« الحلـــــــقه الاولى»
روايـــــــــة
«هل كانَ حلماً...؟»
(ارواح ــ مُهشَمه )
بقلمي... لؤلؤة _البحار
....................2007...................
العراق :- العاصمه
ـــــــــــــــــــــــــــــــــــــــــــــــــ
من تحمل الام رب العالمين نزل طفل برحمها وخلاها تكون مسؤوله عنه سلمها كامل المسؤوليه
الطفل صار امانة اهله من بعد امانة الله والمفروض الاهل يحافظون عليه من كلشي مضر بهايه الحياة
الجنه تحت اقدام الامهات لا تحت اقدام الاباء (بالمختصر) الام تكون ارحم من الاب على طفلها
حملته تسع شهور يتغذه من عظمها وينام على دقات قلبها الغير منتظمه بسبب الحمل
اذا غاب االاب الام تعوض مكانه بس اذا غابت الام الاب ميگدر يعوض مكانها
الام اساس الحياة هي المسؤوله الكبرى عن حياة طفلها وواجبها تأمن الهدوء بحياته
الراحه النفسيه والجسديه الطفوله الحلوه والذكريات الجميله كلها بسبب الام لانو موفره الراحه لطفلها
ممجبور الطفل يتحمل مزاج اهله ممجبور يتحمل فقرهم ومشاكلهم النفسيه ممجبور ينحرم من طفولته واشياءه الي يحبها ويحب تكون اله بسبب اهله
الاهل ولان اجه الطفل بموافقتهم همه مسؤولين عن ولادته لهايه الدنيا واجبهم يوفروله كل الي يريده والاهم من هذا كله
واجبهم يوفروله( الراحه النفسيه) لان اهم شي بالطفل هو نفسيته و راحته اذا فقدهن معناها فقد لذة الحياة كلها...
:- بيوم عادي مثل باقي الايام راجعه من مدرستي اسحل بجنطتي من ثگل الكتب البيها ما اگدر اشيلها على ظهري
امشي بتعب جوعانه وهلكانه والدنيا بارده بداية شهر الواحد موت برد امشي بفرعنه وعيوني عالناس
الرايحه والراده كل ثنين گاعدين او يمشون ويسولفون سوه ... هذاك سني وهابي
والمقابيلهم يگول ـ. شوف هذولاك الشيعه الرافضيه
والي گاعدين ويگولون لبعض... الله لينطي الارهابيين الي يردون يزرعون الفتنه بين السنه والشيعه ويخليهم ناس تاكل ناس
والثاني يرده... هالشي مخطط ومدروس من قبل ارهاب يحاولون يزرعون الفتنه والتفرقه بين
المذاهب الله يردهم وياخذهم ان شاءالله
... امشي وصافنه عليهم وعلى كلامهم شنو معنى المذاهب؟ وشنو يقصدون بكلامهم
وصلت لبيتنه قبل لا افتح الباب شلت جنطتي نفضتها من التراب حيل ولبستها على ظهري
فتحت الباب وطبيت اذا ماما شافتني اسحل بيها تموتني كتل.. تنفست بقهر من سمعت صوت عياطهم عالي
يعني هم عركه اووووف يربي والله تعبنه من المشاكل والعرايك
من دون ما احجي شي رحت نزعت حذائي بالباب ورحت دطب للغرفه
باوعت عليهم ماما تعيط
بصوت عالي
وبابا يشمر بالغراض حيل
وهم يصيح بصوت
اعلى
رتيل گاعده على صفحه
وتباوع عليهم
درت عيوني بخوف اباوع بكل مكان بالبيت وينها وين راحت؟
حطيت ايدي على يدة الباب دا افتحها سمعت صوت ونين مخنوگ فتحت الباب وطبيت للغرفه
دارت عيوني بارجاء الغرفه الى ان شفتها مكرفصه نفسها بزاوية الغرفه حاطه راسها بين رجليها وميطلع منها غير صوت ونينها المخنوگ
نزعت جنطتي شمرتها يم الفراش ورحت عليها كرفصت گبالها رفعت راسها باوعتلي
عيونها مليانه دموع ووجهه صاير احمر من البجي من شافتني برطمت وزادت ابجيها
مديت ايدي لعيونها مسحت دموعها وحجيت بحزن... سهر شبيج تبجين حبيبتي تعالي لحضني...
اجت حضنتني وهي تناشغ مجاوبت ادري بيها خايفه من عياط اهلي فتنرعب وتظل تبجي..
قويت حضنتي عليها حتى اطمنها ماكو شي تلمست ظهرها ناگع مي بعدتها عني وحجيت..
... سهر ملابسج كلها مي وين جنتي؟
باوعتلي بخوف ورجعت نزلت عيونها بخجل گالت بصوت مرتبك... ااا. شسمه..اگلج بس لتگولين لماما اخاف تضربني
هزيت راسي... لا ما اگللها شنو بيج احجي؟
حجت بخوف... من تعاركو ماما وبابا. وبابا گام يصيح بصوت عالي خفت حيل واجيت ختلت هنا حتى ما يشوفوني اخاف يضربوني
فبابا من گام يصيح مدري شنو كسر برا واني من الخوف بـ... سكتت خايفه وخجلانه بنفس الوقت
رجعت بلعت ريگ دارت عيونها تباوع الانحاء الغرفه من دوت متباوع لعيوني گالت
... من الخوف انحصرت واخاف اطلع اروح للحمام فـ... فـ بللت روحي
جريت نفس بقوه باوعتلها بحزن... حجيت... ميخالف لتخجلين هالشي مو بإيدج يلا گومي اخذلج ملابس واشطفلج بالحمام
هزت راسها ورجعت ضمته بين رجليها خجلانه گمت طلعت تراك الي بدلت وهي على گعدتها رجعت طلعتلها تراك لزمته بإيدي مديتلها ايدي الثانيه وحجيت..
