📍الشيخ محمد طه نجف...
عاش الشيخ بالنجف ايام العثمانيين وجان مرجع فقهي لأمور الناس وهو صاحب الكلمة المعروفة...
" العلماء تنقصهم الخدمة الحسينية"!!!...
يكول الشيخ محمد طه نجف" ابو مهدي " بعد ما تغديت بظهر ذاك اليوم نزلت للسرداب مال البيت لأن بارد والدنيا صيف وخذتني غفوة وبالحلم حسيت أني ميت!!!
اسمع أولادي وأهلي بالحلم يبچون ويصيحون يابويه يا بويه والجيران فزعت على بيتي وصارت ضجة بالنجف وكل الناس تصيح شيخ محمد مات واني مااكدر احجي بس اعاين عليهم،،،
اخذوني غسلوني ودفنوني ولما كلها راحت عني بقيت وحدي انتظر منكر ونكير وحساب الخالق،،،
وحشة وخايف وضيگ ما ينوصف واني بذاك الحال وأريد وأحد يجيني يسولف وياي ماكو،،،
يكول بيني وبين نفسي واني بالحلم
اسولف وي روحي شني هاي معقوله احنه نچذب على الناس وماكو حساب وره الموت
اشو صار ثلث تيام محد اجاني،،،
يكول اسمع الناس يمي جايبين شخص جان يشتغل حمال ودفنوا يمي مسافه واني اشوفه بس ما اكدر اسولف،،،
راحت الناس بعد ما دفنو الحمال واشوف مهبط الملائكة والصالحين ويبشرون ذاك الحمال ويتقربون يمه بلطف واشوف شخص لازم قلة ماي بارد وانطه للحمال وراحو عنه،،،
يكول سولفت ويه روحي معقولة الصار إذا اني مرجع وعالم وتقي ومحد اجاني والملائكة هبطت على ذاك الشخص البسيط الگادح...
نهضت يكول ورحت للحمال وسألته أنته شني وشمسوي وليش هيج الخالق انطاك كرامة ولطف بيك،،،
كاله شيخنا ﷲ بعظمته أكرمني لأن جازاني علمود شغلي من اشيل "تنك الماي "واترس الحب الفخاري الصاير بطريق زوار ابي عبد الله الحسين "ع" وهاي العادة مالتي من اني صغير لأن ضعيف حال وماعندي إمكانية اصرف على زوار الحسين "ع" وقدرتي تنكات الماي اجيبهن من البير واترسهن حتى الزوار يشربون،،،
فز من الحلم شيخ محمد طه نجف وصاح "العلماء تنقصهم الخدمة الحسينية"
وگام طلع ولزم التنكات وترسهن ماي ومن شافته الناس واولاده كالوله شيخنا خليك منهم احنه نترس الماي،،،
رفض وكال لا معليكم لازم بيدي ولو شايفين الشفتة لجان محد لامني،،،
وصارت عادة عند الشيخ محمد بيده يترس الماي كل يوم إلى أن توفاه ﷲ واختاره لجواره،،،
▫️هنيئا لكل خدام زوار الإمام الحسين "ع" المخلصين...
اللهم اجعلنا من خدام الحسين "ع"...