اسيرة قدرك

البارت 78

اسيرة قدرك..
بقلمي رسل..
البارت الثامن والسبعون..
واتباد rasolaa7

الأرجوحة

عندما كنا أطفالا ونلعب على الأرجوحة كانت
أصواتنا تعلو فرحا عندما نعلو وتنخفض كلما
ننزل حتى يدفعنا احد...
ولم نكن نعلم أن الدنيا أرجوحة كبيرة ولكن لا أحد
يدفعنا إلى الأعلى وعلينا أن ندفع أنفسنا
ولا يغرنا ارتفاعنا فالنزول اسرع....
وحين تنزل لن تجد من يدفعك أو يكترث لأمرك
الا ما فعلت وأنت في الأعلى....
هكذا الدنيا وهكذا نحن لعبنا أطفالا بالأرجوحة
الان دورها تلعب بنا..

لرائد العتيبي..

-هي كالت لا ان شاء الله ما تدخل بيكم
بهاي الاثناء دكت سرى رفعت خط واسمعها تحجي بخوف..

-ولج وكعت بمصيبة ريا الحكيني فدوه
الحكيني..

-نرعبت من الي سمعته عيني على سمر
الي اشرتلي شبيج منو سديت المكالمة
وابتسمت اخفي خوفي.. لا ماكو شيء هاي
سرى كالت يمكن يردون يجون عليه هي
كالت لعد اني اروح يم بيبي..

-نزلت واني رجعت اتصلت على سرى..احجي
شكو لا تكولين دعمتي واحد سرى انتي ما تتوبين
وتالي وياج..

-هي كالت.. لا يا داعمة واحد يا سيارة مصيبة
ريا وهاي شهد طلعت وحدة كلش مو زينه
وواكعة بمصايب ولاحني من نارها وكعت
وياها يمكن اني ريا شلون بيه لو شحجيلج
عنها يمكن ما تصدكين صدمتي بيها جبيرة كلش..

-لج احجي وكعتي كلبي يا شهد يا صخام
لا تكولين رجعتي وياها؟!..

-ريا لا تزيدينها عليه لا تصيحين بس خليني
افهمج حبابه..

-يلا احجي هاي سكتت هي كالت..  ريا هاي شهد كلش تصرفاتها غريبة وطلعت متعينه بهذا المكان حتى بدون شهادة مجرد واسطة واشتغلت
بالمذخر مال الادوية..

-نترت بيها..  اي شنو يعني هي الحياة متمشي اذا ما عندج ايد ثكيلة بهالبلد وين الغريب بالموضوع..

-مو هنا المشكلة صارلها كم يوم تنك فوك راسي  واني اخاف منها لان كلامها مو راحة تكولي سرى بس طيعيني اخليج تملكين كل شيء بنفسج بقيت امشي على هواها اريد اشوف وين توصل  جريت السانها وتالي طلعت داهية تدرين
اخر شيء شنو كالت..

-شنو كالت حجيتها هي رجعت تحجي بقلق.. لج لو تدري نورهان جان ذبحتني تكلي
هذا الولد الي شفتنه بالشقة هذا يصير اخو صديقتي ومن شاف نورهان مات عليها ويكلهن
اريدها هاي ام لسان مبينه قوية..

-اسمعها وضربت على وجهي.. ولج صخام
بوجهج وبوجهنا يوم الي طلعنا وياج شحجي
شصخم والله يذبحني اسر واختج هسه يلا
تنفست ورجعت البيتها منين جبتي هالشكولات..

-هي حجت بخوف.. ريا ما قبلت ورزلتها حتى
كتلها نورهان رجعت الرجلها بس هي حقيرة
كالت انتي موجودة وهو على سنة الله يعقد عليج
وتعيشين بخير كل شيء تردينا يجيج والله هنا تخبلت عليها وصحت بيها..

-متصورتج هيج لاتحاولين توصلين يمي
ولا يم خواتي متزوجات لا تسويلهن مصيبة
ورجولتهن مخابيل ترى ما تسلمين منهم
واذا تقربتي مني ساعتها افضحج فضيحة..

