مساء الحب
عدنا والعود احمدُ ♥️♥️......
#فينثيدلين
#سما_العبيدي
#البارت_الاول
أمشي ... أركضُ ....أهرولُ
أصعد ...أنزلُ
أصرخ...أنادي ...أولولُ
أهوي ...أخفُ ....أجفُ
أسيرُ ....أطيرُ
أرى ....لا أرى
أتعثرُ
أصفرُ.... أزرقُ.... أخضرُ
أجهشُ... أعطشُ
أتعبُ....أسغبُ
أنسى.... أتذكر
أسمع.... أبصر
أهذي ....أصرخ
لا استطيع
أئن ...أجن
أضل ...أسقط
ادمى ...ويغمى علي
......................................................................
بأحد ليالي الشتاء الباردة
بأحد البيوت العراقية الدافئة
الذي يحوي العديد من القصص والروايات لأفرادها
كل منهم لديه رواية
يسردها بعد انتهائها
لاولاده
لاحفاده
لاصدقائه
أو يمكن لأحد الغريبين الذي يلقائهم في الطريق
وفي نهايه الحديث تخرج من صاحب الرواية تنهيدةٌ عميقه تحمل في طياتها الكثير من الألام والأحزان
خلف كل باب في هذا المنزل قصه
منهم من فقد حب طفولته بسبب العادات والتقاليد
منهم من أنجبر على زواج بامرأة لم يلتقي بها قط
ومنهم من اختفت الالوان في حياته وانسرقت احلامه وانتهت أماله ..........
كعدت من النوم على صوت الرعد فتحت عيوني انضرب الضوء بعيوني غمضتهن قوي ونزلت رجلي بالأرض تسللت برودتها لاعماقي وسرت بجسمي رعشه خفيفه
باوعت ليميني مموجودة بفراشها وينها ليش ماحسيت عليها من كامت ...توجهت ناحية الحمام وطرقت عدة طرقات خفيفه وبصوت خافت حجيت
_حبيبتي انتي هنا
ماجاني رد فتحت الباب بهدوء وباوعت داخل الحمام مموجودة خفت ولبست البلوز بسرعه وطلعت من الغرفه توجهت لانحاء البيت تصنعت الهدوء وهمست
_أوج .... وينج حبيبي
دورت مالكيتها بالطابق الي احنا بي نزلت لجوا ونفس الشي التقيت بوالدي جان طالع من غرفته وبيده سجادة الصلاة
_يابة شفتلي أوج
_ليش وينها البنت
_فزيت من النوم ماهي
_لا اله الا الله شوفها خاف برة
طلعت برة ادور عليها بالحديقه ماكو رجعت دخلت جان والدي مكعد امي واغلب الي بالبيت كاعدين مثل كل يوم وقت صلاة الفجر حجيت وانه التقط انفاسي بصعوبه
_اي واحد يلكاها يحجي بهدوء وياها ولا يفززها تمام طالع بالسيارة يمكن تكون طلعت برة البيت
بهذه الاثناء صاح زياد من فوك
_موج هاي هي بالسطح
ركضت لفوك وتلافيت كلام امي المعتاد عنها وصلت الها ارجف جانت الدنيا ترعد والمطر قوي كلش تقربت بهدوء وحجيت
_حبيبتي أوج شتسوين هنا
التفتت عليه وهي واكفه والمطر مبللها ابتسمت وكالت
_ابنا كان بدو يشوف المطر طلعت معو
_تمام هسه خل نفوت لان باردة وهسه يتمرض يلا تعالي
كملت كلامي وتقربت عليها مديت ايدي الها ضلت تباوعلي بارتباك وتردد مسكت ايدي واستندت عليها سحبتها ومشيت بيها للداخل
_كان بدو يشوف المطر وطلعتو
_تمام كلتيلي .... بس لازم نفوت قبل لا تبردون ثنينكم وتتمرضون وازعل عليكم
مانطت ردة فعل لكلامي دخلتها الغرفة وقربت عليها الدفاية وطلعت بطانية من الكنتور غطيتها بيها ونشفت شعرها بالمجفف
توجهت للكنتور طلعت ملابس وتقربت عليها
_هاي ملابس اخذيهن وغيري ملابسج وانه طالع بس تكملين ناديني
_ابنا هلق يبرد غيرلو ملابسو
هزيت راسي بقبول واخذته من ايدها ودخلت للحمام انهمرت دموع حارة على وجهي فتحت المي البارد وصرت اغسل عسى مارتاح واسيطر على نفسي كدامها
بعد مرور دقائق من الصراع النفسي طلعت بابتسامه مزيفه جانت مغيرة ملابسها شلت الملابس المبلله وخليتهم بالغساله ووصلتها للفراش
_شنو رأيج تشربين زهورات
_مابعرف
_نازل اسويلج
طلعت منها ونزلت لاكتني امي كاعدة ومبين عليها الموضوع شاغل بالها ولازم تنطي رأيها بي تظاهرت عدم اهتمامي لوجودها ودخلت للمطبخ لحكتني
جنت لاهي عنها بالي جاي اسوي
