رواية ... غياهب ... الجهل والظلم ...
بقلمي ... نورس _Nawras
________________
اسيل :-
ضايجه ومقهوره اول مره افشل بشي ..
لحد الان مگدرت اعرف منو هايه وشنو تريد من فراس ..
مبينه وحده بايعه المستحه والخجل فدنوب كلامها كوله فشار هم اني استحي اكثر منها ...
جريت نفس وزفرته بقوه ... سمعت موبايلي رن معناها اجتني رساله ...
رحت فتحته شفتها رساله على تلگرام فراس ...
... فتحتها مقطع صوتي ...
فتحت الصوت وانصدمت ...
.. صدمه الها اول ما الها تالي ...
گال ... هااا لك ساقط تبيع مثاليات براسي وانته بايعها الا انطي المحادثات الاسيل اخليها توديك ةرا الشمس ..!!
اسيل ... صفنت جسمي رجف .. عزاا هذا ادم ..!
بس ليش جان يراسل بفراس من حساب بنيه ..؟
مسحت المحادثات ومسحت البرامج من جهازي ..
گعدت حايره ... حطيت ايدي على راسي .. زين شلون حفهمه انو فراس ميدري بكل الموضوع ..؟
جريت نفس بقوه ... طلعت من غرفتي رحت لغرفة ميرا فتحتها وحجيت ...
.. اگولج تعالي يمي بالغرفه ...
گامت من السري عقجت حاجبها وگالن ... خير اكو شي ..؟
هزيت راسي ... دخلت لغرفتها وقفلت الباب ورايه .. رحت گعدت يمها عالسرير .. ميرا علاقتج بأدم شلونها ..؟
جرت نفس حزين عدلت گعدتها وگامت تلعب بأضافيرها گالت بحزن ...
... مو تمام طاقتي خلصت و بعد ما اگدر اتحمل ظلمه الي ... من حجيت وياه وگتله طگت روحي يگولي دا تتمردين عليه ... ومن گتله اي اريد اتمرد .. ضربني وهددني ما انفذ كلامي وياه ...
اسيل .. حجتهن بحزن .. سكتت باوعتلي وگالت بألم ...
... تدرين اسيل خانگني كولش خانگني لدرجة اذا ردت اتنفس لازم اخذ رئيه واگوله .. حبيبي تقبل اتنفس ..؟
مليت من حياتي كولها مقهوره ومتندمه على كولشي خطأ سويته بحياتي على كول نصيحه نصحوني بيها وما اخذتها ...
والي قاهرني اكثر هايه الفتره ادم لازگ بموبايله ويراسل ويضحك .. حتى بليل يمتى ما افز من نومي الگاه يباوع للموبايل ومبتسم ...
... ما اعرف شنو قصده بهايه الحركات يريد يقهرني ويضوجني لو فعلا لگاله وحده غيري ...
اسيل .. هزيت راسي حجيت .. بس انتي مو تگولين متندمه وبعد ما تگدرين تتحملين شي هايه فرصه الج سولفي لبابا ولعمامي واطلبي الطلاق منه واكسبي حريتج وحياتج ..!!
وخليه هو والي دايراسلها لحالهم مو هذا الانتي ترديه ..؟
جريت نفس .. لا اني ما اريد هذا الشي .. باعي صح مختنگه منه بس ما اريد اتطلگ مهما يكون هو عنده سيئات بس يقابلهن بحسنات هو خانگني وحارمني من اقل حق الي اعرف بهالشي بس هو يحبني ...
اني ما اريد اتطلگ منه اريده يغير نفسه يغير تصرفاته ويايه اريد نعيش حياة حلوه ما بيها شك ما اريد على كولشي يشگ اذا لگاني صافنه يگولي بيمن ...
... الشك اذا دخل بين المتزوجين معناها ماكو ثقه بيناتهم واني هذا الشي مضايقني والاهم اريده يعتقني ويرحمني ينطني مجال اتنفس بيه براحتي ... من دون ميتدخل و يحرمني من كولشي ...
جرت نفس ... اني گلت اتغير عليه وبعد ما اطيعه بالي يريده اتمرد عليه مثل مدا يگول هو .. عسا وان يتغير ويفهم تصرفاته خطأ و ظالمه ويايه ...
... واذا ما تغيير وظل نفس اسلوبه وتعامله ويايه لاا اني هنا لازم اتخذ قرار الطلاق وانفذه لان تعبت وروحي الها حق عليه وتريد ترتاح كافي قهر عليها حراام هالشي العمر عايشينه مره وحده خلي نعيشه براحه وهدوء ...
اسيل ... ابتسمت .. حلوو كلامج عجبني والاول مره تفكرين بعقلج من دون خوف اذا هو يحبج فعلا لازم يغير من نفسه لخاطرج حتى ترتاحون بحياتكم ..
لتخافين ادم يحبج وحيتغير صدگي عندي ثقة تامه بهالشي صح هو واحد عار وبريعصي بس اعرفه يحبج وانتي هم لازم تغيرين من نفسج مو بس هو ..
گالت .. شلون ..؟
ابتسمت ... يعني شنو سلبياتج تحاولين تمحيهن وتعدليهن لان ما اگولج بس ادم الخطأ انتي هم عندج اخطاء هوايه لازم انتم الاثنين تغيرون من نفسكم وانتي تشوفي يحبج ويدافعلج وميقبل بأذيتج ويتمنى رضاج بكولشي واعرف احيانا حتى لو انتي الغلطانه وياه يتنازل ويجي يراضيج ...
... فأنتي بالمقابل هم لازم تدللي ومتخلين شي بنفسه وما تتنحسين بشي عليه فهمتي قصدي ..؟
هزت راسها ابتسمت وگالت .. يي فهمت ..
صفنت شويه ورجعت گالت ...
.. صدوگ ليش ردتيني بغرفتج ..؟ شنو تردين مني؟
ابتسمت .. ما ردت شي بس هيج ضجت وحبيت ندردش سوه يلا اني هسه اگوم اروح لغرفتي ..
اسيل ... گمت فتحت القفل ورجعت فتحت الباب دا اطلع شفت ادم واگف يم الباب ومكتف اديه لصدره ابتعد عن الباب طلعت وسديتها ورايه ...
