Chapter 62 (Final Chapter)
မနက် နှိုးစက်သံကြောင့် ကျွန်တော် နိုးလာတော့ ကျွန်တော့်ကို ကုတင်ပေါ်တွင် ဘေးက ထိုင်ပြီး ကြည့်နေသော Mcqueen ကို ဦးဆုံးမြင်လိုက်ရသည် ။
ကျွန်တော့်ဘေးတွင် Cecil လေးက ကြောင်ကို ဖက်ပြီး အိပ်နေလေသည် ။
ညက Cecil လေးကို သိပ်ရင်း ပင်ပန်းသောကြောင့် ကျွန်တော်ပါ ဘေးတွင် အိပ်ပျော်သွားခဲ့ခြင်း ဖြစ်သည် ။
" ကောင်းကောင်း အိပ်ပျော်တယ် မဟုတ်လား ... "
Mcqueen က ကျွန်တော့်ကို ကြင်နာစွာ ကြည့်ရင်း ဆိုလာလေသည် ။
" Mcqueen ညက အိမ်မပြန်ဘူးလား... "
ကျွန်တော် အပျင်းကြောဆန့်ရင်း မေးလိုက်သည် ။
" ညက မင်း အိပ်ပျော်နေတာလေးကို ခဏလာကြည့်မယ် ဆိုပြီး ပြန်ခါနီး လာကြည့်လိုက်တာ... မင်း နှစ်နှစ်ခြိုက်ခြိုက် အိပ်ပျော်နေတာလေးကို ထိုင်ကြည့်ရင်း မနက်မိုးလင်းသွားတာပဲ ... "
" Ryan နဲ့ စကားပြောတာကော... အဆင်ပြေခဲ့လား... "
" အင်း ... ဒါနဲ့ ဒီနေ့ ယော့ဝန်း ပထမဆုံး အလုပ်သွားရမယ့်ရက် မဟုတ်လား ... အဆင်သင့် ပြင်ထားဦး... ကိုယ် မနက်စာ စားပြီးရင် လိုက်ပို့ပေးမယ်လေ... "
ကျွန်တော်တို့ မနက်စာ စားဖို့အတွက် Ryan က ပြင်ဆင်ပေးထားသည်ကို ကြည့်ခြင်းအားဖြင့် Ryan နှင့် Mcqueen ကြားက ဆက်ဆံရေးသည် အရင်ကထက် အဆင်ပြေသွားပြီဟု ကျွန်တော် ခန့်မှန်းနိုင်လေသည် ။
" Ryan... ဒါတွေအကုန် မင်းလုပ်ထားတာလား... "
" ဟုတ်တယ်... စားကြည့်ပါဦး... ဘယ်လို နေလဲ လို့... "
" ဟုတ်တယ်... အကုန် Ryan ချက်ထားတာ... "
Mcqueen က ခုံတွင် ဝင်ထိုင်ရင်း ပြောလိုက်သည် ။
" အစက သူ မုန့်စျေးကား ရောင်းမယ်ဆိုတော့ ကိုယ်က စိတ်ပူသွားခဲ့တာ... ဒါပေမယ့် အခုမြည်းကြည့်လိုက်တော့ အရမ်းကြီး မဆိုးပါဘူး... မင်း အရမ်းဗိုက်ဆာနေတဲ့အချိန်မျိုးဆိုရင်တော့ စားလို့ရလောက်ပါတယ်... "
Mcqueen က စနောက်လိုက်တော့ Ryan က သူ့လက်ထဲက ယောင်းမကို ကိုင်ပြီး Mcqueen ကို ရွယ်ကာ လှမ်းရိုက်ချင်နေလေသည် ။
" တိတ်တိတ်နေစမ်းပါ... အော်... ဒါနဲ့ မင်း မပြန်ခင် ငါ့ကို မင်းရဲ့ ပါစတာလုပ်နည်း အညွှန်းရေးပေးခဲ့ဦးနော်... "
Ryan က မကျေမချမ်း အသံဖြင့် ပြောလေသည် ။
ပါစတာက Mcqueen ၏ စပယ်ရှယ် လက်ရာ ဖြစ်ပြီး သူ့ဆီသွားတိုင်း ကျွန်တော့်ကို Mcqueen က လုပ်ကျွေးလေ့ရှိသည် ။
" ဒီတစ်ခါ ချက်ထားတာ အရင်ဟာတွေနဲ့ အရသာ မတူဘူး... Daddy... ဒီတစ်ခါ တော်တော်လေး စားကောင်းတယ်... "
Cecil လေးက အားရပါးရ စားရင်း Ryan ကို ချီးကျူးနေလေသည် ။