لزمت ايدي ودارتني عليها انهدمت قواي وحضنتها وبجيت مسحت على راسي وكالت
_شلون يعني تموت نفسك ولك انت هم تمرضت انت هم صرت مثلها وجاي تتطبع اطباعها ولك يمه اسمع كلامي ونفذ الي اكوله هذا الشي لمصلحتك ومصلحتها
عصرت عيوني وباوعت للطباخ مو معير كلامها اهتمام
تنهدت بضيق وفاركت المكان كملت الي نزلت عليه وصعدت لفوك دخلت الغرفه وحجيت بصوت خافت مثل ماتعودت
_هذا اطيب كأس زهورات لاحلى فتاة سمراء بالعالم
اخذته مني وشربت منه شويه وذبته بالطاوله المقابيلها
_بدي نام
_يلا
اصطحبتها للسرير ونيمتها عليه وغطيتها رحت للباب قفلته وخليت المفتاح بجيبي بعد مستحيل أأمن عليها باليل كل يوم الوضع يسوء اكثر
نمت بالجهه الثانيه للسرير ابتعدت بطرف السرير وقوقعت على نفسها وهمست بما اعتدت على سماعه
غمضت عيوني بعد ماحسيت لسانها ثقل وبطلت تردد هالجملتين مثل كل ليله تمر علينا كدرت اغمض عيوني اخيراً ولكن گلبي صاحي وحارسها
صحيت على المنبه الي عادتاً ماسمعه بسبب صوته الخافت تحركت بهدوء اخذت كلشي خاص بيه وطلعت برة الغرفه لعدم ازعاجها بتحركاتي
جهزت نفسي للشغل وطلعت ومر الوقت بين خوفي وبالي عليها وبين شغلي واعمالي الي هملتها من ذاك اليوم لهذا يومنا
رجعت للبيت سلمت وسئلت عنها الوالدة كالت ماطلعت من غرفتها ابد استغربت تصرفها وخفت لا يكون مسويه شي جديد
صعدت الغرفه فتحت الباب بهدوء ودخلت كانت شاردة بأثر فوق عظمه الترقوة تماماً الي لحد الان ماعرف شنو سببه
جانت تسحب شعرها وتغطي الاثر الي بنظرها شوهه جسمها ولكنه ماسبب الا بزيادة جمالها واضاف الها شيء يميزها عن جميع النساء اضافه لوحمتها
أصدرت صوت بخطواتي لحتى تنتبه باوعت علي من المرايا وضلت تسحب بشعرها بارتباك وحيرة من امرها مو عارفه شلون تخفي هالاثر الي خرب جمالها
تقربت وكفت فوك راسها وطبعت قبله خفيفه عليه وهمست
_مازداكِ الله الا جمالاً وفتنتاً بهِ
هزت راسها تنفي كلامي وهمست بحزن
_منظرها مقزز بعرف انك بتتقزز منها وتحكي هيك لحتى لا تجرحني
كومتها من ايدها ودرتها عليه باوعت بملامحها الذابله التعبانه وحجيت
_ابداً و بـ دليل على كلامي
بعدت شعرها وطبعت قبله خفيفه بالمكان المشوهه
رجفت وابتعدت عني بارتباك وحيرة من امرها تلافيت الموقف بطريقتي وحجيت
_ليش مو نازلة اليوم جوة ولا ماكله شي
_ماريد
_ليش
_شفت امك تخليلي سم بصحني امتنعت عن الاكل بدها تقتلني
_واذا اني جهزتلج الاكل هم تخافين تاكلين
هزت راسها لا
_ اذن ادخل اسبح واطلع لا ترحين لمكان وبعدها ننزل
دخلت للحمام سبحت وانه العجز محاوطني ومو تاركلي منفس طلعت ونزلنا سوا جوة جانت الوالدة محضرة الاكل كعدنا على الطاولة والكل موجود ورحيق وامي ينقلون بالاكل
كملو كلشي وكعدو وبدينا ناكل جانت تنقش بالاكل وبس بدون ماتحط شي بحلكها حجينا بامور عاديه وهي ساكته
مسكت ايدها
_ليش ما جاي تاكلين
خلال ماباوعت عليه انتقلت نظراتها خلفي هزت راسها بطريقه هستيرية وصرخت
_لاااا لاااا تجي لا تجيييي
_محد موجود أوج
_مابديييي مابدييي
كامت بحاله ذهول ورعب ركضت لفوك ركضت وراها فتحت باب الغرفه لكيتها بكعدتها المعتادة بالكنتور
فتحت باب وحجيت
_هذا انه موج اهدي ماكو شي محد يجي عليج ولا احد ياخذج مني تمام
غطت وجهه بكفوف ايدها الهزيله وبجت سحبتها وحظنتها بهدوء وحذر وابتعدت عنها بأقل من الدقيقه
وجهتهه للفراش وغطيتها ادعت انها تريد تنام تركتها براحتها وطلعت
وكفت بالباب احاول اسمع الي حيصير حسيتها كامت سمعت صوت صدر من السرير اثر الحركه خطوات بطيئه وخفيفه يا دوب تنسمع تحركت بالغرفه واخذت شي من مكان ما ورجعت للفراش