... باوع لعيوني ثواني وگال ... تعالي احجي وياج بموضوع ...
راح للصاله الي يم غرفتنه دخل ودخلت وراه گعد وگال ...
... تدرين مريم ليش راحت لاهلها ومصره تتطلگ من اركان ..؟
اسيل .. باوعتله ثواني حجيت .. وشنو الدراني اذا همه الي بالبيت كولهم ميدرون سبب زعلتها شنو ..؟
جر نفس وگال بهدوء ... شوفي اسيل مريم راحت زعلانه وتريد تتطلگ من اركان لانو شافت محادثاتكم سوه ..!
فتحت عيوني على وسعهن حجيت ... محادثات شنو الشافتهن ترا اني ما عندي شي وياه العار هذا ومحادثاتي كولها زراله اله ...!
گال بتفهم .. اي صح ردج عليه ما بيه شي وكله رزاله اله والنعم منج وحتى مريم ذبت الصوج بيه ومگالت الاحد عالي صار غير امين واني لان تگول اسيل ما الها علاقه بالموضوع السبب بأركان مو بيها .. بس فراس يدري بيكم سابقا كنتو تحبون بعض ..؟
... هزيت راسي بلا گال ...
... زين شنو رئيج انگوله لو لا ..؟
... سكتت مجاوبته ابتسم ..
گال .. تمام مراح انگوله على شي بس بشرط ..
حجيت .. شنو ..
... تبتعدين عن ميرا الف متر واذا شكتلج لو سولفتلج شي عني تكونين محضر خير وتحببيها بيه فهمتي ..؟
جريت نفس حجيت ... انته صير زين وياها واكون محضر خير الك بس مو تخنگها وتموتها واكيد انته هسه سمعت الكلام الگالته .. يعني هي الي مختنگه من تصرفاتك وياها مو احنه الدنكرهه بيك ...
هز راسه وگال ... سمعت كولشي و والاول مره تعجبني طريقة كلامج وياها وانتي دام تمدحين بيه گدامها وما تخربيها عليه اني ما راح اوصل شي لفراس وراح احاول اقنع امي تخليها تشترون بيت وتطلعون وحدكم .. تمام هيج ...
... جريت نفس براحه .. تمام اني ما عندي شي وياك صير زين ويه اختي هذا كل الي اريده فكر بيها وبلي صارلها هي تعبانه نفسيا فلا تضغط على نفسيتها اكثر ...
... صفن بعيوني بعدين گال ... هذا شي خاص بيني وبين مرتي لا تتدخلين بيه ...
اسيل ... گال هذا الكلام وخله وراح لغرفته ...جريت نفس رحت لغرفتي واني مقهوره ... خطيه مريم يعني عرفت بهذا العار يخونها ...
... اكيد هسه انقهرت وتأذت .. ابتسمت بألم .. اي اكيد تألمت محد يحس بهذا الالم الا المتألم .. اني مريت بهايه المرحله وتظاهرت بالقوه وبينت انو هوه مو هامني بس الصراحه تأذيت ونجرحت كولش ...
... طلعت موبايلي فتحت التلگرام دخلت على محادثة مريم وبلشت اكتب ...
______________________
مريم :- متت قهر من شفتهن جوعانات اكلن اللفات واكلن هوايه تمن ولحم وانا اعاينلهن وماگدر احبس دموعي ..
صفنت شهالقسوه الي عند اخو صبيحه .. شلون يخلي بنات اخته هيج كاتلهن الجوع .. ولو ماتوقع منه شي ثاني ماهو اخو صبيحه الي شبعتني قهر وماشوفتني الراحه وماحست بيه وبعذابي ..
جربت نفس مخنوگ ... اووف حسبنا الله ونعم الوكيل كملن اكلهن ...
گتلهن :- ليش ماحاولتن تتصلن عليه ليش ما سولفتلي الصار ...؟
ساره گالت بقهر - انا اكثر شي جنت محتاره شلون اتصل عليج وانا موبايل ماعندي وامي حاذفه رقمج من موبايلها ورصيد ماكو احتاريت والله ..
جريت نفس
-تدرن بيا مستشفى صبيحه؟
گالت ساره -اي مستشفى ال****
مريم -ها چا بدلن يلا خلي نروح لامجن
مريم .. بهالاثناء وديت الجنط للغرفه الفوگ وضميت الذهب زين وطلعت المحفظه مال الفلوس المجمعتها حطيتها بجنطتي باوعت ملابسي تدمرن الملابس الي اجيت بيهن اشتغلت بيهن
طلعت ملابس غيرهن وبدلت .. نزلت لگيت خواتي مكملات بس ساره داتمشط .. كملنا وطلعنا اخذت تكسي للمستشفى .. وصلنا المستشفى انطيت فلوس ونزلنا ..
لازمه خواتي ايد منا ومنا حسيت بمسؤوليه چبيره .. ماريدهن يعيشن معاناتي ..
دخلنا للردهه هي صايره بخير بس تحتاج عنايه واخوها مماخذها لبيته يخاف يصرفله چم فلس طاحظ هيچ اخوان ..
شفتها وهي نايمه وبأيدها الكانولا والمغذي .. وجهها اصفر ليمونه رحت عليها حجيت ...
... الحمدلله عالسلامه
فتحت عيونها بتعب شافتني تفاجئت...
بناتها ركضن عليها وهي تحضنهن وتبجي .. وگفت يمها
گالت بتعب -:ها يمريم تردين تشمتين بيه؟
ابتسمت حجيت :-اعوذ بالله مو من اخلاقي هالتصرف الشماته مو ثوبي ...!
-بچت :- .. شفتي تالية ابوچ شفتي ..
حجيت بقهر :-شچنتي متوقعه من اب مچان سند لبنته ولاچان يسأل عنها غير وقت الفلوس؟ مچان المفروض تتوقعين منه الهواي ..
گلت بقهر ... الي ماحافظ ع بنته وهي بعمر الزهور وهي قطعه من لحمه ودمه يسري بعروگها .. ماچان المفروض تتأملين بيه هواي ...!!