" တကယ်လား... Cecil... Daddy လက်ရာ တိုးတက်လာတယ်ပေါ့... ဟုတ်လား... "
Ryan က ဝမ်းသာနေလေသည် ။
Ryan တစ်ယောက် အတိတ်အရိပ်များထဲတွင် ပိတ်မိခဲ့စဥ်က သူ့ကိုယ်သူပင် မကယ်တင်နိုင်ခဲ့သည့် အချိန်တို့ကို ကျွန်တော် မြင်ခဲ့ဖူးသည် ။
သို့သော်လည်း ယခုတွေ့နေရသော Ryan သည် အတိတ်မှ Ryan နှင့် လုံးဝ မတူတော့ဘဲ မျှော်လင့်ချက်များ ပြည့်နေသည့် တက်ကြွသည့် Single Father တစ်ယောက်အဖြစ် တွေ့နေရလေသည် ။
လူသားနှစ်ဦး တစ်ဦးကို တစ်ဦး မှီခိုရင်း ချစ်ခင်စွာ အတူတူနေထိုင်ကြခြင်းသည် သာမန်မိသားစု ဘဝလေးနှင့် မခြား ကောင်းမွန်ပျော်ရွှင်ဖွယ်ရာအတိ ဖြစ်လေသည်ကို နောက်ဆုံးတော့ ကျွန်တော် နားလည်နိုင်ခဲ့လေပြီ ။
*******************
ယနေ့ ပထမဆုံး အလုပ်သည် နာမည်ကြီး ရုပ်ရှင် ရိုက်ကွင်းတစ်ခု၏ လုံခြုံရေးအတွက် တာဝန်ယူရခြင်း ဖြစ်သည် ။
မင်းသားက အာရှသားတစ်ယောက် ဖြစ်ပြီး အမေရိကားတွင် နာမည်ကြီးကာ သူ့ Fan ပေါင်းများစွာလည်း ရှိလေသည် ။
သူ့ အရင်ရုပ်ရှင်ကားက အတော်လေး ပေါက်သွားခဲ့ပြီး တဟုန်ထိုး နာမည်ကြီးသွားခဲ့ခြင်း ဖြစ်လေသည် ။
လူအုပ်ကြားတွင် ဝံ့ကြွားစွာ မတ်တပ်ရပ်နေသော ဖော်ရွေသည့် မျက်နှာနှင့်အမျိုးသားသည် သူ့ ပရိသတ်များကို လက်ပြနှုတ်ဆက်နေလေသည် ။
ဤနေရာသည် တစ်ချိန်က ကျွန်တော် ရူးသွပ်စွာ လိုချင်ခဲ့မိသည့် နေရာတစ်ခုဖြစ်သည် ။
သို့သော်လည်း ယခုအခါတွင်တော့ ထိုမြင်ကွင်းမျိုးသည် ကျွန်တော့်ကို မည်သည့်ခံစားချက်မှ မပေးနိုင်တော့ပါပေ ။
" အဲ့တစ်ယောက်က ဂေး Porn ရိုက်တယ်ဆိုတဲ့ တစ်ယောက်မလား... "
ဘေးဘက်က နှစ်ယောက်က ကျွန်တော့်အကြောင်း ခပ်တိုးတိုး အတင်းပြောနေကြသည်ကို ကြားနေရသည် ။
ဤအလုပ်သည် အလုပ်သစ် ဖြစ်သောကြောင့် အလုပ်မှ လူများသည်လည်း ကျွန်တော်နှင့် မရင်းနှီးကြသေးရာ ကျွန်တော့်အတိတ်သည် သူတို့အတွက် ပြောစရာ ခေါင်းစဥ်ကောင်း တစ်ခု ဖြစ်နေလေသည် ။
ဤအခြေအနေသည် ကျွန်တော် ကြိုတင်မျှော်လင့်ထားပြီးသော အခြေအနေ တစ်ခုပင်ဖြစ်သည် ။
သို့သော်လည်း ကြာလာလျှင် ပို၍ အဆင်ပြေလာမည်ဖြစ်ပြီး လူအများသည်လည်း ဤအကြောင်းအရာကို ပြောဖို့ ပျင်းလာသည်နှင့်အမျှ သူ့တို့ကို မထိခိုက်သ၍တော့ မေ့မေ့ပျောက်ပျောက် ဖြစ်သွားကြမည်သာ ။
" အားလုံး ဒီနေ့အတွက် တာဝန်ကျေပါတယ်... "
Ash က အားလုံးကို အနားယူနိုင်ပြီ ဖြစ်ကြောင်း ပြောလာတော့မှ ကျွန်တော် ဖုန်းကို စက်ဖွင့်လိုက်သည် ။
ဖုန်းဖွင့်လိုက်သည်နှင့် Mcqueen ဆီမှ ဖုန်းကောလ် ဝင်လာလေသည် ။
" Mc..."
