💜سـعـد الـبـايـرات💜
بقلم #رباب نجمة وَ إكرام#
الحلقة العاشرة:
عنوان الحلقة: يوم الفرح.
الجزء 33 و الأخير:
يوم_جديد.
واقفة أمام المرآة كتشوف نفسها بخدود موردة وعيون لامعة وبإعجاب شديد.. لابسة قفطان فالأزرق الملكي منبت بالأحجار الكريمة.. وواضعة تاج من الذهب الحر.. قفطان مزير على خصرها بصميطة رقيقة مبين رشاقتها وجسمها الأنثوي...صدر مرفوع للأمام وشعرها جامعاه للفوق بشدة محكمة... دورات وجها للسرير ومشات باتجاهو مدات يديها للفستان لي كان فوق منو هزاتو كتشوف فيه بفرحة.... فستان أبيض خاص بالعروسة شحال تمنات تلبسوا يوم فرحها...
هي دبا عروس.. فرحانة بزاف والتوتر لاعب عليها..
وجها منور بحال شي أميرة... عينيها السود صافيين...جمالها زاد على غير العادة.. اليوم غادي توقع على عقد زواجها لي غادي يربطها إلى الأبد بعريسها... بلا شك غاتسولوني شكون هذا... غانقوليكم سعد ولد عمها الأصغر لي جا من الشمال وطلب يديها أخيرا... سعد لي غادي تولي مرتو قانونيا كيفما تمنات...
ماعمرها تصورات غاتولي مرات سعد خاصة أنها كانت كتربطها بيه علاقة متحررة بحال أي أخ وأخت ولكن كلشي ممكن بإذن الله.. جلسات جلستها الراقية.. كتفكر فشنو داز عليها فالفترة الأخيرة حياتها كانت مليئة بالمغامرات مع صديقتها إكرام لي من زهرهم المشروك حتى هي تخطبات وغادي تزوج فنفس النهار بأخ رباب.. يوسف..
دخلات عندها إكرام بإبتسامة عذبة ومشرقة لابسة قفطان أخضر ملكي لا يقل جمال على قفطان رباب... جلسات بجنبها برقة وتكلمات بعيون متحمسة...
إكرام: قرصيني أرباب عفاك..
رباب: وعلاش مالكي حماقيتي...
إكرام: ياك أنا مكنحلمش هادشي لي واقع بصح...
رباب: اوا غير فرحي ألالة هادشي حقيقة سعدنا حن فينا وغادي نتزوجوا ونرفعوا راسنا فالقبيلة..
إكرام: عرفتي يا رباب أنا فرحانة حيت غانتزوجوا فنفس النهار...
رباب: حتا أنا ألحبيبة..
دخلات ياقوت كيف العجاجة ونطقات مبسمة..
ياقوت: تبارك الله مشاء الله جيتو غزالات الله يحجبكم من عين الخلق..
رباب: ربي يخليك أياقوتة..
ياقوت: الا وجدتوا خليونا نزلوا كلشي موجود بقا خاص غير وجودكم..
إكرام: وخا يلاه خلينا نمشيو ماذا بيا غير فقاش نسني ونتهنا..
رباب: حتا أنا ههه..
تشادوا فاليدين ونزلوا للصالة فين كاين العدول والناس..
علاو عينيهم بالشوية وبخجل باش يطلاقاو مع عينين عرسانهم.. مشاعرهم كانت مخربقة ولكن بريئة ودافية..
تم العقد بنجاح وباسوا العرسان راس البنات تحت تصفيقات الناس... ومانساوش يتغزلوا بيهم... ودبا كيصبحوا متزوجات شرعا وقانونا...
في حين تكلمات ياقوت بخجل مهبطة راسها..
ياقوت: حتى أنا عندي ليكم شي خبار..
الباتول: تكلمي أبنتي..
ياقوت: غادي نتزوج..
الباتول: الله يجعل كلشي مبارك أو مسعود..
رباب: فرحتليك أحبيبة...
إكرام: مبروك عليك أ زين إن شاء ا
لله تانتي تزوجي وتولدي وليدات زوينين بحالك..
الحاكم: وشكون هو هاد الشاب أبنيتي..
ياقوت(بفرحة): كميشة أ سيد الحاج...
رباب وإكرام(بملامح مصدومة): هبيل القبيلة أ ياقوت... أويييلي حاااي..
وهنا سالات قصة #سعد_البايرات... #سعد_رباب_وإكرام..لي عشنا فيها جنون وهبل صديقات كل همهم يتزوجوا...وفعلا تزوجوا وهنا غادي تبدا مغامرات جديدة في زواجهم... بسلامة حبيباتي نطلاقاو فقصص جديدة إن شاء الله كنتم مع سلسلة #سعد_البايرات...للكاتبتان #ر
باب نجمة وَ إكرام# ❤❤❤❤❤💜💎
#الــنــهــايـــة.