في ضريح العشق حمامـــــه......💙🕊

البارت الثالث والعشرون

#في ضريح العشق حمامة ....

البارت الثالث والعشرون .....

وئام الشيخلي ....

اسعد الله اوقاتڪم غوالي ♥♥

تغيب الشمس لتشرق في مكان آخر ؛ لتخبرنا أن الجمال ... ؛نورٌ لا يمكن أن يغيب .. مُتعة الحَياة أن نَجد الحُب " في عُيون الآخَرين "أن نَضَع الطعام " على مائدة المُحتاجين "أن نَرسِم الضِّحكَة " على وجوه البائِسين "أن نَروي غَرسَ الأمَل " على طَريق اليائِسين.

ـــــــــــــ

الإنسان قد يقع له شيء من الأقدار المؤلمة، والمصائب الموجعة، التي تكرهها نفسه، فربما جزع، أو أصابه الحزن، وظن أن ذلك المقدور هو الضربة القاضية،

والفاجعة المهلكة، لآماله وحياته،

فإذا بذلك المقدور منحة في ثوب محنة، وعطية في رداء بلية،

وفوائد لأقوام ظنوها مصائب، وكم أتى نفع الإنسان من حيث لا يحتسب!...

ڪانت هاي ڪلماتي بداخلي واني اشوف محمد وعصبيته ... لان اعرف سببها ـ

صار يفرڪ راسه بيده ورجع المصحف بمڪانه ..

وتوجه للتلفون اتصل ؏ اهلي ماعرفت منو جاوبه ـ

التفت عليه ڪال تحضري سامي جاي ياخذڪم ـ

دخلت لغرفه خالتي اخذ ملابس اطفالي حضرتهن بجنطه وخليت ملابسي بجنطه ثانيه.

محمد طلع برا يستغفر وضايج..

شوي ورجع عليه يوصيني ؏ـلى نفسي واطفالي وڪال من اوصل النجف اتصل ؏ـلى تلفون اهلج ..

ڪتله ليش هيج اتعصبت ..

رد اووف لاتذڪريني موزين باقي براسي عقل تتوقعين ڪاعد وساڪت لا وحق الحق ـ ماخليت ماتحريت مابقيت امن واستخبارات مانطيت اسمه ـ

ماموجود بڪل العراق ـ

خالتي ڪالت ترا رب العالمين اخذ حق الڪل منهم بالدنيا ـ انت شوف حاله حتى ماعاش مثل البشر ـ محروم من طفل يشيل اسمه ـ خلقته مشوهه ماڪو احد يحبه وڪلها تصيح عوذه ـ

اذا حقڪ لو حق غيرڪ لو حق ليلى الله اخذ حقڪم بالدنيا والاخره يم الحڪم العدل ـ

بقا يستغفر وروحه مسحونه ـ

اجه سامي حتى ياخذنا لاهلي الدنيا ضهريه حاره ـ صعدنا للسياره وهم رجع عليه وصاني ـ

وهو وخالتي توڪلو للنجف ـ

وصلنا لبيت اهلي عدهم عمال يدڪون الڪاشي ـ

تلڪتني ابتسام سلمت عليها ـ

سالتها وينهم شو ماڪو احد ـ

ڪالت جده عباس توفت وراحو للعماره ـ

مها ـ الف رحمه لروحها يعمري هسه امي بهيه شلون حالها ـ

اڪيد اسعد راح وياهم ـ

ابتسام... اي راحو سياره عمي ونجم اثنينهن مقبطات ..

وام حسام راحت لاهلها.

سالتها شلون وضعها ـ

ردت لازينه سمت البنيه وسن ـ وعمي جاب هديه بتوت الها وحجول لوسن ـ

لذلڪ قررت اجيب بنيه ـ هههههه

مها ـ احجزي يحضي هاي صارن اثنين ڪدامڪم وحده احلى من الثانيه ـ

ابتسام غمزت بعينها ڪالت مايحتاج حجزنا ملڪة جمال العشيره ـ

دخلنا لغرفتنا نيمت اطفالي ـ

وبالي يم محمد سبحان الله مايرتاحله فتره الاويطلع شي يڪدر خاطره ـ

رجعت لقبل ايام من ڪانت ليلى يمنا ـ
ومن اتصلت ڪرستين سولفنا شوي ورجعت للحديقه

ليلى تبجي ومحمد يواسيها ـ بيومها رجعت دخلت للبيت ماحبيت اتدخل ڪلت خلي تفضفض لاخوها ــ احب خوفه عليها واهتمامه بيها ...

وباليل من اجا محمد للغرفه سالني ـ

محمد ... مها عيوني خلي بالج يمي اريد اسالج بماان ذاڪرتج ڪلش حلوه وتذڪرين الحدث بالتفاصيل ..

ڪنت متمدده ڪعدت لحيلي تربعت اباوعله بتڪ عين ورفعت اصبعي بتهديد ـ ياويلڪ اذا استجواب ...

ضحڪ ڪال لا لا والله بس صحصحي شو احسج منعسه ـ

رديت مصحصحه ڪول ـ

محمد ـ رجعيلي ذاڪرتج من صارت لجين ـ

مها ـ اي نهايه شهر الثالث ـ اذارـ.

محمد ـ اي ڪملي شلون وضعنا بوقتها ليش ليلى مااجت يمنا من جابت ـ

مها ـ اني ڪنت جايبه ميس وانس واوس ـ من جابت ليلى عمرهم ثلث اشهر واني ادوام ڪليه مرحله اولى ـ

لاتذڪرني بذيج الايام ـ ڪان النوم حسره عليه ـ

اڪعد الفجر ارضعهم ـ

وهاي غير انوسه والياس ـ ومدارتهم ـ

واروح للدوام شوي وانام بالقاعه ـ

وخالتي راحت يمها بقت يومين خميس وجمعه ـ ورجعت ـ

وليلى راحت لاهلڪ لان حماتها هم ڪانت جايبه بنتها نمارق بوقته عمرها يمڪن شهر ـ

محمد ـ اي ڪملي ـ

مها.. اي شنو بعد ..

محمد ـ اي شصار بيها هناڪ ـ واڪعه ومتاذيه ..

مها..اها اي اذڪرت يمڪن ضغطها هابط وواڪعه ومتاذيه وداخله مستشفى.. وضلت فتره تعاني من الالم ...

محمد...تدرين هسه تڪول بيومها زوجه موفق مسويه الها مشڪله وڪايله للعار اختڪ تريدنا خدم الها ـ

وهو ضارب ليلى وفاقده ونايمه مستشفى ومن وقتها الدڪتوره ڪايله الها رحمج متضرر ...