نزلت جوة جان الكل بغرفته بطلت جمعاتنا وسهراتنا بسبب كل الي مرينا تشتت العائلة الي جنا نعمل جاهداً حتى تضل بصورتها الصحيحه
انطفأت الانوار بهذا البيت واصبحنا نلتقي رغم عنا لا يجمعنا شي الا اوقات الطعام واكو بعض الكراسي الناقصه اكو بعض الفراغات الي تخلفت اثر خروج اصحابها من هالبيت
كيف كنا وماذا اصبحنا ولماذا سؤال يراود الجميع ولا يوجد جواب مقنع له .... وحين نقول لضمان ثبات ووجود العائلة ف أنا اول من يستهزء ويسئل اين هي العائلة ؟
حسيت محتاج هواء طلعت برة البيت الجو بارد بس داخلي نار تسعر بصدري كعدت باب البيت وانه اسحب بالهواء واحاول اهدء
ايد نحطت على كتفي وربتت علي باوعت وراي زياد كعد بصفي وتنهد طويلاً ربتت على كتفه
_تهووون يخوي
جاوبني وكسرته مفضوحه بسبب صوته
_لا والله يخوي ماتهون ولا تهدء .... خابرتها شلونها
_البارحه اتصلت هي تسئل عن أوج سئلت عنها وتطمنت تكول بخير يومين واروح ازورها واخذ أوج وياي عسى شوي تتغيير نفسيتها
_شفتها صار شكد ما جايه لعدنا وانه الوحيد بينكم ماتسئل عليه
_الله كريم فترة وتعدي
_مافكرت بالي حجيت بي
_جاي افكر وقبلك فكرت واطقست عن الموضوع الكل يكلي هالشي فاشل بالعراق
اثناء الكلام انفتحت الباب التفتنا ثنينا جان سطام وجهه مغيم كعد بصفنا وسحب جكارة من ايد زياد وحجه بدون مقدمات
_شي يوم هاي الي عندي اقتلها ومايرفلي جفن
موج:لهل درجه يابه الي عندك انثى رقيقه محتاجه من يعاملها بهداوة مو يكسرها كل ماتصحله فرصة
سطام:موج لا تحجي شي انت ماتعرفه لخاطر الانبياء
موج:اعرف كلشي انت قاسي وياها والبنيه قوية صعب تكسرها بس انت مازلت مصر على كسرها
زياد:انه اشوف سطام عن حق هي تريد تثبت حالها اله قوية وتكدر تتخلى عنه بسهولة المفروض بالعكس تحسسه هو سندها وماتكدر بدونه
موج:وليش مو حضرت جناب اخوك يحسسها انه هو امانها وسندها بدون منيته عليها
سطام:انه ماكدر اسوي شي اذا مو تطلب مني
موج:وماكو اي وحدة بالعالم تطلب من شخص مهما كانت العلاقه الي تربطهم ان يحسسها بالامان والسند والحب
بعدنا نحجي وجان اسمع صرختها دخلت مفزوع
_شكووو شصايررررر
جاوبت امي
_مرتكككك المخبلة جايبه مميه وتريد تسوي حليب
_وشنو المشكله خليهااا
_لااا انت مثلها تخبلت رسمي
_يمةةة لا تحجين كدامها هيج لا تكولين مخبله عنها
_مخبله ونص
صرخت أوج بصوت عالي هزنا من الداخل وهز المكان هاي حركتها من يكون صوت عالي حواليها تضل تصرخ وماتهدء الا اذا اطلعها من المكان
سحبتها ومشيت لفوك جانت تبجي كعدت على الدرج وامتنعت الصعود وضلت تهذي ب كلمه مابدي وتكررها بالثانيه مايقارب المرتين او ثلاث استمر الحال ربع ساعه انه اقنع بيها وهي كلمه مابدي ماوكعت من لسانها
جزعت ونفذ صبري بلحظه غاضبه صحت بيها
_ كوووومي أوج انتيييي مووو طفله كوميي
جلبت بقوة بالمحجر وصارت تصرخ مابدييييي اتركونييييي الله ياخذكم مابدييييي حل عني
جان صعب علي اسيطر عليها او الزمها تركتها تصرخ وكعدت مقابيلها بمسافه تفصل بيني وبينها
بعد مرور وقت هدأت ونامت هي وكاعدة تقربت
شلتها وصعدت فوك
خليتها على السرير ومسحت على وجهه بهدوء وايدي راجفه كعدت بالجهه الثانية للسرير ووجهت نظري ناحيتها واتسائل نفسي شنو الي وصلها لهنا وليش
شنو سر الطفل الي دائماً تحجي عنه شنوو سبب الي تمر بي هل هي مجنونه لا بعض الاحيان تكون بكامل قواها العقليه هل تدعي الجنون ايضاً لا صعب عليها تمثل
اذن ما السر وراء كل هذه الفوضى ما السر الذي تخفيه هذه الفتاة لماذا لم تعترف بما حدث وما رأت عسى نلاقي علاج او حل لانتهاء هذا العذاب اتساءل نفسي احياناً الي سبب بالي صار والي شافته
الي ايد بتدمير هالبنت ....
