#أبي_لم_يكن_إنساناً
البارت الأخير
للكاتبة لبنى الموسوي
ملاحظة مهمة/ البارت كامل 10000 كلمة
ينتهي لحد توديعي الكم..
فـ اذا شفتوا مقطوع اعرفوا الخلل من الواتباد احذفوا القصة من مكتبتكم ورجعوها يطلع عدكم بشكل كامل وبالترتيب المطلوب
متابعـة شيقـة 💜
انتهت الرحلة واغلقت الذكريات بـ وجهنا الأبواب
كنت هنا
طفلة لم تعي ما يفعلون
فـ تمادوا بـ افعالهم حتى وعت على ما كان جُرم بـ حق الإنسانية لـ تصبح أسيرة لـ ذاك الذي يدعي الأب
لم يكن يوماً أب
بل كان اشبه بـ شيطان رجيم على هيئة ذكر ،،،
عصى والديه فـ عصى بـ ذلك ربـه واذا بـه يفقد اسمى مراتب البشر في الحياة
نعم هـوَ قـد فقد إنسانيتـه ،، فـ (أبي لم يكن إنساناً)...
اليوم العرس
احلى يوم بـ حياة أي بنية حلمت وحصلت على حلمها
فزيت الصبح على صوت موبايلي يرن
رفعت راسي تعبانة كلش حتى نومي قل هالفترة باوعت الغرفة فارغة ماكو احد سحبت الجهاز همام ديتصل رديت بـ ابتسامة الووو
- الووو حبيتي شلونچ
- عاش من سمع هالصوت عيني رئيس الوزرااااء
- ههههههه لحظة بس بالأول صباح الحب
- بعد لتحاچيني زعلانة عليك ومتستاهل اجاوبك اصلاً
- ليش يولي
- هااا گتلي ليش مو بلا جاوبني أخر مكالمة النا شوكت
- البارحة الصبح مثل هالوقت
- يعني تعترف صارلك 24 ساعة ممتصل
شـ تشوف هالشي عادي
لا وفوگاها من اخابر حضرتك مترد وهسة تگول ليييش
- وداعتچ مشغول مشايف دربي بـ عيوني
اطلع الصبح ما ارجع إلا تالي الليل من التعب أنام على وجهي وكل هذا علمود منو غير علمود مرتي الحلوة
- والله حچي يفيدك
هيَّ بس دقيقة شتكلفك اذا حچيت بيها وياية لتتحجج
- وهسة
- قافلة عليك لتحاول
- يعني افهم من كلامچ ما بيها مجال نهائياً
- ما بيها
- ساعات قليلة وتصيرين بـ حضنچ وعود اراويچ المجال شلون يصير ماكو رجعة بعد طريقچ انغلق
- ههههههه شو انتَ كلش طالعة عينك هالأيام ليش بلا
- البركة بيچ غير
- لا والله انتَ وكح بس ما عرفت هالشي إلا لمن...
- لمن شنو كملي
- حبيتك
- وتقربت منك ونمت بحضنك وصرت بين إيديك مووو
- ههههه من اگول طالعة عينك تعترض وتشمرها براسي
- لا عمي ما اعتراض اني ملعب شتردين بعد
- ههههه لا حشاك ديلا روح لازم اگوم تأخر الوقت كلش
- يولي صدگ تحچين ؟!!
- شبيك
- مشتاقلچ وتدرين بـ هالشي مع ذلك مسمعت كلمة منچ
- كلمة شنو مفهمت
- كلمة حلوة
- اممممم شكر مثلاً لو لا عسل شنو رأيك
- انتِ العسل ولو صايرة متنطاقين
- هههههه هاي بعد تورطت بية يلا باي لازم اروح كافي
- ماشي ست روحي وحسابچ وياية بالليل بسيطة
- لا دخيلك مو گدك اني لتتحلف
يابة احبك واموت عليك وذايبة بكل تفاصيلك ومشتاقة الـ عيونك الحلوة بكبر هالدنيا وناسها كافي
- كافي مؤقتاً فاصل ونواصل
- هههههههه اگول حياتي شو گاعد شنو ما عندك شغل
- لا طبعاً عندي والـ فوگ راسي همْ
هسة بس اسبح واتريگ اطلع علمود اشوف الغدة شنو صار بي وها راح ادزلكم گدرين بـ إيد صديقي بلغي أم صالح عود واذا تحتاجون بعد بس خل تتصل بية
- اي تتدلل وعاشت إيدك مقدماً يلا صار لازم اسد الخط
- ديري بالچ على نفسچ
- وانتَ همْ
حچيتها وفصلت الخط ع السريع
گمت لبست حجابي وطلعت الجو محترگ بالصالة گول احنة بيت العريس شعدهم جايين من الصبح ما ادري
غسلت ورجعت شافتني عمة نهاية اجت تهلهل
- يا كافي مو الجيران نايمين شنو ذنبهم يگعدون على صوت الهلاهل قابل عرسهم
- امشي ولچ فرحتي ما انطيها الأحد
يلا دتعال وياية عندي حچايتين مهمات لازم تسمعيهن
دخلتني الـ غرفتها سدت الباب وباوعتلي لا ارادياً خفت
- خير عمة
- اگعدي شبيچ واگفة
- گعدت بس احچي مو وگعتي گلبي
- شلونها المعنويات
- اسكتي عمة شوية وگلبي يوگف وروح ماما
- ليش ولچ قابل أول مرة تعاشرين رجال لويش خايفة
- مو حقچ غير متعرفين الموضوع
اسمعي عمة اكو شي مهم بس محد يعرف بي غير أخت همام وهسة اريد احچي الچ حتى تساعديني
- خير ان شاء الله احچي اسمعچ
- شسمة يعني اني وأرشد ما صرنا مرة ورجال مثل أي اثنين متزوجين اي لتباوعيلي هيچ اني لسة بنية
- بس حچيتها گمزت تلطم على صدرها صدگ تحچين
- اي والله عمة
- شلون ولچ سنة عشتِ ويا ليش ما اخذچ شصار گولي
- ما گدر حسب ما گالت خديجة عنده ضعف أو عجر
ما اعرف شنو بالضبط
المهم حاول هواي لحد أخر يوم بـ حياته بس ما دبرت ويا حتى حبوب أخذ تالي مات بسببهن
- وهمام يدري بـ هالحچي
- لا مو گتلچ محد يعرف غير عمة خديجة
- ادري هوَ هذا شي ينضم ليش مگلتيلي من حقة يعرف
- حاولت والله بس هوَ گبل سد السالفة يضوج احچي بي ومنا اني حايرة
ما اعرف شلون لازم ابدي بالموضوع بعدني اخجل بس فالحة احبك ومشتاقتلك ومن نوصل الـ هالمواضيع اضيع وداعتچ ارجع ذيچ طيبة الفاهية
- شلون سالفة هاي
يعني صدگ هالليلة صعبة واني فرحانة حتى ما گعدت وحچيت وياچ گلت كل شي تعرف شمدريني هيچ
- لتخوفيني فدوة كافيني الرعب الـ عايشة بي
رغم حبي الـ همام بس اخاف من هالسالفة تعقدت والله الصارلي ويا أرشد كرهني بالزواج شلون فهميني
- لا طيبة لتحچين هالشكل
الصار وياچ قبل ميشبه الراح يصير هسة نهائياً وگولي شلون
- اي شلون
- قبل چنتِ طفلة متعرفين أي شي عن هالحياة
وفوگ هذا تزوجتي جبر
ومن رجال بگد أبوچ فـ طبيعي تنفرين وتكرهين الزواج
بس هسة الوضع اختلف
انتِ تحبين همام واختاريتي رجال الچ بـ ارادتچ
فـ اكيد حـ تشوفين هالشي غير عن تجربتچ السابقة وما بي أي مقارنة كافي بس حبه وخوفه عليچ يمة
- ما ادري والله بعدني خايفة
- هههههه بعد عمري تصير سوالف وبعدين انتِ تتعلگين بـ رگبته خصوصاً اذا ظل رجال وشهم وياچ
- اكيد رجال همام ميتغير
- ان شاء الله وهسة گومي نتريگ حتى نطلع للصالون
- اگول خو ما عزمتي عماتي
- لا برررة عمچ محمود ما قبل نعزمهن واجتني من الله
- احسن خليهن گاطعات ميعجبني اشوفهن ابد
- صدگ مسألتي همام عن غدة النسوان
- اي نسيت اگولچ عود وصاني راح يدزة بـ إيد صديقه
- خوش حتى اوصي البنات يستلموا منه
- يلا نگوم
- غيري ملابسچ بين ما اصب الريوگ حتى بسرعة نطلع
- صار
حچيتها وگمت بدلت ع السريع بس تريگت طلعنا
وصلنا للصالون خديجة وبتول جايات قبلنا
وذيچ الشتلة الزينة
من التسعة الصبح لأربعة ونص العصر يلا خلصنا باوعن علينا وظلن يجرن بالصلوات والهلاهل
خابرت عمة نهاية سعد لأن همام وصى يرجعنا
شوية واجة
وصل أول بتول القاعتها بعدين اخذني للقاعة عاد زين حاجزينهن قريبات على بعض ما تعطلنا بالطريق
وصلت المكان ازدحام كلش
عمة نهاية ما مخلية بشر يعتب عليها ما عازمتة بحيث شفت عالم ما اذكرهم غير بس من الأسم
دخلت الـ غرفة التبديل البنات وياية
دتساعدني صفاء البس سمعت جهازي دگ رسالة راحت زينة طلعتة من الجنطة وباوعتلي تضحك احممم
- شكو تباوعين للرسالة شگد حشريةةةة
- الفضول حلو
- هههههه انطيني ولچ ولتعيديها بعد هاي خصوصيات
باوعت من قفل الشاشة كاتب بدأ العد التنازلي باقي بس 3 ساعات وتصيرين بـ حضني
رفعت راسي على زينة تضحك
منا هيَّ تستفزني منا همام ديخوفني بكلامة گبل رجعت الموبايل للجنطة وكملت تبديل ما اريد اجاوبه
ظليت بالساعة گاعدة گدام النسوان
المفروض همام يجي يلبسني بـس تأخر كلش باوعتلي صفاء الموبايل خل نشوف سيد همام وين صار
زينة.. اي ولچ عيني
انطيني اني احچي ويا خل يجي يلبسها ويفضنا هنيال گلبه على هالبرود غيره واحد يوگف بباب القاعة
صفاء.. طالع على أخوچ بارد ليش تستغربين
زينة.. ترحين ترجعين تقصفين بـ سعد اني اعلمچ نرجع ونشوف شيگول اذا عرف
صفاء.. دتتصلي بـ أبو الهول وبعدين نحول على أخوچ
زينة.. ههههه لا عاب حلگچ والله مدري شلون قبلت بي
طيبة.. يلااا ولچن ما اسمح الوحده تحچي على رجلي
زينة.. اللهم امنحني الصبر من حيث لا احتسب قبل لا ارتكب جريمة بيها وبـ رجلها
حچتها وراحت تخابر همام
قريب الساعة يلا اجة صاحت عمة سون طريق العريس بالباب
ظلت عيوني ع الممر انتظر دخوله
هوَ طب لو اني مدري شصارلي فوگ هيبته لابس اسود لا والله هذا ناويها علية اليوم واني ما بية حظ اعترف
همام.. واگف العصر ويا مخلد
نتفق ع الزفة لأن نريدها تتطلع بوقت واحد اجة سمير
- ها أبو النسب شلونها معنوياتك
- شتگول
- والله بصراحة شكلك مال واحد ديودوا للمغيسل مـو للزفة شبيك همْ مخبوص وهمْ دايخ ريلاكس شوية
همام.. ههههههههه طيح الله حظك اي والله
مخلد.. شو هذا ناصب عليك،، لتفرح سمير يجيك يوم
سمير.. تسكت لا اشتغلك ويا ترى ساكتلك بمزاجي والله
ديحچون دگ جهازي
درت وجهي اضحك شفت رقم طيبة
ابتعدت عنهم مسافة ها حبيبي خير خو ممحتاجين شي
زينة.. اني زينة
- ها زين خير صاير شي وياكم
- سالمين يمعود مو المفروض تجي للقاعة هسة لو شنو
- ليش غير ويا الزفة فد مرة
- ههههههه هنيالي اي والله دتعال يرادلك گلب ممدشن
- خوش بس اروح للبيت اغير ملابسي واجي ما اتأخر
استأذنت من الشباب ورحت ويا مخلد للبيت
غيرنا الملابس وطلعنا للقاعات
وصلت سوتلي مرت عمها طريق بس دخلت طيبة صارت بـ وجهي تلگوني بالهلاهل من الباب لحد مگعدت
طيبة.. ما حچة اي كلمة لأن البنات يمي
راحن يجيبن الكيكة فرغت الساحة اله تقرب مني همس والله العظيم حرام عليچ
- ههههههه ليش حبيبي
- كل هذا وتسألين ليش عموماً جوابچ تاخذي بالغرفة مو هنا ولتضحكين هالغمازات ما اريدها تطلع حالياً
زينة.. ها ها خير ان شاء الله
كافي تبشبشون لخاطر الله لاحگين على هالسوالف لبس
همام.. ههههههه نسخة أخوچ سبحان الله.. الله يساعد الياخذچ شراح يتحمل
زينة.. اصلاً ألف هنيالة
الـ ياخذني غير أمه داعية علي اقصد داعيتلة بالتوفيق
طيبة.. ضحكت وباوعت الـ همام شوكت تجي عمة لهنا
همام.. تطلع زفت مخلد ويجون أمي همْ موجودة وياها
حچاها ولبسني
نص ساعة تصوير على كيك على سوالف زينة المخبلة
كل شوية وتصيح بوسها خل اصوركم
عاد هوَ شلون جريء يكتفي بالضحكة ويدور وجهه الية
گام يروح صاحته زين وين محضرتلكم أغاني ترگصون
باوعلها وضحك صدگ تحچين !!!
