أبي لم يكن إنسانًا

البارت 42

#أبي_لم_يكن_إنساناً
البارت الثاني والأربعون
للكاتبة لبنى الموسوي

... بارت مفاجئ لعيونكم حبايب وتتدللون ❤🥀

مشتاگ موت لـ هالوجه فارگني صار هواية
اويلي احس بشوگي الة بگد عالمي ودنياية
بمرايا وجهي وما شفت وعيونچ احلى مرايا
لو ما وكتنا وقسوتة للموت عشتي وياية
مشتاگ الي واني بعد مشتاگة
ما چنت اظن نرجع بعد نتلاگة
هذا الوكت ما يرحم بعشاگة
ياخذ الملگة وينطي بس فراگة

اتمنى اضمك بالگلب ما اعوفك ولا ساعة
بس هوَ حضنة وهالعمر كلش هواية اوجاعة
تدري انتَ بـ أول فرگتك عيني بقت دماعة
وهواية قل سعر الوفة من كثرت البياعة
صدگيني ما بعتچ ولا خليتچ
لبعيد رحتي وبالگلب ظل بيتچ
ما شفتي غيري بـ هالعمر يا ريتچ
ولا اني عشت بـ دنيتي ونسيتچ 💔💔💔

التفتت اشوفها المن تأشر ويا ربي ع الشي الصار گدامي
گلبي وجعني عقلي قفل النبض صعد الراسي
حتى رجلي ما عدت تحملني اجيت اوگع لو ما لزمت بالشجرة معقولة هذا صالح واگف گدامي بعد هالسنين يا الهي ساعدني اعدي هاللحظة على خير

تقرب علينا أكثر قريب ميوصل نفض كل جسمي
بالگوة رجعت نفسي للشجرة
سندت طولي عليها وعيوني تتأمل صالح حتى مـا بية انزع مناظري واشوفة عدل بس لحظة شنو هاي

لابس زي الضباط !!!!
يا الهي صالح سواها وحقق حلمي بي مثل ما اني اليوم حققت حلمهم بية عقلي مگاعد يشيلها والله

باوعت علي مثل ما هوَ ما تغير
بس شوية كبران وملامح الرجولة واضحة على وجهة

تجاوزني وسلم ع البنات لأن اني واگفة مسافة عنهم
عرفتهم اصالة بي
وراها التفت ع البنية وگلها يلا صفاء خلينا نروح تعبان

عفية لحظة شنو هاي راح اموت بـ گاعي
صديقة اصالة !!!
هيَّ نفسها صفاء بت عمي حامد دخيلك الهي گلبي راح يوگف من الصدمة ساعدني ليصيرلة شي

المشكلة كلهم لابسين مناظر لذلك مگدرت اتعرف عليها
واكيد متغيرة بعد كل هالسنين

صافنة عليهم والبية ابد مينوصف
ما ادري انشليت لو انعگد لساني لو عقلي ضرب ما احس إلا الملازم وگعت من إيدي للگاع ونزلت دمعتي

باوعت عليهم سلموا ديرحون
واخيراً وعيت على نفسي يلا طيبة تحركي شمنتظرة صيحيهم بسرعة لازم تستغلين هالفرصة الچنتِ تلحمين بيها من ست سنين

فاتوا من يمي التفتت وراهم
بنفس عميق صحت صااااالح دار وجهة يباوع ع البنات مستغرب ميدري الصوت منين اجة والمن تابع

يشهد علية ربي بالگوة گدرت ارفع إيدي وأأشر الة
صفن علية بـ تعجب
ادري بي معرفني السنين غيرتني والمناظر حجبت عنه التركيز تساءل بنبرة شك نعم منين تعرفيني

- شلونها رحمة

حچيتها ونزعت المناظر من عيني
صفن بـ وجهي صفنة ما اگدر انساها طول حياتي
صفنة تشرح مكنوناتة وتگول
اني هم عانيت وتعذبت وانتظرت وتأملت بـ هاللقاء مو بس انتِ طيبة

ابتسمت بـ ابتسامة خفيفة ونزلت دموعي مثل الجمر
هزيت راسي بمعنى أي اني هيَّ طيبة
ما احس إلا ركض علية بسرعة رهيبة اخذني الـ حضنة ضمني بمنتهى الأشتياق ورفعني يفتر بية وضحكتة تصدح بالمكان طالعة من نص گلبه

ما اعرف ابچي من رهبة الموقف
لو اضحك من عمق السعادة وجمال شعورها
امتزجت مشاعري خليط ما بين الحلم والواقع ضحكت على ضحكتة العالية اشتاقيتلك صالح والله اشتاقيتلك ولك ااااااشتاقيتلك

بعده شايلني ويفتر بية
الطلاب بالجامعة التموا تصفيق مع أنواع الصفير
هاي من غير الحچي المالة داعي لأن عبالهم عدنا علاقة فـ حبوا يشمرون بالكلام مثل عادتهم طبعاً

ولا اهتم صالح الهم
ملتهي بية وفاصل عن العالم الخارجي
نزلني من حضنة واخذ وجهي بين إيدة بلهفة متنوصف

