أبي لم يكن إنسانًا

البارت 45

#أبي_لم_يكن_إنساناً
البارت الخامس والأربعون
للكاتبة لبنى الموسوي

على شوگي ونفس جفني الـ يتانيك
احـن وللزعل مـاا منطـي لزمـة
بـ موعد جيتك كون اندل الميل
واسطي اعلة الدقايق حتى اقدمة
اني مناطرك نطرة غصن چـاان
اخضر بس قبلت تعوفـة يضمـة
بررلي سبـب عطري الـ بلا روح
وليش الشمس تطلع بيها عتمـة
حرت وجهك الـ يتراولي مرات
واقع لـو لأن مشتاگ ارسمـة
أخر نظرة صوغة تظل بالعيون
عند اليگضي شوفة وعينه تعمـة
على سنيني ضنگني الموت بجفاك
وعلى مهلة رجعتك گمت احشمـة
رحت بس آنـة ما راضيلك تروح
ضعف موقف وگفتك ردت احسمـة
حرت من وادعتني اتشاهد؟! اشتاگ؟!
بـ حروف الموادع چانت ازمـة
بـ إديك الخاليات شـ ماخذ وياك
بس هذا الـ ببعدك ردت افهمـة
اذا ريتـي بعدها وياي چا ليش !!
ما تقبل تفوت بـ صدري نسمـة
لا يكمل بعد حلمي الـ بلياك
ولا گلبي الـ يريدك يرضى اهدمـة
وحقك ما استاهل روحتك هـااي
ومو آنـة التخلي بـ گلبه لچمـة
عساك ولا شفتها اوصافها شلـون
ملامح فشلـة الـ يعثره جدمـة
امنيتي اعلة گد ما ارمـش انساك
أقل شي اعلة بعدك گلبي اعلمـة
من تالي صعب نسيانك يصير
مثل الـ بلكبر يتغير أسمـة 💔💔

بعدهم يحچون اندگ الجرس
راح سمير يفتح الباب شوية وصاح يا الله
التفتت سريع وگلبي وگف ساعة اللي شفت رزاق دخل للبيت لا يربي هذا شجابة هسة

صدفت وگفت همام بـ صف صالح
باوع عليهم بـ صدمة وحقه ممتوقع يشوفهم سوة هذا الشي كلش هواي على واحد مجرم مثل رزاق

صالح.. ها شبيك عمي شو انصدمت ولونك انخطف
بس لا شفت منكر ونكير گدامك اكيد المثلك يرجف من الحساب غير صحيفتك سودة

همام.. راح تظل ساكت على الأقل سلم لو لسانك انعگد

صالح.. شبيك دخلي يستوعب ليگطع الخلف المسكين خطية بعدة شباب والدنيا زاهيتله

اباوع الأبوية وجهة صار ينطي ألوان
واگفين يلعبون بـ أعصابة وهوَ مسلم الهم ولا چن هذا رزاق المجرم الـ چان بنظرة منة يخوف أكبر واحد

سكتوا عنة ظل واگف بالباب
لا هوَ الرايح ولا يگدر يدخل واثنينهم هنا
فجأة التفت يدور بالوجوه يمكن يدورني وفعلاً شافني واگفة رفع حاجبه مستغرب طيبة شجابك لهنا

صالح.. غير رجعت من السفر ما دريت

همام.. وعرفت بـ بيت جدها اجوي من البصرة الـ بغداد فـ گالت الرجلها وديني اشوفهم مشتاقة الأبوية

گبل ركضت على رحمة حضنتها حيل
صح ديلعبون علي بـس ميدرون هالشخص مثل الجـن لتدوس علي ولتگول بسم الله الرحمن الرحيم

رزاق بـ داخلة شيطان ويجوز هوَ الشيطان نفسة
والمشكلة ما اخاف على نفسي
بگد ما اخاف على أختي لينتقم بيها مني مثل ما انتقم بـ رحيم وهالمرة ما عندي استعداد اخسرها اموت

حاضنتها على گلبي اباوعله وارجف
تقرب همام مني بـ همس اهدي طيبة ولتخافين لا على نفسچ ولا أختچ ميگدر يمس منكم شعره واني موجود

- رفعت راسي والدمعة بـ طرف عيني
همام خايفة ليأذي رحمة لأن رجعت وكشفت لعبته يمهم شلون عفية

- يا لعبة بالضبط هنَّ هواي
- مثل ما ضحك علينا ضحك على بيت جدي بس خلي يولي واني احچيلك والله گلبي راح يوگف

- اششش اسم الله اهدي اهدي
حچاها وسحب راسي على صدره صرنا مثل الحلقة اني ويا ورحمة صدگ ساعتها حسيت بالأمان الحقيقي

بعده صالح يستفز بي شوية وسكته عمو محمود
- اصبر شوية
التفت على أبوية انتَ شعندك جاي
مو صارلك شهر مختفي ومرتاحين من مشاكلك لو اكو مصيبة جديدة لفتك علينا

ديحچي ويا دار وجهة وانسحب من المكان ع السريع
ما عرفت ليش اجة وليش راح
بس ع الأكثر خاف من الموقف خصوصاً بعد ما انكشف گدام الطرفين ويدري اثنينهم مراح يسكتوله

مباشرتاً طلع صالح ورى
اعرف شگد محمل علي مستحيل يخلي يروح بسهولة لازم يحاسبه بس المشكلة محد ديفكر بـ رحمة

درت وجهي عليها بستها
شگد بريئة متدري بـ حجم الكارثة الدتحيط بيها
فجأة سحبني همام من يمها للغرفة دخلني وسد الباب

- احچي شنو گايل رزاق البيت جدچ
- گعدت حچيتله كل شي عرفتة من صالح على سفرنا وبيع البيت حتى سالفة الخطف هم سولفتله بيها

- واني اگول صالح شبي يحچي ع السفر كارثة والله
شلون دبرها هيچ
شلون اتفق ويا أرشد بحيث قنعوا الكل بچذبتهم سألوا وسألت اكدولهم سفرچ واكدولي نقلتهم للبصرة

- ما ادري والله شلون بس لتنسى
انتَ دتحچي عن رزاق وأرشد بالتحديد مو غيرهم
يعني لا هذا شوية ولا ذاك اثنينهم داهية ومستحيل اكو شي يصعب عليهم

- هسة عرفت ليش أرشد أصر إلا هوَ ينقلچ بـ نفسة
يريد يضبط مسرحيتة للطرفين
حتى من يروحون بيت جدچ للمدرسة ويسألون فايلچ موجود لو لا ميحصلون الجواب الصحيح !!!

