أبي لم يكن إنسانًا

مستقبل الرواية ج7

#أبي_لم_يكن_إنساناً
مستقبل الرواية الجزء السابع..
للكاتبة لبنى الموسوي

واني على هالحالة سمعت يزن يصرخ بـ أسم أبوه
اريد اگوم ما اگدر
الوجع شل حتى عقلي مو بس حركتي
بعدني احاول طب أبني يركض بابا وگع گومي نساعده لأن ثگيل مگدرت اشيله ماما.. حچاها وبچى

سندت نفسي على يدة الطباخ
ردت اگوم الماي الحار ديفور بالدلة ما احس إلا وگع على ظهري انسلخت... شاغت روحي من الألم وصرخت من نص گلبي

موقف ما اتمنى حتى العدوي...
أبني يبچي
مخلد من بعيد يصيح جاوبوني شديصير وياكم
أما اني فالألم صار ضعف علية
همْ الماي الحار وهمْ وجع بطني الديسحب روحي من بين ضلوعي شوية شوية

قويت نفسي وگمت الدم وصل الـ رجلي من النزف
حضنت يزن بـ حنية وسندت نفسي عليه لحد ما دخلنا للغرفة لگيت مخلد بالگاع واصل قريب الباب

- گعدت يمه هاي شمسوي بـ روحك ليش نازل لهنا
- شبيچ
- ما بية شي لتخاف

- شنو ما بيچ يزن يگول أمي واگعة بالگاع
واصلاً اني بأذني سمعت من صرختي شديصير احچي لتضمين عني

- ماكو شي مخلد بس بطني وجعتني شوية
- مستبردة يعني

- لا معدتي يمكن وانچويت همْ
- وين

ردت اجاوبه اجتني الألام
نزلت على ركباتي صرخت بـ حرگة وبدون وعي
سحبني عليه شكو شتحسين احچي حبيبتي
طخت رجلي بـ رجله تدمر دم رفع عينه بـ صدمة بتول دتنزفين ؟!!!

- هزيت راسي وبچيت سحب وجهي بـ إيده
- حامل !!!
- اي

- ليش ولچ ليشششش
ليش ضميتي علية شلون تسكتين عن هيچ شغلة مهمة

- ما ادري مخلد مچنت اعرف
- توني سألتچ حامل وجاوبتيني اي شلون متعرفين !!

- يعني هوَ چان مجرد شك فـ من نزفت تأكد شكي

- ماكو وحده حامل ومتعرف بـ نفسها بتووول
- شنو قصدك ؟!!
- يعني انـتِ تعمدتي تخفين الموضوع وتظلين تشيلين وتحطين بية لأن متأكدة بـ هالطريقة تخسرين الطفل

- شدتحچي اااااانتَ
شـ شايفني حتى اقتل روح صارت ببطني حتى لو أبوه چان مو زين وميستاهل يصير أب للمرة الثانية

- بس حچيتها سحبني من شعري انتبهي الكلامچ ولچ

- دفعت إيده حيل وانتَ انتبه الكلامك والتصرفاتك لأن صدقاً بدت توصل حدها وياك و ويا أهلك

قرفصت على نفسي من الألم
الله ياااخذني حتى ترتاح مخلد الله ياخذني ويريحني من هالعيشة الگشرة

- التفت على يزن انزل صيح الـ بيبيتك بسرعة
- واگف بـ صفي لزمت إيده حيل متنزل يزن ديررر بالك

- عوفي الطفل خلي يروح
- ما اعوفه
- مدتشوفين حالتچ واني گدامچ عاجز شلون اساعدچ

- والله عندي استعداد اتجرع الألم واموت بـ مكاني ولا اطلب المساعدة من أمك وخواتك

- كااااافي عااااااد
كلها حجج حتى توگعين الطفل وهالشي مراح يصيرلچ

- اااااانتَ شنوووووو
ليش هيچ صرت مخلد ليش تغيرررررت
وين مخلد القديم ؟!! الگدامي هسة واحد غريب واحد لا اعرفه ولا يعرفني عبالك شخص ثاني تماماً

يا ريتك متت قبل لتراويني وجهك الحقيقي
مداصدگ هيچ الإنسان عنده قابلية يتغير بين ليلة ويوم

بعدين اني مستحيل اسوووويها
ما اقتل روح بريئة حتى لو بـ هالشي مصلحتي
اصلاً بسببك وبسبب أمك خسرت الطفل المفروض منك تنزل عينك بالگاع ومتتنفس حرف واحد وياية

- بسببي ؟!!

