ازقة الموت
زينب العبودي
البارت 25
اذا الله كتبلي اعيش
باوعت عليه غمزلي بقت عيني عليه الحد ما دخلت الغرفة العمليات
جنت خايفه وعيوني مفارگوهه ليث وزهراء خاصه زهراء حتى وداع مودعتهه
خلولي الكانونه باوعت على ابو التخدير احس گلبي راد يوگف حتى قبل ليخدرني
وهو يضربني الابره كتله
انتظرررر
ابتسم بوجهي لتخافين مراح تحسين
شكد بالميه اعيش
لتخافين راح تعيشين ماكو مره تموت النسوان معمرات
الموت للزلم وبس بالعراق
وابتسم وخله الابره بالكانونه
بس اوكف جنت بهاي اللحظه خايفه متمنيه لو امي ابويه وياي
ومن حرگة گلبي كتله الابو التخدير
گول الوطبان اذا شاف ابويه
يگله تگول ميسم جانت تتمنى انتَ وياهه بهذا اليوم
وهي تموت
انتِ يا مسلسل شايفتهه قبل لتجين للعمليه
اخر كلمه اتذكرهه ضربني البنج گبل حتى بدون مقدمات محسيت بشي بعد
الحياة عبارة عن فض من الذكريات تصب في بحر النسيان
اما الموت الحقيقه الوحيده الراسخه
نتعب بالحياة هواي لكن نتمسك بيهه رغم كلشي و رغم ما الموت هو نهاية التعب بس نخاف منه يمكن لان هو بداية جديده ومجهوله
مااعرف شكد طولت العمليه بس صحيت ردت افتح عيني مكدرت بيهه وجع موطبيعي
حاولت شويه شويه افتحهن جنت مثل الطفل الي توه مولود ميعرف شلون يفتح عيونه وخايف من الحياة الجديده
وخشمي احس بي وجع مااعرف حتى اوصفه ومااكدر اتنفس
بس الوجع جان سهل بالنسبه الانسان جان مأيس يعيش مره ثانيه ويفتح عينه
فتحت عيني شويه وگبل سديتهه وجعتني وصحت اااخ عيني خشمي يوجعني راح اموت
وين ابويه صيحولي ابويه
تذكرت بهاي اللحظه ان ابويه مموجود بحياتي واني وحيده تماماً
الوحده مخيفه مؤلمه تجرد الانسان من كل المشاعر
يبقه بردان حتى بعز الحر
دفو المشاعر جان ينقصني
الامان مسلوب مني
الخوف مستمر عندي
اكو فرق بين الوحده وبين العزله اني جنت انسانه وحيده تماماً
محتاجه اهلي محتاجه ابويه وامي شنو ذنبي همه متفقوا
منو سبب هذا الخراب الي بداخلي
همه اهلي
بعثروني خلوني اضيع بمشاعري وبالدنيا
جان مفروض منهم ميجيبوني الحياة همه اثنينهم مموجودين وياي بيهه
كمت اون من وجعي الي بداخلي والي بجسدي
حاولت افتح عيني هم مكدرت احس بيهه مثل الطابوكه بلحظه سكتني وسكني صوته
الوووو صح النوم مفتهمنه هسه خشمج لو عينج
درت وجهي بااتجاه مصدر الصوت حاولت افتح عيني
هم مكدرت بس افتحهه توجعني
رفعت ايدي ردت الزم ايده سبقني ونزلهه
الكانونه بيدج
وطبان وطبان عيني شبيهه
مورمه شويه من العمليه لتخافين الدكتور كال طبيعي
عدت الحمدلله مو كتلج سهله
يعني اشوف
طبعاً تشوفين
رجعت احاول افتحهن لان قلقني
فتحت عيني شويه اول ماشفته نزلت دمعتي جنت ممصدگه افتح عيني مره ثانيه
ابتسم رجعت سديتهن وابتسمت
-راح اصيح الدكتور واجيج
هزيت راسي بأي ويه مهزيته ونيت من الوجع
شويه واجوي هوه والدكتور وطمني طبيعي عيني هيج لان الخشم قريب من العين
جنت موجوعه انطاني الدكتور مسكنات ضربهن بالمغذي
ساعات طويله اني موجوعه وهو موجود يمي
اهتم بيه بوقتهه هواي بس يخلص المغذي گبل يروح للممرضه ومن اتوجع يصبرني بالكلام لو يتشاقه وياي
الحد ما هو هلك من التعب اباوع عليه على الكرسي نايم وفاتح حلگه من التعب
بقيت اباوع الوجهه الاول مره انتبه التجاعيد الي محاوطه عيونه
ولحيته توهه تريد تطلع بيهه كم شيبه ولا مره سألته عن عمره
