أبي لم يكن إنسانًا

مستقبل الرواية ج6

#أبي_لم_يكن_إنساناً
مستقبل الرواية الجزء السادس..
للكاتبة لبنى الموسوي

شمرت الموبايل ع الطبلة ورجعت للأستقبال
محد اكو فارغ
سديت الباب على نفسي ونزعت الحجاب ابچي شلون ارجع بعد كل شي صار صعبة والله صعبةةةةة

حطيت موبايلي بـ جنطتي واخذت الحجاب
وگفت ع المرايا البس بي هسة اشوفلي واحد من الولد يوصلني للبيت شنو يعني قابل يجبرني ع الرجعة

- بعدني اعدل بـ حجابي دخلت علية طيبة ها وين
- اگول منو اكو من الولد هنا
- سمير
- عفية حاچي خل يرجعني لبيتنا تعبت كلش محتاجة أنام شوية ويزن همْ تنحس على مكانه

- وين يقبل همام من كل عقلچ
- ليش ميقبل وين رايحة قابل هوَ للبيت بعدين السالفة مبين تطول الى متى نظل هنا همَ بيت جدچ بس اني يعتبرون غربة علية واستثقل گعدتي بنصهم

- ازعل عليچ تحچي هيچ ومن شنو تستثقلين
شو عمتچ هنا اني هنا وماكو غير النسوان الشباب كلها ملتهية ويا رجولتنا بالمستشفى

- طيبة لتعرضين لازم اروح حاچيلي سمير فدوة
- احچي يولي شصار منو ضوجچ
- ما ضايجة يمعودة بس تعبت كلش مو تطمنت عليهم شعندي بعد باقية هنا خليني ارجع للبيت ارتاح

- والله صاير شنو عمتي سناء ضوجتچ بكلمة اعرفها
- لا وحتى لو حچت ما اهتم الكلامها
- لعد !!!
- طيبة تحاچين سمير لو اطلع أخذ تكسي من الشارع

- تمام راح احاچي بس قبلها اتصل بـ همام ابلغه
- لا طيبة تعالي لتتصلين
- مستحيل تروحين اذا ما صار عنده علم لأن تدرين بي اذا عصب ميشوف گدامه بعد قابل اعلمچ بـ عمچ

- يعصب علية مو عليچ
- لا حبيبتي حچي يفيدچ اشو أي شي يصير وياكم أو بالشغل يطلع بـ راسي شماعة العصبيتة من يومي

- طيبة مراح يقبل اذا بلغتي عمي واعرفه
- احچي لعد شصاير
- يريدني أرجع المخلد افندي
- شنو ؟!!
- شايفة بلا ويا ريت انطاني مجال گال حضري نفسچ ترجعين وسد الخط بـ وجهي كأنما ديأمرني أمر

- معناها اكو شي
- اكو لو ماكو اني ما اريد ارجعله
- تعالي شو اگعدي هنا خلينا نحچي شوية العناد ميفيد

- هذا الطلع وياچ عناد ؟!!
- سحبتني من إيدي للسرير بتول حبيبتي اهدي شوية

- هديت بس يا ريت لو تحچين بـ عقل
- تمام انتِ تعرفين همام قبل لا اعرفه اني هوَ مو عمچ والسلام لا هوَ أب الچ وأكثر يعني مستحيل يأذيچ

- بس هالمرة يريد يأذيني
- ليش تفكرين هيچ ليش متگولين شاف مخلد محتاج الوجودچ يمه بعد كل شي صار وياهم البارحة

- يمعودة كلها ججج
- حجج شنو ترى عمو محمود گال مخلد طلع من حلگ الموت بألف يا الله يعني اكيد متأذي أكثر منهم

- اي وشسويله
- معقولة تعوفي وهوَ بـ هالحالة
- شيسوي بية اشو أمه يمه خواته يمه غفران يمه شكو وحده خربت بيته يمه بتول شنو وببيش الحگة !!!

- باوعي طول الأيام الراحت مچنت اگدر احچي وياچ
احس نفسي كلش سخيفة
لمن اجي واگول بيتچ رجلچ أبنچ بعد السووا مخلد بس هسة لا راح احچي وبدون تردد لأن الوضع اختلف

همام لو ما شايف مخلد محتاجچ مچان طلب ترجعين
اكيد بي شي
عوفي الزعل هسة واحمدي ربچ لأن رجعه الكم سالم

- بطرانة انتِ مخلد انتهى من حياتي خلاااااااص
- چذابة
- لا مو چذابة متعرفيني الظاهر
- الله عليچ لو ميت اسم الله وانتم زعلانين يعني مراح تلومين نفسچ وياخذچ الندم لأن مات بحسرتكم

- اسم الله عليه
- ها شوفي على شنو تكابرين بعد
- ترى گلت اسم الله لأن مخلد أبو أبني اكيد ما اريدله اليُتم لأن اني أكثر وحده تعرف اليتيم شيحس

- بسسسسسس
- لا مو بس مخلد مو بـ هالسوء حتى اتمناله الموت ما انكر هوَ إنسان والنعم منه ويا الكل بس وياية لا

- هسة صار مخلد مو خوش وياچ
- حتى لو چان خوش شنو الفائدة وهوَ هدم كل البنينا بكلمة وحدة الذيچ السافلة يلا خليها تفيده هسة

- اااف والله تعبتيني
اترجاچ بلا عناد عمچ همْ خطية يهون عليچ تزعلي وهوَ بهالحالة ع الأقل حاولي تحچين ويا بـ هدوء

- ولچ يگول العصر يجي سعد ياخذچ للشقة بعد شوكت الحگ احچي متفهميني

- زين دروحي مثل ما طلب منچ
حتى لو بس يوم واحد وترجعين بعد ما تشوفين همام وتحچين ويا

- ما اگدر والله ما اگدر
شلون ادخل للشقة الطلعت منها واني بـ اسوء حالاتي

- فكري بـ مخلد
- لتخليني اسب مخلد وعشيرته ليش هوَ منو الوصلني لهنا غيره أبو النسوان الحقير الله يـاخ....

