رواية "هل كانَ حُلماً...؟
(العِراق_المُصغَر)
بقلمي... نورس _قاسم"
________________
لتنسون التصويت والمتابعه
+كࢪزاياتي علقو ؏ كل فقࢪه بالقصه خلي تصعد...
_______________
:- فتحت موبايلي
لكيت الرسايل والمكالمات محتركه حرك منه
:-جاوبي
اشتعلو اهلج
لج جاوبي يول وينج
احترگو اهلج
اخر شي كاتبلي
:- اليوم احط تيزاب واحرگج مو اشتعلو اهلج
حره... دب الخوف داخلي وگلبي وجعني من قريت مسجاته
رجفت ايدي التفتت على سالي بعصبيه وگتلها... لج انتي حماره؟ شلون تنسين موبايلج شلون!
كالت وهي تحط ايدها ع راسها... ماادري ماادري لا توتريني
تسارع نفسي من الخوف والتوتر باوعتلي گالت بخوف... خلي نهدى حتى لو نسينا شيكدرون يسون يعني المهم احنا طلعنا وخلص
گتلها بقهر... احس غلطنا گلبي من الاول ناغزني
نزلت دمعتها كالت بهمس... واني هم كلبي يوجعني انتي ماتتخيلين من سمعت عثمان جان اله ايد بحرگ البيت شصار بيا
حطت ايدها ع كلبها وگالت... احترگ گلبي هالرجال وثقت بيه وسامحته هواي
حتى عرس ما طلبت منه لان ما أله احد هواي هواي تنازلت حره
واخر شي اكتشف ان هو الي عيشنا ليالي بخوف وحيره
جريت نفس وحطيت ايدي على ايدها گلتلها... واني هم خفت بس مو من رشاش لان متأكده ميأذيني
باوعتلها وگلت... خفت من سبب تصرفه هذا خفت ينزل من عيني
نزلت دمعتي گتله... مقهوره حيل من الي سواه ولسه مدا استوعب شدايصير... حجيتها بهمس ومسحت دموعي
سالي... هسه شنسوي؟
هزيت راسي وگلتلها... خلينا نكمل طريقنا نوصل لبغداد ونحجي لاخواني وهم هناك يتصرفون
جرت نفس كالت... ماشي
طلعت مرايه تعدل شكلها كملت اخذتها اعدل شكلي وانطيتهيا مر وقت واجا اتصال للسايق
وگف گلبي تذكرت من رحت ويا عمران هم اجاه اتصال وطلع رشاش
كمت اتنفس بسرعه وهو جاوب... هلا بابو السباع
بسرعه التفتت لسالي باوعنا لبعض بخوف
سالي لزمت ايدي ترجف
التفتت للسايق استمع بقلق سالي جرتني مدري شحجت مانتبهت عليها كد ما متوتره
اسمع السايق يكوله... اي وليدي عيوني الك تفضل
سالي ضربتني حيل ببطني كتلها... اخ شبيج
سالي... خلي ننزل بسرعه
حره... ولج وين ننزل ما اندل
سالي... اي سياره تاخذنا بس خلي ننزل حيلزمونا
باوعتلها بخوف وبلعت ريك كالت :-لاتتفهين ولج حره عثمان اذا لزمني طالعه من البيت يعدمني امشي
انربط لساني معرفت شاحجي وشفكر السايق يحجي ويا رشاش يكوله :- لا بالله من الفجر
سالي كالتله :- عمو نزلنا
هو التفت وبعد التليفون عن اذنه بس ماسد الخط كال :-ليش بويه طريقكم ما لبغداد
سالي كالتله :- اي رجلي دزلي مسج حينتظرنا هنا ونروح سويه... وباوعتلي
كال :- بويه ماترهم تبقن وحدجن هينا بنص الشارع انطيني رقم زلمتج اخابرو
سالي كالت بنفاذ صبر :-شكرا عمو منريد شي بس نزلنا
هو باوعلنا وباوع للطريق بحيره سالي كالت بتوتر :-عمو شنو السالفه نزلنا ترا ميصير هيج شنو انت تريد تخطفنا والله اشتكي عليك
اني بقيت ساكته واتنفس بقوه خفت احجي ويسمع صوتي حيل خفت بهاللحظه
السايق هنا ارتبك كال :-زين بويه بس اخلص مكالمتي
سالي لبست الجنطه وفتحت الباب هو بسرعه سحب بريك كاللها :-شلون تسوين هيج
ماجاوبته كالت :-يلا حره