مر وقت هي نايمه غلبني النعاس ونمت بصفها مبتعد عنها مايقارب بمسافه لشخص ثالث يكون بينا
ثاني يوم مثل كل يوم يخلص النهار بالشغل وارجع للبيت
اليوم رجعت جانت روان يمنا شكد مشتاقلها وماتوقعت جيتها
اول مشافتني كامت حظنتني حظنتها وبستها براسها ورحبت بجيتها وسئلت عن احوالها بعدها سئلت عن أوج كالو فوك صعدت فتحت الباب ودخلت نايمه كعدت مقابيلها وهمست
_حبيبتي أوج كومي كافي نوم
فتحت عيونها وابتسمت
_انت هون
بعدت خصلات شعرها المتناثرة على وجنتها وهمست
_توني جيت واكو احد جوا حتفرحين من تعرفين بي
_مين
_روان
_عن جد ليش ماصحتني طول هالوقت
_اكيد ماحبت تزعجج يلا غيري ملابسج ونزلي وانه داخل للحمام
_تمام حبيبي
ابتسمت بتعب حيل صارلي شكد مسامع هاي الكلمه حسيت عليها نزلت جوة طلعت من الحمام بعد ماوهمتها انه جنت اغسل دورت بالجرارات عن شي خاص بيها عندي شك انها خافيه شي عني
دورت بكل الغرفه ماكو اي شي غريب غيرت ملابسي ونزلت جوة جانت منطلقه بالسوالف ويا روان ورحيق نوعاً ما ارتاحيت
الكل موجود باستثناء زياد مابين ضحكاتنا وجمعتنا الي افتقدناها من وقت طويل جداً دخل زياد باهت اللون التقى ب روان وسلم عليها بجفى وكعد مقابيلها نظراته متشخصه عليها
مر وقت وكامو البنات جهزو الاكل وزياد كاعد على اعصابه لزمت رجله اوقف اهتزازها وحجيت
_شبيك اهدء
_عوفني موج
_جاي تأذي روحك والله خلاص انسى وكمل حياتك
نتر ايدي وصعد فوك كمت للمطبخ القيت نظرة عليها جانت تحظر الصحون لنقلهم على الطاوله صحت على روان التفتت واجت وراي
طلعنا برة لزمتها من كتفها وسئلت
_شلونج مرتاحه بحياتج
_الحمد لله تعودت على حياتي وعليه هم
_الله يهنيكم ... يلا ندخل الجو بارد
رجعنا للداخل وعيوني تراقب بيها جانت تتحرك بهدوء ورزانه عكس تصرفاتها المتعود عليها حركتها تكون بعدم توازن وشرود مستمر
انتقلنا لطاوله الطعام والكل تواجد عليها وبدينا ناكل بهدوء فقط اصوات الاقداح والصحون هي الي صادرة بهذا الوقت
كسر الصمت سؤال الوالد الموجهه لروان
_بابا شلونه زوجج وليش ماجه وياج
_الحمد لله بابا ... عندة شغل برة بغداد وراحله واني جيت يمكم كم يوم
_كل الهلا بيج حبيبه گلبي البيت بيتج
حجت أوج بهدوء
_ فرحت كتير بهل خبريه من هلق رح نغيير جو انا وانتي ورحيق مهيك
رحيق:اكيد حبي كل الي بخاطرج نسوي
همست امي مستهزئة بـ أوج
_لو تصحين على نفسج الاول وبعدها تتونسين وتغيرين جو
باوعتلي أوج بعتب وردت على امي
_لا تاكلي هم مرت عمي انا كتير صاحيه ع حالي .... بالعافيه
كامت من الاكل وحجت امي بعصبيه
_جم مرة كايلتلج لا تعوجين بحلكج كدامي بس تتعمدين تستفزيني
موج:يعني شنو استفدتي هسه يمه لا تزيديها عليه ارحميني الله يرضى عليج
سطام:ماجان اكو داعي لكلامج هذا ويا البنيه كلنا نعرف ظرفها صعب ولازم نساعد ابنج حتى يطلعها من الي هي بي مو نصير احنا والزمن عليه
روان :كلام سطام صح ماما
صعد موج وضلينا نلوم بماما شلون حجت هيج وياها ماما ماعجبها كلامنا كملنا اكل وكمنا للمطبخ غسلنا الصحون انه ورحيق ودردشنا شوي
_خطيه موج هواي جاي يتعذب ويا أوج
_صح ...
التفتت لرحيق وهمست بتسائل
_برايج شنو السبب الي وصلها لهل حاله
_الله اعلم بس موج يعرف شي ومتجاهله وبنفس الوقت مايعرف كل الي مرت بي
_ماحاولتي شي يوم تسحبين منها كلام
_لا وين ترة اليوم لو ما انتي هنا جان مانزلت
_ربي يشافيها ... اي احجيلي عنج مرتاحه بيتنا امي ما جاي تضايقج
_لا والله حبابه بس ويا أوج مدري ليش تجاكرها وياي مرات ههههه بس بصورة عامه حبابه الا سئليني على العينتين
_سطام؟
_ليش اكو غيره تعبني روان ما جاي ينطيني فرصه طول الوقت غاضب مني كأنه اني الي جبرته
_زين برأيج بعده ويا ذيج
_لعد وين جاي ينام كل هالايام .... شي يوم اروحلها للبيت وافضحها كدام العالم كله ولو هي مفضوحه
