في عشق الخيال

البارت الثامن

النجوم اخواتي في الله 🌟

يا صديقي إنّ قلبك ما هان عليّ ولا مرة ، وإنِّي على استعداد تام أن أجمع كُل بسماتي واستودعها في صدرك بكُل ما يملُكه صدري مِن رحابة.

اللهم صلي و سلم على نبينا محمد

في صباح اليوم التالي

بعدما دلفوا للنوم عند جوري

جوري بصياح: اصحيي يا بت انتي وهي هنتأخر

نهضت نغم بفزع: ينهاري فيه ايه

ثم نظرت جوري الى مليكة التي لم تبدي اي ردة فعل بل ظلت على حالها

جوري: مليكة اصحي يا بت ايه ياربي ده مصاحبين باندا

نغم وهي تهزها بعنف : مليكة اصحي

جوري:لا هي كده مفيش فايدة فاكرة عمر كان بيعمل ايه في نور

نغم بعدم فهم:عمر مين!

جوري: عمر اللي في رواية بنت الشيطان

نغم:ايوا افتكرت
ثم تابعت بخبث: المطبخ منين

ثم ذهبوا الى المطبخ ليحضروا قطع الثلج وعادوا لتلك المومياء ووضعوها في ثيابها

نهضت مليكة بفزع وهي ترقص مثل الهنود الحمر

مليكة بحنق: ايه ده في حد يصحي حد كده البني ادمين بيصحوا بعض بهدوء مش كده

ظلت جوري ونغم يضحكون عليها وعلى رقصها اللولبي

نغم: البني ادمين الطبيعين بيصحوا بعض بهدوء إنما الباندا بيصحوا كدا

جوري: روحي غيري هدومك وتعالي هنلبس عندي

دلفت الى المرحاض لتغير ثيابها

ثم ذهبوا لارتداء باقي ثيابهم عند جوري

وحان وقت اللحظة المنتظرة

مليكة : هنلبس طرحة ايه

نغم : نبيتي زي ما قولت

مليكة:لا الكاشمير احلى

نغم بإصرار: نبيتي
مليكة بعناد : كاشمير

نغم بتذمر: جوري أنهي احلى نبيتي ولا كاشمير

جوري بحنق :قسمًا عظمًا لنلبس كلنا طرحة سودا

🪄🪄🪄 سبحان الله وبحمده سبحان الله العظيم

جوري بانتصار: شايفين، شايفين الطرحة السودا هتاكل من وشنا حتة ازاي بلا نبيتي بلا كاشمير بلا قرف

مليكة بقهرة: ربنا على المفتري

نغم بحنق: يا ظالم ليك يوم

جوري : بس يابت منك ليها يلا عشان نروح الكلية

نغم بسخرية: كلية مين يا ام كلية انهاردة ستة أكتوبر اجازة

مليكة: صح انا فاكرة إن الدكتور قال المعاد 8 الصبح

جوري : يبقي نفطر ونروح على الشركة دي

ثم خرجوا ليتناولوا الطعام مع عائلة جوري

إياد : انا خايف على الشركة دي منكم والله

مليكة: لي يا اخويا قصدك ايه

اياد ببرود: واضحة قصدي أنكم بوم

نغم بتذمر : بوم في عينك واحد أحول صحيح ما تشوفي الغتت ده يا جوري

جوري بكل هدوء: بس يا بتاع المانجا

إياد بضيق : متجيبيش سيرتها ادامي دي جزاتي اني حكيتلك

جوري بخبث: مش انا بومة اللي متعرفوش بقى ان البوم فتان، يا ماماا تعالي شوفي ابنك بتاع ألمان..

وضع إياد يده على فمها سريعًا

مليكة بضحك: لا ده انا اجيبلك مانجا كل يوم بقى

نغم بأسف مصطنع: مانجا يا إياد اخرتك مانجا اخس

إياد بهدوء : مجانين كأني قاعد في العباسية انا قايم اجهز للكلية عشان المشروع خلو بالكم من نفسكم مش عاوز هزار في الشركة اتدربوا واثبتوا أنكم مجتهدين بس، سلام

أنهى الحديث ودلف إلى غرفته

جوري: يلا ننزل احنا كمان يدوبك نلحق

اتجهوا لإرتداء احذيتهم

نغم : تخيلوا كدا نروح نلاقي المدير الثلاثيني الوسيم زير النساء قاسي القلب اللي بيقولوا عليه في الروايات ده

