صاحت رزان بعلو صوتها : يمهههه
وكعت بالكاع وهي ترجف وحسيتها فقدت
اسمع صوت ضحكات جمال المتكرره وبصوت عالي
باوعت على ايدي ترجف من وحدها وجسمي خدر وحسيت روحي بحلم
عطت عيطه حسيت بلعومي انجرح منها : افتحح البااااب
صرت اضرب بالباب واعيط وجهي كله عرك واني اعيط اباوع لرزان انتهت بالكاع
انفتحت الباب وصار بوجهي جمال
ريحته النكسه وشكله كلت هذا مخبل وفاقد عقله
باوعت لايده عباره عن دم
ضربته على صدره وكتله : وخر خل نطلع عوفنا عوفنااا
دفعته وطلعت اعيط يمهههه وينج يمههه .. يمه !
شفتها كبالي وهالمنظر مستحيل يروح من ذاكرتي
موقف مستحيل اي بشر يتحمله .. منظر بشع لابعد درجه
غركانه بدمها وعيونها مفتوحه وثابته عالسكف
ابتسمت وضحكت بقوه وكعدت يمها : يمههه اكعدي شبيج شنو دتشاقين ويانه شنو هالشقه هذا
هزيتها واني اضحك واحجي وياها : يمه شبيج احجي لتخوفيني
خليت راسي على صدرها حتى اسمع نبضاتها لكن مجان كلبها ينبض !
هزيتها قوي وبدت دموعي تنزل : يمه اكعدي .. لتعوفينا يمه والله بدونج منسوى شي
صرخت بوجها بصوت مجروح : يمههههه
يمه لتروحين والله نتعذب بدونج .. بنان تريدج والله مشتاقتلج اكعدي حبابه والله بس ينام جمال اخذج ونروح .. يمه شبيج احجي وياي يوووم اعيط بوجهها بس مجان اكو اي رد منها
هنا أيقنت انوا امي راحت .. راحت من عدنا وتركتنا وحدنا
مثل ما جابتنا يمها هنا واحنه غربه ، هسه راحت ورجعنا غربه وما النا اي احد
بهالاثناء جنت حاظنتها واني ابجي واحاجيها
اجه جمال وهو يسحل برزان سحل بس هي مجانت واعيه ، جانت بس تباوع
ضحك حيل وشمرها بصفي وكال : يلا اشبعن منها هاي اخر لحظاتكم
جانت صافنه على امي بس مسوت اي شي اباوع عليها قالب ثلج عيونها ثابته على امي ومتحركت ولا بدر منها اي شي
لميت راسها لحضني واني ابجي : يمه اكعدي .. يمه لتعوفينه وحدنه
عاط علينا حيل وكال : يلااااا كافي
عطت بوجهه بحركة كلبي : شنو الكافي شنووو كول شنوووو
وكفت واني اباوعله : اكتلني .. يلا اكتلني اني كدامك
جنه احنه الي واكفين بطريقك وضايج من عدنا
ليش كتلت امي بشنو الها ذنب
اكتلنا احنه ولا تكتل امي جمال
بس انت هسه كتلتها
بجيت واني اباوعلها : خسرت مرة مستحيل تجي وحده ثانيه مثلها ، خسرت انسانه تحملت الويل من وراك ومن ورا سوالفك .. خسرت انسانه متتعوض .. وهسه انت قتلت نفس بريئه .. خسرت دنيتك وخسرت آخرتك هم
عطت بوجهه بفحيح : حسبي الله عليك عساها بحظك وبختك أن شاء الله متتهنى بحياتك
سحبني من ركبتي وخنكني ودفعني عالحايط دفعه قويه حسيت روحي انتهيت
وكعت بالكاع من قوة الضربه حسيتها مو بظهري .. بگلبي
اباوع لرزان لامه رجلها وصافنه على امي وعلى أيدها اللي غطاها الدم
غمضت عيني ودموعي تجري
رجع سحبني من شعري ودفعني بالغرفه ورا دقيقه جاب رزان وشمرها فوكايه وقفل الباب
لزمت رزان واني احاجيها بس مترد علية : رزان اني وياج رزان باعي علية
هزيتها بقوه وباوعتلي بجمود ونزلت دمعه من عيونها : امي ماتت !
بجيت واني حاظنتها : اشششش اهدأي
تحجي وياي بهدوء بس ماعرف شلون اتصرف وياها
رزان : يعني هسه امي راحت من عدنا ؟
امي ماتت بعد ما راح اسمع صوتها ؟
ولا راح تكعدني الصبح ؟
ولا تكعد تسولف وياي وتواسيني وحده تشكي للثانيه
هي مجانت بس ام .. جانت صديقتي
جمال كتلها يعني هسه ؟
هي ماتت ..