فتحت الباب ونزلت باوعلنا كال:-بويه اذا منهزمات ردن لبيوتجن نصيحة ابو لبناتو
جاوبته... شكرا عمو بس حيجي زوج اختي
دانعبر كال :- اوكفن... وانطانا الفلوس كال... دام تغير طريقجن هاجن الباقي
هزيت راسي كتله... شكرا
لزمت ايد سالي وركضنا نعبر الشارع التفتت الرجال يخابر باوعلنا ورجع ركب سيارته
ايدي ترجف
سالي كالت... هسه وين نروح شنسوي
جريت نفس كلتلها... خلي نهدئ
اشرت لكيه وصعدنا بسرعه كال... خويه ترا انه حدي يم الـجسر
كتله... هاهيه خويه
سالي كالت... ولج وين رايحه
حره... ماادري المهم نضيع الطريق وبعدين نصعد بتكسي لبغداد
سالي... اخاف يتيه علينا الطريق ولج
حره... لا نسأل اكيد يدلونا ماكو احد ميندل بغداد
هزت راسها كالت... احس حننعلس وعلي
باوعتلها وكتلها... بفضلج اكيد
سالي... اهو لخاطر الله لتذبيها براسي البيا كافيني
باوعتلها بقهر كتلها... لتهتمين لكلامي
حيل توترت مشت السياره درت وجهي اشوف ابو التكسي جان واكف بمكانه سالي التفتت وياي كالت... خاف يلكونا
حره... مااعتقد منين يلكونا بعد صعدنا كيه
جرت نفس كالت... يارب تعديها على خير
باوعتلي وكالت... شتگولين نرجع؟
باوعتلها بعصبيه... بربج هسسه؟
مو قبل شويه كلتي عثمان يعدمني اذا شافني طالعه بدون اذنه
شتغير هسه!
سالي... اش صوتج فضحتينا
درت وجهي كالت... ماادري توترت ماعرف شسوي حره خايفه
حره... شنسوي شبيدنا يعني مثل ماكتلج يوصلنا للجسر ومناك نسأل وناخذ تكسي
واذا اضطرينا نخابر اخوي يجينا
هزت راسها كالت... اي اي احسن
لزمت ايدي باوعتلي كالت... وشكو ترجفين مو ع الاساس مايضرب شكو خايفه؟
حره... اخاف يحچي حچي اقسى من الضرب لو يضربني اهون عليه
بلعت ريك كالت... يارب هونها
وحطت راسها على كتفي
وصلنا قريب من الجسر توقف كال... هذا حدي
اخذنا الجنط ونزلنا مديت ايدي انطيته الفلوس ولزمت ايد سالي ومشيت باتجاه تكسي
سالي كالت... اوكفي اوكفي
حره... ها شكو؟
سالي... خلي نشوف بلكي اكو صحيات
باوعتلها بحيره كالت... صار عندي مغص من الخوف
حطيت ايدي ع كتفها وكلتلها... لا ابد لتخافين محيصير شي
جريت نفس حاولت اهديها كتلها :-وبعدين الحق ويانا المفروض هم اليعتذرون منا مالهم حق علينا
جريت ايدها وكلتلها... تعاي نشوف بلكي اكو صحيات هنا
مشينا ندور ملكينا اخر شي تجرأت وسألت واحد ودلانا على الصحيات دخلت سالي وغسلت ورتبت روحها ومشينا رجعنا وكفنا يم التكسيات وضليت اسأل وين يوصلنا وشكد ياخذ
اتفقت وياه و باوعت لسالي كلتلها... يلا
فتحت باب السياره صعدت سالي صعدت وراها وسديت الباب مشت السياره باوعت للطريق وكل تفكيري بيه وبتصرفي
اخذت الموبايل فتحته حتى اشوف اذا داز شي بعد
اخر مسج دازه قبل تلث ساعات كاتب بيه
:- هَديتي حَيلي
نزلت دمعتي حسيت بالندم شلون اطلع وما اكوله هالشي حرام وهو اكيد حيزعل
جريت نفس اكيد كلش مقهور مني هواي
من بعد تفكير ادركت اني خطأت
الهروب من المشكله مو حل جان المفروض اواجهه بكلشي واذا معجبني كلامه ارجع لاهلي
بس الصدمه والموقف الي انحطيت بيه جبرني اطلع بدون اذنه
باوعت لسالي خوفها وحركت كلبي على بيتنا والدفتر كلهن اثرن عليه تجي اوقات للانسان ميگدر يفكر بشي حتى من صدمة الموقف هذا الي صار وياي