_يمعودة شسويلج مصيبه ويا سطام ... زين سؤال
التفت علي وتركت من ايدها الصحن بالدولاب
_جواب
_تحبي
_لسطام !؟.... لا طبعاً بس مستحيل اسمحله يهين كرامتي وكبريائي بتصرفاته الصبيانية
التفتت بقوة اثر ايد سطام ماتوقعت ابداً يسمع هالكلام سحبني لغرفتنا ونترني بقوة وصاح
_منو الصبياني
_انت
_والله وتكليها بوجهي بعد
_اكولها وشنو يعني ماكفرت
_رحيق تجفي شري احسلج لا تخليني اشوفج وجهي الثاني
_لا تهدد ابداً ولا تتوعد اذا انت عندك وجهين انه عندي 10
هز راسه بوعيد وتركني بدون ما يحجي شي دخلت للحمام سبحت وطلعت حضرت لبسي للدوام وتوجهت للفراش انتظرته ما اجه نمت بدون ماحس على نفسي وصحيت على صوت المنبه
هف ابداً الجو مو مال دوام بس مضطرة اروح نزلت جوة بعد مالبست روبي الفرو الي يحمي جسمي من البرد جهزت قهوتي وكعدت على طاولة الي بالمطبخ اشربها بهدوء وروقان لسى الساعه ب 6 الصبح محد يكعد غيري هذا الوقت
حسيت باب مدخل البيت تنفتح طبعاً بكوني جريئة وفضولية رحت اشوف منو ولا مهتمه اذا كان حرامي او قاتل او اي شي
جان سطام دخل بهدوء بشكله المعتاد ماباوع عليه بسرعه صعد فوك كملت قهوتي وصعدت وراه جان داخل للحمام صوت الدوش مفتوح
طلع من الحمام لاف المنشفه على خصره وشعره ينكط مي حجيت من مكاني جنت اخلي مكياج
_البس قبل لا تتمرض ... بعدين شعجب ماتسبحك بيتها
حجه مستهزء
_ماعدها مي
كمت من مكاني متوجهه للكنتور
_شدلها كيزر
دارني عليه من عكسي وكال
_حضرتج تستهزئين
_لا والله انت الي استهزئت بحالك
نترت ايدي منه وطلعت لبسي دخلت الحمام لبست وبعدها توجهت للسرير وبيدي الجنطه خليت كلشي احتاجه كل يوم
لبست نظارتي الشمسيه وبيدي الجنطه وطلعت من الغرفه بدون كلام نزلت شغلت سيارتي وتوجهت لدوامي دمي يغلي بداخل عروكي حضرة جنابه تعود بسيطه استاذ سطام انه اشوفك شلون تسهر بعد والله اذا ماراويتك الويل
ضربت الستيرن اثر عصبيتي المفرطه وجان واحد وراي يدك هورن قوي واصلاً احنا بازدحامات
نزلت من السيارة بعصبيه وركضت ناحيته ضربت على بنيد سيارته وصحت
_شبيككككك خاليييي مو شايف السير شلون مزدحم عليشش صرعتنا بالهورن
خنس ماحجه شي رجعت لسيارتي اغلب السيارات تباوع عليه انفتح السير وتوجهت لدوامي دخلت الدائرة وقسمي تحديداً القيت السلام وكعدت مكاني وبديت اشتغل
مر وقت طويل مايقارب ال 3 ساعات اني على كعدة وحدة قررت اخذ ريست رحت على صديقتي وطلعنا تريكنا ورجعنا وكملت شغل لحد ما انتهى الدوام رجعت للبيت
فتحت الباب دخلت سلمت وصعدت غرفتي دخلت للحمام سبحت وطلعت بالروب نشفت شعري بالسشوار طفيته والتفتت لكيت سطام ضارب عكس بالباب ماحجيت شي ويا اخذت ملابس وتوجهت للحمام لبست وطلعت جان كاعد على السرير
رتبت شعري ونزلت جوة حضرت الغدة ويا البنات وجهزنا الطاولة كعدنا ناكل بعدها غسلت صحون ورتبت المطبخ
وصعدت نمت وهو ماعرف وين راح غريب هالرجال بس التفت عنه الكاه ماكو
صحيت الغرفه ظلمه اكيد صار اليل ومحد كعدني كمت شغلت الضوء ساعه 7 المغرب كل هالوقت نايمه كون ماسمعلي حجي بدلت ونزلت بسرعه جانت عمه وروان كاعدات يسولفن والولد ماكو
_مساء الخير
_مساء النور حبي حروح وانه لا شفتجن ولا شي
_لا حترجعين لبيتج
_اشاقه وياج باقيه كم يوم
_اي زين... أوج وينها
حجت عمه
_تلكيها جاي تحجي ويا روحها بغرفتها
حجت روان
_يمه بدينا
_اسكتو عني ماحبها شنو كوة جبر
محد جاوبها لان ماكو جواب الها مر الوقت عادي ثاني يوم الصبح نزلت جوة جانت أوج كاعدة استغربت اول مرة تكعد هيج وقت
_صباح الخير
_صباح النور
_اليوم من وكت بعد محد كاعد ودجهزين الفطور
_صح بس حبيت حضرو انا
_براحتج عمري شفتيلي سطام
_من شوي دخل للبيت
ابتسمت بوجهه وصعدت لفوك جهزت نفسي وسطام جان بالحمام نزلت جوة عمو كاعد وزياد وأوج كلت صباح الخير وكعدت جاوبني عمو متسائل
_صباح النور وينه زوجج
_بالحمام