احسه قريب بداخلي بس جنه بعيدين بالكلام
بس مشاعر تبرز تدل للحب بس ولا مره تجرأنا نعترف
هو جان بعيونه واني بعيوني احجي
مااعرف اذا جنت متوهمه لو لا
واني اباوع عليه ابتسمت
فكرت بهاي اللحظه معقوله رب العالمين دخلني الازقة الموت
حتى اعيش
لو مداخله الهاي الازقه يمكن جان متت لان محد راح يسويلي العمليه
هنا صارت عندي قناعه الصعب الي يصيب الانسان
ويشوفه فوك طاقته هو خير اله للمستقبل بس احنه منعرفه نعتبره بلاء
بس هذا البلاء يكون خير النه للمستقبل
لان رب العالمين هو بس الي يشوفه وعلى اساسه يمنح عباده الخير من هذا الشر الي ميتحمله الانسان
انفتحت الباب هو گبل فز واني رأساً درت وجهي بس شفته تحرك
اجتي الممرضه تشوف وضعي قاستلي ضغطي والسكر
وهو واكف اول مطلعت سألني
خوما موجوعه
هزيت راسي بـ أي بس احسن من قبل
وطبان ليث
ليث زين وكل شويه خطيه الجماعه يخابرون يسألون عنج خوش ناس
دك موبايله وطلع بس وره مدخل للغرفه اباوع عليه مو طبيعي كل شويه اباوعله ابد مفك جانن حواجبه معقوجات وكل شويه يدك موبايله ويطلع
طلعت من المستشفى وره يومين جان وطبان وياي
معافني ابد جنت احس اني طفلته بدون ميحجي شي جانن تصرفاته تگول هيج رغم الاتصالات الي جانت تبين تضووجه
دخلنه للبيت جنت تعبانه وره شويه جاب رضا
ببه يومين يمي بالبيت وكرايب ابو احمد كل وجبه يجيبولنه صينيه
يفرغلي منهه ويكغد هو وليث ياكلون
وليث يلوب على رضا كل شويه ويروحلهم
فجأه كام ميباوع الوجهي وميحجي بس على كد شلونج وتسوك للبيت مسواك وكال اني راح اروح
باجر امرلكم
راح يوم يومين تلاثه مرن هو ماكو
جنت افكر وين راح وخفت خاف صار بي شي
وخطيه ام حيدر مااعرف ابنهه الجبير شسمه بس اعرف واحد منهم اسمه حيدر فأسميهه ام حيدر
ابد معافتني كل شويه تمر عليه
وتسألني على وطبان وين كتلهه بالدوام
فجأه تغير ماادري هو الصيحيح الي يسوي بس اني لان بداخلي مشاعر تجاهه فبداخلي اطلب منه يهتم
بس هو عيونه تگول يحبني بس فجأه اوهم نفسي
مجنت اعرف اذا اني احس هيج من نفسي لو هو هيج فعلاً
بس صرف عليه كل هذا الصرف واني مجرد غريبه
شنو تفسيره
جنت انسى اني مره على ذمة رجال نسيت هذا الشي حرام وتفكيري كله غلط بغلط بس مجنت اكدر اتحكم بمشاعري تجاهه
العمليه جانت ناجحه لان بالاساس جان المرض ببدايته
وكالو فتره ونرجع نسوي تحاليل
اجه وطبان باليوم الرابع حتى من سلم عليه مباوع الوجهي جان يبعده عني من يحجي وياي
جنت اريد اكله اني غلطت بشي بس امنع نفسي
بقه بيومهه نص ساعه بس على كد شاف احتياجاتي والدوه الي مكمل جابه الي
بعدهه بأسبوع اجه بسيارة ابو احمد وداني
سوالي تحاليل مره ثانيه ورجعني ومن صعدت السياره كال اسبوعين وتطلع التحاليل
وره الاسبوعين نشوف العمليه جابت نتيجه لو يحولوج العلاج كيمياوي
درت وجهي عليه باوعت عليه ميباوعلي ابد
بقيت اباوع عليه ردت ابجي بساعتهه لا اكدر اگله ليش هيج تغيرت وياي ولا كدرت اسكت وجعي الي بداخلي درت وجهي عنه نزلني بالباب
عبالي ينزل منزل درت وجهي ورجعت عليه فتح الجامه
نسيتي شي
مراح تنزل
لا مستعجل
وطبان
شكووو
ماكو شي بس عبالي تنزل تتغده
لا مستعجل
تسألني ام حيدر دائماً عليك
گليلهه بالجيش يداوم وعنده واجب اذا ممحتاجه شي دخلي واكفه بالشارع انتِ