- ها هااا بريك حبابة الرجال متمدد بالمستشفى

- يلا اگوم اروح للبيت
- والله انتِ محد يگدر عليچ غير عمة خديجة اصيحها تشوف صرفة وياچ مالي خلگ المشاكلچ ويا عمچ

حچتها وطلعت تركض شلون سالفة تعبانة
شوية ورجعت ويا عمة
ظلن يقنعن بية أخير شي عمتي گالت متطلعين خطوة برة هذا البيت إلا بـ علم همام حتى لتكبر المشكلة

ما گدرت اعاندهم
احسن شي من اشوف عمي احچي ويا واقنعه
للعصر سمعنا صوت الباب انفتح صاح واحد من الشباب يا الله ركضت لبست حجابي بلكي عمو اجة وياهم

رحمة.. كلنا منتظرين العصر بـ فارغ الصبر
للخمسة انفتحت الباب
گمنا لبسنا الحجاب ورجعنا للصالة دخل عمي محمود قبلهم شوية ودخلوا ورى ولده ساندين صالح عليهم

ركضت ويا ماما ردنا نحضنه.. گبل عمو دفعنا عنه
گال الرجال تعبان اصبرن شوية
اخذوا الغرفتنا وكلهم راحوا ورى يتحمدون اله بالسلامة ظليت انتظرهم يخلصون حتى احچي ويا

ربع ساعة وطلعوا من الغرفة ظلينا بس اني وماما يمه
خطية موتت نفسها من البچي
گاعدة يم راسه تبوس بي وتشهگ بالگوة قنعها تسكت

مسحت دموعها ورجعت باسته من راسه أكثر من مرة
التفتت شافتني واگفة ابتسمت بتعب
گامت طبطبت على كتفي وطلعت وسدت الباب وراها

باوعت الصالح ابچي ابتسم واشرلي تعالي
رحت اركض حضنته اشهگ من گلبي شد قبضته علية وصاح كافي غرگتينا بالدموع

- خفت عليك حيل خفت صالح ليصير شي واخسرك
- هاي اني يمچ كافي عاد
- شسويت بية من البارحة لليوم اريد اوگف على رجلي ما اگدر همزين تخربطت حتى الوقت يمر بسرعة

- گرت عينچ وتحچيها گدامي عادي
- اي احچيها لأن ارحم من ساعات الأنتظار واني حايرة وينك وشصاير بيك

- يلا عمري ساعديني اغير ملابسي
- صالح حباب بطل من الشغل هذا اترجاك عوفهم بعد

- ههههههههههه
ليش محسستني گاعد العب دعبل وتريديني ابطل بابا شغل هذا تعرفين شنو يعني شغل مو لعبة

- والشغل بشنو يفيدني لو هسة رايح من إيدي
- كلمن يموت بيومه
- لتجيب طاري الموت على لسانك حرام والله فكر بية بأمك المسكينة لو تروح منو النا غيرك والله ننذل

- ترى انتِ واگفة بـ غرفتچ مو بوادي السلام على گبري

- صااااااااااالح
- هههههههه شسوي غير انتِ گاعدة تنوحين علية واني عايش حبيت اذكرچ لياخذچ الحماس للنجف

- والله انتَ واحد خبييييث ماكو تكك اااابد
- توچ عرفتي
- ردت اروح سحبني من إيدي حيل صارت وگعتي على رجله صرخ بألم گمت مرعوبة اسم الله شبيك

- اذيتيني ولچ
- هوَ اني لو انتَ سحبتني و وگعت
- ردت اعرف وين رايحة
- احضرلك الملابس غير.. مو انتَ ردت تبدل
- عوفي كل شي وتعالي تمددي بحضني مشتاقلچ يولي

- واني هم مشتاقتلك
حچيتها وصعدت للجهة الثانية نمت على صدره موجوع

- لا
- طلقتين وتگول لا
- توجعت بالبداية بس من شفتچ وشفت أمي نسيت كل الوجع غير انتن عافيتي الله ليحرمني منچن

رفعت راسي مبتسمة
ردت ابوسه من خده باس شفتي وضحك تنوكلين وعلي

- هههههه من شوكت بلا
- من چنتِ طفلة تنوكلين الفرق بس بطريقة الأكل لازم تتغير مرحلة عن الثانية واني ما قصرت جربتهن كلهن

- امممم صاير وكح
- من يومي لتصيرين ناكرة للمعروف
- لو صايرلك شي لا سامح الله چان متت صالح
- اهوو همْ رجعنا يمعودة رجعت ما بية شي كافي نكد

- هههههه بومة مو
- اختچ منو بعد بس قابلين عمي ليش شعدنا غيرچن

طيبة.. كلش فرحت من شفت صالح دخل للبيت سالم
والفرحة الأكبر بـ فرحة عمة نهاية ورحمة
بس القلقني همام ما اجة ويا رحت تحمدت اله بالسلامة ورجعت العمو سألته ليش همام مو وياكم

گال ظل يم مخلد ميگدر يعوفه
سحبت جهازي من الميز اتصلت عليه مكالمتين يلا رد

- وينك همام
- ها عيني بعدني بالمستشفى ويا أبو يزن
- شوكت تجي گلبي طگ عليك
- اتأخر لليل سعد راح يوصل بتول بعدها يرجع عليكم حتى ترحون للبيت عود جهزي نفسچ والجهال

