#أبي_لم_يكن_إنساناً
مستقبل الرواية الجزء الأخير..
للكاتبة لبنى الموسوي
- ماذا بكِ ؟!!
- لا شيء سوى تخبطات هذهِ الحياة
- حسناً لا تبالي فـ عند كل إصطدام سـ يقوى عودكِ أكثر
- احقاً يقوى عودي ؟!!
- بكل تأكيد
فـ ما كنتِ لِـ تصلي الى ما انتِ عليهِ الأن إلا بـ تخبطات ذاك الأب الذي ترك لكِ جراحً لا تندمل
- بالله عليك لا تذكرني بـ بشاعة أيامه
فـ قلبي لا يحن لـ دمه وعقلي يرفض ذِكر أسمه ،، رحل وانتهى
- اتريدين اقناعي بـ انكِ نسيتيهِ !!!
- تنهدت بـ أنينٍ حزين وحرقةٍ مكبوتة
معكَ حقك وكيفَ للبنت أن تنسى أباها.. انهُ أبي ولكن..!
- لكن ماذا ؟؟
- أبي لم يكن إنساناً....
~~~~~~~~~~~~~~~~~~~~~~
دفعتها بـ هدوء ودخلت
باوعت للممر هواي احذية بالباب حتى مال زلم
تمشيت بـ خطوات مضطربة وكل جسمي ينفض خوف
فتحت الباب الداخلية چان اسمع صوت مخلد
صاح مثل متوقعت راح تجين وراية
التفتت ع الجانب گاعد على الكرسي بالزاوية
ردت انسحب من المكان گال ادخلي بكل الأحوال انتِ لازم تكونين موجودة
- رديت الباب وباوعت علي بـ تساؤل شنو وراك احچي
- تفضلي وانتِ تعرفين
- ما اريد ادخل تركت يزن وحده بالبيت
- ما عليه شيء والشقة فوگانا شيصير ينزل لا تخافين
حچاها ومشى بالكرسي قبلي
تبعته لگيت الكل موجودين بالصالة والوجوه متتفسر
خالته
بتها غفران
خواته
خفت من منظرهن شكو شبيهن وليش مجمعهن مخلد !!
سلمت بدون ما اباوع عليهن
محد رد السلام غير بس عمتي وهوَ
گعدت افرك بـ إيدي المن مجمعهن معقول راح يخطبها
مجرد التفكير بالموضوع هز كياني من الداخل
هيَّ شعره بيني وبينك يا مخلد
مجرد ما تنگطع حتى الإنسانية بعد متشفع الك عندي
باوعت عليه.. أشرت بـ راسي شكو
گال خليكم هنا
ممنوع وحده تجي للأستقبال إلا اذا اني صحت الها
حچاها وراح
ظلن وحده تباوع بـ وجه الثانية
الوقت صار ميمشي نص ساعة وهوَ ممبين هسة بس لو اعرف ويامن ديحچي ومنو اكو بالأستقبال چان ارتاحيت
شوية وعمتي سألتني شكو عليش مجمعنا
رديت علمي علمچ والله
صاحت خالته تردين تقنعيني جاية ويا ومتدرين ليش دز علينا اني و ولدي اكيد الشغلة وراها انتِ
- اجيت ورى مو ويا
- يعني تتجسسين عليه خوش والله بالعافية على مخلد
- ألف عافية مو عافية وحدة اصلاً وين يلگى مثلي
غفران.. مصدگة روحها البطرانة
ترى الرجال مطايقچ بس غير مرضه جابره
منو يخدمه غيرچ انتِ هنا لهذا السبب وبس لـ خدمته يعني
بتول.. اشوفچ واثقة.. يعني تعرفين ليش جامعنا
لعد متگولين الأمچ وتريحيها
متشوفين المسكينة فضولها عبر القارات احچي وسدي الحدود
غفران.. خليها مفاجأة حتى تنصدمين وينصدمون وياچ
ايات.. كااااافي عاد هسة وكت هالسوالف
جنات.. شبيچ انتِ شو من اجيتي لسة بس تصيحين !!
ايات.. ما بية بس كرمينا بـ سكوتچ دنشوف شبي أخوچ
حچتها وگامت تفتر بالصالة
ظليت اباوع عليها حالتها مو طبيعية ابد
فجأة مخلد صاح غفراااان اياااات تعالن لهنا بس انتن
التفتت على غفران صافنة على ايات بـ صدمة
صاحت عمتي شبي وياچن
ردت غفران والله ما ادري يجوز محتاج شي خل نروح
دخلن للأستقبال وسدن الباب وراهن
ما گدرت اظل گاعدة
گمت أفتر رايحة جاية صارت جنات بـ وجهي بتول الله عليچ بداعة يزن متعرفين مخلد شـ رايد منهن
- والله ما اعرف شبيكم متصدگون
- شكو جمعنا والله راح اتخبل معقولة يخطب غفران
- باوعت عليها بـ طرف عيني يجوز كل شي يطلع منكم
- أخوانها هنا تدرين
- منو
- أخوان غفران يعني لو راح يخطبها لو اكو شي فعلاً
- واني شكو ليش جاية تحچيلي
- أخوية چان يحبچ ليش مشيتي بالطريق الأعوج وهاي انتِ خسرتي
- طريق اعوج !!!
يا طريق هذا بس لا اشتغلت رقاصة بالنوادي الليلة وما ادري بـ روحي شو مدري شلونكم راح تخبلوني
- انتِ تعرفين شـ مسوية ميحتاج احچي
- لا والله منكم وكل شوية اكتشف بية عيوب اني نفسي مچنت اعرف بيهن
ساعة شيطاني قوي ساعة امشي بالدرب الأعوج ساعة ما ادري منين حبلت واني زعلانة بعد ذكريني شنو
داحچي گبت العيطة من الأستقبال
ركزنا ويا الصوت ممفهوم كلامهم لأن ديصيحون بس مبين اكو مشكلة راح تصير
گامت أمه تشوف شكو گبل خالته لحگتها
ظلينا بس اني وجنات
صارت هوسة بس الله يعلم بيها ساعة والوضع مكهرب
انتبهت البيت فارغ ما بي ولا طفل
التفتت على جنات اطفالچن وين ليش جايات وحدچن
- مخلد ما قبل نجيبهم
- اهااا
- شـ تفسريها ليش ما قبل اكيد لأن يعرف بهاي المشكلة
- واني شمدريني يطلعون أهلچ واسأليهم
حچيتها ورحت گعدت ع التخم رجلي بندت من الوگفة
عشر دقايق وصاحوا الولد يا الله عدلت حجابي والتفتت ع الاستقبال طلعوا ولد خالته
الوجوه صايرة دم من العصبية وگبل طلعوا من البيت
گمت الباب بعدها مفتوحة
ترددت اروح اشوف شديصير وياهم لو لا
باوعت الجنات بعدها واگفة خليني بـ مكاني اذا
أختهم ما راحت اني شكو
أول وتالي اعرف الخبر الهسة بفلوس باچر يصير ببلاش
رجعت بـ خطواني ردت اگعد طلع مخلد بالكرسي
ثواني وطلعت عمتي ورى
وصل يمي گتله شكو رد شوية واحچيلچ
سمعت صوت بچي رفعت راسي خالته ساندة غفران والحال مينوصف حتى شكلها مخربط مو بس حجابها
اندگ الجرس حيل يمكن أخوانها ينتظرون بالباب
لبست أمها العباية واجت العمتي
رادت تبوس راسها دفعتها ظليت فاتحة عيوني بصدمة الگاعد اشوفه حلم لو حقيقة عمتي زاعلت أختها
التفتت على مخلد تعتذر
ما رد غير بـ جملة وحدة اني ما منتظر اعتذاركم خالة بس اخذي بنتچ وچفونا شركم كافي الصار لحد الأن
طلعوا من البيت مكسورين وليش ما ادري
هناك واتذكر ايات
باوعت للأستقبال وينها شو مختفية صاح مخلد اياااات
اشرت عمتي الـ بتها روحي جيبيها
راحت جنات شوية وطلعت ساندتها وحالها ميقل سوء عن حال غفران
- وصلت يمنا وگفت گبال مخلد نعم خوية
- حسابي وياچ بعده مفتوح بس خلي اوگف على رجلي