دخلت جوه اول مدخلت كمت ابجي شبيه اني هيج گلبي يوجعني
شويه شويه سحب روحه
يمكن لان شاف بعيوني حب اله كمت مااكدر امنع نفسي من اباوعله بحب وعتب بالنص ساعه الي يجي بيهه
وافكر
هو ضاج مني ومل ويمكن لان صرف عليه هواي فلوس
هو اني شسويت حتى هيج يصير وياي عل اقل بس يحجيلي
گلت هالمره من يجي احجي جنت انتظر يوم التحاليل اكيد راح يجي وبالفعل
اجه بموعد التحاليل جانت اذني يم الباب اول مسمعت
الباب انفتحت كمت وتلكيته من الباب جان لازمهن
ابتسم بوجهي اني ارتبكت وحسيت گلبي كام يدك
تقرب عليه وگال
-تحاليلج نظيفه
مجنت منتظره نتيجة التحليل بكد ما منتظرته دخل للبيت ،خليت القوري مال جاي على الطباخ وكتله جوعان
-لا حتى جاي ماريد اريد اروح محتاجه شي
-راح تروح
-اي .....شنو ليث وين
-يم رضا
-خوش هاج هاي التحاليل وذني القديمات هم
خليهن يمج
-وطبان
-خيرج
-ليش
سكتت متجرأت احجي
-شنو أليش شو سكتي
باوعت عليه جان يباوع عليه بس من شافني خليت عيني بعينه گبل وخرهن وطلع جكاره بقيت اباوع عليه
ياليتني اتجرأ ان اعترف
انِ امامك ارتبك
اخافُ ان يَنقطع الوصال
فأموت من الاشتياق
الوووو اسمع متحجين اريد اروح اذا ماعندج شي تحجي خليني اروح الطريق طويل
وطبان مااعرف اكو شي
مثل شنو
مااعرف اني مسويه شي
مفهمت
مااعرف احسك
تحسيني شتحسين ولتحسين باعيلي تعرفين انتِ وين مكانج مفروض هسه يم شداد
بس انتِ متريدين هذا الشي مااكدر اجبرج
باوعت عليه ابتسمت باستهزاء يم شداد هم رجعت
تكولهه مو انتَ
اني شنو من البدايه كتلج مكانج يم شداد الووو نسيتي شگتلج من البدايه
لا
لا شكلج نسيتي دير بالج تنسين هذا الشي
مو انتِ مره تصلين
باوعت عليه
معقوله قره عيوني
كمت اشوف هو الوطن وهو الامان وهو السند
وراهه اختفه وكام الي يجي بمكانه ابو احمد
وتندمت لان حجيت واني شحجيت محجيت شي
تأذيت من اختفه فجأه بدون اي كلام جان يحسسني هو يبادلني المشاعر وفجأه يخليني اشك بأحساسي
بس اخر مره ذكرني بخيانتي الشداد
جنت اترقب فتحة الباب وانقهر من يخلص يوم وهو ماكو
اندكت الباب وره شهر ونص من عمليتي واجه ليث كال عمو بالباب يريدج
من كال عمو كمت بسرعه عبالي وطبان اجه رحت گبل باوعت على وجهي وخليت العبايه على راسي خاف يحجي
انصدمت ابو احمد حتى عيني بينت من باوعت عليه تبدلت حزن
شلونج خويه
الحمدلله
دخل ورد باب الحوش
شخبارج وضعج زين
اي الحمدلله
خوما تحسين بوجع شي
لا الحمدلله
دومج ان شاء الله
وطبان مكدر يجي وعندج موعد ويه الدكتور اصلاً تأخرتي عليه اجيت اخذج جهزي امورج انتظرج بالسياره
اذني للدكتور فتحلي الخيوط مال عمليه بس كال ابقي اللاسق هلى خشمي واغيره مو ابقه عليه لمدة اسبوع واي خلل تحسين بي تعالي وكتباي على علاج جديد
بنفس اليوم الي اخذني ابو احمد بي للدكتور من رجعني صدمني گلي
جهزي روحج انتِ واخوج راح تسافرون
وانطاني موبايل كال وطبان دزه الج اي شي يصير اتصلي عليه رقمي موجود
ها خويه عكب باجر راح تسافرون انتِ واخوج
وانطاني ورقه كال هذا الدكتور تبقين تراجعي هناك
وهو يعرف وضعج لان الدكتور الي سوالج العمليه حولج عليه يراقب وضعج
جنت كلشي ممفتهمه ومكدرت استحيت اسأله واكله ووطبان وين
طلع ابو احمد لزمت الموبايل مابي بس رقم ابو احمد حتى ممخليلي رقمه
زين شلون راح نسافر وليث مو كال مترهم سالفته
