╔═════ ࿇ ═════╗
𝕮𝖍𝖆𝖕𝖙𝖊𝖗 28
The Smile
╚═════ ࿇ ═════╝
[မှတ်ချက်။ ။ ယခုမှစတင်၍ မိစ္ဆာနှိမ်နင်းသူများအပြင် မကောင်းဆိုးဝါးနှိမ်နင်းသူများ၊ နတ်ဆိုးနှိမ်နင်းသူများ အစရှိသဖြင့် ဝေါဟာရအမျိုးမျိုးဖြင့် အဆင်ပြေဆီလျော်သလို ရေးသားသွားမည်။]
စံပယ်ရနံ့သင်းပျံ့၍ လေထုအနည်းငယ်အေးမြနေသော ခန်းမထဲတွင် ယောကျာ်းလေးအသွင်နှင့် ဒန်မော်ရာက တရုတ်ရိုးရာ ကြေးပလွေအား တီးမှုတ်ကာ ဂါဗင်ကို ဖျော်ဖြေနေခဲ့သည်။
ပလွေအသံ၏သံစဉ်သာယာပုံကား နားထောင်စဉ် ဆိတ်ငြိမ်ပျော်မွေ့ဖွယ် သုခဘုံတစ်ခုကို ရောက်နေသည့်အလား ၎င်းသံစဉ်က စိတ်ဘဝကို ကြည်နူးအေးချမ်းစေသည်။
သူ တီးမှုတ်နေသည့်သီချင်းက တရုတ်ပြည်တွင် ခေတ်အဆက်ဆက်နာမည်ကြီးခဲ့သော ရိုးရာသီချင်းတစ်ပုဒ်ပင်။
ဒန်မော်ရာသည် တရုတ်ပြည်မကြီးမှ ပေါက်ဖွားလာသော ကြောင်နက်မိစ္ဆာဖြစ်၏။
သူ၏ယခင်တရုတ်အမည်မှာမူ Bao Shuai (ပေါင်ရွှိုက်) ဖြစ်ပေသည်။ သို့သော် သူ၏ယခင်ဘဝကို ဇာတ်မြုပ်ချင်ခဲ့သည့်အတွက် ဒန်မော်ရာဟူ၍ အမည်သစ်နှင့်အတူ ဘဝအသစ်တစ်ခုကို သူ၏ဖခင်နှင့် စတင်ခဲ့သည်မှာ ၃ နှစ်မျှသာရှိသေးသည်။ ဤသို့ဖြင့် ဒန်မော်ရာက တရုတ်လူမျိုးစစ်စစ်ဖြစ်ပြီး တရုတ်ရိုးရာအကများနှင့် အတီးအမှုတ်များအား စိတ်ဝင်စားကာ ဝါသနာကြီးသူလည်းဖြစ်သည်။
ထို့အပြင် ရိုးရာပလွေသာမက၊ (Guzheng) ကုချင်းခေါ် ကြိုးတူရိယာ တရုတ်ဗျပ်စောင်းအား ကောင်းစွာ တီးခတ်နိုင်သည်။
(Guzheng ပုံစံအမျိုးမျိုးရှိသည့် ဒန်မော်ရာ ခေါ် ပေါင်ရွိုက် တီးခတ်သည့် Guzheng က ဤပုံစံပင်။)
တရုတ်ရိုးရာအကများလည်း အမျိုးမျိုးကတတ်သူဖြစ်၏။ ဂါဗင်မှ သူပျင်းရိနေသည့်အချိန်များတွင် ဒန်မော်ရာအား အကအလှ၊ အတီးအမှုတ်များဖြင့် ဖျော်ဖြေခိုင်းလေ့ရှိခဲ့သည်။
ဒန်မော်ရာက ယခုတစ်ခါ ကုချင်းကို ငြိမ့်ညောင်းသာယာစွာ တီးခတ်နေပြန်သည်။
ယခုတွင်လည်း ဂါဗင်က ဇိမ်ခံဆိုဖာကြီးပေါ်တွင် ကျော့မော့ခန့်ညားစွာ ထိုင်လျက် ဒန်မော်ရာ၏ပလွေသံချိုချိုအပြင် ငြိမ့်ညောင်းသည့်ဗျပ်စောင်းသံတို့ကိုလည်း အာရုံစိုက်စွာ နားဆင်နေပုံမှာ တရုတ်ဧကရာဇ်မင်းကြီးမှ ပလ္လင်ပေါ်တွင် နားဆင်နေသည့်သယောင်။
