أبي لم يكن إنسانًا

مستقبل الرواية ج2

#أبي_لم_يكن_إنساناً
مستقبل الرواية الجزء الثاني..
للكاتبة لبنى الموسوي

تبعته بـ خطوات سريعة
وگفت بداية الممر مگدرت اسمع شي يبعد عني مسافة وصوته جداً ناصي بحيث يا دوب اسمع انفاسه

شوية والتفت علية بعد ما نهى الأتصال
بس شافني عگد حاجبه مستنكر وگفتي ورى سديت الباب وتقدمت بـ اتجاها صاير شي وياك ظل بالي ؟!!

- لا ليش دتسألين ؟!!
- ما اعرف بس هيچ حسيت ودائماً احساسي بـ محله

- هههههههه ومنين اجاچ هالأحساس بلا !!!
- من الأتصال الغير أحوال زوجي وگلب كيانه كافي لو احتاج شي أوضح حتى يأكد احساسي

- شنو هالحچي طيبة
هالأتصال يخص الشغل وعادي مو شي مهم
مجرد عدهم استفسار ضروري ما گدروا يأجلوا الباچر

- ليش گمت من يمنا
وليش دتحچي بصوت ناصي اذا عادي وماكو شي مهم

- متسمعين الهوسة الجوة شلون تردين اجاوب بنصهم
- ماشي يلا خلينا ندخل
- تجين لو ظالة هنا اني اسلم واروح للبيت انام تعبان

- لا تعال علية بالليل بعدني مشبعت منهم
وبيبي راح تظل وياية خطية محتاجة تغير جو شوية

- على راحتكم
حچاها ودخل للصالة تبعته گاعد يسولف ويا ولد عمي

شوية واستأذن طلع صالح يوصله للباب
تأخر كلش
ردت طلع ورى دخل وگفت بطريقه وين صرت اكو شي

- لا شكو قابل
- ليش تأخرت يم همام الكم بالعشر دقايق بالباب
- شلون يعني منسولف والله حلوة هاي
- النهار كله سوة انتم ما حبكت يعني السوالف هسة إلا اذا اكو موضوع مهم تحچون بي

- وين اشوفه بالدوام اني
تدرين شغلي ويا مخلد مو ويا رجلچ كافي تحقيقات

- احلف عليك دتچذب صالح
- ههههههه رايح انام وظلي انتِ مثل البومة نكدي على نفسچ شگد متگدرين شعدچن غير النكد النسوان

حچاها ومشى بـ اتجاه غرفته
ظلت عيوني تتبع خطواته معقولة كلامه صح
لـو كالعادة احساسي يغلـب جميع محاولاتهم بـ تظليل الحقيقة

گعدت على طرف الدرج اتنقل بـ نظراتي بيناتهم
سوالف وضحك وناسين الدنيا بلمتهم
بديت اوبخ روحي لهنا وكافي بس عاد جوزي من النكد ما مليتي طيبة !!!

حاولت اتجاهل احساسي واعيش لحظتي بـ لحظتها
گمت اخذت حامد من بيبي غيرتله ورجعت
صارت گعدتي بصف خديجة التفتت علية بـ خزرة عين صلفة والله متخافين جاية يمي

- هههههههه شتسوين أكثر من هالگرصة
لو زنبور متوحش هم ميسوي هيچ حرام عليچ لو اخوچ يشوفها شـ اگوله عود يصدگ اخته تتحارش بية

- اتحارش بيچ شنو ولچ
- لعد شنو هذا أثر الـ زراگ ميسوي غير الرجال المرته

- طالعة عينچ كلش
بس مو صوجچ لا والله صوچ ذاك الأفندي القبل يسلم لحيته بـ إيد الزعاطيط مع الأسف علي

- ديلا عيني يلا
شو زعاطيط وزعاطيط وانتم لو ما اني چان نلگاكم من عين باچر واگفين بباب محكمة البياع

بعدين حرام والله عمي ميدري كل هالسالفة تخطيط سري تام بيني وبين شيطاني الرجيم...

