سـعـد الـبـايـرات

|26|

💜سـعـد الـبـايـرات💜
بقلم #رباب نجمة وَ إكرام#
الحلقة الثامنة:
عنوان الحلقة: ديرها فالرجال وترجاها وديرها فالنسا ولا تنساها.
الجزء 26:

💜أصبحنا وأصبح الملك لله💜

كانت رباب وإكرام كيتمشاو فممرات القصر بكل شموخ وفوق راسهم تيجان مذهبين... لابسات قفاطن مطرزة بالعقاد الثمين والأحجار الكريمة، بألوان مبهجة  وزاهرة... شكون هادي لي فالقبيلة تلبس بحالهم..

وصلوا للجناح الخاص بغرف الضياف قربوا كثر داخلين ليه... وصلوا لغرفة عدنان فين كانوا حارسينوا جوج من الجنود لي مكلفين بالحراسة أو وحدة من الحريم كانت مع صاحبتها كدور على الغرفة باغا تشوف عدنان..
تكلمات رباب بصوت مرتفع قفز البنت وخلاها دير يديها على قلبها.. حدرات راسها وتحنات كتلقي التحية..
رباب: أش كاين تما أ جمانة..
جمانة: والو ألالة غير جيت نشوف واش خاصة لسيدي شي حاجة..
إكرام: على حد علمي أ رباب الخدم هما لي مكلفين بهادشي ماشي الحريم..
رباب: غادي تهزي عليا نتي وهاد خيتي لي معاك مانشوفكش كدوري قدامي ولا غادي نعرف حسابي معاك..
جمانة: وخا ألالة هي لي ماتعاودش..

تمشات جمانة مبعدة عليهم وحالفة حتى تفدي دقتها فيهم..
زادت رباب وإكرام للحراس وآمروهم باش ينصارفوا.. دخلوا للغرفة ناويين يفليوها كاملة..
إكرام: الله ياربي ومنين غانبداو..
رباب: منين ما بديتي المهم نلقاو شي حاجة ونعرفوا شنو تحت راس ولد عمي... حالفة حتى ندموا ونوريه شكاتسوا بنت الحاكم.. خلاني أنا لي بنت عمو ومشا يقلب على البراني باغي يخليني ضحكة لأهل القبيلة..
إكرام: وخا صافي عرفتي شنو أنا غانقلب هنا ونتي قلبي فالماريو وحضي لايجي شي واحد..
رباب: وخا طلقي راسك..

بقاو كيقلبوا البنات بلا فائدة..حتى غوتات إكرام..
إكرام: واااو شوفي شنو لقيت..
رباب: سكتي يا الموصيبة باغا تفضحينا.. أش لقيتي گاع..
إكرام(بضحكة شيرات بيديها فالهوا كتوريلها شنو لقات): شوفي هاد المشقوف..
رباب(ضربات على راسها): سميتو تليفون يخليك بالخلا..
إكرام: راني عارفاه ماتبقايش ترديني مكلخة..
رباب: وخا قلبيه وشوفي أش مكتوب فيه..

بقات إكرام كتبقشش وتعاود..
إكرام: هاي هاي سيد مشبعها قلوبة..
رباب(الفقصة راكباها): إييه وأش مكتوب بيناتهم..
إكرام: أختي هداي عليا نتي عارفاني قارية غير العربية وهادشي ماهو عربية ماهو أمازيغية..
رباب(حاضية الباب وكتكلم معها): وشنو داكشي..
إكرام: هاد اللغة باينة الميريكانية..
رباب: يااا على هضرة (تحية لطاليس هه) واش كاينة شي لغة إسمها ميريكانية؟؟
إكرام: ومالها ما تكون؟
رباب: كتقتليني بتخراج العنين أختي.. هاديك باينة الإنجليزية أ الكسولة..
إكرام: لهلا يحييك.. إوا أجي نتي ألالة قراي أش مكتوب... ياك كتعرفي الإنجليزية..
رباب: أنا كنعرف غير الفرونسي والعربية.. بقاتلي غير الإنجليزية أختي ماعلموهاش لينا فالقصر..
إكرام: إوا هنينا من الفهامات..
رباب: عرفتي شنو زيدي نخرجوا بحالنا وحطيلوا شقفوا تما باينة هاد خونا مانصوروا منو لا حق لا باطل..
إكرام: بلاتي أشمن.. خلينا نديو معنا هاد التليفون..
رباب: وشنو غانديروا بيه..
إكرام: نديوه للي كيعرفلوا ونكحلوليه الضواسا مع الميريكانية ديالو..
رباب: يلاه سربي قبل مايرجع ويعيق بينا..
إكرام: وخا يلاه..

خرجوا البنات من الجناح وكيتصرفوا بحال إلا ماوقع والو.. وتمشاو للغرفة يبدلوا حوايجهم... بدلوا وسلاو وقصدوا القاري فالدوار على الله يفيدهم...
وصلوا لمجمع رجال القبيلة..... لي مسالي قبو وماعندوا مايدير كيجي لتما يلعب الكارطة والضامة مع صحابوا....بانليها ناصر جالس وكيقرا فواحد الكناش قديم عيطولوا وتم جاي عندهم..

ناصر: ياك لاباس كاين شي مانقضيو ؟
إكرام: خلينا نبعدوا من هنا وتعرف قصدنا..
ناصر: وخا ألالة..

#يتبع..