#أبي_لم_يكن_إنساناً
البارت الأربعون
للكاتبة لبنى الموسوي
ضم شوفك الي الغيري النظر ممنوع
تصد لـ عيون غيري شحدها وشحدك
كلك مالتـي ومالك جزء يعنيـك
الجسد والروح الية وكل شي ما عندك
وكل شي البية الك ي الما تدري اموتن بيك
احس قيمة الـ وجودي من اوگف بسدك
ترى مسودنـي عشگك والتحـب تغـااار
غـرت من شامتك چـي لازگـة بخـدك
بالك يـوم تغلط لـو تصـد للغير
لـو حتى بحلم تطلع مرة تـودك
لـَ اطبلك بالحلم وياية ألف كابوس
واحضننك واشبگك واختـل بزندك
هاي رويحتـي المتشم هواك تمـوت
لـو كـل الجـروح تطيـب ما فلك
من اصدلك گمت احط حفنة ملح بالعين
خاطر من اشوفك آنه ما احسـدك
ي حبل وصال عمري وعگدتـك بالروح
واني بكيفـي امـوت وما افك عگـدك
تودعنـي وتروح وتوصل اعلة الباب
وتجيك رويحتـي وللداخـل تـردك....
- ههههههه ادري قابل اني وزير التربية شلون استعجل
- يلا عاد فضني لتضحك
- اااي هذا الرابط نزل بس خلي اطلع مدرستكم
- لزمت إيد بتول حيل ولچ الحگي گلبي رااااح يوگف
- اسكتي اني وگف اصلاً
باوعت الـ همام مركز بالشاشة
فجأة رفع راسه على بتول وضحك سبااااعية بت عمها ناجحة وبمعدل 93 ما ضاع تعبي بيچ عفيةةةة
هوَ حچاها لو بتول تخبلت
ظلت تگمز منا ومنا شوية تحضني شوية تحضن عمها وشوية ترجع على الحجية وخديجة
صياحها ترس البيت
باوعتلها اضحك بس داخلي يبچي دم على النتيجة يا رب كون ناجحة بـ معدل عالي وميضيع تعبي
كلهم التهوا بيها فرحانين حتى همام
ظلت بتول تبوس بينا وتصيح ناجحة ولكمممم ناجحة حضنتها وسحبت تراكها اثبتي عاد بعد اااني
التفتت على همام واگف مچتف ويباوع عليها بضحكة
ما تحملت أكثر بعد
بلعت ريگ وحچيت بصوت مخنوگ عمو واني نتيجتي شنو مووو گلبي راح يوگف والله
- اوووو والله نسيتچ
بتـول صرعتنا مـن الفرحة هسة ثانية واطلعها تتدللين
حچاها ورجع گعد ع اللابتوب
البيت صار هدووووء الأبرة لو تنشمر بي ينسمع صوتها
غمضت عيني ادعي بـ خوف يا رب يا حبيبي
وفقني حتى احقق حلم عمو حامد بية احلفك بـ حبيبك محمد وآل بيته الأطهار
شو هذا تأخر شنو السالفة
فتحت اباوعلة الوجه مگلوب لاااا يربي
مباشرتاً گام على حيلة وخزرني هاي شنو طيبة صدگ تحچي عمي ؟!!
صفنت بـ وجهة ما احس بـ دگات گلبي بعد
اريد احچي ماكو
صاح حرامات كل هالتعب بيچ وتالي النتيجة هيچ ليش
بتول.. ليش عمو طيبة مجاوبة مثلي وين المشكلة بعد
طيبة.. احچي شنو رسبت
بس والله اني مجاوبة كلش زين حتى ما عندي اخطاء گلبي وگف گول النتيجة لا هسة اموت بـ مكاني
- لا ما رسبتي
- همام خوية كافي عاد البنية نشف دمها وكت سوالفك
- اوگفي خديجة عندي عتب بسيط ويا طيبة
اريد اعرف وين راحت الدراسة 24 ساعة باليوم وذيچ الدروس الخصوصية والمصاريف والتعب وحضرتها جايبة معدل 99 مو 100
- لو اگول گلبي وگـف لحظتها ورجع نبض هم ما ابالـغ
رجع البيت انخبص
خديجة والحجية يهلهلن بتول تگمز وتحضن بية همام واگف يضحك إلا اني عبالك صنم بس فاتحة حلگي
وحقي والله غير اكلت طن هوى بسبب همام
لسة ممستوعبة
باوعتلة ودمعتي بـ عيني شنو يعني شگد معدلي بلا شقى
- هههههههه لا ماكو شقى طلعتي سباعية وجبتي الـ 99
بس حچاها عطت من گلبي وركضت الـ حضنة اضحك
ما احس إلا شالني وظل يفتر بية
حسيت نفسي بفلم رومانسي ماكو هيچ هم فرحة نجاح وهم حب ما صار ولا راح يصير مثلة بكل الدنيا
- دخت كلش نزلني يضحك ااخ ولچ راسي افتر كااافي
- والله والله معدلي 99 مو شقى
- بـس حچيتها سحـب إيدي گعدني بـ صفة واللابتوب گدامنا
- هاچ شوفي اسمچ حتى تصدگين
- باوعت الأسمي اي والله صدگ گبل طفرت من مكاني اگمز وركضت الحضن خديجة طايرة من الفرح
- عمةةة سمعتي ناجحة والمعدل الأتمنى ااااااه
- ههههههههههه تستاهلي والله هواي تعبتي ألف مبروك
الحجية.. تعالي بيبي خل احضنچ
عفية بالسباعية عفية برفعة راسنا فرحتونا انتِ وبتول اريد الله يفرحكم بـ فرح تسجدون منة شاكرين
- ركضت حضنتها الله يخليچ النا بيبي
اروح فدوة الـ هالدعوات الحلوة غير انتم سبب نجاحنا
واني بحضنها ذكرتني ريحتها بـ ريحة بيبتي
كل الأبتسامة انسلبت مني
رفعت نفسي منها بالگوة لازمة دموعي مباشرتاً سألني همام شبيچ ؟!!
