بنـيامـّين

2;

" ‏دعني عالق بك، أنا أحب
أنْ أموت عَلى شهادة حُبّك."

...

___
____________

كان متربع قريب ع ولد و بنت عمته مقابل التلفزيون يتابعون احد افلام الرعب ..

تنهد هاني بملل كون براء لحد الان ما طلعت ولا شافها و ميدري اذا هي موجوده بالبيت او لا ..

" عذراء " همس هاني لاخت براء يلي كانت كاعده قريب عليه و تاكل فشار " شكو ؟ " التفت هاني يمين ويسار ونطق " براء وين شو ماكو ؟ " مسحت عذراء ايدها بملابسها ورجعت نطقت " بالغرفه فوك روح شوفها و اذا ماكو تلكاها اكيد بالسطح" بفرحه كام من مكانه و صعد فوك بالختلات بدون لا احد يشوفه ..

فتح باب الغرفه بعدما طرقه ثلاث مرات و ما لكى اي رد من الجهه الثانيه ، تفاجئ هاني من شاف براء كاعدة فوك سريرها بشورت قصير و فانيلة خفيفه ..

براء ماكانت مركزه ولا منتبه لهاني بسبب السماعات يلي لابستها بس التفت ناحيه الباب من شعرت بحركة من زاوية عيونها ..

" هاني ؟ هاي شوكت اجيت ماشفتك " نطقت بعدما نزعت السماعه و سوت له مجال يكعد قريب عليها " قبل شويه اجيت " كعد و عيونه كانت تتأمل ملامحها الحلوة ..

" اي شو ماكو هل فتره ليش مختفي " نطقت براء وهي مشغوله بصبغ اظافرها " تدرين الجامعه راح تبدي قريب ف مشغول اجهز لها " شخرت بسخريه ورجعت نطقت " بربك ؟ ترى باقي شهرين مدري ثلاثه يا قريبه "

" تدرين بيه شون ميحتاج اشرح اكثر " ضحكت براء بخفه و مادرت ب هاي ضحكتها سرقت قلب هاني للمره المليون ..
اخذ هاني نفس و ملامحه تغيرت للجديه " براء " رفعت المعنيه راسها بس تفاجئت من هاني تقدم خطوه و باس خدها بخفه و ابتعد و كان منحرج لدرجه اذنه تلون بلون احمر قاتم " اني معجب بيج حيل و .. " ما كمل كلامه بسبب براء يلي باست شفته بخفه و ابتعدت " اني هم .. "

" ها ؟ " بعدم فهم نطق هاني كونه ما استوعب الي صار قبل ثواني " اني هم معجبه بيك وجنت خايفه اكلك " كانت تلعب باطراف اصابعها يلي سحبها هاني وباس اطرافها " يصيري الي " ضحكت براء و هزت راسها " اني الك اصلا "

تزامن ويه اقتراب هاني اغلقت براء عيونها منتظره يلي راح يسوي هاني بس فجأة الباب انطرق و بقوة مسبب فزع لهم  ، قام هاني و فتح الباب و المفاجئ كانت محد بره ..

استغرب هاني و التفت يمين و يسار حتى يتأكد بس للاسف ما لكى اي احد " هذا اكيد منهل " نطقت براء بغضب و قامت غلقت الباب بس هل مره بالمفتاح ..
التفت ناحيه هاني و همست " حتى محد يزعجنا " بعدما كملت جملتها سحبته لفراشها و كانت توزع بوسات ع وجه بدون لا ينسى هاني انُ هو هم يبادلها ..

ايده كانت تتحسس احد اثدائها من فوك الفانيله بدون حياء بينما ايده الثانيه كانت تشد خصرها ناحيته ..

ابتعدت براء ثواني حتى تتنفس مما جعل هاني ياخذ فرصة ينزع بلوزته بس ع غفلة منهم النافذه يلي تطل ع الحديقه انفتحت و بقوه شديدة مصدره صوت عالي يصعب تجاهله ..

بتعب قام هاني حتى يغلق النافذه بس قدر يلمح قطة بلون اسود غامق و عيون ذهبيه ترمقه بنظرات حاده خلت بدنه يقشعر غير عن كونه تذكر بأنه شاف مثلها قبل كم ساعه ..

" كلت لك سوالف منهل هاي ! " عدلت ملابسها و طلعت من الغرفة بخطوات غاضبه اما هاني كان بعده مركز بعيون القطه و شون اكو شي بيها جاي يجذبه لها بشكل مو طبيعي لدرجه كان وده يضل طول الوكت يتأملها ..

استيقظ من شروده بعد ثواني و القطه ماكانت موجوده و كأنها تلاشت ع الرغم كان صافن و مركز عليها ..

