جنون عشقك

البارت الخامس عشر

الصار وي رَتل مرض يُعرف
بـ " أضطراب مـا بعد الصدمه "

سببه التعرض لِحدث مُفزّع وأقرب مثال
الـه موت شخص عزيز وغالي
أعراضه تكون على شكل موت بطيء
احلام ، كوابيس ، قلق مستمر ، وفرط التفكير بـ أشياء صارت قبل او تخيلات بأشياء مالها وجود ، هلوسه ، ورؤية اشياء أضافة للخنگه الي تصير بحيث تُكبت على القلب ..

يا تُرى رَتل راح تگدر تتجاوز الموضوع وتتقبل
واقع موت أشتر أم تبقى متمسكه بـ الأوهام ؟؟
________

رَتل :- حسيت بـ آلم ببطني صرخت بخوف

أنفزّع أبوي و أنخبص بيّه شفت القلق والخوف بعيونه رغم آلمي إلا رفضت قُربه منّي
بيومها أدركت بينه حواجز بعمرها مـا راح
تنهدم ونعيش مثل أي أب وبنته ..

باوعلى بنظرات تتوسلني :- بـابـا بَـس خل أشوف شبيچ ، موجوعه محتاجه مستشفى

هزيت رأسي بـ رفض :- ماكو شيء مُجرد تقلصات طبيعيه هسه راح الآلم

- متأكدة ؟

- أي

- زين گومي خل أخذچ لـ دكتورتچ تشوف وضعچ خاف بيّچ شيء

ضجت من أصرارة والآلم العندي يزيد مَدا ينقص عطت بيّ :- أي مو گُلتك مـا بيّه شيء مجرد تقلصات ليش تلح ، سكت ومـا بدر منه أي رد فعل وسكوته قتلني حسسني بتأنيب الضمير
لزم أيدي وبقى يمي :- بـابـا إذا تحتاجين تفضفضين تبچين اني موجود ، اخواتچ ، عمتچ أي واحد
إذا تحبين أخذچ لطبيب نفسي بَـس لا تبقين هيچ وتقلقيني عليّچ

أخذت نفس بقلة صبر :- مـا بيّه شيء

هز رأسه بالقبول وبقى گاعد يمي ويردد بـ آيات غمضت عيني ورجعت رأسي ورا حسيت الوجع سكن
مر يومي بهدوء بالغرفه وأبوي بقى مگابلني وگاعد
يروح شويه ويرجع عليّه رغم مرضه

اجتمعت الذكريات برأسي والتفكير موتني احس الكلام إذا بقى راح يخنكني بس ماكو شي بأيدي ما أكدر أأمن بهاي العائلة واحجيلهم سري الجبير ما أكدر اضمن ردة فعل بابا يجوز هو بنفسه يسلمني للشُرطة

اخر شي صاح على جُوري تبقى يمي وهو طلع لأن شاف ضلته يمي ما الها أي معنى

گعدت جُوري يمي وضلت ساكته لأول مره وهي مو من عوايدها تسكت

- تگدرين ترحين ترا مبيه شي

جُوري :- لا خليني يمج اصلا مالي خلگ اطلع يمهم

- بيج شي

جُوري :- لا انتِ الي بيج شي شتحسين

- لا مبيه صرت احسن

سكتنه شويه وهي سألتني سؤال تقريبا صدمتني ومجنت متوقعه هذا السؤال

جُوري :- احجيلي عن زوجج شويه شلون تعرفتو تحبي يحبج ؟؟

مگدرت ما ابتسم ورخت ملامحي رغم جنت ما احاول اضهر عاطفتي لشخص بس من اجه طاري اشتر بالنص كُلشي يتغير

جُوري :- عزاا شلون تغيرت ملامحج مبين كُلش تحبي

- تعرفين المثل الي يگول الغرگان يتعلگ بگشايه

جُوري :- أي سامعه بي

- أشتر جان الگشايه الي انشلتني من الضياع والدمار الجنت بي صارلي امل وسند وحياة جديده