- ما بية
- احچي طيبة مو عميان گدامچ ليش اختفت ابتسامتچ
- والله ماكو شي بس تذكرت بيت جدي
تمنيتهم يمـي علمود يشوفون شلون حققت حلـم عمـو حامد بية الچانوا يشجعوني احققة بـ استمرار
اكيد لو موجودين هسة چان فرحوا كلش خصوصاً بيبي وعمة نهاية
- عمي حاولي لَـ تنزعين فرحتچ بـ هالأفكار
خلي كل شي لـ وقته ومثل ما الحزن الة وقت فـ الفرح هم الة وقت ومن حقه عليچ تعيشي بلا منغصات
- ادري والله بس الشغلة مو بـ إيدي
ما اگدر انساهم حتى بـ عز فرحتي يا عالم ذولة أهلي
زين بس اريد اعرف ليش كلهم نسوني هالشكل
شلون راحوا وخلوني معقولة محد منهم سأل بينة وبين نفسه هـ الطيبة شصار بيها عايشة ميتة راح اتخبل !!!
مسحت دموعي احاول اهدي بـ نفسي
صارت عيوني ع اللابتوب باوعت الـ همام عمو هالسنة أختي المفروض بالسادس ابتدائي اذا خلاها رزاق تكمل دراستها طبعاً
- اي وشنو يعني
- يعني رابط السادس اكيد موجود
اذا بحثت ولگيت اسمها راح اعرف مكانهم وين بالضبط
- و وين تلگيها بلا ؟!!
- خليني ابحث أول بـ مدرستها القديمة
واذا لا ما لگيتها اظل ادور بـ كل مدارس البصرة عادي حتى لو اتعب المهم الگاها
- من كل عقلچ تحچين
- حباب والله هاي فرصتي الوحيدة ساعدني
- يلا عمي تعالي اگعدي هسة اطلعلچ الرابط وظلي دوري
بس حچاها ركضت گعدت بصفة
طلع رابط السادس بحثت بـ مدرستي القديمة ما لگيت اسمها هذا أول خيط أمل انگطع بس مراح استسلم
طلع رابط محافظة البصرة وانطاني اللابتوب بحضني
عيوني راحت واني ابحث عنها
مخليت مدرسة ابتدائية تعتب علية مدورت بيها بس بلا نتيجة
ظلن بس خمس مدارس تعبت بعد ما بية اكمل البحث انطيتة اللابتوب ورفعت إيدي على عيني ابچي
- كافي طيبة اني شگلت قبل شوية لتضيعين فرحتچ
بتول.. كافي نكد ولچ موتتيني
گومي خلي نحتفل اليوم يوووومك يا بطل اليوم تلعب جولة وجيب الكاس جيبة هو وشراشيبة
طيبة.. هههههههههه شراشيبة شنو والله عليچ سوالف
همام.. واخيراً ضحكتي
يلا بـ هالمناسبة كل وحده تگول شتريد هدية النجاح
طيبة.. كل هذا وتريد نطلب بعد
المفروض احنة اللي نجيبلك هدية على تعبك ويانا طول الفترة الراحت والفلوس الدفعتها للدروس الخصوصية
همام.. ماكو أي تعب ولا خسارة
كل شي راح فدوة النجاحكم وهيَّ هاي أكبر هدية ممكن تقدموها الي
بتول.. عمو مالك علاقة بهاي الخبلة
اذا هيَّ متريد براحتها بس اني هديتي مستحيل اتنازل عنها واريد موبايل من هذا الحديث شلون جهازك
همام.. رفع حاجبة بـ نظرة اعتراض شتسوين بالموبايل
بتول.. شنو شسوي بي
هوَ هذا هم سؤال يعني راح ادخل للجامعة واني جهاز ما عندي تشوفها عادي لو حاسبني طفلة لسة
خديجة.. اي خوية صدگ البنات كبرن اشتريلهم ولتخاف تربيتي ذني ميسوون الغلط اطمأن
طيبة.. لعد اني هم اسحب كلامي واريد هدية موبايل
همام.. هههههههه امري لله يابة
فترة والموبايل يمچن بعد عدچن أوامر ثانية خاتونات
بتول.. اي اي عدنا اكيد
نريد فلووووووووس كوووووومة حتى نجهز للجامعة
همام.. لا هاي هيَّ معناها انهجم بيتك همام
خديجة.. ههههه شنو الجديد هوَ مهجوم من يوم يومة
بتول.. لحظة انتَ على شنو معترض
فلوس بابا كومة يمك انطينا منهن وفض السالفة غير هنَّ النا والك
- فلوس أبوچ تنسيهن حالياً
عود من تتزوجين ان شاء الله اگعد وياچ وافهمچ وانتِ حرة ساعتها شلون متردين تتصرفين بيهن اتصرفي
- زين عوفك من فلوس بابا
فلوسك انتَ هواي المن ضامهن مو ذاك اليوم حصلتلك شدات مكافأة
طلع اصرف احسن ميظلن تالي للورثة نتكافش عليهن من وراك وفوگاها متحصل منا غير بس المسبة
- ههههههههه خلف الله عليچ عمي هاي وبعدني عايش
- ركضت حضنتة تضحك اتشاقى وياك والله
غير أموت اذا صارلك شي
ليش اني شعندي غيرك يا احسن والطف عم بالدنيا كلها
بيومها فرحتنا بالبيت مستحيل تنوصف
