الحلــــــــقه الرابـــــــــــــــعه
رواية... هل كانَ حُلماً...؟
{ العِراق-المُصغَر...ارواح-مهشمه }
بقلمي ... لؤلؤة_البِحار ...
___________________•
حره :- شويه و رفعت راسي باوعت اجو اثنين من الامنيه باتجاهي وگفو يمي
گالو
... انطينا جنسيتج
حره... معندي... گلتها بخوف
هم واحد باوع للثاني كال ... هويه باج كليه اي شي
كلي:- اهلج وين؟
سكتت كال... انت شارده من احد؟
هزيت راسي لا اا
الولد كلي... لتخافين احنا دنساعدج
حره... ضيعت طريقي
... تفضلي ويانا
حره... لا ماريد... وبجيت
كلي... لتخافين خيتي نتاكد من هويتج ونرجعج لبيتكم
حطيت ايدي ع راسي خايفه سمعت صوت رجال غريب كال... لحظه هالبنيه اعرفها
التفتت اباوع شفت مرتضى لابس تيشيرت اسود نص ردان وشفقه سوده لابسها بالعكس
ولابس ساعه سوده بايده
ولاف ايده اليسرى بشاش
ووياه رجال لابس تشيرت اسود وبنطلون عسكري
اجه مرتضى جرني الامنيه ديحجي الولد طلع هويه شوفهياه
وابتعدو عني يحجون
باوعت لـ مرتضى گتله
:- تيهت
سكت مجاوبني جرني من ايدي ومشينا ابتعدنا كتله :- اخاف ميقبلون هم
مجاوبني جرني ضلينا نمشي احاجيه هو ساكت ميجاوبني كتله :- شبيك ساكت احجي
دار وجهه عليه كال :- واذا حجيت شراح يصير؟
سكتت ضلينا نمشي كتله... زين وين رايحين هسه شنو؟
مرتضى... مو تردين تجين لحياة راح اخذج الها
ركز بوجهي طلع منديل من بنطلونه الاسود كلي ... مسحي هالحمره الي على وجهج
اخذته مسحت وجهي بيه واحنا نمشي الى ان لمحت قبر سمرا وحياة ركضت عليهم حضنتهم وابجي
هو اجه وراي وگفني گال... اوگفي عدل
وهاي اول مره يحاجيني هيج كتله :-شبيك؟
مرتضى... خليهن يشوفنج مو يكولون الميت يشوف ويسمع خليهن يشوفن حالتج
حره... شيشوفن؟
مرتضى... انتي باوعتي لروحج بالمرايه قبل لتطلعين؟
اشرتله... لا كال... حلو ممكن تفهميني شلون تطلعين وحدج!
حره... اريد اشوف حياة
مرتضى... مو صعبه اذا تكولين لخواتج حره!
حره... مراح يخلوني اجي
هو ركز بعيوني كتله... اريد اكوللها ان الي قتلها انقتل
مرتضى... ع فكره افعالج هاي هم داتقتلها لحياة... باوعلي من فوك لجوه كلي... يول باوعي حالتج!
اني باوعت لابسه تراك اشر عليه باصبعه كال :- هاي البنيه تختلف تماما عن البنيه الي شفتها اول يوم والفكره الي اخذتها عنج اول يوم وين جنتي ووين صرتي!
داتثبتيلي يوم عن يوم انج وحده ضعيفه
ومعتمده على غيرج بحياتج
اشرتله لا كتله... انت جاي لهنا حتى تضربني بهالحجي؟
مرتضى... وانتِ شايفه ان كلامي غلط؟
مو من يوم الي ماتت بيه حياة وانتي وقفتي حياتج وحياة اهلج!
لو هذا يشتغل ولو شوي... واشر على راسي... جان كلتي اتقوا علمود اخوي او خواتي
او ع الاقل علمودها... واشر على قبر حياة كال... لتفكرين ان البنات لما يشوفوج بهالوضع راح يفرحون لانج زعلانه عليهم
بالعكس وانت بنفسج كلتيها حياة جانت تحب الموت وراضيه بيه انتِ ليش حتى ماتقبلين بشي هي تحبه؟ انتِ انانيه لو انانيه
بجيت وكعدت كتله... انت مداتفهم شي
كعد نص كعده كال... اني اكثر واحد
فاهم شديصير
جرني كلي... اوكفي شو اوكفي.. وكفني كال.. هنا لازم تاخذين قرارج
حره.. اي قرار شنو؟
مرتضى... لو تضلين طول عمرج تبجين وتشترين كبر بصفهن حتى يدفنوج هنا وانتي مامسويه اي انجاز يذكر عنج حتى مقارنه بحياة واختها ماتتقارنين
باوعتله كتله... ليش هيج تگول
مرتضى... حياة حاربت ابوها وهمزته رغم سلطته و سمرا جانت راح تكشفه وحاربته انتي شسويتي؟
حره... اني دااحارب حتى اعيش
مرتضى... ليش انتي تعتبرين نفسج عايشه؟
ترا النفس بالانسان مايعني ان هو عايش
اهم شي ان يسوي شي لنفسه
يحبه
يفتخر بيه
يتأمل
يسعى يفرح
يحس ان هو عايش اني مااعتبرج عايشه حره انتي دفنتي روحج من يوم وفاة حياة وكأن الحياة انتهت
انتي مو اول وحده تفقدين عزيز ولا اول وحده تشوف الدم
هاي العيون... واشر على عينه... شافت الاكثر قبلج
حره... انت مداتفتهم الصعوبه الي اني عايشه بيها
اني من صغري هيج مافد يوم ارتاحيت او شفت السعاده
مرتضى...تدرين ليش!