- اي هوَ هيچ لأن سألوا وگالوا الفايل موجود ما انقلت
- تدرين اكتشفت شي كلش مهم
- شنو

- بين أرشد ورزاق اكو سر اقوى من الفلوس وغيرها
يعني السالفة مو خالية
من يومه أرشد يتزوج ويطلگ بـ هدوء وبدون خسائـر ليش وياچ انتِ بالذات سوة كل هالشي

- صح كلامك بس الحچي شـ يفيد
راح أرشد واندفن سرهم ويا مـن وين بعد نعرف شكو بيناتهم ولتتصور تحصل من رزاق شي لأن المثل هذا يموت ومينطي بـ روحة

- ماكو شي يندفن
اذا ما بين هنا ميخفي عن رب العالمين بـ يوم الحساب

- ونعم بالله بس گلي الى متى يظل رزاق يحوم علينا
تعبت كلش فوگ متتصورون
تعبت من التفكير تعبت من الماضي تعبت من هالخوف الأحس بي كلما ينذكر أسمه أو اشوفه گدامي

- كم مرة حچيت وگلت خوف لتخافين واني موجود
تتصورين يگدر يمس شعره من راسچ
أو حتى يمس أختچ بـ سوء وكل احنة يمكم مستحيل يگدر طيبة رزاق اجبن من هالشي وتعرفين

قبل چان يگدر لأن ظهرة قوي
هسة حتى رجلة متعينه علمود يوگف عليها
أقل حركة منه حياته تنتهي ورزاق اللي تجاوز الحـزب والسقوط والمشاكل كلها يصير غبي لو وگع هسة بسبب شغلة تافهة مثل شغلتچ

بعدين مراح يطول هواي لتخافين
هذا صالح ديشتغلة واني هم ويا لحد منوگع هالمجرم بشر أعماله انتِ بس اهتمي بـ دراستچ وخلي الباقي علينا

- شتگول يعني بعد ما شافني هنا شنو راح يسوي ؟!!

- كل شي ميسوي وداعتچ
واصلاً عتبيني لو رجع يلفي لـ هالبيت بعد ما انكشف هسة ع العموم صار لازم اروح اخاف يصير شي اتصلي واجيچ بنفس اللحظة مو تظلين ساكتة خوش

- ان شاء الله
- راح تخلصين من عنده طيبة لتخافين نهايتـه قريبة
- الله يسمع منك وارتاح من كابوس رزاق لأن تعبتتتت

- ان شاء الله تخلصين ،، ما ظل شي حبيبتي

فتحت عيني علي مصدومة
حسيته ارتبك گام ع السريع سلم وطلع من الغرفة
حتى ما گدرت اگوم ورى گلي حبيبتي اي والله گاااالها گال حبيبتي ولكم اااخ گلبي راح يوگف من الفرحة

مداصدگ وروح أمي ما اصدگ السمعته
معقولة بلش يحبني حتى لو شوية والله العظيم قابله بـ هالشي وقانعة بي
بس المهم يتحرك گلبه الي حالياً أكثر من هالشي ما اريد بالدنيا عود بعدين اطالبه يحبني مثل ما احبه وازيد

ادري بي تورط بس غصباً علي حچاها اي والله حچاها
طلعت من الغرفة فرحانة
امشي واوزعلهم أبتسمات وهمَ وين مشغولين يحچون بموضوع أبوية گعدت يمهم بس بالي طاير للنجوم

صفنت ويا نفسي اكرر المشهد بذاكرتي بـ كل ثانية
صحيت على ضربة من صفاء
باوعتلها مبتسمة وهزيت بـ راسي ها عيني وين سارحة بـ خيالچ خير ان شاء الله الماخذ عقلچ يتهنى

- سحبت نفس براحة
اي والله يسمع منچ ربي ويهني لأن يستاهل.. وابتسمت

- ههههههههه يااا عيني انتِ واصلة المرحلة الله يبعدنا

- اگول متعوفيني بـ حالي
متشوفين شلون سرحانة ورايحة بعالم الأحلام الوردية لو متگدرين إلا تطيحين حظ حظي وتخربين المود الحلو علية

- گومي للغرفة الله عليچ اليوم إلا اعرف شنو وراچ ما اعوفچ تنامين إلا تحچين الأكو والماكووو

- يمعودة تخبلتي شكو يعني دعوفيني والـ يرحم أبوچ
- والله ما اعوفچ... حچتها وسحبتني من إيدي

انجبرت اگوم لو اظل گاعدة راح تفضحني بـ خبالها
دنمشي صالح صاح ها وين
التفتت علي نحچي شوية بالغرفة ليش تريد شي گول

- لا بس مو تنامن ورانة سهرة
- ههههه ادري يوميا دوامك شلون اذا للفجر انتَ گاعد

- عادي متعود على السهر طيوب
- خوش لعد شوية ونجيكم عود جهزوا متاااع السهرة
- ههههه تتدللين

دخلنا للغرفة وسديت الباب
توني دايرة وجهي طفرت علية فززتني خبال اي والله

- احچي ولچ شكو وراچ ومنو هذا التردي يتنهى عيني

- يعني ضروري إلا تعرفين ما بيها مجال اسكت
- طبعاً ضروري
- سعد
- گبل اختفت ابتسامتها وتركت إيدي سعد شنو شدخلة

- احبه غير
- يا سعد يعني تقصدين هذا أبن عمي محمود لو غيره

- اي هوَ أبن عمي بشحمه ولحمه
- طيبة الله عليچ دتحچين الصدگ لو عاجبچ تتشاقين

- ليش اتشاقى
احچي ضميرچ سعد بي شي مينحب رجال كامل مكمل

باوعت علية بـ عصبية
بين العاجبها تحچي وبين اللي لازمة لسانها بالگوة دارت وجها تطلع من الغرفة متحملت طگيتها ضحكة

- التفتت تباوعلي بـ أستغراب على شنو دتضحكين بلا

- ما گدرت احچي من الضحك ظليت أأشر اوگفي وهيَّ تباوع علية اريد اتنفس ما اگدر تذكرت بتول
ذيچ هم خطية من نصبت عليها نفس تعابير وجه صفاء انرسمت على وجها معناها واگعة الأخت

خمس دقايق واني هيچ
كلما اريد احچي ارجع اضحك أخر شي ركضت بسرعة ضربتني على زندي حيل كافي عاد زهگتيني

- يلا سكتت هههههه

- شوكت يخلص هالفلم الكوميدي مالتچ
ممكن اعرف حتى اذا مطولة أكثر اطفي الضوة وأنااام

- لا والله خلص بعد ما اضحك شوفي.. وسديت حلگي

على شنو حابسة الضحكة طلعيها يمة طلعيها
بس حچتها رجعت اضحك
باوعتلي ورگعت الميز بـ رجلها تحچين لا والله اااابتلي بيچ

- شنو
- ليش تضحكين هسة غير اعرف احچي وبلا سخاافة

- مو حبيبي اني عندي طريقة خاصة ومستفزة لكشف العلاقات السرية
بـ دقيقتين بـس اگدر اخذ الحچاية من حلگ السبع

- شنو علاقات شنو سرية مفهمت هاي شبيچ انتِ ؟!!

