الحلــــــــقه الرابـــــــــــــــعه
رواية... هل كانَ حُلماً...؟
{ العِراق-المُصغَر...ارواح-مهشمه }
بقلمي ... لؤلؤة_البِحار ...
___________________•
اتمنى لو كانت هنالك بوابةٌ تُريُنا المستقبل وبوابةٌ اخرى تعيدنا الى الماضي
كنت قد نضرتُ الى المستقبل واوجاعه
فاحمل نفسي واعود الى الماضي احضن كل شي فيه
حتى اوجاعه
احضنها برفق وابتسم
سوف اتمنى ان نبقى
نبقى فـ الماضي لبقية عمرنا
بقلمي✍🏻
_______________________
حره :- اني ادفع بيه بس مااكدر الكلب ضل يتلمس جسمي وركبتي اني اصرخ بس مينسمعلي صوت ضربته برجلي بس ماكو فائده
كمت ابجي شرمخته وعضيت ايده داطلع لزم ايدي لواها ورا ظهري ولزمني من شعري وحط ايده على وجهي ورجعني عليه
عض اذاني
تقززت كمت ارافس كال
:- شوفي راح اخليج تطلعين بس والله اذا حجيتي لاحد ماتسلمين من شري خوش
.. هزيت راسي باي دفعني ركضت فتحت الباب وعبرت من سياجنا اباوع دنيا الصبح باوعت بالمرايه وجهي احمر
ركضت باوعت للساعه بـ 6 الا ربع وجسمي يرجف
وگفت اغسل بوجهي وبالگوه اجر النفس
حمدت ربي النقذني منه
هو مخلاني اروح الى لمن ضربته وضليت ادفع بيه وهمين سمع صوت برا فمثل الخاف وتركني اروح
لو لا ستر ربي جان رحت بيها رجعت بسرعه ضليت اغسل بوجهي واديه ورگبتي وابجي تقززت حيل وجسمي كله يرجف حسيت بالقرف
واليقهر انو هالكلب مسوي نفسه شيخ كدام الكل
وع اساس يخاف الله
كعدت بالهول ضليت ابجي وماادري شاسوي منتظره رتيل تجي واكوللها شفتها تاخرت
كمت وطلعت بسرعه دا اشوفها وين اول ماطلعت الفرع صار مرتضى كدامي
فك عينه بصدمه من شافني واجه بسرعه كلي ... بيج شي؟
حره... لااا كلتها واني ارجف
مرتضى... لعد ليش هيج عيونج وشعرج
حره... بسرعه حطيت ايدي ع شعري كتله.. شبيه
سكت يباوعلي رجع كال... ليش ايدج ترجف؟
هزيت راسي وبجيت كتله... كلشي مبيا
مرتضى... ليش تبجين شبيج؟
محجيت كال... وين رايحه
كتله... داشوف رتيل
مرتضى... وينها هي؟
كتله... ماادري ماادري
مرتضى... هسه دنيا الفجر ؟
كتله... ادري
مرتضى...حره احس بيج شي احجيلي اني مو صديقج
سكتت كتله... اروح لبيتنا انتظرها
هو سكت ضل يباوع بعيوني نزلت عيوني ومشيت رجعت للبيت انتظرها حسيت نفسي متقززه
طبيت سبحت
صفنت
اخاف احجي ويصير شي مو زين
اخاف ميصدكوني
اخاف مقدام يكتله ونبتلي
اخاف هم ارجع لنقطه الصفر
اخاف واخاف سيطرت عليه مخاوفي من كل الجهات
ماعرفت شاسوي وشاتصرف بس قررت اني اسكت حتى ميصيرلنا شي مو زين
رغم هذا القرار غبي بس ماجنت بحاله طبيعيه واكدر افكر مثل اي بنت جنت خايفه ومرعوبه من كل الاحداث الاخيره
طلعت من الحمام مشطت شعري ولبست الطوك الاسود وكعدت بالهول شويه وسمعت انفتح الباب احس الرجفه بعدها بجسمي
طبت رتيل للهول شافتني تفاجئت گالت
... ها شوكت گعدتي؟
مجاوبتها ضليت افكر احجي لو لا اجت رتيل كعدت يمي حطت ايدها ع كتفي نزيت وبجيت بنفس الوقت حضنتني كالت
... يا شبيج حره
حره... وين جنتي
رتيل... رحت وديت الخياط
حره... بهالوقت تودين الخياط
رتيل... اي البنيه اليوم حنتها ومستعجله تريدهن
ضليت ابجي وارجف كالت... شبيج بس فهميني ليش ترجفين
حره... مابيا شي بس مخنوكه
رتيل... كومي اطلعج؟
حره... لا اريد انام
باوعت بوجهي وسكتت ثواني وكالت :-حره وضعج دايخوفني
حره... واني هم خايفه حجيتها بخنگه
جرت نفس وحضنتني كالت... لا لتخافين احنا كلنا يمج
حره... واني ابجي عطشت باوعت يمي دولكه بيها شويه مي دااخذها
رتيل كالتلي... عوفيها هسه اجيبلج
گامت دتجيب اني غصيت اسمع رتيل تكولي... اسم الله
انوب لزمتني الكحه ركضت رتيل تجيب مي اريد اجر نفس مااكدر حسيت راح اموت
اجت رتيل حاولت تنطيني المي بس مااكدر الكحه لازمتني اسمع سالي كالت بصوت عالي
سالي... اسم الله شكووو
