أبي لم يكن إنسانًا

مستقبل الرواية ج4

#أبي_لم_يكن_إنساناً
مستقبل الرواية الجزء الرابع..
للكاتبة لبنى الموسوي

المشكلة طول ما هوَ يضرب
ذاك ميرفع إيده حتى يدافع عن نفسه
الحجية تصيح وتستريح تريد همام يتركه ماكو أخر شي بالگوة وصلت يمهم ضربت رجله بالكرسي وصاحت بي

- كافي عااااااد عيب عليكم والله
عشرة عمر بيناتكم
انتَ دمرتها بـ إيدك وهذا دمرها بـ افعاله استحوا شوية وخلوا للزاد والملح البيناتكم قيمة وقدر

- بتول دتموت يمة
رادت تنجلط تعرفين شنو يعني رادت تنجلط
ومنوووو السبب ؟!! هذا الدتگولين عنه عشرة عمرررر

حچاها ورفع إيده رجع ضربه حيل
وهنا صار الشي المحد محسب اله حساب ولا اجة على بالنا بسبب الضغط النفسي الگاعد نعيشه بـ لحظتها

يزن واگف بالباب يباوع على عمه وأبوه ويبچي بحرگة
من ضربه همام بوكس صاح بكل صوته لا عمووو

ركض عليهم ردت امنعه فلت من إيدي
نزل على مخلد نام على جسمه يحاول يصير حاجز بينه وبين همام

حضن أبوه حيل يشهگ من البچي
- كافي تضربه ترى والله اگول الـ ماما عليك وبعد منجي يمكم

ابتعد عنه همام يستغفر بـ صوت عالي
التفت على باب الغرفة الدكتور واگف عافنا وراح اعتذر منه رد عليه ولا يهمك عادي تصير بكل البيوت

- ناخذها للمستشفى لو شلون
- لا هسة جيب المغذي والأبر هاي من انطيهيا وتصحى تاخذوها حتى نسوي الها الفحوصات اللازمة

- انتظرني ما اتأخر دقايق
- رايح البيتي أبو نسرين عود من تجيبهن بلغني واجي

- براحتك

سلم وطلع طول ما هو يمشي عيونه على مخلد
رحت سديت الباب ورى
من رجعت لگيت يزن يحاول يگوم بـ أبوه وهذا من گد الضرب ما بيه حيل حتى يرفع راسه من الگاع

- فجأة مد إيده همام اله انطيني إيدك
- باوع عليه وسكت
- مخلد انطيني إيدك ما عندي وقت اريد اجيب العلاج

يزن.. عوفة اني اساعده حتى بعد متضربه هيچ

نصى همام توة ديسحب مخلد صرخ من ضلوعه
گومة بالگوة
نومة ع التخم وصعد يجيب محفظته ركض يزن جاب باكيت الكلينس وگعد يم راسه يبچي

سحب أثنين وباس أبوه من شعره
بدا يمسح الدم من وجهه ما گدرت اسيطر على دموعي من منظرهم تقربت منه گوم حبيبي روح للغرفة

- ما اريد عوفيني
- گوم بابا اسمع كلام عمتك ولتجي لهنا بعد إلا اصيحك

- ليش عمو ضربك بعد ابد ما احبه
- لتحچي هيچ عادي الكبار يتعاركون مثل الصغار المهم بالنهاية يظل واحد يحب الثاني واني احب عمك

مسح دموعه بـ تشيرته ورجع سحب كلينس بعصبية
طبيعته كلش مطيع
بس هالمرة وعلى غير العادة ما سمع الكلام
ظل يمسح بوجه مخلد الى أن نزل همام وشافهم على هالحالة

درت وجهي عليه توسلته بـ عيوني يحل الموقف
تقرب من يزن
مسح على شعره وطلع بدون ميحچي حرف بس سمع مخلد صوت سيارته سند نفسه على أبنه وگام

استأذن من الحجية حتى يشوف بتول.. سمحت اله
أول ما مشى اشرتلي بعيونها يعني روحي ورى
تبعته حتى ميگدر يمشي يمكن لو ما أبنه سانده يوگع

فتح الباب ودخل قبلنا
چانت نايمة بس شكلها كلش يخوف مثل الميت المابي روح وتتغير كل ملامحه حتى شفافها صارن زرگ

تقرب منها ثنى ركبته يم السرير وحط إيده بـ إيدها
- گومي حبيبتي
گومي واني اعتذر منچ لأخر يوم بـ عمري
گومي واني اسوي كل شي حتى تسامحيني بس لتأذين نفسچ وتأذيني وياچ بـ هالنومة هاي

- بابا شبيها ماما
- تعبانة ادعيلها الله يريح جسمها وروحها
- ليش همْ عمو ضربها مثل ما ضربك
- لا بوية عمك يحبها ميمد إيده عليها بس اني الأذيتها

- هوَ همْ يحبك وضربك ليش تدافع عنه
- اني غير
- گومها خلينا نرجع البيتنا واني هناك ادير بالي عليكم حتى الأكل اعرفله اسوي لفات منا لما ماما تطيب

- تعال حبيبي تعال

بس حچاها ركض حط راسه على صدره وبچة
حسيت مخلد تعب بس ميگدر ياخذ راحته واني بيناتهم

اضطريت انسحب من المكان
خليهم وحدهم بلكي الله يبرد نارهم وتنحل هالمشكلة

- رجعت للصالة تلگتني الحجية ها شو اجيتي
- يزن كسر گلبي بيبي
- لعد اني شگول منا يزن منا بتول منا مخلد أبني هذا معزته بـ معزة همام مو سهلة علية اشوفهم هيچ

- شجا دمر كل شي حتى نفسه
- شسوة من دخل عليها
- توسل بيها تگوم بعدين يزن ظل يبچي بـ حضنه اني هم عفتهم لأن حسيت بـ مخلد محتاج يظل وحده

- اووووف يا شيطان البشر
لو راد يخرب بيوت العالم العمرانة شيسوي وشيعمل..