هوَ شعلي ترى ممشترك بالجريمة
مجرد گتله لتتصل بيها هاليومين حتى اساعدك ترجعها

- جلطتوني إلا شوية وتگولين شعلي
- لعد شلون تحسين بـ قيمته اذا ما دق ناقوس الخطرر بـ خطف بعلكِ من قبل الحسناوات يا عمتي العزيزة

- عيني ي الجاحظ
استقر وگوم من يمي لا اسويلك أثر على إيدك الثانية

- ها عمة الظاهر عجبتچ الشغلة والله عيب عليچ
- عزة انتِ صايرة كلش
- رفعت إيدها رادت تكفخني لزمها عمو محمود عييب المرة صارت أم وبعدها الرايح والجاي يكفخ بيها

- ادري الـ تصير أم غير تعقل لو تتخبل بالزايد
- اي عمي مثل السمچ مأكول مذموم
حچيتها وگمت مـن يمها اضحك البنات كلمن يم رجلها

دخلت للمطبخ عمة نهاية واگفة تغسل المواعين
سحبت إيدها بستها واخذتها الحضني بقوة وينچ وين الشغل بعدين كلنا هنا وانتِ تغسليهن مصايرة ترى

- البنات ميقصرن يمة
بس شسوي اني اضوج من الگعدة اسلي روحي بالشغل

- والشغل مصيره يخلص بـ شنو تشغلين روحچ بعدها
- اصلي اداري بيبيتچ اسولف ويا خديجة
- باوعت عليها والخنگة بينت بـ صوتي تعبتي ادري كل شي ما شفتي من حياتچ بسببنا

- شنو هالحچي بنيتي ازعل عليچ
- اي عمة هاي الحقيقة لو ما اني واخواني چان رجعتي الأهلچ وعشتي حياتچ امانتنا چانت صعبة حيل

- يا حياة هاي التردين اشوفها بعد حامد
عسى يلمني تراب الگبر ولا يلمني حضن رجال غيره

أما انتو فـ روحي من الدنيا
لو اگدر اتخلى عن ولدي اتخلى عنكم ساعتها
يوميا اغمض عيوني على بوسة مـن رحمة ونظرة مـن صورة رحيم واتصال منچ يلا اگدر انام مرتاحة انتم بزري الما حملته بطني وأعز من بزري همْ

- حضنتها وبچيت احبچ ماما بس الله اليعلم شگد احب حنيتچ والأمومة الـ لگيتها بحضنچ الدافي

- واني اموت عليچ
بس ما اريد تفكرين مجرد تفكير بالكلام السمعته منچ قبل شوية انتم ريحة حامد تعرفين شنو يعني ريحته

اصلاً ممنونة منكم لأن بسببكم گدرت اعيش بـ هالدنيا من بعد رحيله
انتم الصبرتوني وانطيتوا معنى الحياتي وان شاء الله تكونون مفتاح الجنة اليجمعني برجلي الما لحگت اتهنى بي

- اذا الجنة مو الچ والعمي المن لعد
مرات الملائكة ينزلون على الأرض بهيئة بشر وانتم خير دليل على كلامي والملائكة مخلوقين للجنة وبس

- حضنت وجهي بكفوفها مبتسمة الله يجبر بـ خاطرچ يمة،، طيبة واسمچ عليچ حتى بـ حچاياتچ

ردت ابوس إيدها دخلت رحمة للمطبخ
من بعيد صاحت هااا يمعودين
ركضت وگفت بالنص بحيث صارت حاجز بيناتنا باوعت العمة وضحكت هاي شوكت تبطل غيره مو كبرت

- اكو واحد يكبر ع الدلال بس المخبل
- ههههههه اي عمي حقچ بس كافي شبعتي خلي شوية من دلال هالحلوة للمحرومين

- شتحچين هاي بالذات ما اريد واحد يشاركني بحبها
- متأكدة هاي بالذات
- وداعتچ مستعدة اتنازل عن أبنها وما اتنازل عن حبها

- هههههههه وينك صالح تعال اسمع

نهاية.. چذابة لتصدگيها مخبلته بالغيرة تمشي وتتعارك

رحمة.. أبنچ ينگرط ماما والنسوان عيونها فارغة شسوي

نهاية.. بس الغيرة الزايادة تخنگ يمة مو صح طيوبة

باوعت علية صافنه بوجههم هزت إيدها وضحكت
- اني همْ بطرانة المن اسأل غير هيَّ رگعت أختها نفس الغيرة ونفس الخبال

رحمة.. نعال يمة وتگولين رگعة يلا مقبولة منچ نعديها

طيبة.. هههههههه اريد احضنها لتعترضين حبابة

رحمة.. لا يولي اتشاقى وياچ اغار من الدنيا وما اغار منچ يلا نحضنها سوة قبل لتشرد

بس حچتها سحبناها الحضنا بوس وعصر
خطية ظلت تصيح اختنگت
ما بعدنا عنها إلا بعد ما عيونها صارت تجري دموع من الضحك