ပေါင်ရွှိုက် ခေါ် ဒန်မော်ရာက တရုတ်ပြည်မကြီးတွင် အင်အားအကြီးဆုံး မိစ္ဆာနတ်ဆိုးအမျိုးအနွယ် " အမည်း" ဟု အဓိပ္ပာယ်ရသော Hei (ဟိန်း) မျိုးနွယ်မှ ဆင်းသက်လာသူပင်။
[A/N: pinyin ကို မြန်မာမှုပြုတာမှားနေလျှင် အသိပေးပါ။]
သူသည် ထိုမျိုးနွယ်၏ အသက်အငယ်ဆုံးနှင့် အတော်ဆုံး သူလျှိုလည်းဖြစ်သည်။
တရုတ်နှစ်သစ်ကူးပွဲတော်များ၌ သူ၏မွေးရပ်ဇာတိမြေသို့ ပြန်လေ့ရှိခဲ့၏။
ယခုအတောအတွင်း ဒန်မော်ရာနှင့် ဂါဗင်တို့၏မေတ္တာဆက်ဆံရေးမှာလည်း ယခင်ကထက် တိုးတက်မှုများ ပိုရှိလာသည်။
ဗျပ်စောင်းသံက သီချင်းဆုံးသဖြင့် ရပ်သွားခဲ့သည်။
သံစဉ်ထဲ စီးမျောနေခဲ့သည့်ဂါဗင်လည်း သတိပြန်ဝင်လာပြီး ပြုံးနေခဲ့သည်။
ဒန်မော်ရာက ဂါဗင့်ဆီ တဖြည်းဖြည်းလှမ်းလာပြီး သူ့ပေါင်ပေါ်တွင် ထိုင်ချခဲ့ပြီးနောက် ...
" နားထောင်လို့ ကောင်းရဲ့လား ဒါလင် "
" ကောင်းတာပေါ့။ မင်းက နယ်ပယ်အစုံမှာ ဘက်စုံတော်သားပဲ "
" ဘယ်သူ့ရဲ့ အသည်းလေးမို့ ဒီလောက်တော်နေရသလဲဆိုတာပါ ထည့်ပြောလေ ... "
" ဟားဟား ... "
ဤကဲ့သို့ သူတို့နှစ်ယောက် စကားပြောကာ အကြင်နာဝေလျက် ကြည်နူးခန်းစတင်ဖွင့်ခါနီးဆဲဆဲ အခန်းအပြင်ဘက်မှ တံခါးခေါက်သံကို ကြားလိုက်ရသည်။
" ဆရာ၊ သူရောက်နေပါပြီ "
" အေး၊ ဝင်လာခိုင်းလိုက် "
တံခါးမကြီးနှစ်ချပ်က ပွင့်လာခဲ့လျက်၊ သူတို့ဖိတ်ခေါ်ထားခဲ့သော ဧည့်သည်က အခန်းထဲသို့ အိန္ဒြေရှိပြီး တည်ငြိမ်စွာ ဝင်ရောက်လာခဲ့သည်။
ထိုသူက ကီမိုနိုအနက်ဝတ်ဆင်ထားသည့် အမျိုးသမီးတစ်ဦးပင်ဖြစ်သည်။ အရပ်အမောင်းအနည်းငယ်ပု၍ ပိန်ပါးဖြူလှပ်၏။
အနည်းငယ် မျက်နှာကြောတင်းဟန်ရှိသော်လည်း သူမက အေးစက်မှုထဲ၌ အလှပဆုံးပြုံးထားသည်။ မျက်လုံးများနှင့် တင်ပါးထိရှည်သော ဆံကေသာတို့ကမူ မည်းနက်နေပြီး အာရှအမျိုးသမီးတစ်ယောက်၏ဂုဏ်ယူဖွယ်အလှတရားအား ပကတိ ပိုင်ဆိုင်ထား၏။
သူမဟာ ဒန်မော်ရာ ဖိတ်ခေါ်ထားခဲ့သည့် ဂျပန်ပြည်ဖွား အမြှီးကိုးချောင်းမြေခွေးနက်မိစ္ဆာဖြစ်၏။ Chiyo (ချီရို) ဟု အမည်ရသည်။
