#أبي_لم_يكن_إنساناً
البارت الواحد والأربعون
للكاتبة لبنى الموسوي
ما يفيده الشوف المفارگ عزيز
الضحكة تيبس فوگ حلگ الفاگدة
بصفي واني اشتاگلك يالما دريت
شبيك ما سامع بگلب الوالدة
وجهك يدفيني تموزك حنين
من الله اكرهة الوجوه الباردة
عگدت الساني اذا گالوا اجيت
بصفي تگعد هاي أحسن زايدة
الشاف وجه وليفة تلگة بـ روحة عيد
لا تگلة شلونك اگعد عايدة....
همام.. گاعد اسمع أخبار جوة بالصالة دگ جهازي
هم رقم غريب رفضتة رجع دگ
يمكن نفسها البنية صرت حتى ما جاوب أرقـام غريبـة بسببها رغم شغلي يتطلب هالشي بس شسوي
شوية ودزتلي رسالة الله يخليك رد محتاجتك ضروري
مليت من ملحتها لازم اخلي الها حد
اخذت موبايلي وصعدت فوگ توني طبيت اتصلت گبل جاوبتها نعم منو وياية
- نور
- ادري أختي شبيچ ليش هالملحة
لا والحلوة احظرچ من رقم تجيني من ثاني بدالة لو شنو
- شجاك عيني
ليش هالأسلوب أول مرة اشوف رجال يرد بـ هالطريقة
- اگول لتدوخيني
عندچ شي مهم احچي ما عندچ خليني اسد الخط يلا
- لا عندي
اني شفتك وانعجبت بيك فـ حبيت نتعرف قابل حرام
بعدني ما راد عليها سمعت الباب انفتح حيل
درت وجهي وانصدم بـ طيبة شگاعد يصير هنا اليوم ؟!!
دخلت ورگعت الباب بـ قوة
باوعتلها بـ استغراب طلبت توضيح بطريقة استفزازية گبل سديت الخط وشمرت الجهاز ع الچرباية
- انتِ شلون تتجرأين تدخلين علية بدون استأذان
بعدين شنو هاي همام ؟!! نبرة جديدة أول مرة اسمعها
- جاوب وبعدين اجاوبك ماكو داعي للف والدوران بعد
- شبيچ عمو ؟!!
حرارتچ مرتفعة لو شنو بالضبط
فهميني حتى اعرف شلون اتصرف وياچ عقلچ وووين
طيبة.. باوعتلة بـ عصبية
لتگول عموووو انتَ مو عمي وتعرف هالشي كلش زين
- طيبة لترفعين صوتچ شوفي كم مرة عدتيها وسكتت
- همام احچي شعندك ويا هالبنية
- بعدني احچي دگ جهازة منو هاي جاوب الله يخليك
- ما اعرفها شبيچ
- ها يعني وحدة لازگتلك خوش هسة اني راح اتصرف
ركضت شلت الجهاز من الچرباية فتحت خط عليها
- نعم خير
- منو انتِ عيني
- اني الـ منو لو انتِ شعندچ لازكة وشتردين من رجلي
- شنو هوَ متزوج ؟!!
- ااااي متزوج وديري بالچ ترجعين تتصلين مرررة ثانية
- يريد هوَ يطلب هالشي
اني ما متصلة على رقمچ حتى تنطيني أوامر تسمعين
- لچ والله احرگ أهلچ السابع ظهر
لتتصالفين واثگلي عيب تركضين ورى المتزوج ترى مراح يهدم حياتة وبيتة علمود الرخيصات لتحلمن زايد
بعدها دتحچي وتتجاوز سحب همام مني الموبايل
- شنو هاللسان طيبة أول تالي
- ما حچيت شي حقي شنو تريد اسكت لحد ما تجيب للبيت حية ثانية غير الاء واني الأوگع بيها تالي
- اعقلي شوية والزمي حدچ من شوكت انتِ تتصالفين
- من حبيت واحد حجارة مثلك
لا عنده ذرة مشاعر ولا يعرف يحب بـ حياتة
انطي بس شغل وعقل مدبر أما گلبة راكنة على صفحة
- شنو هالحچي يمعودة ؟!!
حب شنو هذا الدتحچين علي لا اكيد متوهمة
افتحي عينچ اني مثل عمچ وانتِ حالچ من حال بتول
- مو عمي شنو تضحك على روحك
اذا عمي ليش ما اگدر احضنك شوكت ميعجبني
ليش ما اتجرأ واگولك حبيبي زين انتَ تتجرأ تگولها ؟!!
زين ليش دومك تخلي بيناتنا حواجز
عاملني مثل بتول بالضبط مو اني بت أخوك لو غلطانة
فـ كافي عاد لتسويلي بت أخوية وبت عمي وهالسوالف
طيبة كبرت بعد مو ذيچ الطفلة الـ دخلت الهذا الـ بيت مغمضة
حالياً اني اگدر اميز الينفعني من اليضرني
يعني من حقي اختار الشي اللي أشوفة مناسب الي ابد ممسموح الكم تفرضون علية اوامركم بحياتي الشخصية
- لهنا وكافي بعد ترى بزعت روحي
لتخليني أأذيچ بطلي هالسوالف واصحي على نفسچ لا حب ولا لعب جهال
هالشي الگاعد تحسين بي شي عابر ومراح يدوم
يعني مشاعر وهمية وخرط بخرط عشتيها لأسباب عدة
اولاً لأن اني الرجال الوحيد بـ حياتچ
وثانياً انتِ دتمرين حالياً بفترة مراهقة وهاي من اصعب الفترات بعمر الإنسان من يكبر يضحك عليها
- نزلت دموعي غصب عني هاا گتلي مراهقة مووو ؟!!
لا استاذ همام غلطان
مشكلتك متعرف شنو الحب ولا شلون يصير لذلك ابد ما الومك اذا استخفيت بـ مشاعري وسميتها خرط
- هه وانتِ تعرفي ؟!!