لان انتي الداتنظرين لحياتج بهالطريقه ودائما تفكرين ان حياتج كلها حزن وتشوفين كل الامور من الجوانب السلبيه
لو تفكرين شوي بالنعم الي الله انطاها الج جنتي راح تكونين راضيه كثير ترى غيرج ماعنده لا بيت ولا اهل يحبوه مثل اخوانج هاي نعمه انتي ممقدرتها حره
سكتت كال... كافي تعيشين دور الضحيه صيري قويه
انتي لو تريدين تكدرين تسوين المستحيل وكل هالظلمه الي بعينج تكدرين تنوريها
سكتت كال... احجي ليش ساكته
سكتت كعدت يم القبر كال... قرري لو تبقين ع هالحال لو... باوعتله كمل... لو تبدين من جديد تشتغلين على نفسج وتثبتين ان ماكو اي شي ممكن يكسرج صيري قدوه للبنات الي مثلج
ولا عاد تدفنين روحج اكثر
باوع لقبر البنات كال... خليهن يفتخرن بيج هناك بين الناس ويكولن هاي حره صديقتنا رغم الشافته ضلت واكفه على رجليها ومانذلت لاحد
حره الدنيا حلوه بعين الي يريد يشوف حلاوتها
صيري قويه وواجهي الي تمرين بيه بقلب صبور
ولو شنو ما كانت مرارة هالدنيا خليها حلوه بعينج لان هوايه غيرج يتمنوها
حره... حسيت بدوخه قويه حطيت راسي على قبر سمرا وهنا محسيت بشي بعد
فتحت عيوني شفت نفسي كانما ببستان كلش حلو
الهو الي بيه يجنن البروده كلها حسيت بيها
ضليت اتمشى وادور على احد اشوفه هنا
باوعت ليكدام شفت الشمس داتطلع صفنت بجمالية المنظر حسيت شي بداخلي تحرك
وبداخلي كاني اسمع صوت مرتضى من يكول
"الدنيا حلوه بعين الي يريد يشوف حلاوتها"
حسيت بايد على كتفي درت وجهي وشفتها لاول مره بمنامي
حياة
جان مبين عليها الراحه وعيونها بيها لمعه غريبه وتبتسم
كتلها... حياة انتِ عايشه...!
محجت شي كتلها... شلون هيج مو اتذكر متي شفت الدم طالع منج ذاك اليوم
هم محجت شي باوعت ع المكان اني باوعت وياها كانه جنه
ضليت اسالها متجاوب اخر شي انطتني سبحه
وكالت "مااحب الاسود"
كتلها.. ليش
حياة... تعرفين ليش
حره... فتحت عيوني كدامي سبلت كمت اتلفت اني وين؟؟
باوعت شفت بايدي كانولا وشفت المغذي عرفت
اني بالمستشفى بس اشو غرفه وحدي..؟
خاف بالخاص!