- واني اشتاقيتلچ يروحي انتِ
اشتاقيت بگد رحمة الله وتعرفين برحمته شگد واسعة
والله اشتاقيتلچ واشتاقيت الكل شي بيچ
ضحكتچ صوتچ حنيتچ طيبـة گلبچ حتى هاي دموعچ الحلوة هم اشتاقيت الهن موت موووووت طيبة

صفنت بـ عيونة بـ تأمل
دموعي تنزل بلا وعي ما اگدر اسيطر عليها اريد احچي ماكو كل الكلمات تلاشت أمام هاللحظة الحلوة
مسح جـوة عيوني مبتسم توه ديحچي جلفني صـوت همام من صاحني بـ نترة

همام.. گاعد بالمكتب اشتغل دگ موبايلي بتول تتصل ها حبيبتي كملتوا

- اي عمو شگد وتجي علينا
- شوية اتأخر صارلي شغل مهم يعني ساعة ويجوز أقل

- زين لعد اني راح اروح على طيبة
ومناك اتصل بـ اصالة نلتقي بالحديقة بين متجي حتى يمشي الوقت ومنمل اذا وصلت اتصل علية عود

- ان شاء الله

سديت الخط منها وكملت شغلي بـ استعجال علمودهن
طلعت بـ وجهي للجامعة
توني وصلت الكلية طيبة اتصلت على بتول صوت هوسة يمها سألتها وين انتم گالت واگفين قريب النادي

نهيت الأتصال وتوجهت الـ مكانهم
وصلت للحديقة هوسة كلش والطلاب متجمعين
فتت من بينهم وهنا چانت الصدمة صالح شايل طيبة يفتر بيها وواحد يوصف شوقة للثاني شديصير ؟!!

صالح الـ ×××× هوَ نفسة صالح أبن عم طيبة
ما عرفتة لأن بالدوام يصيحوا باللقب مو بأسم أبو بس شنو هالصدفة الغريبة الجمعتني بي بـ هالوقت بالذات

ناسين نفسهم تماماً
والطلاب داير مدايرهم ما خلوا كلمة محچوها
مد إيدة يمسح دموعها صحت طيبةةةةة التفتت علية متفاجأة همام... استغرب صالح مثلي بالضبط

صالح.. سيدي ؟!! شجابك لـ هنا ومن وين تعرف طيبة

- ليش صالح انتَ تعرف همام !!!!

- اي شلون ما اعرفة
اني ويا نداوم بنفس المكان بس انتِ المن وين تعرفي

- التفتت على همام اعصابة بـ عيونة
حچيت بـ همس بعدين صالح السالفة طويلة مو وكتها

تقدم علينا عيونة تتنقل بيني وبين صالح
- شلون وصلت الـ طيبة
شنو چنت تعرف بيها يمي لذلك دگيت على نقلك للمقر

- طبعاً لا لأن لو اعرف مچان سكتت
مثلها بالضبط انصدمت بـ هالصدفة الجمعتني بيها واني سنين مخليت شي مسويتة حتى بس اوصل الها

- شجابك لـ هنا لعد ؟!!
- اختي بالجامعة خلصت دوام واجيت ارجعها كالعادة

طيبة.. صالح يعني انتم بـ بغداد
لعد شلون أبوية گالوا سافرتوا للبصرة لك حتى المنطقة مال بيتنا القديم هم طاش بيها سفركم شلون

- بس حچيتها حد نظرتة علية
ليش هو رزاق وين شافچ وشوكت مو على أساس انتِ مسافرة للخارج ويا رجلچ شلون التقى بيچ

- يا سفر يمعود
هوَ اني خل اطلع برة بغداد بالأول بعدين اسافر للخارج

- معناها لعبها صح هالحقير
الشغلة يرادلها گعدة امشي وياي للبيت ما اشتاقيتيلهم

- طبعاً اشتاقيت
اصلاً راح اموت من شوقي الكم
احچيلي شلونهم خصوصاً رحمة بس الله عليك لتچذب علية خو ما اذاها رزاق لو بطلها من المدرسة

- رحمة زينه
طول ما اني عايش لتخافين عليها
عود لمن اموت شيلي همها من بعدي امانة الغالي هاي

- اسم الله عليك شـ هالحچي عمرك طويل ان شاء الله

همام.. شلون يعني راح يطول هالحديث تحركوا عاد

طيبة.. همام عفية اريد اروح اشوف بيت جدي هسة

همام.. اي امشي اني اخذچ

صالح.. لا تجي وياية لـ تزحم روحك انتَ راجع تعبان

همام.. زحمة شنو ؟!! واجبي ترى هذا يلا طيبة امشي

طيبة.. صالح انتَ روح گدامنا وخلينا وراك لأن ممندل البيت واستعجل شوية والله گلبي طگ عليهم

صالح.. مثل متردين
التفت على أختة يلا صفاء امشي
نسيتها والله باوعت عليها اريد اركض اريد احضنها بس مو وكتها خل نوصل للبيت وهناك عود اشبع منهم

فاتت من يمي تضحك والعيون تلمع
لوحت الها بـ إيدي ابتسمت وهزت بـ راسها
يربي شلون متغيرين شدعي عليك رزاق حرمتني منهم كل هالسنين

