شفاه مخملية

35

البارت الخامس والثلاثون

"جواهر"
عيوني تهمل دمع وراسي احسه انفخ من گدما جر بشعري، ماعرف شنو حيسويلي طلعهم بره وقفل الباب اسمع لعياط هجران وبچيهه تتوسل بي حتى ميسويلي شي وهوه مطنش ولا يمه الموضوع...

اريد انهض روحي من الگاع ماعندي قوة من الكَتل، اللتفت عليه يباوع واخذله صفنه، عيونه يتوزعن ؏ كل جسمي وعاگد حاجبه..

طَول دقيقتين ؏ هالحال واجه تقربلي، گنبص گدامي ولزمني من زندي يريد يگومني، طلع صوتي وصحت بتعب....

-جواهر: لااااء اتركننييي بكرررر آآه كااافي وخرررر علليك الله

اتوسل بي يوخر عني وميخرب حياتي وياخذ اعز شي عندي، ماهتم لصرخاتي وجرني گومني ؏ حيلي وهمس....

-بكر: ياهو التحبي؟

حركت راسي نافيه اكذب السمعه بلكي يقتنع ويهدني، حچيت متوسله...

-محد والله ماكو احد والله... ماكو...

-بكر: جواهر تحچين هسّ لا اعرف بطريقتي وأأذيچ واذبحه يله انتي حددي

-ماكو شبيك انته

طبعاً بالگوة يطلع صوتي مبحوح..

لزگني بالحايط ولطش جسمه بيه، لزم شفايفي بيده وراد يتقرب يبوسني، صارعته بأيدي وابچي.. جزع مني وانطاني راشدي شعل خدي، رجع يجرني من شعري ويحچي مُحذر...

-بكر: لهدرجة تحبي وتخافين تگولين اسمه

-جواهر: بكر عليك الله بداعة بنتك عوفني ماكو احد صدگني

هدني وابتعد، ينفخ نار ويفرك بوجهه،، وازنت روحي ورحت اگعد بزاويه الغرفة وحظنت جسمي، تذكرت ملابسه ستره من چان يضربني نزعنياهه.. گمت اروح اخذهه وجرني من ايدي وشمرني ؏ السرير..

-جواهر: لا حباب حباااب بكرررر

نتر بيه....

-بكر: اشششش لا تدوخيني مراح اسويلچ شي

ماعرف حچة هيچي حتى يهدأني وماصرخ لو فعلاً يعنيهه، اللتفت عليه وگال بحرگة...

-بكر: بت الچلب حتى من تبچي حلوة

زدت بالبچي وظميت وجهي، گعد ؏ طرف السرير يتمايزني ردت اگوم ورجع دفعني حتى انام ماعرف شديسوي وليش هيچ ديسوي، جر حسره قويه وگال...

-بكر: انعل ابوچ ؏ هالبياض والجسم مقسم يگول مليكان (اليعرضون عليهه ملابس)

-جواهر: شتريد مني انته؟

-اريد اعاين لجسمچ شني مايصير؟؟

-جواهر: بكرر احچي الصدووك

-بكر: انعل يومچ ساافله لا تتماوعين من تحچين لا وعلي اهجم عليچ هسة

بچيت وگلت بجزع...

-جواهر: استغفرر الله اني هيچ احچي يعني شلوون

-انچبي يله وگليلي اسم الگو** التحبي

-گتلك ماكو احد

-بت ال**** چذاابه رفضتيني علموده موو

-جواهر: اني رفضتك لان اعتبرتك صديق وماعندي مشاعر تجاهك

-خوب من تتعودين عليّ راح تحبيني

-لا بكر احنه من البدايه چنه أصدقاء ومستحيل يصير شي بيناتنه

-بكر: وانه ماشوفچ صديقه

-هسة انته شتريد؟

-ماريدن شي بَـس گوليلي ياهو هذا واعوفچ والله

-ماگولك ويله خنشوف شنو تگدر تسوي

-هاااا شو هسة رجعتي للسان الطويل مافادتچ الكتله

سكتت وهوه هم سُكت، فرك وجهه واستغفر بصوت عالي گام عن السرير واني عدلت گعدتي وجريت سترتي اريد اللبسهه، گال...

-بكر: لبسيهه لبسيهه بت ال*** هجت من وراهه

عفست وجهي مشمأزة ولبستهه سريع ولبست شالي شلون مچان وصوت هجران لسه عالي تضرب بالباب وتبچي، وزنوبه فحطانه اكيد تشوف امهه تبچي وتبچي نفسهه..

حچة ناهي الحديث...

-بكر: اذا ماگلتيلي شنهي اسمه والعباس أبو فاضل اعرفه بطريچتي وافني عن الوجود وگولي بَكر ماگال

-اگول لعميد الدين عليك والله

فتح عيونه وزادت عصبيته، عاط بعلو صوته حتى خله هجران البره تسكت...

-بكر: جوااااهرررر اذاااا حچيتييي لعميد أي شييي من الصااار اليووووم والله والله والله وروووح امي اذبح اخوچ واحرگ گلبچ عليه!!!

-ايااا نذذل ليييش ولك اني شمسويتلككك

-هيييچ نذااله ورووح امييي وماحلف بروحهه چذب اذا افتهمت گايله لعميد ان انه كتلتچ لو حققت وياچ وعلي اعتبري اخوچ بعرس اختچ شهد ميت ارمي بعرسهه وچيله بنص گلبه احطهه واگولن بالغلط هااااا هسه شنيي تگوللين؟؟؟؟

هزيت راسي بحسرة ونزلته، همس...

-بكر: يعني ماتحچين؟؟؟!

-جواهر: حُب من طرف واحد والله

-بكر: ههههههههههههه ههههههههههههههه يابويييه ضحكتيني ااخخخ بوويه هههههههههه شني شني؟؟؟ حب من طرف واحد؟؟؟

-اي والله

-ايااا چذااابه يعني تردين تقنعيني انتي گايله لزلمة احبك ورفضچ!!! جوااهر هاييي احچيهه للدُبة

-والله العظيم هذا الصار

-چذاااابه وهوه هم چذااااب كلكمممم چذابيييين يااا حُقرااااء يا گو* يا  انتي ويااا ثنينكم *** ادبسزييييه والعباااس رح اعرررفه واذبحه بأيدي وشوفييي

گال هالكلام وفتح قفل الباب، هجران صارت بوجهنه تضرب ؏ صدره وتبچي...

