#أبي_لم_يكن_إنساناً
البارت التاسع والأربعون
للكاتبة لبنى الموسوي
رجعت نظري للباب اقرا بـ أيات الذكر الحكيم
فجأة انفتحت
طلع الممرض يركض صاح من أول الممر ايناااس بسرعة صيحي الدكتور ماجد المريض هنا صحى
ما استوعبت كلامه
من الصدمة هسة لو اشوفه واگف گدامي على طوله ما اصدگ چنت يائسة لـ درجة العجز من سلامته
حچاها الممرض ورجع دخل للغرفة
صحت مخلد هاي شديصير هنااا رد اصبري هسة نعرف
شوية واجة الدكتور يركض
ظليت اندعي من الخوف احس ريگي نشف
گعدت ع الكرسي قبل لا اوگع وعيوني ع الباب منتظرة واحد منهم يطلع ويبشرنا بـ خبر زين عنه
فجأة انفتحت الغرفة وطلع الدكتور
ركضنا علي بنفس اللحظة صاح مخلد بشرنا الله يخليك
- الحمد لله
بفضل رب العالمين وقوة المريض گدر يتجاوز هالأزمة ورجعت اعضاءه تشتغل بشكل طبيعي وسليم
- يعني ؟!!
- المريض فـاق من الغيبوبة وشلنا الأجهزة عن جسمـه
بس حچاها صرنا نضحك والدموع تارسة العيون
باوعت الـ بتول وحضنتها حيل
سمعتي بتول سمعتي الدكتور شگال همام راح يعيشش
- اي اي سمعت لك الحمد ولك الشكر ياااا رب العالمين
مخلد.. اي دكتور شنو نفهم من كلامك زال الخطر عنه
الدكتور.. طبياً زال الحمد لله
لكن تعرف قدرات الدنيا ممحزروة لذلك راح يظل فترة طويلة هنا الى ان نتأكد من شفاءه بصورة تامة
طيبة.. شوكت يگعد دكتور شوكت يفتح عيونه ونشوفة
الدكتور.. راح يتأخر شوية
لأن صح اعضاءه رجعت تعمل لكن وعيه بعد ما رجعله
مخلد.. شگد يتأخر يعني
الدكتور.. هوَ وشجاعته انتم بـس ادعوا اله والله كريم
محمود.. يا الله ألف الحمد لله والشكر
هانت ان شاء الله ما ظل شي ويفرحنا بـ سلامته البطل
صالح.. امين عمي امين
الفرحة متنوصف بـ هاللحظات الحلوة
مع ذلك ظل الخوف مسيطر علينا بسبب كلام الدكتور لأن مستحيل نرتاح اذا ما وگف على طوله گدامنا
لـ 12 بالليل وماكو اي جديد
كل لحظة تمر علينا بـ سنه منتظرين بس يفتح عيونـه حتى يهدأ خوفنا شوية ونگدر نسحب نفس براحة
باوع عمي للساعة وصاح لـ ولده يلا تأخرنا كلش اليوم
استأذنوا وراحوا
راد ياخذني صالح ويا حتى ابدل واسبح ما قبلت ادري اذا رحت وياهم مراح اتحمل انتظر الباچر الظهر
گمت للمغاسل غسلت جوة وتوضيت
وگفت اصلي صلاة الليل وادعيله ساعة ورجعت يمهم
لگيت بتول وحدها سألتها بـ شك گالت لتخافين شويـة ويرجع راح للأسواق
گعدت ع الكرسي تعبانـة
نزلت راسي اسبح الأستغفار بـ أطراف اصابيعي
فجأة واحد مدلي عصير وكيك رفعت راسي هذا مخلد
- ليش زحمت روحك
- ماكو أي زحمة بس اكلي ميصير تظلين هيچ
- ما اگدر والله
- همام واطمأنينا علي صار لازم تاكلين لتوگعين خوية
- احچي الـ نفسك هالكلام
الك 3 أيام غير الماي ما مخلي بـ حلگك
عاد احنة ارحـم تگدرون تجبرونا على الأكل مو مثلكم
- هسة راح أكل هاي جبت الي هم مو بس الكم يلا اخذي
- والله ما اشتهي
- واذا اگولچ الـ خاطر همام تاكلين
- بس حچاها صعدت الـ عبرة الصدري
اخذتهن من إيده وتشكرته
بالگوة جبرت نفسي شلون ارفض وهوَ محلفتي بالغالي
صارت بـ 3 الفجر والوضع مثل ما هوَ
گاعدة وعيوني ع الباب طلع الممرض يركض گمت من مكاني بـ اتجاه مخلد شكو بعد كل شوية ومخوفينا
- انتظري اجة الدكتور الخفر هسة اسألة
حچاها وراح اله
ما سولفوا كلمتين ودخل للغرفة رجع مخلد ضايج هااا شكو بس لا گال شي مو زين عن همام ؟!!
- لا ما حچة اصلاً
گال ادخل للمريض اشوفة يلا اگدر اجاوب على اسئلتك
رفعت راسي ادعي احس صبري نفذ بعد...
