ذاكرة الماء

الجزء العاشر

ذاكرة الماء

الجزء العاشر ...
ممكن ..اخذ رقمج ونتواصل بخصوص الرسم ..

بقيت صافنه عليه ماعرف شنو ارد ..
ولا اكول ..

بقيت ساكته ..

اندار ع شغلة .

كال رهف ..كتبي رقمي ..

الله ذب عليه شكو غباء وثول بالكون بقيت هيج .

صافنه ..

كال شبيج ...

عافني وراح ..

اني هم من فشلتي كمت ..شلت جنطتي وغراضي ..

اجه سريع ..

خله ورقه بيها رقمه كدامي ..

وراح ..
احسن الدنيا كلها تباوع عليه ..
عركت وصخنت ..

اخذته بسرعه وطلعت امشي سريع وكانما الكل شافني شداسوي ..
امشي سريع حتى من عبرت الشارع بدون تركيز ..
اسمع صوت هوررن قوي ..

صحاني من الخبصه الي اني بيها ..

عبرت ع الجهه الثانية ..
الى ان وصلت قريب ..

يلا كدرت اتنفس طبيعي

عبالك جان يركض ورايه جلب...

وصلت قريب البيت ..
دخلت ..

اول ما فتحت الباب صار بوجهي مروان ..

باوع عليه بنظرة استغراب ..
فزيت كتله يمه اسم الله

وين جنتي ..
دخلت جوة ..كتله هنا جنت يم الماركت جبت كم حاجة
..
محتاجتها ...

كال مروان هاي شبيج شالج متخربط ..وجهج مخطوف

عبالك وحدة راكضة ..

بقيت واكفه ثواني ..

اذا يطخني اعترف بكل شي ..

اباوع ع ايدي ترجف ...

كتله جيت انسحك ...

كال / مو اعرفج ثولة مو مال اطلعين وحدج

من اكولج ثولة تزعلين ..

يلا ..صبيلي غدة داروح اودي  والله تعبت من اروح وارجع ..

انوب امي صايرة فد مرة متنجرع ..تعبت

يلا فضيني ..
فزيت  ع صوته
بسرعه ..
اخذت جنطتي وصعدت فوك بدلت هدومي ومروان بعدة يصيح وينج ..

جيت جيت ...

نزلت بسرعه خليت الاكل اله بالحافظات ..
اخذة

وطلع ..

هنا بقيت ..صافنه واني واكفه يم السنك ..

ارتب الاكل ...

اني شداسوي ..

اني ما تذكر فديوم شخص ..اخذت منه رقم او انطيت رقمي لاحد ..

اني شداسوي ..بروحي ياربي ...
شداسوي بروحي شراح يكول عليه يوميه جايتني
وتريد اكعد واسولف وياها
وانوب بس ساكته ..
وهسة انطاني رقمه ..

ماعندي تجارب سابقه ..
ما اتذكر فديوم حبيت لو تواعدت ويا احد

اذا اعيد اغنيه مرتين بمراهقتي امي تكول عشكتي ..
واي رجال يدخل علينه من الاقارب فهم بغرفه واحنا بغرفه ماكو اي تقارب
اخر ولد سفته بحياتي هو بالمدرسة وماتذكر من طفولتي شي
بخص الشباب لان حتى لعب بشارع ممنوع
جنه نلعب احنا البنات بالطرمه
واذا اندكت الباب منفتحها الع واحد من الولد ابويه مانع هل الشي
بس مرات جنه نباوع من ورة الباب ع العالم الي رايح والي جاي وجانت احلى ونسه بحياتنا ..

ومرات منطلع ابد لان ابويه جاي عصبي من الشارع
والي يتنفس ينضرب. .

اي ينضرب هيج بلا سبب يطلع حجج ويضربنا ..

واذا امي دافعت النا هم تنضرب
محد بينه فكر ينتفض ع ابويه
ولا اخواني
كلنا راضين بي ..
.....

اول رجل بحياتي مروان جان ..

اول انسان لزم ايدي باسني تقرب مني هو ..
ماعرف غيرة

يعني حياتي عبارة عن مروان واهله
ماعرف غيرها ..

مستحيل اقبل وادك عليه لو اتصل بي ..

انتبهت ع روحي ..