- اخذت حامد من إيدها ورحت للغرفة
لگيت نسرين من الخوف شابعة بچي يربي شلون حتى الجهال ما سلموا من هالمصيبة

گعدت يمها احاول اقنعها مجرد نقاش مصارت مشكلة
ربع ساعة وسمعت صوت همام صاح يا الله
خليت حامد يم أخته وطلعت جايب الدكتور ويا رحت يمة همست ترى مخلد ويزن يم بتول بلا مشاكل

عافني وراح الغرفتها
ماكو ثواني وطلع مخلد لازم أبنه بـ إيده
نصى ع الحجية باسها من راسها وسحب محفظته من جيبه طلع مبلغ انطا بـ إيد يزن وگلة هاي الك والأمك

- وين رايح بابا
- للبيت
- لتعوفنا انتظر ماما تگعد وأخذنا وياك ما اريد ابقى هنا

- أخذكم ان شاء الله بس مو هسة
انتَ بطل
راح تدير بالك على ماما بـ غيابي وتداريها لتنشغل عنها

- وانتَ منو يداريك
- لتخاف علية بيت جدك يمي
- حباب أخذني ما اريد ابقى هنا اخاف من عمو
- عمك يحبك ميأذيك بعدين شلون تعوف ماما وحدها

- شوكت تجي لعد
- خلي ماما تصير زينة وأوعدك اجي واخذكم
- احبك بابا
- واني احبك يروحه الأبوك.. وباس راسه وخده مرتين

- راد يطلع صاحته الحجية انتظر همام يوصلك يمة
- بتول تحتاجه أكثر مني خلي يمها
- وانتَ بيك تسوق
- بية خالة لتشيلين همي ديروا بالكم على بتول ويزن

حچاها وطلع من الصالة
كلش اختنگت ما ادري شديصير ويانة فجأة وبدون أي سبب رجعنا للمشاكل الما صدگنا نخلص منها

ساعتين وصحت بتول الحمد لله
حتى ما گدرت اشوفها يا دوب بس غيرت الها الملابس وأخذها همام للمستشفى للفجر وهمَ ما جايين

اتصلت على همام أكثر من مرة ماكو ميرد
ظل بالي وياهم وين صاروا
نومت الجهال وظليت گاعدة ويا الحجية للأربعة انفتح الباب ركضت للشباك شفت همام ديدخل سيارته

طلعت ع السريع وانصدمت بـ خديجة نزلت من الصدر
بس شافتني صاحت تعالي ساعديني
رحت يمها فتحت الباب وسحبت بتول انطتني المغذي گالت خليچ رافعته لتنزلي ميصير

بالگوة دخلناها متگدر تمشي ولا همام يگدر يشيلها
وصلناها السريرها منطيها كومة مهدئات بسرعة نامت

طلعنا للصالة گعدت خديجة يم الحجية
إيدها على راسها تبچي وتصيح عين وصابتهم وإلا منو يصدگ مخلد يسوي هيچ وتهون عليه بتول الـ هالدرجة

تعبت نفسيتي من الوضعية
عفت كل شي وراية وصعدت لگيت همام ديبدل وينك مترد گلبنا وگف من الخوف شصار وياكم هناك

- ما گدرت مشغول ليش شفت دربي
- شصار
- بداية جلطة بـس الحمد لله تلاحگوا عليها هاي مـن غير الأنهيار شلون من انخطفت نفس الشي صار هسة

- خو ماكو خطر عليها بعد

- ان شاء الله ماكو
راح انام تعبت اذا صار شي گعديني حاولي تظلين جوة

- اي نازلة ليش وين اگدر أنام وكلهم گاعدين

طفيت الضوة عليه وطلعت
يوم يومين أسبوع بدت عافية بتول ترجع الها شي بعد شي حتى نفسيتها تحسنت ورجعت تاكل وتحچي وتنام بس ابد متجيب سيرة مخلد على لسانها

سألت همام عليه گال حتى ميجي الغرفتي هالأيام
يمكن من شاف حالة بتول قرر يبتعد
راد عافيتها ترجع الها وبعدين يتصرف لأن الضغط عليها وهي بهالحالة ابد مو صحيح

رجعت خديجة البيتها والوضع بدا يرجع الطبيعته
إلا الحجية
طول هالفترة مدري شعدها موبايلها بجيب دشداشتها 24 ساعة واذا اجاها اتصال
تطب الـ غرفتها وتسد الباب اموت واعرف شكو وراها

اليوم الظهر تغدينا واخذت علاج بتول الها
بعدها منعزلة بغرفتها بس احسن من قبل ع الأقل بدت تصحى وتدير بالها على صحتها وأبنها

انطيتها الحباية وقدمت الماي
دتبلعها دگ جهازها
رحت للميز بتول هاي أصالة هواي اتصلت هالفترة حتى علية لأن عرفت بيچ مريضة تحاچيها لو لا

- اي جيبي
- ناوشتها الموبايل وبديت الملم بـ غرفتها

- ها أصالة
- وينچ يولي گلبي نار عليچ شبيچ فجأة شـ مرضچ
- عادي تصير مو أول مرة اوگع

- بتول شكو احچي قابل اني غريبة
- راح اتطلگ
- شنوووووووو
- راح اتطلگ شبيچ اطرشيتي
- لا عفية بس والله مداستوعب ليش تتطلگين شصاير

- خاني
- منو خانچ
- رجلي منو يعني
- ههههه مخلد يخون دسكتي اسكتي اكيد ناصبة علية

- والله العظيم خاني مداتشاقى
وبعد أزيدچ من الشعر بيت طلع اكو حب قديم بحياته

- چان يحب قبلچ يعني
- اي
- ومنو هاي
- بت خالته غفران تعرفيها حاچتلچ عنها
- صخام والله انصدمت لتگولين هيَّ هاي الخانچ وياها