رادت حاولت عافها وطلع
مـن كل عقلها همام يقبل يرگص لا وگدام منو النسوان
- التفتت علية مصدومة
مشايفة رجال بكل حياتي يخجل مثل همام شبقى لعد للنسوان
صفاء.. ههههه اصلاً احلى شي بي الخجل تحسي هيچ رزن مو مثل شباب هالوكت أخف من البنات
زينة.. هههههههه اي والله بالعافية على طيوب تستاهل
الـ ثمانية اجت الزفة
دخلت خديجة تدفع بكرسي الحجية وياهم نسوان من أقاربهم گبل نزلت بستها من راسها وإيدها
- بيبي والله فرحت بجيتچ
- ألف مبروك يمـة سبع سعادات ان شاء الله تستاهلين
شوية ودخل همام
ما گعد عشر دقايق وصاح الخديجة تلبسني
صعدنا بالسيارة رفعت عن وجهي عمة نهاية گاعدة هنا سألتها عن خديجة گالت راحت ويا بتول
عشر دقايق واجة همام
تحركت الزفة رفعت راسي الدنيا مخبوصة بالشارع
عيوني صارت على سيارة بتول هاي شنو معقولة صالح
- التفتت على همام اگول منو ديزف مخلد
- صالح
- بلعتها وسكتت بس حيل ضجت الله يعلم شصاير بي هسة يعني ملگوا غيره يزفهم شلون سالفة تعبانة
شوية ووگفنا يم الأستوديو
صورت بتول بالبداية بعدين اني لقطات كلش مميزة
رجعنا تحركنا وطولت الزفة ساعتين محسيت بأي ملل اصدقاء همام ومخلد حرگوا الدنيا من يمي تونست
فجأة وگفوا رفعت راسي هذا فندق !!!
باوعت الهمام مـو على اساس عرسنا بالبيت هاي شكو
ضحك ونزل طبگت سيارة صالح گدامنا بالضبط
ظل يسولف ويا مخلد وصالح بيناتهم
شوية واجوي جماعتهم اختنگت بالسيارة اجة فتحلي الباب يلا حبيبي نزلي
لزمت بـ إيده ونزلت دخلت بتول وياية
وصلني للغرفـة وراح يسلم على جماعتـه دخلن البنات وراية يجرن بالصلوات باوعتلي عمة وضحكت
- شوفي الترتيب والنزاكة حتى تعرفين قيمة هالرجال
رحمة.. تجنن والله
صفاء.. لا والأخت تحچي علي
بارد حار كاسريهن يمة وفضي الموضوع وين تحصلين مثلة
زينة.. مسامعة المثل ينطي جوز للماعندة سنون عيني
طيبة.. عمى بعينچن ان شاء الله
ادري شكوووو انهديتن بية عاجبتچن اخذنها وخلصني
صفاء.. هههههههههه غير همام يديح اليوم
نهاية.. كافي تأدبن مو اخذچن الواهس يلا الرجال راح يجي اطلعن بسرعة وما اريد نفس
بس حچتها طلعن
ظليت وحدي اباوع بـ زوايا الغرفة
شوية وانفتح الباب عزززة گلبي راد يوگف من المشاعر المو طبيعية بحيث ما اعرف بعد شسوي اوگف اگعد اباوعلة اشتت نظري انسطرت من الدوخة
سمعت خطواتـه گبل گعدت على الچرباية
من التوتر افرك إيد بـ إيد
حسيت على صار يمي رفعني علي ما اگدر ارفع عيني بـ عيونه ضحك باوعيلي حبيبي ليش خجلانة
- م اهتميت
- رفع وجهي بـ اصبعة اريد اشوفچ شلون يعني
- ااا شنو يعني نصلي مو احسن
- متوضية
- اي توضيت عمة وصتني علمود تصلي على بدلتي ما اعرف شنو گالت انتَ تعرف بـ هالسوالف
- يلا نصلي لعد
حچاها وراح فرشلي السجادة ذبيت الحجاب على راسي والعباية على كتفي وبدينا نصلي
من كمل وگفت وصلى ركعتين على ذيال بدلتي
أول ما خلص اندگت الباب
راح فتحها ثواني ورجع الأكل بـ إيده يلاا تعالي تعشي اكيد مماكلة شي من الصبح اعرف بـ سوالفچ
- اي بس ما اشتهي
- شنو متشتهين تعال اكلي ليبرد ترى بعد ما اجيبلچ ها
- ههههههه ما اهون عليك
- طبعاً متهونين بس يلا تعالي تعشي الخاطري جوعان
گعدت ع الطبلة كل شي ما اشتهي
خلصنا الأكل طب للحمام غسل ورجع بـس وصل يمي نزع سترته باوعتله خايفة هاي ليش تنزع
- هههههه شنو ترديني اظل بالقاط للصبح
- نزلت راسي بدون جواب
شـ احچي يعني غير اليوم عرسنا قابل صرف هالصرف كله حتى بالأخير يظل يتفرج على طولي وبس
- فجأة تقرب سحب إيدي باسها
رفعت راسي ابتسم ليش خايفة تدرين شگد انزعج من اشوف الخوف بـ عيونچ ومن منو مني اني !!!
- صفنت بـ وجهه اريد احچي ماكو يلا ولچ اعترفي عاد
- شبيچ ليش ساكتة ؟!!
- لا بـس مخايفة منك وليش داخاف قابل انـتَ غريب
- رفع حنكي بطرف اصبعة وضحك
همْ شفتي روحچ بالمرايا اليوم لـو انشغلتي عن نفسچ
- ليش شبية ؟!!