باوعت لسالي كلتلها... شتكولين اخابر اخوي مقدام
سالي... ليش متندلين؟
حره... هو السايق حيوصلنا
سالي... لعد عوفي لتقلقيه من نوصل لبغداد نخابره
تنهدت وكتلها... ماشي
سحبت نفس وباوعت للطريق ضليت افكر لحد مانتبهت على السايق دخل لمحطة بانزين ووگف ونزل حتى يعبي البانزين
ضلينا منتظرات دقايق وانفتحت الباب الي من جهتي
تفاجئت من رفعت عيني انصدمت بعثمان باوعلي وباوع لسالي بقهر وگال بهدوء :-انزلن
سالي لزمت ايدي وهزت راسها بلا
باوع بعيونها بتركيز وكال :-بسرعه انزلن يلا
حره... عثمان رجائا احنا راجعات لبيت اهلنا عندك شي تكدر تجي وتحاجي اهلنا يلا عيني
دااسد الباب لزمها جر نفس گال :- اذا مانزلتن راح اسوي مشكله
سالي كالتله... مااريد كتلك
حسيت بايد جرت عثمان ووكف بمكانه باوعتله رشاش باوعلي بنظره كزبرت جلدي
جانت عيونه بيها لمعه غريبه
كال بهدوء... الجن دقيقه اذا مانزلتن منها بهدوء وبدون مشاكل تصير فضيحه هينا
حره... رشاش نرجع يم اخونا وهناك عود كولو الي عندكم
التفتت سمعت صوت السايق وهو يكول لرشاش... اصعدو اوصلكم كلكم؟
رشاش... مايحتاج حبيبي... وباوعلي كال... يلا
التفتت على سالي ثنينا نباوع لبعض بحيره سمعت صوت الرجال كال :- بالله عليك اكو مشكله ليش الحريم مانزلو؟
ابتعد رشاش يحجي وياه
عثمان اشرلنا بمعنى انزلو سالي كالت بهمس :-خلي ننزل لا ننسحل ونصير فرجه
هزيت راسي كتلها... ماكو غير حل
لزمت ايدها ونزلنا سويه وكفت يم باب السياره عثمان بصفي اباوع لرشاش مدري شيحجي ويا السايق جان ضايج ومتنرفز طلع محفظته انطاه فلوس والتفتلي
اجه لزمني من ايدي كال... امشي
حره... وين
ماجاوب باوعت لسالي كتله... ابقى ويا سالي مااعوفها
سالي كالت... اي اي متعوفني
التفتت على رشاش خزرني وماحجه جرني كتله... رشاش كتلك اختي اريد ابقى وياها
سكت كتله... ليش ساكت احجي
هم ماكو رد التفتت سالي صعدت بسيارة عثمان طلعنا ووصلنا للسياره فتح الباب ولزمني من كتفي حسيت بوجع كتله... ايدك
مارد كعدت طبك الباب وصعد من الجهه الثانيه باوعت ردت الاحظ اثر لسالي ماشفت
حسيت بندم لان ماخابرت اخوي بس جنت خايفه اقلقه
مشت السياره التفتت لرشاش باوعت ايده ترجف وعيونه بالطريق وخشمه احمر
حجيت بهدوء عكس الخوف الي بداخلي... وين رايحين
مارد نزلت عيوني وحطيت راسي يم الجامه مسحت دموعي وضليت اباوع للطريق
ادري بيه راح يلبسني وميحجي شي مثل اخر مره
وگفنا يم بيت باوعت هاي اول مره يجيبني
فتح الباب نزل ورجع فتحلي الباب جر جنطتي ووگف منتظرني انزل
نزلت سد الباب ومشى فتح الباب مال البيت وطب طبيت وراه واني ارجف سد الباب ومشى طب للهول شمر الجنطه
بنتر گال... ليش؟
حره... بسببك
ابتسم باستهزاء فرك عيونه گال وهو يرفع حواجبه ويجر نفس قوي :- بسببي؟
صح الغلط مني انه الخليت كل ثقتي بيج ونمت مرتاح
هز راسه كال... صح انه استاهل
هالـ لُوعات حتى اوعى واتأكد ان انتي مثل غيرج مايهمج غير نفسج
كتله بصياح وبجي... كول هالشي لنفسك من يوم الي عرفتك كل يوم اعرف عنك جذبه جديده
يوم اسم غير اسمك
يوم متزوج
يوم اهلك ميردوني
كل يوم لازم اكتشف و احل لغز جديد عنك
كافي تعبت مداستوعب شي وهسه طلعت انت الحرگت البيت
انت الي....
