السلام عليكم
يتيمة المشاعر
نور ال زياده
سمر: نزلنه بسرعه ولكينه بنات عمي ماخذهن احمد يوصلهن،
بس رافي مثل التايه يفتر بمكانه وميعرف
شيسوي
ضل يصيح على براء
رافي: برااااء، برااااء
براء: نعم خالو خير شنو صاير؟
رافي: بسرعه اتصلي على نورزان شوفيها وينها هسه
براء: اي حاضر
اتصلت بيها واحنا على اعصابنا
رافي: ها بشري؟
براء: خالو جهازها مقفل
رافي: سيف وينه ؟
براء :طلع قبل شويه
رافي :بسرعه روحي انتي لعد لبيتهم شوفيها موجوده لو لا
واني اوكفلج من بعيد شوفيها وتعالي
سمر: طلعنا اني ورافي يم بابنا ضلينا وننتضر خبر من براء
شويه واجتي وكالت....
براء: ماكو احد واصلا البوب مقفله من برا
ودكيت للتاكد هم ماكو
رافي: ياربي اني شسويت ....
وين راحت ياالهي...
خلي اتصل على سيف يجي ندور عليها
وانتي براء، ضلي كل شويه اتصلي عسى تفتح جهازها
سمر: اجي وياك رافي لان انته كلش متوتر
رافي: اصلا مااعرف شلون راح اسوق السياره
امشي بعد احسن
سمر: اتصلنا بسيف وكلناله يجي هو هم يدور كلمن بجها
واني ورافي طلعنا على كيف ندور بالسياره
واتصلت على منال سالتها بلكي راحت للفاتحه
بس ماكو
يعني مر اكثر من ساعتين وهي ماكو وين صارت؟
بدا الخوف والقلق والتوتر يسيطر علينه
اما رافي حتى وجها صار اصفر حسيته راح ينفجر
لو يصير بي شي
وكل شويه يلوم بروحه ويغلط على نفسه
رجعنه من جديد لفرعنه حتى نسال نشوف بلكي
احد شافها
سالنا ابو الاسواق اللي على الشارع
وانصدمنه بكلامه !!
كال بنيه بمواصفاتها قبل اكثر من ساعه ونص، دعمتها سياره
وصفها مثل مواصفات نورزان
هنا، رافي انتهى، طلع وكعد على الرصيف وخله راسه بين ايده
اني بسرعه اتصلت على سيف يجينا كان قريب
وتقربت من رافي اهدىء وضعه اللي ابد ماعاجبني
وخايفه عليه
رافي حبيبي ليضل بالك ان شاء الله موهيه
هسه تشوف شويه ونلكاها ومابيها شي
رافي:اني السبب اذا صار بيها شي، اني السبب
سمر راح اتخبل راح اموت ...
احس روحي مربط ومختنك
شلون اذا طلعت هيه شلون فهميني؟
اجه سيف وسمع كللمنا وكللنه ....
سيف: رافي شد حيلك وكوم خلي ندورها بالمستشفيات
رافي: مدااكدر، احس نفسي ا نربطت ومدااكدر اتنفس
سمر: كول ياالله مابيها شي ان شاء الله
سيف: ابقوا هنا خلي اسال باقي المحلات بلكي احد شاف، او سمع شي
سمر: راح سيف يسال، ورافي على كعدته
احسه منهار، وفعلا متربط، وعلى ساعه يوكع
سيف: ابشركم سالت وكالو فعلا اكو بنيه اندعمت
بس حادث بسيط
وراد صاحب السياره يوديها، مستشفى هي مارضت
وقرر يوديها مستوصف قريب يله وافقت
رافي: سيف الله عليك كول الصدك خوما بيها شي؟
سيف: والله كالو بسيطه،..
بس شد حيلك وكوم ...
خلي ندور هنا هو كم مستوصف اكيد واحد منهن
بس كول يالله وشد حيلك والله مااعرفك ولاشايفك بهيج حاله بحياتي كلها
ومو هينه عليه اشوفك هيج،
رافي: اني السبب سيف....
اللي صار بيها اني سببه
ردت ابعدها عن حياتي، ....
ماتصورت راح تتاذى بسببي
سمر: يله امشي اندور وان شاء الله بخير نلكاها
دورنا اول مستوصف ماكو، والثاني فتنا ولمحتها من بعيد كاعده وايدها ملفوفه وخاليلها مغذي...
اول ماشفتها كلت...