" ယော့ဝန်း... အလုပ်ပြီးပြီလား... "
" အင်း... ပြီးပြီ ... "
" မင်းအလုပ်က မင်းကို နောက်ကျတဲ့အထိတော့ မခိုင်းဘူးမလား... ဒီနေ့ ပထမဆုံးအလုပ်စလုပ်ရတာ ဆိုတော့ ဘယ်လိုနေလဲ... "
" မဆိုးပါဘူး... "
" ဒါနဲ့ ဒီနေ့က ရုပ်ရှင် ရိုက်ကွင်း တစ်ခုမှာ တာဝန်ကျတာဆို... ဘာရုပ်ရှင်လဲ ယော့ဝန်း... "
" အက်ရှင်ကား တစ်ကားပါပဲ... ဒီနေ့က ကား ပေါက်ကွဲတဲ့အခန်းရိုက်တာ ... "
" အိုး... ကြားရတာ အန္တရာယ်များမယ့်ပုံပဲ... "
" .... "
" ဒါနဲ့ အလုပ်က လုပ်ဖော်ကိုင်ဖက်တွေကကော... "
" ဒီနေ့က ပထမဆုံးနေ့ဆိုတော့ သေချာတော့ မသိသေးဘူး.... "
" မနက်ဖြန်ကော အလုပ်စောစော သွားရဦးမှာလား... "
" မနက်ဖြန်က နေ့လည်မှ ကျွန်တော့ အဆိုင်း ရှိတာ... Mcqueen ကော... "
" ကိုယ်ကတော့ မနက်ဖြန် ကုမ္ပဏီ လွှဲဖို့ ကိစ္စအတွက် ရှေ့နေတွေနဲ့ တွေ့ရဦးမယ်... အလုပ်က ထင်တာထက်ကို ပိုများပြီး ရှုပ်ထွေးတာပဲ... မနက်ဖြန်လည်းကိုယ် အလုပ်များဦးမယ် ထင်တယ်... "
" အားလုံး အဆင်ပြေတယ်မလား... "
" အားလုံး အဆင်ပြေအောင်တော့ လုပ်နေရတာပါပဲ... Janine တို့ ဂျနီဖာတို့ တေလာတို့အတွက်ပါ အဆင်ပြေအောင် စီစဥ်ပေးနေရတော့ အတော်လေး ခက်ခဲနေတာ... "
" .... "
" ယော့ဝန်း... အခု အိမ်ပြန်နေတာလား... "
" မဟုတ်ဘူး... လမ်းလျှောက်နေတာ... "
" ဟ ဟ... ဘယ်ကိုလဲ... "
" တောင်ဘက်ကို ဦးတည်ပြီး လျှောက်နေတာ ... "
" ဟားဟား... စိတ်ဝင်စားစရာပဲ... ကိုယ်ကတော့ မြောက်ဘက်ကို ဦးတည်ပြီး လျှောက်နေတာ... "
ကျွန်တော်နှင့် Mcqueen တို့ ရောက်တတ်ရာရာ စကားများ ဆက်ပြောကြရင်း အချိန်တွေ ဘယ်လောက်တောင် ကြာသွားသည် မသိ ။
နောက်ဆုံးတော့ ကျွန်တော့်ဖုန်း အားကုန်ပြီး ပိတ်သွားလေတော့သည် ။
သို့သော်လည်း Mcqueen နှင့် တွေ့ရမည်ဟု ယုံကြည်နေသ၍ ကျွန်တော် တခြားအရာများကို စိတ်မပူမိပေ ။
ကျွန်တော်တို့ တစ်နေရာထဲသို့ အတူ ဦးတည်၍ တစ်ဖက်စီမှ လျှောက်လာကြခြင်း ဖြစ်သောကြောင့် မလွဲမသွေ ဆုံတွေ့ကြရမည်သာ ။
ကျွန်တော် အရှေ့ကို ကြည့်လိုက်တော့ ကျွန်တော့်ဆီ ဦးတည်ပြီး လျှောက်လာနေသော Mcqueen ။
