الحلــــــــقه الخامــــــــــــــــسه
رواية... هل كانَ حُلماً...؟
{ العِراق-المُصغَر ... التوباز }
بقلمي ... لؤلؤة_البِحار ...
___________________•
حره... جر نفس اشر على بيت مصطفى كتله... اي شبيهم مصطفى ومرتضى؟
سوا مثل الحدبه بظهره كتله... الحدبه
اشر.. لا
كتله... قصدك مرتضى...؟
هز راسه... اي
كتله... شبيه مرتضى!
كال... لا.. بايده
كتله... مرتضى مو...
اشر اي ونزل ظهره مثل الاحدب
كتله... مرتضى مو احدب!!
هو اشر بايده وراسه.... اي اي...
لاأراديا دمعت غمضت عيوني احاول استوعب شهكت گتله... ضاوي شنو هالحجي شنو مرتضى مو احدب
اشر براسه... اي ورجع اشرلي ع الباب وسوا حركات مفهمت منها شي
حطيت ايدي ع وجهي اختنگت مسحت دموعي وباوعتله گتله... مداافهم شي والله
هو سكت وجر نفس بقهر تقربت عليه كتله... ضاوي انت شفت شي؟
اشر براسه اي
نزلت عيوني كتله :-مدااستوعب شي
سكت سمعت صوت شباب اثنين هو التفت ومدري شسوا حركه وابتعد عني من اجو راح ع اساس يدخل لبيتهم ووكف هناك
فهمت حركته حتى لايحجي احد عليه
باوعت لاخر مره على بيت مرتضى ومصطفى ودرت وجهي ومشيت باوعت لبيتنا المحترگ بحسره وبصفه جان بيت حياة المهجور
حسيت حياتي وكفت بهالمكان كمت امشي واحاول اخفي ملامح حزني وحيرتي
وصلت لراس الفرع شفت سياره بيكم بيضه بيها شباب تذكرت من اجيت هم جانت هالسياره موجوده
باوعت ورا اكو تلث شباب ولكدام سايق ويمه واحد
حسيت نغزه بكلبي من شفت الرجال الكاعد ورا باوعلي
اكو ناس من اول ماتباوع بوجههم تحسه مو راحه وتحس بخوف بداخلك اني هيج حسيت
بلعت ريك ومشيت
من شفتها ماتحركت وراي ارتاحيت وكلت لازم ارجع للبيت وكل تفكيري بمرتضى خلاني وسط حيره بس الله اليعلم بيها
طلعت من حينا دامشي باتجاه الشارع فزيت وگلت... يممه
على صوت السياره نفسها شخطت كدامي
جنطتي وكعت مني نزل الرجال والثاني وراه وواحد ضل واكف شلت جنطتي وعيوني عليهم
ايدي ترجف حضنت جنطتي ورجعت ليورا كال
... شبيج خيتي لتخافين بس اريد اسالج عن ولد صاحبنا هنا
حسيت كلبي راح يوگف كتله... نعم؟
باوع لصديقه ورجع باوعلي كال... مقدام شعلان عطيه تعرفيه؟
اباوع الاشكالهم مو راحه هزيت راسي بـ لا
گال... احنا شفنا بيتهم محترگ وكلنا صاحبنا لازم نقوم بالواجب
الثاني كال... الظهريه كلها ندور عليه
كلبي نغزني منهم كتله... لا مااعرف واحد بهالاسم
الثاني كال... ها
ورفع حواجبه وعيونه عليه
حسيته شاك بيا باوعت للشارع شفت ابو المحل موجود ارتاح گلبي كتلهم :-اترخص
الثاني كال... براحتج
مشيت اشرت سياره وهم صعدوا لـ سيارتهم واحد يحجي ويا هذا المو راحه وهو عيونه عليه
وكفت سياره كتله... عمو نزلني ورا ال**** توصل لهناك مو
كال... اي بابا صعدي
صعدت ليورا وگلبي يدك سريع مشت السياره حطيت راسي ع الجامه وافكر شديصير معقوله مرتضى مو احدب؟ زين ليش حتى يجذب؟
يمكن ضاوي فاهم غلط؟
جاوبت نفسي لا ضاوي حباب وميتبلى ع احد سنين نعرفه حتى حياة حيل جانت تحترمه
زين هو مرتضى وينه!