كالت ماتت حسيت روحي انهاريت واني ابجي : كافي كافي رزان كااافي
ابتعدت من يمي وراحت كعدت بعيد وهي صافنه عالكاع ومبجت ولا سوت اي شي
لزمت راسي وصرخت : يااااربي راح اموت
احس الدنيا وكفت احس النفس مداكدر اتنفسه احس گلبي معصور شعوري ما ادري شلون احس اريد اموت احس اريد يجي احد يصحيني يكلي كل هذا حلم كعدي احس الحياة وكفت بهل دقايق احس كلشي انتهئ ..
________________________________
بنان
صعدت للغرفة وتعبانه حيل اريد بس انام واحس مخنوكه شي علئ صدري .... وكاعده وجان يطب فهد اباوع عليه خازرني ومدلغم الي يشوفه يكول بايكه فلوسه واصلا ما اريد احاجي علئ تصرفه مال يوم جان ابد محلو جان يكدر يحجي وياي بتفاهم ويكلي مسحي مو كلشي بعصبيه ..
اشوفه يفتر بالغرفة شو اجه وتمدد يمي علئ الجربايه اني شفته هيج كمت دافرش وانام بالكاع
فهد : وين كايمه
بنان : انام
فهد : متنامين علئ الجربايه منو لازمج
بنان : لا حنام بالكاع
فهد : نامي علئ الجربايه وفضيها لتخافين ما آكلج
_رجعت علئ الجربايه بس خليت مخاد بالنص
فهد : واوو عود حلتها خلت مخاد بنص يعني اذا حطيتي مخاد محكدر آكلج وطكها بضحكه
بنان : شبيك فهد يعني تعرف انت كلش زين اني ما اريد نام علئ نفس الجربايه بس دسوي هيج متقصد حتئ ضوجني
فهد : عساس اني شكد ميت انام وياج ترا اكدر اسوي كلشي واكدر آكلج وكلشي اسوي بس اني ما اريد
بنان : اي اي لعد بقي المخاد هيج احسن مرتاحه
فهد : اي عيني خليهن اهمشي راحتج
بنان : اي
باوعتله هذا كاعد وصافن منام حتى واني على ايش حاطه مخدات .. كمت وياي مخدتي وخليت البطانيه على راسي ورحت انام بالكاع مجان اكو فراش بس فراشه هو
فهد : وين وليتي بت الحلو
باوعتله صفح : ما انام يمك
فهد : ليش بالله ؟
بنان : مادري يلا كافي خل ننام دنيا ليل
فهد : اييييي بس اني ما اريد انام وحدي عالجربايه
حجيت بكلبي : مو صاحي اليوم يريد يسويله عركه ميتحمل
بنان : شايف هذني المخدات البصفك ؟
فهد : اي اصلا حوخرهن
بنان : لا صفطهن على مكاني واعتبر احد نايم يمك وهاذهوه
فهد : لا بويه شسوي بالمخدات
اني شسويت رحت جبت فراشه وفرشته وجيت اريد انام
شو ماشوف غير جايب مخدته ونام بصفي
كمت بعصبية : شلون فهد شلون
ابتسم بأستفزاز : يا بعدهم شبيج عيناي
بنان : يعني اليوم نكضيها لو جربايه لو كاع هسه شلون
ضحك وكال : اصلا اني رجعت المكاني شوفي انتي نايمه بفراشي هم كولي لا
بنان : اي اي
وكفت بعصبية وشلت المخده والبطانيه ورحت نمت
عالجربايه : ضل انت جوا بس من تضوجني فد ترتاح متتحمل لازم تشوفني ضايجه
فهد : غير أنتِ نفسيه
بنان : الله اني نفسيه ؟؟؟
فهد : لعد جدي ؟
بنان : الحجي وياك ضايع
فهد : انتي شلون وي جفصاتج هاا استچني لا اكوملج مره ثانيه
بنان : العفو العفو بس خل ننام يمعود دنيا راح تصبح واحنه مثل توم وجيري واحد يركض ورا الثاني
فهد : شعلية اني انتي لحكتيني ونمتي بفراشي هم كولي ديجذب
باوعتله بعصبيه : هسه شلون
فهد : تعاي بحضني
بنان : فهدد
فهد : نامي عيني
...............................................