نزل للصالة و شاف براء كاعده و تعابير الاستغراب ع ملامحها لهذا تقرب منها و همس " شبيج ؟ " رفعت اصبعها وأشرت ع اخوها الصغير منهل وهو نايم بحضن اخوها الجبير " عصام كال منهل كان نايم من ساعتين و ما تحرك ابد "

" اي و يعني ؟ " عدم الفهم كان واضح ع ملامح هاني مما جعل براء شد شعرها بشكل خفيف " مدا تفهم !! " كان راح يرد عليها بس دخول ابن عمه قاطعه ..

  " هلا شباب شلونكم ، شونج براء ؟ " سحب ايدها وكان راح يحط بوسه عليها بس براء وخرت و نطقت ببرود " زينه " ابتسم ابن عمهم بأحراج و كان راح يكعد قريب ع عصام بس غير رأيه من شاف هاني يشد ع ايد براء ..

" شو وخر ايدك " خاطب هاني بنبرة جافه مما سبب انزعاج له " واذا ما وخرت شراح تسوي ؟ "
ضحك بعصبية و سحب ايد هاني وابعدها عن خاصة براء " وكتها اني راح اوخرها " برفعة حاجب نطق هاني " لا والله ؟ "

" اي والله " تقرب منه لدرجه صدره احتك بخاصة هاني وهنا تدخل عصام و ابعدهم عن بعض "هاني و جابر !! بدون مشاكل خلص كل واحد يكعد مكانه صدك جذب " رجع هاني و وكف قريب ع براء يلي شدت ع ايده و تخفف عنه و هذا الشي جعل جابر يفقد اعصابه و ينطق بكلام سام مثله " شي كلش طبيعي من خنيث مثلك ينسحب هيج بسرعة .. "

التفت هاني ناحيته و ملامح البراءة كانت عليه " خنيث ؟ وين بالضبط؟ " بنظره مليانه بالسخريه رد عليه جابر " وين يعني ؟ وجهك كله " كان متوقع انه استفزه بس للاسف الوضع كان عكس " وجهي ؟ اه ريحتني عبالي داخلياً مثلك "

صك ع جابر ع اسنانه بغضب و توجه ناحية هاني يلي كان بعده يباوع له بنفس النظرات " هاي عليمن ؟! " رفع هاني كتفه ونطق " عليك ؟ "

شد ع ياخة هاني و كان راح يضربه بس عصام امسك ايده و حاول يبعده عنه " هش خلص كلت كافي " سحبه بعيد عن هاني و كان راح يطلعه من الصالة
 
" براسك خير تعال واجهني " للمره ثانيه حاول يستفز هاني يلي كان بارد حيل وياه و ما مهتم اصلا الا ببراء ..

" مو كافي ؟ " نطقت براء بعصبية ودفعت كتف جابر يلي شد ع قبضته بقوة " سالفه بينا مالج دخل بيها " دفعت كتفه مره ثانيه ورجعت نطقت " الي دخل !! كل شي يخص هاني الي دخل بي ! لاني احبه .. "

الكل شهق بدراميه زايده الا هاني يلي انصدم من اعترافها كدام الكل لانه ما كان متوقع ولا واحد بالميه انها تحجي الاحد حتى لعذراء ..

" عرفت تلعبها صح يالخنيث !! " وجه جابر قبضته ناحيه فك هاني يلي كان بعده منصدم من اعتراف براء ..
" هاني !! " صرخت براء بأسمه من الارض استقبلت جسمه بمثالية ..
للمرة الثانيه حاول عصام يسحب جابر بعيد بس بدون فائده كون هاني بدأ يتصرف بالمثل و تهجم ع جابر ..

" هاني هيج رجاءاً !! " صرخت براء بخوف وهي تشوفهم يتبادلون اللكمات بينهم بدون اي خوف او حتى تعب ..

و همه يتعاركون دخل زوج عمتهم يلي كان بالشغل ع الرغم تأخر الوقت " هاي شجاي يصير هنا بحق ابن مريم !! " صرخ بصوت عالي لدرجه ابتعدو كل من جابر وهاني عن بعض بخوف " سرسريه صوتكم للشارع !! شنو هاي مسوين حلبة مصارعه بنص الصاله !! كل واحد لبيته يلا ماريد اشوف جهرة احد هنا " بعد صراخ زوج عمتهم بغضب محد تجرأ ينطق بكلمة او يعترض لهذا الكل شق طريقه خارج البيت ..