-هجران: حراااام علليييك حسبي الله ونعم الوكييييل بييييك

-بكر: وخررري لا تتسودنين ماسويتلهه شييي

-هجران: چذااااب بكررر وديني لبيييت اهللي هسسسسه

-بكر: گتلچ لا تتسودنين وروحي سأليهه بَـس ادبتهه شوي

-هجران: ميخصنييي هسه توديني لبيت اهللييي

عافهه ونزل جوه وهيه راحت لزنوبه اخذتهه من جوري واجت للغرفه باوعتلي نظره عتب طوووييله ماعرف اني شنو ذنبي بَـس حقهه عبالهه زوجهه لعب ويايه وسوالي شي، طلعت جنطة من الكنتور وگامت تطلع بالملابس وساعه تسكت بزينب، تقربت عليهه وبچيت...

-جواهر: هجران مسوالي شي والله

-هجران: اششش جواااهر مابيه اسمع أي شي

-جواهر بصياح: لعددد انييييي شنووووو شيخصنييييي دمرررني وكتلنيييي لييييش كله لان انهااانت رجولته شوويييه!!!!! وانتي دتزيديهه عليه وحتى متباوعين لوجهيييي

ذبت الملابس من ايدهه وگعدت ؏ السرير، غطت وجهها ودخلت بنوبة بكاء طوييييله واني گعدت بصفهه وهم ابچي وجوري اجت ورهف تحظن بيه وتبوس وغزاله من الجهة الثانيه وفتوح ونرجس نزلن وره بكر اللوگيات...

بعد حوالي الساعه هدأنه وزينب نامت گدما بچت وتعبت، علاوي ابن جوري گعد ونزلت جابته ورجعت يمنه..

-جوري: بنات كافي حبابات والله حتموتن كافي مو زين هيچي

محچيت شي گمت ورحت للحمام غسلت وجهي وعدلت شالي گوة اتحرك من الوجع الي بجسمي، اللتفتت ؏ البنات وگلت...

-جواهر: بنات امانه الصار اليوم ماريده يطلع من بيناتنه زين؟

شهگت رهف وضربت صدرهه...

-رهف: والعبااس اله اگول لأبوووي يربي من اول وجديد

-جواهر: رهوفه حبيبتي تعبانه ومبيه احچي حبابه اذا صدوك تحبيني لتگولين لعميد حباابه اترجااكم بناات لحد يحچي شي والله اني الي اتأذة..

هزن بروسهن واللتزمن بالسكوت، اخذت جنطتي ونزلت الدرج ؏ كيفييي اخاف بكر لسه هنا ويحس عليه، طلعت من البيت وقررت ماسولف لأي احد ؏ الصار اليوم حتى لأهلي لان اذا حچيت تكبر السالفه وحلاوة يروح بيهه وبكر مخبل ويسويهه، واليعَجب ليش هيچ خايف من عميد الدين بَـس واضح عميد مهدده بشي يأذي كُلش اذا ضوجني لو اندگ بيه دليل سنه گاعده ببيتهم ماحچة ويايه وولا يباوعلي كأني نَكرة...

**

"غزاله"
طلعت جواهر وهجران لسه تسفط بغراضهه، كملت وشالت الجنطة وبدلت ملابسهه وهاي كله دمعتهه مانشفت تبچي وتمسح بدموعهه سوده عليه..

-جوري: هجور يعني حترحين لبيت اهلي؟

-هجران: ايي

-جوري: ماشي الله يسهل بَـس امانه سلميلي ؏ ماما وبابا وبوسيلي نداوي وحيدر

-هجران: يوصل

تحچي وياهه بنفس باردة، شالت جنطتهه وگلتلي اشيل زنوبه لان تحس رح توگع من طولهه، نزلنه جوه ندور ؏ بكر بالصاله ماموجود رحنه للهول چان حاط راسه بين ايديه وشاعل جگارة بين اصابعه، هجران حچت بصوت مخنوگ...

-يله كملت وديني

رفع راسه وتنهد، گال بتعب...

-بكر: انتي ليش گوة تردين تسوين مشكله؟

-هجران: هه اي واضح اني الاريد المشاكل

-بكر: هجران وراس زينب ما كظيتهه

-بَـس ملختهه بالكتل

-تستاهل لانهه ادبسزز

حچاهه بحده وخزر بعصبيه..

-هجران: وانتتته شيخصصصصك تحب واحد او لااا شعليييك هاااا

-انه ماعليه بَـس مال انه خاطبهه اربع سنين وترفضني من لا سبب تالي طلعت عاشگه ومچذبه عليّ طوول هالفتررة

-انته شبييك متگولي؟؟!! انته متزووجني انييي ومسؤول عني انييي وعندك بنيييه شنو لسه منسيتهه!!!

-استغفر الله ولچ باباا نسيتهه نسييتهه بَـس ردت أأدبهه لان ماعدهم زلمه كفو ويكظ البت لا تروح بين الرجلين

-اللله اكبرررر انتتتته شعلللللليك

-چااا غير تصير بت خال اختيي وچانت عايشه ببيتنه لاا والله حلوووة تريديهه تظل بحظن الزلللم وحنه نتفررررج وين الغيييره هاااا

علت اصواتهم والعركة كبرت، وهجران راكبه راسهه اله تروح لبيت اهلهه اصلاً حسيتهه وحده ثانيه تصيح وتتعارك ويه بكر وتلاسنه حتى هوه صفن عليهه وكأنها لبوة مجروحة وتريد حقها..

مسحت دموعهه واللتفتت عليه، اشرتلي ؏ زينب وگالت...

-هجران: غزاله انطيني زنوبة خليني اطلع

-بكر: نعععم؟؟؟ خييير؟؟ شتسوين بزينب؟؟؟

-هجران: لعد مو تاخذني لبيت اهلي!!

-اييي اخذچ الچ البت ماتطلع منااا

-هجران: شنووو انته شدتحچي!!! تريدني اترك بنتي هناا وحدهه وارووح

-بكر: هذاا العندي تردين تردين لهلچ الله وياچ اوديچ وانه الممنون بَـس مال زينب تطلع من هالبيت انسيييي

رجعو يتعاركون وهجران گامت تدگ وتلطم وجوري تهدأ بيهه، گعدت زينب وبدت بالبچي والبيت انخبص بكر وهجران يتصايحون وزينب وعلاوي يبچون دخنه...