- كلماتك كافية لو ماد إيدك علية ولا حاچي هالحچي
- بعدچ ما شفتي شي
- اسفة خوية
والله شيطان ووزني ما اعرف شلون سويت هالشكل
- هه گلتيلي خوية مووو
غير خوة هاي البعتيها بـ أيفون لو منيطچ شدة دولارات شچان سويتي يمكن تبيعين عشيرتچ شلع
- حقك شـ تحچي حقك اني غلطانة واستاهل كل شي
- امشي بوسي راس بتول واعتذري منها
- صار تتدلل انتَ وياها
حچتها واجت بـ اتجاهي
باست راسي تعتذر من الصدمة ما اعرف شنو ارد عليها
- باوعت الـ مخلد صاح بوسي راس أمي بتول
- نعمممم
- مثل ما سمعتي يلا
- التفتت عليها نظراتها غير عن كل مرة والدمعة بطرف عينها بلا شعور رحت الها بستها من راسها
- مسحت على وجهي وبچت سامحيني يمة أذيتچ حيل
- الله يسامحنا ويسامحكم
مخلد.. يلا ايات
جهزي نفسچ حتى اوديچ البيتچ وبعد متعتبين هنا إلا اني اسمح بـ هالشي حتى لو سمعتي بينا دنموت
- لا فدوة خوية شعندي غيركم وين اروح اذا مو يمكم
- لتناقشين نفذي وبس
- يمة
- نزلت راسها عمتي روحي بنيتي الأمر بـ إيد أخوچ ما بـ إيدي شي عليچ كل شي صار من تحت راسچ
سحبت عبايتها تبچي
رادت تطلع من البيت صاح بيها مخلد خليچ بـ مكانچ
أخذ موبايلة من جيبه اتصل على عمي گله منتظرك يلا
شوية ورمش عليه
سويتله طريق طب حتى يطلع مخلد للسيارة
طلعت وراهم گال نوصل ايات الـ بيتها ونرجع اصعدي يم أبنچ
فتحت الباب وصعدت بعدني مداخلة اجة يزن يركض
- هاي شنو چنتِ طالعة ماما
- اي نزلت يم بيت جدك شوية روح الـ غرفتك العب
- وين بابا ضجت اريد العب ويا من البارحة وعدني
- يزن ماما اسمع كلامي أبوك مشغول هسة خليك جوة بغرفتك لتطلع إلا اني اصيحك
- حاضر ماما
- بسته وضحكت راح يركض الـ غرفته وسد الباب
ظليت الوب
مو عشر دقايق حسيتهن عشر ساعات
سمعت الباب انفتح باوعت من الشباك واخيراً وصلوا
فتحت الباب الداخلية ونزلت ساعدت عمو صعدنا
رحت للمطبخ جبتلهم ماي
شرب مخلد والتفت علية اگعدي حتى تعرفين شـ صار
- بس حچاها گعدت مقابيلهم يلا اسمعك
- انتِ وهمام أكثر الناس تعرفون شگد حبيتچ وتعبت يلا گدرت احصل عليچ منختلف على هالموضوع
- اي ويعني
- خليني اكمل لتقاطعيني اسمعي للأخير وبعدين اسمع منچ الحچي الراح احچي مهم الـ حياتنا
- تمام ما راح اقاطعك كمل حبيتني وبعدين
- من عرفت أمي راح اخطبچ انتِ بالذات فرحت كلش
همْ لأن تحب بيت جدچ وتعرفهم خوش ناس
وهمْ ما صدگت قررت ارتبط بيچ لأن بعد موضوع بت خالتي اني شلت فكرة الزواج من راسي نهائياً
- وهوَ شنو موضوع غفران ممكن اعرف وليش ما گتلي عليه قبل لنتزوج سر مثلاً
- لا مو سر والدليل عمچ يعرف بي
بس لا انتِ سألتيني ولا اني معتبره موضوع مهم لدرجة احچي بي وانطي حيز من حياتنا الراح نبنيها
- وشلون انتهى
- حبيتها بس بالأخير اكتشفتها متستاهل تكونلي زوجة أأمن بيها على حياتي وبيتي ومستقبلي
يعني بـ أختصار ما احب أدخل بالتفاصيل ما ارتاحيت الها ونهيت وياها كل شي بـ علم أهلي وأهلها
- خانتك يعني ؟!!
- تگدرين تگولين خيبت أملي بيها ودمرت الثقة البيناتنا
- معناها خانتك
- مو خيانة عمچ يعرف بس تصرفت تصرفات بالكلية ثبتت الي هيَّ مو گد الأمانة وصعب تحمل أسمي
المهم من بلغت أمي اريد أخطبچ فرحت بالخبر كلش
وصارت القسمة
بـ عيونچ شفتي شلون چانت تعاملچ بـ فترة الخطوبة وأول كم شهر من زواجنا قبل لتبدي المشاكل
- صح ما چانت هيچ فجأة تغيرت وصارت تكرهني
- بالضبط لأن اساساً هيَّ متكرهچ بس بمرور الأيام بدت المشاكل تطلع من جوة الگاع
يا ما اشتغلت يا ما نزلت يا صعدت وعافتني
وهالأمور التافهة المتعلقة بأغلب مشاكل العمة والچنة
بس ما فد يوم انطت بيچ يمي
لدرجة چنت منچ اسمع المشكلة مو منها
بينما هيَّ گدامي ما بلسانها غير المدح بيچ وبتربيتچ
هذا الحچي خلال أول سنة من زواجنا صح بتول لو لا
- صح
- الى أن انفصلت غفران عن زوجها
بدت أمي كلما تشوفني تشكيلي منچ هيچ مرتك سوت وهيچ مرتك ما اشتغلت وبتول نترت بية وبتول رفعت صوتها بـ وجهي
وفترة بسيطة بدت تحچي أمور اعرف بيچ متسويها
وراها صار الكره واضح بـ كلامها
كرهتچ لدرجة ما كرهت أمي بشر غيرچ بالدنيا وكرهها هذا بدا يأثر علية وعلى حياتي الزوجية وياچ
اختنگت من المشاكل
انتِ تحچين براسي منا وهيَّ تبچي وتدعي علية وعليچ مناك واني لا اگدر اردها ولا اگدر اتغاضى واسكت
اعرف بيها غلطانة بس تظل أمي واني وحيدها
يعني لو حياتي وياچ تنهدم همْ ما اعوفها وحدها واروح خصوصاً بعد ما مات أبوية وتزوجن خواتي
بالسنة الثانية الحياة العايشها صارت جحيم
حسرة انزل يمها ومتسممني بـ كلامها
واجي اصعد يمچ حتى ارتاح الگى الوجه مگلوب وبس اسأل شبيچ تنهدين بية يا أمك يا خواتك يا عشيرتك
وهيچ مشت السنين
وراها بـ فترة رجعت غفران للساحة وصرت اشوفها كلما ادخل البيت أهلي واسمع بسيرتها كلما اگعد ويا أمي
حاولت بنظراتها ترجعني الذكريات الماضي
وأكثر من مرة توددت بطريقة غير مباشرة حتى تبينلي هيَّ لسة تحبني ورايدتني
أما اني ما اهتميت ولا أثرت بية وداعة أبني الغالي
بس اللعب بدا يكبر
أمي وخواتي صارن مثل ابليس من يوز براس أبن أدم 24 ساعة يحچن بيها ويذكرني بالماضي الجمعنا سوة
لا سنة ولا سنتين ولا أربعة
تگوم تگعد أمي اريد ازوجك اريد افرح بيك وبجهالك
وحتى اخلص منها اجيت وطلبت منچ طفل ثاني بلكي يسد حلگها وتعوفنا بحالنا لأن چانت حجتها الجهال
وما صار عدنا طفل بعد يزن
ومنا بدا زنهم يكثر ومشاكلنا تكثر ويا
كلما اصعد هنا نتعارك بحيث صرت اكره دخولي للبيت واذا حبيت انزل يم أمي تحچي عليچ وتهججني
ضغط الشغل وضغطكم وصلني المرحلة الأنفجار
صارت تجي أفكار براسي اعوفكم واعوف شغلي واسافر حتى اخلص من حياتي وياكم
بس ارجع استهدي بالرحمن واگول يجي يوم وتنحل كل هالمشاكل لأن ماكو شي يظل على حاله
