اسيل____________
صار تقريباً شهر كامل على سفرت اياد والاوضاع الي بالبيت متبشر بالخير عمو عصبي والولد باليل مينامون وقت اسالهم شكو يكولون الناس الي مات ابنهم يردون يدكونه لأن منقبل نتنازل عن ابنهم المسجون
هاي الفترة امتحانات ومشاكل هواي جاي تصير احمد رجع يزعج فجر وصار يتمادى واكثر من مرة حاول يمد ايده عليها عمو تخبل وطرده من البيت وكال الفجر استعجلوا بالعرس لان مااكدر الزمة انقهرت عليها ليش هيج تهجولت يعني هيه اول وحده اخر وحده تزوج لا خطبة بيها خير ولا عرس بيه خير
خاله سعاد حالتها الصحية تدهورت وصار عدها ذبحة بالقلب بسبب خوفها على الولد و24 ساعة بالفراش مرام صار عدها تقلصات على رغم هيه بعد هواي يلا تدخل بشهرها والدكتورة كالت الها طفلج نازلي قللي حركتج هالفترة لبين متوصلين بشهر تاسع
عبير من زمان عندها ضعف بظهرها وجايبه حملها بالمقويات وقت شافت مرام هيه هم تمرضت فجر وماما كلش تعبن هالفترة بسبب الخطار لطاب والطالع خطية نسوان عمامي من يشوفن ماما تعبانه كل يوم تجي وحده تساعدها بطلنا نطبخ بمواعين البيت واشترينه غراض اكبر لان ما شاء الله على الناس اقل شيء 10 زلم باليوم ويا اما عشه او غده
خطية عمو الي بالعرب اجه وجاب وياه 7 خرفان حتى نزبحهن وقت نحتاج وخلال اسبوع ذبحناهن كلهن
اني ماما متقبل اساعدهن حتى لا اغفل على امتحاناتي اياد دائماً يخابرني ويسال علي ومرات يتعارك وياي بدون سبب بس اني ما اضوج لان يمكن تعبان
صبا هالفترة تقربت منا وصارت تنزل بحجة اساعدكم خوش بنيه وخاصتا بعد ما رزلها حسين صارت تمشي سيده كلامها وياي جداً سطحي ونادرا ما نتناقش على شيء
قبل فترة اجت ام طارق وصارت تحجي على النيشان وماما كالتلها نشتريه من بغداد ارخص واحسن من المحافظات بالاول ماقبلن حسبالهن ناخذ افلوسهم بس طارق حجة ويا فجر وكلها منين متردين تشترين اشتري واني اخدكم لبغداد اذا تردين بس ماما مقبلت وكلتها لا نكلف عليه خالكم ياخذنه
واتفقنه كلنا نروح بعطلة نصف السنة البغداد حتى نجهز فجر ماعرف ليش امه بقت تتعارك ويا ماما تره فجر تكدر تدبر افلوس المهر بقضيتين
هيه معايزة احد ولا محتاجة افلوس احد حتى مهرها خلته مقدم مليون ونص وموخر بس قران والمليون ونص كالت نسوي بيه خطبة وحنه وعرس يعني حتى مو ذهب بس طارق خطية جابلها ذهب يسوء خمس ملايين
كلها تخبلت على ذهبها لان واضح حجمة وكبره اصلا فجر تموت من الذهب غير الحلقة مالبست منه شيء ضمته بالكنتور وهيه عدها شكد ذهب وعمامي كل واحد جاب الها قطة شكل
بس خالوا جاب ست بتوت ذهب وبيبي تخبلت عليهن وصارت تمدح باهل ماما فجر الحلو بيها تحب تنطي يعني اول ما توضفت واستلمت راتبها
جابت محبس البيبي والخاله لأن هن كبار وكلش تحبهن وبعدها جابت اسوارين ذهب الماما ومن صارت عسل جابتلها قلادة باسمها وامير محبس ذهب وجابته جبير حتى من يكبر يلبسه