انختمت عركتهم بكر طلع من البيت وگال حيروح لبغداد وكأنه حط هجران امام الامر الواقع وخلاهه تبقى هنا غصباً عليهه لان اكيييد هجران مو قويه ومو من النوع الاناني الي يهمل طفلته ومتهتم بيهه وترجع لاهلهه وتعوفهه وحدهه..

اخذت زينب مني وراحت فوگ لغرفتهه وجوري صعدت وراهه اما اني ورهف رحنه للغرفه نرتاح شويه...

-رهف: غزاله والله اله اگول لأبوي يطيح حظه هالساقطط والله لو يدري بي كاتل جواهر يذبحه

-غزاله: ادري رهف بَـس جواهر ماترضى نحچي حبابه لا نسوي مشاكل اكثر فدوه

رجفت شفة رهف ودمعن عيونهه كسرت گلبي من گالت...

-رهف: چا ماشفتي البت شلون مزورگهه الله ياخذه ونخلص منه شگذ نذذذل اكررهه انه اكرررهه

ماحچيت شي رغم حسيتهه چوت گلبي من دعت عليّ يبقى اخوي بَـس اخوي غلطان من ساسه لراسه...

لليل ورجعن النسوان زيد چان ماخذهن عدهن واجب وظل هناك ينتظرهن اوووف لو راد چان ؏ الاقل گدر يساعد جواهر ويجرهه من بكر..

متت من القهر من دگيت ؏ مرتضى كذا مرة حتى يجي من چانو بكر وجواهر بالغرفه كله ينطيني رفض مادري شماله..

رحت للمطبخ اسوي عشه وجوري نزلت چانت دايخة كللش گعدت ؏ الكرسي الجدامي بالمطبخ ونزلت راسهه، ماحچيت وياهه ماعندي مُهجة احچي شي ويه احد..

انفتحت باب المطبخ وطب فيصل هستوه راجع چان ويه مرتضى بالمحل، ودار بيناتهم حديث....

-جوري: هاا الله يساعدك

-فيصل: ويساعدچ شلونچ اليوم؟

-جوري: مو زينه فد مرة دايخة

-فيصل: خير خير

-جوري: اي ان شالله، اكولك شوكت نرجع لبغداد؟

-فيصل: مادري عود من....

دگ موبايل فيصل واضح عليه كلش توتر وظل يمتمت..

-فيصل: من هايه.. هايه من يرحون لعرس عميد عود

-جوري: يا عرس عميد؟؟

-فيصل: هاا يا عميد شمالچ انتي اقصد سلمان

-جوري: انته كلت عميد

-لا سلمان انتي مادري شمالچ

-جوري: امممم متأكدد

-فيصل: ايي

-زين منو دگ عليك؟

-فيصل: هذا واحد وياي صاحبي

-جوري: شنو اسمه

-فيصل: احمد

-امممم احمد موووو

-اي شمالچ انتيي

-اي اووّك لا ولشي بعدين احاسبك عود

-فيصل بعصبيه: ااانه چم مرة گتلچ ماتگولين هالچلمه!!!

-جوري: لازم خايف

-فيصل: جوووري سلمي ؏ روويحتچ ترا زودتيهه

گلبت وجهها وراحو جوه وانه كملت الگلي وگعدت بالمطبخ اتصفن شلون بيه وشلون رح تنتهي حياتي؟

معقوله ابقى بهالمعمعه والمشاعر المتضاربه، علاقتي ويه مرتضى كلما جايهه تصير اسوء ويتعارك ؏ اقل شي ويريد حجة حتى يهجم عليّ وانه ماگدر جسمي ماجاي يتحمل واعانده ومارضى يتگربلي وهاي حيصيرلنه شهرين متعاركين ويه بعض ومحد يدري ماگلت لأحد غير امي وتگول مابيدي شي ومن تحچي لأبوي يگول هوه زلمتي ولازم اصبر عليه..

صبيت العشه ووديته للصاله اجن عمه فتوح ونرجس ياكلن بشهية چبيره ولا چنهن شعلن بكر وخلنه يهجم ؏ البت ويملخهه..

رحت للمطبخ اغسل المواعين من كملو عشه واندگت باب المطبخ طرقات بسيطه چنهه دگت مفتاح، صحت...

-تعاال مرتضى ماكو احد

انفتحت الباب وجفلت من سمعت ضحكة رجال غريب، درت وجهي خايفه تفاجأت من شفت...

-سلماااااان

-سلمان: هههه ايي شبيچ عبالك شايفه بعبع

-غزاله: اووف يممه گلببي والله خفت شبيك

-سلمان: شلونچ ولچ غزل شلون كبرانه وصايره شابه محتحته

-غزاله: ههههه شكراً، هاي شوكت اجيت؟؟

-سلمان: هاااي جيتي من المطاار

-غزاله: ياااء ليش ماحچيت چان گلنه لواحد من الولد يجيبوك

-خايبه ردت اسويهه مفاجأة بَـس چنه البيت سنطه شني وينهم نايمين؟

-غزاله: لا جوه تعال تفضل

طب ويايه واول ما شاف خاله انتصار هجم عليهه وهيه بچت من شافته، صارله سنيين بره بالخارج اخر مرة اجه من عقد ؏ شهد گبل سنه بقه چم يوم ورجع لانه دكتور جراح وديدرس بعده، وحتى بعرسي ما اجه لان چانت امتحانات نهاية السنه عنده..

-سلمان: يمه شني شو انتي من مات ابوي عباس كلما جايچ تصيرين احلى

-انتصار: ايا مسودن بعدك ؏ طبايعك مابطلتهن

-سلمان: لا شكو ابطلهن تعااي صدك وينهه عطيات مشتاگلهه

-انتصار: ههههه جررب وگول عطيات جدامهه اله تجيب مريانه وتحوس بفادك

-سلمان: ايبااااخخ بعدهي عايشه هاي الصخله

-غزاله بضحك: چا تريدهه تموت

ضحكنه وراح لحبوبة عطية چانت نايمه وهوه گعدهه بصوته العالي...