ضليت مختنكه ومااگدر اتنفس الى ان رتيل شربتني مي غصبا عليه
يلا خفت وكدرت اجر نفس بصعوبه باوعت ع الجهه الثانيه سالي يمي تدك على ظهري من كدرت اجر نفس حسيت تعبت وصار عندي خمول رتيل غسلتلي
كالت... اسم الله
سالي جابتلي مخده حطتها يمي رتيل كالت... مددي شويه علما
اسوي ريوك... وطبت للمطبخ
سالي طبت وراها
بقيت اباوع ع السكف كعدت يمي سالي تمشط كالت :- لعد مصطفى مااجه ماسأل
رتيل بالمطبخ كالتلها... شيجي يمعوده بعدها ب ٦ الفجر
سالي... ها عبالي
رتيل... بعدين تعاي شعنده يجي؟
سالي... شلون شعنده يجي غير اخوي وصاه علينا ومثل ماتعرفين امانة الصاحب امانه
جابت الصينيه رتيل وضحكت كالتلها :- ماشاء الله معلوماتج ثمينه ياسالي
سالي كعدت يم الصينيه تصب جاي جاوبتها... ما اغشج اني
رتيل... اموت واعرف شلون هيج كلبتي جنتي ماتحبيه شغيرج..حجتها وباوعتلي وكالت... يلا حره تعاي اكلي
داكوللها مااريد جرتني كالت... ع الواهس شبيج
سالي كالت لرتيل... باعي اني مو مااحبه اني جنت شاكه بيه واحد من الطبو لبيتنا ذاك اليوم وناوي ياذينا
رتيل... وهسه شنو تغير؟
سالي... من فكرت كلت مستحيل هالشي وواضح ان هو ماجاي يضرنا وكف ويانه هوايه
خصوصا باخر فتره يعني لو واحد من الداهموا بيتنا مراح يسوي
هيج اكيد
رتيل... ذولاك يمكن جهه حكوميه شعدهم يجون لهنا
سالي... الله اعلم منو ذولاك عموما الله يبعد شرهم عنا
رتيل... امين
حره... ساكته آكل وهنه يسولفن
اكلنا وكمت اغسل وطبيت للغرفه فرشت وفتحت الشبابيك
وقفلت الباب
اخذت موبايلي طلعت اغنية حياة ونمت واني اسمعها
رغم كلماتها بالتركماني بس من كثر مااسمعها حفظتها هي والترجمه
واكثر شي يقهرني من يگول
"فأين الأصحاب وايام السعد القديمه"
"وَ لِما انقلَبت لأحزان اعراسنا "
كلما اسمعها ابجي وانقهر على حالي وين وصل بيا الحال
الي يقهر ان الي گعد بالمكان الجانت گاعده بيه حياة
واحد قذر ورخيص
باوعت لصورة حياة واكول
:- يربي شوكت يخلص هالامتحان تعبت تعبت حيل اني مااكدر ابقى هيج من يوم الي راحت حياة واحسني خايفه وما الي سند بعد
رغم الكل وياي بس احسني وحدي احس كلشي بعد ميفرق وياي
مرات اتمنى افقد عقلي بس حتى انسى الي صار
ومرات اكعد من النوم واتمنى يارب كل الي صار حلم
حتى كعدتنا واحنا جوعانات صرت اتمناها من يوم الي ماتت حياة وهالغصه بداخلي
ما فد يوم نسيت تفصيل صغير عنها ومن كثر مااباوع بالصور انطبعت صورتها هي وسمرا بعيوني
حضنت الصور وبجيت
سمعت رتيل دكت الباب كتلها :-اريد ابقى وحدي
ضلت تحجي وياي وتحاول تواسيني مثل عادتها
بس مكدرت اسمع اي شي تكوله
مددت حاولت انام
بس مااكدر كل شوي انام وافز
مره ينعاد عليه الشريط من انطتني العلاج وكلتلي ضلي يم بيبي وركضت
تروح لـ سمرا
من هاليوم بدت النهايه
من هاليوم حسيت بهالغصه
ومن افز اضل افكر وارجع احاول انام واتذكر شي ثاني واكثر شي من كلتلي
"علما تضمين الدفتر اني ارجع"
صرت لما افز افز واني كلشي ممتذكره اخذ وقت يلا اتذكر شصار ويايه هالفتره؟
شصار بعد هالحجايه
رجعت نمت وشفت لما هالكلب حاول يتحارش بيه
فزيت واني ابجي وبداخلي بودي اگطعه باسناني
هاليوم مجنت واعيه بيه ابدا جنت بين النايمه والكاعده
اخر شي كعدت بالزاويه
صرت اخاف انام
اسمع اصوات سالي ورتيل كل شوي وحده تدك الباب
بس مابيا احجي او اجاوب او حتى اشوف احد
مااريد احد يشوفني بهالحاله
واني كاعده غفيت شفتنا واحنا صغار نلعب ونضحك فزيت صوت الضحك والكلام ببالي
ضليت ادور الغرفه ضلمه من وين هالصوت
دورت الغرفه مبيها احد رجعت كعدت بمكاني
اكو مرايه كدامي مال البوفيه باوعت لنفسي ضوا ماكو خفيف كلش بس من الشباك يادوب اشوف ملامحي مبين بس شعري مكفش
حسيت نفسي بديت اختنك حضنت نفسي وضليت اغني
في حال مامشي الحال..