جُوري :- شگد حلو شلون توصفين وعيونج تلمع

ابتسمت واحس اول مره اكسر الحاجز بيني وبين جُوري
وافكر احجيلها شي يخصني

- جُوري تدرين أشتر مو ميت هو بتركيا وراح يسحبني ورا

جُوري :- يعني انتِ متأكده

- اي هو گلي

جُوري :- زين تشتاقيله

- متتخيلين شگد

جُوري :- ان شاء الله ترجعون تجتمعون

- ان شاء الله املي بالله چبير ومتاكده ميعوفني

جُوري :- ونعمَ بالله
هسه خليني اگوم اجيبلج شي تاكلي حتى تاخذين علاجچ وتصيرين مثل الورد

- ما اشتهي اريد انام

جُوري :- مو بكيفج عيني بعدين مو الج الاكل لابن أُختي انتِ اطلعي منها

ضحكت عليها وهي ضحكت وطلعت برا الغرفه
حبيت اكون هادئة واهتم بصحتي وابتعد عن المشاكل والتوتر بسبب التقلصات الزايده لي دتصيرلي هاي الفتره ..

_____________

" جُوري "

طلعت من الغرفه والدمعه جانت مچلبه بطرف عيني اول مطلعت بجيت عليها حسيتها فاقده عقلها مادري شنو صاير حبها ووصفها لزوجها قهرني كلش ولأن اني بطبيعتي بساع اتأثر ودمعتي رخيصه أثرت بيه هواي

رحت للمطبخ اسويلها اكل شويه ودخلت منة

منة :- ها شدسوين

جُوري :- اكل لرَتل

منة :- خوش والله صرتي خدامه الها

جُوري :- شوفي منة بعد رَتل متتعرضيلها البنيه مصيبتها مصيبه كافي نكون احنه والزمن عليها

منة :- مصيبتيش حُبي !! أجت من المزبلة لقصر وعايشه احسن عيشه ومحد يگُللها على عينج حاجب بعد يا مصيبه گولي حصلت كنز فازت باليانصيب بس مصيبه لاا

جُوري :- لاتحچين بشي متعرفي ولا تشوفين الكل نفسج تهمهم المظاهر والقصور العايشين بيها

منة :- حلو والله گاعده تدافعيلها ولا عبالك اني اختج من سنين وهاي مصارلها كم يوم من دخلت بيتنا

جُوري :- هههه والله شفت اختي من سنين مو اختي ومنتظره بس زلة وحده عليه حتى تطلع حقدها وكُرهها الي دتشوفين

سكتت تماما وبعد مجاوبتني واني أخذت الصينيه لرَتل
جانت متمدده من دخلت عدلت گعدتها اباوع لبطنها شلون چبيرة وحسيت كلش تحمست اشوف ابنها سبحان الله حبيته قبل ليجي للدنيا

خليتلها الاكل على الميز وضليت كاعده يمها لأن بابا نبه عليّ ما اتركها الا لمن اتأكد نامت

وفعلا بعد ما خلصت اكل گامت غسلت ايديها ونامت واني أخذت الصينيه خليتها بالمطبخ ورحت لغرفة ماما وبابا سمعتهم ديتناقشون دكيت الباب ودخلت

- ها بابا جُوري اختج نامت

جُوري :- اي

- شلونه وضعها

جُوري :- كلش زين بس بابا متأكد زوجها ميت

- اي يا بابا متوفي صارله أشهر

جُوري :- بس هي تكول بتركيا ومتاكده

- شهادة الوفاة موجوده والعرفته صحيح ناوي يطلع لتركيا وبالطريق موكفته سيارة وغادرين بي

جُوري :- الله ليوفقهم شرادو منه

- ماما ابوج يكول بينهم مشاكل وعشاير

جُوري :- رَتل مترضى تصدگ ومتاكده حيرجع

- أمي اختج مصدومه وبعدها عايشه بوهم وترا لازم تنعرض على دكتور نفسي لان اذا صحت على نفسها راح تنهدم ومستحيل ترجع لحياتها بعد

