وكيف تكُف الروحُ ، عن الروحِ والروحُ،في الروحِ تُقيمُ ...؟
>>>>>>>>>>>>>>>>>>>
هُمام
بعد ما تمت الخطبه على خير تجمعنا كلنا برا نسولف ونضحك وشقه
فهد : اشوف بعد شلون تشوفها الا احرمك من شوفتها اصبرلي
مؤمل : مصدك نفسك انتَ حيل ترا صارت مرتي ؟
ياسر : يا مرتك هيهيهيهيهي عمي بعد ما تشوفها لو تطلع نخله براسك
ضحكت عليهم لحد الان يتناكرون علمود ميشوف ريم
دقايق ما نشوف الا سيارة طبكت يمنا ولمحنه ثنين ولد دينزلون وجان واحد منهم يجر سلاح منه وثاني يريد يضرب شو منشوف غير وجهه السلاح علئ ياسر وضربه بجتفه طلقه
خلال ثواني ما نشوف غير ياسر طاح وأيده مليانه دم
التفتوا فهد ومؤمل وطلعوا اسلحتهم وركضوا للسيارة ورأسا طاروا ورا هذوله ما ادري لحكوا بيهم لو لا
وياسر بين ايدي كله دم
اباوع للمنظر مصدوم
طلعوا ابويه وعمي زياد وأيهم والعياط وانخبصنا وفوك هذا كله ابويه وكع متخربط هم وحسن يعيط
حسن : همام مو وكتككك امشي جيب السويج اخوك تصوب ويامن احجي
ايهم چان لازم أبوية بالكوه گال
_ همام يلا شبيك
حسيت على روحي وعلى ياسر الي بين ايدي غركان بدمه .. لازم ايده حيل وبلكوه يجر النفس
ركضت ليجوا صعدت للغرفه جبت السويج ونزلت ركض شغلنا سيارة حسن ورحنا للمستشفى
لحظات ماكو اصعب منها واني اشوف اخويه بين ايدي غركان بدمه رغم تصوب بأيده لكن جانت مبينه الرصاصه عميقه .. دقايق وفقد الوعي بين ايدي نهائي
عطت بقهر على حسن : شبيك انتَ سوق سريييع
ايهم : يا الله هسه نوصل لحد ينخبص
نص ساعه صرنا كبال المستشفى رأسا طبينا للطوارئ واخذوهم اثنينهم ياسر وابوية
وكفت يم حسن وأيهم وأيدي مليانه دم واحس روحي بغير عالم : احس راح اتخربط ضغطي هبط يمكن
ايهم : يمعود مو هسه تتخربط الوضع فالت ابوك واخوك وانتَ بيمن نحير
همام : ايهم شلون اخويه مشفته شلون طايح وكله دم
ايهم : مابي شي هسه يطلع الدكتور ويكوللنا
همام : كل ما اتذكر الموقف مادري شيصير بية راح اتخبل
ايهم : شبيك كول يا الله متعرف بياسر هسه يطلع يتمضحك
عفتهم ورحت اريد اغسل ايدي بالحمامات وراسي يوجعني من قوة الموقف حتى ما سألنا على فهد ومؤمل وينهم وشصار ووين راحوا
امشي بس عقلي يم ياسر وابوية
ما احس غير صوت بنية وراي يصيح بأسمي
- همام همام اوكف
وكفت واني اعرف هذا الصوت كُلش زين
صارت كبالي مَي وهي تحجي بالكوه وفحطانه مبينه جانت تركض وراي
مَي : همام شلونك شفتك هنا خما صاير شي
باوعت لايدي وهدومي جان تشهك بصدمه : عزاااا هاي شنو
- اخويه تصوب
_ هـاا
همام : ياسرررر اخويههه تصاوبببب
مَي : اسفه اسفه وهسه وينه بأي غرفه
همام : هناك
- تمام .. شلون تصوب
- مادري
- هـاا
- مادري شلون تصوب
- شلون متدري همام يعني احد صوبه طلقه تايهه لو شنو
- ما ادري مَي ما ادري
توجهت انظاري لـ ايدي الي ملطخه بالدم گلت
_ راح اروح اغسل ايدي .. أنتِ انتظريني هنا هسه اجي
رحت اغسل والقهر مبين علية افرك بـ ايدي بقهر واني اتذكر فرحته ولما عقد وكشخته الي خربت ولطخ ملابسه الدم .. خربت الفرحه بعد ما صار كل هذا
ياسر اخويه واقرب واحد الي من بين اخواني من صغار ولحد ما كبرنا نتشارك اسرارنا وضحكنا سويه ولعبنا حتى بالدراسه بس للاسف شخصياتنا متناقضه ولا مره كعدنا سوية وما تعاركنا بس يبقئ هوه أقرب شخص الي ..