သူမ၏အစွမ်းကား အမှောင်စွမ်းအင်များကို အခြေတည်ကာ အမှောင်မကောင်းဆိုးဝါးလောကသားများကို ဆင့်ခေါ်နိုင်ကာ သူမ၏တပ်သားများအဖြစ် အသုံးပြုနိုင်၏။ သူမ၏ခန္ဓာကိုယ်ကို ကိုယ်ယောင်ဖျောက်၍ အရိပ်အဖြစ် ဖန်တီးကာ ၎င်းအရိပ်မှတစ်ဆင့် သားကောင်များကို အမဲလိုက်သတ်ဖြတ်လေ့ရှိသည်။
ထို့အပြင် ချီရိုက သူမသဘောကျသည့်အမျိုးသားများကိုပါ ဆွဲဆောင်နိုင်သေးသည်။ သူမတွင် တခြားအမှောင်စွမ်းအားများလည်းရှိသေး၏။
" အစ်မ ချီရို ... မတွေ့ရတာကြာတော့ ပိုလှလာတယ်နော် "
ဒန်မော်ရာက ဂါဗင့်ကို လည်ပင်းသိုင်းဖက်ထားကာ ချီရိုကို နူတ်ဆက်လိုက်သည်။
" မော်ရာရောပါပဲ။ ပျော်စရာ အချစ်နဲ့တွေ့သွားလို့နေမယ်။ ပိုတောင်လှလာသေးတယ် "
" အဟဲ ... အဲဒီလိုပဲ ပြောရတော့မယ် ထင်ပါတယ်။ ဒီကလူကြီးက ကျွန်တော့်ကို အရမ်းချစ်နေတာလေ။ မကြွားတော့ပါဘူး။ ထိုင်ပါအုံး အစ်မချီရို "
" ကျေးဇူးပါ "
ချီရိုက အိန္ဒြေရှိစွာ ဂါဗင်နှင့်မော်ရာတို့၏မျက်နှာချင်းဆိုင်က ဇိမ်ခံဆိုဖာကြီးပေါ်တွင် ထိုင်လိုက်သည်။
ထိုစဉ် ဂါဗင်၏အိမ်တော်ထိန်းလည်းဖြစ်၊ တပည့်လည်းဖြစ်သည့် ဂျိမ်းမှ အခန်းထဲသို့ ချီရို သုံးဆောင်ရန် ကော်ဖီနှင့်မုန့်ပဲသရေစာများအား လာချပေးကာ ဧည့်ခံပြီးနောက် ပြန်ထွက်သွားသည်။
" သုံးဆောင်ပါ ချီရို "
ဂါဗင်က လောကွပ်ပြုသည်။
" ကျေးဇူးပါ "
ချီရိုက သူမ၏အနီရောင်လက်သည်းရှည်များဖြင့် ကော်ဖီအေးခွက်၏ ကွေးကော့နေသောကိုင်းကို အသာအယာကိုင်ကာ ခွက်အဝနှင့် သူမ၏ချယ်ရီသီးပမာ ရဲတွတ်နေသောနူတ်ခမ်းဝကို တေ့လိုက်သည်။
ထို့နောက် ကော်ဖီကို ရှူရှိုက်ရင်း တစ်ငုံ၊ နှစ်ငုံ၊ သုံးငုံစီ ဖြည်းဖြည်းချင်း သောက်သည်။ သောက်ပြီးသော် ခွက်အား နေရာတကျ ပြန်ထား၏။
" ဂါဗင်ရဲ့တပ်အင်အားနဲ့ ကျွန်မရဲ့တပ်အင်အားပူးပေါင်းဖို့ကို မော်ရာကနေ တောင်းဆိုထဲက စိတ်ဝင်စားနေခဲ့တာ။ ခုလ်ိုမျိုး ဂါဗင်တို့နဲ့ပူးပေါင်းခွင့်ရတာလည်း ကျေးဇူးတင်ပါတယ်။
အထူးသဖြင့် ပိုစိတ်ဝင်စားခဲ့တာ ဗိုလ်ချုပ်ခရစ်စတိုဖာကြောင့်ပေါ့။ သူက အရည်အချင်းရှိတဲ့ ဗိုလ်ချုပ်တစ်ယောက်ဖြစ်တယ်လို့ သိထားတာကြောင့် သူနဲ့အလုပ်တူတူတွဲလုပ်ရရင် ပျော်စရာအခိုက်အတန့်လေးရှိလာလောက်မယ် ဟင်းဟင်း ..."
