#أبي_لم_يكن_إنساناً
مستقبل الرواية الجزء الخامس..
للكاتبة لبنى الموسوي
تحركت بـ اتجاه سيارتي مرعوب من المنظر الگدامي
من وصلت لگيت الباب مفتوح
الدخان حجب الهوى عني وشدة لهيب النار منعتني من الرؤيا بـ وضوح لدرجة صرت اواجه صعوبة بالنظر الداخل السيارة
تقربت أكثر لسعت النار إيدي
لو ما صوت جهازي قاطعني كان دخلت بـ هالجحيم
طلعته من جيبه ما صدگت مخلد ديتصل فتحت الخط وينك ولك والله عرفتك طالع من شفت الباب
- ااا
انزل للنزلة.. ه همام امشي مسافة للأمام وا اا انزل يلا
سديت الخط وركضت بـ اقصى ما عندي
نزلت مثل ما گال واشوفلك أخوية مشمور على وجهه والدم تارس كل جزء من جسمه خليت سلاحي بالحزام وسحبته الحضني حيل
- مخلد مخلد تسمعني ولك جاااااوب
- فتح عيونه راح يجون اااا اتصل بـ بـ صالح يساندك
- ليش ولكككككك ليش
ليش سويت هييييچ وشلون تخاطر بـ حياتك علمودي
- ااا افديك بـ روحي غير انتَ عضيدي
- حضنته اقوى ولأول مرة أنهار هالشكل راح تعيش لك راح تعيش وترجع الأهلك وأبنك وبيتك متعوفنا اعرف
- بس حچيتها اتصلت على صالح رد عاد رررررد يمعود
- الووو
- صالح صالح تعال الـ **** اني محاصر من المافيات ومخلد جسمه منتهي من الشضايا ساعدنا
- شتحچي انتَ
- مثل ما سمعت جيب وياك اسناد وتعالوا من جهة *** حتى نحاصرهم جنوب غرب فرصتنا هاي
- جاي قبلهم اني لأن طلعت من المركز
- المهم اتصل بلغهم التأخير مو بـ صالحنا ومخلد وضعه خطر اذا يظل ينزف نخسره استعجل اترجاك
- جايك همام دقايق واصير يمك
سديت الخط مخلد يباوعلي بـ وجع والأبتسامة تارسه وجهه شبيك مخلد لتخوفني دخيلك قاوم
- م ميحتاج اوصيك على،، على بتول
بس دير بالك على أبني وأمي لأن ما عدهم غيري سند
- انچب يلا انچب
لتبدي تمسلت محد راح يربي أبنك غيرك شد حيلك عاد
- الملف م ما اعرف وين
- رفعت عيني هذاك مشمور مسافة عنك ارتاح لتحچي خل اگوم اتصرف قبل ليجون لهنا
- ه همام اذا متت لا.. لا تنشغل بية
خ خليك قوي و و كمل البدينا بي م ما اريد دمي يروح هدر
- لتاكل *** زايد گتلك مراح يصيرلك شي
- شهگ بقوة... دير بالك ع على نفسك منهم ه ه همام
- رفعت عيني على السما يا رب قويني على هاللحظات
خليت راسه بالگاع وگمت اباوع على الطريق
فاتت سيارة سحبت سلاحي
عبالي همَ طلع رجال عادي من شاف سيارتي بهالمنظر داس بريك وفلت يخاف على نفسه يتورط
گمت صيحت ورى بس خل ينقل مخلد للمستشفى غير هالشي ما اريد بس للأسف ما سمع مني وراح
سمعت صوت مخلد يتمتم ويا نفسه
تقربت منه
حطيت أذني يم حلگه ديگول عطشان هزيته حيل خل عينك مفتوحه لتغمض مخلد محتاجك وياية خوية
- باوع علية بنفس أخير اا احس اكو حرارة بـ جسمي
- طبعاً غير متصوب
- ه ه همام عوفني خلي عيونك ع ع الطريق
بس حچاها نزل راسه من إيدي
ردت ارفعه ابتسم وغمض عيونه تخبلت عقلي وگف
ظليت اصيح گوم ولك لتنام ماكو ما استجاب سحبت إيده جسيت النبض بعده عايش
طلعت موبايلي داتصل بـ صالح سمعت صوت سيارات
نزلت بسرعة حتى ليشوفوني
باوعت للطريق سيارتين عالية ومظللة نزلوا منها عشر زلم مسلحين واجو بـ اتجاه سيارتي يركضون
- سحبت اقسام احچي ويا نفسي عشرة ذولة شدتسوي همام مستحيل تگدر عليهم !!!