- وداعتك أكثر الناس اعرفة
بس مع الأسف سلمت مشاعري الحقيقة للشخص الغلط
- علميني يلا شنو هوَ الحب منكم نستفيد ست طيبة
- اعلمك ليش لا
- حلو واثقة من نفسچ هم جيد جداً
- مو واثقة من نفسي
بگد ما واثقة من حبي الك اللي انتَ متستاهل ولو ربعه
المهم الحب شي أكبر من استيعابك همام
الحب يجردك من كل شي
الأنانية الكرامة حب الذات يمحي كل الحدود الـ بينك وبين الشخص المقابل يخليك انتَ ويا روح وحدة بجسدين
يوصلك المرحلة تحس بيها حبيبك كل شي بالحياة
الدنيا الناس العمر الوجود
لمن تغار علي يوجعك داخلك وجع الموت
وساعة التلمس اصابيعة أطراف اصابيعك تحس نفسك ملكت الكون كله بكف إيدك اليمين وسعادة الدنيا تستقر بـ إيدك اليسار
تمشي ع الگاع بس طاير ويا نجمات الفضاء
نظرة منه تاخذت العالم ثاني ما بي غير انتَ وهوَ وبس
الحب شي عظيم بدونة منعيش بـ سلام
صدگني متجاوزت الماضي وطفولتي المهمشة وجرائم رزاق وصارتلي شخصية وقويت وتغيرت وصرخت وطلع صوتي إلا بعد ما حبيتك همام
لحد قبل سنتين طيبة خرسة
طيبة متگدر تدافع حتى عن ابسط حقوقها
واذا احد ظلمها تكتفي بـ دمعتين تالي الليل تبلل بيهن مخدتها وتنام
بس هسة لا
حقي بيك مراح اتنازل عنة ابد
إلا اذا چنت فعلاً مرايدني هنا لا كرامتي فوگ كل شي حتى حبك المن طرف واحد ومباشرتاً انسحب
حچيتها وطلعت من الغرفة اركض
ما اعرف شلون طلع مني كل هالكلام ومنين جبتة بس احسن شي حچيت وهوَ حر بـ قرارة بعد
ما اگدر اگول صح السويتة ولا اتقبل الغلط بـ سهولة
بس المهم چان لازم يعرف
هوَ ديشوفني طفلة ولو شگد ما احاول اعكس هالنظرة راح اظل بعينه طيبة الأجت لهذا البيت قاصر
ذيچ الچانت كل شي متعرف غير بس الدموع
رباها وكبرها واعتبرها مثل بت أخو
بس هسة لا كبرت وحبته ولازم يعرف هالحب حتى هوَ يقرر يا أي يا لا ممستعدة اظل عايشة بنار الغيرة كل عمري وما اتصور اكو وحدة تگدر تقاوم هالنار ومتنهار
دخلت الـ غرفتي محترگة حرگ حتى خشمي نزف دم
سحبت الكلينس اوگف النزف
كافي طيبة گلبچ راح يوگف سويتي الـ عليچ على شنو كل هالخوف انتِ شجاعة بنية وسويتي المگدر الرجال يسوي
ما گدرت اقاوم أكثر
گعدت ع الچرباية وشبعت بچي
نار بـ بگلبي شنو سببها ما اعرف المهم مخنوگة خنگـة بس الله يعلم بيها بحيث بالگوة داسحب النفس
شوية وسمعت صوتة باب غرفتة انفتح عرفتة ديروح
گمت غسلت ورجعت اباوع من الشباك
شغل السيارة وطلع سديت البردة حيل واخذت ملابسي اروح اسبح بلكي شوية يبرد گلبي وارتاح
طلعت نشفت وظليت افتر على روحي بالغرفة
باوعت للموبايل خل اتصفح بي
ظليت ادور مخليت شي مسويتة حتى نغمة الجهاز كل شوية مغيرتها أخر شي ظليت العب لعبة الكرات
مليت شمرتة ع الميز وحاولت أنام مگدرت
صارت عيني ع الساعة
يربي بالوحدة وين صار بديت اقلق علي شسوي هسة
رفعت الموبايل ردت اتصل علي ضربتة ع الميز حيل
لا والله فـ لا اتنازل بعد
بس شلون گلبي راح يوگف ليش تأخر هالگد مو بالعادة
گمت من فراشي افتر رايحة جاية لازم تتصرفين طيبة
فتحت الباب ونزلت
طبيت الـ غرفة بتول نايمة ولا حست
رفعت شعرها مررتة على عيونها گومي ولچ محتاجتچ
- عوفيني أنااااام
- حبابة والله شي ضروري گومي بداعة اللي بالي بالچ
- رفعت راسها مخنزرة هااا يمعودة شكو مو توني نمت
- حبابة بس خابري عمچ
طلع من العشرة ونص ولسة ما رجع ظل بالي يمة والله
- وليش داخابرة ؟!!
مو عندچ موبايل اذا على الرقم هاچ انقلي من جهازي
- لا مو موبايلي سلحته
مدري وين شمرتة نسيت صارلي ساعة افتر عل ماكو
- طيبة حبيبتي الموضوع كلش سهل
حچتها وگامت على حيلها للباب دگتها طق طق طووق اتسمح لي بالدخول
طبعاً هوَ راح يگولچ اكيد عمو تفضلي
انتِ رمقي بنظرة عدم رضا وگوليلة بطل هالكلمة حتى اني هم ابطلها
هنا هوَ راح يستغرب ويحاول يسويهن عليچ
گبل گوليلة كافي ثول اني احبك ها اهاااا فضت السالفة ميحتاجلها دراما هندية يا عيني
- يا حب شبيچ ؟!!