ضليت اغنيها واعيدها وابجي الى ان كلت
في حال اذا مافي مجال
شي مره كون ع البال
متقلي انك ناسي.. كذباتك شوي تقال
سمعت الباب اندكت وصوت مصطفى اسمعه يگول... حره انتي بخير؟
مددت مجاوبت احس مااريد اشوف احد رجع دك الباب كال... حره اذا داتسمعيني جاوبي
... مجاوبت كال ... راح اكسر الباب حره
اسمع صوت سالي تكول... مقدام دايتصل شاكوله
كللها... لتجاوبيه هسه... ورجع دك الباب
رتيل كلتله... خاف اغمى عليها اكسر الباب مصطفى
حره... كمت وكفت ورا الباب كتلهم... مبيا شي عوفوني وحدي
كال مصطفى... افتحي الباب حره
كتله... مااريد عفيه عوفوني
مصطفى... حره الله بعز جلاله گال (كل نفس ذائقة الموت) وكل انسان يعرف راح يجي يوم يموت هو او احبابه اعرف الي صار وياج صعب
بس حرام عليج هيج تسوين
داتدمرين بنفسج وتدمرين عائلتج
كتله... مابيا شي والله بس اريد اضل وحدي عوفوني
رتيل كالت... زين بس افتحي الباب خليني اشوفج
حره... مااريد
رتيل... من الصبح لسه مااكلتي شي حره
مقدام كل شوي يتصل يريد يحاجيج
سالي كالت... خطيه بالشغل ليش تشغلين باله افتحي عفيه
حره... هسه احاجيه من موبايلي عوفوني
رتيل كالت... ع الاقل اكلي
حره... اريد بس انام عفيه عوفوني
رتيل... اي طلعي هنا نامي
حره... مااريد بداعت مقدام عوفوني
رتيل... زين افتحي الضوه
حره... اريد انام
ورحت كعدت ع جهه شفت جهازي بيه ومضات فتحته لكيت مقدام يتصل جاوبته كال
:-صار ساعه اتصل وينج
حره... جنت نايمه
كال... حره باجيه؟
حره... لاتوني كعدت من النوم
كال... ليش قافله الغرفه؟
حره... ردت انام
مقدام... اكلتي
حره... اي اكلت
مقدام... اي عفيه اكلي زين رتيل سالي وين ليش اتصل وميجاوبن؟
حره... ديشتغلن بالبيت
مقدام... امي وين.؟
حره... مادري
جر نفس... هم طالعه
سكتت كتله... اريد انام تعبانه
مقدام... حره انتبهي لنفسج وافتحي الباب لتضلين قافله على روحج خوش
حره... اي
مقدام... يلا باي
حره... كتله هلو
وسديته لكيت هوايه متصلين عليه السامر ورشم ورقم غريب
وام حياة تذكرت
رادت صور حياة
خليته ع جهه ورجعت كعدت بمكاني شفت نفسي لا داكدر انام ولا اكعد
رحت فتحت الضوه و طلعت الدفتر الي جابه مرتضى
وكعدت اكتب بيه اشعار واقتباسات احبها
و وصفت بيه يومي وكتبت واني ابجي
"يوم كـ جمره من النار .. كلما زادت رياح الحنين زاد احتراقي .. لله در قلبي"
سديته وضليت افتر بالغرفه اباوع من الشباك دنيا ليل سديت الشباك و رجعت كعدت
لكيت جايتني رساله من رقم غريب ثاني مكتوبلي
:- "مجنت متوقعج ناكره للجميل ساعدتج ودزيت ادله كافيه وتدين مشعل
حاولت بكل الطرق ارضيج واكفر عن ذنبي
وتاليتها تبلغين عني !!