والحمل خطر عليج ـ

مها ..والله ماادري بوقته ڪانت متاذيه بس ڪالت وڪعت ـ

محمد ـ باجر اخابر عمتي ام ڪرار لان هي وياها بوڪته بالمستشفى..

وفعلا ثاني يوم خابر ـ وڪالت اي صدڪ ڪلام ليلى ـ

بوقته ابوڪ طردهم من البيت هو وزوجته بس شنو الفايده هي الاتعذبت واسبوعين نايمه مستشفى واني وياها وڪالت الها الدڪتوره رحمج تضرر والحمل خطر ؏ـلى حياتج وبنتها خلينها يم ام سيف زوجه ڪرار ـ

لان ام عادل جانت مريضه وزوجه عادل لڪتها حجه وراحت لاهلها لان انطردت اختها ـ

بيومها انقهر و يڪولي وجنتي تلوميني صالح اهلڪ وخطيه اهلڪ ـ

واني بس ؏ـلى قهري عليها السنتين العاشتهن يمهم واحنا مويمها معاملينها معامله الڪافر مايسويها ـ

وبذاڪ اليوم بليل اتصلت عمته وسولفتله عن زوجه صبيح شنو مسوين بيها ومشوفيها انواع العذاب وحتى تهم تاهميها ـ
وابنها عمره اشهر اخذته منها ام صبيح وعلمته عليها ـ
وين تروح تاخذه وياها وعلمته يتفل ؏ـلى امه ..

ومن احترڪ بيتڪم هو مات عمره ثلث سنوات ـ بجت وصرخت ؏ـلى ابنها وتعارڪت وي ام صبيح تڪولها ابني مات بسببج وبذاڪ الوضع ساجده وفاهمه ڪتلنها..

ـ وابو ڪرار ڪالها. سامعه بقصه سيدنا الخضر وموسى عليه السلام ـ
من قتل الطفل لان امه وابو صالحين وراد ربج يعوضهم بدل منه ـ

هذا الطفل مات لخاطرج انتي خوش مره لوباقي وتربي ام صبيح يصير شراني مثلهم ماتجيج منه بس المسبه ـ

من اجو اهلها وشافوها فوڪ موت ابنها مڪتوله ـ

ڪعدو عشاير وڪل الكلام تسولف ـ حتى تهمهن الها ـ

اتطلڪت واخذت حقها منهم  ڪامل ـ

وهسه اتزوجت وعدها ولد وبنيه وعيالها متخبلين عليها ـ لان خوش مره ـ

وذاك صبيح وين يتوجه محد ينطي مره ..

وانت الله يحبڪ من اخذو البيت وماجبت زوجتج وعشت وياهم ـ

جان صار ڪاتل ومڪتول ـ

وصدڪ بيومها محمد ڪال

ـ فعلا الله انطاني( منحة في ثوب محنة، وعطية في رداء بلية،)..

وهو اني ؏ـلى البعد ماخلصت من حقدهم وشرهم ـ

صاحت عليه ابتسام ڪالت محمد يريدج ؏ـلى التليفون ـ

جاوبته وسالته على عمي ڪال زين شوي احسن ـ ووضعه مستقر ـ

شوي ونرجع ـ

اتفاجات ڪتله ماتبقى يمه ـ

ڪال شبقى يمه واني وهو بهذا حاله عاتبته علمود ليلى نار بڪلبي ـ

يڪولي هو ابو صبيح راد ينتقم مني وانتقم بموفق ..

مها ـ توڪل بالله خطيه لاتزيدها علي فوڪ مرضه ـ

ڪال الله ڪريم ـ

ڪعدنا اني ونجله ـ

وڪالت تسجل هيام بمدرسه متوسطه ـ

باليل اجه محمد رجعنا للبيت ـ

مبين ؏ـلى ملامحه التعب سبح ونام ..

سالت خالتي شلونه ابو محمد ـ ڪالت زين مثل اخر مره مرو علينه ماعنده فرق واضح ..

خالتي هم حسيتها ضايجه ـ

ورجعت سالتها عن محمد ـ

ڪالت احنه ماعدنا ڪلب يشيل حقد مثلهم حتى حجايه الحق لو نحجيها نتندم نخاف الله ـ

مها ـ خطيه ابو محمد لان مريض ..

خالتي ردت لا مو خطيه. على ڪلام اهلهم من ابو محمد بعمر الياس وهو ابن عمه عداوه مايوم تصالحو لو تصافو ـ
اذا هذا حالڪم ليش تورطون الناس وياڪم ـ

اني طبني مرض ماڪاسر خاطري غير محمد وليلى ـ

بحيل الله ـ بس ابو محمد يصير زين لاڪطع ڪل صله تربطنا بيهم لو اعرف ادخل جهنم ـ

مااخلي شرهم يصل لاولاد محمدـ

مشت الايام والبنات سحبن الوثائق علمود التعيين ـ

وڪلت لمحمد اريد اقدم بلڪي احصل تعيين بالمدرسه الطبقت بيها ..

ومحمد جابها منا ولافها منا وڪال لا انتي يحقلج تڪونين معيده ـ

وخلي نشوف ڪم يوم تداومين بالاسبوع ـ

وادري ڪلامه مجرد بنج وتخدير اعصاب ...

وبعدين ڪتله شوڪت نروح للجامعة اقدم معيده والدوام مو ڪل الاسبوع ـ

رد عليه ارتاحي هالسنه ـ والسنه الجايه قدمي ـ

مامقتنعه بڪل ڪلامه ـ

بس مالحيت لان السنه انوسه والياس اول ابتدائي ـ ويحتاج الهم تهيئة نفسيه واهتمام لان الاول اساس الهم ـ

طبعا عمرهم لشهر الواحد ياله يڪمل ست سنوات ـ يعني يتسجلون وي مواليد السنه القبلهم ـ

هاي غير انس وميس واوس روضه ـ ڪلش متلهفين احسهم لان اخوانهم قبلهم دخلو روضه ـ

خيطت الهم ملابس حلوه واربطه ورتبتهم ـ

وخالتي تسمي وتصلي تخاف عليهم من العين ـ

وڪل يوم تطلع خبز ومن الطبخ الموجود تودي لبيت ايتام ـ تڪول صدقه لوجه الله يحفظ اولاد محمد ...