صرت اروح وارجع بالممر
يارب كون خبر يخليني اسجد لك شاكرة من شدة الفرح
دقايق وطلع الدكتور مبتسم
فتحت عيوني على ابتسامته معقولة راح يبشرنا بخبر سلامته
مخلد.. دكتور الله يخليك گول شي يفرح
الدكتور.. ألف الحمد لله على سلامته
المريض رجع لـ وعيه ونگدر نگول وضعه مستقر تقريباً
بس حچاها ركضت بتول حضنت مخلد تبچي
هوَ عكسها يضحك
أما اني ظليت جامدة بـ مكاني اخاف افرح ويطلع كل هذا حلم وارجع للواقع بـ مجرد يصحوني منه
ظليت اباوع عليهم مصدومة انتبهلي مخلد
عاف بتول واجاني
طيبة سمعتي الدكتور شنو گال همام گعد گعد يعني زال الخطر عنه كلها فترة بسيطة ويرجع الـ حياته والكم
- والله يعني گعد گعد مو حلم هذا اخاف افرح وانصدم
- لا واقع ،، البطل گعد
مباشرتاً نزلت بالگاع ساجدة هذا نذر علية ولازم اوفي
لك الحمد ولك الشكر يا رحمن يا رحيم
لك الحمد ولك الشكر يا منان يا عظيم
لك الحمد ولك الشكر يا معطي يا كريم
لك الحمد حتى يبلغ الحمد منتهـاه... ولك الـشكـر عـدد خلقك وزنة عرشك
گمت من الگاع ما اشوف گدامي من البچي
باوعت الـ مخلد ومسحت دموعي مداصدگ همام عاش والله ما اصدگ
- لا صدگي واني گلت الكم أخوية سبع راح يتجاوزها
التفتت على الدكتور واگف يحچي ويا الممرض
تقربت منه دكتور اگدر اشوفه
سد القلم وباوعلي لا بنتي ممنوع حالياً المريض تعبان
- والله العظيم بـس اشوفه واطلع ما احچي ولا حرف
- بابا هالشي المصلحة المريض
مخلد.. دكتور اسمحلها تدخل
دقيقة مو أكثر لأن هيَّ زوجته بالعكس اذا شافها يرتاح ميتعب
- وشـ تستفاد من هالشي اذا هوَ مراح يحس بـ وجودها
- لا دكتور يحس ان شاء الله بس وافق عفية
- مرتضى
- نعم دكتور
- اطلع وخلي البنية تدخل للمريض مو أكثر من دقيقـة وتطلعها ولتسمح لحد يدخل بعدها مفهوم
- مفهوم ان شاء الله دكتور
بس حچاها راح انطاني لبست وخليت جهازي يم بتول
تقدمت بـ اتجاه الغرفة جسمي ينفض من الخوف
فتح الباب خطيت خطوة للداخل عبالك انشليت رجلي گوة اسحبها غمضت عيني والله ما بية اشوفة
يلا طيبة قوي نفسچ
صح وضعه تعبان بس المهم گام بالسلامة وتعدى الخطر
ويا ما فتحت عيني نزلت دموعي
عبالك فلم رعب
نايم والجسم ملفلف الأوكسجين بـ وجهة والغرفة عبارة عن اصوات ضربات القلب دگت براسي مو أذني
مشايفة هيچ مناظر غير بس بالمسلسلات
ولمن جي اشوفها بالواقع
اشوفها بـ أعز إنسان على گلبي والله هالشي هواي علية
فززني صوت الممرض تحركي شبيچ ما عندچ وقت
خطيت بـ اتجاها خطوات اثقل من كل الحمل الشايلتة على ظهري من الطفولة
وصلت يمه سودة علية شلون وجهه متغير من التعب
قربت حلگي من أذنه عسى ولعل يسمعني
گوم حبيبي اني طيبة مرتك وحبيبتك الراح تموت على كلمة منك تطمنها بيها
ماكو ولا فتح اختنگت كلش اريد اسحب النفس ما اگدر
رفعت إيدي شبكتها بـ أطراف اصابيعه
بالگوة سيطرت الجهاز بـ إيده وخفت لا يتحرك باوعت علي يلا همام حرك إيدك فتح عينك سوي أي شي اريد احس بيك عايش
حسيت الباب انفتح
درت وجهي دخل الممرض يلا عيني انتهى الوقـت بعد
- بس لحظة
- رجاءاً كافي گدامچ الدكتور نبهني متتجاوزين الدقيقة
رجعت باوعت الـ همام وشديت على إيده حيل
ردت اسحب إيدي
فجأة حرك أصبعه لا مو حركه عبالك رد روحي الچانت ويا لا ارادياً بچيت بـ صوت عالي
- التفتت ع الممرض حرك إيده والله حركها تعال شوف
- يلا اطلعي لا اتعاقب بسببچ
مسحت دموعي ورجعت نظري على همام
مررت اصابيعي بين خصلات شعرة فتح عيونك تعبت
- يلا عاد اطلعي
- اي اي
باوعت علي نظرة اخيرة وطلعت اركض المخلد وبتول بس شافوني گاموا ع السريع ها شصار
- حس علية والله حسسسس
- حچة يعني
- لا لا بس توسلت بي يسوي أي شي حتى احسه عايش فـ حرك اصبعه معناها اكيد چان ديسمعني
باوع الـ بتول وسحب راسها الـ حضنه يضحك
- مخلد يعني عمو عايش
- عايش وراح يگوم بالسلامة هذا همام قوي ويظل قوي
من الفرحة ما گدرنا ننام للصبح
بـ ثمانية ونص اجة الدكتور المشرف على حالته
دخل يشوفه دقايق وطلع مبتسم ركضنا علي ها دكتور
- الحمد لله گدر يتجاوز مرحلة الخطر بالوقت المناسب بس لازم يظل هنا فترة طويلة تحت المراقبة
- اي عادي يظل بس شوكت نگدر نشوفه
- باچر ان شاء الله من ينقلوا الـ غرفة خاصة نسمح الكم
الفرحة البينا بيومها ممنطيها الأحد
للظهر اجة صالح گام مخلد يركض بشره خطية ميعرف بعد شيسوي حضن مخلد يحمد الله ويشكره
أخر شي التفت علية مبتسم
- هااا طيبة شـ گتلچ مو گلت همام سبع ومراح يعوفچ
هزيت راسي مبتسمة شوية وانخبصت المستشفى
عالم رايحة راجعة
ظلت هالهوسة لليل بـ 12 يلا هدأ الوضع گاعدة وياهم بتول يمي ومخلد بالممر يصلي طلع الممرض منو طيبة
- باوعتلة خايفة... اني بس ليش ؟!!