- اي هيَّ
- شنو هاي والله ما اصدگ مخلد هيچ عمي غير يحبچ
- راح الحب كرزنا وصار گشور

- اشتري بعد هو الچيس بربع دينار
- هواي عليه الربع چان اشتريت بس استخسر فلوسي بي خلي الغيري بالعافية

ظلت تسألها عن التفاصيل وبتول تجاوب
صح ضجت لأن حچت الأصالة وهمَ بعدهم ما واصلين النقطة حل بس بنفس الوقت فرحت الها كلش

واخيراً تقبلت تحچي بالموضوع لا وتضحك همْ
عفتهم يسولفون وطلعت اكمل شغلي
حيل هملت نفسي هالفترة ما الحگ همْ شغل البيت وهمْ مرض بتول وهمْ مسؤولية الأطفال كلها على راسي

حتى همام ما ادري بي وين ما وين
يا دوب اشوفه على السفرة اثناء الأكل وهوَ كذلك بعد مشكلة بتول صار ماله خلگ حتى الأطفاله مو بس الية

لليل تعشت بتول بـ غرفتها وانطيتها العلاج
ردت اشيل الصينية دگ جهازها
باوعت مكتوب كانت أمي هزت بـ راسها منو تلعثمت ما اعرف حتى شـ احچي بعد گامت سحبته من الميز

باوعت للأسم وضحكت
بتول عادتها مترد على أمها وهيَّ هم متتصل هواي
بس ما اعرف شعجب وليش هالمرة فتحت عليها الخط

- باوعتلي وضحكت اسمعي الله عليچ راح ارفع الصوت
- بتول
- اششش خليني اجاوب حچتها وصاحت الووو

- شلونچ ماما
- هه ماما العفو يمكن انتِ مخربطة بالرقم
- مو بتول لو اني غلطانة
- حتى صوتي متعرفي اذاً غلطانة عيني رايدة شي بعد

- بتول اسمعي لتسدين الخط
- خير ولو ميجي من وراچ خير بس اسمع
- صدگ راح تنفصلين
- ليش يهمچ اجوع اعطش ابرد انخطف اتزوج انفصل

- طبعاً يهمني غير بنتي
- والله عين عليچ ذكرتيني بذاك الرجال ما اريد اذكره

- ليش خانچ أصالة چانت تگول كلش يحبچ

- هاي بعد
شاف ما عندي لا أم بيها خير لا أب فوگ راسي
گال ظلت علية اني همْ اصير نذل واخليها تحير بدنياها

- هيَّ صح الخيانة توجع بس متوصل للطلاگ بس لأن گال الغيرچ احبچ هيچ زودتيها بتول

- وانتِ منو حتى تنطيني نصائح
- أمچ حتى لو رفضتي تتقبلين هالحقيقة بس اظل أمچ

- مرات الأم تخلف ومرات تربي
التخلف عادي مو شرط تستحق نگول عنها أم لأن حتى كلاب الشوارع والقطط يخلفن ويشمرن ع العالم

بس الـ تربي أي هاي هيَّ الأم الحقيقية..
وانتِ شنو ؟!!
ربيتيني چنتِ وياية ساعة المشيت أول خطوة بـ حياتي

علمتيني أول حرف كتبته بـ مشوار دراستي
رجعت من المدرسة جوعانة ولگيتچ مجهزة الأكل وبس ادخل تتلگيني بـ ضحكة وحضن دافي يزيل تعبي

حضرتيلي اجتماع امهات حالي حال باقي البنات
سألني عنچ صديقاتي وگدرت اجاوب بـ فخر
من بلغت وبينت على جسمي ملامح الأنوثة گعدتي يم راسي تطمنيني وتعلميني شلون احافظ على نفسي

ساعة الراهقت صرتيلي حضن مفتوح احچي بي منوو التحارش بية ومنو الحاول يستغل ضعفي
لگيتچ موجودة حتى اسألچ ماما اني داحس بـ مشاعر غريبة يرعبني التفكير بيها

لو مثلاً لمن انخطفت وواجهت اسوء شي ممكن تواجهه أي بنية بـ هالدنيا لگيتچ واگفة بالباب تدگين وتلطمين من خوفچ علية

حضنتيني
طمنتي گلبي بـ كلامچ النابع من گلبچ
من وگعت بسبب افعالهم القذرة وتعبت نفسيتي كلش الى الحد اللي خسرت بي صحتي داويتيتي ؟!!

تخرجت تعرفين شنو يعني تخرجت
وكل البنات لبسن أمهاتهن القبعة جزاء على تعبهن طول هالسنين ويا بناتهن
اني لگيتچ بيوم التخرج حتى البسها الچ وأفتخر بيچ گدام كل الطلاب !!!!

عوفچ من كل هذا يلا مو مهم خلينا نعدي
بـ يوم زواجي حضرتي
احتويتي خوفي وظليتي كل الليل سهرانة منتظرة مني أتصال اطمنچ بي ماما بنتچ صارت مرة !!!