هزت راسه بأسف سكتت و ضلت تبجي ومبينه كلش متندمه ومصدومه بيه ..
جريت نفس رحت للممرضه سألتها
... تگدر اليوم تطلع ...؟
گالت .. الدكتور گال اي بس شرط عنايه وتهتمون بعلاجها واكلها ..
گتلها :- تمام رحت رجعت يمها .. الجلطه چانت خفيفه وماموتتها
نزلت اشتريتلها العلاج وبگلبي اكول لوجه الله .. لخاطر ساره وشهد .. بلكي تنصلح والله يهديها .. دفعت تكاليف الادويه مال المستشفى ورحتلها گتلها
:- يلا تگدرين تطلعين .
:- گالت مو الفلوس
حجيت -انا دفعت يلا امشي شهد لبستها الجوايب وساره الشال .. لبستها عبايتها وسندتها .. اخذت تكسي ورجعنا للبيت .. بس طول هالوقت عينها ماحطتها بعيني ...
رجعنه للبيت نمنه من التعب للعصر گعدت انضف نضفت وصلت للاستقبال جاي امسح بيه وافكر باللي صار منو چان يتوقع ابويه يعوف صبيحه ويبيعها برخص المي .. ؟
جريت نفس فعلا الفلوس تبيع ناس وتشتري ناس .. عند الرخيص طبعا .. صفنت بحياتي ع اللي صار ويايه چنت اگدر ابيع كرامتي وابقى ويه اركان لان عنده فلوس وكِلشي اريده. من فلوس وملابس وطلعه يجيني ع الحاضر ..
بس انا ماردت هالشي ردت حُب،إحترام، كرامه وعِزه قاومت هوايه وصبرت وتحملت وردت احصلهن مگدرت انسحابي من هيچ علاقه فاشله هو الصواب .. وطلاگي راح يكون اكبر انجاز اسويه ..
لان هيچ علاقات تستهلك الانسان اكثر مما تنفعه .. و لاني اختاريت نفسي وتحديت الكل .. لاول مره نفسي راح تكون اولى من كلشي والي اريده اسويه ..
فزيت من تفكيري واني ممنتبهه شوكت فرشت دوشگ لصبيحه .. صحت شهد وانا اطلع من الاستقبال
:- جيبي امچ هنا دام نظافه وتعقيم احسن الها
طلعت من الغرفه وهي لازمه ايد ساره عاينتلي ونزلت عينها .. مادري
.. معقوله خجلت من عمايلها ؟
ممكن ندمت؟
شفتها نامت ع الدوشگ وغطتها ساره حضنتها .. تمنيت خواتي ميعيشن حياتي
.. الاهل يگدرون يدمرون حياة اولادهم .. بلحظه أو بكلمه
كملت تنظيف البيت جلفته جلف .. احس تصير بيه عقده من البيت الوصخ لليل يلا خلصت .. باوعت ملابسي مدمرات رحت سبحت وانا بالي مو وياي ..
طبيت للاستقبال شفت خواتي نايمات وصبيحه گاعده تسبح ..
عاينتلي وگالت بهمس .. تعاي خل نحچي
رحت يمها ..
:- نعم
گالت بقهر:- هاي حوبتچ
عاينتلي بتركيز ويچت
مريم: - صفنت اي صح عشت وياچ طول عمري مظلومه ومكسوره .. انتي وابويه دمرتوني ودمرتوا حياتي ومستقبلي .. حتى شخصيه مااسويتولي من كثر ماتكفخون ع راسي ..
حجيت بألم ...طول عمري احلم بفارس الاحلام الي يجي ويخلصني من هالقهر الي عايشته .. بسببكم وگعت بالغلط .. من اول شخص حچه ويايه كلمه حلوه تعلقت بيه لان انتوا مچنتوا تسمعوني كلام حلو ولااهتمام .. سببتولي عقد نفسيه وقلة ثقه بالنفس .. فعلا الي صار حوبتي
گالت :-يااااه هلگد شايله بگلبچ عليه
هزيت راسي :- شايله بگلبي هموم ميتحملها احد .. مو بس عليچ لان الخطأ الاكبر مو منچ الخطأ الاكبر من الي يتسمى ابويه وباعني برخص المي .. مثل ماباعچ هسه ...!!!
بچت بقهر ..
گالت:- انا ندمت والله .. لزمت ايدي .. سامحيني يمه انا چنت بس اريد اعيش حياة حلوه حتى لو على حسابچ چنت انانيه وحقيره وياچ ..
وهاي الله جازاني .. انكسرت وانخذلت من اقرب الناس الي الي طول عمري اتمناه واتمنى رضاه .. فنيتله عمري وماخليت شي ماسويته .. بس حتى ارضيه ..بعت ذهبي وذليت نفسي لناس حتى يدينونا فلوس .. وعايني نهايتي شلون انكسرت وانذليت .. هاي حوبة اليتيم .. هاي حوبتچ .. سامحيني .. وبچت حيل
ع صوتها فزت شهد اجت يمها تسألها
:- ماما شبيچ ..؟
جاوبتها صبيحه :- انا غلطت يمه والله جازاني .. احس چنت عايشه بوهم واكتشفت الحقيقه متأخر ..
حطيت ايدي ع كتفها ..
مريم: - اذا تبتي صدگ وگلبچ صفى من ناحيتي فـ الله يسامحچ لان الي صار الچ چان عقاب كافي .. ولاعبالچ انا متشمته باللي صار وياچ لا ابد ماتمنيت احد يعيش شعور فقد الاب ابدا ..
لاني عشته وحسيت بيه ..
حضنتني وضلت تبچي .. ضلت تحچيلي عن حبهم وشلون كتلت روحها عليه ومواقف حلوه بينهم .. لاول مره اشوفها مكسوره لهالدرجه ..
ضلينا نحچي لحد الفجر يلا نمنا ..
گعدت ع صوت شهد وساره يحچن بالهول .. عاينت للساعه بـ 10:37 رحت سويت ريوگ .. وجبته بالاستقبال وصحت البنات .. كعدت صبيحه گتلها
...كعدي اكلي ..
