« الحلقـــــه الاولى »
روايـــــــــة
«هل كانَ حلماً...؟»
( ارواح ــ مُهشَمه )
بقلمي... لؤلؤة_البحار
... 2009ــ2010...
:- المو گد المسؤوليه ليش يخلف هايه الكلمه دائما ترن بأذني كل مااشوف رتيل تعبانه من شغل البيت ومن مسؤوليتنا الصبعه
صداها يصدع وينقر براسي كل ما اشوف مقدام يطلع من الصبح لليل يلا يرجع تعبان وهلكان من الشغل...
بوجهه لفراشه ينام من گد التعب اليشوفه
كلمات هالجمله تضرب بشريان گلبي من اشوف نضرات رتيل لمقدام نضرات الخوف والقهر عليه
ليش خلفونا ليش جابونا ع هالدنيا اذا همه مو گد المسؤوليه؟
دائما ما اتسائل بس ما الگه جواب لسؤالي
مدده بالاستقبال وحاطه المخده ع راسي اضغط عليها بقوه احاول امنع اصواتهم ومشاكلهم انو تتغلل لمسمعي...
بعدتها بقهر اصواتهم عاليه ولو احط جبل ع اذاني هم اسمعهم التفتت عيوني لسالي
گاعده بزاوية الاستقبال لازمه الكتاب بإيدها وصافنه.. جريت الكوشه شمرتها بيها
باوعتلي... اقري وين صافنه!
سالي... ليش برئيج اليسمع هيج اصوات حلوه الا نفس يقره بعد؟ حجتها بأبتسامة سخريه.
حُره... حقج بســ.... قطع كلامي صوت ابويه العالي وهو يگول
شعلان ... منو يڪول ذوله جهاليي... حجاها وهو يكسر بالغراض...
حُره- فتحت عيوني مصدومه من كلامه
ابويه كل ماجاله يتحاقر ويانه حيل بس مجنت متوقعه بيوم يشكك بينه ويتهمنه احنا مو جهاله...
ماما تصيح بصوت عالي... جهاااال منووو لعد لكك شعلاااان تتهمنييي..
شعلان ... ماتهمتج اني گتلج منو يگول جهالي بس البعبه طلي يمعمع لو ما صدگ مو جهالي جان ما انقهرتي.
اميره ... ياااا شعلاااان شبيك قااابل اني مثلك غير انته گوا... ودتشوفني بعين نفسك...
حُره... گمزنه من مكانه ع صرخة ماما وشي تكسر فتحنا باب الاستقبال طلعنا ابويه لازمها من شعرها ويضرب بيها ورتيل تحاول تبعده عنها وتصرخ بعلو صوتها
متگدرله هذا مو بشر هذا مثل الغول يشبه كارتون حسناء والوحش بس هذاك الوحش ارحم من هذا مجان يضرب
باوعت للگاع موبايل ابويه الدوز مطشر بالگاع تطشر
لبدت وره التلفزيون ارجف خوف دموعي تنزل واني اشاهد المعركه الگدامي
سالي حاضنتني وتبجي بصوت وتصيح... ماما ماتت ماما ماتتت مقدااام ماما ماتت
التفتت عليها عيونها ع باب البيت وتصيح...
باوعت لمكان عيونها مقدام شمر العلاگه البيده واجه يركض
دفع ابوي بعده عن امي وصار بنصهم وابوي رجع هجم ويغلط ويفشر بصوت عالي
مقدام بنصهم ويحاول يبعد ابوي ويدفع بيه
رتيل جرت امي وهي تغلط على ابوي طببتها للغرفه
ابوي اندار ع مقدام متخبل شلون تمنعني اضربها...
ضرب مقدام بوكسي على وجهه خشمه دار دم رفع ايده لخشمه مسحه بردن قميصه وهو ساكت يباوع الابويه بنضرات حاقده
شعلان ... اياااا ڪوا.... د يا ابن السا... منو گلك تدفعنييييي
مقدام ... ليش شنو شفتني بلا غيره مثلك حتى اخليك تمد ايدك عليها گدامي؟ حجاها بأستهزاء وهو يبصق الدم من حلگه
حُره ... ابويه تخبل شنو يگله هيج لزمه من كتفه جره لباب البيت وهو يغلط ويفشر
فتح باب البيت دفعه بره البيت... ممنووووع تلفي بهذا البيت بعد فااااهم واذا شفتك هنا الا اكسر راسك... ابن *****
حجاها وهو يدفع مقدام بره البيت ويطبگ الباب وراه طب يفشر ويغلط جريت سالي ورگضت للاستقبال
طببتها طبيت سديت باب الاستقبال ووگفت وراها واني گلبي يرجف
اجر النفس بقوه احس رجليا متعيني وبعد تگدر تشيلني..