-سلمان: هااا شنيي شو نايمه عطياات لازم كبرتي وبعد ماتتحملين

صحت حبوبه وگعدت ؏ حيلهه فركت عينهه وضحكت...

-حجية عطيه: خاب سلمان انعل ابوك يالساغط هاي يمته اجيت

-سلمان: هسّ هاااي جيتي من مطار بغداد

راح عليهه بوس ايدهه وراسهه وحتى نزل ؏ رجليهه باسهن وهيه تضحك وتگول...

-حجية عطيه: خاب گم (گوم) بلا لواگه زايده گم لا بارك الله بيك

-سلمان: صواب فگري شني حبوبه ترا انه ازعل ليش تحچين هيچ عليّ لو چان عمييّد مسويلچ هيچ چا هلهلتي من الفرح بَـس عبن انه مو حفيدچ الصدگي

دار وجهه عود زعلان بَـس طبعاً يشاقيهه، ضربت حبوبه ؏ صدرهه وشهگت..

-حجية عطيه: انچعم ياهو گال انته موش ابن عباس وينه اگظه واطرچعه بعلي

-سلمان: انتي حبوبه انتي جاي تگوليهه اشوفهه بعيونچ

نزل راسه وظم عيونه عود جاي يبچي، متت من الضحك عزا العزاك سلمان ولا تگولون رجال شكبره وشگده واليذبح دكتور..

-حجية عطيه: لا وعلي ماگولهه تعال يبعدي تعاال احبنك

بوسته وهوه حظنهه لصدره وصارو يسولفون، شويه واجو عُثمان وعميد الدين تفاجأو من شافو سلمان، عثمان حچة...

-عُثمان: سلماان هاي ايمت اجيت يول؟؟

-سلمان: خاب هستوني تعاال ليه تعال

جره وتحاظنو وتباوسو واندار ؏ عميد الدين لطش بي لطشه وكل شويه يبوسه وساعه يبوسه بچتفه وساعه ؏ راسه لحدما عميد بزع وصاح بي...

-عميد: خاااب بسسسك شني لزگت

-سلمان: الله يطيح حظك عود هاي انه مشتاگ

-عميد: اي خوب افتهمنه بَـس كافي حميت زايد

-سلمان: بالعباس مو صوچك دووخر انعل يوومك انه اخوك الچبير

ضحكو واندار سلمان ؏ حبوبه واستلمهه...

-سلمان: حبوبه عايني انه اجيت وتعنيت مو لخاطر عرسي لااا انه جايبلچ عريس

كلنه شهگنه وحبوبه عدلت گعدتهه وفتحت عيونهه...

-حجية عطيه: خااب شنهيي عريس؟؟!

-سلمان: اي شمالچ فكيتي عيونچ هيچ لازم مشتهية تعرسين يبعدي

غمزلهه وهيه ضحكت وضربته ؏ چتفه، اردف..

-سلمان: هاااا شتگولين ترا هوه صاحبي ودكتور معروف

-حجية عطيه: احاا افادي شنيي دغتوور؟؟

-اي حبوبه وشني من قلافة وشكل عليه دخيلك علي وترا هوه شايف گصايبچ الذهب ورايدچ

فطسنه من الضحك ؏ سوالفه وحبوبه تغشت بشيلتهه وحچت بحياء...

-حجية عطيه: هاي يمته شايف گصايبي

-سلمان: حبوبه انه راويته صوره الچ وگتله هاي حبوبتي وهوه خطبچ مني

-حجية عطيه: يعبااس يبنييي لا يوم عييب اسكت بسسك

-سلمان بضحك: مو حبوبه حرمات نفوته من ايدينه هاا شتگول عميد

عميد گوة كظ روحه من الضحك وحچة...

-عميد: لا سلمان فشله حبوبه موش مال زواج بعد

-حجية عطيه: هاااا هيچ تشوف حبوبي؟

-عميد: اي حبوبه الوادم تاكل وجهي بعلي

-حجية عطيه: چا هاذ هو سلمان ارفضه لا فشله شني هاذ مايستحي

-سلمان: مو حبوبه رح تكسرين گلبه خطيه تعلگ بيچ

-حجية عطيه: لااع مايخصني هاذ العندي عجبه عجبه ماعحبه خلي ياكل خر** ويسكت

طگينه ضحك عليهه وسلمان غمزلنه وگال...

-سلمان: چنچ بعدچ تحبين جدي حبوبه

جرت سنفونيه ومسحت عيونهه بشيلتهه وهزت راسهه بـ "اي" جرهه لصدره وبوسهه مرة ثانيه، سلماان معروف يموووت ؏ التبووس وگظه الليله كلهه يا جار امه يبوس بيهه يا عميد يا عُثمان يا رهوفه خصوصاً من اجت تسلم عليه شهگ وگال...

-سلمان: عمييد شنييي هاي ياهيي؟؟

-عميد: اليسمعك ماشفتهه هذيچ المرة

-سلمان: لا وعلي مامنتبه وشو ماتذكرهه

-عميد: ولك هاي رهف بنيتي

-سلمان: لاا بعليي صدك تحچي وللك تعاي تعاي يبعد عمچ

جرهه ونزل تمطگ لحدما عميد صاح بي...

-عميد: ولك بسسك بزعت الطفله وخر عنهه يله

اجت رهف تگعد بصفي تضحك عليه..

-سلمان: شني هاي شو ياهي الاعاينلهه تصج من الجمال ولكم شني شتوكلوهن حلغووم

-عميد بغرور: خاب حنه حلوين چا عليمن يطلعن

-سلمان: اي اي هاذ بسمار الي صححح

-عميد بضحك: افهمه بلي يعجبك

-سلمان: اياا مشعول الصفحة انه الك اليوم

ضحكو وگامو يگعدون بالهول تلاثتهم وانه رحت اجيب فواكه واوديلهم ورهف وياي، اتصل مرتضى ؏ رهف لان حنه متزاعلين وگال رح يتأخر ماهتميت هاي عادته يظل ويه جماعته ومايرد اله الفجر وگبل ينام واوقات احس بي يبوسني لو يحظني من وره واوقات يحاچيني ؏ كيف ويتغزل بيه وانه نايمه وهوه بالحقيقه انه مو نايمه بَـس مابيه اتجاوب وياه...