كاعدة افرغ الاكل ..ع الكاونتر
بسرعه ..رجعته بالجدر ونظفت المكان ..

وانتظرت الاولاد يجون ..

اول ما اجوي فتحو الباب

وينها بيبي

كتلهم مو هنا بيبي بعدها مجايه ..

سنا / هاي شنو مو عساس اليوم .

تقربت منها حضنتها وكعدت ع ركبي...

سنا ..
نعم ماما ..

اني..ام صالحه الكم ..

باستغراب شلون يعني ..مدافتهمج ..

يعني تشوفوني ممقصرة وياكم تحبوني ..

يوسف واكف بصفها ..

كال / لا ..

رفعت راسي عليه ..

ليش ماما بيش قصرت وياكم ..

كال لا انتي ولا ابويه ..

احس بيكم اتمنى اعيش بغير عائلة
كل الاولاد امهم وابوهم يساعدوهم بالدراسه وبكل شي

يلا انتي تعرفين تقرين ..متعرفين
سنا كالت

ماما انتي  شكلج ولبسج حلو. .كلش قديم
اصلا استحي من تجين علينه ..
انتي حتى متحجين انتي ساكته دومج. .

انصدمت ..كمت كتله انتو شلون تحجون  ويايه هيج ..
شلون اني كاسرة ظهري عليكم
انتي تحملت كل شي علمودكم ..
انتو ليش متخافون مني ومحترموني
علمود ما اضربكم ..
جنه نرجف من صوت اهلنه مو عاد هيج انجاوب
صدك معرفت اربيكم ..

يلا صعدو فوك ما اشوف ولا واحد بيكم

........

عافوني وصعدو
اني شلون ارجعهم اليه شلون
اني مبن الكاها من جهالي لو عمتي الي جايه
لو من منو ..

شسوي ياربي ساعدني تعبت وحدي
محد يساعدني ..

رحت ع المرايا شبي شكلي
شنو الي بيه يستعرون منه ..

شكلي هادئ ما احب المكياج
كحل بعيوني ..وبس ..
حواجبي دوم اني اسويها ..
حتى صالون ما اروح ..

اني سمرة ..وشعري طويل  صابغته صاجي ..
عيوني مو كبار بس رمموشي طويله لونها جوزي
خشمي موالم وجهي لا كبير ولا صغير
شفايفي ناعمه
شكلي حلو ..
مابيه شي انعاب عليه
حتى زوجي دائما يكولي اتشبهين
ياسمينا الي تطلع ويا علاء الدين

بس هذا لبسي من العراق
اني لحد هسة مماخذة شي جديد ماعدا القماصل
لان مو كل شي يعجبني ..البس القديمات شبي
لبسي
والبس ربطه ..
حتى مو شال
ولا اخلي قراصه ترفع الشعر
كل شي  عادي وطبيعي
حتى اظافري دائما اكصها
....
يعني شسوي مثلا ..
كل واحد يريد مني شكل ..

...
عفت نفسي وكل شي صعدت ع جهالي بقيت احضن وابوس بيهم
اتمنى احس بيهم وهم يحسون بيه
واعتذرت منهم
وكتلهم شنو الي تريدو اصير
بس ما اريد اخسركم اني امكم
انتو اجيتو من روحي
ماعندي سي اغلى منكم من هل الكون كله بس انتو ..

نزلتهم اتغدو وبقوا يتعاركون ويحجون ويضحكون
رغم هل الهوسة
بس اني بوجوهم
سعيدة
مداعرف اعبر ولا اعرف شلون اكسبهم ..
.....
دقت ساعه الصفر واجتي عمتي ..
يمنا دخلناها اني ومروان
ووالجهال كلش فرحو بيها .

واني ..
بقيت صافنه عليها شلون
جانب كامل منها متاثر بالجلطه وشلون ع الكرسي ..
وبدا مروان يعلمني ..شسوي وشوكت انطيها علاج ويا حبايه وشسوي
اخذ نص الوكت
والجهال يمها ..
يبوسون ويشبكون بيها ..
وكف مروان
وكال شفني يمه مو داكواج هنا مكانج. الصح
شفتي الجهال شلون فرحانين بيج ..
هي تجاوب بس كلامها متقطع
يعني الجمل متطلع كامله ..

