في ضريح العشق حمامـــــه......💙🕊

الحادي عشر ــ الجزء الثاني

في ضريح العشق حمامه .....

البارت الحادي عشر....

وئام الشيخــــلـــي.....

مساء الورد والياسمين ؏ عيونڪم غوالـــــــــي القلــــ♥ــــــــــــــب.....

ويبقي الأعظم من الحب هو استمراره ..

فـسلامـا على من لبث في كهفِ القلب سنين عددا ..............

ـ
تحديث حبايب ــــــ

اغلفه وفيديو للبارت الجاي اريد توقعاتڪم ـــ

ـــــــــــــــــ

أراك بقلبى أينما كنت ٠٠
فتانس بك روحى وان غبت ٠
فسلام عليك ٠٠
وسلام على قلبى
الذى امتلكَتَ .....

سحبت السنسله ولبستها ـ ورجعت لڪتبي اقره شي قليل وبسرعه افقد الترڪيز.

وڪل شوي ارفع الخارطه واباوع الها.وگلبي ينعصر.

ليش مابقه لابسها مو گال تذڪرني بيج.

يعني شنو خلاص مايريد يتذڪرني.

اطرد الافڪار وازيحها من بالي وارجع لڪتابي.

شگد صعبه عليه بعد ماڪانت القراءه والمذاڪره عشقي.

بعد ماڪنت مااقبل الا باعلى الدرجات.
صرت ابحث. ؏ ابسط درجه.

هواي امور اتحطمت بداخلي وما عاد الي ذاك الامل بالحياه.

واذڪر ايامي الراحت وحالي ڪنت جسد بدون روح ــ

روحي خاويه ومعطوبه ومقتول بداخلها ڪل الامل ــــ

ياترا يدري بحالي ـ

هل أخبروك
بأن عيني في غيابك لا تنام.
هل أخبروك.
بأن الفؤاد بعدك يأبى..الكلام
هل أخبروك
كيف تاهت نفسي مني بين الزحام هل أخبروك محاولات قلبي للهروب إليك..ليقرأ السلام
هل أخبروك
أن الحياةبعدك ماهي إلا ساعات وأيام كذبوا لو أخبروك أني بدونك على مايرام.

وارجع اصحي روحي ڪــــافي ڪـــــافي ڪافـــــــــي مسك ڪافـــي اني بشنو وعدت نفسي ــــ

ويصير بين عيوني ابوي اغلى انسان بڪل حياتي.

امي ــ
اهلي ــ

اجدادي ڪلهم.

اخوالي.

الناس المحبين الي ـ

خالو ابو الحسن ودموعه من تنزل ؏ وجهي قطع من جمر ﭼـوتني.
خوفه عليه بنيتي روحي ضناي.

وبيوم توجهنا للسليمانيه الطريق ڪله يباوعلي بالمرايه وڪلمته بنيتي روحي.
شگد اطمنه زينه خالو زينه الحمدلله.
مااتحمل وسط الطريق صف السياره ؏ جانب.

ابو الحسن ـ محمد ڪمل سياقه بدالي بهد مااگدر ارڪز.

نزل من مڪانه ورجع يمي اخذني لحظنه ويشدد لزمته الي ضمني بقوه يريد يدخلني بين ضلوعه.
غفيت براحه ؏ صدره المليان حنيه وامان.

ماحسيت الا وهو يحاول يشيلني ندخل لبيت خالتي عنيده.

لو خالو ارشد ــ اه يا خالو ارشد ـ انـــــتَ ٵب لو عم لو خال لو اخ لو سند ــ
انـــــــتَ ڪلهن ـــــ

ورجعت بذاڪرتي المحطـــــمه ـــ

بيوم رجعنا من المستشفى بعد مااخذت الرنين ومجموعه تحاليل وفحوصات.

وصلنا لبيت خالتي عنيده
تلڪتنا ام هاجر زوجه خال امي تسٵل بشرو ان شالله زينه.
وخالو ڪالها الحمدلله زينه.
دخلنا للبيت وڪلت لخالتي عنيده دخت اريد انام.

والحقيقه اريد اهرب من نظراتهم وابعد عيوني من النظر الهم واني اشوفهم بحاله ماشفتها بڪل حياتي خوفهم عليه وقلقهم. ڪل هذا يخليني اتدمر دمااار.

وراح يجي الحنين يڪمل عليه.

گالت نص ساعه ويصير الغدا وخالج وصل المطار راح هوشيار يجيبه.

واگول بگلبي هو اني اريد اتهرب من لقائه.

شافتني مطفيه ڪلش گالت تعالي نامي ـ

حسيت روحي غفيت بين الحلم والحقيقه سمعت صوته ـ يگولهم وينها ماارتاح الا اشوفها بعيني مااصدك بيڪم بعد .

عرفت وصل خالو ارشد بقيت بمكاني اختنگت عبره بصدري ودموعي غرغرت وبدا الم عيوني يحرگني.

خطيتنا ڪلنا برگبه منو ؟؟؟؟؟؟؟؟؟؟

اتعذبت وتوجعت وڪتمت حتى لاينقهرون.

لان توجعوا وانقهرو وطغى عليهم الحزن مو ناقصهم قهري ووجعي.

وزاد الوجع عن حده وصار لازم يعرفون.

والنتيجه هذا حالهم.

جاي وقاطع المسافات حتى يطمٵن ؏ حالي.

تارك بنته وزوجته بالغربه منووو الهن بعده؟ ؟؟؟؟

ومن نزل بالوقت الانخطف بي الياس وبقا فتره طويله صارت اله مشڪله بالشرڪه اليداوم بيها. وبالجامعه ڪذلك ـ

واخذله فتره طويله ياله گدر يحل المشڪله.

وهسه جاي والله يعلم شلون رهم اموره.

خطواته البطيئه احس وقعها بگلبي.

وصل يمي يتلمس جبيني باسني ويعدل الغطا عليه.

وجعج ؏ گلبي بنيتي.

اوووف هاي ڪلمتهم خوالي ـ

ڪلهم گالوها لامي بيوم انهارت بسبب العقوبات والاستجوابات لابوي من رَجَع السياره ومسوي حادث والتحق للموصل .

وبقت يومين حال الضيم حالها وحالنا وحال ابوي هي فاقده. يوم بالمستشفى وواليوم الثاني ابيت خوالي ــ

ومن تصحى ماتدري شنو اليصير بالدنيا وتهذي وتشكي وتگول گلبي يوجعني من القهر وتنادي باسم ابوي. ويرجع خالو ينطيها مهدئ وترجع تنام.

وڪل يوم صرت اسمعها من ابو الحسن ـ وجعج ؏ گلبي بنيتي.

لعد ليش عمامي مو مثلڪم ـ
وهمَ السبب لهذا الوجع.

مواقف ٵليمه انخزنت بالذاڪره مستحيل ننساها.

ماتحملت بجيت بخنگه ـ لمني لحضنه ويبجي وڪلماته تگطع گلبي.

صدگ الحنين مايبعد علي البعُد ـ ڪل يوم يسٵل علينا الڪل.

ومايقبل احد يضم عنه اي خبر.

ومشارڪنا الافراح والمآسي.

دموعنا اختلطت ابعضها. ويشهك ويڪررها وجعج ؏ گلبي بنيتي.

واضح علي التعب والقهر طمنته مابيه شي وبجيت لان مشتاگه الك.

ومن لحظه وصوله للعصر مانزل نضره مني وڪل شوي يسٵلني شنو يٵذيج.

وارد علي ــ زينه الحمدلله.

رجعنا العصر للمستشفى وهو ويانا يتسابق قبل ابوي وخالو ابو الحسن ويدفع المصاريف ومايقبل احد يناقشه .

ويدخل يتناقش وي الدڪتور عن حالتي.

و باخر مره رحنا بيها للمستشفى من دخلنا السڪرتيره سولفت وي روز بالڪردي. ــ

روز گالت تگول من تڪملون اريد اشوف نتائج التحاليل. شگد گلبي يحبها بنتڪم.

بعد ساعات ڪملنا ڪل التحاليل والرنين والنتائج الحمدلله.

روز وياي تگولي ايسن تهدد اذا ما رجعتي اليوم وجايبه مسك وياج اجيب نَنَه (الام) ايهان واجي للسليمانيه. وإلين تگولي واني اجي وياهن.

من طلعنا استوقفتنا السڪرتيره وسٵلت روز عن التحاليل و روز تراويها حسيت بيها فرحانه الي وبعض من ڪلامها مافهمته ـ

بس فهمت اخر سؤال من خلال الڪم ڪلمه الحافظتهن من البنات.

والتفتت اباوع الهم اربعتهم.

اڪيد شافت خوفهم عليه وماميزت ياهو منهم ابويه.

ابو ايسن ضحك وگال ٵنــــــي ابوها.

وهي حست بي يمزح ــ

اشر الها ؏ ابويه وگال هذا ابوها ــ وهالاثنين خوالها ــ واني ابن خالهم يعني همات خالها.

سلمنا عليها وطلعنا الجو ڪلش بارد ومطر قوي ـ من دخلنا المشتشفى ماڪانت تمطر.

ابو ايسن گال اجيب الشمسيه من السياره لاتتبل .

گلت لا خلي نمشي بالمطر شوي.

خالو ارشد اخذ ايدي وفتح الڪوت الطويل وغطاني ضمني تحت جناحه يمشي سريع.

ابوي فتح باب السياره صعدنا وعيوني تباوع من جام السياره المطر ڪلش قوي والشوارع نظيفه تمشي السياره واني اتمنى الطريق يطول اڪثر.

ويروح بالي لليوم الي ڪنت العب بالمطر
وامي تطلب من ادخل للبيت. واني مستمره اقفز ما مصدگه اتمنى ڪل المواسم مطر مستمر.
اخر شي زعلت مني وگالت سدي الباب وتعالي.

ومن وصلت الباب تفاجٵت بوجوده ـ يعاتبني ليش طولت بزعلي علي.

مديت اصبعي اسامحه ـ ثواني ودخلت البيت اتنفست براحه.
واگول من زمان ڪنت متمنيه اشوفك واسامحك.
لان دايم اماني تگولي يسٵل عنج ويگول بعدها زعلانه.

