يا هلا ومرحبا 🤎
أعوفكُم ويه المشهد استمتعوا بي وانطوني رأيكم !
حساب الأنستا itfaty1
الكاتبة فَرآشة صاّد
"دهليز مُرهف"
--------
العِراق في احدى المناطق المهجورة
الساعه السادسة صباحاً ،
بحُضني الطفل تمسكت بي كُل قوتي ضميته بصدري بعدة الاربعين مطالع ،
وركضت بكُل مابية واتلفت يارب ميشوفني احد بيهم وبقيت اردد بداخلي
" يا علي ادركني "
صحراء قاحلة حرارة الشمس عَ راسي مماكلة ولا شاربة شي من كم يوم شفتي مجرحه ويابسة
وجهي اصفر كُركم ياربي ماعندي قابلية اتحمل اكثر ..
حوالي الساعتين عَ نفس وضعيتي اركض واتلفت لحد ما تطمنت ابتعدت عنهم
لمحت بيت گدامي بعيد ومخليه گلبي بين ايدية ،
اروح واجازف ؟
لو ابقى بهالحال ؟
بس خاف اذا رحت يطلعون همَ نفسهم او نفس نفسيتهم وقرفهم وأرجع اعيش الي عشته مرا ثانيه ؟
لو ابقى بهذا حالي اركض من لا چارة والطفل بحُضني يبچي ويصرخ يريد حليب وعطشان ؟ شسوي ياربي
بعد صراعات داخلية قررت اسلمها بيد ربي والامام علي هما واگفيلي ومسلمتهم امري
تقربت عَ البيت وگفت گبالة انتبهت لشارع طويل بس ولا سيارة تمُر من عنده فارغ
وقريب من هالبيت اكو عدة بيوت ونصها مهدومة ،
تقربت وشلت ايدي ودگيت الباب والطفل مسكت بُكاءة مُستمر ياربي شسوي
بحدود الخمس دقايق گدام الباب لحد ما يأست ...
شفت حركة البردة من ورا الشباك ديشوف من الي يدگ الباب
انداريت دا اروح وللحظة سمعت صوت الباب
شفت مرية چبيرة باوعتلي بـ شك وخوف ورجعت عيونها للطفل الي بحُضني ...
:- منو انتي ؟
جاوبت بـ بُكاء شديد
:- خالة اني ضايعة هنا فدوة لعينچ ساعديني ليجوني
باوعتلي عوجت شفايفها وطبگت حواجبها ،
:- واني شلون أأمنلچ دادة
آسيا :- خاله دخيلتچ فدوة لعينچ
باوعت للطفل وابتعدت عن الباب ودخلتني ..
دخلت وگلبي لازمته بايدي من الخوف
وباقيه اردد بداخلي يا علي ادركني ، امانة موسى ابن جعفر والخوف مسيطر علية
البيت شكلة قديم اثاثه قديمه ومبين كُلة تراب لعب گلبي وبقيت بـ شك وقلق
گعدت عَ القنفه والتراب تطاير بالجو غطيت الطفل بالقميص مالتي لا يتأذة من التراب ..
جابتلي مي وبس تباوع علية بهدوء ،
شربت المي كُله
آسيا:- خالة اريد بعد
راحت جابتلي وشربت فتحت الجنطه الي ع ظهري طلعت المميه خليت بيها حليب ..
وخليت مي بيها وبديت اشربة سودة علية جوعان ومات بچي لدرجه حسيته راح يموت بين ايدية غير اموت وراه!
غيرتله ملابسه وگمطته ونام
وكُل هالمدة تراقبني بهدوء ياربي سترك هاي شنو وين انذبيت اني شسويت بحياتي حته تدخل بهيچ دوامة ومتاهة مداعرف من وين اخلص روحي بيها
اخ حسبي الله ونعم الوكيل ربي انته اعلم بـ الي بگلبي ،
أخيراً نطقت ..
:- انتي شجايبچ لهنا ؟
آسيا :- اخ يخالة سالفة طويلة
:- مبين عليچ متعوبه
آسيا :- ههه الحمدلله ع كُل حال
:- احچيلي قصتچ! هذا ابنچ؟
آسيا :- اي ابني بس بالبداية انتي ليش هنا بهالمكان المهجور ؟
باوعتلي بتوتر گلبت عيونها وفركت ايدها لزمت خشمها وباوعت صفح
من هنا عرفت هاي چذابة اعرف كُل حركات الإنسان من يتوتر من يچذب ومن حته يحچي الصدُك
اهتم بهالامور والتفاصيل وأحبها واقرا عنها بشكل مستمر ودارستها عدل
صار تفكيري شلون اخلص روحي واطلع منا خايفه ع هالطفل اكثر من ما خايفه ع روحي وحياتي
حچت بتلكئ
:- هذا بيتي من زمان .. چان عندي ولد ثنين وبنيه وعايشين بخير نحمد ربنا ونشكرة بيوم وليلة سار الي صار ودخلوا د١عش احتلونا .. ولدي انكتلوا بنتي اخذوها ويا السبايا وهذا حالي وين اروح؟ صفيت وحدي لا ولد ولا تلد
آسيا :- المكان مهجور !!! شلون ساكنه هنا
بچت ونزلت راسها وتلعب باظافرها
:- يخالة چنت بـ بيت اخوي ومرتة طردتني
مارتاحيت شنو هالفلم؟ وين اكو وحدة تعيش بهيچ مكان فارغ؟
بهالاثناء طلعت من غرفه بنيه تجنن بيضة وطويلة كُلش حلو شكلها شايفتها قبل بس وين وينن!!!
خزرتني وتخصرت انصدمت گمت من مكاني بسرعه فتحت الباب جرتني ايد خشنة وچبيرة وجرتني من شعري بقوة حضنت الطفل وبقيت صامدة
انداريت !!
آسيا :- انتتتته ! هايي شجابك لهنا عوفنيييي
لزمني من رگبتي بقوة وحچه من بين اسنانة
:- مو انه الينضحك عليه افتهمتي لو لاااا الاريدة يصير لو على گص رگبتي
جرني للشارع اخذ الطفل من حُضني ودفعني اني ناعمه وهوا غول سحب شعري وسحلني من عنده احس شعري خلص بين ايديه
بگد اذيتي اضعافها تأذيت ع بچي الطفل كُلشي ولا هوا گمت اصيح الله لا ينطيييييك دمرتني نهيتني دمرت حياتي ومستقبلي انتهييييت انطيني ابنيييي!!!!
بهاللحظة عافني وجمد بمكانه وبقه صافن !
توترت من هدوئة المُفاجئ رفعت راسي وانصدمت مثل صدمته ويمكن اكثر ....
خلص المشهد ان شاءالله يكون عجبكـُم .؟
انتظروني بقصتي الجديدة
"دهليز مُرهف"
لتنسون التصويت وكلمة حلوة منكـُم ، 🤎