كعدت حسيتها مرتاحه اليوم .. يمكن لان فضفضتلي او لان چانت تحس بالذنب وانا سامحتها؟ ممكن
تريگنا وساره وشهد يحچن وانا بالي مو يمهن كملنا .. صبيحه گالت
:- ساره وشهد گومن انتن ساعدن اختجن خطيه تعبت من البارحه لليوم لتكيفين وتغلسن ع الشغل انتن مو صغار يمه تساعدن بيناتچن يلا وحده تشيل الصينيه ووحده تسوي المطبخ
:- ماشي يمه
گمنا رحت غسلت وگعدت بالاستقبال العب بالموبايل دزيت مسج لصاحبة المحل الي چنت اشتغل يمها تعذرت منها وگتلها
...حنفصل عن زوجي ورجعت للبصره
جاوبتني
:- اتمنالج كل الخير واي شي تحتاجيه اني موجوده وحاطه يمه گلب احمر
جاي اسد النقال وصلتني رساله عالتليگرام .. فتحتها من اسيل كاتبه ..
... شلونج مريوم اعرفج هسه مو بخير ويمكن حتى شايله بگلبج عليه وتتصورين خنتج ..بس مريم قسم بالله اني ما خنتج ابددد ومستحيل اخون اي بشر على وجه الكره الارضيه ..تدرين ليش ..؟
مو خوف من احد بس اني انخنت وانغدرت وشفتها شگد صعبه ومؤذيه فمستحيل ااذي غيري بنفس اذيتي واخليه يعيش عذابي ..
احجيلج .. اركان سابقا كان يحبني واني هم ما انكر انو بيوم حبيته لا حبيته ومتت بيه بعد وهو كذالك ضلينه فتره طويله مع بعض الا ان فجأه گام يروح بشغل للبصره بمكان عمو الله يرحمه ...
هنا اركان تغير عليه وفاراتي گامن يخمنن انو هو ديلعب بذيله ضليت وراه وراه الا ان عرفت هو غلطان وياج ولازم يتزوجج ..
ابد مسويت شي مجرد ابتعدت وخلص وهو من هذاك اليوم لحتى يوم عرسي ويه فراس يتصل ويحاول بأي طريقه يريدني انتظره يطلگج و بعدين يتزوجني ..
الصراحه اني من اتعرفت بفراس وقوة علاقتي بيه وگمت احبه من كل وگلبي واقل شي يبدر منه يأذيني والصراحه اكو هواية شغلات صارت وتغافلت عنهن لاجل متصير مشاكل بينه ... بوقتها فهمت هذا الحب الحقيقي عكس اركان كنت ادور الزله وياه حتى اعذبه عذاب الكون ...
فهمت حبي لاركان مو حب كان اعجاب ومراهقه لا اكثر وفعلا اركان من تعرفت على فراس طلع من بالي نهائيا صار بالنسبه الي شخص عادي وميهمني اي شي عنه ...
...من تقربت منج مو لاني حاسه بذنب او شي لا والله تقربت منج شفته مؤذيج وومرتاحه وياه وشفتج ضعيفه وضايعه حبيت اقويج وانطيج حافز يخليج تدافعين عن نفسج ومتسمحين لاحد بأذيتج ..
... مريم صدگي انتي مثل اخواتي شذر وميرا ومعزتج نفس معزتهن بالضبط ومستحيل بيوم ااذيج لو اجرحج ابدد
بالنهايه حابه اگولج ... سوي الي يمليه عليج عقلج لا قلبج ..
لانو العقل يفكر براحتج والقلب يفكر بأذيتج ..
اتمنالج الموفقيه بحياتج وان شاءالله السعاده الدائمه الج ...
مريم ... خاتمه النهايه بقلب احمر ... نزلت دموعي .. جريت حسره بگد الدنيا كتبتلها ...
... لا حبيبتي ما الومج انتي حتى ما منطيته مجال ورافضه كلامه ومهددته اركان الملام هو المذنب ولازم يدفع ثمن خطيئته وذنبه ...
شكرا الج هوايه نصحتيني ولو لا نصيحتج جان انا لسه بنفس شخصيتي الضعيفه بس كلامج قواني وخلالي حافز شكرا الج مره ثانيه ..
سديت الموبايل واني اجر النفس بخنگه ...
عاينت لصبيحه لگيتها تعاينلي گالت بتساؤل ...
:- سولفتلي لرجلج ع السواه ابوچ ..؟
مريم:- لا ومراح اسولف
صبيحه :- شوكت ترجعين لبيت رجلج؟ يدري بيه مريضه؟
مريم :- لا، ومراح ارجع
گالت بدهشه: - جاا لييش ؟ شصاير؟
:- گعدت اسولفلها ع السواه بيه ودگاته الناقصه .. نزلت عيونها بتفكير ..
گالت:-جاا وهسه شراح تسوين؟ تتطلكين ؟
جريت نفس :- اي اتطلگ احسن حل
:- زين هو ضل يتوسل وراج بلكي تاب...
هزيت راسي بنفي :- ذيل الچلب يبقى عوج ماينعدل ...
هزت راسها وگالت :- صح كلامچ شوفي ابوچ مانعدل بعد سنين .. جاا فكري زين مريم قبل اي تصرف الطلاگ مو هين يمه...
تنهدت:-بس اهون مما اعيش ويه هيچ رجال...
گالت:-حقچ حقچ بس فكري شنو الاحسن الچ تتطلگين وتبقين هنا ولو نحصل اكل لو مانحصل ودراسه هالسنه هم ما تگدرين تكملين لو ترجعين لبيت رجلج عندج فلوس وتكملين دراسه بس ماتحصلين رجلج ..
فكري باللي انتي ترديه وانا هالمره راح اساندج بكل قرار تاخذيه .. انا ما راح اعيد اخطاء الماضي .. حتى اطهر نفسي .. وما تصير بالبنيات ...
حجيت بقهر خاله انا متأكده من قراري مستحيل ارجع لاركان والعيشه الله يدبرها ..
