«الحلقـــــه الاولى »
روايـــــــــة
«هل كانَ حلماً...؟»
( ارواح ــ مُهشَمه )
بقلمي... ... لؤلؤة _البحار ...
ــــــــــــــــــــــــــــــــــ
طلع من الردهه رافع الموبايل بإيده
الترجف
يگلب بالارقام يحاول يطلع رقم الطبيب الامريكي
حتى يتصل بيه التفت ع صوت انين مكتوم ومخنوگ
شافه گاعد ع الارض ايد حاطها ع حلگه يمنع صوت بكائه ان يطلع
والايد الثانيه يضرب بيها الارض بقوه
ماهتم للمنضر الگدامه وشافه لان جان كل همه يتصل بالطبيب
عسا وان يلگه علاج للجريحه النايمه تأن متألمه داخل ردهة الحروق
اتصل ع الطبيب
بس قطع اتصاله صوت اخو المخنوگ...
.. يول الحگ امي حالتها تدهورت
راح يركض ويه اخو وصل لردهة الطوارئ فتح الباب وراح عليها
باوع عليها
دمعه خطفت من عيونه ونزلت رفع ايده ومسحها بكم قميصه
نزل راسه وطبع بوسه خفيفه ع جبينها...
وجهه اصفر.. ماصارلها غير كم شهر من طابت من الخبيث وفرحو بيها
بس للاسف فرحتهم ماتمت
گعد ع الكرسي لگدامه وحط راسه بين اديه يحاول يسكن جرحه الينزف بس مو گادر ولا عارف شلون
يسكنه
رفع راسه للسماء وصاح بصوت واهن... ياااااااالله اااااارحمني دخيييلك
گام من مكانه ورجع لردهة الحروق وگف بباب الردهة لان ممنوع الدخول حتى المريضه متتلوث
دقايق معدودات ويه اذان الفجر صارت حركه مريبه بردهة الحروق باوع من شباك الغرفه
الدكتور متوتر ووضعه متخربط ويحجي ويه الممرضين الانخبصو وگامو واحد يتلاطم بالثاني
التوتر بان ع ملامحه الرجوليه الخوف دب بگلبه وبده الثگل يعتلي جسمه
شنو الصار وليش انخبصو
يريد يعرف بس مايگدر يدخل خوف ع المريضه لاجسمها يتلوث وتموت
لان الحروق نسبتها 65٪ واقل تلوث يقتل المريضه
انفتح باب الردهه طلع الطبيب وگف گباله نزل راسه بأسف ونطق... للاسف المريضه توفت جسمها تسمم لان الحروق بليغه وقويه
:- هالخبر نزل عليه مثل الصاعقه ثنى ع ركبه حط اديه ع راسه وصرخ بصوت مكتوم
بكاء وصريخ الاخوه فجع المستشفى بأكملها
للصبح اخذو الجنازه ولازم يقومون بمراسيم الدفن
من بعد ماصلو الصلاه ع الميت وكملو مراسيم الدفن
واگف بحزن ومنزل راسه وعيونه متركزه على قبرها
يسمع صوت المُعزين الوراه يحجون
:- حتى الماحسابيلو حساب اذا كاتبو الله يصير غصب عن كل العباد
الثاني يرد :- لا حول ولاقوة الا بالله رفيجات من المهد لـ اللحد
رجع الاول گال :- دحگ التعب بوجهه الضابط عثمان
رفع راسه بهدوء باوع عالشخص المقابيله النقيب كسار ووياه نفس الشخص الشافه بالمستشفى الي اسمه الضابط عثمان
تقدم النقيب كسار ووياه الضابط عثمان وگفو مقابيله
تكلم النقيب كسار ...
:- سيدي اعرفك على الضابط عثمان
الضابط عثمان رفع ايده حتى يتصافح وياه
رفع ايده المزينها الوشم لحتى يرد السلام
تكلم النقيب كسار ... ضابط عثمان اقدملك الثعلب
عثمان :- حبيبي والله
الثعلب :- عصر ايده المصافح بيها ايد الضابط عثمان وگال
... والله لو هالحريجه موش من الله لخلي النار تاكل نص عيونو ...