جريت حسره وياها اهاااااااات وهسه وين صفينا ـ

ياترا لو التقينا راح اسامحك هالمره لوووووو؟؟؟؟؟؟

ـــــ هااااا المها الصغيره تتمنين هسه انتي بالمطر مووو.

مسك ـ اي والله امنيتي.

گال الانواء الجويه تگول المطر يستمر يومين.
يعني ارتاحي وبالليل نطلع اني وياج بالمطر ـ
المنظر اجمل.

صار المجسر ڪبالي وصلنا قريب لبيت خاله عنيده.
گلت اووو وصلنا.

وخالو گال وعدتج خلاص بالليل نطلع. نمشي بالمطر.

دخلنا للبيت ڪلهم منتظرين ويسٵلون بلهفه.

طمنهم خالو گال ڪلشي تمام الحمدلله.

روز راحت تساعد عمتها وخالتي عنيده.

اتذڪر ڪلام ابو ايسن يگولي اني وهوشيار بمقام خوالج الاربعه.

گاعدين ڪلهم گبالي وابوي بصفهم.

فعلا لاحظت اڪو شبه واضح بين هوار وهوشيار وبين خوالي بالشڪل والاطباع.
وخاصه حنيتهم.

اتغدينا وبعدها الجاي ـ وهمه يقلبون مواضيع. سياسه ؏ اقتصاد ؏ صحه.
خالو اوراس وهوشيار اثنينهم تربيه رياضيه وعدهم جيم رياضي وتحته مطعم مٵڪولات صحيه.
ڪلش واضح عليهم اختصاصهم خالو اوراس يبين اخو هوشيار مو ابو.

يگول مايستخدم السياره الا للضروره.

اڪثر الاوقات يمشي اذا لدوامه او للجيم الرياضي.

روز تريد تسوي حمله لبيت عمتها تعزيل وتنظيف وتغير اماڪن للاثاث .

وعمتها تگول مايحتاج اني وام اميره قبل لاتجون رتبنه.

واني ڪل شوي اطلع للحوش اباوع للمطر وارجع.

وهسه عيوني تباوع للشباك انتضر يحل الليل والمطر بعده مستمر.

اريد اطلع وامشي بالمطر

ماصدگت بدا الغسق (اول ظلمه الليل) ــ اوووف ڪلشي يذڪرني بي ـ

لا واضح هواي راح انسى.

اباوع لخالو ـ

ضحك وگال يالله تحضري طلع للحوش ورجع گال الجو صار دافي.
بس البسي اخاف تتمرضين.

شال شمسيتين. واني بقيت واگفه معترضه.

لان اريد اتبلل.

گال مو راح نمشي هواي خليها اخر شي من نرجع نتبلل.

خالتي عنيده تگول لابو الحسن اخاف مو زين عليها البرد.

گالها ماعليها شي بنفسها تطلع بالمطر خليها بلڪي ترتاح.

ابوي ويانا للباب يوصي خالو ـ

يباوع النا وصلنا الشارع وخالو گال ارجع.

مشينا المنظر يجنن المطر وي اضواء السيارات والحرڪه هواي اڪو ناس بالشارع.

وبدا يسولفلي عن امي وشنو غلاتها عنده. واول ماسافر شلون رجع للعراق علمودها لان ماتقبل تدخل لبيت اهلي وهو ماموجود.

وراح بالي يم انس لو لاسامح الله قرر يسافر ـ
واگول لامستحيل. مااتحمل.
او اسافر وياه.
زين وابوي والياس وامي واخواتي واوس ويزن واجداي اخوالي وهيام لالا لا.
وارجع اڪول اصلا هو ليش يسافر. مايسافر.

حممم گال ها وصلتي ڪراج سيارات لو مطار.

گتله لو اني بمڪانها مااتحمل لو منها ازعل عليك وماارضى ضحك بصوت عالي گال مجرمه انتِ .

بعدها صار ڪلامه عن ابوي وعن جامعتهم وصداقاتهم.

مواقف ڪلها حلوه وتبعث بالنفس طاقه ايجايبه

انشرح صدري واني استمع.

وراح بالي يم احمد من يگول عن مخلد عمامي وخوالي واخوي وتوٵم روحي.

توقف ـ گلت خالو ڪمل.

گال تعالي نتعشا وبعدين اڪمل وصلنا شارع سالم.

دخلنا مطعم گال اطلبي ـ والقهر اني ذيج اللحضه مااجه ؏ بالي غير الرگي.
من گتله انصدم.

گال اطلبي اي شي وهسه ندور.

اني قبل يومين شفت النوعيه المدعبل والڪشر زيتوني غامق.

طلبت مقبلات اڪلنا ومن طلعنا سٵلهم عن الرگي گالوا موجود بهواي محلات.

مشينا هواي ياله وصلنا محل عنده ڪل انواع الفاڪهه صيفيه وشتائيه وخاصه العنب انواع واشكال.
ونوعيه برتقال حجمها بكد التمره. وصاحب المحل گال فائدتها بالڪشر.

من ڪلشي اخذ وخاصه الرگي اخذ ڪميه كبيره ـ اجر تڪسي ونطاه العنوان.

واتصل عليهم بالبيت گال لخاله عنيده لما نوصل للبيت بايدج الحلوه اريد الذره مستويه.

وڪملنا مسيرنا رجعنا. ڪمل ڪلامه عن هيا واميره. وحياتهم بدبي.

هيا ادري بيها ڪلش ذڪيه وطموحها مثل ابوها اداره واقتصاد.
وهي بعدها اعداديه.

يڪول تفڪر بين المحاسبه واداره الاعمال.
وبڪل طريقه يقنعني اڪمل دراستي يمه.

ويسٵلني بعدج تريدين سفيره ـ اي غير اعتبري مڪانج بالسفاره بيوم التتخرجين.

اگوله وابوي ....

يضحك ويگول ناخذه ويانا.

وصلنا گبال شرڪه سيارات نيسان ــ واڪيد هو اجا ؏ بالي.

عشقه للسيارات ونيسان الي اني صرت اعتبره من اجمل الشهور.

صرنا قريبين من فرعهم ــ

حفظت الطريق تقريبا.

نطيته الشمسيه ؏ الوعد مووو.

اخذها من ايدي سحبها ولمها وشمسيته همات.

مشينا بجزره وسطيه بشارع الستين.

المطر قوي والجو دافي والسيارات من جهه ذهاب والثانيه اياب.

لون الاضواء وي ظلام الليل وصوت وقع المطر ـ
تمنيت بيدي ڪاميرا واصور المنظر.

نزعت الڪلاو الصوف من راسي وسحبت الڪماشه ونثرت شعري.

اقفز بالمطر وخالو لازم طرف ايدي يخاف عليه يگولي لاتوڪعين. من اقفز وانزل يحاوطني بايدي.

فرحتي ماتنوصف مااتذڪر شوڪت اخر مره لعبت بالمطر.

مشيت بعڪس الاتجاه وخالوا متمسك بيدي ويرفعها لفوگ ڪلش وي ما اقفز وشعري يتطاير.

اباوعله يضحك. فرحت اڪثر وصرت اقفز عالي اڪثر وهو وياي ضحڪنا اثنينا وصوت ضحڪنا عالي.

ماحسيت بالطريق الا واحنا بالباب.

واني متفاجٵه شوڪت عبرنا الشارع العام شو ماشفت.

وايده نمدت يمسح وجهي من الماي ويمسح شعري.
ومبتسم گال ڪل ذره ومسامه بيج من قدمج لراسج هي امج.

من طلعنا لهاي اللحظه اني اشوف المها وحركاتها والــ هاا الي ڪل شوي تگوليها هااا.
اموت عليها ـ هاي مالت امج الـ. هااا.

طلبج الغريب بالمطعم. شفتيني ضحڪت.

هزيت راسي اي شفت.

گال امج مره طلعنا اني وياها وهي بسادس ابتدائي وصرت اخيرها لفه شنو تحب. واعدد الها انواع المشاوي.

وهي طلبت لفه صمونه بداخلها حلاوه رمليه. وشرط الصمونه حاره
عفت المٵڪولات ومريت للفرن اخذت صمون وبعدها رحت لمعمل الحلويات اخذت الها حلاوه رمليه بالجوز.

وبالمعمل سويت الها اللفه وطلبت منه يحميها بالفرن.

ونمشي وهي تاڪل واني گلبي مليان فرح لان اشوفها تاڪلها بشهيه.
وتمشي بثقه عادي ولا ڪٵن طلبها غريب.

ومن جبتها الها مره ثانيه.

گالت هي بس بذيج اللحظه عجبتني اڪلتها مره بعد ڪافي.

ابوي گبالنا فتح الباب ـ فوتوا عاد اتاخرتوا هواي.

يتلمسني مبلله گال غاليتي بسرعه بدلي وتدفي.

ويگول لخالوا مو ڪتلك لاتسمع ڪلامها.

وخالوا يگول هو اني اگدر.

ماحسيت بالبرد ابد.

بدلت ملابسي. وروز صاحت هوشيار يجيب الشسوار من بيتهم.
نشفت شعري وضفرته.
وخالتي عنيده تستعجلني تگولي ياله حضرت الرگي.

ذاك الليل بقينا لوقت متاخر.
والفجر خالو نزل لبغداد وبعدها سافر.

واحنا بعد ذاك اليوم بقينا يومين ورجعنا لبغداد ــ

اخوال امي بيوتهم واحد بصف الثاني وطيله هاي الايام الاحنه يمهم بيت خالو اوراس موجودين ابيت خاله عنيده وبس باليل يرحون لبيتهم.

وڪلش حلوه حنيتهم واهتماهم.

وفهمت همه دايم هيج لان بيت خالتي عنيده بس هي وزوجها ـ وبيت خالو اوراس بس هو وزوجته وهوشيار خاطب يتزوج عن قريب ـ

وارجع اصفن ؏ وضعهم بڪرڪوك ثلاث بيوت واحد بصف الثاني وڪل الڪعده ابيت ام روز احترام الها. لان ڪبيرتهم.

صارلي اشهر يمهم ماشفت بينهم الا المحبه والتآالف. وگلوبهم مليانه طيب وخير.