ياسر
الصبح نزلت بدلت دانزل اطلع وي احمد ونزلت لكيت الكل ملتم وبيت عمي محمود جاين
ياسر : السلام عليكم هاي شني كبت الحنيه والكل ملتم
ريم : وانت شرايووود
ياسر : انلصمي اي شكو ماكو
ليان : سلامتك ياسر
ياسر : الله ليسلمج
رحاب : ياسرر
ياسر : سكتنه عمي سكتنه
ليان : اي فهد وينه شو ماكو
ياسر : وانتي شرايده من فهد هيج تتسئلين عليه ها
ليان : ها لا بس هيج سؤال
ياسر : اي اي واضح سؤال
ليان : انت شبيك ويايه هيج تحجي شهل الاسلوب
ريم : والله اخويه يحجي وي الناس بالأسلوب الي يستحقونه وانتي تستحقين هل اسلوب
ياسر : بعد ميحتاج احجي ريم جاوبتج شلون متفهميها فهميها
جمانه :ولكم شبيكم وي بت عمكم قابل شحجت وياكم وكبيتوا عليها
رحاب : كافي ريم ياسرر
جمانه : وترئ حجي ليان صح وينه فهد غير يجي يسلم وهاي جنتكم شعدها نايمه للظهاري
ياسر : اول شي فهد عود بس يشوفكم وميسلم بذاك الوكت احجوا عليه هل حجي ثاني شي وين الظهاري ترا الدنيا بعدها صبح وساعه بال 10 وحتئ لو للظهاري شوكت جنتنه متريد تكعد خلي تكعد
جمانه : وانت شبيك كبيت شنو صرت محامي
ياسر : والله معندي مشكله اغير مهنتي واصير محامي المرت اخويه
رحاب : كافي ياسرررر
زوزو : ليش سكتونه محجه شي غلط وفهد هسه يم مرته نايم عود بس يكعدون يجون يسلمون خليهم براحتهم ربي يحفظهم ويديمهم
ريم : امين امين
ياسر : يلا اني رايح لان اذا ابقه شويه حضل امسلت
ريم : اطلق من يمسلت يبعد اختك
ياسر بهمس : هاي شنو انتي ريم اختي؟
ريم : دنجب شكد حابتك اني بس هيج مناظر كدامهم
ياسر : هاا مو اكول تفاجئت
ريم : بعد حتتفاجئ هواي
ياسر : ياستار
..............................................
كعدت الصبح شفت فهد نايم فكمت سبحت ولبست شالي والصايه وخليت شويه مكياج خفيف ونزلت وجان الكه الكل وجان زوزو تلكاني بلهلاهل عبالك عروس
زوزو : كليلييلش هلا ببنيتنه الحلوو تعاي كعدي حبيبه يمي
صرت اوزع ابتسامات وكعدت
جمانه : هلاا عاش من شافج اكو واحد يكعد بهل وكت
ريم : اهوو هم رجعنه ياسر صارله ساعه يمسلت شنو هندي
جمانه : انتي سكتي وهيه المفروض من اول متجي تنزل اسلم شنو متعرف الاصول
ليان : وهيه منين تريد تعرف اذا محد يعرف اصلها من فصلها والله يعلم من يا مله جايه
زوزو : اسكتن شنو هل حجي هاا بلا خلي يجي فهد ونشوف اذا يقبل علئ هل كلام ويقبل احد يضوج مرته
جمانه : هسه متكليلي شكلنه للاميره ديانا
بنان ضوجوني حيلل وحتئ دمعت بسبب حجيهم بس بنفس الوقت هم حقهم محد منهم يعرف اهلي ولا شايفهم اكيد حقهم يحجون هيج
ريم : معليج بنان هسه بس يجي فهد اكول اله واخلي يوكفهم عن حدهم ولضوجين همه هيج دائما همه لو مو غيرانين منج جان محجوا هيج
بنان : لا لتكوليله ما اريد مشاكل
ريم : بس مع اشد الاسف اني احب المشاكل وانتي معليج لضلين هيج فاهيه اذا سكتيلهم حيبقون يتمادون
ليان بهمس : ماما مدام الكل كاعد حصعد احجي وي فهد
جمانه : تمام بس لتخلين احد ينتبهلج ولطولين
ليان : تمام
___________________________
روان
كاعدين بالغرفه
حالة انهيار
رزان منامت وطول الليل صافنه وتهلوس وكلسع تكول امي ماتت
الانسان قوي بحالات لكن يضعف بحالات ثانيه
امي اللي ربتنا طول هالسنوات
ماتت .. اني قويه صح والكل يعرفني قويه
لكن اليوم حسيت روحي ميته
ما اعرف اتصرف ولا اعرف اسوي اي شي وكلسع اتخيلها كبالي
للحظه انوا حسيت نفسي تخبلت وكلسع منظر امي كبالي ميفارق عيني هي و دمها
اخذها لو وين وداها هسه ؟ دفنها ؟ دفنها واحنه ماكو