الف سؤال بعقلي مالهن جواب
اولهن ليش هيج وطبان كاعد يسوي من موجود بحياتي واهتمام بيه مثل اب البنته مثل حبيب ويه حبيبته صح معترف بس جان كلشي يدل الهذا الشي
لختفاءه فجأه
خلصن اليومين جنت متأمله يجي بس الي اخذنه ابو احمد
مفروض افرح راح يتحقق الي اريده
بس مكدرت افرح كل بالي يم وطبان
الي فجأه انسحب بلا كلام
جان الطريق طويل كلش وليث نايم على رجلي
وكل خطوه نخطيهه بالطريق عقلي يشتغل
بأسأله مالهن جواب
الحد ما وصلنه لسيطره مركزيه هي المسؤله عن الدخول الاربيل ونزل ابو احمد ووياه الجناسي شلون ماادري دخلنه الاربيل
مجانت عندي ميانه اسأل وامنع نفسي گوه من السؤال
الحد ما دخلنه اربيل كمت استمتع بجمال الشوارع
اربيل جانت كلش حلوه بيهه طبيعه متنوصف خضار بكل مكان شوارع مبلطه كلهه ونظيفه
تختلف عن بغداد هواي الحد ما وصلنه العماره
وطبك السياره ابو احمد وكال
الحمدلله على سلامتكم وهاي وصلتوا بخير وسلامه
الله يسلمك مشكور مااعرف شلون اجازيكم على الي سويتوا تعبتكم هنا تجرأت لان وصلت كلت لازم اسأل على وطبان
بس ابو احمد وطبان
وطبان عنده شغل
اي بس عادي تنطيني رقمه اريد اشكره
ماعندي رقمه مبدله كاعد اتصل عليه مغلق
باوعت عليه مبين يجذب كتله لعد من تشوفه تشكرلي منه هواي
تدللين من اشوفه اوصلهه اله
نزل من السياره نزلت اني وليوثي من السياره
ليث-رضا ماكو هنا
-اي حبيبي هنا بيتنا الجديد
رحنه وره ابو احمد جانت البنايه جبيره وبيهه مصعد
صعدنه بالمصعد
ووصلنه ابو احمد للشقه
دخلت وراه جانت تخبل مفروشه
كلشي بيهه حلو والمطبخ مشايفته بحياتي كلهه وتلمع لمع عبالك احد كاعد بيهه
ابتسم ابو احمد وباوعلي
تره حلوه الشقه
ابتسمت رحم الله والديكم
خيتي هاي الشقه مدفوع ايجارهه ٦شهور
وطلع من جيبه فلوس
هاي دزهن الج وطبان گال تدبرين بيهن وضعج
انتِ بعد هنا حاولي ترتبين وضعج لا اكو احد وراج ولا تخافين من شي محد يوصل الكم
بس هاااا گال وطبان نبهه صالون ممنوع تشتغل بي
واي شي تحتاجين اتصلي عليه لتترددين
اني بحسبة اخوج الجبير امانه اي شي تحتاجين
-رحم الله والديك مقصرت
-وهااا عنوان الدكتور انطيته الج ذيج المره مو تهملين وضعج واني اتوكل
ابو احمد مااعرف والله شحجي شنو احجي قليل بحقكم
ها قبل لا انسه هاي الجناسي مالتكم
باوعت ليوثي مسويله جنسيه جديده
طلع ابو احمد باوعت على الشقه جان حلم حلمته بعد ما صار الي صار وياي استقر باربيل اني واخواني
ليوثي يمي بقت زهراء بس رغم هذا اكو غصه بگلبي
استقريت باربيل وتغيرت حياتي جذرياً من يومهه ومرحت للدكتور ولا مره لان احس وضعي تمام
وكل هذا بفضل رب العالمين الي منحني هذا الشي من جديد بعد هموم ومشاكل دخلت بيهه
ووطبان الي قدملي هذا الشي بدون اي ثمن والي مستحيل انساه
وذكرياتي الي وياه
ذكريات بداخلي متموت مهما حاولت انساهن جنت اتناساهن فقط
رجعت الحياتي القديمه الهادئه الي بس اركض وره اللگمه بس بقت غصه بگلبي غصتي على وطبان الي حبيته ومكاعد يروح من بالي
التهيت لكيتلي شغل بمطعم منظفة صحون ومرتب حلو استمريت بي شهرين بعدين لكيت شغل بمجمع جبير مال ملابس جنت على المبيعات
وليوثي دخلته معهد تقويه لان مجنت اكدر اسجله بمدرسه اخاف من الجنسيه لان مزوره ماريد مشاكل تجيني واني بغنى عن المشاكل صارت بيه خوفه من كلشي