انا هم راح اشتغل بلكي اشوف مول محل شي احصل منه فلوس لبين ماالله يفرجها علينا
:- هاهيه يمه براحتچ وانا هم ارجع اخيط بس اصير زينه
تنهدت :- ان شاء الله ... باچر ان شاء الله اروح ادور ع شغل محترم
گالت بتفائل :- چا هاهيه الله ييسرلنا ...
حجيت ... ان شاءالله تتيسر
مر اليوم نوم واكل لان تعبانه ثاني يوم گعدت بدلت بنطلون اسود وقميص سمائي للركبه وحذاء سمائي وشال اسود وجنطه سوده طلعت باوعتلي ساره ابتسمت وگالت
ساره :- واوو مرييم ملابسچ تجنن
ابتسمتلها .. ان شاء الله اشتريلچن ملابس مرتبه وماخلي بنفسچن شي بس الله يوفقني
گالت بفرحه :- اميييين
... طلعت 10 انطيتها لصبيحه گلتلها ...هاي اخاف تحتاجن شي وعشه انا اجيب وياي واذا صار شي رمشولي...
نزلت عيونها للگاع وگالت :- الله يوفقچ يمريم ع الدتسويه وياي ويسامحني ..
تنهدت:- امين يارب
طلعت ادور ع شغل بالمحلات قررت اروح للمول الي جنت اشتغل بيه قبل لااتزوج بلكي يشغلوني يمهم وهسه انا تغيرت احس شكلي حيل تغير ...
صرت مرتبه قبل جنت مبهذله كلش صرت اگدر اشتغل بالمول واساعد الزبونه بالتنسيق وهالامور بلكي يقبلوني عاد ادبر عيشتنا لان الباقي وياي يادوب يكفينا اسبوع ..
وخواتي يحتاجن ملابس وشغلات نسائيه ..
وصلت لهناك جاي اعبر الشارع حتى اوصل للمول وانا ماشيه حسيت بضربه برجلي دفعتني ليوره وصوت بريك السياره وگعت انا وجنطتي وموبايلي...
رفعت راسي للسياره شفت بنيه لابسه كعب اسود نزلت من السياره وتصيح بصوت يلعلع
:- الله الله عزا العزاني شسويت صخام بوجهي ...
اجتني تركض .. والعالم التموا .. رادت تاخذني للمستشفى گتلها
:- ميحتاج مبيه شي
گالت :-لاشلون ميصير لازم اخذج للمستشفى
تنهدت :- مابيه شي لتخافين بس اگوم منا توسخت ملابسي
ساندتني حتى اگوم جابولي كرسي من الكوفي القريب كعدوني واكو رجال جبير لملم غراضي وانطانياهن تشكرته
من تأكدوا مبيه شي راحو بس البنيه بقت وياي گالت بقلق
:- عفيه خليني اخذج للمستشفى خاف تتأذين خاف نكسرت رجلج
:- لا حبيبتي مبيه شي جاي اكدر احرك رجلي ماتاذيت ..
باوعتلي بنضرات تأسف :- اعتذر جدا جدا اسفه خطأت بحقچ واتحمل كافة العواقب القانونيه والعشائريه جدا اعتذر...
:- ابتسمت .. شسالفه مبيه شي
أشرت للولد ابو الكافتريا وگالت بصوت عالي ...
:- عفيه خويه عصير برتقال ولو اتعبك ...
تحچي وتأشر بيدها
گاللها :- بعيني خيتي
جابلي عصير برتقال فتحت محفظتها طلعت فلوس وانطته وهي تحجى
:-تعبتك عيني
فتحتلي العصير وانطتنياه شربت
انتبهتلها لابسه ملابس رسميه وتوربان اجت تريد تگومني
گلتلها :-ها وين
ابتسمت:- بالسياره حبيبتي افتحلچ تبريد اذيتچ سوده عليه
مريم :-لا ميحتاج ولايهمچ مابيه شي ..
گمت وكفت شوفي وكفت بخير وسلامه
گالت:- زين انطيني رقمچ عمري اريد اتأكد من صحتچ وسلامتچ والا ماگدر انام
ابتسمت انطيتها الرقم .. حطتها بموبايلها واتصلت اتصل عندي رقمها
موبايلها بس يدگ مسكت ابد ..
گالت:- متأكده بخير يعني اروح عادي؟
هزيت راسي :- اي روحي مبيه شي
جرت نفس :- خوش انتي عندج رقمي اي شي يصير اتصلي لان هسه عندي جلسه وان شاء الله نلتقي
ابتسمت:- ان شاء الله
گالت :- بالمناسبه .. اسمي رشا مدت ايدها
:-ابتسمت ومديت ايدي اسلم .. وانا مريم
:-عاشت الاسامي ...
رجع اتصل موبايلها
:-يلا رايحه مع السلامه فتحت باب سيارتها
:- مع السلامه ... شغلت السياره وانطلقت بيها ...
جريت نفس ... حيل حلوه ومثقفه عجبتني حييل ...
_______________________
اسيل ... گاعدين بالمطعم اني وصديقاتي هنه يسولفن مع بعض واني بالي مو وياهن ...
بالي ويه مريم شلون حتتصرف وحتتطلگ فعلا لو لا حترجع .. جريت نفس ..
ابتسمت ... تذكرت موقف البارحه .. ادم راح للاستقبال وصاح على فراس گله تعال ورايه ...
اني گلبي لعب وضليت افكر بفشلة فراس تخيلت شكله من دره بالموقف يشوف نفسه دونگي ...
دخل للاستقبال ويه ادم دقايق وجان يعيط بأسمي ...
... اسييييييل ولج اسسسسسسسيل ..
... حطيت ايدي على قلبي عزااا انكشفت ..!
دخل للغرفه باوعلي وهو عاقج الحاجب گال بقهر ... ولج شمسويه شمصخمه اسيل ..؟
ابتسمت .. ممصخمه شي غيرتي جبرتني اسوي هيج ..
گال بقهر ... غيرتج جبرتج تفشليني هالفشله ويه اخويه ..!
ولج اني اجيب وابيع مثاليات براسه تالي مطلعتني صاقط من جوه لجوه ..؟
لا واليقهر يجيب ويهدد بيه انو يگلج اذا ما ابطل هالسوالف خليتيني هطولني گدام اخوي ...
