اسيرة قدرك

البارت 76

اسيرة قدرك..
بقلمي رسل..
البارت السادس والسبعون..
واتباد rasolaa7

تونی ردت اغفه اعله طولك
صاحت الوادم خذاه..

-مرت الاشهر وحالنا هواي احسن من بعد ما
رجعت احس بمهاب مختلف كلش و يعبر عن اعتذاره بافعاله وحنيته صار يهتم بيه كدر
يكسر الحاجز الي بينا الي صار بسبب المشكلة
الي سببنها خالاته بس الحمد لله كدرت اتقبله
وارجع لحضنه كل واحد منا يغلط والمهم
الي يتعض من غلطه وهالشيء جان واضح
من تصرفات مهاب وياي..

-خلصت فترة حملي وقرب موعد ولادتي ومهاب حاير بيه من دكتورة الدكتورة يحاول اجيب طبيعي لان يخاف عليه من العملية بس مستحيل وكل طبيبه ترفض لان عندي مشاكل جانت بحملي لازم عملية..

-جهزت كل شيء  احتاجه رحنا للمستشفى وخوفه عليه مبين على ملامحه لازم ايدي
ويهدي بيه بقى حاضني ويدعيلي تكومين بسلامة نفسيتي متكئبه جنت وخايفه وصيته وهو
خطية القلق محتله دخلت العملية واخر شيء
اتذكره كلامه وشلون يوصي بيه وبعد  ما اعرف  الي صار بنجوني ودخلت بغير عالم..

-فتحت عيني واني ألم ذابحني من بطني وما
اعرف شحجي بس احس بمهاب واكف فوك راسي ويبوس بيه ويحجي وياي بصوت مخنوك..

-كم ساعة فكيت من البنج طلبت شوفة جهالي كلبي مفرفح ذوله تعب سنين يلا صاروا
اريد اشوفهم اريد تكمل فرحتي واخليهم بحضني
واخلي عيني تتكحل بشوفت معانيهم..

-مهاب جاوبني بس حسيته مهموم وصاير شيء.. ما يصير حبيبتي بعدين تشوفينهم لازم يخلوهم بالخدج..

-قفلت الا اشوفهم كلبي ما جان مرتاح حسيت طفل من التوم ميت ويخافون يكولون قفلت ماكو الا اشوفهم ردت اكوم مهاب كعدني والتفت
على امه.. يمه جيبليها فضل خلي تشوفه..

-ومنسه هم جيبوها اريد اشوفها حجيتها
وحسيت عليهم ارتبكوا وما يعرفون شنو يحجون
اني اطلبها وهم واحد صافن على الثاني بقلق
صحت بيهم.. اكيد ميته مو احجوا بنتي
شبيها لا توكعون كلبي مهاب احجي فدوه
بنتي ميته مو؟!..

-هم حجوا بقهر.. لا والله بس طلعت تعبانه
وما نكدر نجيبها..

-حلفتهم شبيها وبعد إصرار مني هم
كالوا.. فضل ما بي شيء الحمد لله بس الطفلة مشوهه..

-نسيت الم العملية ونسيت حالي الكلمة نزلت
كفخة على راسي ضربت على وجهي وابجي بحركة.. شبيها بنيتي شبيها احجولي فدوه..

-مهاب كوه حجه العبرة خانكته.. بس اهدي
يا عيني مو زين عليج والطفلة من خشمها لراسها منشوف شكل بس زراك وراسها متأذي منفوخ وبعدهم ما مشخصين حالتها..

-كمت اناشغ فرحتي كلها تلاشت من سمعت بحال بنتي جابولي فضل وفدوه الل الله ابيض و
سمين بقيت ابوس بي واشم بريحته مكدرت ارضعه جنت متوجعة اخذوا واني الوب على
بنيتي بس الي شوي صبرني شوفت فضل حبيببي..

-ثاني يوم  اجت ريا جابها يمي اسر شوي
وطلعنا مهاب ساندني ويمشي صعدت بالسيارة
راجعه وبنتي مو ويايه مقهورة كلش ماخذيها مستشفى اطفال وسرى نايمة بيها رجعت للبيت مالي خلك شيء ماما اتلكتني ومرت اخويه
مددت  جابولي اكل مكدرت اكل مالي نفس
اكل وبنتي لا شايفتها ولا اعرف شبيها..

