«الحلقـــــه الاولى »
روايـــــــــة
«هل كانَ حلماً...؟»
( ارواح ــ مُهشَمه )
بقلمي... ... لؤلؤة _البحار ...
ــــــــــــــــــــــــــــــــــ
اجت كعدت يمي... لج لا بالعكس والله اسمائنا حلوه وبيها معنى وحره معناها ان الانسان حر
او تحرر من العبودي شي كلش حلو يعني انتي حره تخيلي جمال هالاسم
وبعدين اني وياج اسمائنا تشكل جمله
حره.. شلون؟
حياة... اني حياة ترمز للحياة سواء بالدنيا او بالاخره
وانتي حره يعني الانسان الحُر
فــ اني وانتي نكون جملة حياة حُره والجمله هايه بيها معنى يخبل
حُره... اي صدگ والله ... حجيتها بضحكه
حياة... بطلي تتأثرين بأشياء متسوى رأي العالم مو دائما مهم قناعتج بنفسج وثقتج بيها اهم من كلشي
حره... هزيت راسي بأبتسامه ومن يومها بديت احب اسمي واقتنع بيه
هذا الاسبوع الاخير لحياة يمنا وبعدها تنتقل للموصل
هذا الاسبوع ضلينه سوه النهار كله حياة يمنا ومنتفارگ بس من يجي الليل
واگضي الليل بالتفكير والدموع شلون راح اگدر اتحمل بعدها عني
شلون اذا راحت وبعد ماعندي حياة اشكيلها همومي ولا عندي حياة اگدر اشوفها بكل وقت
الا ان انام والدمعه بعيوني وگلبي مقبوض وممرتاح لروحتها ابد
بيوم بليل گاعدين بالاستقبال اني وسالي نلعب بموبايل مقدام لعبة (السنيك)
وكلساه نتعارك اني وسهر ع الموبايل هب تصيح دوري انطينياه واني اگلها لا دوري بعده ماانتهى
تگب بينا العيطه اجرها من شعرها وهي تجرني تالي تجي رتيل بالنعال تفاككنا
الا ان اخذته منه وعاطت... جيييبن انعل ابو الدنيا بعد اذا اطيتجن موبايل ادبسزيات انتن مال نعل مو مال موبايلات
اخذته منعدنه وراحت واحنا گوه لازمين ضحكتنه لاتفلت گدامها اول مطلعت من الاستقبال
طگيناها بضحكه اني وسهر ووحده تباوع للثانيه
اختفت ضحكتنه وسكتنه من سمعنه صريخ امي
گمت من مكاني طلعت ارگض رحت لغرفة امي باوعت رتيل مخبوصه حاطه جنطه زغيره وتلم بيها ملابس مال طفل
التفتت عيوني الامي لازمه بطنها وتصيح بوجع واضح ع معالم وجهه
سهر راحت عليها
وگفت يمها وگامت تمسح بدموعها
التفتت ع صوت رتيل
... سهرررر ارگضي صيحي بيبي بهيه
سهر... اي
حره... راحت سهر تركض طفرت من السياج.. ثواني ورجعت تركض وحياة وبيبي وياها
بيبي باوعت الامي و گالت... عندج ولاده يمه وجهج اصفر
باوعت لرتيل... رتيل يمه صيحي لمقدام خيجي ناخذها للمستشفى
رگضت رتيل طلعت للشارع صاحت لمقدام اجه وياها بيبي بهيه گومت ماما وسندتها ورتيل شالت جنطة الملابس وطلعن ويه مقدام
اني وسهر ضلينا بالبيت وحياة ضلت يمنا للوقت متأخر من الليل واحنا گاعدين نسولف
سهر حاطه راسها ع رجليه وغافيه وحياة گاعده گبالي مربعه وتباوع لعيوني
.. شبيج..؟
حياة... مابيه... حجتها بعبوس
حره.. ليش هيج تباعيلي
حياة... خايفه... گالتها وهي تجر نفس عميق.. خايفه مااتحمل فراگج واشتاقلج رغم اني متأگده مراح اتحمل
حره... راح تتعودين... گلتها بأبتسامه مزيفه داخلي مجروح ومقهور ومجرد فكرة ان بعد مااشوفها تذبحني
بس مالازم اخليها تحس بهالشي لازم اشجعها تروح بالنهايه هي مصيرها متعلق بمصير بيبي بهيه
وبيبي بهيه فكرتلها بالصح و بمصلحتها
راح تتعودين واني هم راح اتعود يمكن اول يومين راح نحسهن صعبات لان ممتعودات نبتعد عن بعض
بس وره اليومين راح يصير كلشي عادي وراح نتعود ع حياتنا الجديده ونماشيها
حياة... صح واحنا راح نضل ع اتصال وسمعت نوران گالت اكو خدمة رسائل مجانيه
من بيبي تشتريلي موبايل اسويها واضل اراسلج ع موبايل مقدام وانضل ننقل اخبارنا لبعض... گالتها بأبتسامه..