يلا گومي نروح للحمام اشطفلج.. لزمت ايدي وگامت وراي طلعنه للحمام واهلي لسه مسكتو عياطهم يزيد مينقص..
اخذتها للحمام شطفتلها ولبستها ملابسها وطلعتها رجعتها للغرفه رجعت اني للحمام جريت تراكها المبللته وگعدت اغسل واشطف بيه خاف ماما تشوفه وتكتلها
كملت اخذته ورحت للحبل اريد اشره مااگدر الحبل عالي واني صغيره ما الوحه تلفتت يمنى يسرى ادور على شي اصعد عليه ماكو
رجعت للمطبخ جريت كرسي بلگوه شلته اخذته ورحت للحبل حطيت الكرسي صعدت عليه شريت التراك شلون مجان ورجعت نزلت خايفه خاف اوگع من الكرسي حسيته عالي عن الگاع بهوايه
التفتت على صوتها وهي تگول... حره؟
شدتسوين؟
... غسلت تراك سهر وشريته
ابتسمت الي... ليش مگتيلي اني اغسله واشره لو واگعه من الكرسي مجان تعورتي وطلع دمج؟
هزيت راسي... لا ما اوگع بسرعه شريته ونزلت.. رتيل جوعانه.. گلتها بقهر
باوعتلي بنضرات حايره وگالت... كلشي مطابخه لان ماكو مسواك بالبيت واني قبل شويه كملت شغلي گلت اطب اسبح وبعدين اشوف شسويلكم حتى تاكلو
تنهدت بحزن... تالي گبت العركه بين امي وابويه فلتهيت وما سويتلجن شي حتى السبح نسيته
حره.. حجيت بدموع... من الصبح لهسه مماكله شي احس بطني ترجف
.. ابتسمتلي بقهر... اكو طماطه وحده اگليها تاكليها؟ واسويلج وياها جاي؟
هزيت راسي... اي شي اكل عادي
.. التفتت دتروح للمطبخ وگالت... هسه اروح واگلي بين مايجي مقدام حتى تاكلين انتي وسهر ومقدام
رجعت التفتتلي.. صدگ نسيت شگد اخذتي بالاملاء؟
باوعتلها بحيره... اخذت 7 نسيت الحركات محطيتها عالاحرف والمعلمه مقبلت فـ حطتلي 7
جرت نفس.. ميخالف حبيبتي لتنقهرين مو مهم شگد تاخذين المهم تتعلمين وتفهمين الدروس
ابتسمتلها راحت للمطبخ واني رجعت للغرفه لگيت سهر حاطه دفتر رسم وترسم بيه گعدت يمها راسمه خط بالطول وحاطتله دائره ببداية الخط ومن نص الخط جاره خطوط اثنين ومن نهايته هم جاره خطوط ثنين عالاساس راسمه شخص
رجعت رسمت اشخاص ازغر من االاول ابتسمت... هذوله منو؟
باوعتلي... هذا بابا وهايه ماما هذا مقدام وهايه رتيل وهايه انتي هسه ارسم بعد اني
عقجت حاجبي بضوجه... اشو راسمه جسمي عوج ومخليتني اكبر من مقدام ترا مقدام اكبر مني
هزت راسها.. لااااء انتي عمرج هالگد... فتحت كفوف اديها ثنينهن وطلعت رقم 7 بيه... هذا عمرج ومقدام هالگد.... طلعت كف واحد فتحته واشرتلي على اصابعها الخمسه...
هزيت راسي... لااااء مقدام اكبر مني اني ازغر..
هزت راسها... لاااااء مو بكيفج
صحت بضوجه... لااااء موو بكيفج انتي مقداااام اكبر منه وغصبن عنج
برطمت واتجمعت الدموع بعينها... لااااء انتي اكبر من مقدااام واني هم اكبر منه...
شطت حيل... ولج غبييييه هو اكبر منه اني عمري 7سنوات وانتي 6 سنوات ومقدام 12سنه يالمطيه...
... اكلي مطي اني اكبر منكم يعني اني ... حجتها بدموع
رفعت ايدي دجرها من گصيبتها انفتح الباب بكل قوته باوعنه ثنينه للباب بخوف ...
واگفه لازمه النعال بأيدها ومعصبه كلش طبت گالت بعصبيه وهي تأشر بالنعال علينه
... تسكتن لا اگطعجن ولجن شنو من بشر انتن كل شويه ومتعاركات الاسمع صوتها النعال اگطعه عليها..
نباوعلها بخوف رغم نعرفها بوخه وبس تهدد متضربنه ابدد ولا تسمح الوحده منه تضرب الثانيه
رغم بيتنه كله مشاكل وبابا دائما يضرب ماما وبيئتنه صعبه والدانشوفه اشياء كبيره علينه بس رتيل معلمتنه نحب بعض ومنمد ادينه على بعض اقوه شي يصير بينه رزاله قويه او اجر سهر من گصيبتها وبعدين اعتذر منها
سكتنه وظلينه صافنين بوجهه عاطت... گوووومن يلا حضرتلجن الاكل بالمطبخ يلاااا شووو..