قاطعني كال... راح تبقين تعيدين عليا هالكلام لاخر يوم من عمري
جذبت جذبت جذبت اي بس لان عبالي تستاهلين
باوعتله بصدمه كال... انه علموج دست على نفسي وعلى اهلي وعمامي برجلي
وانتي لسه تذكريني بهالسوالف التعبانه حركت بيت؟
هذا الي استفزج وخلاج تعوفيني وتدوسين عليه بالنعال؟
بس كل الي سويتو ماوگف بعينج؟
حره... وهيج عندك سهله؟
من خليتنا حايرين بعد ماحترك الملك الوحيد الي نملكه بهالحياة؟
عبالك سهله يعني من واحد يبقى بلا بيت؟
الحيره وحرگة الگلب والحسره الي عشناها اني وخواتي ذاك اليوم هيج سهله عندك؟؟
اكيد تكون سهله عليك بالنهايه انت ماجربت شعور الذل والفقر بيوم
عشت بين هالناس بوسط البيوت الفخمه بحياتك ماراح تفهم الي حسيته بهذاك اليوم
لانك ماعشت الي عشته انت ماحسيت بـ مرورة الفقر لهالسبب حضرتك مستهين بحرگ البيت؟
والدفتر هم جان هناك والصور وكلشي كل ذكرى حلوه الي ويا حياة احترگت
لزمني من اكتافي كال... البيت الي احترك عوضتج بمكانه ببيوت
واسمي الي تغير رفع اسمج
زواجي واهلي الي تكولين يكرهوج جانت اكبر اثبات لحبي الج
ابتعد عني كال... صح انه حركت البيت بس تعرفين ليش؟
حاولتي تفهمين مني السبب يمكن اكون على صواب ؟
فرك عيونه كال :-اخوج جان متورط ويا ارهاب وتجار مخدرات وملاهي وهذول جانو يدورون عليه
ولما عرفو هو انهزم وماراح يسدد الدين جانو يدورون عليه بيتو ليش؟
لان يدرون عندو خوات... غمض عيونه بقهر گال... نحن من زمان جنا ندري ان وجودكم بهالبيت خطر عليجن
وعثمان كثير نصحو لـ مقدام بصفتو مصطفى وكالو بيع هالبيت واشتري غيرو
بس اخوج رفض لان ماجان عندو فلوس وحتى لما عرض عليه مساعده اخوج رفض
جر نفس كال... وبيوم الي وصلتني هالاخبار حاولت اشوش مكانكم تا محد يعرفو
جر نفس كال... كل معلومات اخوج يمهم
اني باوعتله بصدمه مااعرف شاحجي باوع بعيوني وگال... بيومها مالگيت طريقه غير اني احرك البيت تا تنجبرون تبتعدون
وبعدها قنعنا اخوج انو مايرجع لذاك المكان
هسه عرفتي ليش حركت البيت!
سكتت اباوعله بصدمه تقرب عليه وعيونه بعيوني كال... خفت عليج.. خفت احد يأذيج
حره... بس انت كلت هم انلزمو
گال... هم لا واحد ولا ثنين هم عصابات
حطيت ايدي على گلبي كال... كل الي سويتو من يوم الطاحت عيني بعينج سويتو بسبب تفكيري بيج وبمصلحتج
هز راسه كال... غلطت بحقج واعتذرت جبتج لبيتي وسويتج ست البيت
محد يگدر يحجي وياج حجايه
سكت شويه جر نفس وكال بعصبيه:-رحت اتوسل بعمي مثل الجلب اقنعو تا ياخذ المشيه لاخوج
باوع بعيوني كال :- ابد ماتوقعت اگعد الصبح مالگاج يمي
حره... بس اني مجنت ادري عبالي سويت هيج حتى تذلنا
ابتسم بقهر گال... هيج فكرتي؟
هزيت راسي بـ اي باوعلي بصدمه كال :-يعني بعد كل الي عشناه لسه تفكرين بيا بسوء؟
هزيت راسي بـ لا هز راسه گال :-لسه ماعندج ثقه بيا حره؟
حره... مو هيج بس انت قبل جذبت عليا ماادري شصار بيا من سمعت حركت البيت
انصدمت مثل اول مره واكثر ماخطر على بالي
قبل لااكمل تقرب مني وباوعلي بنظرة رجفة كلبي كال بهدوء
:-وانتِ ماتذكرين غير اخطائي؟
حُبي ولهفتي وشوگي كِلها مادحكتيها؟
حاربت الكِل نفسي وهلي وعمامي وانتِ ولا يمچ
مرايه بوجه اعمى!
حره... مو هيج بس
رفع ايده گال... خلص لا تبررين كِلشي توضح
كال وهو يباوع بعيوني :-واضح انه جنت اتعب نفسي وبس كِل محاولاتي باني ابني حياتي وياج فاشله
هز راسه گال... هالمره ماراح اجبرج على شي دام تردين ترجعين لاخوج الج الحق
نزلت دمعتي ماعرفت شاحجي نربط لساني كتله... اني...