ကျွန်တော်ကလည်း သူ့ဆီ ဦးတည်ပြီး သွားနေခဲ့သည်သာ ။
" ယော့ဝန်း... မအေးဘူးလား... "
Mcqueen က ကျွန်တော့်ပါးနှစ်ဖက်ကို သူ့လက်ဖဝါးဖြင့် ကိုင်ထားရင်း မေးလာလေသည် ။
" ခုနကတော့ အေးတယ်... ဒါပေမယ့် အခုတော့ မအေးတော့ဘူး... "
ကျွန်တော်တို့ နှစ်ယောက် မြစ်ကမ်းနံဘေးက ပန်းခြံလေးသို့ သွားရင်း အတူထိုင်ကြသည် ။
ဤ ပန်းခြံလေးသည် ကျွန်တော်တို့ နှစ်ယောက်ကြား အမှတ်တရ များစွာ ရှိခဲ့သော နေရာပင် ။
ဤ ပန်းခြံထဲသို့ ချစ်သူမဖြစ်ခင်ကလည်း အတူလျှောက်ဖူးခဲ့ကြသည် ။
ချစ်သူဖြစ်စဥ်ကာလတစ်လျှောက်လည်း အကြိမ်များစွာ ရောက်ခဲ့ကြသည် ။
ဤ ပန်းခြံ၌ပင် ညဘက် အတူတူ စက်ဘီးစီးခဲ့ကြသည် ။
ဤ ပန်းခြံ၌ပင် ကျွန်တော်တို့ စကားများ ရန်ဖြစ်ပြီး ပြတ်ဆဲခဲ့ကြဖူးသည် ။
ယခုတော့လည်း မုန်တိုင်းထန်သော နေ့များသည် ဘယ်တုန်းကမှ မရှိခဲ့ဖူးသလို သာယာကြည်လင်နေလေတော့သည် ။
" Mcqueen... ခင်ဗျားသိလား... ကျွန်တော် အရင်က ပြောဖူးတဲ့ ဆပ်ဖို့ ကျန်တဲ့ အကြွေးဆိုတာလေ... အဲ့တာ အကုန်ဆပ်ပြီးသွားပြီ... "
ကျွန်တော် စကားစလိုက်သည် ။ Mcqueen ကတော့ ပြုံးရင်း ကြည့်နေလေသည် ။
" ကျွန်တော် အကြွေးဆပ်ပြီးကြောင်း ပြေစာလည်း ရလာခဲ့ပြီ ... သိလား... အခုတော့ အရာအားလုံး ခက်ခဲခဲ့တဲ့ နေရက်တွေ ပြီးသွားခဲ့ပြီ ... "
" အားလုံး အဆင်ပြေသွားပြီပေါ့ ယော့ဝန်း... "
" အင်း... "
" မင်းကိုယ့်ကို ပြောဖူးတာ မင်း အသက် ၂၀ ထဲက စပြီး အကြွေးတွေ ဆပ်ခဲ့ရတယ် လို့ ပြောခဲ့တာနော်... ဒါဆိုရင် ယော့ဝန်း အကြွေးဆပ်ခဲ့ရတဲ့ နှစ်က ငါးနှစ်ကျော် ကြာခဲ့တာပေါ့... "
" ကျွန်တော့်ကို အကြွေးအကုန် ဆပ်နိုင်အောင် ကူညီပေးခဲ့လို့လည်း Mcqueen ကို ကျေးဇူးတင်ပါတယ်... "
Porn လောကကြောင့်ပင် ကျွန်တော်သည် ဘဝတွင် အဆိုးဆုံး အခြေအနေသို့ ရောက်ခဲ့ရပြီး တစ်ဖန် ထို Porn လောကကြောင့်ပင် ကျွန်တော့်ဘဝ၌ အခက်ခဲဆုံးသော ကိစ္စရပ်ကို ကျော်ဖြတ်နိုင်ခဲ့ပြန်လေသည် ။