- يلا لچ تردين تعبريهن علية
عود عبالچ ما اعرف بيچ تحبين سعد وميته علي نظرة وحده كشفتچ بس محتاجة اعتراف واضح منچ

- وسعت عيونها وسحبتها شهگة
عزززة بـ عينچ طيبة ما صارلچ يوم هنا شوكت لحگتي تكشفيني

- هالدروب مو علية اگدر اكشف اليحب من نظرة عينه

- مو قليلة والله
- طبعاً ماما اني طيبة الذكية مو حي الله وحده
- خوش ي الذكية ماطول عرفتي السالفة تعالي حليلي الموضوع لأن الأفندي مو يم أم الحب اصلاً

- يمعودة سالفتچ محلولة شتحچين روحي والهوى وراچ

- شلون الله عليچ
- يعني الأفندي الدتحچين علي واگع على وجهة بحبچ مو بس يحب والسلام لكن انتِ غبيةةةةةة

- الله عليچ
دتحچين صدگ لو همْ ناصبة علية ترى والله مو وكتها

- ههههههه وداعتچ صدگ الصدگ
بس هااااا اهدي شوية وعلى كيفچ ويا روحچ لتموتين وابتلي بيچ الحماس الزايد يسبب سكتات قلبية

- اسكتي غير گلبي بعدله نتفة ويوگف
حبابة حبابة بس فهميني شلون عرفتي هو حچة وياچ

- هههههه مو الـ هالدرجة وين لحگنا نگعد حتى يحچي
بس الصبح من احترگت إيدچ بالطاوة انتبهت
لچ خوفة عليچ واضح بـ عيونه بس شيسوي اذا حابله وحدة مثلچ غبيةةة متفهم بـ لغة الأشارة

- غبية شنوووو
والله هوَ صنم لا تلميحة لا همسة لا صخام
ما اگدر افسر هالحركات العفوية حب يعني ممكن يكون خايف علية مثل ميخاف على أختة غير رابين سوة

- دگومي من گدامي لا افسر سنونچ والنبي

- هههههه لا عليچ الله ساعديني لأن صايرة ذكية كلش

- ليش يمة احد گلچ چنت غبية حتى اصير ذكية
- لا يمعودة اصلاً وين اكو بـ ذكائچ بس ساعديني فدوة

- اصبغي بعد بلكي اقتنع لأن حالياً عقلي قافل
- طيبةةةةة
- ههههههه ماشي راح اساعدچ بس مو هسة الصبح من تطلعون للدوام وبيچ خير وتتدللين

- ليش عود إلا الصبح ما فهمت !!!
- اصبري وتفهمين كافي ملحة ويلا گومي نطلع للصالة الولد ينتظرونا

- زين احچيلي سالفتچ المن اجينا لهنا ترى ما نسيتتت

- لا حبيبتي لا
اني سالفتي مليوصة كلش ادعي بلكي تنحل واحچيلچ

رادت تحچي أشرت الها بـ إيدي باااي وطلعت ع السريع
بقينا بالصالة ع التلفزيون ساعة تقريباً
وراها گاموا ينامون ظلينا بس الشباب باوع سمير علينا وضحك واخيراً ناموا حتى تبدي سهرتنا الليلية

صالح.. ها اليوم هم راح تجيب النا ويسكي

سمير.. هههههههههه
لا اليوم الويسكي لو عليك لو على سعود لتصيرون 56

صالح.. والله اني بالنسبة الي ما اصرف عليكم ولا فلس

سعد.. انچب لك
اذا هسة اني الـ دفعت باچر عليك رضيت أو ما رضيت

صالح.. هههههههه دحرك جيبك اليوم والله كريم الباچر

سعد.. مو بس كلام التنفيذ مطلوب حتى لتنعلس باشا
حچاها والتفتت علينا لأن دنضحك
اي عيوني ضحكن شكو على گلبچن كل شي ع الحاضر

زينة.. وشتريد يمة
ان شاء الله تريدنا نصرف عليكم شگد عيييب ادري زلم قواطي سفن والله يا ربي أخر زمن هذا

سعد.. خوش لعد بـ مناسبة قواطي السفن
اليوم إلا اخليچ تباوعين وتتحسرين خصوصاً ع السفن لأن ادري بيچ شگد تحبي

- لا يمعود اتشاقى وياك
كل شي ولا تحرمني حبيبي وبـ هالمناسبة احب اهديله اغنية يلي اديت لحياتي فـ حبك طعم ولون مش حتنازل عنك ابداً مهما يكون مهما يكوووون

صالح.. سميرة سعيد لو تسمع صوتچ إلا تعتزل الغناااء

زينة.. تغار منك انتَ وياها حقكم معذورين
گام سعد كفخها على راسها يضحك وراح للأسواق ربع ساعة واجة محمل مثل سمير

بدت السهرة بس شنو مگاعد اركز وياهم مثل البارحة
بالي كله يم همام
وينة شگاعد يسوي نايم گاعد بغرفتي بغرفتة يتذكرني مثل ما اتذكرة يربي حبه هالرجال راح يجنني

ليش مگاعد يروح من بالي
هاي مو كـل الأحبهم وچنت اتمنى التقي بيهم گاعدين يمي ليش يظل وجود همام مختلف تماماً مثل الاسثناء من كل قاعدة

متحملت أكثر سحبت الموبايل بلا تفكير ودزيتله مسج
💌 گاعد لو لا

همام.. رجعت للبيت تعشيت وظليت گاعد يم أهلي
شوية وبدت الاسئلة عن طيبة
هسة غير گلت راح تبقى يم بيت جدها يسدون السالفة
لا همَ ظلوا ليش وشلون وشوكت وشعجب قبلت تبقى لحد مزهگت وگمت من يمهم بسرعة

- بعد لحد يسألني شي
هذا الموبايل يمكم وروحوا احچوا وياها
يعني عاجبها تظل شنو قابل اجبرها ع الرجعة هيَّ حرة المكان التشوف راحتها بي تختاره محد يجبرها

حچيتها وصعدت الغرفة طيبة
ما ادري شلون راح تخلص هالسالفة اذا من هسة تعبت

بقيت متمدد احاول أنام ماكو الي فترة نومي تخربط
گمت شغلت الضوة وسحبت الكتاب من المجر
اگعد اقرا لحد ما انعس رغم الساعة راح تصير الوحدة ونص بس شسوي عيني مدتغمض

ويا ما سحبته صارن گدامي صور طيبة مال الأعدادية
اخذتهن من المجر اگلب بيهن
چانن أربعة وحدة جماعية واثنين وياا بتول والأخيرة وحدها دتاكل بيها جبس وتضحك ببراءة 

رجعتهن المكانهن وبقيت هالصورة يمي تمددت صافن عليها البارحة عافتني ليش هالگد اشتاقيت الها
حتى ما صارلي غير ساعة من شفتها
معقول هالشي طبيعي لو لا اني بديت احس....!!!