- رفع المرايا من الميز خلاها گدامي يلا باوعي حبيبي
- صفنت عادي ماكو بـ وجهي شي شنو قصدك
- متأكدة عادي
- والله عادي شنو مكياجي معجبك لو التسريحة محلوة
- هههههه بالعكس شوفي هالجمال وفهميني شلون اگدر اقاومه اني.. صعب مو لو مستحيل
- ههههههه والله عليك سوالف فد واحد حيال انتَ
- ماكو أي حيلة بالموضوع هذا الواقع
- سحبت المرايا من إيده وخليتها بـ وجهه يلا لعد انتَ همْ شوف وگلي هالرجولة كلها صارت سند الية
- هههههه ها اشتغلتي شغلي
- لا بـس هاي الحقيقة انتَ الوحيد الما احسب حساب للكلمة لمن احچيها بـ وجهه
بس لأن اعرفك رجال وتقدر مشاعر هالإنسانة الفضلتك على الدنيا واختارتك تكون رجلها وسندها الدائم
- سحب المرايا
شمرها ع الچرباية وضمني الـ حضنه حيل
احبچ طيبة احبچ يا أول حب بـ حياة همام الما شافها إلا بـ عيونچ وما عاشها إلا بيچ و وياچ
- وأخر حب هااا
- هههههههههههه طبعاً أول وأخر واعظم حب بـ حياتي
- ميحتاج اگولك انتَ أول حب تدري شسويت وشلون حاربت حتى نفسي علمود هالحب
- ليش تگدرين تعيشي غير وياية
- لا الدنيا كلها يمك تختفي وتزول بـ حضورك كل الناس عدم
باوعلي بـ ابتسامة خفيفة فجأة وبدون مقدمات تقرب باسني مباشرتاً سيطر الخوف على كل جوارحي
بس مثل مگالت عمة نهاية
يظل احساسي ويا همام غير عن ذاك الأحساس الچنت بسببه انفر من أرشد بـ استمرار وبدون تفكير
ابتعد عني نزع سترته والرباط
شتت نظري منة اكو حچي هواي لازم يسمعه قبل ليصير شي بيناتنا لأن حرفياً ممستعدة اصير مرته بهاي اللحظة
سحبني من إيدي علي ورجع باسني
حسيت إيده صارت على ظهري بدا يفتح بالقيطان
غمضت گبل
كافي طيبة استسلمي هنا بعد ماكو جبر
هذا همام يعني مو أرشد اليضربچ اذا صديتي مستحيل يگدر يأذيچ فـ خلي عنچ الخوف ولتأذي وياچ
رفعني من خاصرتي للسرير
حاول يخليني انسجم ويا ونجح نوعاً ما
بس مجرد حسيت بي تقرب مني انتهيت بالضبط نفس أرشد كل شي ديصير نفس الماضي هوَ هيچ الزواج وما ادري لو اكو غلط بالموضوع
لزمت الفرشة وشديت قبضتي عليها حيل
لا ارادياً نزلت دموعي
ابتعد عني صافن سحبت الغطا سترت نفسي بي وگمت عدلت گعدتي احاول اكف عن البچي اختنگت
يمكن عرف بعدني بنية لأن مصدوم من الموقف
باوعلي بـ استغراب طيبة شديصير
شهگت من گلبي گبل سحبني الحضنه اششش لتخافين مراح أأذيچ ما ادري والله ما ادري غير تحچين
ظليت بـ بحضنه ابچي
دقايق ونومني سحب الفرشة علينا وتمدد بـ صفي
راسي على صدره شوية يمسح على شعري
وشوية يبـوس بـ خدي الى ان هدأت ماكو شي ينسمع بالغرفة غير اصوات انفاسنا المضطربة بسبب هالموقف
- مليت لازم احچي بعد.. رفعت راسي علي ابتسم همام
- عيون همام
- اريد اجاوبك على سؤالك الما گدرت تسأله الي
- عوفي حبيبي بعدين ارتاحي هسة
- لا كافي محتاجة احچي حتى ارتاح وانتَ لازم تسمع
- اذا هالشي يريحچ احچي اسمعچ
- راح احچي بس قبل كل شي اريدك توعدني
متزعل مني بسبب الكلام الراح تسمعه ادري صعب عليك بس شسوي مجبورة
- اوعدچ يلا سولفي
- أرشد من أول يوم تزوجني بي وهوَ يحاول ياخذني
بس بكل مرة يفشل
بالبداية مچنت افهم شديصير ويا لأن طفلة وما اعرف غير شي بسيط عن الزواج يعني مثل ميگولون علم بدون فهم
وبكل مرة يتقرب مني بيها ينهيها بالصياح والضرب
بعدين يطردني من الغرفة الى ان استقريت بغرفة بتول وتركته وحده بـ طلب منه طبعاً
سألتني خديجة عن الموضوع وحچيت الها كل شي
فرحت بشكل مينوصف
وبدت توصيني كلما يتقرب مني أرشد اتشنج وما انطي من نفسي ومن سألتها عن السبب گالت بعدين تعرفين
بمرور الأيام بديت افهم شديصير ويا أرشد
صاير عنده ضعف لذلك ديحاول وميگدر يحصل الشي اليريده مني وهذا هوَ السبب اليخلي يعصب علية ويطردني كلما يجي يمي
المهم استمر هالحال سنة كاملة
انواع العذاب عذبني حتى الضرب چان بلا رحمة تماماً نفس تعذيب أبوية الي من ماي حار حزام حرگ وغيرها من الأساليب
أخر شي شافتنا الاء بالمطبخ سوة من سويتلك العشى
فـ من صيحت وسمعها ارشد طلب مني اصعد
والله ليراويك شسوة بية فوگ لو شنو من حچي سمعني بس راح احچي هالجملة گال ما حصلتي من شي رحتي الأخوية حتى **********
بعدين گال تنامين هنا متنزلين واني اعلمچ باچر
ثاني يوم صاحني
صعدت ورى ديبلع حبوب وشكله مو طبيعي ابد خفت مبين سكران وهوَ من غير شي ميرحمني اصلاً
حاول وياية بكل الطرق
وهالمرة توحش أكثر وأگثر وصلت بية ابوس إيده حتى يعوفني ع الأقل بعد ميصحى لأن محاس شديسوي
كل شي ما فاد ويا وظل على نفس وحشيته
فجأة هدأت حركته
بالگوة بعدته عني باوعت ميتحرك فـ گمت على السريع صحتك وتعرف بعد الباقي هاي قصتي ويا أخوك
اجيت البيتكم طفلة وظليت طفلة
صح سلب الطفولة مني بس ما گدر يسلب برائتي ولهذا السبب رب العالمين حماني منه ولو تعقدت بسببه
- رفعت راسي علي صافن ع السگف والوجه محتقن ها راح تظل ساكت متحچي شي
- منو يعرف عن هالموضوع غير خديجة ؟!!
- عمة نهاية واليوم يلا سولفت الها لأن شافتني خايفة واني همْ احتاجيت واحد يطمني
- ليش لعد ما حچيتيلي !!!
- حاولت والله بعد مطلعت من المستشفى اذا تذكر
بس انتَ بسرعة سكتتني مجرد جبت سيرة أرشد ومن غير شي اني مترددة وخايفة افاتحك بالسالفة
- كافي لتجيبين اسمه على لسانچ وسدي الموضوع يلا
- باوعتله وسكتت غمض عيونه
شبيك انتَ مو وعدتني متضوج شبسرعة نسيت وعدك
- ما ضايج بس نعست كلش
حچاها وابتعد لبس وگام طفى الضوة رجع تمدد انطاني ظهرة اختنگت من الموقف مو شلون مچان
گمت سحبت السيت لبسته ورحت گعدت ع الطبله
باوعت الروحي بالمرايا
هسة شلون افتح التسريحة لمست شعري اجت الماشة بـ إيدي بديت افتح بيها حتى اسبح وأنام
تعبت كلش
همْ شعري طويل والماشات هواي
وهمْ الدنيا ظلمـة تقريباً بحيث بالگـوة مركزة بالخصل
لو يمي المگص إلا اگصة كاري من العصبية
فجأة مد إيده على شعري عوفي اني اكمله عنچ حبيبي
مجاوبتة بدا يفتح بيهن خصلة بعد الثانية
شگد يلا خلص
حضن وجهي بـ إيده ونزل باسني من خدي يضحك هاي شگد خالين ماشات بـ شعرچ ادري شعر لو مزرعة
- مو طويل يا دوب يثبت
بس حچيتها سحبني من إيدي للسرير
تمدد ونومني على صدره اصابيعـه تتنقل بين خصلات شعري
- طيبة
- نعم
- تدرين شگد احبچ لو لا
- اي بس همْ احب اسمع منك لأن ما اكتفي من هالحب
- احبچ لـ درجة بكل مرة افضل راحتچ على راحتي رغم همام ميرتاح إلا وياچ انتِ وبس
- رفعت راسي مبتسمة وراحة طيبة هي راحتك حبيبي
- احبچ حب اعمق من كل الخلايا الموجودة بـ جسمچ
- طيبة وگلبها وشرايينها وحتى هالخلايا الدتحچي عنهن ملك الك وبأسمك من اليوم والنهاية العمر
- تدرين عمري كله ما اتصورت اتزوج عن حب خصوصاً بعد ما صارت الاء من قسمتي
- باوعتله بـ عصبية هسة شجاب سيرتها بمثل هالليلة
- ههههههه هاي أخر وحده تغارين منها
- ليش
- تعرفين شنو علاقتي بيها
- حتى لو چانت مرتك بيوم من الأيام لو لا لتحچي بعد
- وعيونچ ما حسيت بالراحة وياها حتى بليلة عرسنا
شفتيها شلون تشكي الخديجة
ما چنت اتقرب منها اذا ما تطلب بنفسها واسقاط واجب
- رفعت إيدي على حلگة اشش كافي گلبي ظل يأذيني
- سحب إيدي باسها من الباطن وابتسم سلامة گلبچ
- همام
- عيونه الـ همام
- ممكن ننسى كل شي صار ويانا أرشد الاء الماضي كله ونظل بعالمنا الهادئ الما بي غير اني وانتَ وبس
- انتِ بالنسبة الـ همام الماضي والحاضر والمستقبل وكل حياته ماكو شي يشغل عقلي وگلبي غير حبچ
- امممم تدري شوكت أول مرة حسيت اتجاهك بالحب
- اي بلا
- من أول يوم انولدت بي للدنيا
- ههههههه هاي شلچ بيها شنو طفل وتردين تقشمريني
- لا والله ما اتشاقى
طيبة ما انولدت وانحسبت عليها حياة إلا بعد ما التقت بيك وكأن رب العالمين حب يعوضني عن كل شي صار وياية بعد ما زرع حبك بـ گلبي مثل النبتة
- وعوضني بيچ لأن اني هم شفت الحياة بعيونچ الحلوة
- تدري مچنت اعرف مشاعري اتجاهك شنو چانت
بس من تصوبت أول مرة الله ليعيدها
كلش خفت عليك ومن خوفي عرفت بروحي احبك بس مچنت اگدر اواجه هالحقيقة حتى ويا نفسي
- ليش بلا ما گدرتي
- لأن چنت اشوف بيك عمي حامد فـ شلون تريد اتقبل الموضوع بـ سهولة واني حاسبتك عم الية
- دتعالي يروح عمچ
حچاها وضمني على صدره حيل رفعت راسي بضحكة رحت فدوة الـ هيچ عم كيوت هنيالي بيك
- لتتحارشين ولچ
- واذا تحارشت شيصير بلاااا
- اذا عاجبچ تعرفين جربي وشوفي بـ عينچ شـ يصير
ادري بي ابتعد عني علمود حالتي مراد يكرر الشي السوا أرشد وياية خصوصاً بعد ما عرف سبب خوفي
لذلك حبيت انهي هالصراع البيناتنا
رفعت نفسي بسته بوسة سريعة ردت ابتعد ما احس إلا شمرني ع السرير وباوعلي يضحك ابتسمت بوجهه
- وين خاتون
شنو عبالچ الشغلة لعبة تتحارشين وبـ سهولة تشردين
- ما شردت هاي اني بين إيدك وبـ حضنك
بس حچيتها نزل باسني
الحمد لله صرت مرته وگدرت اتخلص من شبح الخوف الظل ملازمني بسبب أرشد و وحشيته وياية
ابتعد عني باس راسي وسحبني الحضنه
حچاها بـ همس احبچ وهالحب يظل مزروع بية للموت
- واني حبي الك مينوصف لذلك خليني اعيشك هالحب هيچ تحس بي اسرع واسهل
- مبروك علية انتِ
- مبروك النا حياتنا الجديدة والله يهنينا ويسعدنا ببعض
سحب سترته طلع منها علبة
فتحها گدامي حجل ذهـب لبسني بـ رجلي ورفع راسه مبتسم الله يقدرني واسعدچ طول العمر
گبل حضنته من الفرحة اريد ابچي حتى هنا نكد طيبة
- نعستي حبيبي
- لا
- بس لازم تنامين لأن الصبح محضرلچ مفاجأة تعجبچ
- شنو هيَّ
- شلون تصير مفاجأة اذا گتلچ بيها
- لعد راح أنام لأن لـو ظليت گاعدة الفضول يموتنننني
- فتح إيده يضحك تعالي عمري نامي بـ مكانچ
- خليت راسي على صدره ومن التعب مدري شلون نمت
گعدت الصبح على صوت الباب يندگ
باوعت الـ همام نايم بـ صفي صح الخجل مسيطر علية بس والله ماكو احلى من وجوده يمي بـ هذا القرب
- لمست خده بـ أطراف اصابيعي همام گوم الباب يندگ
ما حس علية
رجعت لحيت بالكلام فتح عيونه مبتسم شنو هالصباح الحلو مو دوم اصبح بوجهچ ليش اليوم غير
- هههههه عوف الغزل الباب راح يتفلش گوم شوف منو
- هذا يا مزعج جاينا بهيچ وقت
- گوم كافي كسل
- رايح بس فوتي لبسي شي اخاف واحد من أهلچ اهلي
حچيتها وگمت للباب بس فتحته انفجر مخلد بـ وجهي
- ادري شنو نايمين ميتين
- لا اله إلا الله حتى بـ عرسي ما اخلص منك وين اشرد
- تحچي صدگ
إيدي راحت واني ادگ بالباب غير الموبايل حرگته حرگ
- اي وشتريد
- الطيارة بوية راح نتأخر
- لا بشرفك تدري نسيت حتى الموبايل ما وقتته نمت
- اي عاد شلون اذا توقت المنبه تگعد لتحچيني احسن
- كافي لتلح گتلك نسيت
- حلو والله
من أول يوم اشتغل فقدان الذاكرة وياك بداية موفقـه
- هههههه انچب وروح المرتك بس نغير ملابسنا ونجي
- وين هاي اهلك اجوي
- عود وصيتهم ميجيبون الريوگ وين نلحگ ناكل بعد
طيبة.. طبيت سبحت على السريع
توني طالعة صارت عمة نهاية بـ وجهي ركضت حضنتها همزين اجيتي
- ألف مبروك بنيتي منه المال ومنچ العيال ان شاء الله
- يبارك بيچ گلت مراح تجين لأن بالفندق
- شلون اعوفچ وحدچ بـ مثل هاليوم بشري كل شي تم
- نزلت راسي خجلانة اي عمة الحمد لله والشكر
- وشلون شفتي الـ همام همْ ظليتي خايفة مثل الصبح
- بالبداية اي بس بعدين طلع غير مثل مگلتي بالضبط
- الله يسعدكم ببعض تستاهلون
دخلت خديجة بـ هالأثناء وترست الفندق بصوت الهلاهل
- صباحية مباركة عروستنا الحلوة
- ههههه شكراً عمة الله يبارك بيچ ويسعد گلبچ الطيب
- ها بشري حنطة شعير
- الحمد لله
- لعد تستاهلون حسي يطبگ من الهلاهل هاچ هاي بعد
حچتها ورجعت تهلهل عمة نهاية همْ وياها ع الواهس
دخل همام يضحك كافي يمعودات
باوعتله خديجة تضحك هاي مو الك الطيبة فـ لتتدخل
همام.. ههههههه نعتذر منكم بس لازم نطلع حالاً تأخرنا
نهاية.. وين ترحون ؟!!