- المريض گعد وطلب يشوفچ
- التفتت على مخلد سلم من الصلاة وابتسم يلا فوتي مو تردين تشوفي
همام.. تحركت من يم صالح ومخلد حتى انفذ الخطة
ظليت اراقب المكان
شفتهم من بعيد ديباوعون للخلف گمت ع السريع وقبل لا اتحول للجهة الثانية انقنصت الظاهر كاشفيني
وگعت بـ مكاني بـ نفس اللحظة
ما اجة على بالي غير أمي وطيبة اذا سلمت الأمانة منو الهن من بعدي
ثواني وفقدت الـ وعي تماماً
ما اعرف وين اني وشنو هالأصوات الگاعد اسمعها
فجأة صار صوت طيبة بـ مسامعي تتوسل بية اجاوبها
حاولت افتح عيوني أو ارد عليها بس ما گدرت
كل الطلع بـ إيدي لحظتها
احرك أصبعي بصعوبة حتى تعرف اني داسمعها وترتاح
مجرد ما حركته كل شي اختفى من مسمعي
فتحت عيني ضرب ضوة قوي بيها
بالگوة گدرت اركز غرفة ظلمة تقريباً والأجهزة تحيطني حركت راسي بـ هدوء الممرض نايم ع الكرسي
ما گدرت احچي بـ سهولة
اخذ الموضوع وياية وقت طويل يلا سمع صوتي وگعد
- مباشرتاً اجاني يركض الحمد لله على سلامتك يمعود
- اكتفيت بـ الأبتسامة ما بية ارد
- خليني اطلع ابشرهم اثنين بنات ورجال تخبلوا عليك
- صارلي.. سكتت شوية
حاولت استجمع نفسي الوجع سيطر علية صار شگد هنا
- اليوم الك رابع
- رجعت غمضت صح تعبان بس ضروري اشوفها التفتت علي بعده واگف يم راسي طيبة
- شنو
- طيبة... صيحها
- اي فهمت عليك لتتعب نفسك بالحچي صحتك بعدها
بس طلع غمضت عيوني بـ تعبت
ما ادري نمت فقدت ما احس إلا لمسات خفيفة صارت على إيدي
باوعت هاي طيبة بس وجها مينشاف من البچي
ابتسمت الها ورجعت غمضت
صار صوتها بـ أذني الله يخليك اگعد اريد اسمع صوتك لتنام فدوة لتنام
ما گدرت اجاوبها
فجأة صارت تشهگ ضغطت على نفسي ورجعت باوعت الها منزله راسها على إيدي وتعصر بيها حيل
- طيبة
- انهاريت لأن غمض بسرعة
بعدني ابچي واتوسل بي يرد صاحني !!!