لو ولادتي اوووو هذا اليوم الما اگدر اعاتبچ عليه
ما اگدر صدگيني
شـ اگول يعني صحت بـ أسمچ واني اطلگ عسى ولعل يجيني صوتچ من ورى الباب اني هنا لتخافين ماما

تدرين لو ميته ارحملي بهواي
على الأقل اظل اتذكرچ بـ صورة حلوة
يا ناس يا عالم عندي أم تسوة الكون بس للأسف الموت خطفها مني

كمية الخذلان العشتها بـ حياتي أكبر من عمري نفسه
أبوية خذلني
أمي خذلتني
زوجي خذلني
الدنيا بـ كبرها خذلتني
حتى استحي بعد انتظر أنصاف من الغريب واني اللي مني وبية ما احتووني ولا سندوني وساندوني

- حقچ بس أبوچ تعبني بتول
- أي ابوية مو خوش أدمي ما أنكر هالشي بس منعني عنچ لو منعچ عني احچي اخاف ضامين علية

- لا

- رحم الله والديچ
انتِ عفتيني وفضلتي حياتچ وبيتچ وأطفالچ علية بعد على شنو جاية تلعبين وياية دور المظلومة

بوسي راسي أبنچ يوميا
وحضني بنتچ لما تشبع من دلالچ وحنيتچ الما حضيت بيها بيوم من الأيام ولا عرفت معناها اصلاً
ونامي على صدر رجلچ البسببه بعتي الدنيا وما بيها
وانسي عندچ بنية أسمها بتول مثل ما هي ناسية عدها أم أسمها أسمهان

حچتها وسدت الخط حتى جهازها غلقته
باوعت علية گوة لزمت نفسي وما بچيت كلامها ذكرني بطفولتي بس كل وحدة عاشت العذاب بشكل مختلف

گالت اريد ابقى وحدي بلا زحمة
اخذت الصينية وطلعت توني سادة الباب واسمع صوت بچيها ترس الغرفة
بچي ما بچته غير بس يوم العرفت بـ خيانة مخلد الها

گلبي دينعصر عليها بس ما بـ إيدي شي
لازم اعوفها وحدها
البچي احياناً يريح ويغسل الگلب من همومه خل تبچي بلكي ترتاح شوية وتتجاوز أزمتها ولو ظاهرياً

مرن يومين وهيَّ على نفس العزلة محبوسة بغرفتها
اليوم گاعدة امسح بالصالة طلعت
باوعنا عليها اني والحجية متفاجأين ما اشوف إلا اجت اخذت الماسحة مني ودفعتني شو وخري عيني

- اگعدي بتول شدتسوين انتِ تعبانة
- شبية انصح منچ ومن عشرة مثلچ انتِ التعبانة
- لا صدگ
- احد گال داتشاقى وياچ روحي مشطي شعرچ اهتمي بروحچ حفي لو تظلين هيچ يخونچ البطل

- ويني وين هالسوالف
- ترى محد يفيدچ اعرف مسؤوليتنا تعبتچ بس نفسچ ورجلچ الهم حق عليچ لتصيرين ثولة مثلي

باوعت للحجية متفاجأة
دفعتني حيل روحي سبحي حتى العصر نروح للصالون

الحجية.. بيبي بيچ شي انتِ

بتول.. چان بية بس هسة الحمد لله صرت مثل الزمال

الحجية.. دومچ مثل الزمال
بتول.. ههههههه فرصة واجتلچ بيبي شلون متستغليها

- اريد ارزلچ على الخوف العيشتينا بي
بس المشكلة گلبي ما ينطيني تعمى عين هالگلب كون

- احلى شي بيچ گلبچ
متشوفين الله عوضچ بهاي أم كفشة وين تلگين هيچ چنة مثل الزمال تكرب ومتصيح أخ عفية عليها

- كلنا زمايل لذلك راح اترفع عن الرد عليچ

- واني راح ارفع ثوبي واصير جاكي شان وياچ اذا ما هسة وليتي من وجهي للحمام يلا ماما يلا

بستها من خدها اضحك ورحت للحمام
للظهر اجة همام كلش فرح من شافها ويانا بالصالة
صدگ للعصر گالت اله اريد اروح للصالون ومرتك تجي وياية

عادي ما اعترض اصلاً هو يريدها تطلع
قبل لنروح انطانه فلوس ما رضت تاخذ.. صيح عليها
وصلنا للصالون ورجع هوَ يم الحجية والجهال ساعتين وأكثر بالصالون ما خلت شي بتول ما سوته

رجعنا بالباكيت نلمع
وصلنا همام وطلع الشغله للعشرة ونص ما راجع
بس خلصنا من هوسة المطبخ عافت بتول الجهال عند الحجية وصعدتني الغرفتي سوتني عروس

تشتغل بية واني اضحك والله عليها سوالف
نص ساعة خلصتني
گالت خليچ هنا لتنزلين اني يم الجهال واذا اجة رجلچ اصعدة الچ بلا عشى شيسوي بي انتِ موجودة

حچتها وطلعت تركض
سمعت صوت سيارته باوعت من الشباك طب للبيت
مدري شبية مرتبكة عبالك اليوم زواجي شـ احچي عليچ بتول

ماكو خمس دقايق وانفتح الباب
گبل سحبت الغطى عليه گال شبيچ بتول تگول تعبانة

اقترب مني حط إيده على گصتي
صفن
هزيت بـ راسي شكو ضحك هاي شنو مكياج وصبغ شو بلا وسحب الغطى الله أكبر شـ لابسة يولي عيب

- عيب شنو يمة غير رجلي
- گولي النفسچ هالحچي وإلا ليش خاتلة بالفراش
- استحي
- هههههه تعالي عيني هسة اني أوخر هالخجل بثواني

- حچاها وسحبني عليه مشتاقلچ
- واني همْ حتى ضجت حسيتك بعد متحبني
- الله يشافيچ
- والله هيچ حسيت هالأيام
- متشوفين الوضع شلونه وانتِ همْ مشغولة وياهم مو بس اني لدرجة اشتاقيت احضنچ وأنام..