- اي بسببك لأن اشيلك يوميا
وبسبب أمك لأن اجت وغثتني اليوم بحيث بس طلعت بدت معدتي تفور الى ان صار اللي صار ونزفت

من اليوم راح تشوفون غير بتول
اوعدكم راح اتغير مثل ما تغيرت انتَ وأمك
وحق ربك إلا اجرحكم وأأذيكم بكل فرصة تصحلي مثل ما انتم تجرحوني وتتلذذون بـ أذيتي وعذابي

بس حچيتها دفر الباب بـ إيده
دفع يزن وصرخ انزل صيح بيبيتك بسرعةةةة
صحت ورى لترووووح ما سمع مني ردت اگوم سحبني مخلد عليه لتتحركين خليچ بـ مكانچ تسمعين

- هد إيدي هددددد
- لتعاندين وخلي هالليلة تعدي على خير
- هد إيدي لا اصيح بصوت ألم عليك أمة لا اله إلا الله

- انتِ مرة سويها
- اجيت اصيح لو ما الألم لزمني نزلت بالگاع اتمنى لو اموت بس المهم تنتهي هاللحظات على خير

- سحبني عليه حضني حيل تحملي هسة تجي أمي
- وخر عني ما طايقتك تسمع
- لتدفرين الطفل بـ بطنچ انتِ شنووو غبية لو تتعمديها

- اي يلا اتعمدها
اني ما اريدك ولا اريد منك طفل
يا أخي ما اريد انربط بيك هيَّ گوة خو ما گوة عوفني

- اثبتي ولچ اثبتي عاد لتجبريني استخدم القوة وياچ

- ردت اگوم رجع سحبني بـ عصبية باوعت بعيونه اريد اتصل بـ عمي عوفني شبيك

- لتتحركين اني اجيب الموبايل واتصل
- وين تگدر
- معليچ اگدر بس اگعدي

حچاها وزحف همزين الموبايل قريب ع الميز
سحبه واتصل على همام گله تعال محتاجك سأله شكو رد من تجي تعرف وعود جيب خديجة وياك

- أول ما سد الخط دخلت أمه للغرفة صاحت شصاير
- بتول حامل ودتنزف
- ياااا من شوكت غير چانت زعلانة يم أهلها

بتول.. ههههههه
يلا بلا استلم هاي اللي صحت الها علمود تساعدني !!!

التفتت عليها اضحك أبن حرام..
اي هذا البطني أبن حرام عفت أبنچ من ضيمكم ورحت امشي على حل شعري حتى ادور زلم من ورى

مخلد.. بتووووووول
أم مخلد.. خليها خل تطلع على حقيقتها ليش دتسكتها

مخلد.. يمة الخاطر الله متشوفيها من الوجع دتمسلت
تعالي شوفي شديصير وياها
حاولي تتصرفين بين ميجي عمها وياخذها للمستشفى

- تقربت علية رادت ترفع ثوبي سحبته حيل
- خليني اشوف خاف طرحتي
- ما وخري عني
- انتِ شوكت تجوزين من الصلافة يعني صدگ عجيب أمرچ فوگ شينه گواة عينه حلوة والله !!!

- الصلافة يمكم انتممممم موووو يمي

- مو صوجچ
صوچي اني الغبرة السمعت كلام أبني واجيت اساعدچ

مخلد.. كافي حچي كااافي مشاااكل شوفي شغلچ يمة

أم مخلد.. مدتشوفها متخليني شلون يعني افحصها

مخلد.. اني الزمها يلا شوفي شغلچ
التفت على يزن اطلع برة بابا وسد الباب وراك يلا أبني

حچاها وسحبني قيد إيدي بكل قوته
صح مريض بس ابد ما گدرت عليه شگد حاولت ادفعه ظل ثابت ولا تحرك

اجتني اوجاع مو طبيعية
صرخت كافي عوفوني ما اريد مساعدتكمممم
باوعت عمتي المخلد وگالت راح تطرح النزف قوي كلش

بعدها دتحچي متت من الوجع
لزمت إيد مخلد عضيتها من حرگة گلبي
ضغط على راسي حيل وصاح الله ياخذ العجز المنعني اگوم وانقذ الموقف

- بچيت وحضنت إيده مخلد راح امووووت سوي شي
- يمة دخيلچ ساعديها

- شسوي وليدي مرتك دتطرح
وهذا الوجع طبيعي اني جربته قبلها مو مرة أربع مرات الله يساعدها

لحظات مستحيل تنوصف
انسحبت بيها روحي من جسمي ألف مرة ورجعت
لحظات موت حتى بـ ولادتي ما عشتها ولا اتصور راح اعيشها مرة ثانية أو على الأقل يتكرر موقفها علية

بين ألم جسمي وگلبي حسيت شي نزل مني
راسي چان بـ حضن مخلد
رفعته بتعب والدنيا تفتر بية يمكن طرحت اختفى الوجع