- حب شمس
اييي لتخليني اقسملچ مو تدري بـ لساني ما بي بريك
- وانتِ عبالچ الشغلة هيچ سهلة ويا هالجبل الجليدي
- وداعتچ عندي وتدرين شگد غالية
أكبر جبل يذوب بنظرة وحدة من الحسناوات... وغمزت
- ههههههههههه
يمعودة اتصلي الله عليچ وكافي لغوة داگولچ بالي يمه
- لعبتيها الـ نفسي راح اتصل بس سدي الـ هالبوز برررة
- افتحي المايك اريد اسمع شيگول
بس فدوة مو تگوليلة اني طلبت منچ تتصلين ازعل هاا
- تجين وتعترفين وداعتچ
وساعتها اضحك عليچ مثل مسويتي بية ما انسى ترى
- يلا اتصلي يبوووووو
- عليچ ان شاء الله لا ع اليكرهونچ خطية بعدچ شابة
حچتها وانطت اتصال رفعت المايك بـ إيدي
گلبي يدگ ويا كل دگـة
قريب ميفصل رد بس سمعت صوتة ردت روحي الحمد لله هوَ بخير الباقي كله مو مهم والله العظيم
- الووو
- ها عمو اني بتول شو طلعت والطلعة طلعة بيك شي
- هاي راجع بالطريق
- توصل بالسلامة بس بعد لتتأخر هالگد الدنيا مو أمان
- اگول ناموا لو گاعدين
- باوعت عليها بسرعة واشرت بـ اصبعي لاااا
- لا كلهم ناموا واني هم ردت بس اطمأن عليك وأنام
- عشر دقايق واصير يمكم
عود فتحيلي الباب لأن نسيت المفاتيح ع الميز وطلعت
- اي تتدلل
حچتها وسدت الخط يلا ولي فتحيلة الباب لأن لو اموت هم ما اعوف فراشي واطلع خوووش
- نامي يمعودة شخبصتينا نومة أهل الـ... لا يلا خطية
- هل جزاء الأحسان إلا الأحسان ربچ يعرف عباده عدل
- هههههههه لا حبيبتي اتشاقى نوم العافية ان شاء الله
بستها وطلعت اركض ليجي واني جوة
طلعت فتحتلة الباب وبوجهي للغرفة وگفت يم الشباك اراقبة شوكت يجي شوية وشفت سيارتة من بعيد
اااف الحمد لله هسة يلا اگدر أنام مرتاحة
بقيت اباوع دخل السيارة وسد الباب عبالي راح يطب شو هذا راح للحديقة
رحت للجهة الثانية
شفتة گعد بالمرجوحة ورفع راسـه ليفوگ
اموت واعرف بشنو ديفكر معقولة كلامي ضوجة هالگد
سديت البردة ورحت الـ فراشي
حاولت أنام ماكو باوعت للكنتور احسن شي اگوم ارتب ملابسي لسة مشمورات شلون مچان ملحگت اسويهن
بديت اشتغل بيهن
عشر دقايق وسمعت خطواتة ع الدرج
ما اهتميت هناك ودگ جهازة هنا صدگ متت اكيد هاي رجعت تتصل بي هيچ صلافة مشايفة بـ حياتي
لزمت نفسي بالگوة
اگعدي لتتحركين سويتي العليچ خلي القرار الأخير الة
سمعت صوت الباب انسد
گمت طلعت بـ هدوء تقربت من غرفتة اي ماكو صوت يعني مجاوبها بس كون هيَّ تحس على دمها
رجعت الغرفتي
كملت ترتيب الملابس ع السريع وتمددت أنام
وين يلا غفيت گعدت الصبح على صوت المنبه باوعت للباب هسة شلون يربي اروح اگعدة لو لا
گمت غسلت ورجعت افتر بالغرفة
اگعدة اخاف عبالة متقصدة اسويها حتى اضغط علي
ما اگعدة لا خطية
هو وين يحس غير يروح الدوام علي صفنت ويا نفسي
لتصيرين غبية مو يوميا تگعدي شنو التغير قابل !!!
سحبت نفس قوي وطلعت
دگيت الباب اكيد ميحس دخلت علي المنبه يدگ وهذا نايم على وجهة مو يم أم السالفة تقربت منه أكثر
باوعت علي مبتسمة رغم ضوجتي
عود شدعوة هالگد حلو لمن ينام يمكن لأن احبه
نفضت راسي گعدي وكافي سخافة شـ اتفقنا البارحة ها
مديت إيدي ردت الزمة لحظة لحظة وين انطي صبر
شلون راح تگعدي ؟!!
عمو لا واگفة مترهم البارحة صرتي نازك الملائكة براس الرجال شوفي درب غيره حبيبتي هذا ميفيد بعد
زين شنو همام
تؤ هسة عبالة شامرة روحي علي
لازم اثگـل مو البارحـة كرامتي انمسحت بالگاع بسببه
- اگول اگعد... الووو
يمعود دگوم عاد تأخر الوقت وتالي وياك نوم لو اغماء
- فتح تك عين يفرك بـ شعره بيش الساعة هسة
- سبعة وربع
- بس حچيتها رجع راسه ع المخدة
- اهو شنو السالفة هم راح ترجع تنام ترى والله ميصير
- لا عمو ما أنام هسة دقيقة واگوم
- شديت قبضة إيدي حيل
اهدي بأعصابي لا اروح ارفس بمصارينه بدون ما احس
ادري بي تعمد يگولها
بس بسيطة همام يا انتَ يا طيبة ونشوف منو الأشطر
درت وجهي والله حتى لو رجع نام ما اگعدة بعد
ردت اطلع صاحني
التفتت بدون ما اجاوب وين رايحة متجهزين ملابسي
- اي اسفة عمووووو نسيت والله هسة اجهزهن تتدلل
باوعتلة ابتسم بـ ابتسامة مخفية عود عبالة ثولة اني
رحت طلعت الملابس خليتهن بـ إيدة ونزلت
سويت الريوگ جهزتة ع الميز وصعدت الغرفتي كل مرة انتظره ياكل يلا اصعد بس هسة لا كل شي تغير
ظليت افتر بالغرفة ولا الحامل بـ لحظة ولادتها
سمعت صوتة نزل
شوية وشغل سيارتة هاي شنو وين رايح شو ما تريگ
فتحت البردة شفتة مطلع السيارة وديسد بالباب
نزلت للمطبخ اركض
الريوگ على وضعة ما ماكل شي متت قهر يعني تقصد يأذيني لأن يدري اتخبل اذا طلع بلا ريوگ
صعدت ع السريع اخذت موبايلي واتصلت بي رفضني
أول ضجت
بس لمن تذكرت هوَ ممسجل رقمي هدأت
رجعت دگيت قريب متخلص المكالمة جاوبني بنتر الوو
- ليش ما تريگت شنو هيَّ الشغلة عناد وبس
- طيبة ؟!!