- ميخالف بس حباب حاول لتتأخر بالرجعة
- ان شاء الله
- انتَ زين خو ما بيك شي
- زين بوية ليظل بالچ بقائي هنا علمود مخلد صح ويا عمامة وولدهم بس همْ ما اگدر اعوفه وحده وارجع

- تمام أخذ راحتك وسلم على أبو يزن
- يوصل
- سديت الخط ورحت البتول همام يگول جهزي نفسچ

- شعندي قابل بعدين اني ردت..
- دتحچي اجة أبنها يركض ماما صدگ راح نرجع لبيتنا

- منو گلك
- عمة خديجة حتى گالت روح غير ملابسك
- اي راح نروح يلا غسل وتعال
- حضنها يضحك احبچ ماما همزين قبلتي والله مشتاق الباب والبيتنا والألعابي والكل شي هناك

- روح غسل بسرعة ما ظل وقت

طبية.. باوعت ورى شلون فرحان خطية
رجعت نظري على بتول صافنة على أبنها حرام هالطفل شگد متعلق بمخلد

- ليش شنو كاسر ظهري غيره
من يوم ما زعلت ولليوم كل ساعة يصيح خلينا نرجع

- يلا صار عندچ سبب ثاني ترجعين
الأول مرض مخلد والثاني فرحة يزن بـ رجوعه الأبوه

- گبل باوعتلي بـ خزرة
- هههه شبيچ يمعودة انتِ گدها راح تربي المخلد ادري

- اصلاً مراح ابقى بس احچي ويا عمو ارجع مستحيل اظل بذيچ الشقة لو مدري شيصير

- گومي يلا اجة أبنچ سعد دينتظركم

بي حچتها گمت غيرت الـ يزن ملابسه
ربع ساعة وطلعنا
وصلت للشقة أول منزلت صارت عمتي گبالي تباوعلي من الشباك استغفرت ربي بضجر وصعدت فوگ

وصلني سعد للباب من دخلت يلا راح
فتحت الضوة وانصدم ذيچ الصدمة بـ منظر الشقة ماكو أكثر من هالهوسة بعد باوعلي يزن شنو هاي ماما

- حتى أبوك يعرف قيمتي
هاي شهر عفته وهيچ لو سنة شيصير بحاله الله اعلم

نزعت حجابي وفتحت كل شبابيك الشقة حتى يتداور الهوى بيها البوخة مو طبيعية
بديت الملم وادردم ويا نفسي انطيهن مشاكل وهجمان بيوت بس للشغل والخدمة يصيرن منعزلات ومالهن علاقة لا بأخوهن ولا ببيته

ساعتين يلا خلصت هوستها
أذن صليت وگعدت اقرا قرأن نص ساعة سمعت جهازي يرن گمت ع السريع عمي ديتصل جاوبته ها عمو

- عيني أم يزن احنه راح نوصل
خلي الباب مفتوحة وادخلي للغرفة لأن الشباب ويانا

گمت بسرعة فتحت الباب ووصيت يزن يظل بـ غرفته
بقيت اباوع من الشباب
دقيقتين مو أكثر ودخلت السيارات للشارع
وگفوا يم بابنا نزل عمو فتح جنطة السيارة ونزل منها كرسي متحرك انصدمت معقولة ميگدر يمشي !!!

ظليت اترقب الموقف
فتحوا باب السيارة ونزلوا ساندي
صعدوا ع الكرسي تعاونوا عليه يصعدوا الدرج طلعت أمه من البيت تهلهل وتطش بالچكليت ابتسم وباسها

سديت البردة بـ عصبية
ممقتنعة برجعتي وبنفس الوقت ضايجة على مخلد ما ادري شصاير ويا بس مبينه حالاته تعبانة كلش

گعدت ع الچرباية افرك إيدي بـ توتر
شوية والبيت ضج بالهلاهل
ما اعرف ليش حسيت هذا مو مكاني وكأنما غريبة ومو لازم اكون هنا

سمعت صوت خواته بالشقة سديت أذني حيل
ما طايقة ولا نفر منهم
شغلت موسيقى بـ جهازي وصعدت الصوت على الأخير

حاولت اشغل نفسي بيها بين ميطلعون من الشقة
شوية وصار هدوء
سديت الجهاز وتمددت بـ مكاني بعدني ممغمضة اندگ الباب گمت ع السريع عدلت گعدتي نعم تفضل

- دخل عمو همام شلونچ حبيبتي
- ركضت حضنته الحمد لله على سلامتك عمو متشوف شر ان شاء الله وربي خوفتني عليك كلش

- بس علية
- طبعاً كلكم حتى مخلد وصالح مو شوية الصار وياكم

- تعالي اگعدي اريد احچي وياچ شوية
- حچاها وگعد على الطبلة رحت گعدت مقابيله بطرف الچرباية نعم عمو اسمعك

- تعرفين عمري كله ما جبرتچ على شي انتِ مرايدته
- اي اعرف
- وهسة هم ما اريد اجبرچ اريدچ تبقين هنا عن قناعة

- بس اني ممقتنعة اظل شلون بـ هالحالة
- اسمعي مني أول يجوز تغيرين رأيچ كل شي يصير

- تفضل

- مخلد حالته تعبانة عمي
رجله تضررت كلش بيها شضايا ما گدروا يطلعوها غير اصابته القوية بالظهر كل هذا مراح يخلي يمشي

- انشل يعني ؟!!