ချီရိုက သဘောကျကာ လှပသောအပြုံးဖြင့် မခို့တရို့ ရယ်သည်။ သူမ၏အပြုံးနှင့်ရယ်သံတို့က မကောင်းဆိုးဝါးဆန်သော်လည်း အလွန်လှပသည်။
ချီရိုက ဂျပန်တွင် အင်အားအကြီးဆုံး၊ အရက်စက်ဆုံး ကြောက်မက်ဖွယ်မိစ္ဆာများထဲမှ အဆင့် ၂ ချိတ်ထားသူဖြစ်သကဲ့သို့ သူမသည် ကိုယ်ပိုင်အင်ပါယာဖြင့် တစ်ကိုယ်တည်း အုပ်ချုပ်ကာ နေထိုင်ကျက်စားနေသော မကောင်းဆိုးဝါးဧကရီတစ်ပါးပင်။
ဂါဗင်ကလည်း ချီရို၏မျက်လုံးများကို စိုက်ကြည့်ခဲ့ပြီး အေးစက်စွာ ရယ်ခဲ့သည်။
" ဒါပေါ့။ သေချာပေါက် ပျော်စရာလေးတွေ ရှိလာမှာ ကျိန်းသေတယ်။ ခရစ်စတိုဖာနဲ့အတူတူတောင် အိပ်လို့ရတယ် "
" တကယ်လား "
" အင်း ... ဒါပေမဲ့ သူကမိန်းမစိတ်မဝင်စားဘူး "
" အို ... "
ဂါဗင်၏စကားကြောင့် ချီရိုက အံ့အားသင့်သွားပြီးနောက် သူမ၏မျက်နှာပေါ်တွင် မကောင်းဆိုးဝါးအပြုံးတစ်ခုက လှပစွာ ပေါ်ထွက်လာခဲ့သည်။
" ကိစ္စမရှိပါဘူး။ သူနဲ့ကစားရရင် ပျော်ဖို့ကောင်းမှာပါ ဟားဟားဟား "
မော်ရာနှင့်ဂါဗင်ကလည်း ချီရိုရယ်သံအား သံယောင်လိုက်ကာ အတူတူရယ်ခဲ့ကြလျက်။
" အစ်မချီရိုကတော့လေ လုပ်ပြီ။ ဒါဖြင့် ဒီနေ့ကစပြီး ကျွန်တော်တို့ရဲ့နန်းတော်ကြီးမှာ စိတ်ကြိုက်နေလို့ရပါတယ် "
" မော်ရာပြောသလိုပါပဲ။ ဒီနေ့ကစပြီး ခင်ဗျားက ကျွန်တော့်တပ်ရဲ့ဗိုလ်ချုပ်အသစ်ဖြစ်သွားပြီ။ မော်ရာ့ကိုလည်း အတတ်နိုင်ဆုံး စောင့်ရှောက်ပေးဖို့ ခင်ဗျားကိုတာဝန်လွှဲလိုက်မယ်။ ခင်ဗျားသဘောကရော ကျုပ်တို့ဆီမှာ အသက်ထက်ဆုံးထိ တာဝန်ထမ်းဆောင်ဖို့ ကတိသစ္စာပြုနိုင်လား "
ချီရို၏ယခုတစ်ကြိမ်မှာ မြင်တွေ့ရသည့်အပြုံးသည် ယခင်အပြုံးများထက် ပို၍ပင်မကောင်းဆိုးဝါးအငွေ့အသက်အပြည့်ပါလျက် အလွန်လှပ၍ကြောက်စရာကောင်းသည်။
" ဒါပေါ့။ ကျွန်မ ချီရိုက ဘယ်တော့မှ သစ္စာမဖောက်ဘူး။ မော်ရာကလည်း ကျွန်မဒုက္ခရောက်နေတဲ့အချိန်တွေတုန်းက သူအကောင်းဆုံးကယ်ပေးခဲ့တဲ့ကျေးဇူးတရားတွေရှိတယ်လေ။ ကျွန်မရဲ့အသက်ကို အာမခံထားပြီး ရှင်တို့ရဲ့အားအကိုးရဆုံးဗိုလ်ချုပ်အဖြစ် ထမ်းဆောင်သွားပါ့မယ် ... "
စကားအဆုံးသတ်၌ သူမ၏အပြုံးက ဟော်လိုဝင်းည၏အငွေ့အသက်များပါဝင်နေသကဲ့သို့ တောက်ပလွန်းခဲ့သည်။