_شوكت رجع للبيت
_قبل شوي على مااعتقد
هز راسه بتفهم وتحولت انظارة لأوج جانت تصرفاتها غريبه تباوع لفراغ فوك راس عمو وتبتسم كأنه شخص واكف كدامها بس هو ماكو احد قطع شرودها سؤال عمو عن موج
_وين زوجج
_لساتو نايم
_صبيلي جاي
_حاضر
اخذت الاستكان بايد راجفه صبتله ورجعت كعدت
_كعدي لزوجج اكيد تاخر على شغله
_تكرم عمو
كامت من مكانها وغادرت المطبخ حجه عمو بتسائل
_على منو جانت تباوع وتبتسم
زياد: غريبه هالبنيه والله حيرتني معقوله تمثل
رحيق:مستحيل تمثل ماشفت ذيج المرة شلون جانت منهارة وقت مطرت الدنيا وعود شايله ابنها
الاب:الله يشافيها والله حتخبل يعني ماكو شي وراي
رحيق:لا تخاف ماكو شي
ضحك عمو وكام كال انه رايح باب المطبخ شاف سطام كله صباح الخير يابه عمو ماجاوبه وتعداه كعد بصفي وبدة ياكل متلافي وجودي
كمل اكل وصعد فوك رحت صعدت وراه لازم اخلي حد لكلشي ويا دخلت الغرفه سئلني
_مارحتي
_بطلت اروح ....اريد احجي وياك
_اي تفضلي
كعد مقابيلي على الكنبه وانه على السرير
_شكد عمرك
باوعلي بغرابه ورفع حاجبه
_33
_شوكت تبطل مراهقه
_مفهمت هههه
_داحجي بجديه
_شكو
_ ليش تهرب عيونك مني طول الوقت تطلع من البيت وترجع حتى سلام عليكم ماتكولها الي ما عدة تصرفاتك وردات فعلك الغريبه اتجاهي كدام العالم واهلك
دار وجهه عني كملت كلامي
_يعني يستمر الوضع بهل شكل
جاوب بنفاذ صبر
_شلون تردينه يستمر ست رحيق؟
_مثل الناس .... صباح الخير ... مساء الخير ... شلونج رحيق تناقشني بموضوع ما ... تسئلني عن يومي .... صعب ؟
ماجاوبني
_كثير الي داطلبه منك .... ادري انت غضبان من اهلك زواجنا جان رغم عنك بس مو معناتها تطلع غضبك عليه مثل ما انت مالك ذنب بزواجنا اني مثلك
مسح وجهه
_انت تغضب وتفرغ غضبك بيه واني اغضب وافرغ غضبي بيك وكل واحد بينا يلزمله سلاح ونطلق النار على بعض ونتنهي يعجبك
حجه بنفاذ صبر
_توبه ... استغفر الله
_والله اني هيح تصرفات ماتعجبني اعذرني يعني .... عندك مشكله وياي احجيها الي صرخ عليه لومني عاتبني بس لا تتصرف وياي مثل وحدة..... رجلها لان نسى يشتريلها ورد بعيد الحب
ضحك على المثل الي كلته
_اي هيج بهذا القدر وبس
_حقج عليه احاول اعدل من تصرفاتي وياج
_سهر ممنوع برة البيت من اليوم ... عمو واكفلك على شعرايه ترة .... تاخرت لازم اروح
ابتسم بوجهي وكال
_مع السلامه رحيق
_مع السلامة سطام
طلعت من الغرفه هم وانزاح عني الحمد لله من حجيت كلشي بالي كملت شغل وخلص يومي طبيعي
واليوم ماسهر برة رجع على البيت بليل كاعدين كلنا ياسين جاي من السفر ويوزع بالهدايا
بدأ بامه وابو جايبلهم كل واحد سجادة وتربه ضحك سطام وكله
_الي يشوفك يكول جاي من مكه مو من ملاهي بيروت
شمر عليه هديته وكله
_اسكت وشوف هديتك بس مو هنا عيب
_شجايب ولك
جاوبه مستهزء
_نسوان .... طبعاً مع احترامتي لاختي العزيزة رحيق
موج:بقيت انت احترامات ذاب ورج ويا الكل
ياسين:والله مو بيدي شسوي هذا طبعي.... تفضل هديتك أستاذ موج وهم لا تفتحها هنا
زياد:الله يطيح حظك شجايب ماتكلي
ياسين: تعال اشاورك
جاوبه موج كأنه فهم قصدة
_اكوم اكطع ال 44 مال جدك المرحوم على راسك
ياسين:تكول مو رجل شفل 44 ماكول غير الله يساعدج بيبي
البنات مافهمن قصده بس اني فهمت وتاكدت من فهمي لمن عمو وسطام صاحو
_طيح الله حظك
زياد انبطح بالكاع من الضحك كمل توزيع هدايا ياسين واخر شي نطاهم هدايهم الاصليه لعمو وعمه رتبنا الهوسه الي صارت وصعد كل واحد لغرفته
جان جايبلي عقد يجنن بس اني وين البس عقود واكسسوارات يادوب ايدي متحمله الحلقه
موج
دخلت الغرفه بعد هاليله اللطيفه وهالجمعه الي مفتقديها من زمان حسيت نفسيه أوج تغيرت الحمد لله
جان بيدها راديو الانتيكا الي جابه الها ياسين يعرف بيها تحب ادوات الموسيقى
كعدت بصفها قبلتها بكتفها وهمست
_عجبج
هزت راسها باي
_ماحابه ترجعين تعزفين او تغنين