رفعت راسي دموعي تتسابق على وجهي معقولة همام فتح عيونة
- ابتسم بـ وجهي ورجع لفظ اسمي مرة ثانية
- يا روح وگلب وعمر طيبة يا حياتي وحبيبي ودنيتي كلها
- بالگوة حچاها لتبچين بداعتي.. ورجع غمض بلحظتها
- لا خلص وداعتك
مراح ابچي بعد المهم روحي رجعتلي بالسلامة احبككك
حچيتها وانسحبت من المكان لازم يرتاح تعبان كلش
طلعت تلگاني مخلد ها بشري حچة
هزيت بـ راسي اي حچة بس كلمتين سودة علية ديتأذة
بتول.. يمعودة عسى ما حرف واحد المهم صحى يبووو گلبي ما احس بي بعد ألف الحمد لله والشكر
للصبح اجة الدكتور
شاف وضعـه وراها طلب منهم يحولوا الـ غرفة خاصة
انخبصت الدنيا الممرضين رايحين جايين
شوية وطلعوا
ردنا نشوفة منعونا نتقرب گال مخلد انتن ظلن هنا بس يستقر بـ غرفته اجي اخذچن تشوفنا.. وراح
ربع ساعة شفته يتمشى بالممر گمنا اني وبتول ها بشر
- اصبرن شوية مو هسة
- ليش
- غرفتـه انخبصت بـ جماعتنا فـ خليني اخذچن للبيت وباچر اجي عليچن حتى ارجعچن لهنا تشوفنه هاا
بتول.. مخلد صارلنا ايام بالبهذلة من صحى تريدنا نروح بدون منشوفه طبعاً لا مستحيل اروح هسة
مخلد.. يمعودة الدنيا محترگة
لليل زين لو فرغت غرفته شعدچن هنا روحن ما تعبتن
بتول.. عادي حالنا حالك قابل احنة نتعب وحضرتك لا
مخلد.. استغفر الله رب العالمين واتوب اليه ادري شلون تالي وياچ
بتول.. والله ما اتحرك لو تصلي صلاة الليل مو تستغفر
مخلد.. لعد خليچن هنا يمة متوصلن إلا تفرغ الغرفة من الرياجيل وأي شي تحتاجوا اتصلوا علية
بتول.. اي ميخالف
ظلينا ننتظر للوحدة ما رجع مخلد
گمنا توضينا وصلينا
گاعدين ع الكراسي وعيونة ع الممر اجة صالح بـ إيده علاگة باوعلي مبتسم السلام عليكم
طيبة.. وعليكم السلام شفتة مو لأن گعد وحولوا خاص
- هههههههه شفتة والحمد لله صار زين وعين الله علي
- وحاچيته
- مو بس حاچيته هوَ همْ حاچاني وضحك وياية بعددد
- ألف الحمد لله والشكر
- يلا ما طول ارتاحيتي شوية اخذي الأكل حتى تتغدون
- اني ما اشتهي
- طيبة اخذي هاي تعليمات همام گلي لتعوفهن إلا ياكلن هالأكل لو تردي يزعل منچ وهوَ تعبان
- والله هوَ طلب هالشي
- وداعتچ
- بـس حچاها اخـذت الأكل وجبرت نفسي حتى اتغدة
عبرت العشرة واحنة وحدة تتصفن بـ وجه الثانية
صارت الـ ونص
اجة صالح بس شفتة گمت اركض واخيراً اجيت مليت واني انتظر واحد منكم يبين علمود يطمنا
- وهاي اجيت
- شوكت نگدر نشوفة والله تعبت
- هسة راح اخذكم اله بس اغسل وارجع انتظروني هنا
هوَ حچاها لو اني طرت من السعادة
درت وجهي على بتول حضنتها اضحك شوية واجة يلا نروح
هزيت بـ راسي ومشينا ويا
وصلنا للغرفة بس دخلت صارت عيوني بـ عيونه
تصنمت بـ مكاني يربي هذا همام مفتح وديباوعلي ااخ گلبي راح يوگف من الفرحة والله مگاعد اصدگ
- ركضت بتول تريد تحضنة لزمها مخلد ووين يمعودة الرجال تعبان لتتقربين منه
- نزلت دموعها بـ خنگة شفت الموت وياك عمو شسويت بينا والله حرام عليك
حتى ما گدر يجاوبها اكتفى بالأبتسامة والتفت باوعلي
صاح مخلد يلا نخلي يرتاح
طلعت هي وصالح رجعت بـ خطواتي خزرني هاي وين مو اني طلعتهم علمودچ يلا تعالي شوفي
- ميحتاج هوَ اصلاً تعبان
- من يشوفچ يروح كل تعبه يلا اخذوا راحتكم استأذن
همام.. فتحت عيوني على صوت الدكتور
فحصني وراها گال حولوا يلا
اخذوني للغرفة هواي تأذيت ضربوني مسكن ما اعرف شگد يلا حسيت
- فتحت مخلد واگف فوگ راسي يا الله واخيراً گعدت
- شلونك
- اسكت همام لهنا وانتهت صداقتنا تعبت ما بية اتحمل
- هاا يعني اهون
- باوعلي ودار وجهه اهووو هم بچيت الدموع مو للزلم يول أخوك تعبان لتأذي بـ سوالفك هاي
- حقك متدري شصار بينة واحنة نشوفك تنازع الموت
- هزيت راسي وغمضت
ما اگدر احچي تعبان تعب بس الله اليعلم بي
شوية وگامت العالم تجي
صار الليل ما بية استقبل الضيوف باوعت الـ مخلد كافي
- لا انتهت الزيارة
بس صالح راح يجيب البنات يشوفنك وراها ارتاح شگد ميعجبك خطية ما قبلن يرجعن للبيت علمودك
درت وجهي وغمضت اخذت عيني النوم
حسيت على صوت الباب
مباشرتاً باوعت الـ طيبة خطية متگدر تتحرك من مكانها شوية وطلعهم مخلد ظلينا بس اني وياها
تقربت مني تبچي لزمت إيدي بـ إيدها ولمست أطراف شعري بـ الإيد الثانية ضجت كافي بچي
- هاي دموع الفرح
- ميخالف طيبة ما احب اشوف دموعچ بـ كل الحالات
- خفت عليك يروح طيبة
والله لـو صاير الك شـي چان متت وراك وانـي عايشـة
- اسم الله
- ليش سويت بية هالشكل
انتَ بـ يومها مو گتلي لتخافين ما اموت واعوفچ گلبي مينطيني لعد شلون گلبك انطاك تموتني باليوم ألف موتة واني اشوفك دتنازع گدامي وما بـ إيدي شي عليك
- مو بـ إيدي وداعتچ.. اسف
- ديلا كافي لتتعب نفسك خليني اطلع واعوفك ترتاح
- ظلي
- شنو شـ گلت مسمعتك زين
- ظلي يمي لتروحين
- خليني اروح وجودي يتعبك ادري بـ نفسي ما اسكت
- غيابچ هوَ الـ يتعبني
- اااخ گلبي ممصدگة داسمع هالكلام منك يا كل دنيتي
- احبچ
- مراح اجاوبك لأن ماكو كلمة بالوجود توصف حبي الك
ابتسم وغمض عيونه بسرعة
سحبت الكرسي گعدت گبالة ولزمت إيده الأبتسامة على گلبي قبل وجهي حچاها وهوَ مغمض ليش تباوعيلي
- شلون تريدني ما اباوع واني گدامي هالخلقة الحلوة
- باوعلي وضحك متأكدة !!