ساد الهدووء بالبيت ماكو صايح ابويه ولا غلط امي
ماكو غير صوت شهگه موجوعه وانين ملچوم ومخنوگ شهگتي الطالعه من نص گلبي
وانين سالي الخانگته بأديها خوف لايسمعها ابوي ويجيها مسحت دموعي الباب رادت تنفتح بس لان اني وراها وراجعه عليها بقوه مانفتحت
رتيل ... وخري من وراها راح افتحها... حجتها بهمس
گمت من مكاني رحت گعدت يم سالي طبت رتيل عيونها حمر التفتت علينا اجت گعدت بنصنه واخذتنه لحضنها...
گاعدين گبال شباك الاستقبال راجيه ظهرها ع الحايط واحنا بحضنها صافنه عيونها ع الباب
حُره... وين صافنه رتيل... حجيتها بتساؤل
رتيل... دافكر بمقدام وين راح خطيه وهو راجع تعبان وهلكان من الشغل وابوج خوش تلگاه ملگه... حجتها بحزن ودموعها نزلت...
...ربي تعبنا من هيج عائله تعبنا من هموم مو عمرنه شنو ذنبنا الديصير ونشوفه
مقدام شنو ذنبه يشتغل عماله من الصبح للعصر يرجي يرتاح شويه ويرجع يطلع يشتغل حمال
بس حتى يعيشنه بس حتى يجيبلنه الگمه بدال ميحتوه ويحافضون عليه جاي يدمرو شويه شويه
مسحت دموعها بقهر حجت بعصبيه... والله زين ومنا ماطلع من الطريق زين ومنا محافظ علينه وعلى نفسه وماراح ويه هالاشكال التعبانه
حُره... اباوع عليها مقهوره لسانها سكت بس عيونها الفاضحاتها شيسكتهن...
سالي غفت بحضنها وهي غمضت عيونها تحاول تهدء نفسها اعرفها رتيل من النوع الهادئه والي تتحمل كل الضغوطات بنفس راضيه...
نادرا مااشوفها تشكي من شي كتومه ومتشكي گدامنا
حتى مقدام يشكي گدام رتيل بس بد ميشكي گدامنا اني وسالي
دائما يحاول يعوضنا وميحسسنا بـ نقص...
سحبت نفسي على كيف حتى متگعد سالي گمت فتحت الباب طلعت لبست نعالي وطلعت من البيت
مقهوره ومهمومه وطافره روحي من الدنيا والبيها دا امشي شفت حياة اجت من الفرع الثاني اني نزلت راسي ومشيت
ما اريد التقي بيها مهمومه الدمعه بطارف عيني بس تگلي بزز ابجي
حياة ... سسس اسسس... تحرك لسانها وتهمس بهدوء
من تشوفني تسويلياها بمعنى تعاي
ما التفتت عليها غلست ومشيت طالعه روحي وما اگدر اسولفلها هاي المشكله احسها عيب
صح تدري اكو مشاكل بس متدري بأهلي تاركينا فدنوب وهاملينا وصلت لنهاية الفرع
جريت طابوگة بناء زغيره گعدت عليها اخذت عوده وبديت ارسم بالتراب
رفعت راسي باوعتلها تمشي بإتجاهي وهي تباوعلي بخوف..
وصلت ليمي... هاا شكو شبيج ليش زعلانه؟ حجتها وهي تباوعلي بقلق
... مابيا شي... همست بهدوء
حياة... انجبي زماله مبينا موطبيعيه يلا احجي شكو..؟
حُره... رفعت راسي عليها... ليش الشخص الزين الله مينطيه كلشي يريده؟
حياة... شلون يعني؟
حُره... يعنــ قطعتني وهي تڪول
حياة... اوكفي
راحت جابت بلوكه لونها ابيض جبيره (ثرمستون) گعدت عليها
حياة ... اي احجي..؟
حُره... ليش الله مينطي كلشي نريده؟
قبل ايام طلع بالتلفزيون اجنبي قاتل وبايگ لمن واگع ع صفحه وطالع للخارج عايش عيشة ملوك
ليش الله منطيه اله وهو شخص سيء واحنا الاشخاص الزيينين مينطينا النريده ليش؟
حياة... ليش احنا شناقصنا؟
اشو نگدر نفكر ونسمع ونحجي ونشوف وگلبنا طيب وين اكو احلا من هيج!
حُره... حياة هذا كله مو كافي.. حجيتها بألم
حياة... شنو الي زاعجج بحياتج احجيلي يمكن نتساعد بيننا...
حُره... حياة اني اتمنى لو ماعندي ام وابو حتى مرات اتمنى لو عايشه عند غير عائله... حجيتها بقهر وألم يلسع بگلبي
حياة... ليش...گالتها بحزن
حُره... لان اثنينهم مأذينا ثنينهم يخونون
ويتعاركون
اربع وعشرين ساعه مشاكل وعرايك
حتى تعبنا تفسيتنا تعبت حيل..
