صوره تشبه بطلتنه بطفولتها بنسبة ٩٥%
طا...طا....طا.....
حس المزايق والطلقات ترس الشارع والهلاهل.
وينج يا مره بسرعه نطيني جيس الجكليت والله
يستاهل التخرج.
دقيقه دقيقه....خلي احط العبايه على راسي .
_ ولج وينج هباوي جدي.
_ طلعت راسي من جوه الكرويته.....
هنا هنا جدو.
_ ياشسوين بالكاع كومي دنروح لبيت ابو هيثم.
_ جدو اخاف طلقات هوايه وحسه عالي.
_جرني من ايدي يعدل شعري.
تعالي حبيبة جده.....هذه طلقات فرح....لان تخرج ابنهم.
_ نحجي واحنه متوجهين للطرمه.
ها يعني صار عنده مسدس ويلزم الحرامي .
_ عفيه بالبطله.
فتح جدي باب الشارع
والركص والدبج جماعته وكلهم شايلي وامه تهلهل وتطش جكليت.
وابو خوش ادمي يمسح دموع عيونه....دموع الفرح.
اجتي بيبي.....
وكللللوووووووش وطشت الجكليت.
واني ساعه اريد ارهم حلكي اطلع صوت ميرهم ماعرف شيسوون ويطلع هيجي.
المزيقه ادك وتوكف يردون فلوس وكلسع هيجي.
شفت اخته مينا لابسه بدله حلوه وطاك ابو الورد نازل منا ومنا.
اني تعلمت ماكله لبيبي اريد لان تبجي خطيه....باوعت وسكتت.
واكو اخته الكبيره هم اطلع صوت من حلكه وبطنه
كبيره شلون مال ماما.
صاعده على الكرسي واصفك واكمز على واهس المزيقه.
وهناك ونزلت بسرعه طبيت بنصهم حتى الم الجكليت.
وما شوف اله وداسوا على اصبعي حيل.
واني....عا....عا...
شالني اخو إلاصغر منه ليث ويسكتني لان فحطت.
_ طببني بالنص ويركص بيه.
وصدك تونست وسكتت.
وهيجي كظه اليوم.....وباقي الايام.
.......................
_ جدي ماعنده لا تقاعد ولاشي....عنده محل مطلعه من
البيت ويبيع بي هل قاسمه الله.
ويا محلاتها من نلتم باليل على صينية العشا وبيها البتيته والبيتنجان وطاوة الطماطه والخضره خير وبركه.
وصفطة الخبز من ايد بيبيتي.
اثاري من مرت الايام والسنين السعاده وراحه البال مو معناته تاكل دجاج وسمج ولحم.
لا راحة البال من تنام بوسط ناس تحبهم ويحبوك وموكل باجر بيد الكريم.
امي لاشفته ولا جتي.
سمعت صاير عده ولد ثنين وظاربه الدنيا كلها .
يكلكم حتى ظرته خانسه لان امي ام الولد بعد خلفتله.
يمكن متصدكون تدرون بيناتنه كم فرع أي والله كم فرع وماعدها وكت تشوفني.
_ بيبي خلي اطلع عفيه.
_ ولج هبه كعدي ورمتي قلبي دنيه ظهر بعده.
_ ودكيت رجل اله اطلع.
اخذت حصيرتي الصغيره وفرشتها يم السياج بالشارع.
_ وين صاروا صديقاتي وفرح.
_ هاولج بزونه شعندج بالدرب.
_ عمو مصارت بالسته.
_ شلج بالساعه وعيونج ساعات.....ههههه لابعد شويه
لتروحين بعيد ترى يبوكج الحرامي.
_ كمت بحيل صدر ونفظت دشداشتي وجواها بجامه من نفس اللون.
عمو موعندك مسدس اكتل بي الحرامي.
_ ههههه منو كلج ولج عندي مسدس.
_ بعده يضحك ويحجي وطلع ابو الحجي.
_ شلونك عمو.
_ هله هله بت الغالي...الف رحمه ونور تنزل على ابوج الطيب.
شبيك ابني شو حس ضحكك واصل للطرمه.
_ ههههه أضحك على هاي الفاره تكلي عندك مسدس واكتل الحرامي.