باوعت لموبايلي نزلت دمعتي كلت بكلبي... مرتضى جاوب عندي هواي اسأله لازم تجاوبني تعبت
باوعت للشارع جريت نفس گلت... يارب نور طريقي
غمضت عيني اجى ببالي الحلم الي شفته باليوم الي احترك البيت
حياة انطتني سبحه وكالت "اذكري الله بيها"
مشيت بنصيحتها وكمت استغفر واصلي ع النبي وآله
حسيت ممرتاحه درت وجهي اعدل الجنطه مالتي واجت عيني ع السياره الورانا
فتحت عيوني من الصدمه هاي مو البيكم عزا
هذول شنو دايراقبوني!!
سبحان الله من اول ماشفتهم گلبي ماارتاح الهم
اكيد جيتهم شر لاخويه
ضليت اطكطك باصابيعي لافت السياره الاني بيها درت وجهي هم ورانا
كلت لازم اغير طريقي واضيعهم
باوعت من الجامه شفت مكان بيه ناس واسواق كتله... نازل عمو
شلت جنطتي وطبكلي الولد الكشن انطيته كروه كلي
... عمو مو يم الـ*** تنزلين؟
كتله... لا غيرت الطريق
كال... هاهيه
نزلت وطبكت الباب وكفت يم المرور اشرلي انتظري عبر السيارات وبعدها اشر للسيارات يوكفن واشر اعبري عبرت الشارع وركضت بالازدحامات شفت واحد منهم نزل اني دخلت للاسواق وكمت ادخل وامشي بافرع اني مااعرفها وين بس ردت اضيعهم
طبيت بفرع جان ابو المحل برا كلي... بويه بيج شي... وضل يتلفت يشوف
كتله... لا عمو نزل ضغطي عادي ادخل ارتاح بالمحل
كال... اي تفضلي... وجر الكرسي وصاح ابنه كله... جيب مي للبنيه
اني بس ردت اضيع وقت حتى بعد ميلكوني ويرحون مر وقت طلعت من المحل حسيت نفسي تهت ضليت اسال بالعالم يدلوني الى ان رجعت يم الجسر
ضليت اتلفت تاكدت محد منهم موجود وضيعوني
اشرت سياره وصعدت فتحت موبايلي شفت رتيل متصله هوايه اتصلت عليها كالت
رتيل... اليوم اكطع النعال على راسج... سكتت كالت... ولج وينج؟
ليش طالعه من المدرسه قبل البنات سالي والسايق ضلو يدورون عليج صدك تحجين؟
حره... رحت لمنطقتنا
رتيل... لييش؟ وغير تكولين
وينج هسه انتي؟
حره... من اجي اكولج
رتيل... حره شبيج خوفتيني
حره... اني بالطريق حااجي... سديته وصلت للبيت فتحت الباب رتيل واكفه بالباب وبيدها الموبايل جرتني كالت
رتتيل... ولج وينج
... حضنتها وبجيت كالت... شكو فهميني
سمعت سالي كالت... شلون تطلعين ومتكوليلنا
الجنطه بايدي جرتها مروه كالت :-لاتبجين... وفتحت جيبوب الجنطه تدور فلوس
كعدت ع الدرج ويمي رتيل وسالي تسأل... شبيج؟
رتيل كلتلها... جيبي مي
راحت تجيبلي مي كالت... احجيلي
حره... رتيل اكو ناس دايدورون على اخوي
رتيل... منو احجيلي شصار وياج
اجت سالي سكتنا شربت مي كالت سالي... شبيها؟
رتيل كلتلها... اشتاقت لذاك بيتنا
سالي كعدت بصفي كالت... خلصنا الحمد لله صح احبابنا هناك بس اهون من العيشه بحيينا هالمنطقه ارقى
هزيت راسي كالت... خلص اهدي واذا زعلانه علمود ذكرى حياة وبيتها فـ لتخافين محيروح لغريب
عكدت حاجبي كتلها... شنو يعني
كالت مرتضى ومصطفى حيشتروه
حره... بس بيبي ماكالتلي؟
رتيل... اليوم الصبح خابرتني محاجيها مرتضى البارحه بالليل
حره... مرتضى؟
يعني هو موجود؟
سالي ... اي دايتعالج مدري شبيه حتى مصطفى صارله هواي ميحاجيني غير خمس دقايق باليوم
هزيت راسي وكمت للغرفه حسيت بقهر كعدت ابجي طبت رتيل وقفلت الباب كالت
رتيل... تعاي احجيلي شديصير
حجيتلها كلشي عن السياره البيكم حطت ايدها ع كلبها وكالت... يارب سترك
حره... واشكالهم مو راحه والله تذكرت حياة بالسياره وكأن الله رادني بس التفت ورا حتى اشوفهم
رتيل... زين ليش رحتي لهناك شعندج؟
حره... ردت اشوف مرتضى
رتيل... ليش
حره... صارله اسبوع مامنه خبر مطنشني... دتحجي كتلها... تغير عليه
رتيل... هو مريض حتى مصطفى متشوفيه ميجي
حره ... شفت ضاوي جيرانا
رتيل... اي؟
حره... كلي مرتضى مو احدب خبلني
رتيل...عليج علي هيج كال!