أم مخلد.. اي طرحتي هذا الطفل نزل بالگاع
مخلد.. لتگوليها يمة

أم مخلد.. يلا وليدي لتضوج اكيد بـ هالشي صالح الك

مخلد.. هوَ شنو الصالح شنوووو
تدرين شگد انتظرت هالطفل تدرين بشنو داحس حالياً

ما سمعت شنو حچت ويا
احس أذني انسدت والدنيا غوشت بـ عيني
صحت مخلد باوعلي ورفع راسي من حضنه هاي شبيچ ليش راسچ دينزف بتوووول بتول ردي علية

اريد اجاوبه ما اگدر بعد
بس صوت الهوسة بـ أذني لحد ما اتلاشى حتى هالصوت وفقدت الوعي بين إيده وبحضنه

همام.. ردت افتهم شصاير ويا مخلد ما قبل يحچيلي
لبست ع السريع ومريت على خديجة
وصلنا الشقتهم الباب مفتوحة دخلت اركض لگيت يزن گاعد بالصالة من البچي عيونه رايحة شبيك عمو

- ماما وبابا وگعوا
- وينهم
- بالغرفة سادين الباب عليهم وبيبي يمهم

اشرت الخديجة تدخل تشوفهم
راحت ثانيتين وطلعت تركض الحگ خوية بتول غايبة عن الوعي

ركضت للغرفة الحال مينوصف حتى ما گدرت اباوع
سألت مخلد شبيها ولا رفع راسه
أمه جاوبتني حامل وطرحت صحت بـ خديجة لبستها واخذناها للمستشفى

واگف انتظرهم حسيت قميصي تبلل باوعت دم !!!
سحبت الكلينس من جيبي
ثبته جوة القميص وگعدت ع الكرسي شنو هالمصايب المتقبل تفارگنا دخيلك يا الهي دخييييلك

تذكرت اني تركت أمي ومرتي وحدهم
طلعت جهازي دگيت على طيبة ردت بسرعة توني ردت اتصل بيك شصار شبي مخلد

- مو مخلد بتول
- شبيها بتول اليوم الصبح حچت وياية ما گالت تعبانة

- حامل وطرحت بس ما وگفت على هاي
مدري شصار الها فجأة لگيتها غايبة عن الوعي ونازفة هواي وهسة احنة للمستشفى

- يا يمة شنو هالأخبار الله عليك خو ما بيها شي
- ما ادري يا عيني خديجة يمها
- راح يظل بالي وياها عفية طمني حتى نوم مراح أنام

- واني همْ بالي يمچ ويم الجهال وأمي
احتمال اتأخر سدي البيبان زين طيبة ولتنامين وحدچ فوگ انزلي يم جهالچ والموبايل خلي عام سمعتي

- ما علينا شي لتخاف المهم بتول
- ان شاء الله تگوم بالسلامة اذا حصلت خبر اتصل بيچ

- مراح أنام اتصل شوكت متريد
- تمام بس گومي سدي الباب من جوة وخلي الضويات مشتغلة

طيبة.. سويت مثل ما گال وظليت گاعدة بالصالة
ساعة واتصل گال بتول بخير بس خسرت الطفل ضجت عليها كلش بس العوض بـ سلامتها الباقي سهل

بعدني گاعدة ومشغلة التلفزيون عن الوحشة
سمعت صوت حركة بالممر
گمت بـ خطوات بطيئة باوعت من الشباك واحد ملثم ديحاول يفتح الباب الداخلية گلبي وگع من الخوف

ركضت صعدت فوگ جبت البندقية مال همام ونزلت
لا اعرف الزمها لا اعرف اضرب بيها بس المهم اكو شي يحميني حتى لو ظاهرياً

تقدمت بـ اتجاه الشباك والموبايل بـ إيدي
رفع راسه شافني لأن الضوة معلوگ ختلت بسرعة حتى حجاب ملابسة
شلون شنو المفروض اسوي هسة هذا عرف بينا گاعدين

اندگت الباب حيل
رجعت باوعت من الشباك طفر من مكانه للحديقة
رن جهازي ما صدگت صالح ديتصل
رديت بسرعة صالح اكو حرامي بالبيت الحگ فدوة ما اعرف شسوي

- اني بالباب وينه احچي بسرعة
- راح من جهة الحديقة اكيد ناوي يطفر من السياج

سد الخط ركضت لبست وفتحت الباب الداخلية
بقيت اباوع الـ جانب الحديقة فعلاً طفر من السياج
گبل صار صوت اطلاق نار طلعت ع السريع صحت من جوة صالح بيك شي

اندگت الباب بقوة گلت منو رد اني افتحيها وادخلي
فتحتها ورحت بس ظليت يم الشباك
شفته دخله للممر واتصل ما ادري بـ منو ظل على هاي الوگفة بالربع ساعة بس طول هالمدة يحقق ويا

فجأة اندگت الباب..
فتحتها طب سعد حچى ويا وأخذ هالشخص وراحوا
ركضت تلگيته شكووو سعد شصاير ما فهمت من صالح