رافي هاي نورزان شوفها
***********
نورزان: اخذني الولد للمستوصف من شافوا ايدي مباشر كلولي محتاجه خياط
الجرح كبير وعميق ونزف هواي دم
اني متت خوف، بس كنت مضطره لان الدم ماوكف
خطيه الولد ماعافني ولا ثانيه
خيطولي ايدي واني طالعه روحي، لحد ماخلصوا
عود خلولي بنج موضعي كلشي مسوا
وبعدها ضربوني ابره ضد الكزاز
بس اني ردت اطلع انتهيت....
اريد اوكف على رجلي مااكدر
دخلني للطبيب وكوه فوتوني لان عليه سره هوايه
قاسلي ضغطي كان كلش منخفض واصلا نزفت دم
هوايه،
والحقيقه نفسيتي مو احسن من وضعي
الجسدي،
التمت عليه احس الدنيا ضاقت بيه
طلعنا من الطبيب كعدني الولد وراح جاب الدوا
ومستلزمات المغذي
طبعا لما لكولي وريد حتى يخلولي كانونه، ساعه
مااعرف اختفى زرفو ايدي بكل مكان صار عذاب
احس روحي بدت تطلع وراها ماحسيت بشي فقدت
.
.
صحيت والمغذي بايدي، ....
وراها طلعوني برا كعدوني
لان اكوا هواي مراجعين ينتضرون دورهم
الناس بهيج الم وتعب، تحتاج امهم وابوهم
اني اخاف حتى اتصل بيهم لان يلوموني
ويئذوني بدل ميوكفون ويايا....
احتاجيته هو تمنيت يكون ويايا، تمنيت يجي يمي واشوفه
اشوف الاهتمام اللي بعينه قبل تصرفاته
، بس لا خلص انتهى كل شي ....
خسرته مثل هوايه اشخاص خسرتهم بحياتي
لسبب لليوم مااعرفه
اليوم اني رجعت يتيمه من جديد....
، اهلي اموت لو اعيش ميهتمون لامري
ماكو شخص يهتم لامري...
بس هو وهو راح وعافني وحيده
كل هل الكلمات تتردد بذهني واني مرجعه راسي على كرسي من التعب
منتضره المغذي يخلص واللي اصلا خلولي
ثاني بعد ماخلص الاول
لان ضغطي ماصعد وخطيه الولد ماعافني ثانيه
وحده
حاولت افتح عيني المثقله بالتعب والدموع
واعدل كعدتي....
وهنا واشوف اللي كان شاغل فكري،....
للحضه بداخل نفسي، فرحت مثل طفله وتعورت بالمدرسه واجى والدها عليهه.....
باوعت بعيونه من بعيد ...
اللي اكدر اميز كلش زين بيهم التعب والندم
والخوف وحتى وجها مو طبيعي
اي هو نفسه هو اللي يهتم لامري ويخاف عليه
بس من بين هل الافكار تردد كلامه الاخير
بذهني،
وتذكرت اسلوبه ويايا، وهنا نضرتله ،نضرة عتاب ودرت وجهي عنه
اجت سمر تمشي سريع وبهمه وكالتلي ....
سمر: نورزان حبيبتي الحمد الله على السلامه
شصار وياج ياعمري؟
نورزان: مابيه شي ليضل بالج شغله بسيطه
سمر: يابسيطه دشوفي وجهج شلون صاير
وهاي ايدج الملفوفه، شنو بيها؟
نورزان: جرح وخيطوا الي
الولد: اهلا اختي واسف على اللي صار والله مو بقصدي هي فجئه ضهرت كدامي والله ستر
سمر: يعني انت اللي دعمتها؟
الولد: اي اني وحاولت اوديها للمستشفى ماوافقت
وجبتها لهنا،
بس جرح ايدها كبير وعميق ونزفت هوايه دم لحد ماخيطوا الها
والله ماعرفت شنو اسوي، وكملت من ضغطها
نزل واغمى عليها
سمر: نورزان تحجين صدك؟!!
وتكولين كلشي مابيه ....
ياعمري كل هذا وانتي وحدج
نورزان: احجي ويا سمر واكو عيون تراقبني من بعيد بس ابد مااتقرب
كلش واضح عليه الخوف والتوتر، ....
بس ماتنازل يجي يمي ويسئلني عن حالي...
والله لو بس جاي يمي وحاجي وسائل على حالي
كان نسيت كل اللي صار
اصلا اني حاليا اكثر واحد بالدنيا محتاجه قربه
بس هو مصر وكلامه ماكان بلحضة غلط كان مقصود
اجه سيف يمي وكال....
سيف: نونو الحمد الله على السلامه شلون صرتي؟
نورزان: الحمد لله زينه
سيف: لو تدرين شلون خوفتينا وشكد دورنه
عليج والله كلبنا مثل النار صار
نورزان: الحمد الله من اكو احد استفقدني واهتم
لامري
سيف: لا نورزان لتكولين هيج ترا كلها تهتم لامرج
واذا قصدج على هذولاك الناس الي ضوجوج
ترا كل خوفنا بكفه ...