گمزنه من مكانه وركضنه للمطبخ لگينه مقدام گاعد گدام الصينيه ومبلش ياكل گعدت سهر واني گعدت يمها اجت رتيل گعدت يمنه والنعال بإيدها
حجيت واني اتلفلت وادور بالبيت... وين ماما وبابا؟
جرت نفس وزفرته بهدوء... كالعاده كلمن طلع لونسته
ابتسمت... يعني شنو ونسته
مقدام... يعني طلعو يفترون ويه اصدقائهم ويتونسون وناسين خلفتهم وراهم ... حجاها ابرود وهو مدنك ياكل
سكتنه وظلينه ناكل كملت اكل رحت غسلت وطلعت قرائتي ورحت لرتيل تقريني،،، سهر رجعت لدفتر رسمها تكمل الرسم ومقدام طلع بالشارع ويه اصدقاءه
لليل واهلي ما جايين نعست حطيت راسي عالمخده ومددت يم رتيل وسهر امدده بحضنها بالجهه الثانيه واني اباوع على توم وجيري غفيت
گعدت الصبح مخروعه باوعت نايمه بفراشي واني البارحه نمت بالصاله عالتلفزيون
رجعت باوعت للساعه ماااعرف بيش لان بعدني مامتعلمه عليها رگضت لغرفة ماما باوعتلها نايمه
تنهدت بحزن ماما مو مثل بقية الامهات الي يگعدن الاطفالهن بوقت الدوام لا ماما ولا يوم گعدتني الصبح اروح للدوام
رجعت للغرفه ارگض طلعت ملابس المدرسه لبستهن عدلت شعري قصير بس نزلته بالمشط دا اعدل بالجنطه اسفط الكتب تذكرت وجهي مغسلته
رگضت غسلته ورجعت اركض شلت الجنطه لبست حذائي باوعت للمطبخ جوعانه بس ما اكو ريوگ محد مسويلي اكل خليت وطلعت ارگض للمدرسه
واني امشي بسرعه مريت من يم المحل القريب على بيتنه گتله... عمو بيش الساعه...
... ب7 وثلث عمو
.. تنفست بهدوء... شكرا عمو... رحت للمدرسه امشي على كيفي بعد وكت دوامنه يبدي بـ8 وينتهي بـ12 هيج گالت المديره...
تذكرت شكل معلمتنه مغصتني بطني من الخوف ما احبها عصبيه وبس تعيط علينه اشرد من البيت للمدرسه حتى اخلص من عياط اهلي اروح بالمدرسه الگه المعلمه عياطها واصل لسابع شارع
تنهدت بخوف وحزن وصلت للمدرسه وظلينه ناخذ دروس وواجبات للدرس الرابع حسيت روحي ماعت من الجوع
طلعت بالفرصه گعدت دچه صاير بالممر مال الصفوف حاطه ايدي على بطني واباوع للحانوت
البنات واگفات سره يشترن وياكلن... تحسرت بقهر جوعانه لو عندي فلوس جان شتريت من الحانوت شي واكلته
بس المثلي لازم تنحرم من كلشي حلو.. ما اعرف اذا اهلي يدرون بيه متسجله لو لا اذا يدرون اني صف اول لو لا
اهلي عدهم المشاكل والنگره اهم من اطفالهم وحياة اطفالهم... اذا همه عن اكلنه ميسؤلون ميدرون اذا اكلنه لو لا
جريت نفس... الحمدلله رتيل حنينه علينه وتدبرلنه الگمه بالگوه حتى ناكلها وممخليتنه نموت جوع
طگ الجرس للصفوف رجعنه للصف نانخذ واجب العلوم لحد مطگ جرس الخروج للاهل
طلعت امشي بسرعه واني لازمه بطني تطلع اصوات غريبه كل ما اجوع حيل واخجل لا احد يسمعها
امشي بسرعه بس اريد اوصل حتى اكل شي
وصلت للبيت طافره روحي اول مطبيت البيت نزعت حذائي وبوجهي رحت للمطبخ جنطتي بعدها على ظهري باوعت للطباخ ماكو اكل عليه عيوني ظلت اتدور كلشي ماكو ضجت وانهضمت حيل ..
درت وجهي وطلعت من المطبخ ادور خواتي اشوفهن وين... سمعت صوت سهر بره
لبست الشحاطه وطلعت معصبه اريد اتعارك لگيتها بالشارع تلعب ولابسه تراكي تعصبت حيل رحت عليها ووگفت ارزل بيها
شتسوين هنا شعندج طالعه وحدج متخافين تنخطفين متخافين احد يضربج.؟
وليش لابسه تراكي!
داارزل بسهر وحسيت انجريت من جنطتي
درت وجهي متفاجئه باوعت لبنيه من شكلها مبينه شويه اكبر مني بس اني شويه اطول منها واگفه لازمه جنطتي ومعصبه خزرتني و ڪالت
...ليش تصيحين ع هالطفله مو عيب؟
حجيت بخوف... لا مصيحت
.... اشش ولا كلمه قبل شوي دحقتكي..
غمضت عيونها بصبر مثل التذكرت شي رجعت گالت
...اقصد شفتج
سهر ضحكت گلتلها.... هايه اختي
اني ابتسمت هي رفعت حواجبها متفاجئه ورجعت ضحكت
... للحضات صفنت على جمالها عيونها كبار وبيهن لون،،، بيضه كلش وشعرها اشگر على احمر گالت
... يااا ماادري
ابتسمت... مدت اصبعها الزغير گالت... جيبي اصحابج انصير صديقات اني حياة
مديت اصبعي وتشابكنه بأدينه واني حره.. ابتسمنه ثنينه معناها صرنه اصدقاء
اخذت سهر وطبينه للبيت وهي راحت لبيتها كان بصف بيتنه يفرقنه بس الحايط...