-سكتت شحجي واختي العاقلة ام العلم
مرافقة هيج ناس هي كملت.. ريا هي مخافت
تضحك وتكلي لو ردت اجيبج للطريق غصب عنج اجيبج بطريقتي بس لان حبيتج حسبتج اختي
وجاي احجي وياج المصلحتج كتلج طاوعيني
والي تحلمين بي يجيج..

-صخام بعينج سرى ولج شيخلصج منهم
لا تداومين لا يخطفونج يسوون شيء منين
طلعتنا هاي المصيبة بس الله اليستر بقيت
ارزل بيها هي صاحت وصوتها بي رجفه
خوف وقلق.. ريا حبابه خلي اكمل مو راح اموت
من الخوف الي بيه كافي..

-كملي بلا نشفتي الدم بجسمي ولج ليل
ونهار ادعي الله تنسد السالفة وما يعرف اسر
وانتي الظاهر راح تعمين علينا والله يتخبل عليه
اذا عرف وما الومه امداني بيوم الي طلعت
وياج عسانا لا رحنا لهالمطعم..

-اي عاد من يومها اختفت اسبوع هي ماكو
كلت يمكن خلصت منها اشو هاي  داومت بس مرتبكه كلش بس تصفن قبل نهاية الدوام شفتها
كاعدة وتبجي انقهرت عليها كعدت يمها..

-شهد شبيج ليش تبجين؟!..

-هي كالت روحي سرى روحي عوفيني
بناري ياريت ما اجيت على هالدنيا ولا نهشت لحمي الوحوش ولا شفت هالاب روحي سرى..

-ما فهمت شيء مرة تحجي على ابوها
مرة على نفسها.. احجي بلكت اساعدج شبيج
انتي  وليش تمشين ويا هيج ناس..

-هي بجت هواي حسيتها مترددة بعدها
مسحت دموعها وحجت بقهر.. سرى خايفة
كتلج عوفيني..

-بديت اقنعها تحجي تالي كوه يلا حجت
كالت.. اني جبيرة اهلي عندي أخت أصغر مني بعمر المراهقة واخ عمره عشر سنوات ابويه مو بس يسكر مدمن لدرجة من يجي باليل كلنا
نتختل منه لان نذل سرى نذل لدرجة ما
تتخيليها..

-لدرجة كم مرة نشوفه يتحرش بأخوية ونضم اخوية عنه نخاف عليه هو طفل وبابا من يشرب
بعدما يعرف شيء جان ميطلع اذا مايحصر اخوية بمكان لعب نفسنه منا الناس عدها ابوها قدوه
وامان للبيت واحنا ابونا مصدر رعب وقلق
نتعارك ميفيد ويا من يشرب
ينكلب وحش قذر علينا وغريزته الحيوانية
يريد بس يفرغها بابنه تخيلي ابنه الي يا دوب
عمره عشر سنوات يعني طفل بعده ما يعرف
الدنيا شنو تالي فتح عيونه على اب قذر
وكل همه يعتدي عليه ويسلب براءته..

-ومو بس هيج يريد من امي اربعة وعشرين ساعة فلوس يروح يشرب بيهن المهم تنطي
فلوس لان ننكتل امي تخبز للعالم وتدبر لان ماعدنا احد نروح عليه غير بس خالتي وهو ياخذهن بدون وجع كلب بس حتى يشتري بيهن هالسم ويشربه..

-ما جان عدنا احد نعرفه غير بس خالتي
ومن اروح يمها اشبع قهر جنت اشوف بت حماتها لبسها ودلالها ابقى اتحسر هي تتقصد تغورني وتخليني اتحسر لان اني نص الي عندها
ما عندي واحنا وين كل الي نحصله لابوي..

-وبيوم رحنا لخالة وصادفت بنت حماتها
موجودة كالت الماما خل اخذ شهد ويايه طالعة ويا البنات خطيه تغير و تتونس بس حابسينها
خليها تشوف العالم تتغير نفسيتها..