خديجة.. اني احچيلچ بعدين
مو مسوي مفاجأة الـ طيبة ميگدر يحچي گدامها هسة
نهاية.. يلا لعد خلي نعوفهم براحتهم
طيبة.. صدگ عمة ويامن اجيتي شو همام وهنا
خديجة.. خابرت أم صالح واجتني هـيَّ وعمچ محمود
طيبة.. زين لعد سلميلي على بيبي هواي هواي
خديجة.. يوصل حبيتي وهيَّ همْ حملتني سلام خاص الچ وتگول مبروك عليها همام
- الله يبارك بيها ويحفظها النا
بس طلعوا راح همام يسبح
الفضول عندي يقرا ألف وين حـ ياخذني وشنو المفاجأة المحضرها الي گلبي يدگ سريع من الحماس
شوية واجة غير ملابسة واخذنا الغراض وطلعنا
لگينا بتول ومخلد واگفين ينتظرونا
بس شافتني ركضت حضنتني ظلت وحدة تبارك للثانية بعدين حضنت همام يا الله شگد احب علاقتهم
راحوا يسدون الحساب واحنة انتظرناهم جوة
سألتها وين رايحين
گالت انـي همْ ما اعرف مخلد گال خليها مفاجأة احلى
ظلت عيوني ع الطريق متحمسة اعرف وين رايحين
انصدمنا من وگفونا يم المطار
وهيَّ هاي چانت المفاجأة همام محضر كل شي يخص السفر حتى جنطة ملابسي وهيچ طلعنا التركيا
احلى أيام عشتها هناك ويا اجمل إنسان مر بـ حياتي
شما اگول عوضني عن القهر العشتة هم قليل
مندمت ولا راح اندم من فضلته ع العالم لأن ماكو بشر يستاهل طيبة غيره هوَ وبس
رجعنا الـ بغداد بعد اسبوعين
مخلد وبتول راحوا للمشتمل واحنة ع البيت
دخلت للصالة قريب الأربعة العصر بس الحجية گاعدة
من شافتنا ظلت تهلهل راح همام بوسها
- ألف مبروك وليدي
ان شاء الله يـوم الأخد اطفالك الـ حضني وافرح بيهم
- الله يبارك بيچ ويطولنا بعمرچ حجية
- نزلت بوستها بچت وبچتني وياها ألف مبروك ي بيبي الله يسعدكم ولا يحرمكم واحـد مـن الثاني
طلعت خديجة من المطبخ تهلهل
ظلوا يباركون والفرحة ما شايلتهم گعدنا يمهم أكثر من ساعة قريب الستة گام همام صعد وأشرلي اصعد ورى
دخلنا للغرفة انصدمت
مفاجأت همام متخلص ولا عرفتها غرفتي
شگد ما غيرها قبل هسة مغير بيها اضعاف أخشاب صبغ ديكور فرشات ثريات البردة كل شي كل شي
- التفتت على واگف وراية يضحك حضنته حيل شنوو هاي شمسوي بيها والله صارت تجنن أكثر
- بس مو احلى منچ وانتِ تستاهلين أكثر وأكثر عبالچ شوية عد همام من صارت طيبة مرتة
- احبكككك
- واني اتنفس حبچ مو بس احبچ
ديلا تعالي ادرسچ شوية قبل ليأذن ترى الكسل مو زين
حچاها وسحبني من إيدي ضحكت على سوالفة
وهيچ خلص شهر العسل اللي فعلاً چان شهر عسل مو بس كلام بحيث عيشني أيام ما انساها طول عمري
بعدها بفترة بسيطة بدت أمتحاناتي
ضغط علية بشكل مو طبيعي حتى ادرس ميريد معدلي ينزل لأن هوَ أكثر مني يحلم اكمل دراسات عليا
حتى واجباته تنازل عنهن الـ خاطري
اذا راد شي ينزل يسوي بنفسه واغلب الأحيان لو يگعد بالصالة ويا أهله لو يطلع من البيت في سبيل ليشغلني
أخر يوم الأمتحانات گاعدة ادرس بس بالچذب گاعدة
احس داغفي على نفسي
دايخة وجسمي منحل مدري تعب الأمتحانات لو بسبب السبح تمرضت حتى مداگدر اركز بـ دراستي
شمرت الملزمة وتمددت ع الچرباية
شلون وشوكت غفيت ما ادري فجأة سمعت صوته يمي حبيبي حياتي لچ عمرررري گومي وقت نوم هسة
- رفعت راسي بالگوة عبالك ماخذة منوم عوفني فدوة
- ادري مو عندچ أمتحان
بعدين مـو زين تنامين الغروب گومي يلا صلي وكملي المادة لتزعليني منچ هوَ بس اليوم وتخلص
- حبيبي والله تعبانة بس شوية شوية فدوة الطولك
- سحبني الـ حضنه يضحك تگومين لو اني اصحصحچ بطريقتي الخاصة
- لا عيني طريقتك هاي تخليني أنعس أكثر صاير لوتي
- ههههههه دگومـي يلا وكافي دلال تعبتيني
- نعسانةةةةة يا بشررررر
- ادري ملازم لـو فاليوم كلما تلزميهن تصيحين نعسانة
- مدري شبية
اگول حباب متسويلي فضل وتقرا بدل عني ما بية بعد
- شتدرين اگدر ارفضلچ طلب
لو يصير مچان ترددت بس هذا واجبچ واليتكاسل عن الواجب تعرفين شيصير بي بالنهاية يلا دگومي
- حضنته وضحكت حبيبي أبو گلب الطيب وين اكو من التزامك بالواجب يمة رحت فدوة ااااني
گرصته مـن خده حيل دفع إيدي شو دوخري عني لعنة الله على الشيطان خل اگوم اصلي
- حبيت اتحارش بي
سحبته ع الچرباية اضحك تعال يا عيني شبيك لاحگ ع الصلاة هسة شوية تسبح وتصلي شتگول
- اعوذ بالله من الشيطان الرجيم
يوميا لابستني ومن تجيچ الحالة تجي وكت الصلاة لا هاي هيَّ
- صدگ لو گالوا أكال نكار بس مو صوچك بسيطة
- هههههههههههههه عمي ارجعي نامي شجاني وگعدتچ
- اني الك اذا ما اوكلك عقوبة اليوم متنساها كل عمرك
- مو بكيفچ الشغلة
- لا والله لعد بكيف منو همام افندي
- رايح اذكر ربي خليني اصلي واجي اجاوبچ بكيف منو
ضحكت وگمت قبله للحمام
توضيت وطلعت صليت بس خلصت سحبت الملزمة ما الحگ بعد لازم اقرا بس شلون بية والله نعسانة
بعدني مركزة بالمادة
احاول اجبر عقلي يسحب المعلومات حسيت علي بدل رفعت راسي شلون همام مداگدر ادرس حلها يلا
- ليش شجاچ اليوم
- نعسانة دايخة نفسي لعبت من الدراسة شسوي گولي
- هاي والصبح گعدتي بـ 11 شبيچ ماخذة منوم
- ما ادري والله
- زين اسمعي هالحل شنو رأيچ لو اني ادرسچ بس هااا دراسة فعلية مو اللي بالي بالچ حبيبي
- ههههههه وانتَ شفهمك بـ هالمادة
- عيب عليچ والله لعب جهال هذا بالنسبة الي شتحچين
- زين وطلعتك شلون
- يولي قابل الطلعة أهم منچ شو صايرة مدري شلونچ
- شحدك تفضل الطلعة علية
- ههههه يلا لعد ابدل واجيچ صحصحيلي شوية عيني
غير ملابسه واجة گعد بـ صفي
صح مو كلش يعرف بالمواد بس والله سوالي واهس
لـ 12 تعبت باوعتله اتثاوب كافي عمري نعست كلشش
- وهاي المادة البقت شوكت تكمليها
- عادي اوقت المنبه بـ 3 واگوم ادرس لأن هسة طفيت
- يلا لعد طفي الضوة وتعاليلي حبيبي
- باوعتله فاتحة عيوني ع ابتسامته وين اجيك صدگ تحچي
- ننام غير شبيها نيتچ سوء دائماً
- ههههه عبالي
گمت طفيت الضوة توني متمددة سحبني الـ حضنه هاا اشتغلت رحمة الله مو گلت ننام ونيتچ سوووء
- شبيچ ما اسوي شي بس احضنچ لو حتى هاي ممنوع
- لا مو ممنوع بس خليك عاقل وراية گعدة
- هههههههه يلا نامي هنا.. وأشر على صدره بس خليت راسي گبل غفيت من التعب ما گعدت إلا الفجر
گمت طفيت المنبه وظليت اقرا للسبعة الصبح
رحت غسلت ورجعت اگعد همام بالگوة حس علية يلاا عاد گوم والله شلعت گلبي
- صباح الخير
- صباح النور يلا حتى تسبح بين ما اسوي الريوگ
- گام للحمام غسل ورجع داجهزله الملابس سحبني علي
- هااا خير
- نعسانة مووووو
- هههههه شبيك حبيبي من الصباحيات
- خلصتي المادة لو بعدچ
- لا الحمد لله خلصتها وراجعت شويـة يعني مسيطرة
- يلا لعد تعالي
- همام شبيك وراية أمتحان
- عادي منتأخر هيَّ مراجعة سريعة عشر دقايق وتخلص
- يمعود والريوگ
- ما اريد عندي هنا احلى ريوگ قشطة بالعسل
- فدوة اسمعني والله فكري متشتت بـس خلي هاليوم
بعدني ممكملة كلامي سحبني للچرباية
أخذ ملابسه وصاح گومي بسرعة تأخرنا كلش
خزرتـه بـ عصبية هيَّ هاي سوالفك همام افندي شحچي
- تعودي حياتي
- باوعتله وسكتت راح يسبح واني نزلت بالحمام الجوة
- وصلنا للجامعة ردت انزل لزم إيدي ابتسمت هاا خير
- ركزي زين بـ أمتحانچ ومـن تخلصين خابريني علمود اجي عليچ حارة ما اريد اصلبچ بالشمس
- لا اليوم اتأخر
تعرف أخير يوم أمتحانات واريد اظل ويا صديقاتي
- براحتچ لعد بس اتصلي طمنيني على أمتحانچ
- صار وانتَ هم تريگ بالدوام
- تتدللين
بس حچاها نزلت عديت الأمتحان على خير الحمد لله وگعدت بالنادي انتظر البنات شوية واجتني بتول
- ها بطة شلونچ