كعدت طب مرتضى جر الكرسي كعد كبالي كال... شلون صرتي؟
اشرتله بخير كال... حره خواتج بالطريق راح يجيبهن اخوي
نزلت راسي كال... ليش متباوعيلي؟
حره... خجلانه احس غلطت
هز راسه كال.. تصير.. لتعيديها بعد
سكت كتله... اني راح اكمل واخلي خواتي يفتخرن بيه
ابتسم... ادري بيج سباعيه
حره... بس مرات مااحس بايدي شي مرتضى كمت مااميز الحلم والواقع
هز راسه... تتخطيها انتي سباعيه
حره... شلون جبتني لهنا؟
مرتضى... تعالي نتفق على كم شغله
حره... شنو؟
مرتضى... مااريدج تكولين كدام احد اني اجيتج واخذتج لقبر حياة
حره...بس ليش؟
مرتضى... اخذت سيارة اخوي واندعمت
حره... يااا صدك
مرتضى... اي والولد الي شفتيه وياي اجه يساعدني
حره... لعد ليش متريدني اكول
مرتضى... اخوي يعصب حيل ويمنعني من الطلعه واني مااتحمل
حره... يا ليش يمنعك
مرتضى... يشوفني ماكدر اتحمل مسؤوليه
حره.. يااا.. وضربت كصتي كتله... تمام اذا هيج مراح اكول
مرتضى... حتى لخواتج ولاخوج لتكولين
باوعتله قبل لااحجي كال... ماريد احد يفلت حجايه كدام اخوي
حره.. تمام بس هو حيعرف لما يشوف سيارته مدعومه
مرتضى... لا صلحتها
حره.. تمام لعد مااحجي شي
مرتضى... ادري بيج
حره... شلون اجيتني بسرعه
مرتضى... جنت افتر بالسياره قريب منج لما خابرتي
حره.. اها
مرتضى... اي... اتصل موبايله رفضه وباوعلي كال... وهم ماريد احد يعرف باللي صار لتكولين دخلت للمقبره
حره... ليش؟
مرتضى... علمودج لان هذول الشرطه شكو بيج جانو حيعتقلوج خطيه اخوتج ينقهرون اذا عرفو
حره... بس اني مسويت شي
مرتضى... جان شكلج غريب لهالسبب
حره... يا لعد ديربالك لتفلتها كدام احد
مرتضى...لتخافين مااحجي شي
حره... مرتضى
مرتضى... امم
حره... ليش يكولون عنك مخبل وانته مبيك شي
مرتضى...لا بيه عندي مشاكل نفسيه
حره...بس شو ممبين عليك
ابتسم گال... بس بعينج
حره... شلون يعني
ديحجي سمعت صوت رتيل شفتها طبت تركض حضنتني باوعت طبت سالي و مصطفى
انتبهت لـ مصطفى و مرتضى باوعو لبعض بنظره حاده
ومرتضى رفع حاجبه ونزل عيونه وباوعلنا
رتيل كالت... ولج وين رحتي شلون تطلعين بدون متكوليلي متت خوف عليج
حضنتها وبجيت... اسفه
سالي... ولج شوصلج للنجف
حره... اجيت وحدي
سالي... شلون تطلعين ومتكولين وكفتي كلوبنا
حره... غلطت وبعد متنعاد
رتيل... لتعيديها
اشرتلها بـ اي اتصل موبايل سالي باوعت لرتيل كالتلها
... هذا مقدام
اخذته رتيل جاوبته كلتله... احنا بخير
مقدام... حره شلونها
رتيل... بخير هاي توها كعدت من النوم
مقدام.. الحمد لله
رتيل... شوكت تجي
مقدام... بلكي للمغرب اني بالبيت
رتيل... ترجع بالسلامه
مقدام... الله يسلمج انتبهي لخواتي
رتيل... بعيني
وسد الخط كتلها ... مكلتوله
رتيل... جنت راح اكوله بس خابر صديق مصطفى كاله بمكانج فبطلت ماردت اشغل باله
حره... صديق مصطفى منو؟
مرتضى بسرعه كال بضحكه... الولد الي اجه وياي
حره... اها
مصطفى باوع لـ مرتضى كله... وين لكيتوها وين جنتو تعال حجيلي شعندك هنا
كله بضحك... شبيك ياخويه من طلعنا اني وابن زهراء رمشت حره فلما اتصلت عليها كالت تيهت اتصلت عليك انت ماجاوبت فابن زهراء كلي نروح نجيبها احنا قريبين... باوعلي كال... ونزلنا اثنينا وشفناها
مصطفى... وشلون جبتها للمستشفى
مرتضى... هي جانت صاحيه وجبناها لان داخت
مصطفى... ها بعد لاتعيدها
هو هز راسه وسكت... سالي كلتله... لعد وينه صديقك
مرتضى... راح عنده شغل
حره... تفاجئت عقجت حاجبي هو كلي لما اندعمت اجاني صفنت شويه كلت خاف يقصد هو جان وياي وساعدني اي يمكن
مصطفى باوعلي كلي... الحمد لله على سلامتج حره
حره... الله يسلمك
سالي... بسببج شبعنا مستشفيات
رتيل... ان شاء الله مترجع لهنا... باوعت لـ مرتضى كلتله... الدكتور شكال انطلعها
هز ايده كللها... الدكتور هم ميفتهم يكولي بيها سكر كتله شنو هي جاي وبيها سكر؟
شو لبسني
كلت خطيه خاف مريض
كتله تعال اشدلك سرنجه بايدك شو عصب هيج سوا... وقلد حركات الدكتور ع اساس معصب...
مصطفى كله... بربك سرنجه وبالايد!
مرتضى... اي باوع لايد حره سرنجه ولافيها بتيب
ضحك مصطفى...حبيبي هاي كانولا
مرتضى... نفس الشي
سالي... بس شنو هاي لان خاص هيج ملبوسين محد اجه لا ممرض لادكتور
مرتضى... لا العشرات اجو قبل لتجون
رتيل... شنو يعني توته عندها سكر؟
مصطفى... رايح اشوف الدكتور واستفسر منه
وباوع لـ مرتضى اشرله بعيونه بمعنى تعال طلعو
رتيل ضلت تحجي وياي وتعاتبني ورا شويه اجو
مصطفى كال... مبيها شي عادي نطلعها
رتيل... وشنو يكول سكر؟
مصطفى... هبوط سهله تاكل شي حلو وكلشي يكون تمام
رتيل... خوش لعد
كومتني نزلنا من المصعد وطلعنا صعدت بالسياره كعدت رتيل بصفي ويمها سالي ومشت السياره سالي
كالت :- اكلك مرتضى تعرف تسوق؟
مرتضى... اي كلش زين بس هذا... واشر على مصطفى... ميخليني اسوق
سالي... يا مصطفى ليش متخلي يسوق دام يعرف!