________________________
حره :- افكار الشر اتربعت براسي وانقبض گلبي اكثر بسبب جيرانهم
اخر شي اتصلت واني ابجي وادعي الله تجاوب واسمع صوتها
بس تخبلت من اتصلت والموبايل گلي
(الجهاز مغلق) ضليت افتر بالبيت مثل المخبله
مااعرف شسوي وشتصرف لليل ع نفس القهر رتيل تروح تنضف وترجع عليه تريد تفهم شي مني
بس اني فكري وبالي كله يم حياة باوعت للساعه 11ونص رفعت الموبايل طلعت رقمها
باوعت عليه واني ابجي وادعي.. يارب تجاوب يارب يدگ گلبي راح يوكف من الخوف عليها
دست اتصال شويه ورن رنه ثنين بالثالثه انفتح خط
... هاحره... گالتها بصوت واهن وتعبان
حره... وينج حياة ليش جهازج مغلق ليش متجاوبين من اتصل ليش خليتيني عايشه برعب واشكال الافكار اجتت ببالي... گلتها بدموع والشهگه لزمتني
حياة... مؤمن استشهد... گالتها بشهكه والحزن طاغي ع صوتها
حره... سكتت ثواني.. مؤمن خطيبج! گلتها بصدمه.
حياة... اي استشهد قتلو الاوغاد اخذو مني من بعد ماگلبي تعلق بيه وحبه
اخذو من بعد ماحسيته اماني وسندي
من بعد ماحسيت اكو انسان يحبني وراح يكونلي سند وظهر انتجي عليه بتعبي
حره التنظيم اخذو مني مؤمن الجان يحلم بيوم زواجنا ومنتظره لحضه بلحضه
اااااخ تمنيتج يمي واشكيلج حالي تمنيتج حاضره وتاخذيني لحضني محتاجتج حيل حره مخنوگه حيل
حره... اسمع بكلامها وگلبي يوجعني عيوني تجري على خنگتها وكلامها التحجيه بوجع طاغي
ما اعرف شسوي غير اني بجيت وياها شأگدر اگوللها او اواسيها؟
ضليت ابجي وهي تبجي ع الخط حاولت اصبرها
حره ... تلتقين بيه بالجنه ان شاءالله... گلتها لحتى اصبرها بس منو يصبر ع الفراق بالرغم ندري بيهم بالجنه بس شي صعب ننتضر نموت حتى نشوفهم
بيومها رتيل ضلت تستفسر مني ليش باجيه گتلها
... خطيب حياة استشهد
رتيل... الله يرحمه هنياله نال الشهاده... جرت نفس بقوه وگالت بحزن... والله يصبر حياة وينطيها من صبر يعقوب مسكينه هالبنيه مامكتوبتلها الراحه
حره ... گضيت الليل كله ابجي والحزن مغيم عليه والاذاني اكثر بعد المسافه بيني وبين حياة
يمكن لو هي هنا وصار الي صار جان ماحزنت هالگد لان هي يمي واواسيها وابعد الحزن عنها
صارت الايام تمر علينا بشكل عادي كل يوم جديد جان بيه حسره ع الي مر من عمرنا واحنا مشايفين بيه شي حلو
بيوم گعدت بدلت ولبست زي المدرسه القميص الابيض والصدريه السوده مشطت شعري المدرج
اخذت الجنطه ولبست حذائي وطلعت امشي لنهاية الفرع انتظر سالي هناك
سالي تتأخر يلا تطلع واذا ضليت منتظرتها بالبيت نتلاطش اني وياها