- للأسف حالياً اي يحتاج عمليتين يلا يگدر يوگف على رجله اذا التزم بالعلاج وتحسنت حالته النفسية

- الله يشافي ويگومه بالسلامة
- امين
- أي والمطلوب شنو
- شتگولين يعني يصير نتركه وهوَ بـ هالحالة اسمع منچ

- بس أهله موجودين

- الرجال بهيچ وضع يحتاج مرته يبعد عمچ
ملابسه
حمامه
گومته
گعدته
ما اتصور يگدر يرتاح غير بـ إيدها اني رجال واعرف شگد صعبه على أي رجال يوگع مثل هالوگعة

- بس احنة حالياً مو مثل أي رجال ومرة
- بت الأصول بمثل هالحالات تنسى كل شي وتوگف ويا رجلها وگفة زلمة الزلمة

- اني مو بت اصول اني بت أرشد

- انتِ صح بت أرشد بس لتنسين انتِ تربية عمچ
فتحتي عينچ وانتِ بـ حضني
وما اتصور تربيتي بيها غلط لأن لو هيچ ما چنت هسة گاعد أخذ وانطي وياچ بالحچي واقنع بيچ

- بس عمو
- تقبلين يحچون علية وعلى تربيتي من يشوفون مخلد واگع هالوگعة وانتِ ما مهتمة للموضوع ؟!!

- لا طبعاً ما عاش اليحچي عليك شحده

- لعد تحملي الخاطري
ما اگولچ ارجعي لا يابة بس تحملي هالكم شهر
واوعدچ أول ميوگف مخلد على رجله اجي واخذچ منا بنفسي لتتصورين يهونن علية كرامتچ وزعلچ

- الخاطرك عمو راح اظل
بس يا ريت تبلغه هالشي حتى من ترجع اله صحته ان شاء الله يتركني بحال سبيلي وبدون مشاكل

- صار تتدللين
- شلون تصوبتوا كل شي ما فهمت
- مواجهة صارت ومخلد ضحى بنفسه علمودي لو ما هوَ چان اني ميت هسة لأن رادوا يغتالوني البارحة

- عزة العزاهم شلون رادوا يغتالوك
- فخخوا سيارتي ومخلد من عرف صعد بيها بدل عني وسحبهم الطريق خارجي ومن انفجرت بدت المواجهة

- ومخلد شلون طلع منها سالم !!!
- نزل من السيارة قبل لتنفجر بثواني بس للأسف مثل متشوفين الشضايا احتلت كل جسمه بسبب الأنفجار

- الله ينتقم منهم ان شاء الله
- يلا عمي رايح عفت الرياجيل وحدهم ما اوصيچ بعد

- ان شاء الله

همام.. عفتها ورجعت المخلد
اقاربه يمه بس شافوني اجيت استأذنوا وراحوا
وصلتهم للباب ورجعت اله شفته يباوع الرجله سحبت الغطا على جسمه لتباوعلها مؤقتاً مراح تظل هيچ

- يعني حتى دوام ماكو بعد
- تحتاج ترتاح مخلد لأن وراك علاج وعمليات تحمل ولو شوية حتى ترجع توگف على رجلك وتداوم ساعتها

- وشلون اعيش بدون رجلي تفهم قصدي
- بتول موجودة هنا
- شنو !!!
- بتول بالغرفة اكيد مراح تتخلى عنك وانتَ بـ هالحالة

- باوع علية وسكت
- شلون عرفت قصدهم وليش ما بلغتني قبل لنتحرك

- خل نگول بلغتك شيصير بعدين
- ع الأقل اطلب أسناد قبل لنطلع متدري شصار وشلون تعبنا اني وصالح منا لما اجو جماعتنا ووگعناهم

- اكيد مراقبين المركز
بس يشوفون الأسناد يتحرك وراية معناها تفشل خطتنا

- همْ چان لازم تبلغني هيچ خاطرنا بيك قبل لا نخاطر بروحنا اني وصالح وكل الشباب

- مستحيل همام لو حاچي متخليني اصير بـ مكانك
- طبعاً ما اخليك
- واني ما عندي وقت اشرح الك شنو چان قصدهم من الرسالة الدزوها وصعب تتصرف بدقيقة ودقيقتين

- صدگ شلون عرفت صيغة التهديد ؟!!
- واضح ميخفى على واحد ذكي مثلك بس انتَ مشغول تريد تحچي وياية بموضوع بتول اكيد مركزت

- احچي شلون عرفت قصدهم

- واضحة همام هددوا بطريقة بوليسية
بس اغبياء ما عرفوا ويامن ديلعبون عبالهم احنة مثل أي ضباط يا دوب نداوم علمود الراتب والعيشة

- لو هيچ ما چان تعبوا نفسهم ويانا

- همَ شنو كاتبين تذكر لو لا أو اگولك انطيني موبايلك
- فتحت الجهاز وقدمته اله

- شوف شمكتوب أيها الأحمق هاي طبعاً عليك مو علية

- ههههههه كمل ي الأحمق
- عادي حتى لو غلط المهم طريقتهم چانت مهذبة جداً

- هههههه فضني يول تعبان واريد اروح ارتاح

- اي المهم شوف شـ كاتبين
اتريد ان نتخلى عنك أو نتركك في حال سبيلك
وهمَ موضحين الفرق بين التخلي والترك كاتبين التخلي يعني الموت والترك يعني يعوفوك بحال سبيلك

اذا تريد نتركك اتصل واتنازل عن القضية وسد ملفها
أما اذا عاندت واستمريت بالتحقيق
فـ هنا راح نتخلى عنك يعني يقتلوك واليوم بالتحديد