مصطفى... صدكتي كيلوين ميمشيهن اذا مايندعم لو ما احمد طلع وياه فلا اخليه يروح بالسياره
مرتضى كله... اي ابن زهراء خوش يسوق
ابتسمت حطيت راسي على كتف رتيل وغفيت كعدتني فتحت عيني احنا بفرعنا وصلنا للبيت نزلت سندتني سالي
اسمع رتيل تتشكر بمصطفى واخوه طبيت للبيت تلكتني مروه حضنتني كالت
مروه... بجيت عليج
حره... مبيا شي لتخافين
مروه... عبالي ضعتي كلت بعد منو ينطيني الااف سالي
نحسه متنطيني
سالي... كلبه حقيره هاي عليه
طلعت رغد من الهول كمت كالت... ها توته شلونج... وحضنتني
حره... بخير الحمدلله
طبيت للهول كعدت رتيل طبت
كالت لرغد... سوده عليه تعبناج
رغد... لا يمعوده تعبيش غير انتن خواتي
مروه... اصلا ماضجنا بالعكس شفنا حلوين
رغد ضحكت
سالي كلتلها... ياحلوين ولجن
رغد... ولجن مداهمه ع المنطقه اعتقلو ذوله الاخوه التوأم اليوم والعالم تكول ابن عمهم الي بحي **** حيدر اعتقلوه قبل يومين والثالث بعدني مامتاكده من هويته
سالي... يا ليش اعتقلوهم
رغد... مخدرات مدري شنو
رتيل... حيدر يكولون حباب معقوله؟
رغد... يجوز بس تحقيق
سالي كالت... خرب فاتني المشهد مال الاعتقال
رغد كلتلها... تعيشين وتشوفين غيره ماشاء الله احنا من سيء للاسوء
سالي كلتلها... اي والله
شويه وطبن للمطبخ يسون اكل اني باوعت للبيت كتلها... رتيل لعد وين امي
رتيل... راحت للزياره تبات هي وصديقاتها
حره... هزيت ايدي ومددت كالت... لتنامين اكلي يلا
شويه وجابن الاكل اكلت وياهن وطبيت سبحت باوعت لـ لبسي الاسود ادري حياة ليش متحبه
لانه يدل ع الحزن
مشطت شعري ولبست الطوك والحفايات كعدت شويه حسيت بخنكه لان ضليت افكر
لازم اشغل نفسي كمت كلبت ملابسي بالبوفيه ورتبتهن كلهن من جديد وخليت الدفتر وبداخله الصور
كمت مسحت الغرفه كلها ورحت للرف بيه كتب يقراهن مقدام طلعت كتاب فتحت الكتاب تذكرت ام حياة رادت مني الصور كلت اخابرها اكوللها تجي تذكرت موبايلي وين؟
رحت دورت بالهول وين كعدت ماكو
رتيل... ع شنو تدورين... سألتني وهي تباوعلي بقلق
حره...رتيل موبايلي عزا بس لا ضاع
رتيل... يا انت مجبتي وياج من المستشفى!
حره.. والله اصلا مو ببالي ناسيته
رتيل... خرب دوري زين بلكي هنا
حره... ماكو ماهو
رتيل... خو ما بيه شي؟
... بداخلي كلت اي عزا محادثاتي ويا السامر بيه.. كتلها... هو بيه رمز يعني شنو ينفتح؟
رغد كالت... اذا بيه رمز محد يفتحه الا اذا تفرمت
رتيل كالت... من يجي مقدام نشوفه يحرك الخط
حره... شلون يحرگه
رتيل... من الشركه حتى متصيرلنا مشكله
حره... تمام
حطيت الكتاب كعدت اقره وبالي يم الموبايل خاف احد يفتحه
وبعدين اكول لا هو بيه رمز
ضليت افكر بكلام مرتضى وبحلمي وبداخلي اكول
... الي يريد يعيش لازم يقاوم كلام مرتضى صحيح حتى اذا اموت
مراح انذكر بانجاز سويته الي دااعيشه متعتبر حياة لازم اشتغل على نفسي واصير مصدر فخر للي يحبوني
ضليت ساعه اقره ساعه افكر الى ان غفيت للعصر سمعت صوت مقدام فزيت هو طب للهول سالي اخذت العلاليك منه وتحجي وياه هو طب باوعلي اجه حضني كال
مقدام ... ها شلون صرتي
حره... بخير
مقدام... الحمد لله
اجت كعدت يمه رتيل كلتله... متغدي
مقدام... اي الحمد لله.. لعد امي وين
رتيل... نايمه بالغرفه
مقدام... صلوات اول مره اجي وهي بالبيت
ابتسمت رتيل باوعتله كلتله... مقدام موبايل حره ضاع
مقدام... وين ضاع؟
رتيل... مو ضاجت فطلعت ويا البنات ومادري يمكن واكع منها ومانتبهت