اخذت ملازمي من الگاع ومشيت ويا همام
همست بتول شديصير
مسحت دموعي ولبست المناظر بعدين بتول ما عندي طاقة اشرح الموقف هسة بس ذولة أهلي

باوعتلي متفاجأة وسكتت
أول ما وصلنا للسيارة سحب همام موبايلة واتصل الووو ها صالح خليك هنا بس أوصل بت أخوية وارجعلك

- سد الخط صفنت بـ وجهة شنو همام عندك رقمة هم

- اكيد عندي رقمة غير هوَ يشتغل وياية صارلة سنين

- واني ادور عليهم وماكو تالي يطلع صالح يمك شلون ما انتبهت علي فهمني

- طيبة يشتغل ويا مخلد مو وياية
بعدين شلون تردين انتبه اذا هوَ داخل بـ لقبكم 
ولـو هذا حچي عقلـي شيصير حتى اربط ترى التشابـه وارد مستحيل الواحد يركز بـ هالدقة

- اي صح حقك
اگول متوصلني البيت جدي بعدين تاخذ بتـول وتروح

- لا ويلا اسكتي راسي ديأذيني كلش
- باوعتلة وسكتت ما ادري بشنو ديفكر والمصيبة بارد ميحس بالنار المشتعلة بية

وصلنا للبيت نزل بتول يم الباب وفتح الجامة حاچاها
- عمو اخاف نتأخر ليظل بالكم
وبلغي عمتچ وبيبتچ اخذت طيبة الأهلها حتى ليتصلون

گالت ماشي ولوحت بـ إيدها الله وياكم
رجعنا للجامعة لگينا صالح ينتظرنا بنفس المكان
أشرلة همام تحرك شغل سيارتة ومشى گدامنا بـ مسافة

اباوع الـ همام وجهة ميتفسر
معقولة ضاج من منظرنا بس لا شاف كل شي عززة
قويت نفسي وسألتة اگول همام شكو بيك شي احچي

- لا ما بية ليش هالسؤال
- لا بيك نزل المرايا وشوف وجهك شصاير من اجيتني للجامعة وانتَ مو طبيعي احساسي ميخيب

- زين والله من حسيتي
- احچي بـ وضوح ماكو داعي تشمر بالحچي شسويت

- يعني متدرين بـ نفسچ شسويتي خاتون ؟!!
مغشمة روحچ لو شنو
احضان واشتياق ونظرات غريبة عجيبة الأفندي يمسح بـ دموعچ وانتِ تبتسين بـ وجهة شظل بعد فهميني

ولا كأن اكو عالم داير مدايركم
لا اجة العيب بـ عينكم ولا انتم اللي تعرفون حلال رب العالمين من حرامه والله عفية عليچ طيبة عفية

- رغم چنت خايفة من ردة فعلة بس كلش فرحت
اي والله العظيم فرحت
شلون ما افرح واني اشوف الغيرة بـ عيونة حاولت الزم نفسي ما اريد اضحك واخرب كل شي سويتة

- التفتت علي ونزعت المناظر شنو بس لا غرت عيوني

- يا غيرة شو مدري شلون تحچين
فتحي مخچ وفكري زين ترى السويتي حرام قبل ليكون عيب الغيرة شجابها بالنص شـ شايفتني مگرن

- لا حشاك بس مچان قصدي صدگ
شسوي والله مـن الصدمة ما حسيت على نفسي ليش وين چنت اتوقع راح اشوف أهلي بعد كل هالسنين
لا وبالصدفة مثل مصار اليوم مو حقي اذا انسى روحي

- مو عذر هذا طيبة
السويتي اليوم ابد ممقبول وشوفي الحچي الراح يصير عليچ بالكلية من باچر العالم عليها بالظاهر بس

- درت وجهي ضايجة بدون ما اجاوبة
هسة شنو غار لو خاف علية من العيب والحرام
هالرجال نهايتي على إيدة ما بيها كل مجال جلطنننني

اهدي طيبة مو وكت هالحچي
حالياً لتفكرين غير بـ أهلچ وبس الباقي بعدين
سحبت نفس وباوعت للشارع دگ صالح هورن التفتت علي شو هذا وگف السيارة ونزل بـ اتجاهنا

- نزل همام الجامة ها صالح خير
- سيدي شنو السالفة اذا تظل تمشي هيچ لليل نوصل

- اعذرني والله
بس راسي كلش يأذيني ما بية اسوق أسرع من هالشي

- لا سلامتك
اذا هيچ خلي طيبة تجي ويانا وانتَ ارجع للبيت ارتاح

- لا عادي مو الـ هالدرجة يلا اصعد حتى نكمل الطريق

بس حچاها رجع صالح شغل السيارة وتحركنا
عود فاد بي الحچي
لا والله خفف أكثر حتى النملة تمشي اسرع منة التفتت علي ضايجة ندستة بـ إيدة باوعلي

- ادري شنو السالفة
جواك بيض وتخاف ليتكسر امشي عاد موو گلبي وگف

- هذا الـ عندي والله گلتها وارجع اگولها ما بية اسوق
- اي چان نزلتني

بعدني ممكملة كلامي باوعلي بـ عصبية
اسكت احسنلي
كل إنسان من عدنا جوى ساعة مال خبال والظاهر اجت الـ همام حالياً فـ الحچي ويا عبث