كل الأگدر اگولة حتى اعبر ولو عن جزء من سعادتي
هذا اليوم چان احلى يوم بـ حياتي بعد ما حصلت على ثمرة تعبي وحققت حلم اغلى الناس بية عمي الله يرحمة
لليل صلينا وگال همام لتسوون عشى طالعين برة
بالبداية اخذنا للمطعم تعشينا
بعدها فرنا بالمولات اشترينا واتونسنا لحد ما هلكنا تعب بحيث صارت رجعتنا للبيت بوقت متأخر كلش
طبينا خديجة والحجية نايمات
اخذت بتول الغراض من همام وراحت تركض الغرفتها
بتول.. رجاءاً لحد يگعدني باچر
خلوني أنام بـ راحتي صارلي يومين منايمة نومة اوادم
ظل همام يباوع وراها ويضحك
اخذتلي صفنة على وجهة يا الله شگد مشتاقتلك صارلي فترة كلش طويلة محرومة منك بسبب دراستي
- التفت علية ها شنو اشو صافنة متصعدين تنامين
- لا منعسانة
حچيت هيچ حتى بلكي يظل يمي لأن والله بعدني ما لحگت اشبع منه
وإلا اني بالحقيقة شوية بعد ويغمى علية من التعب الي يومين منايمة زين بسبب تفكيري بالنتيجة
- شلون يعني منعسانة مو عبرت الـ 12 ونص
ادري شوكت تنامين بعد معقولة كل هذا الفر ومتعبتي
- ليش انتَ تعبت ؟!!
- يمعودة هلكان تعب مو بس تعبت هسة اول ما اخلي راسي ع المخدة اجرها نومة للصبح
- متروح تنام لعد شعندك واگف هنا
- اي رايح تصبحين على خير وانتِ هم نامي السهر يأذي
حچاها وصعد الدرج انفجرت بـ مكاني
خرب حظي على هالدگة الناقصة هذا من كل عقلة راح نام وعافني وحدي
الغراض چان حاطهن بـ صف غرفتي شلتهن وطبيت
رگعت الباب وراية حيل
ماكو ميحس ابد ميحس اليگول شايلين منه الأحساس وزارعين بـ مكانه الهبلنة أهبل والله أهببببل
بعدني ادردم ويا روحي انفتحت الباب ودخل همام
- هاي ويامن دتحچين ؟!!
- هاااا شنو لااا مگاعد احچي ويا احد منيلك هالسالفة
- لا تحچين اني سمعتچ من داطب للغرفة
- باوعتلة ساكتة قابل شگولة چنت احچي وارزل بيك
- جاوبي شبيچ صافنة
- ماكو يعني بس چنت احچي ويا روحي بصوت عالي لو هذا هم ممنوع مثلة مثل غيره
- شتقصدين شنو هوَ الغيره ؟!!
- مو مهم حاچيني شجابك لهنا مو رحت الغرفتك تنام
- سمعت صوت الباب انطبگ حيل
فـ ظل بالي يمچ واجيت بس مچنت ادري بيچ تخبلتي رسمي
- باوعتلة صفح احچي بيني وبين نفسي
اي تخبلت وانتَ الخبلتني شسويلك وتحس الخاطر ربك
- اليوم شبيچ خلصتيها صفنات اني مو گاعد احاچيچ
- شنو شبيچ وشبيچ گتلك ماكو شي ليش تلح
- بس حچيتها خزرني بـ عصبية شنو هالأسلوب ولچ
- اسفة عمو مو قصدي والله
كل الموضوع اني ضايجة وتعرف ليش ميحتاج سؤال
- مع ذلك هالسالفة ما اريدها تتكرر طيبة ديري باااالچ
حچاها وطلع رگع الباب ورى حيل
ضجت بالزايد
اجيت انفضح گدامة بسبب غبائي شبية صايرة مدري شلوني ليش مگاعد اسيطر على مشاعري يربي
غيرت ملابسي وتمددت فكرة تاخذني وفكرة تجيبني
وين يلا گدرت أنام
فزيت الصبح مخروعة باوعت للساعة سبعة ونص لاااا يربي راح الوقت شلون هيچ محسيت يبوووو
غسلت وجهي وطلعت اركض
فتحت الباب نايم وجهازة يدگ ادري شنو ميحس
تقربت منة عمو اگعد عمو مظل وقت عفية گوم لتشلع گلبي
- رفع راسه مغمض ليش شگد صارت الساعة
- سبعة ونص
- بس حچيتها طفر من مكانه هاي ليش خليتيني نايم
- والله راحت علية النومة اني هم محسيت إلا هسة
- بسرعة ودي ملابسي للحمام
- هاي شنو وين تلحگ مو إلا تسبح يا دوب تبدل وتطلع
- طيبة سوي الگتلچ علي ولتجادلين مو وكتچ
- اي براحتك حچيتها ورحت خليت الملابس بالحمام لو الدنيا تحترگ هم ميگدر إلا يسبح الصبح
نزلت ع السريع جهزتلة الريوگ
داصب الچاي نزل مستعجل طلعت ورى وين تعال تريگ
- لا عمي ما الحگ بعد عود بالدوام أكل يلا مع السلامة
- الله وياك
رجعت للمطبخ لملمت الهوسة وظليت لفتر بالصالة
ضايجة ما ادري شـ اريد
لا بية حيل اشتغل ولا اگدر ارجع الغرفتي أنام بالساعة يلا گعدوا سويتلهم الريوگ وانشغلت وياهم
