ذاكرة الماء

الجزء الخامس عشر

ذاكرة الماء
الجزء الخامس عشر

بعد مكتب
لي اريد ابوس كل تفاصيلج....

بقيت صافنه ..
رجفه ايدي زادت واحس دقات قلبي صارت بأذني...

احس نار صعدت لراسي

فتحت باب المطبخ
اكو درج وكفت ..

المكان كان اظلم فقط اناره الشارع خفيفه..
والبيوت البعيدة ..

دكيت ع خالد
جاوبني بسرعه ..

هلو رهف مشتاقلج حيل...

اسمعني خالد اني هسه ثبتلي شي واحد انو كلكم انتو الرياجيل كلكم نفس الشي نفس التفكير نفس القرف
عدكم المرأه اداه لتفريغ غريزتكم..وبس ما ابالكم غير شي

ميهمكم مشاعر ميهمكم حب احساس اي شي اهم شي نفسكم
رهف اصبري اوضحلج...

اشش ماريد توضحلي
انتو كلكم مال حرك
الله ياخذكم وياخذ تفكيركم المتخلف...
ماعدكم سالفه بس ابوس وحضن...وهل القرف
الله يقرفكم ...

كال ..رهف شبيج ....اكلتيني وشربتيني ..

شنو بابا اصحو ع نفسكم شنو شايفينه بس اجساد
يعني الله خلقني
وفي كتاب الله يقول
ولقد خلقناكم في احسن تقويم...

والرسول وصى بالنساء خير...

انتو منو تجون تستعبدون المرأه بهاي السوالف ...

رهففففف ليش هيج تحجين...

اني مجان قصدي هيج....

يي خالد كول شنو جان قصدك...
قصدي ادقق بتفاصيلج...

ادقق بتفاصيلي شنو منو انت ودقق بتفاصيلي
حاقده عليكم صنف حقير انتو صنف نمرود

شفتني مرتين طلعت وياك وفضفضتلك
من قهري ..
عبالك اني رخيصه
وتكدر تاخذ مني لتريده
شنو هالخيال الواسع العندك
شايفني هيج اني موزينه
ترا انني فقط حجيت وياك لان كلامك
يشجعنيي ينطيني قوه...
هيج قوة ما اريدها بلاها ..
مو علمود تفكر بيه بهاي الاشياء
اذا انت تفكيرك هيج هذا موذنبي
اني كل كلامي وياك لان غيرتني
خليتني قويه اعرف اطلع حقي وارتب روحي وشوف نفسي
اني لو ادور هيج خو هذا زوجي حلالي واسوي وياه لي اريده
كال
رهف كملتي ..

شنو كملت ..شنو جاهله اني
واكولك شي..
اني شفتك باليوم لي وديتني بي للمطعم
شفتك حاظن وحده وتبوسها..المغرب
...
كلكم نفس الشي كلكم ..
المفروض ابو لهب ..يؤد الولد  مو البنات
لان انتو مرض ع المجتمع ..وعلينه
ررررهف كافي ....

لارهف لاتفهمين غلط...

هاي مجرد صديقتي...

هههههه هاي هيج الاصدقاء عدكم كله حضن وبوس حلو والله..
هاي صديقه واني هم صديقه . والحال ع بعضو

لارهف هي صديقتي المقربه

المهم مقربه اولا. ميهمني بابا ..منو انت وتهمني ..

كل مره اني انهي وقرر اطلعك من حياتي وانت ترجع
ترا مبيناتنه شي مجرد كلام وصداقه...

وعتبر الكلام لي سمعته مني قصه وسمعتها انسى رهف انسى بيوم لتقيت بوحده اسمها رهف اليوم كلشي ينتهي افتهمتني..

ولااريد اسمعك ولاتسمعني...