بعدين موضحين طريقة الأغتيال الراح ينقذوها
دقات غير منتظمة... عبوة يعني
تحت مقاعد غير مرصوفة.. طبعاً تحت مقاعد قابل وين يخلوها على راسك مثلاً همْ مدري شلونهم ذولة

- كمل كمل
- في قطار غير مألوف.. يعني السيارة لذلك كاتبين غير مألوف هذا يسموا تعبير مجازي باللغة العربية

بعد يگولون يحوي على ثلاثين مقعد... يعني يقصدون ثلاثين دقيقة
وعند أولهم تدق نواقيس الخطر يعني بالمقعد الأمامي يتجسد الخطر على حياتك لأن تحتك العبوة

فـ يكون في الثلاثين وعند المسير نهاية البداية
يعني بالدقيقة الثلاثين نهايتك التمثل بدايتهم ساعتها راح يتخلون عنك بالأغتيال وينتصرون

طبعاً هم نغولة
شوف حاسبين مسافة بيتك نص ساعة وتوصل
معناها يردون يفجروها بنص المنطقة وهيچ مو بس انتَ تتضرر حتى العالم الداير مدايرك

- زين انتَ ليش ما نزلت ساعة گبل من السيارة
- لك لتصير غبي كاتبين عند المسير بس تتوقف السيارة يتوقف عداد القنبلة حاسبيها بالملم

- والله دخت شلون فهمتها بسرعة
- خليك انتَ ملتهي بكتب التاريخ اني صرت خبرة من گد ما اقرا كتب بوليسية فـ متعبر علية هيچ فلسفة

- وهمَ شنو اغبياء
على ايش كل هالمعمعة ينفذون تهديدهم وهمَ ساكتين

- يردوك تتنازل لأن يدرون راح تفهم التهديد
بس الما اجة على بالهم راح نفك شفرة تهديدهم وهيچ يوگعون مثل ما صار البارحة

- تعبوني الله يتعبهم
- الله يساعدك صارلك سنة وكسور تشتغل على قضيتهم

- المهم النتيجة
- صح انتَ تعبت بس لتنسى البركة بية خليتك تلگفهم

- اي غير انتَ نقذتني ميحتاج تحچي

- ها الحمد لله عبالي ناسي توني ردت اذكرك والله

- ههههههه يلا ولك أخذ العلاج ونام
طيبة صرعت راسي كل شوية تخابر وين صرت وشگد وترجع

- خالتي هم تلگة گلبها نار عليك هسة
- اي والله شايل همها
- يلا لعد روح ما عندي شي راح انام بس يبدي مفعول المسكن

- اي شي تحتاج بس اتصل علية
- سيارتي وين
- هاي بالباب جابوها الشباب الك والسويچ بجيبي أخذ

- لا لا خليها يمك ما احتاجها
- شنو السالفة..
- لتكمل همام اني نايم بالبيت شسوي بيها بس انتَ ما عندك سيارة و وراك دوام خليها تفيدك ولو مؤقتاً

- رحم الله والديك
- ووالديك
- يلا اشوفك بخير وما اوصيك أي شي تحتاج خابرني

حچيتها وطلعت من يمه
لگيت بتول تفتر بالصالة باوعت داير مدايري لعد أبنچ وين ماله حس

- بـ غرفته اني گتله ميطلع إلا ما اصيحه
- خلي يجي يشوف أبوه
- والله شايلة هم اخاف يشوفه بـ هالحالة ويخاف من غير شي هوَ حاس مخلد تعبان وخلصها علية بچي

- أول وتالي يشوفه اذا مو اليوم باچر
- اي صح

- عموماً راح ينام هسة
عود من يگعد اخذي أبنچ ودخلي عليه
لازم تتحمديله بالسلامة ما اوصيچ عمي ادريچ صاحبة واجب

- ان شاء الله عمو

طيبة.. رجعنا للبيت قبل الصلاة بـ نص ساعة
أذن صلينا وظليت انتظر همام
الحجية خبصتني كل شوية تخليني اتصل عليه أخر شي ضاج گال جاي بعد لتتصلون راح اغلق جهازي

قريب العشرة سمعت الباب انفتح
باوعت من الشباك فتحها ودخل سيارة مخلد !!
طلعنا اني ونسرين نركض تلگينا حضنا يضحك شلونك شلون صرت خو ما متأذي

- ما بية شي مو هاي واگف على طولي گدامچ
- وين انضربت بس بـ إيدك
- اي يلا وخري خليني اشوف أمي بعدين حققي وياية

بعدني عن طريقه ودخل
تبعنا اني ونسرين تلگته الحجية بدموعها
باس راسها وظل گاعد يمها قريب الساعة طمنها وشبع من الجهال وراها استأذن وصعد الغرفتنا

ما صدگت الجهال ناموا
صعدت ورى لگيتة مطفي الضوة ونايم
تقربت منه همام شنو نمت والله ما شبعت منك اگعدد

- منايم
- شغلت الضوة الجانبي وصعدت تمددت بصفه متوجع

- لا بس نعسان كلش محتاج أنام
- منو ذولة
- سالفة طويل بعدين احچيلچ بس خليني أنام شوية

- گلبي راد يوگف من الخوف عليك
- اسم الله على گلبچ حبيبي
- احبك
- واني اموت عليچ بس خلي بالچ يم جهازي خاف يرن گعديني بسرعة حالة مخلد ممستقرة كل شي يصير

- يلا نام ولتشغل بالك ان شاء الله ميحتاجك
- سحبني عليه باس راسي وخدي وحضني حيل احبچ