وديت صينيه فواكه الهم وفاجأني حديثهم وحسيت روحي مثل الاطرش بالزفه...

-سلمان: اويلي عليك خويه اكيد طاگك الجفاف

-عُثمان: وول لااا يُبا أنَا الطاگني الجفاف عميدي حصل بوسة قبل كم يوم

-عميد: عثماااان ولللك انه شگلتتت

-سلمان: ايباااااخ شنييي بووسة خاب شني هاي متطوريين

-عُثمان: اي وحزام الحمزة وشلون بوسة اويليييييي

-عميد: انعللل يومك عثماان وعلييي

-سلمان: خاب عُثمان حاچيني الي ماعليك بهالمعُقد

-عُثمان: خيااي مو بوسة ضيييم وچماله مصحوبة بأعتراف

-سلمان(ضرب گصته): اويلاااه يا بوووويه اشتعلو مروان وخلفته

-عميد بعصبيه: لاااا انتم كللش زودتوهه لا تخلوني اكظكم وارگع راس براس

-عُثمان: هه شحدددك

-عميد: والرضاا اسويهه عُثمان

-عُثمان: يله تعال اشوف

-عميد: هههه ايا نذذذل تدري ما يهون عليّ

-عُثمان: هيهيهي ادري ادري

انه ورهف صافنات ؏ بعض ذوله شجاي يحچون ويا بوسة ويا اعتراف، داخ راسي وهمه بَـس يضحكون ويحششون ؏ عميد الدين وهوه يخزرهم ويأشر علينه حتى مايحچون جدامنه..

**

"هجران"
الليل كله مانمت واني افكر شنو اسوي وجوريه ويايه ساعه تواسني ساعه تگول رجعي لأهلي وعوفي زنوبه، بَـس اووووف ويه گلبي هاي روحي اكو واحد يترك روحه ويروح؟!

گظت الليل سمم وزينب تبچي وتصرخ مانامت الليل كله اكيد اخترعت من صياحنه اليوم، حتى مابيه انزلهه جوة لعثمان حتى يفرفرهه فَـہ ظليت گاعده للصبح..

ثاني يوم گظيته كله بالغرفه ماطلع منهه وحتى غدايه وعشايه غزاله تجيبه لان جوري اليوم رجعت بسبب فيصل عنده شغل طارئ وماقبلت يروح وحده فَـہ رجعت وياه، اوووف هاي اختي تفتهم لعد مثلي فاهيه وغبرة..

اتصلت بأمي وحچيتلهه الصار گامت تصيح عليه ورزلتني...

-صباح: هسسسسه ابوچ يجي عليچ وياخذچ متبقين عنده هذا

-ماما وزينب!!

-صباح: تجيبيهه وياچ

-مو بكر ميقبل شسوووي انييي هسه ماماا فدووه نار ومشعوله بيه

ابچي واحچي وياهه وهيه تصرخ عليه وترزل نزلت فرد نزلة ؏ بكر وتغلط عليه..

-صباح: معليييه عوفي بنتچ وتعالي شنوو احنه نعوف بتنه ويه هيچ وااحد

-ماعوف زنوبه ماما فدوه حبابه اموت اذا اعوفهه

-صباح: انچبييي هجررران گتلچ عوفي الطفله وابوچ يجيبهه بعدين

-ماااا ماتركهه گلتتت والله مينطينياهه اني اعرفه

-الله يطيح حظظظه هوه بكيييفه!!! سمعي لچ تحظرين غراضچ وابوچ جاي للناصريه يتفاهم وياه ويطيح حظه وتحيبون الطفله وتجون

-مموجود بالناصريه رجع لبغداد

-صباح: ايي ويروحله لبغداد هسه شكوو

-لا فدوه خلي هنا حتى يكونون عُثمان وعميد موجودين

-صباح: اهووووو وشوكت يجييي؟؟

-وره عرس شهد

-صباح: وان شالله تردينه نصبر لوره عرس شهدد هجرران تخبلتي انتييي

-هجران: ماما اني هسه مزاعلته وماشوفه ودايسه ؏ كرامتي وباقيه هنا لخاطر بنتي مامااا محد يهتممم هناا لو تفحط من البچي محد يهتم لو تموت يمكن ميدرون بيهه رغم يموتون عليهه بَـس ميهتمون لهلسوالف مال طفله جاعت لو ينزعوهه حفاظه لو لو لو...

-صباح: وغزاله؟؟ مو تگولين زينه وياهه؟؟

-ماما تحچين صدووك انتييي خو البنيه شنو ابتلت ويه بنتي!! خلص عرس شهد بعد كم يوم يخلص وتعالو عليه حتى بكر موجود وتتفاهمون وياه

-صباح: ظليي ظلييي يغبره دوسي ؏ نفسچ لخاطره

-والله ماريده والله ماما حتى حاظرته وماحچي وياااه بَـس زنوبه ماعوفهه واني اعرف لو اخذتهه واجيتكم يطيح حظي ويحرمني منهه طول عمريي

-صباح: استغفر الله حسبي الله ونعم الوكيل

-خلص ماما حبابه لتبچين وتفرفحين اني زينه وامانه لتگولين لبابا هسة حتى ميجي وتصير سالفه بَـس هالكم يوم اگظيهن شلون مچان واجي لبيتكم وبعد ماريد اشوف وجهه

-صباح: نشوف عود

تنهدت وودعتهه وسديت الخط، لليل عثمان دزلي رساله يريد يشوف زنوبه بحساب صارله يومين مشايفهه، دزيتله...

-💬 زنوبة نايمة

جاوبني...

-💬عُثمان: ماشي من تگعد ميخالف تنزليهه؟

-💬اي ماشي

ذييت موبايلي ونمت مانزلتهه بعد وحتى گعدت بالليل تبچي وهم مانزلتهه مابيه احچي ويه احد.. ثاني يوم ماداومت واليوم الوراه صادف عندي امتحان وهم ماردت اروح بَـس جوري اتصلت بيه ورزلتني گالت مو تفلسين من رجال وهم من شهادة ؏ الاقل خلي تصير عندچ شهادة باچر عگبه تفيدچ..