امي بهيه رحنا الها اني وخالتي عصريه اخذنا من خاطرها علمود وفاه امها الله يرحمها ـ

هاي الفتره صرت اخيط ملابس طلعه ومناسبات ـ والحمدلله هواي اشياء ڪنت استصعبها صارت عندي سهله

وصرت اتفنن بالفصال اخذ الموديل من البوردا اغير واضيف ـ

زبوناتي المدرسات الڪانو وياي بالمدرسه الطبقت بيها ـ

واحلى شي من تجي وحده عليه تختار فصال واخذ قياسها ـ

خالتي تاخذ اطفالي وتڪعد هي وياهم بالغرفه وتسد الباب تڪول اخاف عليهم من العين ...

وڪرستين اخذت مني مجله الاطفال ـ
وخيطت للبنات برمودات ڪابوي قصيره وقمصان احمر مقفل ربع ردن ڪلش حلوات ـ

والاقمشه طبعا من الباله ـ

فنانه بڪلشي ڪلش يعجبني خياطها ـ

تڪول هي الباله اوربيه ـ ومن تجيب قطع تنسق ساده ومشجر وتخيطه تنوره قصيره وقميص او شورت وقميص لبناتي ـ

ڪلش انيقات بحيث ام حسام وابتسام عبالهم اميره وعمتي عنيده دازتهم الي من الامارات ـ

وعلى وقت فراغي اغير بالبيت لو البردات لو الشراشف ـ

لو ازرع بالسنادين صارن من باب الهول لباب الحوش واني اطمع بالمزيد ـ

وبيوم جابو عمي ڪلش تعبان اخذو للدڪتور وغير ڪل علاجاته وڪال لازم تمارين علاج طبيعي ..

وقررو يبقا يمنا الۍ يتشافه وام عادل وياه هي اصلا مريضه ..

وعادل وعمات محمد يجيون يشوفونه يطمٵنون علي ويرجعون ـ

ڪالو يحتاج عنايه وراحه نفسيه واڪل صحي ـ

محمد جابله ڪره صغيره مطاطيه  علمود يمرن ڪف ايد ـ

وتمرين اخر ثقل بسيط لازم يرفعه من الارض وڪل يوم يزيد العدات ـ

واسعد يمرله ڪل يوم يقيس ضغطه ويجيڪ صحته ـ...

اجه ارشد للعراق بقا بس اربع ايام حسيتهن لمح البصر ـ

رغم بيوم الاجه يم اهلي ڪعدنا اني وياه وسولفنا هواي ومن سالني ؏ـلى التعين ـ ڪتله انفتحت بالقسم دراسات بس الاولويه لخريجين السنوات السابقه ..

وان شالله بعدين اڪمل ..

واجاني للبيت يشوف عمي ـ وهم ڪعدنا ڪلنا تعللنا ـ

خالو ادريس وعمتي عنيده رجعو للعراق بعد مايرجعون للامارات ـ

واميره ضايجه علمود امها ـ

وبعدها اجوي جماعه ڪرڪوك عمه نجله ـ ام روز وبناتها ـ

وهاجر ولقمان وولدهم ـ

مسڪ وعبد العظيم ابن هاجر وهيا بنت ارشد نفس الشهر صارو بينهم ايام ـ

ومسك سحلتهم ـ عبد العظيم ماعنده شعر اڪرع وهي تريد تڪفش تعصبت علي وڪفخته براسه ..

ونجله تخاف علي تموت علي لان يكولون يشبه ابوها ـالله يرحمه ـ من اجو اخذته يمها وهو بس طاير وراها ..

روزه صديقتي ڪلش مشتاقه الها صديقه الطفوله ـ
همات ماحسيت شبعت من شوفتها والڪلام وياها ...

لان عمي يمنا اجي ساعات وارجع ..

ومن تقرر ثاني يوم الصبح ارشد يسافر ـ

اتصلت ؏ـلى اهلي وڪلت لارشد هم تحسبها عليه انتي جاي و عابر مسافات و دول واني ماشبعت منڪ شوف ـ

ضحڪ ڪال البيت مليان خطار ؏ـلى اساس اجي ومارهمت ـ

شوي واجه هو واميره وهيا ڪال نتعلل ونرجع ورانا سفر ..

وبقو يمنا للصبح اصلا مانمنا بقينا ڪاعدين ونسولف ـ

وهو على اساس اجه علمودي اشو تراوسو هو ومحمد. ماعرف منين بدو ولوين وصلو ـ

واني واميره ڪبالهم نسولف ـ ڪالت بيوم المناقشه مالت ارشد قبل لايدخل اتصل على محمد بالمقر مالته يڪول ارتاحيت سمعت صوته ـ اذا اڪولج ماڪو يوم مايذكره ـ

اشڪد محبوب هناڪ وعنده اصدقاء وحتى عراقين بس مو مثل محمد يڪول محمد هو بوحده الاربعين ماعنده الاشباه التسع وثلاثين ـ

رغم يحب الياس وجابله عطور يڪول هو يحبها ـ ودايم يذڪره ويتصل بي ـ

ڪلت الها ومحمد نفس الحال ـ غير ڪل يوم يباوع لانس ويڪول اووف يخالڪ ارشد ـ

وعمي يڪول لا انس يشبهڪ من انت بعمره جنت البسڪ الشماغ والعڪال مالتي وهسه هو نسخه منڪ من يلبسهن ـ

اميره ڪالت هم اثنينهن عيونهم خضر وانس عيونه خضر ـ يشبه منو منهم هو الربحان ـ اهم شي ياخذ صفاتهم ـ

مها ـ اي والله اهم شي ـ

انتبهت ارشد يباوعلي يضحك ـ عبالي يحجون بيه ـ اشرلي على مسك صايره صديقه هيا ـ

ساحبه ڪفها تلعبها باش باش هيا نامت بالفراش وعضتها البزون ـ تڪولها بلغتها المڪسره. باي باي. داده لوله. ميو ميو ...

وتدغدغها وهن يضحكن ـ هاي اللعبه محمد يلعبها الها ـ

ارشد ڪال من مصلحتڪم اني بعيد ـ لوقريب عليڪم هاي مها الصغيره اڪل اصابعها واخليها بلا اصابع ـ

باوعت لاصعبي الصغير الشابع عض ـ  اريد اعرف منو طالع على منو ـ
محمد فهم وضحك ..

ودعونا الصبح ودعوا اهلي وسافرو ـ

بعد يومين من سفرهم اتصلت باهلي اسال عن عمتي عنيده ـ

نجله ڪالت راحو ڪلهم لڪرڪوڪ ـ

خالي ادريس يسوي تنازل بالبيت الاشتراه بڪرڪوك لعمتي ايهان ـ ويحوله باسمها ـ

اتفاجات ليش ـ

ڪالت مو من ضمن وصيه جده ريمه يٵمنون بيت لعمه ايهان لان زوجها رجله من تضررت بالصيد وتعوقت ـ وجده خافت عليها ـ موصيه من يصير عدهم امڪانيه اڪثر يامنون الها بيت باسمها..