-خالتي بقت تقنع بامي.. خليها تروح تعقدت
البنية من ورة السكير وترى مسار حبابه نفسيتها طيبة خلي تروح وياها..

-قنعن ماما الى ان قبلت اروح رحت وياها
للمطعم جنت فرحانه لان اشوفها دائما تطلع
وتشتري كلت اليوم راح اتونس مثلها من
وصلنا انصدمت بواحد ينتظرها هناك كعدنا شويه واني على اعصابي وخايفة ما عبالي هيج
جنت عبالي نتونس ناكل وصدك نغير جو ونرجع
اشو هاي كعدت يم الولد وعدها عادي ضربتها ميانه..

-الولد شوي وقدملي عطر.. هدية هذا للحلوة..

-خفت منه بس اخذته للعطر رجعت خايفة
بس جان العطر اول حاجة احصلها وفرحانه
بيها ما عرفت راح يطيح حضي واتندم على
هالدرب الي اجيته برجلي..

-رجعنا وخفت ما حجيت شيء كلت العطر
من مسار وهي بقت كل فترة تخليني ابات يم خالة وطلعني وهذا يجيب شيء جديد ملابس اكسسوارات بعدها صار يجيب اشياء بمقابل نروح البيت مسار وبعلم امها والولد ساعات يكعد يمي لو يبوسني  لو يلزم مكان حساس بجسمي بالبداية جنت خايفة وتراجعت
بس الي وكعني جنت اشوف مسار بعلم
امها تسوي هالشيء وهذا خلاني ما اخاف
ولان تعلمت على الصرف جنت شنو ينطيني  يفرحني وانسى نفسي وانسه هالشيء غلط من الاخير يا سرى ما شايف وشاف هيج جنت
يتلمس ويبوس ما ابعده المهم اخذ المقابل
حتى اصير مثل مسار ما ناقصني شيء..

-امي خطية بقت بحيره ودائما تسالني منين
هاي الغراض وليش تاخذينهن واني اتحجج
قديمات وانطتهن الي مسار وهي حبابه وهيج
اسكت امي اخاف منها بس هي جانت ما تقبل
وتاخذهن تذبهن الملابس تكصهم( قص) خوف
عليه وانو ما امد ايدي ولا اخذ شيء مو الي..

-بس اني بعد مشيت بهذا الطريق طلعت
من البيت امي تبجي وتتوسلني بس بعد انحرفت تعلمت على حياة الترافة وامي ما بيدها شيء تسوي وتالي  طلعت حتى خاله مشتركة بهل شي والسبب تخلي براس زوجها انو هو مقصر عليها حارمها من حقها الشرعي وما ينطيها مصرف
وعلمود الفلوس مشن بهذا الدرب القذر..

-ضعت وياهن وجانت ام مسار تملك بيت
جبير وسيارات الفلوس عمت عينهن جرني وياهن بعدها اخذوا عذريتي مقابلها تعيين وشقة استقر بيها بس امي فرفحت عليه واني بعد وين
يا امي ضعت وياهن شرفي واخذوا واحنا
نعمينه بالفلوس الي تجينا ضاع شرفي كله
على الفلوس الي تغوينا وكلما حصلنا اكثر
غركنا بالحرام والقذارة اكثر..

-سرى ضالة مصدومة وما مصدكة الي
تسمعه منها وذيج ضالة تبجي.. وكملها عليه
الي اخذ عذريتي ما اكتفه بس هو ضل يدخل عليه اصدقاءه واني لا حول ولا قوة بعد بيدي سلمت
امري الهم وصرت قذرة مثلهم
ما اعرف سرى ما اعرف ابجي على ضياعي لو ابجي من كمية الإذيه انتهيت اني..

-عيوني عليها بصدمة.. كمت عنها ولج
تصورتج من عائلة منفتحة
تطبين وتطلعين هم كلت عادي
بس شلون هيج ولج لعد شلون ردتي توكعينه بمصيبة شمسويتلج اني وهيج تفترين وراي ولج
شنو انتي واني الغبية اكلج اساعدج ولج
انتي حتى الحرك قليل بيج شلون هيج التفيتي
عليه اني وخواتي..