-مهاب بالغصب وكلني  شوربه عيني عليه
وجهه اصفر مبين تعبان ومنايم مر هذا اليوم وهمه يغصبوني غصب  ارضع ابني يخلونه  يمي واني ابعده مني بالي يم منسه ردت افرح
بيهم اثنينهم بس ما صارت حسيت روحي
يمها بس جسد هنا..

-مهاب بات يمي خطية جان منتهي من التعب
وهم مقهور على الطفلة وريا سهرانه على
فضل تسويله ممه ومن يبجي تكومله
يتوسلون بس شويه رضعي ويخلوا  يم صدري ادفعه خمس ايام مرت ويومية ابجي من وجع بطني وافكر بنتي بالي كله يمها..

-مهاب انتهى من التعب من البيت للمستشفى يروح السرى نقسم نصين بيني وبين بنته اتوسل بمهاب يأخذني بس ما يقبل لان بصعوبة
امشي من عمليتي بس من كد ما كلبي يمها
اتوسل بيهم اريد بس اشوفها وارتاح..

-مهاب ذبح قربان وسوو عشه للأمام وعزمنا كم نفر من كرايبنا وصديقتي وامها اجوي وبدت تتوافد الخطاطير عليه هو  بس جاب الذبيحة
وراح يم الطفلة..

-لليل دخل عليه وبيده باقة ورد وعلبة ذهب كعد يمي باس راسي وقدمها الي فتحتها واشوف
شلون صايغ اسماء فرحتنا فضل ومنسه
بشكل كلش حلو..

-ابتسمت ابتسامة غصب مالي نفس بشيء
واعرف بحاله اصعب من حالي بس يغيرلي
جو بقى يمي ويهدي بيه..

-حبيبتي كولي يالله ان شاء الله كم يوم
وتطلع بتج وداعتج حالها شوي  احسن وراح اعرضها على طبيب اختصاص وان شاء الله ترجع طبيعي الدكتور  شوي برد كلبي
من كال هذا مو تشوه وإنما اكو مشكلة بأعصاب الدماغ..

-حجيت بلهفه.. مهاب تحجي صدك لو تهديني..

-وعيونج بس كولي يالله وعلى كيفج ويا نفسج..

-فرحت شوي ودعيت ربي يشافيها
كم يوم وجابوها للبيت من شفتها ردت اتقيء ما
اعرف شصابني يارب هاي شنو البنية راسها
يخوف بقيت ابجي ومهاب يهدي بيه
انتهيت للعصر اصريت على مهاب.. الا اروح وياك للطبيب اشوف وضعها  عاندت ما اعوف بنتي شكد قنع بيه مهاب بس بعد اني قفلت
من شافوا حالي اخذوني كوه امشي لازمة عمليتي ومهاب حاير بيه وسرى بطفلة واختي ويانه  دخلنا و بعد الفحص اطمنت بنفسي من اكد الطبيب انو هذا مو تشوه الحمد لله..

-شهر مر علينا بتعب مدارات وسهر وتمارين الراس بنتي من بعد كل هذا التعب رجعت بنتي فدوه لجمالها تعالجت صح جان تعب علينه
بس كل هذا التعب هان من شفناها بصحة..

-طول هل فترة عند اهلي بعد الأربعين رجعت بس احس نفس على جهالي وما جاي يرتاحون خالاته المهاب يطلبن صور يشوفن الجهال واني اصير نار عبالهن نسيت الي سونه بيه
ما قبلت احد يدز صورهم سمر وناز ابد ما
اخليهم ياخذون  صور لان اعرف هن على تواصل وياهن مهاب ميعترض يكول براحتج..

-اليوم صار عمر جهالي اربع اشهر طول
هاي الاشهر ضافوا لحياتنا طعم وروح
بالبيت حياتنا كلش هاديه اني ومهاب وفرحتنا
كملت بيهم وبالأخص من نكعد الصبح
على صوتهم الي خله روح بالبيت..

-اجه عليه كال عندي  قضية ببابل يوم واحد وارجع باوعت عليه بخوف هو ابتسم كال
وعيونج قضية ما اريد اشوف هالنظرة منج
وخلي اخذج يم اهلج ما اريد بالي يضل يمكم..

-ماعليه شيء خليني هنا واذا احتاج شيء
اتصل على عمه اسد بابي واكعد اني وجهالي..

-قنعته كال براحتج كمت حضرت غراضه جانت شتاء والجو بارد جان يلبس اجيت عليه..حبيبي بارده عليك البس بلوز..