وبيتهم الڪان باربيل باعو وجاب بيت بڪرڪوك و جانو ڪاعدين هي وعمي لقمان ـ

هسه صار بيت بصف بيت عمي وعمتي ..

رديت الله يوفقه ان شالله وعاشت ايده ويرحم جده ريمه ..

نجله ڪالت عمتي ماقبلت بس هم ڪالو هاي وصيه ولازم تتنفذ ـ

ردتهم اي اني ڪاعده وي اخوي ومامحتاجه ـ هاي غير انتو مامقصرين ويانا ـ

ومو شرط اني اسڪن ابيت وباسمي ـ

وعمتج عنيده ڪالت لو ماعدنه ڪولي هالڪلام بس الخير موجود هو مشتمل بسيط وبصف اخوج ـ

فرحت الله يوفقهم ان شالله ..

وڪالت من يرجعون يڪعدون ابيت ارشد هذا اقتراح خالي يڪول شبقا من عمري اريدها قريبه عليه وهي فرحت بس خالج ادريس متردد ـ

مها ــ اسم الله ؏ـلى عمره ـ. حقه والله ـ

واني شوڪت اشبع من شوفه ارشد ..

نجله ڪالت حقج .. تدرين خالي ادريس يڪول هناڪ شغلي وي شرڪات الها اسمها بس شسوي لعنيده تڪول مليت من الغربه ومااريدها تنقهر...

خلود اتعينت بمدرسه متوسطه بس شوي بعيده عن بيتهم ـ

نتخابر دايم وتحجيلي بطولاتها..

والحمدلله حامل ـ ڪلما اخابرها تڪولي مشتهيه عسل والنبي ـ ولو تدرين شسويت حڪيت شعري ڪله حتى يطلع شعره اشڪر وحڪيت بؤبؤ عيني حتى العيون تطلع عسليه والشعر اشڪر شلوني بالله ـ
رديت مو ڪلتي عقلت ـ

خلود ـ لااا والنبي مااعقل ـ

ريتا سحبت وثقيه وماقدمت تعين تڪول عاجبني تزيين عرايس ـ ودخلت يم وحده اول شهر مجاني تشوف شغلها وبعدين تحسب الها حسب الشغل..

عمي اخذنا للدڪتور يڪول عنده تحسن قليل ـ استمرو ؏ـلى العلاج الطبيعي ـ
وعلاجه مغير منه وبعضه نفسه ...

ڪرستين نتخابر اني وياها يوميه وڪلت الها راح يصير عندج طفل وماسولفتي الي قصه حبڪم ـ

ڪالت والرب عدڪلمتي بااقرب وقت اسولف الج ـ

وبيوم اجتنا باليل يتعللون هي والياس جانت داخله بشهرها ـ

الياس بالاستقبال هو ومحمد وعمي ـ

وخالتي هي وام عادل دايم ڪاعدات سويه وسوالفهن حلوه ـ

و اني وڪرستين بالمطبخ نحضر ضيافه سوينا ڪاڪاو..

واجتني مسك شاده صار ايام ڪل شوي تريد ترضع ـ سمعت بيه  اريد افطمها ـ

لو جن جنوها عليه ـ

ڪلت الها روحي صيحي الياس وتعاي وهي ترد مااااا.

وصلت الڪاڪاو الهم وهي وراي نطتيها لابوها من الباب سالني شبيها ڪتله جاعت مفجوعه ـ فهم عليه ڪال بس لافطمتيها ـ ڪتله اي ...

ومشيت قبل لايرد اخاف اضحك ويڪشفني..

رجعت للمطبخ يم ڪرستين سالتني وينها عسوله ـ

رديت يم ابوها ـ

اريد افطمها ومايقبلون ـ

ڪرستين .هي ڪملت سنتين ..

مها ..اي سنتين ويومين بالضبط ـ
والقهر ڪلما اڪول افطمها خالتي ومحمد مايقبلون يڪولون لاتشوط وينكسر عودها ـ شينڪسر وهي جنها ـ امل طه ـ

وماخلت طفل ماسحلته لااكبر منها سلم منها ولااصغر منها ـ

ڪرستين ـ فدوه زين تسوي بس اني اعقد وياها اتفاقيه تصادق طفلنا ـ

لان الياس يوميه يسالني شوڪت يجي بالسلامه ـ وهواي مهوس بالطفل اخاف عسوله تسحله وتخرب العلاقات ـ

مها ...لااڪيد نعقد اتفاقيه صلح ـ

وهسه قصيلي القصه مالتڪم واذا ماڪملتي ماتروحين اليوم لبيتڪم ـ

اللهم للصبح ـ

اخذنا فناجين الڪاڪاو ورحنا للهول ـ

ڪرستين ـ منين ابدي ..

مها ـ من البدايه وممنوع تطفرين ولاحدث ـ

ڪرستين ـ ڪانت نهايه سنه طلعنا سفره احنا واقاربنا للغابات ـ امي وخالتي ڪلش مضبوطات بالطبخ ـ واني ام علمتني من صغيره لان تزوجت ام ريتا وصارت تعتمد عليه بڪلشي ـ

فاني ڪنت اساعد امي نصب الاڪل ـ واجتني لارا ڪالت يردوج برا ـ

طلعت جان الياس ـ
ڪال ليش ڪل البنات برا وانتي لا ..

رديت نصب الاڪل واجي ـ

رجعت صبينا الاڪل حسيت بالياس يباوعلي ..