-هي حجت وتمسح بدموعها.. مو بيدي ولج كله من خالتي تنك عليه.. جيبي بنات بلكت تقشمرين صديقاتج وتغريهن علمود دخلنه يصعد لان كل ما تحصل بنات اكثر
كلما تحصل فلوس اكثر..

-الله لا يوفقجن هيج بكل سهولة تاجرن بالبنات
وتوكعن بيهن يعني ذني الشفناهن  خالتج وحماتها وبتها شنو من عائلة قذرة ساعة السودة
الي داومتي هنا وشفتج بيها الله لا يوفقجن احجي
وياها وهي مستمرة تبجي..

-اي ذني خالتي وحماتها وبنتها  سرى هذا اخر  يوم اجي وتشوفيني بي اني ناوية اشرد بس وين
ما اعرف بعد ما اكدر ابقى بلكي اكدر اطلع خارج العراق بعد ما اكدر ابقى هنا خايفه اني
سرى..

-ليش تشردين مو الفلوس وحياة ال****  حبيتيها وضيعتي روحج وردتي تضيعني وياج
مو دخلتيها برضاج بعد على شنو خايفة شكلتي
لنفسج من تورطين بنات شابات بهيج طريق
بعديش خايفة ولج حتى نفسي لعبت منج..

-هي جاوبت بضياع.. مو مسار جماعة طالعيلها بالطريق برجعتها البيتها بالليل وكاطعين عليها الطريق ومفجرين راسها بالطلق نفس اليوم امها كاتليها بيتها ومثلين بجثتها..

-سرى بخوف.. ولجن شنو انتن انتي شمدريج ومنو الي كتلها..

-ما ادري جماعة بوقتها رحت الخالتي وما قبلو يسوون  فاتحة الهن من فضيحتهن اني من خوفي حجيت ويا خاله اريدها  تترك هل طريق لان اكيد الدور النا اكيد من كتلوهن راح يفترون
علينا  بس هي جاوبتني وكل ندم وخوف
ما عدها.. اريد أعوض هل نقص الي بداخلي
اشو رجلي يجي كبل ويلف راسه وينام مو مثلهم محد يكتلنا لا تخافين ذنيج اكيد سوون شيء..

-كم يوم فزيت على صريخ خالة كمت واشوفه
زوجها حارك وجهه اجه عليه ووجه محتقن ويخوف ضربته على راسه وشردت واخذت
خالة وياي خلصتها منه بس ما نخلص منهم
الا نطلع للخارج وهالشيء مخوفني..

-رفعت اصبعي بوجهه بتهديد.. لج شوفي
اذا اتقربتي مني لومن خواتي افضحج
وترى هاي اختي زوجها بالاستخبارات يعني بسهولة يطيح حظكم ويفنيكم وعساني لا شفتج
ولا عرفتج وين تولين من الله..

-خايفة ريا حتى دوامي صار كم يوم اطلع
ولازمه كلبي بيدي اخاف يصير شيء تعبت
وحجيت الج..

-ما ادري سرى لا تداومين كم يوم خلي
تولي وارجعي لا تسويلج شيء منين طلعتنا
هالسالفة ولج حتى ما اكدر احجي لاسر يخلص
عليه بس احجي هو سالفة الروضة وعاقبني
عليها عقاب ندمني بس يسمع هيج ينهيني
وما استبعد حتى من بناتي يحرمني
المهم ديري بالج على نفسج وخلي تولي هاي..

-سديته من سرى واني خوفي اكثر منها
والي سمعته منها صدمني بحيث احس فصلت
عن العالم الله ستر بذاك اليوم وكدرنا نطلع
جان هسه حالنا مثلها مجرد تفكيري بهالشيء
احس كلبي يوكف والخوف يتمكن مني
يارب خلصنا من هالمصيبة والله لا عمر ولا اسر
يرحمون بينا هالمرة اذا عرفوا..

