Chapter 50
" မင်း တစ်ချိန်လုံး အိမ်မှာပဲ ရှိနေခဲ့တာလား ယော့ဝန်း... ကိုယ်မင်းကို မင်းတို့ တိုက်အောက်မှာ စောင့်နေခဲ့တာ... "
Mcqueen က ခေါင်းငုံ့ကာ ပြောနေသည် ။
သူ့ပုံစံမှာ လူနှင့် အသိစိတ်တို့ မကပ်သည့်ပုံပင် ။
" အင်း... ဟုတ်တယ်... ကျွန်တော် Mcqueen ကို ဆက်သွယ်လို့ မရလို့ စိတ်ပူနေတာ... ဖုန်းဆက်တော့လည်း ဆက်မရဘူး... "
Mcqueen က သူ့ဖုန်းကို အိတ်ထဲက ထုတ်ပြီး ကြောင်တောင်တောင် ကြည့်နေလေသည် ။
" အိုး... ကိုယ့်ဖုန်း... ဟုတ်သားပဲ... တစ်ချိန်လုံး ဖုန်း အဝင်ကောလ်တွေ အများကြီး ဝင်ပြီး နောက်ဆုံး ဘက်ထရီပါ အားကုန်ပြီး ဖုန်းပိတ်သွားတာပဲ... "
Mcqueen က နွမ်းနယ်နေသော အပြုံးတို့ဖြင့် ပြုံးလာလေသည် ။
Mcqueen ၏ နွမ်းလျသော အပြုံးတို့ကို မြင်ရလျှင် ကျွန်တော့် ရင်ထဲ စိတ်မကောင်း ဖြစ်လိမ့်မည်ဟု မျှော်လင့်ခဲ့မိသည် ။
ထို့အပြင် သူ့ကို ဆက်သွယ်၍ မရသောကြောင့် စိတ်ပူမိခြင်းအပေါ် ကျွန်တော် Mcqueen ထံမှ ချီးကျူးမှုခံစားရလိမ့်မည်ဟု မျှော်လင့်ခဲ့မိသည် ။
သို့သော် ထူးဆန်းစွာပင် ကျွန်တော့်ရင်ထဲ၌ ဘာခံစားမှုမှ ဖြစ်မလာခဲ့ပေ ။
Mcqueen က အံကြိတ်လျက် ဖုန်းကို တင်းတင်း ဆုပ်ကိုင်ထားလေသည် ။
" အင်း... "
ကျွန်တော် အေးစက်စွာပင် ပြန်ဖြေလိုက်မိသည် ။
" မင်း ညစာ စားပြီးပြီလား ယော့ဝန်း... "
" မစားရသေးဘူး... "
အမှန်တော့ စားချင်စိတ် မရှိခြင်းသာ ။
" ဒါဆိုရင် ကိုယ်တို့ အပြင်ထွက်ပြီး သွားစားကြရအောင်... ကိုယ် မနက်ထဲက အခုထိ ဘာမှ မစားရသေးဘူး... ကိုယ် အတော်လေး ဗိုက်ဆာနေပြီ... "
ကျွန်တော် မငြင်းဘဲ Mcqueen အနောက်က တိတ်တဆိတ်လိုက်လျှောက်လာလိုက်မိသည် ။
ဆိုင်ထဲတွင် ထိုင်မိကြတော့ TV တွင် Mcqueen အကြောင်းက သတင်းထဲ ပါနေလေသည် ။
အိုး... ဘယ်နေရာရောက်ရောက် ဒီအရိပ်ကြီးက မလွတ်မြောက်နိုင်ပါ့လား ။
ကျွန်တော့် စိတ်ထဲ အလွန်ပင် ရှုပ်ထွေးနေခဲ့မိလေသည် ။
' အမေရိကန် လွှတ်တော်လူကြီး Jeff ဟာ Glenn Mcqueen ရဲ့ ဂေးကားရုပ်ရှင်အတွက် ရင်းနှီးမြှုပ်နှံခဲ့သူ ဖြစ်ခဲ့ပြီး Jeffဟာ နောက်ကွယ်မှာ Porn လုပ်ငန်းတွေပါ လုပ်ကိုင်နေသလားဟူ၍ လူအများက မေးခွန်းထုတ်စရာ ဖြစ်နေ... '
သတင်းဌာနများသည် သူတို့ထင်ရာကို စွတ်ပြောနေကြလေပြီး Mcqueen ၏ ရုပ်ရှင်ကား ကိစ္စသည် နိုင်ငံရေးနှင့်ပါ ဆက်နွယ်နေသယောင်ယောင်ဖြင့် Jeff ၏ နိုင်ငံရေး ပြိုင်ဘက်ပါတီများက ထိုးနှက်လာကြလေသောကြောင့် ကိစ္စမှာ ထင်သည်ထင် ပိုမို ကြီးမားသွားခဲ့ရလေသည် ။
Mcqueen သည် အစားအသောက်ကို မစားချင် စားချင်နှင့် အတင်း ထိုးသွင်းနေရပုံပေါ်ပြီး ပြောစရာစကားများ ပျောက်ရှ ဆွံ့အနေသည့်နှယ် ။