من ڪملنا اڪل ومشينا انطاني ورده ـ

ذاك الوڪت اني خامس اعدادي وهو ڪليه فرق بينا خمس سنوات ـ
ولارا نفس عمري ـ

فرحت بالورده واتشڪرته ـ
بعدها رجعو لبغداد ـ واحنا ڪنا بالموصل ـ

الياس عايش ابغداد هو ونجوان ماعدهم اخت وامهم وابوهم متوفين ـ

ومن تخرج من ڪليه القانون

اجانا للموصل وصارحني هو يحبني وناوي يتقدملي ـ بس ذا الوقت ما كنت مڪمله 18سنه وهذا شرط مهم بالزواج عدنا  ـ

بعدها ابوي قرر نسڪن ابغداد ونجوان حصل النا البيت قريب منهم ومن ام ريتا ـ

وڪان ابو ريتا بعده ممسافر ـ

بعنا املاڪنا بالموصل وسڪنه ابغداد ـ

وهو اڪثر الوقت من ينزل مجاز يجي  يمنا ويڪول مااحس يڪمل يومي اذا مااشوفج

وتقريبا ڪل اقاربنا يعرفون الياس ناوي يتقدملي ـ

ابوي فتح محل ذهب ابغداد ـ
لان بالموصل هو ڪان صايغ ذهب ـ

بيوم اهل لارا عزمو نجوان لان ترقى بمنصبه وعزمو الڪل ـ

من رحنا لبيتهم واني ساعدتهن والياس اجه سالني ڪملتي ـ
طلعنا للحديقه وڪال لام لارا بعد اذنج اقطع ورده ـ

هي ابتسمت وڪالت ڪل الحديقه ڪدامڪ ـ

وهم قطع ورده ونطاها الي

من رجعت للمطبخ شفت لارا تبجي وامها ماقبلت عليها بس مافهمت شبيها ـ

مرت الايام وابوي خسر بالصياغه خساره قويه لان جابو اله ذهب مغشوش ـ

بس الي ڪال ـ ماخبر احد من اهلي ـ وبقا يحاول يصفي الامور.

وبيوم رجع ڪلش تعبان اني ڪاعده اقرا ـ لميت ڪتبي وتلڪيته جبتله مي ـ

حجالي على الخساره وانطاني الفلوس الي تبقت اله وڪال هذا ڪل مااملڪ
ماڪال لامي يخاف عليها هواي جان يحبها وهي نفس الشي ـ

ڪال اذا صارلي شي اهم شي امج اريدج قويه..

بنفس اليوم صار بي سڪته قلبيه ـ

وامي انصدمت صوتها ماطلع وتمرضت هواي

صار عدها غده ـ هاي غير نفسيتها ادمرت ـ

وتخيلي حالنا ـ يوسف وانجيلا متوسطه

وصارت المسؤليه عليه ـ
مرت شهور تعبت ڪلش وحال امي يڪسر الخاطر ابد ماصحت بعد ابوي ولافرحت ولاضحكت ـ

الياس ويانا ويواسينا على حالنا ـ
ونجوان جان داير باله علينا

هالفتره عرفت لارا تحبه ..

وتدري ناوي يتقدملي ـ
وڪتمت وسڪت

بعدها ڪم مره سالني عن موافقتي.

واني الحمل عليه امي واخواني ـ وهم وصيه ابويه

ورغم هذا داومت ڪليه ـ

واني طلبت منه يستقر ويتزوج لارا

وهي تفاجات من سمعت واجتني وسالتني ـ

والصراحه هي انسانه طيبه وحنينه ڪلش

مها...صح مبينه انسانه طيبه. ـ
بس ليش انتي طلبتي منه يتزوج لارا ـ

وهو ڪلش يحبج ـ

ڪرستين ـ بعد استشهاد نجوان ڪلنا تعبنا وحزنا ـ بس الاڪثر الياس صار وحيد وفقد السند بالحياه

وخاصه نجوان شخصيته قويه ـ

وڪان صاحب ڪلمه ومواقف حلوه على ڪل اقاربنا ـ

يعني رحيله اثر علينه ڪلنا

وحاله الياس ڪلش صعبه

ماحبيت اڪون انانيه واترڪه عايش على حبي واني وضعي صعب ومااڪدر اترڪ امي واسس. حياتي ـ

حتى بعد ماسافر ابو ريتا ـ

وام ريتا ڪالت اني اعتني بيها ـ

بس امي ڪلش متعلقه بيه احسها صارت هي بنتي واني امها . ..

وام ريتا هم عدها وضيفه ومسؤليه ريتا ـ

ومن حبي اله حبيت يٵسس عائله ويطلع من قوقعه الحزن ..

وطلبت يتزوج لارا لان عرفت ڪلش تحبه وتڪدر تسعده ـ

هي عاشت وياه اقل من سنتين ـ
قدمتله ڪل الحب ـ وعلى ڪلامها ڪانت تڪول زين وياي بس يخطا باسمي ويذڪر اسمج ـ

واني اڪولها يمڪن يختبر حبج ـ ودايم اڪلها الياس يستاهلج. ويستاهل حبج اله ـ

وهو مصارحها قبل لايتزوج هو يحبني وڪايله ادري بڪلشي ـ

ومن يلتحق هي تبقا يمنه وشنو تحتاج تڪولي ـ وڪل الفتره العاشت يمنا والقبلها ماصار بينه مغثه بڪد الذره ـ
دام احبه لازم اتمنا اله سعاده ـ

ولو اني متزوجه الياس بوقتها وي ضرفي ـ

ڪان ماڪدرت اسعده

وبعد ها هيه مشيئه الرب...

والباقي انتي تعرفينه ـ

مها..زين ليش بالبدايه ڪالو متردده واشهر ياله وافقتي ـ

ڪرستين ـ اي صح ردت يعيش فتره حزن على لارا لان تستاهل ـ

واني تعودت على حياتي ومسؤليه اهلي ووقتي مقسم بينهن ـ

اخذنا فتره ڪافيه وبعدها تم الاتفاق ـ

وبدايه زواجي هو يضهر حبه واحسه مثل اول مره هدالي الورده ولهفته واضحه ـ

بينما اني ماڪنت مثله ـ

واحب اڪلج شي اني تعلمته منج ـ

من خلال ڪلامي وياج وصلتي بيج ـ
رغم انتي اصغر مني بسبع سنوات

بس اتعلمت منج اهتمامج

بادق التفاصيل رغم مسؤليتج ڪلش مهتمه بمحمد ـ

قلدت هالشي وازدادت ايامنا حلاوه ـ

ويمڪن هو حس هالشي اتعلمته منج ـ

من اڪـَول اله وصلني لبيت مها. يرد عليه مو تدللين ..

مها ـ فدوه فرحتيني ...

بعدها راحو ـ

مرت ايام ـ واني اغلب وقتي بالبيت ـ
اسمع برامج الاذاعه متابعتها ڪلش لان اسمعها واني اشتغل الراديو يفتر وياي ـ

وادرس اطفالي الحمدلله والشڪر ـ
ماعندي اي معاناه بتدريسهم بس احب اڪون وياهم بڪل درس حتى الفنيه وغير ڪراسات الخط ـ

وقصص مصوره .. اشرحها الهم ويرجعون هم يقصونها الي..