" اسف شباب ما ردت هيج يصير " نطق عصام بأسف و سخر هاني بكل وضوح " الي لازم يتأسف هو هذا ابو راس " كان راح يتقدم جابر بس دفعه عصام ونطق " خايبه دكافي صارت بلا ملح "

" ما سمعته الفرخ شكال ! "

" انت الفرخ احترم روحك ابو راس "

" انجب خنيث  "

" لا تحاول تسميني بالقابك انت وراسك هذا مال طابوكه توكع عليه بحق المسيح و نخلص منك "

" دسكت ابو ط*ز "

" الحجي ما يفيد ويه امثالك " نطق هاني و راح لبيتهم بدون ما يودع احد ..

كان يمشي بأمان الله وهو متألم من خده و شفايفه يلي انجرحت بس جفل فجاة من حس شي لمس رجله من جوه لهذا نزل راسه حتى يشوف السبب وكانت قطه بلون اسود فحمي تباوع له بعيونها الذهبيه ..

" هاي هم انتِ ؟! شكو شرايده هسه ؟ " نزل لمستواها حتى يخوفها بس تفاجئ من مسحت راسها بأيده ..
" هاي شنو هاي !! اول مره اشوفج بزون ارعن ما يخاف ، المهم عوفيني بحالي لزكي بشخص ثاني اوك !؟ " اشر عليها باصبع السبابه و الصدمه هنا كانت من مدت لسانها و لعقت اصبعه ..

ابعد ايده بقرف و نطق بصوت عالي " يع !! وخري يا خايسه !! " قام بسرعه و ابتعد عنها ..

رجع يمشي لبيته و كان يلتفت بين كل ثانيه و الوراها حتى يتأكد انُ القطه مو وراه بس للاسف كانت تلحقه بخطوات صغيره و لطيفه ..

" اهو شون ورطه هاي " تأفأف بانزعاج بس وكف من خطر بباله فكره غبيه وهي انو يركض حتى يضيعها ..

و بكل غباء ركض هاني بسرعة للبيت و اول ما وصل شافها تنتظرة كدام الباب اصلا ..

" هاي شون سالفه عقيمه " بضجر نطق و حاول يدخل للبيت بس بدون فائده كونها كانت لازكه بي و ترفض تعوفه ..
بـ هاي الاثناء اخو طلع بعيون منتفخه و حالته يرثى لها بسبب حزنه ع كلبه " وين رايح ؟ " نطق هاني و رد عليه شيفان بدون ما يباوع له حتى " مالك دخل " اومئ هاني كونه يدري وضعه شون مدهور فـ مايريد يضغط عليه ..

" منو سوه بيك هيج ؟ " سئل شيفان بعد دقايق وهو يشد رباط حذائه " تعاركت ويه جابر " توقع هاني انُ شيفان راح يتعصب و يتعارك ويه ابن عمهم بس للاسف اخو كان له رأي ثاني " سلمت ايده " قلب عيونه بأنزعاج ونطق " ترى مو اني الي كتلته ! "

" صدكت حبيبي " نطق شيفان و طلع بدون لا يسمع رد هاني يلي تنرفز حيل و دخل للبيت ..

محد كان موجود غيره لهذا اخذ المنشفه من غرفته و توجه لحمام اهله بغرفتهم كونه يحتوي ع بانيو ..

فتح مي الحار داخل الحوض و بدأ ينزع ملابسه وهو يدندن بلحن اغنيته المفضلة ، سحب كل نوع كدامه من الشامبو و فرغه بالحوض ..
تنهيده عميقه طلعت من بين شفايفه بعدما دخل بالحوض ..

غلق عيونه كان يحاول يسترخي و ينعم بهاي اللحظه النادرة و بدون اي وعي منه غفى داخل الحوض ..

كان يمشي داخل مكان مظلم يحاول يلكى مخرج حتى يطلع بس بدون فائدة كونه ابداً ما كان يخلص كلما مشى ..

مايدري كم من الوقت مر وهو يحاول يطلع بس حس بانها ايام من طولها ..

كدر يلمح ضوء خافت من بعيد لهذا بدأ يركض عسى ولعلَ يلكى مخرج من هل مكان يلي ماله اي نهاية ، كلما كان يقترب الرؤيه كدامه كانت توضح ..

شاف شخص واكف كدامه و ايده كانت ممتده و بداخلها شموع ذايبه لدرجه كانت ايده يلي تحترق بدالها ..

رفع هاني راسه و دقق بملامح الشخص يلي كان يتأمل ايده يلي تحترق بهدوء ، اقترب منه ورفع ذقنه ..

رجع وره بصدمه من شاف الشخص نسخة منه بالضبط بس الحزن كان مخيم ع ملامحه و الدموع كانت ماخذه مسارها ع خده ، حاول هاني ينطق بس بدون فائده ما كان عنده اي حجي يكوله ..