مثل مگال مخلد حتى بيني وبين نفسي ارفض اعترف
مشيت أصبعي ع الصورة دگ جهازي رسالة
خليتها بـ صفي وسحبت الموبايل طيبة دتسألني گاعد

تعمدت ماا ارد عليها لازم تتعلم على غيابي حتى تگدر تفكر ويكون قرارها صح ونهائي
دارجع الموبايل للميز وصلت الرسالة الثانية هااا وينك ليش متجاوب

شمرت الجهاز ع الچرباية افرك بـ راسي والله مداعرف بالضبط هذا الأختبار الها لو الية اني ؟!!

باوعت للموبايل اجت الرسالة الثالثة
ما لحگت حتى اقراها
وصلت الرابعة والخامسة والسادسة ظلت تدز بلا تعب فتحته اقرا بيهن اخاف محتاجتني بشي مهم

💌 عادي لتجاوب بس ترى اني اعرف بيك گاعد

💌 مو عبالك اذا مجاوبت راح ابطل تعلق بيك وانساك

💌 لا غلطان
ما انساك للموت وراح تظل انتَ أول وأخر حب بحياتي

💌 الله عليك گول الصدگ
هم تذكرتني من دخلت للغرفة لو الموضوع عندك عادي

💌 شدتسوي هسة

💌 بالغرفة لو بعدك جوة لو نايم لو شنو تأخر الوقت

💌 احسنلك ترد
لأن اسويها عناد واظل اراسلك لحد متضوج وتجاوبني

💌 اشتاقيتلك موت خبيث

صدگ ضحكت مـن حچتها بـس صدمتني بـ هالرسالة
💌 لتضحك ترى داحس بيك

هزيت بـ راسي وقفلته شلون وياچ اليوم شنو متتعبين
رجعت الموبايل للميز وسحبت الكتاب
بعدني مفاتحة دزت رسالة استغفر الله ربي شلون تالي

باوعت من الأشعارات للرسالة
💌 يعني مُصر مترد ؟!! على العموم احبك عموووووو

- ههههههههه احلف عليها مو صاحية الحمد لله والشكر

رفعت عيني ع الساعة تأخر الوقت كلش
هم هالكتاب ما اريدة
رجعته للمجر وگمت طفيت الضوة
تمددت الأفكاار تدور بـ راسي بالنص ساعة يلا غفيت

طيبة.. بعدني اباوع للموبايل متأملة منه ولو نص كلمة
تفاجأت بـ صالح سحب الجهاز من إيدي
رفعت راسي بـ عصبية هاي شدتسوي صاااالح جيييب موبايلي يلاااا

ولا رد علية اصلاً.. واگف يتصفح بالموبايل
ردت اخذة لزمني بـ الإيد الثانية فارت اعصابي ظليت بس اصيح علي وأهدد

مدري شسوة چان يدوس بي ما احس إلا شمرة بوجهي
- استلمي خاتوووون

شلته اگلب بي شسوة هذا
مباشرتاً دخلت على الرسائل كلها ممسوح !!!
لا والمصيبة ماسح رقم همام وياهن تخبلت عقلي طار من راسي باوعتلة گازة على اسناني من العصبية

- عود شنو هذا السويتةةةة صااااالح
- اسألي نفسچ
- ما اسمحلك تتدخل بـ خصوصياتي ترى زودتهااا كلش

- اتدخل وغصباً عليچ
من تكونين مرة ثانية بيناتنا احترمي الأوادم الگاعدين يمچ واتركي عنچ هاللعب لتنزلين روحچ كافي

- انتَ شتحچي هذا ررررجلي
- ميحتاج نفتح مواضيع اني وانتِ نعرف اساسها شنو

بعدين اني شـ اتفقت وياچ البارحة
شلون رااااح تعرفين راسچ من رجليچ وتوصلين للقرار الصح اذا تظلين تتصرفين هالشكل جاوبيني يلاااا

سعد.. يمعودين شبيكم دتتعاركون بعدنا بسم الله

صفاء.. شجاك صالح ليش دتصيح على طيبة أول تالي

يحچون ويانا واحنة واحدنا يخزر بالثاني
حتى لو چان ويا الحق بالكلام بس بالفعل لا وألف لاااا ابد ممقبول منه هالتصرف

- ضميت الموبايل بـ جيبي وسحبت رحمة گومي وياية
- وين
- معليك تسمع من اليوم ورايح لتتدخل بية

زينة.. تعاالي يمعودة وين رايحين توها السهرة بـ أولها
طيبة.. بالعافية عليكم اني اريد انطمر

حچيتها ورحت الغرفة عمة نهاية... أختي وياية
دخلنا لگيناها نايمة
تمددت بـ صفها وخليت رحمة بالنص ظليت امرر إيدي بين خصلات شعرها لحد ما غفت

انداريت للجهة الثانية حتى أنام صار الموبايل بـ وجهي
سحبته وفتحت القفل
ياا رب بلكي يراسلني حتى لو حرف المهم اخزن رقمه

خليته گدامي وبقيت صافنة على الشاشة
العبرة لازمتني كلمة وحدة بس كافية حتى تبچيني
ماكو ما راسل يجوز نام ويجوز اصلاً چان نايم أو تعمد ميرد كل شي يطلع منه

وقتت المنبه وشمرته ع الميز غمضت عيني أنام
معقولة گلبه ما حن
اذا گاعد شلون گدر يقاوم هالرسائل متأكدة يحبني بس سواها شغلة عناد عبالة مراهقة وتعلقت بي

تذكرت من گلي حبيبتي
فتحت عيني مبتسمة اي يحبچ وراح يبقى يحبچ اياچ تستسلمين أو تتنازلين عن حبه طيبة اياااااچ

الصبح فزيت على صوت المنبه
گمت اطفي گعدت عمة مطفية گوة فتحت عيونها
بستها اضحك ارجعي نامي اني اسويلهم الريوگ وراح اداوم اخاف تگعدين ومتشوفيني ليظل بالچ

- خوش حبيبتي الله وياچ

باوعت الـ رحمة وبستها اليوم هم دوامها ظهري خليها تشبع نوم وعمة عود تگعدها
سحبت الحجاب لبسته وطلعت ويا مفتحت الباب طلع صالح من غرفتة باوعلي وابتسم خزرتة حيل

- صباح الزعل يابة

باوعتلة صفح ورحت للمغاسل بسيطة اني اعلمك ولك
غسلت ورحت الغرفة البنات
صفاء واگفة تمشط وزينة بعدها بالفراش بس گاعدة ها شنو هالنشاط من الصبح گلت هسة الگاچن نايمات

صفاء.. ههههههههه
لا باوعي الساعة وين اكو وقت بعد بس انتِ شمگعدچ

- مو اليوم ناوية اداوم بس محتاجة ملابسچ لأن مثل متعرفين جاية بـ طرگ ثوبي حتى ملازمي ماكو