همه نفس مدرسه حسام ابن نجم وهواي

داير باله عليهم ـ

المعلمه تڪول عبالي اخوهم ـ

ام عادل صار اڪثر من شهرين يمنا لحد الان تستحي من اغسل ملابسها ماتقبل ـ ماي اذا مااني انطي الها ماتشرب.

ياربي سبحانك شڪد هاديه.
شفتها تضغط بكفوها على اقدمها ـ
حاولت ادلڪهن الها ماقبلت تڪول استغفر الله ـ

صحت انوسه والياس ڪلت تعالو دلكو اقدام بيبي. والي يدلك صح ابو بطل ـ

اجوي ڪل واحد لزم قدم يدلڪها ويسالونها ياهو يدلك صح ـ

انوسه فاهيه تمسح عليها ـ

بس الياس التدليك مالته مضبوط ...

ام عادل تڪوله انت ابوڪ بطل ـ

انوسه زعلت وڪعدت اني ادلك بمكانها ـ

دخل محمد جايبته انوسه معترضه ـ

من شافنه ضحك ـ

ڪال ليش تڪولون على انوسه ابوها مو بطل ـ

وهي صارت نادره وڪعدت تدلك بدالي ...

تڪوله شوف بابا ـ

وهو يڪولها عفيه بنيتي بنت البطل ..

بعد الحصار تغيرت العمله النقديه ڪانت سويسريه صارت طباعه ونزلت عمله الخمسين دينار لونها برتقالي فاتح
والعمله بيها خط ونخله مضلله وفسفوره ـ

وڪانت سهله التزوير ـ

وصعب يمشونها اهل المحلات ـ

وبيوم خابرتني خلود ڪالت اسمعي اليوم شنو صار ـ المدرسات البارحه استلمن راتب واني ومدرسه مااستلمنا اسمنا بعده ماجاي لان تعيين جديد

وباليل بالحلم اجه راتبي والمديره تريد تنطيني خمسينات مزوره ـ

واني اڪولها اريدهن خط ونخله وفسفوره ـ

ماحسيت على روحي الا امير يصحيني يڪولي ولج يانخله يافسفوره ـ

اثاريني اصيح بصوت يافشلتي ـ

مها ـ حقج يمعوده تعبج هذا اهم شي مو مزورات..

ــــــ

وبيوم 6/1/1993

ڪرستين جابت بنيه وسمتها آن ـ

ڪلنا فرحنا بس مو مثل فرحه محمد لصديقه ـ
والحلو ڪان وياهم بالمستشفى ..

يڪولي صار 12 سنه من قرر ياسس حياته وي ڪرستين ـ

وشاءت الاقدار ـ وهيج جرت الامور ـ

والحلو ولادتها بيوم عيد الجيش ـ 6ڪانون ـ

لوشايفين الياس وفرحته يحشش يڪول يصير اقدم اجازه بدون راتب ـ

صرت ابو بيت ـ

اريد اڪابل بنتي وزوجتي ـ

اتصلت بارڪت الها وڪلت راح امرلج باليل ـ

ڪالت جيبي مسك ــ

رديت يمعوده خلي الله ساتر عليڪم ـ

ڪالت جيبيها معليج ـ

محمد وصلني لبيت ڪرستين اخذت مسڪ

من وصلنه يمها ريتا وامها وساندرا زوجه يوسف ـ

سلمت عليهن ـ ماشالله البنوته ڪلش حلوه ـ ماامهدتها ملبستها اوفر وڪفوف وجواريب وڪلاو طالعه لعابه ـ

والفرحه واضحه عليهم وخاصه ڪرستين امنيتها بنيه ـ

واني اباوع لمسك مرڪزه ڪلش بيها خفت لاتهجم عليها ـ

ڪرستين اخذتها مني وخلت آن بحضنها تڪولها شوفي هاي صديقتج تبوسج لعبي انتي وياها ـ

مسڪ سحبت ايدها وتمسح الها تڪول باي باي ـ هاي لعبتها المفظله عود باش باش ـ

ڪرستين ڪالت لازم اسويهن صديقات ـ

واخذت لعبه صغيره من الكريكوت مالت آن ونطته لمسك ڪالت هاي من آنه الج ـ

مرت الايام ومسك فطمتها ـ بس دخلت بحرب مو بس من محمد لا هالمره خالتي ڪلش ماقبلت تخاف عليها ـ

يومين اني فاطمتها لان محمد بالواجب مايدري ومن اجه ماڪتله ـ بالليل شدت عليه تبجي وشافني نطيتها نستله وهي تدفعها ماتريدها ـ

ڪال فطمتيها رديت اي ـ

ڪعد على حيله حسسني مسويه جريمه ابن ليلى ـ

يڪولي خطيه قابل شڪد راح ترضع من الليل للصبح ماتشرب استڪان حليت عوفي الفطام رجعيها ترضع ..

مها ـ هي خطيه واني مو خطيه ـ يمعود الليل ڪله مساهره وياها ـ ڪل ماتڪبر
تدور رضاعه اڪثر والله هلڪتني ـ

محمد ــ لحضه انتي مو تدورين رشاقه وتلعبين رياضه ـ وهاي بفضل مسڪ رجعتي لرشاقتج ڪانج مامخلفه ولاطفل ـ

غلست وڪعدت اقنعها تاڪل وهي تاكل وتبجي ـ

محمد صار يسايسني يڪولي تقبليها تاڪل وتبجي مهضومه. ودموعها على خدها صايره ڪلبج قاسي ...

واني اڪول بداخلي لو يجي جدك التاسع عشر ـ

وهي العوبه خلصت النستله وبعدها تبجي .. سحبت ڪلينڪس مسحت الڪاڪاو منها ـ

ولان تشوف المحامي مالتها مڪابلنه تشڪيله تڪوله ممم ـ

يڪولها هسه تنطيج وليدي هاي ماما ام ڪلب الطيب ـ

واني خليتها بحضنه وسحبت الغطا وكتله لو يجي جدك ...

ضحك يڪول لا على بختج مها عود شهر الجاي افطميها ـ

واني ارد على ڪوله منصور اباااااد..

ثاني يوم بالنهار هم شدت ڪلش وصخنت وتعال يالتخلصني ـ

خالتي ومحمد اثنينهن عليه ـ اكلو ڪلبي ..

بس هالمره اني عد ڪلمتي ابد ماتراجع ..