فتح الشخص ثغره ونطق كلمة وحده بس وهي " حياتنا " عدسة عيونه توسعت لدرجه البياض يلي بأطرافها اختفت و دموعه تلونت بلون الاسود ..

شهق هاني و فتح عيونه بقوة وكان بعده بالحوض مما جعله يتنهد براحه من ادرك اخيراً الي شافه كان مجرد حلم لا اكثر ..

تجمد من شاف ظل شخص طويل كدامه واقف بطوله الفارع يلي واصل لسقف الحمام ..

مشى ناحيته و شد ع ركبة هاني بقوة مانعه من التنفس و الحركة ..
بدأ جسم هاني ينتفض داخل الحوض وهو يحاول ياخذ انفاسه يلي تدريجياً كانت تتلاشى ، غلق عيونه بقوة عسى ولعل يكون الي جاي يمر بي حالياً مجرد حلم بس قشعر بدنه من سمع همس قريب ع اذنه ينطق بثقل " انتَ ملك لي " ثواني و فقد هاني وعيه بسبب الخوف و قلة الاوكسجين ..

كان راح يبتعد بس تراجع وحط بوسه ع اذنه ورجع نطق " ملك لي لـ بنيامين مراح اسمح لاحد ياخذك مني .. "

-

فتح عيونه و اول شي قابله كان سقف غرفته الابيض ، مايدري كم من الوقت مر وهو فاقد للوعي بس تأكد بأنه طول الليل لان الشمس اشرقت ..

طلع من غرفته و مشى ناحيه المطبخ بعدما سمع صوت امه وهي تغني بصوتها العذب و سئلها " منو اخذني للغرفه ؟ " التفت ناحيته و نطقت بابتسامة دافيه " شيفان " استغرب بشدة كون اخو قبل لا يطلع شبه تعارك وياه ..

رجع لغرفته و غير ملابسه كلعادة كدام المرايه بس لفت نظرة اثار خنق حول رقبته و كانت تميل للون الازرق و البنفسجي ، لمسها بطرف اصابعه بس ما حس بالالم عكس كدمات وجهه يلي كانت تأذي بدون ما حتى يلمسها ..

لبس ملابسه و غسل وجهه بالمغسله بره الغرفه و بعيونه كان يدور ع شيفان يلي بهيج ساعه اصلا يكون كاعد ..

رجع لغرفته حتى ينشف وجهه و بدون اي وعي نطق بأسم ما سمعه بحياته وكان ' بنيامين ' ما يدري اصلا سبب نطقه لهيج اسم ما مر عليه من قبل ابداً ..

التفت ناحيه شباك غرفته من سمع صوت طرق خفيف لهذا بسرعه فتحه و كان اخو شيفان ..

" شدسوي؟! " سئل هاني بأستغراب وهو يشوف اخو يدخل وكأنه حرامي ..
" يعني شداسوي بنظرك ؟؟؟ ما تسكت بشرفك " نزع حذائه و رماه جوه سرير هاني و بدأ يبدل ملابسه " وين جنت ؟ " نطق هاني وهو يشيل ملابس اخو الوصخه من الارضيه " جنت يم صاحبي " عقد هاني حواجبه ورجع نطق " اوكي ، زين ليش داخل من الشباك ؟ "

" حتى امك و ابوك لا يشوفوني ! " نطق شيفان بحدة ناحية هاني يلي انزعج حرفيا " و شكو بيها !؟ "

" لاني مراجع طول الليل يا اثول يا بهيمه ! شكد تسئل لخاطر الله " طلع من غرفة هاني و توجه لغرفته مثل الحرامي بينما هاني كان واكف نفس مكانه و الصدمه مسيطرة عليه ..

" اذا هو مجان بالبيت لعد منو جان !؟ "

...

___
____________

سلام كايز 😔🤍

شونكم شخباركم ان شاءالله بخير 😔👈👉🤍

الزبدة كتبت هذا البارت مدري شون 🥲 واحسه لعبان نفس بس مشوها هل مره 😔💔

البارتات الجايه كذلك مراح تتعدى ال٢٠٠٠ كلمه لان احس راح تصير لعبان نفس هم اذا بارت طويل واحداثه بيض ..

بخصوص بنيامين و شكله 🌚 مراح احط حالياً اي صورة الى ان يطلع بهيئته البشريه لهذا ابقو تخيلوا كـ معزه او بزونه سوده 🥲 ..

المهم اشوفكم بعد كم يوم ببارت الجاي
كونوا بخير 🤍🤍..