- بس هاي
- لا اكيد هاي ابسط شي اصلاً
- همْ يجي اليوم التسوي بية نفس ما سوة مخلد ببتول

- ليش تشكين بيه ؟!!
- بس بتول همْ چانت متشك بمخلد وشوف النتيجة
- لتجيبين سيرته هسة وتخربين الليلة علينا
- مدتشوفة
- لا مگاعد يجي للغرفة كل شغلنا نخلصه اني وصالح

- تصدگ مرات اضوج منه ومرات انقهر عليه
- گلبچ طيب همزين حتى اذا خنتچ بسرعة تسامحيني

- احرگك وروح أمي إلا بـ هالشغلة ابد ما اتفاهم

- هههههه لعد شـ معنى مخلد
- خيولي الخاين ميستاهل اتعاطف ويا اسحب كلامي

- هههههه شفتي حتى لتدافعين بعد
- تخون يعني
- هوَ اني شايف دربي وياچ حتى اشوف غيرچ شبيچ

- يعني اذا شفت دربك تخون
- الله ياخذك مخلد شـ فتحت علية باب خبلت النسوان

- تخووووووون
- لا حبيبتي العنده مثلچ مخبل يباوع برة
- چذااب والله كلكم تقشمرونا بنفس الكلام جنس آدم ما عليكم عتب ولا الكم أمان

- وفري كلامچ لحد ما اخونچ ان شاء الله

- ان شاء الله همااااام ان شاء الله

- هههههه لعد شـ اگولچ احتاريت
اگول ما أخون تصيحين چذاب اگول أخون اطلع صدگ چذاب لأن ما اسويها مالي بدروب النسوان تعرفيني

- المهم خلي يكون عندك علم في حال لو سويتها
الشغلة جداً بسيطة جدحة وحدة بـ نص الليل والبيبان مسدودة وينتهي البيت بللي بي

- ههههههه بلا اني خنتچ الجهال وامي شعليهم
- الأخضر يروح بسعر اليابس حبيبي
- والله تخوفين
- شعبالك اني مو هينة ترى
- دراويني شطارتچ بغير شغلات لو مفالحة غير بالنكد

- هاي منو علمك عليها الكلمة
- هههههه صالح وعن الحلال والحرام يگول عنچ بومة

- اني اعلمه أبو صماخ
- تنهد بحسرة كبيرة وسحبني عليه وهسة شنو
- شنو
- شنو شنو
- ههههههههه اي صح نسيت أحبك ومشتاقتلك موووت

- بعد وكت
- ضحكت وبسته احب اضوجك واتدلل عليك لو ممنوع

- لا يابة كلي الچ حتى مشاعري التضوجني

اهتميت بي ليلتها هواي
همْ حتى اعوضه عن الفترة الهملته بيها وهمْ نفسيته تحتاج دلال حتى يطلع مـن جو الكأبة الصار أسبوعين عايشين بي كلنا مو بس هوَ...

رحمة.. گاعدة يم بيبي بالصالة اقرا محاضرتي
اجت عمة سناء
شغلت التلفزيون وصعدت الصوت على الأخير.. رفعت عيني متعجبة مدتشوفيني ادرس لو هوَ عناد وبس

- عندچ غرفة وروحي ادرسي بيها
- عاجبني ادرس هنا اكو تلفزيون بالأستقبال اذا تردين روحي شغلي وارفعي الصوت مثل متحبين

- اني همْ عاجبني اباوع بالصالة بيتي واني حرة بي

صفية.. سناء وتالي ليش حاطة گورچ من گور الطفلة

- يا طفلة دشوفيها صارت اطول مني
- استغفر الله
حچيتها وگمت چان تصيح وراية ما الله كرمچ بالحمل

- دراستي أهم من كل شي
- تعالي شو عندي موضوع مهم وياچ يفيدچ صدگيني

- حچتها وسحبتني للممر
- بروح أمچ ما حچيتي ويا صالح بالموضوع
- وانتِ شكو
- ترى تظلين بت أخوية واريدلچ الخير لتصيرين حقيرة

- واضح تردين الخير من مشاكلچ ويا عماتي
- ذني وحد يظلن غربة وما الافيهن بس انتِ بت أخوية لحمي ودمي والدم يحن

- من الأخير شتردين
- صالح ميريد منچ أطفال ليش تظلين ثولة
- ليش ميريد
- انجبر عليچ لأن واجهتي بـ حبچ فـ مگدر يكسر گلبچ وهوَ مربيچ وطبعاً نهاية هي الـ قنعته

- منيلچ هالحچي
- بيت أهلي هذا عبالچ اكو شي يخفى علية
- لا يحبني وهوَ اعترفلي بـ نفسه
- لعد شيگول ما احبچ طبعاً لا.. شو طلعتي غبية كلش

- والمطلوب
- تختبري وتشوفي يتمسك بيچ لو يبيع بسرعة
- شلون يعني اختبره
- تاخذون مانع لو شلون حتى اساعدچ
- اي أخذ حب مانع
- عوفي حتى يصير عندچ حمل وشوفي شلون يتخبل

- اكيد ما اسويها ميقبل واني ما احب اكسر كلمته
- خليچ هيچ ثولة لحد ما يجي اليوم الينزل على راسچ ضرة بحجة انتِ مرتي وهيَّ الحب

- ميسويها صالح
- ليش ميسويها اي رجال اذا ما عاش حب قبل الزواج يدوره بعد الزواج ويجوز اصلاً عايشة ومتدرين

- يعني يحب وحدة غيري
- متدرين كل شي يجوز يجي اليوم اليعترفلچ بنفسه

- شلون يعترف
- يضطر يواجهچ بـ حبه القديم ساعة اليضوج منچ

- يا حب يا قديم شدتحچين انتِ

- بس خلي إيدچ بـ إيدي واخذي مني هالوعد
لو فعلاً صالح يحبچ
لو يطلع على حقيقته ويعوفچ بسبب انانيته وبالحالتين انتِ ربحانه شلچ بواحد ميريد ينربط بيچ

- شايفتني طفلة وراح اتقشمر بـ كلامچ دروحي عيني

عفتها ودخلت الغرفتي
عمتي متحچي كلام ما ورى شي اعرفها كلش زين هذا الزن اكو ورى كلام تريد توصله الي بطريقة ثانية

حتى ما گدرت ادرس بعد
لليل اجة صالح كملنا العشى وعفتهم ورحت الغرفتي
ظليت افتر وافكر بـ كلامها مستحيل اسمع منها حرف بس شلون اعرف غايتها من هالكلام شنو ؟!!