حره... اي وهاا من هسه اگلج ديربالج تصداقين غيري اريد اضل صديقتج الاولى والاخيره واني هم مراح اصادق غيرج اتفقنا
حياة... اتفقنا واساسا اني مراح الگه صديقه مثلج لا بالشرق ولا بالغرب... گالتها بضحكه ودموعها تنزل
حره... سكتت صافنه عليها وهي هم كذالك صفنت بعيوني وهي مبتسمه شويه وباب البره انفتح
رفعت راس سهر من ع رجلي وحطيته ع المخده حياة گامت تباوع من الشباج واني گمت وراها
باوعت طب مقدام ووراه امي ورتيل ساندتها ووراهم طبت بيبي وشايله شي جوه عباتها
تلگيناهم من الباب سلمنه وهمه طبو للغرفه مالت ماما
رتيل سندتها ونومتها ع سريرها وغطتها
وبيبي فتحت عباتها وطلعت الطفل حطته بالكاروك الجابته ماما اله
رگضنه عليه اني وحياة
نباوع للطفل يجنن ابيض حيل وعنده خدود ينگرطن
حياة... بيبي هذا ولد لو بنت... گالتها وهي تباوع للطفله بأبتسامه شاگه حلگها
بهيه... بنيه... يحفظها الباري ويرعها
حره... ضليت صافنه بيها واتأملها.. اني لو خيروني ان اجي ع هايه الدنيا لو اموت ببطن امي جان اختاريت الموت
وانتي ياترى من تكبرين هم راح يكون شعورج مثلي وهم راح تگولين لو ميته ببطن امي احسن
مقدام ... شنو راح تسموها... گالها وهو يباوع للطفله بأبتسامه
اميره... مروه راح اسميها مروه...حجتها بتعب
مقدام... الاسم جبير عليها تره
اميره... لا حلو معليك عجبني الي
حره... مقدام سكت ورتيل ضلت تباوعله واني رجعت عيوني لمروه صح الاسم جبير عليها
ثاني يوم الصبح سهر مگابله مروه وگاعده يمها ساعه تريد. تشيلها ساعه تريد تغسللها وساعه تريد تلعب بيها
ورتيل شايله سهر وتبوس بيها وتكولها... ختولي بيها زفره ومحلوه ابد لتشيليها
للظهر اجن خالاتي حتى يدارن امي
واني كمت اطلع بالنهار اروح يم حياة واظل يمها لليل يلا ارجع
وبيبي اسمهان اول متكمل شغلها تروح الامي تشوفها خاف تحتاج شي
رغم خالاتي ميعوفنها الامي ابد ضلن اسبوع يمنا وحتى الطفله محسينا بيها الان من ايد الايد
واليوم اجه اليوم الجنت حاسبتله الف حساب اندگت الباب الصبح فزيت مخروعه گمزت من فراشي وطلعت اركض اني وكفشتي
فتحت الباب باوعت حياة واگفه لابسه بنطلون وقميص للورك والشعر ضافرته
دموعها تدير ولازمه كلينس وتمسح بخشمها
بيبي واگفه يمها ولازمات جنطه زغيره بإيدهن التفتت اباوع وراهن التكسي واگف
باوعت لحياة بخوف وقلق واضح ع معالم وجهي... راح تروحين... حجيتها بشهگه
اجت عليه حضنتني وگامت تبجي قويت حضنتي عليها وگمت ابجي وياها
ابجي بقهر
بألم
يذبح
گلبي ممرتاح لروحتها
خفت تروح وبعد مااشوفها
وخفت اگللها ضلي وتضل حايره
بيني وبين بيبي بهيه
طبن للبيت وكامن يودعن بأهلي وكلنا على فد بجيه وشهگه
ضلينا متحاضنات ونبجي كالت بيبي وهي تمسح دموعها
... حنرجع يما حنرجع واجيب حياة كل فتره حتى تشوفيها وتشوفج
رتيل... هم بيوم ترجعون لو حتبيعون البيت..؟
بهيه... لا ماراح ابيعه ماعندي ملك غيره واخوي ماضامنته يمكن يرجع يسافر هو ومرته وعياله