- هههههه واني ميته بيك

بتول.. يزن بس عرف أبوه رجع صرع راسي بالبچي
يريد يشوفه
بالگوة قنعته نايم ظل كل شوية رايح جاي يفتح الباب عليه شگد حاولت يمعود نايم عوفه ولا يسمع

- لـ 12 مگابلته وگاعدة بالصالة ها يزن افندي شوكت ناوي تنام بالخير ترى تعبتني والله

- اشوف بابا أول
- بلا ما گعد للصبح شلون نظل سهرانين هيچ
- لا يگعد صارله هواي نايم واكيد يدري اني مشتاق اله

- استغفر الله رب العالمين واتوب اليه
- بس حچيتها گام الغرفتنا فتح الباب بـ هدوء ما اسمع إلا صيحته تعالي بابا گعد

شمرت الموبايل من إيدي وگمت للغرفة
دخلت لگيته حاضن يزن وهذا واگع بي دگ بوس اريد اسلم عليه ما انطاني مجال

انتظرتهم شوية ومخلد صاح بي كافي مو خلصت خدي
باوعله وضحك همزين رجعنا بابا
رجع حضنه حيل هلا بيك حبيبي نور البيت برجعتكم

- بس حچاها باوعلي مبتسم الحمد لله على سلامتك
- الله يسلمچ
- محتاج شي اريد أنوم يزن

يزن.. اريد بابا ما اريد أنام خليني يمه شوية

بتول.. راح تصير الوحدة كافي دلال وامشي للنوم يلااا

مخلد.. خلي اني هم مشتاق اگعد ويا بالوحدة يجيچ

عفتهم وطلعت افتر بالصالة
ما اعرف شلون المفروض اتصرف ويا
يعني بالوقت الأني زعلانة منه يتوجب علية اظل يمه قريبة مثل قرب نفسه اكو اصعب من هالشي بعد

- للوحدة اجة يزن الأبتسامة تارسة وجهه ها شبعت
- اي خليني أنام حتى اگعد الصبح العب ويا بابا بالألغاز

- حبيبي أبوك تعبان لتضغط عليه
- هوَ گال روح هسة نام والصبح نلعب لعبة الألغاز
- يلا امشي غسل ونظف أسنانك بين ما اجهزلك السرير

بس حچيتها راح يركض
نص ساعة ونام طلعت من غرفته محتارة شنو المفروض هسة اروح المخلد لو اروح أنام لو شسوي

باوعت للساعة صارله هواي نايم
يجوز جاع
عطش
محتاج الحمام
لازم اروح اشوفه ليش اني شعندي ظليت غير علموده

تمشيت بتردد فتحت الباب نايم وثاني إيده على عينه
- مخلد محتاج شي
- اي
- دخلت وسديت الباب شنو گول
- محتاجچ

- باوع وقبل كل شي ضروري تعرف بقائي هنا واجب

- واجب ؟!!

- اي واجب وبس
اكيد ما اگدر اعوف أبو أبني وحده وهوَ بهالحالة مترهم

- يعني شنو
- يعني بس تگوم على حيلك يرجع الوضع مثل ما كان

- خوش
- داحچي جديات مجرد تتشافى تطلگ مخلد لتتعبني

- گلت خوش لتلحين
- خلينا نتفق من هسة حتى نگدر نعيش هالكم شهر بلا مشاكل

- احچي يلا
- اني هنا بس حتى اداريك لا علية بيك ولا عليك بية

يعني كلمن حر نفسه
مثل ما راح احترم هالشي اترجاك انتَ همْ تحترمه وها تلزم حدودك اعتبرني غريبة ميربطني بيك غير يزن

- گد كلمتچ متأكدة !!!
- متأكدة
- خوش بعد شعندچ ست بتول اسمع
- بس تتعالج وتگوم على حيلك كلمن يروح بـ طريقه

- متدرين يجوز منا الذاك الوقت تغيرين رأيچ
- ولا بأحلامك
- نشوف لتسبقين الأحداث

- مخلد داحچي جديات اترجاك بطل استهزاء
- ما مستهزأ
- ميجمعني بيك كلام غير بس من تريد اساعدك غيرها كلمن بـ مكان حتى النوم أنام بالصالة مو يمك

- لا هنا اسمحيلي بلا احتاجيت شي بالليل شلون
- صيحني واجيك
- اكيد تتشاقين انتَ بتول تگعدين من صوت ما اصدگ

- خوش يلا أنام هنا بس بالگاع
- براحتچ
- هذا العندي حالياً عود لو تذكرت شي جديد ابلغك بي

- تعالي انطيني المسكن رجلي دتوجعني
- أكلت شي
- لا ما اشتهي بس انطيني العلاج
- ميصير هيچ مو زين تاخذ علاجك على معدة فارغة

- باوعلي مبتسم
- اووو اني شعلية عساك ما اكلت هاك هذا المسكن مو

- أخذه مني وضحك فرشي النفسچ حتى تطفين الضوة

فرشت بالگاع وطفيته ظليت اتگلب ما گدرت أنام
ساعة تقريباً سمعته صار يون
سحبت موبايلي شغلت الضوة وگمت خطية سابح من العرگ وما اعرف شـ ديحچي يمكن يهذي

خليت إيدي على گصته حرارته كلش مرتفعة
الليل كله سهرانة اسويله كمادات
للفجر يلا نزلت حرارته من التعب واني گاعدة ع الطبلة بس خليت راسي على طرف الچرباية وغفيت

حسيت على إيد تتلمس بـ شفايفي
فزيت مرعوبة
ابتسم بـ وجهي اسم الله شبيچ هاي اني.. فركت راسي وگمت ضايجة شگلت اني مخلد هاي بعدنا بأولها