قاطعني گال... ماراح اغلط مثل اخر مره
فعلا الحب مايجي بالاجبار وانتِ ماگدرتي تحبيني
همست... لتحجي هيج اني
رفع ايده حطها ع شفتي يسكتني جر نفس كال :- الحجي مايفيد بعد انتهى
دنگ اخذ الجنطه وگال... مالو داعي ترحين ويا غريب لبيت اخوج انه هين.. ومشى طلع للباب
رحت وراه صعدت بالسياره حرك السياره اباوع لايده ع الستيرن ترجف نزلت راسي ندم على زعل على حيره التفتت ركزت بملامحه وهو يسوق ولاكأن اني يمه
حسيت بيه شگد مقهور من تصرفي جريت نفس ودرت وجهي ع الجامه
مر الوقت وكل تفكيري بيه غمضت عيوني وگلت جنت اني على حق ليش احس صرت غلط ظلمته هواي طبينا لبغداد وهنا توقفت السياره باوعتله گتله... شصار؟
باوع بعيوني وماجاوب ضل يباوعلي دقايق فزينا على صوت رن الموبايل جاوب گله... انه بـ****** وسد الخط ودار وجهه يباوع من الجامه
واني مركزه بملامحه گتله... هذا البيت الي اخذتني اله المن؟
باوعلي وكال :-جان المفروض النا
ابتسمت بحزن گتله :- وهسه؟
نزل راسه مجاوبني اتصل تليفونه جاوب استمع ودار وجهه كاله :-اي دحكت
وفتح الباب كال... نزلي
حره... ليش؟
مجاوب ضجت منه احسه يتجاهلني اخذت جنطتي ونزلت راح يم سياره ثانيه
باوعت هاي سيارة عثمان جريت نفس وباوعتله
كال... ردتي تروحين يم اختج
هزيت راسي كال... روحي
سمعت سالي كالت... يلا تعاي
اشرتلها وباوعتله كتله... في امان الله
هز راسه وكال... الله وياج
مشيت صعدت بسيارة
عثمان باوعت لـ سالي هم مثلي بملامح حزينه
باوعتله واكف مشينا واني اباوعله من المرايه ضل واكف حاط ايديه بجيوبه لحد ما ابتعدنا واختفى عن عيني
مر الوقت وماحجينا اي شي بالسياره وصلنا لباب بيتنا باوعت للباب ابتسمت لان جنت مشتاقتلهم نزلت بسرعه فتحت الباب وطبيت صارت كبالي مروه كاعده بالحديقه تلعب ويا العابها
اول ماشافتني اجت تركض عليه وتصيح... هلا وهلا
ضحكت وحضنتها بقوه على صوتها طلعت رتيل كالت... ياهلا اليوم الشمس منين طالعه
رحتلها اركض حضنتها وبجيت كالت :-اسم الله شبيج ليش تبجين توته منو جابج
شافتني ابجي واشهك كالت :- فوتي
حره... سالي و عثمان برا
جمدت ملامحها كالت... صاير شي؟
هزيت راسي بـ اي جرت حجابها وكالت... مروه روحي كعدي امي ووكفت بالباب
طبت سالي و عثمان طلعت ماما سلمت عليها وطبيت للغرفه واسمع ماما ترحب بعثمان
بدلت وكعدت من القهر مابيا اتحرك شويه وطبت سالي شمرت الصايه كتلها... راح
هزت راسها بـ اي كتلها... رشاش بعد ميريدني تعب مني
جرت نفس كالت... واني و عثمان تمالخنا
حره... هم ضربج
حكت ركبتها كتلها... احجي
سالي... بس راجدي
حره... واكسري ايده شبيج
جرت نفس كالت... تعاركت وياه حاول يراضيني بس مقبلت ابقى
هزيت راسي كالت... هو ندم واعتذر بس احس اريد ارتاح فتره
تعبت
نزلت راسي كالت... ورشاش ؟
هزيت راسي بـ لا كتلها... رشاش ميضرب
سالي... هم زين
حره... بس كلامه وياي جان كلش قاسي
سالي كلش اختنكت
فتحت الباب رتيل ووراها طبت ماما كعدن كالت رتيل... ممكن وحده منجن تفهمني شصاير؟
حره... سالي تسولف الجن.. ومددت انام
وكعدت سالي تسولفلهن
ماما شهكت كالت... يعني هم الحركو البيت!
