مجنونة اقتحمت حياتى (مكتملة )

الفصل الثامن

اللهم انك عفو كريم تحب العفو فاعفو عنا ..

الفصل الثامن
      رونى محمد

-: فهمتى بت يا سمر هتعملى ايه ؟

تركت سمر كوب العصير على المنضدة  وقالت
-: لا مفهمتش !!

-: يخربيتك ده انا بقالى ساعة بتكلم ..

-: يعنى انتى عوزانى آجر الورشة ولا اعمل ايه بالظبط ..

-: اه اجريها للواد حمص ده عيل ايده تتلف فى حرير ويجى منه ..

-: ياختى ده كحيان ولا هيقدر يدفعلك أيجار ولا غيره

-: مش مهم يدفع المهم ان الورشة بتاعة ابويا متتقفلش وتفضل شغالة وبعدين انا كام شهر كده وراجعة لشغلى ... اه الامر ما يسلمشى ..

-: بقى يا منحوسة عاوزة تسيبى عيشة العز والهنا دى وترجعى للفقر تانى .. طب وسي سراج هيوافق بكده !!

-: يوافق ولا ميوافقش هو مش هيكون ليه دعوة اصلا ، يابنتى زى ما قولتلك الجوازة دى كده وكده مش حقيقية يعنى

-: اااه وايه عليكى ياختى بكل ده ، ما حنا كنا عايشين واهى مستورة ..

-: جدى يا سمر تعبان ومرضاش يعمل العملية غير لما اوافق عالجواز وبعدين احساس انك ليكى عيلة وسند كده حاجة تانية ..

-: عيلة سند ولا القلب دق يا بوسة !!

نظرت لها بسمة لدقائق وقالت
-: هو صحيح الواد مز وشبه الممثلين وكده بس يعنى انااااا

صمتت لم تستطع تتحدث وهى تنظر الى الارض بحزن لتقول سمر
-: انتى ايه !! أوعى تكونى يا بت مستقلية بنفسك لا دانتى بوسة بنت الاسطى شريف الى. شباب المنطقة كلها كانوا هيموتوا عليكى ..ولا نسيتى خالى شوقى ..

لوت الاخرى شفتيها لتقول
-: اه شباب المنطقة بامارة زلطة الحرامى الى كان بيسرق الورد من الأرافة عشان يجى يدهولى

-: ههههه ارافة الله يقرفة ده حتى الميتين مسلموش منه ..

-: قفلى طيب عالسيرة دى متفكرنيش المهم انا لازم امشي دلوقتى عشان رايحة مع دلال  الكوافير عوزانى اصبغ شعرى ..

-: وايه لازمته الكوافير ما انا بضربهولك كل عيد اوكسجين بيخليكى زى القمر ..

-: قولتلها ولله وانك اولى من الغريب بس هى مردتش ... يلا المهم روحى وزعى الدعوات دى زى ما قولتلك ..

أمسكت سمر بالدعوات وظلت تقلب بينهم لتقول
-: بس دول عشرة بس

-: معلش بقى ماهو سراج مرضاش يدينى اكتر من كده .. المهم ابقى علقى فرع نور عالبيت عشان الناس تعرف انى اتجوزت

-: طيب طيب متشغليش بالك انتى وروحى يالا انتى عشان متتاخريش ..

-: طب تعالى معايا هوصلك فى طريقى السواق برا ..

-: لا انا مستنية اخد الباقى الراجل من ساعة ما جه اخد الحساب ولهف ال ١٠٠ جنيه ومجبش الباقى ..

-: طيب ياختى سلميلى على خالتى نوسة والواد خشبة ..

-: يوصل ان شاء الله ...

بعد يومين ...

فى احدى القاعات المخصصة لأقامة افراح ارقى العائلات ، كانت اصوات الغناء والموسيقى تملأ الأجواء ، تجلس بسمة متأففة وهى تنظر الى سراج الذى يحتفل مع اصدقاءه بالزواج وكانه زواجا حقيقيا فيبدو من هيئته انه سعيدا قاطع شرودها اقتراب صديقتها سمر منها وهى تمد يدها تحثها على النهوض قائلة
-:مالك قاعدة كده زى الى ميتلها ميت ما  تقومى كده نرقص ونهيص شوية ..