مايختلفون عن بيت جدو عبدلله ومحبتهم.

مايمر مايوم اذا ماتنذڪر الجده ريمه وتوصلها رحمات ودعاء.
ويگولون ابو ادريس هو انسان طيب والله ڪتبله طيبه مثل الجده ريمه ـ
اهالي القريه الڪان ساڪن بيها يذڪرون بالذڪر الحسن.

هو خال جدو عبدلله ويگولون جدو عبدلله مٵخذ منه ڪل صفاته ــ
ثلثين الولد خاله ــ

واتذڪر ڪلمه ام الحسن تگول ثلثين الولد خاله بڪل مڪان اسمعها واشوفها فعلا الولد ماخذ صفات خاله الا ابيت الحجي.
مسيطرين ڪلش و ولدهم طالعين عليهم وقاعدتهم تگول الولد لو ابو لو ابو وعمه.

لان يگولون عن مصطفى هدوء ابو وشبهه واطباعه ابو الحسن.

واخو مصطفى ـ مهيمن يشبهونه بعمه ابو حسام. وجدو عبدلله يسميه السبع.

حسام يگولون عنه شبيه ابو وعمامه والاڪثر عمه ارشد. الشي الي اباله يسوي ومحد يگدر يغيرله رٵيه.

واولاد خالو ابو الحسن بعدهم صغار وامهم تگول ؏ اي واحد من اعمامهم يطلعون انعم الله. ڪلهم خير وبرڪه.

الله ما نطاني اخوان وعوضني بيهم صارو الي اخوان واڪثر وخاصه ابو حسام وحڪمته وحنيته ؏ الڪل.

اشتاگيت الهم هواي وقررت هذا الاسبوع انزل لبغداد بعد مااتحمل ــ

وارجع اگول لعد شبيهم عمامي معقوله ابوي وحڪمته واسلوبه الحلو عجز يلاگي طريقه يڪسبهم بيها. لو الخلل بيهم.

معقوله ما حنت گلوبهم اله.
ماڪفاهم الغدر والطعن بابوي.

وعمي معقوله مارف گلبه وهو يعذب الياس وعذب گلوبنا الڪل ؏ فراگه اوووف واني اتذڪر ذيج الايام.
تمنيت المووت ولا يصير ؏ اخوي شي.

وعمتي الف رحمه لروحها شلون گلبه نطاه يطعنها بشرفها ويٵذيها بكلام ماله صحه و وصل بيها الحال من التعب والقهر تنهار وتضربها جلطه دمويه وصلتها للوفاه.

تعبت واني افڪر تعبت حييل .....

شلون بييه صايره هواي افڪر واربط احداث واقارن ماڪنت هيج. فعلا تعبت. ...

فززني صوت باب الغرفه يندگ إلين تسٵلني نمتي لو بعدج امي تگول خلي تجي تاڪل هي مااتعشت راح نعيد فقره العشا لان جعنه وننه ايهان تسال عليج.

شلت ڪتابي خليته ؏ الميز وطلعت خاله روز ابتسمت من شافتني اشرتلي باتجاه بيت امها گالت ياله لبيت ننه.

دخلن للصاله ڪلهم موجودين وروز راحت تساعدهن تنقل الاڪل ؏ السفره وايليف زوجه طه تساعدها گعدنا ناڪل الا زينه زعلانه الڪل صاحو عليها تجي تاڪل وهي قافله ماتجي. گاعده ؏ التخم ولامه رجليها محتضنتهن بايدها.

يضحڪن بينهن ويباوعن ؏ ابراهيم فهمت هو مزعلها گاعد ؏ السفره ومااڪل بيده الريمونت مالت التلفزيون ويقلب قنوات ويباوع الها.

خاله روز بصفي ڪل شوي تگولي اڪلي.هاي المقبلات التحبيها مو ڪلتي علميني الطريقه.

وابراهيم گبالنا گالها شيلي الها اڪل خلي تاڪل بعدين.

كالت اله انتَ صيح عليها خلي تجي تاڪل ــ

هز راسه لا.

وخاله روز سوت حرڪه بايدها مثل المسبه. وضحڪت تگول بس عليك مو ؏ خالي.

التفتت لــ زينه ورجعت باوعت لابراهيم وگالت مخابيل.

ڪملنا طلعت غسلت واجتني زينه تسٵلني اڪل ـ
رديت لا ـ
گالت احسن.

وگعدت تسولف الي سبب زعلها.
تگول بعد شهر تخرجنا وصار يومين اروح وي امي للسوك اختار ملابس ومااشتريت شي ويگول بعد ممنوع توصلين السوك.

سالتها شعجب ما عجبج شي ؟؟؟

گالت غير حضي حتى امي شبعتي رزايل.

هواي اشياء حلوه عجبتني بس لو يطلع قياسه اڪبر لو اصغر.

لڪيت الها الحل وگلت امي تخيط الج وقياسج تقريبا نفس ميس.
بين فرحانه بين متردده گالت شلون تعب عليها.

المهم اتفقنا و وصت روز تختار الها القماش واللون ومن انزل لبغداد اخذه حتى امي تخيطه الها.

وهي تتحلف با ابراهيم گالت والله هالمره مااراضي وراح اگول لخالي علي بعد مايدخل باي شي يخصني.
گطع نفسي بتدخلاته.

روز ما صدڪت بيها.
گالت اخاف تگومين تبجين وتگولين لخالو فدوه گوله خلي يراضيني.

بس الظاهر هالمره زينه كلش مضبطه امورها.

بحيث داوموا اسبوع ونزلو نهايه الاسبوع سمعت ابراهيم طلب من ابو يعقدون عقد سيد قبل حفله التخرج.

وهي توزع ابتسامات وهاي عود بعدها زعلانه علي.

نزلت لاهلي نهايه الاسبوع اجه ابوي اخذني ـ

ڪل مره انام بالطريق لان اتعب وادوخ.

اليوم ما مصدگه الطريق ڪله اباوعله وهو يسولف وياي ويسٵلني عن ايامي المرت.
ومن وصلنا للدرجات گال ڪلش عادي.

وصلنا داقوق وبعدها الدوز گال المدينتين داومت بيهن وانتي عمرج اشهر.
والطريق ڪله نقلب مواضيع الى ان دخلنا مدخل بغداد.

اتنفست براحه واستنشقت بقوه ـ

گال ها غاليتي الله يا ريحه هلي.؟؟؟؟؟

مسك ــ اي والله بابا رغم دمارها احبها.

واحب هواها.

لاحظت شي بلون الليل بين بغداد والسليمانيه.
بالسليمانيه لون الليل سواد قاتم والنجوم لمعتها قويه.
ابغداد احس لون الليل سواد فاتح ولمعه النجوم قليله.

گال لان بغداد جوها صناعي ـ
والسليمانيه جوها نقي وصحي اڪثر.

بس شباقي منها بغداد ـ الوضع يضرب يقلب.
مابيها اي تطور وتعمير ـ. دمار وخراب.

ومن المدخل لحد بيتنا ڪل شوي سيطره هويتك و وين رايح ومنين جاي.

صارت خوفه بگلبي واني اسمع عن الطائفيه والقتل ؏ الهويه. من الطائفتين.
واليفهم يعرف انو اليقتل هو ماينتمي لاي طائفه.
هو عدو للاسلام وغايته زرع الفتنه والتفرقه بين ابناء البلد.

وصلنا لمحلتنه من بدايه الفرع شفت الياس بالباب من تقربنا اڪثر شفت يمه حسام ويزن.
فتح الباب دخلنا للبيت مو ثلث اسابيع احسهن ثلث سنوات مفارڪتهم.

واگول بداخلي بس هالسنه تخلص لو اعرف شنو يصير مااتغرب عنهم.

الياس فتح الباب من يمي وڪلمته هلا نورت بغداد.
حضنته واگول منوره بيڪم.
يضحك بوجهي ويگول مبينه زينه الحمدلله.

سلمت ؏ حسام واخذت يزن شلته اموت علي و؏ شعر المكنكر.

امي طلعت من باب المطبخ مبتسمه حضنتها يربي شگد مشتاگه الها.
وهي محتضنتي يمكن ما مصدگه رجعتلي صحتي.
ميس تگولها ماما بقيلي خلصتوها.

وانوسه وياهن بالمطبخ.
سلمت عليهن.

ورجعت للصاله. اسلم ؏ اجدادي. اموت عليهم و؏ ڪلماتهم.

نزل انس وبيده محاضراته يگول حيا الله من جانا.
سلمت علي.

عيوني تدور لا اوس.
بيبي گالت اوس راح وي خاله ابو الحسن.

صار اشهر من دوامت هاي السنه الدراسيه بڪرڪوك.

ومن اول اسبوع اني ٵلم عيوني ماخذ روحي وي فراگهم ادمرت دمار.

مااذڪر نزلت لبغداد الا واني باسوء حالاتي. بس ڪتمت وما خبرت احد بحالتي.

اليوم احس نفسي افضل بهواي بس گلبي يسٵلني علي ياترا شنو اخباره وشنو حاله.

واني ادري لحد الان احمد ماانگطع عنه وڪل مايرجع من البصره يمر يسلم و واضح هو جاي من يمه.

نضرتي الي وڪٵنه محمل بامانه ويسٵل عن اخباري.

؏ الدقايق والثواني اذڪر نفسي بصورته التحولت وهو غالي عندي وغلاته ماتنوصف.
بسسسســ ...... شنووووو؟ ؟؟؟؟؟؟؟
حتـــــــى اني نفسي ماادري صدك حاليا هو بس شخص غالي واله اثر بحياتي وبسس؟ ؟؟؟؟؟؟؟

لو هو بعده ........
وصورته مارجعت لسابق عهدنا.

وادعيله ربي يقدمله الخير ويوفقه بڪل خطوه يخطيها.

اتمنى اعرف هو بخير حتى اڪتفي واطمٵن.

اجاني صوته وضحڪته مســـتحيل يلفظ اسمي لفظ صحيح لازم يگلبه ستين گلبه.

وصوت خالو ابو الحسن مو راضي علي يگول صير ادمي. بعد شگد تڪبر.