واذا ع الطلعه والعزومه مستعده ادفع فلوسها اترجاك خالد انساني طلعني من حياتك عوفني
لادزلي مسج كافي حتى خطي راح اكسره

اذا شفتني بشارع صد عني ولاعبالك تعرفني انسى اترجاك انسى رهف. .
كل كلامي وياه وهو ساكت ..
اسمع منه بس اسمعي. 
رهف هيج ظلمتيني ترة اني مو هذا قصدي اني قصدت ادق التفاصيل شكلج ضحكتج مو شي جنسي ترة
اسمعيني وبعدها اسوي لي تريدي

ا
كتله مو غشيمه وتبوس ضحكتي ..

سمعت صوت ورايه .

كبل نزلت التلفون...
ونداريت واشوف يوسف ورايه....

ماما شسوين هنا بهذا الوقت....

طمنت شويه عبالي مروان....

سديت التلفون وكلت اله ..

حبيبي ماما جنت احجي ويا اهلي مشتاقتلهم حيل
كال ..
هسه بهذا الوقت تحجين وياهم. 

ماما مو بالعراق فرق الوقت بينا اهواي حبيبي
هسة صبح يمهم وهم يكعدون من وكت ...

هاا تمام ماما

كالتله انت شكعدك حبيبي..

محتاج شي ماما بيك شي...

لاماما مابيه نزلت عطشان مي...

كتله حبيبي عافيات اشرب مي ونام...

راح للمطبخ وطبيت وراه
شرب مي كال
ماما اهلج بيهم شي سمعتج تصيحيين...

لاماما بس خالك وجدك مشاكل بينهم...

واني تعصبت لان هم مو صغار وهيج يصير بينهم مشاكل
تمام ماما راح انام
وراد يصعد...
يوسف ماما تعال نحجي شويه
ها ماما شتريدين...
اجه يمي وطلعننه بره كعدنه ع
الدرجات كتله يوسف
ماما اني شنو فرق بيني وبين ميلاد
كال  ماما اخاف احجي وزعلين
لاحبيبي كول مازعل منك اني
انت وسنا نور عيوني
واموت عليكم
باوع عليه ماما كل ماحجي تزعلين
الله يخليج سدي الموضوع
وخلي نعيش حياتنا لي انتي بنيتيها النه
لا حبيبي مازعل احجي
ماما
فرق بينكم كلش جبير
تدرين اتمنى هي امي
اني اباوع والدموع بعيني مجمعه...

كال ماما احجي بس لاتتعصبين
ولاتتعاركين وياي وتحرميني من الاشياء الاحبها
لاماما احجي براحتك
اني عمه ميلاد اتمناها امي اصلا اتمنى اني بغير عائله لان لاانتو مرتاحين ويانه ولااحنا مرتاحين وياكم
كتله ..
ليش ماما انتو اولادي
انتو لي طلعت بيكم من الدنيا شعندي غيركم حبيبي
محبتكم واجب النه احنا اهلكم لي نتمنالكم كلشي حلو
اذا بيوم شفتنه دنتعارك ف هاي بكل عائله مشاكل لازم انتو تتحملونه حاله عصبيه وتعدي
ليش تحجي كلام اكبر من عمرك
شفتي ماما شلون عصبتي
انتي كتيلي سولف واني سولفت
شوفي هاي ابسط شي فرق
عمتي تسمعنه من نشكي الها
عمتي تسمعنا من نحجي وتسئل ع حالنه ودراستنه وكلشي ماما
انتي متحسين بينه متعرفين شعدنه
ماعدنه عمتي تعرفنه اكثر منج
اذا بيوم اكعد يمج تحجين بس ع نفسج
فد يوم كتيلنه يالون تحبون ياطبخه تحبون
يانادي تشجعون
يا فرقه تحبون ..
لا عمتي تعرف كلشي علينه عكسج تماما...

زين ماما فد يوم اخذتينه..