----
ယခုနှစ်၌ ကမ္ဘာ့နေရာအနှံ့အပြားတွင် မိစ္ဆာများမှ လူသားများအား ပြန်လည်အမဲလိုက်သတ်ဖြတ်မှုများဟာ တစ်လထက်တစ်လ ပိုမိုများပြားလာသည့်ကာလတစ်ခုသ်ို့ ရောက်ရှိနေလျက်။
အပြည်ပြည်ဆိုင်ရာ ကောင်းကင်နန်းတော်အသီးသီးမှ နတ်သမန်တော်များကလည်း လူ့ပြည်တွင် သောင်းကျန်းဆိုးသွမ်းနေကြသော မိစ္ဆာများအား နတ်ကြေးမုံများဖြင့် အသီးသီး ကြည့်ရှူခဲ့ကြပြီးနောက် မိစ္ဆာနာမည်များအား စာရင်းပြုစုခဲ့ကြသည်။ ထို့နောက် ၎င်းနာမည်စာရင်းများက ငရဲပြည်သို့ ပေးပို့ခြင်းခံရသည်။
ယင်း ကောင်းကင်နတ်သမန်တော်များမှ သက်ဆိုင်ရာ မကောင်းဆိုးဝါးနှိမ်နင်းသူများ၏အကြီးအကဲခေါင်းဆောင်များထံ သဝဏ်လွှာတစ်ခုစီ ပေးပို့လေ့ရှိကြသည်မှာ အစဉ်အလာတစ်ခုပင်။
ယနေ့တွင်လည်း Freeman စံအိမ်တော်ဆီ နတ်ပြည်မှ သဝဏ်လွှာတစ်ခု ရောက်ရှိလာခဲ့လျက်။
၎င်းသဝဏ်လွှာ၌ ...
" ကောင်းကင်ပြည့်ရှင်မင်းကြီး၏ အမိန့်တော်
လန်ဒန်မြို့တွင် လူအများအား ဖမ်းဆီးသတ်ဖြတ်စားသောက်နေသော မကောင်းဆိုးဝါးနတ်ဆိုးမိစ္ဆာများအား အမြန်သုတ်သင်ရှင်းလင်းရန် "
ဤသဝဏ်လွှာအား တီမိုသီဖရီးမန်းမှ လက်ခံရရှိပြီးသော် ဂျရယ်မိုင်ရာအား ယနေ့ညတွင် ထိုမကောင်းဆိုးဝါးနတ်ဆိုးများအား သွားရောက်နှိမ်နင်းရင် တာဝန်ပေးခဲ့၏။
ယနေ့ ညနေတွင် မွန်ဒီနှင့်ကီရမ်က စားသောက်ဆိုင်ကောင်းကောင်းတစ်ခု၌ ညစာဒိတ်ရန် ချိန်းဆိုထားကြ၏။
သဝဏ်လွှာရောက်မလာခင်အထိ ဂျရယ်မိုင်ရာက မွန်ဒီအား သူမနှင့်အတူတူ အပြင်ထွက်ပေးမည်ဟု ကြိုတင်ကတိပေးထားခဲ့သည်။
အချိန်ကား မနက် ၉ နာရီဝန်းကျင်။
မွန်ဒီက သူမ၏အိပ်ခန်းထဲတွင် ပထမဆုံးဒိတ်အတွက် ဝတ်ရမည့်အဝတ်အစားများအား ကိုယ်တိုင်မရွေးနိုင်ဖြစ်နေ၍ ဂျရယ်မ်ိုင်ရာအား အကူအညီတောင်းခဲ့ကာ တစ်စုံပြီးတစ်စုံ ရွေးခိုင်းနေခဲ့သည်။
" ကီရမ် ဒို့ကိုမြင်မြင်ချင်း တန်းကြွေပြီး အာပွားပေးချင်စိတ်ပေါက်မဲ့ ဝတ်စုံလေး ရွေးပေးနော် ဂျရယ် "
" အေး ဒီ messi ဝတ်စုံလေးရော "
" ဟင်း မကြိုက်ဘူး ... တောဆန်နေသလားလို့ ... "
" ဒါဆိုရင် ... ဒီ ဂါဝန်အဖြူလေးရော ..."