حره... والعباس
رتيل.... خاف فاهمته غلط مو مينفهم تأشيره
حره... لا والله حتى سألته كتله يعني مرتضى مو احدب هز راسه باي
سكتت وباوعت بالفراغ كالت... كلبي واجعني دخيلك ربي.. باوعتلي كالت بتفكير... شلون مو احدب!
اندكت الباب كامت رتيل فتحتها سالي باوعتلنا ضيگت عيونها و تخصرت كلتلها رتيل...
رتيل... ها شكو
سالي... حقيرات صايرات اسرار من وراي
ضحكت رتيل كلتلها... لا دااحجيلها عن خلطات حتى تسمن
سالي... اي ولج لازم تسمنين منا وهيج عرسي
ابتسمت رتيل كالت... يلا بدلي واني حاروح اتسوك اشوف شنسوي عشى
حره... ماشي
اخذت تراك وسبحت طبيت للهول الكهرباء مطفيه ماما طالعه ورتيل راحت تجيب عشا وخواتي برا
نشفت شعري وطلعت اشر الخاولي ع الحبل
فجأه اندفر الباب وطفرو مقنعين من السياج حاوطو البيت بلحظات خواتي صرخن وركضن يمي حضنتهن طبو جماعه لابسين اسود
واحد كال... تفتيششش
وواحد ياشر كال... مااريد تعوفون شبر بدون تفتيش
... فتشو المكان حتى ملابسنا طشروها واحنا نرجف تقدم واحد بيده لاسلكي سالنا ... وين مقدام؟
كلتله بصوت يرجف... ماادري
كال... شوكت اخر مره شفتو
حره... صار هوايه
كال بنتر... حددي شوكت؟
خفت كتله... اكثر من ١٥ يوم
طبت رتيل شهكت ركضت مروه عليها الضابط سأل... انتِ منو وشتصيرين منهم
رتيل ... اني اختهم
ضل يسالها عن مقدام وكلنا جاوبنا بالماادري من شافو البيت فارغ انسحبو وطلعو
اجت رتيل حضنتنا كالت... اذوجن؟
سالي... لا بس خفنا
طبينا كعدنا بالهول رتيل كام تبجي واني صارت بيا رجفه فجأه دخلو حتى بدون اي انذار لحظات واستوعبت ان اخوي مطلوب وهاي قوى حكوميه بجيت كتلها... خابري اخوي رتيل شوفيه
كامت جابت الموبايل اتصلت على مقدام وحجتله كلشي راد يجي كللها
... اني مامسوي شي والله ليش اخاف
رتيل مقبلت كلتله... اموت اذا صارلك شي
وضلت توصيه بان يبقى بمكانه لبين ما نشوف الوضع شلون يصفى
بهالاثناء اتصل موبايل سالي طلعت برا تخابر كملت رتيل كالت
رتيل... كلبي واجعني هاليومين مختنكه حيل حره
حره... واني خايفه حيل
حضنتني وبجت اجت سالي كالت... عثمان يكول لتخافون هايه قوى حكوميه ومحد ياذينا... كعدت كالت لرتيل... بشنو متورط اخوي وليش ماحجيتولي
كعدت رتيل تسولفلها واني كمت برا امشط اختنكت اليوم هذا مر بقلق وتوتر مكدرنا ناكل اي شي من القلق وامي متدري بالدنيا شبيها حتى ع الاتصالات ماتجاوب
بس تدز مسجات اني بفلان مكان او اني حـ ابات
لليل الساعه ب ١ ومرتضى مامنه لا مسج لا اتصال حيل عزت عليه نفسي حاولت استرجع كرامتي الي نسحلت دزيتله مسج
"مرحبا مرتضى .. اعتذر عن ازعاجك بهالوقت بس بالنسبه لسؤالك لكيت الجواب عنه وهو لا اني ماعندي اي
مشاعر تجاهك وماعتبرك غير صديق اتمنالك السعاده"
ضليت متردده ادزها او لا الى ان ضغطت على ارسال گلت دامه مطنشني وهو كلشي مابيه يستاهل حسيت اكو خطر وشي غلط كلت ابتعد
بليلتها مكدرت انام ابد جبتها من مقدام اخوي لبيتنا لمرتضى كلش تشوشت طلعت دفتر لـمروه كتبت بيه
" اشتياق قاتل لعيناه "
ضليت الليل كله سهرانه بين البجي والعتب والاشتياق للصبح صارت السته كعدت سالي ورتيل كعدت مروه علمود المدرسه
سالي سوت ريوك صاحتني رتيل
رتيل...حره تعاي تريگي