اطفال بريئات منعرف شنو طائفه ولا نعرف شنو مذهب كل الي نحلم بيه او بالاصح الي بعمرنه يحلم بيه هو اللعب والاكل والنوم والمفروض بهيج عمر ماكو تفكير وتعب غير انو باجر من حنداوم شنو حتنطينه معلمة القراءه الدرس الوره درسنه لو نطفره ونروح للي وراه..
بس اني مو هيج حلمي اني عكس كل الاطفال حلمي اطب لبيتنه الگه بيه ضحكه حلوه ماما تتلگاني وتسألني عن دروسي وواجباتي المدرسيه وبابا يبوسني بخدي ويفرح بشوفتي الگي الاكل جاهز
ومنتظرين جيتي ميتعاركون گدامنه لا اني ولا اخواتي يخافون علينه ويهتمون بينه
بس هذا كله حلم وهالحلم مراح يتحقق بالنسبه لطفله مثلي
العراق يوم بعد يوم بده يتأزم وبغداد بدت التفجيرات بيها هوايه بشي اسمه الطائفيه
ارهاب يفجر والناس تعيط وهابي فجرني الرافضي فجرنه والارهاب بنصهم يشعلون الفتنه ومملحگين
الناس بدت تخاف تطلع ومتبقى لوقت متأخر بره البيت والزلم من يرحون ع اشغالهم يرحون وهمه لازمين گلبهم خاف المكان اليشتغلون بيه على ساعه يتفجر...
للعصر گاعدين نلعب اني وسهر وصارت مثل الهزه بالبيت وصوت قوي كلش
رگضت رتيل اجت علينه حضنتنه وتباوعلنه بخوف طلعت ماما تسأل شكو گلولها صار انفجار بحي الصدريه
ضليت صافنه عليهم ما اعرف شنو معنى الانفجار ولا شايفته بس حسيته شي يخوف لان البيت مثل الاهتز شويه من صار هذا الشي الي اسمه انفجار
الوضع بده يتأزم اكثر وبغداد صارت تخوف بالانفجارات والي يطلع بره البيت يطلع وهو متشاهد ميعرف اذا حيرجع لو لا؟
صداقتي بحياة قوة حيل رغم هي عمرها كفين ووياها اصبع (11سنه) واني عمري كف ووياها اصبعين (7سنين)
گمنه نروح للمدرسه سوه ونرجع سوه هي بنفس مدرستي بس صف ثالث هي المفروض صف خامس بس لان متأخره سنه وراسبه سنه فـ بالثالث
گمت من ارجع من المدرسه اروح وياها لبيتهم حتى اخلص من جو المشاكل الي بالبيت نضل نلعب اني وياها
ومرات نگعد نتابع اخبار اني كلشي ما اعرف بالاخبار بس هي تفهم وتظل تحلل بالاخبار وتستفسر من بيبي بهيه (بيبية حياة)
ماعدها احد غير بيبي بهيه وهنه الثنين عايشات سوه ووحدهن بيبي بهية تشتغل بالبيت خبز طبخ وتبيع ومعيشه حياة
بشهر الرابع تقريبا نص بيه گامت الانفجارات تكثر وبالذات بغداد وكربلاء ايضا لاحتها انفجارات بس مو مثل بغداد
بيوم 2007/4/18 اصعب يوم مر عالعراقيين انفجار اكثر من سياره ملغومه بأرجاء بغداد وعدد القتله هوايه وصل لـ 191
والفاجعه الكبرى انفجار سياره ملغومه قرب سوق بحي الصدريه قتل 140 شخص واصاب 150 جريح
دنيا ليل گاعدين اني وحياة وبيبي بهيه نتابع اخبار ونترقب بخوف وقلق على حالنا حال العراقيين الي ما ارتاحو بيوم
بيبي بهيه دموعها تدير وتمسحهن بشيلتها وحياة مقهوره تباوع للتلفزيون بقلق وخوف
واني گاعده بنصهن مثل الاطرش بالزفه
كلشي مافاهمه من هالكلام غير عدد الاموات والجرحى الي حصتها قناة الاخبار
وصلتني حياة لبيتنه ورجعت لبيتهم... طبيت للصاله لگيت اهلي هم فاتحين اخبار ويتابعون الاحداث
رحت طبيت للغرفه مددت بفراش سهر حطيت اديه الاثنين جوه راسي وظليت صافنه عالسگف
تنفست بقهر وحزن
كل يوم بكل منطقه انفجار
كل يوم جروح
كل يوم قتل
كل يوم دموع وخوف ورعب
والاهم كل يوم دماء مطشره بكل مكان..
نمت واني افكر بلي انقتلو وراحو بالانفجار اگول هنيالهم ماتو وخلصو وارجع اگول لا خطيه اهلهم تأذو بعدهم
فزيت الصبح على هوسه و حركه بالبيت رفعت راسي من المخده نعسانه شفت مقدام واگف راجي ظهره عالحايط ومكتف اديه لصدره..
باوعت عليه... مقدام شكو؟
.. عمي استشهد.. حجاها ابرود وهو واگف...
گعدت مخروعه ومقهوره بنفس الوقت گتله بخوف... يا عمو منهم؟
عمو ازاد.. حجاها وهو يطلع..