سالي هزت راسها بـ اي انتبهت لرتيل قلقت بس ما تفاجئت ولا حجت شي گتلها... رتيل
فزت كالت... ها
حره... تعرفين بالموضوع
صفنت عليه وهزت راسها بـ لا كالت :- ليش؟
حره :-ماحسيتج متفاجئه
سكتت جريت نفس گتلهن :-احس غلطت حيل ويا رشاش
رتيل كالت... انتو اثنينكم صح بس طلعتجن بدون متكولن لاحد غلط كلش جبير
متاكده حتى مقدام مراح يقبل
سالي... بس خفنا حيل
ماما كالت... اي جان اتصلتن يا ماما ع الاقل اتصلن بـ مقدام لون تطلعن وحدجن بمدينه غريبه هو انتن بغداد ماتندلن بيها انوب الانبار؟
حره... كافي تلومنا... وبجيت
تقربت رتيل حضنتني كالت... خلص اعتبرنها فترة راحه الجن ولتزعلن عادي
ماكو ازواج ماتصير بينهم مشاكل
كتلها واني ابجي... لا هو ميريدني بعد
رتيل... ليش هيج تحجين
حره... من كلامه وياي
رتيل... سوا المستحيل علمودج وهسه تكولين هو ميريدج شبيج توته ترا ابو السباع ميت بيج
باوعتلها كالت... الواحد وقت مايزعل ويعصب يقسى بالكلام بس هذا الشي ميعني هو قاصد كلامه
مسحت دموعي كالت... يلا روحي غسلي
هزيت راسي وگمت غسلت وجهي ورجعت حطيت مخده ونمت فزيت بـ الليل على صوت اخوي مقدام بالهول كمت بسرعه طلعت شافني ضحك ركضت حضنته
وهو يضحك باسني براسي كال... شلونها بنيتي الحلوه
هزيت راسي گتله... بخير مشتاقتلك
مقدام... واني هم يابعد روحي
حره... ليش مكعدتني اول مااجيت
مقدام... ذبيتي روحج ماردت اخرب عليج نومتج
كالت رتيل... يلا حااصب عشه لعد دام كعدتن
هزيت راسي باي وكمت اغسل تعشينا وكملنا وكل شوي افتح موبايلي وافكر بلكي اشتاقلي
بلكي يدزلي مسج ونتصالح
وضعي هيج ابد ما مرتاحه احس مخنوكه
لليل بـ ١ سالي تباوع لروحها بالمرايه الصغيره وتبتسم وترجع تسرح
كتلها :- اليوم حابه نفسج
كالت وهي تباوع للمرايه... هاي جابليها عثمان
جرت نفس وگالت... راح اشتاقله هواي
ابتسمت گتلها... لهالدرجه تحبيه
سالي... وليش مااحبه حره هو هواي سندني وعاملني احسن معامله مااكلج هو ماغلط لا غلط بس من حبه الي وخوفه عليه
ابتسمت كتلها... لعد شعندج هنا ليش مابقيتي يمه
سالي... لان ضربني واني عصبت
جرت نفس كالت... حتى مايتجرأ ويعيدها مره ثانيه
ابتسمت كتلها... الله يهدي النفوس
سالي... امين
... لزمت موبايلي بلكي دازلي مسج وهم ماكو جريت نفس بقهر بهالاثناء طبت رتيل للغرفه گالت بهمس... سالي وحره تعالن مقدام يريدجن
كمنا رحنا وكعدنا يمه بالاستقبال داير مداير الصوبه كال... رتيل سولفتلي ع الي صار
شوفن انتن غلطتن من طلعتن وحدجن
الانبار اول شي بيها اماكن خطره هاي نقطه
ثاني شي انتن غريبات بهالمدينه ماصارلجن اشهر بيها تطلعن وحدجن وتريدن تجن لبغداد هالتصرف كلش غلط
سالي كالتله... حره ماقبلت اني الي اصريت الغلط مني
مقدام... كلنا نغلط المهم هالتصرف مايتكرر علمودجن انتن
هالدنيا بيها اشكال الناس المو زينه لازم الواحد ياخذ حذره مو صحيح؟
حره... اي صح
مقدام... وبالنسبه لموضوع لبيت فـ... جر نفس وباوع لرتيل كال... اني جنت ادري هم الحركو
باوعتله باستغراب كتله... شلون !!!
مقدام... عثمان حجالي كلشي قبل فتره
مااكلجن اني ماضجت طبعا ضجت بس من شرحلي اكثر عن الوضع والجان دايصير بذيج الفتره عذرتهم لان ادري بنيتهم سليمه
جريت نفس كتله... واحنا انصدمنا عبالنا سووا هيج لسبب ثاني
مقدام... انتن تدرن اني جنت رافضهم من الاول بس الحق يقال هالاثنين رغم مساوئهم بيهم صفه ممكن ماتلكوها عند غيرهم
ابتسم كال... ازواججن يحبوجن كلش فـ اخذن وقتجن وفكرن زين وارتاحن فتره بس لتخسرنهم
ابتسم كال... تفكيرهم وخوفهم عليجن واني بعيد هذا الشي ياكد هم خوش زلم