يابه اذا مسدسي صار بحلوكهم الزعط لا ربحنه.
_ وهيجي مرت الايام عاديه كأي طفله عراقيه بين الاكو والماكو.
بس فرقي اني مو بس الماده لا فرق وجود الاب والام بحياتي.
_ مرت ايام السقوط والحرب و الدنيا تغيرت ما اكدر اذكرلكم هوايه اني فطنت وره السقوط.
اليوم واكفه على المرايه اسوي ضفيره لشعري هنديه
اي تعلمت كلشي لان كبرت وصرت هسه بالسادس ابتدائي.
اباوع جدي نايم والكبر اخذ حيل حيله وبيبيتي الايده ترجف اذا شالت صينيه.
نزلت ركض من على الدرج بعد ماشفتها شايله القوري.
_ بيبي حبيبتي عوفي ذاك اليوم مو وكع على ايدج.
_ ولج شلون شلون بيج اني مو كتلج من تجيج الد.... وخليت ركض ايدي على حلكها خاف جدو يسمع.
ولج ليش تسكتيني قابل هيه عيب يا اصلا ايام قبل من تجيه للبنيه يسون جمعة حبايب ويتوزع الحلو والشربت.
اي اي يبيبي راحوا الطيبين وراحت ايامهم.
_ ميخالف ميخالف بيبي عفيه استحي اني.
_ شالت ايده خلته على راسي تمسد بشعري
مناويه تتحجبين اخاف عليج من العيون والوكت تغير.
_ طفرت لا عفيه ماحب الربطه لا لا ونهزمت.
طلعت اعدل بصدريتي وقميصي .
فتحت باب الشارع وجان الكي يخابر بالموبايل وصاير
عصبي.....وسيارته مشغله ولابس ملابس دوامه.
صباح الخير عمو.
صباح النور......وكمل مخابرته واني مشيت اروح لفروحه صح صارت بالمتوسطه بس نفس الطريق احنه.
حاليا سنه ٢٠٠٦
واني بالسادس ظعيفه شويه بالرياضيات والانكليزي
شسوي لضحكون عليه اني محد درسني لا ام ولا اب
ولابيبي وجدو اميين.
من ماده ضعيفه بيه جنت اروح يم بيت عمتي ابنه فراس يدرسني.
هو اكبر مني بخمس سنوات.....صايره اضوج منه ويحجي كلام سخيف مال ممترباين.
كتله لبيبي وكالتله لعمتي.
والله يمه لزمته ذاك اليوم لفراس كسرته بالجفجير كتله
ولك هتلي هاي عرضك بت خالك .
ومن سمع ابو كلي خلي تكف بت اخوج رجله من بيتي.
_ جاوبته بيبيتي
وجع كون وجع هل سربوت رجلج ميكول يتيمه وماكسر بخاطره.
كتله والله يمه
يكلي كلنه يتامى....على الاقل هي امه عدله يكول كل اسبوع اشوفه بالسوك عند الصايغ.
تسويله هف اطير.
_ جنت واكفه بالحولي واتسمع عليهم.....هذا الكلام يحز بخاطري وانقهر.
وصرت افتهم امي تخلت عني.
باعتني لخاطر الزواج ورجلها .
عافتني من اني بالتمهيدي صارلها فوك السبع سنين زين منقهرتي عليه مشتاقيتيلي.
لي هسه افتح عيني واذني على كل وحده تحجي على حنية الام.....ليش امي وحد.
_ كملت عمتي كلامه
يمه البنيه بلغت وصلوات على النبي تجذب كلش بالرغم طفله.
جنها المتتسمه امها كل متكبر تزيد حسن.
_ جاوبته بيبيتي
غدي...غدي من عيونكم على هل طفله شمحصله من هل الدنيا شو ظيم بظيم.
وهكذا انتهى نقاشهم.
_ راجعه من المدرسه ومعبسه وشبه مبرطمه.
اليوم شهايدنه مال نص السنه.....وطالعه بدرسين اكيد عرفتوها.
_ تلكتني بيبيتي بعد مطبيت للمطبخ وشمرت الجنطه.
ها بشري يحبيبه.
شبشر شبشر بيبي بدرسين شلون شلون مكاعد اعرفله والله.
_ يا فلك طرج يبت سجيده اي والله بيانج على امج تحب التخامه.