حاولت اگعد ويا أمي افهم سبب كرهها الچ
ما چانت تگول غير بس مو خوش بنية شنو الـ هالدرجة سحرها عامي عيونك عن حقيقتها
يمعودة شبيها مو هاي بت أخو همام
ترد أي منو أبوها ومنو أمها ليش متصدگ هيَّ مو خوش وما مشت حياتها وياك غير بس بالسحورة
من چانت تحچيها ما اهتم لأن اغلب العيال يحچوها
وبنفس الوقت اعرف مرتي متسويها
وزادت المشاكل لدرجة وصلنا اني وياچ للأنفصال
أكثر من مرة زعلتي
وبكل مرة تزعلين تستغل أمي الفرصة وتحببني بغفران
خفت من نفسي من حسيت بديت أميل الها بالشعور
ست سنوات علاقة بيني وبينها مو شوية
وحتى اتخلص من شيطاني
ثاني يوم من زعلتچ اجيت الـ عمچ ورجعتچ للبيت بس حتى هالشي مفاد لأن المشاكل بدت تزيد متقل
وراها بـ فترة راسلتني غفران وقريتي محادثتي وياها
چنت اجاوبها حتى اعرف وين تريد توصل
بس كلامها كان جداً عادي لا عرفت شـ تريد ولا لزمت الخيط اليوصلني لحل لغز كل مشاكلنا
وبيوم من الأيام تجاوزتي وتذكرين هاليوم كلش زين
اني هنا ما انكر جاوبتها بـ ضعف مني
ظليت احچي وياها ساعات بس من اجيت باليوم الثاني وتصفحت بالمحادثة حسيت بيها دتحوك الشي
ومنها حاولت اسايرها
حتى اعرف اذا كان الها إيد بمشاكلنا لو لا
بس كان كلامها طبيعي لحد يوم مشكلتنا بدت تسحب مني الكلام بشكل واضح وتطلب مني افصح عن مشاعري الها وفصحت بس ليش ما اعرف
مو حب ثقي بالله مو حب
بس عقلي الباطن يگول احچيها وراح ترتاح
وحچيتها واني ما اعرف ليش حچيتها بحيث گبل وبلا شعور طلعت من المحادثة لأن ما ادري شتصرفت
ومن واجهتيني حاولت انهي كل شي بالحيلة بس اكيد انتِ اذكى من ان ينضحك عليچ بسهولة
وگلت غلطة ما أنكر
لأن فعلاً چنت احسها غلطة شلون احچيها واني مچنت اعرف شنو لازم اتصرف وراها وشلون أگدر اوصل للحقيقة
بـ وگعتچ مخلد وگع وياچ
اعتزلت كل شي حتى دوامي اروح اله چفيان شر
ومنا همام زعل علية وصارت النا مشكلة بيوم وگعتچ يعني من صدگ حسيت حياتي انتهت عد هالنقطة
من عرفوا أمي وخواتي بـ مشكلتنا فرحوا أكثر من فرحتهم بـ زواجي نفسه
وهنا اني تأكدت وتيقنت غفران الها إيد بـ كرههم الچ
ومرضچ وحالتچ الوصلتي الها
چانت أكبر دافع حتى استمر بالموضوع الى أن اوصل للحقيقة
استمريت ويا غفران طول فترة زعلنا
تنازلت الها
واضطريت انطي بيچ أكثر من مرة حتى أخليها تأمن بية
- تنازلت !!!
- قصدي تنازلت بـ مشاعري صفي النية شبيچ
- وشنو بعد شلون انطيت بية ؟!!
- اي انطيت وطلعتچ ما مالية عيني ومسودة عيشتي
- خير ان شاء الله كمل يلا هيَّ خربانة خربانة
- صار الحادث وگعدت على هذا الكرسي بعدها رجعتي
بـ رجعتچ ضاجت غفران كلش
گالت انتَ مو ردت تطلگها ليش رجعتلك
جاوبتها مؤقتاً بس بين ما اسوي العملية واوگف على رجلي
ولأن ما اريدها تشك بـ شي
خليتها تدخل الهذا البيت ومنعتچ تطرديها
واكيد استمريت اتواصل وياها حتى بـ وجودچ ومرات اضطر ابقى سهران للفجر لحد ما خليتها تأمن وتنطيني الثقة العمياء وتصدگ اني ما حبيت غيرها
لحد البارحة حچي يجر حچي جبنا سيرتچ
گلت الها وجودها يخنگني اتمنى تروح بس خجلان من عمها ما اگدر اطردها
چان ردها سبحان الله انقلب السحر على الساحر
انتهزت الفرصة وذكرت كلام أمي
گلت الها فعلاً احس مسويتلي سحر لأن فجأة كرهتها واني چنت احبها كلش معناها أمي ما چذبت ساحرتني
وهنا اجة الأعتراف
قرت بالشي العشت أشهر وأيام وليالي حتى اوصل اله
گالت خالتي ما رادت تأذيك بس فعلاً مرتك ساحرتلك
بعيني شفت الورقة
ضامتها جوة دوشگ الچرباية كلها اسماء غريبة ورسم مطي مكتوب عليه أسمك وهيَّ صاعدة عليك
سألتها منو طلع الورقة من الدوشگ ردت ايات
هنا لزمت طرف الخيط
ما دققت وياها أكثر حتى لتشك بشي
شوية وگلت الها نعست نهيت المحادثة وياها وراسلت أختي هيَّ الوحيدة الراح تفك شفرة هالمشاكل
صورت الها محادثة غفران وهددتها اذا تنطيها خبر اني سألت عن الموضوع مراح ارحمها وخراب بيتها يكون على إيدي
بالبداية گالت اني فعلاً شفت السحر بغرفتك
بس مـن دزيت الها بصمة اهدد واتوعد وقسمت يمين عظيم اعرف بمرتي متسويها وانتِ وراها قرت واعترفت
الموضوع بـ أختصار هذا
خالتي خلتني براس غفران بعد انفصالها
وهيَّ بدورها تمسكنت الأمي حتى تخليها براسي طبعاً بمساعدة أمها
ولمن ما فاد الحچي بية استخدمن طريق الحيلة
وچان هالطريق سبب كره أمي البتول
ولأن غفران قريبة كلش من أختي ايات شاركتها بهدم بيتي مقابل أيفون تصدگ همام !!
- يعني غفران انطت الأختك أيفون وهيَّ الخلت السحر
- تقريباً خوية
هيَّ مقشمرتها على أبو اني بعدني احب أخوچ بس هوَ يحب مرته ساعديني حتى ارجعه الي
ايات گالت الها مستحيل هذا يموت على بتول
ذيچ گبل انطتها الخطة
گالت اذا خالتي كرهتها مخلد راح يكرهها بس اريد منچ تخلين إيدج بـ إيدي وعوفي الباقي علية
أختي بالبداية خافت فـ رفضت
بس رشتها بـ أيفون حديث خلتها تبيع حتى أخوها
وبيوم من الأيام بتول راحت للدكتورة ونزلت يزن جوة يم أمي وهنا نفذت ايات خطت غفران
تبلل يزن فـ اخذت مفتاح الشقة من أمي حتى تجيب ملابسه شوية ونزلت تفرفح شوفي شلگيت بغرفة أخوية
ورقة مطبوگة ألف طبگة بيها اشكال الكتابة
ورسم مثل ما ذكرت قبل شوية
أمي من شافته تخبلت كل ظنها صدگ بتول ساحرتني خصوصاً من شافتني ما اتأثر بـ مشاكلهم
قنعتها ايات متحچي لأن راح اگول ديتبلون على مرتي
بس بالمقابل تزيد أمي بالمشاكل والحچي على بتول
وما قصرت الحجية
من يومها الطلايب صارت تتراگع بحيث وصلت المرحلة تدعي علية لأن ادافع عليها وتتحسب من گلبها
وهاي اني اليوم جمعت الكل ووضحت اساس المشكلة
أخوان غفران أوادم
تفهموا سبب علاقتي بأختهم واعتذروا بعد ما راويتهم الدليل وبعد ما خليت ايات تحچي كل شي گدامهم
همام.. ادري ليش ما گتلي من أول مصارت المشكلة
مخلد.. شبيك همام صدگ تحچي ؟!!