ကျွန်တော်တို့ နှစ်ယောက်စလုံး ငြိမ်သက်စွာ မျက်နှာချင်းဆိုင် ထိုင်နေမိကြသည် ။
" Mcqueen... ဘယ်ရောက်နေခဲ့တာလဲ... "
ကျွန်တော့်ဘက်မှ စမေးလိုက်သည် ။
" Philadelphia မှာရှိတဲ့ ထုတ်လုပ်ရေး ကုမ္ပဏီတစ်ခုမှာ သွားရှောင်နေခဲ့တာ... "
Mcqueen က စိတ်ရှုပ်သော လေသံဖြင့် ဆိုလေသည် ။
" ကိစ္စတွေက ဘာလို့ ဒီလောက်အထိ ကြီးသွားရတာလဲ ကိုယ်လည်း မသိတော့ဘူး... "
ကျွန်တော် သက်ပြင်းသာ လေးလေးပင်ပင် ချလိုက်မိသည် ။
" ဒါနဲ့ ခုနက မင်း စားပွဲပေါ်မှာ အလုပ်ရှာတဲ့ စာရွက်တွေ ကိုယ် တွေ့ခဲ့တယ် ယော့ဝန်း... မင်း အလုပ်ရှာနေတာလား... "
" အင်း... ဟုတ်တယ်... "
" ဘာလို့လဲ... အရင် အလုပ်က ဘာဖြစ်လို့လဲ... "
" ကျွန်တော် အလုပ်ဖြုတ်ခံလိုက်ရပြီလေ... "
Mcqueen ဘာမှ မပြောနိုင်ဘဲ ခဏတာ ဆွံ့အသွားလေသည် ။
" ဘယ်တုန်းကလဲ... "
" မနေ့ကပဲ... ရုံးခန်းမှာ ခေါ်သတိပေးခံရပြီး အလုပ် အဖြုတ်ခံလိုက်ရတာ... "
" အဓိပ္ပါယ် မဲ့လိုက်တာကွာ... "
" ကျွန်တော် အခုတော့ အလုပ်လိုနေတဲ့ နေရာတွေတွေ့ထားပါတယ်... ကျွန်တော် လိုက်လျှောက်ကြည့်မလို့... ကျွန်တော် လုပ်နိုင်မှာပါ... "
Mcqueen က ကျွန်တော့်ကို စိတ်မကောင်းသည့်ပုံဖြင့် ကြည့်ရင်း ပြောလာလေသည် ။
" ဒီအချိန်မှာ ဒီလိုစကား ပြောရမှာ တစ်မျိုး ဖြစ်ချင် ဖြစ်နိုင်ပေမယ့် ကိုယ်နဲ့ အလုပ်တူတူ လုပ်မယ်ဆိုရင်ကော ဘယ်လို သဘောရလဲဟင် ယော့ဝန်း ... "
" ဘာလဲ... Porn ရိုက်ရဦးမှာလား... "
ကျွန်တော့်အသံက အနည်းငယ် ကျယ်လောင်သွားမိသည် ။
" အိုး... မဟုတ်ပါဘူး... Porn actor အနေနဲ့ မဟုတ်ဘဲ ထုတ်လုပ်ရေးပိုင်းမှာ လုပ်မယ် ဆိုရင် ဘယ်လို သဘောရလဲ... "
" ကျွန်တော် Porn လောကမှာ ထပ်ပြီး မလုပ်ချင်တော့ဘူး... "
ကျွန်တော် လေးပင်စွာ ဆိုလိုက်မိသည် ။
" ဒါဖြင့်ရင် မင်း အခု နောင်တရနေပြီပေါ့... ဟုတ်လား... "
Mcqueen က ထုတ်ဖော် မပြောသော်လည်း သူ ဘာဆိုလိုချင်သည်ကို ကျွန်တော် ကောင်းကောင်း နားလည်ပါသည် ။
ထိုအရာများသည် သူ ကျွန်တော့်ကို တစ်ချိန်က ကမ်းလှမ်းခဲ့ဖူးသော အရာများ ဖြစ်ပြီး ကျွန်တော်ကလည်း လိုလိုချင်ချင် လက်ခံခဲ့သော အရာများသာ ဖြစ်ခဲ့လေသည် ။
ရုတ်တရက် Ryan ပြောခဲ့သော စကားများကို ကျွန်တော် ကြားယောင်လာသည် ။
" မင်းကို ငါ သေချာ သတိမပေးနိုင်ခဲ့တဲ့အတွက် မင်းငါ့ကို နာကျည်းချင်နာကျည်းလို့ရတယ်... ငါ့ကိုယ်ငါသာ အရင်ထဲက နာကျည်းခဲ့မိရင် အခုလောက်ဆို ငါ စိတ္တဇဆေးရုံကို ရောက်နေလောက်ပြီ... "
