« الحلــــــــقه الثانــــــيه»
«هل كانَ حلماً...؟»
«عناق _ الارواح»
بقلمي ... لؤلؤة _البِحار ...
______________________
سمرا... اي من بعد ما عرف رشم بهالموضوع واجه وواجه ابويا وهدده
بس ابويه نكر وحتى اني ماصدكته لرشم
وطردته وحضرته ونهيت كلشي وياه لان يحجي هيج على ابويه ويتهمه وخصوصا سمعته مهمه حاليا
بس بعدها بأيام سمعت ابويا يحجي بالتليفون مع صديقه ويطلب منه يدور على بنته ازهار ويسفرها ويضيع مكانها او يسوي اي شي بس المهم يخفيها وميلگوها
بهيه... مشعل طلب مني اسميها ازهار شنو السبب ماادري بس اني ماحبيته
وغيرته ل حياة لان شفت بيها حياتي...
رشم... اني اگولج شنو السبب حتى يگدر يوصللها ويعرف مكانها
الباشا گلي انكم بالحله
ورحت سألت عنكم ب2013 وماعرفت شي غير انكم انتقلتو لبغداد
ولما اجيت وسألت عنكم ببغداد هم. محد عرفكم... باوعلي وگال...
حتى الج سألتج
حره... صحيح.. گلتها واني اهز راسي..
رشم... بس بوقتها گلتيلي ماا اعرفها ليش..؟
حره... مجنت ادري تقصد على حياة انت گلت ازهار وگلت هي اقاربي
وگلت ساكنه هنا
وحياة محاجيتلي عنك اي شي فاستبعدت انك تكون تعرفها
بالاضافه ان حياة اسمها حياة مو ازهار صح سولفتلي ابوها راد يسميها ازهار
بس هسه حاليا اسمها حياة
فمافكرت انها تكون حياة الدتحجي عنها
رشم... صح هي السالفه مليوصه.. باوع لبيبي وگال.. اني اخر شي عرفته انكم رجعتم للموصل
لحد ما قبل فتره حاجاني صاحبي هنا تعرفت عليه
گلي اكو جماعه رجعو من الموصل بنفس الوصف
واني رجعت لهنا قبل كم يوم ولگيتكم
حياة... والله دخت... حجتها وهي تلزم راسها بأطراف اصابعها
رشم... اعرف وحقج شي مو سهل تعرفين كل هذا وصدمه بس هذا الواقع...
حياة... يعني انتي اختي...؟ حجتها وهي تباوع لسمرا
سمرا هزت راسها بأي
رشم... اعتذر ع التوتر الي سببته الكم بس لازم نتفاهم ببعض الامور ونخصمها
حالة الضياع والتشتت الي تعيشو طول عمركم ماتجوز خصوصا ان ابو حياة رجل عنده فلوس وجاه وسلطه
وانتو عايشين هالعيشه ليش؟
حياة انتي الج حق عند ابوج ولازم تاخذيه
بهيه... لا احنا مانريد منه شي
سمرا... ليش؟ حجتها بتساؤل
بهيه... هو باع حياة طول هالسنين برخص المي وما سأل عنها
واني من يومها تعبت هواي
حتى انطيها لگمة حلال تاكلها
مستحيل هسه اخليها تروح تگعد ويه ابن حرام نسى بنته وتركها للشارع...
بجت سمرا گامتلها حياة حضنتها گلتلها.... لتبجين...
بهيه... يمه حياة لتزعلين بس اني حتى امج اجت للموصل رادت تشوفج منعتها
كلت تعتبرين نفسج يتيمه احسن من اهمال اهلج لان ميستاهلون يبقون يم هيج ورده
حياة... حتى اني ما اريد شي منهم... حجتها وهي تبجي
حره.. صفنت عليها وعلى سمرا صدگ نازگه بس حياة احلا منها بهوايه
رشم... اتركم تفكرون اليوم... باوع لسمرا وگال... سمرا جانت حابه كلش تلتقي بحياة وعندها فضول تشوفها
هااا واخيرا شفتيها... حجاها وهو يباوعلها مبتسم
ضحكت سمرا وحياة گلتلها... تگدرين تزوريني بأي وقت..؟
سمرا... من باجر الصبح اني يمج... گالتها وهي تهز راسها بأي
ضحكنا بيبي گالت... رشم يمه مااريد ابو حياة يعرف بيها او بوجودها او بمكانها رجاءً
رشم... ماشي تدللي.. حجاها وهو مبتسم..