حزنت عليه بابا عنده اخوان ثنين ابويه الكبير وعمو حمدان الوسط وعمو ازاد الصغير...
باوعت سهر نايمه يمي رجليها على بطني وراسها على فراش مقدام مديت ايدي على رجليها دا ابعدهن واگوم
تلمستهن ناگعات غمضت عيوني بقهر هم باااايله! عضيت شفتي بقهر باوعتلها نايمه ومتدري بالدنيا
شمرت رجليها على فراشها وگمت باوعت لروحي اني هم ناگعه وياها اذا الزماله رجليها بنص وجهي بعد شلون متنگعني...
رحت للكنتور گلبته وظليت ادور على تراك لگيت الفانيلا والبجامه مدري وين مشموره
ظليت اگلب بالملابس الا ان لگيتها جريتها ولزمتها بإيدي باوعت للملابس المطشره وجريت نفس هسه ماما تلعب النعال على ظهري
رحت للحمام نزعت تراكي االابسته جريت نجانة المي وكاسرتها صح الجو حار بس المي بعده بارد ما اگدر اغسل بيه الا اكاسره
غسلت بدلت وطلعت دا اطب للغرفه اگعد سهر التفتت على صوت رتيل وهي تحجي...
.. اي والله خاله راح بالانفجار خطيه بمكان شغله..
... يااا خطيه بانفجار بالبارحه الي بالسوق ليش هو يشتغل هناك.
رتيل ... اي اي شغله بحي الصدريه بالسوق مأجر اسواق هو واصدقاءه وكلهم راحو بالانفجار
واگفه هي ومره كبيره بالعمر المره تسألها شلون مات عمو ازاد وهي ترد عليها..
جريت نفس طبيت للغرفه گعدت سهر وديتها للحمام تغسل طلعتلها ملابس ورحت شطفتلها ورجعتها للغرفه انطيتها ملابسها تلبسهن
لبستهن ورجعت نامت بفراش مقدام اني طلعت لبست نعالي ورحت لبيت حياة دگيت باب بيتهم فتحت الباب باوعتلي ابتسمت..
.. حره؟
تعالي همزين اجيتي لان ضايجه حيل
... طبيت يمهم وظلينه نسولف اني وياها ونساعد بيبي بهيه من تخبز ناخذ الخبز اني وحياة نوديه للجواريين الي يردون يشترون
للظهر گاعدين اني وحياة عالدرج وبيبي بهيه جرت المخده طبگتها ومددت عالتلفزيون وحياة دا تعلمني كلام اهل الموصل..
انفتح باب البيت دخلت سهر تركض وگفت يمي گالت بخوف وهي تجر النفس...
.. حره بابا يگول خلي تجي بسرعه لا اجي اموتها..
.. اي اي اجيت.. كمت وراها ورحت لبيتنه واني لازمه گلبي بخوف من بابا اني عفته هو وماما يم بيت عمو ازاد راحولهم
طبيت للبيت بابا واگف بباب الصاله ووجهه عصبي حيل يخوف ولازم النعال بإيده اول مطبيت جرني وگتلني حيل
اجت رتيل تريد تفكني منه بس مگدرت يعيط بيها وهي تخاف منه.
كتلني لزمني من اذاني وگال بغضب
...اذا شفتج ويه حياة بعد اموتج فتهمتي
سكتت ابجي وخايفه منه حيل ترك اذاني وگام يغلط ويهدد بشي اسمه (سنه)
يحجي ويڪول... وهابيه لعنة الله عليهم يوميه مفجرينه قتلو اخوي الوهابيه..
باوعلي وڪال بغضب... اااااخ والله اذا شفتج تلعبين لو تمشين ويه هذيج السنيه الا العب الصونده على ظهرج
عاااط.. افتهمتييييييي
.حره... هزيت راسي بخوف واني خاتله بظهر رتيل اجت امي گامت تصيح عليه
اميره... لتظل بهالعقل هذا هايه الطفله شدخلها بمقتل اخوك وبعدين بهيه وحفيدتها زينات وماعدهن اذيه على احد عيب هالكلام وهنه جوارينه مو فشله اذا سمعتك بهيه!
عاط بماما بصوت عالي... فنها الي تجري وتحجي ويه سنيه الا اطلع روحها بإيدي..
اكو نفاضه عالميز شالها ورگعها بالحايط صارت طشار وشضايها تبعثرت بالهول هو خله وطلع وامي ظلت تدردم مقابله لان تعرف بيبي بهيه مره زينه وتحبها
تالي لبست ملابسها ودتطلع گالتلها رتيل... يوم وين رايحه..
اميره ... طالعه اتغده ويه صديقاتي اووي لعبت نفسي من هالبيت والي بيه
رتيل گالت بقهر... بس ماعدنه شي بالبيت حتى مسواگ ما اكو شأوكل خواتي خطيه دكهن الجوع...
اميره... وكليهن سم من يجي ابوج گليله شنو ابتليت بيكم اني! گالتها ببرود وهي تطلع..
حره... عيوني على رتيل وجهه صار احمر حيل وعيونها البياض انگلب لونه الدموع متجمعه بعيونها وشفافها يرجفن
دارت وجهه علينه باوعتلنه اني وسهر بنضرة حزن گالت بأبتسامه تحاول تخفي حزنها...
رتيل ... اسويلجن تمر وخبز طيب تاكلنه؟
سهر هزت راسها بأي واني سكتت.. رتيل راحت للمطبخ واسمعها تجر النفس بالگوه مثل المختنگه..