_لا
_ليش
_مابدي شي يذكرني بالماضي
_اوقات لازم نذكر
_بس انا مابدي اذكر شي خلاص موج لا تضغط علي
كملت كلامها وبجت
_تمام اسف اذا زعجتج
_مابدي شوفك
استغربت طلبها
_ليش
_مابدي شوفك موج مابدي اطلع برة
_أوج شبيج شجاج
صرخت
_مابدي شوفك مابدي اطلع من الغرفه مابدياك اطلع
ضلت تصرخ طلعت من الغرفه ونزلت بتعب جوة لاكاني الوالد
_بابا موج تعال احاجيك
_ها يابه
_شجاي يصير ويا زوجتك
_ماعرف
_شلون ما تعرف وانت عايش وياها وزوجها
_يعني انت كل ظنك انه وياها عايشين سوا
_شلون يعني مافهمت
_يابه ماريد احجي بالموضوع
_خوش يابه براحتك
دخلت للصاله ومددت على القنفه عقلي وياها شلون اذا صار عليها شي وانه هنا راسلت روان
_روانه كاعدة
شويه وجاوبتني
_اي عيني كاعدة خير
_اريدج تشوفين أوج خوما بيها شي
_ليش انت وين ؟
_طردتني من الغرفه هههههه
_يلا هسه اشوفها
راحت واحس بروحي كاعد على نار جن صارلي قرن مفترك عنها ورة نص ساعه راسلتني
_وين انت
_بالصاله
انفتحت الباب ودخلت روان كعدت كدامي وكالت
_أوج حالتها صعبه .... دكيت الباب اول ماجاني ردها كلت يمكن جانت نايمه فتحت الباب ودخلت كاعدة تحجي كأنه اكو شخص يحجي وياها
انتبهت عليه ابتسمت بوجهه وكتلها
_اكدر احجي وياج
_اكيد تعي جنبي
_شلونج اخبارج حبيت ادردش انه وياج شوي
_منيحه اي منيحه
_ليش موج مو هنا
_انا جرحتو وقسيت علي عم حس بحالي اني اذيتو كتير
بس انا بحبو لموج وكلشي عم يصير غصب عني بحس حالي مريضه وبنفس الوقت لا
_ليش ماتطلبين منه ياخذج لدكتور
_مابدي انا مابثق بحدا بس هو وانتي مافيني بخاف من كل العالم كلهم بدن يقتلوني وياذوني بكرهم كلهم
_مو صحيح كلنا هنا نحبج ونريدج تكونين احسن
_لا ماحدا يحبني انا مشوهه ومالي جميله الكل بيقلي الفتاة السمرا مثل موج بس انا مالي سمرا انا مشوههه
لزمت ايدها وهمست
_انتي سمرا وحلوة بعد وكلنا نحبج موج وانه واخواني وماما وبابا ورحيق الكل
بجت وكالت
_بدي نام ممكن
طلعت منها وماضغطت عليها بس صارت تبجي من كل گلبها موج انه حزنانه عليها
_وانه گلبي يتكطع من اشوفها هيج مابيها مجال بعد رح ادور على طبيب نفسي واخذها اله
_الله يهدي سركم .... تصبح على خير
_وانتي بخير ياريت لو تطفين الضوة وياج
_من عيوني
ابتسمتلها بتعب طلعت وطفت الضوة وياها ردت انام ماكدرت روحي مقبوته ضليت اتكلب لحد ماغمضت عيوني من التعب حسيت الباب انفتحت سمعت صوتها همست
_موج
كمت من مكاني توجهت لنقطه الكهرباء وشغلت الضوة عيونها مليانه دموع وحزينه ... تقربت عليه ورمت حالها بحظني ...... ماردت احظنها لان اعرف بيها تنفر من لمستي الها وماردت افشلها واصدها
احتضنتها بحذر همست بشهكات متقطعه
_اسفه .... عم اجرحك مني وزعلك بس غصب عني
_وانه مستحيل ازعل او انجرح منج
_بدي نام بحظنك
سحبتها من ايدها واخذتها لفوك دخلنا الغرفه توجهت للفراش واجت هي بحظني من اول ماجت لهنا هي تتهرب مني وتخاف بس اليوم حسيت بيها امنتلي او يمكن تاكدت انه مو خطر على حياتها
ماكدرت انام طول الليل سارح بيها اريد اوصل لداخلها واعرف شنو بيها هالانسانه الضعيفه الهزيله شنو بداخلها شنو الي وصلها لهنا تعبت من عدم معرفتي بالي مرت بي طول فترة غيابها اكو اشياء ماعرفها عنها وخافيتها عني
روان
بعد ماحجيت ويا موج طلعت من الصاله وصعدت لغرفتي قبل لا افوت استوقفني صوت زياد
_روان اريد احجي وياج
بدون مالتفت عليه جاوبته
_نعسانه والوقت تاخر باجر عود نحجي
دارني عليه من عكسي وكال
_الوقت تاخر من يمي بس ماتأخر من يم موج
_شدتحجي انتت تخبلت لو شنو انت وموج وسطام وياسين اخواني وماكو فرق بينكم ابداً
_اريد احجي وياج
_احجي
_شلونج
_كل عقلك موكفني تسئلني شلونج صارلي يومين يمكم فـ اكيد عرفت بيه انه زينه
عفته ومشيت جان يكول
_ادري بـ حقيقه زواجج شنو ويجي يوم الكل يعرف وينتهي
رجعت وكفت يمه وحجيت بهجوميه