احساس غريب بين الحزن والرضا
استغفر اللع متمنيت انحط بهيج موقف ..
رغم ما اذتني بس جنت اتمتى ابتعد مو اكثر
والاصعب اداريها
مداكدر او مداتحمل الموقف ..

كال اني حنام هنا بين ما امي تتعلم ع الوضع ..

مر اليوم بين صاعدة نازله الدوا المساج
الدهن
والجمله كوة تطلع منها
نص يوم هلكت
بحيث ردت بس اخلي راسي ع المخدة اريد انام
حتى ارتاح
حتى اكوم للشوط الثاني ثاني يوم...

ثاني يوم كعدت من الصبح ريكت الجهال
وسويت اكل لعمتي ..
ورحت اوكلها
هي اديها اليسرى تشتغل عادي بس اليمنى
بيهت الجلطه تحسنت شويه ..
بديت اوكل واشرب جاي
ومروان طلع لشغله
بس الاكل ساعه يلا  كملت ..

بقت تخزر بيه

شكو كتلها ..

كالت غسلي الي ..
جبت مي وبخاولي ناعم مسحت حلكها ..
ورحت ع شغلي
وكل شويه اتصبح عليه ..
اروح
تكولي عدلي رجلي
كلبي القناه ..

فركي ايدي خدرت
خلي الي دهن ..
تعبت طلعيني برة ..
كوة شلتها روحي طلعت خليتها بلكرسي وطلعتها بالحديقه الجانبيه ..
اباوع  عليها من شباك المطبخ ..

صاحتني

تعالي رجعيني بردت ..

رجعت عمتي طفله ..
بس طفله مو مني ولا احبها
ومتعبة
اول مرة بحياتي الغدة هالكد يتاخر ..

اتاخرت ع كل شي بين ما اروح الها وارجع اكمل كم شغله ..
احس نفسي اركض ..
هنا وهنا
بيومها مروان اتاخر لان صار فترة يطلع من وكت
اجوي الجهال وبقو يمها
وراها ..صعدو
اني رحت يمها ومددت ع القنفه الي يمها
ما احس ع نفسي اله
مروان يكعدني ..
كمت

كال نايمه دنيا مغرب ..

كتله محاسه والله ..

كال ..اي محاسه وحفاظه امي طاكه..رهف ..

كلش تنرفزت ..اني شعلية ..

عمتي كالت اكعدها مكعدت يلا يمه رجعني واجيب معينه ترة مروان اني يوم واحد وتعبت ...مرتك متعرف شي
واني صرت ثكيلة
اوف لو عندي رجلين ..اوف

كال ليش معينه واحنا يمج والله ما ارضاها .
ع نفسي صدك تحجين يمه
من امداني اي والله امداني
اخلي الغرب تشيل امي
كلت بسم الله هاي اول يوم هيج ..
كتله اوكف مروان ترة نمت مصويت جريمه ..

كال ..مو
قاطعته وبعصبيه ..

كتله داكولك نمت ..مو متقصدة واذا ابالكم معينه جيبو افضل للكل ..

فتح عيونه عليه ..كلها
شللون ..
تريدين اذب امي ..

كتله لا تذبها ولا شي

صاح رهففف ..
عفته ورحت للمطبخ ..
وبقى يحجي ويا امه ماعرف شيكول
بس عبالك مو نمت اجرمت ..

اجه يمي

رهف فدوة لعينج كم يوم تحمليها ..
يعني لخاطري ..
هل كم يوم وبعدها شوف تجي ميلاد ونقرر
نشوف شنسوي
انتي الكبيرة الراكزة الي تفتهمين

كتله مصار شي
بس كم يوم مروان ..

مروان كدام اهله يعيش دور البطوله اكثر
ويعيش الحماس
وكل شي كدامهم يبرزة اكثر ..
واكثر ..

...
اخذت الطاسة والملحف ونظفتها مثل مدانظف طفل
حتى كريم وبودرة اخلي لان بدايه قرحه الفراش ..
ولا حمدا ولا شكورا
وكانما هذا واجبي
ومناك ميلاد تخابر
سودة عليه امي وسودة عليه
وعساها بالي يكرهوج

وهل الحجي الي يكصر العمر
.......

خلص اليوم بركض
مصدكت صعدت فوك اريد اندل الجربايه مين
طفيت الضوة ..

مثل كالعادة بدلت..