-حضني..تعاي دفيني شسوي بالبلوز وباس
شفتي نورهان ديري بالج عليهم وان شاء الله
اني باجر يمكم..

-راح على الجهال يبوس بيهم ويشمشم
يتخبل عليهم كعدت يمه.. هيج تحبهم؟!..

-خبله انتي لج ذوله مصدر سعادتي ما اعرف شوصفهم الج ذول فرحتي..

-حجيت بزعل مصطنع.. لعد اني شنو اذا
ذول فرحتك ها بسرعة اخذوا مكاني..

-باسني بقوة.. انتي  يعجز الوصف عنج احبج
حب يختلف عن الكل..

-ودعنه وراح سديت الباب ورجعت
علكت الصوبه وكعدتهم قريب عليها كلت خلي اوكلهم شويه اعود معدتهم سويت سيريلاك وبتيته سلك اجيت لكيت منوس نايمة بس فضل
بديت اوكله حسيت نفسي كثرتله اكل لان شفته يريد يتقيئ كمت غسلتله ورجعت الاعبه
وحبيبي جان مكيف..

-ساعتين ودك مهاب يطمن كتله سلامتك حبيبي من توصل دزلي مسج هو كال ميخالف بس
عينج على الجهال..

-جهالي نامو بقيت اتصفح الى ان غفيت
بهاي الاثناء حسيت عبالك واحد خنكني اريد اتنفس ماكو شح الهوا مهاب وجهالي كبالي بس بينه جرف يفصلنه  ابني شكله عبالك ملاك اريد بس اوصل الهم ما اكدر اتقربت
عليهم بس ما وصلت الهم وكعت من مكان عالي كلش بقيت احرك بيدي اريد مهاب يلزمني
قبل لا يجي عليه فزيت كمت على حيلي
وكلبي يدك اعوذ بالله شنو من حلم..

-جهالي فارشتلهم بالاستقبال يمي بقيت استغفر خفت على مهاب وضل بالي يمه كمت اشوف الجهال تقربت على فضل واشوف ابني ينتفض ارتبكت خليت ايدي عليه وعبالك دخلت ايدي بنص بركان من كد ما حرارته مرتفعة شلته ورحت اغسله وابجي لان  ما اعرف شسوي واني وحدي شوي وابني انتهى ذبل بيدي اباوع لعيونه البؤبؤ اختفى صارت عبارة عن بياض ويرمش اختنك بقى يتقيء اني شفته هيج تخبلت اصرخ بكل صوتي كلت مات ابني اخذته وركضت..

-فتحت الباب وطلعت بالشارع مثل المخبلة  اركض بدون حجاب وبلبس البيت وابني بين
ايدي منتهي  اصرخ وابجي الجيران طلعت على صوتي حاضنته واركض بي بشارع جان الجو بارد وهو حبيبي بدون غطا  بس ملابسه
على جسمه بس اريد اوصل لعيالي عبالك
صار الطريق شطولة العالم تريد توكفني متكدر مستمرة بالركض حافيه نسيت بيتي وبنتي عيالي بعد كم فرع عني وصلتلهم فلشت الباب
وابجي موقف يمكن عدوي ينقهر وتنزل دموعه عليه لو شافني هيج..

-طلعوا و انصدمو من وضعي فضل لاحس ولا نفس مجرد جسد هزيل وحاضنته  صحت
على زيد.. أخذني ابني مات ولكم راح
يروح من ايدي..

-هو خطية نهبط  ركض جاب السويج
عمتي اجتي تبجي و تصيح بعلو صوتها على سمر تجيب غطا للطفل وعبايه الي باوعت 
لناز وتذكرت بنتي..  بنتي عفيه روحوا عليها
بنتي وحدها..

-رحت للسيارة ارجف شايله ابني حافيه ام مهاب رادت تأخذه مني جلبت بي آخر شي سحبته
مني كالت ولج جيبي خانكته بحضنج..

-طول الطريق دموعي ما نشفت وادعي
الله يحفظلي ابني وصلنا للمستشفى زيد
اخذه وركض بي دخلوا للطوارئ و الدكتور يتعيقل علينا واحنا منا مفرفحين زيد
ضل يصيح عليهم  بكل صوته اجه
دكتور والتمو الممرضين فحصوا خلوله اوكسجين كالو عايش بس نبضه ضعيف وان شاء
الله نلحك عليه..

-اني بعد انتهيت هالهبطه هدت حيلي
كعدت بالكاع وحالتي حاله جانت اكو ممرضة كبالي وعينها عليه اجت على زيد واسمعها
تكله هذي امة للطفل؟!..