سمعت كلامهه وگمت بدلت شلون مچان، لبست جبة سوده وشال قهوائي وجنطه وحذاء اسود، وصيت غزاله ؏ زنوبة ونزلت انتظر مرتضى يوصلني لان حاچيته بالليل وگال يگدر ياخذني..

وداني للجامعه وحظرت محاضرة وامتحنت مادري مجاوبه لاا احل من وره خشمي، طلعت بره اگعد بالحديقه احس روحي مخنوگة وگوة لازمة دموعي..

لمحت عُثمان بعيد چان ديحچي ويه استاذ ومبتسم والاستاذ هم مبتسم گلت بگلبي اكيد ديحاچي ؏ درجاته المتفوقه، ذيچ السنه من نجح طلع الاول ؏ مجموعته هوه اصلاً شاطر ناار وهواي يقره ويهتم بنفسه ولمستقبله، ظليت اباوعله من بعيد وفجأة دار وجهه وصفن عليه..

استحيت ونزلت راسي سويت روحي ملتهيه دا اراجع للمحاضره الجاية، توقعته رح يجي ياحچيني بَـس ما اجه كمل طريقه للقسم واني هم اخذت جنطتي وملزمتي ورحت للمحاضره..

كملتهه وطلعت للنادي آكُل شي حموت من الجوع صارلي كم يوم ما آكُل زين وزنوبه هلكتني شگدما رضعت حتى احس ماعندي قوه بعد..

وگفت اطلب وصفنت ماعرف شنو اختار دائماً اني وجواهر نآكُل سوه وهيه تختارلي ؏ ذوقهه، اخير شي طلبت گص دجاج واشتريت بطل مي ورحت ؏ طاولة آكُل..

آكُل لگمة واسرح بالفضاء افكر شنو لازم اسوي، يا تُرى بالغت بردة فعلي من تعاركت ويه بكر لو يستاهل؟ اوووف يربيي لو بَـس اجوز وابطل من حبه ارتاح واريح هواي ناس ويايه..

مسحت دمعتي الخانتني ونزلت ؏ طرف جفني وحسيت بحمحمه شخص واگف گدامي..

رفعت راسي اباوع چانت ميس ابتسمت من شفتهه وهيه بادلتني..

-ميس: مُمكن اگعُد يمچ؟

-اكييد تفضلي

گعدت گدامي وتنهدت، نزلت راسهه تباوع لأيدهه ورفعته عليه..

-ميس: الجمعه خطوبتي واجيت اعزمچ

-صدُك والله الف الفف مبرووك تتهنين حبيبتي

-ميس: يعمري الله ييارك بيچ

سكتنه ثنينه واحسهه مو طبيعيه او حتى اگدر اگول ملامحهه حزينه، ماعرف شلون افتح الموضوع وياهه واني كُلش فاشله بالمواضيع واصلاً ماعرف احچي بَـس هيه اختصرت الموضوع وگالت...

-ميس: الخطبني دكتور بجامعه بغداد شافني وانعجب بيه واجه تقدم، بالبدايه مرضيت لان احم يعني....

-قاطعتهه: تحبين واحد ثاني؟

هزت راسهه بأنكسار ودمعه محبوسه بمُفلة عينهه نزلت، بلعت غصتهه وحچت...

-ميس: سنه ضبط اني احاول وياه وهوه يصدني، صديقاتي گالن جوز ميحب البنيه التلزگ بي فَـہ ابتعدي عنه وهوه يجيلچ، سويتهه اشو ابتعد اكثر وتجي ايام لو يسلم لو لاء..

سُكتت شويه وسألت بحسره..

-ميس: هجران عُثمان يحب؟

-هجران: حسب عملي لاء

-ميس: لعد شبي؟؟ ليش هيچي يتعامل ويايه بهالبرود؟؟

-هجران: حبيبتي لتضوجين نفسچ الرجال مو من نصيبچ

-بَـس احبه

گالتهه وغطت وجهها وبچت، ماعرفت شنو اسوي او شنو اگول، هزيت راسي متحسفه لييش من نحب انسان لدرجة نبچي عليه ميصون حُبنه ويبادلنه؟ حتى لو يچذب علينه ممكن بمرور الايام وهوه يمثل الحُب رح يحبنه وجوز اكثر من حبنه اله..

وخرت ايدهه عن وجهها وطلعت كلينسه من الجنطه ومسحت دموعهه، رفعت راسي اباوع خاف اكو احد ديباوعلنه وانتبهت اكو كم ولد وبنيه عيونهم علينه وتفاجأت من شفت عُثمان چان من ضمنهم..

واگف بعيد يباوع لطاولتنه اكييد وصلتله الرساله ان ميس دتبچي عليه، صارت عيني بعينه وهز راسه بحزن، ودعتني ميس ودعيتلهه بالسعادة وتعذرت منهه لان ماگدر اروح..

شويه واجه عُثمان سحب كرسي وگال..

-عُثمان: ممكن؟

-هجران: اكيد تفضل

گعد گدامي بمكان لميس وتنهد بعمق، زفر الهوا بهدوووء وحچة بنفس النبرة الهادئة...

-عُثمان: امتحنتي؟

-اي شمعرفك عندي امتحان؟

-عُثمان: غزاله گالت

-هجران: هاااا، احم عُثمان بخصوص البارحة وليش منزلتلك زينب لان....

قاطعني..

-عُثمان: عادي هجران ماصار شي اساساً كنتو ادرس وسهرت الليل كلو

-هاا يعني مزعلان؟

قهقه بخفه ومسح وجهه، حط اصبعين ؏ عيونه وضغط عليهن حيل حچة بأبتسامه بارزه سنونه البيض...

-عُثمان: ابد

ابتسمت وسكتت، اكلت اللفه مالتي وهوه گاعد گبالي ماحچة شي بَـس سارح ومبين ديفكر بشي، هز راسه وكأن دينفض الفكرة الاجتله وحچة...

-عُثمان: مشتاق لزنايب حبيبة ابوا (ابوها)

-هههه هيه هم مشتاقتلك ومتنحسه صارلهه 3ايام، صدُك شو مدا تآكُل رح اسجلهه بالتاريخ ترا هههه

ضحك خفيف وظل ساكت، رجع ملامحه للجمود وگال...

-عُثمان: سمعت رح تروحين لأهلك؟

-هجران: اي

نزلت راسي اكيد افتهم اني وبكر متعاركين، رفعت راسي چان لسه ديباوعلي...