- من عيوني حبيبتي هذا الكنتور گدامچ اخذي التردي

زينة.. وكنتوري هم گدامچ
خاف ميعجبچ ذوق صفاء تدرين ذوق سززز من يومها

صفاء.. اي مو طالعة على بت عمي العوبة دگومي ولچ

طيبة.. هههههه فديت خواتي الحنينات وين اكو منچن

زينة.. حياتي فداچ الزعلچ البارحة ان شاء الله

صفاء.. يا حيوانة تحچين على أخوية بسيطة إلا اگولة

طيبة.. ههههه كافي حچي وگومن خل نبدل هم يا الله

- اركض للمغاسل قبل ليگعد سمير ينام بيها وداعتچن

حچتها وطلعت تركض
ضحكت عليها نص عقل تشبه سوالف أخوها
التفتت على صفاء دتعدل بـ ملابس الدوام باوعتلها ها خير

- خير اليصيبچ
بس حسب ما اذكر ردتي تتأكدين من حب سعد صح لا

- اي عفية يا ريت بس شلون ما گلتيلي
- شرارة الأعتراف بالحب تبدأ من الغيرة يا عزيزتي
- يعني ؟!!
- يعني تعالي اضبطچ على غير العادة وشوفي النتيجة

- تستفزي قصدچ لااا عفية وصالح شيسكتة لو نسيتي
- ماكو اوڤر بس هوَ راح ينتبه امشي

حچيتها ونسقت الها ملابس تلفت النظر من زينة صدگ ذوقها يجنن بحيث ما احتاريت ابد
خليتها تبدل وراها مكيجتها مكياج خفيف بس فد شي راقي على گد ما چنا نلعب اني وبتول بي تعلمت

باوعت عليها طلعت كلش حلوة لأن هيَّ اصلاً تشبه أمها
وگفتها گدام المرايا يلا شوفي
فتحت عينها على نفسها الله كلش حلو بس طيبة اني ما اخلي هيچ مكياج مجرد كحلة ومسكارا
هسة الكل ينتبهون مـو بس سعد شلون بية بـ هالحالة

- عادي حبيبتي القالب غالب انتِ حلوة المكياج شعلي
- شسوي هسة
- بس باوعي هوَ اللي راح يسوي وگولي طيوب گالت

بدلت سريع وطلعت اسوي الريوگ لأن تأخر الوقت
وگفت بالمطبخ اشتغل ويا البنات
شوية ودخل سعد يسلم التفت على صفاء باوعلها مـن فوگ ليجوة وصاح هاي شنو هاي شمسوية بروحچ

- شنو سعد شبيك
- المكياج الملابس الوجه هذا كله وتسألين شبيك !!!
- الملابس عادية ملابس دوام والمكياج خفيف بس لأن كل يوم ما اخلي انتبهت علي ما اتصور مزودة

- صفاء امشي غسلي الوجه وغيري هالملابس احسنلچ
- واذا ما غيرتهن
- ماكو دوام اليوم واشوف يا **** يوگف بـ وجهي

زينة.. هاي شبيك ترى لبسها عادي وحتى المكياج خفيف

- لتتدخلين انتِ عينچ بـ شغلچ
رجع باوع الصفاء يلا امشي بدلي ليجي أخوچ ويشوف هالخرابيط

التفتت علية هزيت راسي بمعنى روحي غيرهن
طلعت من يمنة بسرعة
سحب سعد الكرسي وگعد ضايج شوية واجوي سويت البيض ع السريع خليتة گدام صالح ورحت يم زينة گعدت

- شمر علية الخاشوگة دفكيها عاد لتظلين گالبة خلقتچ

ما رديت علي
كملنا الريوگ وطلعنا سمير وزينة ويا سعد
فـ صعدت اني ويا صفاء بـ سيارة صالح وطول الطريق هوَ يباوع بالمرايا أخر شي متحملت باوعتلة

- اگول لو تنتبه ع الطريق مـو أحسن متطلع بالرصيف
- ههههههه وانتِ منو گلچ اني ممنتبه على طريقي
- داشوف عيونك وين ماكو داعي يگولولي

- يلا لعد خلينا نتصالح تدرين صالح مو گد زعل طيبة

- لا گدة
- شبيچ شو گالبتها جديات كلش فكيها عاااد
- ترى هيَّ السالفة جديات من أول بـس الظاهر انتَ ما حاس على روحك شنو سويت

- يابة اعتذر وحقچ على راسي من فوگ
بس صدگيني طيبة هالشي الـ مصلحتچ لازم تتعودين على غيابة حتى تعرفين تقررين صح اسمعي مني

- تمام ما صار شي سد الموضوع يلا
- يعني انتهى الزعل
- تدري ازعل من الدنيا وما ازعل منك بس كون متنعاد

باوعلي من المرايا وضحك
وصلنا للجامعة نزلنا نتمشى اني وصفاء
بس دخلنا سحبتها من إيدها ها ولچ شفتي سعد شسوة

- اي شفت بس شنو يعني غار والله مداصدگ
- ثووووول طبعاً غار متشوفي شلون عصب خو مبينة

- ااااف فرحانة والله متدرين شگد فرحانة
يعني اكو أمل حتى لو ضعيف
سنين واني احبه بس لا حس بية ولا تقدم خطوة رغم عمي ديلح هواي علمود يزوجة ويفرح بي

- ان شاء الله يتزوج وتكونين انتِ نصيبة
- شكراً طيوب
- على شنو يمعودة غير انتِ أختي يلا استعجلي تأخرنا

همام.. الصبح دخلت للمطبخ بتول مجهزة الريوگ
باوعتلها اضحك صايرة شاطرة ومن كيفچ عفية والله

- شسوي عمو مجبورة ما عندي غير حل
لأن لو سويتها وطلعتك بدون ريوگ طيبة تذبحني بلا نقاش

- هههههه صدگ على طاري طيبة
من ترجعين من الدوام اصعدي الغرفتها جهزيلها جنطة للملابس التحتاجها هيَّ گالت بتول تعرف شتخلي

- صار من عيوني تتدلل انتَ وياها
- تسلم عيونچ حبيبتي
گعدت تريگت بسرعة وصلت بتول للجامعة ورحت على دوامي 

- صباح الخير أبو حسين شلونك
- صباح النور سيدي الحمد لله بخير اذا انتَ بخير
- الحمد لله... روح ع السريع شوفلي مخلد اذا موجود خل يجيني ضروري وجهز متهمين قضية السرقة

- صار

دخلت غيرت ملابسي وسحبت الملفات
داشتغل بيها طب علية مخلد ها يوووول صباح الفجل

- ههههههههه صباح الكرفس

- اگول اكو حچاية ولازم احچيها لتصير علية غيبة
عود شنو معناها كلما تحتاجلي تدز علية خو تعالي انتَ

- ههههههههه
وداعتك ما بية حيل اجيك اذا غرفتك بـ تلفااات الدنيا

- واني عادي اجيك من تلفات الدنيا لأن بية حيل مو
- ليش ما استاهل
- لا عمي تستاهل ليش اگدر اگول غيرها المهم البارحة اجيت اتصل وبطلت بالي يمك شصار سولف