مقدام... لا ياالله انوب اذا وكع شي بهالمنطقه مينلكي
رتيل... طلعنا دورنا بس ملكينا
باوعلي كلي... خو ما بيه صور شي
حره... لا مبيه شي وهو بيه رمز
مقدام... الخط بيه؟
حره... اي بيه
رتيل كلتله... احركه
مقدام... ان شاء الله
حره... كمت رحت للحمام طلعت غسلت ورجعت داطب للهول سمعت مقدام يكول لرتيل
... هذا الكلب ورطني دانعل ابو لا بو الجابه
طبيت هو سكت جابت سالي الجاي كعدت اشرب جاي وياهم وكعدت سالي تعدد لـ مقدام اخبار المنطقه
مقدام... والله يوم عن يوم جاي اكره هالمنطقه افكر ابيع هالبيت
سالي... اتفق
رتيل... انجبي انتي
ورجعت باوعت لـ مقدام كلتله ... حتى لو بعته فلوسه قليله هو احنا ماالنا غير هالبيت ساتر علينا بلكي ويا الزمن الله يفرجها
مقدام... تدبر كلها بس كون اطلع من هالمنطقه يختي حتى المدارس مدري شلونها
سالي... بلا هي كل مدارس العراق نفس الشي
مقدام... لا والله اكو مدارس مرتبات بمناطق ثانيه ونظام اخخخ... وعض ايده كال... شمصخم اني ووكعت هنا
رتيل كلتله... الله كريم حبيب كلها تهون يلا الحمد لله غيرنا مالاكي بيت يحتمي بيه
مقدام... الله كريم.. باوع ع الكتاب مالته بصفي كال... هذا موحلو حسيت بيه عنصريه ضد مذهب
الكتاب بصفي باوعت اسمه
(انتيخريستوس) كتله... صدك؟
مقدام... والله هيج حسيت
حره... بعدني ببدايته
مقدام...يولي عوفيه و اقري العقل الباطن حلو ومعلوماته تنفعج
حره... اقراه ان شاء الله.. دنحجي واندكت الباب كامت سالي فتحت الباب اجت كالت
سالي... ام المرحومه هنا
كمت كلتلها... اي رادت صور بنتها رحت طلعت صورتين من الدفتر وطلعت شفتها سلمت عليه كالت
... اتصل عليج وماكو
حره... ضاع موبايلي
كالت... اها
انطيتها الصور كلتلها... ياريت تستنسخيهم وترجعيلي النسخه
كالت... ماشي
وراحت سديت الباب مقدام كال
:-ولو ماتستاهل
حره.. استعطفتها يمكن ندمت
مقدام... ميفيد الندم بعد
سكتت لليل كاعدين اجو مصطفى ومرتضى كعدوا بالاستقبال
اني وسالي كاعدات بالغرفه
گتلها... سالي احنا مكلنا لـ مقدام باللي صار اخاف مصطفى يكول كدامه
سالي... لا ميكول هو اصلا من خابر مقدام كال لتكولوله خطيه تشغلون باله
حره... تمام لعد
ضلو يمنا شويه وطلعو فرشت وحطيت الكتاب اقره بيه حتى انشغل وغفيت فزيت ع صوت مقدام ورتيل يحجون صوتهم بعيد بالهول اسمع مقدام يكوللها
... اني مااريد حره تبقى هيج برئيي اخذها للدكتور وبعدين عود ادبر الفلوس الله يحلها
رتيل كلتله... بس هواي ماكو دكتور ياخذ اقل
مقدام... لا هذا الدكتور سابقا معالج مرتضى
ومصطفى يعرفه يعني مضمون ويعرف بهالسوالف وحتى نصحني كلي اذا رحت لغير دكتور وانطاها مهدئات اتركه لان المهدئات اخر مرحله بالعلاج وهي من الصدمه داتفقد
كلتله رتيل... اي والله ذاك اليوم حيل خفت حسيتها تخبلت
مقدام... مصطفى كلي انطيك ٦٠٠
رتيل... ليش دينطيك؟
مقدام... جان المفروض يسوي عمليه لاخوه فجمع مبلغ مادي بس تاجلت دايقيمون وضع ظهره فكلي اخذهن لان ممحتاجهن حاليا
رتيل... وانت قبلت
مقدام... لا كتله ممحتاج من احتاج اكولك انت اخوي
رتيل... الله يفرح گلبه هواي ديساعدنا
مقدام... امين
حره... رجعت لفراشي ضليت قلقه وافكر اخوتي خطيه حايرين بيا واني شلعت كلبهم صارلي احساس بتأنيب الضمير بقيت افكر اني اريد اتعالج بس خطيه اخوي
اخر فتره كمت مااميز الحلم والواقع ومرات احس كاني مااتذكر اي شي صار وياي
ودااشوف كوابيس اتمنى اخلص من كل هذول
لان متاذيه منهم