جانت حياتي حلوه بس مستحيل اغمض عيني اذا ميصير گبال عيني وطبان
اشتريت جهاز حديث من بنيه وياي تشتغل على الكاشير وسويته الهه دفعتين
وشويه شويه تعلمت عليه وسويتلي حساب بالفيس
وكمت اتصفح بي وابحث بي عن زهراء اختي
ادور اكتب اسمهه اسم بابا اسم ماما ماكو الهم اثر اكول بلكت مسوين حساب شي اكدر اوصل الهم بي
الليل كله ادخل بحسابات العالم مبقيت اسم مكتبته
٦شهور مرن هادئه وجنت اجمع للايجار خاف يخلص
بس بالي يم زهراء وماعندي اي وسيله اتواصل وياهه ومااعرف ارقام لا ابويه ولا امي ومليت وأيست اوصل الهم من الفيس
الحد ما أيست وگلت كافي عيونج راحت وانتِ تدورين جنت ماانام الليل كله
اتصلت عليه رحاب الي اشتريت منهه الموبايل گالتلي تطلعين باجر اوف عدنه
لا مالي مزاج
يحظي خل نطلع نتونس شكد كأيبه
ولج بارده
اي وأذا لبسي ملابس
لا والله مالي مزاج وبارده حيل وخشمي يگوم يصب عليه
ولي شكد كأيبه والله
مو قصة كآبه
الاسبوع اليجي يحظي عدنه شغل شركتين سياحيه متفقه ويه المدير وخصم الهم ومعناهه عدنه كومة شغل خل نروح نتونس عليج الله والله مليت وماعندي غيرج امي متطلع
لحت عليه گتلهه ميخالف باجر نروح
ميسم شتگولين نروح الشقلاوه لو مصيف علي بيك
كم مره رحنالهن
لعد نروح البيخال
رحااااب والله مالي خلك
بابا صارلج شكد هنا وحده غيرج مفرفره اربيل كلهه
مااحب هاي السوالف انطيني فراشي وبس احلى ونسه
باجر نروح مالي علاقه والله
لحت عليه وكتلهه ماشي وكعدنه نتفق شناخذ ويانه
اكل اتفقنه على اشياء خفيفه معجنات كعدت سويتهن ونمت وثاني يوم طلعنه من الصبح
جانت بارده الدنيا
لبست ليوثي هواي ملابس واني هم لبست بنطرون وبدي ابو الركبه وفوكاه صوف وانوب كوت
وترانشوز اتصلت عليه
جاوبتهه واني الليس الحذاء
-مصعدتي
-اجيت بسيارة امي يلله بسرعه محسوب الوكت
ها يعني حنروح بسيارة
ايوون ايون بسياره
عفيه والله يلله ليوثي حبيبي
نزلت كايدته والايد الثانيه شايله بيهه الاغراض
اول ما نزلت من العماره باوعت منا ومنا
مستحيل اطلع الصبح اذا ما اباوع بهاي النظره
الحد الان متأثره وبيه خوفه من امشي بالشارع
صعدت بالسياره
رحاب-فضيهه شنو قصتج
ووجعه مو صعدت
علت المسجل مال اغاني نصيته
الدنيا صبح هاي بدل منقره سورة الفاتحه تسهيل الامر
خرررب حظي خرب اعوف امي هناك تجيني ميسم
بابا احنه طالعين نغير جوووو نستانس
مو نلطم
درت وجهي عنهه باوعت على الطريق وكتلهه شتطلعين طلعي
ليث-ميسم ميسم
درت عليه ها حبيبي
انطيني موبايلج
من الصبح ليوثي والله عينك راح تندمر
عليج الله
اوف منك ليث اوف هاك والله اخاف على عينك
رحاب-ليوووثي الصاك تتزوجني من اكبر
-لا
هـء متتزوجني ليش
-محلوه
-ااااااه
ميسم-فتحت حلكهه وتكله والله محلوه واني اضحك عليهه
تستاهلين
عابت دمشي لك وجه الحلووووو
ميسم-غصباً ماعليج
-اصلاً مااحب الشكرران اذا مو مملوح مينراد
عوفي قفل على الموبايل اصلاً ممنتبه الج
فجأه أشر النه واحد نفتح الجامه جنه نمشي بصفه
نزلت رحاب الجامه گال
سلاو (مرحبا )
جاوبته سيلاف(مرحبا)بس باللهجه الكرديه الشماليه حتى يعرف مراح افهم عليه لان مااعرف لهجته )لان تعلمت بس اللهجه الشماليه لان عدهم اكثر من لهجه
هو فهم رأساً
امشي رحاب
خل اجاوبه اني
لا عوفي
ليش
عوووفي اله يوكفنه احنه يسألنه مرتاحيت الشكله