- هلا حبيبتي الحمد لله انتِ شخبارچ شسويتي اليوم
- اي جاوبت الحمد لله
- عفية عليچ
- دگومي نتمشى بالجامعة ونسولف مليت من هالگعدة
- لا يمعودة ما بية راسي يموتني حتى بالگوة امتحنت
- ليش مريضة
- اي يمكن الي يومين كلش تعبانة
- شتحسين يعني
- ما ادري دايخة ونحلانة راسي يوجعني
- حامل
- فتحت عيوني عليها لا لااا ممعقولة شبسرعة يمعودة
- شوكت الشهرية مالتچ
- ما ادري ما حاسبة الها تصدگين لحظة لا بعد الها يوم اذا صدگ حامل فـ الأعراض متجي من وكت
- عادي هي حالة نفسية بسبب الأمتحانات صار هالشي
- معقولة
- يا رب تطلعين حامل وإيدي بـ إيدچ لأن حيل متشوقة ومتلهفة ع الأمومة حتى مخلد يتمناها
- الله يسمع منچ
بعدنا نحچي اجن صديقاتنا وصفاء وزينة وياهن للظهر واحنة نسولف دگ جهازي همام عزززة نسيته
- گمت على صفحة وفتحت الخط
بس سمع صوتي اشتغلت الرزايل شوكت تبطلين ثوول مو گتلچ اتصلي بية.. اني مشغول انتِ شجاچ
- والله حبيبي التهيت بالبنات ونسيتك اسفة
- گرت عينچ نسيتي مو
- لتزعل متنعاد وعد أول وأخر مرة
- مصار شي بشري شلونچ ان شاء الله گدرتي تجاوبين
- اي الحمد لله
- خوش الحمد لله يلا صارت الـ 12 اجي عليچ لو شنو
- اي تعال اصلاً تعبت كلش انتظرك
- سد الخط رجعت يم البنات
سلمت عليهن وظلينا نتمشى اني وبتول لأن اليوم يمنا خديجة عازمتها هيَّ ورجلها على الغدة
- أول ما وصلنا راحت للمطبخ تركض عمة طيبة حامل
- اششش ولچ منيلي حامل شبيچ
- والله حامل ومبين شنو تضحكين علينا لو على روحچ
خديجة.. الله عليچ طيبة
طيبة.. لا عمة هاي من كيفها تحچي بس لأن عرفت بية تعبانة
گبل گالت اخذچ تحللين
ردت عالجت يمعودة حتى موعدها بعده ماكو عااندت
تالي گوة قنعتها تأجل الموضوع يوم واحد
للأربعة راحوا مخلد وبتول
صعدت فوگ بالگوة فاتحة عيوني نعسانة بشكل توني تمددت طب همام هااا شنو همْ راح تنامين
- اي غير گاعدة من الفجر والله راسي يأذيني
بس حچيتها سحبني الـ حضنه همام اگعد راحة يمعود
- شمسوي قابل
- همااام
- عيون همام ليش الحلو عصبي اليوم
- حباب اريد أنام والله تعبانة
- نامي منو لازمچ بس هنا بحضني قابل المخدة احلى
- مو تتعب هيچ
- فدوة الچ همام وكل تعبه
- اسم الله عليك وتعرف راحتي بـ راحتك متهون علية
- اني مرتاح هالشكل يلا نامي كافي حچي
وفعلاً ما سمحلي ارفع راسي مـن صدره الى ان غفيت
گعدت مموجود طالع
نزلت جوة للعشرة صعدت اگلب بالتلفزيون جابة همام من جهز الغرفة وهمزين چنت أمل وحدي من اصعد
- داتفرج مسلسل انفتح الباب ودخل بعد وكت عيوني
- السلام عليكم
- وعليكم السلام ليش تأخرت همام افندي
- هههه اسف عمري چنت ويا جماعتي واخذتنا السوالف
- ونسيتني مووو
- ليش اني اگدر انسى روحي
حچاها وسحب المخدة خلاها على حضني ونام راسي يوجعني مرغي شوية
ضحكت گال ها شبيك بسته من گصته بعدك تتذكر
- شلون انسى رغم التعب بس كلش ارتاحيت بين إيدچ
- تدري شگد تغزلت بيك بيومها
- شوكت
- من نمت ظلت إيدي تتجول على ملامحك حتى هذني ما سلمن من غزلي.. وأشرت على شواربه
- ههههههه كل هذا واني ما حاس
- وهوَ شـ يحسسك الخاطر الله خليني ساكتـة احسن
- همْ صدگ لو ما انتِ چان هسة تلگيني متزوج غيرچ
- ضربته بالمخدة اموتك والله
- ههههههههه تعالي عمري ليش اني گدرت اعرف معنى الزواج غير وياچ شبية تخبلت واخذ غيرچ
- يلا عاد لتاكل بـ عقلي حلاوة گوم حتى تغير ملابسك
- ما بية
- گوم يمعود قابل انزعك
- شكو بيها حبيبي لو ما استاهل تدلليني
- هههههه اشم ريحة انحراف بالموضوع لو نيتي طفرت
- الله اكبر شمسوي غير مرتي
- لتحاول ادري بيك وكح وكل حركة تسويها تقصد شي
- تعالي لعد خلي اراويچ الأنحراف شلون يصير
- ههههههه عوفني والله اني المنحرفة مالي خلگ يمعود
- لتعيديها بعد
- لا بست التوبة أخر مرة والله
بس حچيتها گام بدل واجة يمي ظلينا نتفرج تلفزيون ساعة وغفى
باوعت علي اضحك
بست خده واخذت الريمونت من إيده
گمت طفيت الضوة ورجعت تمددت يمة صافنة بوجهه معقولة راح يصير عندي طفل منك حبيبي
من التفكير بالگوة نمت
ثاني يوم ظليت الوب للعصر راحت خديجة حچت ويا
ما خلته يحس بشي لأن اريد اسويله مفاجأة
وصلنا ورجع للحجية
حللت وظليت انتظر النتيجة روحي طلعت لحد ما اجة دوري وصاحوا اسمي راحت خديجة تستلمها
- شوية ورجعت تضحك ألف مبروووووك
- الله عليچ
- ههههه اي والله حبيبتي حامل الله يتمم عليچ بسلامة
گبل حضنتها اضحك
طلعت وياها المحل مال حديثي ولادة
اخذت حذاء صغير وغلفته على شكل هدية وراها اجة همام علينا
من وصلنا همست الخديجة
عمة انتِ بشري بيبي واني راح اگول الـ همام
باوعتلي وضحكت چان يگول يلا اني طالع تردون شي
- وين عندي موضوع وياك
- خير
- فوگ مو هنا
بس حچيتها صعد رحت ورى بعدني مفاتحة الباب گال شكو صاير شي وياكم برة ظل بالي يمعودة
- لا شيصير يعني بس اشتريت الك هدية
- صدگ تحچين ادري خو چان انتظرتي ارجع واشوفها
- الزم افتحها وبعدين نحچي
- اخذها مني فتحها بس شافها انصدم هذا شنو يعني
- ضحكت بـ وجهه ساكتة
- حامل
- هزيت بـ راسي اي يروحي راح تصير احلى أب
- بـس حچيتها شالني يضحك ما اگدر اوصـف فرحتنا بهاللحظات بحيث احتار شيسوي حتى يعبر عنها
چان يريد يطلع بطل ظل مگابلني وگاعد بس يتغزل
ثاني يوم اخذني البيت جدي
بسبب زواجي وامتحاناتي ما رحت الهم من يوم العرس
بس بشرت عمة نهاية فضحتني
صارت بـ راسي قناة الجزيرة حتى الجيران عرفوا بخبر حملي اريدها تسكت ماكو ساعة السودة الحچيت
للظهر اجة همام تغدة وراح گال بالليل اجي عليچ
الحمد لله صالح تأقلم
حتى علاقته بـ همام قوت بعد ما تقبل الواقع هيچ يلا گدرت ارتاح وبالي صفى لأن چنت متأذية علي
العصر گاعدة وياهم نسولف فجأة عمو محمود أشرلي
باوعت علي راح الغرفتة
خليت ماعون الفواكه ع الميز ورحت ورى چان واگـف ع المرايا يمشط بـ شعره ها عمو خير
- اگعدي اريد احاچيچ
- گعدت على طرف الچرباية يلا اسمعك
- حسيته مرتبك شوية وگال طيوب عمي اني اريد اتزوج
- گمزت من مكاني والله عمو احلى خبر سمعته
- شبيچ على كيف مو الطفل بـ بطنچ
- فرحانة والله يعني صدگ قررت تتزوج زين منو هاي
- وحده تعرفيها
- منو !!!
- أخت رجلچ اسمها خديجة مو
- چذذذذذذذذذذب انتَ انتَ تريد تتزوج عمتي خديجة
- فضحتينا شبيچ
- دعوف الفضيحة واحچيلي من شوكت تريدها
- صار فترة طويلة تقريباً مـن حادث همام الله لا يعيده
- احمممم احمممم من رحتلها للبيت ها عمو هااا
- تأدبي ولچ شـ شايفتني
- ههههه اتشاقى والله گول شنو المطلوب مني وتتدلل
- اريد تحچين وياها
حتى اذا وافقت اتقدم الها ماا اريد اتخجل ويا رجلچ
- نگول مبروك مقدماً
- صدگ يعني انتِ تشوفيها راح توافق
- طبعاً ليش وين تلگا احسن منك بس الشهادة لله انتَ همْ متلگا مثلك اخلاق وجمال وحسب ونسب
- ادري يبعد عمچ
متشوفين رايدها على سنة الله ورسوله بس كون تقبل
لليل اجة علية همام رجعني للبيت
دخلت للصالة الحجية وخديجة گاعدات ع التلفزيون
غيرت ملابسي ونزلت على السريع اخذتها للغرفة ما بية اصبر الباچر اطگ اذا محچيت هسة وسمعت ردها
- أول ما دخلنا باوعتلي ها خير شكو
- عندي موضوع وياچ
- اي احچي
- اسألچ سؤال واتمنى تجاوبين بكل صراحة لسة تحبي
- منو
- سلام منو يعني
- ليش عود شـ جابة ببالچ هسة
- دجاوبي
- طبعاً لا اني كل عيوبه چنت ادوس عليهن وامشي لأن احبه إلا طعنه بعرضي هنا لا ادوس علي هوَ وامشي
- عفية عليچ والله
- ما گلتيلي ليش سألتي هالسؤال ؟!!