حره.. من بعد هاليوم ضلت سمرا كل يوم تجي يم حياة مرات من الصبح للعصر ومرات من الغده لليل
ودائما تجيب وياها اكل ومرات هدايا ومرات ملابس متجي فارغه ابد رغم هالشي يزعج حياة ومتقبل تاخذ. منها شي
بس اصرار سمرا وفرحتها ان عندها اخت وفرحانه بيها وبوجودها يجبر حياة تاخذ منها التجيبه الها
خلال اسبوع صارن حيل حيل صديقات
دائما اصفن وافكر سبحان الله شلون هيج بسرعه توافقن وصارن الي يگول اخوات من عمر مو مال اسبوع
بيوم سألت سمرا... امج وين وتدري بيج تلتقين بحياة..؟
سمرا... ماما تطلگت من بابا لان حست بالاهانه لان هو بابا گايللها اني جنت متزوج
واجت بنيه بس توفت وبعدين يلا تزوج امي
يعني مگللها اني متزوجج ومتزوج ام حياة فهمتن
حياة.. اي فهمنه... گالتها وهي تباوع لحره وحره تبادلها نفس النضره
حره... مشت الايام طبيعيه وبشكل عادي والعلاقه بين سمرا وحياة قوة حيل
وسمرا تقربت منا اكثر وصارت حتى تساعدهن بشغل البيت
گاعده بالاستقبال والف بالكبه وسالي كاعده يمي وحاطه ورقة رسم جبيره ويمها الوان
دا ترسمني واني الف بالكبه وكل شويه مشوفتني الرسمه واني عايطه بيها
لان لو تطلعني سمينه كلش لو تطلعني رگبتي عوجه
لو تخلي خشمي اطول من وجهي كله واني اعيط بيها وهي تمسح وترجع تعدل بالرسمه...
طب مقدام للبيت راح سلم ع رتيل واجه كعد يمي..
مقدام... يمم شهالريحه الطالعه ولج شهيتيني بالكبه.. كالها وهو ياخذ الخاشوكه ملاها حشو واكله
حره.. تدلل هسه اگليلك واكل.. حجيتها واني مبتسمه..
طبت رتيل شايله سراحية مي ووياها گلاص صبت المي بالگلاص وقدمته لمقدام
اخذه منها شربه وانطاها الگلاص كال... رحم الله والديج رتيل تعالي اكلج
رتيل... اي گول شنو ... گالتها وهي تحط السراحيه بالگاع وتكعد يمه..
مقدام... باوعي هذا عمران مو قبل فتره اشتره تكسي حتى يشتغل بيها
رتيل ... اي اتذكر مره گتلي بس شبيه..؟
مقدام... باوعي بهايه الفتره هو فتح محل وشاف الشغل بيه زين فگالي اخذ التكسي اشتغل بيه من تكمل شغلك
والي تحصله اني وياك بالنص وااني شفتها خوش فكره من ارجع من الشغل اضل افتر
فگلت ليش اضل افتر بالمنطقه اخذ التكسي واشتغل بيه والي يرزقني بيه الله اني وعمران بالنص بيه
رتيل... هي خوش فكره بس انته راح تتعب هيج يعني من الصبح للعصر عماله لو حمال ومن ترجع مترتاح تطلع تشتغل تكسي
مقدام لتدمر صحتك لاجلنا احنا منفيدك بشي اذا لاسامح الله صحتك راحت...
هون على نفسك والحمدلله احنا هسه عندنا ومطلعين مصرفنا هذا كلش كافي
مقدام... بالعكس ما ارتاح اذا مااشوفجن مرتاحات .. جر حسره وكال بأبتسامه...
كل حلمي اشتغل واجمع واشتري بيت بزيونه واكعدجن بيه واعيشجن عيشه الاميره تتمناها واعوضجن حرمان اهلي الجن هذا كل حلمي
رتيل... وان شاءالله راح يجي هذا اليوم بس صحتك اهم من كلشي عدنا وخليك واثق رب العالمين يرزق البشر على گد نياته
واحنا الحمدلله نيتنه خير حتى ويه الي يأذينا ف ان شاءالله الله يرزقنا كل خير
المهم هسه عندنا انته تبقى خيمه فوگ راسنا هذا يسوه كنوز الدنيا بحالها...