-اتصل عليه اسر جاوبته هو كال.. وينج ويامن
تحجين شكد دكيت..

-تنهدت وحجيت عكس الخوف الي بداخلي.. جنت احجي ويا سرى هو كال خير احد غاثج..

-لا حبيبي محد وياي حجه شوي وسده واني
تفكيري ذبحني يارب استرنا كرهت حتى
روحي من وره هالطلعة عساني لا خطيت
لذاك لمكان اذا عرف يذبحني..

سرى..

-يوم عن يوم الخوف والقلق يزيد عندي
لدرجة اروح للدوام وما امن على نفسي ولا
على حياتي صح شهد ابتعدت وصار كم يوم
ما مداومة بس يبقى خوف بداخلي منها
وما نسيت الكلام الي كالته بحيث ليل نهار
تفكيري بيها وبحياتها وشلون رادت تسحبني
وياها لطريق مظلم تندمت على ثقتي الزايدة
ياما جانت ريا تنصحني بس والله ما جنت
متوقعة كل هذا يطلع منها..

-بيوم ما جنت مداومة الصبح ندك الباب
جنت بس اني وماما بالبيت طلعت ماما 
تشوف منو و ننصدم بدوريه جايه على بيتنا وطالبيني بالاسم بحيث كايليلها هذا بيت الصيدلانيه سرى  ماما كالت
الهم اي بس خير على شنو جايين
جان جوابهم.. طالبين شهادتها بالمركز..

-ماما اجتني ترجف وتضرب على خدودها
ولج شمسوية والشرطة جاية عليج يمعزاية
ولج عمر وفارس زلم مشوربة وما سوو سوايتج..

-الصدمة احتلتني ونزلت دمعتي.. والله ما مسويه شيء شرطة شنو ردت اطلع بس خفت فكرت
يمكن ناطية علاج غلط بس ما اتوقع
اجه على بالي الضابط بس هو
الي راح يوكفلي ركضت دكيت عليه من حجيت اله وكتله شرطة بالباب عبالك سبيته ضل
يصيح عليه وما تروحين وياهم انتي شايفة
المركز والي بي تردين حضج يطيح ما تطلعين حاولن تاخرنهم والباقي عليه..

-بجيت بقلة حيرة شلون علي شلون وهم
طالبيني بالاسم الحكلي فدوه الله يخليك  والله ما مسوية شيء اذا اخوية اجه وشافهم يذبحني..

-هو صاح.. سرى روحي اساليهم وخليهم
يشوفونج الورقة التثبت بيها مطلوب شهادتج واريدج بس تقرين توقيع ياضابط ركزيلي
على اسمه وكليلهم بس يجي والدي يلا اتحرك ضيعي الوكت بين ما اتصرف ما اريد غباء
سوي الي كتلج عليه وحضج اطيحه اذا
رحتي وياهم هناك ****..

-سديته منه لان جان معصب وكل شيء يحجي
حجيت مثل ما كال ودزيت اله اسم الضابط  فعلا تقريبا اكثر من عشر دقايق بين ما حجينه
وياهم وماما تتوسل بس خلي يجي ابوها
وبنتي ما مسوية شيء ما تروح وحدها
الدوريه اجاهم إتصال يرجعون وراحوا من يم بيتنا..

-دخلت وماما ترجف وتضرب على وجهه..
تالي عمري الشرطة تجي على بناتي لج
اححي شمصخمة..

-بجيت وبعدما نزلت تحقيق وياي حجيت الها
كل شيء يخص شهد وشلون تعرفت عليها
بس من رحنا للشقه ما حجيت خفت ماما
تفلتها ويوكعن بيها ريا ونورهان بس سولفت
الها عن شهد وشلون ابوها هيج قذر وهي
شلون انجرفت بهالطريق لان الي عرفته
منهم يردون اقوالنا بخصوص شهد الي صار
الها كم يوم مختفيه لهذا طالبين الي الي متصله
بيهم خلال اليومين الاخيرة ومن سوء حضي
المصخم هي جانت تتصل عليه رغم ابتعدت
عنها وما اجاوبها..