تخبلت واني اشكال افكار تجي بدماغي راسي كام يوجعني ودموعي تنزل وماعرف شسوي
رزان ابد مجانت بوعيها طول هالوقت تهلوس بأشياء مو مفهومه بس اللي افتهمه من تكول " امي ماتت " هالشي الوحيد المفهوم من كل الكلام
سكتت حسيت بيها غفت وراسها على رجلي
امسح على شعرها واقرا آيات حتى تهدأ
نزلت دموعي وبجيت بغصه واني احجي
تدمرنا وانتهينا ، امي راحت من عدنا هم ، شراح يصير بينا اكثر من هيج والله متنه
مرت كم دقيقه وفزت رزان وهي تباوعلي وجهها ميتفسر
روان : شبيج رزان
رزان : امي جانت يمي .. والله جانت يمي هنا كاعده كبالي
بجيت واني احجي وياها : ياريت .. تعاي رزان
رزان : ليش متصدكيني والله شفتها كدامي والله العظيم جانت هنا هي مميته امي ما ماتت
حضنتها وصرنا نبجي اثنينا
رزان : والله العظيم اني شفتها روان
روان : رزان هي ماتت
دفعتني وعاطت بوجهي : داكلجج ما ماتت اني شفتها والله كدامي شفتها
حضنتها واني ابجي : تمام تمام هي جانت هنا
بجينا اثنينا سوا
لحد الان مصيرنا مجهول
جمال وفراس اختفوا واختفت كل الأصوات بالبيت وحسب ما اعتقد انوا كلهم طلعوا وبس احنه ضلينا
___________________________
بنان
كاعده وجان انتبه ليان ماكو كبل اشوو طخت برأسي يم فهد ما ادري ليش اضوج لما اشوفها يم فهد او تحجي وي فهد بس گلت خلي اروح اشوف وين فكمت وصعدت فوك
جان الباب مفتوح فتحت شويه من الباب وجان الكه كاعده علئ الجربايه وفهد نايم ودتباوع عليه بتأمل
ودتلزم فهد وجان يلزم ايدهاا
فهد : شدسوين هنا
ليان : هاا اجيت احجي وياك
فهد : تحجين ويايه ؟ والتحجي تجي للغرفه شخص متزوج نايم وتكعد علئ الجربايه مالته وتصفن عليه
ليان : ها بس اني انتظرتك تكعد
فهد : ليان كومي من الجربايه محلو كعدتج هنا الي يشوفنه شيكول
ليان : ميهمني شيكول يكول
فهد نصدمت من جرئته : انتي شنو متستحين
ليان : ليان عفيه فهد بس اسمعني
فهد : اول شي كومي من الجربايه ماكو بنيه محترمه سوي هل تصرف كومي انتظريني هناك هسه جايج
كامت ليان من الجربايه وكفت وشفت فهد كام هوه هم
ليان : اني اريد أكلك شي
فهد : ديلا فضينه كولي خويه
ليان : شنو خويه لتكولي هالكلمه
فهد : ما امشي بأمرج !
ليان :فهد عفيه لتسوي هيج .. اني راح أكلك بس انت لازم تتفهمني
فهد : شنو ؟
ليان : بس اوعدني الموضوع ميوصل لا ابوية ولا اخويه
فهد : اسمع وأشوف يلا ما أقرر من البدايه
ليان : شبيك ليش هيج تحجي وياي من ورا خشمك
فهد: هذا أني ميعجبج روحي ماجابرج تحجين وياي
ليان : المهم اني لازم احجي واحس الموضوع وصل حده عندي
فهد : نعم
ليان : فهد اني احبك والله احبك من زمان بس انت متدري عني ولا تحس بية وقررت اجي واكلك احس كافي انوا أضم عليك ولازم تعرف ومتدري شكد
تأذيت بخبر زواجك .. فهد اني احبك من زمان واني اولى بيك مو بنان شنو هي اصلا ؟
باوعلها وكال : واني بعمري ما حبيتج ومعتبرج كأخت صغيره لا اكثر وهذا كلامج وفري لنفسج واني حالياً رجال متزوج ابعدي عني ليان لان مستحيل يجي يوم واحبج بي ولتحاولين اي شي تسوين لان مراح ينجح تمام وخلي أبالج اني متزوج و زوجتي احبها حيل فوك متتخيلين والافضل الج انوا تسحبين نفسج
يلا بعد ما عندي اي حجي وياج تفضلي بره وجودج هنا يمي وحدنه محلوو
ليان : بس اريد اعرف شحبيت بنان شنو الشي المميز بيها خيه مجرد وحده ما معروف اصلها من فصلها