حره... مقدام لزم كف رتيل رفعه لشفافه باسه ونزله باوعلها مبتسم وهي باسته بخده وگامت
اخذت كبه من الصينيه وگالت وهي تروح للمطبخ... لتطلع خلي اگليلگ حتى تاكل
حره... من يومها مقدام كام من يرجع العصر من شغله ياخذ التكسي ويطلع يشتغل بيه
بيوم اجه للبيت متوتر سألنا اني وسالي ورتيل شكو مجاوب وبس يفتر ومتوتر حيل
عاد احنا لتمينا عليه مثل البزازين اخونا متوتر وكل شويه يخابر واحنا نفتر وراه ونصيح شكو
باوعلنا بلع ريگ وگال وهو عيونه تفتر... شوفن دا اسوق بالتكسي وشفت بنيه واكعه بحضن الثانيه
مثل المغمى عليها
والثانيه تبجي الدنيا ظهر الشارع سيارات قليل اني اقتربت منهن
اشرتلي وگفت ونزلت اساعد لان تخيلتهن سالي وحره ما كدرت بعد اعوفهن
البنيه گالت... عفيه اختي وگعت بس اخذنا لاي مستشفى قريبه ماكو احد يجاوب من اهلنا
مقدام... تدللي خويه هسه اساعدج
البنيه.. اي عليك الله لتعوفنا
مقدام... تقربت ع البنيه الواگعه شلتها وخليتها بالسياره وهي هم صعدت وياها والدموع عشره عشره
وديتها للمستشفى تلگوها الممرضين اخذوها للطوارئ لان مغمي عليها سوولها الاجراءات وقاسو عندها الضغط لگوه مصفر
تالي كامو وحطولها مغذيات وضربوها ابره واختها تفتر وما سكتت بس تبجي
لحد ماسمعتها عاطت التفتت عليها...
مقدام... ها يابه شكو ليش عطتي اختج مابيها شي بس شوية هبوط عدها
حوراء ... لك لاااا مو ع اختي بس موبايلي ضاااع موبايلي يبووو شهاليوم الاكشر
لو داعمتني سياره ولا هالطيحان الحظ دخيلك ربي كله ولا موبايلي
مقدام... على كيفج اني شفتج تخابرين بيه بالسياره... حجاها وهو گوه يضم ابتسامته
حوراء ... ياا اي والله لعد وينه... گالتها وهي تحط كف ايدها جوه حنجها مصدومه
مقدام... يمكن نسيتيه بالسياره اروح اجيبه واجي ضلي يم اختج... حجيتها واني اطلع للسياره
رحت فتحت السياره الباب الوره دورت لگيته واكع شلته قفلت السياره ورجعتلها باوعت هوايه متصلين عليها
كومة مكالمات مديت ايدي بيها الموبايل اخذته مني وخابرت مدري عليمن وكامت تحجي وتبجي
وكل كلمتين والثانيه وعاطت.. صخااام بوجهييي
واني صافن عليها وكوه ضام ضحكتي فشله لا تفلت گدامها
سدت الموبايل جرت نفس باوعتلي وكالت
حوراء ... راح يجون اهلي الحمدلله
مقدام... الحمدلله ع السلامه... ضلينا نحجي اني وياها لبين مااجه رجال جبير ووياه شباب يطلعوني بعمري واكو اكبر مني
گلتلهم... ليش اتصل عليكم متجاوبون خلف الله ع هالرجال طلع اخو خيته وساعدني ومعافني حايره وخطيه لهسه ويايه وماتركني
مقدام... تحجي بعصبيه وهي تباوعلهم همه باوعولي ابوها گال
... ابني مااعرف شلون اشكرك واردلك جميلك رحم الله والديك وممنون منك لوكفتك لبناتي
مقدام... لا عمي هذا واجبي وهنا مثل اخياتي غيرتي ماتسمحلي اعوفهن وهنا بأمس الحاجه
.. ضلو اخوانها وابوها يتشكرون مني ويمدحون بيه وشالوني بالصلوات لبعد شويه وجان حسيت روحي ملاك مو بشر عالگد المدح مالهم
تالي ابوها كال...بنتي بالخامس علمي عندها دورات تاخذها انت تكسي هي وصديقاتها..؟
مقدام... صفنت شويه.. ميخالف بعيوني...