ضليت افكر الى ان صار الفجر كعدت صليت وقريت قران وضليت ادعي لسمرا وحياة بالرحمه
واني داادعي وابجي غمضت عيوني اجه ببالي مرتضى
ابتسمت ودعيت الله يشفيه ويبعد عنه كل مرض ويحققله امانيه
كملت كفيت السجاده وطلعت شفت مقدام كاعد كتله... صباح الخير
مقدام... صباح النور توته كاعده من وكت
حره... اي نمت البارحه من وكت رحت اسوي ريوك اجه كلي
... عوفيه ام التوت خلص هي بيضه اني اطكها سهله
حره... لا اني ضايجه حابه اشتغل
ابتسم كال... تمام... وراح يشسور شعره
لان شعره كيرلي
حطيت الصينيه كعدت رتيل شافتني كالت... لزمت كلبي من ماشفتج
ابتسمت... لاا داسوي ريوك
كعدنا تريكنا تلاثتنا كمل مقدام طلع للشغل رتيل كعدت تخيط مشطت لبست نعالي داطلع كالت
... ها وين
حره.. هنا بالباب
رتيل... على دكت البارحه المفروض متطلعين
حره... لا ضوجه هنا بالباب
رتيل... ماشي
حره... رحت كعدت بالباب بداخلي حابه يطلع مرتضى اشوفه او نحجي من احجي وياه احس الدنيا بعدها بخير
احسه يحفزني ع كلشي انتظرته شويه مطلع تمشيت وين جنا نكعد اني وحياة ملكيته
ضليت انتظره شويه مااجه والعالم بدت تكعد رجعت للبيت وصلت قريب بيتنا شافتني جيرانه جنا نخبزلها اني والمرحومه
اول مشافتني حضنتني كالت... يمه مشتاقيلج سوده عليه ليش هيج ضعفانه شلونج شخبارج
حره... بخير اذا انتي بخير
ضلت تسولف وياي وتحاجيني وتصبرني اني من واحد يكولي البقيه بحياتج تجيني البجيه مااحب هالكلمه ومااتمنى اسمعها بعد ابدا
باثناء الحديث كالت... انتي والمرحومه خبزجن ماكو منه اهلكد الخبزه... وتاشر بايدها كالت... الله يرحمج يايمه
حره... خبز المصلاووين بعد
گالت... والله صفيت ع المخابز محد بحالي جنايني عزلن والولد الله يسلمهم الا تنطي اذن مرته يلا يجي يسلم
حره... سوده عليه اني ادزلج خبز بعيوني
كالت... لا يمه اذا تردين تخبزيلي بفلوس مثل قبل بعد الاحسن بس تدزيلي هيج لا يمه حبيبه
ناقصج انتي
حره... لا خاله هو من خبزنا اطلعلج شسالفه
كالت... لا حبيبه ماترهم اذا تردين تخبزين بكيفج حتى اشوف خواتي هم تخبزيلهن وتستفادين
حره... الله كريم اشوف واردلج خبر
كالت... هاهيه منتظره خبر منج
هزيت راسي و طبيت للبيت اشتغلت وغسلته كملت طلعت ع اساس اشتري كلت بلكي اشوف مرتضى
طلعت واشو هم مموجود رجعت طبيت للبيت وكعدت اقرا كتب لو اكتب بالدفتر الي جابه الي
صفنت كلت اسوي ثواب لحياة وسمرا كمت دورت بالبوفيه جنت حاطه دخل فتحته لكيت بيه ٣٥ الف
طلعت مروه كالت
... الله فلوس
حره... راح ادزج ع غراض اذا جبتيهم نفسهم مو على مزاجج انطيج الف
مروه... ماشي
... دزيتها على مكونات البرياني جابتهم وبديت اطبخ
رتيل كملت واجت ساعدتني مسويت هوايه كلش لان الفلوس مو هوايه بس اهم شي هو ثواب
صار المغرب تقريبا يلا كملت طب مقدام باوعلي كال
... ها ام التوت ارتاحي ليش تشتغلين
حره... لا دااسوي ثواب للبنات
مرتضى... لعد لتوزعن خلي اجيب روبه تخليها وياه
حره... اوك
طلعت گدريه حطيت بيها برياني وخليتها ع جهه
هايه لمرتضى و مصطفى وصبيت بمواعين لباقي جيرانه اخذتهن ماما راحت توزع
مقدام كال... هاي الكدريه المن؟
حره... لـ مصطفى ومرتضى
مقدام... تمام خلي اوديها
اخذها وطلع اجت سالي كالت... امداني عود ردت اني اوديها
حره... سالي مرتضى اليوم هم شفتيه؟
سالي... لا والله ليش
حره... شو مشفته اليوم
سالي... عادي هو نادرا ميتواجد
حره... ليش اشوفه دائما
سالي... هو انت وين تطلعين غير وقت الفجر واصلا من زمان هو ايام مااشوفه ومرات يفرفر بالمنطقه
