مساء الورد احبتي ❤
/// البارت السادس وتسعـــون /////
#بيوت_بلا_جدران
#شمس_السعدي
----------------------------------------------
ماتت ضحكة ايامي
وچفن حسرات لف روحي ولياليهة
والفرحة خذاها الروج بكتارة
وصل شاطي الضياع وغرگ صاريهة ..
----------------------------------------------
ألم يعتصر قلبي
قلبي ذاك الصغير الذي ما عاد يحتمل
فألم يعصره وألم يعتصره
فضاعت حروفي بين عصره وعصره
ياللقلب المسكين مهجور
ولا يسمع سوى صدى الأنين
أصرخ من قحف الرأس
فما يجيبني بشر
وسماء حالكة السمرة يتيمة القمر
ورياح عنيفة اقتلعت جذور الشجر
تتقاطر عبراتي
وتعلو أهاتي
لتنسج بخيوط الألم لوحة بدمعاتي ..
صحيت على صوته ولمساته
فتحت عيني شفته فزيت وابتعدت بالگوة جسمي مايعيني على الحركة لفلفت روحي بساع ..
هو جان يهديني ..
" اشششش لاتخافين مني اني احبج والله ماردت تصيرين الغيري والسويته مو بيدي غصب عني "
صحت بي..
" وخر عني حيوان لو اموت مااصير الك ولك اني عرضك شلون تسوي بيه هيج شلون "
جان يباوع عليه ..
" ماادري شلون سويت هيج بيج ماادري بس انتي صوجج لو مخليتني ماجان ضربتج واذيتج "
صحت ..
" ولك اني على ذمة غيرك ياحقير شلون هيج تسوي "
صاح بيه ..
" لا تگولين هيج انتي الي افتهمتي وهذا درس الج علمود ماتختارين غيري واذا عاندتي اكتله سمعتي اكتله والله وانتي شفتي من ردت اخذج كتلت وماوكف بوجهي واحد .. بس هسا غصب عنج وعنهم تصيرين الي وهو اصلا مايريدج بعد شيسوي بوحدة نام وياها واحد ثاني "
گمت اصرخ بلا وعي ..
" كافي ولك كافي الله يموتك الله ياخذك الله لايرحمك ياحيوان السويته بيه يصير ببعرضك ان شاء الله "
اجه راد يتقربلي ..
كمت اصرخ وادفع بي .. .
رجع ضربني وبعدين حضني اختنگت تمنيت الموت ساعتها ..
همس ..
" كافي لاتخليتي اذيج بعد هسا راح امشي هاي اكل يمج وماي اروح اجيبلج هدوم واشوف الوضع وبعدين ارجعج الهم .. بس ماتگولين اني الخطفتج افتهمتي علمود اخذج واستر عليج .. واذا گلتي اكتله الهذا الاخذج مني .. والله اكتله "
تفيت عليه ..
" لو اموت مااخذك افتهمت لو اموت "
احس روحي بادت وماعندي قوة بعد للحجي ..
تلفونه مابطل دگ ..
گام مني يدور عليه ..
غمضت عيوني ماردت اشوف شكله المشمئز ..
صاح..
" ها عمة هااا شبيج خبصتيني .. اي كلشي صار وهسا جاي اني علمود مااخليهم يشكون .. وهي تبقى هنا اقفل عليها باجر ارجعها "
كمل وحجة ..
" اني رايح دير بالج تسوين شي محد يسمعج ولحد يوصلج هنا افتهمتي "
طلع وقفل الباب لملمت روحي وتغطيت رغم الحر حسيت ببرد ..
جسمي كله يوجعني .. ماافكر غير بس بالموت ردت اموت بأي طريقه ..
مااكلت ولا شربت رغم بقيت يومين بهذا المكان ردت اموت وارتاح .. الماي يمي وعطشانه واكابر .. الى ان جسمي ضعف بعد مايتحمل ..
صرت اغفى وافتح شوية وارجع اغفى
ومااعرف شلون مر الوكت ..
ماحسيت الا وهو يگعدني ..
" گومي حبيبتي جبتلج هدوم البسي علمود نمشي"
شوية وصارت هوسة وطلق عافني وطلع بساع جنت بعالم ثاني بس بداخلي ادعي كون يكتلوه وارتاح ..
هدأ الطلق شوية جنت بس اسمع مااگدر اتحرك.
اندفرت الباب فزيت ..
صارت عيني بعين بابا حسيت بأماني اجه.. نزلت دموعي ودموعه بنفس الوكت ..
طلع ورجع جنت الملم بروحي مستحية همس..
" اني سترج بابا لاتخافين "
لفني وشالني غفيت بحضنه مطمأنه وبداخلي الف جرح وجرح ينزف ..
جنت اسمع شهگاته وضربات گلبه ..
بداخلي اگله ..
" خلص بابا ماستك ماتت كتلوها دمروها .. اعلن الحداد عليها واخذ عزاها "
اخذوني للمستشفى وفحصتني الدكتورة وتحجي وياي واني بعالم ثاني ..
كل السمعته انه گالت للممرضة الوياها ودكتورة ثانية همزين غشائها مطاطي مامتأثر ..
مافهمت شيقصدن بس اذاني كلامها من تگلها اهلها فضحوها والشرطة تارسة المستشفى لو ساكتين احسن
بعد منو ياخذها ..
همست الثانية ..
" لابسة حلقه مخطوبة يمكن "
ردت عليها. .
" وتتوقعين خطيبها يقبل ياخذها بعد وان مافاض بكارتها بس اسمه لمسها ماكو رجال يقبلها على روحه "
ساعتها حسيت سجينة وطعنت گلبي بحجيها ..
جنت ابجي واگله بابا طلعني منا مااريد ابقى رغم انطوني علاجات وضربوني ابر ووصت ابقى بس مابقيت ..