لليل تعشينا وطلعنا للحديقة ويا الشباب
فرشت صفاء بالگاع وراح سعد اشترالنا كرزات وعصير

گعدنا نسولف بعدين قررنا نلعب لعبة الصراحة
أخذت صفاء بُطل الببسي وفرته بالنص
وگف على سعد باوعلها وضحك ها ولچ اكيد متقصدة

- ههههههه شلون يعني اتفق ويا البُطل مثلاً
مشفت فريته حيل گدامك يلا صير سبع ولتخاف مني اضعف الأيمان تنام بالشارع اليوم عادي تصير

- ههههههههه ومنو اليسأل
- اني طبعاً
- اسألي يلا صفاء خانم بس بلا خباثة رجاءً
- كم مرة حبيت بـ حياتك مع ذكر الأسماء ان تعدددت

- اكو خيارات ترك سؤال صح وخطأ اي مساعدة ست
- جاوب بسرعة
- هوَ اني لحگت احب شو فتحت عيني انتِ بـ وجهي

- بس حچاها خزرته بـ وجهك مو
- وبگلبي شبيچ ما انطيتيني مجال اكمل كلامي دومچ عدوانية

صالح.. انتهى الجواب وانسد النقاش فروا البطل سريع

سمير.. جيبوا اني افره
صالح.. اخاف انتَ تطيره مو تفره خليها ع البنات احسن

سمير.. ههههه شنو يمعود جون سينا وما ادري بروحي

صالح.. دفره يلا وفضنا

سمير.. هاي فرينا
ههههه وگف عليك استلم الأحراج شلون ضاملك اسئلة

رحمة.. لا اني الاسأله

سمير.. شو انتن ماخذاتنا فلاحة ملاچة
كـل وحدة لازم تسأل رجلها ولمن يجيني السرة البُطل يسألني

رحمة.. لا انتَ طيبة تسألك لتخاف على روحك عيوني

سمير.. يلا يابة دسألي وامرنا لله الواحد القهار شنسوي

رحمة.. اي صالح
راح اسألك نفس سؤال صفاء كم مرة حبيت بـ حياتك

طيبة.. لا ارادياً نظراتنا التقت لـ بضع ثواني مو أكثر
بعدت عيوني عنه انتظر جوابه بـ قلق
سمعته تنهد وگال هواي مريت بـ علاقات بس كـ حب ما حبيت غيرچ

رحمة.. اي اعرفهن وحدة منهن هاي اللزگت بيك فترة
صالح.. صح يلا سعد فر البُطل انتَ

هالمرة وقع الأختيار على سمير
باوعتله وابتسمت اني اسألك والچذب ممنوع لأن هاي يسموها لعبة الصراحة تعترف يعني تعترف خوش

سمير.. لا چذب شنو وسفة والله
طيبة.. ليش مدتقبل تتزوج اكو وحدة شاغلة گلبك وما گدرت تحصلها

- لا ماكو
- ليش بتكزب يا وليد ما بتعرف أنو حرام
- هههههه والله ما عندي شبيچ
- لعد ليش رافض فكرة الزواج غير اكو سبب
- اني صاحب مزاج وكيف يوميا براي ليش اورط بنات العالم وياية

سعد.. شفتككككككك سميررررررر

سمير.. ههههه ولك مو شرب قصدي مزاجي متقلب
ما عندي شي ثابت وبسرعة أمل من الشغلة خاف اجيب بت العالم سنة سنتين وأملها شسوي ساعتها ؟!!

صالح.. لا اذا هيچ خليك عزابي احسن

سعد.. يلا الدور على طيبة واني اسألها بس الصراحة ها

- تمام
- هم لگفتي همام يخونچ لو يلعب بذيلة منا منا

- هههههههههههههه
حتى اگطع هالذيل واشمره الكلاب الشوارع
هوَ هذا همْ سؤال بشرفك لو ساكت احسن والله يا ربي

- يلا يابة شگلنا قابل سبينا العنب الأسود
- لعد خليني اني اسألك هم خنت صفاء ولعبت بذيلك

- اعوذ بالله الخيانة شنو هاي تنوكل تنشرب
- هههههه باوعوا البراءة يربي
- بريء الله وكيلچ بت عمچ خلتني امشي جنب الحيط

بس حچاها ضربته على كتفه وضحكوا
ظلينا نلعب بالنص ساعة
اندگت الباب گام صالح فتحها دقيقة وطب هوَ وهمام بس شفتة فريت البُطل كل قوتي