- شوية ودخل صالح ها شو گاعدة وحدچ
- هيچ اقصد چنت ادرس
- وجهچ اصفر بيچ شي اخاف ضغطچ نازل ومتدرين

- اي نازل بس ماما انطتني موالح ليظل بالك حبيبي
- شبيچ عمري صاير شي
- اخاف احچي وتزعل مني ما اريد اضوجك
- احچي ما ازعل
- بعدني اريد طفل شسوي ما اگدر اصبر سنتين هواي

- وتالي رحمة
- شبيك ضجت بسرعة وين راح كلامك
- هالموضوع بالذات لتحچين بي وياية لأن مليت منه

- مليت منه يعني مليت مني
گول ما اريد منچ طفل وفض السالفة عليمن هالمراوغة

- اي يلا ما اريد طفل كافي علية انتِ طفلة شسوي بي

- شكو تزوجتني اذا تشوفني طفلة
- والمطلوب معاجبچ يعني
- طبعاً ما عاجبني والأحسن ننفصل حتى الببالك يصير

- شنو هوَ الـ ببالي ؟!!
- ما ادري اسأل نفسك والله مو تسألني
- صار تتدللين خلصي الجامعة وننفصل يلا ارتاحيتي

- ليش مو هسة
بلكي رجع الدوام وحبيت اشوف حياتي ويا غيرك

- بس حچيتها ركض لزم فچي شنو گلتي !!!!!
- اشوف حياتي ويا غيرك
- اش ولچ اشششش لا ابتلي بيچ وضربني على حلگي حيل گبل شفتي طگت دم بچيت بـ حرگة

- رحمة ليش هيچ دتسوين
حياتنا چانت شحلاتها ليش مُصرة تدمريها بطفوليتچ

- وين شحلاتها وين
شو 24 ساعة انتَ برة واني محبوسة بين اربع حيطان بس شغل وتصفن حتى طفل ما عندي مثل النسوان

- الطفل يصير والله بس اتخرجي
أما شغلي انتِ تعرفين بـ صعوبته مو جديدة السالفة

- ليش ضربتني
- شوفي نفسچ شـ حچيتي يلا تسأليني
- مو انتَ تريد تطلگ شعليك بعد
- من كل عقلچ تحچين.. انتِ الي انخلقتي الي أبن أمه وأبوه اليگدر يمس من راسچ شعرة واني عايش

- يعني تحبني
- اكو واحد ميحب روحه
- شنو اني بالنسبة الك بس بروح أبوك تحچي الحقيقة

- انتِ من بعد أمي
اني وياچ ما تزوجنا مثل أي أثنين
اني ربيتچ على إيدي يعني اعتبرچ بنيتي قبل لتصيرين مرتي اخاف عليچ حتى من نفسي وعصبيتي

- حچاها وسحب الكلينس مسح حلگي
- الخاطري بطلي نق
- والطفل
- وحق الله بعرشه هسة اگوم **** نفسي حتى كلش تأيسين من السالفة.. تروح بعد ويا رجولتي

- ههههههه لا يمعود واني وين انطي وجهي
- تتحملين نتيجة نقچ
- لا خلص سكتت خلي ساتر علينا شـ نسوي بالأطفال

ضحك وحضني حيل
مستحيل ميحبني وحتى لو اكو شي من ورى كلام عمة همْ ما اريد اعرفه المهم صالح وياية والباقي يولي

بتول.. شهر والحال نفس ما هوَ
اليوم طلعت ويا عمو اشتريت كم قطعة لأن ما جبت شي من ملابسي وياية بيومها

صارت رجعتنا بالليل
تونا دخلنا للفرع شفنا سيارة مخلد بالباب
گبل عمو صاح شعنده هنا هذا لزمت إيده مبتسمة عمو عادي مستعده اواجهه لتخاف علية

- ادخلي للبيت اني اتفاهم ويا
- المشكلة مشكلتي ومحد يحلها غيري لتضوج نفسك

حچيتها ونزلت
چان گاعد بسيارته وفاتح الباب
بس شافني اجة بـ اتجاهي صار عمو همام بصفي خير مخلد شجابك

- سلم يا صديقي حتى الغريب همْ يستحق السلام
- شعندك جاي
- احچي ويا مرتي لو ممنوع
- ممنوع إلا اذا هيَّ رادت تحچي وياك هنا الكلام غير

بتول.. خلي يطب عمو اني همْ محتاجة احچي ضروري

حچيتها ودخلت للبيت
ركضت الغرفتي لبست من ملابسي الجديدة ومشطت حتى مكياج خليت بس خفيف كلش

ردت اطلع باوعت للعطر
سحبته رشيت دخلت طيبة مخلد يمنا تدرين لو لا

- اي ادري
- وهذا التعديل كله علمودة
- لا علمود نفسي لأن من اليوم ميهمني شي غير نفسي

حچيتها وطلعت باوعت للصالة ما هوَ اكيد بالأستقبال
وفعلاً لگيتة هناك
بس دخلت وگف سديت الباب ورحت بـ اتجاها اسمعك

- شلونچ
- عال العال مثل متشوف
- شلون صرتي ادري بيچ چنتِ مريضة
- انتَ گلتها چنت بس بعد مطلعتك من حياتي كل شي حلو رجعلي وأولها صحتي ألف الحمد لله والشكر