اني خلگي ضيگ وهي خلگها طويل فلازم نتلاطش فأطلع بنهاية الفرع انتظرها بمكان لقائي السابق ويه حياة
ونفس كل يوم من اوگف بهذا المكان شكو هم بالدنيا يتگدر بگلبي واتذكر طفولتنا ولقائاتنا اني وحياة
نزلت عيوني ع الگاع اباوع بلكي الگه اثر من ايام طفولتنا
ابتسمت بحزن
رفعت راسي شفت سياره بيضه
وگفت يم فرعنا انفتح باب السياره
نزل منها واحد
شكله شيك ومبين من اهل الترف من شكله لابس بنطلون جينز اسود ووياه قميص ابيض وفوگه ستره سوده
ولابس نظارات مشى شويه شاف جيرانه ابو وسام رجال جبير بالعمر
وگف يمه و سأله شي
ما اسمعت عن شنو سأله لان المسافه شويه بعيده عني وهوسة اطفال الفرع وعياطهم مخلوني اسمع شي
ضل بالي يمهم عجبني لان شكله حلو واني دا امر بفترة مراهقه لو اشوف جريدي انعجب بيه
ضليت اباوع عليه بتركيز واراقبه الى ان اجت سالي گالت
سالي ... يلا حره امشي
حره ... درت وجهي خلينا ومشينا اني وسالي رحنا للمدرسه گوه عليه مداومه وكارهه الدراسه كلش
خلصنه الدروس وصار وقت الخروج للاهل طلعت لگيت سالي منتظرتني بباب المدرسه
ابتسمت رحت عليها... تأخرت عليج د
سالي... اي اجيت اعوفج وامشي بس خفت يلاگيني جلب ويمرعدني
حره... طاحضج يالمطي هسه بالجذب گولي عادي مصار شي واذا تأخرتي
وبعدين اني شتأخرت هنه كلهن خمس ثوان... حجيتها واني امشي
سالي... وليش اجذب عليج هاي الخمس ثواني ثمينه عندي كلش
حره... اممم امشي ام وقت الثمين ليطلعلج الجلب ويمرعدج
اني جنت امشي مسافه عنها من گتلها هيج اجتي تركض وگامت تمشي بمستواي...
ضحكت ع شكلها... رجعنا للبيت ومثل كل يوم نغسل ونبدل وبعدين نصلي وره رتيل
بين ميجي مقدام ونصب الغده ونكعد نتغده ومروه تفتر داير مدايرنه تلعب وتهوس لان رتيل مغديتها قبل لنجي
من نكمل الغده نساعد رتيل شويه بشغل البيت لان متلحگ خياط ومسؤولية مروه
لان امي ع نفس عادتها تطلع من الصبح مارجع غير لليل وكل مسؤوليه اتجاهنا ماعدها
وره يومين اتصلت ع حياة اسأل عن اخبارها بهاليومين ما اتصل عليها هوايه مره باليوم لان الى الان يجوها يعزوها فمتگدر تتواصل ويايه ع طول
العصر گاعده بالاستقبال اوكل بمروه ورتيل بالهول تخيط انفتح باب البيت رفعت راسي باوعت امي طبت
ماهتميت رجعت خبطت مرگ عالتمن وشلت بالخاشوگه وحطيته بحلگ مروه
رجعت دااخبط بعد واشيل بس فزيت مخروعه على شرگة مروه اباوعلها وجهه ازرگ وبالگوة تجر النفس وبس تگح
تخبلت لزمتها ادگ على ضهرها وهي ع نفس حطتها اجت رتيل ترگض اخذتها من ايدي وشربتها مي ورجعت تدگلها على ضهرها ع الخفيف
يلا شويه جرت نفس گعدت بالگاع وايدي على گلبي مهبوطه لو لا ستر الله جان راحت مني اختي