خلي ببالج مو اني الي انلزم لتلعبين بالنار لا تحترگين هذا اول واخر تنبيه الج"
تفاجئت جاوبت برساله.. شنو مفهمت؟
رجعت اتصلت الجهاز مغلق
تفاجئت هذا منو
واني بلغت عن منو؟
مدافهم لزمت راسي وحاولت اتذكر اني بلغت؟
حاولت اتذكر اخاف ناسيه شي للحظات حسيت نفسي نسيت كلشي وبعدها استوعبت
اني لا مبلغه ولا شي رجعت اتصلت الخط خارج نطاق التغطيه حطيت راسي ع الحايط وكلت... يارب رحمتك تعبت مابيا افكر شصار وياي او شديصير
رجعت اكلب بالاتصالات شفت رقمين غريبات
واحد الي جايتني منه الرساله وواحد متصل ٧ مرات كلت يمكن هذا الثاني لنفس الشخص
هو اكيد نفسه السامر بس اني لا مبلغه ولا شي
اصلا حتى خواتي محاجيتلهم
اتصلت ع الرقم الثاني جاوب كتله ... انت منو؟
كال... مرتضى
حره... منيلك رقمي
مرتضى... شلونج
حره... عايشه
مرتضى... ليش قافله على روحج
حره... تعبانه
مرتضى... التعبان يخفف عن نفسه مو يزيدها
حره... هيج احسنلي
مرتضى... غلطانه اــ...
حره... دايحجي وخلص رصيد موبايلي رجع اتصل
مجاوبت ماعندي قدره ع الكلام
لليل اجت رتيل دكت الباب كتلها ... مابيا شي والله بس اريد انام
رتيل... زين بس افتحيلي الباب
مقبلت تالي ايست وراحت
صار هدوء بالبيت فتحت الباب على كيفي
باوعت الساعه ب ٢ رحت للحمامات غسلت باوعت لوجهي بالمرايه
يخرع
هالاتي السود كلش بارزات ووجهي اصفر
غسلت ودااطب للغرفه باوعت لخواتي نايمات بالهول و ماما مموجوده خفت كلت اخاف وحده منهن ماتت
تقربت منهن على كيفي وگعدت يم رتيل
باوعت لبطنها تتحرك تنهدت اي يعني عايشه وسالي هم وصلت يم مروه نايمه ع بطنها
خفت اخاف متتنفس وخرت شعرها من على وجهها على كيفي وحطيت ايدي ع خشمها شفتها عايشه حطيت ايدي ع كلبي وكمت
رحت صعدت على كيفي للسطح البيت ظلمه
ضليت فوك كعدت وين ما جنا نگعد اني وحياة
باوعت الدنيا مغيمه ساعه الغيوم تحجب ضوه القمر ساعه اشوفه شكله حلو ومريح
ضليت اباوعله حسيت نوعا ما بالامان بقيت ساعه ابجي ساعه اسولف وحدي ساعه ارجع اصفن ع القمر
التفتت على جهة بيت مصطفى ومرتضى
شفت كاننا اني وحياة واگفات دانباوع ع البيوت
گمت اتقربت واني اشوف اني وحياة دانضحك ونباوع من السگف وگفت قريب وغمضت عيني بقوه ورجعت فتحتها
مااكو احد حياة ماهي وبس اني الواكفه
بجيت ودرت وجهي ونزلت من السطح طبيت على كيفي للمطبخ شربت مي واخذت ويايه دولكه وطبيت للغرفه وقفلتها عليه
ضليت هاليوم كله كاعده مكدرت انام ابد
كلما انام تنعاد عليه الاحداث الي
صارت
وافز واني ابجي والخنكه بحنجرتي صارت عندي هلوسه
طلع الضوا كمت فتحت الشباك وحطيت راسي عليه كمت اتنفس سمعت صوت حركه يعني كعدت رتيل دكت الباب مجاوبتها دكتها مره ثانيه مجاوبت
راحت يمكن عبالها نايمه
شربت مي ورجعت مددت
جريت موبايلي باوعت مرتضى متصل هواي وام حياة هم
سويته عام وخليته يم راسي وركزت بالسكف شويه واجاني اتصال باوعت ام حياة فتحت خط كالت
:- ردت اجي اخذ الصور من البارحه لليوم اتصل ماكو
حره...خليها مو اليوم
ام حياة... ليش
حره... ع غير يوم
ام حياة... ماشي
سديت الخط شويه وصفنت ببيبي بهيه!