جان جاوبتي عربي
اذا يعرف عرب راح يلطش النه لتعكرين مزاجنه
ايع اييييع شكد متنطاقين
عابت
وصلنه الشلال بيخال جان يخبل وهواي ناس ولا عبالك بارده وليث ورحاب متونسين اله اني كاعده اباوع عليهم اخر شي كوموني اخذنه صور
وتعبت ورجعت كعدت اباوع عليهم هي وليث شعري ضايقني جنت فاتحته طلعت قراصه من الجنطه صاح ليث ميسممممممم
كبل رفعت عيني عليه
تعالي ورحاب تأشر اروحلهم
أشرتلهم لا فجأه صارت عيني لمحت واحد لابس سويتر والكبوس مال سويتر مخليه على راسه احس گلبي كام يدك سريع بقت عيني عليه جان منطيني ظهره فجأه دار وجهه هو بعيد عليه
وطباااان گبل لميت شعري وعفت اغراضي كلهن ورحت باتجاهه جانو هواي ناس
فجأه فص ملح وطاب بقيت ادور وامشي ردت ابجي
وطبان والله وطبان كمت امشي سريع
وادور ماكو هيج شي جانت عيني عليه من يمشي فجأه ماكو
صاحت رحاب ميسم. مدرت الهه بال بقيت امشي
الحد ما أيست ورجعت بس بقت عيني تدور على ابو الكبوس
اجتني رحاب
وين رحتي خبله اصيحج وماكو
هيج شبهت على واحد
اي وطلع هو
ماادري اختفه ملحكت بي
شبيج
مابيه
دتعالي يمنه ليش كاعده شوفي الشلال شلون يخبل
ماريد
بقيت عيني على الناس بلكت المحه
الحد ما صار العصر رجعنه والطريق كله راسي على الجامه
وافكر واتذكر الذكريات الي جمعتنا الحد ما دمعت عيني
الووووووو وين رحتي
من كالت الووو درت وجهي عليهه صفنت بوجهه
وجعه حتخبليني اليوم شبيج
ال الووووو
شبيهه
مابيهه شي
ووووولج اليوم شبيج عليج الله شبيج شو من كلتي لمحت احد والهسه شارده
ميسم اني مو احجيلج كلشي ليش متحجين الي
شحجي
منو الشبهتي عليه اليوم وانگلب كيانج
واحد ساعدني هواي ومشكرته
بس
هزيت راسي بـ اي
رجعت للشقه هلكانه وليث خشمه كام يصب رحت اخذتله دوه من الصيدليه وشربته
وقبل لينام يستلم موبايلي ميهده ابد
تمددت يمه ودرت وجهي عنه
كل ذكرياتي ويا تسألني عنه ودموع عيني مينشفن من اتذكره
شكد اتمنى القدر يجمعني بي مره ثانيه
مااكدر انساه اخذ گلبي بعد وفات الاوان
كعدت ثاني يوم وديت ليث للمعهد ورحت للشغل
جنت متكأبه
الحد مصارت ب١٢ طلعت نص ساعه رجعت ليث وديته يم ام رحاب دائماً اودي الهه ورجعت لكيت المجمع مليان لان اليوم متفقين ويه شركه سياحه
الهم خصم الزبائنهم
كبل وكفت على المبيعات وحده سألتني على بنطرون وجان ممسعر
رحت الرحاب تشوفه بالحاسبه
رحاب شوفي شكد سعر هذا گبل وحده جانت واكفه على الكاشير ممنتبهه الهه كالت
ميسمممم
درت وجهي عليهه
منارررر
منار-هاي انتِ ولج شتسوين هنا
ضحكت اني اشتغل هنا
بلا زحمه شكد سعر البنطرون
درت للزبونه اعتذر حبيبتي
رحاب شوفي هذا شكد سعره ممتسعر
هسه راح تشوفه حبي
انطيته الرحاب واخذت منار على صفحه
اول شي سلمت عليهه هي سألتني وجانت تعرف اني مفقوده مكدرت احجي وياهه لان ممسموح اليه اثناء الدوام انطيتهه رقمي وكتلهه ضروري اشوفج
وانطتني رقمهه
ماعولت ينتهي دوامي واطلع كتلهه الرحاب بقي ليث يمكم من اخلص امرلكم
اتصلت عليهه والتقينه بمطعم
جانت هي وخواتهه وامهه جايات اخذتهه على صفحه وعاتبتهه وانصدمت وصدمتني من كالت شلون علاء سوه هيج بزهراء وهمه هسه سوه
شنووو
سوه
انصدمت من الي حجيته الهه ومن عرفت هي على تواصل بزهراء اخذت رقم زهراء وأمنتهه متگول الهه شافتني