حره... مااشتهي
رتيل... ماتروحين للمدرسه
حره... لا
رتيل... ليش
حره... تعبانه ونمت بفراشي سالي كالت
... البس صدريتج؟
حره... البسيها
راحت بدلت وكملت وسمعت صوت الهورن دك خلت وطلعت
رتيل كالت.. اوصل مروه واجي الباب لتفتحيها لاي احد
حره... ماشي
طلعت حاولت انام مكدرت ابد كمت انظف رجعت رتيل عجنت كملت عجين اتصل الموبايل مالتها شفته اخوي مقدام انطيتهيا
سمعتها كلتله... هلا حبيب صباح الخير
سكتت تستمع كلتله بتوتر وخوف :-خواتي بالمدرسه بس توته هنا
جرت نفس كلتله... خوفتني مقدام
اني وكفت يمها وجريت الموبايل فتحت سبيكر.. جان اخوي مبين من صوته خايف كال
... اسمعي رتيل تجيبين خواتي وتطلعون للكماليه هناك عمران صديقي راح يوديكم لمكان امن
كلتله رتيل... خويه خوفتني بس فهمني شكو
مقدام... اسمعي مني رتيل بعدين افهمج
رتيل... لا فهمني هسه احجي شكو
هو كال بقهر... عثمان والي وياه الي ع اساس مرتضى
اني انقبض كلبي كال... جذابين استغلوني وضحكو عليه
رتيل شهكت كلتله... شبيهم؟
مقدام... طلعو استخبارات
شهكت رتيل اني بجيت كلتله :-شدتحجي مقدام عثمان عقد على اختي
مقدام... هذا الداياكل بكلبي اكل
بس اطلكها سالفه التبدي بالجذب ماتنتهي على خير.. سكت كللها... رتيل استعجلي جيبي خواتي
رتيل... ماشي
حره... لتعوفين حره وحدها يلا استعجلي امي وين
رتيل... طالعه
مقدام... خرب بالكوا***يد خرب حضي على هالعيشه هاي
حره... اني ركضت بدلت رتيل هم حطت الجنطه وحطت بيها بس الفلوس وقفلنا البيت وطلعنا نركض مدرسة مروه جانت قريبه رحنالها بالاول اخذنا مروه وطلعنا
صعدنا سياره تودينا لمدرستنا اني وسالي ورتيل لازمه السبحه وتتحسب واني كل شوي تنزل دمعتي وامسحها
حسيته جان يضحك عليه ويكضي وقت وياي
واني عبالي صدك يحبني اني غبيه شلون مانتبهت شلون
الطريق حسيته طويل ومينتهي
سمعت صوت موبايلي اجاني مسج فتحت الجنطه طلعته لكيته مرتضى فتحت المسج وجان مكتوب
... لاتكوليلي مرتضى بعد ويمكن نسيت ماكتلج قبل "انه اقره حچي العيون وبالأخص عيونچ"
نزلت دمعتي دزيتله... لو تعرف بس
شگد نزلت من عيني بس الله بالمرصاد لابد يجي يوم وتعرف حدودك
اول ماوصلت اتصل رفضته اتصل مره ثانيه صاحت رتيل... نازل
نزلنا يم المدرسه دكينا الباب فتحتها معاونة المديره رحنا للمديره طبت رتيل سلمت عليها وكالت بشكل سريع
كلتلها... اريد سالي عدنا ظرف ضروري تجي وهم اريد اخذ اجازه لخواتي تدرين بظروفنا هالايام
المديره كلتلها... بعيني بس سالي اجه خطيبها اخذها
جمدت ملامح رتيل كلتلها... شنو شوكت
المديره جاوبت... والله باول عشر دقايق بالدرس الاول حتى كتلها لو ما جايه بس خطيبها كال عدنا ظروف
بلعت ريك هزت راسها وجرتنا كايدتنا اني بايد ومروه بايد وحسيتها كوا تتنفس المديره كلتلها
... خوماكو شي
رتيل... لا
وطلعنا رتيل كالت... دخيلك ياربي شلون شلون هسه... وطلعت موبايلها تتصل بـ عثمان مغلق تتصل بـ سالي هم مغلق
صعدنا السياره بجت كالت... شلون هسه شلون شاتصرف
حره... نكول لـ مقدام
رتيل... لا خاف يجي ويعتقلوه شلون هسه شلوون
رجعنا لبيتنا مندري شنسوي لانكدر نتصل على مقدام خاف يجي ويعتقلوه ولا عثمان وسالي يجاوبون من القهر كعدت بالهول ابجي بصوت عالي