_ بيبي لجيبين طاريه ماعندي ام ماعندي انتي امي
وخليت ايدي على وجهي وكمت ابجي طلعت حركة الدرسين.
_ شبيج وجع اتشاقى وياج
شو ام سامر تكول اجيب بتي كله ميات
وام محمد....وام هيثم هم
ليش بس انتي.
_ اي ام سامر وام محمد عيني حاطيلهم ست بان بذاك الشارع ادرسهم.
ومينا اخوها هيثم يدرسه.....اني منو عندي.
_ اشرله جدي
دروحي يامره انخيه للرجال والله ميقصر ابن اوادم كليله ويه اخيتك درس هل يتيمه.
_ وكفت ماريد ماريد
مينا ماحبه وثاني شي تكول يركع راجديات اذا مجاوبتي.
_ جاوبتني بيبيتي
دنجبي يخايبه هسه قبل وكمنه نتبطر
جرت عباته من وره الباب.
خلي اروحلهم مدام سيارته موجوده.
راحت بيبيتي وكمت اني اصب الغده الي ولجدي
_ هستوني خليت الصينيه بالكاع.
يله جدي كوم نتغدى شو تاخرت بيبي....
_ ها يهبه صبيتي يمه..... بعد مطبت للمطبخ راجعه منهم.
_ حاجاها جدي ها كلتيله للولد.
_ لك فدوه العينه شكد احبه واحترمه....كلي ادللي
حجيه حاله حال مينا.
وانتي يمكموعه مو تشلعين كلبه....كال نزلتي خميس وجمعه ادرسهم مال اسبوع.
_ بس بيبي اخته تكول يضرب والله.
_ خاب دلصمي الرجال مصموط جد جده وينزل يومين يخلي كباله طليان موزين ميركعه بطلقه ويفتح دماغه لهل حولي.
_ نصيت راسي اكمل اكلي واني ساكته.
_ كملي غداج ولمي المطبخ وناميلج ساعتين قبل متروحين.
_ فزيت شنو اليوم اروح.
_ حجي حاجيه ترى ورمته لقلبي.....يمه يساعدك الله ويجابرك يهيثم يبن ام هيثم.
حظري روحج بالسته ترحين كلمة لخ افتح راسج بالماعون.
جماله العوبات يطلعن الصوج بالمعلمات.
_بيبي وجدو شما يحجون ما ازعل منهم أصلا اعتبرهم امي وابويه.
كملت المطبخ وعزلت كلشي بي ورحت انام شويه الجو بعده بي بروده شهر الثاني بعد.
_ كومي كومي هباوي يمه كعدي.
فزيت رأسا
اسم الله يمه شبيج.....كومي حبيبه غسلي وجهج ولبسي تراكسودج وروحي.
_ كمت غسلت وكفت شلبس شلبس....لبست تراكسود
عمتي نطتنيا ابو السحاب حلو جديد اخذته لفروحه وطلع صغير عليه.
شلت شعري ذيل حصان.
شلت كتبي ومحفظتي وطلعت.
يله بيبي تعالي ويايه.
_ يا بيبي شلي اني بالروحه اصلا بيتهم يروش روش واخته تدرس وياج.....يله بيبي توكلي يمه.
_ فتحت باب الشارع مالتنه صار ليث اخو كدامي
هو بصف سادس اعدادي.....وحباب وبشوش.
هلو ليث
_ هلو بزونه.
عمو هنا.
منو ابويه شتردين منه.
لالا عمو هيثم.
ههههههه صار عمو ولك لحك ازوج هععععع.
_ بعدنه نضحك وطلع.
شكو هل ضحك.....وانتي مو كتله للحجيه تجي ادرسه.
_ عمو مو هياتني اجيت .
وطبيت جوه بالهول شلونج خاله.
هله يمه هله
جايه ادرسين.
_ اي خاله.
ومن هذا اليوم بديت ادرس عدهم بس خميس وجمعه
_ اليوم اله تلث اشهر يقريني.
_ فتحوا عقلكم راح اراجعلكم مال بكلوريا التحجي كلمه بليه اركعها براجدي اصحيها.
_ فتحت عيوني واذانتي عليه اخاف لا انظرب ذاك الاسبوع ضرب اخته مينا راجدي ضلت يومين تون منه.