وهالفتره عمي تحسن واضح بصحته ودايم محمد يطلعه العصر يمشي يرحون لاهلي لو ياخده لڪازينو وعنده اصدقاء من المحله دايم يڪعد وياهم ـ

للعصر محمد اخذ عمي ومسك وراح لاهلي ڪال اڪول لابوج عليج ويضحك ـ

رديت بمزح هو اني ڪلت لابوي اصلا مابيه حيل ادخل محاڪمكم العسڪريه ـ واستاذنت منه قبل لا افطمها ـ

وڪال اهم شي راحتج بنيتي ـ

محمد وبنته مشكلتهم ـ

خليت بيد مسڪ نستله خاف تبجي ..

من رجع ڪال ابوج يڪول ڪلها تبطل ماتفطمها ـ

واني اضحك مغلسه ..

بعدها مااعرف علب النستله منو يجيبها ابوي لو اخواني ـ لخاطر مسك خانم ـ

لان شافوها بيدها بيوم الاخذها محمد يمهم ـ

ڪانت ڪلش طيبه اسمها فرندو. وسعره القطعه دينار ـ

ومره اجتني خلود وسولفنه بالموضوع ڪالت لازم احط هالشي وي الحڪم والامثال ـ

سامعه من يڪول قابل على راسج ريشه ـ

اخلي مثل ـ قابل مفطومه على فرندو ـ

لو ابتسام تخابرني تڪول على عين جنتي صرنا آل بيت الحجي ڪلنا ناڪل فرندو لان تعرفين بي مايفرق ـ يجيب الڪم والنا ڪل بيت علبه ـ

خو اني الله جابها عدله حامل والعلبه يادوب تڪفيني ـ وصوفي منشور على بيت نجله ياكل من حصتهم ويصيح لنجله ماما واسمى همات تڪولها ماما

اليشوفهم يڪول توم اخوان ـ

رديت عافيات ربي يحفظكم ـ

مسك من فطمتها وصار ابوها ياخذها العصريات لو لاهلي لو على الياس ـ
والياس يكول شوكت تڪبر بنتي وهم اخذها ونطلع ـ

شلون اثنين ـ

مسك صارت من يطلع ابوها تبجي وراه مااقنعها تسڪت الا تشلع ڪلبي ـ

ومحمد دوامه مرات يومي وينزل العصر ومرات اسبوعي ينزل خميس ويلتحق السبت ...

بهاي الفتره ريتا همات اتعينت ـ

لان المدرسه البيها ڪرستين مابيها مدرسه اختصاص اسريه. بس ڪرستين وماخذه اجازه امومه ـ والمديره وكايله لريتا ماتداومين ڪل الاسبوع ـ

وشغلها بتزين العرائس ڪلش حلو تڪول بسرعه تقنته لان هي من ايام الڪليه حابه هالمهنه ..

ومحمد اخذ عمي للدڪتور ڪايل ماشاالله صحته تمام ـ

اغلب العلاجات مغيرهم وكايل اهم شي اڪل صحي وراحه نفسيه ـ

ومن رجع قرر عمي يرجع لبيته بالنجف ـ

وخالتي ڪالت ام عادل تبقا يمنا ماترجع

سمعت قبل ايام هي وخالتي تحجي انو زوجه عادل ڪلش مو زينه عليها وتقضي الوقت يم اهلها وتڪول اڪولها خلي واحد من الولد يمي رجليه مايعينني ـ

تردها ولدي مو خدم يمڪم ـ

ابو محمد ڪال لا ماترهم ـ صار اشهر ام الياس تدارينا حتى ماتوضفت ـ

ماقصرت والنعم منها بنت الاصول ـ

نروح هناك وعود امرلڪم وهي تجي وياي ـ

خالتي لحت تبقى بس ماقبل ـ

اجت ليلى تشوفهم قبل لايروحون وانوسه علمت لجين تدلڪ اقدام جدتها ـ
وكل وحده تدلڪ قدم ـ

والياس يجيب الها مي ـ

وبيوم الاجه عادل ياخذهم انوسه بجت على ام عادل وبجتها تڪول بيبي لاتروحين ...

اني اجيبلج مي مو الياس ـ

قنعتها ام عادل طلعت المسبحه من جيبها وڪالت الها خليها يمج حتى ارجع عليها ـ

ومن راحو بعد ايام صايره مشڪله بينهم

وام صبيح ماخذه بنتها ام رسول ـ

ڪايله لابو محمد بنتي مو خدامه الڪم ـ

وابو صبيح بالضيم حاله بسبب ابنك العار ماعرفت تربي واحنه ابتلينا.

عدڪم بنيه خلي تجي تخدمڪم ...

رغم عادل مهددها اذا طلعت بعد ماترجع للبيت ـ

واذا تضل تسمع ڪلام امها يطلڪها بس مافاد رايحه وي امها ..

ام ڪرار خابرتنه وسولفت لمحمد ـ

ڪالت عادل يداريهم ـ

وردت يجيون يمي ماقبلو ـ

راح محمد جابهم واڪثر شي انقهرت على ام عادل. هي من اجتنا قبل اشهر اخذت فتره ياله تعودت ..

ومن رجعت هالمره حتى اڪل بالڪوه تاكل ـ

ومحمد يڪولها يعني اني مو ابنج ليش ماتاكلين ــ

اعتبري هذا بيتج وعادل ابنج وطالع بيت بوحده تروحيله خطار او هو يجينا خطار

مااقبل ابد بعد تطلعين من البيت ـ

ورغم عادل باقي بوحده زوجته ماراجعه وڪايله اريد ارجع وامي ماتقبل ـ

وامها دازه خبر ماترجع بنتها الاتلزمون محامي حتى يطلع ابو صبيح من السجن مڪمل سنه من الحكم وباقي اشهر ـ

وام عادل وضعها ماتغير ومحمد شايل همها ـ

وبيوم اجتنا ام ڪرار وام حسن ـ حسيت ام عادل ارتاحت من شافتهن ـ

ام حسن ڪلامها ڪل حڪمه وبس تستغفر.. ومحبوبه ڪلش ـ

اتمنى بس اڪابلها واڪعد ـ

بقن يومين وبعدين فهمت محمد هو جايبهن علمود ام عادل ـ

عادل استاذن من ابو باع البيت واشتره غيره بمدينه ثانيه بعيده عن بيت خاله يڪول مليت من المشاڪل اريد اعيش مثل البشر ـ

وحطيت شرط ع ام رسول اذا ماترجع اطلڪها واتزوج ـ

واذا ترجع امها بعد ماتطب بيتنا ـ

وفعلا رجعت يمه بعد مشاڪل بين عادل وام صبيح وكايله هذا التخطيط موالك هذا تخطيط محمد ينتقم من عدنا ــ

رجعت زوجه عادل واجت يمنا اعتذرت من عمها وعمتها ـ

بس محمد ماقبل يرحون وياهم ڪالهم استقرو وارتاحو ومو بعيدين عليڪم ...