رغم مشتاگه اله هواي.

وگفت لحيلي تجاوزته ورحت لخالو سلمت علي.
يلزم وجهي باثنين ايدي ويتمعن بملامحي ويرجع يحضني ـ ولج شدعوه هلڪد غاليه.
اخذتي روحي بغلاتج.

ربي يحفظك ومايحرمني منك وانتَ همات غالي بغلات روحي واڪثر.

يگولي فدوه لروحج بنيتي.

اجاني يسحبني من خالو هو ويقلد بصوت ام هادي ـ ضحڪني شنو من قابليه عنده يجيد تقليد ڪل الاصوات باحترافيه.

يگولي شو تعاي تا احبج حبتين.
يبوسني بڪل خد بوسه لو عبالك مصاص دماء.
مسحت خدودي ينعل ابليسك اذيتني شلعت خدودي.

يرجع يخلي ايدي ؏ عيونه ع اساس يرڪز ــ
يگول انتي ياهي انتي. مو ام عطوب الصفر الڪتلتي حفيدتي منار المدلله علمود (حصين )حصان بلاستك وسبيتيني. وتوليتنه ڪسر بيدڪم الا ما ڪسر بيدڪم.

غدي غدي غدي ـ وڪحه انتي.

حرامات انتي بنت المهه.

امي تٵشرله ؏ جهه بيتهم تگوله عيب.

يگول ما تسمع العصر سلمت عليها.

گالت شوڪت تخلص دراسه.

لا اسمع ولااشوف ومفاصلي يوجعني. وڪلبي يحتاج قسطره. وعدها فقره زالحه وفقره مڪسوره.

متانيتك تڪمل دراسه وتشوف علتي. اني دعيتلك وانت صرت دڪتور.

ميس ـ وانت تتخصص كلشي وڪلاشي مثلا.

اوس ــ لعيون جده ام هادي ڪلشي وڪلاشي اتخصص.

ميس ــ الضهر رجعت من الداوم ڪلشي مابيها سٵلتني شڪو براس الفرع.

گلت هوسه ناس بس ماعرفت شنو؟ ؟؟

گلت ماادري لو ابتليت.

وهي تگولي شمالج الله منطيج عيون شوسعهن ماشفتي شنو الهوسه.
شبيجن بناويت اخر وڪت فاهيات.

دخلنا للصاله سٵلت عن نور گال زينه الحمدلله الصبح وديتهم لجدادهم صار فتره ما رايحين.
وباجر اجيبهم.

امي اخذتني يمها تسٵلني وتطمٵن عليه.

اذن المغرب صلت وراحت تڪمل وي البنات.

بينا ما صلينا المغرب ـ امي والبنات صبوا العشا.
التمينا ؏ السفره گعدت بين ميس وخالوا.

اباوع عليهم واحد واحد وخاصه الياس ـ

واحمد ربي واشڪره.

طگطگ ؏ الملعقه مالتي بملعقته ينبهني گال هواي تصفنين صايره.

ڪملي اڪل اريد اسولف وياج.

ڪملت ورحت يمه.

بدا يسٵالني شنو ياذيني وهواي اسئله اڪثر من ما ابوي سٵلني.

گال ما راح الومج ليش تفڪرين وليش تقارنين ووووو.

المرحله العمريه الانتي بيها.

الضروف المرت عليڪم.
عمامج.

بُعدج عن اهلج.
مرضج.
واخر شي درجاتج.

ڪلها اسباب.

بڪلشي اكول الج حقج.

بس اذا بقيتي تفڪرين ايام وليالي ـ لگيتي حل لو بس تعبتي دماغج ونفسيتج.

دام ربج موجود لاتفڪرين بشي.

صفنت ؏ ڪلامه.

أحتاج إلى الهدوء جداً، ففي داخلي ضجيج مدينة من الحنين، وفي قلبي أشلاء حكاية ممزقة، وفي عيني ملح بكاء ألف ليلة وليلة.

ويروح بالي يمه الي رسالته ڪانت القاضيه.
ڪمل الي الابتدٵو بي عمامي.

خالو اشرلي بايده مستفهم.

گلت يمڪن ڪلشي اگدر اترك التفڪير بي.

الا عمامي لحد الان من اشوف الياس گلبي يوجعني.
لو من اشوف امي وميس لابسات الاسود.
واباوع لمڪانها.
لابوي وڪسره ضهره.
لجين الاعتڪفت ؏ نفسها. حتى ماتقبل ترد ؏ تلفون.

والله يستر من الجاي.

گال سلامه گلبج.

واستلمني بڪلام اقنعني ابتدا من الايمان بالقضاء والقدر ....... وصلنا الى لن يصيبنا الا ماڪتب الله لنا.
وبعدها عن مشيئه الله وحفظه للانسان.

وهواي ڪلام و؏ درجاتي گال ڪلش عادي.
والماده الفاتت تتعوض واقري ؏ قدر النجاح لاتعبين نفسج.

السنه الجايه ان شالله ارجع انقلج لبغداد اني استلمج اوصلج لمدرسه واني ارجعج و اني اصير المدرس مالتج.

بس لاتفڪرين باي شي وتعبين نفسج.

ڪملنا تعلولتنا وي اهلي وخوالي اجو.

گعدت يم البنات مرام تسولف عن جامعتها ماشالله مستواها ڪلش زين.

تگول جربت شعور الطالب من يصير شاطر ڪلش حلو هالشعور. ولو اجاني متاخر بس انعم الله.
والبنات يسولفون عن مدارسهم ويسالون عن البنات بڪرڪوك.

راحوا وبقيت اني وميس گالت اليوم نصعد انام بغرفتنا.

رديت اي.

راحت جابت محاضراتها ماتحب تستنسخ تڪتب مسوده بالجامعه وترجع للبيت تڪتب واثناء ماتڪتب تراجع المحاضره.

وهم صارت تسٵلني گلت بعد مابيه ارد.
هواي سٵلوني.

خليني اني اسٵلج ــ سٵلتها اذا تعرف اي خبر عنه گالت لا والله.

؏ الرغم قبل ايام اجت معالي وسناريا ونضفت بيت اهلها ومرن يمنا عصريه وراحن.

بعدها اخذتنا السوالف سوالفها حلوه وحنينه.

تلعب بشعري مادريت بنفسي واني غافيه ؏ رجلها.

صوت امي تگولها تخرب نومتها.

فتحت عيوني ـ ابوي يم راسي وامي.

وميس تگولي نصعد لغرفتنا ننام مو انتِ گلتي .

مابيه افتح عيوني رديتها لا هنا نبقى.

تدردم عليه تگول انعل ابليسج العجزه اعجز من اوس.

ثاني يوم مر بسرعه امي بدت تخيط ملابس زينه.

ميس تتصل بيها وتسالها واتفقن ؏ الفصال.

ڪملتهن امي وميس لبستهن ڪلش حلوات.

واجتنا ام الحسن ونور تجنن بيضه وعيونها خضر نفس عيون ابوها وشعرها اسود فاحم عبالك قديفه.

عمرها ثلث اشهر دخلت بالرابع.

تنحط بالگلب ـ شوڪت تجي العطله واشوفها يوميه.

وام الحسن تگول عطلي وتدللي انطيها الج ولامج. ڪبروها ورجعوها الي.

همات صارت تنصحني اخلي بالي ؏ صحتي.

بعدها بيوم ؏ اساس ابوي يرجعني.

وابو الحسن گال اني اوصلها اريد اخذها للدڪتور حتى اطمٵن عليها و؏ صحتها اڪثر.

توڪلنا الفجر وصلنا قبل الضهر.

ارتاحينا والعصر رحنا لشارع الاطباء ڪملنا فحص وطلب تحاليل بسيطه.
ڪملناها وگال مابيها شي غير جفاف العين.

وصداع الشقيقه يعتمد ؏ الحاله النفسيه ونفس التوصيات والراحه النفسيه.

ماادري ليش ڪل ما نراجع لدڪتور خالو يطلع ضايج رغم ماڪو شي يقلق حسب ڪلام الدڪتور.

ويڪتم هالشي وتصرفاته ڪلش واضحه هي مجامله ومبين القهر علي.

طلعنا من العياده مرينا لمحل خالو شحن تلفونه برصيد وبدا يتصل سلم ويگول شلونك دڪتور ــ وبعدها گال اهاا من تطلع من العمليات اتصل بيك.

وصلنا لگبال محل ملابس اطفال ولعب. تجننن.
گتله خالو ادخل للمحل ــ اومٵ براسه بـــ اي.
وبقا اباب المحل اتصل اسمع يگول ابو ياسر ـ يعني احمد ــ

واني دخلت اتفرج وكلشي موجود حلو حرت شنو اختار الها.

سٵلني صاحب المحل بشنو اگدر اساعدج عدنا ملابس اطفال من عمر يوم للست سنوات.
شفت لعابه نفس حجم نور بس شعرها اشقر ـ.

گلت اريد مثلها بس شعرها اسود.

گال موجوده بالمخزن هسه ادز يجيبوها.

اختاريت الها ملابس حلوه اغلبها لون وردي.
وبوندات وڪماشات اشڪال والوان حتى من ارجع لبغداد اسوي شعرها ستوتات.

جاب اللعبابه تجنن شعرها ڪلش اسود. مثل شعر نور.

رفعتها لخالو فهم علي ضحك.

ڪملت ومشينا للسياره بالڪراج وخالو ڪمل اتصاله وفهمت من ڪلامه احمد بالبصره وگاله اني يم خوالي.

باوع للعلاليك بايدي وضحك گال هاي لاختج. موو ترا بعدج انتي اغلى منها.

رجعنا لبيت خاله روز بالطريق هيام اتصلت جاوبها بس سلم وگالها بعدين اني اتصل بيج. ويتشاقه وياها گال شنو قصه ابو ياسر ڪل مااتصل بالبصره ـ

گالت خاله شوي مريض وراحو هو وعمتي عليهم.

وصلنا لبيت خاله روز قبل المغرب ڪلهم گاعدين بالحديقه خالو اتصل بـ هيام وبعدها نطاني التلفون وراح يجيب الشاحنه من السياره گال خلي ؏ الشحن.