ظليت اترقب الموقف عن كثب
ما اگدر ارمـي طلقة وحدة بدون إسناد حتى الرصاص محدود عندي
- قريبين كلش مني سمعت واحد منهم گال مميت هذا لأن الباب مفتوح لو واحد جاي ومساعده
- معقول ناصب النا كمين
- هذا همام مو شوية يسويها تعرفوا شگد ضابط ذكي
- ابحثوا عليه بالمكان ما عنده سيارة ميگدر يبعد هواي
بس حچاها اجو بـ اتجاهي
باوعت المخلد وغمضت عيني ما بيها مجال لازم ارمي
رفعت سلاحي وضربت واحد برجله
بس وگع رجعوا ليورة يصيحون تفرقوا بسرعةةة كمين ولكم كمين
توزعوا بالمكان كل واحد راح من جهة
الطلقة عندي مثل النفس اذا طلع بعد ميرجع لذلك صار تفكيري كله شلون اشغلهم بين ميجيني الأسناد
زحفت ويا مستوى الگاع لحد ما وصلت للجهة الثانية
والحمد لله نجحت خطتي
صاحوا مو وحده اكو واحد مساعده الرمي من جهتين
زحفت أكثر ورميت ثالث طلقة
تخربطت اوضاعهم بعد ما حسوا نفسهم محاصرين من 3 جهات باوعت للمخزن لتخلص اترجاك لتخلص
رجعت زحف لنفس مكان مخلد
الرمي مالتهم مستمر
من شافوني هادئ وما ارمي عليهم تشجعوا يتقدمون
اضطريت اضحي بـ طلقة رابعة حتى ادفع الخطر عن نفسي همَ اذكي من أن ينخدعون بهذا الهدوء
ابتعدوا مسافة شوية ورجعوا للتقدم
استجمعت تركيزي ورفعت السلاح قريب ميوصلون الي رميت الثاني برجله ركضوا سحبوه وانسحبوا ويا
ظلوا يترقبون يردوني اكشف نفسي
زحفت للجهة الثانية ورميت تقدموا بـ اتجاهي
رجعت المخلد ورميت تشتت تركيزهم أمرهم واحد من عدهم يتوزعون على جهات الرمي ويتقدمون للأسفل
اضطريت ارميهم أربع اطلاقات متتالية لأن لو وصلت خطواتهم للنزلة معناها اتأسر بـ إيدهم
المشكلة سلاحهم قوي كلش ومتمرسين ع الرماية بدقة
مجرد ما توزعوا
صار الرمي يصلي على راسي من جميع الجهات
بديت ارمي عليهم عشوائي ماكو 8 طلقات ونفذ المخزن
زحفت سريع سحبت سلاح مخلد من حزامه
رفعته اريد ارمي
سمعت صوت رمي صاروا يصيحون من ورى همْ اكوو ولكم احموا ظهركم وانسحبوا على السررريع
- صالح صالح اجة
سحبت جهازي اتصلت عليه بسرعة رد همام انتَ بخير
- بخير صالح وحدك لو وياك الأسناد
- لا وحدي
- حافظ على المخزن لعد.. ترى همَ هواي منگدر عليهم والعتاد قليل كل طلقة خليها بالمكان المناسب
- مخلد شلونه
- ما اعرف غايب عن الوعي ادعيله
- همام تقدم واحد بـ اتجاهك ركز اترجاك لا يوصلولك
شمرت الجهاز ورفعت السلاح
وصل للنزلة خطوة بعد ويكشفني ضربته بـ رجله وگبل انسحبت مسافة ضربت طلقة ثانية للتشتيت
اجوي سحبوه رماهم صالح من الخلف
ظلينا هيچ مناوشات بطيئة العتاد يحكمنا بالتأني
بعدنا نحاول وياهم اجت سيارة ثالثة رفعت راسي نزل واحد منهم شايل قناص
ثواني واجت سيارة رابعة
صاروا تقريباً عشرين نفر يعني صار لازم نتشاهد
رفعت جهازي صالح الموقف جداً سيئ لا همَ يخلصون ولا عتادهم ينفذ ما اتصور نطلع منها سالمين
- واني همْ هيچ اگول
- بس راح نحاول موتت شرف ولا موتت ذل مو صح
- اكيد
- يلا ارمي بس همْ خليك حذر لتفرغ المخزن إلا بيهم
نزلت الجهاز ورفعت سلاحي
شفت واحد منهم وگع مضروب بـ صدره
رفعت موبايلي لككككك صالح لترمي بمناطق حساسه خلي تركيزك أعلى منريدهم ميتين شجاك