ကျွန်တော်နှင့် Mcqueen တို့ စားသောက်ကြပြီးတော့ ပန်းခြံထဲ၌ မြစ်ကမ်းဘေးတစ်လျှောက် လမ်းအတူတူ လျှောက်ကြသည် ။
တစ်ယောက်ကို တစ်ယောက်တော့ ဘာစကားမှ မဆိုမိကြ ။
နှစ်ယောက်စလုံး ငြိမ်သက်နေကြသည် ။
အဘယ်ကြောင့်ဆိုသော် ယခုအချိန်တွင် မည်သည့် စကားကိုပဲ မည်သူက ပြောသည် ဖြစ်ပါစေ ၊ စကားလုံးတိုင်းက တစ်ဦးကိုတစ်ဦး နာကျင်စေမည်သာ ဖြစ်သောကြောင့် ဖြစ်သည် ။
ရင်နာစရာ ကောင်းလှသော အမှန်တရား တစ်ခုကို ဆိုရပါမည်ဆိုလျှင် မနေ့ကနှင့် ဒီနေ့ နှစ်ရက်လုံး ပါလာသော သတင်းများကို ဖတ်မိပြီးသောအခါ Mcqueen သည် သူနှင့်ထိုက်တန်သော ပြစ်ဒဏ်ကို သူ ခံစားရသည်ဟုပင် ကျွန်တော့်စိတ်ထဲ ခံစားမိရလေသည် ။
တစ်ချိန်ကတော့ သူ့ဇာတ်ညွှန်းသည် ရုပ်ရှင်အဖြစ် ရိုက်ကူးခံရသည်ဟု ကြားခဲ့စဥ်ကတော့ ကျွန်တော် သူ့ကို ရင်းနှီးချစ်ကြည်စွာပင် ဂုဏ်ပြုစကား ဆိုခဲ့မိသေးသည် ။
သို့သော် ယခုအချိန် အမှန်တရားကို သိမြင်လာပြီးချိန်တွင်တော့ ကျွန်တော်သည် Mcqueen ၏ အရှပ်ထုပ်ကြားထဲတွင် ရုန်းကန်နေရလေပြီ ။
Mcqueen ၏ မထီမဲ့မြင်ပြုတတ်သော မျက်လုံးများဖြင့် သူ့ကိုယ်သူ လွတ်လပ်စွာ ပျံသန်းနိုင်ရန် ကြိုးစားအားထုတ်မှုများက တစ်ပါးသူများကို ထိခိုက်နာကျင်စေလှပေသည် ။
Mcqueen က ဆိပ်ခံတံတားနား အရောက်တွင် ရပ်လိုက်ပြီး သူ့အိတ်ထဲမှ စီးကရက်ကို ထုတ်ကာ မီးညှိနေသည် ။
" ဒါနဲ့ မင်း မြင်လိုက်တာ ဘာတွေလဲ ပြောပါဦး ယော့ဝန်း... "
" အဲ့ဒီ့ ... အဲ့ဒီ့ ရုပ်ရှင်ကား... တစ်နည်း ပြောရရင်... "
ရပ်လိုက် ဟု ကိုယ့်ကိုယ်ကို သတိပေးနေသော်လည်း တကယ်တမ်းမူ ကျွန်တော့် ပါးစပ်က မရပ်တန့်နိုင်ခဲ့ပေ ။
" Ryan နဲ့ ခင်ဗျားနဲ့ သရုပ်ဆောင်ခဲ့တဲ့ Porn... အဲ့မှာ ခင်ဗျားက ခရစ်စတိုဖာ အဖြစ် သရုပ်ဆောင်ခဲ့တာ... "
ရပ်လိုက်ဖို့မှာ နောက်ကျသွားခဲ့ပြီဖြစ်ပြီး ကျွန်တော် သိသမျှကို ထုတ်ပြောခဲ့မိလေပြီ ။
Mcqueen ၏ မျက်နှာက တစ်ချက် ပျက်သွားသော်လည်း တည်ငြိမ်အောင် ပြန်ကြိုးစားပြီး မေးခွန်းထုတ်လာလေသည် ။
" အဲ့တာကို ကြည့်ပြီး မင်း ဘယ်လို ခံစားရလဲ ယော့ဝန်း... "
" ကျွန်တော် ထင်တာတော့ Ryan အရမ်းကို နာကျင်ခံစားခဲ့ရမှာပဲ... ပြီးတော့ လူတစ်ယောက်ရဲ့ အောင်မြင်လိုမှုအတွက် သူ့ကိုယ်သူ အသုံးချ ခံရတယ်လို့ ခံစားမိခဲ့ရမှာပဲ... "
Ryan တစ်ယောက် Porn တွေရိုက်တိုင်း မူးယစ်ဆေးဝါးကို မဖြစ်မနေ သုံးစွဲခဲ့ရခြင်းမှာ Mcqueen ပေးခဲ့သော စိတ်ဒဏ်ရာကြောင့်ဟုသာ ကျွန်တော် စွပ်စွဲလိုက်ချင်သော်လည်း မပြောရက်ပါပေ ။