اني وسنا نشتري شي
جبتيلنه هدايا نجاحنا اخذتينا
مكان نترفه بي لا
عمتي تسوي هذا كله
باوعت عليه ونار بصدري...
معقوله اني سيئه لهل درجه
معقوله ماعرفت اربيكم ..وماعرفكم ..
من اكولكم هذا البعد سببه عمتك الي تفضلها عليه
وسببها هاي بيبتك الي اخذت من عمري وصحتي ..
ومن احجي عليهن تزعل. .

ها ماما شوفي راح نرجع ع كلامج..

انتو موخوش جهال واحنا بعمركم تحملنه كلشي..

وتزعلين وتسحبين
التلفون مني وتكولين ماكو بعد طلعه
لذالك محبيت تناقش بهذا الموضوع
خلينه نعيش مثل ماتريدين كلمن بحاله
مثل ماطلعين بدون علم بابا
واحنا نسكت منحجي انتي
هم سكتي وعوفينه ويا عمتي...

شتريدين منه ..

بهذا البيت كلمن عايش حياته بلي يعجبه
خلينه هيج ...

بس يوسف هذا غلط وحرام
انت تدري الي ميرضى امه وابو عنه الله ميرضى عنه
انت تدري تخسر الدنيا والجنه
اذا انت متحبنه
وانت تدري ..الجنه تحت اقدام الامهات واني امكم ..
مو ميلاد ..

غصبا كا عليكم تحبوني
لاني اني احتاج حبكم احتاج احظنكم
احتاج ابوسكم احتاج اعيشكم اي اعيشكم
انتمى ارجعكم بطني واستمتع بنبضاتكم وضرباتكم
ولا هذا البعد يوسف اني تعبانه
انت كبرت وتفهمني

بقى يباوع عليه ..
كال ..اني تعبانه
واندار ع البيت كال اتظنين هذا البيت طبيعي ؟
اللحظات الي اعيش بيها واحس اني جزء من اسرة هو ويا عمتي...

كمت صرت بوجه ..

كتله حرام ..والله يذبك بالنار اذا تبقى هيج لان اني مراح ارضى عنك

مصيرك عذاب جهنم ..
وغضب رب العالمين عليك ..

كال ...

وانتي من بين الرحمن والرحيم والغفور
ويحب عباده ويغفر الذنوب امي

مو بس  ..العذاب والغضب ..

بقيت اباوع عليه ابني ديحجي ويايه ماعرف اردة بالكلام

شوكت كبر وشوكت عرف يناقشني هيج ..

بقيت مصدمه ..
كتله ..اي غفر للاولاد الي يحبون اهلهم بس الي لا
مو غفور ..
ضحك كال..هاي بس
تدرين اني ويامن التقي هسة ..

معرفت اجاوبه ..لان ماعرف

كال ..ويا ابن الشيخ ما اتذكر فديوم علمتيني ع صلاه لو ع رب العالمين ...

هوايه معلومات اعرف ..

اروح انام تصبحين ع الخير...

ابني الطفل الصغير جادلني بكلام ماعرف ارجع اله
ابني خلاني ساكته ومصدومه ..

اي ....صح ...
اني داعيد طفولتي وحياتي وياهم
بكل التفاصيل
ماتذكر احد كلي الله غفور رحيم .

ماتذكر غير العيب والحرام الحرام الحرام
كل شي حرام
اتذكر شي ..اول ما ضب جسمي وبدا صدري يبرز
امي تروح وترجع تضربني ع كيف ع ضهري امشي محدبه
لا تمشين هيج وانتي نافخة نفسج عيب
حرام تبينين جسمج حتى لو بس احنا بلبيت امشي محدبه واحني ظهرج ..

ومن ازوجت ..جنت صغيرة ..وع كلام امي مشيت .

من ضمنها المحدبه
فديوم .
اسمع عمتي تكول عدلي ظهرج ام قنبورة ..

ومشت عليه ام قنبورة وتضحك هي واختها.  وجنه اختها علية
الى ان فديوم
مروان. .كاعد وكالت ها ام قنبورة. 

مروان استغرب ..

شتقصدين امي ...