-هجران: اني وبكر تعاركنه عركة چبيره وگتله ياخذني لأهلي بَـس مقبل اخذ زينب ويايه فَـہ اضطريت ابقى

-ادري

-شمعرفك؟؟

تنهد وكال...

-مو مهم

-هجران: يعني عرفت سبب العركة؟

-لاء

-هجران: هااا

-عُثمان: تعرفين بشَنو گعد افكر هسه؟

-بشنو؟

-عُثمان: شلون بيه من ترحين

بهتت واستغربت من حچايته، صفنت بوجهه وهوه ظل ؏ گعدته حاط رجل ؏ رجل ومكتف ايده، قطع صفنتي من استرسل بالكلام....

-عُثمان: هجران احسِك اخت الي اكثر مما زوجة اخويه، حنيتِك وگلبِك الطيب وكلامِك وعباراتِك الحلوة وابتسامتك التنعش الگلب وتريح البال وتمحي كل تعب اليوم

ابتسمت ونزلت راسي كُلش خجلت من كلامه، هوه كَمل...

-عُثمان: غير عن تعلقي بزنوبة احسهه بنتي الله يشهد احبهه لدرجة مستعد اضحي بروحي لخاطرهه اذا احتاج الموضوع ومارضى عليكي انتي هم وأَنا يوم بعد يوم اكرهو لبكر اكثر لان يعاملك بطريقه تخليكي تبكين بآخر الليل.. عيونِك مايستاهلو يبكو ؏ واحد مايسوه وواحد مفرط بمشاعرِك الجياشه المليانه حُب وحنية

-هجران: هذا حظي عُثمان

-عُثمان: يلعنو للحظ اذا هيك، أنَا بحياتي محد حَنّ عليه كثرِك وأَنا ممنونِك ؏ كل شغله سويتهه الي حتى بالايام الي راسي يوجعني وتصبيلي اكل وتجيبيلي حب وجع راس وتنصحيني انام كل هذا يدل ؏ حنية گلبِك وجمالو من رحنه كلنه قربان الو

-هجران بهمس: اسم الله عليكم

-عُثمان: اوف بكر اديشو غبي وصدگي رح يندم بكثر شعر راسو

-هجران: بكر ميهمه غير الشكل يريدني حلوة لو شنو اسويله احسه ممرتاح وممكتفي يباوعلي بنص عين

گال بحرگة...

-عُثمان: من عمت عينو واحد جاهل سافل غببي سااذج معليكي بي ولا يهمِك شَنو فائدة الوجه الحلو والگلب اسود مثل گلبو، هجران أنَا اعرف خطأ احكي هيك بَـس أنَا يشهد الله ماشوف أي نقص فيكي انتي انسانه تسوين الحلوات وابو الحلوات وينعلو ابوو اليگول غير هيك!!

نزلت راسي ودموعي گامت تنزل، الكلام الي اتمنى اسمعه من بكر من اول يوم تعرفت عليه لليوم الحظ الفگر سمعته من اخو..

-عُثمان: لا تبكين أنَا ماحكيت هيك حتى تبكين يُبا أنَا اريد اقويكي واقولِك هالشي الي يرشك بماي رشي بدم

-ماكدر

-عُثمان: ليييش؟؟؟؟

-هجران: لاني غبيه

-عُثمان: هجران انتي مو غبيه انتي طيبة زيادة يُبا بيعي المايشتريكي حتى لو كان ؏ حساب نفسِك!!

-هجران: عُثمان بَـس اسألك سؤال وجاوبني بصراحة

-سألي

-هجران: شلون تقنع الزهَيد بعين نفسه وتگله انته غالي؟

صفن بوجهي وحلگه تقوس بحزن، استمرينه واحد يباوع بوجه الثاني لدقائق، هز راسه بحزن واخيراً گال...

-عُثمان: لو اضطر ادفعلو روحي حتى اثبتلو غلاتو اسويهه

-هجران: بَـس بكر ماسواهه داسني اكثر واذاني انطيته گلبي وروحي وصحتي وعافيتي وهوه بشنو جازاني؟

ظل ساكت ماحچة شي، ترخصت منه وگتله بدت محاضرتي.. كمل اليوم واني اكو حَسرة بگلبي وكلام عُثمان يدگ بصدري وثلج قلبي لثواني لكن يرجع يحترگ من اتذكر بكر واسلوبه ويايه...

اتصلت بمرتضى حتى يجيني بَـس يطلع مُغلق، اتصلت اكثر من مرة وميجاوب، بالبوابه وشفت عُثمان ديريد يركب سيارته، ركضتله وصحت بأسمه حتى يوگف، نزل من السيارة ونزل نظارته الشمسيه وسأل...

-هجران شبيكي؟

-هجران: اگولك هذا مرتضى لسه ما اجاني ميخالف انته توصلني

-عُثمان: اكييد دللي

صعدت وياه والطريق كله هدوء حتى مافتح الراديو ويسمع عكس العادة، وصلنه للبيت وقبل لا انزل گال بأبتسامه...

-عُثمان: عاجبني اطلع زنوبة اليوم تقبلين؟

-اي عادي اخذهه واخذ غزاله وياك خاف تبهذلك

حك شعره وابتسم بخجل وگال...

-عُثمان: خو انتي تعالي ويانه هم تغيرين جو

ابتسمت عرفت ميريد يطلع زينب يريدني اني اطلع حتى يغير من تفسيتي، هزيت براسي اي بمعنى اجي وياكم لان اريد اطلع من البيت مخنوگة ومدا اطيق الگعده بي..

-عُثمان: حلوو عجل نطلع ؏ الخمسه وخلي رهوفه وغزل يجو هم خطيه

-هجران: ماشي

نزلنه للبيت وكالعادة زنوبه متنحسه ومن شافت عمهه ركضتله وهوه طلع چكليته من جيبه وانطاهه، طااارت من الفرح وتضحك مكيفه..

عفتهه عنده ورحت سبحت وبدلت ملابسي وتمددت ؏ الفراش، دزلي رساله كاتب بيهه...

-💬عُثمان: زنوبة نامت عندي لا يظل بالِك

كيفت ايي ؏ الاقل انام شويه ميته من التعب، حاولت انام شگد وماگدر بَـس افكر اخير شي استسلمت وگمت لبست شال ونزلت جوة چانو عميد الدين ورهف گاعدين بالمطبخ يسولفون...