ردت انهزم من العالم كله واولهم ميراد .. ماخليت عيني بعينه ولا شفته ..
ماردته يشوفني بهيج حالة ..
جابتلي الممرضة منها ملابس بدلت واخذني بابا ورجعنا للبيت .. الم جسمي كله لاشئ من الم روحي وگلبي ..
بودي مااشوف احد ولا احد يشوفني .. احس بالخجل رغم مالي ذنب ..
نمت بحضن جدتي وابجي وهي تهون عليه من غير ماتسألني شي حتى سبح هي سبحتني بيدها من شافت جسمي انصدمت بس مابينت بس جنت احس بدموعها تنزل ودعواتها التهمس بيهن ..
امي مكابله الحمام وواكفه ..
صارت بوجهي لفت راسي بالخاولي وباستني ..
كلها جانت بالهول دنگت ورحت للغرفة ..
گلتلها جدة لاتخليهم يجون مااريد اشوف احد ..
بس أمي تجي تبوسني وتسأل جدتي .. ماحجتلج شي ..
وجدتي تگلها ..
" دير بالج تسأليها لازم نخليها تنسى مانذكرها "
بداخلي اگلها ..
" شينسيني جدة .. شلون انسى واحد جان يتفنن بجسمي بشتى انواع العذاب .. كأنه حيوان جوعان وانطوه فريسة .. بس لو ميتة ومرتاحة اهون الي من كل لحظة اتذكر واتعذب "
من جنت هناك ماجنت بوعي او من الخوف والصدمة ماافكر بس هسا بعد مااسترجع كلشي اتدمر واتمنى الموت الف مرة ..
افز من نومي وابجي واصرخ وارجع اغفى بحضن جدتي بعد ما تقرا على راسي ..
وبكل صرخة احس اهلي بالباب يردون يدخلون ومايگدرون ..
جنت رافضة اشوف اي احد ولا حتى امي .. عمتي دمعة الاحبها ماردت اشوفها ..
اما ميراد جان يستغل جدتي تطلع ويگعد بباب الغرفة
يحجي وياي ..
" ماستي لاتعذبيني والله الا اخذ حقج وحقي منه والله الا اعذبه بيدي الا اخليه يتمنى الموت ومايطوله بس لاتحرميني من شوفتج خليني اشوفج اني حبيبج ميراد مو تگليلي بلياك مااعيش .. ومااتحمل بعدك ليش ماتخليني اشوفج "
هو مايدري بحجيه هذا يدمرني اكثر ..
ماستك خلص تلوثت ماتفيدك ..
ماجنت ارد عليه اكتفي بدموعي التحرگ خدي ..
مر كم يوم واني على حالي وجدتي يمنا ماعافتني ابد ..
رحمة..
مر كم يوم وبنتي اشوفها وكت ماتنام .. وردة وتذبل گبالي علي مايخليني ادخللها يگلي خليها تستوعب الوضع يله ..
تهسترت مااتحملت گمت ادك والطم ..
" ياوضع علي هي البي ينسى .. اني الحاسه بيها .. السواه هالنذل ببنتي سواه عمه بيه .. من شفتها رجعت ذاكرتي الگبل .. كلهم هيج حيوانات مو بشر بس الفرق ذاك جان متزوجني مو مثل هذا النذل الله ياخذه ان شاء الله.. "
حضني ويهدي بيه ..
گعدت ابجي ..
" علي شينسيها .. وشلون بيها شلون راح تعيش ماسة ماتتحمل تموت والله .. وماعرفنا شي ولا شسوالها "
رد ..
" هذا التقرير عندي بس ماأسأل ولا اريد اعرف لان بنتي طاهرة وراح تبقى طاهرة بنظري هالنگس مالوث برائتها وراح اضل وراه لين الزمه بيدي .. هذا وعد مااخلي عيني بعين بنتي ولا اشوفها الا لمن الزمه واخذلها حقها "
سألته ..
" وميراد ؟"
رد ..
" شبي ميراد .. الولد لسا واگف وياها ويريد يشوفها بس اذا بيوم تخلى عنها بكيفه مانجبره .. معناتها مايستاهلها وبوكت الشدة المعادن تبين "
اتنهدت ..
" انت تعرف مجتمعنا مايرحم وخاصه بعد ما الشارع كله عرف وصار يؤل حجي بكيفه "
رد. .
" الحجو والماحجو مايهمني بنتي ضحية واليحجي عليها الله قبيله .. ولو اعرف اخذها الاخر الدنيا المهم ماتتأذى هي .. "
بقينا اثنينا نبجي وواحد يواسي الثاني .. يتذكر طفولتها كل يوم ويطلع صورها بزواجنا من جانت صغيرة وفرحانة وتضحك .. اخذوا حتى ابتسامتها الحلوة المايرحمون ..
فاض صبري وبعد مااتحملت ..
طگ گلبي عليها اريد اشوفها وعلي مايخلينا نضغط عليها ..
بس من تنام اروح اعاين عليها وامي يمنا ماتخليني اگعدها ..
اخوتي والبنات كل يوم يجون ويرحون مايشوفوها ..
استغليت علي ماهو هو اصلا هالفترة ماخذ اجازة ومخلصها بين المحكمة والدعوة وبين السلف يم فيصل مراقبين البيت بلكي يجي مرة ثانية ..
عمتي وامي يتريگن بالمطبخ عفتهن ورحت للغرفة اتسحبت ..
مفتحة عيونها على الشباك وصافنه بعالم ثاني ..
دنگت عليها وبستها وحضنتها ..
" مشتاقتلج يبعد امج ..
درت وجهي وحضنتها لفتني بحضنها مثل صغري وتگلي صيري قوية مثل امج وجدتج لاتضعفين اكثر وحدة تعرف الصارلنا انتي تعلمتي هواي منا لاتخلين الضعف يسيطر عليج كلنا يمج ومانعوفج ابد ..