- اي هذا رقمي وهسة جاوب ليش سويت هالشكل هاا
- ما اشتهي
- هذا كله لأن تعرف ما اقبل تطلع بلا ريوگ
هاي شعليها بذيچ
شنو معنى تصرفك هذا ليش تخلط الأمور ببعضها ليش
- والله هالحچي گولي النفسچ حتى تفسريلي تصرفچ
- يا تصرف ؟!!
- ليش تخلطين الأمور ببعضها هاي شعليها بذيچ
شنو تسوين ريوگ وتخلين وتصعدين
اكو شي تغير مو يوميا تظلين يمي لحد ما اطلع جاوبي يلا مو شاطرة بس تلومين وانتبهي الـ تصرفاتچ
- بس همام
- عمو طيبة مو همام تسمعين
- بقيت ساكته ما اريد احچي وازيد الموقف سوء كافي
- يلا اذا ممحتاجة شي لازم اسد الخط لأن گاعد اسوق
- الله وياك
بس فصلت الخط عصرت الموبايل بـ إيدي حيل
هيچ گلبي دينعصر
ماشي همام مثل متحب خليك هيچ بس اني مو طيبة القديمة من اليوم راح تشوف غير وحده
همام.. توني گاعد اريد اشتغل دخل علية مخلد
يا فتاح يا عليم يا رزاق يا كريم
خير شعندك من الصباحيات ولك حتى بعدني ممسمي
- اجيت اسأل شصار حاچيتها لو لا
- اوووو تصدگ نسيت اعذرني حقك علية اليوم اسألها
- صدگ تحچي همام شنو يعني نسيت احچي غيرها
- وداعتك صارت وياية سالفة البارحة طيرت العقل من راسي لتزعل اليوم افتح الموضوع وياهم
- خير شكو شصاير وياك
- لا هيچ مو مهم سالفة خاصة شوية انسى يلا خوية
- لا شو إلا تحچيلي
اريد اشوف شنو هالسالفة الچبيرة الخلتك تنسى أخوك
- گتلك خاصة
- ليش بيناتنا هالسوالف يلا احچي بلكي اقبل اعتذارك
- هههههههه هاي شنو ولك گلبت السالفة علية
- اشم ريحة حب بالموضوع لأن حتى لونك متغير هااا
- لا يا حب هذا
- احلف عليك حاب بس تخاف تواجه
- مخلد
- احچي يلا وعوفني اني احكم وتعرفني ما اجامل ابد
- اااف استغفر الله رب العالمين واتوب اليه
شمرت القلم من إيدي ورجعت نفسي ع الكرسي احچي حتى بلكت ارتاح شوية
- قبل لا احچي اني اريد اعرف رأيك انتَ بالموضوع
- بعدها طفلة مخلد
كلها فترة بسيطة وتفتح عينها ع الجامعة وهناك تشوف مستقبلها تالي تضحك على هالأيام
- مو طفلة همام البنية كبرت
ليش مُصر تشوفها بـ عينك نفس ما اجتكم أول يوم
- لا مو هيچ بس... والله ما ادري
- وانتَ
- شبية اني ؟!!
- شتحس اتجاها ورحمة الذاك الأب الطيب احچي حق
- باوع ومن الأخير اني چنت اشوفها مثل بتول تماماً
بس بالفترة الأخيرة حسيت تصرفاتها تغيرت
مو ذيچ طيبة القديمة نظراتها تغيرت حركاتها تغيرت لا مو بس هيچ حتى صارت تراقبني شوكت اطب شوكت اطلع فـ شكيت بالموضوع
رغم هذا غالطت نفسي
ادري بيها مراهقة ومو صعبة تتعلق بية وتتوهم بحبي
- خلصنا من المراهقة والمشاعر المو اكيدة غيرها شكو
- البنية صغيرة كلش يول
بيني وبينها 12 سنة يجي يوم وتندم على اختيارها الي
- لتكبر الموضوع اترجاك
يعني مو ذاك الفرق الچبير هاي اني گدامك راح اخطب بت أخوك وبيني وبينها 11 سنة ليش ما اعترضت
- اكو فرق هنا بتول ما ربت گدام عينك
- اليسمعك يگول شايلها بالگماط شو اجت البيتكم تلبس منك حجاب فتح عيونك ترى متلگة احسن منها
بعدين شنو هاي مال تكبر وتندم
ليش هيَّ راح تگدر تحصل واحد مثلك بالجامعة !!!