- شتسوي بيهم وانتَ بالنهاية ميت ميت
- طيح الله حظك
- هههههههه يلا يمعود خليهم يموتون عاد نتغدة وياهم بسفرة وحدة همَ زقوم واحنة فاكهة الجنة
- صالح مو وكت تحشيشك
لتضرب لا بالصدر ولا بالراس ذولة كنز تعرف شنو يعني كنز
- افتهمت يلا ركز وياهم
- شمرت الموبايل ورميت عليهم لأن اقتربوا مني
بعدني أركز بالمكان
لمحت اثنين منهم التفوا من خلف صالح
رفعت الموبايل صااالح دير بالك راح يكشفوك من ورى
- شفتهم شفتهم
- ارمي لتستخر بيهم الرصاص حياتك صارت بـ خطر
شمرت الجهاز ورميت عشوائي بلكي يتشتتون
صارت مواجهة ويا صالح
الخط مفتوح سمعت صوته صاح سحبته من الگاع هاا شبيك لتگول تصوبت صالح صاااااالح وينك رد
- اي تصوبت طلقتين
- يا الله ياااااااااااا الله.. خو ما بـ مكان حساس
- لا بـ رجلي
- قاوم اترجاك صاالح كافي علية مخلد حاول تنسحب من المكان صح صعبة بس حاول لأن كشفوك
رفعت سلاحي رميت شوية وصار هوَ همْ يرمي وياية
صوبنا منهم 7 وخلص المخزن عندي
رفعت الجهاز صالح مخزني ومخزن مخلد خلص شلون
- واني ظلت بس طلقتين عندي
- صوتك تعب
- نزفت هواي حتى مگاعد اركز بالتصويب احس الدنيا تدور بيه وعيوني سوربت يمكن راح افقد الوعي
- اسمع اني راح اطلع
- لا همام تخبلت شنو تطلع تريد تموت
- لازم اطلع خليني اكشف نفسي واتأسر حتى اكسبهم
- مستحيل اترجاك لتسويها
- خلص صالح حتى عتاد ما عدنا شنسوي متنحل
- خليك..
- بعده ممكمل انقطع صوته صالح شبيك صالح صاااالح جاوبني الخاطر الله لتسكت لتسكتتتتت
- يا رب ساعدنا عليك نبيك محمددددددددد
زحفت الجهة صالح
باوعت من بعيد يمكن واگع لأن داشوف رجله گدامي
وين صاااااااااار الأسناد الله ياخذكم من دولة فاشلة
قطعت الأتصال بـ صالح وخابرت القائد
بسرعة رد همام خو ما بيك شي جايين احنه بالطريق
- سيدي مخلد وصالح تصوبوا وعتادنا نفذ
هواي تأخرتوا خمس دقايق واتأسر بـ إيدهم استعجلوا
- وصلنا دقيقة ونصير يمك
- سديت الخط منه باوعت عليهم بدوا يتقدمون علية
اذا وصلوا راح يكشفون مخلد لازم اتحرك
گمت ع السريع
زحفت مسافة وكشفت نفسي الهم صاروا يرمون بـ كل ما بيهم
بعدني ما واصل الصالح انضربت بـ زندي
قاومت الألم
لازم احميهم اذا وگعت معناها أخوتي همْ يوگعون وياية
باوعت الصالح متمدد بالگاع ويأن من الوجع
اخذت السلاح من إيده اجيتك صالح اترجاك ظل سبع لتستلم للموت الخاطر أمك ورحمة
التفتت عليهم وسحبت المخزن بس طلقتين عنده
باوعت بالمكان
واحد منهم واگف بالنص والكل ملتفين حوله اكيد هذا زعيمهم واذا وگع معناها كلهم يوگعون ويا
- رفعت راسي دخيلك الهي ساعدني كل الدنسوي حتى نوگف الأجرام الديصير بحق عبادك
رجعت باوعتلهم بدقة احاول أوصل للزعيم
مطاوقي بشكل حذر جداً
رفعت السلاح صوبت واحد بـ رجله وبسبب وگعته بين عليهم الأرتباك مجرد ما فسحوا المجال عن الزعيم ضربته بـ أخر طلقة ظلت بالمخزن وگع بنصهم
انهزوا من الرعب
صياحهم ترس المكان ونفروا يدورون علية
شمرت السلاح وباوعت المخلد اضحك خلصت صديقي صح وگعنا بس المهم سوينا العلينا وأكثر...