-حسيت ماما راح تنجلط كوه هديتها وحلفت
الها ماكو شيء واني ما عندي علاقة بيها
هي رزلتني وحجت خليتها تحجي جنت مستحقة كل كلمة كالتها لان ما تستاهل امي هيج اسوي
بيها واثق بهيج ناس رغم كل شيء هي جانت
حريصة علينا كلش بس والله ما جنت اعرف
بشهد الهالدرجة واصلة..

-كم يوم عشتها بقلق الله لا يشوفه لعدوي
منا ماما الي ترزل ومنا علي الي بس يصيح
وبنفسه تكفلني اتصل عليه وانصدمت من
كال.. هاي صديقتج لزموها بتهمة قتل
والي قاتلته ابوها..

-شنو الصدمة الي انصدمتها لو الرجفة
الي احتلت جسمي من بعد كل الي حجته الي
وخلتني الليل ما انامه نوب تطلع مجرمة
شبعت بجي هو صاح.. صوت ما اسمع
وراح اجي عليج من الدوام وتطلعين وياي
بنفسي اخذ اقوالج..

-شوي واجه عليه طلعت ويا جان عصبي نار اول ما صعدت رفع ايده واستقرت على خدي
بقوة فتحت عيوني عليه مصدومة منو هو
وهيج يضربني ردت انزل ما خلاني ما اريد منيته عليه اني ما مسويه شيء واكيد الاغلبية من
حققوا وياهم حالهم حالي هو تنهد بقهر..

-وبدا يسالني ويحقق اخذ اقوالي بنفسه
ما قبل رجلي تخطي باب المركز نزلت منه مهظومة ومقهورة الله لا ينطيج يا شهد
على الموقف الي خلتني بي ساعة السودة الي اجيتي بيها وفكرت اصادقج..

-بعد فترة سمعت من علي انو شهد نحكمت 15 سنه وامها واختها تركوا بيتهم وهجوا واخوها
ماخذينه عمامه..

-هو رزلني كال منين تعرفين هيج شكولات
ضجت كلها ترزل وتحجي اني شمدريني هي
هيج حجيت اله كل شيء هو كال اي صح
ابوها كلب ويستاهل لان اختها شهدت وحجت
هي وامها عنه..

-والي فهمته من علي انو شهد داخله للبيت
وسامعة صراخ امها واختها وشايفتهم يدفعون
بابوها بس حتى يخلصون الولد الي جوا
والي جان ابوه مجردة حتى من ملابسه امها جان بيدها سجينه وجارحه  الاب وشهد من شايفه منظر اخوها الي يون جوه ابوه ماخذه السجينه كاتله ابوها وشاردة..

-بجيت من سمعته هيج حجه وهو جان يحجي
بعصبية ويسب بابوها لان هو السبب تنهدت
واجه على بالي فارس الحمد لله من كدرنا
نعالجة الله يبعد هالسم عنا ويسترنا لان الي
يدمن عليه يسوي اشياء ينافس ابليس بيها..

-من هذا اليوم انتهت سالفة شهد رغم جنت
بخوف بس الي طمني وكفه علي وياي
اهلي ما عرفوا التفاصيل لان جان كل ضنهم
سوء فهم وعلمود الادوية والاغلبية حققوا وياهم
ماما سدتها كالت من الباب وراحوا لان هي
اصلا ما جانت مداومة بس هالسالفة ما انسدت
عندي خلتني انتبه للناس صرت اخاف من
كل صديقة واحسب حساب الها بحيث ايام
مرت واني هالحادثة ما تروح من بالي..

ريا..