" ဒီအကြောင်းတွေ ထပ်မပြောပါနဲ့တော ယော့ဝန်း... ပြီးတော့လည်း မင်း ကိုယ့်အပေါ် အကြွေးတင်နေတယ်လို့လည်း မတွေးပါနဲ့... ပြီးတော့ မင်းလည်း ကိုယ့်ကို ဒေါ်လာ ငါးသောင်း ပြန်ပေးခဲ့တယ်လေ... ကိုယ်တို့ ကျေပြီပေါ့ ... မဟုတ်ဘူးလား... "
ကျွန်တော် Mcqueen ကို ကျေးဇူးတင်စွာ ကြည့်ပြီး ပြုံးပြလိုက်မိသည် ။
" ဒါနဲ့ ယော့ဝန်း... ကိုယ် မင်းကို တစ်ခါပြောဖူးတဲ့ HERE ဆိုတဲ့ TV Channel ကို သိတယ်မလား... "
" အော်... LGBT ရုပ်ရှင် ကားတွေ သီးသန့်လွှင့်တဲ့ ချန်နယ် မဟုတ်လား ... "
" အင်း... ဟုတ်တယ်... ကိုယ် အဲ့က ဒါရိုက်တာ တစ်ယောက်နဲ့ ဆုံခဲ့တယ်... သူတို့က ကိုယ့်ကို Short Gay Film တစ်ခုအတွက် ထုတ်လုပ်သူ လုပ်ချင်လား ဆိုပြီး မေးလာခဲ့တယ်... "
" .... "
" အစကတော့ ကိုယ် ငြင်းခဲ့သေးတယ် ... ဒါပေမယ့် နောက်ဆုံးတော့ သူတို့က ကိုယ့်ကို ဆွဲဆောင်နိုင်ခဲ့တယ်... ကိုယ် အဲ့ ချန်နယ်ရဲ့ တခြား ဒါရိုက်တာတွေနဲ့ပါ တွေ့ပြီး ကိုယ့် ဇာတ်ညွှန်းဟောင်း တချို့ကိုပါ ပြခဲ့တယ်... အမ်း... အဲ့တာလေးတွေက ကိုယ့်အသက် ၂၀ အရွယ်လောက်မှာ ရေးခဲ့တဲ့ ဇာတ်ညွှန်းတွေ ဆိုတော့ နည်းနည်းတော့ ကလေးဆန်တယ် ပြောရမလားဘဲ... "
" .... "
" အဲ့ထဲက အဆင်ပြေတဲ့ တစ်ပုဒ်ကို ကိုယ်ရွေးရမှာ... ဘယ်အပုဒ်ကို ရွေးရမယ်မှန်း ကိုယ် တွေးလို့ မရသေးဘူး... ယော့ဝန်း... ကိုယ့်ကို ကူရွေးပေးမယ် မလား ဟင်... "
" သေချာတာပေါ့... "
ကျွန်တော်တို့ အတူ ကြည်နူးစွာ ပြုံးမိကြသည် ။
" အဲ့တာက အက်ရှင်ကားတော့ မဟုတ်ဘူး... ဒီတိုင်း တေးဂီတရုပ်ရှင် အမျိုးအစားပဲ... ဒါပေမယ့် မင်း ရိုက်ဖို့အတွက် စိတ်ဝင်စားလား ယော့ဝန်း... "
" ... "
" အမှန်တော့ မင်းရဲ့ ဖြစ်ချင်တဲ့ အိပ်မက်တွေကို ဖြည့်ဆည်းပေးဖို့ ကိုယ် အမြဲတမ်း တွေးနေခဲ့မိတာ ... အခြေအနေတွေကြောင့် မင်းရဲ့ အိပ်မက်တွေကို စွန့်လွှတ်ခဲ့ရတဲ့အတွက်လည်း ကိုယ် အမြဲတမ်း စိတ်မကောင်း ဖြစ်ခဲ့ရတာ ယော့ဝန်း... "