- حرامي هذا
- گلبي وگف همزين اجة ولو ما ادري شـ جابه
- امشي جهزي نفسكم حتى اخذكم وياية مو مال تبقون هنا

- ليش وين همام صاير شي ومتگلولي
- واني شعرفني دفضيني
- دخلت لگيت الحجية تصيح رحت اشوفها خطية من صاير الضرب فازة وظالة تصيحني بس مسمعتها

اضطريت احچي الها كل شي
ظلت تدگ وتلطم بالگوة قنعتها تغير ملابسها
جهزت الجهال ورحنا البيت جدي كلهم نايمين بس سمير والبنات سهرانين بالحديقة

أول ما دخلنا تلگوني
شوية والكل گعد حچيت الهم الصار وظليت انتظر خبر من صالح

ساعتين تقريباً انفتحت الباب
گمت قبل الكل تلگيته خطية گوة يمشي ع العكازة وين صرت بالي يمك

- بالمركز
- حرامي لو غير شي
- لا حرامي ليظل بالچ مراقب سيارة همام طلع ما رجع بعد فـ تصور البيت فارغ وحب يستغل الوضع

- هذا دم بـ رجلك !!! شبيك شنو صوبك
- لا بس من ردت الزمه ضربني على رجلي بعد ما شاف العكازات بـ إيدي

- تعال خل اشوفها الك خاف مأذيك الله ليوفقه
- ما بيها شي شفتها شغلة بسيطة
- حسيت رحمة وراية شبيها رجلك صدگ انضربت عليها

- والله ما بيها شي لتلحن عاد

عافنا وراح
تبعنا دخل بـ غرفته راحت رحمة ورى
ربع ساعة وطلع مغير ملابسه چان لابس برمودة شفت اللفاف متروس دم باوعتله بخوف

- صالح رجلك دتشوف لو لا
- اي شفت
- رحمة جيبي المستلزمات الطبية خليني انظف جرحه

بس حچيتها راحت جابتهن
گتله مد رجلك ما قبل لبست الكفوف وسحبتها حيل
فتحت اللفاف من النزف منظرها صاير يخوف شافتها عمة لو تخبلت ظلت تنوح فوگ راسي ضجت

- كافي عمة خبصتيني خلي افحصها اله
- بي شي والله شوفي شكلها
- اذا بي اوعدچ هسة اخلي الولد ياخذوا للمستشفى بس اسكتي

صالح.. استقري عيني ندري بيچ دكتورة بس كلامچ ما يمشي إلا على المرضى واني مو مريض

طيبة.. لا ابد هذا مجرد معجون دنلعب دكتورة ومريض
صالح.. هههههه بعدچ تتذكرين

طيبة.. اي شلون انسى
چنت تملطخ روحك بالمعجون وعود اني الدكتورة تجي يمي حتى اعالجك واشبعك مسقول عود حب

صالح.. ههههه ونبوگ سرنجات من بيبي
تضربيني بدون الأبرة
وما انسى مرة ضربتيني بالأبرة يومين مكانها مورم

سمير.. وين تضربك بالضبط ممكن توضح سيدي

صالح.. انچب ولك بـ إيدي طبعاً قابل وين

سمير.. ها عبالي بـ هاني رمزي

صالح.. سخيف

طيبة.. ثبت رجلك كافي تتحرك خل اشوفها الك
صالح.. صار دكتورة
طيبة.. باوعت عليها صح ملتهبة بس الجرح ما مفتوح الحمد لله مجرد التهاب ضروري تراجع باچر

صالح.. ليش انتِ مو دكتورة
طيبة.. واني شعرفني بـ هالمواضيع حتى انطيك علاج

سمير.. دكتورة فاشلة يعني
طيبة.. ماكو فاشل غيرك أبو صماخ عمو دتسمعه لو لا

محمود.. ههههههه ولك لتتحارش بيها هسة تزعل
سمير.. وزعلتهم دكتورة چيس حب علاج متعرف تنطي

صالح.. راح تبچي أم دميعة جوز عنها

سمير.. على نفسها مو علية
عود فرحانين في بيتنا طبيب طلع في بيتنا خروف ميع

طيبة.. شبيك والله هالأمور يحتاج الها خبرة واني لسه خريجة جديدة شـ عرفك انتَ

سمير.. الأعتراف بالفشل نجاح اعترفي بت عمي العار

طيبة.. من كل عقلي بچيت يمكن بسبب الضغط الگاعد اعيش بي حالياً

صالح.. ليش تبچيها سگطططط
مالچ علاقة طيوب وين اكو منچ جمال وطيبة وذكاء

سمير.. اصبغ اصبغ

صالح.. سمير كافي بطل سخافة
ليش تغثها ما اسمحلك عمي سكت أبنك لا أگومله والله

سعد.. هههههه سمير انلصم شقاك بدا يصير اوفر يول

سمير.. اسفين عيني جرحنا مشاعيرچ الحساسة
طيبة.. ضربته بالديتول عار متصير الك چارة عمك منو بعد