حره... اهاا
سالي... والله
... صبينا عشا تعشينا وشربنا جاي ونمنا لثاني يوم نفس الحاله طلعت ملكيته مر لليوم الثالث هم ملكيته حسيتني ضايجه ردت اشوفه رجعت للبيت
اجت كعدت يمي رتيل حجت وياي كالت ... نريد ناخذج دكتور نفسي ولا عبالج هالشي عيب لا ترا كلنا نحتاج دكاتره نفسيين لان احنا عراقيين وعايشين بوسط قلق وعذاب نفسي وكل انسان يمر بمرحله صعبه وهذا الشي لمصلحتج
حره... ماشي
رتيل... باجر اول جلسه مااريدج تتقيدين ابدا
ابتسمت كتلها... ماشي
لثاني يوم رحت للدكتور شفته وجهه بشوش ويضحك ويسولف حسيت ارتاحيت اول شي سواه خلاني احجيله كل الامور الي ماذيتني حجيت كلشي اله
احجي واني مختنگه بس دست على نفسي وكملت وطلعت المأذيني وخانكني
بعدين بدا ينصحني باني اسوي اشياء احبها وامارس هواياتي واسوي رياضه ويحجيلي عن امور نفسيه من رجعت نوعا ما ارتاحيت
و لل الجلسه الثانيه هم خلاني احجيله عن الي ماذيني واكثر شي الدم الي جان ع وجهه حياة ثالث جلسه مرحت
سالتني رتيل ... ليش مترحين
حره... مااريد احسني كلش بخير ميحتاج... وبداخلي اكول اني رفضت اروح لان شفت مقدام دايصرف فوق طاقته وكوا مدبرين الامور حسيت ان خلص ارجع اوكف ع رجليه بعد حسيت صار اكو تحسن من ناحية تفكيري وحمدت الله
غيرت كل روتيني صرت اكعد الصبح اصلي واقرا قران واشتغل بالبيت واغسله واطبخ لان هوايتي الطبخ ومن افرغ اقره كتاب او اكتب الاشياء الي تاذيني هالشي جان يهون عليه وينسيني كل المآسي العشتها
هالفتره كلها مشفت مرتضى وهالشي سببلي وخلاني احس اكو فراغ بداخلي بس كلت تهون
حبيت اساعد اخواني تذكرت جيرانا
گمت العصر دزيتلها خبر ويه مروه ان عادي اخبزلها
لثاني يوم مثل العاده طلعت الفجر رحت لمكانا اني وحياة وهناك شفت مرتضى كاعد
شفته وحسيت بشي غريب داخلي وبنفس الوقت فرحت بشوفته
هو باوعلي كال... ها ام التوت
كعدت كتله... شعندك هنا
مرتضى... انتِ شعندج هنا
حره... هذا مكاني اني وحياة
مرتضى... خلي يصيرلي مكان هنا لعد
حره... صار
ضحك كال... شلونج
حره... بخير وينك طول هالمده
ضحك... ليش
حره... افتقدت وجودك...
تلاشت ضحكته كال... صدك؟
حره...هزيت راسي بأي
مرتضى... دكتوري بالحله ورحتله
حره.. بعيد
مرتضى... اي لهالسبب اتاخر
حره... الله يشفيك دعيتلك بصلاتي
مرتضى... بشنو دعيتيلي
حره... بالشفاء والموفقيه وتحقيق الاماني
مرتضى... وانتي بالف خير ينعاد عليج بالصحه والعافيه
حره... يا ااا مرتضى شبيك قابل هو عيد
ضحك... يكول داتعايديني
حره... مو صوجك صوج اليدعيلك
ضحك كال... دعيتي تتحقق امنيتي؟
اشرتله براسي... اي
مرتضى... تحققت
حره... شنو هي
سكت وباوع ع السياج رجع باوع بعيوني كال... اي شسويتي بهالفتره
حره... رحت دكتور نفسي
مرتضى... عفيه وحسيتي بتحسن؟
حره... اي بديت املي يومي بالشغل بحيث لما يجي الليل اتعب وانام بسرعه
مرتضى... سباعيه
حره... ادري
ضحك وباع بعيوني اني درت وجهي كتله... شبيك؟
مرتضى... عيونج
حره... شبيهن؟
مرتضى... مثل التوباز
حره... شنو التوباز؟
مرتضى... هيج
حره... لا احجي
مرتضى... تذكرت شغله ردت اسالج
حره... اي اسأل
مرتضى...وتجاوبين بصراحه
حره... ماشي اسأل
مرتضى... ليش طردتي الي سكنو ببيت حياة وتعاركتي وياهم
حره... تذكرت الي صار كتله... لانهم مو خوش ناس
مرتضى... ليش مو خوش؟
شفتي شي سيئ منهم !
اشرتله براسي... اي
مرتضى... شنو؟
حره... درت وجهي عليه كتله... اكولك سر!