وصلني مسج من مرتضى كاتب بيه
... جاوبي ع الاتصال انتِ الخسرانه لو طنشتي "
اتصلت رفض طبت رتيل كالت... عليمن داتتصلين
حره... مرتضى
رجع اتصل اخذت مني الموبايل وجاوبت جريته فتحت سبيكر اول مافتح خط كلتله بحرگه
... اختي وين وليش هيج تسوون حسبي الله عليكم
مرتضى... على كيفج عيني
رتيل... قسما بالله اذا مارجعتو اختي اروح اشتكي عليكم والله
مرتضى... انطيج ارقام الضباط الي بمركز منطقتكم
مرتضى... ترا تنضر والله العظيم الي سويتو جريمه
مرتضى... حلاله يابه وين ماياخذها ياخذها
رتيل... ياحلال غير جذبتو علينا
مرتضى... ماجذب بشي الرجال
رتيل... بكلشي جذبتو استغليتونا
مرتضى... ماستغلينا احد ولو نريد نأذي احد منكم فمو صعبه
كلتله بقهر... اختي وين حسبي الله عليكم يالماتخافون الله شتتونا الله ينتقم منكم عساها بخواتك و...
دتكمل كللها... عوفي الدعاوي هسه جاي احجي وياج بهدوء وانه مارايد الكم شر
لكن بالله الكريم لو تجاوزتي اكدر انهيكم باشاره مني
سكتت وكعدت كعدت يمها ابجي كتلها :-كوليله شيريد
دتكوله شتريد كال... وشنو اختج ساعي بريد تكدرين تسأليني انتي بدون واسطات
رتيل... هسه المطلوب شنو اختي سالي وين
مرتضى... اولا اختج يم رجلها
رتيل... انت شلون...
مرتضى ... خلي اكمل... سكتت كللها :-عندكم خيارين اول شي ينسجن اخوج كونو تعامل مع ارهابي خطير مثل ابو مصعب واكثر من متهم ذكر هالشي باثناء التحقيق
وماندري يمكن انتي هم تنسجنين؟
اني شهكت كتله... واختي شكو
مرتضى... اختج حسب العقد المفروض تسدد الدين يوم واحد بالشهر الجاي واليوم ١٦ بالشهر
شوكت تلحك تدبرو؟
حره...رتيل يادين؟
رتيل... انت شدا تخربط!
مرتضى... ها نسى عثمان ماگلج؟
مو مشكله اني افهمج انتي تداينتي مني ٦٠ مليون
وحسب الاتفاق الي بيننا والي وقعتي عليه لازم ترجعيهم بعد شهر
يعني بقالج تقريبا اسبوعين لازم تدبريلي ستين مليون
اني بجيت كتله... مرتضى شدتحجي ياستين مليون احنا اصلا مااخذنا ستين
سكت كال... جاهزه تسمعين الخيار الثاني؟
حره... شنو
مرتضى... اجيب سيد ونعقد على سنة الله ورسوله
رتيل نترت كلتله... تحلم
مرتضى... الحجي ماموجه الج لحره
رتيل... واني المسؤوله عن حره
مرتضى... هاي قبل هسه اختلف الوضع
رتيل... مو بكيفك وحقي اطلعه من عيونكم
مرتضى... حره الج القرار اختاري يا تتزوجيني او تحلمين تشوفين اخوتج تلاثتهم
رتيل... الله بالمرصاد لكل ظالم هو
ضحك كللها... بالمناسبه معارضتج ما بيها فائده بكل الاحوال لو انسجنتي انتي واخوج
هم راح اتزوجها اني جاي احاول اسهل الموضوع لا اكثر
حره...مرتضى الله يخليك عوفنا بحالنا والله ممسوين شي احنا
رتيل كالت... ولج لاتتوسلين خلي يولي وسدت الموبايل
اني بجيت حضنتني وبجت وياي كتلها :-رتيل خايفه
رتيل... واني هم
حره... شلون شنسوي تخابرين مقدام
رتيل... لا مستحيل لا يجي وينسجن
حره... لعد شلون بسالي
هي تبجي صاحت مروه حضنتها كالت :-راح اخذجن لبيت رغد واروح ادور
حره... وين تدورين
رتيل... ماادري بس المهم مااضل كاعده راح انفجر
كمت كتلها... خلي نروح لبيتهم بلكي نلكاهم
رتيل... يلا هالبيت خانكني دااحسه مو امان
كمنا دانطلع اخذت موبايلي شفته داز مسج
... وافقي لتجبريني ااذيج"