كالت لا اتشاقه وياها مرتك ظهرها مو عدل محدب .

كال..لا عدل ..

كالت ..خو انت ..لو بيدك ..طلعها ست الحسن والجمال ..

وصار نقاش بينهم انتهى .

احنا الغلط ..

هاي التفاصيل الصغيرة الي كل انثى تعيشها بدايته عمرها جنت اخاف منها لان حرام
..

كل شي حرام وعيب..

ماتذكر امي علمتني ع الصلاه
من عمتي عرفت الصلاه

وحتى صلاتي مو مستمرة ..

اني اعيد تربيه امي ..
باولادي نفس الشي لكن فرق الزمن بس ...

بعد الي صار
من مروان ..
حسيت نفسي بركان ..
كل طاقتي طلعت بكلمات خالد
انفجرت رجع يوسف رجعني سنين ..
سنين نسيتها او تناسيتها
بس احتيت من جديد ..

حسيت نفسي اتصل بامي ..

بهذا الوقت ..الي هو يمهم بدايه الصبح ..

رن ..

الو هلو يمه شلونج. .

هااا يمه رهف شلونج ..خوما بيكم شي ..

كتله لا مابيه شي بس بس اسال عنكم ..وين امي ليش متخابرين ..

كالت واللع ملتهين ..وابوج زعلان عليج ..

كتلها ليش زعلان ..

كالت غير ابن عمه مات بيت ابو حيدر
ما اخذتي من خاطرة ..

كتلها امي اني هنا وشمعرفني ابو حيدر مات

كالت ميخالف لازم تخابرين ..وتعرفين

كتلها هو لو اني اخابر لو محد يتصل اني مو دزيت فلوس الح تشترين هذا الجهاز وكل شهر احولج
حتى تتصلين ..

وكل هذا اني اتصل بس ..

كالت ..ومتجاهله كلامي ..عمتج حماتج رجلج الجهال شلونهم ..

كتلها كلنه بخير ..ماما اريد ارجع ..

سكتت ..

وين ترجعين ..

ارجع للعراق. 

كالت ..وبيتكم ..اطلعون المؤجر ..

كتلها لا بس اني ارجع. .
كالت هاي شبيج رهيفه ترجعين ليا ضيم حر وكهرب ماكو
وانفجارات خليج هناك بنعيم ..
وهذا ابوج مايرضى ولا خوانج
وابوج سكره متعبه ورجله دتنحفر
يعني فوك مرضة قهر يا يمه
انتي عاقله وراكزة
سايسي سايسي
وعيشي
اذا عليج كل البنات ترجع لاهلها
يمه عيب ..

وليش بس انتي ورجلج وجهالج وبنهن
..صاير شي ضربج سبج

كتلها عفيه هل القوانه مال ضربج وسبح ماعدكم غيرها ..

اي ضربني وسبني وطردني ..

نصة صوتها ..

كالت يمه اتحملي . مو تحملنه وكبرناكم .

كتلها اي وبعدين شطلعنه احنا .

مشتتين ..لا اخ يسال عن اخت ولا اخت عن اخت كل واحد بديرة ..
واني متاكدة ولا واحد بينه مرتاح وهذا الي سويتي بينه وزعتي دنزرعه باولادنة
يعني حطمتونه انتو
لا هل ولا سند ولا شي بس هيج جبتونه للدنيا ..

سكتتني كالت انتي مخابرة دتحجين حجي اكبر من عمرج
الظاهر هذا الخارج طلع عيونج
بدل متخابرين وتسالين جايه تحجين حجي اكبر منج
هناك مرتاحه وتعلمتي كم كلمه اذبيهن علي

اله اخابر مروان ..
واكوله ضب مرتك
وانه امك يا رضا لو يمي والله لا ادبج
والع اخلي يادبج ..
طلعت عيونج. 

وبدات تغلط عليه بنت القندرة ربيناج شبر

عرفت راح تاذيني ..