مرت شهرين والوضع هادئ جداً
طلعت القبولات بتول تقنية طبية واني طب عام ورجعت الفرحة انعادت علية لأن الحلم تحول حقيقة واخيراً
صار وقت التقديم والخوف زاد بينا كلش
لو ما همام منعرف شنسوي
خطية هوَ اخذ إجازة وتكفل بكل شي احنة بس رحنا ويا وباقي الأمور كلها علي مجرد حضرنا المقابلة بالأخير
اذكر أول يوم دخلت للجامعة استغربت حيل
حسيتها عالم ثاني يختلف جذرياً عن ذاك العالم الچنت عايشة بي كل سنوات دراستي
ما لحگ يكملنا اثنينا بيومها
خلص تقديم بتول واجلني ع الاسبوع البعده
صار الوقت ورحنا بس اني ويا وصلنا للكلية همام ظل يتلفت مو مثل كلية بتول من الباب گالوا وين يصير التقديم
وگف واحد من الطلاب حتى يسأله عن المكان
شو هذا يحچي ويا وعينه علية
فجأة همام صاح استغفر الله رب العالمين واتوووب اليه اشتغلت رحمة الله من أول يوم بابا عينك لا اطفيها
- خير أخي سويت شي وما ادري بـ روحي
- شـ اسمك اول
- مهيمن
- زين لعد مهيمن باشا عينك سيطر عليها شوية اعراض الناس مو لعبة ولا الگدامك مگرن تسمع
- ما باوعت واذا باوعت مو قصدي على شنو هالعصبية
- المهم عينك قصدت ما قصدت مشكلتك هاي
طيبة.. ظليت صافنة عليهم
حتى تعبانة من الحر لا مكياج لا ترتيب ويني وين واحد يباوع علية ولو هوَ هذا طبع الشكل مالة علاقة
تجادل ويا شوية وراها سحبني من إيدي ومشينا
اريده يتركني ماكو
باوعت عليها بضجر عوف إيدي گامت توجعني شبيك
- فتح فبضتة والتفت علية ضايج شفتي هذا النموذج
- يا نموذج ما فهمتك ؟!!
- الولد الحچيت ويا گدامچ قبل شوية
- اي شبي
- راح تشوفين منه هواي من اليوم ورايح
فصيري أدمية وحوك ولتخلين واحد يقشمرچ ويضحك عليچ ترى اغلبهم هنا ملعبين
- باوعتلة گوة لازمة نفسي لا اروح ابتسم گدامة ويطلع قهر گلبة بية
شنو هاي يربي معقولة كل هالعصبية بسبب الغيرة
لو ديحچي هيچ من حرصة وخوفة علية فدوتك الهي كون صدگ غار مو مجرد اوهام بـ مخيلتي
باوعلي وصاح يلا فضيني كافي صفنات
اي والنبي غار ولكم غاااااار
ظليت امشي ويا طايرة على جناح الفرح ممصدگة اكو اشارة منه بالحب حتى لو چانت هالأشارة ضعيفة
ما طولنا هواي كمل التقديم بـ ساعة وحدة
همام هواي عنده معارف بالكلية
الفايل مالتي موگع بالگاع من إيد الإيد برمشة عين كل شي خلص ورجعنا للبيت بس شنو شعوري مينوصف
لليل واگفة ويا بتول بالمطبخ
نسولف ونلملم بـ هوسة العشى فجأة تذكرت الهدية يا طيبة شفتي شلون نسينا عمو غلس على الفلوس
- عوفي ولچ خطية اخاف ما عندة
- هههههه هذا ما عندة امشي ولچ بشهرين طلع فلوس الخصوصي الدبل عالي ليغرچ كلامة لوتي وداعتچ
- اي حسدي حسدي
- ها راح تبديلي بـ سوالف مرت العم والله اگلب عليچ
- هههه خبال اني شكو بس اگول خطية مو زين يعني
- لا مو زين خليچ مثلي فطيرة متفكرين غير بـ نفسچ
- چذابة والله اصلاً انتِ اكثر وحده تفكرين بيهم
باوعتلي تضحك وركضت الـ همام
طلعت وراها وگفت گبالة عمو عمو شو محركت جيبك
- ها يعني متنسين
- شلون انسى ترى والله ما عندي ملابس للدوام
كلها يا طلعة يا بيت قابل تريد اداوم للجامعة بالبجامة
خديجة.. اي عود اخذچ باچر اشتريلچ لبستين شيرادلها
- لبستين شنو والله ما اقبل بـ أقل من سبعة على عدد أيام الأسبوع
هاي من غير الأحذية والجنط والشالات وبقية السوالف
خديجة.. شعندچ يمة رايحة تعرضين أزياء لو تدرسين
همام.. عوفيها خديجة شلحيتي وياها
اي عمي گولي شگد رايدة بس لتضربين بالعالي حبابـة
بتول.. مليون
طيبة.. بس حچتها همام فتح حلگة
مو گالت مليون لا ضربتة طلقة حتى لونه انگلب ازرگ
الحجية.. يا يمة صخام أبني راح يروح مني من وراچن ي مگموعات دشوفن شصار بي مليون شنو حرام عليچن
بتول.. لتخافين بيبي عمو ااااسد شنو هالمليون ويموتة
همام.. هواي بتول شتسوين بيهن !!!!