همست ..
" عمتي زهرة تعرف كلشي "
سكتت ..
" شني شگلتي ؟ زهرة شبيها "
ردت ..
" تدري بي راح يسوي هيج "
طفرت من مكاني ..
" شمدريج ؟"
ردت ..
" سمعته يحجي وياها "
رديت
" والله الا اندمها احنه ندور ومخبوصين وهي تسوي روحها ماتدري وشمدرينا ماهي الحرضته "
عفتها وطلعت ..
رحت للغرفة متسودنه مااعرف شسوي ؟
طلعت خابرت البيت اهلي گلت البراء تدزلي وطن بساع
سألت امي ..
" شتردين من وطن يمكن بالمحل بمكان رضوان متعرفيهم يرحون للسلف .. "
رديت ..
" زهرة الملعونه هي السبب طلعت تدري بموسى خاطفها ومن خابر فيصل تگله نايم هنا تسترله "
ردت امي ..
" عوفيها نحجي الفيصل وهو يتصرف "
رديت ..
" شيسوي فيصل يمد ايديه على عمته ؟ جبتها عمر اني متحمله ربحة وال ربحة بس من توصل البنتي مااسكت الصارلها ماينسكت عنه يمه "
ردت ..
" خابري رجلج وگليله "
رديت ..
" وينه رجلي الضيم كاتله يطلع الصبح يجي بالليل "
اجو حسين ووطن اخذتهم ورحت وامي تحجي وعمتي تگلها خليها لو بيه حيل اني مشيت ووكتلتها وياها ..
جنت مااشوف بعيوني اول مرة اطلع من دون علم علي بس جنت متسودنه واحس الدنيا ظلمة بعيني مااشوف..
رحت للسلف اول مامشيت البيت فيصل ..
فتت صارت حمدية گبالي ..
شافتني حجت ..
" خابرتج شگد وماحجيتي وياي والله متت من سمعت هالولد تخبل من تالي ابوه سودنه وعمته "
رديت ..
" لاتحجين وتبررين عبنه نطفة نكسة كلشي يسوي وانتي ماعرفتي تربيه سلمتيه الزهرة تعجنه براحتها لمن خلته يخطف بنتي ويعتدي عليها "
شهگت ..
" يعني زهرة السبب ؟"
ردت منيرة ..
" والله عرفت هالسالف ماتخلى من زهرة هي الخلت ماسه براسه من زمان وتگله انت ابن عنها واحگ بيها "
رديت ..
" واني رايحة واعلمها الحگ شنو ؟"
ردت حمدية ..
" اوگفي اني ماشية وياج لان بسببها ضاع ابني وخرب بيتي "
ردت منيرة ..
" وين تردن هناك رحيم مايسكت وخاف يطگجن "
رديت ..
" زلمة ويوصلي .. عندي بدل الواحد اربع ازلام تعلمه الامهات شتجيب "
لبست حمدية ومشينا ..
رحنا من الجهة الثانية مو على جهة المضيف خاف يشوفونا ..
كسرنا الباب تكسر فتحتها هدوة ..
" ياستار شجابجن .. شني اشتاقيتن الشريجتن واجيتن تشوفنها .. "
دفعتها وفتت ..
صحت زهرة .. زهرة وينج اطلعي
طلعت متفاجأة ..
" شكو خير شو جاية هادودة "
سألتها ..
" مو حرام عليج ماخفتي السوتيه ببنتي يصير ببناتج ولج هاي بنتج اخوج شلون نطاج گلبج هيج تسوين "
ردت بصلافة ..
" واني شعليه عيني قابل اني الخطفتها لو ابن هاي اليمج المفروض تحاسبيها الها موش الي "
تعصبت حمدية ..
" يا شيطانه منهو اليوسوس براسه وخبله منهو الخله ماسة براسه وطمعه منهو الحرضة غيرج "
ردت ..
" ياااع تجيك التهايم وانت نايم روحن بابا شمرن عارجن على غيري وانتي المثلج تطمطم السالفه وتسكت مو تجي بوكاحة عين وتفضح روحها الاحسن تزوجوها موسى وتستروها "
اني سمعت حجيها تخبلت ..
دور گالت ..
" ربج مايطگ بحجار .. شفتي شلون كسرتيني انت واخوج .. لو انت كل يوم معرسة وتغيضين بيه وشايله خشمج عبن علي خذاج وسوالج اعتبار بعد ماجنتي خدامه هنا .. واخوج اخذ ذيج العاجر وفضلها عليه بعد ماجان خطيبي .. هاي حوبتي بيكم واصلا فرحانه ومتشمته مااجذب واكلج ضايجة "
مااتحملت ولاول مرة اسويها ..
اشرت الوطن وحسين يلزموها .. ولزمناها اني وحمدية شبعتها كتل شما اضرب بيها واعظ احس روحي مامكتفية ..
بودي احرگها ..
هي خبصتنا بالصياح وهدوة دزت ابنها ..
شوية ودخل رحيم ..
فاككنا ..
" شعندجن هنا وليش تطگنها "
رديت ..
" شفت عار مثلك ماشفت.. السواه ابنك بنت اخوك عار عليك وعلى اختك الحرضته "
عاين عليها ..
" صدگ حرضتيه انتي ؟"
دخلت عمتي سمرة جانت بالسوگ .
" زهرة انتي ورى هالسالفة "
رديت ..
" اذا انت رجال صدگ ولو اشك .. تسلم ابنك "
صاح بيه ورفع ايديه ..
" اني رجال غصب عنج "
صاح بي صوت ردلي روحي ..
" رحيم احترم روحك وايدك اكسرها لو نمدت عليها "
التفتت شفتهم دخلوا ..
علي وفيصل ورضوان وخوالي ..
هنا حسيت بالامان ..