صح هم غلطو بحقي وحقجن بس كلنا النا اخطاء والاخطاء ممكن تنمحي بالزينات
سكتت استمع كال... هذا البيت بيتجن واني اخوجن وباقيلجن سند الي ما مرتاحه ويا رجلها او الي عندها مشكله وماتحس الها حل تكولي اني ماريد اظلمجن
اذا تعاملو وياجن بطريقه سيئه كولن ابد لتسكتن
ابتسمت كتله... لا بلعكس رشاش كلش محترم وياي وساعدني حتى بدراستي هو يدرسني
ابتسم سالي جرت نفس كالتله... واني هم عثمان زين وياي
مقدام... الحمد لله
حره... بس هسه هو زعل لان طلعت وحدي
مقدام... لاتخافين يهدئ ويرجع
حره... ان شاء الله
مقدام... وانتن ابقن هنا ارتاحن دامها فترة عطله وهم راح نسوي عقد قران ريري وحدوري
ضحكت وحضنت رتيل كتلها... زين هم نغير جو
رتيل... اتفقنا نسوي بكربلاء
هزيت راسي كتلها... حيل مشتاقه للزياره
ضلينا نسولف الى ان تاخرنا ونمنا لثاني يوم فزيت بسرعه ع الموبايل اشوفه اذا داز مسج وانصدمت كلشي مدازلي
اختنكت شسوي احاجيه اني؟
زين شاكوله وهو زعلان
اختنكت مر هاليوم عادي واني انتظر منه اتصال وهو ماكو لليل كلت خلي اتصل هسه شحينقص مني اتصلت تلث مرات مجاوب انقهرت حيل منه سويتله بلوك وحذفت رقمه
هسه على شنو هالكبرياء هو غلط واني غلطت اوف
الايام تمر و حددو موعد عقد رتيل وحيدر جنت فرحانه الهم بس بنفس الوقت اكو غصه بداخلي
اشتياق جبير لرشاش احس اكو نقص بكلشي
رحنا للسوك نشتري ملابس وبكلشي اتذكره
هذا عطره
هايه مثل فانيلته
هايه الساعه تشبه ساعته
گمت بكلشي اشوفه
اشتريت ورجعت بالسياره اباوع للطريق بس كلشي ما اتذكر منه كل الي ببالي ملامح رشاش ابتسمت تذكرت من يكولي
:-حاربت الكِل نفسي وهلي وعمامي وانتِ ولا يمچ مرايه بوجه اعمى"
كلامه هذا كلش قهرني وحز بخاطري حسيته جان يعاتبني ع الي سويته لثاني يوم يوم العقد اخذت الموبايل فتحت الحضر ودزيتله بمسج
... اليوم عقد رتيل حاروح
جاوب بعد ٤٠ دقيقه... وليش جاي تكليلي؟
حره... غير زوجي ميصير اطلع بدون متدري
دز ورا ربع ساعه... جيد هسه يلا عرفتي الاحكام
روحي براحتج
استفزني اتصلت عليه رفض دزلي مسج... مشغول عيوني
حره... ويامن مشغوله
دز... مايخصج
هو حجه هيج لو تخبلت ضليت اتصل وهو يرفض دزيتله... بشنو مشغول احجي
كلبي وجعني فكرت يمكن هو يم وحده غيري او افتكار استغلت غيابي الشيطان تربع براسي ليش هيج هملني فجأه وهو جان يرف گلبه عليه لما يلمحني ضليت اتصل وهو ماكو
دزيتله... والله بعد ما احاجيك
كرهتك
انت ليش هيج هاملني
ليش تتاخر يلا تجاوب
شو دحجيي
ماكو ماجاوب كتله... بسيطه تهنى وياها وشوف ماابقى وياك
راح اطلكك
دزلي فيديو هيليكوبتر واصوات جنود وهوا
دنيا ليل ماواضح كلش
دز :-ملتحق ملتحق وحگ الله ملتحق لا تلحين بوووويه ارحميني طرشتيني
دزيتله... اي كول هيج من البدايه
شافها ومجاوب دزيتله... منو يمك
صورلي فيديو مبين نص وجهه وبصفه كتف واحد وكاتب... مايخصج
ضحكت گتله... تمام مجاوبني
ضجت من تاخيره حضرته ونمت
لثاني يوم عقد رتيل لبست صايه وحجاب وحطيت مكياج ورحنا احنا وخالاتي واهل حيدر هم اقاربهم هوايه جايين باكثر من سياره
وصلنا كربلاء وطبينا زرنا وعقدو وكمنا ناخذ صور كـ ذكرى
صورت اكثر من صوره ورحنا لمطعم جان بيه شبكة مفتوحه اي واحد يكدر يكنك
كنكت شفته ناشر الحاله ع الواتساب مطاعم وسياره وجماعه يركصون الجوبي
تنرفزت هذا شو عايش عادي من دوني شفته مدازلي مسج ولابسني ضجت حيل رحت ادور بالاستوديو صوره حلوه ونشرت الصوره ع الواتساب ورجعت اكل بالمطعم
شويه واجه شعار مال مسج باوعت ابو السباع غلست وضليت اكل اتصل سويته صامت وضليت اكل واضحك واسولف ويا ام حيدر لحد ما كمت اغسل