طلعت رأسا صار بوجهي ايهم
ايهم : وينك انتَ دا ادور عليك مادري وين رحت
همام : مدتشوفني دا اغسل ايدي
ايهم : امشي تعال ابوك كعد خل نشوفه
همام : اي يلا
رجعنا دنمشي ومَي جانت نفس مكانها تنتظرني
لما شفتها كلتلها : اني هناك موجود ابويه بهذيج الغرفه تخربط
مَي : هـاا
همام : اني هنااااك أبوية بهذيج الغرفه
مَي : هـاا ايي ايي تمام افتهمتك
راحت هي و ايهم سألني : هاي منية منين تعرفها
همام : سالفه طويله .. ايهم شنو ماكو خبر عن ياسر
ايهم : لا بعده
__________
مؤمل : فهد موجودين بغرفة التحقيق هسه
باوعت عليه مصغر عيوني وگلت : يوسف ومهدي
مؤمل : اي جوه
كمت واني ارفع أكمام القميص بهدوء واطكطك بركبتي
مؤمل : الظاهر مناوي على خير
فهد : اعرف شلون اتصرف وياهم .. اخويه الله يعلم شلونه هسه وهذوله الكواو** كبالي اهخخخ انتَ لتجي وراية بس دك على همام اسأله عن ياسر وشوف
التفتت وكملت طريقي بـ اتجاه الغرفه
فتحت الباب ودخلت .. مرة ثانيه انداريت وقفلتها وحطيت المفاتيح يمي
باوعت عليهم نظره خاطفه .. نظراتهم مال واحد خايف ومتوتر بس ميريدون يبينون هل شي
- شنو استفاديتو من سويتو هاي الحركه ؟
يوسف : ااني ما متندم وماسويت شي غلط
هزيت راسي اله وابتسمت بهدوء : اعصابك حبيبي شبيك توترت مدامك ممسوي شي غلط شكو ضربته ورها نهزمت
سكتت مجاوب باوعت لاخوه اللي بصفه جانت نفس نظراته گلت
_ وانتَ شعندك وية اخوك ، اثنينكم جايين من بابل لبغداد علمود ياسر
مهدي : انتوا كسرتوا بأخوية وما انطيتوه روان ليش ؟ بس لأنو ما طلعت بنت خالتنا الحقيقيه ، اصلا انتوا طلعتوا فجأه لو ما عرفتوهم بعد كل هاي السنين احسن وهسه شنو انطيتوها لياسر بما انوا ابن عمها وخالتها الحقيقين
باوعتله وضحكت بأستهزاء : هسه انتوا مقهورين لان ياسر خطب روان ؟ انتَ يوسف اجيت و خطبت روان واحنه رفضنا وياسر كال انوا هي الي يعني جان ناطيك علم فـ بعد ليش تلح اغاتي لو تريد تنهان يلا تمشي عالصراط المستقيم .. روان مجانت قابله بيك اصلا وهي متحبك شنو تريدها تحبك وتقبل بيك غصب ؟ وبعد ما صار كل هذا تجي انتَ واخوك و ترمي ياسر بكل سهوله وتصوبه عبالك تفلت من عندي
مهدي : يستاهل ياسر
فهد : انجب .. توقعي جان بمحله وماكو شي غلط عرفتك انتَ ورا هاي السوايه .. فوكاها متلثم لتضحكني حبيب وهسه اعرف شسوي وياكم
مهدي : متكدر تسوي شي
فهد : ايبااااه ماكدر اسوي شي ، تؤ تؤ شكد انتَ على نياتك لعد
يوسف : متكدر سوي شي النه
فهد : اي هسه نشوف
اعصابي فارت صارلي ساعه متحملهم ويوسف اجه بأيدي
ضربته بوكس ورها لزمته كومته وخنكته حيل واني اعيط بوجهه
_ هسه اشوفك منو الي ميكدر يسوي شي .. صوبت اخويه وهسه نايم بالمستشفئ بسبكك شوف شراح اسويي
لزمته حيل وكمت اضرب بي وهوه بس صار يعيط ويكول
_ كافي عوفنيي
مهدي مجان يكدر يسوي شي بس كام يعيط
وبقيت اضرب بيي دميته لحد منهيته بضربة قويه علئ .... خليته يتلاوي من الآلم وبس يعيط
وكام يصيح مهدي : هاي ليش هيج سويت بأخويه
وكفت واني الهث وگلت : تعال انتَ الثانيي
لزمته حيل وهم كمت اضرب بي لحد ما ..
اندكت الباب حيل واسمع صوت مؤمل يصيح علية _فهد افتح الباب بسرعه
وخرت ايدي منه ووجهه صار ازرك و يوسف مدمي ويلوب من الوجع
التفتت بلا مبالاه ورحت فتحت الباب وطلعت وقفلتها مرا لُخ وراي
گال مؤمل : شنو شصار شمسوي بيهم
فهد : هذوله هسه تذبهم بالسجن وميطلعون لو مدري يجي منو فتهمت
مؤمل : بدون متكول ادلل و عاشت ايدك يابه
فهد : خابرتهم
مؤمل : ايي دكيت على هُمام هسه وگال ياسر زين لفوا ايده وطلعوا من العمليه وابوك هم زين يعني الوضع تمام
- خوش اني هسه رايح للمستشفى
مؤمل : انتظرني هسه اجيك
_______________
المستشفى/ همام
متجمعين كلنا بغرفة ياسر
جانت ايديه ملفوفه بشاش وهو وحتى متصوب كاعد يحشش
ياسر : هذا ياهو الي تتوقع مصوبني وميرفله جفن وينقهر علية .. اهخخ حتى صاك معقوله يعني الناس صارت بلا رحمه هيج
همام : مؤمل ما لحك يكلي منو بس همه هسه يمكن راح يجون لهنا
محمد : ما خابرتوهم
همام : لا خابرني مؤمل قبل شوية وكلي
زياد : هذا هو ومتصوب كاعد يضحك
ياسر : اهخخخ عمييي ايدي راحت خربت ام الكشخه شوف حظي وحظج يا رواني .. صدك صدك دك على روان خل احجي وياها
همام : شدك عليها انلصم الناس كاعده
ياسر : يلا صدك .. اكدر اطلع مو ترا لعبت روحي من الريحه
همام : اي عادي نطلع
فات ايهم گال : أكلكم هذا عمي محمود اجه
محمد : شعنده جاي
ايهم : والله مادري
كاموا محمد و زياد وطلعوا برا بقوا بس حسن و ايهم
كال ياسر : عمي اني ما احب الازعاجات بس من رخصتكم ماريد أحد يبقى يمي بس حمام يلا براا
حسن : هيج صارت
ايهم : كبر اي والله شف ناكر الجميل
ياسر : دولي يلا
ايهم : هوه مو صوجك صوج الي جاي ومتعني عليك
ياسر : ولكم ايدي يمه ولج لحكينييي احس نار بيها من الحراره والوجع اخخخ عمييييي
ايهم : انت كلشي ونابص كلمة عمي
ياسر : كيفييي ويلا امشوا ولي كلت بس حمام يبقى