မွန်ဒီက အဝတ်အစားနှင့်ပတ်သက်လျှင် တအားဇီဇာကြောင်ပြီး ဂျီးများလွန်းသူသေးလေးဖြစ်၍ ဂျရယ်မ်ိုင်ရာက သူမအတွက်ဆိုလျှင် အမြဲတမ်း ပင်တိုင် stylist တစ်ယောက်ဖြစ်နေသည်။
" လှတော့လှပါတယ် ... ဒါပေမဲ့ အပေအတေမခံဘူး "
" ဒိတ်မှာလား ရွံ့အိုင်ထဲ ဗွက်သွားလူးမှာလားဟ။ အပေအတေမခံဘူးဆိုရအောင် ... "
" မဟုတ်ဘူးလေ ... စားလို့သောက်လို့ ပေကျံသွားရင် အဖြူလေးမို့ အဆင်မပြေဘူးလေ "
" ဒါဖြင့် ဒီအနက်ကလေးရော။ sexy လည်းကျတယ်။ လှလည်းလှတယ်။ ယူနဲ့ဆို တအားလှမှာ။ ကီရမ်မြင်တာနဲ့ မွန်ဒီ့ကို တန်းကြွေသွားမယ်ဆိုတာ ရဲရဲကြီးအာမခံတယ် "
" ဝါးး တကယ်လား။ ဒါဆို ဒါလေးပဲဝတ်သွားမယ် ... "
" အဟဲဟဲ နင့်အစ်ကိုကြီးပါ။ ငါ့ယုံလိုက်။ ဒီကောင် နင့်ကိုဒီဝတ်စုံနဲ့မှ မကြွေရင် အဲဒီကောင် gay နေလို့ပဲ "
" အာ ... ကိုကြီးကလည်း သူ gay လည်း မွန်ဒီက ကြည်ဖြူစွာ cover တွဲပေးမှာ အဟိဟိ "
"အဟက်ဟက် ... အေးပါ၊ ဘာပဲဖြစ်ဖြစ်။ ရည်းစားတောင် မဖြစ်သေးဘဲ အရမ်းစိတ်ကူးမယဉ်နေနဲ့။
" ဟဲ ... ဘာလို့ ရည်းစားမဖြစ်နိုင်ရမှာလဲ။ ကျွန်မလို အလှပဂေးလေးက ..."
" အေးပါ ... ဒါပဲဝတ်တော့။ ငါ အခန်းပြန်ပြီ"
ဂျရယ်မိုင်ရာလည်း မွန်ဒီ၏အခန်းတံခါးကို သေချာပိတ်ခဲ့ပြီး ထွက်လာခဲ့သည်။
သို့သော် သူ့ရှေ့တွင် အိမ်တော်ထိန်းတစ်ဦးက ရောက်နေခဲ့သည်။
" သခင်လေးကို လာခေါ်မလို့ ပြင်နေတာ။ သခင်ကြီး ဖရီးမန်းနဲ့ တခြားသခင်ကြီးတွေက အရေးပေါ် အစည်းအဝေးလုပ်ဖို့ သခင်လေးကို ခေါ်ခိုင်းလိုက်ပါတယ် "
" အာ ... အိုကေပါ။ ခုပဲလာပြီ "
ဤသို့ဖြင့် ဂျရယ်မိုင်ရာလည်း သူ၏ဘိုးတော်ကြီးများစောင့်နေသော အစည်းအဝေးဟောခန်းမကြီးအား ရောက်ရှိခဲ့သည်။
ခန်းမထဲ ဝင်လျှင်ဝင်ချင်း အဘောဖြစ်သူ တီမိုသီဖရီးမန်း နှင့် ဖခင်ဖြစ်သူ ဒေါမနစ်မျက်လုံးတို့အား အကြည့်ချင်းတန်းစုံခဲ့လျက်။
ဂျရယ်မိုင်ရာလည်း အဘောဖြစ်သူ တီမိုသီဖရီးမန်းနှင့်မျက်နှာချင်းဆိုင်ရာ စားပွဲထိပ်က နေရာလွတ်မှာ ဝင်ထိုင်ခဲ့သည်။
အစည်းအဝေးစားပွဲခုံတန်းသည် အလျား ပေ ၂၀ ရှည်လျားပြီး ပတ်ပတ်လည်တွင် လှပထည်ဝါသော ဇိမ်ခံဆုံလည်ကုလားထိုင်ကြီး ၈ ခုံ တည်ရှိသည်။
တီမိုသီဖရီးမန်း၏ကုလားထိုင်မှလွဲလျှင် ဘိုးတော်ကြီးမျာ၏ကုလားထိုင်များက တစ်ခုံနှင်တစ်ခုံ ၅ ပေခြားထား၏။