خليته ؏ الشحن ودخلت بدلت ملابسي وحضرت ڪتبي حتى ابدي اقره.

إلين گالت تلفون خالج من زمان يدگ بس صوته مو عالي.

طلعت للصاله باوعت للشاشه مڪالمات لم يرد عليها. ورساله من ام ياسر ـــ
مڪتوب ــ خالو ابعثلي التقارير ؏ الايميل حتى اخذهن لدڪتوره ناهد البرزنجي هسه عرفت من ليث هي راجعه من السفر. بس ما جاي افهم سبب خوفك اذا التحاليل والفحوصات ڪلها تمام.

بعده التلفون بيدي واتصلت ـ
نطيته لــ يونس ابن روز وداه لخالو.

اخذت ڪتابي بيدي وگعدت بطرف الحديقه ـ خالو ماڪو طالع برا اجه وبعده يسولف بالتلفون وبيده ڪومه اوراق وتقارير مو بس مالت اليوم.

وابو ايسن گدامه راح فتح الاستقبال وشغل الحاسبه.

اخذهن خالو ودخل ما طلعو لليل الا صاحو الهم ؏ العشا.

يتناقشون بينهم مافهمت من الكلام اي شي.

مااڪلت شي وحتى الماي اختنگت من شربته. اريد افهم شبيها التقارير.

ماڪو الا ميس اتصلت عليها بس سلمت گلت اذا ما سولفتي الي ڪلشي ازعل منج والرب.

ضحڪت وگالت خير گولي.

مسك ــ اتصلي بهيام وافهمي منها ليش طلبت تقاريري من خالو. قبل لا اڪمل شنو تسٵلها......

گالت هسه سديته منها.

مسك ـ اي گولي امانه الله لاتضمين عني شنو ماڪان يڪون .

ميس ــ والله ماڪو شي بس هو خالو يخاف عليج هواي. وبعدين حتى اذا عندج صداع شقيقه لازم ڪل فتره تسوين تحاليل وفحوصات من باب الاطمنئنان اڪثر.

بس هو خوفه فوگ الطبيعي لان التحاليل مالتج بالبدايه ڪان عندج ارتفاع بضغط العين.
والنبض مو طبيعي وبعد امور خلته يشك ...

مسك ــ ادري شاك بـ ورم الدماغ . سمعت ڪلامه بالسليمانيه ـ

ميس ـ المهم هسه هيام اخذت التقارير للدڪتوره تڪول عنها افضل طبيبه عيون باربيل ڪلها.

تجي بس اربع ايام للعراق.

ليث حماها گال الها عليها لان اخت صديقه نفس حالتج بالضبط واصل بيهم الحال تدخل عمليه وتقاريرها تگول ورم الدماغ وقبل العمليه ابوها ماقبل تدخل للعمليات ماخذها وطالع والله جعل الهم سبب هالدڪتوره وهمات طلع عدها صداع الشقيقه العيني. بس همَ عدهم بالعائله هذا المرض.

وهسه عن تقاريرج گايله صداع الشقيقه.

واحتمال من تڪملين امتحانات هيام تمر تاخذج الها. حتى نطمٵن اڪثر.

او ما اتوقع خالو راح ينتضرها للشهر الجاي هسه هيام گالت هو حاير لان عنده دوام بالجامعه. وهي عليها حجز اشهر بس ليث يگدر يحصل الڪم موعد بدون حجز.

مسك ـ والله شلعت گلبه وڪرهته بحياته. مااروح لاي مڪان. وبعدين ليش انتي تعرفين بڪلشي.

ميس ـ گولي الحمدلله الله نطانا اخوال حنيتهم علينا اڪثر من حنيتهم ؏ ضناهم.

وشي ثاني اني اعرف احسن من ما ابوي وامي يعرفون گلبي يتحمل بعده ماشاف ضيم مثلهم ـ

وهو اصلا ماڪو شي وانت مابيج الا العافيه والسلامه.

ايا عوبه غير اني احبج بگد محبه امي الج. روحي بعد ولا اريدج.

مسك ـ ادري والله انتي من النعم الي احمد ربي واشكره عليها ڪل يوم اخت بحنيه ام.

وفعلا ڪلامها خالو ابو الحسن گالها الي مبتسم اخذنا موعد يم طبيبه باربيل هم نغير جو ونشوف هيومه وياسر ما مشتاگه الهم.

وهمات الدڪتوره تشوف عيونج الحلوات.

شنو رايج؟ ؟؟

مسك ـ خالو والرب اني زينه مابيه شي وڪافي انتَ تعبت من الطريق والمخاطر وتارك بيتك ودوامك.

واڪيد قنعني باسلوبه.

ثاني يوم من الصبح رحنا لاربيل هيومه منتظرتنه وحماها ليث وياها اخذونه لمستشفى خاص.

الفحوصات والتحاليل حفظتهن ڪثر ما عدتهن.

والطبيبه طمنتنا ماڪو شي يخوف ان شالله.

وفهمت تگوله لان عمرها صغير اختلطت عليهم االاعراض بحيث الصداع وي اعتلال عضله القلب ـ وي ڪل التراڪمات طلعو بهاي النتيجه.

بقينا يمهم للعصر حموينها طارو بينا ڪلش رحبو بينا وزوجاتهم مثلهم اسلوبهن ڪلش حلو ومحبوبات.

واحمد وامه بعدهم بالبصره.

وهيومه من احنه يمهم اتصلت بـ ميس ورادت منها دفترها مالت انگليزي ـ
وميس گالت منطيته لصديقتها تريده لاختها و واس همات منطي باقي دفتر انس گال يريده لـ مسك.
وهيومه گالت الله ڪريم من لحد ما تبدٵ مسك بالسادس.

اريده ڪلش ضروري راح اخابر احمد يمر عليڪم انطي اله.
اخذتني ارتاح بغرفتها انتبهت للساعه ڪلش حلوه بداخلها صوره احمد ومخلد ماخذيها بجامعه احمد.

غنى گالت هاي هديه ليث سواها الهم ـ
گال لاحمد حتى تشوفه بڪل وقت.

رجعنا لڪرڪوك وخالو بقا يمنا وثاني يوم رجع لبغداد.

الله يعينه شگد اتعذب بسببي.

داومت بالمدرسه ونطونا جدول امتحانات الشهر الثاني من الفصل الثاني.

والمدرسات يردوني امتحن الشهر الاول راح عليه والماده ماقاريه منها ولاحرف.

رجعت للبيت خالتي عنيده يمنا گالت نهايه الاسبوع عرس هوشيار. سٵلتني نروح نشتري ملابس علمود العرس.
وروز گالت زي ڪردي الها وللبنات.

وخالتي ايدتها بالفڪره.

سٵلتها ليش هسه ياله يتزوج وهو توٵم ابو ايسن. وايسن هسه متوسطه.

خالتي عنيده گالت ما فڪر بالزواج الا قبل سنوات راد بنت خاله وجانت صغيره مانطوها الا هسه.

لنهايه الاسبوع نزلت زينه وڪلش عجبنها الملابس لبستهن يجنن عليها.

تحضرنا نروح للسليمانيه ـ الطريق بين ڪرڪوك والسليمانيه تقريبا ساعتين.
وڪله خضار يفتح النفس وما حسينا شلون وصلنا.
خاصه خالتي هاجر اجتي ويانا بسياره هوار تگول عرس اخونه ونبدي الحفله من ڪركوك والطريق ڪله تهلل هي وروز وبنات روز محتفلات لعرس عمهن واني وزينه نصفگ وياهم.
ومن تفوت سياره ابو طه من يمنا تهلهل وهو يگولها اني اعلمج من نوصل.

من وصلنا بدوا بحفله الحنه.

العروس بنت خاله من اربيل.

الحنه ابيت خاله عنيده ڪانت بسيطه وڪلش حلوه.

ثاني يوم العرس صار ابارك ازادي حتى العروس لبست زي ڪردي ابيض. حلوه ونازڪه وفرق العمر بينهم 14 سنه.

ماعازمين هواي ناس عدد قليل من اقاربهم.

حفله حلوه ڪانت دي جي اغلب الاغاني ڪرديه ودبڪاتهم. ڪلهن محترفات بيها.
مااتاخرنا هواي زفوهم للفندق ورجعنا للبيت.

وباليل البنات اتفقو باجر جمعه ناخد الغدا ونروح بالبارك نتغدا ونبقى لليل ياله نرجع الجو حلو ربيعي.

حضرن ڪلشي وبدلنا حتى نطلع.

لبست بنطرون جينز ثلجي وتيشرت ابيض وقمصله جلد.

مو بعيده عليهم بسرعه وصلنه لحد ماصبو الاڪل يونس ابن روز ڪل شوي مختفي من يمنا ويلگوه يم الالعاب.

ڪملنا والعصر مشينا تقريبا ڪانت مزدحمه بالناس لان يوم جمعه.

نزلت قريب من بحيره صغيره اڪو بط ووز نطيتهن جبس ونگرن ايدي منقارهن عبالك منشار.

بعدها مشينا وصلنا لنهايتها ساحه شبه دائريه يلعبون بيها مثل الرقص الفني ؏ الجليد ـ

لابسين سڪوتر ـ سكيت ــ ويفترون دايرها للساحه.

قبل لانوصل ڪانت اغنيه ڪرديه. وانتهت.

سڪت الدي جي بقيت مركزه بحركاتهم
شلون مسيطرين ما يوگعون.

اكو ڪل شوي يوگعون واڪو متقنيها. ومسيطرين.

لفحني نسمات هوا بارد سحبت القمصله بايدي اثنين سديت السحاب ادفي نفسي ولبست الكلاو مالتها.

ميس البارحه اتصلت تگول مشغلين مراوح سقفيه. گلت الها اني لبست الزي الڪردي لو متت برد.

بدت نغمات الاغنيه ــ

هل عندك شكٌ انك احلى واغلى امرٵه في الدنيا؟ ؟؟!!!!!!!

تسمرت بمكاني معالم الصدمة واضحة على ملامحي شرارة ضربت بعقلي اول ما بدأت نغمات الاغنية...