اسيل .. يحجي ويأشر بأصبعه ودمه محروگ رحت عليه بسته بخده وحجيت ...
اسفه حبيبي اي اني لو ما اغار عليك اسوي هيج وبعدين اني شدراني بأخوك صاير يتموع مثل مرته والله ولا لحضه فكرت ممكن يكون رجال مو مره على هالتنعوص والمياعه الشايلها ..!
جر نفس وزفره بقوه گال ... اذا عدتيها مره ثانيه وسويتي هالسوايه صدگي ما تتوقعين الي اسويه بيج ..!
رفعت حاجبي وحجيت ... اي بالله وشنو التسويه ..؟
فراس تعرف اني ما احب التهديد موو .؟
واني اهدد ما اتهدد گلتلك من غيرتي سويت هيج فلتكبر السالفه وخلص تمام ..؟!
مگال شي نفخ بوجهي طلعومن الغرفه ورگع الباب وراه ...
اسيل .. فزيت من صفنتي على كلام براء وهي تگول ...
... صدگ اگولجن اكو موضوع حابه اگوله الجن ..
گنالها بصوت واحد ... شنووو. ؟
ميار اختي گامت تشغل فلوس والارباح خيييير من الله ..!
حجيت .. يعني شنو تشغل فلوس ما فهمت ...؟
گالندت بأبتسامه ... باعي تشغل فلوس مثل هسه اني انطيتها 5 ملايين گلتلها شغليهن الي گامت هي شغلت ال5 ملايين صارت ارباحهن مضاعفه كول شهر يتضاعف ربحهن ..
حجيت بشك .. بس اني سامعه فقط المصارف الي اذا ودعت بيه فلوس يتضاعف بيه ربحهن وهم مو هوايه يعني يمكن كول 6اشهر 50 الف ..؟
نور گالت .. اي صح اني هم هيج سامعه ..؟
براء هزت راسها وگالت .. ايي المصارف تختلف عن اختي اختي تشغلهن وتزيدهن يعني اني انطيتها ال5 ملايين گمت كول سهر اسحب منهن وال5 ملايين باقيات بس هاا ميصير نشغلهن شهر او شهرين وبعدين نسحبهن كولهن ربحهن يروح ومبيهن فوائد. ..
الفوائد شلون تجي وارباحهن شلون تاخذ مثل ال5ملايين يجي شخص محتاج ياخذهن منها بالاقساط ال5ملايين تصير عشر ملاييين ..
هو كل شهر ينطيها فهذا االي لان ال5ملاتي وارباحهن هم اخذها بس مو كلها يعني تنطيني من ال5 الارباح مليونين او 3 والباقي الها فهمتن ..؟!
اسيل .. ابتسمت ..خوش فكره يمكن حسويها احسن من مافلوسي يتطشرن اشغلهن والفوائد الي بس هاا اكيد امينه اختج ...؟
گالت بدهشه ... افااا وسفه عليج اسيل شنو تشكين بصدق و امانت اختي ..؟
لج بابا اني شگد امينه اختي اكثر مني وبعدين هذني امانه عدها مو لعب ..؟
اسيل .. تمام حشوف افكر واردلج الجواب ..
گالت .. تمام يلا اني اروح قبلجن ماما منتظرتني اجيب علاجها من الصيدليه ...
اسيل .. گامت براء وبقينه اني ونور ..
نور باوعتلي وگالت ...
.. صدگ حتشغلين فلوسج يمها اشو مواثقه منها ..؟!
حجيت .. لج لا اني منيلي فلوس بس گلت اشوف فراس اذا عنده يشغلهن بس ما اعتقد عنده لان هالفتره كولش متضايقيين وماعندنه ...
جريت نفس .. تدرين نور مريضه واريد اروح للطبيب وما عندي واستحي اگول گدام اهلي يعني مترهم زوجوني ومخلصو من مصرفي ...
... باوعتلي بخوف وقلق وگالت ... صدوگ جذب اسيل ليش مگتيلي اموركم لهالدرجه داچه وبعدين اني وين رحت عنج ..؟
مو عالاساس اخوات واحنه لبعض من نحتاج شي. .؟
باوعت للطاوله وحجيت بخجل .. والله خجلانه واستحي اگولج اخاف هم ما عندج واحنه هم مصارلنه هوايه من متعرفين على بعض گلت فشله اگوللها ...
... حطت ايدها على اديه وگالت بأبتسامه ...
... لا اسيل ترا ازعل منج والله احنه اخوات ومابينه مستحى حبيبتي ...
.... دارت وجهه فتحت جنطتها طلعت 200الف منها انطتنياهن وگالت ...
... هاج حبيبتي هايه 200 والله لو شايله اكثر جان مااقصر عنج بعيوني روحي بيهه للطبيبه واذا احتاجيني شي ادللي اني يمج ..
... نزلت راسي .. اووف نور ما اعرف شلون اجازيج حبيبتي كثر الله خير وكثر من امثالج ان شاءالله بأقرب وقت حردهن الج ...
ابتسمت وگالت ... لا توازين نفسج عليهن ماكو فرق بينه واني ممحتاجتهن هسه ...
..ابتسمتلها ضلينه گاعدين شويه وبعدين كل وحده رجعت لبيتها .. وصلت للبيت صعدت لغرفتي فتحت لباب فراس گاعد عالسرير ويلبس بخذائه ...
باوعلي ورجع نزل راسه ويعدل بحذائه ... دخلت طلعت الفلوس احسب بيهن باوعلي وگال ..
... منيلج هايه الفلوس ..؟
حجيت واني احسب بيهه ... قطيت صديقتي بحجت مريضه اخذتهن منها ...
گام من السرير اجه وگف گبالي وگال ..
.. جيبيهن اخذهن حتى بليل نطلع نسهر بيهن نتعشى بطعم ونروح للمولات نفتر بيهن ...
اسيل .. ابتسمت ..تمام خوش فكره هاك تفضل اخذهن بس هاا دربالك ليضيعن منك ...
ابتسم .. لا شنو السالفه قابل طفل واضيعهن ...؟
ابتسمت .. اخذهن حطهن بجيبه مشط شعره وطلع ...