بقيت هادئة بس والله على اعصابي
الطريق شطولة ميقبل يخلص شوكت اوصل واشوفهم حتى اخذهم الحضني خصوصاً أختي رحمة

منا لما وصلنا روحي وصلت الـ خشمي
باوعت الصالح دگ هورن وطلع إيدة يأشر اوگفوا
ركن السيارة يم بيت چبير ونزل بـ اتجاهنا توني دافتح الباب لزم إيدي همام انتظري لتنزلين

- ليش
- گلت انتظري ماكو داعي للسؤال اسمعي كلامي
- ردت احچي فتح صالح باب السيارة طيبة شمنتظرة

- شنو ؟!!
- يلا انزلي وصلنا هذا البيت گدامچ
- باوعت للباب ونزلت دموعي معقولة راح اشوفهم هنا

- انتَ هم تفضل سيدي
- لا مشكور حبيبي انتظرها هنا بالسيارة
- باوعتلة بـ صدمة تنتظرني شنو همام اني اتأخر كلش

- عادي على راحتچ تأخري شگد متردين قابـل مانعچ
- لعد متروح لو تريد تنتظر بالسيارة لليل

- انزلي طيبة
- همام شنو راح تظل هنا صدگ ؟!!
- شاكيلچ اني شعليچ اظل لا المهم روحي شوفي أهلچ

باوعتلة ضايجة
صاح انزلي الرجال دينتظرچ فشلة
سحبت الجنطة ونزلت ظلن الملازم بالسيارة
مشيت مسافة ويا صالح التفتت عينة علينا أشر روحي

دخلت للبيت صفاء واگفة بالممر تنتظرنا
أول مشافتني ركضت علية فاتحة إيدها وتبچي اخذتها الحضني دموعي تتسابق على خدي من الموقف

صفاء.. يا عمري يا روحي يا حياااااتي انتِ
اشتاقيتلچ والله
اشتاقيتلچ موووت ومگاعد استوعب رجعتي النا وهاي انتِ واگفة گدامي وبين إيدي بعد كل هالسنين

- شديت قبضتي على ظهرها رجعت صفاء رجعت
حچيتها بـ شهگة
بعدنا صالح عن بعض مبستم كافي يلا لتسمعچن أمي

- دخليها تسمع هوَ اني ممصدگة اشوفها شتحچي انتَ
- لا ولچ ما اريدها تعرف هسة
- ليش ؟!!
- عاجبني انصب عليها مو متدرين شسوت بية بـ غيابچ

- لا خطية صالح حرام عليك

- طيبة اسمعي كلامي لتنزعين المناظر ولتحچين ابد أما الباقي خلي علية
لازم تنصدم بيچ فرحة هاللقاء تستاهل المفاجأة صدگي

- ههههههههه انتِ متبطل من سوالفك مو كبرت يمعود
- صفن بـ وجهي مبتسم صدقة الـ هالضحكة

- احمممم مو راح انغر
- انغري يابة يلوگ الطيبة الغرور واحنة الممنونين
- وهسة
- هسة البسي المناظر واذا شفتيهم جوة اتحملي بشرفچ

- ضحكت ولبستهن يلا نشوف وين يوصلنا خبالك بعد

دخلنا جوة صارت بـ وجهي صالة چبيرة كلش وفارغة
صاح من الباب أم صالح وينچ اجينا
ردت بـ صوت بعيد هلا بيكم وليدي تعالي اني بالمطبخ

هوَ اني سمعت صوتها لو گلبي انعصر
من الفرحة اجة يوگف إلا شوية معقولة هاي عمتي هنا

رجع صاح الها لا انتِ تعالي ويانا خطار
طلعت من المطبخ
حسيت روحي طلعت من جسمي وراحت الحضنها ركض

شصاير بيچ سودة علية
متغيرة كلش تعب الدنيا كلة مرسوم على ملامح وجها

- ها حبيبي
بس شافتني وگفت بـ مكانها مصدومة منو هاي البنية

- حبيبتي

- باوعتلة بـ نظرة حادة
شنو هالكلام صالح اني ما ربيتك هيچ احچي غيرها

- شكو بيها يمة
بنية احبها ورايد تخطبيها الي
فـ جبتها تتعرفين عليها وبـ حضور أختي قابل ماخذها بالختلات حتى أهلها يدرون و واثقين بية

- التفتت علية بـ نص نظرة ادري بيها ما ارتاحتلي
بس مع ذلك مبينت هالشي ورحبت بية
هيَّ هاي عمة نهاية عمرها ما كسرت بـ خاطر بشر حتى لو چان هالشي على حساب كرامتها ومبادئها

ما گدرت ارد
مخنوگة كلش بس احچي تنزل دموعي
واخاف لتعرفني من صوتي فـ اكتفيت بـ هز راسي الها

باوعت الصالح وگالت خليها تتفضل شوية واصب الغدة
سحبني من إيدي يمشيني
گبل خزرتة وراحت يمكن للمطبخ ماكو ثواني وصاحت صالح تعال يمة رايدتك بـ شغلة ضرورية