بتول.. عمو احسبها حساب عرب واني راضية بحكمك
سبع لبسات سبع احذية سبع جنط
اكسسوارات مكياج شالات هوَ شنو المليون والله نفخة وحده كلة يطير هسة انتَ شگد تصرف على ملابسك
- يعني ما بيها مجال تسويلي تخفيض اني هم عمچ
- لا والله عمو اعذرني
بداية الموسم وين اكو تخفيضات صدگ لو بيها مجال چانت مقصرت بس هيَّ من الجملة غالية
- التفت علية مبتسم وانتِ عيني شگد تردين
- مثلها
- لا يا الله شنو هاي خربت البنية
لچ مو چنتِ تستحين تاخذين المصرف مني هسة صرتي تطلبين ملايين
- والله قبل وحد
بعدين على شنو مستغرب غير حالي من حالها
مو انتَ حاسبني مثل بت أخوك لو عندك غير هالحچي
هو اني حچيتها لو هذا طگها بـ ضحكة لحد ما غص
صاحت الحجية اركضي ولچ جيبي للرجال ماي مو راح يموت من وراچن
صدگ خفت علي شرگ بعد حتى ميگدر يسحب النفس
ركضت جبتلة ماي ورجعت قدمتلهيا
بالگوة اخذة مني وجهة صاير دم اسم الله هاك اشرب بسرعة بلكي تروح منك
شرب شوية ارتاح
رفع راسه دينطيني الگلاص شو هذا بس باوعلي ضحك يربي شنو سالفتة ادري شايف قرقوز گدامة
خديجة.. هههههههه يا هذا شبي اليوم
طيبة.. ممكن اعرف ليش بس تباوعلي تضحك شنو قابل قرقوز واگف گبالك ترى والله ميصير
همام.. مسح وجهة بـ إيدة وسحب نفس قوي يجعلها ضحكة خير ان شاء الله
بتول.. بس باعوا الـ سوالفة عود يريد يعبرها علينا
لا عبالك ننسى الموضوع لا حبيبي تحلم
يلا شو راح نداوم وممحصلين منك شي بسرعةةة إيدك ع المليونين من باچر لازم نبدي نجهز للدوام
وها احسب حسابك ماكو طلعة العصر لأن لازم تظل يم بيبي خو متعوفها وحدها
همام.. والله حلوة هاي بعد ست بتول عندچ اوامر ثانية
بتول.. لا هذا كل العندي حالياً
عود اذا تذكرت شي اگولك يلا ناوشني الفلوس بسرعة
همام.. ولچ انطيني صبر دخل اصعد بالأول شبيچ چنچ عباس المستعجل
بتول.. حباب حباب هسة والله ادري بيك مو ثقة وتغلس
همام.. راح اعبرها الچ هالحچاية بس لأن منطيكم كلمة
باوعتلة تضحك واعتذرت
هوَ هم گام الغرفتة شوية ورجع بـ إيده الفلوس
ركضت بتول تلگتة بالدرج اخذت ملاتها تگمز من الفرح
اجة يمي مبتسم قدمهن الي
اخذتهن منة صافنة عليهن شنو هاي معقولة ذني ملاتي
بتول.. شكراً عمو والله انتَ احسن عم بالدنيا
- تتدللين ولو كلها مصالح بس ميخالف المهم النتيجة
حچاها وباوعلي ها شو انتِ ساكتة
حچيت ويا نفسي
هه شتريد يعني قابل اگولك انتَ احسن عم بالدنيا !!!
باوعت للفلوس مبتسمة شكراً
- بس ؟!!
- والله اليوم هذا الـ عندي
عود اذا تحب امدحك أكثر تعال باچر هيچ وقت علمود تسمع الباقي
- شنو هاي صايرة لسان ولچ دتصدميني
- غير البركة بيك
- شنو گلتي مسمعتچ ؟!!