- متقبل تروح هاي رأسها يابس

جُوري :- والله حالتها تقهر

- شبيدي عليها لاگي حل ومامسوي الها

جُوري:- تأكد بالله يجوز زوجها مميت صدُك يجوز شارد وگالو مات ؟

-بابا تحقيق وخبصه وشهادة وفاة وگبر كُل هذا جذب ممعقول

-ماما جُوري عوفي الموضوع وديري بالج على نفسج ترا گلبج مو حمل تعب يا أُمي لتفكرين

جُوري :- مقهوره عليها ماما مشفتيها شلون تسولف عنه والتعب تارس عيونها ورجفة صوتها وهي تحجي والله حسيت گلبي حيطگ من القهر  گوه سيطرت ما ابجي كدامها

- شعليج يا أمي مو اگلج گلبج خلي كل واحد بحاله

جُوري :- رَتل اختي واحس نفسي صرت مسؤوله عنها وبالاخص هي ماعدها احد غيرنه وزوجها توفه امها توفت بابا مچان داري عنها ولايعرفها ف هسه اجه دورنا نحتويها نغيرها ونغير طبعها العدائي نسويها رَتل ثانيه ونحاول نشيل الحزن الي بگلبها

- الله كريم أمي ان شاء الله تتغير هواي شغلات

- راح اقدملها على الكلية هاي السنه بلكي تتغير

جُوري :- صدُك يعني هي مكمله دراسه

- اي مخلصه اعداديه معدلها يقبلها قانون وهي عاجبها

جُوري :- مثل منة هسه يصيرن مكافش

ضحكو اثنينهم بعدين اني سلمت عليهم ورحت لغرفتي فتحت تلفوني ولگيته محترك حرك رسائل واتصالات من رقم غريب فتحته وطلع زيد يتوسل بيه ارجعله
داز كلام هواي
لاحظت بنفسي كلما ابتعد عن شخص او هو يبتعد او ينشغل او نتخارب لفترة كلما تصير رجعتي صعبة ومستحيلة وحتى لو صارت و رجعت احس شي كلش چبير بروحي يتغير وياه ومستحيل ارجع مثل اول مرة
وهذا اكثر شي حاولت اغيره بيه وماگدرت.

حاليا داحس بهذا الشعور احس نفسي ماريده بعد روحي طابت منه وجوده بحياتي صار مثل عدمه والدليل صارلي هواي ممهتمه اله

فتحت المسجات وجان آخر شي دازه راح ادز أمي عليكم تخطبج ولأول مره ما اهتم بس ردت احاجي حتى ميدزها وتتفشل

جُوري :- لا تدز امك ولا تدزلي شي بعد كافي اني مليت

ثواني وطلعلي جار الكتابه ضليت بين نارين بين نار انطي بلوك ونار اشوفه شنو راح يحجي والصار انتظرت اشوف شنو اخرة الحديث يلا احضره

كتبلي : جُوريتي اني غلطت وحقج عليه بس لاتسديها بوجهي هاي المره كتلج راح ادز أمي وبلكي ابوج يوافق صدكيني نيتي بيضه وياج

- انتَ بنفسك گُتلي مستحيل يوافق يعني تدري مقوماتك مراح تعجب بابا ف رجاءا خل نسد هذا الموضوع ونبعد عن المشاكل والاحراجات لي حتصير

زيد :- جُوري باجر أمي تجيكم لا تحاولين

- ماريد زيد لتلح صدكني هاي اول مره اختار نفسي وكلش فرحانه

زيد :- ترجعين وشوفي كلمة منو راح تمشي
جُوري انتِ ضعيفه ومهزوزه ومحد يگدر يحتويج ويقويج غيري لاتنكرين

- مع السلامه لتدز شي بعد

سديت التلفون وشمرته وانشغل بالي بالتفكير طول الليل حرت افكر بروحي ومشكلتي لو برَتل ومصيبتها ..