صفنت مبهورة ومحتارة اني شوڪت شفت هذا المشهد ڪله الساحه وسباق السڪوتر والاغنيه بالحلم لو شوڪت ؟؟؟؟؟

.... نفس اللبس.. نفس المشاعر.. المشهد كأنه لوحة تجسدت بروحي...

فتحت سحاب القمصله اخذت نفس حاولت وحاولت اتذكر هو حلم لو علم لو شنو ... ؟؟؟!!

صرت امشي وي سياج الساحه ولسعات البرودة كأنها كهربا سرت بجسمي واحس ڪلشي اشوفه هسه اني شايفته من قبل بس وين. ماعرف مدااتذكر... مشاعر مخربطة

الابنيه السبقتهم ڪلهم الوحيده ماوگعت وحرڪاتها عجيبه شعرها لڪتفها من تتمايل وتسوي حرڪه وتنزل يغطي عيونها وكل شوي تبعده بايدها.
صارت تتفن ترفع تك رجل وتمشي ؏ رجل وحده.

ڪل هذا شايفته بس وين؟ ؟؟؟؟؟؟

ڪملت درت حول السياج ورجعت خالتي عنيده وروز وزينه والبنات يتفرجن عليهم واني دايخه اريد اتذڪر اني شفت ڪل هذا وين. ؟؟؟؟؟

قررت ادخل استاجر سڪوتر وادخل وياهم.

خالتي عنيده گالت اخاف عليج توڪعين.

گلت اذا مانوگع مانتعلم.
تِلكَ العثرات إمّا أن تكونَ دروساً
لباقي العُمر أو تكون أجراً عظيما...

دخلت استاجرت السڪوتر.

اول ما دخلت للساحه وگعت ـ اباوع لخالتي عنيده تريد تعبر السياج وتجيني.

صاحت مسك حبيبتي ڪافي تعالي.

وگفت لحيلي وڪملت امشي الساحه بيها هواي بنات وشباب بعمري واصغر واكبر.
واني بعدني حايره واگول ڪل هذا اني شايفته قبل.

وگعت مره ثانيه وثالثه ورابعه ياله تعلمت.
وڪل ما اوگع اصيح يالله.

حسيتها محطات حياتي ...

وصرت اسير واتعثر بمسيرتي. صرت بالطرف حتى لا احد يطخني ويوگعني.

ڪملت الساحه ورجعت اسير مره ثانيه.

اتقنتها بدون مااوگع ومن السياج زينه وايسن وإلين يمشن ويشجعني.

وصلت الاغنيه ــ قولي لي قولي لي ڪيف سانقذ نفسي.

وگفت ؏ الطرف ولزمت السياج لالا لالا مو معقول يعني ڪان حلم.
الافكار تدور براسي مثل دوامة

هنا شفت مخلد هو لابس اسود ـ مريض متعب حرڪته بطيئه عيونه ذابله.

هو اليگول قولي لي ـــ

صوت الدي جي العالي اليسمع بارك ازادي ڪلها.

اني اسمع الڪلمات بصوت مخلد.
صوته يصدح بكل خلية بجسدي اسمعه..
صوته بس ولا كأنه الديجي شغال

حليت السياج وضربت بايدي ؏ راسي شنو اليصير.

والله دا اسمع صوته احد يفهمني ياناس هذا صوته ـ ضربت ايدي ؏ السياح الحديدي صدى الصوت سمعته وايدي اتاذت.

وبعده صوته باذني وشڪله المتعب لمعة عيونه المطفية بمخيلتي وهو يگول قولي مالحلُ فاشواقي وصلت لحدود الهذيان.
وصلت بيني وبين الجنون شعرة فقط
صرت اهز براسي يمين ويسار
اريد اصحى اريد اتذكر وبالاحرى مدااعرف شأريد
معقول ... معقول اني صرت اهذي...
لا لا مستحيل.. نبضة قلبي .. رجفة ايدي.. رعشة جسمي مشاعري كلها وهو داينطق باحرف الاغنية
وكأن داعيشها واقع وهو واقف مقابيلي ...

بقيت بمڪاني واباوع ؏ الموجودين ابحث عنه ـــ

"ويكفيك شخصٌ وَاحد في ذاكرة الروح
طَيفهُ يساوي كل العابرين "

فزيت من عاصفة المشاعر وامواج التفكير لما حسيت

انمدت ايد ؏ ايدي شفتها البنيه الي فازت بالسباق.

اخذت ايدي وسحبتي تمشي صفح وتتفنن بحرڪاتها.

ڪملنا اشواط بدون مااوگع ــ

سمعت صوت زينه تصيح عليه رفعت راسي تاشرلي بايدها وتستفهم مني شبييج؟ ؟؟؟؟؟؟؟

عيوني دمعت جمرات تنزل ع خدي موبيدي مااعرف شنو اليصير بيه.

ليش صرت اشوفه وين مااتجه.
ليش طيفه ملاحكني...

ليش ماجاي يروح من بالي ــــ
مر طيفك ك عابر سبيل....
القى السلام... سرق المقام... من القلب...
كسر القشر.... وقطن في اللب...
يا هذااا بالله عليك قل لي...
ماذا افعل فقد وصلت حد الهذيان؟؟؟! ....

رجعنا باليل وفڪري شارد. زينه وإلين يسٵلوني ما مرڪزه شنو گالو.

زينه گالت تعبت واني اسٵلج مارديتي وين بالج؟ ؟؟؟؟

مسك ـ هو هذا سوالج وين بالي؟ ؟؟؟؟؟؟

وحتى اني ماادري بالي وين ــ؟؟؟؟؟؟

زينه ـ اي هذا سؤال وسؤال اخر ڪم مره وگعتي وتعلمتي ؏ السڪوتر.

مسك ــ يمڪن اربع مرات او اڪثر.
وبعدها اعثر وارد انهض اضعف مستحييل.

زينه ڪملت الاغنيه ــ زمن اليعاندني ويخطف مااريد حملي ڪسر ضهري وقيدني بحديد.

وڪملنا سويه اوڪع واصيح الله اوڪع واصيح الله الله وابدا من جديد.

ضحڪنا بعد ما ڪملنا ـ
؏ الين وايسن يصفگن ويشجعن ـ
زينه تعدل اڪتافها وتگول.

شو ماگلتو اعد اعد.
حتۍ اعيدها الڪم.

المره الجايه ادخل للسباق حتى لو اوڪع ميه مره المهم اتعلم ـ

صار فتره عاجبتني بس عندي تردد وخوف.
اتعلمت منج اتحدا نفسي.
هزيت راسي بــ اي.

گالت وين صافنه ــ اخذت ايدي وطلعنا للحوش وبنات روز ورانا صاحو باسمها.
گالت شو ماكو احترامات من وجاي مااقبل بااسمي گولو خاله ڪبرت وراح اتخرج واعقد. وبعدها اصير ام بيت.

وهن يضحڪن مو مقتنعات بڪلامها ـ يحسن نفسهن اخواتها.
واصلا امها مربيتهن وتگول جنت اغار منهن.
رغم من صارن هي بالابتدائيه.

سوت نفسها زعلانه عليهن صعدنا من الدرج الخارجي للسطح.

ڪلش حلوه المنطقه ـ اتٵمل السما ظلام الليل الحالك والنجوم ولمعتها.
واتذڪر لعبتنه من احنا اصغار نحسب النجوم.
وياهو اليحسب نجوم اڪثر ابو بطل.

وڪلنا ننطي ارقام معقوله بحساب النجمات الا اوس يتحايل وينطينا رقم خيالي.

من نستغرب شوڪت عد ڪل هالعدد.

يٵشر النا بيده اليمين من هاي النجمه بديت ووصلت
ياشر بيده اليسار لطرف السماء.
ويقنعنا وكل مره هو الفايز وابو هو البطل .

.لو لعبه الملك والجلاد ـ لان عددنا هواي ضفنا ؏ اللعبه ملڪه. و وزيره.
ورقه الملڪه دايم انس مخليها ؏ جهه يتحيز وينطيها الي يخاف لايطلع الي ورقه اللص وانڪتل.

ـ ولعبه الدول ـ
هاي دايم اوس الفايز علينا.
وبعدها صارت لجين تفوز.

ڪبرنا ياله اعترف هو ڪان يتحايل ويغش.

هواي اشتاگيت الهم.

زينه ــ اگول اني طلعتج من البيت للحوش للسطح حتى تڪملين صفناتج.

انتبهت الها ـ گلت باوعت للنجمات ورجعت لايام الطفوله.
زينه ـ عوفي الطفوله وضعج بالبارك ابد مو طبيعي ـ
والله عندي حاسه السادسه.

وحاسه بيج شي من سمعتي الاغنيه وبعدها ڪل تصرفاتج انتبهت الها الى ان خلصت.
اڪو شخص بحياتج وتذڪرتي ـ
ودموعج نزلت.

ومستحيل يڪون غير هالشي.

ابتسمت بوجهها ادري بيها ذڪيه ولماحها معقول مبين عليه.
اذا هو اني لحد الان ملامحه بين عيوني.

محتاجه ميس اسولف الها الصار بيه اليوم ـ احب ڪلماتها الدافيه المليانه حنيه. تمليني راحه واطمنئنان وڪلش مڪتفيه بيها مخبٵ لــ سري العجيب.

لذلك گلت لزينه ڪل الصار اليوم اني حسيت بنفسي شايفته وڪٵن حقيقه بس وين وشوڪت مااذڪرت.

زينه ــ اي اي ذڪرتيني هذا تخاطر ـ لو يسمونه اسم اخر.

ماادري نسيته. مره دخلت محاضره وي صديقتي بقسم علم النفس والاستاذه شرحت عن هالشي. وكالت ــ

الديجافو.. كلمة فرنسية الأصل ــ
بعلم ما وراء النفس (الباراسايكولوجي) معناها : "شُوهد مسبقاً".. شرحته بطريقه ڪلش حلوه بحيث ڪل الموجودين بالقاعه صارو يستذڪرون احداث.
ويگولون هالشي صار ويانا.

وهي تسٵلهم عن الموقف والحدث.

گالت وهو أنو الشخص يشوف مشهد أو يعيش موقف يمر به لأول مرةٍ بحياته وما سبق اله أن أجه لهذا المكان أو الزمان..