التفتت ع صياح امي... ادريييي ثوووووله خو ماااثوله تجيبين وتدحسين بحلكها انطيها مجال
لو اموتتها بلا شحصل منج اني
حره :- ضليت باهته وعيوني صافنه عليها ماا گدرت انطق واگول اي شي لان الهبطه لسه بيه
رتيل گعدت مروه عالگاع شالت گلاص مي جابته واجت كعدت يمي قربت الكلاص من حلگي وگالت بحده موجهه كلامها لامي
... قدر وصار قابل هي متعمده تغصصها خلف الله عليها من گعدت توكلها وتهتم بيها
اذا همه الاهل مخلفين وعايفين ومايدرون بزرهم وين ماوين ولا قايمين بمسؤولياتهم المفروض تلومين نفسج مو گاعده تلومين هايه الطفله
گالتها وهي تگوم راحت ثنت يم صينية الاكل مدت ايدها وگامت تلم التمن التطشر بالگاع
اميره... اگول شنو انتي امها لو اني مافهمت شو حسره عليه احاسب وحده منهن توگفيلي خنجر انتي وهذاك الافندي
رتيل... اي طبعا اوگفلج خنجر اذا انتي متدرين وين الله خلقنا وبس بوقت الغلط تجين ترگضين تردين تحاسبيهن
لا عيني اني مااقبل بهالشي اني ربيتهن فأني الاحاسبهن ع غلطهن مااسمح لاي كائن من يكون يحاسبهن خوش هالحجي
حره... رتيل اخذت مروه وشالت الصينيه وراحت اني ع صفنتي وذهولي وامي هزت بإيدها وراحت لغرفتها طبت ورگعت الباب وراها بقوه
گمت طلعت من الاستقبال لبست نعالي وطلعت للفرع اتمشى مقهوره وضايجه حيل اني ابد مو متقصده اخليها تغص ليش امي هيج. حجت عليه...
تنهدت بقهر رفعت راسي شفت نفس الشخص واگف وهم دايسأل مهتميت لان ضايجه و مقهوره
رجعت للبيت وكعدت ادرس اني وسالي ثاني يوم لبست نعالي دا اروح اجيب تايت لرتيل
فتحت الباب طلعت وسديتها وراي رحت امشي للمحل اشتريت تايت ورجعت
داامشي بس وگفت مصدومه من شفته وگف گدامي وسلم عليه فتحت عيوني متفاجأه هذا الصاك شعنده يمي... !!
... السلام عليكم ممكن سوؤال
حره...وعليكم السلام تفضل... گلته بخجل
... بس اسألج ع بنيه بلكي تعرفيها هي اقاربي
حره... اي اسأل
... اسمها ازهار مشعل ساكنه بهالحي تعرفيها...؟
حره ... لا والله ماا اعرف بنت بهالاسم ولا اكو بحيينا بنت بهالاسم
...زين خلي اوصفها الج بلكي تعرفيها او شايفتها او لامحتها على الاقل...
حره... اي اوصف
... بنت بيضه عيونها ملونه وقصيره..
حره... صفنت شويه.. هزبت راسي... لا والله ما اعرف بنت اسمها ازهار بهيج مواصفات...
تنهد بحزن فرك عيونه بقهر باوع عليه ابتسم وگال..
... تمام شكرا تعبتج وياي
حره... لا العفو...
راح يمشي واني صافنه عليه منو هالبنت وليش يدور عليها واذا هي قريبته مثل ميگول ليش ميتصل عليها او ياخذ عنوانها... !