شوفي نوران عايشه ويه اهلها احلا عيشه
ابوها لو تطلب عينا يگلها ماتغلى عليج.
واني ملابس داخليه ماعندي !
حياة... بس انتي متعرفين كل ظروفها؟ حجتها بهدوء
حُره... هزيت راسي... كلشي يهون الا الاهل
اذا اصلحو ولدهم اكيد يطلعون حبابين ومرتاحين مثل نوران
واذا لا يطلعون معلعلين مثلي
حياة... حُره انتي ليش تباوعين للي اعلى منج؟
باوعي للي ماعنده النعم مثلج
بيبيتي تگول كل واحد عنده نقص يحاول يعوضه
مثلاً اني حلوه كلش بس فقيره واكو وحده تشوف نفسها مو حلوه وهي غنيه
وتحاول تجمل نفسها بهالفلوس
اكو الي عندهم اهل ومعندهم فلوس
واكو الي عندهم فلوس ومعندهم اهل والي معندهم الاثنين الكل عنده نقص !
حُره... واني شلي بأهلي عاد الفلوس تفيد.. حجيتها بقهر
حياة... لتحجين هيج الفلوس تروح وتجي بس الاهل غيرج يتمناهم حتى لو قاسيين
ع الاقل ابوج معترف بيج وامج رغم اخطائها لسه يمج وتسأل عنج ماشمرتج ع الغير... حجتها وخنگتها العبره
حُره.. حياة اني ممرتاحه ويه اهلي.. همست بحزن
حياة... ولا اني مرتاحه ولا اهلج مرتاحين كلنا ممرتاحين... همست بألم
حُره... ليش ممرتاحه... همست بتسائل..
حياة... متشوفين وين صفه بيا الحال بيبي مره جبيره وتعبت واني داحس لازم اساعدها... همست بقهر
حُره... انتي اهلج متوفين؟ همست
حياة... ياريت... همست بدموع
بس يلا نتحمل بيبي گالت الي الله يحبه يتعذب بالدنيا
وبيبي تگول الانسان لو يبدي حياته معلعل وبالاخير يرتاح
لو يبديها برفاهيه وبالاخير يتعذب
حجتها بتأمل وهي صافنه
حُره... سولفيلي عنج... همست
رفعت عيونها باوعتلي... سولفيلي عنج يمكن اقتنع ان الاهل اذا مموجودين الشخص هم ميرتاح !
حياة... احجيلج سر ميطلع الاحد غيرنا؟ حجتها بهمس
حُره... احجي... همست بهدوء عكس الضجيج الداخل قلبي...
حياة... بالتسعينات امي تعرفت ع ابوي... همست بأبتسامة سخريه...
............1995...........
الموصل...
مشعل:- احمم ميثاء ليش متوافقين ع الموضوع السولفنا بيه ؟
ميثاء... دحقت عليه بغضب... انا قلتلك اذا مو عقد محمكه ما اوافق ع الزواج..
لاتحاول تقنعني لانو مراح وافق
مشعل... تعرفين اني احبج واريدج تصيرين حلالي فـ ليش داتصعبين الموضوع ياعيني
... عن اي حب عدتحكي انا ماطلبت غير حقي اش فرقي عن مرتك ليش هي عاقدلها محكمه وانا لا رافض تعقدلي؟
دحق مشعل اذا ماتعقدلي محكمه مستحيل افكر اتزوجك تمام!
جر نفس وزفرو بهدوء... تمام راح نعقد محكمه بس اذا اسمع مخلوق عرف اطير راسج فهمتي
تعرفين اني رجال مسؤول ومعروف بالدوله والزله ملموسه عليه بس يردوها عليه حتى يشهروني
وبنفس الوقت اهلي وعائلتي ممنوع يوصلهم شي فهمتي؟
ميثاء... دحقت عليه بأبتسامة استهزاء.. تمام فهمت
وصلني ع البيت وغاح لبيتو
فتحت باب بيتنا دخلت واني ادحق ع امي وينها صحت
... امي وينكي؟
بهية... انا هوني بنتي تعالي
ميثاء... اشبيكي امي ليش ماسكه راسكي... تقربت عليها بخوف
بهية... مابيني شي غاسي واجعني شوي واخذتلو حبة غاس.. الا قوليلي وين كنتي ليش تأخرتي..