" ကျွန်တော် ဒီအတောအတွင်း အများကြီး တွေးခဲ့ပြီးပါပြီ Mcqueen... လူ တစ်ယောက်ဟာ သူ စိုက်ပျိုးတဲ့အတိုင်း ပြန်ရိတ်သိမ်းရမှာပါပဲ... အကြောင်းကြောင့် အကျိုး ဖြစ်လာတာပါပဲ... လူတိုင်းကတော့ Mc လိုမျိုး သူတို့ ဖြစ်ချင်တဲ့ အိပ်မက်အတိုင်း ဖြစ်မလာနိုင်ပါဘူး ... ပြီးတော့ ကျွန်တော်က ဆင်းရဲတယ်... အရည်အချင်း မရှိဘူး... ပြီးတော့ သာမန်အရမ်းဆန်တယ်... "
" .... "
" ဖြစ်ချင်တဲ့ အိပ်မက်အတိုင်း ဖြစ်လာရတာ လှပတယ် ဆိုပေမယ့် မဖြစ်လာခဲ့ရင်လည်း အကျည်းတန်တယ်လို့ ပြောလို့ မရပါဘူး Mc... ဘာတွေပဲ ဖြစ်ဖြစ် ကျွန်တော့်ကိုယ်ကျွန်တော် တရားမျှတတဲ့ဘက်မှာပဲ ရှိဖို့ အမြဲ ကြိုးစားခဲ့တယ်... "
" ... "
" အခုချိန်ကစပြီး ကျွန်တော် ဘာကိုမှ ရှောင်မပြေးတော့ဘဲ ဘဝကို ကြိုးစားသွားမှာပါ... ပြီးတော့ ကျွန်တော် သာမန်လူတွေလို ဘဝလေးနဲ့ပဲ Mcqueen နဲ့ တစ်သက်လုံး အတူနေသွားချင်တယ်... "
ကျွန်တော် Mcqueen ၏ ပုခုံးပေါ်တွင် မှီနွဲ့လိုက်သည် ။
" ကောင်းပါပြီ ယော့ဝန်း... ကိုယ် နားလည်ပါတယ်... "
Mcqueen က ကျွန်တော့်ကို ပွေ့ဖက်ရင်း ဆံပင်များကို သပ်ပေးနေလေသည် ။
" ယော့ဝန်း... ကိုယ်မင်းနဲ့ အတူရှိတိုင်း အမြဲ ချိုမြိန်တဲ့ အရသာကို ခံစားရတယ်... "
" ကျွန်တော်ရောပဲ... "
နှစ်ယောက်သား တစ်ယောက်မျက်နှာကို တစ်ယောက် ကြည်နူးစွာ ကြည့်မိကြသည် ။
" Mcqueen.... ရုပ်ရှင်စရိုက်တော့မယ်ဆို ကျွန်တော့်ကို ပြောလေ... နော်... ကျွန်တော် ကူပေးချင်တယ်... နောက်ဆုံး ပစ္စည်းသယ်တာပဲ ဖြစ်ဖြစ်ပေါ့... "
" ကောင်းပါပြီဗျာ... "
Mcqueen က လူချင်းခွာလိုက်ပြီး ကျွန်တော့် မျက်လုံးများကို ကြည့်ကာ အလေးအနက် ပြောလာလေသည် ။
" ယော့ဝန်း... ကိုယ်တို့ အစကနေ ပြန်စကြရအောင်နော်... ကိုယ့်ရဲ့ ကျန်ရှိတဲ့ ဘဝ တစ်လျှောက်ကိုလည်း မင်းနဲ့ပဲ ဖြတ်သန်းဖို့ ကိုယ့်ကို အခွင့်ရေး ပေးပါနော်... ကိုယ် ဒီအချိန်ကစပြီး ကိုယ့်ကိုယ်ကိုထက် ယော့ဝန်းကို ဦးစားပေးမယ်လို့ ကတိပေးပါတယ်... "
ကျွန်တော် ထိုလူသားကို ကြည်နူးစွာ ကြည့်ရင်း ခေါင်းငြိတ်လိုက်မိသည် ။
" ယော့ဝန်း... ကိုယ့်ကို ပြန်စဖို့အတွက် အခွင့်ရေး ပေးမယ် မဟုတ်လား ဟင်... "