كتله يمه ..ما مبرين الذممم

وسديت منها

هنا حسيت الي بالنصر ..طلعت جزء من داخلي الي جنت اخاف احجي لوما هذا البعد يمكن جنت ما احجي
ولوما خالد ما متسلط ع حياتي ما احجي
ارتاحيت شويه ..

بس بقيت ويا الكوابيس
والارق وقله النوم والاكل ..
هنا حاولت ارجع اطفالي الي
احجي وياهم احضنهم ابوسهم ..

بس مثل كل اثنين بوادي
وكل وتحد بعيد عن الثاني .

فديوم .....

خابرت اسماء
هلو سماوي شلونج حبي....

هلو بالبذات هلو بلي مختفي...

ومايسال عليه....

يولي ترة اذا ماعندج رصيد..

رمشيلي واني اتصل عليج...

وبعدين ليش متردين ع رسائلي...

ولج اوكفي والله ضروف جبرتني مارد...

تدرين اخر زعله ويا مروان..

والجو متوتر بعده

هاا يعني ماتصالحتو

لاتصالحنه الحمدالله
يله مبروك
باعي سماوي تذكرين الحبوب لي نطيتيهن اليه هذاك اليوم..
كالت اي
مال نوم ومضاد اكتئاب هاي ..
كتلها اي اريد
جيبيلي منهم بعد
كالت
ولج ميصير والله

اله  وصفه من الدكتور

يسمح بالدوا ينصرف

وتعرفين هنا كلشي بنظام

لازم دكتور يله تاخذي
كتلها ...
اووو ماريد اروح للدكتور

انتي جيبيلي دبريلي فدوه
تمام خلي  اشوف شلون ادبرلج

بس اذا تريدين تعالي هسه عندي منهم علبه
لحد ماجيبلج
بس رهف مو تشربين منهم ع طول موزين فقط وقت ماتحتاجين
كتلها ليش
كالت موميصير تتعودين عليهم متكدرين تنامين لاتشربيهن اله وقت الازمه

تمام باجر جايتج

ماشي حبي انتظرج
باي
باي

طفيت التلفون ونمت

ثاني يوم كعدنه ريكت مروان والجهال والمعينه يم عمتي
بدلت بسرعه وطلعت ع اسماء
اجرت تكسي نزلني يم اسماء
دكيت لباب
فتحته
سلمنه وطبيت
ولج رهف هاي شلون صايره شبيج
والله ضروف متعبتني حيل

احجيلي شكو

قبل ماحجي

اكولج ليش مكتيلي مروان اجه هنا

ياا والله نسيت اكولج اجه وطب وشافج نايمه

وحجيتله عليج كتله دير بالك عليها

ترا مرتك حبابه وفقيره

بعدين ولج اني لومنج وعندي هيج رجال اكابله واكعد
اصلا اقفل باب الغرفه واكتب ممنوع الدخول والخروج

وانتي  ترفسين نعمتج بيدج ولج

شفايتلي عندي مثل مروان جسم وضخامه وهيبه
وشخصيه ولج شبيج يحضي
ما تعرفين بالزلم ..

اثاري صدوك من كلتي هو احلى مني

هسه عرفت الصوج منج مو منه تتبطرين

متلام بيج ميلاد

اسماء شبيج لايغرج المظاهر انتي متعرفي معرفه شخصيه مثلي..وما احب هيج حجي .

ديله عيني شبيج شحجيت

قابل مثل حضي ازوجتلي واحد جنه دعبله

دكومي نشرب شي بارد...
لا تزعلين اشاقه الي ع گلبي ع لساني
كتلها لا ما ازعل ..

اكولج اسماء ..

شنو يعني اتمتع بتفاصيلج
كالت
مافتهمت شنو يعني..هذا مروان كلج اتمتع بتفاصيلج
من امدة حظي ..