ايهم : اهمداكم ضلواا يلاا
همام : چا شعبالك هذا اخوي
ايهم : هسه صار اخوك من تتعاركون والمشاكل تكب للستار جنتوا أعداء
همام : معليك لتدخل ترا
ياسر : هيهيهيهيهيهي
ايهم : شكد حقراء
طلعوا كلهم بقينا وحدنا وياسر يلح : حمام لك ايدييييي هسه لو كاصيها احسن
همام : شنو كاصيها همه يكصوها بالمكص قابل
ياسر : ايشي بس والله توجع معرفت منو مو حتخبل
همام : مادري محد كال
ضلينا كاعدين نسولف دقايق وفهد و مؤمل داهموا الغرفه
ياسر : لك هلا بسيادة الضباط
ما شوف غير فهد حضن ياسر ومدري شنو ضليت صافن عليهم : لك لك باع الرومانسيه شو اني من تخربطت محد حظني من طاحضكم اي والله
ياسر : هيهيهيهي على عنادك
فهد : عوفوكم من الموضوع شلونك انتَ
ياسر : عرج ميطبني
فهد : اي زين صدك وين الجماعه
همام : كلهم تلكيهم برا لان عمك محمود جاي
فهد : هذا شجابه
همام : غير سامع وجاي
گال ياسر : بداعت عمي محمود طلعوني منا والله حزوع من الريحه ترا اتخبل من هيج اني
مؤمل : على كيفك دتتكافش وية روحك
ياسر : هسه شسوي طلعووووني .. شوف اني نسيت باوع منو هو المصوبني اهخخخ كسر بيدك مثل مصوبت ايدي
باوعلنا فهد وكال : يوسف وأخو
همام : يا يوسف
فهد : ولد خالتهم احلام
ياسر : يوسف اللزكه ؟ يابوية يا عمييي وانتَ لزمته موو
فهد : اي لزمته وكسرتهم الك
ياسر : اخوي الزود وحزام الظهررر
مؤمل : واني شنو
ياسر : انت هم الروح والريه
همام " همست يمه " : لتجيك روان
ياسر : اي والله
همام : عفية هاي شمسوية بيك روان
ياسر : دسكت يمعود
فهد : شبيكم تتهامسون
همام : سلامتك هيج خويه
ياسر : طلعوووووني لا احرك روحييييي
مؤمل : يمعودين طلعوه خطية
همام : هسه اروح اشوف
كمت طلعت برا واشوفهم كلهم موجودين أبوية وعمي زياد وعمي محمود وأيهم وعمي محمود يعيط مدري شبيهم
شافني ايهم و اجه عليه وگال : شنو وين رايح
همام : علمود ياسر يريد يطلع
ايهم : هسه اني اروح ارجع انتَ
همام : أكلك شبي عمي محمود
ايهم : يمعود جاي عود يتحمد بسلامه ويبين زين شو ورا شوية فتح سالفة ايمن وكبت العيطه دخيروح مو زين ما مات على أيدي خل يحمد ربه احسله
همام : والله سالفه هذا
ايهم : اي هسه مكلت منية هاي
همام : منيه
ايهم : البنية
همام : مَي
ايهم : يا مَي
همام : بعدين بعدين اسولفلك حروح اكمل الاجراءات الباقيه
________
روان
لما كال همام ياسر تصوب حسيت جسمي يرجف ورأسا نزلت دموعي وكمت ابجي
لحظات والبيت انملى بجي وعياط
اتجمعوا حواليه بنان و ريم ورزان يم خاله زوزو هي ومريم
بجيت من حركة دمي واني اعيط : ياربي شوكت ارتاح اني ليش هيج حظي والله راح اموت .. منوو عفية منو صوبه
بنان : كافي روان ميصير اليوم خطوبتج لتبجين أن شاء الله مابي شي كافي
روان : فهميني يا كافي بنان يا كافي ياسر متصوب
بدون ماحس على نفسي صرت وابجي واشهك وبنان وريم يبجون وياي ويحاولون يسكتوني
روان : خاف يصير بي شيي
حضنتني بنان وگالت : ميصير شي بي والله بس اهدي كافي لتبجين
روان : والله ما اكدر ما ابجي شلون بنان شلون اذا صار بي شي
بنان : بيش مفاوله كافيي روان
روان : شكد حظي فكرر انيي من يوم يومي ما مكتوب النه الراحه احنه ابد
شو ما اشوف غير ريم عاطت بيه وگالت
_ شبيج روان كافي عود هاي انتِ القويه شبيج اصحي علئ نفسج مابي شي ياسررر
روان : لا بي بي
لزمتني حيل من راسي وگالت : هدي داكلج مابي شي اصاوب بجتفه وهسه راحوا اخذوا للمستشفئ ومراح يطلع بي شي
باوعت علئ بنان كامت مني يمي وحاطه ايدها علئ بطنها شلون وحده التلوب راحت ورها رزان وگالت
_ شبيج بنان اكو ديوجعج
بنان : لا ماكو
رزان : لعد شكو كاعده تلوبين
بنان : عوفيني رزان روحي يم روان معليج مني
رزان : بس كليلي شنو الي بيج
بنان : مابيه شي بس كعدي يم روان لتعوفيها
اباوع علئ بنان تبجي علئ صفحه ولازمه بطنها فـ كلت اكيد بسببي فمسحت دموعي وگمت كعدت علئ القنفه وحاطه ايدي علئ وجهيي
وكامت ريم تبجي ولازمه تليفون كلسع دك علئ واحد من الولد بس محد يجاوبها
______
ريم
بقيت طول الوقت ننتظر بلكي احد يخابرنه ويكللنه بس ماكو ادك علئ الولد ماكو ولا واحد يرد فأجه بالي مؤمل فرحت فتحت الحضر منه واتصلت بي بسرعه رد وگال
_ هلا بريمتي
كمت ابجي وگلت : عفيه بس كُولي ياسر بس شي
_ كافي شكو تبجين مابي شي وهسه جنت يمه كعد واصلا يريد يطلع
ريم : صدك تحجي كول والله
مؤمل : لا جذب شبيج صدك كاعد مابي شي
ريم : كول والله
ضحك وگال : والله
ريم : لا لا كاعد جذب عليه
_ مو حلفت ليش اجذب
ريم : اي حلفت وانتَ تضحك ماا ماا احجي صدك ياسر بي شيي
_ وداعت الغوالي مابي شي
ريم : اكيد
_ ايي ، ظاهر تحبين ياسر هواي
ريم : شلون متريدني احبه
_ اي يابه روحي حبيييييي
ريم : ترا اخويه
مؤمل : ادريي لو مو اخوج اعلكج بالبنكه غير
ريم : شوو روح
وجان اسد تليفون بوجهه وروح يم البنات اطمنهم علئ ياسر احس شويه هدئن بس نظراتي راحت الـ بنان كاعده علئ صفحه لازمه بطنها تلوب ..