عمي والله لو اني بنية فـ لا افوتك من إيدي لا ومو بس هيچ چان تقدمت الخطبتك بـ نفسي بعد شتريد
- هههههههه طيح الله حظك
بس اريد اعرف شوكت تبطل من سوالفك مو دنحچي مثل الأوادم يعني إلا تنكت علينا تراب
- غير انتِ استفزيتني بـ كلامك
كل شوية تندم ومراهقة يا أخي الموضوع ابسط بهواي بس لو تحرك هالحجارة الـ بصدرك كل شي ينحل
- هنا حقك هو لو ما حجارة چان عاشرت واحد مثلك
- ها راح تگلب علية
عموماً حجارة مو حجارة غصباً عليك تخاويني
أما موضوعي بتول راح اعبر اليوم خطية الحب ساطرك
- شبيك انتَ يا حب هم رجعنا
- خليني اكمل هسة بعدين عود تعرف يا حب
المهم عذرتك اليوم
بـس باچر اذا اجيت وتحججت يا طيبة يا مدري ايش قسماً بالله هيچ افرغ السلاح بـ...... ،،، براسك يلا
- هههههههههه وتالي وياك دامشي خلينا نشوف شغلنا
- ههههه رايح بس بداعة الخوة فكر زين
- الله كريم
طيبة.. للوحدة ونص رجع همام من دوامة
صعد يبدل بين ما صبينا الأكل راحت بتول تصيحة
شوية ونزل اجتمعنا ع السفرة
الماعون گدامي اگلب بي بس بالي بغير مكان فزيت على صوتة يسألني ها طيبة شبيچ ليش متاكلين
- رفعت عيني علي بلا مبالاة هاي مو داكل
- وين تاكلين بس تگلبين بالماعون اكلي لا تظلين هيچ
خديجة.. شبيچ بطة اليوم مو طبيعية ضايجة من شي
- لا والله عمة ماكو شي هاي شوفي اكلت گدامچ
حچيتها وخليت اللگمة بحلگي
بالگوة گدرت اتغدة ما اريد افضح نفسي گدامهم كافي علية همام
گمت قبلهم لملمت المطبخ وخليت الچاي على النار
نص ساعة واجتمعنا بالصالة
داحچي ويا بتول قاطعنا همام تعالي عمي عندي وياچ موضوع مهم
- خير عمو
- ان شاء الله مخلد صارلة فترة يحچي وياية علمودچ
خديجة.. شنو يعني ؟!!
- يعني طلب إيدها ويريد يدز أهلة
بس لازم اسمع موافقتها قبل ليجون لأن القرار الها هيَّ
طيبة.. هوَ گال هيچ لو گلبي صار يدگ سريع
يربي عبالك خطوبتي
باوعت البتول اضحك الله يساعدها شلون تلگت الخبر اذا اني هيچ اكيد هي تحس گلبها ديوگف
ماكو ولا ابدت اي رد فعل
مجرد صافنة على همام وعيونها مفتوحة
رجع سألها ها عمي ما جاوبتي موافقة لا الرجال ينتظر خبر منا
خديجة.. هههههههه
البنية انعگد لسانها ولا چنها ذيچ بتول المحد يسكتها
الحجية.. وليدي شتگول بعد باوع عليها وفهمك كفاية
همام.. بيها الخير ان شاء الله
جهزوا نفسكم راح ابلغة الخميس يدزهم حتى يطلبوها رسمي
الحجية.. كل الهلا بيهم وليدي نتشرف بنسبهم الطيب
بس حچتها رگعت خديجة الهلاهل
گامت بتول الغرفتها تركض عفتهم يضحكون ولحگتها طبيت شو هاي دافنة راسها بالفراش وتبچي
- يااا شنو السالفة على شنو هالبچي مو اجة وخطبچ
- رفعت راسها تمسح بالدموع
ولچ طيبة ممصدگة عبالي تخلى عني شلون هيچ فجأة تقدم والله راح اتخبل گلبي ما احس بي بعد
- حضنتها اضحك
يعمري انتِ ليش اكو واحد يگدر يتخلى عنچ
الله يتمم الكم على خير ويسعدكم لأن تستاهلون بعض
مرت الأيام والهدوء قاتل بيني وبين همام
لا هو تقدم خطوة ولا اني الـ تنازلت وحچيت ويا
حتى علاقتنا صار بيها نوع من الفتور والتوتر منحچي غير بالمناسبات ومنلتقي غير بس ع الأكل
مخلد دز أهلة طلبوا بتول رسمي
الحمد لله واخيراً صارت شغلة بـ هالبيت تسر الگلب من بعد كل المشاكل الراحت ورجعت بتول تضحك من گلبها
طول الموضوع بالشهر تقريباً بين المشية والتجهيزات
صار يوم العقد
اجوي اقاربهم ظلوا يم الحجية واني رحت ويا خديجة وبتول للصالون لأن هيَّ اصرت تاخذني وياهم
بدوا يشتغلون بيها واني عيوني تتنقل بيناتهم
العروسات وحده احلى من الثانية ابتسمت بحزن صح الموضوع بسيط بس والله حلو البنية لمن تعيش مثل هاليوم والظاهر اني ممكتوبلي اعيشة
- فزيت على صوت خديجة تسأل وين صافنة بطة
- ها لا عمة هيچ اباوع عليهم
- شنو رأيچ اسويلچ بعض التعديلات حتى نحرگ گلبة
- منو هوَ ؟!!