- اگعدي هنا هسة شوية واجيچ
- حچاها وراح باوعتلي صفاء تضحك طيوووب اعتبري صالح انغسل خوش غسلة بالعافية علي والله

- ههههههههه اي اني هم حسيت هالشكل
- تدرين لو لا أمي محبتچ بس ما گدرت تجيبها بالوجه

- ميحتاج تحچيلي حبيبتي
غير شفت بـ عيني يمكن لو يطلع بـ إيدها تطردني من الباب وحقها لأن أخوچ زودها كلش اويلي منة

- هههههه اسكتي لاعب بيها لعب سودة علية بس تحبه
- بعد هذا صالح منو ميحبة
- احممم اجة سدي الموضوع لا عبالة دنحش بي هسة

التفتت طلع من المطبخ مبتسم باوعتلة صفاء وضحكت ها حبيبي انغسلت مووو

- عمتچ تگولي شنو هاي ناقصة التربية
جايبها الي وتريد تسويها مرتك لتحلم صالح ما ازوجك هيچ شكيلات

صفاء.. چان گلتلها هاي تربيتچ يمة

صالح.. ههههه اسكتي اسكتي اجت ما اريد تشك بشي

نهاية.. ها صفاء خيرچ اليوم
شو لسة گاعدة متگومين تغيرين ملابسچ وتساعديني

- والله يوم تعبانة بس صبي وعلية الباقي
اگول صدگ شو زينة ماكو شنو بعدهي لسة ما رجعت

- لا راح سعد يجيبها هسة على جية يلا گومي غيري

بس سمعت اسمائهم عيوني دمعت
على گد ما حبست الدموعي بيها صارت تحرگني
يبو عليك صالح فضني وخلص مسرحيتك ما بية اصبر

احچي ويا روحي وعيوني على عمة مشتاقتلها
فجأة باوعتلي
نصيت چان تگول يمة شبيها البنية خرسة شو من اجت لسة ساكتة ما حچت ولا نص كلمة

- لا اسم الله بس هيَّ طبيعتها خجولة كلش اعذريها

بس حچاها راحت للمطبخ التفتت على صالح بـ ضجر
- شلون وياك اليوم
فضني عاد والله بالگوة لازمة نفسي إلا شوية احضنها

- اصبري شبيچ خل يجون حتى تصير المفاجأة جماعية

- صدگ وينهم شو بس عمتي هنا

- الولد برى
عمي محمود على جية
بيبي دتصلي بـ غرفتها مثل عادتها
أختچ بالمدرسة دوامها ظهري اليوم بالأربعة ونص تجي

- وعماتي سناء وسهام وينهن لعد ؟!!

- عمتچ سناء رب العالمين رحم بحالنا وزوجها
بس شلون زواجة طايح حظها بالعافية عليها تستاهلها

- ههههههههههههه وسهام مرت عمي محمود
- انطتچ عمرها
- نزعت مناظري مصدومة لا صالح دتحچي صدگ ؟!!

- دلبسي يمعودة لتجي عمتچ
- مو وكتها احچيلي شلون ماتت والله انصدمت
- احترگت بـ الغاز بعد ما تزوجتي بـ فترة بسيطة كلش

- رغم كل الشفتة منها بس انقهرت عليها ليش ما ادري
- يلا طيبة لتضوجين والبسي المناظر

- خو انتَ خبصتني بالمناظر
حچيتها ولبستهن ع السريع گام يبدل هو وصفاء بقيت بالصالة وحدي شوية وانفتحت الباب الداخلية

باوعت عمو محمود طب
اااااااخ يمة گلبي هاي شصاير بيهم يربي كلهم كبرانين

الشيب تارس راسه ولحيته
والوجه ذبلان والجسم مو ذاك الجسم ضعفان بشكل مو طبيعي بحيث مصدگت عيوني من شفتة گدامي

بس لمحني رجع ليورة وگح
صاح خوية أم صالح وينچ طلعت تركض هلا أبو سعد

- بيچ أكثر خوية.... اگول منو هالبنية الگاعدة بالصالة
- والله ما ادري شگول اسأل صالح احسن

ديحچون اجوي صالح وصفاء
سحبة عمي من يمنا وراحوا بأخير الصالة
اجتني صفاء تركض نصت علية وهمست هاي السحلةةة الثانية حتى تشوفين شگد أخوية تحمل علمودچ

- هههههههه أخوچ مخبل اني شكووو

باوعت عليهم صدگ شكلة ديترزل يلا خلي يستاهل
ماكو بنفس اللحظة
انفتحت الباب وطبوا ولد عمي كلهم سعد وسمير وزينة

ردت اگوم وگفت بـ وجهي صفاء
- تحملي ولچ لتخربين كل شي صالح يريدهم يجتمعون

گعدت على اعصابي وداخلي اسب بـ صالح
وهمَ كذلك استغربوا وجودي
كلما يگول زميلتي اموت خجل والله علي سوالف هسة شيگولون علية وحقهم وين اكو شريفة تسويها