كتلها
ولج  يا مروان اسمعي مو بليل جنت اتابع مسلسله

والبطل يكول للبطله

اتمنى اتمتع بتفاصيلج وابوسهن

ولج رهف شسم المسلسل مدام عندي نقص حنان اتابعه

ههههههه ولج ماذكر والله هيج داكلب وشفتها

يعني يقصد ايدها ركبتها جسمها  اصابيعها رجلها
اشياء بالمرأه
شمدريني ..شيقصد انزول ..

المهم يتمتع ..دنطيني الاسم حتى كلنا نتمتع ..ايي ولج شفتي همه هذوله الرياجيل رومانسيين بس بالتمثيل
مومثل العدنه عبالك جيش يركض وراه من يريد شي من مرته
بدون حب ولامشاعر
اخذ اليريده ونام

خوب هذا لعندي مايعرف بس يكولي يله فضيني عاد
ابن الزفرة
محسسنيي اني مو مرته
وشي مجبور يسوي
....
ههههههه خرب يومج اسماء سوالفج ماينشبع منها

يله عمري لازم ارجع اخااف يجون الاولاد

ماشي حياتي بوسيلياهم

ماشي عمري
باي
باي
صعدت تكسي نزلني كبال الماركت

رحت اتمشى اشتري كم شغله

هسه داطب واسمع واحد ورايه يصيح رهف رهف
باوعت ورايه
خالد
رحت بسرعه شتريد مني..

شكو جاي ورايه

بس اسمعيني رهف

ليش هيج تعامليني اني شسويتلج

شنو بدر مني والله هاي لي شفتيها ماتعنيلي شي ولابينه شي
اصلا هاي مو عربيه اجنبيه
وعدهم عادي هالشي
واحد يحضن صديقته ويتمشون
عوفني لاانت تهمني ولاهي...

كتلك انسى شي اسمه رهف
لا توكفني بعد الي بيه كافيني ..

ومشيت مانتظرت منه رد

وعقلي فاصل اتذكر كلامه تشجيعه وارجع اكول لا اقوي
غلط الي بي انتي ..

دك تلفوني اسماء
ها حبي
وين انتي
دارجع للبيت...
كالت ارجعي
ولج وين ارجع ماكدر

مروان ع جيه

رهف لازم هسه تجيني
ليش شكو
من تجين نحجي
تمام مسافه الطريق
سديته وكفت تكسي ورحت
دكيت لباب فتحتلي لباب
شكوو اسماء هسه جنت يمج شصار ورجعتيني
رهف اسئلج سوال وردي بكل صراحه

شكو احجي
منين تعرفين خالد
احس ضربه وكعت ع راسي
كتلها ولج شبيج ياخالد
رهف لاتنكرين
هسه بعيني شفتج تحجين ويا يم الماركت

لاحبي ترة مجرد شفته مرتين بالكوفي شربت عصير ومره كهوه
باعي رهف انتي صديقتي واختي..

نصيحه مني الج ابتعدي عن خالد

ترا موخوش ادمي..

يعني شنو موخوش ادمي...

اني قبلج هنا وعرف كلشي ف  نصيحه رهف ابتعدي عنه
كتلها شبيج اسماء شتقصدين
فهميني
باعي رهف انتي لو ممهتمه بخالد مجان سئلتيني ليش وليش
هاي شبيج مومهتمه بس انتي حكمتي ع شخص متعرفي
الولد بس سلم عليه ومبدر منه شي..
كالت
لا اعررررفه واعرف وين جان يشتغل واعرف بيته..
واعرف منو جاان مزوج..

من كالت مزوج هنا راسي احسه افتر ومتفاجئه

كتلها لحظه اسماء شنو منو مزوج

حبيبتي هذا مزوج وحده فرنسية

واني تربطني بي علاقه جانت

بس من عرفته بياع كلام عفته

يتودد للمراه ويعيششها باحلام ورديه ويكوللهن ابنيلج قصر واسويلج كذا وكذا وهو افرغ انسان بالكون..