حسين رايح صايحهم من شايف رحيم جاي خاف عليه ووطن حبيبي جان واكف بيني وبين رحيم خاف يسويلي شي ..
رد رحيم..
" لم مرتك واخذها علي لاتخليني اتصرف غير تصرف "
رديت ..
" الماتعرفوه انه زهرة طلعت هي المحرضه موسى ماسة سامعتها وهي تخابر بي وتسأله شسوة "
ردت..
" جذب والله مالي دخل اني بس كلتله رجعها ترى يدورون عليك "
رد فيصل ..
" تعلميني بيج ؟ اصلا انتي ملاك طاهر .. لسا موت ابوي بگلبي وساكت وهالسالفه كملت السوتيه ماكفاج كتلتيه باللبن هسا تحرضين على الخطف والاغتصاب"
وگعت عمتي سمرة من طولها ..
" ولج كل هذا يطلع منج يزهيرة "
رد علي ..
" البسي وتعاي ويانا "
رد رحيم ..
" وين تاخذوها ماتطلع من البيت "
رد علي ..
" بكيفك خليها بالبيت وعود الشرطة تاخذها للسجن احسن بتهمة التحريض وساعتها ماتگدر تحجي "
رد فيصل ..
" لا تخاف اخذها عندي احجزها وعود من يرجع ابنك ارجعها .. هااا اوصيك عمي عود حذره .. اصلا عمامنا كلها ماتريدكم بالسلف بعد والناس مكاومتكم وتطالبكم بثار يعني لو يشرد العمر كله مصيره ياينسجن ياينكتل"
حمدية كامت تبجي عليه وتدعي على رحيم وزهرة الضيعوه ..
مارضت تمشي اخذوها بالگوة ولا امها ولا رحيم الحجوا بعد ماالكل صار ضدهم وماعندهم مكان يرحوله ..
حبسها بالغرفة فيصل وقفل عليها وگالها منا لمن تگليلنا مكان موسى وين يله تطلعين ..
اخذ موبايلها لگوا عندها خطوط مامعروفه شني ..
شگد عشت وشفت خبث وحقد عند ال ربحة بس ماشفت هيج مكر وتخطيط بس عند ربحة نفسها
ساعتها انهاريت مااتحملت واني الطعنه اجتني من القريب مو الغريب ..
بنتي تحطمت بسبب حقد وغيرة مالها داعي ..
جانت نفسها برضوان وهي اصلا تزوجت وشافت حياتها وتلومني على زواجتين وحدة مجبورة عليها ومارايدتها تعاقب بنتي بدون ذنب بس حتى يصيب بنتي الصابني من العذاب ..
گعد علي يواسي بيه ..
" ليش اجيتي لهنا ؟"
رديت ..
" مو بيدي مااتحملت واني اعرف بنت عمي وعمة بنتي هي السبب "
اتنهدت ..
" اروح فدوة القوتج .. وزين سويتي وفوختي گلبي بيها جنت اتمنى اني الزمها واشبعها اكتل بس مو طبعي امد ايدي على مرة .. قهري اطلعه بعدين بذاك النذل "
اخذوني ورجعنا البيتنا وحجالهن رضوان وعلي ودمعة وبراء يگولن لو ماخذتنا وياج .
بس شمااسوي مااگدر انسي بنتي ذرة من الصارلها ولا اگدر اخليها تنسى ..
ميراد جان يفتر وي زلام فيصل من مكان المكان يريد بس يلگاله اثر ..
النار مشتعلة بداخله اكثر منا كلنا ..
حالة ماسة ماعجبتني ذبلت بساع .. ردت اخذها الدكتورة تشوفها بس علي ماقبل گال تأثر على نفسيتها خلي تمر فترة يله ..
خوالي يرحون ويرجعون واخر شي جابوا نسوانهم ..
جرحتني ام ميراد من گالتلي ..
" ماتزعلي بس انا مابجوز ابني الوحدة معيوبة "
بقيت صافنة عليها وماعرفت شرد عفتها وگمت مرت خالي عدنان صارت تحجي عليها وعمتي ماسكتت ..
گالتلها ..
" شني معيوبة عيب هالحجي البنية شعليها وبعدين لاتدخلين روحج بينهم ابنج لو يريد عافها مو يركض ورى ذاك النذل من مجان المجان "
ردت ..
" شي طبيعي يركض وراه ماهو من قهرو ابني واعرفو مايرتاح الا وياخذ حقو منو ساعتها يوعى ويفكر "
ردت امي ..
" ميراد مثل ابوه مايخلف وعده .. خليه هو ياخذ قرارة وان ماراد مانجبره هم حقه "
ردت ..
" واضح حجة تعرفي ابوه كثير منيح "
سكتت امي واني بالغرفه اسمع واطحن بنفسي .. مستحيل اخلي احد يذل بنتي ..
حجيت العلي گالي خليها تحجي وحدها ..
ميراد من اول يوم گلتله تريد افسخ مانزعل ولا نجبرك
زعل وگالي ..
" ماسة راح تضل مثل ماهي بگلبي وماراح يأثر الصار علينا بس بعد ماالزم ذاك النذل واحاسبه واخذلها حقها عود نحجي "
رديت ..
" اني ادري بي خوش ولد على خالي مهران .. بس يبقى اسمه رجال ومن يشوفها راح يتذكر وهي تتعذب راح تصير فجوة بينهم وخايفه تضل طول العمر "
رد ..
" مو كل رجال هيج تفكيره .. هيج شملتيني اني هم بعدين مستحيل ارضى الذل البنتي لو اشوفه متردد واحد بالمية اني اگله ماعندك مرة عندنا وارجعله المهر كله .."
حضنته..
اعتذر حبيبي بس ماسة شاله حالي اريد اموت والله
اتنهد ..