" ဒါဖြင့်ရင် ယော့ဝန်းရဲ့ စိတ်ထဲမှာ ကိုယ့်ကို တခြားအမြင်တစ်မျိုးနဲ့ တကယ်ပဲ မြင်မိနေပြီလား... Ryan ပြောသလိုပဲ ကိုယ်ဟာ မုဒိန်းကောင် တစ်ယောက် သာသာပဲလို့ မင်း ထင်နေမိပြီလား... "
ကျွန်တော် ဘာမှ ပြန်မဖြေဘဲ တိတ်ဆိတ်နေလိုက်သည် ။
Mcqueen ၏ နာကျင်နေချိန်တွင် ထပ်ပြီး နာကျင်စေမည့်စကားမျိုး ကျွန်တော် ပြောမထွက်ပါပေ ။
" မင်း ဘယ်လို တွေးနေလဲ ဆိုတာ ကိုယ့်ကို ပွင့်ပွင့်လင်းလင်း ပြောစမ်းပါ ယော့ဝန်း ... ကိုယ် အရမ်းသိချင်တယ် ... ပြောစမ်းပါ... "
" ဘယ်အချိန်အထိ... ဘယ်အချိန်အထိ ခင်ဗျား Porn တွေကို ရောင်းနေဦးမှာလဲ Mcqueen... "
ကျွန်တော် ပြောသည့် Porn ဆိုသည်မှာ ကျွန်တော်နှင့် သူ နောက်ဆုံး ရိုက်ထားသော DVD ကို ဆိုလိုမှန်း Mcqueen သိပါလိမ့်မည် ။
ကျွန်တော့်စကားသည် Mcqueen ၏ မြုံနေသော အနာတစ်ခုကို ဓားထက်ထက်ဖြင့် ဆွပေးလိုက်သလို ဖြစ်သွားမှန်းတော့ ကျွန်တော် နားလည်ပါသည် ။
" အဲ့လိုတွေ လုပ်ရင်းနဲ့ ခင်ဗျားကိုယ်ခင်ဗျား အနုပညာရှင် တစ်ယောက်လို တကယ်ကြီး ခံစားနေရတာလား Mcqueen... "
ထိုသို့ဖြင့် သူ့အား ဓားဖြင့်ဆွသလို စကားများကို ပြောအပြီးတွင်တော့ ကျွန်တော့်ရင်ထဲတွင်လည်း နာကျင်ပြီး အထီးကျန်သော ခံစားချက်တို့ကို ခံစားမိရလေသည် ။
ခံစားရသော နောင်တ တရားတို့ကြောင့် အသက်ရှူရသည်ကပင် ခက်ခဲလာခဲ့သလိုလို ။
" Porn တစ်ခုမှာ အနုပညာဆိုတာ ရှိမနေဘူး... "
ကျွန်တော် Mcqueen ကို နာကျင်အောင် ပြောလိုက်မိပါသည် ။
" ယော့ဝန်း... မင်း အခု ခံစားနေရ ရှုတ်ချခံနေရတဲ့ ကိစ္စကြောင့် ကိုယ့်ကို နာကျည်းနေတယ် ဆိုရင်လည်း မင်း ပွင့်ပွင့်လင်းလင်း ပြောလိုက်စမ်းပါ... မင်းရဲ့ ခံစားချက်တွေအပေါ်ကို မင်း ရိုးသားစမ်းပါ... "
" ကျွန်တော် ခင်ဗျားကို မနာကျည်းပါဘူး... ဒီလမ်းကြောင်းက ကျွန်တော်ကိုယ်တိုင် ရွေးခဲ့တဲ့လမ်းပဲလေ... ဒါပေမယ့်... "
" ဒါပေမယ့် မင်း ကိုယ့်ကို အပြစ်တင်ချင်တယ်... Ryan လိုပဲ မင်းဟာလည်း အသုံးချ ခံလိုက်ရတယ်လို့ မင်း မြင်နေခဲ့တယ်... ဟုတ်တယ်မလား... "
Mcqueen ၏ အသံက အက်ကွဲ ကြမ်းရှလျက် နာကျင်နေပုံ ပေါ်လေသည် ။
" မင်းက မင်းရဲ့ ကိုယ်ပိုင် ဆုံးဖြတ်ချက်ကနေ ဖြစ်ပေါ်လာတဲ့ အပြစ်ရှိစိတ်နဲ့ နောင်တ တရားတွေကို ကိုယ့်အပေါ်ကို အကုန် အပြစ်တင် လွှဲချပြီး မင်းကိုယ်ကိုမင်း သက်သာရာရအောင် လုပ်နေတာပဲ ယော့ဝန်း... "
Mcqueen ၏ မျက်နှာက ကျွန်တော့်အနား နီးကပ်လာပြီး Mcqueen ၏ အသံတို့က ပိုမိုတင်းမာလာလေသည် ။
" ကောင်းပြီလေ... ယော့ဝန်း... မင်း အပြစ်တင်ချင်ရင် ငါ့ကိုပဲ လွှဲချပြီး အပြစ်တင်လိုက်စမ်းပါ... ဒါပေမယ့် ဒီလိုအခြေအနေတွေ ဖြစ်လာမှာကို မင်း ကြိုတင်မမျှော်လင့်ထားဘူးလို့တော့ ကိုယ့်ကို လာမလိမ်စမ်းပါနဲ့... "