اتصل موبايل رتيل كالت... هذا عثمان
حره... فتحي سبيكر
فتحته بسرعه كالت وهي تبجي... عثمان اختي وين شلون تاخذها ومتكول
عثمان... زوجها اني مااحتاج اذن
رتيل... والله ياحيف وثقنا بيك وهيج تاليتها تسوي بينا
عثمان... واني ماسويت شي غلط طول هالفتره وياكم
رتيل... اختي وين رجعها
عثمان... مستحيل
كلتله بصياح... ليش هيج تسوون لييييش راح اتخبل انتو وين هسه اريد اشوف اختي
عثمان... اختج راح تبقى يمي خلص احنا متزوجين وخلينا هيج حبابين ولاتجبرينا ع الشر
وها سالي اخذتها وصارت مرتي فابتعدي عن بيتي ولتحاولين تخربيه لااهدم بيتج على راسج
رتيل... والله اموتك ومايرفلي جفن الي يلمس اخوتي بضرر اذبحه
عثمان... اذا هي اختج فهي مرتي وكاعده ببيتها معززه مكرمه اما انتي واخوج فالسالفه
مو يمي
رتيل... شنو
عثمان.... شوفي ابو السباع
وسد الموبايل رجعت تتصل عليه مغلق اني كعدت ابجي كتلها ... رتيل هسه شلون.. ضلت تفتر كتلها... خاف صدك يسجنوكم
رتيل... لا يجذبون يردون يخوفونا
اخذت موبايلي ضليت اتصل ع سالي وعثمان ومحد يجاوب رتيل كالت
... مالي غير رشم اخابره واحجيله
رشم... هو مريض دايتعالج لان عنده تصلب بالشرايين لهالسبب مقدام مادخله بهالسالفه كال من القهر صابته جلطه خفيفه مو ناقصه اذيه
رتيل... لعد شلون يربي ماعدنا احد عمران صديق مقدام هارب
يارب شسوي
مر الوقت وماكو جواب منهم مروه من الجوع كامت تتقيئ راحت رتيل تسويلها اكل
اني كمت ارجف وابجي خايفه صدك يتورطون اخوتي
حسيت بتانيب الضمير لان اني الصورت الفيديو لمرتضى
اخذت موبايلي واتصلت على مرتضى رفضني ورجع اتصل جاوبت كتله
... ليش تسوي هيج
مرتضى... لاتبجين
حره... سالي مداتجاوبني الله يخليك خليه يرجعها
مرتضى... ترا مرتوو
حره... بطلنا نريد نطلكها
مرتضى... السالفه مو لعب زوجتو يحبها وتحبو ليش حتى تطلكوها؟
حره... اكيد كرهته لانه جذاب
مرتضى.. ماجذب بشي كل المعلومات الي انطاها الكم حقيقيه
بجيت كتله... شكد جذاب
سكت كال... كافي شبيج
حره... اريد احجي ويا اختي
جر نفس كال... ماشي هسه تخابرج
حره... ماشي
سد الخط رحت للمطبخ يم رتيل كتلها :-خابرت مرتضى
رتيل... ليش ولج خيولي هالسرسري
حره... علمود نحجي ويا سالي
سكتت كالت... راح انجلط من القهر
حره... كلي راح تخابرج هسه
هزت ايدها كالت... وانتي لسه تصدكيه
حره... ماعدنا غير حل
دانحجي اتصل موبايلي كتلها... عثمان فتحت خط جاوبت سالي اخذته بسرعه رتيل كلتلها
... شلونج خوما اذاج
سالي تبجي كلتلها... لا مااذاني
رتيل... لعد ليش تبجين
سالي... اريد اجي يمكم
اخذته منها كتلها... انتو وين هسه
سالي... ماادري ماكلي وين احنا بس كلي هوايه بعدنا عن بغداد
كعدت رتيل بالكاع كالتلها... خوما ضربج اذاج صيح عليج
سالي... لا ابد ماضوجني بحجايه بس اريد اجي ميخليني... وبجت
رتيل ... اهدي لتخافين راح يجيبج اكيد انتي هسه وين
سالي... ماادري جابني ببيت... بجت كالت... جذبو علينا رتيل
رتيل... اهدي ولتخافين هو مراح ياذيج اسمعي مني واحنا منعوفج راح ناخذج ونطلكج منه
سكتت كلتلها... وشلون باخوي مقدام
رتيل... ماكتله حتى مايجي
سالي... اي كوليله مريضه ومتكدر تحاجيك ترا عثمان مماذيني.. سكتت كالت... وهذا مرتضى طلع كلشي مابيه اصلا اصحى من عثمان