رجعت للبيت انطيت التايت الرتيل ورجعت للاستقبال اقره
استمرينا اني وحياة بالتواصل كل يوم ورجعنا مثل قبل وهي حالتها احسن من قبل بهوايه
نست او تحاول تتناسه خطيبها الشهيد بهايه الفتره حياة گامت تشكيلي انها تعاني بسبب جيرانها
الي مستمرين يتجاوزون واكثر شي جانو يشمرون بطالة الخمر على حايطهم
حره... انتو ليش متنتقلون ليش لحد هسه گاعدين متخافن يشوولجن شي ويأذوجن
حياة... اووف يحره قررنا ننتقل من زمان بس الفلوس هي المنعتنا منگدر لان معدنا ولا فلس
زائد هذا كله خالي الي خسر بشغله وضل حاير بمرته عاد جاب مرته الحامل يمنه
وسافر مع ابنه يدبر يدبر عيشته وبعدين يرجع وهي هالفتره راح تبقى يمنه
حره... حياة امانه دربالج على نفسج ولتطلعون بوقت متأخر ابد والج ومتبتعدين عنهم ليرحون يسوولجن شي فدوا نتبهن
حياة... لتخافين حره مراح يصيبنا غير الكاتبه الله النا وبعدين رب العالمين الحافظ وهو ان شاءالله يحفظنه من كل سوء
حره... امين يارب الله يحفظكم ويرزقكم حتى تگدورن تنتقلون وتخلصون من سوء الجيران
حياة... امين يارب
حره... ضلينه لفتره نتواصل حياة الوضع هادئ يمها وماكو اخبار غير عن جيرانها وازعاجهم
لدرجة حياة بطلت تطلع بسبب عيونهم الزايغه حتى اذا يردون مسواگ حياة تگول ادز طفل من الشارع يجيبلنا
بليله اتصلت بيا مقهوره... لج خبلوني هذوله لج حره وصلت بيهم يگعدون يم الباب يدخنون واصواتهم عاليه ويضلون لوقت متأخر من الليل
حره... عزااا حياة بديت اقلق عليج فدوا حاولي تقنعين بيبي بهيه وترجعون لهنا اامن الكم
حياة... هو احنا هم نفكر نريد نرجع باعي اني تعرفين بيه طبع اتصنت وتعرفين سطحنا متسلط ع سطح جوارينا المزعجين
فأني دائما اصعد اتصنت عليهم واسمع كلامهم كله و.... انقطع الاتصال
حره... نزلت الموبايل من اذني بقهر المجاني خلص وملحگت افهم من حياة شبيهم هذول المزعجين
للفجر گاعده وافكر بيها خايفه عليها هذوله الجواريين مو راحه خاف يسون بيها شي
الافكار تربعت براسي وگامت اشكال توهملي بخصوص حياة اخير شي نفضت راسي ونمت من القهر
ثاني يوم گعدت ع اعصابي اريد مقدام يشد رصيد حتى اتصل بيها وتكملي الكلام وشنو سمعتهم يگولون
لليل اجه مقدام اني واگفتله بباب الهول اول مطب حجيت
... مقدام شديت رصيد..؟
مقدام... اي شديت فلوس شغلي گامن يخلصن على الارصده من وراج
حره... ميخالف مقدام تحملني بس هالفتره والله بالي مشوش على حياة وخايفه عليها
مقدام.. ليش شبيها..؟ گالها وهو يگعد..
رحت گعدت يمه وحجيت بقلق واضح ...
عندها جواريين مزعجين وهي خايفه منهم هوايه ودائما تسمعهم يحجون بشي اسمه القاعده او التنظيم وحتى خمر يشربون
فتح عيونه مصدوم عقج حواجبه صفن بعيوني بلع ريگه وگال بحيره
... ليش ميرحعن للعاصمه ليش باقيات هناك
... هنه هم يفكرن بالرجعه بس مااعرف شوكت..
مقدام... اني اتصل بـ بيبي بهيه واقنعها بالرجعه لهنا افضل الها ولحياة الگعده هناك مو من صالحهن ابد
حره... اي والله ياريت مقدام... ابتسم وطبطب على كتفي سوالي الخدمه اخذت الموبايل وگمت طلعت بره
طلعت رقمها واتصلت رن شويه واجاني صوتها الخايف
تفاجئت... شصاير حياة شبيه صوتج انتي بخير...؟
حياة ... ماكو شي بخير وضع الموصل كل يوم يتأزم واجرامات تنظيم القاعده صار واضح والي يخوف اكثر...