مَيثاء... امي راح اقوللكي شي بس بترجاكي توافقي.. قلتها بتمسكن
بهية... ايش غايده قولي
مَيثاء... رحت قعدت جنبها... امي في ويحد اصلو من بغداد بس جايه عالموصل وساكن هوني حابب يتقدملي ع الزواج ونسكن هوني بالموصل قريب عليكي ايش تقولي موافقه اتزوجو..؟
بهية... دحقت عليها متفاجأه... ايش تقولي يابنتي اشو موافقه ما موافقه بالاول يجي لهوني عالبيت ونشوفو ونتعرفو عليه وبعدين يجيبو عائلتو ونتكلم بهذا الموضوع
مَيثاء... بس يا امي هو ماعندو اهل كلياتهم متوفين وهو صديقي واعرفو حق المعرفه
وحاكاني بموضوع الزواج من زمان وقالي انو حابب يتقدملي بس انا كنتو ارفضو
بعدين فكرت وافق لانو بايين عليه يحبني ومتمسك فيني ومالازم ضيع هيكي فرصه
دحقتلي بطارف عيونا... اي فرصا مالازم تضيعينا
مَيثاء... رجعت شعري وغا اذني دحقتلها بأبتسامه... فرصة انو يحبني ملازم اضيعها بهالزمن قليل نلاقي غجال يحب ويصون...
... قوليلو يجي لهوني حتى نتكلم معو وان شاءالله خير...
مَيثاء... فرحت كثيغ قمت من عندا وانا مبسوطه ...
ثاني يوم قلتلو ع القالتو امي وقلتلو ميجيب سيرة زوجتو الاولى واهلو قدامها لانو قلتلا ماعندو اهل...
وغا ايام اجا ضيفتو امي وقيعدت تحكي معو شويه واترخص قام وغاح قال عندو شغل كثيغ
بهية... يابنتي انتي واثقه من زواجكي منوو مباين عليه متوبع (ملعب) قلبي ما اغتاحلو
مَيثاء... لا امي ماعليكي من شكلو قلبو طيب كثيغ وانا حبيتو وكمان الي زمان اعرفو
والمثل يقول.. خذ الشين التعرفو احسن من الزين الماتعرفو...
بهية.. قصدج تعرفينو هو شين ومتوبع (ملعب) صح..؟
مَيثاء... لا طبعا امي بس قصدي انو الاعرفو احسن من الماعرفو وماطولو شاريني ويحبني ايش اغيد اكثغ من هيكي..
بهية... خلص بنتي الله يهنيكي ويسعدكي ليش انا ايش اغيد غير سعادتكي...
مَيثاء... بعد فتره اجا لعند امي واتفقو عالزواج وع المقدم والغايب اشترالي بيت قريب ع امي اقعد فينو...
غحنا سوا جهزناه ورتبنا من كل المستلزمات المنزليه امي ماكان عاجبها مشعل ماحبتو كثيغ
دائما تقولي انو هي تحسو متوبع (ملعب) وقلبها مامرتاحلو هو صح انا اعرف بيه متوبع بس مو مهم المهم عندو فلوس كثيغ وهو شخص معروف كثيغ
رجعت للبيت هلكانه وتعبانه كثيغ... اشونكي امي
بهية... مليحه تعالي مَيثاء لنحكي...
مَيثاء... تقربت عليها قيعدت جنبا... خير امي اشبيكي؟
... دحقي بنتي انا روحت وسألت عنو لـ مشعل الصراحه مالقيتو عنو شي لانو مالو زمان بقعدتو هوني بالموصل مصارلو غير كم شهر
بس يابنتي ما اعغف ليش قلبي واجعني منو حاسستو متزوج او مخبي علينا سغ كبير
مَيثاء... عنفصت (عبست) وجهي عليها... ايش تقولي يا امي عقولكي انا اعرفو كثيغ وهو غجال كويس ومابينو عيب
بهية... سكتت وانا قلبي واجعني...
مَيثاء... قمت من عندا... دخيلو لـ الله قديش بتسأل قلتلك انا اعرفو وخلاص ايش هالتفكير وغايحه تسألي عنو...
وقفت بصمت.. لو عرفت انو زواجنا مؤقت شو عتعمل يا ترى... دخيلو لـ الله اكيد بتجن
... نفضت راسي من الافكار المشؤومه... ليش اذا انا ماقلتلا منين تعرف..؟
وغا يومين تم زواجنا وانتقلتو لبيتي بصف بيتا لامي ما اقدر اتركا وحدانيا
اتفقنا انا ومشعل مانجيبو اولاد
لانو زواجنه مؤقت
قمت كل يوم اخذ منو مصرف واشتغي بيهم ذهب واضمو ما اقولو لحدا اشتغيت
واحيانا اشتغي بيهم حواس (هدوم _ملابس)
واحيانا اجمع بصندوق صغير مندون ماحدا يعرف... وغا زواجنا بثاثي (3) شهور مشعل بايت عندي جاه اتصال ع التلفوني الارضي..
سمعتو عديحكي مع ويحد من اهلو..
مشعل... تحجي صدگ يعني حامل... الف الحمدلله الف الحمدلله
مَيثاء... اكيد زوجتو الاولى حامل انزعجت كثيغ رجعت للغرفه ونار الغيره شاعله بقلبي
ليش ما انا احمل مثلا..!
خلاص بساوي طفل وع الاساس انا مااغيدو وصار غصب
وخلينو يورث فلوسو الابو لانو انا زوجتو مثلي مثلا...