واذا سافر بيوم اني راجعه لهنا واذا استقريت بالموصل بيوم ابيعه وماارجع
گالت اخر كلمه بغصه.. هورن التكسي بده يزمر طلعن واحنا وراهن ركبن بالتكسي واني وحياة دموعنا موگفت
گالت... اهتمي بدراستج ولاتنقطعين عني خلي كل يوم نحجي ونتراسل اخذت رقم مقدام لان بيبي حتجيبلي موبايل گالت حتى تحجين ويه البنات
مشى التكسي ومشت روحي وراه واگفه بنص الشارع الوحلها بإيدي وهي ماده راسها من السياره وتلوحلي لحد مااختفت السياره من الفرع
نزلت ايدي ورجعت رفعتها لگلبي فرگته بألم احاول اهدء نبضه المتسارع
التفتت رتيل واگفه وراي وتباوعلي بحزن
رتيل... لتخافين ان شاءالله اول متشتري موبايل تحاحيج وضلن تراسلن واعرفن احوال بعضجن
تركت رتيل ورحت للغرفه بيومها ضليت النهار كله منعزله ع نفسي ومااطيق اشوف احد
مرت اسابيع وحياة ماكو واني احس روحي ضايعه بغيابها
احس روحي مثل الابره وغرگت بأعماق البحر
بيوم اجه مقدام واني گاعده اقره طب عليه وگال
... احزري اليوم منو اتصل عليه... گالها بأبتسامه
.. كمزت من مكاني فرحانه... حياة صح...؟
... اي وگالت من ترجع للبيت گل لحره ختتصل عليه مشتاقه اسمع صوتها
... رحت ارگض عليه حضنته بفرح... اتصلي عليها مقدام فدوه اريد اسمع صوتها
... اوگفي دقيقه... طلع موبايله وهو يضحك داس بيه ارقام وضغط اتصال...
... لا تخلصين رصيدي اشتركتلج بخدمه بليل تگدرين تحجين وياها براحتح... گالها بضحكه وهو يطيني الموبايل
... اي ميخالف... گلتها بفرح.. اخذت الموبايل منه حطيته ع اذني واني افتر بالاستقبال طول وعرض
معرفت بوقتها شنو الشعور الاجتاحني شعور فرح او شعور بحزن
اريد احجي وياها واسمع صوتها
واريد اعاتبها شلون نستني كل هالمده
هدءت دگات گلبي من سمعت صوتها
... الوو
... حياةة حبيبتي شلونج.. حجيتها وگمت ابجي
حياة... حرره يروحي الزماله المطيه لتبجين... وهم گامت تبجي وياي
بالخمس دقايق احنا نبجي ودموعنا عبرت عن مدا شوقنا لبعض
... شلونج شخبارج متتصورين شگد مشتاقتلج
حره... موزينه والله عبالي نسيتيتي تأخرتي هوايه بالاتصال ولا عندي رقمج واگدر انصل واسأل عن اخبارج
حياة... اسفه ع الاساس اول مااوصل اشتري بس مگدرت الاجار هنا كله غالي وتعرفين
احنا راتب الرعايه يادوب يكفينا فضطريت ااجل مشتره الموبايل هسه بس والله مامو يوم مر اذا مابجيت من اشتياقي الج بيه
حره... گوليلي شلونكم والمكان الجديد تعودتو عليه وخالكم زين وياكم
حياة... اي خالي وزوجته زينين وحبابين واحنا اجرنا بيت بصف بيتهم بس حره البيوت اجارها غاليه والمنطقه الهمه گاعدين بيها طاگه
فتورطنا الان الراتب ميكفي وماادري شلون حتدبر
حره... ليش خالكم ميساعدكم مو هو الح على روحتكم المفروض يوگف وياكم
حياة... حره الوادم كلمن حاير بنفسه معليه بغيره... جرت نفس حزين... اني مشكلتي بيبي شلون بيها والله شايله همها
مره جبيره والحياة متعبتها حيل وفوگ ضيم ابحياة ضيمي اني وهمي وحملي عليها