يعني هي ابد متهتم ودائما دكول الحمدلله الي خله نفسنا قنوعة وكلنا على هذا النمط اله عبير شوي يابسه ويا نفسها ويا اطفالها تحب الفلوس
عماتي كذالك عكس خالاتي الي يطشرن طشر على رغم نصهن حالتهن المادية مو كلش
ماما ضاجت وقت ام طارق كالتلها لعد من تجيبون النيشان نتحاسب عليه على شنو تتحاسبون؟ هي غير راح تشتريه بفلوسها ولا على كم فلس الي انطاهن طارق بعد ماباس ايد فجر حتى تقبل تاخذهن منه
امي كلتلها من عيوني تجين واوكفج عليهن قطعة قطعة بعد شرايده هي كلبت وجها عجيبة هالمرة
اني بعدلي امتحان واحد وهو اقتصاد عكب باجر امتحنه
صدك نسيت احجيلكم على صادق هوه مو بس اني ياخذني للمدرسة لا ياخذ بنات عمي هم حور وطيبة ونجمة تصير بت جيرانه صديقتي
نحن 4 يعني يكفي نكعد كلنا ورى واني على السوالف اريد اكعد يمهن بس هو اله اكعد يمه بالصدر وصاير حيل يتحكم بيه شنو هاي السدرية وليش هيج شعرج صح اني مو محجبة بس مستحيل البس لبس ضيك لا اهلي يقبلون ولا اني سدريتي كلش عريضة وشعري لان قصير اسويه اثنين ظفاير فرنسيان هو يضوج
وقت يشوفني طالعة من المدرسة لازم بسرعة اصعد للسيارة ممنوع تنزلين سوك ممنوع مكتبة ممنوع تحجين ويا حارس المدرسة على رغم من هو جبير بس ميقبل احجي وياه بس البنات عادي حتى هوه ياخذهن للسوك اما اني يكلي كليلي شتردين واني اجيبلج اني عادي ماعندي مشكلة هو يجيبلي
بس ميقبل ياخذ فلوس ابدددا حتى اذا البنات رادن شيء مثل حلويات هوه يدفع الهن وقت حجيت الاياد عليه كال شيكول تسوين ومتخالفين اوامره شفت بيه اياد الثاني بالتحكم بس الفرق اذا عاندت اياد او كسرت كلمته يضربني بينما صادق يسب ويغلط على نفسه
كاعدة افرج براس بيبي والكتاب كدامي اقرا بيه عسولة تلعب بتيلفوني منزله هاي دي وتوكل الحيوانات جابته وجت تركض علي عرفته اتصال
شفت بيبي نايمة اخذت التيلفون ورحت بلمطبخ يم ماما هاي نجمة تخابرني
اسيل_الو هلو حبي
نجمة_هلو اسوله اكلج
اسيل_كولي حياتي
نجمة_شرايج باجر نبقى سوء يعني منرجع للبيت بسرعة اني كلت العماد اخوي وكدرت اقنعة بس كال اذا ويا صديقاتج اي بس اذا بوحدج انسي الفكرة وبما انو باجر اخر امتحان نتونس شوي شرايج
اسيل_اسأل ماما واردلج الخبر اني هم اخابر طيبة وحور واشوف شنو يكولن
نجمة_اي عفية لج ماصدكت اخوي قبل تدرين بعماد رأسه يابس
اسيل_جبح وجهه
نجمة_ياااا ترحيله فدوة هوه انتي وين شايفه وجهه
اسيل_هوه غير اخوج يعني يشبهج وانت جنج شيطان
نجمة_ههههههه نجبي لج لا يحظي احنه البنات مجكلمات والولد يخبلون
اسيل_حرامات المهم حبي خلي اشوف ماما جاي تقرين؟
نجمة_اويلي غير اغتصبت المادة
اسيل_اي اعرفج فطحل بالاغتصاب في بسيل كل صفنه تصفنيها تحسيني تذكرين رومنسياتج ويا ابو صابر
نجمة_دولي هوه اني غير ريوكي حليب مطايه
اسيل_كسرتي خاطري غيري وجيبي حلب هوش بلكت يكون نتيجة مستهوشه
نجمة_هههههه روحي اسالي امج