دخل مروان ورايه
بدون كلام ولا نقاش
نزع ملابسة و اجة كبل يحضني ويبوس بيه بوساتة تتناثر بتسرع يريد بس يكمل وينام ..

تقززت الوضع...  ما احس بيه..  وتعبانه ..والف شغله براسي

كل همه مصلحتة..

رجع باوعلي  لحظة وهو يتقرب مني بكل استعجال...

شوي وذب جسمه جانب يمي وهو يتنهد..

ـ الشغل اليوم هواي وتعبت.. وتفكير
زين من الواحد يمارس حياتة الطبيعية ..

سحبت فوني  متجاهلتة و هو يباوع

ـ ما ناوية تنامين

ـ لا مجايني نوم.. 

ـ شبيج شو تحاجيني بثكل.

الاحساس داخلي صار معدوم حتى العشرة الزوجية صارت حالها من حال شغل بيت وواجبات و يلة نخلص ننام..
ماكو مشاعر ولا غزل. ولا حب
  من جنت مراهقة جنت احلم بالفارس و مشاعر  حب رومانسية و نلتقي  حتى جوة مطر او ضباب ما يهمنا..
شي
بس الواقع تعيس ..

حتى النومه طارت من عيوني
عفته ..يشخر
ورحت اسبح

رحت للحمام فتحت المي بالبانيو
وكعدت ع حافه البانيو
وبيدي التلفون ...اجه ابالي خالد
رجعت ع الغرفه بسرعه سحبت جنطتي ع كيف و اخذت
ورقم خالد
ورجعت للحمام
صافنه اراسله لولا متردده كلش
شعور اول مره احسه..
ذبيت الفون لا ما اراسل ..
ليش داسوي هيج ..
رجعت اخذت الفون
دارسل رساله كتبت هلو وحذفتها
قبل لاارسلها
رجعت كتبت هلو اني رهف ومسحتها متوتره حساس جديد
بس بقى الحذف ..

راسا
دز رساله

يا هلا ...
بسرعه جاوبت
كتله اني رهف

كالي عرفتج

كتله شلون ..

كال حسيت انتي راح تراسليني بهيج وقت

سكتت ماعرفت شكوله..

كتله شلونك
كالي تمام وانتي

كتله تمام..

كتله بعد شلونك ..

دز هههه هم زين وانتي ..

دزيت

راح انام

جاوب انتي مراستلني حتى تكولين الي راح انام

دز سمايل واحد فاتح عيونه ...

مارديت..حذفت كل شي ..وطفيت النت ..

بداخلي شعور ماعرف شلون اوصفه
خوف ع فرح شي غريب..
ع ضوجه ..
شعور غريب ..

كمت للمرايه اباوع وابتسم شبيه حلوة جسمي حلو و حتى وجهي حلو ..

غسلت وجهي وسبحت

حطيت ماسك لبشرتي واني ابتسم..

والله اني حلوه ويرادلي شويه تعديلات
باللبس والبشره ومكياج

ليش هيج مكبره نفسي

ليش ماتعلم السياقه
ليش اسمح لمروان يكولي انتي ثوله
ليش ؤجبرني ع اشياء ما اريدها ..

لازم اطب جم
واتعلم سياقه اطب مراكز تجميل
اغير قصه شعري اغير طريقه مكياجي
اني مناقصني شي
بقيت وقت طويل بالحمام افكر
ليش وليش اجتي بالي وقررت راح
اتغير من باجر اطلع اجيب ملابس وروح صالون اغير شعري قصته ولونه

اخاف مروان ميقبل وعمتي شلون ..
وارجع واكول لا مياخذ من الوقت هوايه . .

اووف تعبت من الافكار ..

مروان كلشي وكال متعرفين ثوله

طلعت من الحمام واني كلي نشاط وامل
وحب للحياه
نمت اول مره بحياتي واني افكر شسوي وشغير بنفسي

وكعدت الصبح ع صوت مروان حضرتله الريوك ..

وريكت عمتي ..

وعمتي رادت سمج ..

وماعندي ..

مروان كال جيبي من الماركت
تندلي مو

كتله اي

كال رهف دخيل ربج ..انتبهي زين مو جيبين غير شي 
اعرف دماغج  ميشتغل عدل .

جاوبته ليش ميشتغل عدل مروان

كال هاي شبيج اشاقه . ...