حره... حرت شلون اواسيها بس معرفت گلبت الموضوع وياها وضلينا نسأل عن احوال بعضنا ونهينا الاتصال
ضلينا سنه نتواصل مع بعض كل يوم وننقل اخبار بعضنه بالتفصيل شنو يصير ويانه بهاليوم نسولفه لبعض
بديت اتعود على فراگها رغم اكو غصه بداخلي بس احاول امحي الغصه بكلامي وياها
واامل نفسي انو راح يجي يوم وحياة ترجعلي وان شاءالله هاليوم قريب
بيوم 2013/1/25 رجعت من المدرسه تعبانه وخربان واهسي من الدراسه لان دااحس كل مااكبر كل ماامسؤوليتي وحملي يزيد على اخويه
طبيت للبيت نزعت حذائي وجواريبي نزعت جنطتي شمرتها بالهول ورحت للحمام غسلت اديه ورجليه ووجهي
طلعت من الحمام رحت للمطبخ رتيل واگفه تگلب بالتمن حاطته ع الصوبه ومروه يمها
مروه عمرها سنتين تفتر وره رتيل وتناديلها
مروه... ممه ممه
ورتيل تبوس بيها وتغنيلها...
... الگوه... حجتها وهي مبتسمه
... ابتسمت... امي وين
رتيل... شعجب داتسألين ع الاساس متعرفيها وين
حره.. جريت نفس بقهر.. ماما من بعد ماراح بابا طلعاتها زادن ومگضيه وقتها بالصالونات
ومترجع غير الاخر الليل وبأخر الليل تگب عرگه بينها وبين مقدام الكبر وگام يعرف تصرفها غلط وملازم يسكت عنه
بس بالنهايه تبقى امه وميكدر يتجاوز عليها
من تجي دائما لو جايبه ملابس وياها الها لو مرات حلويات او مرات تجيب العاب لسهر ومروه بس اني ابد. متذكرني بشي
رتيل متقبل سهر تاخذ شي من امي تگوللها حرام لتاكلين ولا تاخذين اي شي تنطيه الج واني هم منبه عليه
بس من ماما تنطي لسهر حلويات وتجي يمي بالغرفه ناكله بسكوت عنها ومنگول گدام رتيل
بليل اتصلت على حياة مثل كل يوم نتبادل بيوميات بعضنه بس هالمره حياة ضايجه ومخنوگه مبينه من صوتها
حره... شبيج ليش ضايجه
حياة... اوووف يحره اوووف
حره... شبيج ليش تتأفأفين..؟
حياة... باعي حره خالي انتقل من جانب الايسر للايمن
بسبب شغل لگاه هو وابنه وبيبي معندها الاجار الكافي حتى ننتقل وياهم
الان حسب مافهمنا الاجار هناك اغلى من هنا بضعفين واحنا ماعدنه القدره ع الاجار الغالي
فبيبي قررت نبقى لوحدنا هنا وخالي انتقل اني ممقهوره غير من خالي
احنا اجينا علمودهم وهما تركونا حتى بيبي حيل مقهوره بس تگول شغلهم هذا مابيدهم شي
حره... سكتت... ارجعو لبغداد ع القليل هنا بيتكم واحنا يمكم احسن من ماتبقون لوحدكم
حياة... اووف مااعرف والله اقترحت هالفكره على بيبي بس مقبلت تگول هنا منطقتي وتعودت عليها انشوف بلكي اقنعها بالرجعه للعاصمه
... ان شاءالله تقتنع الا گوليلي شلونج بالدراسه..؟
... والله مو تمام من تفكيري بيبي وبالمشاكل وبوحدتنا حتى مدااركز عالقرايه
... هااا حياة تلومين بيه لان ما اقره وخربان واهسي وانتي صايره اتعس مني.. شدي حيلج وانجحي
خطيه بيبيتج داتتعب حتى تشوفج واصله وتگدر تأمن عليج وع مستقبلج
حياة... ان شاءالله ارجع لدراستي وقرايتي وانتي هم اقري وشدي حيلج
... تمام.. يلا اروح هسه بعدين اتصل عليج
.. تمام زماله روحي باي