سمير.. هههههه أبوچ العار

محمود.. اش الرجال ميت كافي تشيلون وترگعون بيه

طيبة.. مد رجلك نظفتها بس اعقمها بالكبسول وألفها
صالح.. مسحي دموعچ أول

سعد.. الله يطيح حظك سمير ليش تبچي أم نسرين
سمير.. مو اعتذرنا شكو بعد
سعد.. رفع نعاله ضربه تعرف وين تخلي اعتذارك حقير

سمير.. هوَ اني شعندي
غير حب الله والوطن ونعالك اللي لعب على ظهري لعب من عمر سنتين لحد ما صرت زلمة مشورب

نهاية.. هههههه والله هالولد مصيبة الله يساعد التاخذه

سمير.. ليش عمة
ترى والله اني خوش زلمة مربى وعسل
لا اقصد مربى خوش تربية وعمري ما سمحت الوحدة من البنات تضحك علية لأني شنو أبن عالم وناس

محمود.. وتلبس حجاب وتصلي ومتبرز مفاتنك للغريب

سمير.. شلون عرفت بابا
محمود.. لا يا أبن السگط يگولي شلون عرفت فرحااان

سمير.. طبعاً فرحان تربيتك ما ضاعت بية وبـ زينة
محمود.. مو حاسب نفسك مرة بعد شـ اريد احچي وياك

بس حچاها سحب شيلة بيبي لبسها وگعد ع التخم يلا حبوبة داوي الولد واجرچ على الحمزة أبو حزامين

صدگ ضحكت على منظره
نزعها مبتسم يلا بچيتچ وضحكتچ بعد مالچ شي يمي

- درت وجهي اضحك
داعقم بـ رجل صالح تذكرت باوعتله همام عرف لو بعده

- لا خطية كافي المصايب الفوگ راسه بعدين ابلغه
- صدگ انتَ شـ جابك للبيت
- هوَ اتصل گال اني يم مخلد روح على أهلي وأخذهم

- والله اجيت بوكتك ردت اموت إلا شوية من الخوف
- اسم الله عليچ
- شو ما اتصل بعد معقولة بتول بيها شي

- لا اني اتصلت بي وگتله أخذتهم فـ اكيد تطمن عليكم

سحبت اللفاف شديت رجله وگمت
انطيت الغراض الـ رحمة وأخذت حامد الغرفة عمة من الهوسة طارت نومته

بعدني احاول انومه دخلت عمة نهاية
بس شافتنا ابتسمت
شالته من حضني تبوس بي كلش تحبه يمكن لأن اسمه على أسم عمو أو لأن أبني ومحبته من محبتي

گالت اني راح انومه ارتاحي يمة
طلعت من الغرفة بعدهم گاعدين ظلينا للأذان صلينا يلا نمنا

بتول.. فتحت عيني بالمستشفى
دايخة وما اتذكر شي
كل الگاعد أذكره نقاشي الحاد ويا مخلد خمس دقايق يلا رجعت الوعيي واستوعب كل شي صار وياية

ظهري لسه يحرگني بس عادي الألم ينحمل
حطيت إيدي على بطني
حسيت بـ فراغ والوجع مختفي شنو يعني خسرته ؟!!

اجت الممرضة سألت عندچ اوجاع
هزيت بـ راسي لا
رادت تروح سألتها الطفل مات ردت الله يعوضكم عيني

الغصة وصلت الحنجرتي
تمالكت نفسي ما اريد ابچي ماكو شي يستاهل
اجت عمة خديجة تفاجأت بيها ظلت تسأل شصار وياچ حچيت كل شي

ساعة ورجعنا
صحتي تعبانة دمي نازل ضغطي نازل
هاي من غير النزف أخذ كل حيلي عمة گالت بأجر أخذچ للدكتورة المستشفى متفيد لازم نطمأن عليچ

دخلنا مخلد ويزن وحدهم
انصدمت معقولة أمه تعوفه وحده وهوَ بـ هالحالة
چان گاعد بالصالة بس شافنا أشر الـ عمي همس بـ أذنه وعمو راح همس بـ أذن عمتي شديصير ما اعرف

راحت الغرفتنا ردت امشي وراها منعني عمي
گتله ليش
رد تعالي ارتاحي هنا تريد تنظف الغرفة
بس گعدت اجة يزن حضني خفت عليچ ماما شلونچ

- زينة حبيبي لتخاف
- رفع عينه مخلد الحمد لله على سلامتچ أم يزن
- الله يسلمك

همام.. التعقيم وينه
بتول.. على الرف گدامك بالممر

بس حچيتها راح جابه هوَ والقطن
رجع للصالة نزع قميصه إيده بيها دم ردت أكوم لزمني مخلد لتتحركين