تفاجئت من شفته
حره... وين شفتيه
سالي... بالطريق التقو جان ويا جماعه ولابسين اسود ولازم بحبل جلب اسود يخوف حيل والله انصدمت
... دتحجي طب عثمان كللها... ماكملتي
سالي... لا دحجي ويا خواتي
عثمان... تعاي تغدي بالاول
سالي... مااريد
رتيل كلتلها... تغدي انتي عندج فقر دم وحاجيني مو؟
سالي... ماشي
سدت الموبايل ارتاحيت من عرفت مامأذيها كتلها... رتيل خابري امي ختجي نشوف شنسوي
هزت ايدها كالت... اي مو هي تحل لو تربط... صبت اكل كالت... اكلي سكرج
حره... حايره
رتيل... اني هم وهذا بيت ابوي مااكدر ابيعه مااعرف بهالسوالف
هو صح طابو بس لازم اخوي موجود مالي غير ابيع هذا البيت
بس شلون يربي نصفى بالشارع
حره... اذا اضطرينا نروح لبيت حياة
رتيل... اشتراه مرتضى بيبي البارحه بليل خابرتني
حره... راح عن بالي زين وهسه شلون يربي
رتيل... ماادري واخاف تجي امي وتكول لمقدام وخاف يجي ويعتقلوه
حره... خاف صدك يورطوج
حطت ايدها ع راسها وسكتت
للعصر هم خابرت سالي وجانت مرتاحه وضلت توصفلنا بيتهم وكالت
:-يخبل وعثمان كلش زين وياي ومااذاني
سألتها رتيل اذا صدك اخذها وصارت زوجته سالي كلتلها
... لا بالعكس اصلا داطرده من الغرفه وهو يطلع لان يشوفني ضايجه
حره... الحمد لله يعني مو نيته ياذيج
سالي... اي وحتى على مقدام كلي حااساعده بس رتيل اختي ميتدخل بسالفتها لان يم رْشاش
حسيت نفسي سامعه الاسم كتلها... رْشاش منو
سالي... مرتضى اسمه رْشاش
كالت رتيل... شكد كرهته الله يصخم وجهه
حره... انقهرت حسيت شكد استهلكت نفسي علموده
وهو يضحك عليه ضلت تحجي للمغرب اجت امي حجت وياها رتيل بكلشي من درت بسالي شاطت وخابرت عثمان كلتله
اميره... والله اذا مسيت شعره من بنتي باذيه مو بس احركك احرك عشيرتك هم خوش
عثمان... مرتي هاي ولو اذيتها بحجايه عود بذاك الوقت الكم حق عليه
اميره... مو ع اساس انت اخو مقدام وتوكف وياه امناك على بيتنا ووثقنا بيك تالي هيج تورطنا وتورط رتيل
عثمان... السالفه مو يمي شوفو ابو السباع
اميره... لا يمك احنا جنا نتعامل وياك مو ويا اخوك الخبل
عثمان... مو خبل ومو اخوي
اميره... ماشاء الله بكلشي جذب
عثمان... خاله اني احبج واحترمج وانتي بحسبة امي وعلى عيني وعلى راسي كل كلامج صح وماالومج اي مره تخاف على بنتها
بس اني سالي احبها ولو اذيتها الج حق هيج تحاسبيني
اميره... واخوة سالي من تاذيهم هي ماراح تنقهر
عثمان... وهم ماراح يتاذون ترا ابو السباع بحسبة اخوي وهو يحب توته مابيها شي اذا عقد عليها ولو اذاها بحجايه اني اطلكها منو
رتيل كلتله... والله تحلمون انطيكم اختي
عثمان... روحي تفاهمي وياه اذا هيج اني ميخصني
وهيج انخصم الكلام سدت الخط كالت... جيبي احجي ويا مرتضى مدري ابو السباع
رتيل كلتلها... خيولي شكو تحاجيه؟
اميره... خلي افهم منه بلكي نوصل لحل
رتيل... وشنو الحل تنطيه توته والله لو اموت
امي كلتلها... يجوز
رتيل... ابد لتحاوليين
سكتت كلتلها... خابري مقدام كوليله خوما نبقى نجذب
رتيل كلتلها... والله اذا كلتيله مايصير خير خلي يطلع منها بسلام ومن يرجع نطلك سالي بس خلي يخلص من هالورطه
امي باوعتلها كلتلها... وشلون يطلع منها
حره... سالي كالت عثمان حيساعده