ابتسمت و قررت انفذ خطتي قمتو ماخذو للمانع واعمل نفسي اخذو بس زتو بالسغ
وغا شهر ونص غابت الشهريه عندي غحت حللت طلعتو حامل كثيغ نبسطت
رجعت للبيت انتظرتو يجي حتى اقلو وادحق ردت فعلو
بس فاجئني بجنونو وانو ما يغيد الطفل
... ليش ماتغيدو صار وخلاص اش اسوي انا
مشعل... گتلج واتفقت مسبقا زواجي منج مؤقت وطفل مااريد وهسه ترحين تنزلي حالاً
... لااا ما اغوح ولا انزلو انا اغيدو للطفل وماغاح نزلو لو شو ميصير
مشعل... لعد موتج ع ايدي يصير انتي وطفلج
مَيثاء... خفت كثيغ ليغوح يسويها ويقتلني قلتلو.. خلاص اعطيني فلوس الي ولطفلي لحتى اامن حياتو وانا اخذو وسافر للخارج وانت عيش حياتك..
.. هز غاسو موافق غاح طلع للمسا رجع ومعو فلوس كثيغ بالملايين
قالي...
... اخذي الفلوس وسافري ولا اعرفج ولاتعرفيني لا انتي ولا الطفل البطنج تمام وباجر من الصبح بالمحكمه اطلگج...
غاح طلع قيعدت مبسوطه كثيغ لميت حواسي (هدومي) اخذتوم وغحت لامي
بهية... ايش صاير بنتي ليش جايبه كل حواسكي معكي
.. امي تعاركت مع مشعل وقررنه نتطلق
فتحت عيونا بصدمه.. ايش تقولي بنتي ليش تتطلقو ايش صاير بينكم
... ماعاد غيدو ماتفاهمنه وحياتو صعبه كثيغ قررت اتطلق منو واتفقنا غ عاهالشي
بهية... ليش الطلاق سهل يابنتي رجعي عقلكي لغاسكي من البدايه قتلكي مااغتاحلو قلبي بس انتي اصريتي علينو
... ماعيلنو يما انا قررتو وخلاص مااغيد اغجعلو اغيد اتطلق وعيش حياتي..
بهية.. وشو اقولو للعالم بنتي الما الها غير اربع خمس شهور من تزوجت وتغيد تتطلق
ماغاح يطلعوكي ويحده عايبه وطلقكي..
مَيثاء... وليش يهمك حكيي العالم اكثغ من بنتكي شنو نغيد من حكيي العالم المهم احنا نعيش مرتاحين مو مهم العالم شو عديحكو عنا...
قلتها وانا اطر (اشمر) جنطة حواسي (هدومي _ملابسي) واغوح لغرفتي..
بهية... لاحول ولاقوة الا بالله ايش غاح اتصرف ايش اعمل...
ثاني يوم قيعدت غاسي مورم كثيغ الليل كلو مانمتو من التفكيغ
دحقت بغرفتها ماموجودي وين غاحت غحت حطيت الشاي ع النار وقيعدت ع المحفوفه (الزوليه)
شوي ونفتح الباب دخلت مَيثاء
... اشونكي امي
... مليحه وين كنتي
... بالمحكمه... تطلقنا امي خلاص..
.. فتحت عيوني بصدمه ايش هالكلام من دوني ماتقوليلي غوحتي وتطلقتو..!!
.. اتفقنا ع الطلاق وخلاص امي لتفكرين بشي
... والطفل البطنك مافكرتي بينو شلون غاح يعيش من دون اب
مَيثاء... مثل ماعشت انا
بهية... بس اكو اختلاف انتي ابوكي متوفي طفلكي ابوه عايش!
مَيثاء... نعتبرو متوفي عادي... قلتهاا ببرود وانا ااغوح لغرفتي
امي ماقبلت نقعدت بالموصل عتقول ما اقدر اتحمل حكيي العالم
قررت تروح للحله وتسكن هونيك تفاجاءت بس ماحكيت شي وغا شهر بعنا بيتنا وغحنا للحله لنسكن هونيك اجرنا بيت وقيعدنا
دخلت شهري التاسع الي ايام بيه
ببداية سنة 1996 نص بشهر الويحد بالليل نايمه وعد احس الم قوي كثيغ ببطني قمت اتلوى وابكي بصوت عالي
بهية... عندكي ولاده يابنتي قومي اخذكي لعند القابله هوني قريبه الجيران دلوني عليها
... غحنا للقابله ظليت اتلوى وابكي من الطلوق ورى كم ساعه يلا قدرت اولد بنوته كثيغ حلوه...
اخذتها امي والقابله يغسلوها ويلفوها بين ماارتاح شوي ونغوح لبيتنا
بهية... دحقت عليها كثيغ حليوه... يحفظك الباري يابنتي
رفعت التلفون الارضي اتصلت علينو احاول احنن قلبو على بنتو مااغيدها تنحرم من حنانو لابوها
جاني صوتو... نعم
... اشونك مشعل..