اني رحت للسرير بدلت ملابسي ورحت نمت حتى اشبع نوم لليل ابقه مصحصه و ما اتعب ...
______________________
ميرا :-
گاعده اقلم اضافري واصبغهن انفتحت باب الغرفه رفعت راسي باوعتله دخل وقفل الباب وراه .. رجعت اباوع الاضافري ومهتميت لوجوده ...
.. اجه گعد يمي حط ايده على كتافي وسحبني لحضنه گال وهو يباوع الاضافري ...
... حبيبتي نسولف مع بعض شويه .. ما ترهم نضل بهايه المشاكل لازم نلگه حل الها مو صح ..!؟
رفعت راسي ترگت المبرر جريت نفس هزيت راسي ... اي صح مو حلوه المشاكل و معروفه نهايتها شنو واذا انته تريدها تنتهي فالحل بأيدك انته ..!
هز راسه گال ... تمام الحل بإيدي گوليلي عالحل شنو بلكي افهم عليج واعرف غلطي وياج ...
بعدت ايده عن ظهري گمت گعدت گباله رجعت شعري ورا اذني ... الحل بإيدك تگدر تغير نفسك تگدر تفكر وتشوف تصرفاتك ومعاملتك الي سيئه لو لا هاهيه تگدر تبين لحالك انته خانگني لو مريحني ...
تگدر تغمر وتشوف اساس الغلط وين مني لو منك اذا مني گولي عليه حتى اغيره واذا منك هم لازم تغيره ...
.. ادم البيت الاساسه جاي عوج مينبني وحتى لو انبنه راح يحي يوم وينهدم لان اساسا عوج من البدايه .. احنه هيج اساسنا مو صحيح ويردله تعديل خلينه نعدله من هسه احسن من ما بعدين ينهدم و بوقته كولشي ينهدم وياه ومراح يرجع شي مثل ما كان من الي انهدم ...!
جر نفس وگال ... تمام اعرف اني غلطان وياج اعرف اني خانگج ومخليح سجينه بهذا البيت بس ما فكرتي شنو السبب لهذني ..؟
ابتسمت بحزن .. هو السبب واحد من الاثنين يا انته ما عندك ثقه بيه يا خايف ينعاد ماضيي مره الثانيه .. !
هز راسه بنفي ابتسم .. لا والله حبيبتي ولا وحده من هذني الاثنين بالعكس اكثر بشر بالكون كله اثق بيه هو انتي لا تنسين ربيتي على ايدي وگدام عيوني اما ماضيج فهذا مو سبب يخليني اعاملج هايه المعامله لانه ماضي راح وخلص صح غلطتي بس سبحان المايغلط ماكو بشر معصوم عن الغلط ..
... بلعت ريگي .. لعد شنو المخليك هي تسوي ويايه ..حيرتني !
جر نفس .. حبي وخوفي عليج ولان اني جاي اشوف اشكال الوان المصايب الداتجيني بالقضايا والملفات وكلها سببها نساء اعوذ بالله منهن ابليس ما يلحگهن بشرهن وكيدهن ...
ما اريدج تختلطين حتى ما وحدخ تأثر عليج وتضيعج مني. ما اريد عندج موبايل حتى ما تتطلعين على امور اكبر منج ومن عقلج وحتى عقلج ما يتوسخ بيها ...
... مو عدم ثقه بيج مانعج من الطلعه والموبايل بس من خوفي وحرصي عليج والدليل من اني بالبيت موبايلي بإيدج وتتصفحين بيه براحتج قابل مانعج منه ...
جر نفس .. الفيس بوك وبقية البرامج كولها برامج سيئه واكثرها جيوش اكترونيه تحرض للفساد والفتن ...
المصائب الداتجينا كلها بسبب الفيس وبقية البرامج ...
فالذالك مانع الموبايل عنج خاف اني ما موجود ولا سامح الله وحده بحجة الصداقه ولا شي ثاني تضحك عليج وتسحب منج صورج ولا كلام ولا اي شي ثاني وبعدين تگوم تبتزج وتهددج بيهن..
.. وتعال ساعتها الموت اشرفلي بمليار مره من هايه السالفه غير اموت واتخبل لان مراح نگدر نلزم عليها اي ملتزم اكثريتهم يسوون ايميلات وارقام امريكيه مراح تنعرف لدلو اموت ...
ميرا .. صفنت عليه ثواني .. بس اني مو غبيه لدرجة اصادق ناس ما اعرف واروح انطيهم صوري ولا اسولفلهم خصوصيتي تعرفني اني مو اجتماعيه والدليل حتى بالمدرسه مجان الي اصدقاء يگولون عليه انطوائيه ومتحب الصداقات وفعلا اني جنت انطوائيه ...
جر نفس باوعلي دقائق وگال .. تمام راح اغير بنفسي من هايه الناحيه راح ادوس على خوفي واجيبلج موبايل بس بالمقابل اريد وعد منج ..؟
ابتسمت بفرح .. شنو ..؟
ابتسم گرصني بخدي ... البرامج التنزليها تكونين حذره بيها وتنزليها بأذني وموافقتي عليها متختلط ولا تصادقين اي احد على اي برنامج ماعدا اخواتج واخواتي .. كولشي يصير وياج اي شي اي تفصيل حتى وان كان زغير ما ينضم عليه وتجين تگوليه الي ..وعدني بهايه الامور حتى يرتاح گلبي اولا ودام اعرف ميورتي بريئه وما تخون الوعد ...
ابتسمت .. تمام اوعدك ما عليه بهذني الي گلتهن كولهن وحتى مو مهم اذا نزلتهن بالموبايل اولا اهم شي برنامج التليگرام يكون عندي حتى احاجي شذر وماما منه ...
.. ابتسم .. تمام تدللي من باجر الموبايل يمج .. بعد شنو المشكله الثانيه ..؟
ابتسمت ... الطلعه هايه مشكلتي النفسيه .. دا اختنك من البيت هوايه لان 24 ساعه مسجونه بيه مو مشكله اذا فرغتلي نفسك وطلعنه سويه اني وياك رحنه مطعم مول منتزه حتى لو لحدائق النعمان نغير جو بيهن هم قابله واهلي متحرمني منهم اريد اشوفهم بين مده ومده ما اگولك يوميه بس انته شوكت متفرغ تاخذني الصبح وتعال عليه بليل هم اني اغير جو وهم ارتاح واكون مرتاحه وياك ..!