اميره... ورتيل شلون بيها
رتيل... حاسوي سلفه وابيع الذهب الجابه اخوي واتداين وادبرها الله كريم
اميره... ١٠ ملايين مايجيبن
رتيل... الله كريم هذا البيت هم راح اعرضه للبيع
امي كلتلها. واحنا وين نبقى
رتيل... الله مايعوفنا
حره... بدت عطلة الاربعينيه ومرت ايام ومقدام ميدري شي عن سالي هي من تخابره ويكوللها انطيني رتيل تتحجج
ورتيل من تخابره ويكوللها انطيني سالي تتحجج
وهيج مشى الوضع
رتيل سوت سلفه وباعت كل غرض بيه سعر وجمعت ١٠ ملايين ولان ميكفن عرضت بيتنا الجديد للبيع وكالت
... اذا اضطرينا نعيش ببيت محروك ومتهدم مو مشكله
اهم شي ماينلزم اخوي وابو السباع يستغل وضعنا
اكيد الله مايعوفنا
ولان صارت حادثة سرقه بالمنطقه ودت رتيل الفلوس يم خالتي وطلبت منها انو تضم الفلوس عندها لان مو امان
وفعلا خالتي اخذت الفلوس ضمتهن يمها
طول هالوقت اني بموكب بيت خالتي هناك اشتغل واخدمهم عسى الله يباوعلنا ورْشاش بعد ماسمعت عنه خبر
رتيل كل يوم تتواصل ويا سالي وتطمنا بانها بخير
مرت تلث ايام وهالشهر قرب ينتهي وكل ماله يزيد خوفي
بيوم بالليل سهرانه ابجي وحدي مثل عادتي وصلني مسج من رْشاش مكتوب بيه رقم طويل وتحته مكتوب
... عبي هذا الرصيد وكنكي عليه وهاي الطريقه... وكاتبلي الطريقه
دزيتله... مااحتاج صدقات منك
اتصل رفضته دزيتله... مااريد اسمع صوتك كارهتك
دزلي.. دزيتلج صور ع الواتساب
حره... مالتيش
رشاش... كنكي وتعرفين
صدك رحت عبيت الطريقه وكنكت وفتحت واتساب ورا دقايق وصلتني صور من رقم غريب
عرفته هو
فتحت الصور وشفت صورتين لعثمان وسالي ومحجبه ولابسه صايه ماخذين سيلفي بسياره
لاحظت عثمان محلق لحيته
والصوره الثالثه تحمل من فتحت انصدمت صورة مقدام اخويه وهو يطب لبيت والصوره من بعيد كتبلتله
... انت شنو داتهددني
دزلي صوره رابعه صورة مكتوب بيها مثل التعهد ان رتيل متدينه من رشاش ٦٠ مليون
وحترجعهن بيوم ١ وموقعه هي وموقعين شهود
دزيتله... هاي شنوو!
رشاش... انتي شتشوفين؟
حره... حرام عليك اخوتي ماذوك بشي
رشاش... وانه هم مااريد ااذيهم
حره... لعد شتريد ليش هيج تسوي
رشاش... اريدج
حره... تحلم
رشاش... نشوف منو اليحلم
بجيت كال... هسه شكو تبجين
حره... عوفنا بحالنا
رشاش... انه ماعليه غير بيج بحجايه وحده منج كِلشي يتغير
حره... مااريدك كرهتك
رشاش... جذبي ع الكل الا عليه
مجاوبته دزلي مسج... اريد اشوفج باجر خلينا نتفاهم على كلشي
حره... مااريد اشوفك
رشاش... باقي ايام قليله ولازم اختج تسلم الفلوس خلينا نتفاهم احسن
حره... اختي حتدبر الفلوس
رشاش... ننتظر ونشوف
طلعت من البرنامج وكعدت ابجي حسيت شكد هو حقير مر وقت غفيت شويه صحيت ع الاذان گمت صليت
ومر هاليوم بشكل عادي هم رحت للموكب ساعدتهم ورجعت
للمغرب دااسوي عشا
خابرت خالتي على رتيل فتحت خط اسمعها شهكت كتلها... شكووو
كالت بصياح... انباكن الفلووووس....يتبع...
____________________
فراشاتي توقعاتكم للاحداث الجايه
ولتنسون التصويت والمتابعه
حسابي الانستگرام
nawras_qasim_22
حسابي الفيس بوك
Nawras qasim
شسمه
الله ينطيني روح وصبر اتحمل بيها حياتي
مثل روح وصبر رشاش بتمثيله
عفيه 8اشهر مدري 7اشهر تمثيل
ايي الواد داا 😵