-هو كاللها بقهر..  اي امه وهالطفل اجاها بعد سنين قهر هي حسيتها انقهرت طمنتنه
وضلت كل شوي تدخل على ابني  شكلوله مغذي من الإبرة بجه من سمعت صوته كعدت بالكاع الحمدلله من سمعت صوت بجيته ضليت اردد
الحمد لله لان جنت مايسه على حالة الي شفته
بيها..

-كالوا باجر نقرر وضعه الظاهر الصخونه ضربت عضو بالجسم وهسه يحق بس ثنين مرافقين يبقون بقينا اني وعمتي وزيد كال اي شيء تحتاجون اني بره..

-بقيت ادعي وانخه مكابلته اكول يارب برد كلبي يارب لا تاخذه مني بعدما تعلقت بي اباوع عليه الرموش كثيفه وطويلة ومبلله من دموعه وجهه  ابيض وعباره عن خدود
انتفضت ودموعي تصب.. هل وجه لو غاب اموت ما اتحمل يصير عليه شيء
عيني ما غفت  لحضه..

-الصبح دخلوا علينا سرى وزيد والطبيب بس شافتني بجت عليه حضنتها.. سرى فضل تعبان
سرى فدوه سوو اي شيء ما اريد اخسر ابني
ما شفتي شلون انتهى بين ايدي البارحة احجي
وهي تبجي وياي..

-حولوا على فحص الراس رغم رادو يعرفون بدون اشعاع لان طفل بس الطبيب كال مستحيل تتوضح لازم وطلب فحص يسحبون من ظهره اخاف الصخونة  مسببه عنده إصابة بفد مكان اباوع لروحي الي مدد على بطنه سحبوا سائل بأبرة جبيرة من ظهره وجن سحبوا روحي
هذا قطعة مني ما اكدر اشوفه بهالحال..

-دموعي غركتني كالوا ساعة تطلع التقارير سرى تركض منا ومنا على الاطباء اجه
زيد كال مهاب يريدج الظاهر البنات انطنه علم..

-ما كدرت احجي ويا ما جان يطلع مني
غير بس شهكاتي هو جان منهار وبس يصيح  شصار نورهان فضل شبي يريد بس
اطمنه واني ما كدرت اختنكت بدموعي وهو
منا يصيح ذبيت الجهاز على عمتي وهي حجت
ويا..

-مرت الساعة وخذت من عمري وحيلي
يلا مرت رحنا كالوا بعد نص ساعة يعني اقسم بالله حرب اعصاب مو مستشفيات زيد عدنه يفوق مهاب بالاعصاب ضل يصيح عليهم ولا تلعبون باعصابنا احجوا الطفل شبي ما تشفون
امه راح تموت انتم شنو ما عدكم احساس..

-المراجعين طلعوا على صوته سرى راحت
حجت ويا الممرض ربع ساعة انطونه التقرير أخذنا للطبيب هو كال عنده ضمور بالدماغ كتبوله منام مدة اسبوع..

-كم ساعة اجا مهاب حبيبي بس الله الي يعلم
شكد باجي العيون دم من شفته انفجرت بجي
حضني وهاي حضنته اختصرت حروف اللغة
كلها من عبرته الي بداخلها ما كدر ينطق
بكلمة راح على فضل بقى يبوس بي وعينه عليه بقهر..

-راح على الدكتور رحت ويا سال على وضعه الطبيب طمنه كال الحمد لله جان اتسببله شيء اصعب الطفل جانت حرارته عالية لدرجة دخلته اغماء..

-مهاب بقى يسأل من شنو وليش اني متحملت اسكت.. دكتور وكلته سريلاك جان ثخين وبتيته سلك خليته ياكل زيادة بقى يلومني الطبيب هذا مو تصرف ام عاقله طفل عمره اشهر شلون
هيج..

مهاب سكته..  دكتور الحمدلله قدر الله وما شاء فعل قابل هي متقصده اترخص وطلعنا
شافني كلش انقهرت.. معليج انتي حبيبتي يجوز هو مريض من زمان خلي ندعيله لا تضلين
تلومين بروحج..

-ما ادري مهاب والله خايفه عليه.. تذكرت
الحلم وكلبي رجف بخوف مهاب..

-ها كلبي..

-حلمت حلم مو حلو ومن فزيت لكيت فضل
هيج حالته حجيتها هو صفن عليه حجيت الحلم
هو كال.. اش هذا حلم وراح تعالي وياي
اخذني وغسل وجهي ورجعنا يمهم..