- ظلت هناك
- كلش زين هوَ هذا المطلوب بس على شنو ضايج انتَ

- دتضغط علية كلش ومن هسة بديت اتعب
- شلون يعني

- يا أخي البارحت چنت مشتاقلها كلش ومفتقد وجودها
فـ بدل ما التهي عنها وانساها شوية
تجي تراسلني لا رسالة ولا اثنين بحيث متدري شصار بية حتى اقاوم نفسي وما اضعف وارد عليها

- والله زين سويت ابقى لترد
لازم تنطيها الفرصة الكافية حتى تفكر لأن لو تظل يوميا تحچي وياك وتشوفك مراح يتغير عليها شي

- واني مخلد شلون بية
- هههههههههه هاي شنو يول وگعت مووو الله يساعدك

- تنهدت بـ حسرة وهزيت راسي
وگعت خوية ومن زمان بس ما اگدر اتقدم خطوة واني ما اعرف بـ حقيقة مشاعرها هيَّ عندي أهم مني

- ومتريد مقابل للخير السويتة
- بالضبط
- هذا المقابل مو منها من رب العالمين لأن شخص مثلك يستاهل وحدة مثلها الطيبون للطيبات خويي

- راح اخليها تفكر والله يصبرني حتى اگدر اقاومها
- انطيك حل شوف بس تراسلك أو تتصل بيك گبل خلي الموبايل ع الوضع الصامت وشمرة بعيد عنك

- وهالشي راح يفيد
- اكيد يفيد ولا كأنك تشوفها تراسل هوَ هذا انسب حل حتى تفكر وتختار بينك وبين أبن عمها صالح

بس جاب اسمه انغثيت
شمرت الملف من إيدي ورجعت ليورة افكر
اندگت الباب ودخل أبن الحلال بذكرة باوعلي وابتسم

- صباح الخير
حچاها والتفت على مخلد هاي انتَ هنا سيدي واني الي عشر دقايق ادور عليك عندك اوراق محتاجة توقيع

- هسة جاي... تريد شي همام رايح لأن الشغل ميخلص
- لا خوية اخذ راحتك

خلصت دوامي رحت على بتول ورجعنا للبيت
للعصر اخذت غراض طيبة ورحت الها دگيت الباب طلع سمير يا هلا وچثير الهلا بالنسيب

- بالمهلي حبيبي رحم الله والديك
- تفضل فوت
- لا مشكور عندي شغل مستعجل بس هاي الغراض مال طيبة جبتهن الها وصلهن وسلملنا على الأهل

- اي تتدلل بس والله ممقبولة توصل للباب ومتتفضل
- ثق ما عندي مجال مستعجل
- براحتك ما الح أكثر انتَ من أهل البيت مو غريب عنا

طيبة.. رجعت من الدوام تعبانة كلش
نمت شوية وگعدت فرحانة ادري بـ همام راح يجي حتى يجيب الغراض گمت غسلت وظليت بالصالة انتظر

سمعت الباب... دگ گلبي حيل
ردت اگوم افتحها طلع سمير من غرفتة خليچ اني رايح

حچاها وطلع گمت ورى ع السريع اباوع من الشباك
لمحتة واگف مدري شصارلي
عبالك الي سنة مشايفتة مو البارحة بالليل
چان يحچي ويا سمير شو هذا صافحة يسلم انسحنت روحي من القهر

معقولة هيچ صارت يوصلهن ويروح حتى ميسلم علية
بدون تفكير طلعت للممر
على صوت الباب التفت باوعتلة ضايجة شنو همام رايح

- ها طيبة اي اروح عندي شغل مستعجل ما اگدر اظل
سمير.. اخذو راحتكم

حچاها وراح بقيت اباوع ورى لحد ما طب وسد الباب
تمشيت الـ همام اباوعلة بـ نظرات عتب هيچ صارت من الباب وتروح ليش كل هذا حتى متشوفني !!!

- ما اشوفچ شنو شبيچ طيبة
كل الموضوع عندي شغل تدرين بية اغلب الأحيان اكمل شغلي العصر قابل انتِ غريبة واگعد ابرر الچ

- خوش صدگتك هنا بس رسائل البارحة شنو ؟!!
لا رسالة ولا رسالتين وما كلفت نفسك ترد لو هم عندك شغل مهم وما گدرت تجاوبني

- لا بس چنت نايم

- مو همام الـ يچذب متعودت عليك هيچ
لأن لو فعلاً نايم چان رديت الصبح بس انتِ متريد ترد

- محتاجة شي لازم اروح لأن تأخرت
- اي محتاجة
- شنو
- تحضني
- باوعلي مستغرب ليش هالطلب يعني ما فهمت ؟!!
- روح يلا ميحتاج حچيتها وفتحت الباب لزم إيدي حيل

- مو قصدي بس يعني... والله ما ادري شـ اگول

- اني راح اجاوبك ولا يهمك
تگدر تعتبر هالحضن وداع لأن متأكدة ما راح تراويني وجهك بعد اليوم

- منين جبتي هالحچي ماكو هيچ شي
- من گلبي واتمنى يطلع هالأحساس غلط اااتمنى همام

صفن بـ عيوني شوية وراها سحبني الـ حضنة بچيت
- كافي على شنو هالبچي
اني موجود شوكت متحتاجيني وهاي بيت جدچ وأختچ يمچ مو هذا الـ چنتِ تتمني من سنين لو غلطان

- وشنو الفائدة اذا انتَ مو يمي
- تتعودين شوية شوية مو انتِ بنفسچ اختاريتي البعد

- هزيت بـ راسي اي بدون ما اجاوب
رفع إيدة مرر أصابعة مـن تحت عيوني مسح الدمـوع

- دموعچ هاي غالية كلش طيبة لا تنزليهن إلا ع الغالي
- وانتَ غالي عندي كلش غالي وروح ماما
- وانتِ اغلى وروح أبوية

صفنت بـ وجهة احاول اشبع من عيونة شوية
مگاعد اگدر افارگة
اتمنى لو اگدر احچي لو اگدر اصرخ واصيح بعلو صوتي كافي تعبت اخذني وياك ما اتحمل هالبعد والله

بس للأسف ما اگدر
لازم اتحمل واصبر حتى اثبت النفسي قبل الكل
هالحب حقيقي اموت وميموت بـ گلبي وهوَ هم يحس بـ قيمتي ويعرف اذا چان يگدر يعيش بدوني لو لا

- يلا محتاجة شي
- سلامتك وصدگ شكراً على الغراض تعبتك
- تعبچ راحة واي شي تعتازين اتصلي أو دزي خبر ويا بتول

هزيت بـ راسي سلم وراح
بقيت اباوع ورى ما اعرف ليش گاعد احس هاي المرة الأخيرة الراح اشوف بيها همام واحساسي دوم يصيب

سديت الباب وسحبت الجنطة بـ وجهي الغرفة عمة
فتحتها وبديت ارتب الملابس بالكنتور
من الدموع ما اشوف گدامي خلصن تقريباً شلت التنورة چان انصدم بـ قميص همام جواها هاي شنو !!!