سديته منها وماما تروح مناه وتجي مناه
اسيل_ماما نجمة دكول بما انو باجر اخر امتحان نطلع نتونس سوء يعني صادق الي يطلعنه ومنروح المكان بعيد اكو حديقة يم المدرسة نكعد بيها ونروح نشتري اشياء من السوك شرايج
بقت تباع عليه وهي تحرك بالجدر بس لا ترفض هيه متحب هيج سوالف
احلام_انتي ومنو ترحين
اسيل_اني ونجمة ويمكن طيبة وحور بنات عمي
احلام_اياد يعرف؟
اسيل_بعدني مكايلتله بس غير انت توافقين بالاول
حجت فجر وهي تباع على ماما بنظرات تقهر عفيةة بفجر تعجبني
فجر _خليها تطلع صح الأوضاع ما تبشر بس صادق وياهن
احلام_روحي بس ذكريني انطيج فلوس مو ترحين ايد ورى وايد كدام عيب صادق مبتلي بيج
اسيل_واالله هوه ميقبل ياخذ فلوس شسويله
رحت للاستقبال شفت عمو فالح يلعب بتليفونه كعدت يمه لازم اكله لان يزعل اذا مكتله
اسيل _عمو عادي اروح ويا البنات باجر يعني نطلع نتونس بعد الامتحان
فالح_وين ترحن بالضبط
اسيل_مادري بس نخلي صادق يفرفرنه
فالح _شرايكم ترحون مدينة العاب مو بعيده
اسيل _هاااااا صدك يعني عادي بس منو ياخذنه وشلون
فالح_اني اتفق ويا صادق يرجعكم للبيت تبدلون وترحون مدينة العاب تتونسون
اسيل_لعد اقناع ماما عليك لان كوه قبلت اروح ويا البنات
فالح_ههه ولا يهمج بويه روحي واني وامج نتفاهم
ركضت واتصلت على بنات واتساب اتصال جماعي وكتلهن على اقتراح عمو وقبلن كلهن راح يرحن اتفقنه شنو نلبس
حسب الي فهمته يمكن عماد هوه يجيب نجمة هيه كالت بالليل اردلج الخبر
عقلي طار ولا يم القراية كله يم السفرة فجر كالت اجي وياج بس ماما كلتلها ومنو يشتري الاغراض بطلت كالت ماروح بقيت اضحك عليها
عمو تحسين ولا شايفين وجهه 24 ساعة طالع ومن يجي كبل ينام أحمد صاير مو راحه ابد يتاخر بالرجعة شاكه بشيء بس اتمنى شكي يطلع غلط
صعدت سبحت وغسلت اسناني قررت اراجع وانام بس قاطعتني صبا
صبا_اكلج اسيل بس تيلفونج اتصل على حسين ماعندي رصيد اذا متصير زحمة عليج
اسيل _لا يمعودة ذاك اخذيه
اخذته وصعدت فوك ورى شكد يلا اجت جابته يدك
صبا_اياد اتصل عليج اسفه بس جنت اخابر بحسين وهوه اتصل اكثر من مرة وحسين لطش فتاخرت عليج عفية اسيل اذا سالج ليش متردين لا دكولين اله عند صبا هسه يضوج منج لان هوه ماعرف ليش يكرهني
اسيل_لا حبيبتي مااكوله وبعدين هوه يكرهنه كلنا مو بس انتي
بقت واكفة هاي شبيها رديت بس طورش اذني من الصياح غير افهم شبيه شكو يصيح
اسيل_ شبيك ليش هيج تصيح
_صار ساعة ادك عليجج ليش يطلعلي مشغول من ال12 للوحدة اتصل ويامن جنتي تحجين
_هااا اي اي جنت احجي ويا نجمة بت جيرانه صديقتي
اياد_وشترين صخمة متصله عليج بهيج وقت
اسيل _باجر عندنه سفرة يعني احنه قررنا نروح مدينه العاب وعمو قبل وكال راح اتقف ويا صادق ياخذكم
اياد_وشوكتتتت ناويه دكليلي لمن ترجعين لو ناويه تغلسين من الاساس اسيل ليش تجبريني اغلط عليج
ليششش ماعنده تفاهم ابدددد هسه غير كتله يعني اذا كتله قبل كم ساعة شراح يغير مثلا