فهد لزم عكس ليان حيل : اسمعيني بعمري ما ماد ايدي علئ بنيه هاي او لا لتخليني امد ايدي عليج وهاي اخر مره اشوفج تحجينن هيج علئ بنان يا ويلج اسمعج تحجين هل حجي عليها مره ثانيه اشوفج غير تصرف ويلا اطلعي براا بسرعه
ليان : ميهمني اي شي بس انت الي لو اعرف اسوب كلشي حتئ تصير الي وما اخليك الهاي الي اسمها بنان تاخذك
فهد : شوفي لج انتي مو مال احترامات كتلج ما اريدج ما اطيقج معتبرج حالج حال اخت لا اكثر ويابه اذا شفتج مسمعه بنان كلمه او حاجيه عليها ولتخليني اتصرف غير تصرف واروح اكول الابوج اشوف يقبل بنته تحجي هل حجي وهسه كلمه ما اسمع تطلعين من الغرفة مثل الشطوره
شفت ليان تريد تطلع كبل رحت فتت بغير غرفة ما ادري افرح لو احزن علئ الي سمعته بس حيل كبر بعيني فهد وانو ما انطه مجال الهاا وتصرفها ابد محلوو ليش مصرفت هيج واعترفتله قبل ميزوج لو لما ازوج حله بعين الخاتون
نزلت وشفت ليان شلون كعدت يم امها وخازرتني بس مهتميتلها وجان ينزل فهد
فهد : السلام عليكم
جمانه : هلا بفهد شلونك
فهد : الحمدالله وانتي
جمانه : علئ الله اي شكو ماكو شخبارك شخبار شغلك
بعدها ممكمله كلامها وقاطعتها ريم
ريم : فهد تقبل يكولون علئ مرتك الله يعلم منين جايه ومن لا مله وانو هيه محد يعرف اصلها من فصلها تقبل هل كلام ينحجي علئ مرتك
اباوع علئ جمانه شلون خزرت ريم بس ريم ولا يمها وبقت مكمله كلامها وبنطلاق
فهد : ابن امه وابوه خلي يحجي هل كلام كبالي وشوف شسوي بي و شنو من يا مله ومنين اصلها وفصلها شنو هل تمسلت ميهمني كلام اي احد المهم انو اني اعرف اهل بنان منو ومنو اعرف بنان شنوو هوه منو الي حجه هيج عليها ؟
زوزو : محد وليدي روح شغلك انت لتتأخر بس هيج حبينه نسئلك
باوعلنه صفح شلون ما مقتنع : يلا ثيمالا
زوزو : ترا اكدر اكول انتو حجيتوا هيج بس مردت مشاكل بس سمعتوا شكال وان شاء الله ميتكرر هل شي لان هل مره حسكت وراح اعديها مره ثانيه حكول اله وهوه يعرف شلون يتصرف
جمانه : هسه متكولين شحجينه يلا كومي ليان امشي نروح تأخرنه
ريم بهمس : روحه بلا رده
بنان : هيوو ريم عيب حيسمعون
ريم : امداج انتي ابقي طول عمرج فاهيه
_____________________________
ياسر
طبعاً الدنيا ضوجه بدون رواني وطافره روحي من السياج ، خابرت احمد وكلتله راح اجيك للبيت
صعدت بسياره ورحت لاحمد وطول الطريق مسطووور وكل تفكيري بروان يعني معقوله هيج زعلت حتى بدون دوام ولا مكالمه ولا اي شي .. مع العلم علاقتها كلش قويه ب ريم وصديقات من زمان
وصلت لبيت احمد طلعلي لكيته واكف بالباب
احمد : وصل ياسر يلا حيو حيو
حجيت بضوجه : وخر عمي يا ياسر هو بقى ياسر
احمد : خاب شبيك انت شو وضعك مو تمام هالايام
تنهدت وكتله : سالفه وجعانه بعد عمك
احمد : اي والله .. فوت فوت حبيب
دخلت جوه استقبلتنا ام احمد خطيه مره جبيره ورحنه للغرفه كعدنا وطكيناها صفنه واحد صافن عالثاني
احمد : شبيك يووول احجي
ياسر : شحجي
احمد : احجي شبيك مادري معاجبني انتَ .. مو ياسر القديم اليضحك للهوا شبيك صاير فدشي ومضوجك .. اكو احد مضوجك حتى افصمه فصم وداعتك
ياسر : مادري شحجيلك
احمد : شحجيلك آهاتي تشكيلك .. داحسك بعد شويه وتجرها بـ بچيه دحجي وفضني توترت
ضحك ياسر وكال : شوف يعني مادري احس خجلت
ضحك احمد : لكككك هاااا انت تخجل اكص ايدي اذا عندك خجل انتَ
ياسر : انجب يلا كافي خل احجي
احمد : اسمعك يبعدي
ياسر : شوف احمد اني احب
كمز احمد من مكانه : وربي عرفتك مو خالي
ياسر : شبيك عمي استچن خل اكمل
احمد : ياسر يحب كليليليليلش