كالت ليش متعمقت وياهه بكل التفاصيل بس حلفتهه متجيب سيره ال زهراء شافتني ابداً
رادت تروح كتلهه منار بما ان انتِ عندج تواصل ويه زهراء متعرفين اخبار ابويه وامي ووين زهراء هسه مستقره
گبل باوعتلي بحزن اني جانت مدمعه عيني على اهلي گلبي مفرفح عليهم
ميسم ابوج توفه من زمان
اني گالت هيج گبل خليت ايدي على گلبي ونزلت دمعتي
اأأ....أبويه ماااات ليش ليش مات ليشششش مكدرت الزم روحي انهاريت بالبجي وگلبي احسه راد يوكف
گبل شبكتني بجيت بصوت عالي بحيث كل لي موجودين كاموا يباوعون عليه
اخذتني وكعدتني وكامت تبجي وياي
كعدت على الكرسي احس نفسي گلبي يريد يوكف دنكت واكلهه ليش مات شوكت مات ليش يابابا ليش
ورقته وكعت وانتهى يومه حبيبتي
اجني خواتهه وامهه يصبرن بيه
الحد ما هدأت واستوعبت كمت
منار-طمنيني عليج عود
هزيت راسي بـ. أي وطلعت جنت امشي بس بالي مو يم الشارع ودموعي يصبن وگلبي يوجعني
كنت على امل ان بعد هذه الرحله الطويله سيأتي يوماً والتجئ الى حضنك
سأشكو اليك ما احززني وماذا فعل بي الزمان
لكنِ اليوم فقدت هذا الامل
وكنت اظن اني لم اتأثر لفقدانك لكنني تأثرت
أخذك مني الموت، ما كنت أتوقع أن يُسلَب مني أغلى ما أملك،
أن تفقد أباك معناه أنك تخسر الجدار الذي تستند إليه ويجعلك في مهبّ ريح
رغم بعدك عنا رغم لم نشعر بوجودك لكنك كنت الامان الوحيد الينا
كعدت على الرصيف رجلي مساعدتني احس فقدت السيطره عليهه ودموعي متقبل تسكت
تذكرته من حضني من انطاني قوه
يمكن لو بيومهه محاضني جان ماعندي اي ذكره حلوه ويا
كوه وصلت البيت رحاب واول مشافتني انصدمت وكامت تسأل الحد ما كتلهه ابويه مات
رأساً بجت لان جانت تعرف معنى فقدان الاب
مخلوني بيومهه لا هي ولا امهه ارجع للشقه بقيت يمهم
بيومهه كابلت رقم زهراء وابجي اريد اتصل عليهه واخاف
مرن اسبوعين واني مكسوره على خبر وفاة ابويه
مجنت اعرف الهاي الدرجه راح اتأذه على خبر موته الي بيوم من الايام من جنت اتعب واشوف الي عدهم اب متدللين بجاله تمنيتله الموت
كمت أأنب نفسي لان تمنيت الموت اله بيوم من الايام
صعب صعب موت الاب كلش صعب
ياابي انا اشتاق اليك فالشوق بعد الموت مميت
ليت مكانك هو مكاني
ليتك تعود
لا استطيع ان اعيش في حياة انتَ غير موجود فيها
احتاج اليك في كل وقتاً
لم اشبع منكَ
مازلت بحاجه الى حضنك
حضنك الذي لم ارتوي منه الا القليل لماذا تركتني يا ابي
رحاب-وجهج اصفر
مابيه شي
ميسم مجنت اتوقع هيج تحبين ابوج
ابد محاجيه بي ومو كلتي اهلج منفصلين وعايفيكم
حتى اذا مجرد هو يشم الهوى جنت احس اكو عندي سند حتى اذا مشايفته بس شعور لا ارادي احس نفسي مسنوده
هسه احس نفسي ضايعه
رحاب-عندج ذكريات ويا
اي عندي ذكريات قليله
يجوز لان عندج ذكريات ويا هيج تأثرتي اني جنت طفله من مات بابا بس عندي احساس لو هو موجود جان اني يختلف حالي ومسنوده الله يرحمهم
الله يرحمهم
جنت طالعه اني وياهه من الشغل متوجهين البيتهم
اخذت ليث ورجعت واني امشي دك موبايلي
رقم جاوبت كلت يجوز نسيت شي ورحاب اتصلت من امهه لان دومهه ماعدهه رصيد
جاوبتهه انصدمت بالصوت
ميسم اني زهراء اختج
باوعت على الرقم اني مسجله رقم زهراء من اخذته من منار
زهراء
اي زهراء مشتاقتلج ليش هيج حرمتينا منج لو ما بالصدفه جفصتهه منار يمي ليش هيج ميسم عفتيني ليش عبالنه متي حتى منعرف شصاير بحالج