" جا اني العايش . تدرين كل يوم من اگعد خشمي ينزف وصغطي الگاه معلگ .. لان بداخلي حرگة كاتمها ومااگدر احجي "
جنا كل ليلة قبل لا ننام نتذكرها ونبجي وعلي مگابل صورها يگلي
رحمة مشتاقلها .. اشتاقيت لسوالفها وغيرتها من اخوانها عليه .. يمي وفرق غرفة بينا ومااگدر اوصلها واحجي وياها ..
اتنهدت ..
" گوم علي .. روحلها هي تحتاجك اكثر مني وتسمع كلامك گوم هون عليها وخليها تحس احنه وياها اني مااتحمل احجي وياها تخنگني العبرة ومااگدر "
گام ..
" تعاي بالاول شوفي امج خاف نايمة مااگدر افوت "
رحت للغرفة شفت امي گاعدة اشرتلها ..
" علي يريد يشوف ماسة .."
لفت فوطتها البيضة على راسها وگامت ..
عاينت عليه بالباب ..
" الله يجازيك كل خير "
دخل الها بقيت ورى الباب ماگدرت افوت ..
جان يمسد براسها ..
سمعته يحجي وياها ..
" باباتي ماستي ادري بيج تسمعيني .. ليش حارمتني من صوتج الحلو .. والله گلبي طاگ عليج وعلى سوالفج .. لاتحرميني من وجهج وصوتج يبعد ابوج انتي "
صارت تشهگ ..
" بابا روح بيا وجه اباوعلك .. اني خلص تدمرت اريد اموت بابا .. انكسرت ومااريد اعيش بعد "
فتحت الباب شوية مااتحملت من سمعت شهگاتها ..
جانت مغطية راسها وتحجي ..
دنگ عليها وباس راسها ..
" ولج بوية ماعاش اليكسرج واني عايش .. لاتضمين راسج ابد .. راسي مرفوع بيج دوم.. هو المفروض يضم راسه مو انتي .. وحگ الله الا اكسره ومااخليه يتهنى ولج ماخليت دعوة مافتحتها عليه وين يولي بعد باجر عگبة ينكمش .. "
تهسترت وضلت تصيح ..
" واذا انكمش .. لو انسجن .. اني شيرجعني شيرجع حياتي شينسيني الصار شلون امحي كلشي من عقلي ..
مااگدر انسى صوتي بأذني اسمعه دوم حجيه .. ضحكته .. شكله القذر مايروحن من بالي .. "
صارت تضرب براسها وتبجي ..
اريد انساه اريد انساه شلون فهموني ..
صرت ابجي ..
مااتحملت دخلت ..
يمه بنتي علي شبيها ؟"
انهارت هو بسرعة حضني واشرلي اطلع ..
صار يهدي بيها ويقرالها ايات ..
گعدت يم الغرفة ابجي ..
عاينت على امي .. " يمة شلون بيها بنتي جاي تموت شوية شوية شسويلها "
ردت ..
" ماكو غير تلجأ الـ الله .. هي مخلصتها نوم لازم تگوم وتذكر ربها. هو الينسيها "
رديت ..
" ماتشوفيها فاقدة حتى اكل ماتاكل وين عندها قوة توگف "
ردت ..
" تجيها القوة غصب عنها .. الصارلها مو شوية وصعب عليها وعلينا بس لازم ماتعوف ربها وصلاتها جا شلون يجبر خاطرها "
امي تريدها مثلها تصبر وتدوس على جرحها وتگوم جانت ..
بس ماسة لا مثلها ولا مثلي احنه كبرنا بوسط الظلم وتعودنا . مناك اجتنا القوة والصبر.
بس هي تعودت على الدلال والحب ماشافت هيج وحشية وظلم ..
بقى علي يمها يحجي وياها ويهديها الى ان نامت ..
طلع من الغرفة عيونه مورمات من البجي ..
سألته ..
" ها نامت ؟"
هز راسه وراح للغرفة ..
خفت لا ينزف خشمه بسرعه يعلگ ضغطه مايتحمل عصرت ليمون واخذته اله ..
ماقبل يشرب بس شوية ..
راح نام بدون مايحجي اي كلمة ..
فوگ وضع ماسه المشاكل حاوطتنا ..
المحلات بدت يقل واردها لان كلهم عايفين اشغالهم ويركضون من مكان المكان يدورون عليه ..
من غير حجي الناس الظلم بنتي وصارت الناس تبتعد عنا واغلبهم مايشترون ..
كله من عمة علا الحجت بالفاتحة وشوهت صورتها ..
رغم حجي الناس مايخلص بس جان اخر همنا .. خوفنا على ماسة لاتسمع وتتأثر ..
حسين جان يضوج من يطلع ويرجع عصبي وكم مرة اجت شكوة منه كاتل ولد ومتعارك وياهم ..
يگول .. شني اصدقائي يعيروني يگلولي
" اختك شردت وي صاحبها وانكتل ابو علا بسببها "
سديت حلگه ..
" اششش لاتسمع اختك .. انت تعرف اختك شنو ليش تهتم للحجي "
رد ..
" شلون مااهتم يمه وهمة يگلولي خليلك گرون والله حتى بالمحل مااگعد بعد ولا اطلع منا لمن تشوفولنا حل والا والله اشبعهم كتل اذا حجوا "
جنت اطلب الستر من رب العالمين.. ربي استرنا وارحمنا برحمتك الهي .. بعد ماعندنا طاقة نتحمل ..
اركان ماگلناله وكلما يخابر امي يگلوله ببيت رحمة وعلي يخابرلنا ..
اخر مرة سألني ..
" امي ليش عندكم صاير شي ؟ هاي كم مرة اخابر الفاطمة تگلي عمتي هناك شكو "
حجيتله كلشي تسودن وتعصب ..