وهو كان بكفه ثانيه..
والله انهار من درا انتي مسويه حادث...
صار مثل المجنون
لتشيلين بخاطرج منه...
لحضة عصبيه والله انتي كلش غاليه عنده
بس اكيد اكو سبب ورا هاي تصرفاته
نورزان: اكتفيت انو اسكت مااريد اعيد وازيد بالموضوع ولااعتب على شخص ماكلف روحه
يجي يمي
ميكفي خوفه بالنسبه اليه،
واصلا دايخه وتعبانه، اريد بس يخلص المغذي
اجى الطبيب وكال خلص المغذي راح ارفعه
وتكدرون تطلعون ولتعرض الجرح للمي هل الفتره
انطانا علاج تشكرنا منه وقررنا نطلع
والولد خطيه ضل يتعذر، ويبرر موقفه
واني كتله...
اخويه قدر راد يصير واشكرك ماقصرت وماعفتني دقيقه روح الله وياك مابيه شي
الولد: اختي اي شي تحتاجي اني حاضر
اخذوا رقمي اذا تريدون
سيف: مشكور اللي عليك سويته هاهيه
توكل الله وياك، ماقصرت
نورزان: طلعنا وطلع الولد ويانا، ورافي واكف بعيد ابد ماتقرب
من طلعنا صار بوجهي بس ماباوعت علي
كلي....
رافي: الحمد الله على السلامه
نورزان: رديت من غير نفس وماباوعت بوجها وكلت ...
الله يسلمك...
عفته ومشيت
كلت لسيف يوصلني لبيتنا انتضر اهلي بالكراج علما يجون
بس سمر شاطت عليه وحجت بعصبيه ...
سمر: كل عقلج نورزان اخليج تروحين وتكعدين هاي كعدتج برا وانتي بهل حال...
والله اكلب الدنيا عليج وعلى رافي
تجين يمي الى ان اهلج يرجعون بعدها هسه يله بدت تصير المغرب
وهمه ميجون لليل ....
كل هل وقت تضلين تنتضريهم ،،،كل عقلج امشي ولتخليني ابتلي بيج
اسحلج سحل، شنو مطروده وهيج تحجين
نورزان: قابل كذب اي مطروده....
، لو نسيتي تلميحات اخوج انو بعد مااطب هل البيت
سمر: لتستفزيني، وتعرفين رافي مو هذا قصده
واذا على كلامه يجي يوم وتفهمين اسبابه
وبوقتها تعذري
نورزان: لااعذره ولايعذرني،
مااريد حتى اشوفه بعد
سيف: ها نورزان هيج صار الحجي ....
من موقف تبيعين الاول والتالي هذا رافي العزيز هيج تحجين عنه ....
ولج هذا لوتكليله موت علمودج يموت
هيج صارت بينكم....
، تعوذي من الشيطان وامشي ويانا لما يجون اهلج وبعدها شتسوين سوي
نورزان: صعدت ويا سيف، وسمر اجت ويانا
ورافي صعد بسيارته،
اصلا ماعندي حل اخر وين اروح وحدي واصلا
تعبانه ودايخه كوه واكفه مو مال اكابر
رحنه لبيت عمو نبيل، بس من ردت انزل
افترت الدنيا بيه مااعرف ليش
نزل سيف بسرعه عليه، نزلني، واجت سمر
تلكتني ودخلتني جوا
اسمع صوته ينصي بي ويسال سيف ويكله ....
رافي: شبيها شنو الصار وياها؟
سيف: داخت رادت توكع
نورزان: كلامهم صار بعيد عليه بعد مادخلتني سمر جوا دخلنا للصاله مال الضيوف
كعدت بس بعدها الدنيا تفتر بيه،
ادري معقوله ضغطي لسه نازل
مددتني سمر على التخم وراحت جابت بطانيه
ومخده،
بس خليت راسي، وارتاحيت صرت اغفي
بعد شويه اجت سمر جايبه عصير طبيعي
بس اني مابيه حيل لاي شي
احس نفسي نعسانه، واريد بس انام
كوه شربت رشفتين منه
غمضت عيوني بس مونايمه تعبانه، وسمر طلعت
خلتني على راحتي، واسمعهم برا يحجون
سيف: ها بشري شلون صارت؟
سمر: شكلها تعبانه ونامت، والدوخه مافاركتها
رافي: شلون خاف بيها شي نوديها للمستشفى
سمر: هسه تنام وترتاح ان شاء الله تكعد زينه
هاي من الهبطه، والدم اللي نزفته
رافي: لتخبليني سمر ليش شنو جرح ايدها هيج
كبير ونازفه هلكد دم ؟
سمر: اي اللي افتهمته عميق وكبير
، وطالعه روحها من مخيطي مئذيها لحد مامخلصين
ومن مخلصين دايخه
وطلع ضغطها كلش هابط، ومغمى عليها
رافي: صدك تحجين سمر!!!