اني ماكدرت احجي بس متفاجئه مصدومه من لي اسمعه
اشرتلي اسماء براسها
ايي ايي هو هذا خالد اي وحده جديده يشوفها يريد يسوي وياها علاقه
وعبالج العلاقه بس كلام لالا حبي
يريد نوم وطبات وطلعات
واحتمال ياخذ منج فلوس
اسماء مفتهمتني غلط انتي

اني ماعندي شي وياه

بس لان جيت للكوفي مالتهم وبعدين كطعت وكفني سألني ليش مختفيه
كالت
ليش انتي يسالج  شنو هالميانه لبينكم بحيث يوكفج بنص الشارع ويسأل وين مختفيه
هي هاي دروبه ..يسوي تفسه كل شي يعرف والحنين .

اسماء هسه شتريدين انتي

مزوج اولا اني شعليه

داكولج ماعندي شي وياج
كالت
تمام اني مجرد نصحتج خاف. يوكعج بكلامه المعسول

باعي رهف يمكن اني اسوء بنيه عرفتيها

بس اني كلش صريحه ومتصالحه ويا نفسي الزين احجي والشين احجي
اني عندي علاقه بي وهو لي عرفني بصالون وشغلني ويا ناس موزينه
ف نقطه راس سطر ابتعدي عنه..
رجعت واني
اشوف ليش هيج وياه دوم تعكس ليش من اسوي شي انفضح ميلاد شافتني و اسماء ودائما خطا اني
دائما ماعرف اتصرف ..
ليش الكل يستعبدني
ويستغلني ..

بس اخذت قرار وانتهى والحمدلله من انكشف الي خالد
وبقى خالد يتصل ويدز
بس احذف
ما اريد احجي وياه
اكو اشياء داخل نفسي اخاف احجيها بس احسها
اخاف احجي لا انجرف اله

هل الايام تمر هادىة بسبب الحبوب
هدئتني وانام مثل الطفل حتى ما احلم وانسى كل شي
واكعد نعسانه وارجع انام
اكمل شي وانام .

حتى عمتي اذا تسبني اضحك
واذا مروان يعصب اضحك ..
هيج هدوء داخل نفسي ..
وابتسم ويا الكل
حتى ميلاد مرة مم المرات اخوها كلها ليش متزوجين
جانت تحجي وتباوع عليه .

اووع وليش اتزوج وشناقصني واجيب رجال
يتحكم بيه ..
شهادتي وشغلي اهم
لو اجيب رجال ع بني واخرب حياتي
مروان ..
اني .ما احتاج رياجيل بحياتي
مرتاحه هيج
عاد اطلع وشوف مزوجات ويدورن
مدري شيردن بعد ..فدوة ..
حيوانات مو بشر الله وكيلك
مروان يكولها الله يبعدنا ..

واني جنت ابتسم واعرف الكلام موجه الي ..
جنت اشرب بدل الوحدة ٢
واذا انقهر اشرب ٣
لان ارتاح الها ..
بقت بس اسماء اتواصل وياها
ومرات اروح بسرعه وارجع وجتى الماركت كمت كا اروح اروح لمكان ابعد في سبيل ما اشوفه ..

الى ..ان بيوم ..

رجع مروان نفس التصرفات الي جان يسويه وياجود
يهتم بنفسه. .
يطلع بحجج.
يقلب فونه اذا افوت من يمه ..يطلع راسا ..

نفس الشي
بس هنا ما حجيت شي
شو احس عادي
مكتله اني شناقصني ولا كلت اله ..اني شمقصرة
لا حسيت ميفيد الكلام
وماكدر اواجه
اتمنى اعرف ليش جنت اسكت واعرف يخون
ووصلت ..حسيت بملابسه ..
اكو عطر ..اكو حمرة
وملابس الداخليه من غسلتها شفت اثر
اكو علاقه جنسيه صايرة ..
اصعب شي بالخيانه انك تتعلم
واذا تواجهه راح تفقد هوايه اشياء اولها الكرامه ان وجدت وتفقد شي صعب يرجع
بس 
تتعلم وتشوف المقابل يخون بكل شي وتسكت وتكول مدة وتعدي
وتحس نفسك عدت المدة بس انت تعبت والعمر ضاع
وانت تلم هل الشتات المتبقي
والم و وجع داخل نفسك وتناقض مينتهي  ..
وتسكت في سبيل تضحي
والمقابل يحس نفسه هو المضحي