جرت نفس وسكتت
حره... شكو ولج احجي.. حجيتها بخوف
حياة... هذول الزمايل (قصدها ع جيرانها) سمعتهم يمجدون ويمدحون بالقاعده
گالت بعصبيه... اني تفلت من السطح عليهم بس التفله ماوگعت ع روسهم خرررب حضي
حره... الخوف دب بگلبي اكثر... حياة عفيه قنعي بيبي وتعاي بقائج بالموصل ميرهم
قنعي بيبي وتعالي يمنا احسن والله
حياة... وهو هذا الي حيصير... يلا حره حا اروح بيبي تصيحني
انتبهي لنفسج واهتمي بدراستج
حره... ماشي حبيبتي روحي مع السلامه
... مع السلامه
راحت حياة وهذا كان اخر اتصال منها بنص سنة ال2014 اتصل على حياة وماكو جواب منها نهائيا
لا مسج منها يطمني ولا سامعه صوتها حتى رتيل ومقدام وسالي من شافوني خايفه ومتوتره خافو ويايه
والزادني رعب اوضاع الموصل هايه الفتره متطمن ابد.. الخوف ملى گلبي لان اعرف جيرانهم حيوانات مو بشر
ايام وليالي تمر عليه اتصل عليه على مدار الاربع وعشرين ساعه وماكو منها اي خبر يريح گلبي
ومن الخوف والتفكير قطعت الاكل والشرب والكوابييس ملاحقتني ومدا تعوفني
رتيل تحاول تهديني وتطمني بس هيهات مگدرت اهدء ابد
لحد شهر السادس اني ع هالحال ماكو اي خبر من حياة او عنها حاولت اتصل ببيبي
وحتى صديقه الها بالموصل جانت تزورها ومره اتصلت عليه منها وحفظت رقمها يمي
اتصلت وماكو اي خبر يطلعلي خارج التغطيه حاولت اتصل بخالها بس مغير خطه وهو اساسا مسافر يعني مراح يفيدني بشي
يوم 9 بالشهر اجه مقدام طب للبيت مخطوف لون وجهه انتبهت رتيل عليه بس اني منتبهت
بالي مو وياه كل تفكيري بحياة واني صارت روحي بيها انعزلت عن كلشي بس حاطه صورتها وابجي
بهاليوم رتيل ضلت تسأل وتلح ع مقدام شمو شصاير بس هو ميجاوبها بس لاحضته ممرتاح يحوص يمشي يطلع ويرجع للبيت
اخر شي صاح رتيل لبره شويه وسمعت رتيل شهگت وگالت
... عزاااا بعييني
حره... بسرعه طلعت اركض گتلها... شكوووو
مقدام ارتبك وبلع ريگ متوتر گال... هااا مو صديقي سوه حادث... گالها بصوت متقطع
سكتت... وشلون صار هسه
مقدام... لا الحمدلله احسن
حره... سكتت اباوعله مقهور على صديقه الله يشافيه
باوعت لرتيل حالها مو احسن من مقدام گامت تفتر بالبيت وبالها مو وياها
للعصر اندگت الباب... طلعت اركض فتحتها بفرح عسا وان تطلع حياة. بس للاسف طلعت جيرانا
اول مفتحت الباب بجت وگالت... ولج مصييييبه الموووصل سقطت
ولكم متدرون التنظيم سيطر ع الموصل
وماكو خبر عنهم ولكم يگولون هواي شهداء
تبجي وتحجي
اني مستوعبت گمت اصرخ عليها... شتقصدييييين..
... ولج التنظيم داعش سيطر على الموصل وهواي عوائل تهجرت ومنهم انقتلو
اليوم اعلنو سقوط الموصل ماشفتي الاخبار الدنيا انگلبت
حره... رگضت فتحت التلفزيون وايدي ترجف وابجي رتيل گالت
رتيل... شسويتي يا خاله
واحت تهديني واني ادور ع الاخبار وميگلب الريموند حسيت الدنيا سودت بوجهي فتحته ع قناة الاخبار
شفت مكتوب بالاخبار... انو الدوله تؤكد سقوط الموصل واطراف نينوى بيد مسلحون الدوله الاسلاميه في الشام والعراق
هنا ستوعبت... ضليت ابجي و اصرخ وكل الي ببالي حياة صارلها شي
من اسوء الايام الي عشتها هاليوم مستحيل انساه لحضه بلحضه بذاكرتي..