طبت ام احمد وبأيدها صينية جاي وهي تضحك ع صوت الهلهوله : خيرك احمد شبيك تسودنت
احمد : اي يوم يلا جيبيها
أخذ الصينيه من أمه وحطها وهو يباوع بفضول ويضحك ع ياسر
احمد : اي بس لا مضروب بوري من الاخت
باوع ياسر بضوجه : مو بوري هم
احمد : لعددد شنو حشك هدومي دحجي
ياسر : هي تصير صديقة اختي ونفس الوقت اخت مرت اخويه
احمد ضل صافن : مفتهمت ولا اي شي بعد عمري عيد مره ثانيه
حط ياسر ايده ع راسه : شلون ويه الفهاوه
احمد : انجب واحجي هي مال بطتنه بطت بطن بطتكم
ياسر : اي عوفك من الحسب والنسب .. هي مختفيه من 4 ايام تقريباً وماهيه وحتى ما اتصلت ع اختي ولا اي شي
لزم راسه بتفكير : احمد راح اتخبل والله مادري شصاير بحالي لا نومي نوم ولا كعدتي كعده شهالحياة
احمد : اوووبا وقعنا في الكمين
ياسر : دنجب عمي بس هي ماكووو وهاذهوه سد الموضوع
احمد بتفكير : خاف سافرت
ياسر : اكل نعل شنو سافرت خ** بدماغك انت؟
احمد : شبيك انت متخبل لتجوعر مو دنفكر حتى نساعدك
ياسر : اي شنو سافرت وين احنه
احمد : خاف مريضه لو شي
ياسر : حتى لو مريضه متختفي هيج
احمد : هسه انت شدعواك هي 4 ايام شنيه قابل تهي بهي
شال ياسر سويجه بضوجه وكال لاحمد : عمي اخابرك لاحقاً حولي هسه
احمد : تاج راسي ابو اليُسر الله وياك
وراها صاح : لك تعال قندره مشربت الجاي
ياسر : خليته الك
.................................................
بيت فهد
كاعدين بعد الغدا دنيا ظهر وياسر رجع ضايج وكبل نام وما اكل ولا شي و كلنا جنه كاعدين بالصاله نسولف
ريم : اكول همام شبي ياسر
همام : علمي علمج
ريم : مادري احسه متغير حيل هالايام
بنان : اي حتى اني .. وين مريم وفرح مختفين
ريم : انتي وين طامسه غير حسن أخذهم الصبح وداها لاهلها
همام : اي فروحه مكانها خالي
بنان : ريم بعد مخابرتج روان ؟
حجت ريم بحزن : اي والله شكد دكيت ومتجاوبني ماعرف ليش هيج زعلت علية وما داومت
بنان : يلا باجر هسه تداومين واذا داومت كوليلي شلونها تمام
ريم : بعيني
زوزو : هاي شنو عيني تتبسبسون؟
ضحكت رحاب : عيني عدهم سوالف خاصه
زوزو : يا خاصه تهي بهي اوف منك يا لساني
ريم : اي زوزو شلونج
زوزو : بخيرررر
ريم : تدرون فد ضوجه وطكت الكئابه عندي
همام : نامي خويه
ريم : اسكت انت عزيزي يا نوم حتى النوم مليت من عنده
بنان : هم ضوجه .. اذا يجي فهد خلي نكوله يطلعنا
ريم : والله صراحه اني هم مفكره اكوله وين تقترحون ؟
همام بتفكير : مادري .. نروح وين صدك ؟
ريم : لجهنم فكر فكر بعد
بنان : نخلي يودينا للمول
ريم : لا لا ماريد مول نروح مكان هيج نتونس بي مثلاً مدينة ألعاب
همام : فكره حلوه صراحه
بنان : ما اريد اروح مدينة ألعاب
ريم : ليش ولج
بنان : ماحبها
ريم : ليشششش
بنان : مادري ما احبها
حجيت هالكلمات مو لان ما احب مدينة الألعاب
لان فكرت بخواتي وانقهرت .. اني اطلع وهنه لا .. مستحيل
ريم : حروح اشوف ياسر واجي
همام : هذاك طامس
ريم : اي هو اشوفه واجي
صعدت ريم فوك لاكاها ياسر يعدل بشعره ويغني
الحبج ما خسر رواني الحبج ما خسر رواني
ريم : ايبااااااخ موهنديس ياسر صار بيها رواني مووو
ياسر : اوووف مو وكتج
ريم : شبيك ياسر
ياسر : يطبني مرض
ريم : يممهه اسم الله دحجي شبيك
ياسر : روان
ريم: اهخخخ مثل تفكيري والله حتى اني هم افكر بيها مثلك .. ياسر انت تحبها صدك؟
ياسر : مو وكت هالموضوع نازل اكل حاجه وارجع انام
ريم : وضعك معاجبني هسه باجر اداوم وحتجي روان وتشوفها لتخاف
تنهد وكال : ياريت
ريم : ديلا تعال ننزل بس يجي فهد نطلع