مليكة بضحك: واضربه بالقلم

جوري من داخل احلام اليقظة: فا يحطني في دماغة عشان ينتقم مني

نغم بهيام مصطنع: ونحب بعض
مليكة : و

فجأه جائت والدة جوري

والدة جوري : لا (و) دي بقى عندي و هتاخدوا بالشبشب يا جزمة منك ليها

انهت جملتها وركضت خلفهم بخفها المنزلي

جوري بتوتر: احنا قولنا تخيل تخيل ايه مابتتخيليش

والدة جوري: لا منا بتخيل اهو اني بعمل من فخادكم شاورما

نغم بتذمر: ماما عنيفه اوي يا جوري

مليكة بضحك: انا عاوزاها شاورما لحمة يا طنط مبحبش الفراخ

وركضوا سريعًا للخارج وهن يضحكن بشدة

مليكة بضحك: نرجع بقى للثلاثيني

جوري ونغم بخوف: لااا

ثم بالطبع لن يذهبوا الى اي مكان دون شرب عصير القصب

مليكة: صباح الخير يا عم متولي

عم متولي : صباحكم نور يا بنات

جوري بإستعجال: الحقنا بقى بتلاتة قصب وسط ل احسن اتأخرنا على التدريب

أحضر لهم عم متولي العصير

نغم بإستمتاع: هو ده الترطيب اللي على حق لا تقولي نيفيا ولا دوڨ

انتهوا من شرب العصير ثم اتجهوا الى وجهتهم
.
.
.
.

عند كنزي كانت تحاول الاتصال بندى صديقتها لتأكيد على الخطة

كنزي بصياح: اصحي بقى اصحي مش معقول كده

دلف سليم الغرفة

سليم: مالك يا كنزي بتزعقي ليه

كنزي بتوتر:لا ولا حاجه بحاول اصحي ندى عشان عايزاها

سليم بشك: من امتى وانتي تصحيها! مش مرتاحلك هتهببي ايه

كنزي ببرائة مصطنعة: ولا حاجة يا سليم انا بعمل حاجة اصلًا

سليم بعدم تصديق: هحاول اصدقك عمومًا انا رايح الشركة عاوزة حاجة

كنزي مقلدة للوجي: ميرسي يا سولي

سليم بتقزز: هو انا اخلص منها في الشركة الاقيك هنا ارحموني بقى

ثم تركها وغادر وهي عادت لمحاولة الاتصال بـ ندى واخيرًا أجابت

كنزي بغضب: انتي متخيلة اتصلت بيكي كام مرة

ندى بنعاس: انا الحمد لله، انتِ عاملة ايه

كنزي بسخرية وهي تقلدها: رني عليا بس وهتلاقيني رديت على طول انا اصلًا نومي خفيف

ندى: مكنوش اربعة وعشرين رنة يعني ها قولي عايزة ايه

كنزي بجدية:اتصل بيه ولا لاء

ندى بخبث: ماشي اهو حتى تقلقي نومه

كنزي بخبث مماثل : ماشي اقفلي اكلمك على اللاب ڨيديو واتصل عليه من التليفون

بالفعل قامت كنزي بمحادثة ندى ڨيديو من على جهاز الابتوب وقامت بالرنين على إياد

كنزي بهدوء: السلام عليكم اذيك يا إياد

إياد بأستغراب: وعليكم السلام انا كويس الحمد لله

ثم تحول

إياد بغضب مصطنع ليتشاجر معها: ايه اللي عملتيه آخر مرة ده في حد عاقل يعمل كدا مش خسارة الكتب دي

كان يتوقع رد فعل عنيف منها ولكن صدم مما قالتله

كنزي ببرائة: معلش كنت عصبية شوية بس أوعدك هشتري الكتب دي واقرأهم كلهم زي ما قولت أهم حاجة المشروع ولا ايه

اياد بأستغراب:انتي كويسة

كنزي : اه هيكون مالي يعني
عاوز حاجة تاني

إياد بشك: لا

كنزي بأدب : طب ياريت لو عاوز حاجة تكلمني و تطلبها على طول وانا تحت امرك المهم نجاح المشروع

وعلى الناحية الاخري

ندى بهمس: قوليله انك هتقابليه انهاردة عشان المشروع عشان تنفذي الخطة

كنزي بهمس تبعد الهاتف عنها: ششششش هيسمعنا

كنزي: هنتقابل انهاردة عشان المشروع مش كده

اياد : ده طبعًا مفيش يوم راحة، هنتقابل اخر النهار، سلام

ولم ينتظر حتى اجابتها واغلق المكالمة وهذا جعل كنزي تستشيط غضبًا

كنزي بغيظ: مش طايقاه غتت كده معرفش هفضل اتعامل معاه كده لحد امتى، بتخيله في عقلي وانا بقتله بقلم رصاص

ندى بضحك: اجمدي كدا كلها كام ساعة يعني

كنزي بقلق :تفتكري سمعنا
ندى : لا مظنش
.
.
.
عند إياد : مهو يأما اللي حصل ده تهيؤات لأما المانجا حمضانة
مش دي بنت المرشدي اكيد لا لا انا لازم احرص منها السلام الالهي ده وراه مصيبة اكيد
.
.
.
سبحان الله وبحمده سبحان الله العظيم