جان يوم اسود جنت اشوف الموت بين حياة عايشه ويمكن اسيره او جريحه او احد يأذيها وبين انها ممكن انقتلت
مجان سهل ابد شلون مر هاليوم ماادري
الساعه صارت سنه من عمري حبست نفسي بالغرفه وبس ابجي واقره قرءان
لحد ال4 الصبح اني مارفلي جفن ولا نمت ولا ارتاحيت
لما صار الصبح هم رجعت فتحت التلفزيون عسى الگه الي يفيدني درت ع الاخبار
شفت المالكي طالع ويحجي يأكد ان الموصل سقطت
و هالشي زاد من خوفي وهلعي
ايام واني على هالحال بين القرءان والتلفزيون
اضافه عليها المرض الي صابني
يوم 12 مجزرة سبايكر من شفت الاخبار وشفت المجزره انجنيت
متت خوف وبجي ومن القهر نقلوني مستشفى
لثاني يوم اني بالمستشفى ضغطي مصفر
لان لا اكل ولاشرب
واني بالمستشفى ودموعي تدير وروحي شايغه ع حياة وع الي صار سمعت الممرضات يحجن بينهن
وحده تگولها... اني اخوي سجل
والثانيه تگولها... ابويه هم سجل وامي ماتت قهر
الممرضه تبجي والكل متحسر ومقهور وسبايكر ماكو احد مذكرها بالمستشفى..
حجت الممرضه عن الخطه والجهاد الكفائي متحملت سألت الممرضه
... شنو الي صار
الممرضه... المرجعيه انطت الجهاد الكفائي
حره... شلون يعني؟
رتيل... يعني اوجبت حمل السلاح للي يستحقون حتى يدافعون عن الموصل
يعني مثلا اي شخص يگدر يحمل السلاح
من واجبه يروح ويدافع بساحة القتال بالموصل
ومن ينقتل ينحسب شهيد سكتت صفنت شويه ورحعت كملت... والعجيب الالاف شاركو وحتى اكو اذنو بالجوامع حي على الجهاد
حره... حطت ايدها على ايدي وگالت... لتخافين كلشي حيرجع ويكون بخير بزود الابطال
حره... الالم البگلبي مينوصف حتى النفس احس حرام اتنفسه واخيتي ماا معروف عنها شي
لليل اني على بجيه وونه اديه على راسي دموعي تنزل ولساني يردد بأيات القرءان
لليل كلش طلعت من المستشفى ورجعت للبيت
بوجهي للمغسله توضيت ورحت للغرفه فتحت القرءان وگعدت عالقبله وگمت اقره
اقره ودموعي جون خدي وحركنه اقره وگلبي مخنوگ وعقلي تفتر بيه الاشياء السيئه
الي ممكن تصيب حياة او احتمال صابتها
طفولتنا وسوالفنا وكولشي حلو مرينا بيه كله بهاليوم مر ببالي على هالسجاده وگبال القبله
سديت القرءان ونزلته عالسجاده گمت من مكاني كلعت اركض على صوت مقدام
باوعتله واگف بالهول والموبايل على اذنه لازمه بإيده الترجف
لون وجهه المخطوف وبياض شفته وبلع الريگ يبسن گلبي ونشفن الدم بجسمي.... نهاية البارت
________________________
مرحبا فراشاتي شلونكم ان شاءالله بخير
طبعا دا احاول اركزلكم على صداقة حياة وحره بأدق التفاصيل
واوضحلكم طفولتهم القاسيه
على تسلسل السنين قدر الامكان
حتى متنصدمون بـ الي حيصير بسنة ال2017
وهاا قبل لا انسه
محتاجه ادمنيه لگروب الفيس بوك متفاعلات
الي تشوف نفسها وتگدر تدير الگروب ويايه تكلمني عالفيس حتى اصعدها ادمنيه
لان بصراحه ملتهيه بالقصه واحداثها وابد مدا افرغ حتى اسوي تفاعل بالگروب
وهسه حبايب لتنسون التصويت والمتابعه
واهم شي غلسو عن السحگ
قراءه ممتعه فراشاتي 🦋