ياسر : وين
ريم : شمدريني هوه بعد بكيفه يلا تعال
ياسر : ما اريد اروح روحوا انتو
ريم : شبيك ياسر امشي تغير جوو
ياسر : ولي ريم من يمي
ريم : شبيك تعال شتريدني اكابل همام الي وجهه البومه ومدلغم لو اكابل فهد ابو خنزوره
ياسر : روحي من يمي
ريم : باوع اذا هسه اجيت ويانه انطيك رقم روان
ياسر : والله
ريم : والله
ياسر : ديلا ولي خلي ابدل
ريم : سمع بيها روان
ياسر : طلعي برا وسدي الباب
ريم : هذا هيج مفعول روان قوي
ياسر : وليي
___________________________________
روان
صار اليل ولحد الان ماكو لا فراس ولا جمال ولا احد
واباوع علئ رزان كاعده وصافنه بزاويه واني بكلبي حصرة وقهر بس الله يعلم
روان : رزان رزان
رزان : يمه گلبي روان مداتحمل حموت من القهر
روان : عفيه رزان اني ميته من القهره لزيديها عليه
رزان : شلون شتريدين اسويي احس نفس نقطع مني روان مداكدر احس هيج توقفت الحياة
روان تبجي وتشهك : كله بسببي لو ما لحيت عليكم جان ما ماتت ولا صار هذا كله شكد كلتلي هل شي غلط وهل شي مو صح ولنروح بس اني لحيت لحيت وشوفي وين وصلت شتت الكل يربي مداتحمل اختبارك صعب
اباوع علئ رزان صافنه ومجاوبني فجئه نطقت
رزان : خلي نروح البنان
روان : شنو
رزان بعياط : نروح البنان شنو الي مدسمعي نروح البنان
روان : شبيج رزان اهدي شنو نروح
رزان : معدنه غير هل حل اني بعد ميهمني شي شيصير خلي يصير شيسوي جمال خلي يسويي كافي رزان مليت خلي نروح البنان مداتحمل
اباوع عليها نهارت بالكاع وبس تبجي وترجف
روان : حضنتها وكلتلها تمام تمام نروح نروح
رزان : عفيه روان خلي نروح
روان : تمام نروج هسه نروح صبري
كمت التفت بالغرفه الباب مقفول بس اكو بالغرفه صاير شباك نكدر نكمز منه لان مسافة قصيره مو ذاك الارتفاع ..
..............................................
ريم : هلا بفيهدان الله جابك اخوي العزيز
فهد : هلا بيج شتريدين من الاخير
ريم : اخوي الغالي انت اخوي ..
قاطعها فهد : ريمه كولي من الأخير شتريدين
ريم : خلي نطلع
فهد : وخري من يمي ضايج وتعبان ومابيه حيل
ريم : هسه ليش تفشلني اي اخي خلي نطلع ولا ضايجين والكل ضايج وهاي وحتئ رحت الكلت الياسر حنطلع وكاعد حيصر بروحه
فهد : وانتي بكيفج تعزمين الاوادم
ريم : فهد شبيك عفيه حباب خلي نطلع
فهد : والله تعبان عود غير مره
ريم : اشرت البنان انو تتدخل
بنان : اي فهد خل نطلع
فهد : تريدين طلعين
بنان : اي بس اذا تعبان هاهيه
ريم خزرت بنان
فهد : اذا هيج ضايجين لعد حضروا نفسكم
ريم : هاي شنو صارت بيعا بنان سيادة الضابط قبل صارلي ساعة اتوسل واصبغ واسحسل روحي وتاليها اجت هاي الفاهيه فهد خلي نطلع ضايجين كبل قبلت هاي شنو والله ميصير
همام : عوفي يبعد اخوج هوه زوج صارت بس مرته وبس والباقي خس
زوزو : صرنه تحت التحت احنه
همام : اي والله عوفي ريم عوفي ميسمعلج اني اسمعلج
ريم : يا خوفي انت هم تزوج وتنساني
همام : والله اذا حلوه مو بس انساج انسه عشيرتي كلها
زوزو : هوه اني غاسلة ايدي منك
فهد حضن ريم : شبيج هسه شحجيت انتي الروح والريه
ريم : اي اي صدكت
فهد : شعندي غيرج اني
ريم : مشكور خويه
فهد : دولي من يمي روحي بدلي لا اغير رائي
ريم : لا شنو هيه خمس دقايق وتلكاني كبالك
فهد : خاف يصيرن ساعتين
ريم : لا لا
بنان
صعدت للغرفه فات فهد يسبح واني
لبست فستان مال محجبات لون بيجي ويه شال اسود وخليت شويه مكياج وطلعت الفهد ملابس
بنان : ذني الملابس
فهد : تمام صدك بنان عيني