_مووو من حقك ابداً تدخل بخصوصياتي الزم حدودك وياي زياد
عفته ورجعت للغرفه تنفست بغضب ورحت للموبايل لكيت مروان داك عليه اكثر من مرة فتحته وخابرته اول مافتح خط ضل يغلط عليه ويتلفظ بكلام بذيء ليش ماجاوبه ماكدرت احجي اي شي غير اسد الاتصال بوجهه واغلق موبايلي
ثاني يوم جان جمعه والكل كاعد بس اكيد مو مثل قبل مادري اصلاً شلون البارحه اتجمعنا كلنا وضحكنا بسبب ياسين جاي يحاول يلم شملنا من جديد بس الي انكسر مايتصلح
العصر كاعدين انه ورحيق وماما نلف كبه بالمطبخ البارد على الميز اندكت الباب غسلت ايدي ورحت افتحها حجت ماما
_مادري يعني العروس ماتعودت علينا ماتنزل ويانه
رحيق :ميخالف ماما هسه مو انه وروان وياج مقصرين بشي
_لا ابد من فدوة لكلبج شلون عاقله ورزنه ذيج ماما تستحيف تكول
جانت جوارينا سلمت ودخلت كعدت ويانا وبدأ الحش بالعالم جابتلنا اخبار الطرف كله انه ورحيق وحدة تباوع ع الخ وتضحك من تحت لتحت
دخلت أوج للمطبخ كالت مساء الخير وتوجهت تشرب مي وكفت مقابيل ام هيثم وكالتلها كيفك طانط
_هلا عيوني ياا فدوا شلون تحجي مثل المسلسلات التركيه شلونج عيوني
_منيحه شكراً ع سؤالك .... روان وينو موج
_طلع يمكن سمعته يكول لياسين اخذ سيارته للغسيل
شردت ثواني وضلت واكفه حجت رحيق ب لطافه
_تعالي كعدي يمنا
هزت راسها بقبول وكعدت بس بالها مو ويانا ابد ضلت ماما تحجي ويا ام هيثم وتبسمرلها لأوج جان ام هيثم سئلتها
_اكلج حبيبه ام اسم الغريب
باوعتلها أوج باستغراب رجعت كملت كلامها
_ايه انتي عذرني بس ماكدر الفظ اسمج اكلج صارلكم هواي متزوجين ماكو شي بالطريق
_كيف يعني
_يعني طفل ماكو محبلتي
رجفت أوج وحجت بهجوميه
_شووو دخلك انتي شووو خصك
بجت وكامت من مكانها تصيح مو انا الي عملت هيك مو أنا الي عملت هيك وكعت من طولها وصارت تضرب على راسها وتصرخ ماعم يسكت بيضل يبكي سكتووو سكتووو
ماكدرنا نسيطر عليها لا انه ولا رحيق ولا حتى بابا ركضت للموبايل خابرت موج بس فتح خط سمع صوتها ضل يصيح شبيها حجيتله مختصر كال جاي بالطريق
ام هيثم راحت وعرفنا هالموضوع ماراح تسكت عنه هسه تنقله بكل البيوت وانوب تطلع سيط بيت ابو سطام جنتهم مخبله
هدأت أوج من الصياح وضلت بس تبجي وتنود بروحها دخل موج للبيت وركضلها جانت لهسه على كعدتها اول مشافته بجت وكالت
_موج ماعم يسكت بيضل يبكي
_تمام حبيبي تعالي وياي وهسه انه اسكته
ضلت تشهك كومها واخذها لغرفتهم اوف يا قهرك يا اخوي شجاي يصير وياك وشنو تتحمل بعد
كعد بابا راسه يوجعه وحجه بتسائل
_ليش هيج نهارت
حجت ماما
_تسودنت بس كالتلها المرة ماحبلتي ولج روان اكص ايدي اذا ماتطلع هالبنيه مسويتلها مكسورة واخوج جاي يتستر عليها
عفتها ورحت غرفتي ورحيق لمت الهوسه الي صارت وصلتلي رساله من مروان يخبرني برجعته من السفر ويريد يجي ياخذني باليل منا ماجاوبته جهزت اغراضي ورتبت جنطتي وطلعت كعدت يم ياسين ومر الوقت موج ماطلع من الغرفه
موج
دخلتها للغرفه نيمتها بفراشها وكعدت كدامها سحبت نفس وسئلتهل
_أوج وين ابنا
نزلت دمعتها وماجاوبت كومتها بقوة من ايدها انطيتها مجال هواي لازم أعرف شجاي يصير وياها
_كومي اوكفي كدامي واحجيلي شنو صاير وياج
ماحجت شي
_اوووج احجيليييي
بجت وراحت كعدت على كرسي وضلت تفرك بيدها كعدت مقابيلها
_حبيبتي لخاطري احجيلي
رجف فكها وبجت سحبت نفس عميق
_انا قتلت ابني
يتبع
......................................................................
رجعتلكم حبايب بالبارت الاول من روايتي الجديدة الجميلة 🥺♥️
التنزيل بين يوم ويوم وبنفس الوقت او يمكن اتاخر شوي حسب النت
اريدكم تتفاعلوووووون حبابيننننن
كلش حابه هالرواية واريد تتفاعلون حتى ابقى بواهسي
لا تنسون التصويت ولا تقصرون بالتعليقات
احبكم هوووواي 🥺💋💋
قناة التليكرام ضيفوها عُمري ♥️♥️
وحساب الانسكرام 🙈♥️