ما اشوف إلا بيبي طلعت من الغرفة
هنا عيوني مقاومت أكثر وخانتني الدموع البللت خدي

شگد كبرانة بس ظالة مثل ما هيَّ
نفس الجمال
نفس الوقار والنور البوجها ونفس ذيچ الملامح الذبلانة

سلمت وگعدت مقابيلي عدل
ظلت عيوني عليها شوكت احضنها وارتاح الهي
شويـة وصبوا الأكل اجتمعت وياهم على سفرة وحدة

صارت گعدتي يم صالح تقربت بـ همس
- شوكت يجي الفرج
مو كافي علية كل هالسنين هسة هم اجي انتظر بسببك

- ما ظل شي وداعتچ بس اصبري
- شگد يعني
- بس خل يخلصون الغدة مو اذا شافوچ بعد محد ياكل

- استغفر الله رب العالمين واتوب اليه اكرهككك صالح
- هههههه بس اني احبچ ويلا كافي لا عبالهم دتتغزلين بية هم من غير شي ما طايقين وجودچ

- الفضل الك غير
- مشاعر مؤقتة شوية وتتحول للأحضان اصبري ولچ

ما اشتهيت أكل ظلت عيوني عليهم شوكت يخلصون
تقريباً فرغت السفرة
همس صالح راح اصيح وبس يباوعولچ شيلي المناظر

عززة عبالك مدري شصار حتى گلبي ما احس بي بعد
شگد منتظرة هاللحظة
بس والله خايفة كلش ليصير بية شي من الفرحة قبل لا اشوفهم واشبع منهم ساعدني يا الهي

- يا جماعة شوية اسمعولي عندي موضوع مهم وياكم

هوَ حچاها الكل التفت علينا
گال صالح البنية حاملتكم أمانة من شخص عزيز عليكم

حولوا نظرهم علية
باوعلي صالح وأشر على عيوني نزعت المناظر
التفتت عليهم دموعي تجري ظلوا صافنين بـ وجهي من الصدمة محد بيهم تحرك من مكانة

صالح.. هااا شبيكم
مو هيَّ هاي طيبة الما وگعت سيرتها من لسانكم سنين

هنا عمة ما تحملت صاحت بـ كل صوتها
- ولك يمة صالح تحچي صدگ
هيَّ هاي بنيتي طيبة الكسرت ظهري بروحتها هيَّ هاي بت گلبي الـ ربيتها وتعبت تالي اخذوها مني غصب

حچتها وگامت ركضت تلگيتها بـ حضني
فقدنا من البچي
رفعت راسها تشهگ وتصيح لك الحمد ولك الشكر يا الله يا رب العالمين من رجعتلي بنيتي الغاليةةةةة

حضنت وجهي بـ إيدها تبوسني من كل شبر بي
اريد اهدأها ماكو
ما احس إلا نزلت على إيدي باستها سحبتها ورى ظهري وبست إيدها أكثر من مرة وبـ لهفة متنوصف

طيبة.. اني الأبوس إيدچ ورجلچ يمة شگاعد تسوين

محمود.. تعالي يبعد عمچ
تعالي الـ حضني وخليني اصدگ انتِ هنا وواگفة بيناتنا

بست راس عمة نهاية ورحت الـ عمي اركض
حضنتة بـ قوة
بالگوة حچيتها الشهگة لازمتني عمو والله اشتاقيت الك

- مو بگدي يروحة الـ عمچ
ولچ ما تدرين شصار بية واني افكر شـ حالچ بـ غربتچ

لزم وجهي بـ إيدة
مسح جوة عيوني وباس راسي أربع مرات رحت فدوة الـ بنيتي شگد كبرانة نورتي بيتچ يبعد بيتي

- ماكو نور بعد نوركم عمو
حچيتها والتفتت على بيبي خطية من البچي مناظرها متناشف ركضت ذبيت روحي بـ حضنها ابچي

اوووف ي هالحضن شگد يختصرلي اشياء وأشخاص
هذا هوَ حضن جدي
وحضن عمو حامد الراح وتركني واني بعز حاجتي الة
هنا الأمان الطيبة الحب وكل شي حلو بـ هالدنيا الغبرة

صفية.. من رحتي ولليوم واني اذكرچ بكل فرض
بكل سبحه بكل دعاء
حتى الله يوگفلچ الناس الطيبة منا لما ترجعين لحضنا

طيبة.. رب العالمين استجاب الچ بيبي وفعلاً وگف الي الناس الطيبة
الصارولي أهل وأكثر وسندوني بكل ما بيهم بس حتى اوصل للشي الـ وصلت الة اليوم اني

زينة.. ديلا كافي خلولنا شوية شنو الأحضان كلها الكم

طيبة.. ركضت عليها اجت تركض الحضني زينة يروحي اشتاقيتلچ عوبة هاي شصايرة تخبلين

زينة.. ولچ شتحچين غير ميتة على شوفتچ اني
وشكراً ع اللبخ
بس اكيد منوصل الـ جمالك يابو خدود الحلوة يجميل انتَ ياااااااي ممصدگة وربي هااااي انتِ