Mcqueen က ကျွန်တော့် ပုခုံးနှစ်ဖက်ကို သူ့လက်ဖြင့် ဆုပ်ကိုင်ပြီး ဒေါသတကြီး ဆိုလာလေသည် ။
" ကိုယ် မင်းကို Pornရိုက်ဖို့ ဆိုပြီး တစ်ခါမှ အတင်းအကျပ်စေခိုင်း ဖိအား မပေးခဲ့ဖူးဘူးလေ... မင်းရဲ့ ကိုယ်ပိုင်ဆုံးဖြတ်ချက်က ဖြစ်ပေါ်လာတဲ့ ကိုယ့်ကိုယ်ကို အပြစ်တင်စိတ်တွေ နောင်တရစိတ်တွေအတွက် ကိုယ်က အပြစ်တင်ခံရဖို့ ထိုက်တန်တယ်လို့များ မင်း ထင်နေခဲ့တာလား.... ဘာလို့လဲ... မင်းက ကိုယ့်ရဲ့ ထူးခြားတဲ့ သူတစ်ယောက်ဖြစ်နေလို့ ကိုယ်က အဲ့တာကို သည်းခံပေးရမှာလား... ဟုတ်လား ယော့ဝန်း... "
Mcqueen ၏ စကားများသည် ကျွန်တော့် နှလုံးသားကို ဓားချွန်ဖြင့် ထိုးနေသလိုပင် သိပ်ကို နာကျင်ရပါသည် ။
နှစ်ဦးစလုံး ထိခိုက်ခံစားနေရချိန်တွင် အလုပ်ကပင် လောလောလတ်လတ် ထုတ်ပယ်ခံထားရသော လူတစ်ယောက်ကို သူ ဒီလိုတော့ မညှာမတာ မပြောသင့်ဘူးဟု ကျွန်တော် နာကျင်စွာဖြင့် တွေးမိသည် ။
ယခုအချိန်တွင် ကျွန်တော် Mcqueen ဆီမှ နှစ်သိမ့်မှုတစ်စုံတစ်ရာကို မျှော်လင့်ခဲ့မိခြင်းသည် ကျွန်တော် ရူးသွပ်ခဲ့ခြင်းသာ ဖြစ်ပေလိမ့်မည် ။
ကျွန်တော်က စိတ်ထဲ ရှိသော စကားမှန်သမျှကို အကုန်အစင်မပြောဘဲ ထိန်းသိမ်းခဲ့သော်လည်း ကျွန်တော် ပြန်ရလိုက်သည်မှာ Mcqueen ၏ အော်ငေါက်မှုတို့ပင် ဖြစ်သည် ။
" ဒါတွေအကုန်လုံးက ကျွန်တော့်အမှားတွေပဲ ဆိုတာ ကျွန်တော် သိပါတယ် Mcqueen... ကျွန်တော်က Mcqueen ဆီကနေ ကျွန်တော့်ကို Porn ရိုက်တာ ရပ်လိုက်ပါတော့ ဆိုတဲ့ စကားမျိုး ကြားချင်ခဲ့တာ... "
ကျွန်တော် စိတ်ထဲရှိသမျှကို Mcqueen အား ပြန်ပြောဖို့ အသင့် ဖြစ်ခဲ့လေပြီ ။
" ခင်ဗျား စိတ်ထဲမှာ ကျွန်တော့်ကို ဒေါ်လာ ငါးသောင်း လွှဲပေးပြီးတဲ့အချိန်မှာ ပေါ့ပါသွားခဲ့ပြီး ကျွန်တော့်ကို နှစ်သိမ့်ပေးနိုင်သွားပြီ လို့ တွေးခဲ့တယ် မဟုတ်လား... ဒါပေမယ့် အဲ့တာက ကျွန်တော့်ကို မနှစ်သိမ့်နိုင်တဲ့အပြင် ပိုပြီးတောင် ဆိုးဝါးစေခဲ့တယ် ဆိုတာ ခင်ဗျား သိရဲ့လား... "
ကျွန်တော် Mcqueen မျက်နှာကို စေ့စေ့ကြည့်ရင်း ပြောနေခဲ့သည် ။
" ခင်ဗျား သိရဲ့လား... ကျွန်တော်တို့ Porn ရိုက်တဲ့အခါ မီးထိုးတဲ့သူတွေ ၊ ကင်မရာမန်းတွေ ၊ setting ဆင်ပေးတဲ့လူတွေ... အဲ့လူတွေ အားလုံးက ကျွန်တော့်စိတ်ထဲမှာ သိပ်ကြောက်စရာကောင်းတယ်လို့ အမြဲခံစားခဲ့ရတယ်... ဒါပေမယ့်... ဒါပေမယ့် ခင်ဗျားကတော့ သူတို့အားလုံး ပေါင်းထားတာထက်တောင် ပိုပြီး ကြောက်ဖို့ကောင်းနေသေးတယ်... "