اگولك اني نفسي مچنت اعرف شديصير وشلون اتصرف تريد انتَ تعرف
والله لو حاچيلكم چان گلتوا تتحجج حتى تطلع نفسك من المشكلة وتبيض صفحتك يمنا گول چذب
بعدين من صارت المواجهة گتلك بالمستشفى
اني احب بتول
وكل شي صار اله سبب يجي يوم وتعرفه واتصور لهذا السبب انتَ رجعتها لأن هيَّ مستحيل ترجع من كيفها
همام.. والله هالنسوان طرگاعة سودة عدهن عقل اسرائيل متمتلكه
نفس ذيچ تذكر شسوت وشعملت حتى تطلع طيبة من حياتي وهسة انعاد وياك نفس السيناريو بس بـ طريقة مختلفة
- نفوسهن ضعيفة خوية
ع الأقل ذيچ أسمها مرتك إلا اني هاي أختي يول شنو تحط الها وتطيب حتى ما اگدر انسالها هالأذية
- صدگ شلون قنعتها تحچي بـ هالسهولة
- باللين احياناً وبالعصبية احياناً أخرى
يعني شوية هددت
وشوية جبتها باللسان الحلو وطمنتها اذا تحچي الحق ما اسوي الها شي بس اخلي حد الخالتي والبتها
وهيچ أمنت وحچت كل شي
اصلاً ما عدها سبيل ثاني تعرف اذا ساكته چان واجهت بينها وبين بتول يعني بكل الأحوال راح تنكشف
مچانت متوقعة غفران راح تحچي
بس اني چنت متأكد راح تحچي خصوصاً بعد ما ثقت بـ حبي الها علمود تحاول بهالطريقة تكرهني ببتول
تدرين شنو الحلو بالموضوع كله
خابرت أخوانها يجون وراها اتصلت بيها
بلغتها راح اخطبچ اليوم بس ما اريد تگولين لأحد خلي الموضوع مفاجأة
لأن لو ما هيچ متجي بـ رجلها الية
چان شكت مجرد ما عرفت داز على أمها وأخوانها
وهسة خليها منها الهم عود خل تحاول تبرر افعالها اذا گدرت
همام.. اگول عبالك راح اعتذر منك
لا عيني متوهم
الضرب الأكلته قليل بـ حقك حتى لو عندك غاية من كل هذا بس تظل بتول مالها ذنب حتى تأذيها وياك
مخلد.. واني مطالب منك اعتذار
اصلاً لو ما ضاربني چان ما صحيت على نفسي بسببك وبسبب وگعة بتول شغلت عقلي وتحركت عدل
همام.. وأمك هسة شنو عرفت شگد چانت ظالمة بتول
مخلد.. عرفت واعتذرت منها والباقي يم بت أخوك
تسامح خير وبركة
متسامح براحتها بس لو ما هيچ منعيش مرتاحين هيَّ بكل الأحوال حياتنا خربانة ع الأقل نسوي العلينا
يعني خوية اني ممستعد اعيش حياتي بالمشاكل
أمي مطايقة مرتي
ومرتي تتنرفز من وجود أمي
عيشتيش هاي التخلصها بالقال والقيل فوگاها ما اگدر ابعد واعوف أمي ولا بية اعيش بنص هاللغاوي
فـ ما لگيت غير هالحل
لو انهي هالصراع وارجع حياتنا مثل قبل
لو تنتهي حياتي ويا بتول وأخسر كل شي بس اشتري راحة بالي
- الحمد لله من كشفت لعبتهم بلكي هيچ الوالدة تعوفك بحال سبيلك انتَ وهالمسكينة
حچاها وگام
يلا صار لازم اروح محتاج شي مني لازم أمر للمركز
- سلامتك ما قصرت
بس أخيك شوفلي موضوع السفر گعدتي هواي طولت
- داشتغل عليه وداعتك
بس المشكلة بسبب الفايروس دنواجه صعوبة بالطلعة تصور حصلت أذن بالسفر وما حصلت الفيزا
- وتالي ما بيها مجال نسويها داخل العراق
- بلغت دكتورك يتواصل ويا جماعة الشمال اذا يگدرون على حالتك نسويها هنا
- الله كريم
- اصبر خوية ما ظل شي وترجع الشغلك وحياتك
طلع عمي رحت وصلته للباب
ظل يوصيني على مخلد وبالي مو ويا كلش
بس نزل سديت الباب ورى
بقيت واگفة بمكاني ممستوعبة الكلام السمعته معقولة كل هذا صاير ببيتي هنا واني ما ادري
شلون دخلوا الشقتي شوصلهم الغرفتي !!!
زين شلون دبروها واتهموني بالسحر بحيث خلوا عمتي تصدگ بيهم شنو هالبشر وحق الله راح اتخبل
- فزيت على صوت مخلد صاح وينچ بتول
- نفضت راسي من الأفكار ورحت يمه نعم رايد شي
- شبيچ شو وجهچ اصفر
- عود شلون صاعدين الغرفتي وشوصلهم الفراشي !!!
- مو حچيت كل شي گدامچ
- اعرف بس يعني أمك شلون اقتنعت بـ هالسهولة
- مو بسهولة
صاعدة ومدورة بالغرفة هيَّ وايات
ولگت بالمخاد حرز ملفوف من فاتحته بي اسمي واسم أمي
وشعر كله دنابيس
وجوة الزولية خيوط معگودة وبنصها قطع قماش كلش صغيرة شلون ترديها متصدگ بعد كل هذا
- يعني بت خالتك المحترمة مسويتلنا سحر
- طبعاً لا
- وانتَ شعرفك لو جاي تدافع الها فوگ عمايلها السودة
- بتول شبيچ ادافع شنو ؟!!
أختي مشتركة وياها ومسوية هالشغلات بـ إيدها
بعدين لو اكو سحر چان هسة تلگيني مگلوب طنطل عليچ يعني لو مطلگچ لو متزوج مو بعدني احبچ وهذا الحچي صارله سنين
- وأمك شلون تصدگ
شنو شايفتني يوميا لابسة حجابي ومفترة ع الدجالين
واني اگول يربي شفتها وشافتني تصيح أم السحورة
لو تصعد ترش الشقة وتقرا المعوذات
والله مداصدگ الله ينتقم منكم.. بيكم العيب وترموني بي هسة منو طلعت أم السحورة اني لو أختك المحترمة
- بتووووول
- اي عيني ليش لا
أختك هاي شلون يصير احچي عليها
بس مرتك طزززز سنين صارلهم يشيلون ويرگعون بيها بسبب ايات الحقيرة وعادي مجرد رزلتها وانتهت
- تعالي ساعديني اغير ملابسي حتى اصلي
- لو غفران عيني
الصارلك أشهر تحب وتتغزل بيها
والله شنو علمود اعرف شكو وراها اي صدگتك مو زوج وتعبر علية دروب الدبدوب يلا ماما العبهن بعيد
- اريد ابدل
- ماكو تبديل احچي شـ چنت تحچي وياها كل هالأشهر
- بتول راح يأذن اصلي ونحچي
باوعتله بـ عصبية ورحت للغرفة جبت ملابسه
رفعت البلوز دانزعه شكل بـ راسه صاح اختنگت ولچ
سحبت التراك لبسته ونترت لتخاف ميصيرلك شي واذا اختنگت قابل راح تموت روحك روح بزون
- ههههههههههههه ها يعني ترديني اموت
- تغزلت بيها احچي مخلد
- شوية مو هواي
- شنو يعني شوية مثلاً گلتلها اموت ان شاء الله و ما كملت العليچ
- قافلة ع موتي انتِ
- واكيد چنت تحچي علية ومطلعني سندس الشريرة وانتِ ياااااا عيني جويسم المسكين كلكم نفس الـ***
- سندس منو جويسم منو شنو هالأسماء الغريبة
- لكككككك راح انجلططططط من برودك
بس والله لو تموت ما ارجعلك عود عبالك هالشي يفيد وراح يشفعلك عندي
لا يمة بس تصير زين اعوفك وعود روح تزوج هاي بت خالتك أم السحورة حتى ترسملك خروف بصف المطي هالمرة وتصعد عليهن وخل أمك تهلهل وتفرح
- اريد اتوضى ما خلصتي صياح
- مخلد.. وغمضت عيني احاول اكتم غضبي
- ها حبيبي شكو ترى الصلاة خير العمل شلچ بالمشاكل
- اتفل بـ وجهي اذا وصلت صلاتك أبو النسوان
- لا حبيبي عيب اتفل شنو
- متووووصل
- ميخالف اني وربي بس ساعديني اتوضى وكافي عاد
اخذته للحمام غسل وطلع يتوضى
انتظرته يخلص وصلته للصالة ورجعت للغرفة
شياطين الجن والأنس كلها تطفر گدام عيني ابد مگاعد اتحمل الموضوع السمعته خصوصاً علاقته بنعلان
طيبة.. گاعدة ويا الحجية اباوع محاضرة دينية ورحمة ترسم النسرين دگ جهازها چان ع التخم يمي
باوعت صالح داز رسالة كاتب بيها احبچ
التفتت علية ها منو
غمزتلها الحبيب ديتغزل عيني گومي ردي عليه خطية
- عوفي بعدين
- ليش ولچ مو تگولين بارد هذا شنو لعد
- تلگين واحد معلمة وإلا وينه وين الرومانسية رجلي واعرفه
- ليش تظلمي يجوز بُعدچ حسسه بـ قيمتچ
- يجوز