لكن هو يشعر أن هذا المكان مألوف بالنسبه اله بشكلٍ قوي جداً..

وكأنه شاف من قبل.. نفس الموقف.. بتفاصيله وأحاديثه وصغيره وكبيره. .. وكأنه حلمٌ رآه من قبل مايدري متى وأين وكيف شاهد هذا الشي !!

ورجعت ڪملت ــ انو البعض گال أنّو هذا جزء خافت مجهول من ذكريات الطفولة.

واڪو گالو أن الإنسان في بطن أمه يشاهد شريط حياته قبل أن يولد (فيلم وثائقي ) وينسى الكثير منها لأنه إنسان
ـ فـ من يشوفها بعدين يحسه حلم.

او ان الشي الشفتي واي شخص مر گدامج هو همات يفڪر بيج او شافج بطيف او ماشابه هالشي. بس هالشخص يڪون مشابه لصفاتج او شخصيتج وقريب لروحج لدرجه ڪبيره.

وبعدها ڪالت عن التوٵم ليش نشبه قوه العلاقه بين اثنين ـ سواء حبيب او صديق.
نگول ڪٵنهم توٵم ـ

لان التوأم يعتبرون من أسمى علاقات التخاطر العقلي أو الذهني، تربطهم قوة غريبة يشعرون ببعض حتى إذا كان كل واحد منهم في مكان أخر عن أخيه، وإذا أصاب أحدهم مكروه يشعر به توأمه.

هذا يلي اتذكره من محاضرة علم النفس يلي حضرتها.
وقريتها مرات حفظتها اڪثر من محاضرات ـ التبولوجي والتحليل العقدي. والتحليل الرياضي.

هاا شلوني خوش اشرح مثل دڪتوره الطاف العاني.
ڪلش حبيت الاستاذه ودايم احضر الها محاضره بعد عرڪه وي ابراهيم لان ما يحب اروح لغير اقسام.

يعني مثلا اني وابراهيم مثل التوٵم احس بيه شنو يصير وياه وهو يحس بي
واذا تريدين الصدگ.
اني وابراهيم توم بس مو توٵم روحي.
لاااا لايابه لااا اني وياه توم وجيري.

ضحڪت ؏ توم وجيري فعلا روز تسميهم هالاسم.

بس واضح شگد يحبها وتحبه.

وعن التوٵم واحساسهم ابعضهم فعلا هالشي اشوفه ينطبق ؏ الياس وانوسه.

والصديق وتوٵم الروح ـ
ابوي وخالو ارشد.

احمد ومخلد.
الياس وحسام.
ميوسه صديقي روحي وتحس بڪلشي يصير بيه نفس حنيه امي.

زينه ــــ هسه گوليلي منو الي شفتي؟ ؟؟؟؟

ومنو هذا توٵم روحج وشبيه شخصيتج ويمتلك نفس صفاتج.

مسك ــ صفنت ؏ وصفها وعجبتني ڪلمه توٵم روحي ـــ

بس اتخذت اسلوب اوس راوغت وصرت اسولف الها عن لعباتنا بالطفوله.
وطلعت هي فعلا ذڪيه ماعبر عليها ڪلامي.
گالت والله والله اڪو شخص اجه ؏ بالج وهو النزل دموعج.
بس مو مشڪله حلوه لعباتڪم.

حبيت لعبه المحيبس برمضان.
انتظروني بس اريد اصير ضد فريق ابراهيم وڪون فريقنا يفوز.

مسك ـ خير ان شالله ياريت والله عاد المحيبس الها طعم خاص وي ابوي واخوالي.

گلت امشي ننزل.

سمعت صوت ابراهيم يدور الها.

ويسٵل عليها.

گالت اسمعي توٵم روحي يدورلي.

نزلنا الدرج شافها گالها تبقين ــــــ وسڪت وبعدين گال ــ ولايصير الج حل ماتعرفين تگولين اني فوگ صار ساعه اسٵل وين ولت؟ ؟؟

باوعت الي ڪالت الفراغ ــ تبقين ثوله ــ حشاج ــ شفتي توم وجيري.

وهمات زعلت علي.

ثاني يوم رجعنا لڪرڪوك ورجعت لدوامي ومدرستي واحاول اعوض الفاتني من الدروس.

ڪل المدرسات گالو امتحني شهر الثاني ونحسبه الج شهرين.

الامدرسه العربي گالت امتحنج الشهر الاول قواعد والادب بنفس الامتحان احب اشوف اجاباتج.

والشواهد الشعريه التڪتبيها ــ

ماتدري اني فاقده الذاڪره.

ومدرسه الڪيماء حيل ضايجه مني لان اخذت عشره من ميه تگول انتي تعمدتي ماتجاوبين.
هاي شلون وليش ماادري؟ ؟؟؟

زين هو منو التضرر غيري اني.

رجعت للبيت قريت امتحان الادب والقواعد ـ

وثاني يوم داومت اول درس عدنا عربي حضرت ورقتي وگعدت اراجع.

مراقبه الصف نرمين عدها حرڪات خفه تذڪرني بـ سلامه بمسلسل الحياله.

وتقلده بطريقه حلوه واگفه يم الباب وتعدد المدرسات الراحو للشعب.

ومدرستنا اتاخرت.

گالت اروح للاداره اشوفها لاتسون صوت.
حتى اذا ماجايه نلعب لعبه ــ من غير ڪلام.

راحت ورجعت من وصلت باب الشعبه سوت حرڪه سريعه مثل سلامه شحطت بقدمها وصلت السبوره اخذت بريك وگفت تقلد حرڪاته.
گالت البشرى ياقوم ـ واجت يمي اخذت ڪتاب الادب من ايدي وسدته.
گالت البشرى يامسك.

ست خوله مجايه اليوم.

والطالبات احتفلو الله يبشرج بالخير.
وهي رجعت وگفت يم السبوره وتقلد حرڪات سلامه.

وگالت ياله فريقين بسرعه انقسمت الشعبه فريقين وبدينا اللعبه.

اجت طالبه من الادبي اسمها سوزان اعرفها دايم تجي لصفنا.

گالت مسك محمد ـ جيبي ورقتج وتعالي امتحني بصفنا مدرستڪم دازه الاسئله بيد ست روناك.

نرمين گالت يبوو مسك مالحڪتي تفرحين.

اخذت اوراقي ومشيت وي سوزان لصفهم.

گعدت اول رحله.

ونطتني ست روناك الاسئله.

واسترسلت تشرح الدرس مواضيع الجناس والطباق.
ڪلامها ڪله بالفصحى.
طلبت شواهد شعريه ــ
وطالبات الادبي بدعوا بالشواهد الحافظيها.

وسوزان ڪل شوي ذاڪره شاهد شعري.

اخر شي گالت ـــ

فقلت للنفس أي الــــــضرب يؤلمك؟?
ضربُ النواقيسِ أم ضـــــــرب النوى قِيسي .....

ناقشو المعنى ـ

النواقيس الاولى ـ اجراس النصارى تضرب وقت الصلاه.

النوى الثانيه معناها البُعـــــد.

انطلقو من هذا الشاهد الشعري ـ
وصار النقاش عن البعد. وموضوع يجر موضوع وصلو لــ توارد الخواطر.
وتشرح عنه بطريقه حلوه بحيث استعجلت اريد اڪمل اجاباتي حتى استمع الها.

ڪملت سلمتها الورقه وطلبت ابقا وياهم استمع.

والحلو طالبه گالت بمزح ست حتى جدتي تعرف توارد الخواطر تسمي الگلوب سواجي.

وضحڪو ؏ ڪلامها.

بقيت مرڪزه بڪلام ست روناك.

ربطت بين ڪلامها وڪلام زينه قبل ايام.

من گالت ست روناك التفڪرين بي بنفس اللحظه هو يفڪر بيج.

سوزان گالت الها اني الهوا الاستنشقه ڪاظم الساهر ليل نهار افكر بي. هو هم يفڪر بي لولا.

ست روناك گالت لا ـ ؏ الاقل لازم يجمعڪم موقف.

خلص الدرس ورجعت لصفي ـ وڪملنا باقي الدروس لهذا اليوم.

ومشت باقي ايامي بامتحانتي ودرجاتي الخمسينات.

ليوم امتحان الڪيمياء واني ماقاريه ربع الماده وماجاوبت وهي اصلا زعلانه عليه.

من شافت ورقتي ما مجاوبه.
گالت باجر استعدي امتحنج بماده الشهر الاول.

هزيت راسي بــ اي وطلعت للساحه.

اول مره اتندم لان ما سمعت ڪلام ابوي من گال لاتداوم السنه.

المفروض اني تارڪه السنه وباقيه يم اهلي ؏ الاقل ڪان شبعت من شوفتهم بدل هالعذاب وشيصير بحالي من اشتاق الهم .

بهذا اليوم تعبت ڪلش.

دك الجرس للبيت ـ وخاله هاجر گالت عدنا اجتماع عشر دقايق مو اڪثر اگعدي انتي وإلين وايسن بغرفه المعاونات لحد ماانڪمل.

ردنا نطلع وماقبلت رغم البيت قريب ونرجع مشي.

العشر دقايق حسيتها دهور.
احس بتخبط وضياع.
تعبت وصلت اقصى درجات التعب دماغي مشوش.

اتمنى اصرخ باعلى صوت وافرغ القهر البداخلي.
احس بضغط عليه واعصابي تلفت وترڪيزي بڪلشي صفر.

إلين گالت ياله ـ رفعت نضري خاله هاجر بالباب اشرتلي نطلع.
ومدرسه الڪيمياء ذڪرتني
لاتنسين باجر الامتحان.

گلت ست ليش ماتحسبين الامتحان مالت اليوم للشهرين.

گالت قصدج الثلاثين من ميه.

لا امتحنج باجر.

ما ناقشت واگول بداخلي اذا هذا ثلاثين شنو اڪتب باجر واني ماده الشهر الاول ماقاريتها.

طلعنا للبيت امشي بضياع خطواتي بطيئه بحيث ڪل شوي خالتي هاجر والبنات يوگفن لحد مااوصل وياهن.

