هبه/
بعدني بصدمتي ممستوعبه ابد شنو هل جرأه
نعم شتفضلت يامره عيوني غلطان عرفه ولفه اني وياك.
هيه مره جيتكم قبل سنتين.
وآخر مره قبل اشهر تشاوفنه.
بعد شوكت شفتك وتزوجتك ها..
رائد /
احم
بالمحكمه تزوجنه شبيج نسيتي.
موجيتي وقعتي واني اخذت الاوراق للقاضي ختمها لان جنتي مكسره وها كلتي بكامل قوايه العقليه.
هبه/
بديت فعلا اتعصب لان ديحجي كلام جدي وديثبت انه رحت للمحكمه فعلا واني مكسره.
اكلك رائد اسمك مو حسب ما اذكر.
رائد /
يولي والله وكت الحرمه ماتعرف اسم زلمتها.
هبه/
صوتي عله
كافي كافي دروح الله يخليك شلطشت هم حظي هذا هو اليوم يله جريت نفس مين طلعتلي شلون بلوه هاي.
الظاهر هنا الحارس سمع حسنه.
_ اخي شعندك هنا وليش دتزعج الطالبه.
رائد/
يا اخت ابني هذه زوجتي.
_ زوجتك وتعيط بنص الشارع
هوياتكم رجاءا.
رائد/
ههههه بس بس هويه ادلل
تفضل هذه الهويه مالتي وهاي مال زوجتي.
هبه/
هنا تخبلت نجنيت ولكم هاي هويتي صدك شكاعد يصير شنو منو شديصير اني هسه صدك زوجته ولكم اسمه يادوب تذكرته.
الحارس/
اختي روحي ويه زوجج ليش واكفه اباب المدرسه لعد يله اخويه توكلوا.
رائد /
اسفين يابه يله مرتي يله.
هههههههه .
هبه/
ماشوف اله سحلني من ايدي ورى.
يمشي ويجر بيه.
وصل للسياره وعطت.
دعوفني يمعود شبيك صدكت كذبتك انت.
رائد /
وروح ابويه ممكذب انتي مرتي امشي اوديج لبيت امج وان شاء الله خير.
هبه/
كولوا صعدت كوه واغلي بودي اطير للبيت وهو مطنش ومرتاح.
رائد/
اي هباوي شبيج ساكته.
بله ليش مطلعه شعرج محتجه على شنو وذبيتي شالج اني حاليافرحان بيج وماريد اعكر مزاجي.
هبه/
كل كلامه مكاعد يطب براسي صراحتا هناك وتذكرت فرح.
اكلك انت مو متزوج ها وفرح حامل شعندك يمي وشجابك عليه.
رائد/
اول شي تعلمي يمره لاتعلين صوتج بوجودي وثانيا حرمه متاكل حرمه انتي بدارج وهيه بدارها.
هبه/
يحاجيني باستفزاز وبرود
لا اني اكل مره سمعت اكلها وعلى اي اساس اقبل بيك ومصدك اني مرتك.
سمعت من حلكي كلمة موافقه ها سمعتها.
مالي علاقه إذا مطمطمين السالفه انت وامي.
رائد/
عجل يابه سمعيني انتي ولتخليني اطرج نصين هين انتي مرتي قانونا عجبج اهلا وسهلا معجبج على كولتهم تحجين وتسكتين .
وسمعي داكلج مدامج كملتي دراستج زفتج بعد شهر سمعتي الج شهر تحظرين نفسج بي.
هبه/
وصلني وصلني بسرعه للبيت راسي حيطك
زفتي لا صدك متريد باجر انزف الك.
رائد/
وعلي تفضلين علي صارلي سنه كوه مصبريني ههههه شحلاتج من مطيعه.
.
.
وصلت للبيت شو هذا طفه ونزل
انداريت عليه وهزيت راسي بمعنى شكو.
رائد /
شبيج مبحلقه عيونج من عابت عيونج الحلوات
يولي كلهم يعرفوني هين بس انتي.