للأسف مصار علي
مباشرتاً باوعلي بـ استغراب
ما جزت عنه الى أن ثبت گدامه رفعت راسي اضحك

- دنلعب لعبة الصراحة والسؤال الي هالمرة
بس هااا لازم تجاوب بـ أمانة مهما كان السؤال خطير

- الله يشافيچ
دگومي جهزي نفسچ وجهالچ نريد نروح راسي يأذيني

- ماكو تجاوب يلا
- طيبة بطلي سوالف الجهال تعبان ومالي خلگ والله

صالح.. ها صديقي
شكلك خايف من السؤال اعترف شمسوي من ورى بت عمي

همام.. هاي شبيك انتَ الثاني خايف شنو

صالح.. لعد وافق هو سؤال
چان هسة جاوبت ورحت مو احسن من هالنقاش وياها

- يلا بوية اسألي
- منو اتصل بيك الظهر ؟!!
- سألتي ساعتها وجاوبتچ اتصال من الشغل
- جواب مو مقنع دوم يتصلون بيك من الشغل وتجاوب گدامي شمعنى هالمرة الأتصال صار سري

صالح.. لا طيبة صدگ الأتصال من الشغل حتى هوَ قبل ليروح بلغني بي متشوفين تأخرنا بالباب

باوعتلهم وسكتت مجبورة
دخل همام يسلم عليهم واني گمت جهزت اطفالي
قريب الساعة سلم ورجعنا للبيت مدري ليش ممرتاحة وشگد اضوج من هالأحساس لمن يلازمني

رحمة.. بس طلعت طيبة رحت للمطبخ
وگفت الملم بـ الهوسة لأن بس اعوفها تجي أمي تنظف واذا حاولت امنعها تتحجج الهي نفسي بـ هالشغل

دامسح بالكاونتر حسيت عمتي سناء دخلت علية
سويت روحي منتبهت الها
شربت ماي وسحبت الكرسي گعدت وراية صارت تسبح استغفار بـ صوت عالي التفتت عليها ها عمة خيرچ

- لا هيچ بس ضايجة وداستغفر

- استغفري ليش لا
يحتاجلچ تستغفرين هواي لأن تدرين بثواب الأستغفار

- عود انتِ ليش ما حبلتي لسة
- متفقين اني وصالح منسوي أطفال إلا ما اكمل دراسة

- هاااا
متأكدة هذا السبب لو اكو شي ثاني تحاولين تتجاهلي

- شي ثاني مثل شنو ؟!!
- مثلاً ميصير عدكم جهال لو صالح ميريد منچ جهال

- داگولچ احنة مدنسوي ميصير شنو
بعدين ليش ميريد مني عنده غيري وما ادري ها احچي

- يجوز كل شي يصير
- لا اطمأني رجلي واعرفه ما عنده هالسوالف التعبانة

- اااي الك الله ي الفقير لمن كل الناس تحاول تستغفلك

باوعت عليها بنص نظرة
ابتسمت بـ استهزاء وعافتني وراحت
شمرت الوصلة من إيدي وطلعت اركض باوعت للصالة صالح ماكو رحت للغرفة گاعد يشتغل ع اللابتوب

- شنو عندك شغل صالح
- اي
- اريد احچي وياك شوية اترك من إيدك
- حبيبي الشغل مهم ميتأجل بس كلامچ يتأجل اصبري

- لا كلامي همْ مهم وميتأجل
- بس حچيتها سد اللابتوب اسمعچ گولي خير شصاير

- اريد طفل
- شنو تردين طفل جديدة هاي
- متزوجة واريد طفل ليش تحسسني داطلب شي حرام

- بس احنة متفقين ماكو اطفال إلا تتخرجين
- اي هوَ وينه الدوام بعدين ما ظل شي سنتين واتخرج

- حتى لو ماكو دوام
تدبريها بين دراستچ والامتحانات وشغل البيت جاوبي

- أمي موجودة ومتقصر اكيد

- ادري قابل أمچ تجي تحبل بـ مكانچ
ليش مستسهلة الموضوع تالي بعدين تظلين تنقين فوگ راسي وتعال يا صالح تحمل دلالها كـ العادة

- اشوفك بديت تضوج مني شنو مليت بسرعة

- مليت شنو احچي عدل
كل الموضوع اخاف عليچ لأن مربيچ على إيدي واعرف مو حمل كل هالمسؤولية بـ وقت واحد