- انتهت يعني
- انتهت بس نهاية شرف تليق بينا
- مقصرت خوية الله يجزيك خير عن كل عراقي حاولت تحمي وتاخذ حقه من كل مجرم حاسبته وصفيته
- كلنا اشتركنا بـ هالبطولات مو وحدي
- يعني اليوم نتغدة ويا الرسول مثل ذولاك الناس
- ههه وشرط باچة وعليها راس بصل من هذا اليشتهي گلبك وعصرة حامض
- ههه ما بيه اضحك اسكت
- باوعت من الزاويا راح يوصلون صالح اقتربوا كلش
درت وجهي على جهة مخلد تنهدت بـ حسرة
ودعته من بعيد
تشاهدت اني وصالح ورفعت السلاح من الگاع وجهته عليهم أوهمهم بي ما اريد استلسم للأسر خليهم يرمون علية واموت اشرف من الذلة بـ إيدهم
هي لحظات بسيطة
مشيئتهم قررت النا الخسارة والموت
ومشيئة رب العالمين ارتفعت وكللتنا بالنصر والحياة
صوت سياراتنا ترست المكان
نزلوا الأسناد انسحبوا المافيات للخلف بسرعة قصوى
باوعت الجماعتنا هواي والقائد وياهم گمت عفت صالح وظهرت نفسي من بعيد اشرت بـ إيدي على السلاح
شمرولي رشاش أخذته من الگاع وبدت المواجهة
ربع ساعة وهمَ يراوغون ويانا
هناك واسمع صوت واحد وگع التفتت وراية لاااااا ولكم رائد تصوب اسحبوه من الساحة بسرعةةةةةة
- اي صح اسحبوا ديرمون عليه يمعودين
- صحت بيهم لحد يرمي على الأجزاء الحساسة نريدهم عايشين ما اوصيكم
باوعت للقائد ارجع سيدي هواي انطينا خسائر اليوم
سمع كلامي وانسحب
بدت طاقتي تنفذ والألم سيطر علية رجعت بـ خطواتي للخلف گعدت بصف صالح منتهي حتى ميحس
مررت إيدي على وجهه الحمد لله بعده يتنفس
غمضت عيني بتعب
ثواني وخف الأطلاق وراها وگف نهائياً باوعت للضابط شصار
- نفذ عتادهم
- حاصروهم أخيك هالمواجهة متحمل الخسارة ما راح ينهزمون هواي عدهم مصابين وأولهم زعيمهم
بس حچيتها تقدموا للأمام
وفعلاً انشلت حركتهم بسبب أصابة جماعتهم
شوية وگدرنا نلقي القبض عليهم بس شفتهم مكتفين أجتني طاقة عجيبة گمت من مكاني جنديين مصابين
حطيت إيدي على نبضهم واحد عايش والثاني ميت
رجعت للضابط رائد بعده صاحي
عفتهم وتقدمت المخلد جماعتنا كلهم يمه نزل اله القائد جس نبضه ورفع عينه علينا يبچي ما استوعبت
گعدت بالگاع واخذت مخلد الحضني
صاح الضابط شنو مات
هز راسه القائد ع الأكثر مات ما بي نبض ونزف هواي
همام.. ما مات ما ماااااااااات
گوم ولك مخلد ازعل عليك والله اذا سويتها وعفتني
احمد.. خلونا ننسحب المكان كلش خطر حالياً
همام.. رائد وصالح متصوبين اسعفوهم بسرعةةةة
وانتَ احمد
تعال ساعدني نرفع مخلد للسيارة بي روح مستحيييل يموت مخلد قوي وكلكم تعرفوه
احمد.. ميخالف اني وياهم نشيله انتَ مصاب روح يلا
همام.. لا اني اشيله بس تعال ساعدني
شافوني رفعته اجو ساعدوني صعدنا بالسيارة
انطيتهم سويچ سيارة مخلد واخذت الملف من الگاع
صعدت ويا بس گعدت اخذت راسه الحضني ما گدرت اتماسك أكثر من هذا