- همام منو يعني قابل اكو غيره
- فتحت عيني عليها لا يربي هاي شلون عرفت السالفة
- هههههه اي اعرف شعبالچ لعد
- ياا اني حچيت بگلبي شلون سمعتي والله دتخوفيني
- هههههه لتخافين بس لتنسين اني مربيتچ على إيدي
- شلون عرفتي عمة
- غير حتى الجيران سمعوچ يوم التعاركتي ويا
تصيحين انتَ مو عمي
احنة هم سكتنا منريد نخجلچ بس بيني وبينچ سباعية
- نزلت راسي فشلانة شلون بية انشريت ع الحبل ربي
- لتخجلين حبيبتي
اصلاً يوم المنى تصيرين مرت همام ليش يحصل مثلچ
- لا عمة اني غلطت واستعجلت من حچيت ويا
- بالعكس ولچ
هو شايفچ مراهقة واي تصرف تتصرفي طيش ويجي يوم تغيرين رأيچ بـ هالحب الدتعيشي
بس بعد ما تجرأتي واعترفتي بوجهة علني
راح يظل يلف ويدور ويا نفسي ويفكر بيچ غصباً علي
- شنو الفائدة يفكر وبعدين
ميتغير شي راح اظل بنظرة ذيچ طيبة الأجتكم طفلة
- اي طبعاً يا عمة يشوفچ طفلة انتِ وگصيبتچ هاي
- شنو يعني
- يعني هو ديشوفچ طفلة گدامة لأن انتِ فعلاً بعدچ طفلة ما غيرتي من نفسچ شي
رتبي عدلي لبسي تمكيجي غيري شعرچ حفي بشرتچ
ادري شلون تردي يحس بـ أنوثتچ وانتِ دافنتها ميصير يا أمي دفكري
- واني شلون اسوي كل هذا استحي والله
- عشتو تستحي
حچتها وگامت لأم الصالون مدري شگالت الها ورجعت
- شوفي بطة اني راح اروح ما اطول ساعه وارجع
فد شوية تصيحچ أم الصالون
شتسوي وياچ لتعترضين وإلا والله ما اساعدچ لا وبعد ازوج همام وگدام عينچ فـ صيري حبابة احسن
- شنو هاي ليش هيچ تحچين ؟!!
- حتى تنفذين الكلام عدل امشي وراية تربحين بطـة
سلمت عليهم وطلعت ما ادري وين
صدگ شوية وصاحتني گمت اشرتلي ع الغرفة شوفي ذاك الباب ادخلي بي بين ما ادزلچ البنات عيني
ما ادري على شنو ناويات
بدون ما اناقش دخلت للغرفة ماكو ثواني وطبن اثنين بنات وراية سألتهن شكو گالن نريد ننظف جسمچ
عزززة اجيت انجلط من الصدمة
بالبداية رفضت بعدين قنعني مو كل الجسم يسوونـة
بدن يشتغلن ويضحكن علية لأن خجلانة
اصلاً شعري خفيف كلش ويميل للشگار ممبين حتى ما شلع گلبهن نص ساعة كملن كل شي وبدن بوجهي
حفنلي وگالي يلا نطلع حتى نبلش مكياج
أول ما فتحت الباب صارت بتول بوجهي فدوة طالعة تجنن عبالك لعابة
طلبت أم الصالون من البنات ياخذن بتول يساعدنها
وراها صاحتني
گعدت ع الكرسي خجلانة بدت تشتغل بية يربي هسة اني شورطني وحچيت الخديجة يبوووو
بعدها تشتغلي دخلت خديجة تسألها ها كل شي تمام
جاوبتها مثل ما طلبتي
ظليت مغمضة وفكري كله يم اليوم الأعترفت الـ همام بي لحد ما گالتلي يلا خلصنا بالعافية حبيبتي
رفعت عيني بالمرايا عزززة هاي منو ؟!!
ضحكت المرة
ظليت اباوع اني نفسي ما عرفت نفسي شنو السالفـة
التفتت على خديجة جرتها صلوات
بـ هالأثناء طلعت بتول وحدة صفنت ع الثانية
حقنا غير أول مرة نلعب بخلقتنا هالشكل تقربت تهمس هاي شنو بطة اليوم ناوية على عمي الله يعينة
- ههههههه لا والله الله يعين مخلد المسكين
- اسكتي گلبي راح يوگف معقولة يطب علية واني هيچ
ردت اجاوبها سحبتني خديجة
طلعت من العلاگة بدلة وحذاء هاي اشتريتهن الچ هسة فوتي بدل ع السريع بين ما اخابر همام يجينا
اخذت البدلة منها فتحتها حتى اشوفها چان انصدم
لا عمة فدوة وين اگدر البس هيچ
دشوفي فتحت صدرها وطولها لا هاچ والله ما اريدها
- تفوتين تلبسيها لا اراويچ الوجه الثاني
- عمة
- طيبة فضيني وبلا عناد هوَ عرس شتلبسين لعد جبة
اخذتها ورحت للغرفة لبستها والله فضيحة شنو هاي
طلعت تلگتني بتول بالهلاهل
باوعتلها اضحك ولچ طالعة حالچ من حالي صدقة لله
راحت خديجة حاسبت أم الصالون حسابين
يعني مشتغلتني شغل عروس
شوية ورمش همام شمرنا الربطات على وجهنا ولبستنا خديجة العبي طلعت شو هذا مو همام
- التفتت عليها عمة هذا منو ؟!!
- دزة همام لأن مشغول بنواقص العقد مگدر يجي علينا
وصلنا للبيت تلگنا النسوان بالهلاهل
مشايفاتني فـ كل دقيقة وحدة منهن تسأل منو هالبنية
اصالة بت خالت بتول اخذتها للغرفة
نزعتها العباية ورتبها ورجعت للصالة گعدت يم النسوان
إلا اني ظليت متربطة استحي انزع مو بـ إيدي
- شوية وفرغتلي خديجة
صدگ چذب المن متچفنة ذبي العباية الخاطر الأسلام
- استحي والله
- اصالة
- چانت يم بتول عافتها واجت تركض نعم خالة گولي
- حبيبتي وزعي للمعازيم انتِ وصديقاتچ
اكيد تعرفين الطريقة
بس بين ما اساعد مرت أخوية بتجهيز نفسها واجيكم
- هيَّ هاي مرت همام
- اي
- يا عيني ما شاء الله كلش حلوة تجنن
- ابتسمت الها بـ هدوء شكراً حبيبتي عيونچ الـ حلوة
رجعت خديجة توصيها وصعدنا الغرفتي
شو هاي بس دخلنا صاحت هسة راجعتلچ وركضت ما ادري وين شوية واجتني بـ إيدها ملابس همام هاي شنو
- ملابس همام
- ادري ملابسه بس ليش جايبتهن لـ هنا ؟!!