گعدت الصبح على صوت صريخ گمت مفزوعه باوعت للساعه ب ٨ الصبح لبست روب فوك بجامتي وطلعت ركض اشوف شنو صاير انتبهت لغرفة منة مفتوحه والصوت جاي من عدها دخلت وانصدمت بشكل منة شعرها مكصوص بطريقة تضحك جهه طويله وجهه قصيرة وگاعده تبچي وتصيح وماما وخاله ايناس يمها يسكتنها بس هي على فد صيحة

جُوري :- هاي شصايررر شبيها منة شبيجج

حجت ماما والانزعاج باين على وجهها : اختج الخبله گصت شعر منة

جُوري :- عزااا مستحيل

صاحت بيه منة بصوت عالي : شنو مستحيللل شنووو گصت شعري هاي الگ^^^ الساقطه والله الا اشرب من دمها هاي الحقيرة بس خل تصبرلي

ضليت صافنه عليها وخفت من تهديدها خاف صدگ تسويلها شي لأن هاي منة وما ادراك ما منة

حجت خالة ايناس بصوتها الحاني

:- لاتضوجين أمي هسه احجزلج يم احسن صالون ونگُصه گصه مرتبه واسويلج الخصل العاجبتج ماشي

هدأت شويه وهزت براسها

- يلا روحي غسلي وجهج ونزلي نتريك

منة :- ما انزل هيج شوفو شعري

- ميخالف لبسي توربان ونزلي خصل تطلعين تخبلين يلا ماماتي

گومتها گوه وغسلتلها وجهها وعدلت ملابسها ولفتلها توربان

-هسه صرتي جاهزة شوفي شحلاتج

منة :- شعري ماما شعري

- يطول حبيبتي يطول

جانت خاله ايناس تقنعها مثل الطفله بينما ماما جانت كلش مراضيه على تصرف رَتل وساكته گوه عليها

نزلو ماما وخاله ايناس ومنة رادت تنزل وراهن بس اني سحبتها

منة :- هااا

- خل احجي وياج شويه

منة :- اكيد تردين تدافعين عن اختج حبيبة گلبچ

- مو ادافع بس سمعيني للآخر رَتل زوجها توفى وهي مو راضيه تقتنع عايشه بوهم ومنتظره جيته عقلها مو برأسها صدگيني وكل تصرفاتها مو مدروسه اصلا فدوه لا تتهورين وتسويلها شي وتأذيها

منة :- اني شعليه بيهااااا ولج هاي الخبله كصصت شعري واني نايمه لوما افز جان گرعتني ولج والله هاي اصحى مني ومنج وكُل تصرفاتها مخطط الها ف لا تنتظرين من عندي اسكتلها على هاي السالفه

- اني ححجي وياها بس عفيه لاتسوين شي يأذيها او يأذي طفلها

منة :- انجبي انتِ شعلية بطفلها  بس اني اعرف شسويلها

تركتني ونزلت جوا واني بوجهي رحت لغرفة رَتل شفتها نايمه وكمية البراءة الشفتها بوجهها مو طبيعيه 
اليشوفها هسه مستحيل يفكر كل هالمصايب تطلع من عدها تركتها وطلعت رحت غسلت وبدلت ونزلت جوا لگيت إيهاب موجود ومنة كاعده يمه بس وجهها ثكيل ومبين عليها شگد ضايجه

بس شافني بابا گلي : بابا جُوري وين اختج

- نايمه

منة :- نامت عليها طابوگه ان شاء الله هالحقيره

صاح بيها بابا راسا : انتِ شو صايره بدون أخلاق كلش مو عيب عليج تحجين هيج على اختج الچبيره

منة :- لتگول أُختي اني ما أتشرف تكون عندي هيج اخت

-ولججج لسانج لا اكصه الج

منة :- مثلما بنتك گصصت شعري انت حتكص لساني حلو

-شنوو شنوو شصاير

حجت ماما ومبين عليها الانزعاج : بتك گصت شعر منة وهي نايمه شنو رأيك

- صبرك يارب صبرككك

ترك الاكل وصعد فوك واني صعدت ورا بسرعه

- بابا عفيه لتسويلها شي اني احجي وياها

- شسويلها يعني البنيه مو بعقلها اريد أقنعها أخذها دكتور نفسي

-ليش متفتح وياها موضوع الدراسه يجوز نفسيتها تتحسن إذا انشغلت بشي احسن من گعدتها وحدها بالغرفه كل الوقت