- هالحچي ميفيد اني اريد طفل وما اتراجع عن قراري
- الله كريم
- هسة صالح يلا لتضحك علية

- هسة شنو !!!
شو دروحي يمعودة ولتدوخين وياچ براسي ألف سالفة

- والله حلوة هاي المن متزوجني لعد اذا القرار بس الك

- هذا اتفاق
- اي لهنا وكافي كل اتفاق ممكن يُنقض عادي
- لعد لازم نرجع نتفق مـن جديد ونوصل الـ نقطة حـل ترضيچ وترضيني

- يلا اسمعك
- بالمرحلة الرابعة نسوي طفل
- لا هسة يعني هسة
- طفلة انتِ شنو هالعناد گتلچ ماكو حمل دراستچ أهم من كل شي لاحگة على شلعان الگلب رحمة خانم

- شلعان گلب ؟!!!
يعني انتَ معتبر الطفل اليربطك بية شلعان گلب خوش والله عاشت إيدك اخذت الحچاية من حلگك

حچيتها ودرت وجهي طلعت
فرشت أسناني ورحت ذكرت أمي تاخذ علاجها وبستها ورجعت الغرفتي

فتحت الباب بعده على نفس گعدته يشتغل باللابتوب
رگعتها حيل ورحت للكنتور غيرت ملابسي
طفيت الضوة باوعلي بـ خزرة بس كل شي ما حچة
تمددت على الچرباية اريد ابچي اكيد عمتي تقصد شي وإلا ليش تگول الك الله يالفقير زين منو مستغفلني !!

نص ساعة اتگلب وافكر بـ كلامها
حسيت على صالح تمدد بـ صفي گبل درت ظهري علي سمعته ضحك وراها سحبني الحضنه وباسني من خدي

- صالح ابعد عني اترجاك

- ابعد عني يبن الناس خليني بمراري وروح شتداوي جرح جرحين شو مية جرح مجروح
منين اجيت انتَ
شجابك الدنياي
ما تحمل عذابي
ولا ترهم وياي
ابعد عني يبن الناس خليني بمراري وروح شتداوي جرح جرحين شو مية جرح مجروح

- الأخ الساهر مسلطن واني روحي دتطلع حلووو والله

- اسم الله على روحچ حبيبي
بعدين منين اجيت أخ لعد يوميا بالليل منـو الدياخذچ الحلبة المصارعة يا غالب يا مغلوب لو راح تنكرين

- اريد طفل حباب
- هذا يا طايح الحظ الدخل هالفكرة بـ راسچ فهميني

- محد بس اني شفت أبن طيبة واشتهيت الطفل ميصير

- لاحگة والله بس تخرجي
هوَ انتِ من غير شي يوميا مريضة وواگعة علينا
يا نازل دمچ يا هابط ضغطچ ترى متهونين علية وروح أبوية ولمن تتعبين من يمي اتعب حسي بية عاد

- صالح اسمعني
- اششش كافي وراية دوام ولازم انام

حچاها وباس شفتي حتى يسكتني
دارني علي وحضني حيل ظل يمسح على راسي دقايق ونام لأن تعبان أما اني للفجر يلا اخذت عيني النوم

ثاني يوم داكنس بـ غرفتي اندگت الباب
صحت تفضل
دخلت أمي تضحك طفيت المكنسة ورحت حضنتها ها ماما خير مو من عوايدچ تجين لهنا

- عندي حچي مهم وياچ
- اي تفضلي
- گعدت ع الطبلة تباوعلي هزيت بـ راسي شكو اشرت ع الچرباية اگعدي هناك الحچي هواي يمة

- هاي گعدت احچي ترى خوفتيني
- اليوم صالح بلغني الصبح تخبلتي علي البارحة علمود الأطفال صح هالكلام

- مراح ازعل لأن شكاني الچ
انتِ قبل لتكونين أمة أمي وأكثر بس ماما هالموضوع حساس اذا هوَ تذمر ومفهمني منو يفهمني لعد

- يحچي المصلحتچ ليش متستوعبين
- قابل هوَ ادرى بـ مصلحتي مني بعدين اني قررت واني اتحمل نتيجة قراري مراح اتعبكم لتخافون

- عود حچت الفاهمة
ليش من شوكت احنة اشتكينا منچ ليش تخليني اگوم وامد إيدي عليچ من تالي عمري حتى تتأدبين