- لا جديات
عود ليش انتَ حلو بكل حالاتك ممكن سر المهنة عيني
- ههه ظلت حلا مو صرت حلاوة
- امممم لعد اني ضغطي هابط ويحتاجلي حلاوة حتى يستقر شوية اجيت بوقتك
- ولچ مو وكتچ لتتحارشين
- هههههههه يلا حبيبي غمض عيونك الحلوة ونـام نـوم العوافي ان شاء الله واني يمك للصبح اذا تحتاجني
بس حچيتها غمض بسرعة من التعب
خطية للصبح ما گدر ينام واني هم رغم البارحة منايمة ولا دقيقة بس ما گدرت اعوفة ظليت يم راسه
للستة هدأ شوية
نـام تقريباً ساعة ونص بعدني صافنة علي فتح عيونه احلى صباح هذا من بديت يومي بـ نظرة منك
- صباح الخير عمري
- انتَ الخير شلونك هم اكو وجع شگاعد تحس بالضبط
- اي
- هواي لو شوية
- دعوفي الحچي وامشي صيحيلي مخلد على السريع
بس حچاها بست راسه وطلعت مخلد وبتول گبال الباب
گام بسرعة ها شلونه
- شلونه يعني
الليل كله ما نام يون من الألم خطية المهم هسة يريدك
بس حچيتها دخل رحنة اني وبتول ورى
- ها خوية
- مخلد ولو ازحمك بس رجع بتول وطيبة للبيت بسرعة
طيبة.. عفية همام اروح اسبح بس ارجع ما اگدر اخليك
- لتتعبيني واسمعي الكلام
هسة ترحين ويا مخلد وما اريد رجلچ تعبت المستشفى مرة ثانية فترة واطلع كافي عليكم هالأيام
- ما تعبت والله
- مو بس ع التعب نفذي طيبة ترى ما بية احچي هواي
- تمام تمام راح اروح لتضوج
مخلد.. هسة صار تمام ونزل عليچن العقل فجأة
مو راح يصيرلي اسبوع اتوسل لا عين التنكسر ولا راس اليلين أبوية حرگتنا
طيبة.. ههههههه غير چنا خايفين علي بس هسة تطمنا الحمد لله
بتول.. انـتَ بالذات لتحچي ترى حالك اسوء مـن حالنا
همام.. يلا مخلد اخذهن
مخلد.. ميخالف بـ عيني بس اصبر شلون اعوفك وحدك
- شكو علية قابل
هيَّ نـص ساعة توصلهن وترجع تلگاني نايم من التعب
سلمت علي وطلعت على عمى عيني ما اگدر اعانده وهوَ مريض بس شيصبرني هناك ساعدني يا الهي
بـ نص الطريق گلت الـ مخلد ياخذني البيت همام
وصلنا بالباب وراح
بس دگينا الجرس طلعت خديجة حضنتنا تبچي بصوت عالي حاولنا نهديها بس بالأخير انهارينا وياها
تعب هالأيام صار بالروح قبل الجسم
بالگوة سكتنا
دخلنا للصالة الحجية گاعدة تبچي ركضنا حضناها الله يساعدها گلب والدة ماكو بشر بالدنيا يوصله
الحجية.. ولچن شلونه وليدي طمنوا گلبي علي لا اموت
بتول.. والله بيبي زين
كلها كم يوم يگوم على حيله ويجي ينور هالبيت بحسه
خديجة.. يعني شنو نگدر نحچي ويا هسة
طيبة.. اي شوية واتصلي على مخلد بس خل يوصل اله لأن بعده بالطريق هوَ وصلنا لـ هنا
حچيتها وصعدت للغرفة ادعي الـ نفسي بالصبر
ما اعرف شلون مرت الأيام
اشتاقيت اله كلش من يوم ما رجعت من المستشفى ما شفتة بعد لأن مانع علينا نوصل الـ هناك مهما صار
رغم ديتصل بية يوميا ثواني بس هالشي ميبرد گلبي
اريد اشوفة
اريد احس بي يمي الأيام مدتمشي بدون عيونه شلون يربي شوكت تخلص هالسالفة ويرجعلي
اليوم اله 28 يوم على الحادث
گاعدة بالغرفة ادرس محاضراتي دگ الموبايل
باوعت همام مثل العادة قبل لينام يتصل يتطمن علية ويسد الخط بسرعة
- حبيبي
- عيون وگلب حبيبي
- اشتاقيتلك والله كلش هواي اشتاقيتلك
- مو بگدي بس هانت كلها أيام واخذچ الـ حضني صبر