.. الحمدلله منو
... انا اما لمَيثاء..
.. اهلا وسهلا تفضلي
تنفست بقهر... مَيثاء ولدت بنوتي كثيغ حلوه ماتغيد تشوفا..؟
مشعل... اتفقنه تاخذ الطفل والفلوس وتسافر فليش اشوفها بعد اساسا اني ماردت الطفل يجي وردتها تنزله بس هي گالت تاخذه وتسافر ماسافرت؟
بهية... قلتلو بقهر... ايش عدتقول ياابني في ويحد مايغيد ابنو ايش الخلاك تتزوج اذا ماتغيد الاطفال
... هذا كان اتفاقنا زواجنه مؤقت ومانسوي اطفال بس هي كسرت الاتفاق وسوت الطفل ولو مااحبها واعزها كان هي هسه بخبر كان ولـ الله يرحمهم...
... ايش عدتقول ياابني!! اتفاق بينكم اي اتفاق؟
... مسولفتلج؟ اتفاق زواجنا مؤقت ومابيه اطفال لان مااريد عائلتي تعرف واني متزوج مو اروح اخرب عائلتي وحياتي علمودها؟
راح ادزلج فلوس للطفله وسميها ( ازهار)
وبعد لتتصلين وتحاجيني
بهية... مصعوقه من كلامو سديت التلفون وانا بهتانه بنتي ماقالتلي هالكلام
ااااه ياربي واقول قلبي واجعني من البدايه ظليت ادحق عالطفله العمرها اسبوع والقهر غاح ياكلني
لليل انتظرها وماجات اتصل الارضي غوحت رفعتو
الوو
... امي انا حسافر تعرفت ع شخص من الموصل يحبني كثيغ غاح نتزوح ونسافر...
... ايش تقووولي انتي ايش تتصخمي تتزوجي وبنتكي عمرها اسبوع معقولي انتي ام!!
... يماا انا احبو وغاح اتزوجو قلت اقللكي حتى ماتبقي قلقانه وبنتي انتي ربيها مااغيدها..
بهية... تفففففف عليج وع الخلفتج ولييي وبعد لتتصلين ياقليلة تربيه ... طريت التلفيون وكسرته
اااااخ يااااقلبي حسااافه ماعغفت اشون اغبيها...
ــــــــــــــــــــــــــــــــــ
حُره...تحجي بحرگة كلب وقهر واني ابجي عليها يمكن فعلا حسيت ان حياتي والدايصير بيها شي بسيط گدام حياتها...
حياة... عمري شهرين واني ابطن امي وابوي نكرني وعمري اسبوع واني بالحياة امي تركتني يم بيبي وسافرت تزوجت وشافت حياتها
ظليت اني متعلعله بيبي مره جبيره وتعبانه وحايره بيه
باوعتلي بدموع.... شفتي ؟
شفتي ان حيااتج اهون من حياتي؟
شنو الاسهل ان تعيشين ويه امج وابوج
الي مهما سووا تدرين بيهم يحبوج لان ماشمروج بالشارع
لو ان تعيشين وحدج ويه مره جبيره فنت عمرها عليج وانتي تشوفيها تتأذى الاجلج واهلج عايشيين وناكريج..
حُره... زين شنو متزعلين... همست بألم من بين دموعي
حياة... ازعل وابجي وانقهر بس بيبي تگول كلشي يصير بهايه الدنيا بيه خير النا ...
حُره... صفنت عليها متألمه حياتها مو احسن من حياتي... گمزنه ثنينه متطافرات ع صوت الجامع من اذن
حياة... يااا عزاا هسه بيبي تقلق ويظل بالها
حُره... هسه الگه رتيل لازمه سلاحه واگفه اباب البيت... حجيتها مبتسمه..
حياة... اي سلاح..؟ حجتها بتساؤل
حُره... نعال رتيل المشهور لو الماسحه هذني بالنسبه لرتيل اقوه سلاحين عالكره الارضيه...
.. ضحكت رجعنا هي طبت لبيتهم واني طبيت لبيتنا ...
.. حاطه ايدها اليمنى ع خصرها وايدها الثانيه لازمه بيها راسها وتفتر بالبيت
اول مطبيت التفتتلي باوعتلي بغضب نزعت نعالها دنگت شالته واجتني تمشي بعصبيه
رتيل... وين جنتيييي سايبه العصريه كلها مكفتج وخليتي رجعتج لليل... تحجي بعصبيه وهي تأشر بالنعال عليه
... جنت گاعده بنهاية الفرع اني وحياة نسولف و واخذتنه السوالف ومحسينه بالوقت...