ကျွန်တော့် စိတ်ထဲက ရပ်တန့်လိုက်ဖို့ ကျွန်တော့်ကိုယ်ကျွန်တော် သတိပေးနေသော်လည်း ကျွန်တော့် နှုတ်ခမ်းများက ဦးနှောက်၏ အမိန့်ကို မနာခံခဲ့ပါပေ ။
စကားလုံးများသည် သူ့အလိုလိုပင် ပါးစပ်ထဲမှ လျှောကနဲ ထွက်ကျလာခဲ့သလိုပါပင် ။
" သတင်းတွေထဲမှာ ပါတဲ့ စကားလုံးတိုင်း အတွက် ခင်ဗျားက အပြောခံရဖို့ ထိုက်တန်နေတာပဲ... "
ကျွန်တော် Mcqueen ၏ လက်များမှ ရုန်းထွက်လိုက်ပြီး အော်ပြောပစ်လိုက်သည် ။
" ခင်ဗျား ကျွန်တော့်အပေါ်မှာ ခံစားချက်ရှိတယ် ဆိုတာလည်း ခင်ဗျားအတွက် ထုတ်ကုန် တစ်ခုဆိုတာထက် မပိုပါဘူး Mcqueen... ခင်ဗျား အခုချိန်ထိ လုပ်ခဲ့သမျှ အားလုံးဟာ ပြည့်တန်ဆာခေါင်း တစ်ယောက်အနေနဲ့ ခင်ဗျားအကျိုးအတွက် ခင်ဗျား လုပ်ခဲ့တာချည်းပဲ... "
ကျွန်တော့်နှုတ်မှ ထိုမျှ ကြမ်းတမ်းသော စကားလုံးတို့က အဘယ်သို့များ ထွက်လာခဲ့ပါလေသလဲ ။
" အစကတော့ Ryan က ကျွန်တော့်ကို ခင်ဗျားနဲ့ မပတ်သတ်ဖို့ ပြောတုန်းက ကျွန်တော်က Ryan ကိုတောင် အပြစ်မြင်ခဲ့တာ... သူက သံသယလွန်ကဲတဲ့ ရောဂါ ရနေတာလို့တောင် ကျွန်တော် တွေးခဲ့မိတာ... အခုတော့ ကျွန်တော် အဲ့လို တွေးခဲ့တာ မှန်ရဲ့လားလို့တောင် ကျွန်တော် မသေချာတော့ဘူး... "
ကျွန်တော့်မျက်နှာကို ကျွန်တော် လက်နှစ်ဖက်ဖြင့် အုပ်ထားပြီး အော်ပြောနေလိုက်မိသည် ။
ထိုအချိန်၌သာ အသေအချာ ကြည့်မိခဲ့ပါလျှင် Mcqueen ၏ တုန်လှုပ်ခြောက်ခြားနေသော မျက်နှာကို ကျွန်တော် ကျိန်းသေပေါက် မြင်ရမည်သာ ။
" ခင်ဗျားနဲ့ ရိုက်ခဲ့တဲ့ Porn တွေ အားလုံးဟာ ကျွန်တော့်ကိုယ် ကျွန်တော် အမှိုက်ပုံထဲကို ခုန်ချသလိုမျိုး ဖြစ်ခဲ့လိမ့်မယ်လို့ ကျွန်တော် အရင်က မတွေးမိခဲ့ဘူး... "
Mcqueen ဆီက နာနာကျင်ကျင် ရှိုက်ကာ အသက်ရှူလိုက်သော အသံကို ကျွန်တော် ကြားလိုက်ရသည် ။
ကျွန်တော့်စကားများသည် Mcqueen ကို အပြင်းအထန် နာကျင်စေခဲ့လေပြီ ။
" ခင်ဗျားက ခင်ဗျား အမြဲတမ်း လုပ်ခဲ့သလိုပဲ ပြည့်တန်ဆာခေါင်း အဖြစ်နဲ့ ဒီလောကမှာ အကျိုးအမြတ်တွေ ရနေဦးမှာပဲ... ဒါပေမယ့်... ကျွန်တော့်အတွက်ကျတော့ရော... ကျွန်တော်က ဒီ ချာတူးလန်နေတဲ့ အမှန်တရားကြီးနဲ့ တစ်သက်လုံး ရုန်းကန်ပြီးနေသွားရမှာ... "
ကျွန်တော့် အော်သံတွေ ကျယ်လောင်နေခဲ့လေသည် ။
ကျွန်တော် ရင်ဘတ်တွေ အောင့်လာသောကြောင့် မိမိရင်ဘတ်ကို မိမိ ပြန်ဖိထားလိုက်ရသည် ။
ကျွန်တော့်နှလုံးသားသည် မြင်းတစ်ကောင်ကဲ့သို့ လျင်မြန်စွာ ခုန်နေလေသည် ။
စကားလုံးများသည် ရေတံခွန်ကဲ့သို့ တသွင်သွင် စီးကျထွက်သွားခဲ့လေပြီ ဖြစ်ပြီး မည်သည့်နည်းနှင့်မျှ ပြန်လည် ရုပ်သိမ်းလို့ မရနိုင်တော့ပါချေ ။
" ဟားဟား... "