بنان : هاا
فهد : حمرتج خفيفها
بنان : ليش
فهد : شنو ليش هاي احنه يوميه نفس السيناريوو مو تارسه حلكج حمره شعدنه عرس
بنان : عزاا وين والله شويه
فهد : لا وتحلف هم باعي لا شويه ولا شيي خفيفها لو تمسحيها بس افضل تمسحيها احسن
بنان : بس ترا دنيا ليل محد منتبه
فهد : اي الجني ينتبه
بنان بهمس : عود ينكت
فهد : ترا سمعتج انتي وتاليتها وي لسانج
بنان : شبي لساني
فهد : رايدله كص
بنان : اذا نكص بيش احجي
فهد : ميحتاج تحجين اني احجي بدالج
بنان : والله
فهد : مسحيهااا وفضينه
بنان مردت اناقشها واضوجه واضوج روحي فرحت مسحتها وانجبيت للعلم حاطه شويه وسوه هيج لو احط هواي شيسوي
بنان : هاا ان شاء الله احسن
فهد : اي هسه حلوه
بنان : بكل حالاتي حلوه اني اصلا
فهد : اي بويه انتي منو بجمالج تخبلين
بنان : ادري
فهد : يلا امشي ننزل
همام : يلا زوزو متريد تجي وبابا ميريد وماما متريد وحسن ميريد اصلا هذا خارج نطاق التغطيه منشوفه ابد بس بوكت المصايب وبس احنه نروح
ياسر : بعد احسن يسون فضل يخفون علينه
فهد : ديلا امشوا وين تريدون نولي
ريم : مدينة العاب ست بنان متحبها مول محد يريد
ياسر : نروح للكبور احسن
همام : هوه هذا احسن شي
فهد : امشوا نروح نشوفلنه حديقة نكعد بيها هاا شتكولون
ريم : اوك هوه هم هيج
بنان طلعنه وطول الطريق ياسر يريد يطلع ساجده عبيد وفهد يطفيها باقين طول الطريق مناكر وصلنه للحديقة راح همام جابلنه لفات مال كص وكعدنه ناكل
فهد : شو متاكلين بنان
بنان : ما ادري ما اشتهي
فهد : ميصير اكلي بويه مو زين تضلين بدون اكل
بنان : بعدين والله ما اشتهي
فهد : براحتج
دك موبايل همام راح بعيد عنه ديحجي
ريم : خلي نجيب شعر بنات
ياسر : الكل يكبر وانتي ضلي زعطوطه
ريم : هوه اني اريد اضل زعطوطه وانت اريدك تكبر
فهد : كوم ياسر روح جيبوا شعر بنات وتعالوا
ياسر : كلشي ياسر ياسر
فهد : دمشي لك روح وي اختك جيبوا شعر بنات وتعالوا بنان تريدين انتي
بنان : لا ما اريد
راحوا ياسر وريم يجبيون شعر بنات وضلينه اني وفهد كاعدين
فهد : بيج شي بنان شو احسج ضايجه
بنان : ما ادري فهد مخنوكه
فهد : من شنو
بنان : ما ادري بس حاسه حيصير شي ودافكر هواي بخواتي وخايفة عليهم حيلل
فهد
اباوع عليها وكلت بگلبي اوف لعد لو تعرفين انتي بتت عمي وخالتي شسوين
بنان : فهد مداتحمل اني خايفة حيل
فهد : لتخافين ما دام فهد بظهرج لتخافين
بنان : يجي يوم وتعوفني
فهد : اي بس اموت بذاك اليوم اعوفج
قاطع كلامنه همام
همام : ها فعد نرجع لان هسه عندي شغل شويه اريد اكمله
فهد : اي هاهيه بعد ما عدنه شي يلا امشوا
روان
كسرت الجامه وطلعنه اني ورزان وكل بگلبي اريد بس اوصل يم بنان اريد احجيلها اريد ارتاح اريد شوف احنه بيا ضيم امشي ويدي علئ گلبي وادعي جمال ميطلع بطريقنه لازمه ايد رزان وصلنه لشارع واخذنه تكسي جان السايق رجال جبير وركبنه وكتله وين يودينه ..
بنان رجعنه للبيت لكينه زوزو وعمو وخاله كاعدين بالصاله وبهل الاثناء جنه دنسولف ودك الباب
محمد : كوم ياسر افتح الباب هذا منو بهل ليل جاينه
ياسر : اهوو هم ياسر خلي يكوم همام اني شعليه
محمد : ولك ياسر كوم شوف منوو علئ الباب
ياسر : كمت كمت هوه بهل بيت بس ياسر ياسر
طلعت دافتح الباب فتحته ...
ياسر " بصدمه " : روان !!
نهاية البارت
يتبع ..
(لاتنسوا التصويت)
وأن شاء الله يعجبكم البارت وشنو توقعاتكم للبارت الجاي ؟
إلى اللقاء يا أعز العابرين في قلبي ♡.
الكاتبات دينا & نور