- هم فكرت بالموضوع

دخل لغرفتها بهدوء راح كعد يمها على السرير ضل يلعب بشعرها ويلمس خدودها شويه وفتحت عيونها ورددت كلمة أشتر على لسانها

- اهدي بابا هذا أني

رَتل :- اوف شتريد مني

- ليش هيج سويتي بأختج

رَتل :- مسويت شي مجرد رجعت حقي

- ياحق باباتي بشرفج هاي تصرفات وحده عاقله وراح تدخل جامعة بعد كم يوم

سكتت شويه بعدين حجت وكأنها أستوعبت كلامه

رَتل :- شنو راح ادخل جامعه

- ماتردين تكملين دراسه

رَتل :- اريد طبعا أشتر جان واعدني يخليني اكمل

- واني راح اخليج تكملين والتردي يصيرلج بس يا بابا كافي عداوه انسي الماضي وفتحي صفحه جديده كافي تعادينا وتعادين خواتج احنه ولد اليوم صح مانكدر نصحح الماضي بس الحاضر بأيدينا
ترا انتِ صرتي منا وبينا كلنا نحبج وكلنه نريد وجودج بينه

رَتل :- هذا الكلام ميفيد يمي مستحيل يجي يوم انسى شلون امي احتركت كدام عيني والسبب جان انت مستحيل لا تتوقع مني أسامحك ادري كل هاي تصرفاتك بدافع الشفقه مادري تأنيب ضمير بس متأكده مو شي نابع من داخلك
انت الي تركتني واني قطعة دم بداخل أمي وسنين مارف كلبك عليه تريدني اصدك انت متقبلني ومعتبرني بنتك صدك

- ادري لو شما احجي راح تضل فكره مزروعه براسج بس انت ماتدرين اني بشنو احس ولا تعرفين شكد مكانتج وحبج انزرعن بگلبي
غلطت بحقج قبل بس منا وهيج مستحيل اغلط نفس الغلط السابق

رَتل :- اتركني بحالي وبس خلي كلبي يطيب منك وهم كول لبنتك لا تندك بيه بعد لأن ماتعرف شسويلها

- عوفي منة بحالها وانتِ جهزي روحج للدوام اني راح انطي مصرف لعمتج حتى تاخذج تسوگين و انت بابا جوري وياها

جُوري :- ماشي حبيبي

طلع برا الغرفه وسد الباب ورا

- لج شمسويه بمنة

رَتل :- حقيره تستاهل

- شعليج بيها يمعوده ترا تأذيج

رَتل :- ماتگدر خنيثه

- وانتِ جون سينا ماشاءالله

رَتل :- مايوصلي

-ههههه يلا كومي غسلي وخلينه نتريك سوا بالحديقه ترا اني ما اكلت وحتى بعدين نطلع نتسوك بصراحه اني ضايجه وملانه ف خلينه نتونس برا

رَتل :- ما اكول لا اختنكت من البيت

- طفري لعد اني راح اجهز السفره وانت تعالي وراي للحديقه

هزت برأسها واني نزلت جوا نقلت الاكل للحديقه فرشت سفره بالكاع وسويت أجواء حلوه وبالاخص الجو بده يكسر واحنه متعودين كلما نغسل الحديقه تصير بروده بالكاع وتصعد ريحه الزرع والتراب ويصير جو يجنن

جهزت الاكل كله واني داعدل دخل عاصم من الباب الرئيسي بس شاف الاكل صاح : ها شنووو بت أُختي تدري بخالها طاگه الجوع ومحظرتله شلون گعده