....؟

سكتت .. وعدت الايام بابتسامه .
ليش ماعرف ..
كمت اشرب ٤ حبايات وما انام بس هيج
جسمي مرتاح وعقلي نعسان بس ما انام

بديت ..اضعف
وجسمي يرجف منها ..
بس جنت ارتاح
غير الكتابه والحبوب ماكو شي يسلي
حتى الرسم تركته
وقفلت المرسم
فد يوم ..

كاعدين اني ومروان
حبيبي خلي  نحجي شويه
ها رهف كولي
خلي  ادرس حباب
عدل كعدته كال شدرسين رهف
والجهال وامي والبيت شلون
وطلبات امي ماتخلص تعرفيها مريضه ويرادلها عنايه
يوو مروان امك عدها معينه
وبوقت الي تغيب المعينه اني بعيوني اخدمها والله ما اقصر وان قصرت كولي

بس اريد ابني كيان الي اريد اتعلم اريد اسوي شي افتخر بي

لارهف سدي الموضوع موقته ابد رسمي وخلص
مو جبت الج مرسم وفرغت الج غرفه

ليش هيج مروان ليش ماعندك روح المناقشه ليش مستصغرني هيج..

حصره احجي كتله لا ولا...

زين ليش لا ناقشني ليش هيج رفضت...

رهف مارفض بس متكدرين تدرسين وعندج بيت وجهال وامي..

لا اكدر كلشي اسوي

مروان باوعلي وكالي ايي الحجي سهل
كتله
اي سهل احنا بغير بلد

كلشي بي ديطور...
كال
هاا وتعرفين تحجين ست رهف...

هاي عود مطالعه وهيج عينج طالعه
لو طلعين شسوين...
كتله
لا مطالعه عيني

ميخالف رهف بس اجلي موهسه
ضل ضل مروان ضل هيج اجاهلني
ضل ع كلشي كولي لا...

اني اعرف ليش هيج دسوي
باوعلي شنو قصدج
مروان ترة اني موغبيه مثل ممتخيلني
بس اني اغلس اعبر بمزاجي..كل شي اعرف
بس امشي ..
حتى الحياه تمشي
حتلو ع حساب نفسي وكرامتي..اغلس ...

كالي ع شنو دتلمحين رهف شتقصدين بكلامج...

مروان ماقصد شي بس لاعبالك اني مافتهم وغبيه
ذب تلفونه وكعد كال
باعي رهف
اني من يوم مازوجتج
اشوفج الانسانه الصبوره الطيبه الملاك
ف لاتخلين هاي النظره تتغير
ف الي تعرفي احجي بدون ماتحجين اللغاز
ماكو شي مروان لاتحط بالك...

غلس مثل ما اني اغلس ...

وارجع احجي ويا حسن ..
احسن مني ..

وكمت من يمه ..

كال تعالي . شكو
كتلة
ماكو ..بس اجيب الفون
نزلت جوة .

اخذ الفون من الشاحن ..

طفيت النقطه ..
اباوع رسائل .

هوايه ..
دخلت يم عمتي ..

كعدت ..

فتحت اشوفها من خالد .

فتحت
رهف جاوبي ....
رهف جاوبي
لاتخليني اتصرف غير تصرف ..

وبعدها صور وفيديوات دتحمل ..
فتحتهم ..

بقيت ارمش بعيني ..

هاي شنوهاي اني كاعدة ويا ..
وهاي ..ديصورني واني بالباص
وهاي محادثه ..

وللحكايه بقية
شهرزاد
سهرة ممتعه
❤️