مشيت بحزن للغرفه فتحت الباب باوعت للغرفه هوسه وكلشي بيها مطشر رحت گعدت بزاوية الغرفه
دقات گلبي سريعه من قوة النبض حسيت گلبي راح يطلع من صدري حطيت راسي بين رجليه وگمت ابجي
ابجي بقهر حياة احبها هوايه وما اگدر بعد مااشوفها رفعت راسي للسگف.. ربي خلي ابوي يموت مااريده اكررهه حباب ربي موته حباااب..
ظليت گاعده بالغرفه ماطلعت منها رغم رتيل توسلت بيه حتى اكل بس ما اشتهي شي
للعصر واهلي ماكو لا ماما ولا بابا ثنينهم ما رجعو ركضت للسياج حطيت كم. طابوگه وصعدت عليهن
السياج كله عالي بس اكو قسم منه مفلش وصاير ناصي وبيبية حياة داڪته بچادر
صحت... حياااااة تعاااي
مدت راسها من المطبخ گالت... اييي اوگفي البس نعالي واجي
لبست نعالها واجت حطت طابوگ وصعدت عليه صارت بمستواي
شكو ليش باجيه... حجت وهي تباوعلي بخوف
حره... بيه عاده من ابجي رسن يبين عليه والكل يعرفني باچيه... ابويه بعد ميقبل احجي وياج... گلتها بدموع..
حياة... يااا ليش..
گالت وهي فاتحه عيونها بصدمه..
مسحت دموعي... يگول انتو سنه وكتلتو اخو!
حياة... لا حول ولا قوه الا بالله احنا شلنا علاقه ديشوفنا ناس ؏ گد حالنا..!
حره... ماادري هو هيج يگول... نزلت عيوني للگاع.. رجعت رفعت عيوني عليها باوعت بعيونها...
حياة... وانتي مصدگه... حجت وهي تباوعلي بخوف وقلق واضح؟
حره... هزيت راسي بنفي... لا طبعا ليش اكو احن منج ومن بيبي اختي انتي بس اني گتلج لان ضايجه وممتعوده اضم عليج
حياة اني مااگدر مااحجي وياج وبنفس الوقت خايفه منه لهذا شسوي!
حطت ايدها ع راسها گالت بقهر... دخيلك ربي ليش ديصير هيج بينا تفجر مكان سني صاحو الشيعه كتلو تفجر مكان شيعي صاحو السنه كتلو الى متى تستمر هيج الطائفيه
باوعتلي بخوف وگالت... هايه لعبه سياسيه ديوگعون بَينا لتصيرين جزء من هالعبه احنا جيل واعي منصير مثل ابوج وامثاله
جريت نفس... حياة خلينا نلتقي بالسر من يطلع ابويه احاجيج من السياج تمام؟
ابتسمت... اي تمام يلا هسه روحي ليجي ابوج يشوفج..
ابتسمت.. نزلت من السياج رجعت الطابوگات لمكانهن ورحت للمطبخ لگيت رتيل گاعده تعجن
.. رتيل جوعانه... حجيتها واني مبتسمه وامسح على بطني...
باوعتلي وابتسمت گالت... هسه اگوم اسويلج لفه بس خل اكمل العجين لا يبرد بإيدي..
.. هزيت راسي ورحت گعدت يمها اباوعلها شلون تعجن وتدوف بيه باوعتلها ملامحه تعبانه وحزينه رغم عمرها زغير كفين واربع اصابع (14سنه)
بس شايله هم مسؤوليتنه حايره بلگمتنه و بشغل البيت الي لو ماهي كان خاس من الوسخ لان امي متشتغل ولا تسوي اي شي ماعدها غير الطلعه والطبه والمخابرات...
كملت العجن غطته وحطت عليه مخاديد راحت طلعت گرصة خبز قسمتها نصين رجعت نص وبقت النص الثاني
طلعت طاوه محموس بيها تمر حطت تمر بالخبزه لفتها وانطتنياها اخذتها منها وبلشت اكل
طيبه حيل ما ادري من الجوع اشوفها طيبه اكلتها كلها ورحت غسلت طلعت كتبي واجيت گعدت قريب على سهر هي ترسم واني اقره...
ظليت اتهجئ الكلمات واقراهن حتى احفظهن شويه والتفتت على شي وگع باوعت لانها سهر واگعه بالگاع..
گمت مفزوعه لزمتها احرك بيها متتحرك صحت بصوت.. سهررر سهرر شبيج... گمت ابجي خفت حيل
سمعت رگضه التفتت شفت رتيل اجت تركض كرفصت گبال سهر شالتها حطتها بحضنها وهي تگعد بيها
... جيبييي مااااي... عاااطت بيه
رگضت للمطبخ حطيت بالگلاص ماي وطلعت اروح للاستقبال انفتح باب البره دخل مقدام
من شافني ابجي وايدي البيها الگلاص ترجف گال...
... حرره شبيج؟
منو وياج... حجاها وهو يمشي بأتجاهي..
عفته ورحت اركض لاستقبال وهو اجه ورايه انطيت الماي لرتيل گام تشيل بأصابعها وتنثره على وجهه سهر
مقدام من شافها تخبل راح اخذها من رتيل شالها وگال... راح اخذها للمستوصف يشوفوها...
قبل لتحجي رتيل شي خله وطلع تالي رتيل جرتني لبست نعالها وراحت وره مقدام وهي گايدتني وتسحل بيه...