-عمتي بقت تحجي عليه وتلوم ما حجيت
شيء لان حقها ومن حبها لأطفالي بس
هي ما سكتت ضلت تلوم بيه واني مو يمها
بالي يم الي هد حيلي بنومته هنا..

-مهاب كالها.. الخاطر الأنبياء عوفيها سكتي
كافي يعني جاي تشوفين وضعها يتحمل وتزيديها عليها بهذا كلامج لوما بعينج شفتيها شلون اجتكم
وابنها منتهي بيدها يمه وكت ملامه قابل هي تكرهه..

-التفت على زيد اخذ امي وروح خليها
ترتاح هنا تتعب..

-راحوا و سرى ما عافت فضل ابد كل شوي تتفقده بقينه على هذا الوضع خمس ايام بين فحوصات وعلاج اني مرة وحدة مهاب بتوسل أخذني ابدل وانام شويه وبسرعة رجعت
ما اكدر ارجع للبيت وابني مو وياي..

-ريا وسرى وياي ما عافني بس وضع ابني مجان يتحسن ابد بي وما يزيد ايده تزرفت من الابر
وحبيبي انتهى بهاي الكم يوم..

-كاعدين يمه اني وريا وعمتي ومهاب وام سجى
وننتظر رحمة الله  كم ساعة حال ابني صار أكثر من بقية الايام احتقن وجهه شفته زركه
تخبلت ومهاب يمه يفرك بيديه الصغار
وبصدره وحال مهاب يكسر الخاطر ايديه
ترجف من الخوف..

- سرى ركضت صاحت للطبيب اجه ركض مهاب اتلكاه يتوسل بي.. ابني فدوه راح يروح
سويله شيء الولد اختنك..

-التموا عليه الأطباء وصارت هوسه
شصار بحالي تمنيت ياخذون من عافيتي
ومن عمري ويخلونهن الابني كعدت للكاع
ابجي وانخي واحد حالة اتعس من الثاني..

-شوي سمعت كلام الطبيب الي وكف كلبي حسيت انتهت  حياتي متحملت عمق وجعها مهاب مو احسن مني حاله اسوء وبس صافن عليه والنظرات ما تتفسر الطبيب صاح على الي ويا بكلام جان اثقل من الحديد عليه.. الطفل مات توقف كلبه ..

-بعد ما تحملت اروح على ابني  واشوفه بهالحال ركضت بره بحديقة المستشفى ودموعي تصب مهاب اجه ورايه صارت عندي نوبة انهيار ام سجى طلعت وكلها تتباجه كعدت بالكاع مهاب كعد يمي حضني يفرك صدري اختنكت
كلش وبس شهكاتي الي تطلع..

-راح تموتين الخاطر الله كافي هذا امر
الله هو انطاه هو اخذه لا تهدين حيلي مو
والله نكسر ظهري يحجي ودموعه اكثر مني مخنوك وحالتنا تبجي العدو..

-رفعت راسي للسماء..  اللهي ليش انطيته الي وبعدين اخذته ليش خليتني اتعلق بي
ليش بعدما صرت ما احس بطعم الحياة اذا
ما اصبح  بضحكته ليش اخذته مني لوما
شايفتهم من البداية وباقيه محرومة ولا هاليوم
ياربي مو حمل هالشيء الضنا غالي يا ناس
غالي والله..

-مهاب حضني واحس بي يرجف يردون
بس يسكتوني لو يهدوني ما يكدرون
حيلي نهد وبس ابجي واردد باسم فضل
ما اتخيله يروح وبعدما اصبح بوجهه
ما اتخيله يروح وارجع للبيت من دونه
ما اكدر تعلمت على وجوده وياي ونيسي
هذا ما اتخيل حياتي بدونه..

-حسيت كلبي توقف ويا من بين صراخي
ونار كلبي حسيت اجاني صوتها وكلامها
الي جان مثل الثلج ونزل على صدري
الي النار شاعله بي..

-التفتنا كلنا على صوتها وهي تركض ومن
بين دموعها لمحت ابتسامة مطمنه
وتصيح.. ابنكم رجع كلبه ينبض ما مات
ولج نورهان ابنج عايش والله عايش....

يتبع....

من اصعب البارتات الي اكتبها والله
غلسوا على الاخطاء البارت بدون مراجعة..

اللهم صل على محمد وال محمد❤️