رتيل... بعد اذا تأخرتي اگطع هذا عليج خووش... حجتها وهي تأشر ع النعال
حُره... اي.. حجيتها بأبتسامه واني اهز راسي... راحت للمطبخ وهي تدردم رحت لسالي.. مقدام اجه..؟
سالي... من طلع ابوي طب سبح وبدل وبسرعه طلع حتى رتيل رادت تسويله جاي مقبل
حُره... سكتت مقهوره ع اخويه... جريت نفس بقهر..
يمكن اول طفل يتمنى وفاة اهله هو اني
اتمنى يموتون
يختفون
يطيرون
المهم يمنى ميبقون
دمرونا وضيعونا
عيشونا تعب نفسي وجسدي
لليل كلش رتيل گاعده وعيونها تتلفت ع الباب والقلق واضح عليها
الكتاب بحضني اراجع واجباتي بس عيوني ع اختي الحايره وخايفه
نعست شلت كتبي ضميتهن بالجنطه ضربت گصتي بقهر نسيت مغسلت جواريبي
رحت مددت بالگاع ومديت ايدي جوه الكنتور طلعت الحذاء مديت ايدي اله جريت الجواريب
گمت اضمهن بالحذاء حتى رتيل متلگاهن وتغسلهن كافي عليها ملابسنا ومسؤوليتنا
جريتهن وگمت اركض للحمام جلفتهن بالتايت زين عصرتهن حيل ورحت شريتهن عالدرج حتى ينشفن للصبح
مددت بفراشي التفتت لسالي نايمه رجليها بفراشي وراسها بفراش مقدام ابتسمت نومها عبث حيل
دائما اگعد الگه مقدام يعدل نومتها لو الگه رتيل شايلتها وترجعها لفراشها مرات نلگاها فوگ روسنا ومرات جوه رجلينا
انفتح باب البيت رفعت راسي باوعت مقدام طب ورتيل تلگته ظل واگف ورتيل مدري شتسولف وياه
فضولي يلح عليه اگوم اتسمع عليهم بس النعاس غلب فضولي واخذني لعالم الاحلام
ثاني يوم الصبح طلعت للمدرسه امشي سالي عافتني وراحت ويا صديقاتها قبلي
وصلت لنهاية الفرع بمكانه المعتاد لگيتها تنتظرني ابتسمت..
حياة... صباح الخير... گالتها بأبتسامه
حُره... صباح النور.. حجيتها بضحكه
مثل كل مره شابكنا ادينا ابعض ورحنا نمشي للمدرسه شفنه ضاوي الاخرس يمشي
ضاوي بنفس فرعنا
بيتنا بالوسط
بصفنا ع الجهه اليمنى بيت حياة بصفنا ع الجهه اليسرى بيت عمو حاتم وبصف بيت عمو حاتم بيت ضاوي الاخرس وبصف بيت ضاوي محل عمو سالم
... ضاوي اخرس ميحجي بس بالتأشير احنا منفهم عليه بس شباب المنطقه يفهمون عليه
يسولفون ويا بالاشارات ويفتهمو كلش..
حباب وفقير وما اله دخل بشي انسان مسالم الابعد درجه گلبه طيب حيل
حياة... والله احنا متعافيات ع نعم الله.. گالتها وهي تباوع لضاوي بأبتسامه..
اشو ما شاءالله كلشي عدنا ومراضيات ع العيشه
باعي ضاوي فقير وباعي وضعه وقناعته بالدنيا ماكو منها هنياله
حُره... جريت نفس.. اي والله هنياله.. وصلنه للمدرسه ومثل كل يوم ظلينا واجبات ودروس
صار وقت الخروج للاهل لبست جنطتي وطلعت وگفت لحياة يم باب المدرسه انتظرها
دقايق وطلعت تعدل بجنطتها شافتني اجت عليه
حياة ... ها تأخرت عليج؟
.. لا هستوني طلعت.. يلا امشي نروح..
حياة.. اي يلا
حُره... رجعنا نمشي وصلنا لراس الفرع افترقنا كالعاده حتى ميشوفنا ابوي رغم مرات مالگاه بالبيت
بس حياة متأمن تگول ع لحضه يجي ويشوفنا خاف يضربج
فتحت باب البيت وطبيت رحت للهول نزعت حذائي باوعت سالي دتنزع جواريبها...
طبيت للهول نزعت جنطتي
رتيل... روحي غسلي وبدلي بين ميصير الغده وانتي همين .. حجتها وهي تباوع لسالي
رحنا نركض اني وسالي للحمام منو اليغسل اول وصلت قبلها واني اعيب عليها
... حيييل يالفاهيه وصلت قبلج هذا يعني اني اشطر منج... حجيتها واني امد الساني اعيب عليها
سالي... انجبي حيوانه اني اشطر منج بلا شك
كسولي نايم بالبلم ميعرف يقط القلم... حجتها وهي تعيب عليه
اخذت مي بكفي وشمرته عليها گامت تضحك طبت للحمام وياي غسلنه رجلينه وادينا ووجهنه
سدينه بوري المي ورحنا للغرفه نبدل سمعت صوت مقدام
مقدام ... رتيل البنات اجن
... اي اجن يلا تعال دااصب غده..