__________
بنان
مرت بعدها كم ساعه وروان كلسع تبجي وتسكت وامي وزوزو بيناتهن مناحه صايرهه
منحس غير صار صوت برا قوي وصوت سيارات وهورنات عرفناهم اجوي
باوعت لروان كامت بفرحه وركضت للباب وكلنا رحنا وراها
زوزو صاحت : يمههه وليديي اجههه
فتحنا الباب واحنه نباوع عليهم كلهم التموا ينزلون ياسر وهو يعيط : يابه دعوفوني شني عبالك مو متصوب بجتفي عبالك مشلول
عاط عليه عمي : انجب فوكاها يفاول
ياسر : شسويلكم خل انزل
فهد : بس تصير زين اكتلك كتله معدله
ياسر : اوي اوي يمه خفت لحكيني
ضحكنا عليهم بس يتناكرون
التفتت على روان عيونها تلمع وتمسح بيها : ولج شبيج ضمي دموعج شوفي كلشي مابي خطيه وانتِ كالبه الدنيا ومكعدتها
روان : والله الدنيا بدون يسورتي متسوى اموت بعده
رزان : لك عيني اسمع الغززززل
ريم : وهي اذا تشوفه تكصيها ويا عراك ومكافش
و وراه تبجي وتصير رومانسيه
بنان : يلا وخرن خلي يفوتون عيب واكفين
طلعت خاله رحاب تبجي على ياسر خطيه و زوزو ضلت يمنا بس تبجي
فاتوا همه يتناكرون ويضحكون بيناتهم بس مؤمل گال
_يلا اني بعد تأخرت على البيت بس شسمه عود خل اشوف مرتي دقايق
فهد : دمشي ولي والله حلوه لزك ف لزكه
مؤمل : اكول عمي تقبل انتَ اشوف مرتي معليه بولدك واكفين ضدي
محمد : اي بويه براحتكم
همام : لاااا يابه ماكوو
ياسر : اي والله ماكو شوية احترموا المريض
مؤمل : بس ترااا مرتي يمعوودينننن
فاتوا طبوا للصاله كعدوا يسولفون بعدها طلع ايهم أخذ رزان فوك
وراها اجه همام ضايج وگال : وين ريم
بنان : هناك ريم كاعده يم روان وزوزو ليش محتاجين شي
همام : لا يمعوده عود رجلها يريدها
لزمتني الضحكه على شكله صاير عصبي ويغار
صاح لـ ريم وراحت وياه طبوا لصاله شو ورا شوية طلعوا ياسر وفهد
ياسر : اهخخخ ولج يمه ايدي وهذا يريد يحجي وي اختيي
فهد : شو وخر روح فوت انتَ مابيك شي خل ارجع يم همام اضل يم اختي
ياسر : وعينك على مؤمل خوش
فهد : توصي حريص
التفتت علية ياسر يضحك واني عيني على فهد ما حجه وياي ولا انطاني اهتمام ولحد الان اكو نغزات ببطني خفيفه بس توجعني
كال ياسر : اكلج وين رواني
بنان : يم زوزو
ياسر : صيحيها بلا أمر عليج عمي
بنان : اني كاعده هنا ادليكم على زوجاتكم
ياسر : ها شو ضجتي
بنان : لا مضجت
ورا شويه طلعت روان تباوعلي صفح وتضحك صعدوا فوك وضليت وحدي اني انتضر فهد
_________
ريم
صاحني همام كلي مؤمل يريدج
جان كل الي بالي نضل وحدنا
اول مطبيت لكيت اخواني وهو كاعد يمهم ضليت اباوع بتوتر عليهم
كال ياسر : اي بسيطه شوفو لحد يخليه وحده هذا خوش اني تعبان حروح فوك للغرفه
فهد : اوكف اجي وياك
ياسر : يابه مابية شي
ريم ؛ يلا عادي اني اوديك حتى لو مابيك شي
ياسر : دكعدي عيني سندريلا مثل موصيتكم انتَ همام ابقى هنا هم خوش
همام : مو بعيني يا خويه
طلعوا ياسر وفهد وهمام ضل وياي
رحت كعدت كبال مؤمل يم همام ومؤمل تعصب ويخوزر
گال كدام همام : تعاي يمي شني اريد احجي وياج
همام : ترا كبالك يعني بعدين اني اخوها شي اكيد تكعد يمي
جان يباوع بمكر وگال : تعاي " مرتي " ركز على هاي الكلمه وكمل ، تعاي يمي كعدي
همام : ماكو ريم ضلي يمي
ضليت اباوع عليهم يتعاركون بالنظرات واحد يخزر بالثاني واني مصدومه
ورا شوية فات فهد وهم اجه كعد بصفي صرت اني بالنص وبصفي همام وفهد
مؤمل : هيييي ترا مرتي وعلي اذا متخلوني اكعد يمها اصيح ابوكم وعمكممممم
فهد : والله لو صيحح منو ما اخليك
مؤمل : اي والله يابههه شنييي ترا اصلا اني متأخر على أهلي دخلي احجي وية مرتي شمسوي ماكلهااا
گال فهد بدون اهتمام : اي كلشي اتوقع منك
گال مؤمل وهو يباوعلهم : شلونج حبيبتي
ضليت مفهيه بوجه وهمام وفهد شالتهم الغيره
فهد : انجب لك عار يحجي كدامي مو اكوم اورم وجهك مؤمل احترم نفسك
همام : هاي شنو طوختها حيل مؤمل
تجاهلهم وكمل كلامه وگال : يعمري مستحيه يلا ولا يهمج ؏ الجايات نسولف واذا منضل وحدنا اشوف شغلي وية ذوله مخابيل اخوانج
فهد : هاي عليمن مخابيل ؟
مؤمل : علئ الغوالي
كام همام وگال : لاااااا وصلت حدهاااا
مؤمل : دروحو بزعتوني وضوجتوني
كام بزعل وفهد وهمام يضحكون عليه : عفية عفية يلا شوفنا عرض اكتافك
مؤمل : اصبرلي فهد انتَ والبصفك المعقد
همام : تعاي ريمه حبيبتي
حضني وباسني من خدي ويباوعله وهو رافع حواجبه
مؤمل يخنزر وگال
_ بسيطه يصير خير
همام : ترا اخوهاا
مؤمل : خل اروح احسلي
فهد : عفية بمؤمل عفية يلا براااا
مؤمل : همزين جاي بسيارتي
طلع هو وطلعوا وراه وهو يباوعلي ويبتسملي بخفية
عيوني تلمع لما اشوفه .. والبسمه متفارق وجهي
مؤمل لما اشوفه احس براحه مو طبيعيه ، حبي اله مراح هيج ...