اسيل_غير انته تتصل علي واني اكلك
اياد_هااا يعني اذا ما تصلت ما دكليلي بسيطة اسيل لزمج لو ما الزمج ورب العزة اطيح حظج
اسيل_اذا تبقى هيج تحجي فباي يلا
حجيت هيج لو تخبل اليوم انعل والديج بت الكلب حقيرة ادبسزز طايح حظ والله اموتج اذا قللتي احترام بس الزمج ما ارحمج واليوم اسود عيشتج اخر شيء رجع عالفشار يبووووو اول مره اسمع اياد هيج يفشر كدامي عمري كله مسامعته يهيج يحجي اخر شيء بسرعة نسد التيلفون
اني بقيت صافنة هذا شبيه؟ وصبا تباع علي الحمدلله جنت كاتمه الصوت
صبا_شبيج ليش وجهج صار اصفر
اسيل_يمكن رحت للموت برجلي
صبا _شنو مافهمت اياد شريد منج شكالج وهيج وجهج اصفر
اسيل_اعترفلي باشتياقة وحبه الي بس بطرق خاصة
شو هاي احتقن وجها وخورتني بدون اي كلام دارت وجها وراحت دطيروا هوه اني ناقصني دوخت راس
دخلت على المكالمات شفت رقم بدون اسم عرفت رقم حسين سجلته يمي حسين
اياد ميقبل ايييي شخص ياخذ رقمي هسه حاليا رقمي بس عند ماما وهوه وفجر وبالكوه انطيته النجمة وبنات عمي ومن عرف بقى شكد يحجي
نمت وانا كلي حماس حتى ارجع للبيت وابدل واطلع مع صديقاتي شكد طالعه وشكد اروح البيت عمي وعماتي وخوالي وزيارات بس مستحيل احس بلذه هاي اول مرة اطلع وحدي ويا صديقاتي احسها طلعه خرافية
صادق___________
هستوني كعدت من النوم والباب ندك رحت افتحة شفت ابو فجر سلمت عليه وكعدنا بالحديقة نسوالف ابوي يحجيله على الشغل
عرفت جاي حتى باجر اخذ البنات لمدينة العاب والله هاي سوالف اسيل يابه اني ماعندي مانع اخذ اسيل بس الباقيات لا مسؤوليه وكل وحده السانها شطولة اسيل بس بخزرة تبطل تلح
مكدرت ارفض عدلت وضعي واخذت غسلت السيارة افاااا سيارتي الحلو تصير خط للبنات بس يلا كل شيء هيون لعيون اسيل
اسيل حتى اسمها مختلف ومميز هي الوحيدة الي بيناتنا اسمها مميز "اسيل "ما اعرف معناه بالضبط بس احس معناه الروح او الانتماء لأن هيج وضعي واني يمها
احس روحي ترجعلي وانتماء وتقبل بداخلي تجاه كل شيء معقولة بشر يخيك تحب الدنيا كلها وتتمنى تبقى تعيشها بس وياه
وتفكر باخرتك تحصل عليه وتكون بالدنيا وبالاخرة سوه اذا الله رزقني باسيل ماريد من الدنيا شيء ثاني
راح اكتفي اعيش وياها بابسط حال راح اكتفي بيت صغير او غرفة صغيرة اي شيء يخليني مجتمع بيها وما تبتعد عن انظاري
مجرد احساس اوفكرة اني اكدر احضنها تكفي تعيشني يوم بطوله فرحان ومزاجي حلو
ربي انت اعلم بحالي وادر بكل شيء خليها تكون من نصيبي ولا تبعدها عني لأن والله وجودها بقربي يخليني اعيش
معقولة هذا عقاب الي على كل الي سويته ببنات الناس صح جنت اضحك عليهن واقشمرهن وانطيهن وعود كاذبه بس اني صادق ويا اسيل
معقولة الله رزقني بحبي الها وما ينطينياها هاي الفكرة حيل ماذيتني لدرجة صرت اخاف يطلع توقعي صدك وما احصل على اسيل وتروح الغيري والله ساعتها اموت