- ما عندي صبر بعد اريد بس اشوفك گلبي راح يطگ
- سلامة گلبچ
- الله يسلمك.. اي شلون صرت بعدك موجوع
- لا حبيبي كل شي ما احس حالياً انتِ شلونچ شتسوين
- ادرس
- لعد خليني اروح ما اعطلچ عن دراستچ
- لا ما عندي شي مهم هيچ اراجع ظل نسولف ضايجة
- والله تعبان اريد أنام هسة
- اي حبيبي حقك يلا روح ارتاح وباچر اتصل مو تنسى
- احبچ
- اموت بيك حياتي
سلمت وسديت الخط ضايجة شهر كامل مو كافي بعد
ثاني يوم داومت
مالي خلگ حتى محاضراتي ما كملتها
اجة علينا مخلد من يومها صار هوَ ياخذنا ويرجعنا لحد اليوم همام ميأمن بالخط شگد حاولنا ويا ميقنع
وصلنا للبيت بالعادة يذبنا بالباب ويروح
شو هالمرة دخل ويانا
باوعتله متفاجأة ها مخلد مو لازم تروح الهمام لو شنو
- شوية واروح أبن عمچ يمة لتخافين
- مو تتأخر علي
- اطرديني بعد گولي لتطب يلا
- لا والله مو قصدي بس همام ميرتاح إلا وياك وتعرف
- ميحتاج توصيني هسة رايح اله
رحبت بي ورحت للمطبخ
خديجة حارگة الدنيا باوعت للطباخ حيل المن كل هذا
- هاا بطة مو مخلد اتصل وگال غداية يمكم فشلة بعد
- يلا بس اغير ملابسي وانزل اساعدچ ما اتأخر راجعة
- على راحتچ حبيبتي
صعدت فوگ اسحل بـ نفسي من الملل
شيصير يعني لو همام بيناتنا
فتحت الباب چان انصدم بي متمدد ع الچرباية باوعلي وابتسم وسعـت عيوني علي مـن الفرحـة
همام.. كتبولي خروج بس ما بلغت طيبة بالخبر حبيت اسويلهيا مفاجأة حتى الفرحة تصير فرحتين
وصلت للبيت تلگني خديجة وأمي بالهلاهل
ظليت گاعد يمهن بالساعة
وراها صعدت الـ غرفتي ارتاح نمت شوية گعدت صوت طيبة جوة غسلت ع السريع ورجعت تمددت
فتحت الباب بس شافتني انصدمت
گمت على حيلي وفتحت الها إيدي ركضت بسرعة على صدري تصرخ حبيبي حبيبي حبيبي والله ممصدگة
خطينا خطوات سوة وهيَّ بـ حضني
سديت الباب عافتها مفتوحة من الصدمة وبعدتها عني
طيبة.. باوعت الـ عيوني اضحك من كبر فرحتي
رجعني للحايط
لزمني من خصري ومرر أصبعة على أطراف شفتي طيبة
- روح طيبة
- لتضحكين ما اقاوم هالغمازات تاخذين عقلي بيهن ولچ
- شسوي مو بـ إيدي
احس الضحكة طالعة من گلبي مو شفتي غير فرحانةة
- احبچ موت احبچ يولي
- واني ذايبة بيك مو بس احبك يعمري وكل حياتي انتَ
بعده لازمني من خصري سحبني علي ورجعني للحايط
باوع علية بـ نظرات غريبة
ردت ادفعة تقرب مني يتنفس سريع
سحب شفتي بـ أسنانه چان تندگ الباب بسرعة رهيبة ابتعد مني ضايج
- لاااااا اله إلا الله هالبوسة الگشرة همْ ما اريدها عمي
ما گدرت الزم ضحكتي من الموقف
گبل باوعلي بخزرة هزيت براسي ها حبيبي خير شبيك
- افتحي الباب شنو مدتسمعين
- ههههه ادري شكو صاير عصبي علية قابل اني گلتلهم دگوها
- افتحي وبلا حچي زايد
حچاها وراح وگف يم الچرباية رغم وگفته بصف الباب يعني چان المفروض هوَ اليفتحها بس ضاج بعد
عدلت نفسي وطگيت القفل
بس فتحتها طبت بتول تركض الحضنه عمووو هاي انتَ هناااا والله ما صدگت مخلد من گلي عمچ بغرفته
- اشتعلت روحه لـ مخلد ان شاء الله
- يااا هاي ليش تحچي علي
باوعتله ورجعت باوعتلي متحملت ضحكت
گبل فهمت السالفة هااا اسفة اسفة اعتبروني ما اجيت اخذوا راحتكم