مرادوا تعرفين وهسه شكو بعد.
هبه/
نار نار صايره
طبيت بهجوم للبيت شنو طلعوا مزوجيني بدون علمي واني الغشيمه شلون شلون اتقبله لا اعرفه ولا
احبه وجماله مزوج ومنو فرح الي امها عمتي ولا حيجي طفل.
زين شجابرني اني شنو الي يخليني اخذ هيجي مواصفات.
وين نجاحي شهادتي كليتي أحلامي شنو اكعد اكابله واكابل فرح شنو اليصبرني ربي رحمتك شمسويه اني
سجود/
ها يمه جيت........
هبه /
جيت جيت جابني نسيبج عيوني.
سجود/
ها
اااااا شدتحجين منو جابج.
هبه/
بعياط سمعت امة محمد
نسيبج عيوني نسيبج
شنو نسيتي شلون شلون نطاج قلبج تعقديلي على رجل فرح.
لاومزوج حيجي طفل........شكلتي شكلتي الروحج شنو اني لعبه بيدكم.
والله احركها الروحي وما قبل بي سمعتي وخلي يسمع هو هم.
سجود/
ها يعني اجاج وكلج اخ اخ شكد عنوديه كتلج لذبين حجابج استلمي هسه.
هبه/
شو من كل عقلج تحجين وخايفه منه وحاسبتله حساب.
سجود/
غير رجلج طبعا احسبله حساب
هبه/
كتلج لو يبقى بس هو رجال ما اريده سمع.......
رائد/
احم احم.......يا الله.
ام نور/
هله هله ابني نورت تفضل
هاي انت بره ومندري.
توجه الكلام لهبه
يايمه غير تكليله ادخل يابنتي.
هبه/
ما شاء الله الكل تعرفه ومسير عليكم وميانه بعد زين وين جنت اني ها.
رائد/
اولا _السلام عليكم جميعا
ثانيا _ قبل شويه كلتلها لهبه بالسياره بعد شهر اخذها بزفه منا.
هسه بعد الكلام السمعتو تغير الكلام عجل هبه خانم معاجبها اني.
خلص استنادا على كلامها
اخذها هذا الخميس......يله اودعناكم.
هبه/
بعياط وانهيار لو تموت لو تموت ماريدك وطلكني غصبا ما عليك
سجود تسد بحلكها لان تعرف نتائج كلامها مو بصالحها ولو اطخ براسه يسحلها هسه.
رائد/
ام يزن عكليها لبنتج وعلميها لتزت الكلام بوجه زلمتها خلي تنجعم والكبار من يحجون الصغار مالهم كلام تمام.
هبه/
قلبي يدك سريع وعيوني جاحظه عليه شكاعد يحجي ياربي شوكت يخلص الحلم.
____________
.
.
سجود/
اوكف عيني رائد شبيك تهف طالع.
رائد/
كولي ام يزن تفضلي وان شاء الله جان كلامي جوه واضح.
سجود/
اكيد ابني حجيت جوه دتهددها لهبه وتخوفها مو.
رائد/
ابد حرمتي ورايدها
وشدد بكلامه
اريد اتمم زواجي منها .
سجود/
بتعجب شنو شتمم متفقنه هيجي كلت تبقى يمج لحين متكمل دراسه الكليه.
رائد/
لا ماقبل
ماعندي حرمه تفتر بالكليات عجل شبيه انه حقصر عليها .
علام كافيه لهين وبصراحه مالج سيطره عليها شجابرني رايح جاي خليها بحجرتها يمي وخلص.
سجود/
بس كلت ماتمم زواجي اله توافق هيه.
رائد/
هه
وشنو اذا موافقت حطلك مثلا لو اخليها واتفرج عليها.
خلي تسمعني هيه مجبره تتقبلني سمعتوا
وهذا اخر كلام عندي.
اودعناكم سلميلي على ابو يزن وكليله عفتله هايه المناقصه الو.
_________________
.