- گتلك صح صايرة لسان بعد كبرت خو ما اظل فاهية
ما جاوبني التفت على التلفزيون يكمل الفلم
لهيت نفسي ويا بتول من الفرحة كل شوية نعيد حساب الفلوس وخديجة گاعدة تضحك علينا
قريب الـ 12 نعسوا
اخذت خديجة الحجية وراحن ينامن
گامت بتول سحبت الفلوس مني وصاحت رايحة وراح اخلي ذني جوة مخدتي بلكي للصبح يفرخن
ضحكنا اني وهمام عليها
ظل يباوع عشر دقايق وخلص الفلم
طفى التلفزيون يتثاوب لبس بـ رجلة وگام محتاجة شي
- شنو راح تنام
- اي
- شنو السالفة ليش هيچ تنامون من وقت چنكم دجاج
- ليش هسة شگد صارت الساعة
- بـ 12
- بـ 12 وتگولين بعد وقت
بعدين اني عندي دوام يعني وارية گعدة من الصبح مو مال سهر تدرين بنومي شگد ثگيل انتِ التتورطين
- ههههههه اي والله صح ديلا روح نام تصبح على خير
- وانتِ من أهل الخير
صعد الدرج وعيوني تتحرك ورى
احس بروحي اريد ابچي شديصير وياية وليش هالشكل مديفهم علية معقولة كل هذا وما وصلة حبي
باوعت داير مدايري ضايجة
ادري ليش گاعدة وحدچ مثل البومة متصعدين تنامين
گمت طفيت الضويات ورحت الـ غرفتي
ساعة واني الوب
هسة غير أنام ماكو شگد حاولت ولا غمضت عيني أخر شي گمت والله إلا اروح يمة وشيصير خل يصير
فتحت الباب وطلعت مترددة
عادي شكو بيها مراح اظل نايمة بصفة مثل المرة الفاتت لا بس احس بـ روحي نعست گبل ارجع الغرفتي
دخلت علي نايم والچرچف على عيونة
شلون حظ وكتك هسة تغطي وجهك شلون راح اشوفك ها كلة من ورى ضوة الحديقة هذا
تقربت منة بـ هدوء صارلة ساعة اكيد هسة بسابع نومة
مديت إيدي ع الچرچف
داسحبة من وجهة فز من الخرعة وگعت ليورة عدل على ميز الچرباية انرگعت بـ راسي رگعة تسوة العمر
- الله الله هاي شبيچ يمعودة شجاچ ليش اخترعتي
- اااخ راسي يموتني
- طبعاً غير انرگع بحافة الميز شو تعالي اشوف اخاف لا سامح الله صارلچ شي لأن الضربة قوية
حچاها وسحبني علي حتى يشوف راسي
بسرعة غمضت
وجهي صار بـ نص صدرة حسيتة متقصد يعذني ورغم هذا راضية بـ عذابه وعلى گلبي احلى من العسل
سحبت نفس من عطرة وضحكت شنو هالوگعة يربي
فجأة ابتعد
باوعتلة وفركت راسي شنو طلع دم شو كلش يوجعني
- لا لتخافين كل شي ما بي
بس حاچيني شجابچ لهنا توني نايم وفززتيني بجيتچ
- باوعتلة مرتبكة يلا طيبة شوفيلچ حجة على السريع
- ها شبيچ
- خفت
- من شنو خفتي عمي ؟!!
- مدري سمعت اصوات واجيت اگعدك تشوف مصدرها
- ظلي هنا خل اروح اشوف اكو شي صدگ لو يتراولچ
حچاها وطلع بقيت انتظرة بـ مكاني ضايجة
لشوكت اظل اتحجج حتى اشوفه يعني شنو راح يظل هالشكل بلا احساس مو والله موتني
- دقيقتين ورجع للغرفة يضحك كل شي ماكو بالبيت
- بس اني متأكدة سمعت صوت من جوة
- يمعودة البيت فارغ حتى جوة نزلت اخاف دتحلمين
- والله حلم علم اني بعد مستحيل اگدر أنام وحدي
- طيبة بشرفچ نعسان ووراية دوام جوزي من سوالفچ
- وشنو هنَّ سوالفي ؟!!
على العموم اسفة ع الازعاج الظاهر مچان لازم اگعدك
ردت اطلع لزمني من زندي حيل
- تعالي لتزعلين احچي شرايدة تنامين هنا عادي نامي
- لا والله هيَّ بس هاي العايزة اني أنام بغرفة الاء الحية
- استغفر الله رب العالمين واتوب اليه
زين حل ثاني وأخير اجي اني أنام بـ غرفتچ اعترضي
- لا ليش اعترض بالعكس هيچ راح ابطل خوف وأنام
- يلا امشي بس نفس ما اريد لأن وراية دوام سمعتي
- صدگ چذب تتدلل
حچيتها وطلعت قبلة گلبي يرگص على ايقاع الأنتصار
جبتك للدرب حبيبي شعبالك لعد
دخلت للغرفة طب وراية وسد الباب راد يسحب المندر اخذتة منه وين نام ع الچرباية هذا مكاني
- شنو هاي ؟!!
- اي لسة أنام ع المندر شسوي بعد احب هالنومة كلش
- براحتچ
حچاها وتمدد ع الچرباية طفي الضوة بسرعة خل ننام
طفيتة وتمددت بالگاع عيوني علي بسرعة غمض
ادري ليش ما حبني مثل ما حبيته
شنو بيه محلو حتى ميتقبلني مرة الة قابل الاء عشتو احلى مني لو احسن مني وقبل يتزوجها
لو بيها أمل عادي انتظرة والله
بس المصيبة اذا صدگ يعتبرني مثل بتول هيچ معناها مراح يفكر بيه مرة حتى لو متت گدامة بالحب
غفيت واني الأفكار تلف وتدور بـ راسي مثل الدولاب
فزيت على صوت المنبه
گمت اطفي لحظة المنبه مو هيچ دگتة هذا اتصال ؟!!
باوعت للجهاز رقم غريب !!
ما لحگت اشيلة فصل الخط بعدني صافنة ع الشاشـة اجت رسالة رد الله يخليك والله الأمر ضروري
الأسلوب مو مال رياجيل شنو معقولة هاي بنية ؟!!
عزة غير أموووت
گلبي ظل يدگ خوف رحت گعدتة بالگوة فز گوم عااد ديتصلون بيك رد وخلصني موبايلك مديسكت
- منو
- انتَ اعرف والله اني شدراني
- واني شمعرفني مو گدامچ تونـي گعدت وعلى إيدچ
حچاها وسحب الموبايل من إيدي
بعده ما فاتحة رجع الرقم يدگ رد بسرعة الو نعم منو حضرتچ ؟!!