- طيبة فتحي مخچ وامشي وراية متخسرين وكرامتچ محفوظة كل شي طبيعي مراح يحس بشي
- شلون يعني
- يعني ظل واگفة هنا بـ مكانچ وهوَ راح يجيچ برجلي
حچتها ونزعتني الحجاب ترتب بالتسريحة
باوعتلي وصلت ع النبي
التفتت للمرايا ورجعت باوعتلها هسة شنو عمة فهميني
- ظلي هنا لتطلعين منا لما اني اصيحلچ
- اريد احضر العقد يمعودة
- راح تحضري وتشبعين هسة اكو شي أهم من كل هذا
حچتها وطلعت من الغرفة سدت الباب وراها
التفتت ع المرايا
اباوع الـ نفسي متعجبة هاي منو والله ما اصدگ اني
شلوون هيچ المكياج غيرني
لا الحفافة هم شنو نسيتي بعدني داحچي ويا روحي انفتحت الباب التفتت عززززة هذا همام
همام.. انخبصت بتجهيزات العقد عبالك اني العريس
من الظهر للأربعة ونص يلا كملت
رجعت للبيت اسبح وابدل حتى اروح المخلد ما گدرت ادخل من النسوان خابرت خديجة سوتلي طريق
- توني طاب لزمتني بباب المطبخ اصعد الغرفة طيبة
- ليش ؟!!
- قفلت غرفتك تدري بعد البيت هوسة
وغراضك هواي خفت ليصير شي وهمَ هناك اكو حمام داخلي تگدر تسبح على راحتك وملابسك ع الچرباية
- اي زين سويتي بس الغرفة فارغة خو ميصعدن هناك
- لا لا محد اكو حتى طيبة هسة شفتها بالصالة
بس حچتها صعدت ركض
فتحت الباب هاي شنو شجاب البنية هنا مو گالت ماكو احد درت وجهي ع السريع اسف خوية اعتذر
طيبة.. هنا يلا استوعبت خطة خديجة
بس والله ضحكت من ما عرفني ولو هوَ مركز باوعلي خطف ودار وجهة ادري بي كلش يستحرم
حبيت العبها صح
هوَ اجة برجلة والغرفتي مثل مگالت خديجة قابل اني رحتلة فـ هنا كرامتي محفوظة ونشوف شيسوي
- همام
- طيبة انتِ هنا ؟!!
- اي شبيك طب ليش واگف بالباب
- والبنية
- ها لا مو راحت للحمام هسة بس تطب تلبس عبايتها وتطلع تعال اصلاً هيَّ مو غريبة تصير اقاربكم
- بس حچيتها التفت ديطب انصدم بـ منظري
- طيبة ؟!!
- اي
- فتح عينة مصدوم ونظراتة حچت الما حچى لسانه
- ها شبيك ادخل شنو ردت وليش اجيت الـ غرفتي
- شتت نظرة يباوع منا ومنا خديجة گالت ملابسي هنا
- هاا اي صح هم گالتلي نسيت
اكو بالحمام وذني مال الطلعة على الچرباية ومكويات
دخل وسد الباب فات من يمي ميباوع ها غير اني مثل بت أخوك ليش لعد دتتهرب مني ؟!!
يلا اجيت الـ ملعبي استلم الراح يصيرلك طلعت شغل من جوة الگاع بين ميكمل سبح شوية وطلع ينشف
- بس شافني انصدم عبالة رحت نعيماً
- شكراً ليش ما نزلتي
- غرفتي هاي خاف نسيت عموماً عندي شغل ومنتظرتك تطلع حتى اكملة استعجل شوية
شو هذا طول ما اني احچي صافن ب؟ وجهي
رفعت حاجبي احس بـ انتصار مو طبيعي مباشرتاً اندار عني للمرايا ينشف بشعره
- تتأخر
- لا هسة بس ابدل اطلع مخلد ينتظرني
- تمام اني رايحة للحمام حاول تستعجل شوية واجيك
حچيتها ومشيت
هوَ واگف بنص الطريق فتت من يمه طخيت بي بقصد گبل غمض عيونة مني وهمس همس
- اشتعلت روحچ بس لو اعرف شدتسوين چان ارتاح
- صح حچاها بصوت ناصي بس سمعتة
دخلت للحمام حسبت للعشرين
ادري بي راح يشرد فـ لازم اطلع قبلة وياريتني مطلعت
لابس بنطرون بيج وقميص زيتوني
گلبي راح من شفتة شلون يربي هيچ ينزل گدامهن غير ياكلنة أكل اعرفهن
- باوعتلة من فوگ ليجوة ليش هالشكل لبسك محلو
- ليش شبي
- محلو والله ما لايگ عليك غيرهن نصيحة
- عادي قابل اني العريس وادور كشخة
- واذا هسة لو نزلت گدام النسوان وشافنك مبهذل أول مراح يگولن مرتة مبهذلة مو صح
- صح بس طيبة مو الـ هالدرجة اللبس ما بي شي
- انتظر فد لحظة
رحت اركض الغرفتة
فتحت الكنتور سحبت قميص أسود انتبهت النفسي
شنو السالفة ولچ مو الـ هالدرجـة راح تفضحين روحچ
اخذت ماروني مقفل ورجعت الة
هاك البس
ما حچة شـي اخذهن وراح للحمام شوية وطلع مغيره صح بعدة حلو بس ارحم بـ هواي من الزيتوني
انتبهت للياخة عوجة
خطية الظاهر ما مباوع الروحة بالمرايا
تقربت منه رفعت نفسي وعدلتها صار وجهة بـ رگبتي حسيت اوضاعة تخربطت بسرعة ابتعد عني يگح
- اتركي اني اسويها
- براحتك
- عدلها على السريع والتفت للمرايا سويلي طريق انزل
نزلت قبلة انطيتهن خبر واشرتلة