- عمو محمود تعرفين.. اليوم حچة وياية يريد يتقدملچ
- خدودها صارن طماطة مـن الخجل يتقدم الي اني
- احممممم شـ هالخجل عيني
- شبيچ
- اگص إيدي اذا ما صاير بيناتكم شي لأن حتى كلامه مو طبيعي مال واحد عاشگ وذايب بالحب
- عزة اسكتي شنو هالحچي ولچ
- الله عليچ بس سولفي وما احچي لأحد فضولي قاتل
- شسولف شبيچ
- شصاير بيناتكم من حچة واضح يحبچ مو مال واحد يريد يخطب والسلام وگالها بصراحة عاجبتني
- ما صار
- لاا صار وتحديداً من اجة للبيت يبلغچ بـ أصابة همام
- صخام الصخم خديجة شـ عرفچ بـ هالسالفة ولچ
- هو حچالي
- شلون يعني شـ حچالچ !!!
- گال من يوم ما انصاب رجلچ واني هاويها يلا انكري
- بس حچيتها نزلت راسها بـ خجل
- بداعة عمو محمود الغالي احچيلي شصار بيناتكم
- يا ولچ هوَ شنو وتحلفيني بي ترى رحتي زايد مخبلة
- من الفضول راح اسقط احچي عاد
- ههههههه اسم الله عليچ
مصار والله بس تعرفين الواحد من يوصله مثل هالخبر ينهار مو گمت اصيح حضني يهديني حتى أمي لتسمع بس ترى حضنة عادية ليروح بالچ بعيد
- يا عيني وشحسيتي يلا
- امشي دماغ سزز أخوية ديموت ويني وين الأحساس
- ههههههه هم صح والله يلا شنو هسة نگول مبروووك
- وولده شلون
- ولده احلى شي بالدنيا من تعاشريهم راح تتأكدين من كلامي أما همَ ما عدهم شي أهم من سعادة أبوهم
- وهمام شراح يگول والله فشلة
- هذا بالذات عوفي علي راح اخلي يوافق وهوَ الممنون
حچيتها وطلعت اركض ظلت وراية تحاول تسكتني
همام گاعد ع التلفزيون
وگفت گدامة عمو محمود خطب خديجة وهيَّ موافقة شنو رأيك
صفنوا بوجهي مصدومين
گبل خديجة دارت وجها ع الحايط هزيت راسي شكوو يمعودين واحد وخطب وحدة على شنو هالصدمة
- طيبة هاي شگاعد تحچين
- والله شبيك هـوَ حاچاني اليوم حتى ابلغها و وافقت
- خديجة وافقتي ؟!!
- اكيد مراح تجاوبك متشوفها خجلانة بس والله قبلت
الحجية.. وانتَ يمة شـ تگول
همام.. اذا موافقة والرجال شاريها على سنة الله ورسوله ليش لا اقلها نعرفه شنو ما شنو مو مثل ذاك
بس حچاها طگيتها بـ هلهولة وصلت الراس الشارع
گام سحبني من إيدي كافي نفسچ انگطع نسيتي حامل
- فرحانة والله العظيم فرحانةةةةةة
- راح اهفچ براشدي يطير الفرحة من راسچ كافي عاد لتكمزين خافي على أبنچ
- والله لو تضربني چلاق همْ متطير فرحتي بيهم اليوم
سحبني الحضنه يضحك وباسني من راسي
صدگ خجلت
ممسويها قبل أول مرة يبوسني گدامهم باوعتله الحجية اگول اخذها فوگ وتحاضنوا لا گدامنا
- هههههه ها يمة غرتي
- لا ي وليدي لو اغار من كل الدنيا من هالطيبة ما أغار
- نزلت عليها شبعتها بوس احبببچ والله واحب طيبتچ
بعد يومين اجة عمي محمود وخطب خديجة من همام
ما تأخروا بالزواج شهر مو أكثر
بيومها اتفقوا وولده وصالح يسووله مفاجأة لأن رفض يسوي عرس يگول كبرنا بعد على هالسوالف
اخذت خديجة للصالون جهزتها
بيومها طلعت تجنن من غير شي هيَّ حلوة الدور عروس
سوينالهم زفة ولا بالأحلام
رغم بساطتها بس بيها نكهة خاصة ما شفتها بغير عرس
صالح هوَ اللي زفهم واني ويا بالسيارة
عود يمة اني ولي أمر العروسة شبعوني تصنيف بيومها
مرت الأشهر بتعب لأن تنساتي چانت صعبة ومزعجة
رجع الدوام وبدت البهذلة
خطية عمو محمود صار يوميا يجيب خديجة قبل الدوام يخليها يم الحجية ومن يرجع يجي عليها
بعد أربع اشهر من زواجهم
راجعة من الدوام تعبانة سلمت على الحجية وبـ وجهي للمطبخ
- جوعانةةةة عمة
- اي بـ عيوني صار الأكل بس غيري ملابسط
- شبيچ شو احسچ مو على بعضچ
- تعالي وسدي البـاب اجيتـي والله جابچ چنت حايرة
- خير
- گلبي راح يوگف من الخوف يمكن اني حامل
- الله عليچ عمة ييوووووو گلبي اني الراح يوگف والله
- اششش يمعودة
- امشي نحلل العصر شتگولين
- شلون استحي احچي ويا همام بشنو راح اتحجج الة
- هيَّ مال مستحة
حچيتها وصعدت ع السريع فتحت الباب لگيتة ديبدل
- شلون تالي وياچ كافي تگمز
- عندي الك خبررر بفلوس الدنيا كلها راح يفرحك والله
- خير
- يمكن عمة خديجة حاااااااامل راح ابچي من السعادة
- صدگ والله
- اااي هيَّ گالتلي واريدك العصر تاخذنا حتى نحلل الها
وفعلاً العصر اخذناها للمختبر
حللت وچانت النتيجة ايجابية فرحتنا بهالخبر متنوصف خديجة بتول الحجية همام اني كلنا ممصدگين الله جبر خاطرها وعوضها عن حرمان السنين
بعد يومين ضبط بتول همْ طلعت حامل
هنا الفرحة صارت فرحتين خطية الها أشهر تنتظر وماكو من حللت وعرفت بنفسها حامل عزمتنا ع الغدة
أسبوع واخذت سونار طلعت بية بنوتة
همام طار بيها فرح
لأن ادري بي شگد يحب البنات لدرجة مـن يخلي إيده على بطني يحچي بصيغة المؤنث عبالك متأكد
صارت القسمة بين سعد وصفاء مباشرتاً بعد زواج عمو
استمرت الخطوبة أربع اشهر وراها تزوجوا
وصلت شهري بالحمل والدنيا طالعة من عيني تعبتتت
ورم على ثگل على تنسى حتى گومتي وگعدتي صارت صعبة علية ومنا دوامي صدگ تبهذلت
بعدلي يومين واخلص شهري
نامت الحجية صعدت الـ غرفتي داتفرج تلفزيون دخل همام ها بطوط بشريني شلونچ اليوم
- ادري ليش دتتأخر
والله مليت مگابلة الحايط وگاعدة وحدي مـو وضعية
- ليش وحدچ لعد وهالبنوتة الحلوة وين راحت
- بطل ترى ما اتقشمر
- هههههه والله مو قصدي اقشمرچ بس شسوي تأخرت
- اي عادي شبعت من هالحچي يوميا تتأخر وتعتذر
- تعالي بـ حضني
- وخررر روح ارجع الـ جماعتك خليهم يفيدوك
- شنو بكيفچ اوخر شو تعاااالي
- همام ضايجة ومخنوگة گوم غير ملابسك وعوفننني
- هسة كل ضوجتچ تروح حياتي
- هماااام
- اششش كافي عاااد من الطريق افكر بيچ حسي يولي
- اي واضح
- مشتاقلچ وداعة هالعيون الحلوة
- هوَ انتَ تنطي الـ نفسك مجال تشتاق ما ادري شلون چنت عايش بلا مرة اعترف متزوج بالسر مووو
- ههههههه معذورة ما اخذ بكلامچ ادري طباگات حمل
بس راح اجاوبچ
انتَ خبلتيني مچنت هيچ بس وياچ انسى نفسي حتى اني متعجب وين وصلتيني بـ حبچ
- حلاوة حلاوة ي ولد وببلاش همْ تعال حمل وروح
- ههههههه لعد خليني اكلها
- ماكو
- مو بكيفچ تعالي شووو حچاها وسحبني علي باسني
بس ابتعد حسيت بوجع بسيط كلش
محچيت
گمت سبحت ورجعت طب وراية نشفت شعري ولملمت الهوسة توني تمددت اجة سحبني الـ حضنه
- احس بيچ شي مو طبيعي شكو احچي
- لا ما بية
- شنو بعدچ زعلانة مني
- لا شبيك عادي ما اضوج تطلع بس لا تتأخر والله أمل
- صار من عيوني ما اتأخر بعد
- يلا لعد افتح إيدك اريد انام هنا للصبح حتى لو متقبل
- هههههه ما اقبل ليش همام وحضنه ملك الچ للأبد
بسته من صدره وخليت راسي علي
الأوجاع مستمرة تروح وتجي بس يعني مو قوية
شوية ونمت فزيت الفجر على ألم يذبح باوعت الهمام نايم والغطى على وجهه لأن عايف الضوة معلوگ ما راد يگعدني واني بـ حضنه
گمت طفيت الضوة وظليت الوب من الألم
رايحة راجعة بالغرفة وعيني ع الساعة استمر هالحال من الثنتين للخمسة الفجر من الوجع صرت ابچي بخنگة
للستة بعد ما قاومت الألم
لزمت الكنتور گازة على اسناني حيل عطت بكل صوتي هماااااام
ولا حس رجعت اصيح اگعد عاد مو راح اموووووت
الحمد لله فز
گام يركض سندني من خصري ها هاااا اسم الله شبيچ
- راح اجيب يمكن وجع وجع مو طبيعي گاعد اموووت
- اسم الله عليچ اسم الله هسة شسوي
ظل يفتر على روحه خطية ارتبك بسببي
نزلت بالگاع ابچي اخذ راسي بـ حضنه لتبچين حبيبي هسة راح نروح للمستشفى
- سحب موبايلة خابر على بيت جدي الووو
ها أبو سعد طيبة دتجيب تعال انتَ وخديجة ما اعرف شلون اتصرف وحدي
- سد الخط واجة گومني للچرباية
- همام ما اتحمل
- اصبري يا عيني ما ظل شي خديجة دتجي بالطريق
نص ساعة واني على هالحال
اجت خديجة ظلت بالبيت علمود الحجية وعمـة نهاية راحت وياية للمستشفى طلعت روحي يلا جبت
قريب الظهر يلا طلعوني
بعدني بالممر شفت همام گاعد بالباب
بس لمحني گام يركض باس راسي وهمس گلبي انتهى يلا رجعتيلي ألف الحمد لله على سلامتچ حبيبي
- الله يسلمك ومبروك علينا البنوتة
رجع باس راسي
رفعني من الكرسي سندني علي وصعدني بالسيارة گبل رحنا البيت جدي لأن عمة نهاية اصرت ابقى يمهم
وصلنا من الباب ورجع للبيت
لأن چان عنده انذار بيومها ما گدر ياخذ اجازة
أول ما طبيت تفاجأت بالولد مسويلي حفلة رشاش مال اعراس على چگليت والبنات خبصن الدنيا بالهلاهل