.
بعد دخول سجود ودايخه بكلام رائد ومجان هذا الاتفاق الكلام كله تغير .
تلكتها هبه من الباب
هبه/
ها كولي كلامه كذب كولي شقى
هيجي بعتيني لخاطر رجلج مو كولي ليش ولج ليش انتي ام تقبلين تسوين ابناتج هيجي.
سجود/
كافي كافي
شنو نطيتج لواحد فكور شو مال والنخل حمال واذا مزوج هاي اني امج مو عايشه ويه ضرتي ابيت واحد اكلتها اكلتني
ارضي بقسمتج وخلص شبي شاب تتمنى كل بنيه وان شاء الله حاسبه فرح على النسوان ههههههه
غمتها وكلتلها
عمت عينج اذا تنافسج اصلا باجر اخذج للصالون شوفي شطلعج.
اذا مخليته يمشي طلي وراج ما اتسمى سجوووووود.
هبه/
الصدمه شلت لساني معقوله هذه أم.
__________________
هبه /
عفتها ودخلت الغرفتي وكعدت دكيت ولطمت على حظي شنو مسويتني مثل خروف الاضحيه علفته
لحد مكبرو ويذبحوا.
اي والله ذبحتني بعملتها بس مستحيل اخضعلهم اني .
كمت اسمع صوتها تحجي علني بالموضوع.
سجود/
ابو يزن عيوني باجر اخذ هباوي للسوك اجهزها لان مظل وكت.
أبو يزن/
اي صدك نسيت اكلج مر عليه اليوم للمحل تركلها مليونين كال خلي تاخذ الأساسيات
ماعرف والله.
سجود/
ههههههه
مو كتلها هذا مو فكور الثوله مكابله الغرفه وكاعده من الصبح لي هسه.
ابو يزن/
ترى ميصير سجود كتلج امشي بموافقتها بنتج مو صغيره.
كتيلي بنتي واني ادره
احس الله راح يعابينه بزرتنه اريد افتح موضوعها ويا بلكت اعوفله اخر مناقصات ويعوف البنيه شذنبها وكعت بيها هيه.
سجود/
ميخالف ميخالف يارجال تتعود يمعود ولتنسى الاتفاق تكظي وداعتك.
______________
.
.
هبه/
لايمكن انفهلهم شلون بعد تلث ايام يردوني انام بفراشه.
قررت واليوم باليل انفذ وهذا هو همه جبروني.
_______________
الساعه التاسعه مساءا
الكل مجموع بالحديقه طلعت من غرفتي امشي وماخذه حذري.
فتحت ملحق الكاونتر اخذته ورجعت لغرفتي قفلت الباب.
اجهز نفسي لمنتصف الليل.
.
.
.
.
تمنيت اعيش بجدرانك الخاويه ولاعشت باحظان الطعنوني.
.
.
.
هبه/
قافله باب الغرفه وكاعده انتظرهم ينامون النهار كله احس راسي حينفجر.
ياناس شخص ماعرفه شلون شلون اصيرله مره مستحيل اقبل.
دكت الساعه بالثنتين بعد منتصف الليل.
كمت لبست تراكسود صيفي ولبست عبايه اسلاميه وشالها.
ولبست حذاء ناصي وعندي كم فلس خليتهم بجزدان صغير.
وطلعت اتسحب على كيفي....
واتلفت اخاف لحد يلكفني والله ماعدها مانع امي تقفل الغرفه عليه لحين مياخذني.
واخيرا كدرت والحمد لله افتح باب الكلدور وافلت بروحي.
_______________
صباحا ///
ابو يزن /
ها عيني شو كاعده من الصباحيات.
سجود/
مو كتلك داخذ هبه اجهزها.
هذا رجلها قرج ما تبالش ويا عنده استعداد ياخذها بدشداشتها للبيت.
اصلا هو مشايفنه كلنه بس هيه بعينه اني اعرف الشخص من اول نظره.