_عند الشباب

دلف سليم فجأة على يزن ومازن

مازن بسخرية: تؤتؤ في حد يدخل كدا من غير ما يخبط ايه قلة الزوق دي

يزن بضحك: ايه شغل الأوباش ده يا سليم مش تربيتك خالص

سليم بغيظ: خلاص خلصتوا تحفيل خلونا في المهم

مازن: قول ياخويا قول اطربني

سليم: اللي اسمها لوچي دي مش هتسيب البنات الجديدة في حالهم مانتم عارفينها

يزن: انا مش عارف اترمت علينا من انهي داهية مكنتش جبتها يا سليم

سليم: مانتم عارفين اني مقدرش ازعل امي وكمان اتلككت طلع السي في بتاعها حلو ومبقاش ادامي حجة

مازن: خلاص هي اكيد فترة وهتمشي لو مدتهاش وش

سليم:يارب بقى، المهم شكلي حلو

يزن بإستغراب: مانت عارف إن دايمًا شكلك شيك وحلو اشمعنا بتسأل انهاردة

سليم بتوتر: اصل جوري من ضمن البنات الجديدة

مازن بسخرية: قول كدا من الأول اتاريك خايف على البنانيت من لوچي، أو اسمها خايف على جوري من لوچي خليك واضح يا سوسة

سليم بتهرب: بس يازفت يلا انا هروح أجهز عشان اقابلهم

يزن ومازن بضحك : اسمها عشان اقابلها

خرج ولم يرد عليهم و ذهب الى مكتبه لاستقبالهم
.
.
.
على الناحية الأخرى
كانت تتجول لوچي بملل في الاروقة لا تجد أحد تتحدث إليه جميهم حمقى بالنسبة لها توقفت فجأة حين لمحت فتاتين يبدوا الغرور على ملامحهن فتجهت اليهن

لوجي بتكبر: انتو مين

سندس بغرور مماثل : احنا المتدربات اللي اترشحنا عشان نتدرب في الشركة دي (شاورت بأحتقار)

روميساء وهتي تمضغ علكة بطريقة مقززة: ايه المكان ده مفيهوش حد ستايل خالص

سندس: لاحظت مفيش غيرها

قالت وهي تشاور على لوچي

لوچي بخبث: انا لوچي بشتغل هنا

اومئت لها سندس بغطرسة

سندس: انا سندس ودي روميس..

صمتت سندس وهي ترى رجل وسيم يمر برفقة صديقه امامهم

سندس : شوفتي القمر ده يا روميساء

روميساء بضحك: لا شوفتي المز اللي جمبه

لوچي: دول مازن ويزن شركاه هنا

سندس : لا كدا الشركة احلوت في عيني مازن ده بقى يخصني

روميساء : و يزن ليا انا

لوچي: شكلنا هنتسلى اوي انا بقى سليم يخصني

سندس بخبث: قولتلي اسمك ايه

لوچي : لوچي لو عايزين مازن ويزن يبقوا ليكم يبقى لازم نتعاون لأنهم صحاب جدا

روميساء: اتفقنا

لوجي : بصوا هتعملوا ايه

وأخذت تعطيهم التعليمات وتناقش معهم خطة من خططها الحقيرة للإيقاع بمازن ويزن
صدق ما قال حقًا الطيور على أشكالها تقع

لوجي: فهمتوا

سندس و روميساء بخبث: فهمنا

قاطع حديثهم دلوف جوري ونغم ومليكة

لوجي :مين الاشكال اللي دخلت دي

سندس بحقد : دول اللي هيدربوا معانا مليكة ونغم وجوري ميغركيش شكلهم دول، دول بياخدوا كل حاجة ببرائتهم ومثاليتهم المزيفة بياخدوا الاحترام والاهتمام عشان قال ايه محجبين بقى واحنا بنقف نتفرج عليهم

.
.
.

في الجهة الآخرى

وصلت فتياتنا إلى تلك الشركة واخذوا يتطلعونها بذهول حتى وجدوا سندس وروميساء يقفون بعيدًا وينظرون إليهم بشر

نغم: يافتاح يا عليم يا رزاق يا كريم

مليكة بسخرية: لا ومعاهم واحدة شكلها انيل منهم يا ستير

جوري بهدوء :عيب يا بنات ملناش دعوة بيهم خلينا في حالنا زي الكلية تعالوا يلا ندخل

ثم توجهوا لقاعة الإستقبال بجانبهم

رأيكم؟

سندس وروميساء هيوصلوا لمازن ويزن ازاي؟

إياد هيتصرف ازاي مع كنزي؟

البنات هتعمل ايه مع الحربايتين والعقربة

يتبع