طيبة.. هههههههه شنو هاي شمسوين ولكم
صالح.. ألف الحمد لله على سلامتچ طيووووب حچاها ورش على راسي باوعتله اضحك بطل سوالفك عاد
ظلوا يباركولي فرحانين كلش بـ ولادتي
لليل چنت نايمة بـ غرفة عمة نهاية حسيت لمسات على شعري فتحت بـ ضحكة حبيبي شوكت اجيت
- هاي وصلتي بشري شلونچ خو ممتوجعة
- بس شفتك اختفى الوجع
- دوم عمري يلا انطينياها بحضني مشلتها بسبب الدوام
سميت وشلتها خليتها بـ حضنه بالگوة شالها يخاف
حچة وياها شوية بعدين باوعلي لحد الأن ما سميناها
- اي شـ يعجبك نسميها
- انتِ سمي
- ماكو فرق انتَ اختار واذا ما عجبني اعترض لتخاف
- نسرين
- بس حچاها ما اعرف دموعي منين نزلت حيل فرحت
- ها شو ساكتة
- صدگ تقبل اسميها على أسم أمي
- ليش اكو احلى منه هيَّ همْ من تكبر راح تفرح متأكد
- حضنته حيل الله ليحرمني منك ومن حنانك وحبك
اسبوع مر على ولادتي ما تحمل همام اجة رجعني ويا
كلش عانيت بعد هاليوم
شغل البيت الدوام الطفلة الدراسة راسي صار طبل عود همام يساعدني حتى بالسهر ما قصر خطية
بعد كم شهر جابت خديجة بنوتة سموها فرح
وراها بـ اسبوع بتول جابت يزن
الحمد لله ولادتهن چانت كلش سهلة وطبيعي مو مثل ما تصورنا
على الأربعين حبلت خديجة
وهالشي رغبة من عمي لأن يريد يعوضها عن الحرمان الچانت عايشة بي ما زال بعد بيها حيل للحمل
مر حملها على خير وجابت ولد سموا سعيد
ما ادري عمي شعندة ويا اسماء الفرح والسعادة ان شاء الله تكون حياتهم مثل اسماء اولادهم
همام.. بعد مرور 3 سنوات على ولادة طيبة چنت گاعد بالمكتب اندگت الباب صحت تفضل دخل صالح
- ها أبو النسب شلونك
- هلا حبيبي تعال تفضل البارحة ما بينت وينك
- انشغلت والله بالقضايا واجيت عليك نهاية الدوام ما لگيتك علي گال طلع قبل خمس دقايق
- ما گال يمكن نسى
- عندي موضوع وياك بس محتار منين ابدي
- خير
- هوَ خير بس الصار ما چنت متوقعة ابد حتى انتَ راح تنصدم بس تسمعة احچي لو مشغول هسة
- لا يول شعندي يلا سولف
- اكو بنية قبل فترة تعرفت عليها بالصدفة
هيچ نحچي مرات وهي التتصل مو اني لأن تعرف بية ممستعد للزواج فما اريد اورط بنات العالم وياية
- الى متى متريد تتزوج أمك يوميا تحچي وياية عليك
- يجيك الحچي بس اسمع
- يلا كمل
البارحة بالليل چنت گاعد بالصالة ويا أهلي دگت علية
رحت الغرفتي جاوبتها
توني داحچي انفتحت الباب ودخلت رحمة بااارود الله وكيلك ظليت صافن عليها ممتوقع منها هالحركة
- لتگولها
- اسكت خوية لعبت بية لعـب عبالك رجلها وكشفتنـي أخون ظلت ترزل بية
- تحبك !!!!!
- اي اعترفت گالت احبك مـن زمان بس منين اجيبلك الاحساس لو يبعوا چان اشتريتة الك وخلصت
- ههههههههههههه
- ها شبيك
- نفـس أختها الله وكيلك طلعـت تشبهها حتى بالطباع مو بس بالشكل سبحان الله رب العالمين
- هههههه يعني طيبة هم اعترفت الك هيچ
- اي بالضبط نفس الموقف تعرف بعد وكت الغيرة جيب السباعية التگدر تلزم نفسها
- هههه مو قليلات حفيدات جدي ميستاهل رزاق اذكرة
- ههههههه وهسة شراح تسوي
- بيني وبينك تعجبني ومن زمان بس يا أخي طفلة لاا والمصيبة اني المربيها يعني صعبة مو
- لتصير مثلي ولك
ظليت اصيح صغيرة ومربيها لحد ما شلعت گلب البنية وياية بعدين مو كلش صغيرة عمرها 17
- يعني
- يعني ما زال اكو تفاهم بيناتكم وتحبك امشي وانـتَ مغمض هاي اني ومخلد نفس حالتك بالضبط
- ها هيچ تشوف يعني عادي فرق العمر
- طبعاً عادي بشرفك لتشلع گلبها خطية كافي الشافتة بطفولتها تحتاج ترتاح
- راح تنضرب همام اشلع گلبها شنو هاي بنيتي الربيتها على إيدي لو كل الناس تأذيها اني مستحيل
- هههههه معناها ألف مبروك مقدماً
- الله يبارك بيك نسيب بس مو هسة خليها تكمل السنة تدري سادس ما اريد اشغل فكرها بـ هالسوالف
- المهم احچي لتظل ساكت حتى متتعذب وياك
- اي اليوم احاچيها
- أم نسرين مسوية ع الغدة شلون دولمة تاكل اصابعك وراها تجي وياية لو تفوتها عليك
- طبعاً اجي هيَّ الدولمة تنرد
- دجامل وگول ما اگدر اردك صاير مثل مخلد متنجرع
- هههههههه الچذب حرام ما جاي علمودك جاي للدولمة
حچاها وگام يلا استأذن
- الله وياك عود من تكمل مر علية نطلع سوة
طيبة.. اليوم عطلتي وهمام كلش يحب الدولمة
گعدت من الصبح لفيتها
بالعشرة انطيته خبر حتى ليتأخر اذا تبرد يروح طعمها
واگفة بالمطبخ اشتغل حسيت علي حضني من ظهري
- الله يساعدك
- ويساعدچ أم نسرين الحلوة شلون الدولمة
- جاهزة وتنتظرك تاكلها اصعد بدل على السريع وتعال
- دروحي لبسي حجابچ صالح وياية اليوم يتغدة هنا
- اي هلا بي
رحت لبست الحجاب ونزلت
گاعد بالصالة ونسرين بـ حضنه يلعبها ها صالح شلونك
- هلا بالبذاتة عاش من شافچ
- أكال نكار ولا چنك ذاك السبت تغديت يمي بس عادي
- ظلي تمنني علية باللگمة اروح أكل يم عمتچ اشرفلي
- ههههههه لعد شتريد اخليك تاكل وتنكر
همام.. هههههههه هاي مينگدر عليها لتحاول لأن تتعب
صالح.. ادري تعلمني بيها
همام.. يلا عيني دفوتي صبي الأكل ميتين من جوع
بس حچاها رحت ع السريع
انطيت علاج الحجية وصبيت اجتمعنا ع السفرة ناكل
عيوني تراقب همام
مگعد نسرين بـ صفه ويوكلها بـ إيده رغـم تعرف للأكل لأن صارت چبيرة بس هوَ بعد علمها ع الدلال
ابتسمت ويا نفسي
اي ي نسرين رب العالمين يحبچ وانطاچ هيچ أب حتى لتعيشين العذاب العاشت بي أمچ وبيبيتچ
غمضت عيني ودعيت
ربي يحفظه الها والية لأن احنة لا شي لـو مـا وجودة
بس خلصت الأكل گمت اسويلهم چاي
توني راجعة للصالة سمعتهم يضحكون خير ضحكوني وياكم ضايجة
- اگول
- گول حبيبي أول وتالي راح تعرف منها
- التفت همام مبتسم أختچ رحمة طلعت تحـب صالح
باوعتلهم بصدمة كل شي چنت اتوقع إلا هالشي
رغم هيَّ كل جمعة تبات يمي
بس ولا مرة بينت أو لمحت بحبها الصالح بالعكس من تحچي عنه عبالك دتحچي عن أخوها اللوتية
همام.. هههههههه ها ساكتة
طيبة.. شحچي والله مصدومة ولا بينت هالشي اعلمها
همام.. شتگول يعني وأخونا بالله مثگل عليها
قابل ترديها تحچي بعدين تتفشل ما ترهم صعبة كلش
صالح.. مثل ما حضرتك ثگلت على أم نسرين
نصيحة فـي الله لا ترمي النـاس بالحجارة وبيتك مـن زجاج
همام.. ههههههههه ما ظل ثگل بعد خليني ساكت احسن
ظلوا سوالف وشقى وضحك
صدگ انصدمت سبحان الله بالضبط نفس الموقف الصار وياية صار وياها وبنفس الطريقة اعترفت الصالح
خلصت السنة ونجحت رحمة من السادس
الحمد لله طلعت معدل 86 وصالح شجعها تدخل قانون همْ رغبتها وهمْ هوَ يحب القانون
بالعطلة خطبها
فرحة الكل بكفة وفرحة عمة نهاية بكفة ثانية
ابد مچانت متوقعة راح يحبون بعض شلون تتوقع وهمَ رابين سوة رغم هي أكثر وحدة تمنت ارتباطهم
ما تأخروا بالزواج عمة ظلت تستعجلهم
قبل لتبدي السنة تزوجوا وبيوم العرس همام تكفل بكل شي يخص زواجهم حتى هوَ بـ نفسة زفهم وعمة ويا أما اني رحت ويا سعد وصفاء
طبعاً زفتهم متقل عن زفتنا بـ شي نفسهم جماعة همام جماعة صالح لذلك حرگوا الجو مثل ما سووا ويانا
بعدهم بشهر تزوجت زينة من ولد غريب
الحمد لله طلع خوش إنسان
أما سمير فـ مضرب عـن الزواج شگد دتحاول خديجـة تقنع بي بس رافض الفكرة تماماً ليش محد يدري
ست سنين جامعة خلصت بحلوها ومرها
اليوم اني مرحلة أخيرة
ممصدگة راح اخلص تعبت كلش المسؤولية اذا اجتمعت ويا الدراسة يهدون الحيل وهالشي صار وياية
بداية السنة همام لح علية علمود الحمل
واني همْ ما حبيت ادره نسرين كبرت وهوَ يحب الخلفة اتحمل هالكم شهر الخاطرة
صار الحمل بس هالمرة اهون بـ هواي من حملي الأول
بشهر الخامس اخذت سونار طلع ولد
رجعت الـ همام چان ينتظرني بالباب بس شافني اجة ها بشري
- ولد
- الحمد لله والشكر الله يفرحني بـ سلامتكم انتِ ويا
- امين
بس من هسة اگولك لازم تختارله اسم مو مثل نسرين
- مختار وداعتچ من أول مصار ببطنچ بس ردت اتأكد
- شنو شو ما گتلي
- حامد
- ااااااخ گلبي لو ما الفشلة إلا احضنه بنص الشارع من فرحتي اكو واحد يلوموني لأن حبيت هالرجال
- بس صعدنا للسيارة لزمت إيده ما اصدگ انتَ شنو
- هذا أقل شي اگدر اقدمه الچ والهم عمري
- بس اريد اعرف شسويت بحياتي والله عوضني بيك
- مثل الشي السويتة وعوضني بيچ
- احبك