- مو قصدي لتزعلين مني
- كملي دراستچ ويصير خير وإلا اذا ظليتي معاندة على هالموضوع لا انتِ بنتي ولا اعرفچ وهاي أول مرة احچيها

- تردين تقنعيني كل هذا علمود الدراسة

- الدراسة وراحتچ همْ منريدچ تتأذين صعب تدبريها
منا الامتحانات منا انتِ صحتچ على گدچ
اي يا يمة فدوة اروحلچ شغلي العقلچ ولتتعبيني وياچ

- هذا هو سكتت ونشوف تاليها وين توصل ويا أبنچ

- گامت باست راسي وضحكت هسة صار أبني وين راح كلامچ ماما احبه ماما ما اگدر بدونه

- اي لسة احبه واموت علي متشوفيني اريد طفل منه
- الله يرزقكم بنيتي بس بالوقت المناسب
- ان شاء الله

بتول.. من ثاني يوم رجعتي رجعت المشاكل وياية
مليت تعبت زهگت بس ما عندي غير الصبر
اليوم بيت خالتهم يجون خابرتني عمتي من الليل گالت بس يطلع رجلچ للدوام انزلي ساعديني بالشغل

انتظرت مخلد أول ما طلع لملمت البيت ع السريع
بالگوة گعدت أبني
نزلت جوة بناتها اثنينهن موجودات الظاهر من البارحة جايات لأن بـ ملابس البيت وگاعدات يتريگن

بعدني ممسلمة عليهم صاحت عمتي حفري للدولمة ما عدنا وقت للسوالف بعد
رحت للمطبخ اضحك ويا نفسي وين راح ذاك الدلال يا بتول چنتي بالكلمة مترضين هسة ما عندچ غير بس الحاضر

انكسر ظهري بالشغل
وين ماكو شي صعب يذبنا علية وهنَّ يشتغلن فوگاني بس عن العتب حتى لا تحچي عليهن عمتي

للظهر اجت خالتهم وياها بناتها الثلاثة
اثنين بعدهن ممتزوجات و وحدة تطلگت ورى زواجي بـ سنة بسبب عيالها
غفران مثل ضيمي تقريباً بس اني أرحم لأن رجلي دوم وياية بس هيَّ حتى رجلها طلي بـ إيد أمه وخواته الى أن خربن بيته يلا ارتاحن

بـ هاليوم حسيت اكو شي مو طبيعي ديصير وياهم
اجي يمهم يسكتون
اروح للمطبخ اسمعهم يبسبسون شكو وشعدهم ما اعرف

قريب الثنتين اجة مخلد من دوامه
صبينا الغدة واجتمعنا ع السفرة دناكل سمعـت خالتهم سألتني ليش بس هالولد عندچ چبير ما شاء الله

أم مخلد.. صارلها فوگ السنة من عافت المانع
بس ماكو مديصير عدها وتروح للدكتورة تگولها ما بيچ شي مدري هيَّ متفتهم مدري چنتنا ضامة علينا

مخلد.. يمةةةة

أم مخلد.. ها شبيك چذبت قابل

بتول.. لا عمة حشاچ
بس عادي تصير لأن انتَ اعرف مني شلون المانع يبرد الرحم

أم مخلد.. يبرده شهر شهرين مو هاي راح يصير سنتين وماكو خلفة أبني خطية وحيد وتردي يظل وحيد

ايات.. اي خوية صح كلام أمي
شوف حل خلي مرتك تراجع أكثر من دكتورة حتى اذا بيها شي تتزوج خو ما تظل على هالواحد ميصير

جنات.. طبعاً ميصير
ولو هيَّ الشغلة واضحة بتول صعبة بالحمل حتى بهذا أبنها ما حبلت بـ سهولة هم حظ مخلد المسكين

مخلد.. سدن الموضوع ليش تخلني اهينچن گدام العالم

بتول.. الحمد لله والشكر رايحة اسوي الچاي

ردت اگوم لزم إيدي واشرلي ظلي
سحبتها حيل ورحت للمطبخ المن گاعدة حتى يسممني بكلامهن صبرك ربي ما بية طاقة اتحملهن أكثر

تكررت زيارة خالتهم مرة ومرتين وعشرة
بديت احس بغرابة مچنت اشوفها غير بس بالمناسبات شعدها هسة كل يومين والثاني جاية وجايبة بناتها وياها

اليوم همْ چانوا موجودين ع الغدة
ظلوا لليل
تعشوا وراح مخلد يوصلهم من رجع گبل گمت صعدت تأخر يم أهله بالربع ساعة يلا صعد وراية