- يعني مراح تجاوبين
- لا رسمتي أهم من كل شي عوفي ينتظر شعنده قابل
شمرت الموبايل ورجعت اتفرج تلفزيون
سمعت الباب انفتحت
گمت باوعت من الشباك هذا همام رحمة لبسي حجابچ
گامت لبست ويا رجعتها صاح يا الله گتله تفضل
طب شكله ضايج
كل مرة يگعد وياهم شو هسة سلم وصعد للغرفة رحت ورى واگف ديبدل ها حبيبي خيرك صاير شي
- اي بس مالي خلگ احچي
- وفضولي
- شلون اني ويا فضولچ من تزوجتچ ولليوم مشتغل ما تطفي شوية وتريحينا واليرحم أمچ ذيچ الطيبة
- لا مستحيل يطفى خصوصاً اذا الموضوع يخصك
- ادري مراح تفكين عني ياخة تعالي احچيلچ
- ركضت گعدت ع الچرباية وبدا يسولفلي ظليت مثل الصنم لا أخذ ولا انطي من الصدمة
- بس كمل صحت والله حسيت ورى سالفة مخلد شي
- شلون يعني
- ما ادري بس مجرد احساس
- وانتِ احساسچ خبرة تعلميني بي قابل
- ههههههه اي مثلي
- حتى ضحكتچ صايرة مو راحة شجاچ يولي خربتي
- منو خربني غير انتِ لو نسيت الگصايب
- هههههه لا ما نسيت
- اگول عمو ممكن اسأل سؤال بس تجاوبني بـ صراحة
- اسألي يبعد عمچ حتى بس اجاوب اعلمچ العمو شلون تصير إلا اتوبچ تتحارشين بية
- هههههههههه تريدها من الله
المهم اريد اسألك انتَ همْ حچيت ويا صالح شي يخص رحمة
- اي حچيت لعد شلون قبل يبقيها هنا
- يعني صدگ اهتمامه ما اجة من فراغ وبسببك تغير
- شنو قصدچ وضحي
- مو هوَ صاير يهتم بيها يراسلها يتغزل وحچيتلك هيَّ شگد چانت تعاني من بروده فـ تگول واحد علمه
- لا طيبة الأهتمام يعطى ولا يطلب
شلون تتوقعين اروح اگوله اهتم بيها وحسسها بحبك
وشنو فائدة الأهتمام لو اجة بعد الطلب
اني بهالحالة راح ارخص بـ رحمة وبمشاعرها وتعرفين رحمة بالنسبة الي حالها من حال بتول
- لعد شگتله وحس على روحه والله كلش متغير
- ما گتله غير جملتين
أول جملة ضروري تبقيها يمنا حتى ترتاح شوية وتهدأ اعصابها بعدها تگدرون تتفاهمون بـ هدوء بعيداً عن التوتر والضغط النفسي
أما الجملة الثانية راجع نفس صالح
شوف نقاط الضغف البيك وحاول تغيرهن قبل لا تخسر زواجك وترجع النقطة الصفر ورحمة متستاهل تخذلها
الله وكيلچ غير هالجملتين ما حچيت
واكيد صالح اذكى من أن يواجه صعوبة بـ فهم الكلام
تلگي راجع نفسه وعرف تقصيره
ولو ما يحبها ميغير من نفسه اني چنت واثق بعدها عنه راح يغيره
- شلون
- أختچ ربت ويا صالح يعني من طفولتها وهيَّ بـ إيده وبين عيونه حتى زواجه منها ما شاف بي صعوبة
ما واجه مشاكل يلا حصلها
ولا عاش وياها فترة خطوبة مثل أي اثنين
حتى ما كان اكو غرابة بـ ارتباطه بيها.. لأن هيَّ تربيته يعني يعرفها أكثر ما يعرف روحه
هذا كله خلا يوهم نفسه بالأشباع منها
لدرجة صار ميحس بوجودها إلا وقت حاجته واكيد هذا الشي غلط بس داحچيلچ هوَ شلون يفكر وبشنو يحس
أما هسة وبعد ما تركته ودق ناقوس الخطر بخسارتها وعى على نفسه وعرف قيمتها
ومنا بدت مشاعره تتحرك بشكل ايجابي
يحس بحبها
يشتاقلها
يفتقد الوجودها يمه
يخلي راسه ع المخده ومن گد التفكير بيها يحتاج ولو رسالة منها يسكن هالأشتياق ويهدأ مشاعره
يعني أبن عمچ توه عاش فترة الخطوبة
توه بدا يحس ويشتاق ويفتقد وكل هذا چنت متوقعه يصير بمجرد بعدها عنه
- زين اني مو چنت عايشة وياك شو ما صار كل هذا
- لتقارنيهم بينا طيبة
احنة ورغم عيشتنا سوة بس كنت اتجبب منچ وتتجببين مني يعني داخلنا اكو احساس بالحرمة وهالشي ايجابي
الخجل الكان بيناتنا اذا دل على شي
فـ يدل على تقبل بعضنا البعض كـ زوج وزوجة
بينما أختچ وصالح عاشوا مثل الأخوان.. ولهذا السبب صالح واجه صعوبة بتقبل مشاعره اتجاها
- صح اني چنت اخجل حتى احضنك
- واني چنت ما اگدر اخلي عيني بعينچ فترة طويلة ما اتجرأ اباوع الدموعچ واخاف من زعلچ هذا كله شنو
- اممممم حب مو استاذ
- جنون هذا مو بس حب ورغم هالشي ما ردت اضعف الهالمشاعر حتى لا استغل وجودچ بيناتنا
- دضعف الخاطر ربك والله شلعت گلبي بوقتها
- هههههههه
بس المهم هاي اني ضعفت بالنهاية ووگعت بشباك حبچ
- بشرفك هم ندمت بيوم لأن ارتبطت بية
- اذا اريد اندم على شي فـ أندم لأن ضيعت سنين من حياتنا الزوجية ع الورق وبس
- هههههه ليش
- لأن لو ماخذچ ساعتها چان هسة عندي خمس جهال على أقل تقدير حتى لو تدرسين عادي تدبريها
- خمسة يا ظالم
- اريد طفل
- اهووووو اني هم صوچي مخبلة واذكرك بهالموضوع
- لا صدگ اريد طفل كافي حامد كبر
- شـ كبر الله يخليك كل عمره سنة ونص اگعد راحة
- اروح اتزوج ترى
- احرگك همام وروح أمي احرگك وهنا بالغرفة احذرك تتحارش بية بهيچ سالفة لأن ما اتفاهم ساعتها
- ههههههه لعد جيبيلي طفل وما اتزوج
- يمعود أبنك صغير
- اي عادي يربون سوة شبيها
- هاي سوالف أمك بديت تتطبقهن براسي والله مصيبة
- حبيبتي وتالي
- شوف عمري مال اسوي طفل هسة مستحيل بس ها ممكن اوعدك ع السنة الجديدة افكر بالموضوع
- توعديني نسوي مو تفكرين اسكت غيرها هسة اسوي
- ههههههه يلا اوعدك ع السنة الجديدة
- شنو
- نسوي طفل
- هاي هيَّ صايرين بوية بس وعد الحر دين اذا انقض ما اضمنلچ شراح تكون العقوبة ساعتها
- ههههههههه لا خلص وعد وداعة عيونك الأموت بيها
- قفلي الباب وتعالي
- متتعشى
- انتِ موجودة يا أكل هذا
- اگول طلعنا فدوة والله ضايجين وما بية اسوي العشى
- يلا گومي وشوفي أمي تگدر تجي ويانة
- الله عليك
- ههههههه شبيچ شو تفاجأتي اليشوفچ يگول حارمكم من الطلعة شنو السالفة يولي
- لا بس مو شفتك تعبان كلش فـ متوقعت تگدر تطلعنا
- لعيونچ كل شي يروح فدوة حتى تعبي
- لا والله
شو اني الاروح فدوة الك بكل شي بية... وبست خده
نزلت اركض رحمة بعدها ترسم ويا نسرين گومي ولچ
باوعت علية شبيچ شكو
- نطلع نتعشى برة
- والله
- هههه والله بس استعجلي ليروح يغير رأيه لأن تعبان
بس حچيتها گامت بـ لهفة
لزمت إيد نسرين وصارت تگمز بالصالة وتصيح طلعةة ولكم طلعةةةةة واخيراً راااااااااح نننننطلع
خربنا عليها ضحك اني والحجية
- التفتت وراية بيبي يلا انتِ هم تجين ويانة
- لا ما بية
- فدوة حبابة الخاطري
- لا ي يمة خاطرچ على عيني وراسي بس والله تعبانة
ردت حاولت عاندت متقبل تطلع عفتها براحتها
باوعت الرحمة بعدها تگمز
سحبتها من إيدها كافي امشي بدلي انتِ ونسرين
باستني تضحك هوى وداعتچ خمس دقايق ونكون يمچ
- بلغي صالح
- اممم يعني ضروري
- طبعاً ضروري من كل عقلچ تردين تطلعين بدون علمه
رحمة.. تمام هسة اتصل بي بس ابدل الـ بنتچ
حچيتها ورحت للغرفة
غيرت ملابس نسرين ومشطت شعرها.. باوعت للساعة بعدها تسعة ونص ما اتصور صالح رجع للبيت
- سحبت موبايلي اتصلت بي نهاية المكالمة رد وينك
- ها حبيبي بالشغل خير
- همام راح يطلعنا نتعشى برة فـ حبيت ابلغك
- اي ادري صار عندي علم وما عندي اشكال ألف عافية
- شلون عرفت ؟!!