.. بيباي... سديت الموبايل وطلعت ع صوت الهوسه اشوف شكو.. التفتت للهول مقدام گاعد واكو مكينة خياطه كبيره يمه ومدري شدا يدعفس بيها
ابتسمت... هاي منو جابها
رتيل... مقدام جابها الي حتى اگوم اخيطلكم ملابس بيها
حره... ابتسمت.. رتيل من فتره حطت ورق وكعدت تتعلم الخياط عليه وگامت تتقوه شويه شويه
ومقدام يتشغل ويجمعلها الا ان جابلها المكينه
گعدت رتيل عالمكينه وشغلتها زين تعرفلها وتعرف شلون تشغلها
مبتسمه ع الفرحه الاشوفها بوجهه رتيل فرحانه بالمكينه حيل وعبالك اليوم انطوها اكبر جائزة بالعالم مو مكينة خياط
بيومها طلعت دشداشتها وگعدت فصلتها وسوتها ثوب لمروه
ومن اول مره الخياط طلع يخبل وياها
ثاني يوم راحت للسوگ جابت قطع وخيطتلنا اني وسهر ثيابه حلوه
وگالت... من تطلعن شوفن ثيابجن للجيران ومن يسألوجن منو خيطلجن گولن رتيل تمام
... تمام... وفعلا طلعنا بالفرع نگضي وقت والجوارين بلشو يسألونه ع الخياط وكنالهم اختنا الخيطتلنا
وسألونا اذا يجيبولها قطع تخيطلهم لو لا گنالهم اي تخيط
خلال شهر رتيل نعرفت بالمنطقه وڪام يجيبولها قطع تخيط
واحنا گمنا نلبس ملابس حلوه بسببها كل ميصير عدها تجيبلنا قطع وتخيطلنا احلى الثياب
بيوم گعدت على صوت سهر وهي تتوسل برتيل وتڪوللها
... رتيل حبابه خيطيلي فستان سالي الله عليج هاج شوفي رسمته الج حتى تشوفيه وتخيطيلي نفسه
حره... گمت من مكاني جريت الورقه منها باوعت عليها راسمه فستان سالي الكارتون وجايبته بالضبط ومبيه اي غلط
رتيل... لازم قماش زين يلا يجي نفس الفستان ويصير حلو والله بس يصير عندي مبلغ جوه ايدي اروحلج للسوگ اجيبلج قماش زين واخيطه الج
سهر... لعد اريد دبدوب سالي اريد لو فستان لو دبدوب سالي... گالتها بزعل
رتيل تنفست بقهر راحت طلعت قطعه كشمير وگعدت تفصلها فستان لسهر
وسهر مگابلتها وگاعده لليل وهي گاعده تخيط بيه حتى حسيت ظهرها راح يطگ من الكعده
بس اصرت تكمله اليوم وتلبسه لسهر وفعلا كمل الفستان صار كلش حلو صح مختلف عن فستان سالي الكارتون ولون الفستان يختلف بس هم حلو
سهر... لا هذا موحلو ومو نفس فستان سالي يختلف هوايه
رتيل... والله بسى يصير عندي فلوس اجيبلج قماش زين ونفس اللون واخيطه الج تدللي
سهر سكتت وراحت للغرفه زعلانه سهر تتمنى كلشي عند سالي عندها الفستان والدبدوب والحذاء كلهن تتمناهن من كثر متحبها
ثاني يوم كعدت رتيل تحاول تقنع بيها انو من يصير عندها تشتريلها الفستان وكلشي تتمناه بس سهر ابد مقنعت
صاحتها رتيل كعدتها يمها... سهر ليش هيج تحبين سالي انتي حلوه بكل حالاتج
سهر... لا اسمي حلو ولا ملابسي حلوه ولا حذائي حلو... گالتها بزعل
رتيل... يااا غير انتي كشاخة المنطقه هو وين اكو مثلج.. !
سهر ... لا اصلا اسمي مال عجايز حتى صديقاتي كالو اسم سالي يجنن هسه اهلي ليش مسموني سالي خرررب حظي
رتيل... اذا لهالدرجه تحبيه فاسمج صار سالي من اليوم الكل حيناديج بسالي واولهم اني
سهر... صدگ..