ياربي اني شنو سويت؟
شلون هيج اذيتها ؟
شلون ماحسبت حساب هل شي؟
امشي خلي نوديها للمستشفى يروح يصير بيها شي
سمر: رافي اهدى مابيها شي ان شاء الله
قابل بالمستشفى شراح يسوون اكثر من السوا الطبيب، ....
بس شويه اهدئو خلي افوت اشوفها شلون صارت
نورزان: كل كلامهم اسمعه واني ماعندي حيل حتى افتح عيوني، مااعرف شنو صار بيه
واستغربت كلامه وخوفه !!!
ادري لعد ليش صار فتره هيج يعاملني؟
، ممعقوله كرهني ومل مني اللي بينا عمر كامل، بس اكيد فعلا اكو سبب
اجتي سمر حجت ويايا مارديت عليها ماعندي حيل
وتعبانه غطتني عدل وطلعت
ورا وقت مااعرف شكد .....
حسيت صرت نار، صخنت ،،،وتعبت حيل،
اريد اصيح احد يجيني ميطلع صوتي
مااحس الاايد نحطت على جبيني
اي هاي الايد اعرفها والنفس والعطر هذا اله
هو تلمس جبيني
وحجه ويا سمر بصوت اقرب للهمس
رافي: تعالي سمر شوفيها مصخنه صايره نار
نورزان: اجتى سمر شافت حرارتي،
سمر: اي والله مصخنه، خلي اسويلها، كمادات
بلكي تنزل
رافي: خلي نكعدها ننطيها خافض حراره، حرارتها عاليه، مو مال كمادات
نورزان: اسمعهم وماارد، كعدتني سمر بس ماعندي
حيل، ولا طاقه
حاولت، فتحت عيني وسديتها
اجى سيف هم
كعدوني وجلسوني كوه
واجت زوجة احمد خطيه، هم وياهم وبراء شربوني
دوا ورجعت نمت
، بعد ماحسيت، الاريام يمي وامي وعمه ام رافي فوك راسي
شويه بعد الدوا صرت احسن كدرت اكعد
سالتني امي، على اللي صار
كلتلها...
رحت لصديقتي اخذ محاضراتي منها لان اليوم ماداومت...
بالطريق صار اللي صار
، ماكلت اللي صار قبلها والمشكله
سيف وسمر باوعولي باستغراب
بس اني هزيتلهم راسي حتى يتفهمون الموضوع
ويمشون ورا كلامي
ام زيد: ادري غير تنتبهين، انتي شلون بيج
تدورين المشاكل دواره
ام رافي: ام زيد كولي ياالله قابل قاصدتها
هذا قدر والله قدر ولطف...
الحمد الله على سلامتج يمه ....
هاي عين ماصلت على النبي من شافنج بالفاتحه خلن عينهن عليج
نورزان: مااستغربت كلام امي اللي الحمد الله على السلامه ماكالتها
ريام: نونو حبيبتي لو ادري راجعه وياج
اني صوجي
سيف: يمعودين كولو ياالله مابيها شي ان شاء الله
هسه نضربها اربعين ابره تصير مثل الورد
نورزان: سيف تسكت لاابتلي بيك واطلع كلشي براسك
، ادري عاضني جلب، حتى اربعين ابره
اضرب،
سيف: اي هسه اطمئنيت هاي نورزان اللي اعرفها
متسكت عليه، لازم ترد
هي المشكله مو هنا المشكله، راحت عليه الباجه
سمر: يووووه، والله هسه عرفت ماغيرك الفاك
حلكك عليها...
، ادري ابتلت على عمرها تعلمت تطبخ،
ولج نورزان اذا طبختي بعد لاحد اني ابتلي
بيج
نورزان: ضحكنا على سوالفه، وبراء حبيبتي دمعت
عيونها، وتكابلن هي وريام كلبنها مناحه...
اخر شي عاط بيهن سيف وكلهن....
سيف: يمعودات كلبتنها مناحه، راح تموتنها للبنيه
جوزن عنها
نورزان: صرت احسن خصوصا بعد ماشربت العصير
وكمت على حيلي
ورجعنا لبيتنا، ومن هل الدقيقه قررت بعد ماافوت
بيتهم ولا اشوفه، ولا حتى اخلي يلمحني
يتبع