مقدام .. بس اسبح عالسريع كلي وسخ... حجاها وهو يفتح الباب
حُره... اني لبست ملابسي بس سالي داتلبس بالفانيله من نفتح الباب عاطت
سالي ... مقدااااام داابدل... حجتها وهي تلبس الفانيله و خدودها نگلبن حمر
مقدام... اووو سوري بنيتي نسيت ادگ الباب... حجاها وهو يضحك تقدم عليها باسها براسها التفتلي هم باسني براسي
مقدام ... شلونجن بالمدرسه.. حجاها بتساؤل
سالي... زينه اليوم اخذت عشره من عشره... حجتها بفرحه
حُره... واني هم زينه الحمدلله.
مقدام... عفيه بالسبعات شدن حيلجن ورفعن راسي خوش..
حجاها وهو يگوم راح يمشي للكنتور فتح الباب طلع ملابس اله
هزينه براسنا وطلعنا يم رتيل وهو راح يسبح رتيل گملت تگلاه البتيته والطماطه حطتهن بالصينيه
حطت الخبز والمي يمهن وشالت الصينيه اخذتها وراحت للهول حطتها بالگاع
گعدت گعدنا يمها صاحت... مقدااام يلا استعجل الاكل راح يبرد..
مقدام ... اييي هاي خلصت بس ثواني...
حُره... اجت امي گعدت يمنه ع الصينيه طلع مقدام تقرب يمنه وهو ينشف شعره بالخاولي...
التفتت عيونه ع امي ورجعت علينا ابتسم بطارف شفته واجه دنا سالي وگعد بنصنا اني وسالي
گال... بسم الله الرحمن الرحيم...
اني وسالي عدناها وراه وبلشنا ناكل كملنا اكل امي گامت وسالي لحگتها وتگول
سالي... اوگفي الزمج لاتمشين ويطيح الطفل...
وماما تضحك ع سوالفها
سالي عكسي رغم اليسوه اهلي بسرعه تنسى
وتڪوم تسولف وتضحك وياهم
بس اني ولان متأذيه منهم مبتعده منهم حيل مااتذكر بيوم طلبت احضن امي
رغم بنفسي هالشي
ولا اتذكر بستها لو بست كف ايدها لان هي بعيده عنا ولان ممختلطه ويانه اخجل منها
عكس رتيل ابوسها شوكت مااشتاقلها انام بحضنها واني مأمنه ومرتاحه احسها قريبه مني حيل والخجل منها شايلته
اخذت نجانة الخبز وكمت للمطبخ طبيت حطيتها ع الكاونتر التفتت طب مقدام التفتلي ابتسم رجع باوع لرتيل
مقدام... رتيل اسألي امج خاف مشتهيه شي رايده شي حتى احيبه الها دام طالع... حجاها بأرتباك وعيونه تتلفت بأركان المطبخ بس متباوع لرتيل
... ميخالف هسه اسألها... حجتها بأبتسامه..
راحت تمشي لامي اني دااطلع من المطبخ التفتت ع سدت الباب باوعت ابويه طب للبيت
حُره .... لا هلا... حجيتها بهمس
مقدام طلع من المطبخ وبإيده گلاص ماي يشرب منه
شافه ابوي تقدم عليه
شعلان... انطيني فلوس... حجاها وهو يباوع لمقدام..
حُره... مقدام ديشرب ماي من سمعه نزل الگلاص من حلگه شمر باقي الماي اباب الهول التفت لابويه
مقدام ... شنو؟ حجاها بأستهزاء..
شعلان... مثل مسمعت مو جاي تشتغل طلع فلوس الشغل وانطينياهن محتاجهن... حجاها وهو يمد ايده...
مقدام... منو گالك دااشتغل فلس واحد ماعندي... گالها وهو يحط الگلاص بإيد ابوي...
حُره... فزيت مخروعه ع صوت الگلاص وهو يتطشر بالگاع...
شعلان... شنو ماعندك فلس واحد ولك شنو جاي تضحك عليه طلع فلوس ونطيني لا اطردك من البيت ودقيقه وحده مااخليك
مقدام... دااگلك فلس ماعندي مكسور ظهري من الصبح لليل علمود احصل 5الاف اجيب بيها اكل الاخواتي الماتدري وين الله خلقهن
فوگ ما انته تصرف عليهن وتجيبلهن لان هذا واجبك كأب ومسؤوليتك توفرلهن احتياجاتهن
جاي تريد مني فلوسس. !
هه گتلك فلس واحد ماعندي وشتريد تسوي سوي
حُره... عطت مخروعه ع صوت الضربه الصارت ع وجهه اخوي... نهاية البارت
يتبع ... 🦋
Nawras...