دخلت للشقة غير ملابسه وگعد يتفرج تلفزيون
ظليت رايحة جاية
شوية وضربته على كتفه عوف الأخبار واسمعني عندي حچي وياك مخلددددد مو داحچي

- ها شبيچ متشوفين مركز ويا هالخبر

- اني تعبت مليت
ما بية بعد الشغل اخذ كل طاقتي لدرجة من اصعد هنا ما اگدر اشتغل شي لأن حيلي ينهد ببيت أهلك

- لتنزلين تحججي بالمرض مرة مرتين بلكي يفيد
- ميفيد تصعد تنطيني حباية وتنزلني قابل اعلمك بيها

- والمطلوب
- شوف حل هالحچي ميصرفلي بعد
- أمي شتريدين اطردها لو اخليها وحدها واطلع علمود حضرتچ ترتاحين

- والله مثل ما أمك الها حق عليك اني هم الي هالحق

بعدين مو كورونا والدنيا مخبوصة
شعدها خالتك كل يومين جاية وخابصتنا وياها وتعال مخلد وصلها أخر الليل ليش ولدها لعد وين

ما جاوبني بـ حرف
هزيت ظهره حيل مو داحچي وياك
رفع صوت التلفزيون واندار عني لو اني تخبلت ظليت اصيح واغلط لحد ما فلت لساني كلش وتجاوزت

گتله اليرضى مرته تهان ويظل ساكت هذا مو رجال
بس حچيتها گام بـ عصبية
راد يضربني على أخر لحظة حس على روحه اندار على التلفزيون ورگع الريموت بالشاشة حيل تفلشت

ظلي يصيح ويغلط بـ اشكال الغلط والكلام
اني ابچي
أبنه يبچي
أخر شي دفر الميز برجله وطب للغرفة ورگع الباب ورى

من يومها وحياتي ويا مخلد تحولت الى جحيم
حاولت اصلح الموقف ويا ما انطاني مجال
والأغرب تصرفاته التغيرت 180 درجة صار يتأخر برة وميرجع إلا تالي الليل بس يطب يلف راسه وينام

ميتقرب مني
ميحچي وياية ولا يسأل شمحتاجة ممحتاجة
واذا اجة الظهر من الدوام ينزل يم أمه بـ حجة خطية ميصير اعوفها لازم يوميا اشوفها وتشوفني

اليوم بالليل تحضرتله لأن لازم اخلي حد الـ هالمهزلة
انتظرته لـ 12 يلا طب للبيت
فتح باب الغرفة وگفت باوعلي من فوگ ليجوة واندار شمر السويچ والموبايل على الميز بـ عصبية

- تقربت منه حضنته من ظهره اسفة والله مو قصدي
- على شنو
- ما قصدت اتجاوز عليك ما ادري شلون طلعت الكلمة مني بعدين هاي مو أول مرة اسويها لو نسيت

- بس مرة عن مرة تفرق
- اي صح لذلك داعتذر منك هسة كافي لتصير قاسي مو صار فوگ الأسبوع گالب وجهك بوجهي ما اشتاقيت

- يزن نام
- اي نام حتى ليزعج أبوه وأمه.. وغمزتله

بلا مقدمات سحبني علي باسني
اللهفة چانت جداً واضحة بكل حركه منه
بس ما لمست الحب الچنت المسه قبل من يتقرب مني يمكن لأن بعده شايل بـ خاطره علية !!!

نهاية الأسبوع رجعت خالتهم اجت
كل مرة مخلد يتغده ويصعد للشقة ينام بس هالمرة ظل گاعد وياهم

بقيت اراقب الوضع الكل مو طبيعين شصاير يا ترى
انتبهت بت خالته غفران عيونها علي
شوية وگامت يمة مدري شتراوي بموبايلها تقربت منهم جريمة هوَ محقق بيها ومصوريها بالتلفزيون

بقيت احرگ بـ روحي
هيَّ مطلگة وأمه وخواته مگاعدات راحة أي ليش لا !!