ကျွန်တော်တို့ နှစ်ယောက်သည် မမျှော်လင့်သော အခြေအနေတွင် အကြောင်းမလှစွာ ဆုံခဲ့ကြသည် ။
သို့သော်လည်း လှပသော အတိတ်များကို အတူဖန်တီးခဲ့ကြသည် ။
ထိုလူသားကြောင့် ကျွန်တော် ငိုခဲ့ရဖူးသည် ၊ ဒေါသထွက်ခဲ့ရဖူးသည် ၊ ကြည်နူးခဲ့ရဖူးသည် ၊ အချစ်ဆိုသည်ကို နားလည်ခဲ့ရဖူးသည် ၊ ကြမ်းတမ်းသော အခြေအနေများကို ရင်ဆိုင်ခဲ့ရဖူးသည် ။
ထို့အပြင် ကျွန်တော်တို့နှစ်ယောက်သည် တစ်ယောက်ကို တစ်ယောက် ဒဏ်ရာတွေ ပေးရင်း နာကျင်စွာ ကျောခိုင်းခဲ့ကြဖူးသည် ။
သို့သော်လည်း အဆုံးတွင်မူကား တစ်ဦးကို တစ်ဦး မခွဲနိုင် မခွာရက်လေမှန်း သေချာစွာ နားလည်ခဲ့ကြရသည် ။
ယခုတော့ ကျွန်တော် ထိုလူသားနှင့် အတူ ဘဝကို ဖြတ်သန်းသွားဖို့ အသင့်ဖြစ်ပြီဟု ထင်မိပါသည် ။
ကျွန်တော် Mcqueen ကို မျက်လုံးများ မှေးသွားသည်အထိ ပြုံးလိုက်ရင်း ပြန်ဖြေမိလိုက်လေသည် ။
" ကောင်းပြီလေ... ကျွန်တော်တို့ အစကနေ ပြန်စကြရအောင်... "
ယခုအခါတွင်မူ နှစ်ယောက်သား တစ်ယောက်ကို တစ်ယောက် ယခင်ထက် တောက်ပ ကြီးမားသော အပြုံးတို့ဖြင့် ပြုံးပြနိုင်ခဲ့လေပြီ ။
ကျွန်တော်တို့ တစ်ဦးကို တစ်ဦး မွတ်သိပ်စွာ နမ်းရှိုက်မိကြသည် ။
မြစ်ကမ်းနဘေးမှ လေပြည်တို့သည် ကျွန်တော်တို့ဆီသို့ တိုးဝင် တိုက်ခတ်လျက်... ။
ယခုည အခိုက်အတန့်လေးသည် ကျွန်တော့် နှလုံးသားထဲတွင် အစဥ်သဖြင့် မပျောက်မပျက် စွဲမြဲစွာ တည်ရှိနေပေတော့မည် ဖြစ်သည် ။
နောက်ဆုံးတွင်တော့ ကျွန်တော်တို့ နှစ်ဦးသည် တစ်ဦး၏ နှလုံးသားဆီသို့ တစ်ဦးက လက်လှမ်းမှီကာ ရောက်ရှိနိုင်ခဲ့ကြလေသည်မှာ အသေအချာပင် ဖြစ်လေတော့သည် ။
ပြီးပါပြီ.... ။
(T/N... extra လေးတွေ လာပါဦးမယ်... Mcqueen နဲ့ ယော့ဝန်းတို့ရဲ့ rated အခန်းလေးတွေ မတွေ့ရတာ ကြာပြီမို့ မျှော်လင့်နေကြသူတွေအတွက်တော့ သတင်းကောင်းပါ 😂😂😂 ... ဒါပြီးရင်တော့ Yours to Claim ရယ်... System တစ်ပုဒ်ရယ်ကို ပြီးတဲ့အထိ ဆက်ရေးသွားပါမယ်...
ဇာတ်သိမ်းအထိ အတူ စီးမျော ခံစားပေးခဲ့ကြသူ အားလုံးကို ကျေးဇူးတင်ပါတယ်ခင်ဗျာ... )