ابو يزن/
سجود يا عيني الرزق على الله عوفي هل يتيمه والله كل ما شوف بناتي ضميري ياكلني اكل.
لتوكفين وتكوليلي انت مو ابوها واني امها واعرف.
بنيه طفله مراهقه شنو تجبريها تعاشر رجال متعرفه
لا والاضبط يتمم زواجه.
ترى اني اعرفهم ذوله المله ماعنده مال يصبر ودامن عليه وتتقبله.
لا قلبي ترى بساعتها ياخذها عسى ما تموت بيده.
حتعلميني بيهم وهو شرس وكبحي حيل عوفيها للبنيه خطيه.
سجود/
اووووو
يا محاظرة الصبح المتخلص.
هسه التريده شنو.
ابو يزن/
الاريده حردله فليساته
واكله مجبر اطلك.
_ عافته وطلعت من الغرفه سجود ودردم معاجبها الوضع تعرف المقابيلها صعب ومو سهل.
________________
هبه/
كاعده بالهول الفارغ الحار المترب .
البيت الكبير الموحش رغم حتى سحب كهرباء مابي.
لامه رجلها لصدرها وتبجي.
اي تبجي من وصلت لبيت الحنيه وهيه تبجي.
هبه/
وينج بيبي
وينك جدي.
تعالوا شوفوا حالي من بعدكم اخ اخ يابويه المن عفتوني.
حصرتها حتى حياطين البيت نزلت دمعتها عليه.
شلون شلون هسه اني منمن مهزومه امي لو المدعو زوجي.
اذا لكوني شحيسوون بيه.....خاف يكتلوني مثل ما اسمع.
زين ماعرف وين اروح وماعندي احد اروحله اني هنا لحد موصلت متت بدمي.
اخاف اي شنو الخوف مو عيب.
اخذتني الصفنه شلون و صلت لهنا.
------------------
هبه/
همزين فتحت الباب مال شارع وعفته ورايه مطبكته وطلعت اركض اركض للشارع العام واتلفت اخاف احد يلحكني
واكفه على الشارع لازم بسياره اروح.
محد يوكفلي والي يفوت يباوعلي بنظرات قذره عبالهم مهزومه.
اي صدك مهزومه اني بس من منو ماعرف معقوله من امي.
والله ويوكفلي رجال كبير بالعمر ابن حلال.
_ وين رايحه بنتي.
_ ...... لهاي المنطقه .
_ صعدي بنتي صعدي لاحول ولا قوة إلا بالله بنتي بعدج حديثه شمطلعج بنص الليل.
تعرفين شكو بالشارع انتي.
_ ها مو بيبيتي متخربطه ولازم اروحلها.
كتله هيجي وحسيته مقتنع ظل يهز براسه.
_ اي عمي هنانه اي اي هذا البيت.
شكد كروه عمو.
_ دخلي بنتي اعتبره دفعة بله عليه وعلى عيال بيتي.
_ اشكرك عمو رحمه الله والديك.
نزلت ودخلت للبيت بس قبل مادخل انداريت وشفت سيارة هيثم واكفه.
ايبا على السنين والعمر اليركض شلون جنت بس اسمع صوته اباوع من زرف الباب.
تنهدت ودخلت خايفه وحايره ومشتته ملكيت مكان امان الي اكثر من جدران هذا البيت.
رغم جعت وتمنيت وتحسرت بي بس يبقى الحظن الدافئ الي.
فزيت على صوت شي وكع باوعت من الشباك بزونه كمزت على طشت قديم عايفي النزل الجانو هنانه كاعدين.
بعد مخلص عقدهم امي بلغت عمتي متجدده تريد تبيعه.
افتريت بالبيت تراب وفارغ ومابي كلشي
رحت للمطبخ وكفت كدام مكان الكرويته مال جدي
الجان يمدد عليها تصير كدام باب المطبخ.
الله الذكريات تذبح تذبح.
دموعي تنزل بصمت تمنيت يكومون ولو يوم .