- دوم ان شاء الله
- تفضل استريح ليش واگف
- بس حچيتها گعد بتول انتِ تدرين بية شگد احبچ

- يمعود شبعنا من هالسوالف جدد جدد التغيير حلو
- ما اريد اجدد مكتفي بيچ
- صح
- ليش غالقة جهازچ وحاذفة البرامج غيرتي الخط مو

- اذا تعرف شكو تسأل بعد
- واني
- شبيك دتجي من الباب وتشوف أبنك أكثر من هذا ما عندي بعد اعذرني كلمن وياخذ قدر استحقاقه

- احبچ وراس أبني
تعرفين شنو يعني أحلف براس وحيدي
واذا على غفران غلطة وندمت عليها بس كـ مشاعر الله وكيلچ ما عندي اتجاها ذرة حب الحب الچ وبس

- للأسف اني بطلت احبك فـ هالكلام ميفيد
- چذابة
- انتَ ضابط وتعرف الچذب من العيون هاك راح اباوع بعيونك واگولها اكرهك مخلد ها صادقة لو لا بشر

- عيونچ ما بيها غير التعب
- البركة بيك طبعاً
- شسوي حتى تسامحيني مستعد لأي شي تطلبي والله

- ترمي علية اليمين ساعتها اسامحك وروح أبوية
- تحلمين
- مو بكيفك اذا تعاند المحاكم بيناتنا
- أكبر قاضي ميگدر يطلگنا لتحاولين بتول ما اعوفچ

- عمي موجود
- لو اعرف أخسر الدنيا مو بس همام همْ ما اطلكچ

- ناوي تحقر يعني

- مو ثوبي هذا
بس اني احبچ شلون تطلبين اتخلى عن حياتي واعيش واني ميت منو يقبلها على نفسه

- هههههه يومين وتتزوج غفورة صدگ چذب
- تغارين يعني تحبيني
- وداعتك ما اغار واجي وارگص بعرسك أبو أبني لذلك لازم اقوم بالواجب وياك على حسب الأصول

- واني منو حتى تحلفين بداعتي وتردين اصدگچ
- أبو أبني
- زين يا أم أبني واذا گتلچ ما اتزوج غفران لو تظل أخر وحدة بالدنيا وداعتچ هم تصدگين

- منا لهذا الباب ما اصدگ بيك بعد والله بطران
- يجي يوم وتصدگيني
- مخلد اترجاك تطلگ بلا مشاكل ع الأقل الخاطر يزن

- دنحچي طب يزن يركض بابا حبيبي اشتاقيتلك
- يروح أبوك واني اشتاقيتلك
- حضنه حيل مو وعدتني تاخذني شو هواي طولت يلا اخذني اني وماما اشتاقينا البيتنا والك حيييل

- باوعلي وابتسم واني اشتاقيت الكم بس ماما معاندة متقبل ترجع قنعها وليدي السبع

- مخلد لتستغل الطفل بمشكلتنا وتوگع من عيني ازيد

يزن.. ماما حبابة خلينا نرجع ضجت هنا اريد بابا اني
مخلد.. همس بـ أذنه گللها احبچ

- احبچ
- گللها بابا يحبچ كلش
- وبابا يحبچ كلش واني احبچ وانتِ تحبينا
- سبببع أبني ميحتاج ادرسك انتَ المفروض تدرسني

بتول..  تعال حبيبي اطلع للصالة
اخلص كلام ويا بابا واصيحك تگعد ويا لحد متشبع

- طلعته وسديت الباب
- شبيچ تخزرين
- تالي وياك شوكت ناوي تصير رجال وتعوفني بحالي

شنو انتَ
شـ شايف روحك عبالك بتول تموت بدونك
اني اني لا انتَ ولا غيرك يلغون وجودي بس خل يكون بعلمك راح تتندم لأن لو تموت متلگة التعوضك مكاني

- اعرف
- بلا كافي لغاوي زايدة شبعت منك حچي حچي حچي صير رجال ولو مرة وراويني افعالك وطلگ

- انعم الله عليچ
- عوفني يا أخي ما اريدك ما اريدك ليش مدتستوعب

- بس اني اريدچ
- بيناتنا المحاكم لعد ويجي اليوم الأخلص منك غصب

- گام عدل قميصه وتقرب باس راسي عود من اموت ان شاء الله يجي هاليوم وتخلصين مني

حچاها وراح صدگ كرهته فوگ كرهي بسبب عملته
تبعته أخذ يزن وطلع
ركضت باوعت من الشباك لگيته واگف بالباب ويا خمس دقايق باسه وطلع محفظته انطا فلوس وراح

- طب يزن انطانياهن خزرته ليش اخذت منه
- ليش ما أخذ
- صاح عمو من بعيد الطفل ماله علاقة بمشاكلكم بتول انتبهي على تصرفاتچ ترى الدتسوي غلط

اخذتهن منه ورحت الغرفتي
والله حلوة فوگ عملته هوَ أبو الراهي بس اني الك اذا ما اصدمك بورقة الأستدعاء ما اطلع اني بتول

- رجعت طلعت عمو اسمعني
- نعم
- اريد ارفع دعوى على مخلد لأن حضرته ميقبل يطلگ

الحجية.. تخبلت البنية
همام.. متشوفين بعد وكت على هالكلام لو تصبرين بعد

- ما اريد اصبر واذا صدگ تحبني لتخليني على ذمته
- الله كريم
- راح تساعدني لو تفضل صديقك علية
- بتول
- جاوب عمو ضروري
- لو افضل صديقي مچان الي بالشهر ماخذ موقف منه

- خوش انتظرك لعد وباچر
- صاحت بيبي بلا طلعتي حامل مصارلچ شهر زعلانة

- صفنت عليها عززززة بس لا صدگ
گالت ها متجاوبين
عفتهم ورجعت للغرفة هاي الية شهر وماكو معقولة راح يسويها الحظ بعد ما انتهى كل شي بيناتنا