رتيل... اي والله... گالتها وهي مبتسمه
وفعلا رتيل بدئت تطش اسم سهر تغير وصار سالي ولان هي خياطه ونسوان المنطقه يجون يخيطون يمها فگامت تطلب منهم ينادون لسهر سالي
اكو بعض النسوان من منطقتنه گامن يستهزأن وحده منهن گالت
... شنو احنا بفيلم تركي كلنا بصغرنا ماحبينا اسمائنا بس شو محد غيرها
رتيل... خاله هذا الشي خاص بيننا احنا عائلتها واحنا نقرر شنو تريد اختي..
المره سكتت وهيج انتشر الاسم وسمو سهر بسالي والمنطقه كلها عرفتها بهالاسم
اني وسالي گاعدين ندرس اني مستواي ضعيف بدراستي ومااريد ادرس
بس رتيل لازمه النعال وتفتر فوگ راسي
... رتيل خلي ابطل مااريد ادرس... گلتها بضجر
.. اجاني النعال يركض وصوب هدفه بكصتي واتبعته العيطه
... اقررررري لااااا حظج اطيحه ولج
تأفأفت بملل.. انفتح الباب طب مقدام باوعل لرتيل وباوعلي
مقدام... شكو شبيجن
رتيل... هاي النعال ماترضى تقره والله شنو ترسد. تبطل
حره... يمه هي رتيل حجت هيج وهو شمر العلاليگ ونزع النعال شاله واجاني
اني گمت من مكاني ورگضت وهو يركض وراي ولازم النعال ويصيح
.. ولج تريدين تصيرين مثلي شهاده ماعندج وتدرين كلش زين الشهاده هي الاساس والسند للبنيه وحتى للرجل
حره... خلاص والله راح اقره وانحج بس لتضربني
حجيتها واني اضحك ع منضره وهو لازم النعال
شمر النعال هز ايده وطلع يدردم عليه رحت رجعت لدراستي وگعدت ادرس بملل
للغده طب مقدام وڪعدنا نتغده رتيل حايره بمروه واكلها واحنا ناكل
مقدام... راح يجي يوم اشتري بيت بالكراده واخذجن هناك و اعيشجن احلا عيشه
وطزز بالي اجه والما اجه من اهلي الماعدهم احساس
دائما يگول هالكلام ويسمع امي بيه لان مقدام حيل تعب وياها هو ميقبل على رجعاتها. المتأخره وهي متقبل يحجي وياها وطايحتله انجب ومعليك
ومقدام يشوط ويتعارك ويضل يتحسب عليها ورتيل گوه تهديه
اتصلت حياة بيا سولفنا شويه وگالت
حياة... لج حره لتشوفين جيرانه الجدد شگد مزعجين مرات يفتحون اغاني عاليه كلش
... عزززا حياة صدگ تحجين
حياة... اي والله لج لتشوفين وجوهم تخوف احس مبيها اي رحمه تدرين هذاك اليوم شفتهم يشربون خمر
حره... عززاا وشمدريج شعرفج ان هذا خمر
حياة... متأگده هذا خمر لان شايفته بالمسلسلات التركيه وحتى بمسلسل مراد علم دار من يطلع زازا يشرب خمر نفس هذا الهمه يشربو بالضبط
حره... حياة عوفيهم وابد معليج بيهم الواحد يحير بنفسه وبس
حياة... اي والله هم صدگ
ضلينا نسولف شويه وسدينا الموبايل طبت امي للبيت باوعت للساعه ب12ونص
شايله بإيدها علاليگ طلعت وحده منهن فتحتها طلعت منها لعابتين انطت وحده لسالي ووحده لمروه
واخذت العلاليگ وراحت لغرفتها امي تهتم شويه بسالي وبمروه
اما اني فلا
واضح اهتمامها بيهم اكثر مني ومن البقيه اضوج وانقهر من هالتفرقه بس ماابين هالشي
اضمها بگلبي ومااسولفها الاحد لان ماعندي بس حياة جنت اسولفلها وحياة راحت
ومترهم اقهرها واسولفلها ع الموبايل
مرت ايام وبيوم حياة اتصلت عليه
حياة... حره زماله مطيه تعالي عندي شي اكوله الج
حره.. شنو كولي
حياة... اكو شخص تقدملي هو من الفلوجه وخالي وبيبي يعرفو خوش ولد ويگولون احنا مرتاحيله