بچيت من گلبي
حاضنه وخايف لا هاي أخر مرة اشوف أخوية بيها
السوا مخلد ابد مينسي ضحى بـ روحه في سبيل يحمي الوطن من شرهم ويحمي أخوه من تهديداتهم
وصلنا للمستشفى نزلت ع السريع
اخذوا مخلد التفتت على صديقي صالح ورائد شلونهم
- نزفوا هواي وبالطريق فقد رائد الوعي
- يا رب دخيلك احميهم الأهلهم
- يمعود شو ماخذ راحتك امشي ادخل انتَ همْ مصاب
- ما بية شي شي اني
المهم همَ لأن خسارتهم يا احمد متتعوض ابد متتعوض
- ليش خسارتك التتعوض عامود التحقيق انتَ دامشي
سحبني من إيدي دخلنا للمستشفى
اجة الدكتور فتح القميص وصاح هاي انتَ شلون واگف على طولك شوف إيدك شصاير بيها اخذوا بسرعة
دخلوني الغرفة العمليات
بالي كله يم مخلد وصالح تعبت كلش
بدوا يحچون وياية ما اذكر شنو شوية وتلاشى كل شي من گدامي
طيبة.. همام گلي اليوم يريد يحچي ويا مخلد
لذلك ما خفت من تأخر
بس المصيبة من صرت اتصل عليه كله ينطيني انتظار وميرد لعب الشيطان بـ راسي شديصير ويا
نزلت جوة قريب الثلاثة
رجعت اتصلت بي انغلق جهازه خفت أكثر
رحت سولفت البتول ظلت صافنة بـ وجهي ها يمعودة
- معقولة صاير وياهم شي
- لا اسم الله عفية لتخوفيني گلبي خلص
- تعالي نتصل بـ مخلد من موبايل بيبي واذا رد انطيچ انتِ تحچين ويا
- يلا همْ خوش فكرة
- بس حچيتها راحت اتصلت بي باوعتلي هذا همْ ميرد
- شنو السالفة
- ظلي دگي على همام واني على مخلد نشوف تاليها
نص ساعة واحنة نتصل بيهم
بعدني احاول اتصلت بية رحمة جاوبتها بسرعة
- همزين دگيتي بوكتچ رجلچ وين رجع للبيت لو بعده
- لا ما رجع
هوَ اني اتصلت حتى اسألچ
لأن خابرني گال عندي شغل ويا همام ومخلد راح اتأخر
طيبة.. بيهم شي والله بيهم شي
بتول.. عزة بعيني هسة شنسوي شلون نتصرف احچي
رحمة.. شبيهم شنو تعرفون شي وضامين علية
طيبة.. شمدريني اصبرن يمعودات
احسن شي اتصل بـ عمو محمود لأن وحدنا منسوي شي
اتصلت بـ عمو بلغته وظليت انتظر خبر منه
ساعة واتصل
حاول يخفي عني ومن لحيت اعترف ثلاثتهم مصابين
تخبلنا اني وبتول
گال جهزوا نفسكم سمير يجي ياخذكم البيتنا
هيچ يا دوب بس لبسنا الحجاب اجة علينا اخذنا البيت جدي بس طبيت تلگني بالبچي كلهن مفجوعات بعزيز
ساعات اصعب ما يكون مستحيل تنوصف دقايقها
ردنا نروح الهم عمو محمود اتصل يصيح راح احذركم التوصل للمستشفى متلوم إلا نفسها الدنيا مخبوصة هنا
گعدنا وسكتنا مجبورات
باتوا بالمستشفى بيومها وكلما نسأل عمو عليهم يگول كلهم بخير لتخافون بس الليلة ونطلع ان شاء الله
همام.. فتحت عيني الهج بـ أسم مخلد
صار القائد بـ وجهي الحمد لله على سلامتك يا بطل
گمت بسرعة لزمني وين يمعود توك طالع من العمليات
- مخلد صالح رائد شصار احچي سيدي
- صالح ورائد بخير الحمد لله
- ومخلد !!!