اخذت موبايلي رمشتلها ماتصلت ضليت ارمشلها ماكو
اخذت دفتر مرتضى وكعدت اشخبط وارسم
ورا شويه اتصلت بيبي رديت عليها
كلتلي... ها بيبي شلونج
حره... بخير
ضلت تسألني عن حالي گتلها... تمام گتلها... بيبي اريد اطلب منج طلب
كالت... اي بنيتي اطلبي
حره... لتبيعين لبيت لانوار ورجلها
بهيه... ليش؟
حره... لتبيعيه الهم لخاطري
بهيه... اي يمه ماابيعه الهم بس ليش
حره... مارتاحيت لزوجها حسيت عينه زايغه
بهيه... حجه حجايه موحلو وياج؟ سكتت كالت... احجي يمه
حره... لا بس ماارتاحيتله نظراته موحلوه عفيه بيبي لتبيعيه الهم
سكتت كالت... هاهيه لعد راح اخابرها اكللها بطلت ماابيعه
حره... اي الحمد لله
ضلينا نحجي وضلت تسالني عن وضعي وحجتلي عن اخر اخبار التحقيقات والطب العدلي
كالت... اني هاليومين اجي ازور حياة بالنجف
حره... كوليلي عود
بهيه... ماشي
شويه وغلقت الخط كلبت بالاتصالات سامر مادزلي مسج من الرقمين ولا اتصل
ضل بالي شديصير
اجت رتيل دكت الباب ضلت تحجي وتحاول تقنعني افتحها كمت فتحتها وشلت المفتاح حطيته بالحمالات حتى متاخذه هي حضنتني
كالت... ليش هيج تسوين بينا
حره... تعبانه اريد ابقى وحدي
سكتت رجعت كالت... شوفي شصاير بحالج حره
سكتت كعدت بالهول كتلها... مقدام شوكت يجي
رتيل... احتمال باجر
سوت ريوك وتريكنا اخذت ملابسي وطبيت سبحت كملت لبست تراك وحفايات دامشط شعري رتيل كالت :-اني اسويلجياه تسريحه
شسورته وسوته ضفاير صغار وثبتتهن بماشات سود
سمعت الباب ندكت طلعت سالي اسمع صوت مصطفى كاللها ...
مصطفى... حره شلون صارت
سالي... بخير اليوم طلعت
مصطفى... خوش لعد اي شي يصير اتصلو عليه
سالي... تمام
اجت يمنا كالت لرتيل... هذا مصطفى جان هنا
رتيل كلتلها... اي سمعت صوته شعلوه
ضحكت سالي كعدت بالهول شويه ردت الهي نفسي رحت جبت كتاب وضليت اكلب بصفحاته بس بالي مو يمه
فزيت ع صوت انوار جان صوتها عالي اسمعها تكول
... طلعتن من جوا لجوه ومتحبن الخير لغيرجن
ررتيل كلتلها... شكو شبيج انوار
حره... طلعت وكفت بباب الهول انوار اشرت عليه وكالت
انوار... اسألي اختج واني جنت زعلانه عليها واكول خطيه بس طلعت مصلحجيه بلا المرحومه حياة تقبل بالي داتسوي
سالي كلتلها ... عزيزتي نصي صوتج ترا مكاعدين بالشارع
رتيل باوعتلي كالت... شكو حره؟
اني سكتت انوار كالت ... بيبي بهيه بعد متبيعني البيت
رتيل... ليش؟
انوار...و ليش يعني لان اختج كايلتلها
... اني جريت نفس اجت يمي انوار كالت ... ليش هيج تسوين فهميني شمسويلج قابل
حره... ماحبيت واحد مثل رجلج يكعد بمكان جانت تتنفس بيه حياة
انوار... وشبيه رجلي عيني يشرفج ويشرف عشيرتج
يالماتعرفين الاصول
دفعتها سالي كلتلها... احترمي نفسج ترا اتحملناج بما فيه الكفايه
رتيل لزمت سالي كلتلها... اهدي خنفتهم
باوعت لرتيل كتلها... اني خابرت بيبي وكلتلها متنطيهم البيت
لان ميستاهلوه
انوار كالت... ما اكول غير حسبي الله عليج شفتيني محتاجه البيت وعيالي مبهذليني ورغم هذا وكفتي بطريقي حسبي الله وجرت عباتها وطلعت
اني رجعت للغرفه دا اقفلها طبت رتيل لزمت ايدي بعد متحملت بجيت كالت
... فهميني ليش هيج سويتي
حره... احسن
رتيل... اي غير تفهميني ليش شفتي شي مو زين من رجلها كوليلي
حره... مارتاحيتله
رتيل... غير اكو سبب
سكتت حاولت وياي محجيت شي غفيت ع كتفها فزيت اني بفراشي نايمه كمت باوعت الساعه بـ ٣ الظهر كمت داشرب مي من المطبخ سمعت صوت ام حيدر الي راد يخطب رتيل ومقبلت تگول لرتيل
ام حيدر... انوار تكول اختج حاولت تغري رجلي ومن ماقبل حجت ويا بيبي بهيه حتى تمنعهم يعيشون قريبين منهم وشهرتها بالولايه شهيره
حره... اني سمعت هيج لو انفجرت طبيت كتلها بهدوء... شنو خاله؟
كامت كالت... سوده عليه يمه شصاير بيج... واجت داتحضني كتلها
... بس لحضه شكالت انوار؟
سكتت رتيل كالتلي... لا ماكو شي
باوعتلها مبين باجيه كتلها... انيي واشرت على روحي انيي حاولت اغري هالكلب؟
ومنو حجه هيج؟
انوار ؟
حجيت بهدوء وبصوت باجي كتلها :-صديقة حياة و تقريبا صديقتي من الطفوله؟
لزمتني رتيل كالت... اهدي فهمتي غلط
اني كلتلها... زين وحياة؟
خلي اولي اني وحياة؟
شراح تحس لما تشوف انوار هيج تطعن بيا
معقوله انوار وصلت لهالمستوى حطيت ايدي ع راسي وكمت ابجي بصوت عالي
كالت ام حيدر... لتبجين يمه كلنا نعرفج ونعرف اخلاقج لتبجين حبيبه
گتلها بصراخ... هو تحرش بيا هو الكلب
مسحت دموعي... والله اليوم اشهرهم وكمت لبست نعالي وطلعت واني امسح بدموعي
اجت وراي رتيل طلعت للباب لزمتني مارديت
لزمتني سالي داتكنس الـ برا باوعتلنا ذبت المكناسه كالت
سالي... شكو
محجيت عفتها ورحت اركض لبيت انوار
ورتيل تصيح مرديت عليها وصلت لبيت انوار هي ويا عيالها عايشه و بيتهم ع الشارع
اكو ناس تفتر دنيا الظهر اني دفعت الباب مقفوله دكيتها بكل قوتي طلعلي طفل صغير ابن حماها كتله
... انوار الكلبه وينها
كلي... جوا الكلبه نايمه
طبيت اسمع الطفل يدردم يكول... هي كل يوم نايمه والماما تكنس وتطبخ وتنظف
حره... دادخل طلعت ام رجلها مره جبيره كالت ... ها توته شبيج
كتلها... جنتج ويين
هي صاحت انوار ودرات وجهها عليه كالت ... شكو يمه ولو عتبانه عليج بعد السويتيـ...