يوم واحد والله راضيه هيجي كون اشمهم وجلب بذيالهم وكلهم اخذوني المن عفتوني.
_________________
سجود/
هبه هبه
يله بنتي وينج تعالي نزلي تريكي دروح.
هبه دجاوبي يا يمه المن معتكفه من البارحه لليوم .
ابو يزن/
شبيج دعوفيها للبنيه.
سجود/
يا شفتني كصبتها
غير داصيحها تتريك.
ابو يزن/
كوم حبيبي يزن صيح اختك.
صعد يزن ونزل
_ يابه غرفتها مفتوحه وماكو هبه.
أبو يزن/
ابني شنو ماكو شوفها بالحمام بالسطح.
سجود/
صخام الصخمني اذا صدك
وصعدت تركض والبيت كله يدور نكلب وهبه ماكو.
ابو يزن/
كافي كافي
لحد يدور البنيه شارده من البيت.
سجود/
على بختك كول غيرها
فدوه لعينك لتكولها.
ابو يزن/
باب الشارع مفتوحه وممسدوده اكيد هبه عايفتها.
كال كلامه وكعد خله راسه بين ايديه حاير ودايخ متخبل شلون وين يلكاها.
ام نور/
برد قلبج هسه ها
خبلتيها للبنيه وشردتيها كلتلج ما اقبل لجبروني لجبروني.
اوف يمه عمت عيني عليج يل حنينه.
سجود/
هسه طلعت موخوش ام اني
ها كولوا احجوها بوجهي ليش ساكتين.
اي اني ضحيت ابنتي لاجل رجلي وهذا البيت يبقى واكف.
بس يشهد ربي مبعتها بيع.
شفته شاريها ورايدها الرجال رايدها قبل فرح وهمه كربسوا ذيج براسه.
ابو يزن/
بعياط
هص هص الكل تلصم.
ولكم جاوبوني وكلولي البارحه كلي العصر يمكم اني رايد احاجيها لهبه بلكت هدأت.
يجي شكله والله مرتك نهزمت واحنه الثولان جنه نايمين.
ولكم من هجم على راسكم البيت ان شاء الله.
_________________
هبه صارت الظهر حسيت على صوت الاذان نمت نومه ماكو هيجي راحه.
بعدين كعدت
زين جعت هسه شلون.
البارحه كله مماكله اني وهسه بطني ركع جدوره بيها
ههههه اي والله كامت مو بس اصوات طلع شوكامت اطلع أصوات كراكيع.
بس شسوي مجبوره لليل ابقى انتظر حتى اطلع اجيبلي اكل واجي.
زين هسه من عرفوا شسووا
هه اكيد مداروا بال.
__________________
.
.
سجود/
ترن.....ترن.........ترن........
تعال الحكلي ابو يزن هذا رائد ديخابر
عزا وصخام شكله.
ابو يزن/
انطيني الجهاز
الو
صباح الخير
صباح النور اهلا رائد اهلا.
العفو ماعرف حظرتك بالبيت جان اتصلت عليك.
ميهم مبهم
بس ام يزن راحت للسوك.
لا
ها عجل لتأخذ هبه وياها اني اخذها شعدها نقص و.....
قاطعه أبو يزن
ابني تفضل هسه يمنه بالبيت ظروري.
خير صاير شي
اي صاير شي كبير تعال ونتفاهم.
________________
.
.
بعد مرور نص ساعه.
رائد /
شنو شنو
مرتي مهزومه والله اطلعوها ترى تصير موزينه كلكم والعباس ابو فاضل انيمكم جوه.
اني حرمتي تشرد اخ اخ الله اعلمها بسيطه.
ابو يزن/
اكعد حالنه من حالك ترى كعدنه لكيناها ماكو.
رائد /
مرتي اريدها منكم انتو اطلعوها من جوه الكاع شلون ماعرف.
منو يضمنلي مو انتو الضاميها وخطه ها.
سجود/
وين نظمها يعني داكلك دايخين من صباح الله لي هسه.