" وساكتين عنه.. اذبحوا لاتسلموه للشرطة مصيره يعلفون بي ومايسووله شي .. "
بالگوة هديته ..
" لاتخاف الولد ليلهم ونهارهم يدورون عليه وعلي سواله قضايا مايطلع منها بسهولة من غير جريمة ابو علا .. بس انت شلونك وشني وضعك ؟"
رد ..
" بقيت بالنمسا حاليا بين ماارتب وضعي بس "
سألته ..
" شبيك احجيلي "
اتنهد ..
" ولو مو وكت هالحجي بس رحمة اني خلص قررت اطلگ فاطمة مااريد اظلمها وياي "
سألته ..
" ونورا مافكرت بيها وبعد مااتعلقت بيها وتصيحلها ماما "
رد ..
" بس گلبي ماهواها .. جان بالي يم نورا .. وگلت خلص مااحب بعد .. بس هسا ما اعرف شگلج ؟"
سألته ..
" اكو وحدة بحياتك شنو ؟"
اتنهد ..
" هسا مو مال هيج سوالف خلي تعدي هالازمة ونحجي اني هم ضايع واريد اخذ رأيج بهواي شغلات "
رديت ..
" خوش حجي استقر ورتب وضعك بالاول وفكر يله تخطي اي خطوة سالفة نورا سدها حاليا لان بعد مالنا خلگ صدمة ثانية لاتخطي اي خطوة تندم عليها افتهمت .. "
رد ..
" هاهي سلميلي عليهم كلهم وبوسيلي ماسة "
سديته منه ..
خابرت فاطمة وحجيتلها كلشي ..
گامت تبجي ..
" خاف صدگ يطلگني "
رديت ..
" السبب بيج مااعرف السوتيه صح لو غلط بس هو متعلق بالتخابره يعني بأمل ويمكن بسببها يريد ينهي كلشي .. گالي بعدين احجيلج بس هسا انتي لاتخابريه بعد اتركيه فترة بين مانشوف وين تصفا "
مرت الايام والوضع على ماهو عليه ..
فيصل حابس زهرة بالغرفة ومحد يدخللها غيره ..
موبايلها عنده بس مايعرف على ياخط يخابرها وهي معاندة ماتحجي رغم كل الصار ..
ماسة بدت تستجيب الامي وصارت تگوم تصلي وتقرا قران بس ماتحجي وي واحد منا ولا تختلط عازلة نفسها..
حتى من نطلعها يمنا بالهول تبقى صافنه وبعدين ترجع للغرفة ومانگدر نضغط عليها ..
عمتي جانت تلح عليه اشوف دكتورة .. وگلتلها علي مايقبل رغم متأكدة يعرف كلشي بس ماگال حتى الي
لمن لحيت عليه گالي جملة وحدة ..
" لاتخافين بعدها بنيه "
رديت ..
" يعني ماواصللها .. "
اتنهد ..
" غشائها مطاطي "
سألته مستغربة ..
" شنو مطاطي "
رد ..
" يعني مو بسهولة ينفض يمكن هاي نعمة من الله علمود هالنذل مايوصل المراده "
جنت مافاهمة شي بس العرفته بعدها بنية .. لان هذا كل اليهم مجتمعنا وناسنا محد يهتم الكسرت روحها وگلبها والتعذيب الصارلها .. امي تكول جسمها كله ازرگ جان .. تذكرت عيد من تزوجني هم هيج جان يعذبني ملة كشرة ابتلينا بيها ..
بهالشهور المرت ..
ماسة ماقبلت تداوم رغم جانت ناجحة من الدور الاول وبتقدير جيد جدا .. بس ماداومت وعلي گال خليها تأجل السنة مو مشكلة ..
بعد مايأسوا من موسى الكل رجع الشغله وحياته ..
وتحملوا نظرة الناس وحجيهم ..
وبسبب الجهال بالمدرسة وعركهم وي الطلاب كل يوم اقترحوا اخواني نبيع بيتنا ونشيل من المنطقة كلها رغم علي ماقبل وگال اني مامكسور وجهي واطلع من بيتي ومنطقتي ..
بس درع گاله علمود جهالنا لازم تبيع .. مانريدهم كل يوم يسمعون حجاية ويتعاركون الناس ماترحم وذوله بعدهم صغار يتأثرون وخاف يصير شي اكبر ..
قفلنا بيتنا واخذنا غراضنا ورحنا مؤقتا ببيت اهلي بين ماينباع البيت ..
بعد مافكر علي .. گال اني المنطقة الصدگت بالحجي واني عايش وياهم سنين ويعرفوني ويعرفون عائلتي مااريدهم ولا ابقى وياهم ..
فيصل اصر نجي يمه للسلف بس علي ماقبل يخاف على ماسه .. وهي اصلا ماتطلع من الغرفة ..
انطانه درع غرفة اولاده الفوگ استقرينا بيها ووطن وحسون ويوسف ينامون بالاستقبال واصلا فرحانين لان عاشو سوة ..
بيت اهلي بعيد عن منطقتنا شوية ارتاحينا من الحجي والقال والقيل .. درع قبل ليروح للدوام يوصل الجهال المدارسهم ..
نبقى بس احنه الصبح كل وحدة تخلصلها شغله عمتي وي امي وفاطمة بنفس الغرفة ..
فاطمة تگول انقطعت عنه صارلي شهرين وهو متخبل بس يدز رسائل خطية ..
جان كاسر خاطرها لمن گلتلها معليج خليه ينساها اذا بقى وياها يعوفج وهي تضحك عليه ..
يعوفني ويروحلي مووو ..
واني احجي وي فاطمة جانت دمعه متخربطة وراحت للحمام تركض تتقيئ ..
طلعت شحالها ..
سألتها .. شو صارلج كم يوم هيج شكو مستبردة ..
ردت ..
" لا بس مدري شبيه معدتي مايثبت بيها شي ونفسي تلعب من ريحة الطبخ "
سألتها ..