-من بعد كل هالسنين الي عشتها ويا اسر
رغم المر والذل الي شفته منه بداية زواجي
بس من بعد هالسنين اسر تغير كلش وهالشيء
جنت التمسه بتصرفاته صرت قريبة منه
لدرجة يشاركني بكل خطوة يخطيها صار تفكيره
بعائلته وبناته اكثر بهواي من قبل البنات كبرن
وبسنه 2016 صار عمر مهرة 9 وريا 8
فرحته بيهن جبيرة بحيث دراسة يكعد بنفسه يتابع
دروسهن بالليل قبل لا ينام يروح يمهن يسولف
وياهن صار الهن اب وصديق واني جنت
دائما اسعى بس حتى بناتي ما يصيرن مثلي
اريدهن شخصيتهن قوية..

-طلع من الحمام ينشف بشعره جنت واكفه
يمه.. نعيما..

-الله ينعم عليج وين البنات عندي حجي وياهن
اخذ ايدي ورحنا يمهن كعد وخلاهن
يمه وحدة منا وحدة منا ويبوس بيهن سالهن
على دراستهن بعدها حجه وياهن عن الحجاب
وشلون يبعد العيون عنهن وكالهن اريد احجبجن
هنا مهرة اعترضت.. بس بابا والله بعدنا صغار
مو هسه حباب اني ما اريد اتحجب هسه..

-ليش بابا شبي الحجاب هذا ستر الج.. هي
باوعت عليه ورجعت حجت ويا بابا ما اريد
هسه اتحجب والله بعدني صغيرة حباب بس
اكبر شوي البسه هو باس راسها وكام..

-رحت وراه.. اسر فدوه ما اريد بناتي ينجبرن
على شيء خليهن هسه بعدهن صغار من شوي
يكبرن نحجبهن..

-بابا هذا ستر الهن ولا تخافين طول ما الله
كاتبلي عمر ما اخليهن ينجبرن على شيء
روحي ذني والله..

-لعد واني حجيت بدلع هو ابتسم.. انتي روحي..

-رجعنا يمهن هو سد الموضوع ورجع يدرسهن تذكرت من سجلهن شكد فرح بيهن الدنيا
ما واسعته خلاهن مدارس خاصة وصار بيده ياخذهن ومن هو ماكو خط تعب عليهن حيل
كل وقت فراغ يكعد يمهن و يعلمهن ويحجي
وياهن وهو يطب ويطلع بناتي وبناتي خابص
الدنيا بيهن وهالشيء كلش يفرحني وادعي
من ربي تبقى هيج حياتنا حلوة وهادئة..

-التفت عليه.. باجر عازمكم بمكان تغيرون
جو وهم البنات يتونسن..

-ما اروح اني حجيتها هو عقد حاجبه.. ليش يابه
ما تروحين؟!..

-اسر ما اريد البس عبايه ضجت منها مكبرتني حباب خليني ارجع على لبسي والله كله مستور حجيت ردت بس هو قافل زعلت وتمسكنت
عليه هو صاح.. ادبسز بس ما يهون عليه
ازعلج ريا لبس مستور لو صايات اشوف
غيرهن ارجعج عليها..

-فرحت بسته بخده.. احبك هواي لعد اروح..

-هو ضحك.. مو اكلج ادبسز هسه صار بيها
اروح..

-كمت عنه وهو يضحك رحت للغرفة
حضرت ملابس النا وللبنات اجه وراي
اخذني لحضنه وسد الكنتور وهو يهمس بشوكه
ولهفته اخذني للجرباية وهو يتفنن بحبه بكل
لهفه وحنيه..

-ثاني يوم كعدنا الظهر باس خشمي.. يلا ورانا طريق..

-ليش وين رايحين.. هو كال صديقي عازمني يمهم بالحلة بمزارعهم..

-ترددت اروح مو طبعي الاختلاط استحي حتى اجامل الناس من كتله هيج هو كال.. معليج اني احجي بمكانج هو انتي بس شوفيهم وعود كولي ما اروح غير نفسيتج كلها تتغير وترى مو وحدج راح تروحين خابرت مهاب يجيب نورهان
ويجون ويانا..

-من سمعت ويايه نورهان ارتاحيت اتحضرنا من شافنا كاشخات استغفر وحجه بعصبيه.. مهره بابا شلابسه ترى عيب هناك شيوخ ينتقدون شنو
هالبنطرون..