တီမိုသီက ချောင်းဟန့်လိုက်ပြီး စကားစပြောသည်။
" ကဲ ... ဒီညမှာ နတ်ဘုရားတွေဆီကနေ သဝဏ်လွှာရထားတယ်။ လန်ဒန်တစ်ဝိုက်မှာသောင်းကျန်းနေတဲ့ အကောင်တွေကို ရှင်းပစ်ဖို့ပေါ့။
အဲဒီအကောင်တွေအကုန်လုံးက ဂျက်ဖရီလက်အောက်က မကောင်းဆိုးဝါးကောင်တွေချည်းပဲ။ သူတို့က လူတွေတင်မက အားနည်းတဲ့တခြားမိစ္ဆာအမျိုးနွယ်က မိစ္ဆာတွေပါ အနိုင်ကျင့်င့်သတ်ဖြတ်နေကြတယ်ဆိုပဲ။
သဝဏ်လွှာထဲမှာပါတဲ့အကောင်တွေအကြောင်းကို ငါတို့တွေ ထပ်စုံစမ်းပြီး သတင်းအချက်အလက်တွေ ပြုစုထားတယ်။
ဒီတော့ ဂျရယ်မိုင်ရာကို တာဝန်ပေးပါတယ်။ မင်းရဲ့ဖုန်းထဲ ဒေတာတွေ ပို့ပြီးပြီ။ မစ်ရှင်ကို ကျေပွန်အောင် ဆောင်ရွက်ပါ။ အဖဘုရားသခင် ကောင်းချီးပေးပါစေ "
ဂျရယ်မိုင်ရာက တီမိုသီ၏စကားများကို နားထောင်ပြီး မျက်နှာရှုံ့မဲ့လိုက်ကာ ...
" နေ-နေပါအုံး။ အဖေတို့ အဘိုးတို့ကရော မကူပေးဘူးလား။ အဲဒီအကောင်တွေ အကုန်လုံးကို ကျွန်တော်တစ်ယောက်ထဲပဲ ချရမယ်ပေါ့။ ဒီည မွန်ဒီနဲ့အပြင်မှာ လျောက်လည်ပြီး သူစားချင်တဲ့ဆိုင်မှာ ညစားအတူတူစားပေးဖို့ ကတိပေးထားပြီးပြီ။ ကတိဖျက်ရင် သိတဲ့အတိုင်း သူကတစ်အိမ်လုံး စိတ်ကောက်ပြီး ပတ်သောင်းကျန်းမှာ "
ဂျရယ်မိုင်ရာက မွန်ဒီနှင့်သာမက ခရစ်စတိုဖာနှင့်ပါ ညဘက်ချိန်းဆိုထားတာကြောင့် အခက်တွေ့နေ၏။
တီမိုသီက ဂျရယ်မိုင်ရာကို အေးစက်စက် ကြည့်နေခဲ့သည်။
" မွန်ဒီ့ကို ငါပြောလိုက်မယ်။ နောက်မှ မင်းနဲ့သွားဖို့။ အဲဒီကလေးမက ငါပြောရင် ရပါတယ်"
တီမိုသီက ဖြေသည်။
" အာ ... "
ဂျရယ်မ်ိုင်ရာဘက်က တင်မိုသီအား ပြန်လည်ပြောဆိုရန် ' အာ ' အစချီပြီး ပါးစပ်ဟလိုက်စဉ်မှာ တီမိုသီက အနည်းငယ်လေသံမာရင်း ပြောခဲ့သည်။
" မင်းတို့နှစ်ယောက် အပြင်မှာ ဘာမဟုတ်တာတွေလုပ်ပြီး သောင်းကျန်းမယ်လို့ ကြံစည်ထားကြလဲ။ မင်း ကလေးကို အန္တရာယ်ထဲ တွန်းပို့မနေနဲ့နော်။ သူက သာမာန်လူမဟုတ်သလို မိစ္ဆာကောင်တွေအတွက် ကစားစရာ၊ မျက်စိကျစရာဖြစ်လာနိုင်တယ်။ ပြီးတော့ ခုမှ သူနဲ့ဘာစွမ်းအင်က အလိုက်ဖက်ဆုံးလဲဆိုတာ စမ်းသပ်ပြီး လေ့ကျင်ကာစရှိသေးတယ်။ သူ့က်ိုယ်သူလည်း မကာကွယ်နိုင်သေးဘူး။ ငါက သူ့လုံခြုံရေးအတွက် ပြောတာပါ "