اخذت موبايلي وفتحته وجان اشوف الاتصالات تركع
ودازلي مسج... حذفي الصوره
ووراها بدقيقتين داز... لايشوفها احد بنت الگو**د احذفيها
ومتصل واني دااقرا اتصل جاوبت كتله بهدوء... الو نعم
كال :- ووجع خوش
حره... عفوا منو حضرتك
گال... انه رجلج الي طلع طيـ***و من سوالفج
اني طكيتها ضحكه كال بصياح :-الصوره يول
حره...اووي فززتني شبيك
گال...وجعوي هاي بنص المطعم هيج تضحكين
حره... اي
كال... والله؟
حره... لا لا اشاقه بالحمامات اني
كال... الصوره حره احذفيها
رحت حذفتها كال... منو شافها
حره... ماادري ماشفت
كال... اخ عليتي گلبي يابويه لو الزمج شسوي بيج
حره... عادي انت مو ناشر ستوريات
كال... ها هنا مربط الثور
ضحكت اجه واحد يحجي يمه سده بدون ميودعني
ضجت منه
رجعنا للبيت خابرت طيبه گالت
... زعلانه منج يول لاتحاجيني
حره... ليش
طيبه... عجل هايه سوايه سوايتج؟
حره... كللكم؟
طيبه... بس الي
جريت نفس كتلها... وشكال لاهلج
طيبه... كللهم كعدت الصبح مشتاقه لاخوانها ووديتها الهم
حره... الحمد لله ماعرفو
ضلت ترزلني اخر شي سألتها كتلها... و رشاش وين ماوين
طيبه... ملتحق
حره... وهاي الحربايه خوما سوت شي
طيبه... الفرحه مبينه بعيونها من يوم الرحتي
حره... ماتدوم هالفرحه الا ارجع اكعد على گلبها
ضحكت كالت... ان شاء الله
حجينا شويه وسديته مرت تلث ايام وتحدد موعد زواج رتيل رغم هي مجانت تريد الزواج هسه
بس حيدر جان مستعجل وبسبب اصراره لان عنده سفر فيريد يلحك يتزوج وافقت رتيل
ورشاش ايام تمر ميخابرني بس يخابر ماما او اخوتي الي ميحاجيني هالشي دخلني بحاله من الحزن والقهر شكد ماادزله واتحجج لو يطنشني لو يكول كلمه وحده
حيل كرهت اسلوبه هذا وياي عثمان ضل يجي ويراضي بسالي الى ان تصالحو
بس رشاش ابد مااجه جان يعتبرني اني الغلطانه لحد يوم حنة رتيل هو مايخابرني مقدام كال... عزمته وكاله راح اجي
جنا حاجزين قاعه قريبه كلش من بيتنا طلعنا من الصالون ومتامله بلكي اشوفه
سألت مقدام... اجه؟
مقدام... لا اعتذرلي كال ميكدر يجي
ضجت حيل بس سكتت وصلنا للقاعه وبدت الحنه
اني لابسه فستان تركوازي بينصل جوا الركب
مخصر وفوكاه ستره كوباي سوده ووياه بوت وشعري مسرحته وقصير
رحت دااحضر البدله الثانيه لرتيل شفت اكو بدله ناقصه
ركضت لسالي كتلها... البدله المارونيه ماهي
سالي... جبتيها انتي؟
حره... لا غير معتمده عليج... امداج وغميتها... جريت الصايه والحجاب
سالي... ها وين
حره... وين يعني اركض اجيب البدله
سالي... لا تتاخرين
حره... هنا دقايق
خابرت مقدام كتله كال... جاي بالسياره
اجه اخذني وصلني للبيت طبيت مستعجله طلعت الجنطه حطيت فستان الي والبدله دا اطلع شفت وجهي بالمرايه الكحل سايل
ركضت جبت كلينكس وباودر واعدل اخذت الجنطه ودا اطلع دك موبايلي واني دا امشي شفت الاسم...رشاش ابتسمت
جاوبت واني داامشي انطخيت بجسم رفعت عيوني باوعت شفته رشاش ضحكت بفرح كتله... انت اجييت
كال... لا مااجيت انه بالانبار
ضحكت وحضنته جرني من خصري عليه حضني وحط راسه برگبتي وگال :-شگد مشتاقلچ
حط ايده ع راسي ضحكت گتله... وينك عني
گال... بگلبج انه يـ واهس ضحكتي
... يتبع ...
_____________________
اسفه ؏ التأخير بس هالايام ضاربتني الكآبه مدري بسبب الجو مدري بسبب اطفالي 🤧
حتى الانستا مدااتفاعل بيه ولادااجاوب ؏ الاسكات
بلكي باجر بليل اتفرغ واگعد اجاوبكم كلكم
الاسىئله القديمه والجديده
اما بخصوص الي دازاتلي ع الانستا ان البارت السابق قصير حيل فـ حبيبتي تعالي هينا ؏ كولت عمو رشاش
مااسويلج شي لتخافين🪚🔪
تصبحون ؏ ماتتمنون ♡