گالت لاتهمين لشي اليوم اخذج لصديقتي منى تدرسج الڪيمياء.
ڪملت طريقي للبيت.
احس هموم الدنيا ڪلها ؏ راسي.
قريت شوي ونمت للغروب بالگوه صحيت.

صليت واخذت ڪتابي وگعدت بالحديقه اقرا.
صوت يجي من سياره.

فانا لااملك في الدنيا الا عينك واحزاني ـــــــ

واگول هو اني بس ناقصني ذڪرى منك تڪمل عليه.

وتوقعت اني دااتخيل هالشي.
رغم بعدها ڪلمات الاغنيه ترن باذني.

ماذا اُعطيكِ اجيبيني قلقي الحادي غثياني ــــ

انا الف احبكِ فابتعدي عني عن ناري ودخاني.

مبتعـــده مبتعـــــــده اطمٵن ـــ
هو شنو بقى بيه حتى اقترب.

الصوت واللحن يرنن براسي ڪافي يربي تعبت.
شلت ڪتبي ادخل للصاله.

بعد شوي اجت إلين گالت مسكه قبل شوي سمعت الاغنيه التحبيها.
عيناك.

صرت استفسر منها وين سمعتي گالت سياره فاتت من الباب.
سٵلتها شفتيها.
گالت لا بس اني بالحديقه مالت بيت ننه ايهان وسمعتها.
واگول بگلبي شنو يعني قابل الاغنيه محتڪرها. هو ومحد اله حق يسمعها ڪلش عادي.

واذڪرت احنه بنهايه شهر نيسان.

إلين گالت سمعتيها. ؟؟؟؟؟

رديت اي ــ

ومر اليوم طبيعي ــ

بس الشي المو طبيعي ابد ابد.
ثاني يوم الصبح متحضرين نطلع للدوام.

طلع يونس يريد يروح لمدرسته ورجع من الباب بيده ورد ياسمين ابيض ـ ورد الجوري الوردي فاتح.

ذبيت الجنطه من ايدي ورحت يمه گال شوفي لگيته بالباب.

اخذت ايده ورحت رڪض للباب وباقي بعد ڪم ورده منثورات.

شلتهن من الگاع ومااعرف شصار بحالي ـ
ليش احسك موجود.
يربي ساعدني.
حاولت اڪتم ادموعي بس الم گلبي اقوى.

ماسيطرت ؏ دموعي بجيت.

يامن تغيب فتستبيح مدامعي
ألا تراعي وحشتي وتوجعي

يامن اذا حل الضلام بكيته
وريأته في كل ركن المهجع

إني سقيم أرتجيك تضرعا
ألا تغيب فهل كفاك تضرعي

فأنت في عيني وعيني بذاتها
تراك في كل الجهات الأربع...

يونس عباله ابجي ؏ الوردات يگولي مااريدهن اخذيهن.
يقدمهن الي ويگولها بحزن مقهور عليه.

رجعت للبيت اريد اتصل باهلي ـ

وهو يگولي مسوڪه راح اخليهن بجنطتج ـ

يسولف لاهله عن الوردات لڪيتهن بالشارع.

ابو ايسن گال حفلات تخرج مال جامعات لان البارحه شفت هواي طلاب اخذو ورود طبيعه من المشتل مالت صديقي.

اتصلت ؏ الارضي امي ردت سلمت عليها وسٵلت عن ميس گالت طلعت للجامعه.

خاله هاجر حست بيه شي هي وروز.

تستفسر مني گلت اريد اسولف وي ميس محتاجتها. بس بالگوه اسولف احس روحي مخنوگه.

وللدوام مابيه اروح تعبانه.

نطتي تلفونها ادك ؏ ميس. گالت اتصلي اروح اشوف ايليف گعدت لولا خطيه الليل مانامت لان البارحه لقحو البنات ومصخنات والليل ڪله سهرانه وياهن.

وروز گالت اصيح لامي تجي يمج ـ ورجعي نامي شوفي عيونج شلون صارن.

اتصلت بــ ميس ماترد اڪرر الاتصال وماڪو رد.

غيرت رائيي راح اداوم اريد اسٵل ست روناك.
الصار ڪله واقع وهو موجود لو شنوووو ــ

رجعت خالتي هاجر وگلت الها لا راح اداوم.

استغربت سرعتي بتبديل قراري.

و روز اجت وامها وياها گلت الها اداوم.

ڰالت ارتاحي اليوم.

رديت لااني زينه مابيه شي.

مشيت للمدرسه والتفڪير شتتني اخاف اني ناقصه شتات.
اول ما وصلت للمدرسه رحت لست روناك وفهمتها الصار ڪله وگلت الها هو شخص مٵثر بحياتي ـ والي تٵثير بحياته.

وڪلام مختصر عنه.

گالت الموقف من البارحه لليوم ـ تسعين بالميه هالشخص موجود وهو البعث الوردات وسمعج الاغنيه.

شيء منك دوما يتلصصّ على تفاصيل يومي وحتى على احداثيات مكاني ....

شيء منك دوما يفوح بقربي وأنا أمشي في الحديقة كأنك سرقت عطر الياسمين
شيء منك يناديني دوما وأسمعه بأذني ولكن لا أعرف مصدره ولا أعرف غايته ...

شيء منك ما زال عالقا في حلقي .. كلما أردت أن أصرخ به .. غصّت كل حبالي الصوتية

كانت أيامي من بعدك مجرد رفوف في خزانة يتجمع عليها غبار النسيان .

.نسيانك أنت لم ألاحظ أننا في الحياة اذا نسينا تنظيف الرفوف تصبح فيما بعد قذرة لا تسرّ الناظرين...

لم ألاحظ أن الحياة عادلة بشكل كافي كي تقتلني ثم تعلن في نشرات الاخبار أني المجرمة ...

لم ألاحظ أني تغيرت كثيرا من بعدك .. فما عدت ما يسأل عنك كي لا يفضح ضعفه أمامك ...

لم ألاحظ أن كتبي ما عادت مبعثرة وخزانتي لم تعد تفيض بأشياءك وهداياك وبطاقات المعايدة.......

مااخذت دروس طلبت من خاله هاجر ارجع للبيت.

تخاف عليه اتصلت بام روز تتلگاني.

ماقبلت اطلع الاتجي.

تگولي شوفي وجهج احتقن واخاف تتخربطين.

رحت للمغاسل غسلت ورجعت اصريت اطلع.
وصلتني لباب المدرسه گالت جيبي الجنطه ثگيله عليج.

فتحتها اخذ منها دفتر اشيله بيدي ـ واشوف الوردات يونس مخليهن بالجنطه.
اخذت دفتر و وحده من الوردات بيها غصن طويل وهواي جنابذ بعضها مفتحه وبعضها بعدهن.

بقت واگفه اباب المدرسه تباوعلي.

واني مشيت للبيت ماتحملت ڪل اليصير وياي ــ

هواي هواي دماغي مايستوعبهن بدا الم عيوني وحرگتهن ڪتمت دموعي واحس دايرهن صار يحرڪني من امد اصبعي لاطراف عيني عبالك ابر توخز بيهن.
احس رمل ناعم بداخلهن.

‏أنا وماضيَّ... يعقوبٌ ويُوسفُهُ
مازلتُ منتظراً... ما ليسَ بالآتي!

العينُ من حزنِها ابيضَّتْ فوا أسفا
أينُ القميصُ الذي يجلو متاهاتي؟

وتحول الالم بصدري. خنڪني

مشيت وبالگوه مرڪزه بطريقي.

تلگتني ام روز تگول هاي وصلتها عرفت هاجر متصله بيها.

سدته بوستني واخذت ايدي تعاتبني انتي مريضه ليش داومتي.
قبل لا نوصل البيت دخت وحسيت نار تغلي بمعدتي تقيات.
لزمني صداع اريد افتح عيوني مااڪدر.

فتحت ڪف ايدي مجروحه وبيها دم لان من الاالم ضاغطه ؏ الورده والشوك مالت الغصن جرح ايدي. شمرتها مااريد منك لا الورد ولا الشوك.

ام روز جابتلي مي غسلت وجوارينهم طلعو الحجيه عيشه ميزت صوتها شكد احبها.

ها يمه مسڪه شجاج بنيتي. صارت گبالي وتضغط بيدها ؏ راسي. وتسمي وتدعي.

ولدها گالو لام روز ناخذها للمستشفى.
ابو ايسن وابو طه ماموجودين.

گلت لا مااروح للمستشفى عندي علاج بدون ما التفت عليهم دوخه قويه براسي.

مشت الحجيه ويانا تگول ماخذه برد.

دخلت البيت وهي بقت تسولف لام روز تگولها مسڪه مصيوبه بالعين شوفي رموشها مفتوله.

نمت اهرب من واقعي وهي تقرا عليه قصار السور الحافظتن وتدعيلي.

صحيت ؏ صوت ايسن بيدها التلفون گالت ميس تريدج.

رديت عليها سٵلتها تعرف شي عن مخلد ـ هو بالسجن لو طلع
معقول هو موجود بڪرڪوك.

اريدها تجيب اي خبر عنه.

گالت اتصل بهيام لو معالي واحاول افهم منهن واردلج خبر.

سديته وگعدت استغفر وادعي ربي يوجهني للطريق الصح.

إلين گالت مدرسه الڪيمياء گالت لعمه هاجر خليت لــ مسك صفر.

رديت خلف الله عليها ماتقصر هي بقت عليها.

اتصلت ميس ـ رديت عليها.

گالت مخلد طالع براءه قبل ايام.

بس مستحيل يڪون بڪرڪوك.
لان عمه وشخص اخر شهدو ضده زور وهسه حڪم مخلد يتحول ؏ شاهد الزور.

وابن عمه المسافر جاي لان التهمه تتحول لابو وهسه مشاڪل صارت الهم بالعشيره الها اول مالها اخر

والڪارثه مو هنا.

جدته من القهر والبجي علي واصله لاسوء حالتها وحاليا هي بين الحياه والموت.

وانتي تخيلي شنو حال مخلد والانسانه الربته هذا حالها ــــــ

توقعاتڪم ــــ

وئام الشيخلي ـــــ💞