- واني احبچ وراح اظل احبچ موت الأخر يوم بـ عمري
رجعنا للبيت بشرناهم فرحوا الـ همام كلش
بشهر الثالث صارت حفلة التخرج مالتي دزيت الصالح ورحمة دعوة حتى يشاركوني هالفرحة الحلوة
همام.. گاعد بالمكتب اشتغل سريع
علمود الحگ على حفلة التخرج دخل علية صالح هااااا
- اجاني خبر
- خير ان شاء الله
- رزاق
- شبي
- تذكر تجار الممنوعات الوصلت النا معلومات ديتعامل رزاق وياهم خارج العراق
- اي
- الظاهر تخلفوا ويا وصفوا اليوم
- مات يعني
- لا بالمستشفى بس حالته كلش خطرة ما اظن يعيش
- وهسة شنو ابلغ طيبة
- المفروض تبلغها بس يظل القرار الك اني بالنسبة الي رايح هسة للبيت ابلغ رحمة حتى يصير عدها علم
- خوش لعد اروح واحچي وياها مو مال مكالمة
- طلعنا من المكتب صار مخلد گدامنا هااا خير شصاير
- رزاق
- شبي وجه التنكة
- الجماعة تخاربوا ويا وصفوا اليوم بس بعده دينازع
- اااااي واخيراً
الى قير وبأس المصير ،، بس شنو وين دترحون مفهمت
صالح.. رايحين ننطي خبر للبنات
مخلد.. لا همام مرتك حامل مو مال هيچ خبر لا تجيب
همام.. ما اگدر اضم عليها هيچ خبر
لازم تعرف احسن متعاتبني بعدين من تعرف بية چنت ادري وما گلت
مخلد.. خوش بس دير بالك عليها خطية متستاهل
سلمنا علي وطلعنا راح صالح يبلغ رحمة
وصلت الكليتها چانت تنتظرني بالباب هاااا وين صرت وليش وحدك وين صالح
- باوعت عليها خايف
- احچي همام صار شي مو زين مووو
- اي بس اوعديني متتأثرين بالراح اگوله أبنچ بـ بطنچ
- اوعدك بس احچي بسرعة گلبي وگع
- أبوچ
- شبي هذا بعد
- ضاربي اليوم بسبب شغلة بالممنوعات وبالمستشفى
كل كلام الدنيا ميوصف شعوري بـ هاللحظة
ما اعرف افرح لو اضوج
درت وجهي على همام اخذني اله ع السريع راد حاول بس حتى يمنعني مگدر مستحيل افوت هالفرصة
الطريق كله ادعي كون الحگ علي قبل ليموت
وصلنا صالح ورحمة موجودين
بس شافتني بچت واجت تركض طيبة بابا راح يموت
طيبة.. لتبچين علي كافي ميستاهل دمعة من عيونچ
صالح.. انتِ ليش اجيتي مو حامل يمعودة
ما جاوبتة التفتت على همام وطلبت منه اشوف رزاق
گال ميصير بالعناية
رديت مو صعبة عليك تگدر تدخلني اذا تريد من شاف اصراري راح جابلي أذن بالدخول طبينا سوة
نايم على الأجهزة نفس نومة همام بالضبط
التفتت كلهم وراية
رجعت باوعتله ورفعت عيني ع الجهاز گلبه ديدگ اااخ شوكت توگف وتريحني تعبت من كابوسك
لزمت إيد رحمة وتقدمت علي
نزلت دموعي
راح احچي رزاق وراح تسمعني غصباً عنك حتى لووو چنت نايم أو ميت ميهمني المهم تسمممممع
هاي اني اجيت اليوم حتى اشهد على موتك بـ نفسي
وهاي رحمة الما رحمتها بيوم
اجت وياية حتى تكحل عينها بشوفتك وانتَ تناااااازع الموت گدامها لأن هذا أقل شي تقدمه النا
كم واحد مات على إيدك تحب اذكرك اخاف ناسي
رحيم
الشمرتة گدام عيوني بـ نص الماي الحار وانـتَ تضحك
لو أمي الچنت يوميا تموتها ع البطيء
لحد مقضيت عليها وهيَّ حامل بشهرها بس لان وگفت بـ وجهك وحاولت تحميني منك ومن اجرامك
التفتت على صالح باوعت بـ عيونه ودموعي تمطر
لو جدو وعمو حامد
الكتلتهم بددم بارد واجيت بعدها حتى تعترفلي شلون موتتهم وتهددني بـ نفس المصير الأخواني
بس حچيتها صفن صالح بـ وجهي
شوية وهجم على أبوية گوة لزمة همام اهدأ يمعوووود
- ولك همام شـ هدأ مدتسمع حچيها
هذا الحيوان هو الكتل أبويه وحرمني منه بالوقت الما احتاج شي بحياتي غير وجوده فوگ راااااسي
زين ليش فهموني ليشششش
والله ما سواله شي كل ذنبه چان يدافع عن طيبةةةةة وأخوانها ومن منوووو من أبوهم العااااااار
طيبة.. لتلوث إيدك بي اتركه
هـوَ ما باقيله شي كلها أيام والله ياخذ روحه ويريحنا وهناك راح يطلع حق كل شخص ظلمة من عيونه
حچيتها ورجعت باوعت الأبوية ابچي
رزاق اذا تسمعني ومتأكدة تسمعني فـ ركز بـ هالكلمات كلش زين
الله ليسامحك ولا يغفرلك ولا يرحمك بـ رحمته
وراح يجي هاليوم اللي أواجهك بي گدام رب العالمين
وساعتها بـ دموع عيني وحرگة گلبي
اطالبك بحقي وحق أخوية وأمي وعمي وجدي وتعرف يم ربك ميضيع حق فـ شلون لو چان هالشي يتعلق بالأمانة المو من حق بشر يسلبها غير الخالقها
- سحبني همام كافي خلينا نطلع لتأذين روحچ بسببه
درت وجهي سحبت رحمة وطلعنا
انهارت خطية
حقها مو سهل عليها الكلام السمعته بس لازم تعررررف لازم تنقهر على أمها مو على رزاق المجرم
ظل صالح يهدي بيها
شوية وطلب منه همام ياخذها للبيت ترتاح
بقوا واحد يوصي بـ الثاني صالح يگوله ديـر بالك على طيبة وهذا يگوله لتخلي رحمة وحدها تحتاجك
رجعنا للبيت أول ما دخلت صعدت الـ غرفتي ع السريع حتى نسرين ما شفتها
نمت ع الچرباية وشبعت بچي انفتحت الباب بس دخل همام ركض سحبني الـ حضنه يبوس بـ راسي
- اشششش بداعتي كافي لتبچين دتأذيني وياچ والله
بعده يحچي دگ جهازة
شفت الاسم صالح رد هااااا صدگ والله يلا ماشي روح
- سد الخط مسحت دموعي وباوعتله شكو
- مات أول ما طلعنا من يمه
- شمرت نفسي بـ حضنه وشبعت بچي والله صعبةةةة لا مو صعبة تذبح لمن البنية تفرح بموت أبوها
- كافي اني رجال وگلبي گام يوجعني ارحميني طيبة
- ما جاوبته بچيت لحد ما انگطع نفسي
حس بية هدأت رفع راسي بـ أطراف اصابيعة هاي شنو شمسوية بـ روحچ حرام والله ليش كل هالبچي
- مو بـ إيدي والله
- دتأذيني
- اسفة... وبچيت گبل سحبني الحضنه لـ تعتذرين انـي الأسف لأن ما اگدر اشيل الوجع من صدرچ الصدري
- اسم الله عليك من كل وجع
- عندي الچ فكرة ومتأكد راح تعجبچ مثل ما عجبتني
- شنو هيَّ
- ليش متكتبين قصتچ بـ كتاب
هيچ انتِ ترتاحين والعالم راح تعرف المعاناة الـ عشتي بيها طول هالسنين عسى ولعل يخف شوية وجعچ
- شـ يفيد قابل
- شلون شيفيد بشاعة رزاق راح تتسجل بالتاريخ وانتِ ترتاحين من تلگين ناس تسمعچ وتحس بيچ
- وتتصور هالشي راح يمحي الأثر من گلبي
- مستحيل ينمحي بـس نگدر نگول يهون مـن وجعـه
- ما اعرف افكر
- فكري براحتچ واني مستعد اساعدچ بـ أي طريقة بس وافقي وخلي الباقي علية لتشيلن هم الشي
وفعلاً خليت هالفكرة بـ راسي
بالبداية ردت اطبعها كتاب لأن مچتت اعرف اكو قصص عراقية شعبية تنكتب بـ إيادي كاتبات مبدعات
بس بعد ما اكتشفت الواتباد عن طريق الصدفة غيرت رأيي خصوصاً من قريت قصص بكثرة وانكتبت قصة طيبة هالقصة الغريبة نوعاً ما
ماكو ظلم ابشع من ظلم الأهل
ولا اكو شي يأذي بالحياة گد ما تخاف البنية من سندها الوحيد الى ان يتحول هالسند الكابوس متصحى منه طول عمرها...
وهيچ انتهت ذكرياتي
بس قصتي لا تزال مستمرة لأن الحياة تمشي ومتوگف على محطة واحده
شكر كبير لكل الناس
الساندوني ودعموني ودعوا الية طول هالمدة البسيطة العشتها وياكم بـ حلوها ومرها
اشوف تعليقاتكم واحد واحد واحبكم واحد واحد وهذا دعائي الكم
عسى ايامكم كلها افراح وسعادة ومتعيشون يوم واحد من الأيام العشتها وشهدتوا عليها خلال هالقصة
شكراً لـ ربي اولاً واخيراً
شكراً للكاتبة على تعبها وياية طول هالفترة
شكراً لزوجي اللي لولا فضل رب العالمين ثم فضلة ماا وصلت طيبة الكم اليوم ولا عرفتوا قصتها
يامن عرفتوني في السر
ادعوا لي في سركم فـ دعوة الغريب للغريب مستجابة
_____________________
الى هنا نطوي واياكم صفحة ( أبي لم يكن إنساناً )
اجتمعنا على الحب
وسوف نفترق على الحب والخير
يعز علي أن اوداعكم ولكن لكل بداية نهاية وهذه هي نهاية الراوية حيث سنغادرها كما دخلنا حتى نلتقي في مكان أخر
القصة انختمت عام 2019
هواي صارت احداث بـ حياتهم لحد الأن ما كاتبتها ولا متطرقة الها واذا نويت اكتبها فـ مراح تحصلون عليها غير بـ حسابي حصراً خليكم محتفظين بالقصة بمكتبتكم حتى اذا نويت انزللكم احداث مستقبلية عنها يكون عدكم علم بـ هالشي
وهواي منكم طلبوا صور مشابهة للأبطال
الصور جاهزة عندي ومن زمان
بس المشكلة اغلب اشباهها اشخاص حقيقيين اخاف انزلها وتبدي المشاكل لأن مثل متعرفون بعض البنات ميگعدن راحة يرحون يطلعون حساب اصحاب الصور ويراسلوهم وهيچ يوگعوني بـ مشاكل اني في غنى عنها
كم يوم وانزللكم هنا إعلان قصتي الجديدة
تلگوها بـ حسابي هذا 👈🏻 Lubna_Almousawi
الى ذلك الوقت استودعكم الله واسترعيكم أحبتـي
اختكم الكاتبة (لبنى الموسوي)
.... كـل الحـب وانتـم الحـب كلـه ❤🥀