همام.. گعدت الصبح وفكري كله يم كلام بتول
سألت طيبة گالت نايمة
طلعت للدوام وناوي احچي ويا مخلد ما اريده ينصدم لازم يصير عنده خبر بقرار بتول بلكي اوصل وياهم الحل ودي بعيد عن المحاكم

قريب مينتهي الدوام اتصلت بي طلبته الغرفتي
گال اخلص شغلي واجيك
سديت الملفات وگمت ابدل دخل علية صالح هااا وين

- للبيت غير
- متحول الملف ناوي تأجله الباچر
- لا ما بي مجال نحول هسة الجماعة شغلتهم تعبانة

مخلد.. السلام عليكم
صالح..  وعليكم السلام همزين اجيت راح نحول ملف رافد على المحكمة انتهت شغلته بعد

مخلد.. ليش يعني تردون القضية تنسد
صالح.. ما اعترف راح يموت من التعذيب وهوَ صامد

مخلد.. ومراح يعترف حتى يم القاضي وبالنهاية يطلع منها مثل الشعره من العجين

صالح.. لعد نخلي محبوس يمنا طول العمر مترهم مو

مخلد.. همام

همام.. هاك صالح خلي يمك وقعته باچر عود حوله
ولتنسى المدير طلب واحد من عدنا انتَ روح لأن اني ومخلد عنده شغل مهم

صالح.. صار من عيوني
همام.. رحم الله والديك يلا توكل يا دوب تلحگ

بس حچيتها طلع
گمت غيرت ملابسي حتى نطلع نحچي برة دگ جهازي رسالة بالعادة اتجاهل الرسائل بس هالمرة ما ادري ليش اهتميت اشوف شنو محتواها

فتحتها رقم غريب كاتب
أيها الأحمق اتريد ان نتخلى عنك أو نتركك في حال سبيلك فـ هناك فرق بين التخلي والترك
التخلي هوَ الموت والترك هوَ الحرية والحياة الرغيدة
ان كنت ترغب بالترك أتصل بنا حالاً
وان كنت تُريد التخلي فأليك التالي اليوم تحديداً...
دقات غير منتضمة
تحت مقاعد غير مرصوفة
في قطار غير مألوف
يحوي على ثلاثين مقعد وعند أولهم تدق نواقيس الخطر
فـ يكون في الثلاثين وعند المسير نهاية البداية حيث ترى التخلي عندها وهكذا تنتهي الحكاية بالنصر لنا...

- هههههه ذولة شديحچون
- منو بس لا همَ
- اكو غيرهم گاعدين يتفلسفون بـ راسي المهم تهديد

- شو خل اقرا
- ميحتاج اكو كلام أهم لازم نحچي بي
- همام انطيني ماكو شي أهم من تهديدهم حياتك هاي

- امشي نطلع
- سحب مني الموبايل وفتح البصمة بـ اصبعي احلفك بروح أبوك تتحملني شوية بس اشوف شيردون

سكتت بدا يقرا بـ تركيز
يمكن عادها عشر مرات لأن تأخر هواي
شوية ورفع راسه باوعلي صافن ورجع جهازي شو هذا صار يروح ويجي بالغرفة ما اعرف بشنو ديفكر

- مخلد دفضني يمعووود
- اشش انتظر
- شنو انتظر شبيك لتخليني اندم حچيت وياك
- أخذله صفنه على وجهي فجأة صاح انززززع بسرعة

- نعممممم
- انزع قميصك وانطيني مجال لزمت راس الخيط
- شلون يعني ما فهمت
- أقل الساعة وتفهم هسة ماكو مجال بس نفذ اترجاك

نزعت قميصي مستغرب
هوَ همْ نزع قميصه باوعتله بـ تعجب شمره علية وأخذ قميصي لبسه هاي شدتسوي تخبلت انتَ شبيك

- البس القميص همام گتلك ما عدنا وقت
- لبسته وبعدين
- هاك سويچ سيارتي اطلع قبلي الـ **** انتظرني خلف الـ **** ما اتأخر مسافة الطريق واجي وراك

- ليش عود غير افتهم
- اكفر بيك وحق محمد لا عبالك زعلان وشايف نفسك علية هذا شغل عوف الخلاف على صفحة حالياً

- اي شنو افتهمت لازم اعرف
- همَ هناك راح يجون انتَ مو تريد تلزمهم
- طبعاً اريد
- بعد شكو راح تلزمهم بس امشي وراية وانتَ ساكت

- نشوف
- هاك البس المناظر والشفقة وحاول مترفع راسك حتى لا يبين وجهك گبل للسيارة شغلها وللمكان

- خوش يلا رايح
- دير بالك على نفسك من تطلع ناويين علينا اليوم
- وانتَ همْ دير بالك على نفسك ولتتأخر علية تعرفني ما احب الأنتظار خصوصاً مداعرف بشنو تفكر

- ما اتأخر لتخاف

بس حچيتها انطيته سويچ سيارتي وطلعت
صعدت بسيارة مخلد وظليت واگف
شفته طلع منزل راسه والغريب ملف القضية بـ إيده !!

ظليت انتظره بس صعد دزلي رسالة
تحرك قبلي شـ منتظر الخاطر الله وحاول تمشي سريع

شغلت السيارة ومشيت سرعة مثل ما گلي
ما شفته وراية ابد
زاد الخوف داخلي بـ شنو دتفكر مخلد راح يوگف عقلي

وصلت للمكان صفيت سيارته ليورة ونزلت اتمشى
ظليت انتظر منه خبر
بعدني اروح واجي بالمكان سمعت صـوت أنفجار قوي رج الگاع رج باوعت من الفتحة سيارتي منفجرة والنار تارسه المكان لا لككككك مخلددددددد....

يتبع