قبل لتكمل طلعت انوار اني دفعتها حيل كلتلها... يالتس يام راسين اني ردت اغري زوجج والله هسه اعلمكم حره منوو
هي دفعتني كالت... نعرفج عيني الدايحه ام الشوارع هو منو ماسامع بصيتكم غير اني جنت اتستر عليج علمود المرحومه
دفعتها كتلها... متبريه المرحومه منج لجج يالبلا اخلاق انتي وزوجج خلك ناس سرسريه اذا احطكم بحاويات الزباله
الزباله تستنكف
داكشفها لزمتني رتيل
وام رجلها دفعتها وتكوللها... شمصخمه ولج
حره... هسه اني اكولج واكول للدنيا كلها
اليوم افضحكم فضيحه والله لاندمكم فتحت باب بيتهم جرتني ام رجل انوار كالت
... ولج حبيبه بالتفاهم
حره... صيحت بصوت عالي... ماكو تفاهم ويا ناس مثلكم والله يا انوار لاندمج
اني اصيح وهي تصيح والناس التمت رتيل وسالي حاولن يطلعني من البيت بس اني فقدت اجن النسوان الجوارين يسالن شكو كلتلهن
... اني اكوللجن شكو الكلب رجلها تحرش بيا وفوك صخام وجهه هو والزماله الي وياه دايتبلون عليه وطلعت اني داغريه ولج خليه يزين شواربه
ضلينا نتعارك ووحده تكفش الثانيه واني فقدت كمت اغلط والبنات يدفعني ع الباب ملختها تملخ دفعتني رتيل برا كالت... فضحتينا ولج
داطب اكتلها سدت حلكي رتيل ودفعتني لبرا كتلها... ولج خلي اكتلها
مقبلت جرتني كالت... ولج فضحتينا حره
كتلها بصياح... الفضيحه الهم الهم موو الي
دفعتني بالكوه رجعتني للبيت جان واكف مصطفى برا اول ماشفنا اشر شكو اني مشيت بعصبيه
اسمع مروه تكوله... اني اخباري بفلوس تريد اخبار ببلاش روح لوحده غيري
باوعتلها صحت... مرووووه
فزت كتلها... كداااامي
رتيل دفعتني كالت من بين اسنانها :-ولج فضحتينا طبي ودفعتني
حره... والله اسحلهم
رتيل... بس اهدي
شويه وطبت مروه تتمختر وبيدها خمسه هزيت ايدي وطبيت للغرفه وقفلتها عليه احس اختنكت الكلبه حيل قهرتني هالذليله فوك ماتلزم رجلها حدوده
جايه تتهمني
تذكرت هم ناقلين شوية غراض لبيت بيبي بهيه
ركضت فتحت باب الغرفه وطلعت فتحت باب بيبي وطبيت للبيت سالي اجت وراي هي ومصطفى كالت
سالي... شداتسوين
كتلهم ... ساعدوني داطلع هالغراض
سالي... هم يجون ياخذوهن
خزرتها هي باوعت لمصطفى كلتله... يلا شيل الغراض اخوي امنك علينا
هو هز راسه اخذت اغلب اغراضهم شمرتها بالشارع
اجت ام رجل انوار من بعيد طلعت التلفزيون برا كتلها
... اخذيهم غراض ابنج نكسات مثله
احجي وهي تاشرلي... اش فضحتينا
اسمع رتيل كالت... خاله جيبو سياره واخذو غراضكم
ام رجل انوار كالت... بس خاله مالكم حق
حره... النا ونص بيبي كالت بعد ماتبيع وامنتني على هالبيت وانتو مادافعين فلس واحد فيلا شيلو غراضكم وبعد لتشوفوني اشكالكم
طلعت اخر خشبه موجوده وقفلت الباب كتلها
... ابنج لو شفته اشرب من دمه
كلتها وطبيت للبيت محروگه حرگ طبيت للغرفه وهم رجعت قفلت الباب اجت وراي رتيل حجت وياي من ورا الباب
بجيت صحت بصوت عالي... عووووفوني وحدي ماارييييد اشوف احد
هي سكتت ضليت ابجي ومر هاليوم مثل كل مره بجي وقهر وعتاب وولا كدرت انام ولا اكل شي
لحد الساعه ب ١٠ بليل اتصل رشم مجاوبت
ضل يتصل الى ان دز مسج كلي
... عندي خبر يفرحج
رمشتله اتصل كلي... انت بخير اتصل ومتجاوبين شبيج؟
حره... مبيا شي
رشم... الي قتل حياة
بجيت كتله... شبيه؟