طيبة.. ههههههه
عبالي عقلتي ولو المفروض اغسل إيدي أخوچ منو بعد

سحبني منها سعد ادري متقصديني
نسيت كل شي وحضنتة حيل ولك مشتاقتلك والله
مسح على راسي يضحك مـو بگدي ي بعد گلب أخـوچ

سمير.. اعرف اني المقصود
بس يلا سماح اليوم ادللي على كيفچ وبعدين الحساب

- فتح إيدة مبتسم تعالي ظل بس حضني مشتاقتلچ

- ركضت حضنتة واني هم مشتاقتلك
مشتاقة السوالفك الحلوة سمير يا الله شگد فرحانةةة

ظليت على هالحالة ساعات طويلة
اتنقل من حضن الـ حضن محد بيهم يقبل يعوفني
أخر شي تعبوا وتعبوني
گعدنا بالصالة صاحتني عمة نهاية وطوقتني بـ حضنها حيل عبالك تخاف لا اروح واتركها مرة ثانية

- بست خدها وضحكت عمة هديني ترى والله ما اطير
- لا عشتو اهدچ شنو ظلي هنا حضني مكانچ

صالح.. روحي طيبة انحكم عليچ مؤبد بـ سجن نهاية

- رجعت بستها بـ قوة
اذا هيچ السجن يصير فـ العمر كله خلوني مسجونة ما اريد الأفراج شـ حلات حضن الأم جنةةةة

صالح.. ههههههه العبببب
شتريدين بعد أم صالح كل هالحب الچ الله ربچ يوووم

نهاية.. لتغار حبيبي
مو زين عليك ليطگ الك عرگ لا سامح الله هدي اللعب

طيبة.. هههههههه
والله عمة للأمانة هوَ كل شي بي طاگ ظلت على العرگ

صالح.. هههههههههه مقبولة منچ نعديها اليوم عروستنا

طيبة.. هههههههههه عمة مشفتي شسوة بية
لا فوگاها خلاكم تحچون علية والله شنو حتى يفاجأكم بس مو صوچة صوچي اني الـ سمعت كلامة

نهاية.. فدوة لـ بنيتي كبرانة وصايرة لسان
يلا احچيلنا شصار وياچ زين وين چنتِ شوصلچ لـ هنا

طيبة.. هسة راح احچيلكم كل شي والله العظيم
بس بالأول انتم احچولي
شـ اخباركم واذا بعدكم ببغداد ليش اختفيتوا عني كل هالفترة اكيد رزاق مدبر سالفة حتى لتوصلولي

بس حچيتها گعد صالح يشرحلي كل شي صار
بهالسنين واويلي شگد انصدمت بحيل رزاق والكوارث الصارت بـ غيابي

بعد زواجي بـ يوم واحد ضبط
أبوية مبلغهم أرشد اخذني وسافرنا خارج العراق
مع ذلك عمي محمود ما صدگ بـ كلامة
رايح وسائل أكثر من شخص وكلهم اكدولة سفر أرشد شلون ما ادري

ولو هالشي ميصعب على واحد مثلة
غير هوَ ورزاق وجهان لعملة واحدة تصعب عليهم هيچ شغلة بسيطة اذا ابليس يتعلم من هالأثنين مكر

وراها صالح رايح الـ مدرستي
سائلهم على بـ طاقتي گالولة موجودة محد سحبها
رغم هيَّ انسحبت بعد زواجي مباشرتاً بس الظاهر همَ متوقعين كل هالحركات فـ اخذوا حذرهم مقدماً

ما خلصت مصايب رزاق لـ هنا
دگ ببيت جدي الناقصة وباع البيت بلا علمهم بحساب هوَ الچبير والوكالة عندة ولمن عرف عمو محمود گلب الدنيا بس بدون نتيجة طبعاً
أخر شي اشترى هذا البيت وطرد رزاق منة بعد عملتة

خطية مثلي ما خلوا شي ما سوو حتى يوصلولي
بس أرشد ورزاق حابكيها صح
بحيث وصلوهم اليقين اني مسافرة رغم هذا ظل صالح يوعدهم راح يلگاني ويرجعني الهم غصب عن رزاق

حچولي هواي وأكثر شي عن حمايتهم الـ رحمة
بعد ما باعني رزاق
كلهم وگفوا حاجز صد گدام رحمة وبـ وجه أبوية لذلك ما گدر لا يبطلها ولا يزوجها مثل ما سوة وياية

بس اكيد ما گدروا يمنعوا من شوفتها
بين فترة والثانية يجي يشوفها شوية ويروح ومتأكدة الة منها غاية وإلا شخص مثل رزاق يعرف يحب

كملوا حياتهم وبديت اشرحلهم عن حياتي
انصدموا بموت أرشد
وانصدموا أكثر من عرفوا أبوية اجة بعد وفاتة مباشرتاً حتى ياخذني بس همام حماني بزواجنا المؤقت

صالح.. شتحچين طيبة يعني همام هسة رجلچ ؟!!