بهالاثناء المستشفى انملت كل شويه واحد من اقربائهم يجي اخوانها ما اقتنعو بالضغط سوولها تحاليل كامله خاف بيها شي
اخر شي اني ترخصت ورجعت لان عمران جان محتاج السياره وتأخرت عليه
رتيل... خطيه الله يشافيها
مقدام... والله اول مره اصير بهيج موقف شو شي صعب بنات ووحدهم....
حره... عاد هو گال هيج لو رتيل كعدت وگامت تمدح وتشجع بيه وتگول
رتيل... يمه فدوا اروحلك رجال وعندك غيره
حره... ابتسمت على شكلها ماخذه دور الام وتمدح بيه هي دائما هيج من يسوي موقف زين وبيه نخوه تضل تمدح بيه وتصعده للسما بمديحها لدرجة يگوم يمشي ويعدل بياخه فانليته مكيف
كلتله رتيل... لعد شبيك متوتر..؟
مقدام... هااا والله ماادري بس ماادري احساس غريب.
باوعلنا ورجع باوع لرتيل... هاي البنيه الله يحفظها حيل مبينه حبابه وادميه الله يستر عليها
حره... رتيل باوعتلي واني باوعت لسالي رجعنا باوعناله وابتسمنا گناله بصوت واحد
... امييين
الايام تمشي بشكل اعتيادي سمرا كل يوم تجي تزور اختها وتقضي النهار يمها
واني وحياة مستمرين بالخبز والطبخ للعالم
ومقدام صار يوصل البنات ومن ضمنهم البنيه حوراء الي الظاهر اخويه وگع بيها
لان من يروح يوصلها للمدرسين ويرجع لليل هو يسولف بيها وويه اسوالفه ابتسامه حلوه مثل روحه...
مرات اهلها يخابرو يطلبون منه يوصلهم لمكان يرحوله
بهايه الفتره رتيل منعتني انو اطبخ واسوي كبب للعالم گالت
رتيل... حره هالسنه ثالث وبكلوريا ميصير تهملين دراستج اكثر تره شهادتج هي سندج من بعد الله
حره... اهز براسي واني ساكته وكلامها مايأثر بيه لان ماعندي اي اهتمام وواهس للدراسه
ضليت اسخت واطب واطلع ويه حياة ومن خوفي من رتيل الزم الكتب وافتر بيها ع الاساس دا اقره
طلعت من البيت والكتاب بإيدي رحت لبيت حياة لگيتها دا تعجن رحت گعدت يمها
... ليش متقرين...؟
... وهذا شنو الگدامج مو لازمته بإيدي واقره.. حجيتها واني ااشرلها ع الكتاب
حياة... باوعي حره تضحكين ع الدنيا كلها ومتضحكين عليه اعرفج وادري بيج لازمه كتابج بإيدج للزينه وبس
حره... حياة مالي واهس اقره ولا ادرس تره الدراسه مو اجبار
حياة... اعرف واني وياج الدراسه مو اجبار بس تره الدراسه تحديد مصير ومراح تفهمين كلامي الى لمن تلزمين شهادتج بإيدج
هسه تگولين شلون تشجعني ع الدراسه وهي تاركه دراستها
اني تركت الدراسه لان وضعي يختلف
اني ماعندي بس بيبي وبيبي مره جبيره بالعمر صعبه تضل تخبز وهي بهالعمر بس حتى تعيشني
كل ماالزم الكتاب تجي ببالي شلون هي تعبانه لاجلي ومكسور ظهرها واهلي تاركيني وشامريني عليها وعايشين ومتمتعين وناسيني
فما اگدر اشوفها بهالتعب وخرب واهسي بالدراسه لهالسبب بس انتي تختلفين
اعرف ظروفكم صعبه بس عندج مقدام كاسر ظهره حتى يوصلكم ويشوفكم مرتاحين
ورتيل مساعدته وهم دتشتغل خياطه ومطلعه شوية مصرف وياه يعني انتي من تشوفين تعبهم لازم يگون عندج اصرار ان تكملين وتوصلين وتحققين حلمج وحلمهم
حره... لتعبين نفسج بالكلام اكثر مثل شعورج واحساسج بتعب بيبيتج وان لازم تساعديها
اني هم احس هيج لازم اساعد اخواني مااريد اكون حمل ثگيل عليهم
تدرين حياة مرات مقدام من يطلع من البيت واحنا نايمين ومنحس بطلعته ويطلع بلا ريوگ وهو يتأخر يلا يرجع من شغله
تدرين عمران يگول يبقى بلا اكل ومايشتري ولا يصرف فلس تدرين ليش
يڪلها هالفلوس تفيد خواتي بشي يحتاجنها اكثر من احتياج بطني
عمران مره بالصدفه فلتها گدام رتيل ولو لا عمران احنا مندري بأخونا شكد دايتعذب في سبيل يوفرلنا النحتاجه
لان من جان يرجع وتحضرله رتيل الاكل يگعد ياكل بشراهه رتيل داائما تسأله اذا هو ياكل بره او لا
جان جوابه دائما بأي اكل من اجوع وطلع جوابه جذاب بس حتى منقلق وننقهر ميگللنا
حياة... والله ماادري حره ماادري شأگلج بس الي اريده منج تهتمين بدراستج لخاطر تعب مقدام مو الاحد غيره...