Mcqueen ဆီက နာကျင်နေသော ရယ်သံတချို့ ထွက်လာလေသည် ။
" ပြည့်တန်ဆာခေါင်း တဲ့လား... သိပ်ကို ကောင်းတဲ့ စကားပဲ... "
Mcqueen အသံက နာကျင်မှုကို ဖုံးကွယ်ထားရသည့်အလား အေးစက်စက် ။
" မင်းကိုယ့်ကို အဲ့လိုမျိုး တွေးထင်နေခဲ့လိမ့်မယ်လို့ ကိုယ် အိမ်မက်ထဲတောင် မမက်ခဲ့မိဘူး ... "
Mcqueen သည် ကျွန်တော့်ထံသို့ နာနာကျင်ကျင် ကြည့်လာလေသည် ။
" ပထမဆုံးအနေနဲ့ ပြောရရင် ကိုယ်ဟာ Porn ရိုက်တာကြောင့် ကိုယ့်ကိုယ်ကို ဘယ်တုန်းကမှ မရှက်ခဲ့ဖူးဘူး... အဲ့တာကို အမှိုက်တစ်ခုလို့လည်း မမြင်ခဲ့ဖူးဘူး... ကိုယ့်ကို Porn ရိုက်တာ တစ်ခုထဲကိုပဲ ကြည့်ပြီး ကိုယ့်တန်ဖိုးကို ဆုံးဖြတ်မှာကို ကိုယ်မလိုချင်ခဲ့ရုံပဲ ... "
Mcqueen က အထိုးခံထားရသောကြောင့် ညိုမဲနေသော ကျွန်တော့် နှုတ်ခမ်းထောင့်လေးကို သူ့လက်ဖြင့်လာရောက် ပွတ်သပ်လေသည် ။
" အစက ကိုယ် မင်းကို လုံးလုံး ယုံမိတော့မလို့ပဲ... "
Mcqueen ၏ လက်က ချက်ချင်းပင် ကျွန်တော့်ပါးဆီမှ ပြန်ရုတ်သိမ်းသွားပါလေ၏ ။
" မင်း ကိုယ့်ကို ချစ်လှပါချည်ရဲ့ လို့ ပြောခဲ့တာ ဘယ်တုန်းကများလဲ ပတ်ယော့ဝန်း... "
" ... "
" မင်း ကိုယ့်ကို အထင်သေး စပ်ဆုတ်နေလည်းပဲ ကိုယ့်အတွက်တော့ ဘာမှ ထပ်ပြီး ဆုံးရှုံးသွားစရာ မရှိဘူး... ဒါပေမယ့် စိတ်မကောင်းစရာပဲ... မင်းလိုမျိုး စူးဝါးတဲ့အကြည့်နဲ့ ကိုယ့်ကို စပ်ဆုတ်နေတဲ့လူတွေက အစထဲက အများကြီး ရှိနှင့်နေပြီးပြီ ... မင်းတစ်ယောက်ကြောင့် နဲ့ ဘာမှတော့ ထူးထူးခြားခြား မပြောင်းလဲသွားပါဘူး... "
Mcqueen သည် တည်ငြိမ်ဟန် ဆောင်နေသော်လည်း စီးကရက် ကိုင်ထားသော သူ့လက်များကမူ တုန်နေကြောင်းကို ပြန့်ကျဲနေသော ဆေးလိပ်ပြာများကို ကြည့်၍ ပြောန်ုင်ပါသည် ။
" ဒါပေမယ့် အဲ့သည့်လူတွေ အားလုံးထဲမှာ မင်းကတော့ ငါ့ကို အညစ်ပတ်ဆုံးနည်းလမ်းနဲ့ အရှက်တကွဲ ဖြစ်စေခဲ့သူပဲ... ဒါပေမယ့် ကိုယ် အပြစ်မတင်တော့ပါဘူး... ဘာလို့လဲ ဆိုတော့ အခုအချိန် မင်းဘက်မှာ ဘယ်သူမှ မရှိတော့ဘူး ဆိုတာ ကိုယ်သိနေလို့ပဲ ... "
Mcqueen သည် ကျွန်တော့်အား နောက်ဆုံးအကြိမ်အဖြစ် ကြည့်သလို ငေးမောကြည့်လာရင်း ဆိုလေသည် ။
" မင်းပြောခဲ့သလိုပဲ မင်းက ကိုယ့်ဆီက အသုံးချခံလိုက်ရတဲ့ အရှုံးသမားသာသာပါပဲ... "
Mcqueen ခဏလောက် ငြိမ်သက်သွားကာ ကြိုးစား အသက်ရှူနေပုံပေါ်လေသည် ။
" ခင်ဗျား မှန်ပါတယ် Mcqueen... မှန်လွန်းလို့ပဲ အဲ့သည့်စကားကို ခင်ဗျားပါးစပ်က အခုလို ကိုယ်တိုင်ကိုယ်ကျ ထုတ်ပြောလာချိန်မှာ.... ကျွန်တော်... ကျွန်တော် အရမ်းနာကျင်ရတယ်... "
အဆုံးသတ်တွင်တော့...