ظليت واگفة اريد افهم السالفة
ظل يسمع الها شوية وگال ادري من وين حصلتي الرقم
- فجأة سد الخط عالم فارغة من الصبح استغفر الله
گام للحمام ظلت عيوني ع الموبايل
منو هاي مبين تعرفه
اي اكيد وإلا ليش گال الها منين حصلتي الرقم يبوووو ناقصة اني هوَ من غير شي الأحساس عنده صفر
طلعت ملابسه خليتهن ع الچرباية ونزلت اسويلة ريوگ
شوية ونزل گعد ياكل باستعجال
گوة لزمت نفسي حتى لا اسألة رجع موبايلة يدگ حطة صامت وكمل أكلة
- عود ليش سويتة صامت
- وليش دتسألين ؟!!
- لا بس يعني اخاف يتصلون بيك من الشغل أو اتصال ثاني ضروري ومتحس ميصير يظل صامت
- لا ميظل
هسة دايخ لأن توني گاعد من النوم شوية وارجعة عام
ما حچيت ظليت اشتغل بالمطبخ الهي نفسي
شوية وگام غسل
دارتب الميز شفت موبايلة دگ نفس الرقم فتحت الخط ورفعتة على أذني بس ما حچيت چان تگول
- همام الله يخليك جابوني ليش دتسد الخط بـ وجهي
گبل سديت الخط ورجعت الموبايل للميز
شنو يعني هاي تعرفة
گالتلة همام يربي بس لا عندة علاقة قديمة بيها
عزة العزاچ طيبة اخاف چانت عايزة التمت استلمي يلا
اجة اخذ الغراض من المطبخ وسلم وراح
ظليت طول اليوم الوب
مالي خلگ حتى احچي وياهم بالبيت
أخر شي قررت اتصل علي صح ما عندي حجة للأتصال بس اكيد تدبر ساعتها المهم اسمع صوته وارتاح
همام.. بالطريق ورجعت البنية تدگ علية
هيَّ تگول على اساس اني قبل فترة محقق بـ قضية تخص أخوها
بس منين جابت رقمي وشلون تعرفني هذا الما فهمته
وصلت للمقر وبديت اشتغل والأتصالات مستمرة
صالح واگف يمي دنحقق ويا المتهمين
شوية وگال جهازك سيدي يدگ شنو مگاعد تسمعه ؟!!
- اسمع صالح اسمع
رفعت راسي اسأل المتهم رجع يدگ اعصابي تلفت
لزمت الرقم حظرتة رغم اكره هالأساليب
ماكو ثواني ورجعت تتصل رفعتة بدون ما اباوع للرقم هااااا شرايدة الخاطرررر الله
طيبة.. ليش دتصيح توني دگيت عليك ؟!!
همام.. فركت وجهي بـ إيدي هاي انتِ اسف مو عليچ
- لعد عليمن منو هاي الدتصيح عليها وتوهمت بية !!!
- تردين شي عمي
ترى العالم واگفة فوگ راسي منتظرين شغلهم يخلص
- لا سلامتك
حچتها وسدت الخط حتى ما سلمت
خلصت الشغل الجوة إيدي شوية ودخل مخلد ها يول
- هلا حبيبي تعال استريح شلونك
- عوف الشلونك وهم يالله تنفذ وعدك الي كافي بعد
همام.. طبعاً بعد حادث اختطاف بتول مباشرتاً اجاني مخلد وطلب إيدها مني
بوقتها ما قبلت والاسباب چانت هواي
بس أهم سببين دراستها والسبب الثاني وضعها النفسي اللي تأزم بعد الحادثة بشكل جبرني اراجع بيها دكتور
كلش انقهر لا حتى زعل مني
بحيث ظل فترة مثگل وجهة ويايه وميمر للمكتب بس عذرتة اعرف هو حب يساعدها لكن حقه ميدري بالوضع
اشهر مرت ع الحادث ومخلد متغير علية بشكل
فد يوم صارلي شغل بعد الدوام
فـ اضطريت ادز علي واطلب منة يرجع البنات بمكاني
ما گال شي الرجال
راح ورجع فتح الموضوع وياية مرة ثانية
فهمتة الوضع بالبداية حتى يترك هالزعل بعدين وعدته أقبل بس كون يأجل الموضوع البعد السادس ما اريد بتول تتأثر دراستها بسبب ارتباطها بي
وهذا هوَ اليوم اجاني حتى انفذ الوعد ما بي يصبر
- شرايد مخلد من الأخير
- اريد اتزوج يا أخي
حس بيه ولتظل تسويلي صغيرة ومدري شنو
البنية كبرت ودخلت للجامعة شتريد أكثر من هذا بعد
- لحظة بس خل اذكرك بـ شغلة
مو انت الچنت تگول مخبل اتزوج وأورط نفسي مثلك شو اشوفك غيرت رأيك بسرعة لا فوگاها مستعجل على هالورطة
- ليش تجبرني اچفص بمصارينك خليني ساكت أحسن
- بلا اچفص اريد اسمع جواب السؤالي
- حبيت يا أخي لا مو بس حبيت اموت عليها وداعتك
- رفعت السويچ ضربتة بي يلا لك گوم لا ابتلي بيك
- مو گتلك راح اچفص انتَ اصريت إلا تسمع الجواب
- والله ما ارتاحلك شلون تريد ازوجك بت أخوية
- ليش يابة مترتاحلي
شنو شايفني بطل العرگ بـ إيدي وافتر