- همام اتصل بية وبلغني
- هااا ماشي يلا لازم اروح سلم على الكل وبوس ماما
- بس ماما
- اي بس ماما.. لا لا وبيبي همْ
- هههه تتدللين يوصل ان شاء الله يلا روحي لتعطليهم
سديت الخط وغيرت ملابسي ع السريع
بيومها تونست كلش الي فترة مطالعة ومغيرة جو برة بسبب كورونا وحبستنا بالبيت
بعد اسبوع واگفة اسوي العشى ويا طيبة دگ جهازي
باوعت صالح
جاوبته گال اني بالباب تعالي طلعيلي
ذبيت الحجاب على راسي وطلعت فتحتها اله استقبلني بـ ابتسامة ها شلونها الحلوة بـ غيابي
- الحمد لله تفضل
- همام موجود
- لا بعده ما رجع شوية ويجي
- روحي لعد غيري ملابسچ وتعالي حتى نطلع نتعشى
- صدگ !!
- هههههههه اي وعيونچ هاي الفرحانة
- خوش بس شنو راح تظل بالباب تفضل بين ما اجهز
- ميحتاج بس جيبيلي الجهال مشتاقلهم كلش
- اي تتدلل
- حچيتها ودخلت اركض نسرررين وينچ حبيبتي تعالي
- ها خالة
- خالو صالح بالباب يريدچ
- ااااي والله مشتاقتله همزين اجةةةة
طلعت طايرة من الفرح خطية
اخذت حامد اله ودخلت اجهز نفسي ع السريع
توني طالعة لگيت همام ديسلم عليه بالباب... انتظرتهم يخلصون وطلعنا
أول رحنا للمطعم تعشينا بعدين ظل يفرني بالسيارة
شوية وگال القرص بالمرايا الگدامچ انطينيا
نزلتها چان توگع بحضني وردة حمرة باوعتله وضحكت
- امممم چني شايفة هالمشهد من قبل
- اي غير هسة شفتي
- لا لا مو هسة شايفتة من زمان بس وين يا ترى وين
- يم صالح شبيچ
- اي اي تذكرت هذا مشهد بمسلسل تركي
البطل يگول للبطلة اكو على انفك شي ومن تنزل المرايا توگع الوردة بـ حضنها
- متابعة جيدة
- ههههههه لا والله انتَ المتابع الجيد
من شوكت صاير تباوع مسلسلات تركية لا وتقلدهم همْ جيد جداً
- شسوي احاول اتعلم رومانسية ما اعرف بـ هالسوالف
- ههههههههههههههه يلا همْ انعم الله احسن من الماكو
- ما عجبتچ الحركة يعني
- مو كلش لأن شايفتها قبل ما بيها أبتكار
- ومنين اجيبلچ شي جديد اذا انتِ مگابلة المسلسلات وگاعدة حتى الخمط ميفيد بيچ بسرعة تلگفي
- منا.. واشرت على صدره
- احممم
- ها شبيك شنو صعبة لو ما استاهل مثلاً
- لا بوية اذا انتِ متستاهلين منو التستاهل.. على أمرچ
بنص الطريق ركن السيارة وگال ننزل نتمشى شوية
مشينا مسافة عافني وراح ما ادري وين
ظليت اباوع داير مدايري هذا وين اختفى فجأة صارت لمسة على ظهري
- درت وجهي مخروعة هذا انتَ والله اجيت اضربك
- هههههه ليش
- شمدريني عبالي يتحارشون بية
- ومنو هذا اليتجرأ يتحارش واني موجود غير يكتب نهاية عمره على إيده
- شنو ورى ظهرك
- هدية الچ تفضلي تستاهلين
- ضحكت ضحكة حتى الشباب اليمنا صاروا يباوعون
- گبل سحبني من إيدي يبعدني عنهم صووتچ تخبلتي
- هاي شنو بشرفك
- هدية شنو يعني مو سألتي وجاوبت
- ماشا والدب ؟!!!
- والله طلعناچ ما عاجبچ
جبت ورد گلتي اريد شي مبتكر هالمشهد شايفته
وهاي اني ابتكرت
اتحدى واحد جايب المرته مثل هالهدية المميزة شوفي
- رفعها بـ وجهي تخبل خصوصاً ماشا لأن حيل تشبهچ
- صاااالح
- ها حبيبي شنو ما عجبتچ
- ادري شنو قابل گالولك متزوج طفلة
- مو انتِ تحبين ماشا والدب وتمشي وتغنين اغنيتها
يا صغير لما لا تنم
هل عديت كل الغنم
والذئب الذي هناك
خطف غنم خلف الشباك
- هههههههه بس والله فضحتنا
لا والمصيبل حافظها !!!! من شوكت بلا جديدة هاي
- البارحة والله حفظتها علمودچ
- هههههه انتَ شدتسوي الخاطر الله والله غريب كلش
- علمودك انتَ وبس اكشخ واتعلم والبس
- ههههه شكراً
- يلا هاچ اخذي همْ هدية وهمْ ضحكتچ بعد شتردين
- متقصر رحم الله والديك
- تاكلين لبلبي
- اي الله صح توني متعشية بس والله احبه ما اقاومه
- يلا تعالي ذاك يبيع ع الرصيف
حچاها ولزمني من إيدي عبرنا الشارع
من بداية زواجنا لليوم معشت ويا صالح مثل هاللحظات الحلوة.. هاي أول مرة احس بـ حبه واهتمامه وأول مرة يكون قريب مني الـ هالدرجة بحيث صار يعرف شنو احب ويشاركني بـ حب هالشي
بتول.. اسبوعين والوضع هادئ يمنا
لا اني حچيت ويا مخلد
ولا هوَ رجع وفتح الموضوع وياية.. يمكن لأن ديلاحظ عصبيتي ويحاول يخليني اهدأ وانسى السالفة شوية
ظل عمو يشتغل على موضوع سفره بـ مساعدة القائد
اليوم اجة وگال وصلنا لرئيس الوزراء وراح تسافر
كنت محسبه حساب اسافر وياهم وهنا الصدمة جوازي طلع ساقط ويحتاج اله تجديد !!!