_______
روان
لما صعدت ويه ياسر لغرفته وصلته واني حاضنته من خصره
همس يم اذني وگال : عيونج مورمه عمي باچيه علية ؟
نزلت راسي بحزن وگلت : اي بچيت هواي
ياسر : اشتعل عمج
روان : عزااااا عمي ابوك
ياسر : غلسي علئ عمي محمود المهم .. ولج طركاعتي مشتاقلج حيل
روان : والله اني هم مشتاقتلك .. احس اليوم هذا فكر ، لا اليوم شعليه اني فكر اصلا
ياسر : شني فكر ما فكر ماقبل تحجين هيج هو تدرين ياهو السوه هاي الدكه
روان : اي صدك منو ياسر راسي وكف واني افكر منو ممكن يكون والله عيوني راحت على ما كد جنت فرحانه بجيت
ياسر : عوفي البجي أنتِ رواني القويه واني زينه شوفي مابية شي .. هسه انتِ تعرفين منو
روان : كول منو
ياسر : يوسف ابن خالتج واخوه التحفه
روان : عزااااا تعزينا
ياسر : فهد ومؤمل نفس الحظات لازميهم وهسه بالسجن
روان : يمه جايين من بابل لهنا علمودك
ياسر : ايي لان عقدنا
روان : الله ياخذني هسه اني شبية وهذا حبني
ياسر : شوفي خل احجي العلية .. ترا انتي تخبلين وحلوة جمالج يجذب انتباه وكفشة شعرج وحدها قصه هو النعال حاط عينه عليج ، بس انتِ الي اني مو لأحد أنتِ رواني وطركاعتي ولما سمع خطبتج الظاهر متخبل واني ذيج المره كلت انوا اني اريدج وأنتِ الي كدامه فـ شاف ماكو امل و عمامه محد اجه وياه تخبل وجايب اخوه وجايين .. معلية ماريد اتذكره هو بالسجن ياكل نعل المهم هسه أنتِ يمي وكبالي كلشي ماريد غيرج
حضنته وگلت : والله خفت عليك حيل ماكدر بدونك
ياسر : يمههه لو ادري هيج حضنج حلو جان من زمان عقدنا
ديريد يوخر بالغلط ايدي طخت بمكان الشاش الملفوف على ايديه وهو كال بألم : اهخخخ
روان : عزا والله مادري اذتك والله صوجي اني المخبله ما انتبهت
ابتسم ابتسمامه وگال : يول عمي شبيج ترا طخه لتكبرين الموضوع عاد
روام : انتَ متفتهم اني اخاف عليك ليصير بيك شي هسه شلون اني راح اعوفك واروح بالي رح يضل يمك
ياسر : نامي يمي
روان : لا والله حتى نصير حديث البيت غير
ياسر : لعد شلون اني مشتاقلج
روان : اني هم
بحركه خفيفه تقرب وباس خدي وگال : مو خد كيمر
روان : ياسر خاف يجي همام
ياسر : معلية معلية ابقي لج
روان : هسه انتَ محتاج شي
ياسر : معوز حنان والله
روان : اكعد راحههه اميري الوسيم يا حنان هسه وكت حنان بهل زلك ليروح أحد يجفت علينا
ياسر : من دنعل ابو حظك يا ياسر شوكت ارتاح من هذوله اني
روان : هسه انتَ يعني ايدك توجعك لو لا
ياسر : تردين الصدك اي توجع بس من اشوفك يروح ابو الوجع
باوعت عليه وعيوني تلمع : يعمري يَسورتي الرومانسي
هو باوعلي وحظني وگال : احبچ عمي
روان : اموت عليك
_____________
بنان
رجعت كعدت بغرفتي وحاطه ايدي علئ بطني ولحد الان الوجع مستمر ..