حره... سكتت مجاوبتها هي لمت العجينه وگامت دثرتها حتى تختمر بسرعه
اندگت باب البره فتحته بيبي لان هي بالحمام دتغسل شيلتها
طبت سمرا من شافتنا ضحكت...
سمرا.. هاشلونجن يحلوات... گالتها بأبتسامه
حره.. الحمدلله انتي شلونج..
حياة... اذا انتي بخير نحنا بخير
سمرا... دومجن ان شاءالله... حياة شوفي شجبتلج.. گالتها وهي شايله كارتونا حجمها زغير وتهز بيها بإيدها
حياة... شنو...؟
سمرا... موبايل.. اليوم رحت اشتري لان البارحه موبايلي وگع عجبني اجيب ثنين نفس النوع ونفس الون الي والج
حره.. حياة صفنت عليها شويه وگالت...
حياة... سمرا مو گتلج بعد لتجيبين شي انتي بهايه الطريقه دتحرجيني...
سمرا... ليش احرجج..؟ گالتها وهي تنزل ايدها وتباوع لحياة بلون باهت...
حياة... دا انحرج لان من التقيت بيج الى الان وانتي هوايه تقدميلي اشياء واني ولا مره گدرت اقدملج شي... گالتها وهي تفرك اديها بتوتر وتباوع للگاع
سمرا... انجبي لتحجين هيج احنا اخوات ومبينا هالرسميات وهالاشياء وبعدين اني اعرف وضعج ومقدرته وان شاءالله من يتحسن وضعج المادي اگوم اني اسحلج من كصيبتج واخذج للسوگ واشتري الي اريده ع حسابج... گالتها وهي مبتسمه
حياة سكتت خجلانه.. تقدمت عليها حضنتها وحجت بغصه مجروحه..
... حياة تدرين ان انتي احلى هديه اجتني بحياتي كلها..؟
تدرين رغم قهري من ابويا ورغم زعلي وشمئزازي منه بس اني ممنونه منه بشغله وحده وهي وجودج لهايه الحياة...
عشت عمري اتحسر ع الاخت من اشوف صديقاتي العندهن اخوات واشوف علاقتهن بأخواتهن رغم هنا ميمتلكن الي امتلكه لا عندهن بيت كبير ولا سياره خاصه ولا مساعدات بس حياتهن حلوه بلمتهن
عكسي اني ظاهري فخفخه وكله من الغالي والماركات بس من ارجع للبيت اختنگ واحس روحي عايشه بسجن مو قصر
بس من لگيتج تغيير الوضع گمت اجي يمج وابقى اليوم كله نايمه على گلبج حتى لو بيوم ضجتي مني مراح اعوفج
وتدرين اني هسه وحيده بس من اكون وياج لو ويه رشم احس بالسعاده والاكتفاء
ابويه عنده شغله وتخطيطاته وسمعته اهم. من بنته وعائلته
اخواني يفرفرون من الصبح لليل يلا يرجعون
وامي تلبس منا تطلع منا حتى مبيوم سألتني اذا اني مرتاحه بحياتي او عندي شي خافيته عليها
حره... تحجي بألم صوتها مخنوگ والرجفه معتليته حجت بيبي بهيه
بهيه... مابيها شي يمه حياة واذا جابتلج هي اخيتج مو غريبه وحبت تفرحج وتشاركج الفرحه...