طول ما هوَ يمشي يباوعلة فضول النسوان بعد تعلمت علي بس مع ذلك ضجت كلش اغار علي شسوي
خلصت الحفلة على خير
وفرحة بتول ومخلد متنوصف بهذا اليوم
بس طلعن النسوان سألتني خديجة حچيتلها كل الصار
- عفية عليچ الخطة ماشية مية مية
- يعني
- يعني ابشرچ ي اللبوة الاسد بلش يوگع بـ شباكچ
- والله ما ادري
- خليچ قريبة منه ما اگولچ ذبي روحچ بس لتبتعدين عنه تصرفي طبيعي مثل قبل بطة
- ان شاء الله
- ظلي بملابسچ لتبدلين بلكي يجي متلحلح
- باوعتلها مبتسمة مدري وين راح توصل نصبر ونشوف
لليل گاعدة انتظرة بحجة عشى زايدة ناقصة ما اجة
للوحدة ما راجع
تعبت كلش سبحت ونمت على وجهي شسويلة واذا ما اجة شنو قابل اظل انتظرة للفجر
فزيت الصبح على صوت المنبه
رحت كالعادة اگعدة بالگوة حس رفع راسة باوعلي شو مدري نظراتة شلونها هزيت بـ راسي خير شكو
- جهزلي الملابس
- اي ميخالف بس عفية لترجع تنام
حچيتها ورحت وديت ملابسة ونزلت سويتلة الريوگ
اجة يتريگ ظليت يمه مثل ما وصتني خديجة
دياكل حچاها منصي شمسوية بوجهچ
المرايا گدامي باوعت الـ نفسي مستغربة ليش شنو بية
- ما ادري بس قبل چنتِ احلى بهواي
- بالعكس هسة يلا صرت مرة
قبل چنت طفلة وحسب مفهمت من كلامك انتَ تريدلك مرة مو طفلة لذلك اعترضت وزعلت من كلامي
بس حچيتها ذب اللگمة من إيدة وخزرني
راد يحچي تراجع
گام سحب السويچ وطلع يومين وهوَ مثگل علية كلش
اچذب لو اگول مهتميت بس هيچ احسن
ثالث يوم بدا الدوام بالجامعة گعدنا اني وبتول الصبح نجهز روحنا بـ فرحة
نسقنا الملابس والحجاب وحطينا مكياج خفيف كلش
رحت اسوي الريوگ وبتول صعدت تگعده
توني گاعدة ع الميز دخل بس شافني گدامة الوجه تغير
- هاي شمسويات بوجهچن من الصباحيات
بتول.. شبينا عمو
مو هسة صعدت گعدتك شو ما اعترضت على شكلي
- منتبهت توني گاعد من النوم
شنو رايحات تدرسن لو تستعرضن غسلنا يلا ع السريع
بتول.. بس عمو والله ما بي....
همام.. قاطعها بنترة لتناقشيني بتوووول
فوتن غسلن ع السريع وخلينا نطلع راح نتأخر بسببچن
طيبة.. گمت من يمة روحي طالعة
صارلنا ساعة نعدل بروحنا تالي بـ لحظة خرب كل شي
غسلت وجهي ورجعت
چان گاعد ع الميز گعدت گبالة رفع حاجبة شو ضايجة
- لا مضايجة
- دگومي شوفي وجهچ بالمرايا بعدين عود جاوبيني
- ميحتاج توني غسلت وشفتة يلا اكل الچاي راح يبرد
تريگنا ع السريع وطلعنا
وصلنا الداخل الكلية يلا راح لأن أول يوم وكل شي ما نندل بيها وألف مرة وصانة بسبب الشباب
ما فرحت ابد بدوامي بالعكس استغربت لأن وحدي
نص الدوام تعرفت على بنات اثنين
يعني گدرت شوية اتألف وياهن لحد ما خلصت اليوم
گعدت بالحديقة انتظر شوية واجتني بتول
- ها خلصتي
- اي وانتِ ترى كلش تعب
- اني هم خلصت بس لازم ننتظر عمو ساعة يلا يجينا
- اهووو والله هواي
- صار عنده شغل بس يلا عادي هسة تجي اصالة نلتهي وياها بس ميجي حتى اذا تردين اعزمكم
- ليش هيَّ ويانا بالجامعة
- اي مرحلة ثانية والبارحة اتصلت گالت اريد اشوفچ ما حبيت افشلها واغلس گلتلها على فراغي نتشاوف
- اي شكو بيها هيچ هيچ احنة مجبورين ننتظر اليوم
- اتصلت بيها وتواعدن
ظلينا ننتظر بالحديقة
الشمس كلش قوية مترحم لبست مناظري ورحت جوة الشجرة هناك في راسي أذاني من الحر
شوية واجت بت خالة بتول وياها صديقتها
هم لابسات مناظر شمسية
ديمشن بـ اتجاهنا دگ موبايل صديقة اصالة دارت وجها تحچي عافتها واجت تسلم علينا ها شلونچن
بتول.. وينچ تأخرتي كلش
اصالة.. صديقتي اخرتني اعتذر ومعزومات على حسابي هم اعتذار وهم بمناسبة أول يوم دوام الكم
- ههههههه قبول عمي قبول غير راح اموت من الجوع
- ههههههه اسم الله عليچ بس خل تجي صديقتي
نهت البنية الأتصال وتوجهت علينا
باوعتلها دتأشر من بعيد عزززززة بس لا تطلع مصادقة وراح تجيبة حتى تعرفة علينا صخام اي والله
التفتت اشوفها المن تأشر ويا ربي ع الشي الصار گدامي
گلبي وجعني عقلي قفل النبض صعد الراسي
حتى رجلي ما عدت تحملني اجيت اوگع لو ما لزمت بالشجرة معقولة هذا صالح واگف گدامي بعد هالسنين يا الهي ساعدني اعدي هاللحظة على خير....
يتبع
لتنسووون ⭐⭐⭐⭐⭐⭐
كل الحب ❤🥀