لو يوميا طالع تبياتة ويا وحده شكل بـ الشقق المشبوهة
- ههههههه شو صاير كلش شدعوة گالبها جديات ولك
- لا صدگ همام اني جدي بالموضوع
اترجاك وافق وخليني ادز الأهل كافي خلصت حججك
- واذا ما وافقت
- اخطفها وأبن أمك وأبوك اذا گدرت تلگالنا طريق بعد
- ههههههههه لا عمي كل شي ولا الخطف
موافق بس انتظرني انطيها خبر واذا گالت أي دز الأهل
- روح يا أخي الله يزوجك
- ههههههههه الله يطيح حظك على هالدعوة
- ههههه رايح اكمل شغلي وانتظر جوابك وإلا متخلص
طيبة.. من رد علية بنترة عرفت بعدها تتصل بي
ما احچي عن حالتي شصارت
للظهر اجة همام صعد غير ملابسة ونزل حط الموبايل ع الميز وگعد بصف الحجية صبينا الغدة بسرعة
تغدينا ولملمنا المطبخ بعدنا نشتغل صاحنا همام
رحنا نركض
گال اذكر وصيتوني على هدية بس الظاهر بعد متردوها
بتول.. لا عمو شنو منريدها
بس والله كسرت خاطرنا تونة قاطيك بمليونين خطية
ابتسم ومد إيده انطانا علاگتين تفضلوا هديتكم
اخذناهن منه بـ فرحة
ما صدگنا جاب الموبايلات لا وحديثات كلش مبين هسة نازلات باوعتلة وضحكت الله يجننننن
بتول.. شكراً عمو والله كلش فرحتنا دهاك بوسة چبيرة
حچتها وباستة حيل
ظليت اباوع عليهم واضحك رفع عينه علية اشحنوهن ساعتين كاملات حتى البطارية لتضعف
واكو خطوط بالعلاگة كل وحده تاخذ رقم اثنينهن بيهن رصيد بعد شتردون
طيبة.. عاشت إيدك وشكراً هواي
حچيتها وركضت اشحنة كلش فرحانة بالجهاز
للعصر طلعنا نجهز للدوام
مخلينا شي يعتب علينا ما اشترينا حتى خديجة تعبت
چنت مجمعة 500 من مصروفي اخذتهن وياية احتياط
دخلنا بواحد من المولات صار محل ذهب بوجهي
باوعت علي ليش ما اشتري شي بـ هالفلوس مو احسن من الملابس التفتت الخديجة عمة
- ها بطة
- تدرين اني چنت اجمع من المصرف وصار عندي 500
- سباعية والله هيچ النسوان المعدلة
- شكراً عمة
بس شنو رأيچ لو اشتري بيهن محبس البسة بالدوام
- عفية عليچ ومو واحد نشتري اثنين
- شلون ميكفن الفلوس
- شگد تعتازين اني اچمل عليهن حبيبتي مو مشكلة
- لا عمة والله ميصير
- امشي ولچ اعتبريهن هدية نجاحچ وما اريد اعتراض
بنص العالم بستها حيل والله اموت على هالمرة
دخلنا للمحل واشترينا محبسين
فوگ فلوسي خلت 150 ألف يلا كفن طرت فرح بيهن
رجعت للبيت ما اشوف گدامي
هم ملابس هم ذهب واخيراً عشتِ مثل العالم طيبة
دينزل همام الغراض صاح شنو هاي ولچن مشتريات كل بغداد
بتول.. لا عمو هاي نص بغداد
للأسف فلوسنا مكفت حتى نشتريها كلها يلا ع الجايات
همام.. همزين ما كفت والله
دخلهن للبيت وصعد الغرفتة يبدل
طول ما نزل صليت وكملت وهوَ ماكو وين صار
ظليت رايحة راجعة
شوية ونزل لزم الريمونت يگلب بالتلفزيون عفتة ورحت الخديجة انطيتها موبايلي سجلي رقمچ عمة
سجلت رقمها ورقم الحجية
اخذتة منها ورجعت الـ همام قدمتة الة الووو هاك الزم
- شنو هذا ؟!!
- موبايلي اريد رقمك اكتبة هنا
اخذة مني سجلة ديكتب الأسم صحت لا اني احفظة
- على راحتچ
سحبتة من إيده
كتبت على حبيبي وضميت الجهاز بجيبي حتى اساعد خديجة بالعشى خطية واگفة بالمطبخ وحدها
ساعة وخلصنا كل شي
گاعدين بالصالة نباوع تلفزيون دگ جهاز همام
اخذة من الميز باوع للشاشة فصل الخط توة ديرجعـة دگ مرة ثانية رجع رفضة
بعدة بـ إيده اجت رسالة ع الخط
بس قراها گام صعد الـ غرفتة عزة لو اگول انجلطت هم كلش قليل ع الشعور الحسيتة بـ گلبي ساعتها
أول مرة اعرف الغيرة مرض خبيث
ميرتاح اذا مياكل بالجسم شوية شوية بحيث ما ادري شنو اليوجعني بالضبط گلبي راسي بطني ؟!!
متحملت اظل بـ مكاني بعد
گدام الكل صعدت حتى لو انتبهوا عادي شسويلهم
فتحت باب الغرفة دخلت ورگعتها بـ كل قوتي
التفت علية مصدوم باوعتلة بخزرة ونترت بسرعة همام هسة اريد توضحلي شگاعد يصير هنا......
يتبع
لتنسووون ⭐⭐⭐⭐⭐⭐
كل الحب ❤🥀