صبرك اللهم صبرك شنو اسوي حتى الله يغفر الي وما يخليها بنفسي والله متندم على الي سويته ويا بنات الناس بس خاف الندم ميفيد وراح وقته واني اخسر كل شيء كعقاب الي
تنهدت بضيق شسوي وشلون اصلح الي خربته البنات نصهن ما اتذكرهن والنص الثاني شافن حياتهن بس الحوبه تبطي وما تخطي
كمت صليت ركعتين وكعدت على السجادة واني كلش خجلان من ربي منين ابدي وشلون اختصر سوالفي التعبانه بس اني اليوم جايك بس حتى تطهرني من قذارتي وقذارة فكري
ربي بنفسي شيء لا تخليه ولا تبعده عني اول مرة اعيش احساس النقاء وجان ويا اسيل مجرد فكرة هيه احسن مني تخليني احس بالذنب شنو فرقي عنها وليش اني صرت قذر وهيه بقت نقية
ربي يامن هديتني وانا على طريق معصيتك اهدني ودلني على طريق الصح
كعدت اسبح واستغفر واني بداخلي ثكل عندي رغبة قوية بالبكاء على معاصيي والحرام الي مسويه وعلى التلذذ الي حسيت بيه شكد حسيت بالقرف والاشمئزاز من نفسي بهاي الحظة غرني شيطان وخلاني اغطس بوحل قذارتي
تذكرت مرة اول يوم الي اخذها للمدرسة جانت تقرا ايات اكثر من ايه الاولى الفاتحة والثانية التوحيد والثالثه الملك وبعدين كالت دعاء بصوت مسموع«اللهم لقد خرجت بك فحفظني من يميني ومن شمالي ومن خلفي ومن امامي وانت خير الحافظين»
رغم بساطته بس جان كلش حلو وهيه دكوله وكل يوم تحجي هذا الدعاء وتردد هاي الآيات ومرات تظيف عليهن مثل دعاء كالت هذا دعاء النبي ﷺ
في حال استعصى عليك امر «اللهم توجهت اليك بنبيك نبي الرحمة وال بيته الذي اخترتهم علمن على العالمين اللهم لين صعوبتها واحزنتها واكفني شرها فانت الكافي المعافي الغالب القهار»
وعلمتني اذا حسيت بحزن رادد هذا الدعاء والي هو للنبي ﷺ«اللهم لا تسهل امراً الا ماجعلته سهل وانت الحزن اذا شئت تجعله سهلاً»
وقت سالتها منو علمج عليهن كالت اياد رغم غيرتي بذاك الوقت الا اني كلش حبيت هذا الجانب البيه
اياد شخص أسود وكل شيء بيه سواد من فوك الجوة اسود باسود بس منشر السواد للاشخاص اليحبهم
قاتل مجرم مريض مختل مغرور متعجرف متكبر كل الصفات القبيحة بيه لا انه عرف شلون يخلي اسيل مختلفة ونقية
شلون الشخص ميعرف مفهوم النقاء يصنع شخص بهذا النقاء؟
معقولة اياد متمسك باسيل لأن هي الجانب الابيض من حياته؟
اتفقنا باجر اخذهن المدينة للعاب خلي يتونسن واني هم بعد ما اتحمل راح افتح موضوع حبي واعجابي ويا اسيل اذا شفت بيها مجال اعترفلها بحبي واتقدم اخطبها واذا لا انتظر والله كريم
اسيل__________
اسيل_خلصت اليوم كله بحماس واني منتظرة صادق يجي ياخذنه حتى نبدل ملابس المدرسة لأن المديرة متستقبل اي طالبة مخالفه زي
تأخر علينه حتى اخو نجمة الجبير اجه اخذها توسلت بيه اروح وياها بس بنات عمي شلون؟ فرفضت وكتلها روحي قبلنا نحن وراج نجي حسب الي عرفته نجمة هيه واختها واخوها يرحون وياها