خوف وقلق ع اختي المانعرف شبيها وليش طاحت واغمى عليها مقدام شايل سهر ويمشي طاير ورتيل تمشي وراء بكل سرعتها وهي گايدتني واني اسحل برجليه وراها...
وصلنه للمستوصف مقدام گص باص ودخلنه للغرفه مااعرف مال شنو (الطوارئ) گعدنه اجه ولد كبير شاف سهر گلب بوجهه ولزم ايدها اليمنى
رجع فتح عيونها باوعلهن لزم گصتها بكف ايده باوع لمقدام وگال...
... الطبيب مايجي غير لل8ونص الصبح اعتقد عدها فقر دم راح اخذلها تحليل دم وادرار ونشوف بس ابوكم امكم وين لازم شخص كبير وياكم؟
حره... باوعت لمقدام عيونه صار لونهن دم
... اني ابوها... گالها بخنگه ورجفه بصوته
رتيل سكتت والولد ظل صافن على مقدام هز راسه بأسف وراح جاب ابره اني من شفت الابره لبدت بظهر رتيل
هو ضحك وگال... اضربج ابره؟
هزيت راسي بخوف مقدام ابتسم من بين آلمه... جبانه حيل تخاف من الابر... گالها وهو يباوعلي مبتسم
الولد ضحك ولزم ايد سهر وسحب منها دم خلاه بشي مثل الگزاز وكتب عليه اسم سهر واخذه وراح باوعت لسهر شويه شويه گام تفتح عيونها
باوعتلنه بخوف وهي مبرطمه حضنتها رتيل وهي تبوس بيها وتهديها..
مقدام ... لتخافين بنيتي.. حجاها ببرود وهو مبتسم
شالها مقدام وگال لرتيل... امشي ارجعجن للبيت وارجع اني لهنا التحليل يتأخر يلا يطلع
اباوع لعيونه يباوع لرتيل ويرجع يباوع وراها درت وجهي اشوف شنو اليباوع عليه
شفت ولد ثنين اكبر من مقدام گاعدين وعيونهم على رتيل رجعت باوعت لمقدام خازرهم وواگف
گال... رتيل الزمي حره وامشي گدامي اني امشي وراچن ..
مشينه اني ورتيل وهو. ورانه وعيونه عالشباب وهو خازرهم طلعنه نمشي شويه وصلنه للبيت المسافه مو حيل بعيده
المستوصف صاير عالشارع الاحنه بيه بس احنه بالفرع المقابيله... رتيل راحت جابت فراش فرشته بالاستقبال اجه مقدام نوم سهر عليه
باسها بخدها ونهض گال.. راجع للمستوصف بين مايطلع التحليل واجي...
... رتيل هزت راسها وهو طلع اني جريت كتبي وگعدت يم سهر اقره واباوع عليها خاف تتخربط مره ثانيه...
رتيل تلعبها وتضحكها وهي تضحك بتعب وجهه اصفر وشاحب حيل ركزت بشفايفها يرجفن وحدهن ويرجعن يوگفن وشويه وهم يرجعن يرجفن
ظلت عيوني عليها تترقب كل حركه منها خايفه حيل خايفه لا اختي تروح مني صح نتعارك اني وياها دائما بس هي روحي اموت بدونها...
شويه ورتيل گامت طلعت صينيه رشت بيها طحين وجرت العجين وگعدت تجر من العجين وتسوي على شكل دائري (شنگ) او (كور)
عيونها علينه واديها ويه العجين شويه وطب مقدام باوعلنه ابتسم باوع لرتيل
... رتيل تعالي وياي... حجاها وهو يمشي بأتجاه الغرفه..
گامت رتيل راحت غسلت اديها... ظلي گاعده هنا وعيونج على اختج لتتحركين من مكانج... حجتها وهي تمشي للغرفه..
گمت على كيف امشي ع اطراف اصابعي وگفت يم باب الغرفه مفتوحه شويه وصوتهم واضح غمضت عين وفتحت عين اباوعلهم منها بالسر ..
مقدام... طلع تحليل سهر عندها نقص دم قوي حتى المحلل تفاجئ من شاف دمها... گالها وهو يمسح وجهه بكفوف اديه...
رتيل... حقها من الجوع اكيد ينقص دمها.. انطاها علاج؟ گالت وهي تباوعله بحيره
... اي كتبلي بس ما عندي اجيبه رحت للصيدليه وطلع غالي حيل واني مابجيبي ولا فلس... كرفص عالگاع وحط اديه على راسه
تقربت رتيل منا... لتنقهر من يجون اهلك اشوفهم وهمه يجيبون العلاج... حجتها بيأس
... كُلش راح يهتمون وراح يركضون بيها من طبيب لطبيب ... گالها
بأستهزاء
حره... رتيل سكتت مجاوبته... گعد وهو حاير.. شويه وگام وگف...
... راح اترك المدرسه طززز بالدراسه اهم شي صحة اختي اروح ادور على شغل اشتغل واجيبلهن اكله زينه ياكلنها... گالها وهو لام ايده بقوه
... اشششش هذا الكلام مااريد اسمعه مره ثانيه فاااهم... حجتها بقهر..
تعوف المدرسه وانته بعدلك كم شهر على امتحانات الوزاري تحجي صدگ مقدااام
... اي احجي صدگ اذا انظل هيج اخواتج يموتن جوع وقهر منو بحالهن..؟
هذاك ابو النسوان الحايره بگحـ***ٌ
لو هذيج التفتر من الصبح لليل من گوا*** لگو***
منو بحالهن هااا عالقليل اشوفلي شغله شي حتى لو اطلع منها 5الاف باليوم هم نعمه عاد اوكلكم بيها... يحجي بقهر وهو يفتر طول وعرض بالغرفه
... مقدام اني انجبرت اترك لخاطر خواتي ادبرها منا ومنا والله كريم بس انته مستحيل اسمحلك تترك دراستك...