- مخلد للأسف حالته جداً تعبانة يحتاج اله أعجاز الهي
- يعني عايش
- عايش بس الشضايا تارسه جسمه
- اي والدكاترة شـ ينتظرون هيَّ شضية تصعب عليهم
- خمس دكاترة على راسه لمدة خمس ساعات
طلعوا اغلبها
بس اكو كم شضايا مستقرة بـ رجله بالتحديد ما گدروا يطلعوها اله بس خل يگوم بالسلامة والباقي يهون
- اريد اشوفه
- متگدر همام وضعه حرج شبيك متستوعب
- زين اشوف صالح ع الأقل
- ادري انتَ وينك وين الوگفة ليش هيچ روحك رخيصة
- اني بخير واذا شفتهم اصير احسن
- ماشي بس اسألهم انتظر
راح شوية ورجع گعدني بالكرسي واخذني الصالح بس دخلت صاحت الممرضة هاي انتَ همام اكيد
- اي ليش
- يمعود صرعني يريد يجيك ورجله ابد متتحمل ضغط
القائد.. ههههههه شلون أثنين عنوديين
همام.. قربت الكرسي من صالح راد يگوم لزمت إيده
خليك صحتك بالدنيا
صالح.. الحمد لله على سلامتك أبو النسب متشوف شر
همام.. وسلامتك حبيبي
- صدگ مخلد بخير
- يگولون بخير بس ما شفته لسه ادعيله ماكو بـ إيدنا غير بس الدعاء اله والرائد وصادق وياهم
- ليش رائد وصادق همْ تصابوا
- وأمين استشهد
- استغفر الله رب العظيم واتوب اليه صدمتني بالقرأن
- المهم دمائنا ما راحت هدر وگدرنا نلقي القبض عليهم
- شوداك الهم وليش ما بلغتني قبل لتروح
- ما ادري حالي حالك كل شي ما اعرف الحچي كله يم مخلد
ظليت يم صالح عشر دقايق وراها رحت الرائد
حاولت اقنعهم اشوف مخلد محد قبل
للصبح لو ما المسكنات ما أنام من التوتر مو الوجع كل دقيقة تمر علية سنة ما اريد غير بس اطمأن على مخلد
- بالتسعة دخل علية القائد فرحان ابشرك صحى السبع
- بـ روح امواتك سيدي
- وداعتك.. بس خطية حيل تعبان
- اشوفه اترجاك ما راح ارتاح إلا اذا گعدت فوگ راسه
- هسة احاول احچي وياهم بلكي يسمحون الك
راح شوية ورجع گال يلا گوم
سندني تمشيت الغرفته دخلت وظل هوَ ينتظر بالباب
باوعت عليه نايم وحالته يرثى لها
تقربت منه مسحت على شعره گوم ي البطل گوم وريح أخيك گلبي نار عليك
- فتح عيونه بتعب هاي شنو شجابك هنا
- غير بالمستشفى
- واني عبالي افتح عيوني على حور العين تالي فتحت على جهرتك بس يلا شسوي هوَ حظ بعد
- ههههههههههه حسابك ويا بتول مراح احچي شي
- لا دخيل ربك
- شلون صرت شدتحس
- ما بية شي انصح منك بس بشرفك شفت شسويت
- شفت شفت
- نقذتك يول تعرف شلون نقذتك
- رحم الله والديك
- لا عادي ما سويت شي ولا داحملك منية هيچ حچاية التنگال ماكو منة بين الأخوان تعرف انتَ
- متبطل سوالفك
- يلا لك فوگ ما نقذتك هيَّ مو منية بس انتَ تحچي الأخرس
- ضحكت چان تندگ الباب ويدخل صالح
- أبو الخلد بطل وربي
- ها شفت شلون نقذتكم مو منية بس الشيء بالشيء يذكر
همام.. هوَ وين الشي الأنذكر بلا زحمة
مخلد.. مو گال بطل
صالح.. اي والله عمي بطل لو ما انتَ منصيدهم صيدة الفيران
مخلد.. حتى تعرفون بلا مخلد انتم دايحين