مرتضى... كولي
حره... اني غبيه
مرتضى... حشاج
حره... لا يعني جد مرات اتصرف بغباء مو معقول
باوعلي بتركيز كال... ليش هيج تحجين
جريت نفس كتله... ولاشي
مرتضى... حره احجيلي رجل انوار سمعج حجايه..؟
دمعت عيني كال... باوعيلي واحجي..
اني هنا متحملت بجيت كلي... اش اسكتي بس فهميني شسوالج؟
حره... تحرش بيه
اباوع ل عيونه صارت حمر كتله... اني رحت لبيت حياة الفجر مجنت ادري بيه هناك لان اصلا بيبي بعدها مبايعته الهم بالمحكمه مجرد حجي
اني غلطت بس هو تحرش بيا... وبجيت
مرتضى... اش لتبجين انطاني منديل كال... لتكولين اني غلطت وتلومين نفسج اذا اكو احد غلط فهو حتى لو عبرتي للبيت لو هو محترم جان طلع هو وتركلج البيت لان يعرف حالتج
حره... اي هو حقير... وبجيت
مرتضى... خلص لتبجين
حره... ومرته الحقيره اتهمتني وهي اكثر وحده تعرفني
مرتضى... معليج بيها
مسحت دموعي... يلا اروح اخبز
مرتضى... ماشي
كمت كال... شلون دبرتيها بربج تلث ارباع ردن وشال
ضحكت جنت لابسه تراك وشال هيج
حط ع الراس
رحت خبزت ووديت الخبز لجيرانه وهم اليوم كله هو مموجود لثاني يوم هم مشى وهو ماكو ومشى اليوم نفس الروتين
ثالث يوم عجنت وطلعت بدون شال علما تختمر رحت لكيته بنفس المكان
كعدنا نحجي واسأله عن سبب غيابه ويكولي..
مرتضى... ممتواجد بسبب علاجي والدكتور
حره... ماشي
باوع بعيوني كلي... "محد ملاحظ غيابي بس انتي "
ابتسمت باوع لرجليه لابسه حفايات كال... بربج بهالحر حفايات
ضحكت... متعوده البسهن حتى بتموز
مرتضى... حاره ولج
باوعتله كتله... عادي هسه انت مو كله تلبس تيشيرت ردن كامل والجو حار
ضحك كال... مو اني استحرم اطلع ايدي
ابتسمتله كتله... بيش الساعه
مرتضى... ب ٧
حره...لعد خلي اروح اخبز... كمت كلي
مرتضى... لا ابقي وياي حيل ضايج ورجع باوع لموبايله
حره... ليش؟
مرتضى... هيج ضوجه من الله
حره... تمام اكعد احجيلي
مرتضى... خشمج شو حيل صغير
حره... لا حجمه عادي
مرتضى... احنا العراقيين نعاني من الخشم
ضحكت كتله... كل واحد شكل خشمه يتناسب ويا وجهه
مرتضى... ابد لتحاولين تلزكيها
ضحكت... ع فكره خشمك هم صغير
مرتضى... لا مو كلش
حره... بس حلو متناسب ويا وجهك... اتصل موبايله رفضه گال
مرتضى... گعد
ثواني كال... يلا تروحين للبيت
حره... اي والله دااخبز
مرتضى... تمام اني هم صديقي راح يجي
مشينا شويه لبدايه الفرع فارغ مبيه ناس احنا منطقتنه
الناس ويا العصر يلا تبدي تطلع الصبح الفرع فارغ بس الجهال والنسوان الكبار مرات يطلعن
وصلت لبداية الفرع شخطت شويه بعيد عنا كدامنا سياره تاهو مظلله ووكفت
انفتحت الباب انشمر رجال ومشت السياره
شهكت حطيت ايدي ع كلبي كلت... عزا مرتضى
مرتضى... اي والله عزاا
حره... مرتضى هذا واحد مشمور بالشارع
مرتضى... الله عليج تصدكين عبالي كونيه
باوعت الرجال الي انشمر يتحرك يحاول يكوم كتله ... اكولك شلون هسه نروحله نشرد خاف نبتلي
مرتضى... لا نشرد شنو مو من شيم الرجال هاي... وياشر بايده
حره... اي انت رجال قابل اني
مرتى... واو معلوماتج رهيبه اليوم
حره... دروح شوفه منو يلا
مرتضى... رجلي على رجلج تجين وياي اتحرك متجين نبقى نتفرج لبين متجي العالم
حره... اي وتجي الشرطه وتلكاه ميت وتاخذنا للحبس
هو ركز كال... امشي ياالله
تقربنا من الولدوشفته و من شفته شهكت مصدومه كلت... سلام قولا من رب رحيم
هو باوعلي مضروب ووجهه مزورك وكوا يحاول يوكف...
انصدمت هذا العار رجل انوار…؟ ...يتبع ...
________________
قراءه ممتعه فراشاتي
لتنسون التصويت والمتابعه
دمتم بخير احبتي