جر نفس كال... انتحر
اني انصدمت كتله... انتحر لو قتلته
رشم... لا والله ملحكت اقتله هو انتحر
حره... بجيت محجيت شي هو كال
:- كاتب رساله لزوجته وكايل بيها ان هو سوا كل هذا علمود يأمنلهم فلوس وحياة حلوه
بس هسه مدايتحمل تانيب الضمير والكوابيس الداتجيه بسبب حياة
حره... ضليت ابجي وسديت الخط احس كلبي طگ من القهر بعد مااتحمل المفروض افرح بس ماكدرت
لان مجنت متوقعه يجي اليوم التنقتل بيه حياة اصلا
بقيت ابجي واشهك باوعت بالمرايه بس مشفت وجهي شفت وجهه حياة بجيت
رحت وكفت يم المرايه ولزمت ملامح الوجه جانت تتلاشى بجيت بصوت عالى رتيل دكت الباب كالت
... شكو حره شبيج
مجاوبت حطيت راسي ع المرايه وغمضت عيني تذكرت مره حياة گلتلي
"الانسان السيئ مُبتلى بنفسه لانها راح تهلكه "
بجيت وكتلها.... فعلا والي قتلج هم قتل نفسه
اختنكت كلت هذا يوم السعد قاتل حياة انقتل
كمت افتر وابجي واضحك يعني هسه الله اخذ حقنا فتحت المجر لكيت حمره مال ماما وكحل وباودر
اخذت الحمره وحطيت منها مجنت اعرف اصلا شلون اخليها باوعت لنفسي مسحت دموعي اخلي كحل وكلما اخلي تنزل دمعه ويسيل بس عادي
باوعت لروحي بالمرايه بجيت ومسحت دموعي
هي هاي مظاهر الفرح
دكت الباب رتيل اني فتحت الباب هي شافتني شهكت كالت
رتيل... شمسويه بروحج حره
حره... متدرين شصار.. رجعت باوعت لسالي فاكه عيونها وحلكها كتلها... مادريتو موو؟
ضحكت كتلها... هسه افهمكم الي قتل حياة مات
كلتها وبجيت
رتيل كالت... تعاي اغسلج
حره... لا اجيت ابشركم شو ماهلهلتو احجي وابجي
گالت رتيل... ولج حره كافي ارحمي بحالج شدتسوين راح تتخبلين
حره.... لا انتي مداتفهمين
رتيل... خليني امسحلج الحمره ولج شمسويه
صرخت... عوفيها عوفيها اني احبها هاي الحمره
وبجيت رجعت دادخل للغرفه لزمتني حضنتني وبجت
كالت... زين تعالي نامي هنا تعالي
حره... ماتمسحين حمرتي مو؟
رتيل... ماامسحها بس تعاي يمنا
حضنتها وبجيت كتلها... داتوجع من اتنفس
سالي جابتلي العلاج اخذته وحضنت رتيل واني اسوي... المكياج احبه
سالي... وضع حره صار يخوف اختي تخبلت حاضنه رتيل وساعه تبجي ساعه تصرخ ساعه تضحك بهستيريا
رتيل تبجي وياها حاضنتها وتحاول تهدئها بس ماتعرف شلون
حطيت ايدي على حلگي مصدومه من منظرها وشكلها دموعي تدير وكلبي ينزف عليها
انطيتها العلاج يلا شويه هدئت مددتها رتيل ع الفراش ونومتها
و ركضت جرت الموبايل واتصلت على مقدام كلتله... مقدام وضع حره مو تمام وخايفه عليها وامي ماهي لازم تجي باجر خاف شو شتسوي بنفسها
هو كللها... خو ما قفلت على روحها
كلتله... لا هاي انطيناها علاج ونامت بس مادري شبيها فقدت كامت تهلوس وتخربط بالحجي وحطت روج احمر وكحل خبلتنا ... حجتها وبجت بقهر
هو كللها...باجر باجر الصبح اني يمكم
حره... فزيت مخنوگه باوعت من الشباك الدنيا ظلام يعني الكل نايم كمت على كيفي وببالي
لازم اروح اشوف حياة وابشرها حطيت شال على راسي وحتى ماغسلت وجهي
فتحت موبايلي متصلين عليه رشم ومقدام و مرتضى
سديت الموبايل باوعت الساعه ب ٤ الفجر
حطيت الشال على راسي وطلعت فتحت الباب مال البيت ع كيف مافتحت
عرفت رتيل قافلتها
رحت عبرت من سياج بيت حياة ردت اطب لهولهم بس خفت