حره... اي وانتي شنو تگولين ومو بعدج زغيره عالزواج..؟
حياة... بالنسبه انو زغيره عالزواج الوضعها مثل وضعي ملازم تفكر اذا زغيره او جبيره
لان وضعي ميسمح بهالشي اريد اخلص بيبي من حملي ومسؤوليتي
وتردين الصراحه الولد اني هم مرتاحتله
باعي حره وجهه بيه رحمه من تباوعين عليه ترتاحين وعيونه حلوه
اني انطيت الموافقه لبيبي وردتلهم الخبر وبهالايام العقد مالتي حيل تمنيت تكونين موجوده ويايه بهاليوم
حره... حياة وافقتي تتزوجيه بس لان تردين تخلصين بيبيتج من حملج تفكيرج غلط وميصير تتخذين مصيرج ع هالاساس يمكن الولد موخوش وحتشبعين قهر وياه ساعتها شلون؟
حياة... لاحره هو حباب واهله حيل حبابين اني شريد اكثر من هذا وحتى هو گلي بيتج وحدج بصف اهلي وبيبيتج وياج وامي وياي ونعيش سويه واني هالشي مرضي الي
بس القاهرني والمزعلني عدم وجودج وياي بهيج يوم مهم بحياتي
حره... الله يقدملج البيه خير ولتزعلين مقسوملي مااحضر عقد قرءانج بس ان شاءالله بزواجج اني اول الحاضرين
حياة... امين يارب..
خره.. سديته منها واني زعلانه اختي وتوؤمي بعد يومين عقدها واني مراح اكدر احضر
مر اسبوع واني مخنوگه حيل وابد ممرتاحه بيوم اتصلت عليه حياة مقهوره وتشتكي
حياة... هذوله زودوها هوايه
حره... منو همه
حياة... جوارينا البلوه.. الله ياخذهم تدرين حره صعدت تصنتت عليهم من فوگ السطح
جانو يحجون عن تنظيم اسمه القاعده واني حيل خايفه منهم لاني سمعت بالاخبار ان هالتنظيم ارهابي
همه شنو الحجو مسمعتهم بالضبط بس جان اكو بكلامهم تنظيم وقاعده
حره... لزمت گلبي من الخوف بس مبينتلها... اهدي حياة كلها فتره وتعدي ولتنسين انتي قريبا حتتزوجين وتنتقلين للفلوجه وكلشي يكون تمام
ضليت اهدي بيها واني خايفه اكثر منها لان سمعت بشي اسمه تنظيم وهالشي يخوف وموزين
ضلينا ع تواصل فتره طويله نسولف اخبارنا لبعض ومن ضمن الاخبار همه الجيران
تشكي منهم وتگول كام يشربون خمر ويشمرون علينا البطاله وتتكسر بالحايط
لو يلفظون بالفاظ تخجل ومابيها مستحى وهي كلش مقهوره وخايفه منهم
صارت حتى متگدر تطلع بسببهم
بيوم گعدت الصبح رحت للمدرسه داومت عادي مثل كل الايام
من رجعت تغديت ونمت شويه وگعدت اقره وبعدين لزمت مروه لرتيل بين ماتكمل غسل البيت
لليل اجه مقدام اخذت موبايله واتصلت على حياة
وهاي اول مره اتصل عليها ومتجاوب
مره ثنين وهي ماكو
گلبي وجعني اذاني حيل
ياترى شبيها وليش متجاوب
للصبح اني اتصل عليها وهي ماكو
الليل كله گاعده وگلبي بين اديه من الخوف
لثاني يوم افتر بالبيت مثل المخبله حتى مدرسه مداومت شايله موبايل مقدام واتصل عليها وماكو
افكار الشر اتربعت براسي وانقبض گلبي اكثر بسبب جيرانهم
اخر شي اتصلت واني ابجي وادعي الله تجاوب واسمع صوتها
بس تخبلت من. اتصلت والموبايل گلي
الجهاز مغلق... نهاية البارت
_____________
اسفه فراشاتي
تأخرت عليكم بالتنزيل
فراشات لتنسون التصويت والمتابعه
وارائكم بالقصه واحداثها
ارائكم وتشجيعكم الي يحفزني للكتابه والسرد
الي قره الغش ال ع الفيس بوك وفهمه اكيد راح يعرف شنو اليصير بالاحداث القادمه
والغش بخصوص حُره
مشاهده ممتعه احبتي 💕
#لؤلؤة