ကြီးမားသော ထိုးနှက်မှုများဖြင့် နာကျင်နှင့်ပြီး ဖြစ်တာတောင်မှ ကျွန်တော့်ဆီ အပြေးရောက်လာခဲ့သော ထိုလူသားကို ကျွန်တော့်၏ တစ်ကိုယ်ကောင်းဆန်လှစွာ သူရဲဘောကြောင်သော စကားလုံးများဖြင့် နာကျင်စေခဲ့ရလေပြီ ။
ထို့အတူပင် ထိုသူသည်လည်း ကျွန်တော့်အား အပြန်အလှန် နာကျင်စေခဲ့ပြန်သည် ။
ကျွန်တော်တို့သည် တစ်ဦးကို တစ်ဦး နာကျင်စေရန် ၊ ဒဏ်ရာပေးစေရန် ချစ်ခဲ့ကြရသလိုပါပင် ။
Mcqueen သည် နာကျင်စွာဖြင့် ကျွန်တော့်ကို ကြည့်လာရင်းမှ တစ်ဖက်သို့ လှည့်ကာ ထွက်သွားလေတော့သည် ။
ကျွန်တော်သာ Mcqueen ကို ယခု သွားခွင့် ပြုလိုက်လျှင် ကျွန်တော်တို့ နှစ်ယောက်ကြားက အရာအားလုံးသည် လုံးဝ အဆုံးသတ်သွားမည်ကို ကျွန်တော် သိပါသည် ။
သူ့အား ပြည့်တန်ဆာခေါင်း ဟု ခေါ်ခဲ့ခြင်း ၊ သူနှင့် ရုပ်ရှင်ရိုက်သည်မှာ အမှိုက်တစ်ခုသာသာ ဟုသာ ပြောခဲ့ခြင်း ၊ ထိုစကားများသည် Mcqueenအပေါ် အတော်လေးကို ရက်စက်ကြမ်းတမ်းခဲ့ပါပေလိမ့်မည် ။
ကျွန်တော် ခေတ္တ ခဏမျှ ကြောင်အမ်းစွာ ရပ်နေရာမှ လှည့်ကြည့်လိုက်သောအခါ Mcqueen သည် ကျွန်တော်နှင့် ခပ်လှမ်းလှမ်းသို့ ရောက်သွားခဲ့လေပြီ ။
ကျွန်တော် ချက်ချင်းပင် အသိပြန်ဝင်လာပြီး Mcqueen အနောက်သို့ အပြေးတစ်ပိုင်း လိုက်သွားမိလေတော့သည် ။
ကျွန်တော်သာ တောင်းဆိုလျှင် Mcqueen က ကျွန်တော့်ကို ခွင့်လွှတ်ပါမည်လား ။
ဒါမှမဟုတ် ကျွန်တော့်ဘက်က စပြီး ခွင့်လွှတ်ပေးဖို့ တောင်းပန်လိုက်လျှင်ကော ။
Mcqueen ခွင့်လွှတ်ကောင်း ခွင့်လွှတ်နိုင်ပါလိမ့်မည် ။
ကျွန်တော် အပြေးလိုက်သွားပြီး သူ့ကို မီလာသောအခါတွင် Mcqueen ၏ လက်ကိုဆွဲလိုက်လေသည် ။
" Mc... "
Mcqueen ၏ မျက်နှာ ကျွန်တော့်ဘက်လှည့်လာလေသည် ။
သူ၏ မျက်နှာကို မြင်လိုက်ရချိန်တွင်တော့ ခုနက ကျွန်တော် တွေးခဲ့သမျှသည် အမှားအယွင်း တစ်ခုမျှသာ ဖြစ်သည်ကို ကျွန်တော် နားလည်သွားခဲ့ရလေသည် ။
အေးစက်ကာ ခံစားချက်မဲ့နေသည့် Mcqueen ၏ မျက်နှာသည် ကျွန်တော့်အပေါ်တွင် ဘာခံစားချက်မျှ မရှိတော့သည့်နှယ်ပင် ။
မည်သို့သော အရာကမျှ ကျွန်တော်တို့ နှစ်ယောက်ကြားက အက်ကွဲနေသော ချစ်ခြင်းတရားတို့ကို ပြန်လည် ပြင်ဆင်ပေးဖို့ မဖြစ်နိုင်လေတော့သည့်အလားပါပင် ။