بتول.. شبيك عمو
همام.. ما بية شي جرحي التهب شوية
مخلد.. تعال اني انظفه الك متسيطر على روحك هيچ

گعد يم مخلد
سحب نفسه ليورة وبدا ينظف جرحه
انتبهت العمة طلعت من غرفتي ونزلت جوة عرفت ليش شاورها حتى تدفن الطفل الظاهر طرحت بالغرفة

شوية ورجعت نظفت غرفتي واجت گومتني
يزن لزم بية إلا اجي وياچ
رادت عمة تاخذه الغرفته ما قبلت گلت الها خلي شوية وأخذي

تمددت ع الچرباية ماكو وجع بس گلبي منتهي
گالت عمة محتاجة شي
هزيت بـ راسي لا طلعت وعافتنا
اجة يزن سحب الطبلة وگعد يمي لزم إيدي بـ ايديناته الصغيرة

- ماما بعدها بطنچ توجع
- لا حبيبي خلاص اختفى الوجع
- ليش وجعتچ صدگ چان بيها نونو صغير

- انتَ منو گلك
- بيبي
- استغفر الله رب العالمين واتوب اليه شلون تالي وياها

- ليش مات
- مات ماما بعد أمر ربك هذا
- بيبي من رحتي تعاركت ويا بابا وصار عصبي عليها

- ليش !!!
- گالت اله الله يحبك خلصك من السحارة شتقصد ها

- وهوَ شنو گال الها تذكر
- ما أذكر بس صيح وطردها نزلت تبچي
- صدگ تحچي
- والله صيح وكسر موبايله حتى علية صيح من اجيته

- لتزعل صار عصبي مو قصده يضوجكم انتَ وبيبي

- بابا گام يبچي

- شنو !!!
- من بقينا وحدنا بابا بچى هواي ماما
اجيت يمه گلت اله بابا شبيك حضني وبچى حيل كلش

ليش هيچ
احنة ما چنا نتعارك هسة بس نتعارك وانتم يوميا واحد يزاعل الثاني ونعوف بيتنا ونروح البيت بيبي

حتى ما اشوفكم مثل قبل تضحكون وتطلعون بالعطل
مناكل سوة
ما بابا يشاقيچ وانتِ تزعلين بعدين يضحك ويبوسچ

كل شي تغير ماما
حياتنا مو حلوة صارت ما احبها اني احب قبل أكثر

- واني همْ ما احب هالحياة
حچيتها وحضنته ابچي بـ حرگة طالعة من نص گلبي

واحنة على هالحالة دخلت عمة علينا
سحبت يزن من حضني طلعته برة وسدت الباب ليش هيچ الطفل خطية

- اريد أنام
- عمة قوي نفسچ أمتحان ويعدي ان شاء الله
- طفي الضوة اريد أنام ويا ريت متگعدوني تعبانة كلش

باوعت علية رادت تحچي بچيت
انسحبت من الغرفة وتركتني وحدي خليت راسي على المخدة شگد ما اگول اتمنى أنام وما اگعد هم قليل

فزيت الصبح على صوت يزن ديلعب بالقطار
گمت من مكاني دايخة بالگوة امشي
فتحت الباب گاعدين يتريگون صبحت عليهم وبوجهي للحمام

غسلت وطلعت گالت عمة اگعدي اتريگي وراچ علاج
سحبت الطبلة گعدت على طرفها
اجة عمو همس بـ أذني ترى رجلچ من البارحة ما دخل للحمام وكلما احچي ويا يگول ممحتاج حاچي

- عفته وگمت المخلد چان صافن ع التلفزيون يلا گوم
- وين !!
- للحمام يعني وين
- ما محتاج شكراً روحي ارتاحي

- گوم مخلد لتعاند
- گتلچ ممحتاج ليش تلحين

همام.. لتخاف ما اخليها تشيلك بس بالحمام تساعدك

مخلد.. ممحتاج صدگ خوية
همام.. شلون اصدگ وانتَ من البارحة على هالگعدة !!

- رحت اليزن همست بـ إذنه فوت بوس بابا وگوله گوم غسل بداعتي

سمع كلامي وگام يركض
باسه يريد يحچي الجملة نساها لأن فكرة چان باللعبة

- باوعلي شنو ماما نسيت شگلتي

- التفت مخلد باوعلي وابتسم اگوم اغسل هيچ گالتلك

- اي صح تذكرت گوم بداعتي

همام.. يلا الخاطر يزن اذا احنة مالنا خاطر يمك

مخلد.. مد إيده سحبه عمي خاطرك على عيني وراسي

اخذه للحمام وصله للباب وعافنا وراح
كل مرة اساعده عادي
هالمرة ميقبل بس يا دوب سمح الي أسنده حتى يثبت گعدته

للعصر رادت عمة تاخذني للدكتورة گلت الها خليها غير يوم حاولت هواي عاندت لأن ما بية كلش
گالت لعد اروح اني وصلها عمو وما رجع إلا لليل
چنت متمددة بالصالة فتح الباب وراح بـ وجهه المخلد

- متگوم للحمام
- لا
- اگول شنو هيچ راح تظل تشلع گلبي كل يوم
- ليش انتَ ناوي تبقى هنا ؟!!