- اي صالح
- زواج شكلي يعني ع الورق مو
- اي راد يحميني بي من رزاق منا لما أتخرج حتى اگدر اعتمد على نفسي واوگف بـ وجه أبوية بصلابة

وبصراحة ما قصر
لو ما دعمة المادي والمعنوي مچان گدرت احقق حلمكم وحلم عمو حامد بية وادخل الـ كلية الطب

نهاية.. اللهم صلِ على محمد وآل محمد سويتيها يمة

- ابتسمت وهزيت راسي اي راح اصير دكتورة عمةةة

خطية من فرحتها ظلت تهلهل
أكثر وحدة سعت حتى تحقق حلم عمو بية بس للأسف بسبب رزاق تربطت وما طلع بـ إيدها شي

اخذنا الوقت بين فرحتهم بالخبر والسوالف المتخلص
ما احس إلا رحمة دخلت للبيت
بس شفتها جسمي خدر بالگوة سندت نفسي على عمة نهاية وگمت اباوعلها ودموعي مثل المطر

صفنت بـ وجهي وحقها وين تعرفني
مشيت ببطئ بعدين قويت نفسي وركضت حيل
ضميتها الـ گلبي بقوة وابوس بيها اني طيبة رحمة اني أختچ حبيبتي أختچ الراح تموت على كلمة منچ

وسعت عيونها حضنتني وصارت تنحب
- هاي وين چنتِ ليش هيچ طيبة رحتي ومسألتي عني

- يعمررررري يروووووحي
تتذكرين حبيبتي لسة تذكرين عندچ أخت اسمها طيبة

نهاية.. شلون تنساچ
غير يوميا بالليل منغمض عينة إلا بعد منسولف بيچ

درت وجهي ما اشوف گدامي من الدموع
ابتسم الـ عمة
شكراً يا اعظم مرة بالكون لو ما انتِ رحمة ما تقبلتني

شوية وهدأنا اني وياها
اخذتها الـ حضني وگعدنا بالصالة يمهم
فجأة رفعت راسها علية اشتاقيتلچ طيبة والله كل يوم اباوع الصورتچ وابچي بس انتِ حيل متغيرة

- يعمري واني مشتاقتلچ
انتِ هم متغيرة وكبرانة عمة الله عليچ هالحلوة مووو صايرة نسخة من ماما احچي ضميرچ لتجاملين

- صح والله اني اگوم واگعد اصيحلها نسرين الصغيرة

- فدوة الـ هالوجه هي ماما تخبل شتطلع بعد بنوتتها
- ههههههه انتِ هم حلوة
- لا عيني اني شنو انتِ احلى مني بـ هواي
- صاحت عمة لا تتعاركن انتن حباية ومگسومة نصين

مرت لحظات ما انساها بـ كل حياتي كلها
هيَّ هاي اللحظات الوحيدة الهونت علية كل قهر السنين الراحت واني بعيدة عنهم

فجأة صالح گال تعالي طيبة رايدچ بموضوع
باوعتلة احچي
رد لا بالغرفة شي خاص شوية
درت وجهي على عمة نهاية باوعتلي وابتسمت شكووو

- ماكو شي گومي ويا أبن عمچ من شنو خايفة
- المصايب متخلص
- لا ماكو مصايب ان شاء الله روحي والهـوى بـ ظهرچ

- زين رحمة شلون والله مينطيني گلبي اعوفها

صالح.. شنو قابل راح تطير أول وتالي تشبعين منها يلا

طيبة.. راجعتلچ لتتحركين من مكانچ اااابد

نهاية.. هههه لچ عوفيها تغير ملابسها تاكل لگمة شجاچ

طيبة.. ههههههههه اي والله صح
يلا خليها تبدل وتاكل بين ما ارجع الها بس استعجلي

حچيتها ورحت ويا صالح للغرفة باوعت متعجبة
- غرفتك
- اي
- والله وووكت تذكر من چنا ننام بغرفة وحدة وبالگاع

- شلون انسى احلى أيام بـ حياتي
- يمعود يا احلى أيام شكلك نسيت المصايب العشناها

- لا ما نسيت
بس تظل بالنسبة الية اهون من الأيام العشتها بفراگچ

- ههههههه اي والله
اني هم رغم قساوة ذيچ الايام بس هواي چنت احنلها مو شوية العشنا سوة ربيت على إيدك اني

- وهاي انتِ رجعتيلنا الله ليفرقنا بعد
- امين اي احچيلي شلون صرت ضابط ي السبع
- قصة طويلة بس اختصرها الچ بكلمة وحدة علمودچ

- رفعت حاجبي بـ غرور
ادري علمودي غير صرعت راسك بـ هالأمنية ما نسيت

- لا مو هذا السبب
- ما فهمت اذا مو هذا السبب شنو لعد ؟!!
- صرت ضابط حتى ارجعچ الـ حضني مكانچ ومملكتچ

- باوعتلة بـ استغراب شنو صالح شبيك !!!

تقرب سحب إيدي بـ إيدة وعيونة تتأمل تفاصيل وجهي
- احبچ طيبـة ومو أي حـب
احبچ حـب عذري حـب صافي مثل صفاء عيونچ ونقـي مثل نقاوة گلبچ وطاهـر مثل طهـارة روحچ
اي احبچ موـوت احبچ وهالحـب ذبحني واني عايش.....

يتبع

لتنسووون ⭐⭐⭐⭐⭐⭐
كل الحب ❤🥀