هز راسه ... تمام ولو عندي مشكله بيها ويمكن ما اگدر اتحملها بس اوعدج راح احاول انفذ الترديه ..
عقجت حاجبي .. شنو المشكله العندك كولها ...
... جر نفس .. يعني اذا طلعنه اكيد العيون راح تصير عليج وهذا الشي يخبلني وراح يخليني اتعارك واسوي مصيبه الها اول ما الها تالي ..؟!
ابتسمت .. هو اكيد العيون حتصير عليه بس بسببك اذا انته خليت هايه الفكره ببالك هيج راح يتصورلك اما اذا شلتها من بالك فراح تشوف كولشي طبيعي وماكو عيون تصير عليه لان مو بس اني مره طالعه للسوگ او للمول لااا كومة نسوان غيري وحتى اذا احد باوع بالصدفه او بالغلط هالشي جدا طبيعي اني ما دخلني بيه اني عليه بيك انته وبس وهذا المهم مو صح ..!
... ابتسم گرصني من خدي الثاني وگال ... صح ووعدتج راح احاول ويمكن بمحاولاتي راح اتعود على هالشي ...شنو المشكله الثالثه ...
... اممم حطيت اصبع ايدي على خشمي وحجيت ... مشكله اخيره ...
.. شنو گولي ..؟
... ما احب تتحقق ويايه تجي تسألني بنبره حلوه نبرة تساؤل ما احسها نبرة تحقيق تسألني بيها الي تريده عادي بس اذا تجيني بتحقيق لا هالشي يخنگتي ويحسسني انته مواثق بيه حتى لو موقصدك هالشي بس اني اخذها بغير معنه ...
والشغله الاهم ... من اريد ملابس ومتعحبني البيجات نطلع اني وياك واختار الي يعجبني ومتجبرني على شي ما احبه وتفرضه عليه لا گولي حابب تلبسين هالشي عادي اني ساعتها حجاوبك بالي تريده بس من تفرضه عليه وتجبرني عليه لا حكرهك بهالطريقه ..
جر نفس ... تما تدللي هذني هم نغيرهن بس هااا انتي كل يوم تردين ملابس شكل يعني مو معناها كل يوم بالمولات نحدد يوم نطلع بيه تشترين كول الي ترديه وخلص منضل يوميه بالمول ..تمام ..
... ابتسمت براحه ... تمام .. جريت نفس وزفرته بهدوء عدلت شعري باوعتله وحجيت ... مشكلتك ويايه شنو تفضل گولها حتى اغيرها ...
..ابتسم جرني من خشمي وگرصني حيل اني عطت حجيت ... عفيه شبيك اليوم بس تگرص خشمي حينعوج ..
ضحك بصوت عالي رجع باوعلي وگال .. ما عندي مشكله وياج بس وحده اني احبج وتعرفين بهالشي وحابب قربي منج دائما بهايه ما اريدج تتنحسين عليه لو تخليها بمزاجج لا كون بمزاجي اني تمام ...!
ابتسمت جريت نفس .. تمام الي تريده يصير ...
حجيت بگلبي .. اعرف هالشي صعب عليه واكثر شي اكرهه العلاقه الزوجيه بس مو مشكله ماطول حاب يتغير ويايه ويريد نعيش حياة سعيد ادوس على خوفي واتقبل الواقع واحاول بأي طريقه ابعد هالخوف المتملكني واخليه مرتاح وسعيد ويايه ...
... فزيت من شرودي على گرصته الي بخدي .. ابتسمت ... انته شبيك بس تگرص معقوله امك متوحمه بيك على تگرص ..!
عاط بيه وگال ... لاااا ياالله هم جفضت ولج اني اول شرط اليه بتغييرج هو جفصاتج شوفيلهن جاره وبطليهن...
... ضحكت وغميت روحي مارهملي جاره گوه هي ...
جريت نفس بأرتياح ... ليلتها نمت سعيده ومرتاحه وبالي مطمئن انو القادم بفضل الله احسن واحلا ..
ثاني يوم الصبح صادف جمعه گعدنه ساعه 9ونص اني وياه باوعلي ابتسم ...
صباح الخير يأحلى خير صابني بحياتي ...
... ابتسمت گرصته من خده ... صباح النور حبيبي ...
بعد ايدي عن خده وگال ... احمم ولج ديربالج تگرصين بعد حسستيني حسوني ابن امين ...
ضحكت گمنه من الفراش هو اخذ ملابسه وراح للحمام واني ضليت اعزل بالغرفه بين ماطلع هوا اخذت ملابسي وهم دخلت للحمام كملت غسل مشطت شعري حطيت مكياج خفيف ونزلت جوا اسوي ريوگ ...
.. ادم وخاله گاعدين بالمطبخ اني صبحت على خاله ورحت شغلت الطباخ وبلشت اسوي ريوگ شويه ودخل فراس صبح علينا وصعد لغرفته ..
... طگيت البيض وطلعت الجبن وحصرت الخبز والاستكايان دا اجيب الجاي اصبه اسمعت عيطه قويه ...يتبع ....
_____________________
شلونكم فراشاتي ان شاءالله بخير حبايبي ...
اسفه عالتأخير كان المفروض انزله من زمان بس اسرد والبارت ينحذف خبلني .. هسه سردت ومن دا احفضه نسخت الكاتبته كوله علمود اذا انحذف موجود عندي ما ارجع اسرده من جديد والحمدلله منحذف ...
دا اسرد بالبارت القادم اذا لحگت وكملته من وكت انشره الكم وادللوو ...
هسه اريد ارائكم عالقصه ...
لتنسون التصويت والمتابعه ...
مشاهده ممتعه ❤️
#Nawras
#تعديل 😁. نسيت هذا سكرين من محادثة اسيل من ادم صاح لفراس للاستقبال ...