فاتت نص ساعة وهوه مجاي بنات عمي كالن خلي نرجع مشي بس إني اخاف اكثر من مرة اسمع ولد يسمعون حجي محلو ودائما يتغزلون بعيوني وهواي شابعه راشديات من اياد بعد تبت كلت مستحيل ارجع للبيت مشي
واخيرا اجه بعد مصفينة المدرسة على ادينه
صادق_ها بنات تاخرت عليجن؟
طيبة_يبوووووو متنه وحنه ننتظرك صدك جذب مرة ثانية من تتاخر خابر واحد من اخواني يجي علينه هسه شوكت نلحك نعدل نفسنه
صادق_دلصمي حلكج وامشي اصعدي
مشيت وراه بعد وقت وعلى راحتنه ماعدنا شيء بس طيبة تحب تجاكر صادق دكول اكرهه مااحبه على رغم من هوه كلش طيب وحباب بس دكول شايف نفسه ويحسس الواحد بيه نقص كوه
فتحت باب لوره وهو صاح علي بصوت طير كلبي حسيت عيوني غرغرن من الفشلة والخوفة
صادق_انتيييي مو هذا مكانج هيه كل يوم احجيها تعالي هنااااا كعدي لا تسودنيني
اسيل_كمزتني شبيك تصيح
مسح وجه وصعد بالسيارة تجاهلته وكعدت ورى يم البنات طيبة همستلي مو كتلج مليق ومكروه مدريت عليها لازم لازم واحد يعكر ابو مزاجي
رجعت للبيت بعد الف اوف اوف وخرب ومنين طعتلي بهاي السالفة واسيل انتي وانتي وانتي جابنا الطريق كله رزايل شصار عليه
اخر شيء كتله روح اخلي عمو ياخذنه وهو تخبل كال اذا كلتيله اطيح حظج همه شمالهم وياي ليش كلهم هيج سلوبهم جايف
على السرعة كلت الطيبة وحور تعالن البسن من فجر لان هنه شوي ضخام مو مثلي ناعمة
اخذت افلوس وعمو انطه للبنات هم على رغم هنه اصرا مياخذن بس هوه انطاهن كلش فرحانه طلعنا سيارتين نحن وعائلة نجمة خطية كالت سويت دولمة وبيزا وبرگل وهيج سوالف صادق كال اني اشتريلكم مناك
دخلنا للمدينة احلى وافضل مكان بالعالم كله صوت الضحك والعياط والاغاني والروح الي بيها تحسسج انت طايرة فوك الغيوم تجنن
اتفقنه وقت نخلص لعب نجتمع بمكان سلمت على اخت نجمة وامها هم جايه المراة كبيرة بالعمر مجايه تلعب بس هم متوسلين بيها حتى تغير جو اخوها تففففف يخوف طويل بطول اياد ونفس ضخاميه جسمة بس هذا عنده عضلات بزنده مبالغ بيهن ملامحة حادة ومتعصبة طول الوقت عاقد حواجبة طلع صادق يعرفه فندمجوا بالحجي كل شويه يباع علي ويخزرني شبيه هذا؟ يمكن لان جنت صافنه عليه
طيبة وحور نطلقن طارن واني ونجمة بقينا نتمشى وبعدين نلعب
نجمة _لج شفتي عماد مشال عينه عليج هههه
اسيل_جبح وجهه وجه الجينكوا لج يخزر بيه بس كلش ينطي شبه لاياد بالنكد
نجمة _اي هوه واياد يشتغلون سوه
اسيل _هااااا كولي والله شو اني مااعرف واول مرة اشوفه اصدقاء اياد كلهم اعرفهم
نجمة _لج هم شغلهم حيل حساس لهذا السبب محد يعرف بيه وتعالي كليلي شلون تعرفين اصدقاء اياد هاااا طلعتي دورين وراه
نزعجت منها لان جانت تضرب بجتفي وتغمزلي يااا اني ادور مستحيل بس هوه فضول أكثر من مرة ادخل استوديو الصور واشوفه هوه وجماعته
كلش لعبنا مخلينه لعبه ملعبناها اله الي بيها مرتفعات مالعبتها ابد وهي نص الألعاب الحلوة بيها عياط لعبت لعبه اسمها سفينه نوح احس كلبي مات من كثر الخوف على رغم من جان صادق يمي بس من الخوف كلش دخت واجيت اتقيئ