- اي اخذت اجازة لأن راجعت الدكتور قبل شوية
جرحي ملتهب ومحتاج راحة اجت بـ وقتها علمودك

- ميحتاج همام مرتك وأمك بحاجتك روح الهم خطية

- اسكت يمعود لتخليني ابتلي بيك

- أخذ بتول وروح
هيَّ همْ محتاجة ترتاح هالفترة لأن هنا تعبت كلش

بتول.. صفنت عليه صاح عمو مو بكيفك ولتخاف اني موجود مراح اخليها تتعب

مخلد.. اني ادبر نفسي اترجاك أخذها وروح لتعاند همام

بتول.. اني ما اروح

همام.. هاك شفت بـ عينك وسمعت بـ أذنك

مخلد.. بتول روحي ارتاحي اني راح انزل جوة يم أهلي

بتول.. تريد تنزل أنزل بالنسبة الي باقية هنا بشقتي ويا أبني عاجبك تعوفنا عادي مراح نلزم بيك

همام.. بارك الله بيچ حبيبتي

بتول.. يلا عمو خل ناخذه للحمام مو بكيفه طول ما هوَ بهالشقة احنة نساعده من ينزل يم أهله عود نتركه

حچيتها وگمت قدمت الكرسي گدامه
اعرف كلامي أذى ومچان المفروض احچي لأن الوضع البي حالياً بعيد كل البعد عن المشاكل الصارت بيناتنا

طيبة.. ظليت انتظر اتصال من همام لثاني يوم العصر وهوَ مختفي
توني ردت اتصل بي انفتحت الباب ودخلت خديجة

- ها عمة شلون صارت بتول
- الحمد لله احسن
- ألف الحمد لله.. زين شنو منو جابچ انتِ
- همام
- لعد وينه شو لا دخل ولا سلم
- راح للدكتور جرحه ملتهب ويريد يراجع بلكي ينطوه اجازة لأن ضروري يظل يم مخلد هالفترة

عفتها ورحت للحديقة
گعدت بالمرجوحة ضايجة اتصلت ببتول سألتها شصار سولفت كل شي ظليت صافنة من عمايل عمتها

بقينا نحچي بالساعة تقريباً
أخر شي گالت اروح مخلد وحده بالصالة
سديت الخط ودخلت صليت وبقيت گاعدة اسولف ويا بيبي والحجية

فوگ التسعة سمعت جهازي يرن
ركضت همام ديتصل
طلعت للحديقة جاوبته وينك مختفي ظل بالي يمك

- بخير حبيبتي لتخافين
- شنو گال الدكتور
- ماكو شي التهاب بسيط ومحتاج راحة شوية

- ومنين تجيك الراحة ي حسرة
فنك تگعد بس شلون ميصير همام يگعد مستحيييييل

- ههههههه لا اوعدچ راح اگعد هالمرة
- وين انتَ
- رايح للبيت اجيب ملابسي لأن لازم ابقى يم مخلد

- واحنة شلون
- والله ما ادري مستثقل گعدتكم ببيت جدچ
- ومستحيل نرجع وحدنا اخاف والله تريدني انجلطط

- ههههههه شكو عليكم المنطقة أمان
- اي كلش أمان خليني ساكتة لتجبرني اغرد الك

- يلا اشوف تنحل ان شاء الله
- وين صدگ ترى مفتاح الغرفة وياية تعال حتى تاخذه

- ليش يمعودة على شنو قافلتها

- انتَ تدري طفر علينا حرامي
ولو ما ستر الله وجية صالح على أخر لحظة چان هسة مذبوحين مخطوفين الله اعلم وين توصل ويانا

- شدتحچين ؟!!!
- والله مثل ما سمعت حبيت ابلغك بس
- صالح وين بالبيت لو بعده برة
- لا موجود
- جاي اني مسافة الطريق اريد احچي ويا بلغي ليطلع

حچاها وسد الخط
دخلت للبيت صالح گاعد ورحمة بصفه گتله همام جاي بالطريق يريد يحچي وياك رد كل الهلا بي وبيچ

سناء.. صدگ لو گالوا ما محبة إلا بعد عداوة

صالح.. شتقصدين ؟!!

