سـعـد الـبـايـرات

|15|

💜سـعـد الـبـايـرات💜
بقلم #رباب نجمة وَ إكرام#
الحلقة الخامسة:
عنوان الحلقة: الشوافة خناتة.
الجزء15:

يااااااااااقوووووووت...

تعيييطة صمكات لياقوت ودنيها.. فاقت من نعاسها مخلوعة غير كتجري باتجاه بيت رباب ماعرفات باش تبلات..
ياقوت: لالة رباب أش واقعليك تا مفيقاني فنص الليل..
كانت رباب مخلوعة وشعرها لاصق على وجها بسبب العرق.. ناعسة على السرير وغارسة أظافرها فالغطا.. نطقات بإرتجاف..
رباب: أنا خايفة أ ياقوت..
قربات منها الياقوت مخلوعة عليها حيت كتعزها بزاف..
ياقوت: ياك لاباس ألالة أش واقعليك ياكما شي حلم خايب..
رباب: آه أ الياقوت حلمت حلمة خايبة بزاااف أنا خايفة..

قبل ماتكمل كلامها تسمع آذان الفجر..
ياقوت: تعالي نصليو الفجر ومن بعد عاوديلي بشنو حلمتي..
اكتافات رباب تهز راسها بالإيجاب ومشات مع ياقوت توضاو وصلاو من بعد رجعوا لغرفة رباب وتخشاو فالفراش..

ياقوت: عاوديلي بشنو حلمتي..
رباب: حلمت براسي غادا فطريق طويلة وفآخر ديك الطريق كيبان نور مضوي.. كلما قربت نوصل كنلقى راسي بديت من أول وجديد وماحدي كنتمشى والطريق كتضياق عليا.. شوية حسيت براسي تجريت والظلام هو لي كاين مكنشوف والو ولكن كنحس بشي حد معايا وكيتنفس حدايا شوية بدات الصورة كتوضاح واللفاعي ضايرين بيا أ ياقوت هئ هئ تخلعت بزاف وبصعوبة حليت عيني من دوك الأحلام.
ياقوت: خير وسلام ألالة اللهم اجعله خير..
رباب: فنظرك أياقوت شنو تفسير هاد الحلمة؟
ياقوت: الحية ألالة فالحلم كتعني الحاسد ظنيت والله أعلم ساحرين ليك على داكشي مزال ماتزوجتي ورحتي لدارك..
رباب(وسعات عينيها بخوف): لا تقوليهاش أياقوت راك خلعتيني.. إوا وشنو المعمول ؟؟
ياقوت: إوا فهاد الحالة ألالة رباب.. الشوافة هي الحل..أنا كنعرف وحدة جات فسوق الهواوي دقة بطلة مزال عاقلة على بنت القابلة حدهوم كانت مكتولدش ماخلات حكيم ماخلات عشوب.. ماخلات مادارت.. فالأخير قصدات الشوافة خناتة ماجات فين تكمل الشهر حتا كانت هازا فكرشها تويميين تبارك الله كيفتنوا بالزين..
رباب(رمشات بأمل): آربي ربي يا ختي يا ياقوت.. شتي ويجيب الله تيسير على يدين هاد الشوافة.. بحلاوتك أزين..
ياقوت: أنا نتمنى ليك غير الخير ماخصني والو.. نعسي دبا وغدا يصبح ويفتح..
رباب: وخا أنا غانعس دبا ولكن بقاي معايا هاد الليلة راني خايفة ومرعودة وغدا غاتمشي معايا أنا وإكرام لعند هاد الشوافة وخص با مايجيبش ليا الخبار..
ياقوت: إن شاء الله ألالة يلاه تصبحي على خير..
رباب: ونتي من أهل الخير..

#يتبع..