- اعذريني ما گدرت اقاوم المنظر

- يا منظر !!!
- لا هيچ بس شعندچ نايمة هنا مو چنت جوة
اعترفي اكيد مگدرتي على فراگي واشتاقيتي الـ عطري

- هزيت إيدي بـ استهزاء
والله بطران غير الليل كله حرارتك مرتفعة بسببك نوم ما نمت

- رحم الله والديچ
يلا تعالي ساعديني محتاج الحمام وسويلي لگمة اكلها علمود أخذ علاجي اذا متصير زحمة طبعاً

ما جاوبت بس اكتفيت بالأبتسامة
سحبت الكرسي فتحته گدام الچرباية ورحت يمه
تقربت مترددة رفع إيده حضنته وسحبته للكرسي يمة ظهري راح يلا گدرت اگعده لأنه صاحب جسم

اخذته للحمام شوية ورجعته للصالة
بين ما سويت الأكل گعد يزن
تريگوا سوة وراها ظلوا يلعبون رحت اسوي الغدة نص ساعة واندگت الباب باوعت من العين عمو اجة

فتحتها متسوگ أشكال والوان
گتله شدعوة رد يفيدكم منا وجاي خطاركم ميخلص

ظل يمنا لصلاة الظهر
لزمت بي ع الغدة ما قبل عفته على راحته
مبين عليه تعبان بس مجبور يجي علمود مخلد اعرفه شلون يفكر

للعصر گاعدة انظف بالخضرة ومخلد يلاعب يزن
اندگت الباب مرتين
گمت باوعت من العين السحرية أهله وبيت خالته نااار وشبت بين ضلوعي لو بيدي ازفهم من باب البيت

فتحتها بعصبية دخلت عمتي بدون متسلم
تبعنها خواته
سلمت خالته رديت من ورى خشمي عافتني وطبت ما ظل غير بس غفران گالت سلام رديت لا عليكم

- شبيچ وياية
- شعندچ جاية البيتي ؟!!
- جاية اشوف أبن خالتي ممنوع لو حرام وما گايليلي

- باوعتلها بـ خزرة ردت اسد الباب بـ وجها صاح مخلد بتوووول تعالي هنا اريدچ

تمشيت الشياطين الحمر يطفرن فوگ راسي
وصلت يمه نعم
گال جيبيلي الماي صار وقت علاجي نصيت عليه بهمس تشرب سم ان شاء الله بس اني الك بسيطة مخلد

عفته ورحت للمطبخ جهزت التقديم الهم
رجعت الصينية بـ إيدي
همَ يسولفون وهوَ متمدد ع التخم مغمض بس سمعني اجيت سحب نفسه أخذ الماي مني وبلع علاجه

أم غفران.. شجاك خالة
ولو مو جديدة الشغلة هوَ انتَ من يوم متزوجت لليوم مشفت الخير عين وصابتك الله ينتقم منهم ان شاء الله

مخلد.. ليش خالة عندي هالورود وما شايف الخير

ايات.. يا ورود شو مدنشوفهم
هوَ بس يزن اليسمعك يگول عندك خمس جهال يحظي

جنات.. اسكتي يمعودة متعرفيهم ينغثون من الحقيقة

أم مخلد.. اسكتن هسة مو وكت هالحچي تعبان الرجال

غفران.. اي خطية حتى لونه متغير
انتَ بس سوي العملية ولتشيل همْ مركزنا بي كادر طبي ممتاز كم جلسة وتگوم على حيلك ان شاء الله

بتول.. ولو اقطع كلامكم
بس العلاج الأخذه مخلد قوي كلش فـ يحتاج ينام لازم اودي للغرفة وانتم مو غربة البيت بيتكم اكيد

باوعت المخلد ابتسم
قدمت الكرسي خليته گدامه وسحبته علية
حضني حيل
اني همْ ما اعرف ليش خليت راسي برگبته يمكن بسبب غفران والموجودين لأن اعرف بيهم ديراقبونة

اخذته للغرفة مددته ع الچرباية وعفته وطلعت
حسيت الوجوه تگلبت
ماكو دقيقتين وگالوا نستأذن بالچذب ما گلتلهم خليكم ع العشى لو بـ إيدي اشمر سبع حجارات وراهم

رجعت للغرفة اعصابي فايرة
طبيت لگيته يگلب بالتلفزيون رگعت الباب حيل
توقعت راح يگول شبيچ بس ولا يمه مستمر على نفس الهدوء عبالك ديحاول يلعب بـ اعصابي الخبيث

- شوية وشلت باكيت الكلينس ضربته بي بكل قوتي
- باوعلي مبتسم هاي ليش

- والك عين تسأل منو هيَّ حتى تجبرني ادخلها البيتي

- منو هيَّ
- غفران منو يعني من كون الله لا يغفر الها دنيا وأخرة

- يگولون بت خالتي
- لا وانتَ الصادق يگولون حبيبتك قبل وهسة وبعدين

- شتردين بتول
- ممسموحلك تجبرني ادخلها لبيتي تسمعني لو لاااااااا

- انتِ مو گلتي ما اتدخل بيك ولا تتدخل بية
- اي گلت
- بعد شكو لتتدخلين
- شنو ما اتدخل ترى هيَّ اجت البيتي
- بيتچ ؟!! المهم وأن كان جيتها مو علمودچ علمودي

- شوف مخلد افندي
طول ما اني بهذا البيت باقية ولأي سبب كان غصباً عليك وعلى راس أهلك واحد واحد تحترم ووجودي وتمسع كلامي واني گلت غفران ممنوع تعتب هالبيت