بس طلعت لحگتها والله اخاف ابقى يمة صاير منحرف
بعدني بالباب صاح بسيطة الگفچ وين ترحين
- نزلت ركض للمطبخ التفتت خديجة شو بعدچ بملابسچ
- مو شفت همام وانشغلت ويا
الله يسامحچ عمة ليش مگلتيلي موجود أول موصلت
- هههههههه هو حب يسويها مفاجأة شلون اخربها ديلا احچيلي شلون چان لقائكم
- خرب بسبب بتول ألف الحمد لله والشكر
- هههههه راح بيها الرجال
- هههههه يلا لازم نصب مخلد راح يروح يتغدة ببيتهم
صبينا واجتمعنا ع السفرة
طول ما هـوَ ياكل عيوني علي ممصدگة رجع بالسلامة وهذا گاعد بيناتنا وانتهى ذاك الكابوس الأخذ نص عمري
ما اكلت هواي
گمت الملم بالمطبخ شوية واجت بتول ساعدتني
تونا خلصنا سمعنا مخلد يسلم ركضت بتول هااي شنو راح تروح خو ظل نام هنا والعصر روح
- لا اريد اسبح ابدل تعبت كلش
الحجية.. اريـد ربـي ينطيك الصحـة والعافيـة ويرضى عنك وليدي على تعبك ويا همام
مخلد.. أخوية هذا خالة لو شسوي همْ يظل قليل بحقه
همام.. رحم الله والديك ما اوگفلك غير بالأفراح حبيبي
سلم مخلد وراح.. طلع همام يوصله للباب
صعدت اركض
اكيد راح يظلون يسولفون مستحيل يصعد بسرعة
طلعت ملابسي وفتحت القميص بعدني ع النص طـب همام سديته بسرعة باوعلي وضحك
- شبيچ نزيتي
- ليش مدگيت الباب مو تدري بية فوگ هاي همْ سواية
- تقرب مني مبتسم ليش ادگها اكو شي بيچ ممنوع علية
- رجعت ليورة تقدم أكثر انضربت بالكنتور همام شببك
- كل شي بية واولهم انتِ
- اي بس وخر عني مو اريد اغير ملابسي
- واذا ما وخرت
- باوعتله فاتحه عيوني صاح شتسوين اصرخ شسووي يعني واخلي البيت يلتم عليك
بس حچيتها ضحك من گلبه وراح قفل الباب
ردت احچي ضم المفتاح بـ جيبة يلا صيحي اشوف منو يگدر يدخل للغرفة
- همام الله يخليك لتسوي هيچ والله دتخوفني منك
- تخافين مني !!!
- انطيني المفتاح عفية اريد انزل بتول تريد مني شغلة
- عوفي بتول وتعالي نامي بـ حضني
- باوعتلة مترددة
- لتخافين ما اتقرب منچ بـس مشتاق الـ حضنچ كلش
- احلف
- وعيونچ الحلوة ما اتقرب
حچاها وتمدد ظليت خايفة صاح تعالي عاد مو وعدتچ
نزعت من رجلي وتمددت گبل سحبني علي
فتح إيده خليت راسي على صدره
مسح على راسي وباسني من گصتي باوعتلة وابتسمت
- عود صدگ خفتي مني ؟!! ترى چنت اتشاقى
تعرفين مستحيل اسوي شي يأذيچ ولا اگدر اتقرب منچ غير وانتِ لابستلي البدلة البيضا وتدخلين البيتي عروس وگدام كل العالم
- لا ما خفت صدگ
- ليش تچذبين طيبة
الخوف شفته بـ عيونچ ميحتاج تشرحي الي
بعدين خل نفرض صار شي بيناتنا من شنو تخافين غير انتِ مرتي وحلالي سوينا شي غلط وما ادري
باوعت علي والدمعة بـ طرف عيني
اريد احچيله
اريد اگوله شـ عانيت من أرشد حتى يعذر ويقدر خوفي
- بلعت ريگ وحچت بتردد همام أرشد...
- هوَ اني گلت اسمه ما اشوف إلا طفر مـن مكانه خير طيبة شجاب سيرته بالموضوع هسة
- اسفة والله
بس لتصير عصبي مو زين عليك توك يلا بديت تتعافى
رجع تمدد الوجه مگلوب
ما فتحلي إيده بعدها عـن صدره ونمت ضايجة شلون احچيله السالفة هسة اذا حتى اسمه ميطيق يسمعه
- باوعت علي مكشر مررت اصبعي على خـده حبيبببي
- نعم
- لتزعل والله مسويت شي بس حبيت احچي وياك..