همام.. اهوووو
مخلد.. ها يول شو معاجبك ترى اني نقذتك خاف ناسي عادي والله مستعد اذكرك كل دقيقة
صالح.. ههههههه الك الله همام شـ يخلصك بعد
- ديحچي دخل القائد ها بشر مخلد شلونك هسة
- الحمد لله
- سبع والله وتستاهل الترقية
- اي طبعاً غير اني نقذت همام
التفت علية لتباوع هيچ مو قصدي احملك منية قصدي يعني لو ما اني چان انتَ هسة صاير تشريب لحم
همام.. ارجع نام لا اخربطلك خلقتك الزفرة
مخلد.. ههههههه هاي فوگ ما نقذتك بس مو صوچك
همام.. حسيت الباب انفتحت دخل الدكتور تعجب بينا
الدكتور.. ليش كل هالتجمعات المريض يحتاج للراحة
همام.. رايحين بس حبينا نطمأن عليه
مخلد.. دكتور رجلي مگاعد اگدر احركهم ولا احس بيها
الدكتور.. تحمل شوية
اصابتك چانت كلش قوية مو زين ظليت عايش لسه
همام.. سحبت القائد وطلعنا من الغرفة شبيها رجله ؟!!
بتول.. الصدمة چانت اقوى مما اتصور
بنفس الوقت الأني زعلانة بي من مخلد اكتشفه مصاب وحالته خطرة مجرد التفكير بـ رحيله رعبني
الليل كله يزن يبچي بـ حضني ما شاء الله على ذكاءه
بس يصير شي يحس گبل
لذلك خلصها اريد بابا اخذيني البابا احتاريت شنو اگول وشلون اقنعه أخر شي ظليت ابچي ويا مثل الجهال
للصبح اجت صفاء جايبة الريوگ
ظلت تتوسل بينا ناكل
محد گدرت
اذا كل وحده بالها يم وليها من عمة نهاية وخديجة الى رحمة المسكينة الخلصت الليل كله تتخربط وگوة يصحوها بالعلاج
للعشرة دگ جهاز طيبة طفرت وهيَّ تصيح همام ولكممم
گمزت وياها جاوبي ورفعي الصوت بسرعة
- الووو همام
- ها عيني أم نسرين شلونكم
- شلونه يعني والله دنموت من خوفنا عليكم
- كلنا بخير ليظل بالكم وهذا صالح اسمعوا صوته يمي
صاح صالح يمة اني بخير لتخافين
بچت خطية
رحت حضنتها وحضنت رحمة اتحمدلهم بسلامة صالح
نهاية.. يمة صالح بروح أبوك احچي الحقيقة لتضم عني
صالح.. والله يمة زين رحمة شلونها
نهاية.. كل شوية متخربطة راح تتخبل عليك شتعرفها
صالح.. طمنيها كلها كم ساعة وارجعلكم خل تدير بالها على صحتها
بتول.. كافي لتبچين هذا هوَ بخير الحمد لله
رحمة.. ما ارتاح اذا ما اشوفه گدامي
بتول.. راح تشوفي ان شاء الله وتاخذي الحضنچ كافي سمعتي صوته قوي نفسچ شوية
- بعدها طيبة تحچي ويا همام رجعتلها خايفة ومخلد
- همام صدگ مخلد شلونه
- ليش منو اليسأل عليه ومنو المهتم الأمره
- لتظلمها الليل كله منامت خطية وهيَّ اصلاً السألت عنه
- انطيني اريد احچي وياها
- اخذته من طيبة وغلقت السبيكر عموو حبيبي الحمد لله على سلامتك گلبي راد يوگف من خوفي عليكم
- الله يسلمچ حبيبتي يلا جهزي نفسچ حتى ترجعين
- شنو وين مفهمت عليك
- لا فهمتي وما اريد نقاش تجهزي للأربعة ياخذچ سعد الشقتچ وممنوع الأعتراض تسمعيني لو لاااا
حچاها وسد الخط بـ وجهي ظليت صافنة ورى هذا من كل عقله يحچي أرجع شنوووو ؟!!!....
يتبع