فات فهد وهو تعبان ومبين بالكوه ديمشي حتى
كمت عليه بسرعه ورحت حضنته وگلت
_فهد وينك تأخرت بالي يمك
بادلني الحضن بس كال ببرود : اي جنت يم ريم و مؤمل وراها كعدت يم امي وابوية وجيت
باوعت عليه بحزن وگلت : فهد شبيك ليش هيج وياي انت
فهد : شبية ؟
بنان : كلبت علية صارلك اسبوع كامل مو نفس فهد الاعرفه
ابتعد عني وراح يطلع ملابسه وگال : لا بالعكس عادي مابية شي
نزلت دموعي واني احجي : لا بيك شي انتَ دتسوي هيج بية لان زعلان والله اني اعتذرت الك وكلتلك هم بس انتَ شبيك وياي ليش هيج متغير
دار وجهه وگال : بوية ما بية شي اني تتخيلين
رحت كعدت ؏ الجربايه ابجي : ما اتخيل ما اتخيل انتَ تغيرت علية
مجاوبني طب يسبح واني ضليت آكل بروحي وقهري
وابجييي : هو ديسوي هيج وياي حتى يكلي شوفي انتِ هيج سويتي بية
كله صوجيي اني الغبية كلهه صوجي
كعدت ابجي وبطني زاد وجعها حطيت ايدي عليها ومن خوفي زاد بچيي
طلع من الحمام واجه علية بخوف وگال
_ بنان شبيج دتبجين هيج
بنان: بطني دتوجعني
فهد : من شنو
بنان : من القهر
اجه كعد يمي وگال : وليش تقهرين روحج
بنان : يعني مفروض ما اقهر روحي
فهد : ايي
بنان : مادري حتى مماكله شي
فهد : عفية عفية صومي ماوصيج
بنان : هسه عوف الاكلل والله احس بطني دتوجعني
فهد : من شوكت
بنان : من جنتوا بالمستشفى
فهد : خاف من العلاج الي تاخذي
بنان : لا بالعكس ما بي اعراض جانبية هذا
فهد : خاف تقلصات لو شي
بنان : يمكن
كعد بصفي ؏ الجرباية ، حظني حيل واني زدت بالبجي واني حاضنته گلت : فهد حباب لتعوفني
فهد : منو گال اعوفج
بنان : محد بس اني اكول
فهد : لا بوية ماعوفج .. أنه اعوف روحي وماعوفج غير أنتِ درابين كلبي
بنان : لعد شبيك هيج صارلك اسبوع وياي والله اعرف نفسي غلطانه ومرات اجفص وماعرف اتخذ قرارات بس مو لـ هلدرجه اتعاقب
فهد : بس أنتِ تشوطين الواحد بسوالفج حقي انكلب عليج يعني صدك تخبليني .. أنتِ ما واجهتيني وكلتي هيج وهيج حتى اشرح احجي حتى متنطين مجال وكم مرة كايل متطلعين بدون علمي وشلون ضمين حملج عني
بنان : اسفه والله التوبه بعد ماعيدها
فهد : تمام هاهيه شكو تعتذرين تصافينا
بنان : فهد صدك طلع يوسف هو الي سوة هيجي بياسر
فهد : اي هوه
بنان : ياسر حالته زينه هسه يعني
فهد : والله هو شي اكيد ايده توجعه الطلقه وجرحها مو هين
بنان : خطيه
بقه صافن بوجهي لحد ما قرب وجهه يم وجهي انفاسه صارت علئ وجهي ورها تقرب وباسني بشفتي ..
ونيمني علئ الفراش واجه نام يمي وحضني حيل وحط راسه بركبتي وگال
_ صارلي شكد ما مشتم هل ريحة الطيبه
ضحكت وگلت : ريحة الثوم
گام يقلد عليه وگال : فهاااد ترا بعد احط ريحة ثوم بشعريي
بنان : وانتَ عساس تفك ياخه تكُلي عادي ماكو مشكله
حضني اقوه وگال : اقبل بأي شي اني اذا جان منج
بنان : احبك فهد حيل
فهد : اني احبج أكثر بس أنتِ متسمعين الكلام
بنان : لا والله اسمعه مو كلت بعد ماعيدها
فهد : نشوف
________________
هُمام
كاعد يم ياسر بالليل وهو يلعب بتلفونه ويتمضحك
وصلتني رساله من مَي مكتوب بيها
" جيت ادور عليك مالكيتك ، أن شاء الله اخوك صار احسن ؟ "
رديت عليها " الحمد لله زين هذا وينه .. أنتِ شلونج "
مرت دقايق يلا جاوبتني " الحمد لله اسأل عليك "
ضليت افكر ادك عليها بس ياسر موجود كلتلها : الحمد لله بالمحادثه متشلعين الگلب هواي
- شقصدك
- لا مقصدي شي
- اي تمام يلا .. تصبح على خير
واني ما اتحمل الا اجفص كلتلها : الله وياج
بعدين استوعب مسحتها وكتبت : وانتي من اهل الخير
________
بنان
مر اسبوع كامل وعلى نفس الوضع لحد ما قبل يوم فهد گال .. تحضروا باجر نروح كلنا للنجف وللمقبرة
الكل أخذ احتياطاته وسهرنا بالليل واحنه نحضر امورنا وغراضنا حتى جنط حضرنا بالليل كلشي حتى الفجر نطلع منا ..