من شاف حالتي صار يضحك علي رحنه كعدنا بالحديقة ام نجمة كلش اسبورتيه وتموت ضحك عدها سوالف خلتنا نموت ضحك
جانت تحجيلنه شلون زوجها جان يضوجها ويضربها لحد ما طكت روحها وصار تعامله مثل ميعاملها عود رادت تصير قوية ومرة غلط عليها وهيه غلطت عليه من الصدمة الي هوه مصدوم بيها متخرب
لان جان يحبها وميضربها بس يغلط ومرات تصير شوي اكشن كم بوكس وكم راشدي بس هيه لأن مؤدبة ممتوقع منها هيج تصرف ومتخرب
طول ما نحن كاعدين هذا الحقنة بس ينافخ واذا ضحكت بصوت يبقى يخنزر صادق مدري شبيه اليوم لاطش بيه لطش كل شويه اوخر منه يلزم ايدي ويقربني منه بحجة لا تضيعين
وهذا الولد شكيت بيه ضاج من صادق لأن اني ضجت الي يشوفه يكول زوجي او خطيبي او اخوي بس هوه مو هيج مادري من وين نزل عليه كل هذا الإهتمام ولا جنه قبل كم ساعة شبعني رزايل طيبة كل شوي ضاربتني على رجلي لأن كلهم انتبهوا على عماد حتى امه
يباع على ايدي الي لازمها صادق كلش خفت منه وماعرف ليش حسيت اني لازم ابرر لهم تصرفات صادق وابين لهم اني وياه بس ولد عم وهوه مدري شبيه
سحبت ايدي بس صادق جان شابك اصابعنا سوء من سحبتها شد عليها حيل وابتسم بغيض بسرعة رفعت راسي على لولد اشر براسه كومي
اني بسرعة كمت صادق كال وين كتله اريد اروح للحمام كال جاي وياج خاف متندلين بس عماد كله لا خلي تروح هيه ونجمة
بسرعة نجمة كامت لزمت ايدي وسحلتني وياها صادق ليش هيج سوه؟
اسيل_صادق جاي حيل يزعجني وهواي يدخل اني ماحب واحد يلزم ايدي واكثر من مرة سحبت ايدي بس هوه ميقبل
نجمة _ايييي كبر كلنا انتبهنه عليه ولج خاف يحبج ويغار عليج من اخوي هههه
اسيل_متطيرين حب الكشر وبعدين هوه اخوج على شنو يغار منه حور لون شو يخوف
نجمة_امممم هجم بيتج شو من هزت راس كمتي جنج صل بسرعة طفرتي هاي لو كايلج موتي يمكن تموتين
اسيل_اجت بوقتها هههه
دخلت غسلت وجهي واديه وعدلت ملابس ونجمة دخلت للحمام طلعت انتظرها برئ
شفته واكف يدخن مقابيل الحمامات اشرلي تعالي شو هذا راح ورى الحمامات اروح لو لا؟ بقيت واكفة بس هوه اجه باتجاهي ولزم طرف ارداني وسحبني ورى
عماد_اسمي زين وافتحي اذانج عدل تصرفات المگ**** انتي وابن عمج كدام اختي ماريدها وشوي الزمي نفسج مناه الناس عود ارجعوا بالبيت واشبعوا من قذارتكم وانتي ونجمة ماريدجن سوء بعد اختي اخاف عليها تتعلم منج الواضح انتي مو خوش ادمية
نلصم حلكي وعيوني صارن يحركن بيه عمري كله مسامعه هيج حجي ينكال عليه او احد يحاجيني بهذا الاسلوب المقرف شنو قصدة بكلامه انو اني قابلة على تصرف صادق؟ دموعي نزلن محاجيته ولا هوه اهتم رجعت اركص لنجمة بعدين تذكرت كلامه
بجيت بالزايد وصرت اشهك من القهر ليش الناس اول نظره الهم غلط شنو سويت وهذا الاطباع خذه علي مو بس هوه كلهم حتى عماتي دائماً اسمعهن يحجن علينه اني وفجر ويكولن ملعبات وامهات ولد