-هي ردت عليه بهدوء عكس غضبه.. بابا هسه اغيره واجي..

-اني ضجت ما احب يعيشون مأساتي من عمر جان محاربني.. اسر لبسها عادي هو صاح
عادي بنطرون مفروض انتي تنتبهين
عفته لا تصير مشكلة مالي خلك هي راحت لبست جاكيت خفيف واجتي هو باسها وعفيه بنيتي
الي تسمع الكلام..

-طلعنا واخذنا مهاب ونورهان ويانا
وهو وخالة خلصوا الطريق تحشيش وصلنا اتلكونه ملكه شيوخ بترحيبهم وضيافتهم بناتهم يخبلن وملكاهن بعد احلى..

-الزلم بالديوان واحنا رحنا جوا يمهن
شوي ومدن السفرة واكلهم من شكله وتنوعه يشهي استحينه ناكل رغم اني قصتي ويا الأكل قصة عشق التفت على نورهان.. هسه شصار
لو يعوفونه وحدنه جان نسفت الصواني
بس شو استحي كدامهن..

-بما انو اختي طالعة على رجلها السانهم
يغرد خجلتني كدامهن من كالت بضحكة.. ريا اكلي حبيبتي ليش مستحيه اعرفج متقاومين..

-ضليت اوزع ابتسامات و النسوان ضلن يجيبن يخلن كدامي عبالهن ام بطن واكلي وهذا طيب
واني حتى شهيتي انسدت من الخجل باوعت
عليها و اتحلفت بيها..

-العصريه طلعونا على مزارعهم تجنن
مبين تعبانيين هواي عليهن اسر اجه يمي.. مرتاحه حبيبتي تونستي..

-اي يجنن المكان حياتهم حلوة وبسيطة..

-اذا اشتري بيت هنا تتحملين تكعدين حجاها واني كتله.. لا طبعا ما اتحمل كل أحبابي هناك
شعدنا وحدنا هنا..

-هو عض على شفته.. ادبسز لعد اني مو من احبابج..

-انت النفس لريا بس ما متعلمين هنا اسر
ذول حياتهم وصارلهم سنين متعلمين عليها
هو كال امشي ام لسان..

-افترينا ومتعنا نظرنا بالجمال ما قبلوا
الا نتعشه يلا نطلع حضروا الشوي وانجمعوا
للمغرب حضرو العشه للوحدة بليل طلعنا منهم بالطريق صحت على مهاب هو التفت عليه.. هاي شبيك اختي ماتوكلها نسفت الصواني عبالك مشايفه هو ابتسم.. يمعوده اختج بقيت بس
اني ما اكلتني خايف على روحي منها هي
فرتها عليه واسر انتهى من الضحك وكل شوي
وصاح ام بطن وهذا جان من الايام الحلوة
بحياتنا تونسنا بشكل..

-رغم الراحة بس اكيد ما نخلى من المشاكل
لان خبث ام دنو ميخلص بس اني لخاطر
اسر ما معبرتها رغم هي كم مرة تصعد عصرية
لو تاخذ اسر وتبسبس عود تضوجني لو تسمعني
كلام بس بتجاهلي الها بردت راسي..

-بعد اسبوع اسر صادف بالدوام بهاليوم
ما نسمع غير تفتيش بالمنطقة أسر عنده سلاح وأوراق مهمه خفت عليهن خفت لا عنده شيء
خاص اتصلت عليه وكتله راح يفتشون
هو كال.. ممنوع تفتحين الباب وعباتج حتى وجهج تضمي اموتج اذا طلعتي وهسه اصعد ام دنو يمج..

-اجتي يمي المسمومة حجت بشماته.. حبيبي اسر خابرني كال مااثق بريا هاي فاهيه ما تدبرها اصعدي انتي لملمي اوراقي....

يتبع....

حبايبي اقتربنا من النهاية وهذا بارت طويل
وان شاء الله ما باقي غير كم بارت للنهاية
واحبكم..

اللهم صل على محمد وال محمد❤️