حره... حياة ابتسمت اخذته منها موبايل لمس شكله حلو لونه وردي نفس لون سمرا
... ضليت مبتسمه علاقتهن حلوه وطيبه وسمرا شكلها حلو وبريئ والحلو بيها
بسرعه تندمج ويه الواحد وتاخذ عليه تماشت ويه وضعنا وصارت فاهمه عيشتنه
دائما تگول لحياة... ليش عايشه هنا وانتي مكانج بقصر ليش مترحين وياي وتسكنين هنا ببيتنا وابوي غصب عنه يتقبلج
واصلا مو مهم اذا تقبلج او لا بس المهم انتي الج حقه يمه وتگدرين تاخذيه من عيونه
حياة... لا هنا مرتاحه هنا بيتي واماني وابوي الي تخله عني من جنت بأمس الحاجه اله
مااحتاجه هسه وبعدين اني حتى بوجودي مااريده يعرف خليني عايشه حياتي بهدوء وبس حره وبيبي وانتي بيها
مااريد دخيل يدمرها ويعكرها عليه
حره... سمرا سكتت ضلينا للعصر كلش اجه رشم على سمرا ودعناها واخذها وراح
شلت الكلاصات مال الببسي اخذتهن غسلتهن ورجعت گعدت اجت حياة مددت بالگاع وحطت راسها بحضني...
حره.. حياة..
حياة... همم
حره... ليش مترحين هناك تسكنين وترتاحين احس الج من هالتعب...
حياة... حره اني خايفه لان الانسان الظالم كلشي يسوي
ومثل منگولها بالعاميه
المايخاف من الله ينخاف منه
وهذا الي يتسمه ابوي ظالم وواصل ومعروف بالدوله اني منو حتى اروح واخرب عليه سمعته
هذا انسان اناني وحقير عنده استعداد يسحگني برجله ويمشي عليه دون ميرفله جفن.
حره... سكتت كلامها صح ومقنع حيل اذا هو تركها كل هالسنين وحسب ماگال رشم هو يتوسط لمجرمين ويطلعهم شراح نگدر نترجه من واحد مثله
لعبت بشعرها وشويه ورجعت لبيتنا گعدت اقره او بالاحر اجبر روحي على القرايه..
مرت هالسنه بشكل عتيادي امتحنت الوزاري واليوم النتيجه واني گاعده وحاطه ايد على ايد مأيسه من نجاحي
مقدام راح يجيب الشهاده شويه وطب باوعلي بغضب وهو عاقج حاجبه...
... هاي شنو حره..؟
.. شنو.. گلتها واني اسحب الشهاده منه ما شاءالله باوعتلها وممصدگه هاي شهادتي
الحمدلله مكمله بس بالرياضيات ماخذه 48 اما الباقي ناجحه بيه بس بالدفرات
واجه رفع قرار والحمدلله القرار شملني وطلعت من الثالث بالدفرات وخلصت منه
باوعت لمقدام بفرح.. هاي صدك شهادتي..؟
مقدام... وتسألين وفوگاها فرحانه لج انتي شنو من بشر... گالها وهو عاقج حاجبه ويهز بإيده
حره... يااا مقدام اني توقعت نفسي راسبه غير هسه المفروض اروح اصلي ركعتين شكر لوجه الله ع هالدرجات...!
غمني بأديه وهز ايده وطلع رمشت بعيوني متفاجأه التفتت لرتيل تباوعلي وتهز راسها بأسف...
رفعت شهادتي بوستها حيل ورحت للغرفه واني اضحك مكيفه...
مشت سنة 2015 وطبينه بسنة 2016 والوضع نفسه رجعت اطبخ للعالم رغم مقدام يعارض وميقبل
بس اني مصره اكمل وامشي بشغلي خلص لازم اساعدهم كبرت اني..