تقربت منه حطت اديها على كتافاته... مقداام انته املنه وسندنه من بعد الله اذا تركت دراستك نضيع صدگني اندبرها هسه شلون مجان لمن تخلص دراستك بخير ادور يصير اعتمادنه على الله وعليك
عالقليل بوقتها عندك شهاده بإيدك بوقتها راح افرح من صدگ واگول اخوات مقدام مينكسرن ولا ينذلن ماطول بظهرهن رجال
... تنفس بغضب... 6سنوات 6سنوات من غير الكليه تعرفين يعني لازم بال10 سنوات تتحملن جوع وقهر ومنو گالج راح الگه تعيين
هذولاك شباب كومه كلهم خريجيين منو بحالهم منو عينهم وخلالهم وضيفه يستحقوها وجابوها بتعبهم
احنه مو دول الخليج
ولا دول الغرب
ولادول اوربا
احنا العراق
ناس تاكل ناس
بشي اسمه سنه وشيعه
بشي اسمه اختلاف المذاهب
حكامنه فاسدين تصير فاسد يصفگولك ويطگولك التحيه ويخلوك تدوس راسهم
تصير شريف يضيع حقك وتنوكل وفوگاها تنقتل وانته الممنون
عن اي شهاده تحجين بلا.؟
حُره... رتيل ظلت ساكته وصافنه بوجهه مصدومه بكلامه..
... عمرك كله ينعد ع اصابع 12 سنه لا اكبر ولا ازغر منين تعلمت هذا الكلام كله ؟
مقداام بعدك زغير ع هيج كلام ممستاهل تشغل نفسك بهيج امور
كل العليك تكمل دراستك وخلص منا لهذاك الوكت يحلها رب العالميين
وان شاءالله الايام تتغير
وحال العراق يتغيير ماكو شي يبقى على حاله
وان شاءالله تكمل دراستك وتتعيين ويكونلك المنصب الي تريده وارفع راسي اني واخواتك بيك
.. وهذا اخر كلام عندي احسب حسابك اذا تركت لو رسبت بالسادس احرگ روحي وافضها
.. حجت هالكلام وهي تمشي بأتجاه باب الغرفه
رجعت اركض بسرعه گعدت يم سهر.. طلعت من الغرفه ورجعت گعدت بمكانها وگامت تكور بالعجيين..
مقدام طلع وراها ظل صافن عليها شويه وبعدين اخذ كتابه وطلع للشارع..
ظليت اباوع لسهر بخوف وقلق رتيل گملت العجين اخذت الصينيه وراحت تخبز
... اريد اطلع للشارع العب... حجتها وهي تنهض بنفسها..
.. اسأل رتيل اذا قبلت اطلعج... گلتها واني اگوم.
رحت لرتيل... سهر تريد تطلع بالشارع اطلعها...؟
... طلعيها واگعدي يمها لتعوفيها وحدها لتتخربط... گالت وهي تجر الكوره وتصفگها بإيدها
.. ابتسمت.. رحت على سهر.. يلا امشي نطلع.. گامت عدَلت تراكها وگدتها من ايدها..
طلعنه للفرع سهر راحت ويه صديقاتها تلعب واني جريت طابوگه گعدت عليها واباوعلها...
درت وجهي لنهاية الفرع شفت مقدام واگف ولازم كتابه بإيده وصافن على ولد بعمره واگف وابوه واگف يمه يبوس بيه...
ظلت عيوني على اخويه اعرفه زعلان ومقهور لان ابوه مو مثل اباء اصدقاءه حلوين ويحبون اطفالهم..
تنهدت بحزن.. عكس ابونا يكرهنه وميحبنه ابد...
رجعت رفعت راسي باوعت لمكان مقدام شفته راح يمشي للشارع وهو يمسح عيونه بأردان ايده...
ابتسمت من شفتها اجت تمشي وتلعب بگصيبتها گمت وگفت تقربت مني..
اختفت ابتسامتي من شفت دموعها
... شبيج..
حجيتها بخوف واني اباوع لعيونها..
.. مابيه..
گالتها وهي تدير وجهه عني وتفرك عيونها حيل
... مو ع الاساس اني اختج ومتضمين عني ليش متگليلي ليش باجيه يعني معقوله تجذبين عليه واني مو اختج؟
حجيتها بحزن..
... انجبي زماااله... حجتها بغضب
انتي اختي طبعا بس مااريد اشغلج بسوالف راحت
... لا سولفيلي ارتاح من تسولفيلي... حجيتها بأبتسامه..
ابتسمت... تعالي اسولفلج.. جرت طابوگه گعدت عليها گعدت يمها.. سولفي يلا
.. حياة... باعي من دا اروح للصيدليه اجيب علاج الضغط لبيبي فتت من حيينه... سكتت شويه نزلت راسها كملت بصوت مخنوگ
... لزمتني من اذني مره عجوز وگالت
... انتي مو وهابيه شعندج هنا شوو دوليي... ودفعتني حيل
ظلت المره تدفع بيه وتصيح... ماكفاكم التفجيرات هايه كلها من راسكم يالوهابيه.! نهاية البـــــارت .
يتبع...
#تم نشر اول بارت
يوم الاثنين 2022/6/20