-هجران: سلام عليكم

جاوبوني وابتسمو، رهف گالت بضوجة...

-رهف: هجرااان شني هاي عمو عُثمان مايرضى ينطيني زينب اللعب وياهه

-ياا ليش عود؟

-عميد: لان البت نامت ولچ بابه يمته تكبرين انتي وتبطلين وكاحة

-رهف: عااااا بابا انه وكحة

-عميد: رب الوكاحة عيب بنيتي صرتي حديثه

-رهف: لااا بعدني زعطوطه انته مو تگول انتي زعطوطه

-عميد: لا بنيتي انتي چبيره بَـس عگلچ زعطوط

متت ضحك وهوه هم ضحك ؏ ضحكتي ورهف گلبت وجهها، عفتهم ورحت بالصاله اتصفن وحدي ظل بالي ؏ زينب خاف گعدت بَـس لا عيني هاي بتي عايقه اذا گعدت وفتحت حلگهه شيسده بعد..

مشه الوقت وصارت قريب الخمسه وزنوبه لسه بغرفة عُثمان معناهه نايمه وياه، صعدت فوگ وبدلت ملابسي ورحت اگول لغزاله لگيتهه دتبدل وتخط الكحلة، ضحكت من شافتني صافنه عليهه وگالت..

-غزاله: هجرانه روحي حطي شي بوجهچ صايره صفره

-هجران: شوف هاي اني بيا حال

-اهووو حتى لو چا تظلين هيچ مصوفرة

-هجران: اي ويله بسرعه خلينه نطلع

هزت راسهه معاجبهه وطلعت ويايه، نزلنه جوه چان عُثمان مبدل وشايل زنوبه ماحتاجيت ابدللهه لان اول ماجيت غزاله ملبستهه فستان ومكشختهه..

اجت رهف وكلنه طلعنه صدُك تونسنه بيومهه فرفرنه كل مكان وابد ما مَل ولا جزع، وشنوو تأشر عليه زينب يشتريلهه حتى شافت شفقة معلگه بباب المحل واشرت عليهه تريدهه..

راح واشترالهه ولبسلهيا، رحت لمحل الاطفال اشتريلهه ملابس لحنه شهد لان رح اضطر اروح محد يبقى بالبيت خوما اظل وحدي..

اشتريتلهه وهم عُثمان دفع فلوسه، واشتريتلي فستان اسود بي نمنم من فوگ وينزل لمع كُلش عجبني وغزاله هم عجبهه ورادت تشتري نفسه بَـس غير لون ورهف مقبلت تگول شنو زي لابسات..

كملنه كل شغلاتنه وبالرجعه عُثمان من كل عقله دار وجهه ؏ زنوبه يسألهه عبالك بنيه چبيرة...

-عُثمان: بابا زنايب تردين موطه؟

زنوبه صفنت بعدهه متعرف تگول اي ولا بَـس سوت صوت بحلگهه هوه اخذهه هاي اي غزاله ضحكت وگالت...

-غزاله: بويااي نيالهه زنايب ؏ هالدلال

-رهف بضحك: اي بعلي حتى صايره اغار منهه احس ابوي يحبهه اكثر مني

-هجران: هههه لا حبيبتي هاي لان بعدهه عنونه هيچ يدللولهه خليهه تكبر شويه وتجي غيرهه تصير كخة

-عُثمان: وبسطال الحمزة مستحيل احب طفل اكثر منهه حتى لو كان ابني تبقى زنايب رقم واحد عندي

نزلت راسي ؏ زنوبه الگاعده تفرفر بعيونهه وبيدهه مصاصه ممفتوحه وگلت...

-هجران: عمي صدُك لعد نيال زنايب ؏ هيچ ابو

باوعلي من المرايه وابتسم، احسه يفرح من اگول لزنوبه ان هوه ابوهه وانقهر عليه بنفس الوقت لان واضح شگد يحب الجهال واتمنى يخطب ويتزوج بَـس استحي افاتحه بهيچ موضوع حساس..

وصلنه لأبو الموطه وگتله يجيبلنه للسيارة لان زينب تخبصنه اذا ننزل نآكُل جوة، اللتفت علينه يسألنه شنو نحب حسيت انعاد نفس الموقف من اول مرة طلعنه..

طلبن البنات واللتفت عليه وگال..

-شتحبين؟

-هجران: مادري بكيفك

غمض عيونه وزفر..

-عُثمان: احيييي اتمنىى اسألِك شي يوم شنو تحبين تاكلين لو شنو يعجبِك وتجاوبيني

-مو مادري اممم....

-عُثمان: حطي هالشي حلقة بأذنِك هجران واعتبري دَرس ابد ابد لا تگولين كلمه بكيفك لأي شخص دائماً انطي رأيِك وگولي شَنو اليعجبِك وشنو المايعحبِك! افرضي شخصيتِك ؏ الشخص المقابل خلي يسويلِك اهميه

-حچيت بصوت ناصي: مو استحي

-عُثمان: ميهم اجبري نفسِك تمام؟؟

ابتسمت وهزيت براسي وگلت..

-اريد موطه ام الككو

بادلني الابتسامه وهمس "كفو" ونزل يشتريلنه، رجعنه للبيت وبالباب شفنه سيارات كومة سادات الطريق، عُثمان عگد حاجبه وگال..

-هاي شكو؟

-هجران: شمدريني

قبل لا يسفط السيارة طلع موبايله وصاح...

-عُثمان: افففف 23 مكالمه فائته من عميدي

رجف گلبي هاي شكو، نزلنه من السيارة ووگفنه صوت عياط رج الدنيا هذا صوت عميد الدين جاي من الديوان، شنو الشي الي خله عميد يعيط بهالطريقه وبالديوان واكيد گدام ذوله الناس..

عُثمان ركض جوة يشوف شكو واحنه البنات دخلنه للبيت نرجف، تفاجأت من شفت الوجوه صفره والحيره واضحة عليهم، ردت اسأل بَـس قاطع تفكيري ونسيت سؤالي من سمعت صوت رمي جاي من بره يا ستاار هااي شكووو؟؟؟؟

يتبع ...