اعصابي انهارات بيومها
الضغوطات علية من كل الجهات
أخر شي مخلد قنعني أمه تروح ويا ومن قبلت گدرت ارتاح واطمأن شوية مهما صار تظل أمه وتخاف عليه
باچر الفجر يسافرون هوَ وأمه واثنين من ولد عمه
جهزت الجنطة وظليت افتر على روحي
ساعة احس ناسية شي وساعة اگول شلون اخلي وحده
بعدني رايحة راجعة بالمكان دخل مخلد للغرفة وقطع طريقي بالكرسي شبيچ دايخة اكو شي
- ما ادري اخاف نسيت شغلة رغم تأكدت من الجنطة
- ملابسي تحاليلي شاحنتي الفلوس
- كلهن خليتهن
- بعد شكو هوَ هذا كل شي مناسية بس خليچ مرتاحة
- انتَ عادي تسافر بدوني
- أمي موجودة
- اعرف والله بس ما ادري ليش مدارتاح شسوي فهمني
- بس حچيتها سحبني من إيدي گعدت يم رجله
مسح على راسي مبتسم لتخافين وجودچ بگلبي كافي حتى يقويني مو إلا تكونين وياية بنفس المكان
- انتَ قوي وراح ترجع توگف على رجلك ان شاء الله
- قوي بيچ
- يزن محتاج الطول أبوه
محتاج يشوفك واگف على حيلك واگف مخلد مو گاعد على هالكرسي
تاخذه للمدرسه
تدربه وياك
تطلعه
تودي للدكتور اذا لا سامح تمرض بـ يوم من الأيام...
الخاطره هوَ شد حيلك
گعدتك على هالكرسي كلش توجع الگلب
وما اتصور يهون عليك وجع گلبي يلا قوي نفسك وگوم
- ان شاء الله بس ادعيلي
- والله ادعيلك بدون متگول لليل نهار ادعيلك لـ درجة نسيت نفسي بالدعاء گد ما ذكرتك بـ توسلاتي
- رحم الله والديچ
- يلا نام وراك گعدة من الفجر
- جيبي يزن ينام يمي اريد اشبع منه قبل لا اروح
ابتسمت وهزيت راسي بالموافقة
اخذته للحمام وجبتله يزن تمدد بـ صفه يضحك
ردت اروح گال نامي هنا بس اليوم باوعلي يزن اي ماما عفية ظلي يمنا
ما حبيت أكسر بـ خاطرهم
طفيت الضوة وتمددت صار يزن بيناتنا
گبل اخذ إيدي حطها على صدره ورفع إيد أبوه ثبتها فوگ إيدي هيچ الزم إيد ماما لتعوفها ولتتعاركون بعد
- باوعلي وابتسم صار وليدي اني اصلاً ما اگدر اعوفها
- تحبها بابا
- كلش بگد ما احبك انتَ
- واني شگد تحبني هواي لو شوية
- احبك بگد عافيتي اللي نسلبت مني وصرتلي عافية
بتول.. شلون تالي متنامون اليوم
يزن.. بس نحچي شوية بابا باچر يسافر بعد ما اشوفه
بتول.. بس حبيبي أبوك ورى سفر ولازم ينام ويرتاح
مخلد.. اني مرتاح هيچ
بتول.. مخلدددد
اني عصبية وهذا گاعد يستفزني بـ ابتسامته
الليل كله خلصوا يلغون براسي
قريب الأذان نام يزن على روحه حضنه مخلد وغمض
- شنو راح تنام ما ظل وقت
- بس شوية
- مخلد راح يأذن
- اي من يأذن گعديني اصلي واروح كلش نعست هسة
عفتهم نايمين وگمت اتأكد من الجنطة
عشر دقايق وأذن
بالگوة گعدت مخلد صلينا وسويت الريوگ دناكل باوع علية وعيونه تشرح حالته لزمت إيده مبتسمة
- راح تصير احسن متأكدة
- انتم الشاغلين بالي مو صحتي صدگيني
- واحنة ماكو شي يهمنا بالدنيا غير صحتك وعافيتك
بعدين شكو علينا
راح نروح ببيت جدي وكلهم هناك يمنا
ان شاء الله متتأخر عمو گال شغلة شهر شهرين بالزايد
- ان شاء الله
- حضنت وجهه بـ إيدي وبست راسه يلا أكل وراك سفر
نص ساعة واجة عمو اخذنا للمطار ودعناهم وسافروا
رجعت للشقة طفيت الأجهزة ورحت ويا البيت جدي
دخلت رحمة وطيبة توهن گاعدات بس شافني ركضن
رحمة.. واخيراً اجيتي راح نتونس سوة
بتول.. انتِ شوكت تحسين على دمچ وترجعين الرجلچ
- گاعدة على گلبچ حبيبتي
- لا صدگ خطية ولچ ارجعي كافي دلال
- عود من تبطلين دلالچ على مخلد أفكر اعقل وارجع
- اظل ارحم منچ على الأقل مگابلته وگاعدة
- من ينشل رجلي عود اگابله
- ههه خبال بيش متفاولة للرجال انتَ متسمعين أختچ
طيبة.. اسمع بس شسويلها القاضي راضي المتهم شعلي
رحمة.. مشت الأيام وصالح ما تخلى عني نهائياً
فعلاً ثبت حبه وصدق مشاعره
تحملني بمزاجيتي وتقبل بعدي عنه في سبيل يخليني ارجع عن قناعة من غير الليالي الحلوة العشناها سوة
بين يوم ويوم چان يجي يطلعني
غرگني بالهدايا
وتغزل بية بـ كل ليلة مثل ميتغزل العاشق بـ معشوقته
شهرين مرت على وجودي ببيت همام
بـ يوم من الأيام اجة طلعني گتله اريد ارجع وياك
استغربت من گلي ابقي بعد
أول شي زعلت بعدين فكرت بيني وبين نفسي متأكدة اكو سبب لأن كلما اگوله هسة يلا تأكدت من حبك يگول لا بعد راح تتأكدين أكثر بالأيام القادمة
نجحت عملية مخلد وخضع للعلاج الطبيعي هناك
فرحة بتول چانت متنوصف
بس خطية ظلت عايشة بقلق لأن حسب كلام الدكاترة رجله تضررت بسبب الشضايا الأستقرت بيها
اليوم العصر اتصل صالح گال جهزي نفسچ اني بالطريق
استغربت جيتة
بالعادة اذا ردنا نطلع بعد صلاة المغرب
غيرت ملابسي وظليت انتظره
شوية واجة
سألته وين رد مفاجأة بس اصبري شوية وراح تعرفين
باوعت للطريق وصلنا قريب بيت جدي
عبالي راح يرجعني
تفاجأت من استدار بالفرع الثاني ووگف يم بيت صغير
- نزل من السيارة فتحلي الباب باوعت للبيت هذا شنو
- فتح إيدي خله المفتاح بيها هذا بيتنا حبيبتي
صفنت بـ وجهه متعجبة ونزلت دموع الفرح
اشر يلا افتحي الباب
فتحتها ودخلت فارش البيت وحتى غرفتنا ناقلها عبارة عن غرفتين وصالة صح صغير بس بناءه يجنن
- التفتت حضنته حيل هاي شنو شوكت اجرته
- اشتريته
- شنو !!
- اشتريته الچ حبيبتي.. هذا بيتچ ملكچ محد يشاركچ ملكيته وماكو بشر يغثچ بي
- تحچي صدگ
- وداعتچ.. اهم شي عندي راحتچ
- شلون اشتريته يعني فلوسك متكفي للبيت
- سعد وعمي محمود ساعدوني وقدمت على قرض بس استلمه ارجع فلوسهم
- يا ربي ممصدگة احبك والله احببببك.. حضنته اضحك هناك واتذكرت صالح ماما شلون
- تجي لتخافين وحتى غرفتها جاهزة
- شلون قنعتها تعوف بيبي
- مرت عمي ساعدتني قنعتها ولتنسين أمي ماعدها أعز منچ بالدنيا اكيد تقبل ماطول بـ هالشي راحتچ
بعدين صار لازم ابعدكم عن مشاكل بيت جدي
طول ما عمتي سناء هناك مراح ترتاحون وراحتكم هيَّ راحتي
- الله... يعني راح نعيش هنا اني وانتَ وماما وبسسس
- ههههههه اي
- شلون شجاب هالفكرة براسك فهمني
- اولاً حتى تعرفين شگد احبچ ومتهتز ثقتچ بية
ثانياً صار ضروري نطلع لأن بعد ما عرفتي مشاعر سمير صعب بالنسبة الچ تعيشين ويا ببيت واحد
- يااااا وانتَ شمدريك
- من زمان ادري بعد ما تزوجنا بـ شهر حچالي سعد
- زين شلون عرفت اجة واجهني
- اكيد أخذ الأذن مني واني وافقت بس حتى تعرفين اني همْ متحمل وضاغط على نفسي الخاطرچ مو بس انتِ
- والله انصدمت يعني..