_ اجه للهول ليث
اهلين شبابوز .
شعندك هنا مو سادس انت يله لغرفتك خلي راسك بكتبك.
شبيك لخاطر الله مو صرت عمو هههههه شكد نحس.
_ ليث ولي منا لاكوم اسحلك هسه.
خليني اخلص ذني داطلع.
_ متطلع جيب اني اقريهم بس أخذ اختك الحولي وياك وعوفلي هل عود الاخضر.
_اخ اخ راسي ليش يابه.
ههههههه خربنه من الضحك ليث ضحوك مو مثل هيثم صح هو حباب بس ميشاقه.
وهناك ونركع بالمسطره الحديد خطيه وطلع.
_ مشت الايام ونجحت من الدور الأول.
ومينا طلعت اكمال بالانكليزي.
_ ولج هبه امشي نشكر من ابن العالم.
_ حجيه شماخذه وياج.
_ والله يحجي اخذتلهم زنود الست وزلابيه حلاوة نجاح هباوي.
ولج وينج فظيني عاد.
_ جيت جيت بيبي
عوفيني يم جدو وانتي روحي والله باعي صدره الكحه.
_ روحي روحي جدي هنا مدد على الكرويته مابيه شي.
_ شلونج خيه ام هيثم
هله هله بالحجيه
والله جيت اتشكر وليدي يوم زواجه ونفرح بي.
الله يسلمج خيه.
وهناك نزل مبدل العصريه والريحه تعط.......ماعرف ليش ريحهم تعط واني حتى روحي ماشمه.
_ كامتله بيبيتي
هله هله بزين الشباب مشكوره منك خاله اعتمدت على الله وعليك.
_ تسلمين حجيه شسوينه يمعوده يوم تخرجه من الثانوية.
_ اوف هم ينطيني الله عمر.
_ عمرج طويل حجيه.
وهسه اعذروني عندي شغل سلميلي على الحجي هوايه.
وانتي هباوي شدي حيلج للمتوسطه.
_ ان شاء الله عمو.
_ بدت العطله وجدي وضعه كلش تعبان وميقبل يروح للدكتور يكول بليه معنى.
_ بس جذب لان الدكتور يرادله كومة فلوس.
واحنى يادوب مدبريه والحمد لله.
_ ٢٥/٨/٢٠٠٦
شهر اب والدنيه صمط ظهريه كله اكضيه اسبح واطلع
حتى تجيني نسمة الهوى البارده.
لاباليل نكدر انام بالسطح نخاف من الطلقات العشوائية ولا الظهريه سحب ماعدنه .
امي اخ اخ يا امي والله ذكراها من يجي بحلكي يستغرب الساني من انطقها.
من ذاك اليوم الي جنت بي بالاول وهذا يوم هم صرت اول.
بس الفرق دارت ست سنين
ست سنين يا امي ولسه احلم بحظنتج الي.
اشتاقلج والله واني ملحكت اشبع منج.
مشاقيتيلي
محن قلبج عليه
بطنج الشالتني مكرصتج وذكرتج بيه
من تشوفين بنات رجلج مذكريني.
اوف اوف هاي كل مايضربني الحنين اكعد اعاتب بيه بيني وبين نفسي.
_ هاها ولكم
منو
اني اني فراس ( ابن عمتي).
شبيك يمعود هجمته للباب.
هلو بزون
اهو احجي عدل فراس.
شبيك بس بس.
حصيح جدو عليك والله
على طاري جدو امي دزتني كالت ابقه يمهم اليوم لان ابويه مريض كلش.
اي كلش صدره متنك عليه.
_ وكظه النهار بين حجي بيبي وتصنيف فراس.
هذا فراس ابن عمتي سينما يخرب من الضحك بس ماعرف يباوعلي ماعرف شلون.
_ بنفس البيت الساعه العاشره مساءا
_ كاعده اني وفراس نسولف بالحديقه فارشين جودليه وخالين ماعون الحب شمسي قمر.
_ لذب عليه شبيك.
هباوي
ها شبيك
تدرين عيونج بنص الضلمه تلمع.
شلون تلمع وهيه سوده
ماعرف والله سبحان الله.
لاوالله جذاب.