رفعتة الـ وجهي حسيت اكو شي وگع على رجلي
نزلت راسي صورة همام ؟!!
شنو السالفة ذني شجابهن لـ هنا معقولة هو خلاهن لااا عيني لا مستحيل همام مو مال هالسوالف اعرفة

التفتت ادور على موبايلي لگيتة ع الشحن
ركضت فتحته واتصلت على بتول هلا والله عاااش من سمع هالصوت بذاتة

- ههههههه شلونچ بتولة والله مشتاقتلچ موووت
- اني أكثر يعمري
- شلونچ ويا مخلد خو ماكو مشاكل
- ههههههه من الروس وداعتچ بس بلحظتها يحلها أبو عقل الچبير لتشيلين همنا

- هههههههه عادي زعل حبايب الله يخليكم البعض
- امين... ها وصلن الغراض

- اي وصلن بس منو الحضرهن انتِ لو همام
- لا اني
- ولچ لعد شكو حاطة صورة همام وقميصة ويا الغراض

- تصبيرة عيني العاشگ يحس بالعاشگ شعبالچ
- تصبيرة شنو ؟!!
- يعني أنكسر گلبي عليچ وادري راح تشتاقين للحب وما عندچ شي من أثرة يصبرچ فـ شگلت ويا نفسي

بتول يا حبابة
خلي شي من ملابسه للمسكينة تصبر نفسها بيهن
فـ خليت صورته والقميص هاا ورشيت زجاجة من عطر عمي على قميصه يلا گولي بتول مو خوش

- هههههههههه والله عليچ سوالف عموماً عاشت إيدچ

ظلينا نحچي شوية
سألتها عن الحجية وخديجة وسديت الخط
رفعت القميص شميت عطرة من گد ما راشة متشبع بي غمضت عيني اضحك يا الله شگد مشتاقتلك
مشتاقة الضحكتك الصوتك العطرك مشتاقة الكل شي بيك ولا كأن قبل دقايق شفتك

اخذت الصورة اباوعلها ومبتسمة
كل شي بيك سحر بالنسبة الطيبة نصيت بستها ورحت للميز طلعت علاگة سودة وضميتهن بيها

فعلاً احساسي ما خاب
وچانت هاي أخير مرة اشوف بيها همام واسمع صوتـه

أكثر من خمس أشهر مرن وهوَ بعيد عني
لا اجة ولا سأل ولا اتصل حتى
ما ادري گلبه شلون انطا حتى لو ماكو حب اني عشت ويا سنين معقولة ما افتقد الوجودي بـ حياته !!!

بالنهار چنت انشغل
بين دوامي ودراستي وبين دراسة رحمة
بس أول ميجي الليل واحط راسي ع المخدة اشبع من البچي وانجبر اكتم صوتي حتى لحد يحس علية

تعودت على قميصه
صار عندي أدمان يوميا اشتم بي
حتى العطر بلش يختفي منه أما صورتة فـ حفظت كل تفاصيلها على گد مصفنت وركزت بيها بـ هالأشهر

ما گطع عني المصرف ولا قصر وياية من هالناحية
كل شهر يدزلي بـ إيد بتول مبلغ
وتسألني يگول اذا محتاجة شي خل تنطيني خبر لتظل ساكتة

بـ استمرار چنت اشوفها بالجامعة
اسألها عليهم واحد واحد وأخير شي اسأل عن همام
بس ولا تجرأت أخذ رقمة لأن ادري لو صار بـ جهازي ما اگدر اقاوم نفسي واظل اتصل بي بالدقيقة عشرة

خليني هيچ مثل ما هوَ قوي
اني هم اصير قوية بـ غيابه ونشوف وين توصل بالتالي

وضعي يم بيت جدي مثل ما هوَ
خصوصاً ويا صالح
الـ چان بـ استمرار يحاول يشغلني حتى لا افكر بـ همام

اغلب الأوقات يطلعني اني والبنات بالليل
نفتر مولات مطاعم نشتري نتونس كل هذا وما فاد لأن مجرد ما انفرد بـ نفسي ارجع الـ نقطة الصفر واحن

بس والله هالشي مو بـ إيدي
هاي اشهر مرت ورغم غيابه ما گدرت انسى !!!
ليش محد راضي يصدگ حبي الـ همام حب نقي وصادق حب ميمحي لا الزمان ولا بعد المسافات
وهاي اني تأكدت بعد الغياب بدل ما انسى حبيته أكثر وأكثر

خمس أشهر هدن حيلي واخذن كل عافيتي
حتى الأكل ما اشتهي
ضعفت كلش وذبل وجهي حتى عيوني غارت گد البچي البچيته علي بـ توالي الليل بسبب وجع روحي

اليوم جمعة عطلتي وعطلة الولد
فتحت عيني من النوم احس الخنگة بـ صدري تحجب حتى النفس من غير وجع راسي المو طبيعي

گمت عدلت گعدتي اباوع بـ زوايا الغرفة
لشوكت تظلين هيچ مو كافي غياب روحي يلاا شوفي حتى تخصمين الموضوع ويا لا كرامة ولا بطيخ

لبست حجابي وطلعت غسلت
تمشيت للمطبخ بس بيبي وعمي محمود گاعدين وعمة نهاية تصب الهم الچاي صبحت عليهم بتعب

نهاية.. هلا يمة يلا همزين گعدتي تعاي تريگي ع الواهس
طيبة.. لا ما اشتهي
نهاية.. شلون تالي وياچ شوفي شصاير بحالچ مو والله راح تموتيني وين من اجيتينا و وين هسة

- أكل عمة بس بعدين والله هسة ما اشتهي
باوعتلي وسكتت سندت نفسي ع الباب اگول سعد گعد لو بعده نايم

- والله ما ادري بس اتصور نايم مشفتة طلع من غرفتة

عفتهم ورحت دگيت الباب علي أكثر من مرة ما جاوب
فتحتها ودخلت رايح بـ سابع حلم
تقربت منه يذكرني بـ همام مثلة نومة ثگيل سعد سعدد گوم يمعووود

- ها ها شكو من صباحيات رب العالمين صاير شي
- اريدك بـ شغلة حباب
- من عيوني گولي
- اريد تاخذني البيت همام هسة
- ليش
- عندي شغلات محتاجتهن ضروري لازم اجيبهن مناك

- ميخالف بالعشرة أخذچ.. حچاها ورجع راسه للمخدة
- اهووو گوم يمعود لازم هسة نطلع
- طيبة شنو حلمانة باوعي الساعة سبعة ونص شعندچ رايحة للعالم هسة اصلاً تلگيهم نايمين