رائد/
يجوز وديتيها اهلج عيالج وين ماعرف
مو البارحه ردتي اطلكها ها بس لو تحلمون تحلمون اعوفها.
ودك جهاز رائد.
ها ابو محمد.
تعال شوف يولو..........
ابو محمد/
على كيفك على كيفك ويه روحك حاسس بيك والله وتعرف انت .
حاليا عممت اسمها على كل السيطرات ومداخل ومخارج بغداد والمحافظات.
لتخاف نلكاها ان شاء الله.
رائد /
شلون كلي من الليل ماكو وراح يجي الليل وين راحت راسي حيطك.
اخ بس الزمها لا كسرها جنت الومك اثاري حقك والله طلعن مثل الزيبك.
ابو محمد/
اريد اجي احجي وياهم.
رائد /
تعال اني هنا اصلا ماعوفهم اله استلمها بيدي.
__________
.
.
هبه / اذن العشا وطلعت تسحبت من البيت رحت سريع سريع متلفلفه بالشال جبت لفتين فلافل وببسي وبطلين مي ورجعت.
كعدت اكل بس اسد معدتي الاصوات ذبحتني والمغص.
________________
.
.
في بيت ابو يزن الساعه بثمانيه ونص.
بو محمد/
اي كمليلي ام يزن منو عدكم اقارب جيران.
سجود/
شبه نهارت
عيني صارلك نص ساعه تحقق ويايه داكلك ماعدنه احد.
وجوارين ماعدنه ولبيت عمتها متروح.
وبيت جدها فارغ يصوصي دنبيعه.
كملت وكعدت تبجي.
ابو محمد/
هسه يعني متعرفون مكان الحرمه عجل شلون انتو مسؤولين على خلفتكم.
كوم كوم رائد ان شاء الله عرفت مكانها.
بليه زحمه ام يزن جيبيلي مفاتيح بيت جدها .
سجود/
ها
شداحجي اني اكلك البيت فارغ فارغ شسوي بي تروح.
ابو محمد/
جيبي بلكت عاجبني اشتري.
_ راحت سجود للمطبخ تجيب المفتاح دورت كلبت المطبخ والكاونترات ماكو المفتاح.
سجود/
ولكم وينه وينه المفتاح هم ضيعتوا.
ابو محمد/
يله رائد كوم
تمام وصلت الرساله يله اودعناكم.
_____________
.
.
.
الساعه بالتسعه تقريبا.
هبه/
حس سياره قريب على البيت كهرباء ماكو بردات ماكو.
رحت كعدت بالمطبخ حتى ما اشرف كلش.
رائد/
حكسر الباب وفوت.
ابو محمد/
على كيفك ليش نكسر بيبان عجل الكاعده جوه شسوي هيه تفتح الباب النه بليه فضايح يول.
هبه/
الطم على وجهي وره الباب عزا العزاني صخام الصخمني شلون عرفوا هنا اني.
اباوع بس هو وابن خاله لعد اهلي وين.
يايابه شراح يفكني منهم.
واكفين اباب المطبخ.
رائد /
هبه هبه
اعرف جوه فتحي الباب بليه فضايح فتحيها بسرعه لا اكسرها على راسج صدكي.
هبه/
مبقى شي بيه صاحي كلي ارجف ارجف حتى نفسي كطعته.
ابو محمد/
بنتي هبه فتحي الباب بحمايتي انتي صدكي محد يوصلج مدام واكف وره الباب.
هبه اخرمره احاجيج اذا اروح ما افزعلج بعد.
_ انتظر عشر دقائق تقريبا.
ابو محمد/
رائد اني رايح ودير بالك تخابرني بيانكم مطوله شغلتكم.
هبه/
خفت خفت صدك يروح ويعوفني بيده والله ياكلني اكل.
لحكت كمت وصحت من وره الباب اوكف اوكف راح افتحه.
.
.
.
.
.
.المفاجأة بالبارت القادم.☻☻☻