" هي فايتتلج "
سكتت ..
رديت ..
" بس لا حامل وماتحجين ليش ولج ؟"
اتنهدت ..
" اني شاكة من ذاك الشهر لان صار شهرين ماكو بس ماردت احجي خاف يطلع جذب واتفشل وهم شغلة ماسة مو مال واحد يفرح واحنه بهيج وضع "
رديت ..
" تحجين صدگ ؟ تضيعين فرحة رضوان وفرحتنا بيج"
حجيت وي براء تاخذها للدكتورة گالت اجت بوكتها اني هم اريد اراجع .. اني ماگدرت اعوف ماسة لان بس سمعت خابرنا نجحز تسودنت حسبالها الها واتهسترت من غير ماتعرف شني السالفة ..
راحن العصر واجن جانت المفاجأة انه براء شهريتها مامنتظمة وهم رادت تراجع وبالسونار بين عندها حمل رغم هي متعجبة وتكول اني متعودة كل ثلاث اشهر تغيب وترجع مااتوقعت اكون حامل .. ودمعة هم طلعت حامل .. وبنفس الشهر اثنينهن شهرين الهن "
الفرحة فرحتين الدرع ورضوان الجان يبجي ومامصدگ راح يصير اب واخيرا بعد كل هالسنين ..
هاي اول فرحة من شهور بعد الصار الماسة اول ضحكة نضحكها .. رغم همة راعوا مشاعرنا ومابينوا فرحتهم الا لمن شافونا ضحكنا وفرحنالهم ..
رضوان جان ناذر عشا الوجه الله .. جابلنا من برة ..
بيومها اجه ميراد .. رايح لهناك مقفول لاگيه جاي البيت اهلي ..
بعد ماطردته ماسة اخر مرة وشامرة عليه الحلقة گاله علي خليها ترتاح فترة واحجي وياها ..
وبقى هالفترة يتواصل وي علي ويسأل عنها الى ان طگ گلبه واجه مااتحمل ..
بعد ماكملنا عشا هي اصلا ماتگعد ويانا ولا تاكل ..
رغم ابوها واني وخوالها ماتاركيها كل شوية واحد يروحلها ويحجي وياها ويهديها ..
بس هي بعالم ثاني بس تسمع وساكته ..
علي جان مقرر ياخذها الطبيبة نفسية اذا بقت هيج
لان عدت شهور على السالفه وراح تدخل بسنة 2007 وهي مثل اول يوم اجت ..
اشرلي وراحلها علي خاف عليها ماقبل ..
گلتله خليها تواجه مصيرها الى متى تبقى ساكته ..
ماسة ..
" حسيت نفسي انقطعت عن العالم .. اخذت نصيحة جدتي وصرت اشكي وابجي الربي وبس.. اعتزلت عن الكل .. اعرف اهلي عافوا بيتهم ومنطقتهم بسببي .. حتى المحلات جاي تخسـر بسببي .. جنت اتمنى الموت علمود الكل يرتاح واولهم ميراد ..
مااريده يتعذب وياي اريده يشوف حياته ويستقر ..
لان اني خلص بعد ماافيده ..
حاول يحجي وياي كم مرة الى ان طردته وشمرت الحلقة عليه ..
" خلص اني ماافيدك بعد الاحسن تطلگني وتشوف حياتك "
گام ..
" مااريد اضغط عليج بعده جرحج جديد بس من تهدين احجي واعلمج شلون هيج تنزعين الحلقة واحنه تعاهدنا هالحلقة ماتطلع الا وكت مانحولها للجهة اليسرى بعرسنا .. ومناك للموت ماننزعها بعد "
رديت ..
" عرسنا ؟؟ عرسيش ليش المثلي بعد تتزوج وتعيش حياتها .. صح انت ماربيت هنا بس احنه عايشين بالعراق محد يرحمنا "
رد ..
" وانتي شعليج بالناس عليج بيه "
رديت ..
" وانت هم ماتتحمل يوم يومين شهر شهرين بعد هاهي يفيض صبرك وانت الشك ياكل عقلك والناس التحجي وتسمعها ماتتحمل .. روح ميراد واعتبر كلشي بينا انتهى "
صح جنت احبه بس ماردت اظلمه وياي .. جنت اتذكر سوالفنا وحجينا واشتاق .. وبعدها اتذكر موسى والسواه وابجي لحد مااسكت ..
مرت الشهور ورجع جان متأمل انه يلگاني متغيرة بس مايدري انه جرحي الوحيد مايطيب ويتجدد بمرور الوقت .. لدرجة صرت بيها اكره حتى نفسي ..
جنت گاعدة ارسم او اشخبط علمود اشتت تفكيري ..
دخل ماشلت عيني بس من شميت عطره عرفته هو ..
مااعرف شبي گلبي صار يدگ حيل وتوتر ..
بس سويت نفسي مامهتمة…
سأل ..
شلون صرتي ؟؟
ماحجيت .. بقيت ساكته و لا كأنه موجود سويت نفسي ما مهتمه ..
همس ..
" مشتاقلج والله لاتعذبيني "
احس گلبي يتگطع بس مو بيدي ..
كمل ..
احجي صيحي كلشي سوي بس لاتسكتين لا تسوين نفسج متجاهلتني وماترديني ..
انت هيج تموتيني ..
ماگدرت اخلي وجهي بوجهة ..
بس سألته ..
" انت ليش متمسك بيه .. شفقة لو شنو ؟"
رد ..
" لا والله لان احبج "
اتنهدت ماگدرت اگله اني لمسني واحد غيرك وبلمسته صرت اشمئز من كل الرجال بالدنيا ماعدا بابا وخوالي ..
ماگدرت اگله ماراح تگدر تعيش وياي واني اريدك ومااريدك .. احبك واكرهك بنفس الوقت لان من جنس ادم .