" ကျွန်တော် နားလည်ပါတယ်။ ဒါပေမဲ့ ဟိုတစ်ခါကလို တစ်ယောက်ထဲ အပြင်ခိုးမထွက်စေချင်လို့ လိုက်ပို့ပေးရုံပါ။ ပျော်ပျော်နေနေတတ်တဲ့ကလေးတစ်ယောက်ကို စည်းကမ်းတွေနဲ့ အရမ်းဖိအားပေးတာမျိုး၊ ပိတ်ပင်တာမျိုးလည်း မလုပ်ချင်ဘူး။ ကြာလေ သူ စိတ်ကျဉ်းကျပ်ပြီး မဟုတ်တာတွေ လုပ်မိနေမယ် "
ဂျရယ်မိုင်ရာက တီမိုသီ၏မျက်လုံးအေးအေးများကို စိုက်ကြည့်ကာ မွန်ဒီ၏ကိုယ်ပိုင်လွတ်လပ်ခွင့်အတွက် ကာကွယ်ပြောဆိုခဲ့သည်။
တီမိုသီက မျက်စိခဏမှိတ်လိုက်ပြီး သက်ပြင်းချသည်။
" ကဲ ... အဲဒါဆို ငါအားနေတာ။ ပျင်းလည်းပျင်းနေတော့ ငါပါ ဝိုင်းသမပေးပါ့မယ် "
ခဏတာ တိတ်ဆိတ်မှုကို အဘိုးဖြစ်သူက ကြားဖြတ်ပြောကာ ဖြိုခွင်းလိုက်၏။
" အင်း ... ငါလည်း အစွမ်းမသုံးရတာကြာပြီဆိုတော့ မင်းနဲ့အတူလိုက်ခဲ့မယ် သား "
အဘိုးဖြစ်သူအား မျက်နှာချင်းဆိုင်တွင် ရှိသည့် အဘေးမှ လှမ်းပြောသည်။
" ကျွန်တော်ပါ လိုက်ခဲ့ရအုံးမလား အဖေနဲ့အဘိုးတို့နဲ့ ဒါမှမဟုတ် ဂျရယ်မ်ိုင်ရာနဲ့နှစ်ယောက်တစ်ဖွဲ့သွားတာပေါ့ ... "
ဒေါမနစ်လည်း စကားဝ်ိုင်းထဲ ပါလာခဲ့သည်။
" ဒါဆို မွန်ဒီနဲ့ခုပဲအပြင်ထွက်လိုက်ပါ့မယ်။ ညမရောက်ခင် သူနဲ့အိမ်ပြန်လာတာပေါ့။ မကောင်းဘူးလား။ ဒီလိုဆိုရင် မယ်မင်းကြီးမ ရစ်တာမခံရတော့ဘူး... "
" အေး ... ကောင်းပြီ။ လက်ရည်ပြန်စမ်းချင်တဲ့လူတွေလည်း ကိုယ်စီတာဝန်ယူပြီး ရှင်းပစ်ချင်တဲ့အကောင်တွေကို ကြ်ိုရွေးထားလိုက်။ မစ်ရှင်တွေက မင်းတို့ဘာသာ အဆင်ပြေသလ်ိုခွဲ။ စစ်ကူလို့မှ ငါတို့ကို အကြောင်းကြားလိုက်။ အကောင်တွေက ပမွှားကောင်လေးတွေပါ။ မင်းတို့အစွမ်းနဲ့ လေပေါ်မှာ အိပ်ပြီးတောင် ရှင်းနိုင်တယ်။ စစ်ကူခေါ်စရာ မလိုလောက်ဘူး "
တီမိုသီက မြေးမြစ်များ၏ဆန္ဒကို သဘောတူကာ လိုက်လျောခဲ့သည်။
မကောင်းဆိုးဝါးမိစ္ဆာများ၏ ကိုယ်ရေးရာဇဝင်နှင့်အချက်အလက်များက်ို ဂျရယ်မိုင်ရာအပြင် တခြားမြေးမြစ်များ၏ဖုန်းများထဲပါ ပေးပို့ခဲ့သည်။
အစည်းအဝေးအပြီးမှာ ဂျရယ်မ်ိုင်ရာက ခရစတိုဖာကို စာပို့ထားခဲ့သည်။
" ဒီညတော့ အခြေအနေအရ လာနိုင်မှ လာနိုင်မယ် ဘေဘီ။ မိသားစုမှာအရေးကြီးကိစ္စပေါ်လာလို့ပါ။ ချစ်တယ် မွ 😘"
မွန်ဒီလည်း သူမအိမ်တော်၏အရေးပေါ်ကိစ္စကြောင့် ကီရမ်ကို ဒိတ်အချိန်ပြောင်းကြောင်း အသိပေးထားခဲ့သည်။
◎ ══════ ❈ ══════ ◎