رأساً نزلت دمعتي
زهراء وكبل بجيت بهاللحظه ليث راد يعبر جريته وصحت ليث وين اوكف حبيبي لتعبر
زهراء-ليث ليث ليثنه ميسم
ميسم-مشتاقتلج زهوره
زهراء-ميسم هذا ليث اخونه وياج احجي
اي حبيبتي
والله ليث وياج ميسم واني كل هاي الفتره ميته من تأنيب الضمير وانتِ بأربيل عايشه حياتج. طبيعي واني ميته هنااااا
زهوره هواي حجي هسه من اوصل اخابرج
لتخابرين ميسم لتخابرين عايفتني كل هاي الفتره اعيش بتأنيب الضمير ومكلفتي روحج حتى تگليلي ليث عايش ولكيتي
والله مو بأرادتي
لا والله صدك تحجين لتخابريني ولا اخابرج بعد ابقي هناك متونسه وعايشه حياتج
سدته بوجهي گبل خابرت على منار مجاوبتني اخذت ليث ورجعت للشقه بقيت اتصل على زهراء متجاوبني
دزيت رساله عتب المنار وكتلهه عود حلفتج
قرتهه ودزتلي
مالي عين احجي وياج والله بالغلط جفصتهه ولحت زهراء اله تاخذ الرقم اسفه والله
مرن يومين والموضوع شاغل بالي اتصل على زهراء متجاوب كلش تكأبت
الحد ما هي رجعت اتصلت عليه جنت بالشغل رحت گبل للحمام لان كامرات ومااكدر احجي فتره طويله بالتلفون
زهراء ليش متجاوبيني
انصدمت ميسم متدرين والله الي عشته شنو
اسفه والله
شيفيد اسفج كليلي ليث شخباره خابرت علموده
ومن كلت ال ماما كالت اله نروح الاربيل
لا لا ديربالج
شكو
اكيد مراقبج شداد
منو شداد
زهراء والله هواي سوالف من ارجع احجيلج
رجعت للشقه بعد منتهى شغلي وخابرتهه حجيتلهه كلشي طمنتني ماكو احد وراهه وعايشه طبيعي وحجزوا ٥ أيام بشركه راح يجون يشوفوني
جنت خايفه وفرحت بنفس الوقت وكالت اليوم بليل يطلعون يعني باجر بحدود ال١٢يوصلون
انطيتهم عنوان الشقه حتى يروحون عليهه كبل من يوصلون وعلمتهه شتگول الابو التكسي
وره نص ساعه خابرت كالت أجلوهه على عمبه لان خالو مريض
كلت بيهه صالح اصلاً خايفه من جيتهم مااعرف ليش
وديت ليث الصبح مثل يوميه وطلعت هم ب١٢اخذته ووديته الام رحاب
من رجعت خابرت زهراء كالت راح يطلعون اليوم
سويت اكل كلت حتى من يجون ميتعبون اذا مقبل ينطيني اجازه المسؤؤل
ومن رحت للشغل حجيت ويا على اجازه اليوم ويكصهه من مرتبي
گلي ميخالف بس ب١٢اطلع فرحت كلت الحك اخذ ليث استقبلهم بالبيت
اخذت ليوثي جنت فرحانه وگلت الابو التكسي يومف يم محل مال حلويات
نزلت وكتله ينتظرني جان ليث نعسان عفته بالتكسي
التهيت اخذ الحلويات الي تحبهن زهراء
طلعت ماكو ابو التكسي باوعت منا ومنا گلت بلكت طابك السياره بعيد ماكو
احس گلبي راد يوكف گبل وكعت من ايدي علبة الحلويات
وصرت مثل المخبله
ابو التكسي هنا مشفتوه نسيت لغتهم تختلف بحيث يتصفنون بوجهي وارجع اكلهم بالكردي مشفتو اخويه
ابو التكسي الي هنا عفته بالتكسي
يمكن لميت الناس مثل المخبله ابجي واسأل بالناس حتى ابو محل الحلويات طلع سألته كتله مو اني نزلت من التكسي كدامك كال ممنتبه والله
وحظي ابو المحل ماعنده كامرات
تخبلت فقدت كمت اركض منا ومنا ادور شسوي بحالي وين انطي وجهي
خابرت على رحاب اخترعت من صوتي ومن كتلهه ليث ماكو اله اثر هم تخبلت وكالت جايتج
شتسويلي ماادري كمت حتى ادك على راسي
سألت محل محل الحد ما طلعت مأيسه وخايفه
راح ارجع اعيش نفس الخوف والشعور
اموت اذا ماالكاه انهزمت بي من بغداد وهم اضيعه
دك موبايلي رقم گبل جاوبت
الوووو
ست ميسم مشتاقين
................يتبع