- كافي ترى دوختيني
- تقربت ركض دفعت راسه دوختك شنوووووو
- سحب إيدي عليه باسها انتبهي حبيبي لأن هيچ انتِ تجبريني اخالف القوانين واتجاوز الحدود الرسمتيها

دفعت إيده وطلعت اليسويلي بز انفجر بـ وجهه
لليل صعدت أمه
دگت الباب فتحتها وطبيت حتى ما حچيت وياها هيَّ هم راحت لغرفتنا گبل شلون راح تخلص ما ادري

ماكو عشر دقايق وگبت العيطة
هيَّ تگوله شـ رجعها وهوَ يرد بيتها ورجلها ناقص تجون تحاسبوها ليش رجعتي الـ مكانچ انتبهي يمة

عرفت من شنو ضايجة
اكيد بسبب جيتهم العصر هاي عود مطردتها بس مجرد أخذت مخلد الغرفته تخبلوا مصيبة هالعالم والله

تقربت الداخل الصالة حتى اسمع شدتحچي
مو كلش فهمت بسبب الصياح
بس سمعتها من گالت بعدك تحبها ورى كل شي سوته

صرخ بكل صوته أي احبها وما احب غيرها يلا ارتاحي
وهنا ما گدرت اقاوم ضحكتي
من سمعتها گالت اله ساحرتك وروح أبوك وإلا وضعك هذا مو مال إنسان طبيعي خليك نايم بالخيسة

رجعت للمطبخ شغلت علبة البخور كلها
ويا دخلتي للصالة طلعت هيَّ من الغرفة رفعتهن بوجها سحر شوفي داسويلكم سحر ديري بالچ مني عمة

باوعتلي بخزرة واجت بـ اتجاهي
وصلت يمي دفعتني حيل رجعت تقربت منها چان تنتر شيطانچ يجي يوم ويوگع ساعتها يشوفچ مخلد على حقيقتچ القذرة

- ما اتصور
- الله موجود لتاخذچ العزة بالأثم
- يصلاة النبي احسن صايرة تحچين برب العالمين عمة

- حسبي الله ونعم الوكيل بكل ظالم
- امييييين

رجعت دفعتني وطلعت رگعت الباب وراها
باوعت على إيدي وطفيت البخور بالحايط احس تلفت أعصابي من وقاحتهم فوگاها هيَّ الـ تتحسب

رجعت للغرفة بدون ما احچي ويا اخذته للحمام
بس رجعته نمت
ثاني يوم هم اجة عمي ظل على هالحالة اسبوع تقريباً خصوصاً بالليل لأن اصدقاء مخلد يجون يشوفوه

اليوم العصر دانظف الشقة اندگت الباب
باوعت من العين عمتي
فتحتها وطبيت شو ما اشوف إلا بـ إيدها بطل لازمتـه بعصبية وترش بي زوايا البيت ظليت صافنة عليها

خلصت رش ظلت تقرا المعوذات بصوت عالي
وراها مشت من يمي الغرفتي تبعتها مدري شنو حطت بحلگ مخلد وباسته تبچي

گلها شبيچ ما ردت عليه
طلعت للصالة أخذت يزن ونزلت البيتها
سديت الباب واستندت عليها ربي صبرني من كل عقلها هاي جاية ترش البيت عبالها اني الي بدرب السحر

اچذب لو اگول ما انغثيت
من القهر احس معدتي صارت تفور شوية واستفرغت

من بعيد صاح مخلد بتول بيچ شي
غسلت وگتله لتخاف بس اخذت برد شوية واصير زينة

اوضاعي تخربطت حتى راسي صار يفتر
ويا الصلاة اخذت مخلد للحمام بالگوة شلته من التعب ورجعت للغرفة صليت

واگفة اسوي بالعشى اندگت الباب
رحت فتحتها دخل يزن بـ إيده ماعون مقليات
گتله هذا شنو ؟!! رد بيبي دزته گالت خل أبوك ياكل من هذا لتسوي أمك عشى

سديت الباب وبسته روح غسل وتعال ساعدني
رجعت للمطبخ اخذت علاگة شمرت الأكل مالتها وخليته على صفحة عود باچر انطي للحيوانات

الوجع بكل مكان بجسمي بس كله يهون يم وجع معدتي بسببه حتى ما اگدر اظل واگفة على حيلي كل شوية اگعد ثواني يلا ارجع اكمل شغلي

اجة يزن گال ماما بشنو اساعدچ
انطيته سلة الخبز
راد يروح گال ماما بيبي تگول أمك هيَّ المرضت أبوك

- معليك بيها ماما
- ليش هيچ تگول اخاف لأن عمو همام ضربه
- ماما اترجاك لتتدخل بسوالف الكبار وبعد ممنوع تنزل جوة وما اريد نقاش وإلا نرجع يم بيبي الحجية

باوعلي ضايج وطلع بدون ميجاوب
أول ما راح اجتني اوجاع فضيعة ببطني حاولت اقاوم ما گدرت موت أحمر مو وجع
گعدت بالگاع اتلوى ما عشت هالألم حتى بولادتي اليزن

شوية وحسيت اكو شي دينزل علية
اجة يزن شافني متمددة صاح ماما هاي شبيچ
من الألم صرخت من گلبي صيح أبوك راح اموووووت
ركض حتى يصيحه واني بـ هالحالة تذكرت الوضع
صحت ورى لتحچي يزن تعاااال ولكككك ماما
للأسف مسمعني
اجت أوجاع سحنت روحي سحن صرخت بكل صوتي ورگعت راسي بجامة الطباخ نزل الدم على عيوني مسحته وقرفصت على نفسي بالأرض من الحالة العشتها نطقت الشهادة لأن حسيت دانازع الموت....

يتبع