- مو بـ إيدي طيبة ميعجبني تذكري على لسانچ وانتبهي على هالشي من اليوم ورايح
- ليش يجوز الموضوع مهم
- حتى لو مهم اني ما اريد اسمعه احتفظي بي الـ نفسچ
- همْ ليش
- هيچ بدون سبب كافي تناقشين گومي يلا تعبت كلش
- اممممم ممكن تكون غرت مثلاً
- شو اسكتي
- ليش اسكت اعترف وگول اي اغار مو بس بهالموضوع لا انتَ كلما تغار متعترف وتتحجج يا بالحرام يا بالعيب
- ههههه يعجبچ اغار يعني
- بالمعقول طبعاً لأن الغيرة دليل الحب شلون ميعجبني
- اي غرت وبكل مرة اغار عليچ من كل شي حتى مني
- رفعت راسي اضحك وبسته من خده حيل اروح فدوة للغيرة وصاحبها هوَ ياهو اليجي ويغار
- انتبهي ترى دتحرضيني عليچ واني ممسؤول عن الشي الراح يصير اذا استمريتي بـ هالوكاحة
- ههههههه لا لا خلص گعدت عاقلة سيدي ما اوكح بعد
- عفية
- لسة ممصدگة انتَ هنا ولا مستوعبة نومتي بـ حضنك
- هاي اني هنا لتفكرين بعد
- شصار بيك من تصوبت همْ اجت طيبة على بالك
- أول ما اجيتي على بالي انتِ وأمي لأن ادري اثنينچن تضيعن من بعدي وفكرت بـ خديجة وبتول
- يعني چنت ناوي تروح وتعوفنا
- هاي الحقيقة المريت بـي مو سهل بيني وبين الموت شعرة وحده لو لا لطف رب العالمين چان اني ميت هسة
- كافي لتحچي بالموت اسم الله عليك
واكيد تصير المعجزة
لأن رب العالمين يدري بـ حالنا ويعرف من بعدك ننكسر ونضيع وبنفس الوقت مو همام اليستحق يموت
اوووي هسة احنة شبينا
ما لگينا غير موضوع الموت نحچي بي كافي گلبي خلص
- بس حچيتها نزل على صدري باسني من جهة اليسار اسم الله على گلبچ حياتي يلا خلينا نحچي بموضوع حلى شنو رأيچ
- وهوَ
- نسوي عرسنا ويا بتول ومخلد مثلاً
- صدگ والله
- وداعتچ وهالشي اقتراحهم
- بس شلون انتَ تعبان وهمَ مراح يتعطلون أكثر من هذا
- ما بية شي تعبان شنو
بعدين راح احچي ويا مخلد يأجل الموضوع فد اسبوعين خلالها جهزي نفسچ انتِ وخلي الباقي علية
- هيچ راح تضغط على نفسك ومتهون علية والله
- لا ضغط ولا شي بـس انتِ تتحججين مبين مموافقة تصيرين مرتي
- ضحكت وحضنته حيل موافقة طبعاً موافقة وللأبددد
- ههههه لعد گومي اوصلچ البيت جدچ
همْ اشوفهم
وهمْ يصير عدهم خبر بالمشية يمكن راح اسويها باچر
- هسة انتَ تعبان وينك وين هالسوالف
ميحتاج والله مشية شنو تجهيزات شنو ليش عندي أهم منك ومن عافيتك
- ما اتنازل عنها ولا عن غيرها حبيبتي
وعدتچ احقق كل احلامچ وارفع راسچ بين العالم وراح اظل عد وعدي
- والله ممستاهلة
قابل اني ما اعرفك گد الكلمة وجاية هسة حتى اجربك بس المشية عوفها لأن تعب وانتَ صحتك مو تمام
- لا مستاهلة وهيَّ أهم شي عندي
انـي اتشرف بيچ تصيرين مرتي گدام الناس
وانتِ تستاهلين اجيبلچ العالم كله حتى تقبلين بية رجال الچ
- ليش يمة شبية قابل تخبلت حتى ارفض رجال مثلك
- هههههه يلا دگومي
ننطيهم خبر ومناك ابلـغ جماعتي ويا مخلد وقت ماكو
حچاها ونزل جوة
بدلت ع السريع وطلعنا مخلد ويانا
وصلنا البيت جدي صار عدهم خبر بجيتنا بيبتي تلگتة بالچكليت والهلاهل وعمي ذبح جوة رجلة السلامتة
انطاهم خبر بالموعد وما تأخر راح يكمل شغلة
وفعلاً ثاني يوم صارت المشية الوعدني بيها من گد ما جاب عالم البيت ما وسعهم شيوخ على ضباط على سادة
بعدها انشغلت اني بالتحضيرات كله ركض ركض
أما هوَ مچنت اعرف شديسوي
كلما اسألة يگولي مفاجأة تحمست شيريد يسوي أكثر من كل شي سوا علمودي مو حقي اذوب بحب هالرجال
صرت ابد ما اشوفة هالفترة بسبب انشغالاتنا
يا دوب يجي علينا
ياخذنا اني وعمة والبنات من الباب نجهز العصر وبس نخلص يجي علينا يوصلنا ويسلم حتى ميدخل
اليوم العرس
احلى يوم بـ حياة أي بنية حلمت وحصلت على حلمها
فزيت الصبح على صوت موبايلي يرن
رفعت راسي تعبانة كلش حتى نومي قل هالفترة باوعت الغرفة فارغة ماكو احد سحبت الجهاز همام ديتصل رديت بـ ابتسامة الووو...
يتبع
لتنسوون ⭐⭐⭐⭐⭐⭐
كل الحب ❤🥀