نظرت بسمة حولها ورأت من بعيد دلال وجدها يحثنها على النهوض كذالك اقتربت هانيا ودليدا منها يمسكان اليد الاخرى لتستسلم لألحاحهما وتقوم متجهة الى ساحة الرقص ..

   التفت البنات حول العروس وهى تتمايل على انغام احدى الاغنيات   وامامها صديقتها سمر تبادلها الرقص باحترافية ..

بعد وقت ليس بالكثير كانت بسمة تجلس فى المكان المخصص لها بجوارها سراج الغاضب  لتقول
-: عجبك كده كسفتى قدام الناس ، طب كنت اصبر شوية الاغنية تخلص  دا انا كنت بحب ارقص على اخر حته ...

رمقها بضيق وهو يقول
-: اه كنت استنى لما قرونى تطلع مش كده !!

-: وانت يعنى شايفنى برقص ببدلة رقص ، ولا ماسكة السجات ..

-: جربى تعمليها وساعتها ادفنك مكانك

-: لا انا متربية اصلا عمرى ما اعمل كده ، وبعدين ما هانيا كانت بترقص اشمعنا انا اعدتنى وهى لأ ..

-: وطى صوتك عشان كلمة كمان وهخرصك خالص ..

حاولت بسمة  ان تكتم غضبها ولكنها لم تستطع لتقول
-: طط طب ما انت من اول الفرح بترقص مع اصحابك وانا مضايقتش عادى ..

-: اه انا اقرص واتنطت واعمل الى اعمله انما انتى لا ..

-: دى كوسة بقى ..

قطع حديثم الملتهب صوت دلال التى قد لاحظت نظراتهم وحديثهم المشتعل لتقترب منهم قائلة
-: فى ايه يا ولاد ايه الى بيحصل

-: يرضيكى يا دلال سراج ياخدنى من قفايا من وسط البنات ده كان ماسكنى ولا حزمة الجرجير ..

-: لا يا سراج انت كده غلطان ما كنت تسبها تفك مع البنات شوية

-: اه قوليله انا مش عارفة ولله هو ماله ومالى

اقتربت دلال من سراج قائلة
-: اهدى كده يا سراج احنا مش عاوزين مشاكل عشان انت عارف جدك ..

-: قوليله يا دلدول بدال ما هو واقفلى كده زى اللقمة فالزور ..

-: مش هتتحرك من هنا لو عاوزسن اليوم ده يعدى ..

-: روحى انتى يا دلال ده شكل دماغه فيها قفل مصدى ..

ودعتهم دلال وانصرفت لتعود الى عتمان اما سراج فضيق عيناه المشتعلة بالغضب ونظر لها نظرة قاتلة عرفت هى مخزاها لتقول مصححة
-: لا  بس يعنى طلع عندك حق .. ده حتى الاغنية مكنتش حلوة اوى انا كان نفسي ارقص على اغنية حمو بيكا بتاعة رب الكون ميزنا بميزة ..

نظر لها بتعجب ليقول
-: ميزة وهى فين الميزة دى ان شاء الله !!

-: الرجولة والنفس عزيزة ..

رفع حاجبيه وتفاجأ من سماع هذه الكلمات الى ان انهت الاغنية قائلة
-: ها ما تقوم كده قول للراجل بتاع الدى جى يشغل حاجة لحمو ولا حتى لعب باسط

-: عب باسط !! مين ده كمان ؟

-: بتاع اغنية ببص لروحى فجاة لقيتنى ..

-: لقيتك ايه بقى ؟

-: لقيتنى كبرت فجاة كبرت

-: ودى عملتيها ازاى !!

-:ما انا تعبت من المفاجأة ونزلت دمعتى ..

-: وايه الانبهار فى كده !!

 -: شكلك مش سميع طب عارف الاغنية بتاعة الغسيل الى بينقط !!

-: احيه وهى دى كمان ليها اغنية !!