بسرعه ركضت طلعت من باب بيتهم وركضت وين جنا نلتقي اني وحياة
باوعت ملگيت مرتضى
رحت للشارع اشرت سياره وكفتلي الرجال واضح عليه استغرب بس ماحجه شي كلي
... وين توصلين عمو
حره... للنجف
... انزلج يم الكراج
حره... ماشي
تذكرت اني مجايبه فلوس فتحت كفر موبايلي بيه الف انطيتهياه هو كل شويه يباوعلي
كلي... بابا بيج شي؟
احد ضاربج
حره... لا عمو ليش
... احسج تعبانه
حره... اي ماتت صديقتي.. نزلت راسي كتله... دفنوها بالنجف اريد اشوفها
كلي... الله يساعدج بويه
كتله... عمو اني مااندل
كلي... بابا اهلج يدرون بيج طالعه
كتله... اي
سأل كال... لعد وينهم؟
مجاوبت درت وجهي
نزلني يم الكراج شفت موبايلي اتصالات جايتني من رتيل ومرتضى ومقدام
و موبايلي صامت
سألت على سيارات النجف اشرلي الولد رحت صعدت اخر شي بيه
وكل اليجي يباوعلي متفاجئ مشت السياره ولمو الكروه واني ماعندي ولافلس
ضليت اباوع من الشباك وكفت السياره نزلو الكل نزلت اني كتله... عمو مشايله كروه هو دايحجي كتله... عندي موبايلي اذا تحب اخذه هذا اغلى من الكروه
هو صفن عليه كال... محلل وموهوبه بابا
حره... لاعمو اخذه اخذه
كال... لا بويه روحي تحتاجين فلوس
اشرتله لا سديت الباب ومشيت ضليت امشي صعدت ستوته وصلني للمقبره دخلت اكو باب جبير بيه امنيه طبيت ضليت امشي
حسيتني تيهت انقهرت كمت ابجي انوب وقت ظهر ماكو ناس قليله فتحت موبايلي
هوايه اتصالات اخر اتصال مرتضى ردت اتصل ماعندي رصيد بس ترميشه واني وحضي لو توصل لو لا
رمشت بسرعه اتصل
اول مفتحت خط اجاني صوته... وينج حره
بجيت كال... شكو حىه شبيج تبجين
شهكت كتله ... ضيعت الطريق
اسمع اصوات هورنات وصوت هوا يمكن هو بالسياره كعدت ابجي كتله...تعالي
مرتضى... وين انتي؟
... هنا اني
مرتضى...حره اخذي نفس واهدي وجاوبيني وين انتي
حره... اجيت للمقبره وتيهت
مرتضى... لتخافين جاييج بس وصفيلي المكان يمج احد لوحه شي
اسمع واحد يمه يحجي بس ماافهم كلامه
ضليت اوصفله المكان رغم مااعرف شلون اوصفه
كملت سديت الموبايل ومشيت كعدت يم لوحه وضليت وحدي تقريبا نص ساعه ضليت انام اغفى ويوكع راسي وافز
شويه رفعت راسي باوعت اجو اثنين من الامنيه باتجاهي وگفو يمي
گالو
... انطينا جنسيتج
حره... معندي... گلتها بخوف
هم واحد باوع للثاني كال ... هويه باج كليه اي شي.... يتبع....
__________________
اسفه فراشات البارحه منزلت لان حره عندها ظروف واليوم يلا كدرنا نتواصل
اعتذر عن التأخير
اريد انوه عن حالة حره
بهايه الفتره حره جانت تعاني من اضطراب نفسي حاد
يعني اي شي ديبدر منها مو بوعيها
واغلب الاحداث هي متتذكرها البنات سولفنها الها
وطبعا السبب الاهم والي وصلها لهالمرحله هو انعزالها عن عائلتها وانطوائها عن نفسها
وسجنت نفسها بغرفه بحيث كام يتهيئلها هواية اشياء
الانطواء والانعزال ابد ميفدون ولا يحلون مشكلة ولا يبعدون الحزن عن الاشخاص
بالعكس يزيدون الشخص بتهيئات مموجوده
يظهرها العقل الباطني ويهيئها الهم
كـ حقيقه
واكثر الاحيان الانعزال أيأدي للجنون وتدمير الـ ذات وتحطيم الشخصيه
وهسه اتركم مع القصه
قراءه ممتعه فراشاتي🦋
لتنسون التصويت والمتابعه
شاركوني ارائكم وتوقعاتكم للاحداث القادمه
والاهم غلسو ع السحگ
دمتم بخير ... ❤