- مو الك شنيه اني ورَتل حنتريك هنا

عاصم :- بروح ابوج اگعد وياكم

- شعندك ويانه عاصم وغمزتله

عاصم :- شعندي اريد اشوف واتمعن بخلق الله وهاي الطبيعه الخلابه

- يااا البنيه متزوجه

تقرب عليه وهمس بأذني :قصدج ارمله وخطيه حامل وابنها منو اله خطيه

- عزا مخلي عينك عليها

عاصم :- قصدي شريف الله شاهد ماعندي نية سيئة اتجاها

-وماريا مدري شسمها

عاصم :- شگد قديمه انتِ راحت وي الراحو وهسه اجة وقت الاستقرار

بعدني داجاوبه أجت رَتل گعدت يمي

واجت وراها منة وإيهاب

إيهاب:- هاي شنو الگعده الحلوه اي عمي الدلال بس لست رَتل

منة :- امشينا إيهاب تأخرت

إيهاب:- يلا امشي

طلعو بالسياره وعاصم يباوع وراهم

عاصم :- شعدهم طالعين وحدهم

- منة رايحه للصالون تعدل شعرها وإيهاب راح يوصلها

عاصم :- شبي شتعدل منه شو هاي البت سابت كلش

-مو رَتل كصت شعرها وراحت تعدله

عاصم :- لا بشرفج والله واجه صگارج يا منة بويه موش مره

رَتل :- خل تتعلم ماتندك بيه بعد وانتَ هم راح يوصلك السره صدگو ما اعبرها الكم

عاصم :- شمسويلج اني بالله جاي يمج صوبج

رَتل :- تعرف كلش زين شمسوي

جُوري :- اهووو هسه احنه جايين نتعارك لو نأكل بهدوء بعدين عاصم بعد شويه نريد نطلع للسوك نشتري ملابس للجامعه مضل شي وانتَ تأخذنه

عاصم :- من عيوني جم جُوري عندي

رَتل :- فديتك

كدرت الطف الجو وضلينه نأكل بهدوء عاصم اكل شويه وگام بس طول الكعده مشال عينه عن رَتل بحيث حسيتها تضايقت بسببه بس ضلت ساكته وهي سكوتها كُلش يخوف

رَتل :- هذا خالج خفيف كلش كُليله يبتعد عني لا ادمره والله

- يمعوده هو هيج اريحي مو خفه ولا شي بس هذا طبعه لا تتضايقين منه

رَتل :- ما ارتاحيتله

- عوفي شعليج بي وفدوه خففي الموجه بعد دمرتيها لمنة ومستحيل تسكت وعاصم كذلك

رَتل :- تستاهل وماتخوف جلبي

سكتت عنها لأن الكلام وياهن ضايع يعني سبحان الله نفس الطباع ونفس الخباثه

خلصنه الاكل ولميت كُلشي ورحت ابدل كلت لماما وماعارضت لأن بابا موافق وعاصم ويانه ماردت تجي ويانه عمه لأن ردت نتونس وهي مو مال ونسه وهالسوالف

طلعنه سوا واشترينا كومه شغلات بابا انطاني فلوس هواي وكلي ميزانيه مفتوحه شتريد رَتل اشتريلها وانت هم وصدگ اشتريتلها هواي شغلات للكليه على ذوقها مال حوامل واشتريت لنفسي ومانسيت منة حتى لاتتحسس 

اما عاصم يفتر ويانه ويدردم اني شجابني وياج وشجابني وياج

اخر شي رحت لمحل ضليت اگلب بالبضاعه حدما عجبني فستان وأخذته وگلت لرتل حروح اقيسه ورحت لغرف القياس بس دخلت دا اسد الباب اندفع عليه ودخل شخص وراسا رفع سلاحه بوجهي بعدني داصرخ وهو تقدم عليه بسرعه وخله ايده على حلگي

همس باذني بصوت مرعب :- ولا نفس لا يفرغ المسدس براسج

هزيت رأسي بخوف وخر ايده من حلگي وطلع شي من جيبه وخله ضرف ورقي بأيدي

- وصليها للوالد
وبعدها حسيت بضربه قويه كلش برأسي خلتني ما احس بأي شي حولي بعد...

يتبع ..

_______________

بارت لطيف لعيونكم لتنسوني بالتصويت وتعليقاتكم الحلوه وأريد تتوقعون شنو حيصير 🙈🙈

تابعو حسابي الانستا مو تنسون