وصعد فوك يبدل

رحت ع مروان كتله مروان اني اريد اطلع اريد اشوف الناس اريد اعيش حالي حال العالم
هو جام ديبدل ويباوع صفح عليه
يتحضر يريد يروح للشغل
كالي انتي متفتهمين الناس بره
مومثل ماتتصورين الشارع شنو وشلون ناس بي

كالتله ليش مقيدني عوفني اجرب خليني اشوف اتعلم ماكو شي مستحيل

كالي انهي الموضوع طلعه ماكو هذا بيتج وكعدي وحمدي ربج..روحي جيبي مسواك حيري بجهالج
وامي وخلص ..
عافني وطلع...

كمتت رتبت كلشي... ونزلت للسوك اجيب سمك

ومن داطلع راحت عيوني ع الكوفي..

عبرت الشارع وطبيت اباوع بعيوني ادور ع خالد...

لكن ماشفته وكعدت ع الطاوله واجاني النادل طلبت عصير...

اجتني بنيه كالت ادورين ع خالد...

كلبي وكع من الخوف كتلها
لا ياخالد اني جايه اتسوك
وتعبت وطبيت اشرب عصير.
باوعتلي
كالت ترا عادي كولي جايه علمود خالد هو صديقنه كلنه
اني سكتت استغربت

شنو صديقنه كلنه ...

بسرعه البنيه عرفتني ع نفسها
كالت اني ساره من العراق
اشتغل هنا

وخالد اجازه اليوم

راح يقضي يومه ويا عائلته

كتلها اني رهف وبيتي قريب منا

بس بداخلي ضايجه من كلامها ماعرف شعور غيره او شنو احساس غريب..

حسيت خالد متاح لكل البنات

رادت تسولف تعذرت منها وعفتها وطلعت

انقهرت  بداخلي كمت رجعت للبيت...
دخلت للبيت خليت السمك جوة المي ...
دخلت ع عمتي ..
مجرد ما شافتني

كالت وين جنتي

ليش اتاخرتي مشوفين اني مريضه عاجزة

واريد احد يداريني

شعندج هالكد بره....شدسوين ..

اني من كلام ساره قلبي  يفور ...

من القهر وهي مستمره بالحجي...

تعالي قيسي ضغطي
ونطيني اكل
وعدلي فراشي
فركي ايدي خدرت

اريد اكل قبل الدوة

انتي ليش متتحركين

وكومه طلبات عبالك اني انسان الي
ولازم كلهن اسويهن بنفس اللحظه
تعبت حيل تعب منها
علما افهم كلامها وقت وعلما اتحرك وقت ..

وينج ..راح اختنك شربيني مي
من الله لا يوفقج
ولا يوفق ابني ذبني عليج ..

وكفت كبالها كلت الها..

بكل غضب اني اكرهج....
واكرهه ابنج واكرهه نفسي
واكره اليوم الي عرفتكم بي واكره حتى جهالي
شتريديييين كافي اسكتي دخت اسكتي اسكتي

لزمت حلكي ..واني مصدومه شنو حجيت ..
سديت حلكي بقوة
وهي تباوع عليه ..
............

انقطعت سلسله القراءة بدفتر رهف ..
باتصال ...

وانقطع كل شي وياها قبل لا افكر منو خالد وشنو الي صار بينه وبين مرتي

اباوع هذا رقم عمي ..الجبير ..

بقى يرن كلت اكيديسالون عليه ويطمنون ..

مجاوبت
انسد رجع اتصل مرة ثانيه وثالثه ..

وبعدها اتصل ابن عمي ..

هنا قبل لا اشرب مي وابل ريكي بصدمتي برهف ..

خفت لاصار شي بالعراق مهم ..

لان اتصالاتنه محدودة ..

جاوبت
نعم

ابن عمي ..وينك ابو يوسف

جاوبت شكو صاير شي

كال شكو شصار يمك انت وينك وبصوت عالي ويعيط عليه ..

اهل زوجتك هدو علينه بليل ..

ودكو بيتنه وبيتكم مكتوب عليه مطلوب عشائريا
وانطونه عطوة ..

نجيب عمامنه ويفصولنه ع موته ام يوسف
يردون فصل ..

.....

وللحكايه بقية .

شهرزاد ..