كل الگدرت احجيه ..
" ميراد لاتعبني .. اني ماعدت انفع لا الك ولا الغيرك شوف حياتك وانساني .. لان اني خلص نسيتك "
انصدم من كلامي ..
" تحجين صدگ ؟ نسيتيني .. احجي ادري بيج تجذبين علمود تبعديني.. بس اني اريدج والله اريدج والصار مايأثر علينا "
رديت ..
" لو شايفني بوكت الحادث ماحجيت هيج .. جاي تشوفني حتى عيني مااخليها بعينك لاتضغط عليه بعد ارحمني لان اني كارهة روحي فلا تخليني اكرهها اكثر "
گام مقهور ومكسور ..
حسيت هالشي من تنهيداته ..
راد يتقرب .. طفرت من مكاني بسرعة ..
" دير بالك تتقربلي افتهمت .. "
رد بتوتر ..
" خلص لاتخافين مااتقرب بس ردت احضنج مشتاقلج"
بجيت..
" ارحمني كافي مااريدك ولا اريد قربك جسمي صار يشمئز منكم كرهكم ارحمني وعوفني "
تعصب ..
" والله الا اذبحه هالنذل "
عافني وطلع ..
مرات نتخذ قرارات مو بأرادتنا .. بس حتى مانظلم النحبهم ويانا ..
ماگدرت اخلي عيني بعينه بس من طلع شلت عيني وشفته ..
لمحت ظهره .. شعره كلشي بي اشتاقيتله گلبي يريده وعقلي وجسمي رافضه .. رغم بعدني على ذمته بس احسه صار محرم عليه ..
رضيت بقدري واستسلمت .. لان مجرد قربه يوترني وخوفي يزيد ..
رحمة ..
طلع ميراد ضايج مثل عادته ..
گال اني رايح للسلف اشوف فيصل .
زينب هاي ايام ولادتها هالطفل اتاخر مو مثل اخوانه القبله وفيصل خايف عليه ..
لليل خابرنا فيصل بشرنا زينب جابت ولد وسموه فرج
حمدنا الله وشكرناه وگلناله بعد خليها ترتاح وتربي ذولي الثلاثة ..
الطفل وجهة خير علينا ..
بالصدفة وميراد يغير بالخطوط مال زهرة الموجودات عند فيصل ..
لاگي رسائل جايات من رقم غريب..
فاتحهن جانن من موسى ..
بسرعة خابر للولد وراحوا ..
بقينا اني والبنات وامي وعمتي ندعي كون يلگوه ونرتاح ..
فيصل جابر زهرة تخابره على نفس الرقم وتسأله وين هو .. واذا حجت شي گالها من ايدنا لشرطة نسلمج هم يتكفلون بيج..
جانوا كلهم محاوطيها من خابرت ..
سألها ليش ماخابرته طول هالاشهر ويخبرها ويراسلها وماكو !!
گالتله جان الموبايل عاطل وماگدرت اطلع فيصل ناشر زلامة بالسلف واخاف يحس .. هسا يله صلحته ..
انت شلونك وين هسا كاعد ..
سألها على ماسة ..
گالتله ..
" زينة مابيها شي "
اشرولها تسأله عن مكانه مرة ثانية ..
سألته ..
گالها اني بأطراف النجف عند ولد من جماعتنا.. لان اسمي متعمم بالسيطرات مااگدر اطلع برة النجف
ردت ..
" هاا اي احسن الك "
رد ..
" عمة محتاج فلوس اريدج تدبريلي "
هز راسه علي الها.
ردت. .
" اي بس شلون اوديهن الك "
رد ..
" انت بس دبريلي واني اوديلج واحد ياخذوهن ويجيبهن الي .."
سدت التلفون واتفقوا بس تدبرهن تخابره ..
من حجالي علي رد الامل الي بلكي يلگوه ونرتاح..
انتظروا يومين علمود مايشك وخلوها تخابره ..
گالتله ماگدرت ادبر بس ذني 100 الف لان ماعندي تدري بيه .. وحبوبتك هم ماعندها .. طرشلك واحد يجي ياخذهن بسكوت كون محد يشوفه ..
حددوا مكان يلتقون بي ..
وراحوا الولد ..
على وصف اركان للولد لزموه وشبعوا كتل وهددوه يسلموه للشرطة يله معترف على مكانه.
حبسه فيصل يمه ومشوا البقية كلهم سيارتين ..
راحوا للمكان الگال عليه الولد..
جان خاتل بگن مال دجاج ..
سحله ميراد شبعه كتل .. وذاك يستفزه ويگله :
" حرمتك منها اني اول من ضاگها وشاف جسمها اويلي شلون جسم يموت .. "
صار يوصفله شسوالها وميراد تسودن ماخله لا سنون اله كلهن كسرهن ولا وجه صاحي بالگوة سحبوه منه.. ودور استلمه علي هم شبعه كتل ودرع ورضوان ماقصروا بحيث اخذوه للمركز منتهي بالگوة يجر النفس
الضابط گايللهم
" ماطلعتوله شهادة وفاة فد مرة وجبتوه "
حوله للمستشفى تحت حراسه يعالجوه .. راد يشتكي عليهم لان ضربوه بس الضابط رزله وگاله ..
" المفروض يدفنوك بساعتها بس الموت انت الك رحمة على عملتك السودة "
موسى بالتحقيق بالاول نكر بس من عذبوه اعترف مو بس على السواه وشلون كتل ابو علا .
اعترف على عمته زهرة هم وگالهم هي الخططت وحرضتني واني بس نفذت .. اعترف عليها انتقاما منها لان دلتهم بمكانه ..
بعد التحقيق الضابط اصدر القاء قبض على زهرة بتهمة التحريض والتستر ..
#يتبع ..
( شمس السعدي )