نزلنا ثاني يوم الفجر ورا صلاة الصبح مبدلين وكلشي محضرين واول مرة اشوف روان لابسه شال من رزان
قسمت سياراتنا هنه 3 سيارات وحده مال فهد وحده مال حسن وحده مال ايهم
سيارة فهد بس اني وفهد ما قبل أحد يجي ويانه
بس سيارة حسن انهجمت مضل احد مراح بيها جانت بيها عمو محمد خاله رحاب وزوزو ومريم وفرح يم همام ووياهم همام كاعد بالاخييير والكل منجعص
أما سيارة ايهم بيها عمو زياد ورزان وروان وياسر
مؤمل اجه ويانه بعلم من فهد وعمو محمد وريم راحت وياه بسيارته
سيارة حسن رادت تنفجر كلت لفهد : شبيك انت ليش هيج نحيس خلي بعد يجون ويانه
فهد : شلون ما ضل يم مرتي اني ؟
بنان : لا عادي بس يعني خطيه
فهد : هسه نوصل
بنان : الله باع السهوله اللي تنحجي خطيههه
فهد : معليج أنتِ
شغلنا السيارات وتوكلنا طلعت اول شي سيارة فهد بالبداية وورانا الباقين كعلامه الهم
طريق النجف بالليل خاصةً شوية متعب نوعاً ما لان احنه بالليل طالعين اصلا
ضليت اباوع عالشارع وعيوني تلمع
گلت بهدوء : يعني راح اشوف قبر اهلي الحقيقين
- راح تشوفيهم .. وراح تشوفين ماما الهام على كولتج
ابتسمت ونزلت دموعي .. واخيرا كدرت اروحلهم بعد كل هذا التعب
دقايق وما احس غير غفيت
ضليت انام واكعد اسأله : وصلنا ؟
وهو يجاوب : لا بعد
احس متشوقه ومتلهفه حيل لحتى اشوف الكل وداخلي يبجي دم
اخر شي غفيت وراها كعدني فهد : يلا بنان وصلنا هذا مطعم بس خلي نتريك وبعدها نروح للمقبره خوش
هزيت راسي بدوخه وتعب : فهد احس نفسي لعبانه
فهد : شبيج بويه من شنو
بنان : مادري من الطريق مطالعه هيجي من قبل
فهد : سهله تهون يلا ننزل باعي كلهم نزلوا
التفتت وأشوف الجيش كله واكف گلت
- اي يلا
نزلت بهدوء وهو اجه يمي هم ودخلنا ربع ساعه بالمطعم بس اكلنا ورجعنا للسيارات وكملنا طريقنا
تمشي السيارة واني دموعي تنزل كُل منقترب اكثر گلبي يوجعني اكثر ..
فهد يحاول يسكتني بأي طريقه بس ميكدر
اول ما طبينا واني اباوع عالقبور ما اتحمل اول مرة اطب هيج مكان من قبل ...
ورا ربع ساعه وصلنا طبكوا السيارات ونزلنا نمشي واحنه ندورهم
صاروا كدامنا عمو محمد وعمو زياد وزوزو علكيفها تمشي هي وخاله رحاب وكل مجموعه وحدها
لحد ما فهد باوعلي وهو متوتر من ردة فعلي گال
_ هذيج قبر عمي اياد وخاله سراب
دمعت عيوني واجني يمي روان ورزان وحده مچلبه بالثانيه ويرجفن وعيونهن مدمعه
لحد ما صرنا قريبين عليها حيل
نسيت خواتي ونسيت الكل
جانوا بس اهلي بالي .. تذكرت لما شفتهم بالصور
كمت امشي بدون ما احس وكبل رحت عليهم
ما احس باللي حولي بس اسمع بجي
طحت بين القبرين جانوا اثنينهم نفس المكان
حطيت راسي على قبر امي ودموعي تنزل واحجي : يمه وأخيراً اجيت لقبرج انتي وابوية .. اهخخ يا يمه ليش جبتينا بهل دنيا وبهذلتينا بين العالم .. ليش متتوا وعفتونا ايتام .. ليش عفتونا بيد جمال يمه تعذبنا حيل شصار لو انتوا عايشين ، مو جان المفروض هسه حياتنا حلوة وعايشين بسلام مثل كل بنية يمها عائلتها
يمههه والله تعبت من كُلشي صار ويانه ، ياريت لو أنتِ يمنا جان ما تبهذلنا .. جان ما باعني جمال ولا رزان انخطبت لامير ولا انهزموا بيوم عرسها .. تدرين شنو اني افتقد حنان الام الحقيقية .. ماما الهام ما قصرت وربتنا يمه بس محتاجتج كلش
التفتت ودموعي تنزل على قبر أبوية وگلت
وانتَ بابا ليش عفتنا ليش متت وعفتنا بدون امان .. لو تدري شكد تبهذلنا من بعدكم وشكد عايشين عيشه ذليله
بابا انت بالذات اني محتاجتك لان عمري وحياتي ما حسيت بإحساس الابوه والأمان ، عشنا برعب وخوف طول حياتنا هاي بدونكم .. عشنا يم انسان ظالم هو الي سوه كل هذا بينا وبهذلنا ..
هواي اشياء بداخلي مجنت أكدر اعبرها
لحد ما حسيت احد يجر بية واني ادفع بأيده واعيط
_ وخر وخر خليني احجي وياهم ليش عافونا لحد يلزمنييي زدت بالبجي أكثر واكثر لحد ما اتهسترت لما ترجع على بالي جمال والي سواه بينا والعيشه والظلم وكُلشي صار
لحد ما هديت اباوع عالمكان مابي احد غيري اني وفهد والبنات يبجون وحده حاضنه الثانيه
قبل شوية جان الكل هنا ..