عمي هاي الفتره صار هو يطلع ويمشي ويروح بدون محمد وعنده اصدقاء بعمره يكعد وياهم ـ

بشهر اذار اجتني دعوه احضر معرض بالڪليه ـ والدعوه من استاذتي بالبحث ..

ومن حضرت طلبت مني نشتغل بمڪتب مالتها موجود بالڪراده تصميم وتنسيق قاعات مناقشات الاطروحات وصالات الاعراس والمناسبات ـ

ڪالت محتفظه بالصور مالت تصميم مشروعج وراويتهن لمهندسه وماجابت التصميم مثلج ـ

ڪلت الها افڪر واردلج خبر ـ

واخذت من المڪتبه ملازم English

علمود امتحان ڪفاءه اللغه ـ

بيومها اخذت الياس وانوسه وياي وردت اخذلهم لعبه ڪانت اكو سيارات صغار تڪويك الياس ماقبل يريد مسدس ـ مالڪيت مسدس وزعل ـ

يڪولي لو رايح لمدرستي احسن لان اخذتلهم اجازه ـ
وانوسه ماعجبها شي ـ

رجعنا للبيت ـ

وبديت افڪر بالمقترح مالت الاستاذه ڪلش عجبني ـ

عندي مجلات وبوردا تخص التصميم

وبديت اتصفح واجمع افڪار ابالي ـ

وخاصه صار عندي فڪره ڪامله عن الالوان وتناسقها ...

بقيت اقلب واخذ افڪار ـ

بعدها جمعتهم ورجعتهن لمڪانهن ـ

وانتضر يرجع حڪومتي الموقره واشوف رٵية ـ

ولليل رجع من ڪتله حسيت انضرب براسه ـ

سالني شلون يعني

فهمته ـ

اني مااتواجد يوميا اڪو مهندسه ـ

فقط من يڪون اڪو تصميم او تنسيق قاعه ـ وهالشي اثبات ذات اليه مو اڪثر ـ

وتدري اني احب التصميم وصعود السلم درجات ـ

وصار يبلع بريجه ومااقتنع مبين من ملامح وتعابير وجهه ..

ڪال شنو رديتي عليها ـ

مها ـ ڪلت الها افڪر ـ

محمد ـ ماادري شو مامقتنع او خليها بعدين نفڪر بالموضوع لان حاليا تعبان ڪلش وفاجٵتيني ـ

مها ـ اها على راحتك بس ياريت تفڪر خلال هذا الاسبوع لان نطيتها رقم تلفون البيت وكالت تتصل بيه حتى ارد الها خبر ..

اخذت ملزمه وتوجهت اريد اطلع من الغرفه صاح وراي ويييين ...

حجيت بدون مااندار اعوفڪ ترتاح لان تعبان ـ

طلعت للحوش خالتي فارشه حصير الجو ربيع ڪلش حلو ـ

ڪاعدين هي وام عادل بجهه وعمي بجهه ـ واطفالي يمهم ـ

خليت الملزمه وبديت اقرا بشڪل سطحي لان مااعرف اقر واحفظ ڪلمه

اذا مابيدي دفتر مسوده واڪتب ڪل ڪلمه ـ ومااريد ارجع للغرفه ويغير الموضوع ويرضيني ڪانو شي ماڪان ـ

شوي وطلع ڪعد يمنا ـ صاح مها جيبيلي براسيتول راسي ڪلش اذاني

ـ واڪول بڪلبي راسك ياذيك لو ڪلبڪ ـ

نهضت جبت ونطيته اله ـ

ورجعت على ملزمه بس لازمتها وبالي شارد ـ

ڪل ماارفع عيوني اشوفه يباوعلي ـ

خالتي تسال شبيك وليش راسك يوجعك ـ

حسيت اطفالي يغفون اخذت نيمتم ونمت من وڪت ..

ثاني يوم هو موجود واني لهيت نفسي سويت حمله على البيت وهو ڪل شوي يڪول ماڪافي بس باقي تشلعين الڪاشي وترجعينه ..

مارديت ـ

السبت الفجر التحق ـ

يوميه يخابرنا العصر اعرف توقيته لذلك ابد ماارد ـ

خالتي واطفالي حجو وياه ومسك تدردم علي ومرات تبجي تريده ـ

خالتي صاحت عليه سال عليج رديتها اي هسه

اخذ السماعه منهم واسده ـ

بعد خمس ايام من التحاقه اتصل العصر وهم خالتي ردت ڪالها انطيني المها اريد احجي وياها ضروري ..

اخذت التليفون ورديت علي ڪلت نعم ..

ڪال صار ڪم يوم  ماسامع صوتج شنو هالقساوه هاي ـ

مارديت ـ

ڪال تسمعيني ـ

ڪتله اي ـ

ڪال شو احسج تعاقبيني ـ

مها ـ لا ماڪو هيج شي ـ

سالني ـ اتصلت استاذتج ـ

مها ـ اي البارحه ورديت بعدني داافكر ..

ڪال زين اذا اتصلت او اتصلتي بيها ڪول الها لا ماموافقه ..

مها ـ يعني ڪلمتك نهائيه مابيها نقاش ولاتراجع ـ

محمد ـ اي والله ـ بس شو احسج. ضجتي زعلتي صح لو لا ــ

مها ــ حشاك عن التشبيه ـ بس اذا انت بمڪاني شنو تسوي تزعل تضوج لو شنو ـ

محمد ـ شو هيج شنو حشاك عن التشبيه

وبعدين اني اي قرار وتصرف اخلي نفسـي بمڪانج واشوف الانسب النا ـ

مها ـ قصدك الانسب الك ـ

محمد ـ احنا واحد ..

مها ـ خير ان شالله اخذ راحتك ..

ڪال وين بعدني دااحجي ـ

ڪتله اريد اتصلت بالاستاذه لان تنتضرني اردلها خبر ـ ڪلت هالشي لان توقعته موافق ودا يمزح وياي يستفزني ـ

ڪال ـ ياله عمري اتصلي واذا لحت لاتنطيها امل ـ

سديته بدون مااضيف ڪلمه ـ

بس والنبي العربي الا اشوفڪ المها الثانيه ـ

واخليڪ تترحم على الايام الماڪانت عاجبتك ـ

محمد ......

يتبع ــــــــــ

لاتنسو التصويت 💛🧡

وئام الشيخلي💞