- لتكملين انسي كل شي الماضي يظل ماضي المهم اني احبچ وانتَ تحبيني هذا حاضرنا ومستقبلنا مفهوم
- هزيت براسي مفهوم حبيبي
- وبعد شغلة خل نحچي بيها حتى نخلص من المشاكل
- وهيَّ ؟!!
- مسألة الحمل تتأجل بعد التخرج غير هالكلام ما عندي
- هاي بالذات اموت واعرف سببها
- راح احچي حتى لتسمحين للشيطان يوسوس براسچ بشغلات مالها وجود
- احچي
- گلبچ تعبان رحمة ميتحمل الحمل يحتاجلچ مراجعة مستمرة للدكاترة وهالشي ميصير وانتِ تدرسين
- شبي گلبي مريضة يعني ؟!!
- شي بسيط لتخافين ع العلاج تصيرين زينة حبيبتي
ردت احچي دخلت أمي فرحانة
بطبتها نسيت الموضوع
حضنتها وضحكت والله لو ما قابلة تجين چان رجعت هناك ما اتحمل اعيش بمكان انتِ مو بي
- واني ما اگدر افاركگم لا انتِ ولا صالح
بعد استقراري بـ فترة طلبت من طيبة تاخذني للدكتور
وفعلاً اخذتني
طلع مرضي مو هين مثل ما گال صالح بس مو مميت
محد چان يعرف بالموضوع غير أمي وصالح
حتى طيبة من عرفت انهارات
واخذت فترة يلا گدرت تتقبل الموضوع مثلي بعد ما وگع لسان ماما وهيَّ تقنع بيها ماكو أي خطر يهدد حياتي
بتول.. شهرين ونص يلا رجع مخلد گاعد ع الكرسي
ولأن عنده مراجعات يوميا
اضطرينا نستقر جوة يم ييت أهله
علاقتي بيهم جداً سطحية صح راح اعيش وياهم بس ما بيناتنا غير السلام
بعد شهر وعشر أيام گدر يتجاوز مرحلة الكرسي
اعتمد ع العكازات وگام على حيلة
بالبداية واجه صعوبة بعدين تعود عليهن بحيث والحمد لله گدر يرجع الدوامه
خلال هالفترة عمتي صارت تحاول تتقرب مني
حسيتها حابة تصلح الموقف
بس للأسف بعد كل شي صار مداگدر اتقبلهم بـ حياتي لدرجة حتى مخلد علاقتي بي غير مستقرة
الوحيدة الرجعت علاقتي بيها أخته جنات
أما ايات
من يوم المشكلة ومخلد مانعها تدخل للبيت وحسب ما سمعت غفران أخوانها مشوفينها الويل حتى منعوها تداوم وراحت الوظيفة عليها
اليوم كملت العشى وانطيت العلاج العمتي
عفت يزن يلعب بالأيباد ورحت سويت الچاي المخلد
دخلت عليه ديشتغل باللابتوب
خليت الگلاص گدامه باوعلي وابتسم كافي شغل هيچ تتعب ارتاح شوية
- مرتاح لتشيلين همي
- تعال اساعدك اگعد ع الچرباية اريد الملم هالهوسة
- بس حچيتها مد إيده يلا ساعديني ليش لا
اخذته للفراشه گال سدي الباب اريد اغير ملابسي وگع الماي عليهن
رحت قفلتها ورجعت طلعت اله فانيلا
ساعدته ينزع دالبسه الفانيلا سحبني وگعني بـ حضنه
- مشتاقلچ
- مخلد
- بتول حسي حتى لو زعلانة تظلين مرتي وهذا ابسط حق الي عليچ مثل ما اني ممقصر بحقوقي اتجاهچ
- ادري انتَ مو تعبان
- تعبان بس مو عطلان عادي بعدني بـ حيلي
- اترجاك..
- اني محتاجچ والباقي عليچ اذا حابة تحصلين أثم ما احچي بعد.. انتِ حرة بـ سجل اعمالچ
- زين خليني اسبح واجيك لأن چنت بالمطبخ اشتغل
حچيتها وگمت للكنتور اخذت الملابس ورحت سبحت
رجعت للغرفة ديحچي ويا عمي بالموبايل
مشطت شعري دالفه سد الخط باوعتله مترددة أشر يلا تعالي شبيچ خجلانة مني
تقربت بـ خطوات بطيئة شگد چنت ضايجة منه
بس من لمسني نسيت كل شي ورجع ذاك مخلد القديم الما حبيت ولا راح احب رجال غيره بكل عمري
من يومها صار يطالبني بـ حقوقه
ويوميا يعتذر عن أفعال أهله وبيت خالته
صح ما نسيت بس تعايشت خصوصاً من عرفت بنفسي حامل هنا فرحة يزن ومخلد فرحتني أكثر من الخبر نفسه
علاج مخلد مستمر بس رجله مستحيل ترجع مثل قبل
وعلاقتي ببيت أهله مثل ما هيَّ
أما علاقتي بي بدت تتحسن بس لازال التوتر بيها قائم بسبب عيشتي ويا أمه ببيت واحد رغم ماكو أي مشاكل بينتنا
عموماً مجبورة اتحمل هالشي
صحت مخلد متساعد نرجع الشقتنا ولا نگدر نطلع بعيد عنها وهيَّ مرة وحيدة
طيبة.. بما اني انطيت وعد الهمام نسوي طفل ع السنة الجديدة صار لازم انفذ الوعد غصباً عني بحلول سنة 2021
الحمد لله ما صار هالشي بسرعة
شهرين بالثالث صار عندي احساس تم الحمل
وفعلاً بعد ما حللت بتول بـ اسبوعين حللت اني وطلعت حامل
مو كلش تعبت بالتنسى مثل حملي بـ أبني
لذلك شكيت حامل بولد
وفعلاً بعد أربع أشهر سوينا سونار اني وبتول اثنينا ولد
اليوم گال همام نروح نزور أمير المؤمنين ومناك اخذچ للمقبرة تزورين أمچ وبيت جدچ
كلش فرحت
خليت الجهال والحجية يم خديجة وطلعنا
انصدمت من مر على بيت صالح گتله ليش رد بابتسامة يجون ويانا حبيت اسويها مفاجأة الچ
وصلنا زرنا ورحنا للمقابر
صح جاية اني لهنا بس قبل موت أبوية يعني هاي أول مرة اشوف قبره بيها حاولت على گد ما اگدر اتجاهل وجوده زرت أمي وجدو وعمي والتفتت على صالح
شفته يباوع على قبر أبوه ودموعه تنزل
تقربت منه ليش تبچي هذا هوَ تساوى وياهم ونايم جوة التراب النايمين همَ تحته
- التفت على قبر أبوية وباوعلي تعالي وراية
أخذ رحمة ووگف گدامه
حچى ويا هواي أخر شي التفت علينا تدرون المواجهة الصارت قبل فترة چانت ويا جماعة أبوچن
وتدرون نفسهم الصفوا
من قبلها چان الهم إيد بتصفية أبوية وجدي بناءً على طلب رزاق وأرشد يعني اني اخذت بثار أبوية واخيراً
ذولة نفسهم جماعة أبوچ طيبة ونفسهم جماعة أرشد
أكبر تجار اعضاء بشرية ومخدرات
من غير الدعارة وسحبهم البنات العالم للطريق الحرام
طيبة.. باوعتله بـ صدمة ممستوعبة كلامة
شگد چنت اسأل همام منو ذولة يگول عادي مجرمين حققنا وياهم حالهم حال الغير
التفتت عليه اسأله بـ نظراتي عن صحة الكلام
هز بـ راسه أي
رجعت نظري على قبر أبوية ونزلت دموعي حتى حرام العتب بيك بس للأسف ضمك التراب وما ضمتك المزابل
المثلك كفر يندفن بـ أطهر مكان بالدنيا
عشت بالقذارة
ومتت وانتَ قذررر
نعم يا بني آدم يؤسفني ذلك ولكن أبي لم يكن إنساناً.
النهاية.....
التقيكم قريباً في رواية (عُقد البنات)
تجدون إعلانها على حسابي الخاص في الواتباد
Lubna_Almousawi
الى ذلك الوقت
استودعكم الله واسترعيكم أحبتي ...
دمتكم بخير وصحة وأمان.... كل الود والأحترام ❤🥀