سناء.. يعني انتَ ونسيبك صايرين حبايب ما تصورتكم هيچ عبالي بعدكم كاتل ومكتول

نهاية.. سناء شلچ بهالحچي ومن شوكت صالح وهمام يتعاركون لو بس تردين تحچين

سناء.. ههههههه شبيكم علية ممچذبة غير صالح مچان يحبه لأن أخو أرشد بعدين شافه خوش رجال

طيبة.. اي طبيعي لأن مچان يعرفه شنو إلا من عاشره

سناء.. تخيل صالح لو همام ميت بالحرب الصارت شنو راح تكون ردة فعلك يعني لأن تحبه قصدي

صالح.. عمره اطول من عمري ان شاء الله

خديجة.. وتالي وياچ وين تردين توصلين من هالخرط

سناء.. دنحچي شبيكم ضايجين
شو متتحملون الحچاية مني ترى اني همْ منكم وبيكم

صالح.. سدن الموضوع وگومن للعشى جعت وعمي على جية اللغاوي متفيدچ بشي عمة

طيبة.. كلش ضوجني كلامها ما اعرف شنو هدفها منه
عفتهم ورحت للمطبخ
داشتغل اجة همام سويتله طريق طب يحچي ويا صالح بالأستقبال نص ساعة وطلع لزمت بي عمة نهاية ع العشى

خلصنا بس شرب الچاي گام استأذن
رحت جبت المفتاح
دانطيهيا گال تعالي وياية جهزي ملابسي وارجعچ لهنا

رحت بدلت ردت أخذ الجهال وياية ما قبلت عمة نهاية
وصلنا للبيت بس طبيت خفت
فتح همام الباب وظل يفتر بكل غرفة يشوف خاف اكو شي ناقص بعدين صعد فوگ تبعته چان ديسحب فلوس

- شگد راح تبقى هناك
- ما ادري بس ان شاء الله ما اطول
- لو ما بيبي چان اجيت وياك همْ علمودك وهمْ اظل يم بتول خطية اكيد محتاجة احد يمها بـ هالفترة

- تحملي كلها كم يوم وارجع
وديري بالچ على أمي تدرين شگد تتحسس من وضعها لتخلين احد يساعدها غيرچ ما اوصيچ بعد

- ميحتاج توصي اصلاً
تقربت منه فتحت قميصه ضحك هاي شنو يولي شگاعد تسوين

- شبيك اشوف جرحك ظل بالي من عرفته ملتهب
- هاا عبالي
- شنو عبالك اشم ريحة انحراف بالموضوع اعرف بيك

- ههههه لا بس گلت يمكن اشتاقيتيلي واجيتي تبادرين

- ليش تشك اني ممشتاقتلك
- طبعاً لا
- شلون عرفت
- لأن صرتي بومة من عرفتي راح ابقى هناك تردين بعد دليل أقوى من هذا حبيبتي

- ههههههه عابتلك صالح شـ علمته من سالفة
- بس حچيتها سحبني عليه احلى بومة شفتها بحياتي

- انكد عليك
- قابل
- اتعبك من النق والتشاؤم
- على گلبي احلى من العسل وداعتچ
- تمل متتحملني
- أمل الناس كلها وما أمل مرتي وحبيبتي وأم اطفالي

- اممممم صاير رومانسي
- من يومي هيچ ليش تنكرين يولي
- وين شو..
- بعدني ممكملة سحبني تعالي اراويچ الرومانسية على اصولها

طبيت سبحت قبله
طلعت اجهز ملابسه وراح هوَ يسبح
باوعت الساعة راح تصير 12 حييييل تأخرنا والمشكلة عفت حامد يم عمة نهاية الله يعلم شسوة بيها

طلع نشف گتله استعجل فدوة جهالك خطية
اجة باسني وگال ما عندي شي
وصلنا لبيت جدي انطاني فلوس ورجع وصاني على أمه

- كافي توصي والله اضوج هيَّ بـ معزة بيبي
- شو صايرة حلوة ولچ

- من يومي حلوة بس انتَ احول

- هههههههه شنو رأيچ لو نعوف كل شي ونرجع للبيت

- روح حبيبي ترى مخلد ينتظرك

- شسوي گالوها من لگا احبابه نسى اصحابه واني بعد لگيتچ فـ ما اذكر حتى نفسي

- لا إلا نفسك اذا تنساها معناها تنساني
- ونسيتها شنو يعني غير انتِ موجودة شلي بيها وبية

بسته بالهوى ونزلت.. ضحك ورجعلي البوسة
انتظرني فتحت الباب وراح
بقيت اباوع ورى طلع من الفرع سديتها ودرت وجهي

نزيت نزة أخت الچذب من شفت رحمة واگفة وراية
صحت بيها خرعتيني شجاچ
باوعتلي بـ عصبية ودموعها ترست عيونها
طيبة احچي شنو الـ بينچ وبين صالح واحذرچ تنكرين الحقيقة ترى اني موووو غبية عرفت كل شي...

يتبع