مروه كبرت وامي گامت تطلعها وياها وتلبسها احلى لبس
بيوم ضليت گاعده للفجر مجايني نوم اندگت الباب بقوه
مقدام دايصلي كمل صلاته سلم وگام اني متمدده بفراشي
ورتيل گامت وره مقدام شويه وطب سألته رتيل
... منو هذا..؟
مقدام... هذا عمران
رتيل... شيريد باهالوقت
... اجه يسألني اذا باجر راح اودي حوراء واختها للمحاضرات لو لا.. گالها وراح يبدل
گمت وراهم
رتيل... ليش شيريد
مقدام... يگول لگيت شغل بالديوانيه عاد نروح ونحصللنا شكم فلس اني وياك والولد شتگول
اني گتله يلا علواه
حره... رتيل تفتر وراه وهي لابسه ازار الصلاه والسبحه بإيدها وتستجوب بيه عالشغل وهو يجاوبها بهدوء
گتله... شكم يوم تضل هناك
مقدام... لا ان شاءالله لليل ارجع ماابات هناك
حره.. گمت سويت ريوگ وگعدنا تريكنا رغم مقدام مستعجل بس رتيل مخلته يروح الايتريگ
صار الصبح وامي كالعاده طلعت ومارجعت غير للظهر طبت لغرفتها ونامت
رتيل اليوم عرس صديقتها بشره وراحتلها للعصر اني اخذت ملابسي وطبيت للحمام اسبح
شويه واندگت الباب انفتحت باب غرفة امي الظاهر طلعت تشوف منو
ثواني وسمعت اصوات صديقات امي وصوت امي وعي تگوللهن
... تفضلن تفضلن
وحده منهن گالتلها... جنتي نايمه ولج
اميره... اي والله هاي توني گعدت تفضلن تعالن اكعدن
البنيه گلتلها... لا منگدر نكعد تعالي ويانا معزومه ع العشا بمطعم..**ٌ
اميره... هااا حلو لعد راح اجيب بنات وياي
... يلا منتظريج بره بالسياره..
اميره... دكعدي هنا شويه
.. لالا راح انتضرج بره لتتأخرين
حره... سمعت اصواتهن ابتعدن اني داابدل سمعت امي صاحت ع مروه وسالي
اميره... يلا بدلن دا اخذجن ويايه للمطعم
حره... فتحت باب الحمام طلعت شافتني
اميره... هاا انتي هناا
حره.. اي
اميره.. خوش
حره.. طبت دتبدل هي ومروه.. رحت عليها گتلها... يمه وين رايحين
اميره... دا اروح للمطعم
حره... الله اخذيني وياج
ااميره... هاا لا مو مااگدر
حره... ليش.. گلتها واني اباوع عليها بترجي
اميره... مو ماعندج ملابس حلوه ع غير مره ان شاءالله اخذج
حره... لا ليش عندي بنطلون وقميص حلوات مبيهن شي
اميره... لا يمعوده جنج مجديه بيهن.. .
حره... حيل انقهرت وهالكلمه حزت بداخلي وجهي صار احمر عفتها ورحت امشط
شلت المشط وكعدت امشط بشعري وشفافي يرجفن قهر ع الم على احساس مر وصعب حيل
باوعت سالي داتبدل اجت عليه گالت... شنو مترحين ويانا
حره... لا
سالي... يااا ليش
حره... مجاوبتها اني بطبيعتي من اضوج اسكت حتى لا ابجي ولا احد يحس بيه
سالي... يلا مو مشكله اني اجيبلج وياي اكل
واذا اضطريت اقسم من اكلي واضملج
حره... لا كلشي مااريد بس انتي اكلي زين
ضحكت سالي وطلعت ضليت گاعده بمكاني وگلبي يرجف
شويه واجت امي مثل الي حست انها ضوجتني او جرحتني بكلامها
گالت... حبيبتي على غير مره اخذج خوش
حره.. ماشي
اميره... اني والله اريد اخذج وياي بس مو مقدام يجي بليل وگال سوولي عشى ورتيل ماهيه وانتي طبخج طيب يخبل
حره.. تمام... گلتها بهدوء عكس براكين گلبي التفور
كملن وامي اخذتهن وطلعن اني فتحت باب الحمام
طبيت وسديت الباب ورايه كعدت كرفصت على نفسي وحسيت گلبي لهنا وانفجر...
بجيت بوجع
وبألم يذبح.... نهاية البارت...
يتبع
مشاهده ممتعه
لتنسون المتابعه والتصويت
والاهم شاركوني ارائكم للقصه
جيت رشم راح تفتح ابواب ع البنات
وياترى منو حيكونون ضحية هالابواب...
وهذا السكرين غشش الكم
دمتم بخير احبتي 💕