بس ولا مرة حجن بوجهي صح كلامهن يضوج بس مجنت اهتم اكول يكرهني او يكرهن اختي بس هذا الولد ليش هيج حجة
رجعت المكان الي جنه كاعدين بيه صادق بسرعة كام من شافني ابجي اجه بسرعة علي ولزمني من اديه صار يستفسر بس اني محجيت لأن كلمة الولد بعدها تحز بخاطري واذا حجيت الصادق يتعارك وياه
شفته هوه واخته اجو دنكت وكلت الصادق ضعت وبجيت بقى يلوم بيه وكال يلا نرجع شكد جنت فرحانه بس خربت كل فرحتي
عادي بقت على هاي رجعت وكل شويه ابجي بالطريق طيبة وحور حاولن يهدن بيه بس مجاي انسى كلامه ونظراته وملامح وجهه وهو يحجي وياي بتقزز وكان فضلات كدامة مو بشر
اول مرجعت جانت ساعة 4 العصر ماما بغرفتها نايمة سلمت على بيبي وخاله وفجر تستفسر انطيت حلويات للجهال بدلت واجيت انام بلكت يروح القهر
غطيت راسي ورجعت ابجي سمعت الباب انفتح بسرعة مسحت دموعي وسويت نفسي نايمة سمعت صوت احمد يكول
_ اي هستوها اجت لا بعدها منايمة كال اسيل اياد يريدج مالي خلك رزاله ابد بس كعدت لأن البارحة سد لتيلفون بوجهي احمد انطاني تليفونه ومن شاف وجهي اشرلي شبيج كتله نعسانه خلى وطلع
اياد_الووو وينج
اسيل_ها وياك اسمعك
اياد_ليش متحجين ليش هيج صوتج باجية؟
من كال باجية بجيت بالزايد اريد الكلام يطلع مطلع الف نشغة نشفت وانا احجيله شنو كالي بس مكتله اخو نجمة كتله ولد غريب هوه كل شويه يكول على كيفج بس بطلي بجي ميخالف واني مستمرة
ماكدر اظم شيء عليه ولا اكدر اتجاهل شيء يخص اياد وهوه كذلك بقى يستفسر مني
وصار يحجي وياي على كلام الناس وهو مايقدم ولا ياخر وحنه لازم تنجاهل الكلام الي ياذينه ويجرحنه ولازم منتاثر وتضعف شخصيتنه بعدها صار يرزل بيه لان مرديت عليه بس اياد ذكي ميمشي علي شيء بقى مصر الي حجة وياي عرف او نعرفه
اياد_زين هوه ليش هيج كالج؟
اسيل _مو كتلك صادق بقى لازم ايدي حتى لا اضيع
اياد_يعني الولد قريب من يمكم وين جنتوا كاعدين بمطعم؟
اسيل_لا بالحديقة لا مو يمنه بعيد
اياد_بس اذا بعيد شلون عرف صادق ابن عمج؟ انتي ومنو رحتوا للعاب
اسيل_ماعرف.... رحنه اني واهل نجمة جوارينه
اياد _اي منو منو راح ويا نجمة لو كلكم اخذكم صادق؟
اسيل_ لااا هذا اخوها الحيوان اخذها اصلا هوه الي غلط علي وسمعني هذا الكلام وكالي لا تمشين ويا نجمة اني اخاف على اختي وانتي مو خوش ادمية
اكبر جفصة جفصتها وراح اجفص بعد جغصات اكبر منها بالمستقبل عفية اسيل عاشت ايدج صار ساعة تشرحين ودكليله غريب هسه خوش طلع جذبتج سمعته ضحك
اياد_منو بيهم عماد ولا توفيق الجبير مؤدب بس عماد السانة طويل ولا يهمج اسولتي والله اذا ما سويته الج اجنازه ماطلع اياد باجر تسمعين خبره.....
بس لا يسوي شيء بالولد اياد ميرحم ابد........
قراءة ممتعة
اتمنى لكم يوم سعيد:)
لا تنسوا تصوتوا وتتركوا تعليق يشجعني تره والله جاي اتعب بالكتابة♡
انتهى البارت بـ3604 كلمة