بعدنه نحجي و....
يبو يبو يبو نهجم بيتي لك عيني كوم
كوم يبعد عيني كوم يخيمتي......اخ ليش ربي ليش ردته يشيلني هو ومانذل للوكت لك كوم يسند عمري.
_ اي هذا صوت بيبي واني ..........اني وين
راح جدي
راح الحنين.
راح ابويه اليوم
اني ماشفت الاب.........بس اليوم مات ابويه وجدي وسندي.
_ بيبيتي كطعت روحه........ملخته وعمتي وبناته الاثنين واني وكم جيران على كم كرايب.
فاتحه على كدنه حتى جادر منصبنه المن ننصب اذا لا ابو البيت ولا عزوته( ابنه ) ثنينهم ماكو.
_ خاله راسي على رجلي وعيوني راحت من الدموع.
طفله ماعرف الطم............ولو اعرف شظاملي الوكت جان جلبت بتابوته.
_ الجوارين سوها فضل وجمعوا وجابوا ملايه تقره يومين.....
هم خلفله عليهم غزر جيس الجكليت وبطل الشربت التدخل بيبي عليهم بي.
_ هناك ونسمع
جق.....جق......جق......
حس كعب هذا ومنوا عدنه يكشخ هيجي ويجينه بالكعب.
_ طبت العبايه السوده التلمع......والشال شمر مشمور
والعيون مكحلات كل عين بطول الاصبع.
الكذله حمره طالعه.
الاظافر مقلمات.
هاي امي لو اني امه.
اباوع روحي دشداشه من عمتي مالتها شكبرها المها يله اكوم.
الوجه كركم وشاحب.
الشعر على فد عكده صارله تلث ايام.
سجود/
واكفه اباب الهول البقاء لله......وان شاء الله اخر الاحزان.
وراحت كعدت اشرت لجاهل جابله كرسي.
_ ايبا صدك متكلفه وجايه
عاد عرفتني لا........اخر همي هيه.
_ هناك وطلعت العالم وصفوا جم وحده كرايب.
ام فراس/
حجت عمتي اي يسجود يم الأصول .....متعرفين تنصين وتاخذين من خاطر عمتج وحماتج.
ترى حتى لو تزوجتي وضحكتلج الدنيه نبقى عيالج واهل رجلج الميت واهل بنتج.
بنتج الناسيتها والعينج مدورته من طبيتي لي هسه.
سجود /
اي شبيج خيه مو اخذت من خاطركم.
هناك وخلت ايدعلى بطنها وايد على ظهرها وكالت وآلله حامل ورجلي كوه كوه خلاني اجي يخاف عليه حدي للحمام وارجع.
_ خيه بس انتي حبلتي ملزوك بعلج خما بعلج جاوبته وحده من اقارب بيبي.
سجود/
اي والله يخاف يوميه يبوس بطني يكلي هيجي بطن اذب ولد هي وصاحبتها على راسي.
_ قاطعته بيبي خير يسجيده خير
اشوف جيتج مو لخاطر العزه.
احنه حلكنه متروس دم ابو بيتي راح ونهجم عاموده وانتي جايه تتماوعين عليه بزر بطنج.
جنج نسيتي دفنت ذاك الشاب الحوك الباب متسد طوله.
خلت شيلته على وجهه وتنعي مره على ابويه ومره على جدي.
والكاعده سد الحايط ترى بنيتج صارت مره وبعدج حاسه روحج مراهقه.
_ حجت التتسمه امي
راح الله يرحمه احسله شله بعيشت الفكر خطيه.
_ انتفضت عمتي وكامت من مكانه مدامنه فكر ليش دايسه بساطنه شلج عدنه.
سجود/
لاحبيبتي لا
الي هنا اكثر منج
الي بنتي وحصت ابوها
هنا هيه الاصل وانتي الج التلافيس.
اني بنتي اريدها بعد ماخليه يمكم .
وهنا جانت صدمت الكل ❕
سجود سبب جيتها شنو معقوله هبت عواصف الامومه داخلها.
لو طمعا بحصت بنتها.
لو خوفا على بتها من المستقبل.
الحاب يتعرف على اخبار القصه ويتابعها ينظم ويانه لكروب الفيس المثبت اول تعليق.