-: امال أنت على فكرة فايتك كتير من الواضح انك مش زواق فالفن

-: زواق لا بصراحة انا مبهور وحاسس ان في بارقة امل جية من بعيد

اعتدلت بسمة فى جلستها لتتحدث بثقه قائلة
-: اه بعون الله انا هخليك تشوف وتسمع الى عمرك ما يخطر فى بالك ..

-: ربنا يستر دى باين لها أيام عنب ..

اقتربت جاكلين تمد يدها وتبارك للعروسين ، وقف سراج لها حتى لا يحرجها امام الضيوف لتجذبه نحوها تقبله وتقول
-: على فكرة عروستك وحشة اوى انا احلا منها بكتير

اغتاظت بسمة منها واشتعلت نيران الغيرة بقلبها لتقوم وتفرقتهما قائلة
-: وسعى كده يا حلوة العريس زى مانتى شيفاه خلاص مبقاش فاضى ..

نظرت لها جاكلين باستهزاء قائلة
-: هههه ده على اساس انه جواز بجد ما أنا عارفة ان كلو شكليات

قاطعها سراج قائلا
-: جاكلين انا معزمتكيش وطلبت منك قبل كده انك متجيش .. جيتى ليه ؟

وضعت يدها على كتفه وهى تتكلم بغنج قائلة
-: كده يا سراج يا حبيبى مش كفاية سيباك تتجوز الحشرة دى عليه ..

ارادت بسمة حينها ان تجذبها  من شعرها ولكن خافت من ردة فعل الجميع لتحاول ان تتحكم بأعصابها قليلا قائلة
-: على اساس انك مراته ، اجرى يا جيركن بعيد شوفيلك جردل على قدك ..

نفض سراج يدها بعيدا وهو يقول
-: لو سمحتى يا جاكلين اتفضلى وخلى اليوم ده يعدى على خير ..

نظرت لها بسمة بانتصار وهى تقول
-: يلا يا حبيبتى اهو قالك هوينا ، العريس للعروسة والجرى للمتاعيس

اغتاظت الاخرى منها لتقول
-: انا متاعيس يابيئة

سراج : جاكلين اتفضلى بهدوء عشان مضطرش انادى حد يطلعك برا ..

تاففت جاكلين وهى تدب الارض بقدميها وابتعدت عنهم ، بينما جلس سراج وبسمة مرة اخرى ..
-: بقولك هو الفرح ده هيخلص امتى انا حسيت ان جسمى اتخشب من القعدة السودا دى ..

نظر سراج بساعة يده ثم قال
-: ساعة وكفاية اوى لغاية كده ..

-: يا مين يصبرنى الساعة دى .. طب بقولك ايه انا جعانة ..

-: البوفيه اكيد هيفتح دلوقتى ابقى كلى بعدين ..

ونبتعد قليلا عن موضع العروسين لنجد سمر تجلس جوار والدتها قائلة
-: ولله يا ماما البت بوسة طالعة زى القمر وعريسها كمان ربنا يهنيها ..

-: اه ولله شكلهم من بعيد كده يشرح القلب ، الجدع باين عليه ابن حلال ربنا يهنيها ..

قاطعهم محمود الملقب بخشبة قائلا
-: انا جعان هو أحنا هناكل امتى ؟

-: هششش بس اسكت انت كده هتفضحنا ..

-: انا جعاااان لو مجبتوليش اكل ولله هقوم اجيب لنفسي ..

تذمرت نوسة قائلة
-: هو يا ولا انا مش مغدياك قبل ما ننزل

-: اه وجعت تانى هعمل ايه يعنى ؟؟

وقفت سمر قائلة
-: اا انا هطلع برا واشوف اى مكان اجبله منه بسكوت ولا شيبسي اهو يسد جوعة لغاية ما البوفيه يفتح ..

-: طيب روحى ومتتأخريش ..

وقفت سمر وهى تشد فستانها الأحمر حتى يصل الى بعد ركبتها لتتذمر منه قائلة
-: هو ماله الفستان ده عمال يكش كده ليه منك لله يا صفاء يا بت ام صفاء اجرتيلى الفستان وانتى عارفة انه بيكش ..
لم تلحظ تلك العيون التى تتابعها من بعيد   ...