- لا يگعدون من وكت اعرفهم
بعدين بتول گالت همام عندة طلعة قبل التسعة
يعني اذا عطلتني مراح الحگ اخذ غراضي لأن هوَ دوم يقفل الغرفة قبل ليطلع شلون اطب بعد حاچيني

- ليش يقفلها ؟!!
- هسة اني اگعد اشرحلك دگوم يمعوووود الخاطر الله

- أمري للواحد القهار
هاي گمت بس انطيني عشر دقايق اغسل واغير هدومي

بس حچاها طلعت اركض الغرفة عمة
غيرت ملابسي وعدلت نفسي شوية غير اذا شاف هاي الچهرة يسد الباب بـ وجهي صايرة عبالك مومياء

طلعت للصالة شافوني مبدلة استغربوا وسألني عمي
- وين ؟!!
- رايحة ويا سعد البيت همام محتاج قسم من الغراض

- لعد عمي شعندچ مغبشة ع العالم انتظري العشرة عاد

- المفتاح يم همام وهوَ يطلع بالتسعة يقفل الغرفة ورى

باوعتلهم صفنوا بـ وجهي يمكن ما صدگوني
ادري بالچذبة سخيفة
بس شسوي بعد ما اتحمل أكثر اختنگت كلش ضروري اشوفه ليصير بية شي من گد البچي والتفكير

طلعت ويا سعد عاد همزين صالح نايم
لو گاعد قبل طلعتي مستحيل يخليني اعرف بي شلون يفكر

الطريق شطولة ما ادري شلون خلص و وصلنا
باوعت الـ سعد روح اني اتصل بيك
جاوبني بـ استغراب ليش اروح انتظرچ هنا معندي شي

تحججت بـ اشتياقي الهم وقنعته يروح
نزلت دگيت الباب وگلبي يدگ من الفرحة شوية وصاحت خديجة منو جاوبت اني واشرت السعد يروح

أول ما دخلت حضنتني حيل تعاتب بيه
- هيچ صارت بطة رحتي والروحة روحة ليش ولچ مو والله العشرة متهون مع الأسف اشتاقينا وما اشتاقيتي

- ما هانت والله
متشوفين يوميا اتصل بيچ شلون تحچين علية زعلتت

- ههههههههه ليش ما رجعتي بعد شنو علمود همام ؟!!

- اي عمة هوَ السبب
قررت ابعد عنه حتى اشوف يحس بـ غيابي لو لا
بس للأسف طلعت ولا شي عنده وطلع هوَ بلا احساس

- هه والأخ اكيد ظل ينتظر منچ قرار
حتى يتأكد من مشاعرچ اتجاها وهيچ انتم ظالين واحد ينتظر الثاني دطبي عمة الله يهديچ ويهدي راح تخبلوني وياكم

- بشريني گاعد لو لسة نايم
- ما ادري ما نزل بس تدرين بي يگعد من وكت
- اي ادري بس على عيني اليوم يدخل بـ غيبوبة حظي وتعرفي شلون مصخم ميحتاج احچيلي

- هههههههه حظچ مثل وجهچ ان شاء الله ولو ضعفانة
- محلوة يعني
- حلوة بس مبين عليچ التعب وحقچ غير مفارگة الغالي

بستها اضحك ودخلت اركض صارت الحجية بـ وجهي
- بيبي يعمري مشتاقتلچ

- مبين مشتاقتلي
رحتي ولا چنچ عايفه وراچ عالم تحبچ وخري عني ما احاچيچ بعد ارجعي الأهلچ الظاهر احنة غربة

- والله العظيم بيبي غصباً عني
الله يشهد شگد اشتاق الكم واتذكركم يوميا
وروح ماما شگد چنت متلهفة على بيت جدي بس رغم هاللهفة تظل حياتي يمكم الها طعم خاص ما اگدر احس بي بـ غير مكان

- ي بعد گلب بيبيتچ
من حبي الچ اعاتب لأن والله اشتاقيتلچ صارلچ خمس أشهر مفارگتنا وتدرين انتِ بـ غلاوة بتولة

- اني أكثر صدگي
هسة بس اصعد فوگ شوية وانزل يمكم
وراح اظل شگد متردون اشبع منكم وتشبعون مني ها رضيتي

- هههههه رضيت اصعدي يمة

بس حچتها گمت اركض وگفني صوت خديجة تضحك
- لتوگعين بطة ترى مراح يطير

- ههههههه شفايتلي لو طار ع الأقل افقد الأمل وارتاح

- صيري سباعية وشغلي عقلچ
وراح ترتاحين متأكدة.. حچتها وغمزتلي بستها بالهوى

- ههههههه انتِ ماكو منچ والله اموت عليچ

حچيتها وصعدت طايرة احس گلبي يدگ ويا كل خطوة
لزمت يدة الباب إيدي ترجف
يا رب ساعدني فتحتها الغرفة فارغة اكيد بالحمام مثل العادة

دخلت اباوع بالزوايا
يا الله شگد مشتاقة الـ غرفتي بس هنا الراحة الحقيقية

وگفت على الميز اباوع العطر مالتة من الطول للطول
سحبت زجاجة منهن ورشيت بـ إيدي
رفعتها على خشمي يبوووو والله روحي ردتلي اليگول اشتميت العطر منه شخصياً حبك خبلني همام

رجعتة الـ مكانة صارت عيوني على شغلاتة
مررت إيدي على سلاحة سويچة موبايلة محفظتة
شعور بالفرحة غريب عبالك لزمته هوَ مو الغراض باوعت الروحي بالمرايا وضحكت

درت وجهي وتمشيت بالغرفة
التفتت للكنتور فتحت الباب ناقل كل ملابسة هنا
مررت طرف أصبعي على قمصانة قميص قميص هزيت راسي مبتسمة طيبة تدرين بـ نفسچ مو صاحية

سديت الكنتور ورحت للچرباية گعدت بـ مكانة
هنا ينام الحلو
رفعت مخدتـه داحضنها چااان اشوف صورة الأعدادية جواها باوعت بـ صدمة وسحبتها ع السريع

- شتسوي هاي هنا معقولة بتول خلتها !!!
لا لا خو چان شافها وشالها مو يوم ويومين حتى نگول ما انتبه اي هوَ هذا المعقول

بعدني صافنة عليها احاول افسر الموقف بـ راسي
سمعت باب الحمام انفتح گمت ع السريع
ضميت الصورة ورى ظهري وعدلت وگفتي گلبـي يدگ مثل دگ الطبول شوية بعد ويوگف من الحماس

طلع من الحمام الخاولي على راسه ينشف بـ شعره
ما انتبه الـ وجودي ،، باوعتلة ابلع بـ ريگي
من جمال الموقف حسيته نشف
اندار على الميز وبعد الخاولي عن وجهة سحب المشط ديمشط بس رفع راسه صرت گبالة بالمرايا....

يتبع

لتنسووون ⭐⭐⭐⭐⭐⭐
كل الحب ❤🥀