گال فهد بهدوء : حاس بيج بنان .. ما اكدر امنعج شكد متبجين ابجي
بجيت ورحت حظنته وگلت : فهد .. احس اريد اشوفهم بالحقيقه روحي تتكطع مدا اتحمل
كام يمسح على راسي ويحجي بهدوء : اششش يلا كافي
جاب بطل مي وغسل وجهي واني اشهك ولحد الآن تنزل دموعي واني اباوع على قبورهم
كلت بهدوء : وين الباقين وين راحوا
فهد : أنتِ ما حسيتي على نفسج بعد تدرين صارلج هواي هنا لو لا خواتج ضلوا يمج يريدون يسحبوج وانتِ تدفعين بيهن حالهن هم مو احسن من حالج مدريتي شصار عفتج ما اجيت عليج لان اعرف انتِ محتاجه تضلين يمهم وتشكيلهم .. صعبه كلش لهذا ما اكدر امنعج بس بهاي حالتج ميصير شوفي ملابسج كلها تراب صارت
بجيت بالزايد ورحت عليهم حضنتهن واني ابجي وهنه يبجن
التفتت لفهد وگال : وين الباقيين
فهد : راحوا توجهوا هسه للامام علي .. انتوا هسه اني راح اخذكم لامكم الهام والباقين كالوا راح نروح وتعالوا ورانا امشوا اوديكم
مسحت دموعي وباوعت الهم نظره أخيرة وكمت واحس جسمي مشلول بالكوه امشي
كالت روان : وين قبر ماما الهام
فهد : هنا تعالوا
زدنا بالبچي والذكريات تنزل علينا
منشوف غير ورانا سيارة وجايين ياسر وأيهم
التفت فهد وباوعلهم : هذوله مو راحوا شجابهم
ياسر مد راسه : لتخافون منروح بس جبنا مي للقبر شبيكم تروحون هيج
نزلوا يمشون ويانه وأيهم ويه رزان وهي تبجي وروان وياسر نفس الحاله
كل واحد ضل ويه زوجته
كلت لفهد : يعني هنا هي .. ياريتني اني الميته
فهد : شنو هل حجي بنان ما اقبل لتفاولين ودموعي تزيد تنزل
هم مشينا مسافه وكال ياسر : هذاك القبر مو فهد
فهد : اي
بجينا وجتي يمي رزان ترجف : لج بنان كله بسببي هي ماتت شلون ما اتحمل هو جان عرسي ياربي لج حموت والله
بجت روان : واني الي طلعت الفكره وكلت خل ننهزم كله صوجي اني مو انتي
ضلوا يبجون واني حالي مو اقل منهم
وصلناها وكعدنا يمها نبجي ونشكيلها عن حالنا وشصار بينا .. روان هي متبجي اول مرة اشوفها هلكد تبجي وعيونها حمر صارت وياسر ميعرف يهديها وميعرف يتصرف بهيج مواقف
ورزان ملخت روحها وهي تردد نفس الكلمه : كله بسببي
ايهم جان مهتم بيها كُلش كاعد يمها ويحاول يسكتها
واني الوحيده الي احس غصة بداخلي لان جنت قبل اتمنى فهد يرجعني الها حتى ارتاح واشوفها
فهد جاب ألمي وغسل القبر واحنه نبجي يمها ونشكي
لزمت قرآن وكعدت اقرا يمها لحد ما مرت مده
وكال ياسر : ها نروح
روان كالت : محسينا بالوقت والكل راح يلا
كمنا كلنا روان ورزان راحوا بسيارة ايهم
واني وفهد رجعنا لسيارتنا وبعدها توجهنا للامام
بعد ساعتين او اكثر
وصلنا الامام
رفعت راسي والدموع بعيني واني اشوف قبة الامام والناس والزوار
يمنا الكل ريم وخاله وبيبي
تجمعنا كلنا برا وكالت خاله رحاب : يمه روحن طبن زورن واني ازور بيبيتكم بالاخير خوش
كالت ريم : تعالو اني اندل منين
طبينا كلنا سوا للامام واحس قشعر بدني من المنضر
والريحه الطيبه والبخور والهوا البارد .. بعد كمية البجي البجيته احس براحه مو طبيعيه لما دخلت باوعت من بعيد على شباج الامام ما اهتميت للناس كلهم نزلت دموعي وما اعرف شلون كدرت الزمه رغم الهوسه وخفت لا اضيع بس ريم جانت ويانه وكلنا سوية
لزمت شباج الامام ودموعي تنزل وهي تشكي كل تعب مر علينا وكل ألم بهل ساعات ما وكفت دموعنا ابد وروان ورزان هم كدروا يكمشوا .. كلش ارتاحيت واحس براحه ملت گلبي
اخذتنا وكعدنا صلينا وقرينا قرآن وطلعنا تجمعنا كلنا برا وورانا طبت خاله رحاب وزوزو زاروا وطلعوا
والولد هم جانوا كلهم زايرين ومخلصين ..
تقريباً جانت الدنيا عصر عالمغرب لان احنه تأخرنا حيل بالمقبره ولما وصلنا الامام ساعه 5 العصر او هيج ..
كال عمو محمد : تريدون تروحون للسوك ؟
كال ياسر : يابه تعبانين حيل خل نروح للفندق وبعدين بالليل كلنا نطلع للسوك ميصير كله سويه
قبلوا كلهم رحت يم فهد كلتله : حنروح الفندق
فهد: اي حنروح .. شلونچ بويه شلون صرتي بالي يمج
بنان : زينه كلش ، متتخيل شكد ارتاحيت لما شفت اهلي كلهم وزرت .. احبك فهد والله
ابتسم لي وكال : مو بكدي
بالنسبه للبنات احنه كلنا تجمعنا نمشي سوا جان الفندق قريب وسياراتنا بالكراج
والولد يمشون كدامنا ووراهم
ضلينا نسولف
روان : بنان حيل ارتاحيت
رزان : اي والله اني هم حيل
ريم جانت تباوعلنا وعيونها مدمعه
ابتسمت الها وكلتلها : شبيج ريمه ليش احس بگلبج شي
ريم : مثلكم كلش مرتاحه .. توجه نظرها لمؤمل وكملت وگالت : لان مؤمل وياي هم اليوم احلى يوم بحياتي احبكم انتوا حيللل
كالت روان : والله احنه نموت عليج انتي اختنا الرابعه
ورا دقايق وصلنا الفندق راحوا الولد حجزوا النا غرف شكد بحيث سدينا الفندق بعائلتنا
غرفه الي والفهد وغرفة ل رزان وأيهم
وغرفة لريم و وروان وخاله وزوزو وغرفة للولد وهيج ..
من طبيت للغرفه وفهد فات وراي بتعب
حسيت وجع بطني رجع ..
تورطت يعني الا بهل يوم بطني هيج تصير
فهد انتبه الي وگال بخوف : بنان شبيج
كلت واني لازم بطني
_ فهد بطني دتوجعني حيل مادري شبية
نهاية البارت
يتبع ...
(لاتنسوا التصويت)
أن شاء الله بعجبكم البارت 💖 + بال 5000 كلمة
7.nldn حسابنا الأنستا
إلى اللقاء يا أعز العابرين في قلبي ♡.
الكاتبات دينا & نور