سألتهم راح اسوي نسكافي منو يشرب
كلهم گالوا نريد
دخلت للمطبخ رديت الباب ووگفت اراقب مـن الفتحة

بالبداية يباوعون عادي
فجأة حطت إيدها على صدره وضحكت
ردت اطلع بس لزمت نفسي گوة المشاكل متفيدچ بتول اهدي حتى تعرفين تتصرفين صح اهدي ولچ اهدي

سويتلهم سم وطلعت قدمته بس شافتني اجيت گامت
خليت الصينية ع الميز وگعدت بـ صف مخلد
صرت اراقب كل نظره منها هوَ ميباوعلها بس هيَّ بين الدقيقة والثانية ترفع عيونها علي وتبتسم

لليل استأذنوا گام مخلد يوصلهم
وزيت بـ راس يزن لزم بـ أبوه إلا اروح وياك
اخذه مخلد وراحوا عشر دقايق سمعت سيارته لبسـت حجابي وطلعت بسرعة اخذت أبني وصعدت للشقة

- بس سديت الباب گعدت يم رجله اي حبيبي سولفلي شسويتوا ما سويتي

- وصلناهم ورجعنا
- وبعد شحچوا بالسيارة تتذكر لو لا
- هواي ما اتذكر بس خالة گالت البابا يوم عرسك اني گلتلها ماما عروسته وهوَ سكتني گال دتتشاقى لتحچي

- يلا يروحي فوت بدل وغسل حتى اكتبك درس اليوم

بس حچيتها راح يركض
ما ادري منين اجتني كل هالقوة بس يمكن حتى يرتاح ضميري من احافظ على بيتي ورجلي لأخر نفس

بعدني دابدل دخل مخلد للغرفة
أول ما حط رجله بالعتبه دگ جهازه رسالة
فتحه حطه وضع صامت وراح يغسل ركضت طلعته من البنطرون وظليت ادوس بالبصمة لحد ما توقفت

شوية ورجع اخذ الموبايل وراح للصالة
تبعته اجة يزن بـ إيده الدفتر
چنت واگفة ورى مخلد مسافة التفت علية بتول لاعبة بجهازي انتِ ؟!!

- لا ليش تسأل
- البصمة مدتشتغل !!
- ها هذا يزن اجة للغرفة طلعه من جيبك وظل يدوس يريد يلعب گتله بابا ميقبل واخذته منه

- باوع اليزن ليش هيچ بابا
- لزمت گلبي بس لا يفضحني چان انصدم من گال اسف بابا بعد ما اسويها،، حضنته حيل وگتله طفل سامحه

موبايلي بـ إيدي فاتحته ع الفيديو
بس دار وجهه عني رفعت الموبايل ع السريع سويت اله زوم وصورته من ديكتب الرمز انطيت ايقاف واخذت يزن الغرفته

بالگوة گدرت ادرسه شوية
ساعة وگام يتثاوب خليته يفرش أسنانه ونام
رجعت للغرفة مخلد متمدد ع الچرباية بس شافني أشر على حضنه تمددت وحطيت راسي على صدره

- تدرين شگد احبچ
- اي
- المشاكل اخذتنا من بعض بس صدگي حبي الچ ماكو شي ينهي غير بس التابوت اذا شالني

- اسم الله عليك لتحچي هالشكل عفية
- يلا نامي تعبتي اليوم وعود قفلي الباب الصبح حتى لو أمي صعدت لتفتحيلها اني اتصرف وياها بعدين

- الله كريم
- باسني من راسي وابتسم تصبحين على خير حبيبتي
- وانتَ من أهل الخير

انتظرته حتى ينام
صح هنَّ عشر دقايق بس حسيتهن عمر كامل
أول مغفى گمت اتسحب اخذت موبايلي حفظت الرمز ورحت للجهة الثانية سحبت جهازة من الميز

دخلت الرمز ما انفتح معقولة غيره ؟!!
رجعت دخلته انفتح يمكن من الأرتباك كتبته غلط
باوعت ع البرامج حايرة وين اروح وليا برنامج ادخل !!

فتحت الماسنجر ما بي شي بس جماعته
دخلت ع الانستا فارغ
رحت للواتس اب وگلبي صار يدگ بـ راسي مـن شفت أسم غفران أول شي بالمحادثات واكو رسائل ممفتوحة

دخلت ع المحادثة أخر شي كاتبة اله تصبح على خير
وقبلها هواي حچي وينك ليش مترد
صعدت فوگ ما اريد كلامها ميهمني اريد اشوف حبببي شكاتب الها اللي هيچ تتوسل بي جاوب ولتروح

وصلت الرسالته واخيراً
لا لا بتول اكيد متوهمة هاي شـ كاتب واني همْ احبچ !!
لو عيوني بيها شي ودتقرا الكلام غلط
ابد ما اصدگ والله العظيم ما اصدگ مخلد مووو هيچ مخلد ميسويها مستحيل يخذلني مستحيييل....

يتبع