وعلى جانب أخر يقف جاسر جوار اخيه احمد قائلا
-: هو بابا وعمى ميعرفوش بفرح سراج ولا ايه ؟

ضم احمد شفتيه قائلا
-: علمى علمك بس بيهيالى جدى اتعمد اننا منقولهمش ..

جاسر : طبعا بابا مكنش هيسكت على الى بيحصل

-: اه تخيل يعرف بعد السنين دى كلها ان جدك كان مقضيها وطلع متجوز من ورانا ..

-: هو انا ليه الوحيد الى شايف انه معملش حاجة غلط ..

-: طبعا ما هو جى على هواك . ما شابه جده فما ظلم ..

دفعة جاسر قائلا
-: طب اسكت عشان قرك ده هو الى جايبنى لورا وحاسس انى هتكشف قريب

-: تتكشف !! وهو انت هتغلب ما انت طول عمرك بتعمل المصيبة من دول وتطلع منها زى الشعرة من العجين ...

انضم مؤمن لهما قائلا
-: هو ماله الفرح ده ناشف كده ليه ، ده انا فكرت هلاقى مزز بقى والدنيا هتحلو

دفعه احمد جانب جاسر قائلا
-: اهو انت و هو نفس العينة والتفكير الزبالة

-: ده على اساس انك مبتقومش من على سجادة الصلاة نسيت البت نوال بتاعة المنيل

-: شششش الله بخربيتك هتفضحنى

-: امم لا متقلقش انت اصلا مفضوح خلقة طب فاكر لما نزلتك فى نص الليل وعملتلك حفلة فالمنطقة ..

ضحك أحمد قائلا
-: دى مجنونة ولله انا بقولها عاوزين نسهر ونتصور كام صورة كده وكنت همشي ، هى الى موافقتش كانت طموحتها اعلا من كده ..

جاسم : وانت يعنى يوم ما تروح لموزة تروح عشان تتصور !!

-: كنت عاوز اغيظ هانيا يمكن لما تشوف الصور تغير عليه لا حاجة ..

-: هههه يابنى انت اصلا ولا فى دماغها هانيا مبتفكرش فيك .. وهتبقى جوازتك منها زى انا ونجلا ..

نظر له احمد بضيق ولهانيا التى كانت تتجاهله تابعها من بعيد بضيق قائلا
-: انا نفسي اعرف هى العيلة دى دمها كده ده طبيعى ولا كان مخلوط بدم الاسكيمو ..

ضحك مؤمن قائلا
-: ولله من خلال معرفتى بيكم البرود الى عندكم ده طبيعى ده فعلا وراثة ...

لفت نظر جاسر فتاة ترتدى ثوب أحمر وهى تتعثر فى مشيتها ليقول
-: ولا شايف الموزة الى هناك دى

ألتفت مؤمن لها قائلا
-: البت صاروخ ياد انا رايح الاغيها

احمد : بس يابنى انت وهو مش عاوزين مشاكل افرد طلعت تبع حد من قرايبنا

جاسر : لا معتقدش انا اول مرة اشوفها  ..

وضع مؤمن يده على كتف جاسر قائلا
-: تعالى نلاغيها ونشوف هتدى لمين فينا الرقم ..

خرج الاثنان يتبعان سمر خارج القاعة بينما وقف احمد ينظر لهم بضيق ..

اما جاكلين التى خرجت  من القاعة وحينما ابتعدت عن الجميع اخرجت هاتفها لتحدث شخصا ما قائلة
-: نفذ  الى قولتلك عليه ؟

-: متأكدة انك مش مصدر شك

-: اه متأكدة انا روحت سلمت عليهم وسراج هو الى طردنى عشان يعد مع ست الخسن والجمال ..

-: طيب تمام ..

اغلقا الخط ووقفت جاكلين تبتسم بنصر وهى تستمع لذلك الصوت المرتفع الذى جاء من داخل القاعة تبعته خروج طوائف الناس مندفعين نحو الخارج باصوات الهلع والخوف ...

ياترا جاكلين عملت ايه وايه الى حصل جوه القاعة !!
     انتظرونى ...
متنسوش الفووت وتقولولى رأيكم ..